【龔成問答信箱】（Q20061-Q20080）

Q20061：

老師那你覺得繼續持有外幣前景好嗎？
英鎊3萬多（12.8-12.9元買入）
澳元4萬多（7.2-8元買入）
再一次感謝您

老師晚安，另請問摩根亞洲總收益債券基金值得買嗎？

龔成老師︰

在投資的角度，外匯不是最好的投資項目，因為說到尾，這些都只是一些貨幣，即是「政府借據」，貨幣中期會以週期的模式運作，但長期來說，都是貶值收場，因為貨幣只有「交易價值」，並無真正的財富價值。

而我地進行財富增值時，應該集中將資金投放在真正的資產，如物業、車位、優質股等。

如果你外幣無實際用途，建議換回港幣去進行投資會較好。

另外債券其實只是「產品」，物業、優質股是「資產」，所以從財富本質上，我地應較集中持有「資產」，才對我地最有利（你可以睇睇《財務自由行》一書，我從財富本質上，講述了當中原理）。同時，現時息口低，但未來有機會重回加息週期，債券未必是最好的投資工具。

至於債券基金，坊間分好多種，你要小心睇，因為有d風險低，無乜問題，有d則有潛在的風險，絕對不是保本的產品，有機會出現了「賺息蝕價」的情況。

第一，有些基券基金，會投資「高收益債券」，即是「垃圾債券」，你一定要睇睇佢所佔的比率。

第二，債券基金往往不是單純地持有債券，而是可以作買賣，以及利用衍生工具作對沖等策略，即是可能有價格上的波動。

第三，不少銀行都會提供借貸，以槓杆去放大回報，以平息借貸去賺取息差。低息環境時間題不大，但進入加息週期，不止借貸成本增加，同時債券價格往往在加息期下跌，雙從打擊下，投資價值成疑。當然，若然加息步伐不快，息差利潤就可觀。

我不是說債券基金有問題，只是說明當中的風險，因為市面上的基券基金好多，你要仔細分析。

------------------------------------------------

Q20062：

Hello啊sir,我係你之前的學生，我上年237蚊買入港交所，一直揸到宜家冇放，現暴升到500蚊

記得你有話話升一倍放一半，但如果係優質嘅，又唔係急用錢可以唔放，所以480幾我都冇放。

但去到今日個市好熱，成交大，其實我反而有啲驚，唔知應該放定係繼續持有，想問下啊sir你意見！Thanks!

龔成老師：

現時大市的確有點熱，特別是新經濟股，所以如果入市要好小心。

至於港交所（0388），是值得長線持有的股票。如果你持貨較多，可以賣部分，如不多，就持有。

總之，點都要有基本的貨在手。

------------------------------------------------

Q20063：

龔sir, 之前同你提過我諗住今年開始用分注模式買2800 ，諗住每個月出糧嗰日就草錢，2個月固定入一手

但係我上星期想入都入唔到，因為佢係咁升，無人放，咁我繼續排佢，定係點樣入可以呀？（聽日開市會再試吓）

龔成老師：

你唔好同排隊買入，可以試下同「市價盤」即刻買入。

月供或自行分注模式，只要你長期做，同時留現金，就可以平均買入價，唔需要太著重現價平與貴。好處是減少人為主觀的分析。

------------------------------------------------

Q20064：

老師你好，有幾個關於市盈率嘅問題想請教你？

1. 如何找岀歷市市盈率？每股盈利可從年報得知，但股價每日都會變動

是否應該用平均數/中位數作計算？我知不少財經網站都有提供相關數據

但當中不少都會納入部份特殊收益，影響了準確性。

2. 財經網站的預測市盈率是否可信？

3. 有無邊類形嘅行業，市盈率並不適合作為估值工具？

感謝老師

龔成老師︰

1） 其實有些網站，都有提供每年市盈率數據，佢地可能會用唔同計法。一般都是用年末的。

只要你用作比較時的市盈率，都係用同一準則去計，咁就可以。

若當年有出現特殊收益，你就要自行去扣除才計算。

2） 我建議你作為一個參考，但唔好盡信。

3） 主要係地產類，因為佢有盈利中包含了"物業重估"。這個只係會計數字，而非真正收益，會令市盈率出現誤導。

其實有些行業，盈利的代表性不強，又或企業仍在發展階段，用市盈率都未必適合。

------------------------------------------------

Q20065：

龔Sir, 首先多謝你一直以黎無私的付出, 穫益良多。想問幾樣野嫁:

1. 819天能動力, 近排分拆業務喺A股科創版, 想問下對於佢H股會有乜野變化呢? 因為我睇佢呢幾年的業積其實係唔錯的, 近排仲發盈喜, 第一唔明點解今日跌得咁誇張?

第二唔明點解佢呢幾年O既市盈率都係喺5-10之間?因為業績咁好O既股, 理應市盈率會保持住比較高O既水平。我覺得唯一風險係呢隻股O既會計師記錄麻麻地...請問你點睇呢?

2. 點睇951超威動力?

3. 其實我幾年前上過你D course嫁喇, 喺尖沙咀同銅鑼灣, 而家想報番個進階課程, 還可以有折扣嗎? 幾年前的入數單我已沒有keep了, 我有notes做證嫁....haha....唔該哂你

龔成老師：

1）你唔好太理會短期股價上落，最重要睇長期。佢在國內上市可以集資，有利佢發展。

天能動力（0819）有質素的，同時業務仍在增長中，不過，增長力由過往的高增長，轉為平穩增長。

佢主要係中國從事研發、生產和銷售新能源鋰動力電池、特殊用途鉛動力電池、電動自行車鉛動力電池；廢舊電池回收處理；以及智慧能源解決方案業務。

佢業務都正面的，但盈利就比較波動，因為幾年前曾出現過虧損，這是扣分的地方。近幾年已無這問題，見佢生意同盈利都有理想增長。

不過，這股業務始終有潛在波動，股價上落大，現價合理區頂，但不能大注。

2）超威動力（0951）為鉛酸動力電池製造商，產品主要用於電動自行車，亦生產風能與太陽能儲能電池，以及一直與吉利及江淮等汽車製造商合作，開發電動車用鉛酸動力電池原型。

佢的銷售及分銷網絡覆蓋一級（向電動自行車製造商供應產品）及二級市場（電動自行車的替換電池市場）。

質素都有少少，但增長力不強，見佢之前盈利無乜增長，反映企業在大環境向好下，都不是特別好賺。投資價值中等，現價合理的。

3）只要是舊生，就可以有進階班優惠價，你可以whatsapp 55457212我同事，比翻D基本資料佢，只要證明你上過堂就得，同事會跟進的。

龔成課程：【倍升股進階課程】（共30小時）
費用：$18800（新學員）
費用：$12800（讀過「龔成投資倍升股課程」學員）
報名：https://www.80shing.com/register.php?id=3

------------------------------------------------

Q20066：

老師想請教下
我一直都想合理價買
但而家牛三

每天看見想買的只升不跌
又怕一下子大跌
入市會得不常失

因為我都不過聽老師提的
12
14
823
吧了
而1928，我等到32入一手，點知又再跌，但我知長遠無問題

又如3067，又是天天升，都不知如何是好

謝謝老師解答

龔成老師：

我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

你上述買入舊經濟股，無問題，現價合理。

但都不能完全無新經濟。

安碩恒生科技（3067）可長線。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂至略貴，因此，這刻不能大注投資。最好的策略，就是月供，或自行分注小注慢慢收貨（例如每月買一次、或2個月買可次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

------------------------------------------------

Q20067：

龔sir, 我上過您既堂, 供股票已經2年, 現在暫時停了, 因為將會買樓, 但暫時股票倉亦很穩實。

呢2年個過程有很大體會, 我持有接近10隻股票, 當中有賺有蝕, 唔係隻隻賺$, 但組合已有接近10%利潤, 其實已經很滿足, 因為明白欲速則不達, 相信經年後會慢慢有複息效益。

就算有些股票仍是蝕少少都不會擔心, 因為來年收息已能達致平衡。

同時, 現在個市既上落, 對我來說, 已經無乜感覺, 現在我對股票的看法, 除非它不再是優質股, 我才會售出。

尤記得以前每買入一隻優質股票, 當佢下跌的時候, 根本無想過會加注, 同時買入每一隻股票, 都希望每隻都會有利潤

但今天回想, 市場上落, 坦言不可能每隻都必定能有利潤的, 但能取之平衡才是皇道吧。最後, 最開心的是我以呢種投資方法, 感染了2位朋友, 同時加入供股行為了。

其中1位朋友已供股1年, 她今天多謝我令她擁有資產的感覺, 所以我覺得應該跟您說聲多謝才是呀。

龔成老師：

太好了！

一般散戶認為買買賣賣是最賺錢方法，雖然有時短期有回報，但其實背後有風險，反而月供股票這種長期儲貨的模式，更穩陣。

我稱為「穩中求勝」的方法。所以，對很多投資者，其實這方法都適合的。

這是長期戰，保持規律進行啦！

------------------------------------------------

Q20068：

龔sir,我是你的學生，有個問題關於配置想請教

家人準備退休，現有700萬cash + 100萬基金退休用

手持一細單位，現在有打算再買650萬左右的樓,因唔夠住。現持有個度可以放租

請問是否應該一口氣full pay嗎？定還是擺落水桶3 到做收息差既組合？

如果做水桶3,應該擺資金幾多落去？做返個穩定資金流，謝謝解答

龔成老師︰

由於你家人已準備退休，投資上要保守些，唔建議再增持物業。如果現時細屋唔足夠應付生活所需，你可以利用部份資金，去將佢換成大屋。

之後，餘下資金可以分成5部分。

第一部分投資收息股，你可以建立一個收息股組合，你可考慮港燈（2638）、香港電訊（6823）、恆生（0011）、工行（1398）、置富（0778）、陽光（0435）、深高速（0548）等，大多有5%股息

