【龔成問答信箱】（Q21521-Q21540）

Q21521：

老師,我受持1826（已停牌）。請問以下是甚麼意思? 我應答應嗎? 我$2.2買的

『中國銀河國際證券（香港）有限公司代表要約人提出有關收購旭通控股有限公司（股份代號：1826）全部已發行股份

（要約人及其一致行動人士已擁有或同意將予收購者除外）的強制性無條件現金要約，每股 0.158港元』

謝謝老師

龔成老師︰

這個要約，代表有機構想收購你手上旭通控股(1826)股票，作價為每股HKD0.158。

至於答應與否，我地要從資產角度考慮。如果企業係有質素，長線有升值潛力。你接受要約，就等同放棄優質資產，換回只會貶值的現金，係不值。

所以，你要先了解企業本質，去再決定。

旭通控股(1826)主要在香港從事提供金融相關信息及技術服務；新發展工程之承包服務等。

集團在2021年3月31日表示，因核數師對其2020年度的綜合財務報表發出不發表意見，故暫時停止買賣。

在為投資者，而一刻係無野可以做。而一刻未知背後原因，所以好難話會唔會可以復牌，只能說機會係有。

但睇翻本身質素，唔算係好高，而且公司規模好細。過往股票都十分波動，這類股票最多只宜好小注。

此股唔係完全無價值，但不算高，加上有一定風險。暫時睇，接受要約會係較好選擇。

------------------------------------------------

Q21522：

另外想問老師，新年前科技股大升好勢時，十年投資回本了，也有少少賺，但現在科技股回調，又倒蝕番，所以之前有少少唔開心，後來再聽老師FB，再想想自己組合內的股都不是有問題的公司，所以會繼續持有

但想進行一些調倉，之前買了京東健康及微盟，近排跌了不少，想溝少少（占倉不大）所以想放1手美團（共有3手），唔知咁樣操作如何？

龔成老師：

第一，平常心對股價，股價上上落落好正常，你唔好太著重，最重要是企業長遠的發展與價值。提高你的心理質素。

第二，我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

你要睇翻自己的持倉比例，是否，以及應該加多少新經濟股類別。

京東健康（6618）及微盟（2013）都有潛力的，但現價只是合理區頂至略貴，如果你這類股比例唔多，可買入，但不要買入得太急，要慢慢分注。

至於美團（3690）如果你持貨較多，可減。

記住，整個方向不是睇你的買入價、賺蝕。而是「優質度」「比例」。

------------------------------------------------

Q21523：

你好，我係最近先開始睇你fb，睇完想重新審視自己既股票，下面係我現在持有既股票：

- 港鐵500股@$43.15
- 匯豐400股@$75
- 電能1000股@$40.3

- 建行15000股@$6.6
- 煤氣4100股@$12.89
- 西部水泥40000股@$1.3

現在29歲，想請教下呢個組合會唔會太保守？有幾隻仲放咗幾年都仲蝕緊錢，覺得總會升番上去/蝕就收住息先，呢個心態係咪唔岩？

另外，見你話同隻股唔好佔太重比例，應該點計個比例（用錢/用股）？Thanks

龔成老師︰

首先，你見蝕，就收住息先，等佢上升翻。這個想法，是不正確的。

我地是否持有一隻股票，應該睇佢長線質素。所以，佢股價有明顯下調時，你就要睇翻佢山現調整的原因，唔好主觀咁「估」佢會升翻上去。

如果唔關佢本身質素事，純粹係中短期價格波動，我地就唔洗理。相反，我地發現係因為佢長線質素轉差，係而個時候，就算蝕多少，我地都要減持，甚至完全沽出所有持貨。

投資增值時，我地係會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你現時只係29歲，應先以增值為主。但你現時組合中，以收息股居多(0005、0006、0939、2233)。這些股票不是無質素，只係佢地增長力好弱，主要係收下息。

現時你持有太多，會拖低左成個組合的增長力。建議你慢慢分段沽出部份，換碼至以下有增長力的股票。

你將來可以用「平穏增長股」 + 「潛力股」作目標，去創建你的組合。

由於你投資知識不高，因此可較集中在平穩增長類股，至於潛力股，只宜小小注(約3成)。最好是你先提高投資知識，等你有一定知識，先慢慢增加翻潛力股比例(約5成)。

至於，我所講個別股票唔好佔過多。其實是指任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你長線要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於3成，而單一企業不要高過15%。

我地計算時，係用佢價值，即係你"股價 x 持有股數"。

但盈富(2800)就不受此限，因為它是一個包含55間優質企業的基金，這些企業來自不同行業。因此，盈富(2800)就算在組合中佔較大比重，都唔會造成過度集中性風險。

------------------------------------------------

Q21524：

龔SIR, 你好, follow你facebook有兩年了, 我好認同你的投資方法。

所以平時除左睇你facebook外, 亦買左《選股勝經》、《50值博倍升股》、《5年買樓4步曲》增加自己投資知識。

我和老公打算置業，過去幾個月先後到香港仔/田灣、大圍、荃灣睇過樓，睇左超過20個介乎400-450萬的單位，發現如下：

1. 如想買300呎左右的單位，樓齡通常較高，介乎38-42年左右；
2. 如想買20-30年樓齡，單位通常較細，得230-260呎；
3. 如想買300多呎+20幾年樓齡，地點就偏遠，在屯門。

我們感到矛盾，不知如何選擇，究竟買樓時要看樓齡定呎數，我已經睇左《5年買樓4步曲》，但都決定不了，所以想請教下老師，謝謝！

龔成老師︰

你現時發現這個現象，係正常。

在同一價錢下，想大點，樓齡自然會較高，否則只能找較細單位。要尺寸和樓齡都較理想，地理位置多數係較偏遠。

至於選擇邊間，先要睇翻你置業原因。若果係為投資，(2)的尺寸太細，不達至基本家庭生活所需，所以投資價值會較弱。而(1)和(3)都可以考慮。

若你目的係為自住，就真係要睇翻你自己本身生活需要。例如你長線會生小朋友，(2)就未必太適合。如果2位都係香港島返工，(3)就唔係咁理想。

所以，作為自住屋，那一個會較合適，只有你們才會最清楚。但記住，唔好單係考慮現在，要諗長少少，未來5-10年對你們是否都係適合。

最後，我地是否購入這間自住屋，除了睇佢適唔適合你需要外。緊記堅守「供得起」這個大原則，咁就可以。

------------------------------------------------

Q21525：

龔老師，我無投資經驗。

有3.5m cash / 有層8.5m 既樓

兩公婆月入 10萬，每月洗費一共6萬左右，其餘都係草起。

兩人大約30歲，想愈早退休愈好。只係草，無投資，驚輸晒。

你有冇小小建議點出發 開始錢搵錢？

龔成老師︰

其實你只儲錢，不做投資增值，本身已經係輸左。因為現金只會一直貶值，令你這筆現金的購買力一直減少緊。

所以，你長線一定要建立一個財富增值組合，令財富保值之餘，都有一定提升。

我地進行財富增值，其實就係將一直貶值架"現金"，轉換成"優質資產"的一個過程，佢可以係股票、物業、一盤生意等等。

由於你已經有一間物業，為免令組合過份集中係物業類，造成風險。你350萬現金，我地應用優質股，去創造一個增值平台。

以你大約30歲，可以選擇一些「平穩增值股」+「潛力股」作投資目標。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄，另一半就先儲起架策略。

你現時投資知識不高，可先集中在平穩增長類股，至於潛力股，只宜小小注(不多於3成)。此期間，你最好是努力提高投資知識，才慢慢增加翻潛力股比例(約5成)。

但你要留意，潛力股有增長潛力，但股價波動性都唔細。如果你想再保守D，可以先全數投資「平穩增值股」都可以。你自己因應個人風險承受能力，去修正係無問題。

現時你的350萬就先動用30-50萬，餘下的現就等你累積一定經驗，才動用入市。如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q21526：

阿sir我59歲,以下是本人的投資，請给意見。
700,100股，已收回成本。

388, 200股$196.6
9988, 200股224
1810, 1800股$19.6
3067, 500股$20.25
2382, 100股$196.8
2800, 1000股$27.03

5, 800股$58.9
939, 4000股$6.165
3988, 9000股$3.225
884, 2000股$6.1
1313 ,2000股$8.72

有部分16年持貨至今，現想將5号和3988沽出，換入中银香港，請給意見

是否太多，太散，發覺散户十大犯錯之一，神聖價位，自己就犯咗啦！時常睇住當年7OO，388，$19幾入，就當這是神聖價，要見番才入，於是將資金入其他，越買越多，其實心想入5至6隻，又不知如何選擇，好股可奇多，怎買得哂，請阿sir指点

龔成老師：

你59歲，以這年齡來說，潛力股不應太多，除非你本身是較能承受風險的人。否則，你可能要調整翻，起碼都唔好再加注在潛力股。

只一方面，銀行股比例太多，你這年齡，的確可以有一定比例的收息股，但就不能只集中在銀行股。建議你慢慢減持翻銀行股，同時，可以加入其他收息股，例如港燈（2638）、深高速（0548）、香港電訊（6823）、置富（0778）、陽光（0435）、高息基金（3110）都可以。

其實你持有的股票，基本上都是有質素的，因此，本身選股的問題不大，只是配置上的問題。

------------------------------------------------

Q21527：

阿sir,現有問題想你幫助。兒子現年26歲，有一份穩定工作’在員工合作社，每月供15000元，利息三厘。以前跟同事買牛熊証，有小小收穫。

但沒時間跟，我勸他不要投機，他也聽我說話。
然後他於$295，買了一手9988。＄52買滙豐二手。点知又不派息。

最近入了小米5手＠27.5,中移動1手@55，亞厘爸爸1手@225,全部下跌。

最近他很灰心,懷疑自己不適合買股票,問我怎辦？
他可以每月剩1萬元,員工合作社剩5仟元，有甚麽投資組合建議？多謝解答！

龔成老師：

第一，唔建議佢再投資衍生工具，發行商食水好深，唔好再做水魚。

第二，不要用短期股價去衡量投資成績，要用長期的企業價值分析。

第三，佢要懂得建立一個平衡的財富組合。要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

佢持有的股票，並不是無質素的，不過以佢的年齡，收息股就不用太多。另外，佢部分股的買入價略貴，令佢買入後股價下跌，其實本質無問題。

建議佢從「設計長遠的投資組合」著手，而不是著重這刻的股價。

------------------------------------------------

Q21528：

老師，2018，3319，590，3918呢幾隻股票，值博率同合理區邊隻會最好？

龔成老師︰

現時4隻股票，都算在合理區。但當中六福集團（0590）算係合理區中間。

另外，要留意瑞聲科技（2018）本身已有一定的規模與技術，長遠發展正面。不過，佢增長力不是好強，你預佢只係平穩增長類別。

金界控股（3918）畢竟是在新興市場，不確定性較大，在注碼上不能投資得過多。

雅生活服務（3319）不錯的，佢無論在業務本質、規模、品牌、財務數據、前景，都是理想的，反映這企業有一定的質素。

加上這企業的背景因素，以及行業的發展，相信這企業的前景不差，有長線投資的價值。

整體是有長線投資價值的。現價合理區中上部，不過股價都會有時出現波動，投資宜分注進行。

如果你能承受風險及控制注碼，金界值博率會較高，另外，雅生活服務都有投資值博率。

------------------------------------------------

Q21529：

我有點問題想問︰

1. 如果想去評估一啲未有盈利，但有前境嘅新經濟股， 係咪要進階課程先有?

