關於性騷擾同埋女性身體自主嘅部份，我諗連日嚟都有好多討論，我分享一下自己對自己身體嘅睇法，唔係咩學術研究，大家有興趣都可以留言話我知你嘅觀點。

由細到大，阿媽都話我唔肯飲木瓜牛奶，導致心口塊肉發育得唔好。（btw木瓜奶有無科學根據??）亦曾經有一段時間，我剪好短嘅頭髮，打扮得好中性，連身邊嘅朋友都一度懷疑我打算做TB，又或者喜歡女性。其實喺升中學果排，有位師兄對我上下其手，於是我決定打扮得男仔頭一啲，以為咁樣就唔會有人再摸我。當時你以為我心口有肉？無㗎，啱啱升中學，又唔飲木瓜奶，點會覺得有人會用「摸吓會大啲」呢啲藉口嚟摸你？自從我中性打扮之後，多咗男仔朋友，多咗女仔朋友，更唔再有人摸我😆呢招幾好，係令阿媽擔心咗啫。

與其令阿媽心痛個女俾人摸，不如擔心我做TB。

我當時係咁諗嘅。

再大個啲，認識咗好多人，發現個世界好大，乜原來身體係咁㗎？乜原來性係咁㗎？乜原來自己有得揀？我都呆咗。有好好嘅朋友教我點樣尊重自己嘅身體，發掘自己嘅靚，包括指正我戴錯胸圍，而唔係唔飲木瓜奶啦😆🙈。後來同一班女仔分享，發現點樣對待自己，原來係有得揀，有得say no，喺人哋對自己評頭品足嘅同時，我哋都可以對男仔指手劃腳。曾經有位身材好靚嘅女仔話我知，佢鍾意展露靚嘅身材俾人睇，鍾意po靚相上網，但唔代表佢係淫賤，唔等於大波無腦，佢嘅一段說話令我印象深刻，從此對大波妹改觀。拎對波出嚟俾大家欣賞，勾起大家嘅慾望，唔等於佢cheap佢無內涵，追求靚嘅嘢並唔係錯，佢為咗一副靚嘅body付出嘅努力、心機、時間、汗水，絕對唔係膚淺嘅人眼中嘅cheap。

係呢位女性朋友令我覺得，我要對自己好啲。

於是我買返啱嘅胸圍，練返少少肌肉，唔再亂咁減肥，就算肥都肥得好靚。我以為靚嘅body係對自己嘅追求，令自己滿足，只係唔小心地（少少刻意地）滿足埋我另一半❤️😆。不過無人知～因為我好鍾意著鬆身衫，舒服囉，暖囉。我唔習慣著緊身衫，唔喜歡戴push up bra，因為一push就好緊好攰，講嘢都好似無咗個腦咁，講真，我永遠都去唔到人哋靚body嘅地步同埋境界，D E F G呢啲對我嚟講只係chord而唔係cup，既然係咁，我亦樂於做一個無乜身材嘅村姑，樂得自在。我可以著好多衫去保護、保暖，亦可以除好多衫去滿足我自己或我愛嘅人。

身體在我而言，就係一個我可以隨意對待，但無人可以指手劃腳嘅存在。

作為女性，我知道我哋其實並非弱者，但當有人對我哋指手劃腳之際，往往會因為對自我嘅唔認識、對身體嘅誤解，甚至係對指控而下意識感到遲疑嘅時候，無法為自己嘅權益挺身而出。

#我被人喺港鐵撞過胸
#我被人喺巴士摸過大脾
#但我無出聲

因為我唔肯定對方係咪有心定係無意。

更驚會聽到：

#係摸都唔摸你啦豬扒
#你又無波我點撞你呀
#甚至係旁人冷漠嘅眼光或恥笑聲

呢啲嘅擔心同害怕，唔係亳無根據㗎。我哋會喺雞排妹嘅新聞下面見到大量嘅評論，「博版面」、「炒新聞」、「為什麼不提告」、「當下為什麼不講不舒服」，不論男女都會對佢指手劃腳，一個藝人就算內心幾咁強大都會覺得難過，更何況係一個普通人？當我哋大大聲講出被性騷擾嘅經過而會遭到好多質疑嘅同時，有無諗過有一班正在受到欺凌嘅人，水深火熱之中，我到底應唔應該講？應唔應該大嗌？應唔應該勇敢一次去保護自己？