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

（你可睇下《50穩健收息股》當中仲有好多）。

你平衡的投資這些股，除了可以得到穩健的收息收，同時可有效的分散風險。

第二，投資債券，你可以選擇A評級的債券，年期較長都可以，但利息卻不高。你可以到銀行問問。

第三，投資年金，你可以睇睇，這是適合你們的產品，零風險，可以有穩定回報。

第四，你亦可投資銀行低風險類的產品，你可自行到銀行了解下，總之是「低風險，持續現金流」的。

第五，持有現金，除了可做定期外，現金亦可以為你的後盾，以備不時之需。同時，若投資市場大跌，你可以在這時買到更多的收息股，股息率會進一步上升。

你可以這筆資金，平衡地分配在上述的項目上，對你來說是最好平衡風險，同時有穩定的現金流。

------------------------------------------------

Q20069：

龑成老師，請問滙賢87001和首程控股697可仍持有嗎？它們合理價應是多少？

龔成老師︰

匯賢產業信託（87001）雖然是不錯的房託，但這房託比其他房託有點特別。

匯賢現時主要資產：包括於2011年收購的北京東方廣場之零售、寫字樓及服務式公寓業務；以及兩家酒店（北京東方君悅大酒店及瀋陽麗都索菲特酒店）。

佢過往都有新增投資，例如2015年才收購的重慶大都會東方廣場。

但要留意，根據北京市人民政府於2006年6月26日發出的國有土地使用證（京市東港澳臺國用（2006出）第10128號），該發展項目總土地面積為7萬7千平方米的土地使用權已授予北京東方廣場公司作綜合用途，到期日為2049年4月21日。

從整體及本質上，這房託是不錯的，適合長線投資。雖然有上述所講的潛在風險，但高股息率，可說能抵償當中風險，同時反映部分物業有「到期」因素。

簡單來說，就是佢的股價，會慢慢長期向下，因為有些資產會到期。不過，如果佢餘下的資產在這段時間增值，咁股價就不會向下。

你其實可以咁樣理解，你收到的股息，有少少是包括了本金的部分，所以就算日後賣出價低了少少，也不會因此而虧損。

整體來說，這股現價有投資價值，現價可分注投資。

首程控股（0697）主要在中國從事停車場經營管理，以及私募基金管理業務。

佢由過往鋼材製造、礦物開採及加工業務，轉型至現時業務。其業務會比較波動，甚至出現過虧損。

整體質素只屬一般，見佢最近有盈利改善的情況，如果你持股不多，可以睇下企業的業務係唔係真正有改善，才決定處理方法。

------------------------------------------------

Q20070：

龔sir，你好，我981係$25.11入貨，你認為目前可以止盈未？還是可以上望$32？

另外，968目前算唔算可入貨價位？

我仲持有2208，$17.25入3萬股，呢幾日都跌得好勁，你認為佢前景樂觀嗎？

龔成老師︰

中短期走勢，我估唔倒。我地投資唔應該睇咁短線，而係應從佢長線質素，去決定是否值得投資。

中芯國際（0981）本質不過不失，雖然仍每年的生意都有增長，但盈利就有波動，反映雖然大環境的市場在增長中，但佢的成本與售價，就未必在佢掌握的範圍，最後造成盈利波動的結果。

雖然這股都有前景，但以佢面對的情況，但好難將佢定義為好優質的股票，只屬中等。再加上中美問題，令不確性增加左。因為有些舉措，未知會否對集團發展，造成長線影響。

此股質素和吸引力只屬一般，如果佢佔你組合比重唔高，可長線持有。

信義光能（0968）有質素，環保能源會係大勢所趨，未來光伏行業，在中國以至全球發展都係正面。

業務上保持一定增長，股本回報率處高水平，加上現金流強勁，是有一定質素。

現價計略貴，如果想入，要回翻D先可以慢慢分注。這股上落比較大，故投資時要控制注碼。

金風科技（2208）主要從事製造並銷售風力發電機組及風電零部件，佢有提供風電相關諮詢，風電場建設、維護服務；建立及經營風力發電場；以及提供污水處理業務及融資租賃服務。

整體算不差，但股價有點波動。睇佢近年股東回報率都有下跌，代表佢賺錢能力弱左。加上此股負債不輕，都係一個風險因素。

此股可投資，但只宜小注。若佔你組合比重唔高，可以守住先。

------------------------------------------------

Q20071：

老師你好， 我30 歲附近， 收入一個月20000 幾， 本身一個月供4000

2000 供2800同2000 供0012, 已有11xx 股2800 同 1000股多d 0012, 另外都持有一手0012

兩手0066, 一手恆生。 想問月供建議應轉下供領展/ 港鐵？ 定係keep 住供恆基好？ thanks, 想儲錢

同埋宜加月供成日有碎股問題， 供夠一手後會突多左。 建議點樣解決？

龔成老師︰

月供係一個長線計劃，短期出現架碎股，唔洗太在意。同埋碎股都可以照賣，只是價位略略低，其實不用擔心。

現時你組合都有質素，至於是否轉領展（0823）或港鐵（0066），視乎你投資喜好，質素上都跟恆基（0012）相近。

但以你年紀，若相轉換組合，我會建議你加入一隻潛力股。因為你組合有增長力，但唔算十分高。以下都是合適潛力股，供你參考。

潛力股︰安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）。

------------------------------------------------

Q20072：

龔SIR你好，想問問什麼是市價盤及增強限價盤買盤是否一定會在指定價格或以下才會執行

而增強限價盤賣盤是否一定會在指定價格或以上才會執行，謝謝

龔成老師：

市價盤就是同你在市場，立刻同任何價入貨。

增強限價盤買入就是在指定價位或以下，就會同你入貨。

增強限價盤賣出就是在指定價位或以上，就會同你出貨。

------------------------------------------------

Q20073：

你好老師想問吓268金蝶國際適合現投資及長遠持有嗎？
買了小米及雅迪，想再買隻一些進取嘅股票有甚麼建議？謝謝

龔成老師︰

金蝶國際（0268）其實是不錯的股票，近年的發展快速，生意同盈利都有明顯的增長，而且行業仍處增長階段。

不過，這股的股價太高，現價處貴水平，對這刻投資有所保留。要等有明顯回調，才可以開始小注入市，會較好。

雅迪控股（1585）主要在中國以「雅迪」品牌從事電動兩輪車（包括電動踏板車及電動自行車）。

此股有增長力，但現價唔算平。過往股價甚為波動，而且佢負債都唔輕，都係扣分地方。

只可以話現價的值博率，中等。若你持貨不多，係可以的。

較有潛力股票︰安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園（1448）。

現時只有安碩恒生科技（3067）、阿里（9988）、中生製藥（1177）、福壽園（1448）算係在合理區頂部，可分注入貨，其餘都略貴，想買就要等一等。

但你要知道，我地唔可以只講求增長，而都要考慮組合平衡性。若你係年青人，這些潛力股，也只能佔你組合最多一半，否則個波動性風險會好過高。

------------------------------------------------

Q20074：

老師你好! 我24歲, 月入22K, 每月可儲10K. 目標3年後可以儲70萬或以上結婚.

去年已經做了10萬定期, 現時銀行有13萬存款. 半年前開始低風險的投資,

有買小額的股票（如小米, 美團）, 但現時已沒有持有.
想了解更全面和合適的投資方法. 謝謝!

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你可以用"平穏增長股" + "潛力股"，去創造一個增值的組合。定期這類定息產品，在財富增值上唔係咁適合。

現在你可用每月5成儲蓄去做月供，其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、領展（0823）、希慎（0014）、太古地產（1972）或潛力股︰中生（1177）、福壽園（1448）、安碩恒生科技（3067）、港交所（0388）、阿里（9988）、騰訊（0700）。

大市只在合理區，你現有23萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨。

以每年回報10%計，3年係可以增值到70萬。但留意，3年唔算長時間，會有機會出現波動，令你最終回報的不確定性增加，你要知這個風險。

------------------------------------------------

Q20075：

龔老師, 你好，本人手上持有多隻股票, 佔全部資產約9成, 現想整理組合, 增加現金流,
請問以下那些可繼續持有, 那些可以賣出?