2. 如果想評估一啲企業上市未夠5年 ， 但係有盈利 ，例如小米，( 我睇你書講話要睇五年)，

咁如果呢啲公司未有五年報表， 基礎課程幫唔幫助到去評估?

龔成老師︰

【基礎班】對象是初中階的投資者，5個選股方法、捕捉時機、投資策略、計平貴，會教3種企業估值方法、年報分析、3大財務報表，都有一定的內容，同時會派一份6頁紙的「企業評估表」給學員

【進階班】18種企業價值計算方法，年報全面分析，10倍股選股，研究企業，研究名財務報表，財務比率應用與分析。

進階班可以話係基礎班的延伸。

1) 你讀完基礎班，會有一定企業分析能力。但要分析不同行業、不同性質的股票，進階班會有較全面的教授。

其實一些未有盈利的企業，用一般估值方法，都會較難得出一個穏當的答案。

因為，佢主要投資價值，都係來自「未來」，是一個未知之數。

但唔代表我地無野可以做，我地可以透過深入了解，佢現時財務結構、行業狀況等，去估算佢將來成事機會。

或者係成事前，集團有無能力，一直維持正常營運。例如有無足夠資金支持研發、市場推廣等工作。這些因素，我地都可以在分析財報中找到答案。

令我地係「估」算將來發展的同時，有較「踏實」的理據，在背後支持這個答案。

這些財報相關知識，進階班會有較詳細教授。對分析這類股票，較有幫助。

2) 這類上市不足5年、但有盈利的企業。你都可以用基礎課程的方法，去做個估值。但由於數據較少，我地就要相對保守。

投資時，都不能大注，以平衡不確定性的風險。

------------------------------------------------

Q21530：

A) 成哥，想請教下啟德住宅投資價值

1.近九龍東商業區核心區
2.沙中綫過海後可以係紅磡轉車
3.附近土地供應唔多
4.配套暫時未完善
5.夜晚行過都屬於靜中帶旺

B) 另外想問下沙田一城仲有無投資價值
1. 自成一國大型屋苑，生活配套設施齊全
2. 附近土地供應唔多
3.出九龍東核心商業區近
4.靜中帶旺

C) 如果我買樓用作投資，大約600-700萬左右。
灣仔
黃竹坑
大圍
沙田一城
啟德

D) 唔好意思，仲有一個問題。因為無人名既關係，所以我要比多15% stamp duty .咁仲值唔值得？

龔成老師︰

A) 你都講到大部份重點，其實政府未來會將九龍東發展成第二個核心的商業區，當中包括了啟德及周邊地區。

當未來更多政府或私營機構搬入東九，交通和生活配套日漸完善，都會對附近住宅需求，產生正面影響。

啟德絕對有一定投資潛力，係可以考慮。

B) 其實九龍東發展，除了啟德外，只相隔數個港鐵站的沙田區，都會有正面影響。

而且佢作為地理位置有優勢，沙田區是新界東與市區的連接位，在整個香港的地圖上，可以算是一個中心。

第一城作為大型屋苑，整體配套算完善。附近又有港鐵第一城站，交通便利度算唔錯。

故第一城都有投資價值，但潛力度，無啟德咁高。

C) 從地區上計，啟德升值潛力會較高。其次會係黃竹坑、大圍。

D) 現時香港樓市算係合理區頂，值博率本身已經唔好高。再加上有15%印花稅，令到回報再打折扣。

所以，而一刻我地唔需要急住去投資物業。你有資金，可考慮先用優質股增值，值博率會較高。

------------------------------------------------

Q21531：

老師你好！我今年將踏入27，我打算重組我個組合，然後長期持有。目標想年回報有15%up！可唔可以比少少意見。

3 （未持有）
66（未持有）
270（未持有）
788（～74.5%）
968（未持有）

1177（～4%）
1810（～4.5%）
1448（～4%）
3918（～5.5%）
9988（～7%）

1.之前入得太多788！打算賣出大部份轉至其他股票。如果這10隻股各佔10%成為我的組合，潛力是否足夠？

我想做到潛力股：平穩增長（7:3 到6:4間）

2. 我想賣出部份788後先入少量未持有既股票，然後留住2-3成現金加每月存錢等股價有機會下調再分段入，請問題這計劃可行嗎？

龔成老師︰

1) 個別股票，就算再優質都好，不要超過組合15%，否則會出現過度集中的風險。

所以，你要將中國鐵塔(0788)部份沽出，慢慢換碼至其他優質股。

你上述股票都有質素，每隻10%都無問題。

如果你想做到年增長15%，可以用這些股票，再配以你7:3或6:4比例。但你要明白，潛力股增長力雖高，但波動性同樣都大，你要明白這風險。

若你投資經驗較淺，我就唔建議你潛力股佔咁高比重。你可以先佔約3成，到你慢慢累積到一定投資經驗，才慢慢加大潛力股部份，會較為穏當。

2) 現時大市在合理區，現金和股票比例，最好係各一半。

你用賣出部份中國鐵塔(0788)的資金，為未持有的股票先入首注，係無問題。將來到股價有明顯回調，才慢慢加大入貨力度，就可以。

------------------------------------------------

Q21532：

龔成老師，

1. 想問下阿里爸爸既質素如何？尼排佢好多壞消息，但我認為佢基本面不差，我打算每月都儲d阿里爸爸，請問現價算貴嗎？

2. 另外，我想問多個問題，之前睇左你個金錢騙post，唸起最近aia的每月派息計劃，息率有8厘。我睇過資料，係買以下基金：

安聯動力亞洲高收益債券基金

https://hk.allianzgi.com/documents/hk-allianz-dynamic-asian-high-yield-bond-amg-factsheet-tc

入面既成份主要係買BB級或以上的債券，尼類投資既風險大嗎？因為基金吸引之處是每月派息，可以做到現金流，

但佢能派到8厘另我覺得可能有些風險冇留意到，所以想請教一下

感謝老師一直以來的回覆，不趕的，你安排好時間就回覆，而且是可以公開的。

龔成老師︰

1) 阿里巴巴（9988）有質素，有增長力，之前貴，現價去翻合理區。

係業務層面，擁有相當的優勢，不少業務處於壟斷狀態，同時增長理想。加上正不斷發展延伸業務，這都會成為企業增長的潛力，預期增長會持續，這是阿里最大的賣點。

以企業的長期發展計，這股的確優質，但股價都有一定的波動，現價算是合理翻D，但都不是大手時候。

始終將面對內地監管可能收緊，因此風險度增加左，不過，我相信佢的整體優質度仍在，內地不是不想佢賺錢，只是想規管佢。佢已建立好完善的業務，因此本身是無得輸，只是賺多賺少問題，現時監管多左，點都會影響賺錢能力。

對於這類優質、有發展，但現價未算特別平的股票，小注分注投資，或月供，是較好的方法，算是平衡了風險與增長的考慮。

這股可以長線投資的。預佢現價約合理區中上部。你月供的話，現價開始係可以。

2) 債券基金，坊間分好多種，你要小心睇，因為有d風險低，無乜問題，有d則有潛在的風險，絕對不是保本的產品，有機會出現了「賺息蝕價」的情況。

第一，有些基券基金，會投資「高收益債券」，即是「垃圾債券」，你一定要睇睇佢所佔的比率。

第二，債券基金往往不是單純地持有債券，而是可以作買賣，以及利用衍生工具作對沖等策略，即是可能有價格上的波動。

第三，不少銀行都會提供借貸，以槓杆去放大回報，以平息借貸去賺取息差。低息環境時間題不大，但進入加息週期，不止借貸成本增加，同時債券價格往往在加息期下跌，雙從打擊下，投資價值成疑。當然，若然加息步伐不快，息差利潤就可觀。

初步睇你隻基金，主要投資在內地房地產類的B至BB級債券。不論行業和評級而言，都係有一定風險。

佢派息雖然有8%，好似係唔錯，但你要明白一定風險存在。而且，你要了解翻，到底8%是否保證。

我不是說這債券基金有問題，只是說明當中的風險。而投資與否，就要你自己因應個人風險承受能力，去作出衡量。

------------------------------------------------

Q21533：

你好老師，我想問永利澳門(1128)和澳博控股(0880)，是不是長線持有，沒有問題？

因為已買了一段時間，可能當年都升高位買的，所以一直都升不回去，而且無股息。

但我看Facebook 老師有說過這兩隻都是有潛力的股，所以不知該不該賣出。

另外，找了幾間書店，才找到這本50優質潛力股。

龔成老師︰

永利澳門（1128）和澳博控股（0880）品牌及資產質素都不差，雖然中短期未必好強，但長遠仍是正面。

但你預佢地，唔會係高增長類，只會較平穏發展。

你現貨照長線持有，沒有問題的。

50優質潛力股在三聯、商務、誠品都有得賣，但有時會斷貨。所以，下次你見唔到想買我架書，可以問下職員（又或向職員訂都可以）。

------------------------------------------------

Q21534：

龔sir你好呀，有野想請教你。我朋友今年26歲， 佢做網上生意的 月入唔太穩定，但平均約有3萬多。由於佢份人好慳的，一個月佢大約可儲27-8k左右。

佢手頭大約有110萬cash，佢想請教你應該點配置好，佢想有最好既財富增長效果，應該買樓好(佢想買500萬樓下的樓)，定還是用來買股票比較好?

佢同我講 呢幾年買樓既人好好賺，一層樓平均持貨3-5年轉手賣出可賺百萬，但又驚黎緊幾年樓價會跌，因為受政治局勢等因素影響。

想問你點睇 如果佢將手上的錢用哂黎買樓，但咁樣做的話，之後每個月佢既錢都會所剩冇幾，因為拎左大部分錢黎供樓，未必有錢再投資股票。

唔該哂呀sir呀~!!

