【龔成問答信箱】（Q20681-Q20700）

Q20681：

龔sir, 你好
1. 記得之前你教我計算股票的息率係派息➗現時股價✖️100% = 現時股票的應有息率

2. 見到你推介Facebook 的人現時應同時長線持有新經熱及舊經濟股，但係你之前同我講新經濟股不適合我,因為我重有6年退休,

但問題係為何唔應該在這幾年持有20%或以下新經濟股較好呢，咁可以同經濟增長同步？
感激不盡

龔成老師：

1）公式正確。

2）如果你就退休，就不適合你。加上你的性格保守，我認為新經濟股對你唔太適合，始終這類股較為波動，你見最近股市大上大落，部分新經濟股從股價高位跌了3成，你可以想象當中的波動。

如果你認為自己能承受風險，投資10%-15%都可以的。

如果不懂選股，就安碩恒生科技（3067），有長線投資價值。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂至略貴，因此，這刻不能大注投資。最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

------------------------------------------------

Q20682：

龔sir, 手上帶2269，6098，8083，9988，近期跌左好多

想問加息會吾會令高估值股票持續下跌？另外REITs處於低位，應否開始建倉， 如405

龔成老師︰

加息會對企業估值，造成一定影響。但我地分析一隻股票時，除左息口，更重要係佢本身質素。

中國有贊（8083）集團主要於中國從事經營電商業務及支付服務業務，業務分類如下：

（１）電子商貿：透過電商品牌「有贊」提供各種有關虛擬批發及零售之線上及線下解決方案及服務，如「有
贊微商城」

以有「有贊零售」等ＳａａＳ軟體產品及人才服務、面向開發者的「有贊雲」ＰａａＳ雲服務、面向品牌商的「有贊推廣」與「有贊分銷」、以及面向消費者的「有贊精選」與「有贊微小店」。

（２）第三方支付服務。

（３）一鳴神州：提供第三方支付系統解決方案及銷售綜合智能銷售點裝置。

（４）一般貿易。

近年業務發展快速，生意增長力，不過，現時估值高，業務變化較，整體有好大的不確定性。加上佢過往在核數師報告出現過「保留意見」，盤數可能有古怪，雖然已是數年前的事，但都會扣分。

佢不是無潛力，但風險較高，這刻投資值博率不高。

其餘3隻都有質素，唔洗太在意中短期波動，長線持有就可以。

不過要留意，你持有的股，不少都是近期有炒作的，即是之前價位都貴，其實唔應該持有太多。如果你貨好多，可能要減。

現時不少本地REITs，都處於合理區中下部，係有一定吸引力。但佢地主要係收息用，增長力唔高。若你係年青至中年人士，就唔建議買太多這類股票。

------------------------------------------------

Q20683：

老師點睇1478呀？
有貨者好冇繼續持有呢？

龔成老師：

丘鈦科技（1478）這股之前好波動，其實呢隻股本身唔算差，前景不過不失，但市場估值的變化就相當大，當企業有不同的消息，都會對股價有一定的影響。

佢雖然有技術，但賺錢能力相當不穩。當環境逆轉，手機市場轉弱，這企業就成為較大影響的企業。

整體來說，不過不失，波動是這股最大的風險。如果你持貨太多，宜減。但如果不多，長線是無問題的。

------------------------------------------------

Q20684：

阿sir.. 我本身係一個文職，人工$16000蚊，老公收入$18500左右，有一層自住，供左2年幾，每月供樓$8000，請工人姐姐$4700

有一個小朋友，就讀小學

哩兩筆錢係固定支出，未計家庭洗費同水電煤，生活費等，由於兩個人收入都不多，積蓄只有10萬，每月尾幾乎月月清，可儲既錢都唔多，哩兩年遇到社運同疫情，我都無加到人工

一直停留，令到我想轉行去做保險經紀，做一份多勞多得既人，但我朋友唔多，保險一開始都係做自己身邊既人，我又怕開唔到單

我無份穩定既收入，因為我老公份糧，唔足以支撐屋企支出，我應該要點做，轉唔轉去做保險經紀，而家係人生交叉點，你可唔可以比d意見我

龔成老師：

長遠，你地的確要開發新的收入來源。

保險經紀係其中一個方法，但不是唯一的方法。

你應該更闊去想，怎樣增加收入，例如一些小生意、網上收入等等，最初可能只是副業，希望日後能化成正職，提高總收入。

至於保險經紀，要睇你份人本身的特質，如果本身性格主動、積極，就算這刻朋友唔多，其實都有機會發展的，你可以向一些從事這行的朋友了解下。

思維會闊少少，想不同的可能性，唔好太快出現限制思維。

------------------------------------------------

Q20685：

阿sir,941 可以長線投資嗎？現價在合理區嗎
1313 在9.92的貨是否也可以長揸

其實我都明白你講嘅長線投資道理但有時真係會因為啲價位上落波動而擔心

龔成老師：

中移動（0941）不是無質素的，5G雖然對佢有正面影響，不過，中國政府希望相關費用不會太貴，令資訊流通更好便利，所以，對佢的賺錢能力方面，未必能帶來突破性的增長。

可視佢為收息股，增長力不算強，這股有長線投資價值。現價合理。

華潤水泥控股（1313）本身有質素的，不過業務就較有波動，佢過往的盈利數據上落都大，因此股價的變大亦會較大。

佢之前公布的中期業績，業務有回落情況。長遠計，房屋、基建發展等因素，都會利好水泥股。因此長遠是正面，但就要留意股價上落會較大，自己要注碼上控制，如果你持貨不多，無問題，長線就得。

長線投資，最重要就是睇企業，減少睇股價。比亞迪（1211）我持有了12年，都試過由$88跌落$12，之後先慢慢上翻去，中間經歷好多年，最重要是「企業」，平常心睇股價。

------------------------------------------------

Q20686：

龔sir，地產板塊係唔係時機,同埋邊一隻會好啲

3081到合理價位未?
1810又回到咩位先合理

如我先可買一隻買邊隻先會好啲
之前聽完你講3067已經慢慢收集,已經好好

龔成老師：

現時地產股價合理，可以投資，作為財富組合的其中一部分。恆基（0012）合理的。

價值黃金（3081）算是合理區頂。

小米（1810）有潛力的，佢的產品性價比高，相信在全球好多個國家都會有市場，佢長遠只會進一步增長。

同時，佢建立的平台是佢長遠的增長動力，先賣手機，再利用手機的平台延伸銷售小米家電。長遠正面的。

這股可長線，不過現價唔平，去翻$22以下合理，最好都$24先投資會較穩健。

恆生科指ETF（3067）以慢慢收貨模式是最好的，因為長遠不差，但經常貴，所以要慢慢分注收貨。

------------------------------------------------

Q20687：

龔sir, 黎緊月尾, 我會辭職返內地一段時間, 未必可以留意到個市況. 我消化左你之前比我既建議,

選擇左一個月供組合（盈富$3000+中生$1000）. 因為暫停收入, 但又唔想停止增加資產, 所以注碼較少. 想問下你覺得可唔可行？

龔成老師：

其實股市根本不用成日睇，我地只要睇「企業」就得，不是「股價」。

如果你這刻無收入，就要睇你的現金是否足夠，如果有現金，保持月供或減少金額去供，可以。

------------------------------------------------

Q20688：

龔成老師，我而家月入5萬左右
月儲兩萬多。

有啲積蓄，但係近期股市波動令我損失左差唔多7-8萬
我可以做啲咩嚟對沖風險？
同埋點部署之後嘅投資？

現時持股
6060 眾安在線 10000 股

龔成老師：

最重要不是睇「賺蝕」，不是睇「買入價」，而是睇質素。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

眾安（6060），業務都有發展力的，但業務仍有不確定性。佢最近開始由虧轉盈，反映之前的投資開始有收成，暫時睇是正面的，但之後的發展仍有未知，這一定會令股價波動。

佢做這類互聯網保險公司，的確有潛力，同時背後有支持，所以有發展，這部分產生了「概念價值」。

現時市值有部分是概念價值，而這個價值值多少錢，其實無人知，市場對這價值的看法不一，同時經常改變，所以令股價大上大落。

初步睇，企業有發展力的，不過風險同時存在，因此唔建議太大注投資，這股都可考慮長線持有的。現價勉強合理區頂。

這股如貨不多，可守。但你不能只集中在一隻股票的。

------------------------------------------------

Q20689：

Hello啊Sir，拜師左你一年，睇左你既書同上左你既堂，對自己係選股上有好大幫助。成個組合跟左你之後都有10-14%升幅。多謝你

不過我發覺自己仍然有兩大問題，希望啊Sir可以比啲意見。

1. 我每日都會不斷開個app睇，明知股價唔重要，但都會係咁睇，搞到心情會有影響。我係一個長線投資者，對選擇左既公司好有信心唔會放。但係我定左每年都要投入新資金擴大成個組合，所以其中一個原因成日睇app係怕錯過適合既買入價，驚因為自己睇漏咗而入唔反。