0001 @ 71
0005 @ 50
0066 @ 40.3
0388 @ 236
0700 @ 240
0883 @ 8.35
0939 @ 6.2
1288 @ 3.47
1299 @ 76
1339 @ 5.32
1810 @ 16.32
2800 @ 26
2823 @ 12.9
3988 @ 3.23
6886 @ 16.35
6993 @ 13.5
9987 @ 418

謝謝指教

龔成老師︰

我地投資會運用「先增值，後現金流」作方法，初期應投資較多增值類資產，較後期則應投資較多保守類項目。所以係分配投資項目時，會因應番你的人生階段。

若果你年青，應用"平穏增長股"+"潛力股"。中年人士，可以較集中翻係"平穏增長股"。當你已近退休之年，就應集中在"收息股"，去創造平穏現金流。

你以上組合，基本上幾種股票都有。而且組合股票，最好維持10隻左右，否則較難管理。你可以因應你股票類別，去作出調整。

潛力股︰港交所（0388）、騰訊（0700）、小米（1810）

平穏增長股︰長和（0001）、港鐵（0066）、中海油（0883）、友邦（1299）、中國人民保險集團（1339）、盈富（2800）、安碩Ａ５０（2823）、ＨＴＳＣ華泰證券（6886）、藍月亮（6993）、百勝中國（9987）
收息股︰匯控（0005）、建行（0939）、農行（1288）、中行（3988）、

當中，中海油（0883）、中國人民保險集團（1339）、ＨＴＳＣ華泰證券（6886）質素較一般，不宜持有太多。、而藍月亮（6993）上市不久，都有一定不確定性，同樣只可小注。

另外，我發現你都比較集中銀行股。緊記相同行業不可佔組合多於3成，而單一企業不要高過15%，否則會有過度集中架問題。

現時大市只在合理區，現金和股票最好各一半。你可以係調整時，多留一點現金，用來等大跌市機會。

------------------------------------------------

Q20076：

老師 708和2333哪個增長力較高？
現價是合理區嗎？

龔成老師︰

恆大汽車（0708）是有風險，有回報的類別。佢業務增長的確快速，雖然前景正面，但係估值方面，就好困難。佢而家仲係燒銀紙的狀態，幾時先有較具體的盈利？無人知。

往後的盈利，有幾大？又無人知，市場只是估估下。而佢現時的市值去到成2800億，只是估出來，好難用具體的財務數據支持。加上佢自己同母公司，仍然處於高負債的水平，令人較難放心投資。

近期推出新能車，這部份會發展成點，尚係未知之數。此股潛力雖然有，但風險並存，如果你是小注的話，都可以。

長城汽車（2333）都正面的，中國汽車市場龐大，加上仍有增長力，這公司都有品牌，所以長線發展不會太差。

但你要留意翻未來車市焦點會落在新能源汽車，比亞迪（1211）這類新能車龍頭，前景相信比長城為佳。

近期佢回左唔少，但都仲係貴。

------------------------------------------------

Q20077：

你好，請問持有以下股票，對以下前景有咩睇法？

#9928 $12.9 10000股
#489 $7.3 18000股
#762 $4.8 14000股
謝謝

龔成老師︰

時代鄰里（9928）於2019年12月由時代中國控股（1233）分拆上市，主要在中國從事提供物業管理服務及相關服務。

上市年期唔算耐，可參考數據相對會較少，要分析較難。只能說，時代鄰里是有質素的。但由於較新，不確定性會較高，不宜大注。

東風集團股份（0489）主要從事商用車、乘用車及汽車發動機、零部件的生產和銷售業務，裝備製造業務，金融業務以及與汽車相關的其他業務。

此股都算有質素，可長線投資。

中國聯通（0762）本質不差的，但賺錢能力比過往有減弱情況，只算是平穩增長類別。

但佢始終是中國3大電訊商之一，點都有一定實力。但股本回報率長期處於較低水平，反映企業賺錢能力不足。現價合理，可分注。

因為中國政府想人民用電話費上網費較平，所以佢只能賺合理，而不過多的利潤。因此，你唔好預佢是高增長。

------------------------------------------------

Q20078：

老師，想問市區樓窩打老道8號同土瓜灣傲雲峰那個優勝。

油麻地區沒什麼大發展，舊區，勝在地鐵站就在旁邊，地點方便，市區海景不錯，價錢大約$800萬，尺價正常，大概$18500/尺。新鴻基樓，圖則比較實用。

傲雲峰，土瓜灣舊區，交通不太方便，但將來有地鐵站開通，景觀也開陽，不過海景比較少。也有合適的450尺，呎價18,000，圖則也可以。

左想右想還是九龍西比較好
老師，我有選擇困難症
不知道應選擇那一區

龔成老師：

兩個都差不多，其實你都大致講出了兩個地方的重點。

如果講發展，傲雲峰會較好，因為啟德長遠的發展較大，對佢都有利。

如果你自住，其實睇你自己喜好就得。

------------------------------------------------

Q20079：

老師，我一年前開始接觸股票，當時咩都識，跟你推薦的買，如領展，金沙等等，第一次賺錢係金沙，果時賺左3千就立賣左，之後再買金沙 823 ，曾經一輪跌好多，好驚，唔敢溝唔敢放，好彩之後有升返同賺錢

然後又賣左，之後一直入唔返，試過幾次經驗都係咁，特別是700同美團，一賣左就直升，經驗下來後

我開始更深信老師你所教的，優質有潛力的股票真的不怕佢跌，而且有耐性長渣才是重點，眼看身邊朋友常大手吃差價，有時候真的會眼紅，所以很佩服你

股票最大的阻礙其實是心態，感謝你願意分享經驗想法。

現在想買書研究搵幾隻股長渣，但不知看那本先，而且不知何時止蝕，或是咩位跌要溝，咩位賺時可以再入注，這些知識我可以由邊幾本書入手了解。

龔成老師：

你見到人賺錢，最重要是平常心，每個人承受風險能力不同的，同埋有些方法短期可能好賺錢，但長遠可以蝕翻。心理質素好重要的。

正如我買比亞迪（1211），持貨十幾年，過往多年回報一般，無乜升幅，我知出面有唔少人笑左我幾年，但我地最緊要是做好自己，唔好理人，最後比亞迪比左我10倍回報！

我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

你睇《股票勝經》《50優質潛力股》。

------------------------------------------------

Q20080：

龔老師，我有一個問題，我有個儲蓄保險大約10萬蚊
如果唔拎，頭一年可能有多$1800
兩年可能有$4000

還是應該拎出嚟投資股票

龔成老師：

要睇兩樣點，第一，你本身的財富組合情況。你可以將這些產品，視為財富組合的一充分，因為我地進行理財，攻守兼備是需要的，但你預這部分的增長力不會強。因此，都可以保留。

但如果你本身已有一些防守性的產品，就不要再持有，應投資其他更高增長力的項目。

第二，你本身的投資實力。

如果你投資實力不差，自行投資一定較好，買股票回報較高。

但如果你實力不足，與其買股票虧損，不要投資上述產品。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q19301-Q19320）

Q19301：

龔老師，本人都將近半百，持有#128好幾年，並佔本人大部份份額。想沽出又怕資金重投舊經濟股，一直持有又浪費機會成本。請問閣下有何高見，謝謝你！

龔成老師：

首先你要明白一個概念，我地持有一隻股票與否，關鍵位是企業質素、前景，不要被買入價影響。買為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

安寧控股（0128）質素不太好，這股多年都出現虧損，企業價值不斷向下，長期持有的作用不大，你應該賣出。

長遠來講，我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

------------------------------------------------

Q19302：

老師，見到你經常慷慨咁回答投資理財問題，雖然我都搵過保險理財顧問做過理財規劃，但係最後佢哋都一定會sell產品兼意見不中肯。

想咗好耐都係覺得請教你可能會有更好的得著。

我同老公2人月入約11萬左右。
假設有一個月花紅約月入12萬。保守當11萬嚟計數。

負債: 共406萬
香港樓 估值840萬 (負276萬)
海外樓 估值210萬 (負130萬)
海外樓將來退休時用。

每月扣除所有支出後只儲得2萬
其中1萬月供股票
匯豐 (月供超過10年)
現市值50萬 每月4000
中銀＆煤氣＆中電 (月供已3年)
現市值20萬 每月各2000

現金大約有200萬
按揭高息戶口多按咗100萬只擺咗係度唔敢打筆錢主意

1) 如果想10~15年內財務自由及每月想有6萬被動收入，可以如何部署股票投資?

2) 現時租緊樓$19K, 自己層樓收租$21.5K 連埋物業稅係打和。

因為租樓的居住環境比較好。
老師覺得與其每個月白白俾19K，我們還可以考慮自己再買樓嗎？(無資金又擔心負債太高)

3)理財規劃顧問推銷的產品老師又如何看待?

4) 由於沒有小朋友，2人每年需要交15萬稅，可扣稅自願性強積金供款/可扣稅年金(回報低)，老師又點睇? 還是應該集中學習投資股票?