龔成老師︰

我地投資股票好、樓市好，都唔好用「估走勢」來做策略。我地應該用翻個資產本身的平貴度，去作為入市指標。

現時香港樓市，大致在合理區頂位。相比優質股的值博率，相對較低。從投資角度，我地應用優質股去增值較好。

除非你找到一個價廉物美的旬盤，否則先投資優質股，會對你較有利。

以26歲這個年齡，是財富增值的黃金時期，要好好把握，盡你一切的力量去儲蓄、投資、學投資知識。

由於你朋友收入不穏定，最好先預留一筆生意上營運資金，加半年生活開支，才開始投資計劃會較好。

你朋友可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。

平穩增長股：潛力股
7：3
（如果你朋友投資實力較強，可增加潛力股比例）

你朋友可先用每月5成儲蓄做月供，其餘先儲起，用一邊月供一邊儲蓄的策略。

平穩增長股：考慮盈富（2800）。

另外再加：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

潛力股：安碩恆生科技ETF（3067）

另外再加：阿里（9988）、騰訊（0700）、港交所（0388）、舜宇光學（2382）、小米（1810）、ＧＸ中國電車基金（2845）、中生製藥（1177），但就要明白波動性比上述會高左，同時風險大左，你要自己平衡。部分要等回少少先入。

現時大市只是合理區，現有資金可以先投入約一半，用"分注"形式，慢慢買貨。餘下資金和每月所儲倒的資金，就等大市出現一定程度的下跌，才大力度掃貨，然後長線投資。

若此期間，樓市有較大回調，或者有入市好機會，佢都可以動用這筆儲下來的資金。

另外，如果佢長遠有自住需要，就可以考慮投資物業，否則如果純投資角度，你朋友照我上述所講的方向進行就得。

緊記，我地做財富增值，係講緊成個配置。長遠你唔可以只有股票，到你用股票累積到一定金額。

你都要去找機會投資樓市，令成個組合唔會偏重左係個別資產類。

------------------------------------------------

Q21535：

龔成老師，請問你預計以下20年的月供計劃可滾存到甚麼金額？謝謝！

12,66,388,700,823,1177,1211,1810,3690,9988每隻各$2000，共$20000

龔成老師︰

我假設投資回報有10%（連股息再投資），你每月投資$20000，20年後大約會增值至1350萬。

但當然這只是個預算，到時實際多少，要睇到時市況而定。

你現時組合，有7成都係潛力股。若你係好年輕，本身都有一定投資經驗，而且都能承受較高風險，這組合係可以。

但如果你想風險無咁高，可以換入一些平穏增長股部份，令組合波動性減少。

平穏增長股：金沙（1928）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）、長建(1038)

另外，比亞迪(1211)現價偏貴，月供等佢回到$150才開始，會較好。

或者可考慮GX中國電車（2845），這基金的目標是追蹤Solactive中國電動車指數NTR「相關指數」表現緊密相關的投資回報。

持股中最重就係比亞迪A股（002594），以及與中國電動車產業有關的股票，中國因為能源問題，長遠一定要發展電動車，這是大方向，故此股有一定投資價值。

現時大市只在合理區，每月資金唔好盡用。最好留有部份，等大跌市出現時，可以用來掃貨。

最後，你要留意這個組合，唔可以長時間都維持7成係潛力股。因為佢始終有一定波動性風險，當你越年長，比例就要相應減少。

若你現在好年青，可以用你7成，並慢慢減少。到40歲要減至4成、到50歲應該只餘下2成、將近退休應該為0%。

------------------------------------------------

Q21536：

Hi老師。我有努力，同時都有無力感，唔知係咪方向錯，所以努力既回報好低效。

同埋我都幾介意，我屋企人成日係度比較，點解大學生出黎都搵甘少錢。

我個科要考professional qualification 先會人工高，我有放工就去自修室溫書，但一返到屋企聽到啊邊個子女搵5 6 萬，幾勁。

唔明，我既人工點解低過中學生，唔明讀書有咩用。

我係fresh grad後做左2年幾，因為公司上年凍薪，所以我人工唔高。我有少少衝動，有幾秒搵過一份更高既人工。

但唔會咁做，同埋佢地係重視錢。所以連我既男朋友都唔滿意，有俾說話我聽。

錢唔代表一切，我深知人工高，我屋企人先會俾番應有既respect。

龔成老師︰

我明白你點解會有這樣感受，因為你在正為默默付出，為將來打併，但身邊的人郤看不到。

其實，我地係股票、物業、以至投資在工作，我都睇的視野，一定係長線。

你現時人工可能較少，但如果這工作經驗，再加上你將來的professional qualification，會令你收入大幅提高的話，這個投資係絕對值得。

你現時所選修的行業，點去發展才最好，相信只有你才會最清楚。

我見你其實已有想法，而且已經進行中。只要你相信這條路，長線發展係會唔錯，你就唔應該太在意今天人工較少過個問題。

至於家人和男朋友，我覺得可以再理性溝通，或許他對你職業生涯規劃，未太了解，才會出現這個情況。

記住，我地係唔需要同別人做比較。每個人性格、目標、能力、背景都大不同。只要找到自己最想行的路，咁就可以。

------------------------------------------------

Q21537：

龔sir ,另外現時我想買樓，之前睇你著作（5年買樓4部曲）,有一點唔係好sure

因為我現時持有資金，夠2成首期，但我諗緊到底借按揭8成定9成，始終如果用曬2成做首期，手頭資金就會好緊拙。

諗緊好唔好按9成，但將餘下資金做投資or擺mortgage link...

我份工係穩定的，供樓沒問題

龔成老師：

如果你手上資金太緊，我建議用8成半或9成，因為你手上完全無現金，是危險，以及在理財上不是好事，反而有少少現金作防守，是必要的。

不過，高成數按，如9成，的按保費會較高，所以你可在8成半，或9成，之間選擇，如果想留多少少資金，就9成，寧願比多少少保費，留一定的防守力比自己。

餘下資金就mortgage link，唔好比自己無晒現金。至於投資，就要利用之後的儲蓄進行。

------------------------------------------------

Q21538：

龔成老師，我決定下月開始月供股票。想你給我以下組合意見。

安碩3067: ＄2000
盈富2628: ＄1000
小米1810: ＄1000
阿里9988: ＄1000
舜宇2382: ＄1000
港交所388: ＄1000
比亞迪1211: ＄1000

原本想包括騰訊，但好像＄1000只買得1.5股，好少。

另外有一問題，有沒有書籍或途徑可以令我了解市場資訊，而知道對往後股市或個別股票有什麼影響？

例如：美元或債息升／跌？加大QE？美國加息？加減中國存款準備金？

央行放水？油價？公司回購？配售等等
會影響市場什麼？什麼類型股票受影響？

你不用逐一解釋，我想知有什麼途徑自學了解，因為我不了解市場動向，亂入市好危險，麻煩你解答，謝謝！

龔成老師：

上述的組合，可以，這些都是有質素的股票，長期月供適合的。

不過要留意，當中不是都是潛力股類別，你要注意翻相關風險（並不是不可，只要明白在這情況就得）。

至於市場資訊，其實你每天保持睇電視的財經新聞已得，我已睇了20年，因為較為重點，比你自己睇網站更好。這個學習過程是長期的。

當然，個別名詞的意義，你就自己行上網尋找。

另外，建議你要有知識的基礎，《股票勝經》這書適合你的。

------------------------------------------------

Q21539：

你好阿sir, 留意左你個page好耐，亦有跟你平時嘅教導投資，月供股票同埋低位吸納一啲優質股（阿里巴巴$190買入）長遠投資。

最近見到 比亞迪 同美團 跌到巴巴聲，本身有月供比亞迪，唔知而家係咪好時機直接購入一啲貨，兩隻股票點解會跌成咁嘅？

我睇左好多新聞都唔係好明，求指教，另外阿里巴巴我覺得$240樓下都叫合理價位可以增持，你點睇？

謝謝！

龔成老師︰

其實佢地下跌的原因，第一，市場之前預期得太好，現時出來的業績與業務合理翻，股價就會回歸理性，第二，之前貴，因為之前新經濟股熱炒，而市場情緒正常翻，股價就會回落。第三，一些監管問題，近期中央對科網企業的監管增加，影響了這些企業，所以股價自然下跌。

簡單來說，企業長遠質素無變，只是之前市場預期得太好，現時理性翻。

上述都是有質素的股，你可以持有，只要不過多就得，但就要留意股價會較為波動。

比亞迪（1211）2021年首季收入，相較2020年首季增長逾1倍，接近410億元人民幣。

收入增長幅度雖然強勁，但要留意2020年首季，全球經濟活動，正受肺炎疫情嚴重影響，令集團收入大幅下滑。

因此，今季收入出現較大幅度增長，很大程度是由於2020年首季收入的基數較少所致。

其實整個2021年首季業績，大致上算合理。

緊記，我地分析時，最重要是長遠的企業發展。

集團在新能車發展上，賺錢能力依然維持強勢，未來當技術、市場規模、成本控制等有利因素慢慢出現下，賺錢能力會進一步提高。

我估值上，暫時維持不變，月供最好$150才開始。現價月供風險有少少高，如果你有一定貨，最好停一停。如果真係好想供，必需控制注碼，只能好小注。

至於直接入貨，建議等回到去翻$120這個較合理水平，才作考慮。

而美團點評（3690）有潛力的，過往一直虧損，到近一年，開始有正現金流，這是一個實質的利好因素，因為之前一直在燒銀紙，現時初步見到成效，不過，估值的方法好虛無，因為現時的市盈率仍過百倍。

美團這類股票，如果有利好消息，佢可以上好多，但如果估值修正，股價可太跌。

近期中央政府有不少新監管政策出台，令不少大型企業，包括美團的風險都高左。所以，近期股票回調，相信部份是這個原因所致。

只可以話，潛力是有的，現價唔算平，之前明顯貴，之後回翻好少少，大約合理區頂至略貴。若你想投資，一定不能大注。先小小注或者月供，會是較好的做法。

而阿里巴巴(9988)，現價算係合理區中上部。你已經有貨係手，如果你資金好充裕，現價都可以加1小注，並長線持有。

------------------------------------------------

Q21540：

龔sir你好啊！真心覺得你講嘅野好inspiring！每日上Facebook第一樣就係睇番你嘅post! 夜晚就咪你嘅書！我有幾個問題想請教你 唔好意思有啲長。

1）請問你會唔會開weekend班？平日夜晚要照顧小朋友無辦法出嚟 唔知有無機會有啲上幾日嘅星期六班呢

2）我今年38歲 我諗住用以下比率砌個portfolio 一半資金用月供形式買入其餘等跌市 你覺得呢啲股票適合嗎 會否太散亂？

平穩增值
2800 (20%)
66 (10%)
1928 (10%)
VOO (10%)

潛力
3067 (10%)
QQQ (10%)
ARKK (5%)
1801 (5%)

9698 (5%)
916 (5%)
1448 (5%)
1177 (5%)