2. 我現有組合目標既股票都已有貨。但每次為自己訂左下一次既買入價，好多時候都會心急，驚唔會跌落個個價位而早入左。

呢兩個問題困擾左我好耐，我覺得要提升投資能力一定要克服呢兩個問題，好希望老師可以指導我。除左心理調整仲有冇其他實際方法解決

我現有組合共15隻，市值$170萬左右:
3, 27, 66, 788, 823, 1177, 1299, 1448, 1810, 1928, 2382, 2800
3067, 3319, 9988

龔成老師：

1）強烈建議你刪去個app。

你唔會因為睇少左股價而錯過左某些位，反而可以更冷靜去分析。

例如股價$100以下是平，當你見到佢由$300跌到$200，你由於每日睇股價，你已經會忍唔住入貨，但如果不常睇股價，反而更有耐性去等，到最後可能股價跌到$80，你先發現，到時先入貨。

雖然，有時真的會錯過某些價位，但總體計，好處一定比壞處多。

2）你要制定一套更有效的買賣策略，要自己強制去跟。

一年只比自己最多買5隻股票（我平均一年是1、2隻），要自己睇到好準先出手。

現時組合，基本上都是優質股，其實方向無問題，而是你的心態及投資策略有改進空間。

------------------------------------------------

Q20690：

老師 對之前美國債息有什麼看法，我手上的科技股 跌超過40% 我應該止蝕嗎

還是繼續持有 都是9911 3738 ，其實我是想長線持有 但這次波動有點怕 我心有點慌

龔成老師：

我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

所以，如果你同一股，佔組合比例太多，你配置就出了問題。

赤子城科技（9911）主要從事開發一系列移動應用程式、健身應用程式、遊戲應用程式等。佢長遠有發展的。

業務上，係有吸引力的，但就仍未算好穩定，盈利上落較大，但長遠增長力是有的，加上業務規模細，發展力強，不過風險都會有。質素中等。

這股不宜持有太多。如果你貨多宜減持。

阜博集團（3738）是較高風險類。

業務是線上視頻內容保護服務供應商，客戶包括七大全球電影公司、電視網絡公司及其他內容擁有者。

過往一直虧損，近年開始有錢賺，業務增長加快，不過，本身的獨特性不是好強，規模未算好大，因此，未見佢有好確定的優勢。

潛力度有的，不過就存有較有不確定性，這類股只適合小注投資。

------------------------------------------------

Q20691：

老師你好..想請問下我35蚊入左1558

之後8蚊入左3662

再 6.5入左552 但全部都輸緊好多 我應該點部署好

龔成老師：

東陽光藥（1558）不是零質素，但業務有少少轉弱。

佢係一家專注於在抗病毒、內分泌、心血管、抗腫瘤等疾病的製藥企業，是東陽光集團旗下的國內製劑平台。

行業及企業長遠仍有增長。但企業都有少少風險，加上2019年發行4億美元可轉換債券後，令負債增加不少，都會令佢扣分。

現時回歸合理價值，這股都可長線投資，但業務都有少少風險，因此唔可以太大注。

你有貨可守，但唔好加注。

奧園健康（3662）由中國奧園（3883）分拆上市，主要在中國從事物業管理服務及商業運營服務。

例如提供住宅及非住宅物業管理服務（安保、清潔、園藝、維修與維護服務）等，業務穩定，現金流不差，但上市年期不算耐，以及現價合理區中上部。

這股前景是正面的，但平貴問題則要小心，同時不建議太大注。這股可守，除非你持貨太多，就要減。

中國通信服務（0552）仍是有質素的公司，不過增長力弱左。

佢中國電信（0728）的子公司，是中國一家具領導地位的服務供應商，為信息化領域提供一體化支撐服務。

主要客戶包括國內電信運營商客戶，以及政府機構、行業客戶、中小企業等國內非運營商集團客戶，亦有海外客戶。業務範圍包括電信基建服務、信息技術設施管理維護、軟件開發及系統支撐、增值服務及其他。

見佢近期的業務有下跌情況，增長力弱左，相信中短期仍未必好，長遠來說，算是平穩型，收息可以，不過就唔好對股價有太大期望。現價合理。

相信你的投資時機出左問題，不懂分析企業價值，在貴的時候買入，建議你提高企業估值方面的知識。又或日後買股，用月供模式進行。

------------------------------------------------

Q20692：

老師
目前我持有01299 / 01810/ 02800， 亦有做月供股票 ，00027 只有月供。另外我有用保險單做儲蓄。

如果我按以上組合，我需要再分散投資嗎？

龔成老師：

持有的都是有質素的股票，可以長線投資。

建議你在月供股票，加入盈富（2800），可以更有效平衡你的組合。

長遠，你應再加多幾隻股，總股數去到5-10隻會較適合（當然，不能胡亂分散，要選優質股）。

如果你較年輕，可承受風險，就加入安碩恒生科技（3067），有長線投資價值。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂至略貴，因此，這刻不能大注投資。最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

------------------------------------------------

Q20693：

龔成老師，我手上持左幾隻股，都坐艇中啊，所以要揾你求救睇下要點處理

327 係8.88有10000股
1093係8.84有10000
1137係15.1有20000

1478係16.32有5000
1929係11.38有2000
9988係262.8有500
想睇下我要點部署，無限感激！

龔成老師︰

你要了解一件事，就算再優質企業，中短期股價都會有機會波動。原因不一定是本質出問題，可以係一些與其本質無關的因素。只要長線質素無變，中短期波動我地唔需要理會，長線持有就可以。

這些股票都有質素，係可以長線持有，但想你留意翻以下3隻企業。

百富環球（0327）和丘鈦科技（1478）質素較中等，只宜小注。

香港電視（1137）業務有前景，但有兩點存有風險的。

第一，佢都會依靠人的因素，王維基成為了公司最值錢的資產，佢的想法好多，有生意頭腦，但我對這類太依靠個人的企業，不建議太過大注。

第二，這企業現時搞網購，有增長力的，但同時存有一定的未知數。疫情過後的增長力會否減慢？另外就是估值方面，我都好難講這刻的估值。投資係可以，但同樣不建議大注。

------------------------------------------------

Q20694：

老師，想問中國海洋石油都潛力嗎？

咁2314 現價入係未合理價範圍？

龔成老師：

中國海洋石油（0883）雖然質素都算有，但不是最高質類別，佢對油價較為敏感。

雖然佢都有一定的規模，但卻不是最高質素的企業，這是由於佢的產品自主力較弱。

石油是商品，當中沒有差異性，佢地要將石油賣出，只能跟國際油價，這令佢地處於被動狀態。沒有價格自主的能力，這令佢地的獨特性有限。這類商品企業，都可投資，但就要明白不是最高質的企業。

由於質素中等，唔建議大注投資，但相信油價上翻佢會上升的。

理文造紙（2314）主要從事生產及貿易原紙、木漿及衛生紙產品。本質不算差，但又唔算係好好。

過往的生意，雖然都有增長，但不算強，同時近年有回落情況，現價合理的，投資價值都算有，但又唔值得投資太多。

整體的投資價值，可算是中等，買入收下息都可以，但就唔好對股價有太大期望。

------------------------------------------------

Q20695：

你好龔sir！175.520.636.968.1177.1810.3067.6993以上都高位入。什麼價位可再加注呢？

還是不加注等市再跌買1211.388.什麼價位可買？以上股票可以長缐投資？阿Sir點看謝謝你感恩

龔成老師：

上述的股票，選股無問題，但如果買入價都在高位，反映你在把握投資時機、企業估值上，技巧不足，要強化這方面。

另外，你唔好心急加注，大市波動，等跌多D先，唔好急。

至於比亞迪（1211）、港交所（0388），仍貴，建議月供好了。港交所跌多1成可考慮小注。

------------------------------------------------

Q20696：

你好，我持有：
62/2018瑞聲入左2000股
175/6618京健入左200股
13.5/1789愛康入左4000股
我應該点做好

龔成老師：

其實持股不是無質素，不過買入價都處貴。

瑞聲科技（2018）不差的，本身有一定的規模與技術，長遠發展正面，不過，佢增長力不是好強，只能視為平穩增長類別。

現價合理，長線持有。

京東健康（6618）由京東（9618）分折出來京東健康，將會來港上市。這股可長線。

質素上，京東健康是有的。但由於估值難，不確定性大，同時經常貴，這股你小注較好，不要心急加注。

愛康醫療（1789）本身不是無質素的，只是之前炒作太多。

這股經常處於少少貴的水平，這是最大風險，就算現時，都成30倍市盈率。

睇翻最近情況，自2018年「4＋7帶量採購」開始後，令醫療材料開始降價，降幅基本在50%左右，甚至更高，預計未來3年帶量採購在醫用耗材領域會持續，會常態化，影響佢的賺錢能力。