真心多謝老師的寶貴時間回答我的問題先

龔成老師：

1）當我地進行人生財富累積，會運用「先增值，後現金流」作方法，初期應投資較多增值類資產，而較年長的，則應投資較多保守類項目，這樣對整體財富增長最有效果。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你這刻可以投資平穩增長類的股票，原本投資的股票可持有，但不少都是收息股，增長力不強，其實這刻財富仍有增長，到退休前才轉翻收息股都得。

如果到時要在$60000被動收入，你到時可利用物業收租、收租股、債券（到時先投資），及其他收息類工具。

而這刻，就好好利用股票去增長。

你可以月供盈富（2800），另外，加少少安碩恒生科技（3067）去月供，都可以，因為你組合增長力不足。

2）以你現時的財富分配，已有一定的物業比例，如果再增加，例財富%會過多。暫時保持現狀，相信較好。

3）其實都有價值的，但最重要是投資「適合」你的項目，因為在財富配置上，我地要講求平衡，物業、股票、理財產品，你都可以適當持有。

4）最重要睇你的需要，如果你認為強積金回報較你自己投資好，就可考慮。又或你認為年金長遠適合你，就可以考慮。這才是分析的核心，至於扣稅，只是加分位。

------------------------------------------------

Q19303：

你好！在3年前這個時候，第一次向您請教。過去3年用50萬在不同時期買入股票及Ibond；同時亦開始月供2800，都差不多3年了。另外手上還有30萬現金可作投資，每月可儲$10,000，期望下一個3年可增加70萬資產。

問題一：現在的組合平均每月現金流$1,700，離當時目標$2000到$3000還差一點。至於總資產，明顯比買入價低，可以話過去一年失望之處。其實您認為這個組合是否不足，甚至算得上差？

問題二：因為問題一，所以發覺組合內太多舊經濟股，有考慮過當2800供滿3年時(預計到時佔總資產近40%)停供讓它自然收息，然後改供恒指科技指數ETF。這個做法會不會太一刀切?

龔成老師：

1）當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

所以，你要睇翻自己在那一個階段，如果想集中現金流，可以在之後加強股息高的股票，如香港電訊（6823）、置富（0778）等。

同時，你唔好太著重一年的賺蝕，要睇長期。

2）如果你想增值，上述組合的確無潛力股，全部都是平穩增長股+收息股，所以在配置上的確有問題。

因此，你可以月供安碩恒生科技（3067），可長線。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂，因此，這刻不能大注投資。最好的策略，就是月供，或自行分注小注慢慢收貨，原理如同不斷儲貨，這樣就能平均買入價，減少風險。然後就長線持有。

至於月供多與少，就要睇你各類股票想佔組合的比例。

------------------------------------------------

Q19304：

阿sir，我想講多謝，你既課程好值，內容真係可以用一世，我之前都有上過其他類別課程，但唔會可以課堂前後有咁多時間俾學生問問題，我地上3個鐘堂，但你就頭尾留守4-5個鐘

第8堂最後你又竟然留email俾大家，我係完全估唔到的，其他課程都唔會咁做，但你會繼續照顧學生，就好似之前你派功課俾舊生一樣。

進階班見~

龔成老師：

我相信知識是用來分享的，有時對我來講，花多1、2個鐘其實無乜野，但對學生來講，就可以影響好巨大。

因此，盡力而為啦！記得多溫書、睇年報、用課堂的「企業評估表」！

------------------------------------------------

Q19305：

自己本身有渣車，每月租停車場$2700，如果我將130萬買個車位自用，可以慳番$2700。這樣有投資價值嗎？

亞Sir,咁咪要樓價回落先有值博率，但樓價好似唔識回落呀！

龔成老師：

你可以計計，$2700X12，除以$130萬，這是車位的租金回報率，大約2.5%。

如果你將資金投資收息股，假設建立一個5%的股息組合，$130萬，每月收息為$5400，你將資金用作交租仍有現金流。

因此，除非你預期該車位有升值的能力，否則，現時在較低租金回報率的情況下，車位的投資價值只是一般，投資值博率未算高。

至於物業市場，你預香港樓，中短期會因經濟差而向下，但都唔好預佢大跌，而長遠，由於需求始終大，所以慢慢會上翻，不過就不是大升模式。

------------------------------------------------

Q19306：

龔sir 您好！我是澳門讀者，以下係我基本資料:

- 33歲, 未婚, 同父母住
- 月入2萬4, 各類支出扣減後(包括保險及飯錢)每月約剩1萬
- 現有17萬存款, 15萬儲蓄投資保險, 約11萬股票
- 股票包括: 金沙-400股, 阿里巴巴-300股, F三星原油期-8000股, 暫時全部都賺緊

澳門供股的話, 每一隻股票手續費為50, 由於份工比較忙, 無時間日日睇住個巿, 考慮緊供1-2隻股票
我心目中考慮的包括: 華夏恒生科技、港交所、阿里巴巴、騰訊、中國軟件國際

每月想囉出黎5000-8000供股, 如果以供2隻計算, 手續費為100, 總手續費就壓在2%以下

其實我想再進取啲, 應該如何選擇及分配供股的部分?
另外想我想請教, 如何計算大巿(恆指)幾多點先算合理區? 以現時約26000左右, 合理區的中間定係頂部?

希望疫情快啲過去, 等龔sir過黎澳門開堂, 或者開線上課程!

龔成老師：

你這個年齡，的確可以承受到風險，現時的現金就唔需要心急動用，至於每個月的$8000，就可以做月供股票。

最平衡的做法，是月供盈富（2800）$4000，加上安碩恒生科技（3067）$4000。這樣對手續費，以及財富組合平衡角度都較好。如果你真的想進取D，就集中一隻供3067。

當然，你都可以供個股，但要留意個股佔組合比例唔應該太多。

同時，現有的$17萬，作用是等個股大跌時把握機會，你上述所選的股票都可以。恆指現價是合理的。

疫情過後，一定會過澳門，到時見！

------------------------------------------------

Q19307：

龔老師：若用市賬率估值，下列股票之合理價買入，是否合理？

置富（0778）
合理價：10-11元

領展（823）
77元至81元

中電（0002）
75-79

香港電訊（6823）
9-10

龔成老師：

置富（0778）你的估值要調低翻2、3成。至於其他股票，大致都可以，但最好合理區的範圈闊翻D。

同埋你要留意，利用市賬率做估值，要考慮最新的情況而進行調整，唔能夠程式般套用。

同時，這只是估值方法的其中一種，我地進行企業估值時，應該同時運用多種方法，配合使用，得到的估值就會更加立體。

------------------------------------------------

Q19308：

你好老師， 本人39歲，已看了大半你的大富翁致富藍圖，開竅了，真的謝謝你，希望不是太晚。

有問題關於外幣，書裡第五章p.147，想看看你意見。
剛轉工作到台灣，以後會以台幣為收入。看到書中p147裡提及：

先借取利率較低，有貶值前提的貨幣，然後兌換成另一貨幣，將資金投資於另一個國家的資產，而該國貨幣擁一定的升值潛力，其後到資產增值後賣出

再對成最初借貸的貨幣作償還本金及利息，過程如同資產創造與轉換一樣。

想請問對比起港幣，台幣是否利率較低有貶值？
如果是，我應否借取台幣來繼續投資我在香港的月供股票？

如果不是， 我可以怎樣繼續投資我在香港的月供股票？
因為收入幣值改變，我又應該怎樣計劃我的財富資產？
萬分感謝老師的指點

龔成老師：

你的方向不是不可，但投資值博率未能稱為很高，因為要確定台幣下跌，港幣（即美元）上升，而這是長期性的，這方法才可運作成功。

至於台幣，我都未能確定長遠會否貶值，美國經濟增長力度會較台灣好，但同時美元大量印銀紙，因此美元本身是貶值的，問題是經濟向好因素，而及其他外幣貶值的因素，都造成複雜的問題。

因此，上述方法，未能肯定有著數，因此值博率未算高。同時這是較進取的方法。

比較穩健的做法，就是你工作後，將資金轉回港幣，月供港股，盈富（2800）、安碩恒生科技（3067）都可以。長期進行就得。

------------------------------------------------

Q19309：

老師，我有層樓已經供了3年過了銀行的死期，之前樓價195萬126尺買，借銀行60萬，月供4000,收租7500/月

我看見依家樓價可以賣出250萬，想換間大點的，300萬樓下的，這樣適合嗎？

龔成老師：

方向不是不可，因為你能增加財富組合中資產的數量，同時，可以轉成較有質素的物業。

不過，你$250萬樓，轉成300萬樓，差別少，其實當中的交易成本高，因為當中一買一賣有較多雜費，我唔太建議換樓時有太少的變化，寧願你儲多少少資金，一次過軜去$400萬樓，會較好。

