［人工得返四份一］昨日明報經濟版，最多人睇就係呢篇文

1. 登登登登，隆重推介呢篇文。講我搞移民台灣嘅種種。明報文，昨日出，所以我今日先貼。反正亦免費。Link在此，（https://bit.ly/3gwlZdB），最底下我都會貼全文。

2. 咁文中講過嘅不再全部重覆。但想講啲場外花絮。

3. 首先，呢篇文收視係好好嘅，昨日係明報經濟版網上第一。仲要其實我未在呢度貼出嚟的。問返朋友，佢話可能因為上一期個主角係三哥個仔（https://fbook.cc/3BgR），講兩萬蚊人工可以買樓娶老婆，一般讀者就冇乜代入感了。但我呢啲比較真實個案，素人，大家投入到。

4. 留意，其實個訪問好長，好似講咗成粒鐘，我係唔知邊啲部份會出街的（＊）。記者朋友本身我都識，當普通傾計咁，結果佢好詫異我居然成個鐘一句粗口都冇講過！話「早知拍段片出街啦」。即係原本其實怕我講到一半太興奮爆粗，雖然唔係直播，但總不能「嘟」咗佢嘛。

5. 我覺得，篇文咁好反應，除咗時機（但其實訪問係七一之前做的），主要係因為個題起得好。先頭部隊固然正，但最重要都係：忠告你，金融人或只「搵得番四分一」。呢個真係一個好好嘅bite

6. 四分一呢個概念，你見我講台灣嘅文必講。仲咁啱大約就係台幣對港紙嘅匯率。我唔止一次識得在港嘅台灣金融行家講，返台灣？人工不變，不過由港幣變台幣。

7. 真的，之前貼過我同事（其實係姐妹公司），台灣女仔，反服貿訪問（https://bit.ly/2VPlKCs），不介意公開自己收入（當然因為高就唔介意），香港就年薪百萬港紙，台灣就百萬台幣都冇。

8. 其他行業可能折讓冇咁多（你搵到的話），但金融業，真係四份一係magic number。冇法，香港就金融業發達，台灣就金融業較弱，一來一回，好係嘢。咁其他工種可能好啲，但，可能都係三份一咁上下？

9. 所以，我就認為，文中有講，香港人「係台灣返工唔係一個Option」，我真係冇乜見香港人走去打工。一係就退休金或有樓收租食過世，一係就可以在台灣做香港嘅freelance收香港客香港錢。創業嘅，就梗係香港人「三寶」：茶餐廳、燒味店、咖啡店。但，固然唔少執笠，最慘係，賺錢嘅，識個朋友間嘢賺到三四皮嘢港紙，但做到PK，朝七晚十星期一至星期七，畀你班文青嚟打卡小確幸匠人精神。咁不如返香港打工算啦。

10. 當然有啲人，我地稱之為　鄧小平粉絲，係包拗項，又會話唏我有個朋友在台灣搵幾十萬港紙個月，唏我個朋友點點點。唔拗，大家都知鄧小平係煙鏟但好長命。但我講in general，我做台資公司時，睇埋啲高層嘅人工（上市公司嘛，邊有咁多秘密），亦見到台灣同香港比，真係四份一都未必有。

11. 另外，你見有個移民開支表（好似網上版睇唔到，我在comment貼），講用咗30萬港紙—原來好多人見到話平！我想講，我已經用得多。要更平都得。原來真係好多人誤解咗，你台灣嗰600萬台幣，係開公司，唔係食咗你的。你搞掂晒護照（當然我唔會叫你一搞掂就執笠），然後公司結業，係可以拎得返大部份。

12. 點解我話我已經係用得多？首先有6皮嘢畀咗移民顧問。固然我都建議你搵，但以前真係亦有唔少人自己搞。係慳返錢的，你諗你。另外，由我地開始搞到埃汾太辭工過去到開業，都用咗啲時間。有啲人係可以好快手的。仲有，我係有租實體舖，亦有請兼職員工—就係用錢買certainty，我間公司完全四正，有實店有貨賣有請當地人，移民官冇可能質疑到我。咁有啲人唔租舖唔請人嘅，又係你諗你（但而家好似唔得了）。

13. 記者朋友仲有問到，「幾時先走」。實在有少少敏感，你想像下我老細見到會點諗？但本人都係選擇光明呂樂，照買。咪且戰且走，在香港有得撈，有份接受到嘅工咪留多陣。冇人要嘅，咪收工走人。