從長遠發展，這股仍是正面，但就算現價仍唔平。你這股小注持有就好了，不要心急加注。

暫時都可守住先。
但有心理準備會較波動。

------------------------------------------------

Q20697：

今次大鍋！股市近期回左唔少，救下我應該點處理
快手 500股 $400
華虹半導體 2000股$60
京東 500股 $412
心動2000股$90
龍源 10000股 $14.5
阿里 1000股$302
現在怎麼算？蝕$250000

龔成老師：

其實你上述持股，不是無質素，但你集中在新經濟股及近一年熱炒類別，這是最大的風險！

加上你的買入價，全部都是貴，反映你有核心的投資問題。

第一，選股問題，你應該建議更平衡組合，你之後應加入盈富（2800）。

第二，買入時機，相信你會在最好短期利好消息，大市最好氣氛時投資。而這時卻是最貴的！

至於現時的情況，由於你集中在新經濟類別，你最好在反映後，減持部分，持有現金或轉去盈富。

平衡翻組合風險後，餘下先慢慢守。

------------------------------------------------

Q20698：

阿sir你好，本人係做生意，分店有10多間，每月可動用流動現金有100萬，自住樓1，家族收租樓2，股票知識0，只跟風20蚊買左2000股Tilray

準備投資50-100萬做其他行業生意/買股票，投資年期4-5年，目標每月賺5-10萬，回本期一年至年半，目標投資回報400-500萬，請問股票/生意邊樣會較穩定認識目標

龔成老師：

你應該建立一個更平衡的財富組合：生意、物業、股票。

所以，現時你應該用資金，投資股票。當然，股票的回報，未必及你投資資金做生意，但相對地，優質股的風險都較少。同時可以助你建立一個平衡的財富組合。

投資股票，我地最重要是建立一個長期的「股票組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。長線持有。

你可以投資「平穩增值股」，暫時唔好投資「潛力股」，因為潛力股要求你有一定知識。

暫時可動用$20萬-$40萬。

平穩增長股：考慮盈富（2800）。

另外再加：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

現時大市波動，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q20699：

丫sir，我都在人生交叉口
可以點

我在做梗一份不喜歡的工作
這個工作時間合約是10至7，一天
有萬六，其他時間要扮工

一天我實際工作的時間是兩至3小時， 其餘時間有做副業，正職穩定，但要經常扮在工作中
副業主要是做銷售大概可以有2萬3萬左右

我有2個小朋友，老公剛失業
他現在批法自己生產的食品
因為我經常都在街上

我都會幫他順便做銷售
你認為我辭掉穩定的工作好嗎？
有時覺得穩定工作好似仲限制咗自己

但疫情下
又怕失去穩定
我應該如何是好？

龔成老師：

你在長遠計，辭工是最好的。

你現時副業有發展，甚至可以你地二人合作發展，從長遠角度，這是大方向，一定最適合你地的。

問題只是時機。

如果你地現時現金較少，較擔心，就暫時唔好辭住，你要盡力儲錢，等你有足夠的現金，就辭工

如果你現時有一定現金，就可辭工。

------------------------------------------------

Q20700：

老師你好，想問問關於買樓事宜，假設我和女朋友想買樓，在價值觀大前提下，用一個人名，之後用一個做擔保

理論上可以做到九成按揭，但感覺上對另外一個層樓冇名但同樣要比錢及月供好像不公平，但如果用聯名去買，會安心d

但之後再買樓時又用唔到首次置業，請問如這程況，應該如何處理比較適合？

另外想問如用了首次置業，是可以自住，但如果想出租是否違法？可有其他途經放租又安全嗎？

龔成老師：

正路來說，用一個人名會較好的，因為有名可以日後有機會買多一層。

雖然表面上唔公平，但根據過往的法庭案例，只要佢都有持續供樓，其實到時打官私都有機會二人平分的。

當然，如果好想聯名先較安心，都可以的，到日後有需要，其實可以比錢上律師樓去搞拆名。

至於首置，可照放租的。

只是金管局定明，5成以上按揭不能放租的。（當然，坊間有部分人仍會9成按放租的，但當然有風險，你可自行上網找多D資料，這裡不便講太多）。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q20301-Q20320）

Q20301：

你好，龔成sir。我由幾年前開始接觸你嘅投資方法同投資理念，到近半年揾到一份穩定嘅工作，開始親身嘗試。我真係覺得呢個方法好適合我。

呢幾日我睇完你出的《百萬富翁2》。令我對自己的自信增加唔少。我都俾自己一個都幾難嘅目標，就係4年儲第一個一百萬。我會好努力咁達成佢。

最後有啲問題想問，就係點樣最基本咁揾到倍升股？同埋點樣初步計算合理價位頂部中部同低部？

我知道呢啲係你嘅授課內容，當中嘅答案應該好複雜同埋含金量好高。但係我真心想係短時間內學識同應用。
Ps. 如果唔肯答我都理解的

龔成老師：

你有明確目標十分好，這是成功的重要一步，之後就要落實去做，執行目標。加油！

至於倍升股，你可以睇《股票勝經》，有你具體要的答案。首先要選股，然後要有投資時機。

選股，我地會以「分析企業」的角度去，選取優質，有潛力的企業要計企業的價值，要考慮企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。

例如，我地會考慮佢有多少生意，有多少盈利、現金流，有多少資產，從而計算該業務值多少錢，同時會推算將來的盈利情況。

如果要深入計算，基本上要好仔細的研究企業，要分析好多財務數據用比率，先至有較完整的答案。

我由十幾年前開始，每個星期都會分析一間公司，平均用6小時，即是一年分析50間，然後只會選1、2間去投資。

你會見到，要選中股，就要大量分析，小心投資。

同時，兩等待最好的投資時機才出手，就能成就倍升股。

------------------------------------------------

Q20302：

想問你意見，我5千股6823,4千股939,低位揸左好多年，當時諗住用來收息

如果現各放一半用d錢來買當炒股值博率高d, 你點睇？

龔成老師︰

香港電訊（6823）和建行（0939）主要係收息，唔會有太大增長力。如果你係較年長，或者係好保守架投資者，這2隻股票係適合你。

但若果你係較年青，這2隻股票會拖低你財富增長力，不宜持有太多。

長線計，你需要將大部份持股，慢慢換碼至一些較有增長力股票。但緊記，唔係做短炒，而係要長線持有。

------------------------------------------------

Q20303：

龔成老師，你好呀！想問一下708恆大汽車（現價$51.5）及6666恆大物業 （現價$16.48）前景如何？

現價合理嗎？
謝謝

龔成老師︰

恒大汽車（0708）雖然可能有潛力，但風險高，佢資金投入的確強，大力發展新能源車，但這些仍未有賣產品真正的實力，長遠能帶動多少收入，未知。

由於仍有好多未知數，而股價已經大升左好多（比半年前），因此，這刻要自己衡量風險。

可能佢真的有潛力，但連基本的銷售銷售都未有，我地作為投資者，就好難分析，只可以話佢股價會大上大落。

恒大物業（6666）其實都有質素，有長線投資價值。

佢係物業管理服務運營商，佢係中國物業服務百強企業中，以項目所覆蓋城市數目計，佢排名第二，如果以總收入、總毛利及總淨利潤計，排名第三。

類別為中高端住宅物業、寫字樓及商用物業，並已訂約管理其他物業類型如主題樂園、產業園、康養項目、特色小鎮及學校等。

佢絕大部分物業管理服務收入，來自集團控股股東恒大集（3333）所開發物業提供的服務。不過，現價唔平，要等有明顯回調才入貨，會較好，或小注好了。

上述兩股，我會較建議恆大物業，不過這刻不能太大注投資。

------------------------------------------------

Q20304：

龔成老師，你好⋯⋯本人今年30歲，有穩定職業，單身，以前唔係好識投資幾年前買了以下的股票

（有一些是3-4買前買、有一些是上年買的），主要是當收息用，有些是當增值股例如阿里巴巴（但買入價都不夠平）

帳面還是虧損，希望老師能夠在百忙之中指點迷津，應該如何處理以下股票，是否繼續持有，還是買出？

現持有股票：

1. 中國鐵建1186 - $10.7/500股
2. 中國銀行3988 - $2.98/1,000股
3. BOC HK 2388 - $35.4/1,000股
4. Yuexiu REIT 405- $3.97/2000股
5. 招商局港口144 - $14/4000股