3）因為我想分散風險 所以想將部分資金投資美股 我應該如上咁買VOO QQQ ETF 定買美股嘅基金 佢哋主要分別係咩？我睇過ETF回報好啲同手續費應該平啲

4）因為計劃3年後回流澳洲 之前滙價低時買咗啲澳紙 佔資產大約15% 我應唔應用部分澳紙，去供澳紙結算嘅基金？

龔成老師︰

1) 我間中都會開星期六班的，通常一年開1、2次，星期六下午時間。

下次可能在今年年尾。

你或者可以預早留位，只要whatsapp 55457212我同事，打「留位星期六班」就得。我地有具體資料就會 whatsapp。

2) 以你38歲計，這個組合選股都可以。數量有少少多，你要留意翻你供咁多隻，會唔會每隻分配倒的月供資金，其實唔多。

因為你每隻供款越少，變相月供費用佔比重就越大，會影響到你長線回報。

如果每隻供款額係好少(例如少於HKD1000)，最好你就供少幾隻，將佢地集中D，去調低月供成本比重。

3) 你照月供VOO和QQQ就可以。

Vanguard標普500指數ETF〈VOO〉，是追蹤標普500指數的ETF。QQQ則是追蹤納斯達克100指數，同時不錯的月供選擇。

至於美股基金，你要睇翻佢當中的投資項目，因為每隻基金都可以好唔同。

你可以衡量基金的投資策略，所投資的資產類別、投資策略、風險程度、市場、以及過往的表現(可以睇佢過往5-10年，如果回報係比主要投資市場高，有機會值得繼續投資)。

4) 我地重點都係睇翻隻基金的質素和回報，如果有投資價值，都可以考慮動用這筆澳元作投資，但就不要為投資而投資。

另外，由於你尚有3年才會用這筆資金。如果佢金額比較大，我建議你都先將部份，換成港元去投資增值，咁會較有利。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21361-Q21380）

Q21361：

老師，想問一下呷哺呷哺呢3年的毛利，為何會跟營業額是一樣的？

毛利不是指扣除成本下的利潤嗎？火鍋的材料都算是成本哦。謝謝

龔成老師︰

「毛利」，就是「營業額」扣除買貨成本的淨額。因此，正常情況下，2者係唔會一樣。

呷哺呷哺(0520)年報中，並無直接列出「毛利」數字。若你想知佢大約銷售成本，可以用年報中「所用原材料及耗材」，作為參考。

而你見到「營業額」等於「毛利」情況，相信係個別網站，數據顯示上的問題。

------------------------------------------------

Q21362：

呀sir 我想問下莎莎 定藍月亮好點 值的投資

我在15、16蚊買了藍月亮，但佢跌緊，身邊朋友不停地叫我賣了藍月亮，買莎莎我比想聽聽你意見

我今年30歲，預了兩三萬做股票投資，因為剛剛學，或者你有無更好的指引

龔成老師︰

藍月亮（6993）有質素的。

佢有「中國P&G」之稱，成立於1992年，擁有衣物清潔護理、個人清潔護理和家居清潔護理三大系列共73個品種的產品。

佢係中國洗衣液有龍頭地位，加上毛利率高，賺錢能力強。睇翻佢之前的資料，以零售額計算，藍月亮在洗衣液市場、濃縮洗衣液市場及洗手液市場的市佔率均為第一，分別為24%、28%、17%。

整體有質素與發展力，近期雖然回調不少，不過現價依然唔平。此股有質素，若你只係小注，長線持有係無問題。

我地投資，唔好太睇重"買入價"，我地應著眼企業長線質素，只要質素無變，投資價值就依然存在，唔需要因短期股價跌，而作出沽貨。除非你持貨過多，否則不用賣出。

至於，莎莎（0178）都有質素，但佢已經無過往年代般的賺錢能力，同時香港的零售市道有風險，都令這股近年的表現較一般。

這企業本身在行業有一定的地位，賺錢能力不差，但就會受經濟及零售市道影響，令股價較為波動。

其實股票班我都有講這股的估值，在過往10年，自由行較為黃金年代過左，所以從估值上，無之前咁高。

佢在行業的優勢仍在，但整體行業及零售市道，無過往咁強。長遠仍有質素，這刻處合理區，你投資都可以，但要分注。同時間，注碼不能太大，亦要有耐心先有收成。

長遠你唔好成個組合，只集中係1,2隻股票身上。

最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

你現時30歲，可以投資一些「平穩增值股」+「潛力股」去增值。不過，由於經驗不足，建議你用月供去創造組合。

你每月5成儲蓄，其餘先儲起，用一邊月供一邊儲蓄的策略。現時大市處合理區，兩三萬和每月儲蓄就先儲起，等大跌市時才出手。

另外，你可以睇我寫架"80後百萬富翁"、"財務自由行"和"股票勝經"，都適合初學者。相信對打好你投資基礎，會有一定作用。

------------------------------------------------

Q21363：

龔成你好，我有2個問題，希望有機會得到解答啦。

問題1: 以你自身為例子，資產類別比我這種投資新人多勁多，有沒有比較好的方法/軟件/app推介，

可以幫忙處理及分類資產配置（portfolio )(即可以看清自己以地域/行業/投資額/種類如債券所有的分類等）

問題2: 在股市上升時，心裡常常有一種衝動去買股票，生怕它變成下一隻比亞廸，現在不買，明天之後可能更貴更難入市，請問有什麼方法去處理這種情緒衝動和想法呢？

（因為本來是負債月光族，現在債務開始還清，但手頭資金極少，所以「揮棒擊球」的機會只得一次半次，股價升了可能就再沒資金和機會買了）

謝謝

龔成老師︰

1) 我自己無用任何軟件/app，其實要整理這些資料，唔需要做得太複雜。

只要能確保自已成個組合係平衡、唔會太偏重係個別行業，或者資產類別。而負債比重，因應自己年紀，是不是維持在一個合理水平，咁就可以。

你可以簡單用本薄，或者excel去做。創造一個你的「收支表」，列出每月各項收入和支出名目。

另外，「資產負債表」，列出不同資產和負債項目。最後，審視持股組合，了解翻各企業和行業比重，以確保無過情況，已經可以。

2) 你要明白，我地投資係因應企業質素，再按股價水平，而去決定買賣策略。

唔好比大市氣氛影響倒，咁會好易令你買貴貨。如果你好擔心，會被市場氣氛影響，令你買貴或者錯失入市機會。

我建議你透過月供股票方式，去每月儲一定貨，同時可以拉平均個買入價。

一方向避免了錯失入市機會，另一方面，減少因受心理影響，導致出現買貴貨的情況。

------------------------------------------------

Q21364：

Hello你好，本人30歲，收入$13000左右, 最近開始學習月供股票而找到老師很多有用的資訊，

本月開始已經月供 盈富 和領展(各1000)

現在考慮要不要組合中加港交所、中華煤氣或港鐵(其中一項)，還是應該將本身組合(2800+823)的供款加大﹖

另外如果我在3-5年後或回報率達30%後離場又是否比較好的方法?

感謝老師指導。Thank you!

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你30歲，應以增值為主，投資組合係可以進取d。現時盈富(2800)和領展(0823)，都係合適的。

但我建議你再加入一些「潛力股」，去令組合增長潛力提升。

不過，由於潛力股要求你有一定的投資知識。若你投資知識不多，潛力股就只宜先小小注(約3成左右)。到你投資知識有所提升之後，才慢慢加大潛力股比重。

潛力股︰中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）。

同時，你現時每月只投入$2000去進行財富增值，並不足夠的，以你的年齡，是財富增長黃金期，因此可以投資更多，就算去到$5000都可以。

至於沽貨，我不會定一個明確的目標價。只要隻股票質素不變，依然係優質的話，我地應該長線持有，個增值效果才會最好。

而我賣出一隻股票，只會基於下列幾個原因：

由於我買入的是優質股，若買入後發現自己犯錯，這股不是優質股，又或這股核心的質素轉差，變成非優質股，這時無論賺蝕都會沽貨。

又或是市況過熱，市場處牛市三期的狂熱狀態，例如2015年的大時代狂熱時，我便會採用多沽少買的策略，但當時的市況未到極度狂熱，所以我亦只是沽出了一部分的貨。

此外，股價要是嚴重高估，例如市況狂熱，又或自身的原因令股價爆升，都有可能沽出。

若然你無法掌握到我上述所講的，可簡單用「升一倍、放一半」的原則，沽出後等同收回成本，餘下的貨就不用再理會，長期或永遠持有，因為這部分已經是淨賺。

------------------------------------------------

Q21365：

你好，老師！我今年36歲，持有以下股票

1299 400股 平均價$70.7
1398 6000股 平均價$4.85
2800 1000股 平均價$25.5

2840 25股 平均價$1328
2313 100股 平均價$97
另有現金10萬

1. 請問依個組合會唔會太保守?

2. 如果目標5年內達到100萬，會太難嗎?

3. 我應該點樣衡量個目標係咪合理呢?

謝謝！

龔成老師︰

1) 以你36歲計，係保守少少。因為我地財富增值，係應在較年青時，先做好增值部份，累積一筆財富。到退休時，用這筆資金換成收息資產，去支援退休生活。

你現時持有的工行(1398)係收息股，增長力欠奉，不太適合用作財富增值。

而黃金，本身無現金流，主要係用來對沖黑天鵝事件。因此ＳＰＤＲ金ＥＴＦ(2840)，都不宜持有太多。

我建議你加入一些「潛力股」，去提升個增值潛力。

但潛力股增長潛力高，但同時波動性都大。若你投資知識不高，暫時先小注好了，大約可以佔組合3成。到你有一定投資知識後，才慢慢加大潛力股比重。

潛力股︰中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）。

2) 以大市過去年平均回報10%計（連股息再投資），你現有25萬資金和持股，5年後大約會增值至40萬。

如果要達至你的財務目標，我建議你用這筆資產增值同時。每月多投入約$8000作投資，可以月供股票，或分注入貨都可以。

這樣安排，會較大機會達至5年100萬的目標。

3) 要睇翻你本身定下目標，是否切合你人生階段、生活狀況、資產配置、收入、投資經驗等。

例如，你係一個無投資經驗的人，你郤全數資金投資潛力股，這樣明顯係風險過高，並不合理。

又或者，你係一個剛出社會的年青人，郤全數投資收息股。好明顯策略係過於保守。

基本上，成個財富增值策略，最重要係「平衡性」。我地投資，其實係一個財富配置的動作。根據我們年紀和其他客觀條件，去進行一個適當的配置。

長遠令你能建立一個風險不高，又有適合你增長程度的財富組合。

------------------------------------------------

Q21366：

龔成老師，你好。我是股票班的舊生

下面是我的持股
已有自住物業，40歲

股票名稱/平均買入價/當前價格/持股/總收益
2160.HK/12.46/14.74/1000/2280
2158.HK/27.724/35.9/200/1635.2
6993.HK/13.456/10.58/1500/-4314
6618.HK/108.49/111.2/100/271
1177.HK/8.54/8.03/6000/-3060

1810.HK/15.091/25.55/2000/20918
9618.HK/231.268/305.4/100/7413.2
9999.HK/125.248/168/200/8550.4
9988.HK/193.46/236.6/200/8628
1830.HK/2.53/6.31/13638/51551.64

1137.HK/0.002/11.02/7000/77126
1928.HK/32.91/36.5/1200/4308
1448.HK/6.69/8.19/7000/10500
0590.HK/21.35/20.7/2000/-1300
2772.HK/5.21/5.46/10000/2500

0012.HK/38.392/35.1/1382/-4549.544
0823.HK/91.92/74.2/1000/-17720
0066.HK/50.36/44.1/1500/-9390
0003.HK/15.965/12.28/5250/-19346.25
1211.HK/52.321/176.9/601/74871.979
0005.HK/64.369/45.9/405/-7479.945


(1)我的組合有冇問題?