14. 記者朋友話，咁土生土長香港人，在香港金融圈，仲有冇得發圍？冇嘅，睇你點睇。鬼頭年代一樣係冇得你發圍，就係鬼頭執包伏，大陸佬又未玩熟，中間大約有十幾廿年，係香港土炮嘅黃金年代—「亦即係地產霸權年代」。我04年先做銀行，中資添。06年先做股票，當時已經好多中資，就睇你點走位咯。＼

15. 但，唔好有口話人冇口話自己。咁你同廿年前三十年前比，土炮當然更加暗淡。唔講政治都好，都話我舊公司啲煙腸，個個中文又好過我，英文都好過我！又勤力過我！但人工係我N份一。優勝劣敗啫，睇你點走位，老咗唔夠人爆，咪踢法經濟啲，食腦。再講白啲，四十幾歲人仲日日開個Excel砌model玩macro玩VBA咩，唔夠人鬥的。「但我識吹水」。咁睇你想做乜咯，你要好巴閉嘅，係難啲。但我又唔係要點巴閉做CEO做乜，搵餐晏仔，一年去幾次日本食幾次米芝蓮供層樓之類，總走到位。當然你唔順超人，就另一回事。

16. 另外有朋友睇咗，話我批評台灣喎。實情你見我都唔少批評台灣。例如文入話「人治」—喂咁的確係咁喎，你睇台灣移民審批，極不透明。永遠都只係傳：呢期乜乜乜專業收，呢期乜乜乜行業唔收，呢期非香港出世嘅全部落閘—但永遠唔話你知。

17. 咁當然，去人地度梗係跟人地玩法。但我亦只係實話實說，我咪跟你玩法，搵移民顧問—其實有冇諗過，呢啲咪rent seeking！（＊＊）．真喎，你全部跟制度嘅地方，邊使咁多呢啲乜乜顧問？你見啲腐敗國家（唔係講台灣），咪最多人幫你填form呀教你寫野呀咁咯

18. 況且，幾時都係身體最誠實。你見我成日話台灣，但我都係選擇會搬去住嘛。梗有好處，爭在未必係你估嘅好處。天地良心，埃汾係BNO持有人，我仲要係好多年前已經拎返再續（咁中間係有停過嘅，我在英國回港後，4年先再去旅行），夠晒忠心。但我完全冇諗過走去英國—即使，天地良心客觀睇，我在英國搵到工嘅機會，一定大過台灣—甚至計及在我台灣減一大截人工添。如果我在英國肯拎台灣咁人工，應該好易搵到。始終英國亦係金融業發達，當年出trip都見唔少黃皮膚人睇返亞洲股票　—　「但你要嘈話做唔到最大粒嗰個就隨你」

19. 最後一樣講，你見成日話台灣經濟唔好。但經濟唔好先係好！對外來人嘅好。台灣經濟好就唔得嚟畀你咁爽過去做皇帝啦下話。香港經濟夠好，但你問香港人係咪受惠到？係咪開心？

20. 當然，亦都好睇你在人生咩階段。正如你搵男女朋友就搵件刺激嘅，但搵老婆老公就唔好咁刺激。你要搏殺要上位要搵食嘅，在台灣死得，香港梗係搵錢好。但台灣就生活好。

21. 咁如何在台灣又可以生活好？就梗係，搵香港錢在台灣洗啦！就靠你地啦！收費專欄好快重出江湖！而家玩住收費短片先！

22. 最最最底有明報篇文全文。或者你開link睇又得 （https://bit.ly/3gwlZdB）。

（＊）我發現好多人以為記者會畀份稿公司／受訪人睇先出街。答案係唔會的，基本嘅行規或守則。你要指指點點嘅，就自己賣廣告或開個記者會咯。不過我在唔同公司都見有不同嘅人，用啲不同嘅濕鳩借口去叫人畀份稿佢睇咗先（例如「想確保啲嘢冇錯啫」），我都話，香港人，係從來唔尊重其他人嘅專業的。我就唔係悍衡新聞自由乜柒，但我尊重記者朋友嘅慣常做法，而唔會用香港人例牌嘅：「拿新聞嘅嘢我唔識啦，不過我覺得呢……」

（＊＊）而唔少人真係以為rent seeking就係租間屋畀人。不過咩係rent seeking都有啲深，但到見到嗰時，你就明白。呢度嘅例子，你移民要搵顧問嘅，就好大機會佢地係rent seeking嘅行業。你諗下當中幾多油水幾多勾當？