6. 中電002- $87/500股
7. 778置富- 9.935/2000股
8. 香港電訊6823 - $10.84/ 1000股
9. 太古1972 - $19.5/400股
10. Alibaba 9988 - $281.5 / 300股
11. 中國移動941 - $40 / 500股

其實一直都有D想賣掉1-3的股票（因為買入價實在太貴，覺得好大機會升唔番上去）

而趁低價的時候換其他增值股例如1211或者穩定D嘅823 / 66，謝謝老師的提示和建議，感激不盡！

龔成老師︰

首先你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

另外，我地投資選股，都會睇年紀。由於你都算年青，應先做好增值，去累積財富。

持股當中，中行（3988）、越秀房產（0405）、置富（0778）、香港電訊（6823）、中國移動（0941）這類收息股，不宜持有太多。佢地有質素，但增長力唔高，會影響到你財富累積能力。

以下都是一些適合你架股票，你可以慢慢換碼。至於比亞迪（1211）太貴，唔好買住。或考慮月供2845。

平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、領展（0823）

潛力股︰安碩恒生科技（3067）、比亞迪（1211）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園（1448）。

留意，現時只有安碩恒生科技（3067）、阿里（9988）、中生製藥（1177）、福壽園（1448）勉強算在合理區頂部，可分注入貨。其餘都略貴，暫時不宜入貨。

------------------------------------------------

Q20305：

老師：177 幾多入比較好

港燈同中電 邊個好啲 幾多可入 唔該

龔成老師︰

江蘇寧滬高速（0177）業務穩定，但增長力不強，發展力唔強，只能視為收息股，唔好對股價有太大的期望。

現價計，己有5.5%以上股息率，已可以分注入貨。

中電（0002）和港燈（2638）都係唔錯架收息股，前者會有少少增長力，後者就會係穏定股息。2者現價都合理，可分注慢慢入貨。

------------------------------------------------

Q20306：

龔成老師你好，我現時33歲，有2個小朋友，月入19000，一直對投資方面零知識，最近停業中

想學習投資希望可以累積更多財富，想投資較平穩的，目標係每年收息8－10萬

1） 之前有留意你曾推介盈富基金，現時還值得購入嗎？如購入的話，購入一手還是月供較好？

2） 請問可以推介多幾隻收息潛力股嗎？

剛學投資，比較多問題想問，謝謝老師

龔成老師︰

1） 簡單來說，月供股票就是你每月將現金，買入某一隻或多隻股票，慢慢咁樣儲貨。

月供股票每月投入的金額相同，因此當股價上升時，買入的股數自然減少，而當股價下跌時，就自然會買入較多股數，如同自行調節一樣，去減低價格波動的風險。

其實一手手買都可以做到以上效果，你現金只要平均地慢慢投入股市（如保持住每月定額買一手）就可以。2個方法都可以，一手手買更節省了銀行月供收費，但你必需確保自已可以有自律性地進行。

盈富（2800）依然在合理水平，可分注入貨。

2） 我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

所以，以你現時人生階段，應該先做好增值部份，而唔係去收息。

策略上，你可以投資"平穏增長股" 和 "潛力股"。你先用每月5成儲蓄做月供，其餘先儲起，用一邊月供一邊儲蓄的策略。

選股上，你可以投資在平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、粵海（0270）、領展（0823）。

增長力較強的，可選安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園（1448）。但佢地波動性和風險會較高，你要自己平衡。

餘下的另一半現金，我地就等機會，當大市出現較大回調，就加大力度掃貨，然後作長線投資。

但由於你現時待業，建議先預留約半年基本開支，才開始投資計劃，咁會較穏當。

------------------------------------------------

Q20307：

老師你好，想問下493，772，1114前景如何🙏🏼🙏🏼

龔成老師︰

國美零售（0493）主要業務是在中國經營及管理電器及電子消費品零售門店網絡。

質素一般，近年生意完全無增長，更加出現虧損，持有的價值不高，賣出這股轉投其他股票，相信會有更好的長遠回報。

閱文集團（0772）這類股，並不易分析的，因為佢的生意模式未完全穩定，可說是有危有機，這一定令業務的不確定性較大，同時市場對佢的估值變化亦較高。

佢業務有增長力，現價唔平，要有明顯回調才可入貨。此股有潛力，可以投資，但不要太大注。

華晨中國（1114）有質素的，但中國車市放緩、外來競爭、行業競爭加劇，都成為不利的因素，相信中短期仍會對佢不利。

加上佢品牌的市場並不是行低端，這路線相對經濟的敏感度較高，經濟轉壞時，會有較大影響。

未來電動車將為汽車業帶來很大發展空間，但華晨在電動車方面技術和品牌暫時唔算太高。相比比亞迪（1211）和其他電動車企業，優勢唔算明顯，故對這部份唔好有過高期望。

股價現在合理，由於不確定性較大，不宜太大注。

------------------------------------------------

Q20308：

老師你好，本人35歲，與老公收入共有7萬，現金約有150萬，每月交2萬元租金

每月用一萬月供盈富，我們每月可另加一萬作其他投資

想問我們應該作怎樣的投資可做到更大回報？
謝謝你

龔成老師︰

除了盈富（2800），你應再加入一些"潛力股"，去提升增值能力。現時大市在合理區，你先用每月5成儲蓄做月供，其餘先儲起，用一邊月供一邊儲蓄的策略。

潛力股︰安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園（1448）。

餘下的另一半現金，我地就等機會。當大市出現較大回調，才加大力度掃貨，然後作長線投資。

如不懂選股，最好加入安碩恒生科技（3067），可長線。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂至略貴，因此，這刻不能大注投資。最好的策略，就是月供，或自行分注小注慢慢收貨（例如每月買一次、或2個月買可次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

------------------------------------------------

Q20309：

你好龔成老師
上年年中開始睇你Facebook
近來再睇埋五年買樓四步曲
先了解財富增值既重要
真係好後悔

做左10年野先儲得約40萬現金
雖然都有係保險公司做儲蓄計劃 不過完全幫唔到依一刻想買樓既目標
所以有d問題想請教一下

本人三十歲 係單親媽媽 家中仲有2老要照顧 雖然月入有50000

但家庭開支好大
扣埋保險交稅同個人開支
一個月目標儲到10000-15000

本身對投資零概念
上年年尾到現在有睇下股票既野
有試下買少少股票

暫時有
煤氣 1000股 11.8
長實 500 股43.9
I share安碩TEF 200股 19.8
不過因為完全唔識股票
又唔敢再入手

1）請問以上股票係咪可以繼續持有，仲應唔應該加注同點加？

2）我仲有考慮 希慎，是否應係疫情仲未過之前儘快入手？希慎前景如何？

另外舜宇光學又可否考慮？

3）我目標都想儘快儲到首期買600-800萬樓，但又要保留一定現金備家人不時之需，
老師建議我現在的現金儲備同每月儲蓄可以點分配投資？

龔成老師︰

1） 現有持股有質素，長線持有就可以。

2） + 3） 首先，"保險"只係理財中防守部份，買足夠保障就可以，增值可以留比優質資產（如優質股、物業等）去做。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

不論你是投資增值、儲錢買物業，還是想留一筆錢比家人都好，你都可以透過投資一些「平穩增值股」+「潛力股」去做。

不過，由於經驗不足，因此這刻不用急著投資，你可以入盈富（2800）先，未來有一定經驗，才加入下列股票。

平穩增值股：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）。

潛力股：安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177），但就要明白波動性比上述會高左，同時風險大左，你要自己平衡。

現時大市處合理區，你可以先用每月儲倒的一半資金投資，另一半就先儲起，等大跌市時才出手。

------------------------------------------------

Q20310：

龔成老師您好！我總覺得自己好懶同唔識分析，所以一直冇研究點投資。

最近突然係Facebook見到你既專頁，認真睇每一個post同留言，覺得你既意見都好詳細同行穩陣路線，所以打算試下學

我今年28歲，月入大概3萬2千左右，扣除開支每月約至少有1萬可儲。錢一直只放銀行冇特別理財，
大約有50萬左右。想請教下幾個問題:

1） 暫時計劃如下，請問會否太保守？:
- 月供$3000 2800 同 $3000 3067
- 放$10萬入投資戶口，用黎抽下新股或者買股

2） 早前抽中快手（1024）一手股，如果到$400係咪可以放？定建議佢作為我第一隻長揸既股票？

3）今日初試入市 $11時買入一手云想科技（2131），我見佢同快手、抖音有合作，
所以估計業務都好似前景唔錯。唔知我咁既判斷有冇錯呢？同呢隻適唔適合長揸？

4）月供請問如果係銀行（如hsbc, boc）等做好d? 定係自己係證券行戶口做好d?