------------------------------------------------

Q19310：

龔老師請問: 美股價值投資高嗎？

龔成老師：

我相信在20年後，美國、中國將會是全部最強的經濟體，因此兩個國家當中的企業，都有投資價值，你可以建立一個平衡組合，同時持有，可以。

同埋我地最重要，是睇「企業」，只要優質企業，就可以投資，這不限於國家。

------------------------------------------------

Q19311：

龔Sir你好,想請教一下,現在部署入粵海投資,澳優, 中海物業是否可行。仲有隻深圳國際

見它們的估值都偏低
多謝建議

龔成老師：

粵海投資（0270）澳優（1717）都在合理區，可分注投資。都有長線投資價值的。但就未算是偏低。

至於中海物業（2669）不差的，佢係2015年由中國海外發展（0688）分拆上市。

佢主要於中國內地、香港及澳門從事物業管理業務（如保安、維修及保養、清潔及綠化、為物業發展商提供交付前服務等。

現金流不差，增長力都有，但就不是好高增長，是平穩增長類。現時在合理區中上部，分注投資都可，這股都可以長線。

至於深圳國際（0152）合理價，都可以考慮，但這股不是高增長類，以收息為主。

------------------------------------------------

Q19312：

老師你好，我最近追緊你的《5年買樓4部曲》，資料同分析都好詳盡，真係好正！

我已經唔係90/00後，80後的我其實已經行緊你寫的第1步，做2份工去努力儲錢，已經儲左100萬左右。

現在真係好想實踐第2步，但係做住2份工+照顧孩子，實在無辦法去上你的實體班。

老師，你會唔會考慮可以現場zoom/視像教學/錄製短片之類，等我地呢類學生都可以報名。

等你好消息

龔成老師：

好！你保持向目標行就得。

$100萬是一個不差的初期資金，作為錢滾錢的基礎會好理想，你之後要加強投資知識，從書中及課程增加都得。

我遲d，會開一個有關於資產配置的網上課程。

至於股票班，由於內容太重要，暫時唔會。

因為之前實體股票班試過比人偷拍，之後放左上網賣，最後要搞到報海關先處理到，好煩。所以，網上類的教學，都好擔心有偷拍問題，風險太高，因為好多課堂內容，都唔想太公開，只想自己學生知，所以暫時都唔會搞。

------------------------------------------------

Q19313：

首先，要多謝您咁認真答我

1) 其實我都知我太集中金融相關，但係我本身正職份工好忙，所以當初開始買股票個時就集中一個板塊，係留意相關消息既時候比較易manage d 如果需要調整，應如何著手？

2) 係投資心理狀況上，我都覺得自己好難take balance
如果我keep住留意新聞，我就好有衝動不斷trade in/out，結果多數係執少少就放，或者蟹左，甚至有時會影響我番工，因為成日心掛掛，但係我一唔睇，又真係唔睇幾個月，好多時會錯過好多入市既良機
我應該點做？

3) 其實我都對您個課程有興趣，但係weekday 7點灣仔對我好有難度，我本身係機場番工，6點半收到工已經算係早。會唔會有機會遲d有weekend class?

龔成老師：

1）你可以考慮盈富（2800）。

另外再加：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：安碩恆生科技ETF（3067），但這基金較高風險，要分注，慢慢投資。

2）利用月供，或每隔一段時間先入一次，這是最好的。唔好以為成日睇住個市會捉到低位，根據我過往做10年銀行與證券行的經驗，日日睇住個市的散戶，是輸得最多的一群。

你要學長線投資，所有賺大錢的投資者都是長線的。

3）我間中都會開星期六班的，通常一年開1、2次，星期六下午時間。

下次在今年4月。

你或者可以預早留位，只要whatsapp 55457212我同事，打「留位星期六班」就得。我地有具體資料就會 whatsapp。

------------------------------------------------

Q19314：

龔sir，我係你學生，請問（利息覆蓋率）名字是否等如（利息盈利率）？

我在中銀網找（利息盈利率），名字後跟了個（X），系咩意思呢？另外，例如相中，福壽園的（利息盈利率）是86.071，個數好大，佢系米%黎架？

我嘗試自己計公式（EBIT除 利息），但查過好多網頁，都找不到（EBIT）, 另外，（利息）在哪裡找到？

龔成老師：

（利息覆蓋率）等如（利息盈利率）。

你見到數目大，是正常，因為當一間公司無也利息支出，就會出現這數，因為這公式的原理是比較賺錢與利息，如果利息好少，出來的數就會好大，這是好正常。

（X）就是倍的意思。

你記住，5停倍以上合格，數字愈大愈好。

至於EBIT，財經網站未必有提供的，你可以自己計算翻，除股東應佔溢利，加翻利息、稅項，就是EBIT。

不過，我地在分析利息覆蓋率時，一般都唔會自己計，直接睇財經網站就得。

------------------------------------------------

Q19315：

老師，我見你講過黃金應該以配置模式？例如佔組合3%，咩意思？

龔成老師：

所謂的「配置」，就是並非買賣，不是賺差價，是買入後「持有」，成為財富組合的一部分。

例如目標是佔財富的3%，如果你現時有$100萬，你應該有$3萬是黃金，當你財富增加至$200萬，你就要將黃金增加至$6萬。

當然，不用成日轉，大約就得。

------------------------------------------------

Q19316：

阿sir，我想問，係咪所有新上市公司都係水桶一， 即使內地業務幾成熟都好。

例如舉個例子，愛奇藝，內地好紅，好多用家。但係佢都算係水桶一，唔算水桶二？

愛奇藝只不過係一個例子，當然佢好似未喺香港上市，我想問佢係屬於水桶幾？

其實我係想問Bilibili，好多消息話佢會喺香港上市，我知道係內地好紅

無論佢業務幾成熟都好，新上市就一定係水桶一？

龔成老師︰

新上市唔一定係水桶1，佢屬於那個層次的水桶，其實係睇佢業務發展狀況、穏定性、潛力等等因素。

但問題係，我地分析新上市企業合理價時，除了了解行業發展、佢本身業務狀況外，都要參考過往財務數據。

但新股都唔會有太多這方面的可靠資訊，令成個分析唔完整。所以就算你覺得佢基本面好好，但我地係投資時，都要比較保守，唔可以太取，去平衡翻參考數據不足這個風險。

至於內地視頻平台嗶哩嗶哩（BILIBILI）傳聞會在港上市，但由於未落實，也沒有相關上市文件和上市價，暫時好難評論佢投資價值。但相信是有潛力的，不過就要睇到時平與貴。

------------------------------------------------

Q19317：

老師你好，京東健康 市價在阿里健康及平安好醫生中間 ，但銷售額就在他們之上，京東健康 我有兩手在招股價 值得長線持有嗎

值得加入你50隻潛力股之一嗎？

因為我買左電子版

Q2.之前老師曾經有提過平安好醫生是潛力股 但現在很少見你推薦給大家？

龔成老師：

京東健康（6618）與阿里健康（0241）的模式較近。與平安好醫生（1833）都算同行。3隻都有質素，長遠都正面，但估值好難，因為現時無太大的盈利基礎，市場只能以不同的角度去進行分析，當中亦較多預期的因素。

京東健康其業務主要提供線上線下的醫藥出售和健康管理服務，業務布局包括醫藥電商、互聯網醫療、智慧醫療解決方案、健康服務等4個大板塊。

京東健康旗下京東大藥房，更是內地線上線下收入規模最大的零售藥房。其互聯網醫院，日接診量超過10萬次。

質素上，京東健康是有的。但由於估值難，不確定性大，同時暫時略貴，所以如投資，最好回翻D，$100以下較有值博率。如本身有貨，可長線。

簡單來講，京東健康都可成為優質股的其中一員。

平安好醫生（1833），質素無變，長遠有發展力。

佢係中國領先的一站式醫療健康系統平台，透過「移動醫療+AI」，為每個家庭提供一位家庭醫生，為每個人提供一份電子健康檔案、一個健康管理計畫。

平安好醫生係中國互聯網醫療健康市場的先行者，以平均月活躍客戶，以及在線諮詢量計，是中國最大規模的互聯網醫療健康平台。

企業的業務有潛力，本身有優勢，大環境的配合，都成了這企業的機遇，前景正面，不過財務數據未算好理想。

雖然長遠的企業價值向上，但股價在中短期，可以十分波動，因為市場以「前景」作估值，故此變化必然很大。好難得出平貴的準確數，只能估估下，作參考。

因此，低風險者未必適合投資，若投資者考慮這股，亦不能大注投資，買入後就耐心長線持有，等待這企業改變整個行業的情況，初步分析，$100以上是貴的價位，$100以下開始為合理區頂。

------------------------------------------------

Q19318：

龔sir你好，請問若果通脹時，可以點應對？如何避險？需要預留較多現金嗎？

龔成老師：

通脹即是現金愈來愈不值錢，當然不要持有現金。

你最重要就是建立一個財富組合，當中要持有真資產，例如物業、車位、優質生意、優質股等，長期持有就得。

其實你好難因應短期的通賬去做投資，但我地知道長期現金一定貶值，因此長遠計，唔應該持有現金，應該持有資產。

------------------------------------------------

Q19319：

你好，我打算去做月供股票 (盈富基金) 但我發覺 MPF account 今年回報幾好, 所以做月供股票 還是做MPF自願性供款好呢？

另外1177 6.75 入咗 可以keep嗎？
Thanks

龔成老師：

你唔好只睇短期回報，整個財富累積是長期的，強積金是一個長期的投資，你要先確定，長期的回報，是否理想，是否能跑贏大市，如果不能跑贏大市，將資金投資大市，例如盈富（2800）策略會更好。

