我個女十二歲自殺（上） . 我有一個女，佢叫雯雯，佢係我嘅開心果，佢係我嘅全部。 . 老婆過咗身之後，我就一個人養大個女，佢今年先十二歲，我已經幻想過佢第日嘅老公，但諗嚟諗去，總覺得全世界嘅男仔都襯唔起佢。 . 我諗得太遠，雯雯就嚟讀中學，呢幾年我應該係教佢唔好早戀，專心讀書。 . ， 然後，雯雯跳樓自殺，死咗。 . 冇一個形容詞可以形容我嘅震憾同傷心，其實都唔需要形容詞，我平鋪直敘地講件事出嚟，你都會明白我嘅感受。 . 傷心之餘，就係無盡嘅困惑，雯雯點解會自殺？ . ， 雯雯冇留低遺書，佢就嚟升中，派位派咗一間心儀嘅中學，應該冇任何學習壓力。 . 我問過晒佢嘅老師、同學，確定佢喺小學過得好順利，同同學嘅關係好好，冇被欺凌過。 . 我拎住雯雯部手機，睇晒佢嘅每一個訊息，一切都好正常，佢冇提過想自殺。 . 但我從手機記錄中發現，雯雯自殺前，Del咗一個Apps，係一隻叫「甜甜心心」嘅手機遊戲。 . ， 我下載番「甜甜心心」，我諗，雯雯會唔會同遊戲中嘅朋友講過心事？ . 我登入雯雯嘅帳號，仔細研究「甜甜心心」，主角可以整甜品，可以買衫襯衫。 . 雯雯生前都有同我提過，佢玩緊呢隻Game，我嗰陣掃咗兩眼，見啲畫風咁卡通，冇色情冇暴力，明顯係啲細路女Game，就畀佢玩。 . ， 但依加，當我仔細研究呢隻Game，我就發現有少少唔妥。 . 隻Game冇唔妥，但雯雯嘅帳號居然係VIP8，儲值五百蚊先可以做VIP8。 . 我記得，幾個月前，雯雯同我講過想課五十蚊，買一套咩甜心套裝，我當然冇畀佢課金，咁細個就畀錢打機，大個仲得了？ . 所以，雯雯應該係冇課過金，咁呢個VIP8係點嚟？ . ， 我研究咗好耐，突然間，有個叫「心之美人」嘅好友私訊雯雯隻角色：「上次講嘅嘢……你考慮成點？」 . 佢哋上次講啲咩？可惜遊戲嘅私訊冇保留記錄。 . 我沉住氣答：「我唔知丫，未諗好。」 . 心之美人就講：「咁啦，買多套『粉藍美鑽套裝』畀你，出到嚟就買。」 . ， 我即刻去商城搜索「粉藍美鑽套裝」，大概要三百蚊。 . 雯雯嘅VIP8，就係心之美人課畀佢？呢個人點解會課金畀雯雯，雯雯有冇見過佢？ . 搜索商城嘅時候，心之美人再發訊息過嚟：「你唔肯嘅話，你啲相我就分享畀大家睇㗎啦。」 . 然後，心之美人Send咗兩張相過嚟，兩張相都用小畫家畫到花晒，但我仍然認得，背景係我屋企嘅廁所，雯雯喺廁所自拍……冇著衫。 . ， 嗰一刻，我幾乎嬲到爆炸。 . 我知道真相啦，就係心之美人用遊戲儲值，引誘雯雯影裸照畀佢。 . 然後佢就用裸照威脅雯雯同佢出街，佢想做乜嘢，大家都估到啦。 . 雯雯解決唔到呢件事，糾結之下，跳樓自殺。 . 呢個禽獸！雯雯先得十二歲咋。 . ， 我一定要殺咗佢！ . 我馬上覆佢：「咁好啦，我哋喺邊度見面？」 . 「上次咪講咗囉。」心之美人覆。 . 我唔知佢上次講咗啲咩，只可以話：「我唔記得咗。」 . ， 心之美人冇覆我，好快就下咗線。 . 我個心一涼，我不斷祈禱，希望心之美人再次出現。 . 但我等咗幾日，佢嘅帳號都冇再上過線。 . 佢一定係發現咗破綻，或者係因為，我唔記得佢哋講過嘅嘢；或者係我嘅語言習慣同雯雯唔同。 . 總之，佢知道我唔係雯雯，佢唔想搏，亦唔會再用呢個帳號。 . ， 我去咗遊戲公司，用之前嘅聊天截圖，逼佢哋交出心之美人嘅資料。 . 遊戲公司嘅經理深表同情，然後交出一個「a5678987」嘅帳號。 . 我問：「得個帳號？」 . 「係啊，依加註冊遊戲，只需要填帳號密碼。」經理話：「呢個玩家嘅行為嚴重違反遊戲規定，我哋會將佢封號。」 . 「唔好封號，封號就打草驚蛇！」喺我強烈要求下，經理應承唔封號。 . ， 但係，只有一個無意義嘅帳號，咩資料都冇，我點可能搵到心之美人？ . 我思考咗一晚，我推斷，心之美人有戀童癖，佢習慣玩一啲幼稚嘅遊戲，去引誘細路女Send裸照。 . 呢次佢雖然懷疑我，唔再上線，但我既冇報警，佢個帳號都冇被封，唔至於嚇親佢，佢應該會繼續做呢種禽獸不如嘅事。 . ， 於是，我辭咗職，全職打機，全職幫雯雯復仇。 . 除咗「甜甜心心」之外，我仲搵咗幾隻細路女鍾意玩嘅遊戲，每個遊戲都開幾個帳號，以一個十一歲女仔嘅身份，努力去玩。 . 好快，就有人私訊我，問我想唔想儲值，叫我影啲相Send畀佢，初時係正常自拍，之後嘅要求就愈嚟愈過份。 . 待續... . 頭髮食人：https://goo.gl/Tf2883 複製人之城：http://bit.do/faTnU . #短故 #短篇 #小說 #陳美濤 #廣東話 #粵語 #tomatochan #我個女十二歲自殺