龔成老師︰

1） 月供部份，適合你年紀。每月餘下$4000，就等大跌市才動用。

由於現時你係投資架黃金時期，如果50萬係閒錢，建議都動用來做增值。現時大市在合理區，可先用一半，分注入貨。餘下一半，同樣等大跌市機會。

以下都是一些適合你年紀架股票，比你參考下。

平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、領展（0823）

潛力股︰安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園（1448）。

但潛力股中，現時只有安碩恒生科技（3067）、阿里（9988）、中生製藥（1177）、福壽園（1448）勉強算在合理區頂部，可分注入貨，其餘都略貴，想買就要等一等。

2） 快手（1024）由於你只有一手，建議你長線持有較好。

3） 我地投資，唔單只要選優質股，定平貴都可重要，佢會影響你長線回報。

云想科技（2131）主營線上合約廣告服務，佢業務上都有可投資地方。但由於佢上市不久，現時數字只能參考，因為好多新股都要過一段時間才見真章，故投資時要保守些。

佢2019年盈利只有7000萬，市值郤近80億，明顯唔平，現時投資有一定風險。現貨可持有，但唔好再加注住。

4） 其實無所謂，睇下邊個收費平和方便你。

------------------------------------------------

Q20311：

阿sir,想問埋2400點睇？
見有同事炒，但我覺得呢隻好泡沫

龔成老師︰

短炒根本是無法賺錢，我之前做銀行、證券行多年，見證大量客短炒全部都蝕錢，只有長線才能有錢賺。所以，你唔好以短炒作為策略。

心動公司（2400）集團主要於中國、亞洲、北美洲、南美洲及澳大利亞開發和營運網上遊戲，網絡遊戲都為免費，收入主要來自銷售遊戲內的虛擬物品所產生。

集團同時也開發及營運付費遊戲，以及與第三方遊戲開發商合作發行及營運授權遊戲。

業務上，有吸引地方。不過，業務有點波動，只建議你小注，同時你要明白當中的風險。

------------------------------------------------

Q20312：

龔成你好，我冇意中留意到你既page知道你會幫人建議下投資邊隻股票。我係一個傷殘人士，靠依家既pt同津貼過生活，每月加埋有4-5千

想買一點唔太貴同短線投資既股票，希望你可以比一啲建議我。如果唔方便既都謝謝你

龔成老師：

我唔建議短炒的，因為根本好難賺錢，風險高。

以你的情況，反而建議你穩健D，投資平穩增長股，加少少收息股。

你可以考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

同時，你可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q20313：

老師
apple點睇？

龔成老師：

Apple（AAPL）有質素，無論持術、發展、品牌、銷售網絡都十分強，是可以長線持有的股票。

佢設計了各種各樣的消費電子設備，如智能手機（iPhone）、（iPad）、智慧手錶等。

而iPhone占蘋果總收入的大部分。另外，蘋果亦為客戶提供各種服務，亦是一些延伸的賺錢模式，如蘋果音樂、iCloud、蘋果電視、蘋果支付等。

由於已經發展得好大，因此，最高速增長期已過，之後會進入穩定的增長期。長遠的投資價值仍在，但要留意股價。近年大部分時間在合理區中上部至略貴的水平，如投資要分注，長線。

------------------------------------------------

Q20314：

如果對數字唔敏感⋯ 有咩書睇左可以對呢方便可以有進一步了解？

本人只係初哥⋯
之前聽朋友講 買入3988 現持有20000 股 平均價係$3

另有 1093 @8.9 *2000
1299 @ 89.9 * 400
6123 @ 8.8 * 6000
968 @ 19 * 2000

應該繼續持有 還是沽出？

龔成老師：

首先，我地最重要是建立一個長期的「財富組合」，要優質，要平衡，要適合你的年齡與風險承受程度，不同類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

另外，建議你睇《股票勝經》，適合入門者的。

至於你現時持有的股，都可以持有的，有質素，可長線。無問題。但要留意，6123、968、1093，股價上落會較大，你要注意相關風險。

------------------------------------------------

Q20315：

你好，我36歲，月薪34000，外幣，股票，現金，保險共一球

持有股票有：5 , 11 , 144 , 6886 , 2018 , 1810 ,6055 , 6969, 836 , 823 , 688 , 3988 ,想盡快儲到3，4球，有邊啲股票應該放棄，去轉買邊啲股票？

龔成老師：

我地理財，要攻守兼備，要平衡，保險在理財中都有一定作用，但不宜過多，至於外幣，不是真財富，因此唔建議持有太多。

至於股票，當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你36歲，財富仍有增長力，可投資「平穩增長股」+部分「潛力股」。

而上述的，0005、0011、0144、6886、3988，增長力都唔算強，你可以轉其他。

平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、粵海（0270）、領展（0823）。

另外，潛力股可考慮安碩恒生科技（3067），有長線投資價值。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂至略貴，因此，這刻不能大注投資。最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

------------------------------------------------

Q20316：

Hello 老師
想問下除咗買債外，仲可以做咩防守型投資？

龔成老師：

年金、銀行裡一些較低風險的投資產品，以及收息股，都可以。

你可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

------------------------------------------------

Q20317：

老師，我想唔通點解企業 自己rePurchase 返自己發行嘅 outstanding shares 係好的現象、而發行更多新股反應企業質素轉差？

公司回購返自己d股票意味著什麼？

龔成老師：

當我地分析時，最重要了解背後的目的，不能只睇一些表面因素。

企業買翻自己的股票，要睇下佢目的，有的只是為支持短期股價，有的則因為現金多，利用現金買購股票後註銷，減少總股數令每一股的價值增加，用這方法去提高股東們的利益。

有時當企業發行新股，股數增加會令股價下跌，但如果企業發行新股得到的資金，能有效利用，就能為企業帶來長期的價值。

------------------------------------------------

Q20318：

老師 我想買你的書 那一本是關於分析公司價值的？ 如果我是初學， 直接看那本書會有難度嗎？

龔成老師：

你可以睇《股票勝經》《年報勝經》，有少少教企業價值，巴菲特相關的書都可以睇，要計企業的價值，過程比較複雜，好難三言兩語就講到，就算在我的股票班，都要講5小時，裡面會講3種估值方法，有難有易，但同學都用到的。

簡單來說，你要考慮企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。

如果要深入計算，基本上要好仔細的研究企業，要分析好多財務數據用比率，先至有較完整的答案。

較具體教企業價值，會在股票班。

------------------------------------------------

Q20319：

老師，我和僱主都一齊有自願性供款，大家各供月薪的5％,其實是否有這個需要呢？

龔成老師：

自願供款扣稅強積金，有好有壞，好處是稅項的優惠，但要留意，佢都會有個上限。

如果你原本都是儲蓄投資，比起自己做，參加自願可扣稅，這的確是好處。

當然，都有壞處，首先是管理費，盈富（2800）的管理費只是0.1%，但坊間的強積金，就算是追蹤指數的基金，管理費都唔低，你要計下數睇下有無著數。

另外，你要到65歲先可以取到，靈活性會大減，因為你人生裡不同的階段，都可能會需要資金，而不一定等65先，所以，這方面你可以留意。但如果你本身都想這筆錢65歲作退休先用，咁都可以考慮。

------------------------------------------------

Q20320：

老師 現時25歲 月入6萬 都有草小小現金 諗住下年結婚 以前投資都淨係玩下Ibond同定期

想依家開始學 應該點樣入手好，謝謝

龔成老師：

坦白講，如果你資金要結婚用，就要保守一點，投資始終有風險。另外，投資股票要長期先有較理想的回報中短期只有不確定性，所以你要自己衡量相關風險。

你可以考慮一些平穩增長股，及收息股，風險相對會較低。

盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

記住，要控制注碼。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q14381-Q14400）

Q14381：

老師，我欠了信用卡及家人不少錢，但我又想做月供股票，增加資產，點算？

龔成老師：

首先，你一定要還左銀行的卡數先，因為這是較為高息的負債。

之後就是到家人的，如果家人是不用比息的，在理財角度，其實可以慢慢還，不過在家人的角度，這樣始終不太好。

所以，家人的錢，你點都要有「保持還款」的動作，至於每月點還，就你自己決定。

從累積財富角度，理論上，減慢還，將資金投資月供股票是較好的，但你一定要取平衡。

我會建議你想方法開源，增加收入，這是較有效處理你問題的方法，雖然會辛苦少少，但對你是最好的。

------------------------------------------------

Q14382：

老師，想問0144 招商局港口 前景如何？

另 香港電訊行業 總覺得搵唔到好多
6823現價 值得入？

另548深圳公路 升勢好勁 但見市盈市脹派息 都幾靚
想問有冇伏

龔成老師︰

招商局港口（0144）有一定的質素，不過，近年有關貿易的行業，賺錢能力低左，同埋風險大左。先講佢的基本面，佢係中國最大，世界領先的港口開發、投資和營運商，係中國沿海主要樞紐港建立了完善的港口網，並成功布局南亞、非洲、歐洲及地中海等地區。