所以，你先從長期角度分析先。

中生（1177）出左業績，比預期差，所以股價都有所回落，都是正常市場情況。

不過，又唔需要太過著重短期業務，一間企業中短期業務總有變化，都好正常，最重要是睇長期。這刻長期分析，又未算差，整體質素無變，長遠仍是有發展的。當然，仍要多觀察之後的業績，先有更立體的情況，但暫時見唔到核心改變。

佢由之前的貴，去翻現價合理區中上部，現價又未到大手時機，相信中短期仍波動，要有心理準備，但長遠無問題的。

------------------------------------------------

Q19320：

老師，想分享少少野，我上了初階班之後，發現課程真的物超所值～你善於把一些複雜的概念精簡化，我也按照筆記分析了一些股票。

現時我在購買之前，最少也知道自己「買些什麼」，同時，也真的沒有蝕錢……哈哈。感謝您

龔成老師：

好呀！

投資知識好重要，我地從來不是亂買股，而是有策略地進行投資，建立一個優質股、平衡、適合自己的組合，長期持有。

同時在選股上，小心進行，所以你見我股票班有教5種選股方法。

你現時已有投資基本功，之後要多分析企業，多用「企業評估表」，保持進行，財富一定能長期保持增長。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q19201-Q19220）

Q19201：

阿Sir, 我係買股新手，學人高追短炒諗住可以賺少少啦，入左就係咁跌

當日睇大行報告目標價會升，其實某d大行借有利消息氹人入貨，抬高曬個價之後佢地就沽空，散戶就落搭...係咪咁樣？

我真係後知後覺，未見識股票世面阿sir, 我最近有開始睇你d書同fb page, 多謝你無私分享你既知識，其實我都知唔應該高追炒消息，但貪心想賺少少，不過自己未衰過都未知死...

另外你可以講多啲關於大行造價呢方面既野嗎？或者你有冇邊本書有提到？

謝謝龔Sir!另外請教阿Sir

龔成老師：

第一，之後唔好再短炒，無著數的。

第二，大行報告好多目的，唔知的，因此參考下好，唔好盡信。

其實你著重了解大行的目的，根本無意思，你應該花時間集中研究「企業業務」，你買股票就是買入企業，你應該著重這企業的基本面。

第三，買股票要有好強的心理質素，股價上落好正常，要平常心。

第四，你要以「長線投資」為方向，建立一個平衡的組合。

------------------------------------------------

Q19202：

龔成老師，您好！小弟自從睇咗老師您嘅Facebook page同書（買咗4本，睇咗3本：1. 股票勝經 2. 財務自由行 3. 選股勝經）之後都獲益匪淺，絕大多數問題都解答到，仲plan緊未來疫情好轉後參加您嘅股票班，所以多謝您先！

但喺目前有一個疑問我喺未諗得通，好frustrated，想請教一下老師您，希望您可以俾一啲意見，指點迷津。

我喺2019年頭嘅時候入咗2000股電能（0006），當時$53.5/股。然後疫情爆發，0006一直都徘徊喺$40左右，反而手上其他股都升晒。

我知道老師嘅概念喺優質嘅股票不妨長期持有，但當時買入嘅時候未認識老師您，當時買入嘅目的希望喺收息，但而家功力又未深厚到可以評估到佢價值如何。

所以我嘅問題喺，我應該點處置呢隻股票呢？應該繼續持有等佢返鄉下？賣出轉買其他優質股？還是其他做法？

多謝老師嘅時間同意見！

龔成老師：

其實，我地最重要是「配置」，建立一個長期的投資組合，要優質，要平衡，買入價、賺錢，並不是重點。

電能（0006）雖然有質素，但只是收息股，你要衡量自己的投資目標及風險承受程度。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

因此，你要睇翻這股是否長期持有，又或收息股應該佔你組合的比例。

這股本質無問題，但你預佢增長力不強。

------------------------------------------------

Q19203：

你好，想問點睇佳兆業美好2168

龔成老師：

佳兆業美好（2168）由佳兆業集團（1638）分拆上市，整體都有質素的，有長線投資的價值。不過規模不大，母公司不算強，因此估值不會太高。

佢主要於中國提供以下四項服務：

（１）物業管理服務：提供秩序維護、清潔及園藝、維修及維護，以及客戶服務等，物業管理組合涵蓋住宅物
業、商用物業、寫字樓等。

（２）交付前及顧問服務：於物業交付前向物業開發商提供建築工地管理以及示範單位及物業銷售場地管理服
務；亦向其他物業管理公司提供物業管理顧問服務。

（３）社區增值服務：提供停車位租賃、公共空間租賃、家居生活及物業交易等增值服務。

（４）智能解決方案服務；與第三方承包商合作向物業開發商提供自動化及其他硬件設備安裝服務。

睇翻佢的財務數據，正面，生意與盈利有不差的增長，現金流強，有長線投資。

現價合理，不過行業股價上落較大，要注意風險，同時這股規模唔算大，因此唔值得太大注。

------------------------------------------------

Q19204：

Sir,我睇翻上年成績，股票➕股息回報率14%，對我來說也是不錯的回報率。自從2018睇到80後百萬富翁後，資產增值係好事，但最重要的是我在您身上得到啟發，真心多想您。

新的一年我都必須更加努力，完成自己的夢想。
「財務自由係每個人最基本的權利」
謝謝龔sir!

龔成老師：

太好了！

我好相信累積財富是有方法的，只要不斷增加知識，財富自然保持增長，繼續努力！

------------------------------------------------

Q19205：

龔成老師，最近有d問題想請教下阿sir你，因為怕等唔切股票班先問。

2013年喺深圳福田區買咗樓，呢層樓係同我家姐夾份買嘅，因為最近樓價升得好勁，而我同家姐各有家庭所以決定賣咗層樓分返開d錢。所以我將會有大概$2,500,000港幣現金。

講一講我背景先，我36歲，有一子，我同太太加埋月入$33,000，喺香港有一層樓自住 (係我同太太聯名買，剛住滿1年，要住滿3年先可以提早還款)， 每月供樓大概$13,000，我同太太都唔大駛嘅，冇車，公司有手提電話費，交通，午飯錢津貼，所以基本駛費主要都係保險錢+雙方父母家用+日常生活開支，大概每月＄15,000， 每月可儲蓄$5000。

我本身有一半係泰國人，擁有泰國身份，打算2023年移居泰國，我打算到時將我現居所嘅貸款還1半，再將間屋租出去

估計到時每月會有港幣＄6000收入，到時去到泰國都係想以投資股票嚟過活，因為暫時未知喺嗰度可以做d乜，喺泰國我有一層樓，所以冇住屋嘅壓力，我諗主要駛費都係小朋友讀書嘅開支。

好嘞，問題嚟嘞。我想知道我呢$2,500,000應該點部署？

我自已暫時個計劃如下，想請教老師你覺得我有冇諗得唔啱嘅地方或可以更好嘅建議。

- 2年後 會用1,400,000用嚟還現自住樓的貸款（連租金收入有$6000收入）,所以呢2年可以用呢筆錢嚟投資。

- 400,000投資股票 （暫定），上完阿sir嘅股票班後再作調整。

- 施政報告將非自住物業撤辣，令我想投資一下車位，我想買入沙田區1或2個車位嚟到收租，因為我見暫時重有80－90萬嘅車位可選擇，月租$2000-$2200，打算一炮過買入1個或2個，你覺得可行嗎？

唔好意思，文字有d長，多謝你嘅耐心同埋時間！
祝身體健康！感謝龔sir！報左你堂，上堂見！

龔成老師：

$250萬，建議有$100萬留現金，無論是備用，加上等你之後償還現時部分按揭，當中的$100萬，都建議只留現金。

因此，可動用的資金大約為$150萬。

至於車位，唔建議投資，第一，現價唔算平，租金回報率低。第二，你長遠已會將香港物業放租，因此唔需要太集中在香港的固定資產類別。

加上你日後過泰國，現時唔應該投資太多固定資產，應該持有一些流動性較強的資產，這樣會比較彈性。

$150萬現金，可以部分投資股票，部分就等機會投資。你這年齡，財富仍有增長力，可投資平穩增長股，而具體的方案，我會建議你上完堂先開始進行，唔好急。

至於現時股票，就上完堂先變，同樣不用急。上堂見！

------------------------------------------------

Q19206：

成哥、你好！想請問現在有百多萬mpf.本人三十八歲、一半係Manulife 自2010開始供康健護理

其如一半在Aia。之前放咗喺中華基金、三月因為疫情放咗喺stable bond fund.想請教應該點樣可以提高回報。謝謝你

龔成老師：

強積金的配置其實唔複雜，你只要按你的年齡階段，去進行分配就得，年輕時較進取，中年平穩，退休前就保守，你按年齡，慢慢跟這樣比調整就得。

而選擇方面，我建議你買追蹤恆指基金。因為恆指當中已包括很多中港有質素股票，絕對適合長線持有。

我自踏出社會工作後，強積金都100%恆指的，我當時公司選的強積金公司，有隻基金好簡單，就咁完全追蹤恆指，所以我就選左果隻。

以你的年齡，財富仍有增長力。相信仍可承受風險。

Manulife保持進行。

Aia則選一些追蹤指數的基金，如睇好美國，就選指標普500指數的基金，如睇好中國及香港，就追恆指。之後唔需要轉來轉去。

------------------------------------------------

Q19207：

龔SIR,您好呀
唔知我可唔可以問少少野

(呢幾個月開始留意開龔SIR你,同埋我都有買到<<80後百萬富翁>>睇緊學習緊知識)