——————————————————————————————
收費短片第二擊，暫時斷次買。80蚊，講足半個鐘，有圖有表有筆記。
都係一周思考課題，當然唔會就咁報新聞呃錢，係講有乜啟示。
影片簡介：https://bit.ly/2ZILRwf　
或者睇置頂 post都得：https://fbook.cc/3BRq
講銀行加按息係咪睇淡樓市，美股有冇泡沫，奧地利發100年債券有乜啟示。
仲講樓，講埋Growth vs Value．

以下係報名方法：

【最新李聲揚收費影片】股市係咪真係太貴? 要買究竟邊隻係抵?
*影片下方會有內容撮要，唔想睇片可以睇字
影片/課程編號：CC003
播放平台：https://homebloggerhk.com/web-class-player/
付款及收看步驟：
1/點擊報名收看 [ 影片/課程編號：CC003 ]
2/利用信用卡網上付款
3/及後有登入資料可以立即收看
查詢：whatsapp 63832145

----------------------------------------------------------------------------------------

分析員李聲揚擬移台 忠告：金融人或只「搵得番四分一」

「港區國安法」由提案到實施不過一個多月，香港似乎重演80年移民潮，搬錢、撤資成為中產熱話。已「半邊身」移台的金融人李聲揚直言「細個好鍾意香港，但環境愈來愈擠迫」，故自2014年由太太做「先頭部隊」著手移民台灣，並在兩年前取得護照。不過，他忠告想移民台灣的香港人或金融人需有心理準備，因為隨時「搵到工都得番香港三分一或四分一」。

目前李聲揚暫未計劃正式動身去坐「移民監」，作為金融人，他坦言全因香港賺錢易，「係台灣返工唔係一個Option（選項）」，因為香港經濟遠比台灣好，「重災區」金融業對比更是強烈，「人工完全係天同地比」。但土生港人在香港金融圈還有機會嗎？他說，香港金融業在外資離開、中資未到時，亦曾有港人黃金時代，「但我入行時已經係好多中資，所以（最終）都係睇香港人識唔識走位」。

香港金融人「最緊要識走位」

不少人因為喜歡到台灣旅遊而決定移民台灣，但李聲揚坦言，與太太行動前卻並無到過台灣多少次。他說，下決心關鍵源於2014年台灣取消「存款移民」，即港澳人士不可再用「敘造定期存款500萬新台幣（約131.6萬港元）滿一年」為由申請長期居留，現已改為需投資移民600萬元新台幣（約151.9萬港元）開設公司，兼有經營繳稅紀錄才可申請居留權。

李聲揚有感當時移台人士有增無減，相信門檻定會逐步收緊，因此「快快手、聽完移民講座」就在2014年底決定由太太先行一步搞移台手續。他指出，相信不少港人與自己一樣，開初是「諗多過做」，因為就算在台經營香港人「三寶」茶餐廳、燒味店、咖啡店，「都係過癮，但要賺錢唔係咁易」。

他認為，移台港人除退休人士或剛入職場、薪水較低的年輕人外，與他同齡或背景的人、三十多歲已結婚生子、或在港有資產的都要考慮更多，他以自己為例，「（本來）兩公婆都返工，移民就要有其中一位辭工，所以多數係在台灣較難搵到同類工作、又或者人工較低嗰個去」。

寧願多付點成本 找移民顧問代辦
縱然台灣門檻較低，但李聲揚與太太仍決定選擇成本較高但較方便的途徑，以約6萬港元聘用移民顧問，皆因他覺得台灣「人治的特質比較高」，「其他國家移民係好似剔點心紙咁計分，但台灣就不一樣，像專才移民，就無好清楚透明話邊啲行業高分低分」，因此需要聘請移民顧問教路或提供門路。

他說，與太太到台灣投資移民時，就嘗試揣摩當局的諗法，因此不考慮經營網店，改為經移民顧問開設實體時裝店，並聘請兼職員工，「好聽係創造就業，又交稅，唔係過去爭飯食、爭工返、爭福利」，令審批更易。他又指出，移台有很多文件手續，需到不同政府部門、銀行等「敲門」，自己處理的話可能要不時親身到台灣，但移民顧問則會代辦各類事宜，因此他寧願多付一點成本，但可節省回不少時間。

談到他覺得台灣吸引的地方，「所有嘢都好抵，但正因為經濟唔好先係咁宜居」，又笑言「好得意，香港經濟係好，但香港人又係咪開心？又係咪受惠到？都真係未必。」

「（留在）香港的代價就係人工高、人多又逼，無咩人情味、樓又貴啲。」他說。

[是去是留系列之二]