(2)老師對1137有什麽意見?我是$3時買了10000股,在$10時放了3000股,已取回成本。
我應怎樣處理?有諗過轉去700。

(3)老師對2772有什麽意見?應否轉其他大型內房?

龔成老師︰

1) 你組合十分雜亂，而且數量太多，會好難定期管理。你最好維持10-12隻，咁會較理想。

以你40歲計，雖然都有一定增長需要，但你潛力股佔比重太高。因為佢地有增長潛力，同時間波動性大。

若你投資經驗一般，最多持有2,3成好了。如你較有經驗，也不宜超過5成。

另外，微創心通醫療科技（2160）、醫渡科技(2158)、港視(1137)、京東健康(6618)這些股票有質素，但波動性較大，不宜持有過多。

2) 香港電視（1137）業務有前景，但有兩個風險，你係要留意。

第一，佢都會依靠人的因素，王維基成為了公司最值錢的資產，佢的想法好多，有生意頭腦，但我對這類太依靠個人的企業，不建議太過大注。

第二，這企業現時搞網購，有增長力的，但同時存有一定的未知數。疫情過後的增長力會否減慢？

此股有質素，現貨可持有。唔需要特意轉去其他股票。但由於佢都係較大不確定性，故不宜持有太多，暫時唔好再加注。

3) 中梁控股（2772）是上市不久的股票，這類股其實好難分析，因為上市公司的真實面，好多時都要1、2年後先慢慢出現。

同時，內地房地產類股的股價波動一般較大，而且普遍負債都較高，風險較大。轉去大型內房係可以，但若要投資這類股票，要自己衡量風險。

------------------------------------------------

Q21367：

老師，你認為最好的買入優質股/潛力股方法是等熊市或大跌市的時候大注買入，還是用平均買入法用價格區域買入？

龔成老師：

耐心等待，的確會有最高回報，但都有一個風險，就是「等唔到」。

所以，我一般建議平衡做法，在無貨或不足時，就算合理區，小注分注買入（當然同時留部分現金）。

到有一定的貨，就耐心等大跌市先入。

------------------------------------------------

Q21368：

龔SIR，想請教以下的問題

1. 如要找REITs長線持有, 泓富產業信託 (808) 是否好選擇?

2. 越秀地產在內房中, 如要平穩收息可以嗎?

3. 內銀股中, 中國銀行 (3988) 和 農業銀行 (1288) 哪一隻較好?

4. 投資黃金ETF的話, 一般來說是否在股市低迷情況下便是入市好時機? (換句話說, 股市市值高應該離埸)

請指教一下

龔成老師：

1）對，這房託有質素的，可考慮，但都要留意，因為佢集中在寫字樓類別，如果經濟波動，對商業活動都有影響，加上在家工作等因素，會影響佢增長，但整體來說，仍是有質素的。

2）越秀地產（0123）不過不失的，佢的控權股東為廣州越秀集團，係是隸屬廣州市人民政府的國有企業。這企業的生意同盈利都保持增長，企業發展正面。

但這企業有一個最大的風險（其實，不少中國企業都有這問題），就是負債好多，佢的負債比率去到成300%，佢憑住自己本身的地位，認為自己可以冒更高的風險，所以加大自己的負債去加快發展。

這是有危有機的，企業利用負債，當然可以把握到機會，將來發展會更大。但同時，只要經營環境逆轉，都會對佢造成風險。因此，這股雖然可投資，但一定不能太大注。

3）兩隻都不差，收息可以，中行（3988）會略好。

4）其實不是，因為黃金是另一類別的項目，你以黃金自己作分析就得。一般來說，持有1-3%佔財富組合比例就足夠。

------------------------------------------------

Q21369：

你好啊SIR，本人今年已40歲, 結了婚, 暫時無仔女。

後生時無特別為自己長線考慮, 而且好早期已搬了出外住, 所以一直都沒有儲錢，前年因社會運動和疫情關係, 我比公司炒了....

為左唔想比老婆辛苦, 中途有約半年時間都係用公司賠償金來交租, 而家雖然有番份工作 (人工比之前少成萬), 但家庭開支始終大, 個個月都清...現在成副身家只剩30K。

我睇完你既文章後, 老婆開始幫我將其中3K 家用月供2800, 助我將來理財之用。

來緊我地會睇下其他較為便宜既樓租的，希望每月可以有多3-4千數旁身, 用來月供多一兩隻股票，想問以下組合啊SIR你覺得如何?

2800 - 3K
1211 - 2K
1810 - 1K

謝謝你

龔成老師：

你40歲，仍是財富可以累積的時期，因此要好好把握。

轉租一些較平租的地方，是可以的，同時嘗試在生活上，各種細節位，睇下有咩地方法可以減少支出，要令資金用得其所。

現時你現金不足，建議你加大翻個現金數目，作基本的備用。

至於月供方面，可以在少少調整，盈富（2800）及小米（1810）無問題。但比亞迪（1211）現價略貴因此又唔係好值得供$2000，你可以改供恆生科指ETF（3067）或中國電車ETF（2845），又或減比亞迪月供金額。

------------------------------------------------

Q21370：

我想問下2013,Saas走勢如何、長線、我見他發展不斷合併收購公司、他商業模式如何、他有自己模式做生意，現在巴巴同700合作、對他有無影響，微信生意收入、謝謝你
龔成

近期有無新講股票書、優質股

我想買

龔成老師：

微盟集團（2013）集團主要在中國從事提供軟件即服務產品及營銷服務。

佢的產品分為「商業雲」解決方案、「營銷雲」解決方案及「銷售雲」解決方案三類。

「商業雲」可助商戶開設線上業務並助彼等提升顧客參與度、轉化率、收益及忠誠度。「營銷雲」通過大數據分析能力及ＡＩ技術為商戶提供智能營銷服務。

這些都是將來發展的大趨勢，從業務潛力上，的確是有的，見佢財務數據的增長都強勁。但在估值上都唔平，所以，如果投資，這刻小注好了。

《50優質潛力股》上年的更新版，有加入部分新的股票，你可睇睇。我預期下年有機會出一本全新的《50股》。

------------------------------------------------

Q21371：

龔 sir，如果想要高增長，除了 9988 及 700 外，9923 又是否一個好選擇呢? 我都想長線持有 700，但現價好似都唔平，期望跌番到 500 附近先吸納

1928 又係咪一個好選擇呢？

如果比較 1928 同 285，雖然兩者不同板塊，但如果想長遠有較高增長，邊隻會較好呢？同埋想整理一下投資組合

包括會打算持有 9988，700，（941，728 二選一），2388，939，（1928，285，二選一），（12，1113 二選一），可以比少少意見?

龔成老師：

移卡（9923）是有風險，有潛力的類別。

首先，佢的業務為一站式支付服務，包括基於應用程序的支付服務及傳統支付服務，並支持逾500款發卡機構的移動應用程序，以支付為基礎的科技平台。

其中包括微信支付、支付寶或雲閃付，涵蓋了中國大多數的電子錢包。

另外，佢業務亦有科技賦能商業服務，即是提供商戶ＳａａＳ產品（包括實時庫存管理、消費者關係管理、智能訂單管理及全方位僱員管理）、營銷服務（包括量身定製的精準營銷及客戶忠誠度計劃電子工具），以及金融科技服務（包括助貸服務、委託貸款及保險轉介服務）等增值服務。

睇翻佢的財務數據，增長快速，但業務變數大，行業有不確定性，估值上比較難，這一定會令股價上落大，這刻仍唔平，投資值博率只是一般。

你預佢有潛力，同時有風險，如果控制注碼，都可以小注投資。

至於金沙（1928），當然可以考慮，因為這是有質素的。不過投資那一隻，要睇你的投資目標，移卡潛力度較高，金沙就收息及較穩陣。

至於比亞迪電子（0285）這股正面的，佢是1211的子公司，主要從事製造及銷售手機部件、模組及其他產品、提供手機設計及組裝服務，以及提供其他電子產品的部件及組裝服務。

過往發展正面，有技術，前景不差。長遠睇好佢的。

如果考慮佢近年的增長，大約$40係合理區頂。如果之前有貨，可以長線持有，現價小注好了。

投資那一股，好睇你本身的風險承受能力及投資目標。

（941，728 二選一），941較好

（1928，285，二選一），要睇你風險及投資目標

（12，1113 二選一），0012較平衡

------------------------------------------------

Q21372：

阿Sir想問吓你意見如果想投資證券公司
中金 定中信6066 比較有前景一些？

龔成老師：

中金公司（3908）會略好，規模與質素會好少少。這企業都有增長力。

業務包括投資銀行：提供股權融資、債務及結構化融資、財務顧問（包括併購、戰略聯盟及公司重組等）及新三板服務。

以及股本銷售及交易：包括經紀業務及資本中介業務。

固定收益、財富管理服務、投資管理都是佢業務。

佢主要在中國國內經營業務，亦在香港、紐約、倫敦及新加坡設立網絡。

其實佢不是無生意，盈利都有，增長力都不差，不過現近期上左好少，現價已在合理區中上部至頂，這刻分注小注可以，但就唔值得買入太多。

------------------------------------------------

Q21373：

龔sir 你好啊
我想請問下你點睇2007碧桂園？
2千億市值 PE:5.2

我諗住依家入市 長期持有
我買左你本”50優質潛力股”
但吾見有2007所以想問下

另外我揀左幾隻股票建倉長揸
1810 $28入左
2382 未入
9988 未入
以上幾隻加埋2007
依個組合穩吾穩陣呢？

感謝

龔成老師：

碧桂園（2007）的質素都不差，本身有品牌，有規模，但碧桂園服務（6098）反而更好。2007拆出6098後，質素略略減。

2007要不斷發展物業去賣，這樣才不斷有生意，但6098的模式就不用，物業管理是持續性的，擁有一個項目後，就會有持續的現金流，加上2007負債較多，所以從質素上，6098更好。

你投資2007不是不可，但要明白，由於佢負債較多，令佢估值不會太高，但這並不代表平。你投資都可，現價算合理，不過不建議太大注。

至於另外3隻，都有質素的，可考慮。阿里（9988）現價合理，至於小米（1810）、舜宇光學科技（2382）現價就處合理區頂至略貴。

------------------------------------------------

Q21374：

龔成老師，你好！
我開始睇緊你出既書，好正面好有感受，開始諗緊自己既投資策略有無問題。

我33歲，已婚，月入$44K，有1個1歲多小孩，每月有$24K儲蓄

我用$17K月供股票，其餘的當儲備金。
月供股票如下:

盈富基金 $2K
小米 $5K
阿里巴巴 $5K
騰迅 $2K
友邦保險 $1K
領展 $2K

我想在3年後置業，請問會否太進取？月供太多新經濟股？盼望回覆！

龔成老師：

如果你3年後置業，可以利用投資股票，作基本的財富增長，時間算是勉強，不過，不能用過多現金，同時，不能投資太多潛力股，因為潛力股有風險，無人知你買樓一刻股價會否波動。