我係澳門人,手頭上有現金10萬左右
基金大約9萬左右

安聯增長及收益 7萬(供左三年左右,依家收緊息)
霸菱環球高級抵押債券基金 2萬(供緊3千一個月)

咁股票就係3萬左右
中通 50股(218)
圓通 4000股(6.67)

想問下龔SIR你呢

我應該點樣去部署我GE投資組合會好D?
因為我見6123個價係咁跌....唔知守住先定係放晒佢

多謝龔SIR~~
希望唔會煩到龔SIR你~~

龔成老師：

基金要睇翻當中的投資策略、質素，你可以比過往佢的回報以及大市的回報，睇下佢的表現如何。

你唔好太心急去增加股票，$10萬暫時只動用$5萬，要慢慢睇機會，要時機先出手。同時，唔好再買入同一行業的股票。

你可以考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

至於你的持股，中通快遞（2057）有質素。

睇翻佢的資料，佢係中國較領先的快遞公司，於2002年成立，按總包裹量計是中國領先的快遞服務供應商，市佔率約2成，佢通過全國性網絡提供送件服務，以及其他增值物流服務。

佢的網絡基礎設施，由90個分揀中心與282條自動化分揀線，由約9,050輛自營幹線車輛服務超過3,400條幹線線路組成，網絡覆蓋全中國。

至於財務數據方面，生意與盈利都不差，不過，始終新上市數據未必好準，要慢慢先見真章。現價平就唔平貴，不過有發展的，如果小注無問題的，這股值得長線。

圓通速遞（6123）本身係一家以香港作為總部的國際貨運代理服務供應商，業務已擴展至多個國家，並在亞洲、荷蘭及北美設立了幾十個辦事處。

佢主要經營以下四項業務：空運及海運貨運代理服務、總銷售代理、配套及合約物流服務。

早前阿里巴巴（9988）入股增持，令股價大上大落，這的確會令企業有更多發展，前景正面，不過，估值方面已難。

因為這刻根本無法計算佢，之能賺多少錢，企業發展情況如果，只可以話好多不確定性，但股價就反映大部分利好因素。

因此，這股雖然有發展，但同樣股價上是有風險，相信之後的股價仍會波動。只可以話，這類股小注持有不是不可，但要明白風險因素。

要留意，唔好太集中在同一行業。

------------------------------------------------

Q19208：

龔成老師 我想問2018瑞聲依家依個位算唔算值得長線吸納 我見佢啱啱份業績雖然聲學唔係太好

但係光學業務開始有增長 我見同業2382舜宇做光學 但升到依個高位

相對之下2018如果光學業務繼續有穩定增長咁咪變相現價咪平左

同埋出面市場D人好似唱到好衰好似放棄佢咁

龔成老師：

瑞聲科技（2018）不差的，本身有一定的規模與技術，長遠發展正面，不過，佢增長力不是好強，只能視為平穩增長類別。

現價合理，可以分注投資，長線持有。

佢在聲學方面的技術較強，雖然都有發展光學業務，但未能稱為強的狀態，反而舜宇光學（2382）在光學方面較優質。

由於長遠來說，光學的發展會比聲學較好，因此瑞聲科技的增長未能稱為強。但整體上，都有質素的。

------------------------------------------------

Q19209：

龔sir, 上完你最後一課，我由對股票咩都吾識，怕股票，到完左課程後覺得自已有好大進步

我成日諗，跑馬拉松，都要跟跑會學，網上學，睇片學跑姿，更何況是投資，我好興幸可以遇到你而位師傅

我個人其實無咩目標，四十歲人，好平庸，無大學學位，亦吾敢諗自已有一日可以過上等人架生活，但其實我內心是好渴望能成為上等人

可以由將軍澳居屋搬去港島區住，可以優雅地老去，老來不缺錢用，以前我吾知有咩方法，到有一日facebook遇上你

我馬上去加按自住層居屋，去買左個車位(sir你指的真正資產)，買你啲書睇，再報埋你架課程，我知這個只是起步

我而家知道世上是有方法的成為上等人的，多謝阿sir, 最後一堂，好吾捨得你，多謝龔sir。

你講到你細個時望住XXXX，我坐最前排，見到阿sir你講到眼有小小紅，吾知系米我錯覺呢，我細個時也有類似經歷

我住藍田屋村，都系成日由窗門望住對面啲私傢樓，覺得好高級，好靚，我以前以為搬去將軍澳居屋已是我人生終極，但今日我知我仲有空間向上爬，多謝龔sir比左最寶貴架知識比我。

龔成老師：

我相信你過往的感受，正正是我的感受，大家都是草根，然後希望向上爬，憑自己努力，一步步完成目標。

可以啟發到你實在太好，我相信每個人都有想做的事，想完成的目標，每個人不同，但只要有信心，都可以達成的。

我相信，方法總會有，過程並不易，但一步步，可以做到的，大家都加油呀！相信自己可以完成好多大事情！

------------------------------------------------

Q19210：

老師，你好！現時持有港交所同金沙各一手，買入價分別係371同33.4

想問老師你覺得係咪高得濟入咗貨同應唔應該返家鄉就放定值得長線持有？謝謝！

龔成老師：

港交所（0388）有質素，只是買入價略貴，你可以持有。這股有得守，可長線的。

金沙（1928），有質素，買入價合理區中上部，持有無問題，長線可以。

------------------------------------------------

Q19211：

你好，我見你成日叫人買盈富，點解？

龔成老師：

其實最大的作用是「平衡組合」，對不少散戶來說，與其自己選股，我反而會建議佢地投資盈富，因為佢地選股通常選錯，而盈富是一個組合，風險相對較低。

同時有50隻股票，風險得以平衡，因此對大部分人來說是較好。同時，有平穩增長力，對整體財富不差。

------------------------------------------------

Q19212：

龔sir,我早排起交友app識左個男仔，跟住比佢呃左賣曬手上所有既股票，用曬所有錢跟佢玩數字貨幣。

本身賺左好多錢，但最後要拎錢既時候先話要交中國所得稅，我先如夢初醒發現係一個騙局。

而家所有錢無曬，好彩我突然醒左無比個騙子說服去借錢/用信用卡套現交稅，無欠任何債務，但呢幾年辛苦儲落既錢全部付諸東流。

報左警，但相信d錢都無咩機會拎得返。

我份工受到疫情影響，呢九個月基本上收入已經大不如前，每月大約萬五蚊左右。十二月保就業完左，人工只會得返一萬蚊左右。

我四月有幾份保險要交，總共年繳約五萬左右，而家會努力用之後果幾個月既人工儲起交保費既錢。

而家一切清零，我想問我之後點部署先最適合？

本身預左我五年後可以儲到六七十萬左右買樓，但而家咩都無曬，又要重新來過。

我諗我都可能要多額外三四年先真正上到樓。
好sad呀，只能怪自己蠢。

之前跟呀sir建議月供比亞迪，賺左既錢都比人呃埋，係一個好昂貴既教訓。

龔成老師：

報左警，就由相關方面處理。

事情已經發生，這都無辦法，只有當學習，令你之後投資等各方面都小心D。

雖然這刻由零開始，但你已經有知識、經驗，因此情況已經不同。

你由基本的儲蓄開始，到一定備用現金後，就開始投資股票，月供盈富（2800），如果想高增長，就月供安碩恒生科技（3067），可長線的。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂，因此，這刻不能大注投資。最好的策略，就是月供，或自行分注小注慢慢收貨，原理如同不斷儲貨，這樣就能平均買入價，減少風險。然後就長線持有。

現時只有一步步做。

或者你可以想方法增加收入，例如做小生意，做佣金類工作，都是方法，要相信，方法總有的！

------------------------------------------------

Q19213：

成老師，可惜遲左接觸你嘅page，我原本係$198有買入港交所，但係$29X就放曬。如果早小小認識你個page我或者唔會放

我依家861嘅持股平均價大約$6.6，你覺得我應該賣出，還是等回本先？麻煩曬

龔成老師：

這都是學習的一部分，只要之後持有優質股，長線，就得。

我想教翻你少少概念問題，我地持有一隻股票與否，關鍵位是企業質素、前景，不要被買入價影響。買為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