佢有龐大的港口業務，於中國處領先地位，絕對有其優勢。不過，貿易因素受全球及中國經濟情況影響，將令業務出現略波動情況。

另外，股本回報率低，加上中國進入經濟增長較一般的年代，都令這企業的賺錢能力較一般，整體質素而言，算是中等。

過往股價一般般，長遠來說將平穩，股息則十分穩定，但增長有限，現價有投資價值，但貿易問題對佢股價有波動，分注較好，同時不建議大注。

香港電訊（6823）是業務穩定的股票，過往的派息比率達100%，絕對是典型的收息股。香港電訊擁有一定的優勢，而且市場結構對其有利，令企業的生意與盈利得以保障。

電訊行業高速發展的年代已過，智能手機爆炸式增長時代亦不再，即是這企業並不屬於高增長類型，而是收息類。現時股息率有6%，有長線投資價值。

深圳高速公路（0548），同樣是不錯的股票，收入主要來自公路路費。現時9成收入依靠路費收入，另外佢都有做環保事業，這部份會有增長潛力，現階段佔比重很低。預期此股長遠會由收息股，慢慢進化成平穏增長股。

現時股息率雖有逾7%，但要留意計算當中包含了上年特別股息，這股息並不一定每年都有。扣除特別息計，只有不足3.6%，長線投資價值一般。

------------------------------------------------

Q14383：

呀Sir,我想問下呢，每個月可以儲到兩萬蚊，咁用幾多成投資 ，萬3投資，7千蚊儲，咁岩唔岩？

龔成老師︰

恆指過往市盈率，約為8-24倍的水平，恆指在27500點，大約為11倍市盈率，算是處合理水平。

我建議你以50/50去分配資，先用$10000去作投資，月供或分注買入優質股。

餘下的$10000會先儲起，等大市大跌時才入市掃貨，咁做會較理想。

------------------------------------------------

Q14384：

想問月供股票,港交所,領展,港鐵邊隻較好?

龔成老師︰

港交所（0388）佢係香港唯一獲認可的證券市場及期貨市場，在香港有壟斷性優勢。盈利方面有保證，問題只是賺多與賺少。

領展（0823）有一定規模，坐擁不少優質商場。，現有一些商場，有提升潛力。再加上佢開始在海外尋找有潛力物業，預期由本地化進一步國際化，這都是潛力所在。

港鐵（0066）因為港鐵的獨特性好強，運輸+物業的模式，令佢處於穩賺的局面，可說是無競爭，因此長期月供好適合。

以上3隻都是平穏增長型股票，都是十分優質，當中港交所和港鐵較優秀。作為月供的話，3隻都適合。

------------------------------------------------

Q14385：

你認為恆大嘅債券值得買嗎？現價好吸引，派息高，但風險高嗎？謝謝你！

龔成老師︰

我不如先從佢的股票、股息方面講起。恒大（3333）剛公布派息，以現價計股息率達7%以上。

但你睇佢過去財務數據，雖然見到佢生意不差，企業有賺錢能力，但負債情況不理想，處於極高水平，令這企業存有風險。

對經濟好時，佢有賺錢能力。但經濟轉差，物業滯銷，資金鏈出現問題，後果可以好嚴重，所以投資此企業風險不輕。

你投資債券，比起股票，能有較早的償債次序，同時有穩定的利息回報，但你要留意，佢本身已經好多負債，風險已不低。因此，佢的債券不是無風險的，你不能以100%保本去分析。

如果你能承受風險，才可以買佢的債券，我相信佢出事的機會不大，但如果樓市逆轉，可以大件事。

------------------------------------------------

Q14386：

老師，想問點先睇到嗰隻股票係最低位最便宜才買？ 有時低處未算低 又或者一買就跌 我有好多呢啲經驗

龔成老師：

我地不是分析高低，而是計算平貴。

每間企業都有佢的企業價值，當中主要由資產價值與業務價值組成，計算後，比較現時股價，就知這刻平與貴。

不過，就算在平宜價買入，不代表不會跌，只是我地預期佢在長期，會回歸到企業價值，即是中短期可能會跌，但長期股價會趨向上。

------------------------------------------------

Q14387：

龔老師你好，我今年34歲，月入約3萬，一家4口住公屋，投資零經驗，有留意開你的投資分享，好想學習一下投資，希望老師可以俾一下意見。

扣除每月家庭正常開支1萬5千元，每月投資1萬，月儲5千元以備不時之需，希望15至20年時間後能達到收3萬元利息，這數字合理嗎？我應該怎樣部署？投資組合又應該如何 ？

謝謝老師解答

龔成老師︰

如果你希望20年後有3萬現金流，以5%股息率計，你要720萬資金。

策略上，你可以每月用$8000去做月供，其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富（2800）、金沙（1928）、恆基（0012）、中銀（2388）、港鐵（0066）、煤氣（0003）、港交所（388）、長建（1038）、粵海（0270）、領展（823）、深高速（0548）或潛力股︰比亞迪（1211），中生（1177）或福壽園（1448）等。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

以恆指過去年平均回報10%計（連股息再投資），你每月投資$15000，20年後大約會增值至1000萬，這樣安排相信很大機會達至你的財務目標。

------------------------------------------------

Q14388：

唉，我冇資金
完全唔知點計劃
資本主義社會

龔成老師：

對呀，第一步要有資金，所以十幾年前，我做銀行得$10000人工，由零開始，就係明白錢搵錢的道理，我用盡各種方法，儲本金。

一星期返7日工，正職與兼職，帶飯返工，唔亂洗錢。用盡方法，將儲到的錢用作投資，5年累積到第一個$100萬。

$100萬多嗎？
當然唔多！

但$100萬就係重要的初期本金，有資金有可以玩錢搵錢的遊戲，就有機會向上流，否則，打死$1萬工一世！

------------------------------------------------

Q14389：

你好..龔成
我32歲, 投資了股票有4年多.
現時持有大約30萬現金-月入17K,
扣除家用及日常開支,還有6K
另外, 持有以下股票
1398 $5.54 13000
883 $8.71 3000
788 $1.26 12000
405 $5.32 5000
3 $14.8 4000

1) 我應否進行月供股票?
看了很多資訊有關月供既好處及壞處
也明白平均成本法
價高 買入少 ; 價低 買入多
但如果股價不斷上升 不是等於買貴了?

又看到其他財經人一些看法
在低位時不敢買入, 到來升回又會後悔沒有做任何操作
反而, 月供就不用理會, 還可以令投資者感覺一下大市的高低

高時, 可以減持及減供款.. 股票變回大量資金,
低位時又可以加大供款, 將大量資金慢慢放回股票內.
我覺得這個看法很好.

2) 打算月供3000 盈富基金
其實我也不喜歡月供的感覺, 覺得全手買入,乾淨利落些.
但我在想如果我不斷儲現金,
有足夠資金再入市, 又要等一個合理價
這樣的時間值損耗, 不是會令我的回報下低及現金也會貶值?
所以我才想月供股票, 這個想法是否有誤?
簡單講我不想再防守..

3) 分注入市VS長期持有
假設, 已到了合理價, 或自己能承受的風險, 少注入市.
股價升值了,已有一定盈利,因為長期持有, 不想沽出
哪升值了的股價是否不宜再買入?
哪分注的定義,是否只適用於買入價以下才加注?-「溝淡」有可分別?