更令我感到擔憂嘅係，唔止女仔，我相信有好多男仔都面對過性騷擾嘅問題。

而好多男仔都會擔心自己講咗出嚟會俾人笑，甚至會為咗避免成為受害者而加入成為加害者。我喺電視台工作期間都曾經成為過加害者，因為你要喺一堆黃色笑話中存活，你就要學識比其他人更黃更深入，佢唔夠你黃自然會收皮。當你表達出「咦～」尷尬或者面有難色，只會令佢哋更興奮，當你正氣凜然拒絕不雅，只會令佢哋指責你「玩唔起」、「老正」，背後議論你「假正經」。曾經因為我無做到某件事，令我後悔至今，有位女同事喺開會嘅時候表示過受到性騷擾，一班同事嘩然，當時我喺會議中，見住呢位女同事欲言又止，因為大家嘅嘩然又漸漸細聲，無法想像佢當時用咗幾耐儲咗幾多勇氣...事後我只有輕輕講咗一句「性騷擾係好主觀嘅感覺」都被其他人望住，我質疑我自己，係咪我幫口都係我唔啱呢？我唔黃係咪生存唔到呢？於是我變成咗其中一位加害者，我繼續沉默。

至今我仍然反思，我當時，點解無企出嚟。

哪怕只有一個人幫口，哪怕只有一句支持，佢都唔會感到尷尬難過。當然佢勇敢講出嚟之後，所有同事都對佢避之則吉，無人開佢玩笑，亦無人接近佢。世界又好似回復返平靜。但我個心泛起漣漪，時至今日，都難以平靜。私下我會同啲師妹、朋友、後輩講，點樣先可以保護自己，但遠不及雞排妹嘅勇氣，佢嘅舉動真係令人反思好多嘢，呢一行係咪只有低級趣味先係趣味？無論男女，喺唔舒服嘅當下點樣令當事人停手？係咪只有鬥黃，先可以令自己好過一啲？

唔好誤會，我私下係可以很黃很暴力，好講得笑，完全no hard feeling，性對我嚟講一啲都唔尷尬，已婚婦女心態係咁㗎啦。

只係人大咗，想知道點樣做，先可以保護自己保護他人，令身邊嘅人唔會感到唔舒服。

#歡迎大家討論
#唔嚴肅嘅
#張相左邊係表達緊我算有容奶大
#張相右邊係表達緊我好少拎出嚟
#感謝你哋睇到最後
#我會繼續食肥自己
#keepfatstaystrong

[我的結他故事系列: 向現實妥協]
=================================
那一天我們會飛入面有一句金句：
香港唔係比人發夢嘅地方嚟。
的確，香港真係唔係比人發夢嘅地方嚟。
土生土長嘅小朋友永遠都係比人灌輸成績等於一切嘅概念，
由出世開始就係跟住個世界嚟走，
從來都無自己發夢嘅權利。

我細個有學過幾樣古典樂器，
細個嘛，唔覺得係咩一回事，
有阿爸阿媽比錢我學，
練唔練都無所謂，
就算我中意音樂，
我去上嗰啲樂器班都唔係自己想去發嘅夢。
結果父母見我練得唔開心，
就無比我繼續學。

成日都話：
人要經過一啲事情，
先至會學識成長，
對自己負責任。
經歷過屋企嘅問題，
無人可以幫我分擔痛苦，
我將情緒寄托係信仰同音樂之上。
拎住一把平平嘅旅行結他仔，
由咩都唔識亂彈開始，
到依家都叫做可以係教會入面帶下詩歌仔，
無人迫嘅興趣先至係自己一世都唔會放棄嘅嘢。
不論開心失望痛苦興奮無聊喜怒哀樂...
都可以有佢陪我，
即使只係自己自學無人教，
上網搵chord 譜 fingering 譜，
一步一步行，
始終可以彈到。

本來有機會我可以好好發夢，
但係我無要到，
我向呢個社會嘅價值觀妥協咗，
如果當初我有立定決心，
日日練，練到天昏地暗，
或者遲咗起步嘅我都會有夢境成真嘅機會。
但係我選擇咗做長輩們眼中嘅成功人仕，
因為佢哋覺得
「玩音樂無錢途架！」

依家我已經過咗發夢嘅年紀，
大學入咗一科人人都話有前途嘅科目，
但係夢想離我愈嚟愈遠，
細個以為自己好特別嘅人生，
其實已經慢慢走上同普通人一樣嘅路。
依家嘅我，
只係可以自己得閒嘅時間，
可以彈好把結他佢，
只少帶比自己少少嘅不平凡。