因此，你先要有一定的現金，除非大跌市，否則不動用。

另外，在投資潛力股比例上，不能多過一半，最好在3成以下。

至於你上述的選股，雖然有質素，但最好調整一下。盈富（2800）可加大金額，而小米（1810）及阿里（9988）而減少金額，另外，可以加入少少恆生科指ETF（3067）（但你加入後，要留意投資在潛力股比例，會否太多），但記住，要同時留有一定的現金。

------------------------------------------------

Q21375：

成哥，最近朋友有買美股nano demension高位18跌到依家7.4跌了一半，youtube聽專家AAA講三十樓上高追小米，宜家坐緊艇

專家BBB前陣子買新經濟股又坐緊，專家CCC又今日買B站，衆人皆醉我獨醒，別人貪婪我恐懼，你買D比亞迪是否應該先食一半，那你剩下的己經是沒成本持有。

美股telsal 都跌了四成，新經濟股股災像快到臨，你是否贊同？

龔成老師︰

我地買入一隻股票，一定要知道佢質素、行業前景、財務狀況等，才去投資。唔好只係靠聽消息，或者聽其他人講，就走去買。

你可以睇下全球最賺錢的投資者巴菲特，佢的投資方法，同坊間專家的投資方法，有可不同，你想想為何有錢人是少數，自己是思維是否停在一般人層次。

你投資前，必需要對間公司有一定認識。若果你連間公司點賺錢、行內有乜優勢、點解未來有發展和增長潛力，都答唔倒自已，咁就要停一停，唔好投資住。

Nano Dimension Ltd(NNDM)是一家專注於技術領域的以色列增材電子供應商。

佢業務上有吸引之處，過去收入有增長，但依然係處於燒銀紙狀態，未知幾時才會有真正利潤。

你若果睇好佢發展，可以小注，但你預佢股價會好波動。

另外，我地手持架優質股，永遠都係長線持有最有利。我持有比亞迪（1211）已經12年，由$2x升到上$88，試過跌翻$12，之後多年後，又升到近期$270，之後又跌翻。

你試想想，如果用你的方法，在過往，港交所（0388）、騰訊（0700）在這麼多年，股價上升100倍時，你的方法能賺到多少？可能連一倍都賺唔到。你怎樣能賺到100倍，就是「唔好賣」。

當然，如果你係好保守架投資者。用"升一倍、放一半"去先收回成本，係可以的。但永遠都係長線持有優質股，效果會最好。

現時部份新經濟股，的確有輕微過熱情況。至於股災，會係無人預計到的時候出現。但現時部份股票回調，只係因為之前太貴，現時回歸較合理值，係正常的。

------------------------------------------------

Q21376：

老師你好，五月將會上你的課，十分期待中！

我今年49歲，月供股票四年，有以下組合，希望在60歲前有一個每月10k收息組合

現在持有月供組合

1）388-$2500
2）2388-$2500
3）0002-$2500
4）1299-$2500

另外
388-300股，均價$501@
1810-1800股，均價$30@
909-1000股，@$38

問題- 月供股票如上應該加到一個月多少，應該加什麼股票或或板塊比較好？想加多些中電，同加入電能，比亞迪？會唔會太高？

另外股票組合全部低于買入價，是否應繼續？

謝謝你的意見！感激萬分！

龔成老師︰

如果你希望60歲後每月有1萬蚊現金流，以股息率6%計，你需要本金200萬。

我假設投資回報有10%（連股息再投資），你每月投資$10000，11年後大約會增值至200萬，故達至你的財務目標，機會都大。

只要你在未來11年，用正確投資方法，要累積你筆財富，相信很大機會做到。

以你49歲計﹐現時月供組合係可以，因為你都有一定增富增長需要。而供多少，可以睇翻你自己經濟狀況，只要係閒錢就可以，比重上無一個特定答案。

但你要留意，隨著年紀越大，你組合要慢慢向，轉為較多平穏增長類股票。港交所(0388)有質素和潛力，但波動性會相比其餘幾隻大少少，故你要慢慢減少佢供款比重。

到退休前5年左右，可以開始加入一些收息股。個例可以慢慢提高，到退休之時，組合應全為收息股。

你現時持股，都係有質素，可以長線持有。唔好太在意個買入價，我地持有一隻股票，係應該睇佢本身質素。

至於組合長遠點去調整，你可等上完課堂後，再因應自已年紀和投資取態作安排。現時唔洗急，月供計劃照維持現狀就可以。

至於明源雲（0909）及小米（1810），是潛力度股票，風險度會略高，當你慢慢近退休年齡，這類股就未必適合投資太多。特別是明源雲（0909）。

------------------------------------------------

Q21377：

你好龔成老師，在2020年初時買入1826旭通控股，當時0.27買入30萬股，現在此股票已經停止買賣。

請問係咪即係唔會有機會復牌？

求解答，萬分感謝

龔成老師︰

旭通控股(1826)主要在香港從事提供金融相關信息及技術服務；新發展工程之承包服務等。

集團在2021年3月31日表示，因核數師對其2020年度的綜合財務報表發出不發表意見，故暫時停止買賣。

在為投資者，而一刻係無野可以做。而一刻未知背後原因，所以好難話會唔會可以復牌，只能說機會係有。

但睇翻本身質素，唔算係好高，而且公司規模好細。過往股票都十分波動，這類股票最多只宜好小注。建議佢如果復牌，至少沽出部份，去平衡風險。

------------------------------------------------

Q21378：

龔Sir你好，我今年19歲，爺爺生前留左50萬現金俾我，而我想用作股票投資，麻煩龔成老師睇一睇我的組合並且俾一啲意見俾我，希望龔sir有空時候回覆，謝謝。

想平衡各股的資金比例，另外加小小虛擬貨幣。

港股.
京東集團9618 - 資金分配12% 約投資6萬
騰訊控股700 - 資金分配12% 約投資6萬
小米集團1810 - 資金分配12% 約投資6萬
嗶哩嗶哩9626 - 資金分配12% 約投資6萬
中生製藥1177 - 資金分配12% 約投資6萬
舜宇光學2382 - 資金分配12% 約投資6萬

美股.
蘋果AAPL - 資金分配12% 約投資6萬
台積電TSM - 資金分配12% 約投資6萬

虛擬貨幣.
比特幣Bitcoin - 資金分配4% 約投資2萬

龔成老師︰

我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

你所講股票，全部都係有質素。

當中，嗶哩嗶哩（9626）係一個綜合性的視頻社區，在當中，用戶同埋內容創作者能夠有好多元的內容，並進行互動，內容包含生活、遊戲、娛樂、動漫、科技和知識等眾多領域。

另外，佢亦能夠支持廣泛的視頻內容消費場景，以專業 用戶生成視頻（PUGV）為中心，輔以直播、專業機構生成視頻（OGV）等。

根據報告，35歲及以下的用戶佔佢的月活用戶比例超過86%，月活用戶達到2.02億人，每年增長5成以上。業務正高增長。

佢收入主要來自移動遊戲、增值服務、廣告、電商及其他；收入成本包括收入分成成本、內容成本、服務器及帶寬服務成本以及電商及其他成本。

過往的生意高增長，這刻雖然未有盈利，但前景正面，這股有潛力，有長線投資價值，不過估值就較難，股價變化大，市場對這股的股值較分歧。

如投資小注係可以，大約佔5-6%左右。同時你要預佢股價上落較大。

你現時組合，較問題是全部都是潛力型股票。佢地增長力係高，但波動都會較大。長線你要建立一個平衡組合，要加入翻一些舊經濟股，去提升組合平衡性。

同時你的組合，無論港股美股，都太集中在科網手機相關類別，這會出現集中風險。

現時不少潛力股都偏貴，除了中生(1177)算係合理區頂外，其他股票都略貴，最好等回多1,2成，才開始慢慢分注入貨，個值博率會較高。

或者，你用月供方法，去儲上述股票(除了9626)，都係可以。

建議你加大翻平穏增長股部份，令組合更平衡。

平穏增長股：金沙（1928）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）、長建(1038)

至於虛擬貨幣，我不是這方面的專家，所以我太大意見。

以本質來說，這是人為創造出來的，絕對不是「資產」，有沒有真正的價值，如何定義真正的價值，未知。

這些人為創造的貨幣，因為關注度由很少變得大，價格會大升，但這背後是否有真正的支持，我不知道。只能說，投資這些貨幣，投機味好重，可能大賺，亦可能蝕到一文不值，因為，當中有沒有價格，我不知道。

但這不代表佢無價值，佢可能好勁，只是我自己不知佢好勁定好差。

佢長遠的價值，取決於「有多少人用」，即是說，雖然無真實價值，但可以有「交易價值」，如果長遠好多人用，的確可能有高價值。

因此，這些虛擬貨幣，由於我無法作出專業分析，所以，我不會投資。

但如果你分析到佢長遠的交易大，大家都持續關注，就有價值，就值得你投資。但由於有一定風險，緊記控制注碼。

最後，想提一提你，你年紀很輕。應該把握這個財富增值黃金時期，好好儲錢和學習投資，盡力去提升財富增值效果。

------------------------------------------------

Q21379：

老師，我買了以下這些：

[email protected]
[email protected]
[email protected]