4) 可否評論一下我持有的股票成績如何? 謝謝

龔成老師：

1）要準確定義高低，其實是好難的，當年我做銀行時，見好多散戶在$15買入港交所（0388），但當去到當時歷史高位$20時，99%都賣出了。

你想想，應該點定高低？
如何用策略？

如果我地馬後砲以為自己足到，就會變得自以為是。

所以，我地應該用一套面的方法，第一，月供股票應該長期進行，只要供的是優質股就得，因為當企業價值向上時，就算你之後供的價高左少少，仍然是值得，而月供的好處，就是減少了人為的因素。

當然，你中間增加或減少金額是可以的，但我希望你唔好單單用「股價」去衡量，而是同時有「價值」的分析，這會更加全面。

2）唔好比「感覺」影響到你，投資者「理性」是最重要的。

我會比較建議你用「平貴」去衡量投資策略，現時大市處合理，你部分月供，同時留有部分的現金，等機會，是最好的方法。

「留現金等機會」都是長線投資中，增加回報的模式之一，你都要用。

3）永遠都是睇「平貴」，不是睇「高低」。

如果現價$1，企業價值$1，合理。

當股價由$1升到$2，而企業價值升到$3，雖然股價升左一倍，但卻是平貴左，我地不應賣，應該買。

另外決定我地是否加注的因素，是自己的投資組合。

記住，我地投資是「將現金轉為冷產組合」的一個過程，要著重各股票間的配置比例，建立一個平衡的組合。

4）基本不差，但工行（1398）增長力不強，未必最適合你的年齡。中海油（0883）只是商品企業，質素不是最高之列，因此不會佔組合的比例太多。

------------------------------------------------

Q14390：

老師
想請教你

我有間海外物業，仲有一年就要比125萬
兩年後再比埋最後125萬

我想問我現在我還應該買股票嗎
有50萬買左1177 ，在$10.72買入
有20萬買左175，在$15.5

另外有80萬係月供股票
我唔知應該在餘下一兩年間
應該點處理好
可以比意見我嗎

謝謝
其間，會努力工作的

龔成老師：

1年時間，是比較短的時間，2年時間，相可以叫做中長期。

所以，你這刻要集中，處理左1年時間去比的費用。

你要計翻現時有多少現金，與$125萬的差距是多少，同時，在支付這筆資金之前，你靠收入與儲蓄有多少。

如果不足的話，即是要賣出股票，那麼，你就唔好再投入資金入股市，而是睇下，應該賣出那些股票去套現。

賣出時，首先睇那些股票質素差，會賣出這些先（記住，唔好睇賺蝕），另外，下一個賣出的，是佔你的組合比例過多的類別。如果之後仍是選股賣出，就選這刻股價較貴的。

------------------------------------------------

Q14391：

老師您好，我今年26歲，月入5萬，我希望30歲可以有500萬資產，我應該要點部署？
投資方面我現在持有以下股票：

941 ---1500股，77.1
857----30000股，4.85
19----500股，75.8
823----500股，79
778-----6000股，8.92

788------70000股，1.71
2314-----10000股， 5.5
1211----500股，38
1398---10000股，5.89
1810----5000股，10.82

其實857同941我知道自己犯了錯，想溝淡所以入多左，不過放中長線我又吾擔心佢地升吾番上去嘅…只係機會成本嘅問題，令我買吾到其他更優質嘅股票。

另外我有一份10萬元嘅基金。

短期儲蓄方面我持有10萬元現金，同10萬元嘅定期存款，半年後到期。每月基本洗費6000蚊左右，其餘洗淨就會草起佢。

中長線黎講，我有兩份每年供2萬元嘅儲蓄保險，一份儲15年，另一份儲5年。仲有一份每年供2萬元嘅危疾以備不時之需。以上就係我嘅投資組合，請求老師賜教！

龔成老師：

基本上，你的財富組合，都能做到「攻守兼備」，有適當的保險及現金，以及備用現金，其實防守部分已足，餘下要好好進攻。

現時你持有的股票，基本上都有質素，都可以長線投資，記住，唔好因為買入價因素而加注，只有在平宜價（即在有較大投資值博率），以及這股，在你組合的比例仍想增加，先可以加注。

你現時26歲是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股則小注已可。

如果你想30歲有$500萬資產，你要好大力去做儲蓄先得，要大幅加強本金，這點十分重要。現時的$20萬現金，不要用。

你要一邊投資一邊儲現金，你要投資「平穩增值股」為主力，再加「潛力股」（所以要大幅增加你的投資知識），提升潛力股佔你的比例。利用每月儲到的資金，以分注模式投入股市。

現時大市處合理區，可以一邊投資一邊留現金，而餘下現金十分重要，如運用得好，將會大幅提高你的回報，你要好好等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q14392：

老師，我想請教一下你的心態，你年少的時候會否和身邊的朋友比較？

我相信很多人也會喜歡跟身邊的人去比較，但因着比較，我覺得很辛苦，老身常談的什麼不用和別人比較我做不到。

眼見一個朋友，她大我一年,19歲，她幫人補9個習，還有2份part time ,dse又考得好，讀緊survey,係專業工，而自己呢？

我明白應該視他人為學習對象嘛，但我一和她比較，便認為自己一無是處，沒有自尊自信可言，同時也沒動力去做好自己。

眼見人地19歲可能已經月入2,3萬而白己仲靠緊屋企，霎時覺得自己好似爛泥扶唔上炳咁，覺得好唔開心但又無動力去改變：（

龔成老師：

每個人都有自己的強項，所以根本無必要事事同人比較。

比較，有時我都會，但不會對我有影響，我通常會睇下佢有無我學習的地方，我明白，我有我的強項，佢有佢的強項，我無可能在所有範疇都精通，我只要做好自己，同時學習別人強項已得。

比較不是問題，但你要同時學識欣賞自己，你都有你的強項，這是你要發掘的地方。

例如，你見人地補習賺到錢，但人地同時的付出都好多，你願意付出嗎？如果你無這付出，回報不及別人都是正常。

如果你比較完，你感得人地好強，你想學習，你要做的「不是要覺得自己無用，而是要行動！」

你可以立刻想想，自己如果賺得更多，別人幫9個人補習，你會否行第一步，幫一個人補習？

你要做的是行動！

你首先要找自己的目標、強項，有能力做到那些事，下一步就是行動！行動最重要，那怕是小小一步，都十分動要！

你睇完我同你講呢翻說話後，希望你立刻，用紙筆，寫低自己的目標，計劃，貼在家中當眼位，然後行動！

------------------------------------------------

Q14393：

老師 我的投資目標是投資組合的回報能打敗大市，每年複息回報至少15%，而我的股票組合居然跑輸大市。

組合(12,27,388,1211,1177) 當中只有1177,27跑贏大市，388，12與大市持平，1211蝕17%

我在反思，追求高回報同時，一部分資金買入指數型etf係咪更好，因為事實證明我的投資實力未夠強，未足以打敗大市。

所以最近研究etf,的確etf是好好追蹤大市的工具，但有2點，令我一直不願意買etf。

1,費用比率，費用比率當然愈低愈好，即使己經好低，但長遠複息計，吞食投資者的回報亦愈來愈多。

2,沒有股東權益，一般買股票擁有投票權，能出席股東大會，而etf雖然持有實際股票，但只有基金公司擁有股東權益。

我的問題是，投資真是一門大學問，我不太喜歡etf,但我承認組合中持有etf能降低風險。我們投資者是否應該不理會自己意願，能一切對自己有利的選擇都要做？

即是我應該買etf來達到打敗大市的目標？雖然我不喜歡etf

龔成老師：

小心犯了一個錯！

我地投資，一定以長期計算，唔好以一年的回報，去衡量整個組合的價值。好多投資組合，特別是如果當中有潛力股，都要3年以上才能慢慢顯現價值，因此，回報一定是長期計，唔好睇中短期表現。

你上述的組合不差，保持持有就得。

1）所以要投資費用較低的基金，例如盈富（2800）每年的管理費只是0.1%，我相信是全港最平的。

2）對，基金是比人管理，是較被動的模式，有好有壞。

如果我地有選股的能力，就不必投資ETF。但對於好多散戶來講，投資ETF仍是較好的選擇。

其實，你可以部分投資ETF，部分自行選股，這已經是一個不錯的策略。

------------------------------------------------

Q14394：

你好成哥，follow左你兩年幾。我係2017年股票班同學仔。

好耐冇問問題請教你，自從上左你堂後，係投資 理財方面改變不少，依兩年連工作都有很大的改善，相信同個人思維有關，先感謝你既啟發。

今次想請教既係關放創業方面，其實一直想建立被動收入系統。

以前有開過店，亦有在網上做買賣，因正職問題都能夠好好去做，加上網店工作量頗大，一個人做衍生唔少客服問題。

依兩年都不斷同做生意朋友交流，發覺大部份都有獨特技能令盤生意做得住，草到舊客之餘又吸引到新客。

例如十分專業的網上營銷、IT知識去接project、專業攝影同拍片技巧、會計師、工程裝修等等…

反觀自己好似除左銷售都冇咩專長，而家online shop林立，透明度高，做網店競爭好大。又想做，又好多顧慮，應該點好

希望成哥可以指引下，謝謝你
但我確實已經想去發展副業，難得終於工作配合到

龔成老師：

每個人都有佢的強項，你唔需要太刻意同人比較，而且太過個人化，企業反而較大莊大，如果要搞大，反而唔好個人化，要系統化，麥當勞就是一例。

如果你過往有開過店，其實已有生意經驗，你會知道那些地方應該優化，當時的問題所在。如果當時已有穩定生意，只是工作量問題，其實一個兼職幫手，可能能解決問題。

當時你能夠有生意，即是你有爭取生意的能力，這已經是你的強項，你要做好這點，而客服問題，就交給員工去做，你自己就繼續找生意。

當然，現時網上競爭大，要開一門生意不易，但記住，你不是要「與別人比強項」，而是要「與別人比不同」，緊記！

生意的切入點，從來不是大家鬥強，這是無意義的，你要找出與別不同之處，獨特點，顧客能很易記得你的地方，專心做好一個類別，這是最重要的。你試試從獨有需求的方向去想想。