可能比起好多人嚟講，
我已經好好，
有把細細嘅結他，
未至於冇得玩。
希望得到呢把結他嘅原因
只係因為希望自己可以習慣番彈正常size 嘅結他，
唔洗之前番到教會唔慣成日㩒唔啱位，
順便希望換支靚啲嘅結他。
其實都預咗自己今次拎到嘅機會唔大，
只不過希望寫個故事出嚟，
多多少少有啲小朋友睇到，
唔好好似姐姐咁細膽，
唔好放棄自己發夢嘅機會，
唔好咁容易向現實低頭。

如果我仲有少少發夢嘅機會，
雖然有機會令唔少人失望，
好似有大好前程都唔要咁，
但係我都會去行，
可惜... 只係如果...
=================================
到底，香港有幾多人，心底想做的事，同現實做的事是一樣?

[我的結他故事系列：C chord 就像初衷]
=====================================================
Dickens老師你好
你或許不知我是誰
但我卻知道你是誰
是你讓我學會我人生第一個C chord的
我稱這個為C和弦的故事。

我是一個因暑假無事幹而屎忽痕學結他的女孩。與其他學樂器的人不同，我家並不富有，我第一次"摸"結他是朋友那封塵已久的結他;我沒有上過任何樂器班，我連基本的樂理知識drmfslt也未分得到，連一首歌是啥key也不懂; 我沒有特別優越的器材，我第一支結他是一部不過二百元的普通結他，我第一個capo是我學會彈一個和弦後的半年才買的。可能有人說工欲善其事 必先利其器，但我總不認為價錢低等於價值低。別人眼中的低等貨在我眼中卻是寶貝，那時的暑假我每天的事就是看著你的新手教學日練夜練。我認為我對音樂這回事並沒有天份，至少，一個最基本的C和弦也足夠讓我學上一個星期，而一個Bm竟然練上半年才勉強轉到。我還記得，那半年，我只能彈所有C key的chord，因為上面也告訴過你，我那時還未買我的capo。
讓我決心由半桶水轉為認真mode的 相信是教會的司他服事。那年十月的某一次聚會，一位組員問我:你不是會彈結他嗎，下星期你幫我忙彈敬拜吧！
就是這樣的一句，在下星期六前的五天，每晚放學後就是練習轉換和弦，我還記得，那首是將天敞開，一首G key的歌。對吧，叫一個連C chord也不知花費多少個寒窗的人來說，這簡直是開玩笑，因為最大的障礙還是那個，Bm ，一個尚未跨過的關口。但我告訴自己，沒有不可能的事，只有不可能的人，而那個人絕對不是我。
就是這樣，奇妙的事發生了，我不但完成了那次的敬拜，而且直到今天，我依然是小組的司他手，一個終於彈到Bm的結他手。終於，我擁有了結他者的護照 - 手指變得不平滑，這個對女孩子來說始終是個遺憾。但我知道，這條路走上了，就是跪著也要走完。
對於現在的我，C chord當然難不到我，但我每次按著C chord的時候我都會記得那天我為了成功按到C和弦的熱衷，都會記得是小學雞結他網教會我的。
最簡單的是最難的
最易忘記的是最值得記住的。雖然C chord是基本，但我每次按到，都像提醒我，我為何要彈結他，是為了誰彈。對著普通人，我會說是為了自己而彈，但對著自己，我會說是為祂而彈。
但祂帶我這個小學雞看到小學雞，學到小學雞，彈到C和弦。
謝謝祂也謝謝你。現在的我有了第一部結他，而第一部結他我也跟一個有心學習的友人分享了我的故事然後送給她了，我希望每當我會換一部更適合的結他時，能將精神傳承，這是我一個少少夢想。
故事說到這裏已經分享完，上面所有提及的褒獎並不是為了得到jab而特地誇大，更不是想為了得到你注意，而我這個平凡的女孩亦不希望會被別人所知。我只是單純希望看完之後會令你有過半秒的鼓舞，原來你所做的都沒有白費過，我相信不只我一個是因你而自學成功的，只是剛好我能有一個這樣的機會告訴你。
C chord 就像初衷，一個最起初而又最易遺忘其重要的和弦，提醒著你我最初那份熱誠。
=====================================================
生活真的很多磨難，人很容易忘記最單純的初衷。
謝謝你啊，我會繼續努力啊。