因此，股票持有與否，重點不是買入價、賺蝕。

神州控股（0861）主要從事大數據運營、物聯網及人工智能業務，業務領域包括智慧城市、智慧產業鏈、金融科技、智能製造、智能農業、智能運維、量子通信等。

都是有前景的行業，長遠有發展，不過，業務就有較大的不確定性，始終行業結構不穩，變數大。

過往盈利增長不差，不過就有少少波動，這是企業的風險所在，股本回報率不高是扣分的地方。

整體來說，業務長遠仍有發展，不過現時估值唔算平，投資投資值博率只是中等。長線投資都可，但就唔值得佔組合比例太多。

------------------------------------------------

Q19214：

你好阿sir, 唔好意思又要打攪你，最近試用你上堂教的程式篩選優質股方法，搵到一隻初步睇唔差的股 海螺創業 （0586）,想問下你意見。

我用企業分析表頭兩頁分析，5年財務數據合格，其中ROE同盈利近2年快速增長。但有個問題係，海螺創業主要盈利不是來自主業務，而係聯營公司海螺水泥

海螺創業的環保業務比較新，市場仲係初始階段，如果有海螺水泥呢啲發展成熟的企業支持，其實係咪可以視為一個優勢？

因為我都簡單分析過海螺水泥，絕對是一間不錯的優質企業，海螺水泥有規模、網絡、現金流強，負債不高，雖然預期增長力會減慢，但平穩增長相信仍然可以。

而海螺創業的主業務，近年發展出最賺錢的兩個項目為固廢處理和爐排爐垃圾處置，2項都在高速增長中，建設中及待建項目都唔少

日後營運收入會改善，年報中亦都指出以上兩項將會是未來核心發展項目。海螺創業有投資研發技術，現有垃圾處理、垃圾發電等技術水平亦不錯，相信可以提高行業競爭力。

我亦用光大國際 （0257）作比較，從年報中得知光大國際業務中有多項環保項目，而最賺錢的正正是垃圾焚化發電，海螺創業專注發展爐排爐垃圾處理可以更有力搶佔市場。網上資料顯示

中國垃圾焚化發電行業近年開始技術成熟及加快增長，成為最主要的垃圾處置方案，而行業可處理垃圾能力遠遠未達實際需求，反映行業仍處於增長期，加上近年中國愈來愈注重環保，國策大方向支持下有利行業發展。

綜合以上分析，海螺創業財務狀況、行業前境大致不錯，負債近2年增加較快，但應該係因為投資增加所致，暫時還是可接受。

由於行業始終較新，未來能否保持高增長，或者會否有新技術令行業改變是未知之數，而且行業的賺錢能力能否達預期亦是風險之一，可以講係有危有機。如果投資呢一刻唔會太大注，現價估算應該約處於合理區中上部，回返10-20％先分注入會更有吸引力。

唔知阿sir對此股點睇，有無潛力成為倍升股呢？有啲長編，先謝過阿sir！

（另附上企業評估表）

龔成老師：

你的分析不差，都講出了企業的重點，當你分析到海螺創業（0586）憑著海螺水泥（0914）而得到盈利貢獻，你就要同時分析海螺水泥，了解翻這公司的業務情況，是否本身的生意不差，是否對你現時分析的海螺創業有正面影響。

從本質未說，0914有質素，有增長力。佢主要從事生產和銷售熟料和水泥製品，業務地區包括中國東部、南部、西部、中部及海外。而安徽海螺是水泥行業中，全球最大的單一品牌供應商。

雖然增長力未必好強，但整體不差，所以，0586都會因此而利好。

我見你的分析及企業評估表都算做到分析，但就未夠深入，例如你要同時分析0914，以及從非財務數據方面，去了解這企業之後的發展。

評分大致正確，方向無問題。定出的投資策略都可以進行。

整體來講，海螺創業（0586）前景正面，佢整體的發展不差，生意與盈利都有理想增長，財務數據理想，負債不多。

佢係一家節能環保解決方案的綜合供應商，主要集中運用於水泥行業，並計劃提供具有節能環保特點的替代型綠色建材，雖然股價升左唔少，但由於盈利有實質上升，因此仍未算貴，只算合理區中上部。都有長線投資價值。長遠倍升都有機會的。

希望你可以更深入分析這股，等自己更了解後，才買入。

------------------------------------------------

Q19215：

龔sir,想問6988 ,1566點睇 ?
同打算入 9988 ,823,1810長 放 合理價可幾$入啊?
謝謝!!

龔成老師：

樂享互動（6988）是中國的效果類自媒體營銷服務提供商，利用商業智能技術為行業客戶及自媒體發佈者提供服務。

睇翻近年的財務數據，佢增長力是有的，但上市前的數據參考價值較低。

相信佢長遠，業務都有增長力的，公司話佢自己能盈利高增長。但就唔平，小注持有可以。

華夏文化科技（1566），投資價值則不高。

至於另外3隻，都是優質股，阿里（9988）$250以下較合理，小米（1810）$20以下較合理。領展（0823）現價在合理區，已經可以分注。

------------------------------------------------

Q19216：

點睇春立醫療？呢排回左好多

另外都想問埋愛康，成哥點睇呢兩隻股?現時是否兩隻股入市既好機會?

龔成老師：

春立醫療（1858）長遠有發展的。

佢主要從事以自有品牌「春立」研發及產銷植入性骨科醫療器械，產品包括：

（１）標準關節假體產品：主要包括髖關節假體產品及膝關節假體產品，用於治療骨關節炎、類風濕性關節炎
及其他疾病。

（２）定制關節假體產品：分為傳統定制關節假體產品及組配式定制關節假體產品，主要用於治療關節骨折及
其他原因所致的關節損傷或骨缺損。

（３）脊柱產品：包括頸椎前後路固定系統、胸椎固定系統及腰椎固定系統，產品適用於退化性疾病、脊柱疾病、畸形、骨折及其他病理原因所致的背痛。

佢係關節醫療器械技術有一定經驗，受惠於未來人口老化對醫療用品需求、醫療器械納入醫療保障等因素下，此股有佢架投資價值。

集團盈利由2015年4000萬，升至2019年2.4億，升近數倍。但主要升幅來自2019年，所以盈利增長唔算係平穏，同時間也推高了近期股價水平。

現時比之前合理翻D，但仍未算平，此股雖然有投資價值，但都有不確定性，不宜持有過多。不過近期有不利消息，醫療材料降價超預期，相信會影響佢一段時間，要觀察賺錢能力會否持續有影響。

愛康醫療（1789）本身不是無質素的，只是之前炒作太多。

這股經常處於少少貴的水平，這是最大風險，就算現時，都成30倍市盈率。

睇翻最近情況，自2018年「4＋7帶量採購」開始後，令醫療材料開始降價，降幅基本在50%左右，甚至更高，預計未來3年帶量採購在醫用耗材領域會持續，會常態化，影響佢的賺錢能力。

從長遠發展，這股仍是正面，但就算現價仍唔平。

------------------------------------------------

Q19217：

睇你你的Post，我開始月供5000蚊盈富，明白應該要長線投資，但我想知道如果我月供5年盈富，平均成本5年後跟那時的價格沒有太大分別

那這5年資產就沒有增值（只是收左股息），如再過10年都沒有太大分別，那起不是做不到財務自由？
求解，謝謝你

龔成老師：

如果目標為財務自由，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

所以，你這刻可集中在「平穩增長類」的股票，著重「增值」，盈富（2800）你預每年的回報，升幅連股息約8%-10%，因此都能平穩增長。

當然，這仍是未足夠的，你最好月供盈富的同時，留翻基本的現金，而這刻現金就是給你自行選股，以及把握時機進行投資，這樣，你的財富先有更強的增值效果。

------------------------------------------------

Q19218：

Hello 唔好意思唔個有冇人問過，想問老師點睇機械人行業的發展？

龔成老師：

相信長遠行業正面的，就算我屋企，都有用掃地機械人，我相信機械人可以做到的事情會愈來愈多，這可以有效減省了一些人力及時間，絕對有市場需求。

長遠正面，技術應用會更加廣泛。

------------------------------------------------

Q19219：

想問下，23年會開始供樓，居屋150萬，手上有50萬現金，有無高息股幫補下供樓？謝謝你

龔成老師：

你可以投資收息股，建立一個組合，但不建議將全部資金都投資，因為一定要留有一定的現金作防守，以備不時之需，以及若大市下跌，可以買平貨之用。

你可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

如果你能承受到風險，有些更有超過8%、10%的高息股，但股價就略有風險，要自己衡量，佐丹奴國際（0709）、中石化（0386）、互太紡織（1382）等（記住，股價略波動，只能小注）。

但要留意，現時股價只是合理，未到平宜，因此買入時宜分注，同時不能用盡現金。

------------------------------------------------

Q19220：

龔成老師，你好，想問下

我26歲，月入萬九，因為俾人呃所以借左屋企一百萬，同兩條銀行貸款 一條17萬 一條6萬，銀行個啲會係三年內清還

想問下我想還完銀行個啲之後五年內還埋屋企個一百萬，我應該點樣做好？謝謝

龔成老師：

你要一步步由基本開始，第一，儲蓄，要設定一個好的收支模式，每月都要有儲蓄。目的是累積「初期資金」。

第二，投資，這方面要睇你有幾大信心，如果你實力只是一般、投資經驗不多，就投資一些較穩健的股，如盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果較有實力，就可投資一些較高增長的股。

第三，你要盡力增加收入，你要開發不同的收入來源，兼職、小生意、做佣金收入工作等，要大膽試，可能會有突破。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。