《無異之局》守護者之死（三） 「阿揚……」我聽完唔單止冇清晰到，反而仲多咗疑問，「……時間守衡者？」 「算喇，複雜嘅嘢先擺到最後，簡單嚟講我係無二嘅朋友，」阿揚回應：「仲應承過佢會盡我所能救返你。」 「救返我……」我腦海閃過頭先上的士之後發生嘅事，一陣噁心感頓時湧上喉嚨，「……到底係咩事？」 「不如等在下嚟說明喇。」回應嘅居然係老查，「等揚兄你可以專心做自己嘢。」 「其實可以做嘅已經做咗……不過確實係由你講好啲，始終我都唔係接觸咗你哋嘅世界好耐。」阿揚禮貌咁講。 「阿聰，喺解釋之前……我要稍微確認下你嘅記憶。」老查接住講：「你講返我哋喺倉庫分開之後發生嘅事，簡短就得喇……因為我哋要爭取時間。」 爭取時間？雖然唔明係咩意思，但我都係照回答： 「嗰陣域少突破咗無二整嘅結界，仲將我打暈……醒返就已經喺『城寨』嘅牢房裡面，之後仲見到董炎本人……」 我再用幾句說話概括咁講完牢房嘅經歷──見到堂哥、神秘人出現救我、喺天台知道當年大戰嘅事、最後俾佢一掌打返出結界外面…… 「……到我坐上的士，司機突然成個人唔郁，然後附近就出現咗一個女人……佢戴住帽同口罩……話係……代替狄陀嚟處置我……」 「哎喲，竟然係狄陀嘅手下，咁睇嚟成件事真係越嚟越耐人尋味啦。」老查聽到呢度回應。 「之後嘅事我就好模糊……」 「好啦，其實聽完都確認唔到董炎有冇做過咩手腳……無二老弟呢個要求真係強人所難。」老查無奈咁講：「唔理有冇住先……總之，你喺『城寨』外面俾人襲擊，一枝差唔多10cm嘅長針直穿心臟……」 🔽閱讀全文，入去前用幾秒俾 like 同分享下呀： https://www.patreon.com/posts/56135756 －－－－－－－－－－－－－－－－－ 老人物未見多年，經已脫胎換骨。 之後係雙線發展。 #無異之初 #無異之地 各大書局熱賣中。 －－－－－－－－－－－－－－－－－