------------------------------------------------

Q14395：

老師我今年29歲，因做家族貿易生意，另上其他收入，平均一個月8萬，因未知中美貿易影響如何，有可能影響我。

因之前亂買股票及短炒輸接近百萬，現在重新出發我手上持有250萬現金，珠海物業約60萬。

日本樓兩層分別250萬及60萬價值每月收租進帳1萬3及25萬股票。

現打算將50萬再投入股市，請問有什麼可提議，我打算香港自己未來5年購入自住單位約800萬樓下的樓。

還有老師點睇珠海樓價，及本人睇好股票775 及173 作長遠投資。吾知老師點睇，謝謝

龔成老師：

記住，你一定要以「整體財富組合」的角度去分析，建議你以一個圓的模式，去寫低自己的資產分佈，各資產所佔的比例，你會好多野清楚好多。

唔好再做短炒，而是要以「建立財富組合」的模式去進行。

這刻你物業已足夠，不用太心急增持物業，否則會令你的比例過多。

另外，你這刻現金較多，應該將部分現金，以分注模式，轉為優質股，長期持有。

長江生命科技（0775）是潛力股，雖鰳都有投資價值，但這類股，不能佔組合太多，因此你只可以小注投資。

嘉華國際（0173）有質素，現時股價合理，可分注投資。

另外，建議你考慮盈富（2800）、銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）等，你可以了解下這些股票，然後從中選股。

記住，你不是炒賣，而是配置，買入優質股長線持有。

另外，以你的年齡，財富仍有一定的增值力，建議你多增加投資知識，在選股、企業估值、投資時機上落功夫，對你長遠財富有好大影響。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q14396：

龔sir，另外岩岩去完大陸返黎，見到路面上好多BYD既車...令我考慮緊好唔好入返d 比亞迪....但如果同時候持有比亞迪同吉利係咪好奇怪既組合？？？

始終佢地未來可能會成為左競爭對手，係咪應該選其一好d？

龔成老師：

中國車市中短期仍會較弱，不過，長遠仍是正面，加上比亞迪（1211）發展得不差，在外國都有好多歐洲國家，正試用佢的電動車，我相信佢的前景。因此這股有長線投資的價值。

至於吉利（0175），同樣是不差的股票，可長線投資。

其實，只要是優質股，而你又能了解與分析，就算同行，都可以一同持有，這可以有分散風險的作用。不過，同一行業不能佔你股票組合的比例太多，你只要用「比例」的角度分析就可以了，無論一隻還是三隻，概念都是一樣的。

你最好唔好佔股票組合過3成，這就無問題。

------------------------------------------------

Q14397：

老師你好，朗廷最近半年都跌左，請問現時入朗廷是否合理區？如果是，入10手會否太多？還是維持分注入較好？

本人見它派息穩定並較高息，考慮長線持有。
但亦矛盾於其業務沒有更大增長。
謝謝 老師

龔成老師：

朗廷（1270）是酒店類別的房託，雖然都有一些協議的租約，但始終都會受經濟週期的上落影響、遊客情況影響，因此在股價及股息上會較為波動。

香港的社會情況，對佢都有一定的影響，但我相信這只是中短期，這刻反而令佢有更大的投資值博率。

現時股息率去到8%，已反映香港的不利情況，有投資值博率，現價合理，分注投資可以。增長力不算強，你預佢平穩增長。

至於入多少，最主要睇你組合的比例，只要唔好過多比例就得，你要衡量這類股，應該佔你組合的比例多少，同時，同一隻股，佔組合比例不能太多。

------------------------------------------------

Q14398：

師兄,1951現價合理嗎
我見行業獨特 有興趣

龔成老師：

錦欣生殖（1951）本質不差的，長遠有增長力。

佢主要係中國及美國，透過合約安排從事經營及管理輔助生殖醫療機構，以提供輔助生殖服務、管理服務，以及輔助醫療服務。

佢的自有輔助生殖醫療機構，包括位於中國的成都西囡婦科醫院及深圳中山泌尿外科醫院，以及位於美國加利福尼亞州的３間ＨＲＣ　Ｍｅｄｉｃａｌ手術中心以及ＮｅｘＧｅｎｏｍｉｃｓ　ＰＧＳ實驗室。

佢過往的財務數據不差，生意與盈利都有不差的增長。

不過，佢上市年期不算長，加上佢現時市值去到$250億以上，就算佢盈利增長快速，相信佢接下來幾年，每年盈利都只會有幾億，以這作假設推算，佢現時的估值都幾貴。

如果你見佢有回落，先小注投資，之後再跌先入。

------------------------------------------------

Q14399：

龔sir，你好。
多謝你分享行之有效既理財知識及方法。我很喜歡看你寫的文章及聽Youtube的分享，極具建設性！謝謝

受龔sir鼓勵，本人由2020開始月供股票，希望獲得龔sir既指點

本人24歲，3年前開始做私人健身教練(Freelancer)，有自己既客(10-12個)，收入依舊很不穩定 月入介乎八千至一萬四之間。

另外，為增加競爭力，今年開始進修運動治療(大學生Yr3)，為期2-3年。

本人有開源節流的經驗，每月開支最多可減至二至三千元。來源方面：有幫中介公司教1-3個客，幸運的話會接到相關的教班合約 以增加收入，有必要時會做散工。

節流方面：懂得購入當季食材並自行煮野食，甚少娛樂/逛街，現時八成的客人都是在我居所附近，車程15mins內。

受到龔sir教的Time Value of Money、平均成本法及主動創作被動收入等理財概念所啟蒙，希望透過月供股票增加創業成本，用於畢業後的小生意上（與現有工作相關）。

現有後備生活金約3萬，可月存3千(男友給的生活資助金，存起以便他之後置業用），打算月供股票5千。若把5千全部供盈富(2800)適合嗎？

龔成老師：

首先，你方向正確，利用各種方法，去盡力開源節流，因為你這刻24歲，是累積財富的黃金年期，要盡全力做，之後才慢慢放鬆。

不過，你都要同時作出長期的提升，例如你進修運動治療，方向正確，但你要多想思考，進修與前途的相關性，尋找相關性較高的進修，亦要想方法提高你的身價。

你一天24小時，用盡都是有限數，因此，除了找更多客外，另一方法是提高你的身價，你要提高自己的形象及競爭力，這都是你長遠要發展的方向。

至於你現時的開源、節流，方向正確，保持做就得。這可以令你有更多的初期資金，能作出投資。

現金$3萬不要動用。月供$4000盈富（2800），可以的，如果你本身有其他心水股，就可以減$1000盈富，供該心水股，如無，就$4000供盈富。

以你的年齡，財富仍有一定的增值力，建議你多增加投資知識，在選股、企業估值、投資時機上落功夫，對你長遠財富有好大影響。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q14400：

我剛剛睇到「財務自由行」講借貸可以加速達到財務自由，我想知呀sir你08年/15年果時有冇曾經試過運用借貸去掃平貨。

其實係咪只要計算到股息足夠支付借款利息就可以好安全地建立更多資產？

龔成老師：

對，借貸是加速財富增長的方法，但有利有弊，因此要平衡運用，第一，要明白當中風險，第二，要控制好比例（財務自由行有講），第三，要有息差或時機。

我一向都有在物業方面運用，因為物業運用的風險較少。

至於股票方面，在2008年，我當時利用私人貸款，去盡力掃股票。最主要是因為當時股市大平賣，是盡力掃貨的時機，因此，是運用最後一張皇牌「借貸」的時機。

所以，不能為借而借，而是有機會才借，這點十分重要。

----------------------------------------------

多謝各位提問，若然你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網的，當然，會將發問者的身份，以及有關個人的部分刪去。

另外，由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。