請問應該應止蝕還是等？

另外，我親戚買了[email protected]，她問是否應該溝貨？
謝謝！

龔成老師︰

你要記住，不要用自己的買入價作為何時沽出的指標，也不要以回本後沽貨作為策略，同時，更加不要抱著「賺了多少就沽貨」這心態去投資。

坊間經常用買入價作為何時沽出的標指，這是極度錯誤的。沽出是基於這股已偏貴，又或沒有前景，質素有問題，而絕非由買入價去作決定。

京東(9618)、中國海洋石油（0883）、中國人壽(2628)都係有質素，可以守。

但當中國海洋石油（0883）質素不是最高質類別，雖然佢都有一定的規模及質素，但畢竟係商品類企業，這是由於佢地的產品自主力較弱。

而中國人壽(2628)近年增長力都弱左，此2隻股票，唔建議持有太多。若佔比重係高的話，你可以沽一部份，去平衡個組合風險。

中國有贊（8083）集團主要於中國從事經營電商業務及支付服務業務，近年業務發展快速，生意增長力，不過，現時估值高，業務變化較大，整體有好大的不確定性。

加上佢過往在核數師報告出現過「保留意見」，盤數可能有古怪，雖然已是數年前的事，但都會扣分。

佢不是無潛力，但風險較高，這刻投資值博率不高，唔建議持有太多。所以若起再加注，我較有保留。

------------------------------------------------

Q21380：

龔sir 你好 在facebook見到你的資訊 很羨慕所有人可以達成自己的理想 我去年剛剛失業 亦都無法找到工作

但有些積蓄 幸好老公有工做 但很想幫助老公分擔 不知 龔sir可否教導我如何可以做到呢？

我自己大約有 70萬股票 但是在股票上總是不能有回報。

我希望可以幫到老公分擔生活費 不想做住米大蟲

我的組合有：
1658
9988
6060
2013

700 一手
388 一手
451少量
3800少量

但是全部都未返到家鄉

在去年尾才買股票 所以大部分都在高位，雖然並非在最高。

我覺得看你的文章認為你非常有啟發性 希望自己可以慢慢學識 然後傳授給我仔女 讓他們提早計劃退休， 早一步財務自由。

我如果可以把這個技能傳授給仔女 比起我找到工作更有意義 更有價值！

龔成老師︰

不論在小朋友教育和家庭責任上的想法，你都很正確和正面。現時經濟環境較波動，短期待業狀況，有時都無可奈何。

由於你現時係待業狀態，加上大環境都較不明朗。建議你在投資前，先預留最少半年開支，在應急之用。

另外，我希望你投資前，先明白投資買股票就是買企業。再好企業，都要時間去成長，所以會係長線。

投資優質股，主要係為你長線財富作增值。短線的財務問題，建議你透過找兼職，甚至做些網上小生意，去舒緩。

而你有不少股票在高位入，你好可能係犯下不少投資新手，經常犯的錯誤。

投資新手通常都有兩個主要錯誤，第一、買入當炒股；第二、在市況最旺（即是最多人認為市場好景的時候）以最貴的價位買入。

其實這些問題，係可以避免。方法其實好簡單，就是投資較穩健的股票，又或是盈富基金（2800），分注買入，例如透過月供股票方式，每月買些少，會是較好的策略。

現時你有持股中，協鑫新能源（0451）和保利協鑫能源（3800）質素只是一般。但由於你只係小注，可以守住先，但唔好加注。

眾安在綫(6060)和微盟(2013)都係有質素，但不確定性較大，同樣不宜大注。你現時只係小注，可以守。若較大比重，最好沽少少去平衡不確定性的風險。

其餘幾隻股票，都無問題。

長線計，你可以用「平穏增長股」 + 「潛力股」的組合。但「潛力股」要經驗較多，若你此刻經驗較少的話，就不要佔太大比重。到有一定知識和經驗，才加大翻。

現時大市在合理區，現金和股票最好約各一半。你可以再投入多少少資金，分注慢慢入以上股票。餘下資金，我地就等大跌市機會。

你是一個正面和有行動力的人，我有信心，你好快走出困局，加油。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21301-Q21320）

Q21301：

龔SIR 我有問題想問

1. 想問股票班，第4堂現金流折現法如果用係股票, 適合用係邊類型股票? 還是呢種方法唔係太適合用係股票?

因為股現金流折現法用係有年期同穩定無增長既資產先適用…

咁股票全部都係無年期, 加上增長率難預測, 咁係咪現金流折現法唔岩用係股票?

2. 另外想問第5堂教的估值法,,合理區範圍要加Buffer,, 想問點計個百分比, 例如合理區係 $100-$200,, 範圍百分比應該係

(a) (100/200)X 100% = 50%
(b) (100/100)X 100% = 100%

3. 都係關於市盈率估值法,,如果某公司佢係行業龍頭, 需要調高10%,,想問係調高佢PE合理區還是計到最尾個Step 先調高合理估值?

參考第5堂Notes P.34, 388為例,,388因為係壟斷狀態, 要調高

咁應該係幾時調高?
(a) 將PE合理區32.7 – 37.7 倍調高10%
(b) 將合理估值加左Buffer 後的 $212 - $298調高10%
(c) 還是無所謂, 兩個是但一個都得?

4. 我用左388 最新數據去計佢個合理估值,.

年度: 2016/2017/2018/2019/2020
每股盈利($): 4.76/6.03/7.5/7.49/9.11
每股盈利增長率(%): -28.96/26.88/24.38/-0.13/21.63

近5年每股盈利 = $6.978
增長率 = 8.76%
有代表性的EPS= $7.53
合理PE = 34.18x to 42.75x
估算合理價 = $258 to $322
因為估值範圍闊度=25% 所以唔洗加Buffer

(a) 想問以上估值計得岩唔岩?

(b) 因為我想增長率準確D, 我用左過往5年增長率相加再除5

[-28.96 + 26.88 + 24.38 + (-0.13) + 21.63)/5 , 得出8.76%,

我想問堂上你話實計既法(複式增長率) 係咪就係咁樣計? 定係我計錯?

(c) 都係關於增長率問題, 我上網睇番”預測每股盈利”

年度: 2021/2022/2023
預測每股盈利: 11.88/13.73/15.64
EPS增長率(我自己計): 30.4%/15.6%/13.9%

我可唔可以用2021既既預測每股盈利增長率30.4% 當作計算有代表性的EPS既增長率? $6.978 x 1.3= $9

咁樣計法會唔會唔準?

(d) 想問估值範圍闊度應該係(322-258)/322 x 100% =20% 還是 322-258)/258 x100% = 25%

5. 第5堂Notes. P.83, 點解公用股可以用PB Ratio 分析? 公用股Average PB Ratio 13x-16x, 大過4x 正常應該唔可以用PB 分析

有勞龔SIR！

龔成老師︰

1) 其實現金流折現法，係最正統的估值方法，基本上係適合於任何股票。

但由於計算上，有不少主觀數字。只要稍有偏差，最終計算結果的落差，係可以好大。

如果你經驗較淺，你用佢來計算現金流穏定，或者資產有固定年期的企業(好似西隧盈利)，係可以。

但若果你想計一些波動性較大，增長力較高的股票，我建議你先用其他估值方法，會較為穏陣。

2) 假如你初步估值得出，合理區係 $100-$200。

你就用佢2者的差額，即$100。再去比對估值中最高價位，即係$200。

以100/200，得出結果係50%。由於合理價格範圍，高於20%，所以你就不用在初步估值上加入緩衝區。

但假若今次，你初步估值得出，合理區係 $100-$110。

以10/110，得出結果係9%，少於我們要求。因此，你要在初步估值上，加入10%緩衝區。

最終估值，會變成$90 - $121。

其實你要明白這個加緩衝區的原理，是希望股價能更有效反映合理區，你不要公式化去用。

3) 其實港交所，一直都係獨市經驗，你用佢過往PE作參考，已經可以。

因為當中已經反映其獨市優勢，不用作調整。

至於所謂的調高多少%，其實是當比較該企業及行業市盈率時，若然這企業是龍頭，若果以行業市盈率作基礎，就有可能調高，但調高多少%，無絕對的，因為最重要是衡量該企業比行業有多強。

4a + b) 我地算增長率，唔係單單用個平均數，而係用過往多年的增長，去計一個每年平衡增長率。

由2016年至2020年，每股盈利大致上升92%。

年度化增長率︰約為+18%
有代表性的EPS= $8.23
合理PE = 34.18x to 42.75x
合理估值︰$281 - $352
由於合理區範圍只有20%，故再加10%緩衝區，估值變成︰$253 - $387

當然有代表的EPS，我用增長率18%，當我地運用時，要理性地分析，往後是否能增長18%，我地不能公式化運用，要明白每一個數字背後所代表的意義。而從18%推算出來的有代表性的EPS= $8.23，由於能有效反映近年的盈利情況，因此，我相信這數字有一定的代表性。

4c) 你都可以參考大行預測，但最好用多間大行的平均數。之後，你可以用佢結果，再更你計算結果，取一個平均數，去作為有代表性的EPS，都係可以。

4d) 以你上述例子，(322-258)/322 x 100% =20%才是正確計法。

5) 由於公用股，主要企業價值，都可以反映在會計資產上。因此，可以用市賬率，作為計算中電(0002)這類公用股平貴指標。

我相信你見到公用股佢PB去到10倍以上，是找錯左數字，你見到的數字，應該不是PB。

------------------------------------------------

Q21302：

龔老師 請教下，0548已過除淨日，係未再回落D再入好D呢

龔成老師︰

首先，你可能對派息運作，有點誤解。好多散戶都會覺得，「除淨日」後會跌，那時候買入就最抵。

其實，這個想法係不正確。

「除淨日」，其實就是用來確認那些股東收到這權益的日子。等到「除淨日」當天才買，派息就唔會有你份。

「除淨日」那天，股價就會扣除派息部份，例如原來股價$10，派息$1。那麼「除淨日」就會將股價，從$10下調至$9，以反映派息動作。

而「派息日」，就係這班合資格股東，正式收到股息的日子。

由於「除淨日」股價會下跌。而下跌比重同收到息係一樣，所以只係左手交右手動作。作為投資者，你唔會在此期間前後，去做買/沽貨，而出現任何著數。

所以，「除淨日」只係一個用來扣除派息權益的日子，與你是否投資一隻股票，係絕對無關。

深圳高速公路股份（0548）有質素的，這股持有不少有質素的資產，現金流穩定，不過增長力不強。

這股有長線投資價值，收息可以，但就不要對股價有太大期望。現價合理。

------------------------------------------------

Q21303：

你好阿sir，我已睇左三本你既書，分別係選股、股票同年報勝經

本人都對金錢系統同時間值有概念，識捕捉市場恐慌同熱市同有明確目標6年要有100萬

目前進度用左15個月18萬貨，4萬現金，問銀行借左平loan 10萬等恐慌入市機會

但睇完三本書始終吾識做估值衡量股票平貴

一般既市盈率同現金流折現法都明白，但吾識衡量股票平貴同搵潛力股
求指點

龔成老師：

對，保持閱讀與進步，長遠來說，你的知識一定同財富成正比。

至於借貸投資，則是有危有機，雖然利息不高，但你都要明白，這動作有風險的。我一般較建議「有明顯機會才動用「借」這個最後動用的「皇牌」，在一般情況，不太建議為借而借。

如果你現時已經借了資金，就可以等大跌市時，好好把握機會，但唔好心急動用，寧願輸利息，都唔好心急投資。

要計企業的價值，過程比較複雜，好難三言兩語就講到，就算在我的股票班，都要講5小時，裡面會講3種估值方法，有難有易，但同學都用到的。

簡單來說，你要考慮企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。

例如，我地會考慮佢有多少生意，有多少盈利、現金流，有多少資產，從而計算該業務值多少錢，同時會推算將來的盈利情況，去推算這企業長遠的價值。

如果要深入計算，基本上要好仔細的研究企業，要分析好多財務數據用比率，先至有較完整的答案。

------------------------------------------------

Q21304：

老師你好呀！
請問你點睇1358同2899呀？謝謝你

同埋358

龔成老師：

普華和順（1358）主要於中國開發、製造及銷售再生醫用生物材料產品；輸液器產品；以及骨科植入物產品。

本身業務有點波動，同時未見有好大獨特性與規模，整體的投資價值未算好高。

佢派特別股息後，股價除淨大跌，而派特別股息令佢現金減少，整體企業發展力不強。整體的投資價值唔高。

紫金礦業（2899）佢主要從事黃金及其他礦產資源的勘探、採礦、生產、冶煉及銷售。

但你要留意番，雖然這類資源股雖有投資價值，但只算中等。

原因是這樣，資源本身有一定的價值，但盈利始終受國際黃金價格影響，本質上會較為被動，無乜價格自主能力，同時產品無差異性，是典型的商品企業。這類企業都有一定的投資價值，但就不會太高。

江西銅業股份（0358）係中國一家綜合性銅生產企業，主要業務範圍為於江西省東北部經營銅采礦、選礦、熔煉與精煉以生產陰極銅、銅杆線及副產品，包括硫精礦、硫酸及電解金和銀以及稀散金屬，如鉬精礦。

佢亦會為客戶根據來料提供熔煉和精煉的加工服務。

就過往的業務情況來分析，這股不過不失，盈利較為波動，反映無乜產品價格自主的能力，長遠企業價值增長只是一般。

這股不是劣質，但都不是高質，相信股價長遠未必有明顯上升，只是較普通的企業，投資價值只是一般。

------------------------------------------------

Q21305：

老師，目前只有以下的股:
939@4000,
968@2000,
1177@2000,
1810@1000.
1257@2000

想問1257和956邊隻較好，
睇左老師的書，想入

1317或1569两者選一，
1448，1830，1928，696，1458，老師可以比d建議應該咩組合較好

另外，也想問下老師如何評價558，我見佢都升得多，
謝謝你抽空睇我的留言

龔成老師：

現時持有的組合，基本上都是有質素的股，長線持有無問題，但要留意，當中持有的小米（1810）、信義光能（0968）、中生（1177）都是潛力股類別，這些都是可長線投資，但都不能過度集中在潛力股。所以當你日後增加潛力股時，要留意翻比例及上限。

新天綠色能源（0956）本質不差，值博率會高少少，有一定的增長力，但由於都有一定的負債，考慮到風險因素，現價只是合理區，未算平。

你投資都可以，分注無問題，但由於這企業規模比較細，加上有行業風險，因此唔建議太大注。

至於教育股，可考慮楓葉教育（1317）。

至於另外的5間，都是有質素的，如果想收息及平穩增長，可考慮金沙（1928），如果想潛力，可考慮褔壽園（1448）、必瘦站（1830）（當然這兩股回翻少少就較有值博率）。

------------------------------------------------

Q21306：

老師您好，請問一下必瘦站1830，您如何分析及看好的原因，希望能夠詳細地瞭解一下您的看法。非常感謝您！

龔成老師：

必瘦站（1830）長遠有發展，本身有一定的質素。

睇翻之前的疫情，佢身處的行業受影響，但佢的現金流及財務數據都唔算差，這點可以想象到，當正常的經營環境，佢的生意一定唔錯。

加上佢的野心愈來愈大，本身有一定的技術，同時不斷將香港的業務模式複製到其他海外地區，我見佢加強了發展其他地方，因此發展不差。

這股有長線投資價值。

這股我自己都有貨，都是長期睇翻，見佢之前的發展一直唔差，加上疫情仍有錢賺，這是加分的地方，你可以推算到，當經濟正常翻，佢的生意一定會唔錯。但近期升了好多，已貴，最好回少少先小注，大跌先正式買入，會較穩陣。

------------------------------------------------

Q21307：

老師我剛開始月供股票，2800 $2000，823/2388各$1500，現在有2個小朋友約10歲，我想將佢地既利是錢用黎買股票希望在佢地成年時已有一筆唔少既錢比佢地繼續投資

如果我用佢地既錢用晒黎買3067長線可以嗎？還是有其他穩陣長線部署？

自己持有
8000 股 1313 $9.34
2000股 358 $16.76
可長線持有嗎？

龔成老師：

你現你月供的盈富（2800）、領展（0823）、中銀（2388），都是有質素的，都可以長期進行。

至於現時持有的股票，華潤水泥控股（1313）本身有質素的，不過業務就較有波動，佢過往的盈利數據上落都大，因此股價的變大亦會較大。

佢之前公布的中期業績，業務有回落情況。長遠計，房屋、基建發展等因素，都會利好水泥股。因此長遠是正面，你長線持有就得。

至於江西銅業股份（0358）係中國一家綜合性銅生產企業，主要業務範圍為於江西省東北部經營銅采礦、選礦、熔煉與精煉以生產陰極銅、銅杆線及副產品，包括硫精礦、硫酸及電解金和銀以及稀散金屬，如鉬精礦。

佢亦會為客戶根據來料提供熔煉和精煉的加工服務。

就過往的業務情況來分析，這股不過不失，盈利較為波動，反映無乜產品價格自主的能力，長遠企業價值增長只是一般。

這股不是劣質，但都不是高質，相信股價長遠未必有明顯上升，只是較普通的企業，投資價值只是一般。因此不建議持有太多貨。

至於你小朋友，集中投資恆生科指（3067）不是不可，但就始終有少少風險，要睇你地的風險承受能力。這是一個潛力股基金，當中都是潛力股，回報高，風險大。從你小朋友長線投資角度，不是不可，但就要明白這動作的風險，如果承受風險能力不高，就只宜部分投資這基金，不能全部。

------------------------------------------------

Q21308：

你好，想問下﹐我用個個估值方法對於某d股會偏差好大。

好似我用來計1177﹐佢收入一時可以增長40%﹐一時又得16%﹐今年仲下跌左﹐變相好難預計以後增長幾多%

龔成老師：

當我地進行企業分析，以及進行估值時，最重要是找一些核心因素。

例如你見佢有時收入增長較多，有時就較少，而我地會著重佢長期的收入增長是多少，而不是一年半年。

同時，你不能只公式化去運用，你要懂得將財務數據「意義化」，你要解釋翻，點解佢該年會增長較多，而另一年增長少，當時的大環境怎樣，而將來的大環境發展又會怎樣，從而推算將來的收入及財務數據情況。

因此，你要利用對企業「核心」，及「長期」的因素作為分析點。

------------------------------------------------

Q21309：

龔成老師，如果3067咩價位入比較適合？

175，2600現價可入？

龔成老師：

安碩恒生科技（3067），有長線投資價值。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂至略貴，因此，這刻不能大注投資。最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

吉利（0175）業績弱將會對股價短期不利，企業價值都有少少影響，不過最重要睇翻長遠價值，吉利（0175）本身的質素不差，擁有一定的銷售網絡及品牌，不錯的市場策略及定位，而又能把握中國汽車市場增長的機遇。

長遠來講，佢的品牌與發展在中國仍理想，2018年，吉利透過旗下海外企業，動用超過$500億人民幣收購戴姆勒股份公司9.69%股份。由于戴姆勒股權結構分散，所以吉利已經成為了戴姆勒集團最大單一股東。這不單有利佢有中國發展，同時長遠，可能加快了海外發展速度。

另外，佢未必發展自己的電動車品牌，但會發展當中的技術，相信在合作及自身價值上，長遠仍是正面的。

現時價位在合理區中上部至頂位，股價波動，有貨可長線。如果現價入貨，小注都得。

中國鋁業（2600）主要從事鋁土礦、煤炭等資源勘探開採；氧化鋁、原鋁和鋁合金產品生產、銷售、技術研發；國際貿易；物流產業，火力及新能源發電業務。

過往的業務與盈利都較波動，反映企業較受外圍價格影響，產品價格自主能力較弱。

質素算中等，現價合理，但又唔算吸引，投資價值只是一般。

------------------------------------------------

Q21310：

啊Sir，多謝你之前回覆，之前請教過你後已減持左一半煤氣轉到9988，同時亦投入左一部分係3067。以下係小弟現時既倉。

想問以下問題:
1. 餘下的煤氣應在那個價位完全減持？

2. 鐵塔長期表現不佳，我應否轉股？如果轉的話那個價位開始減持和轉那一隻股票？

3. 小米和阿里，暫時是我第二、三大持倉，我應在那價位再增持？

4. 福壽園和舜宇光學我非常看好，應在那價位增持？我看福壽園最新業績理想，合理區會由$7上升多少呢？

5. 3067,我在$19.51入市，應該算略貴，我應該如何是好？和在那價位再增加呢？

麻煩晒啊sir

優質股:
1. 煤氣x3,000@$14.5,
2. 銀娛x1,000@$52.25
3. 港鐵x3,204@$38.93
4. 領展x2,137@$62.83
5. 金沙x5,322@$28.78
6. 盈富x2,[email protected]

-潛力股
1. 鐵塔x90,[email protected]
2. 小米x5,400@$25.89
3. 舜宇x500@$129.8
4. 雅生活x3,250@$31.92
5. 中生製藥x12,[email protected]
6. 福壽園x6,000@$7.67, 4.96%
7. 阿里巴巴[email protected]
8. 3067x3,700@$19.51

龔成老師：

1）煤氣（0003）不是無質素的，因此你餘下的貨，持有都無問題。

除非你好想集中資金在潛力股，但其實我又不太建議。

2）中國鐵塔（0788）不是無質素的。始終中國的3大電訊巨頭，都是佢的主要客戶，以及大股東，當5G發展，佢一定會受惠，因此前景仍然正面。

佢現時的收入都增長，盈利都保持向上，但增長比之前略減，加上股本回報率不高，是這股較弱的地方。若分析佢市盈率，會見到現時仍然處較高水平，反映佢雖然股價回落左唔少，但仍然未到平。

這股算是合理價。

這股長遠仍算有發展力，可長線。不過，潛力度比過往略減。

其實只要你持貨不過多，就無問題，如果你較擔心，就賣部分轉其他較有增長力的。

3）如果已經佔有一定的比例，就唔好心急，其實一隻股佔股票組合15%已經是上限，你可以考慮翻這個因素。

同時當你已經持有一定的比例，就更加不要心急加注，小米（1810）最好落翻2成以上，而阿里（9988）就落翻1成以上，先考慮加注。

4）這兩股都是有質素的，但經常都唔平，其實你可以考慮月供。如果你本身有貨，可考慮跌翻1成以上加注。

5）你預恆生科指ETF（3067）合理區頂約在$16/$17，如果低過這價，你又資金足，其實可以慢慢分注買入，以長期儲貨的模式進行。

------------------------------------------------

Q21311：

老師你好！之前因為要買樓俾首期所以將所有股票都賣晒，而家要重新建立股票組合，想再請教一下老師。

三十歲，穩定職業，月入大約十萬，扣除供樓及生活雜費後，每月大概有三萬元剩，打算每月投放兩萬蚊於股票投資，一萬作儲蓄，另外現金有30餘萬打算放入投資市場。

暫時自己選擇了
穩健的包括：

- 美股ETF: VOO

- 創科實業

潛力股包括：
- 小米
- 金沙中國
- 金界控股
- 必瘦站
- 舜宇光學
- 福耀玻璃
- 阿里巴巴

想請問一下老師我的選股是否正確，比例就應該怎樣分配？多謝老師，祝生活美滿！

龔成老師：

基本上，方向正確。

你剛買完樓，可以重新配置個整個財富組合，由於已置業，在之後的配置上，考慮以股票作為增值，是可以的，亦是較平衡的做法。

你所選的都是有質素的股票，都可以考慮，以你30歲的年齡，基本上是適合的，如果你本身有一定的投資實力，潛力股可以去到60%，如果投資實力一般，就大約30%已足夠，你可以睇翻自己的實力及風險承受程度去配置。

$20000作投資（可以利用月供或分注），以及$10000儲蓄，方向正確。

至於現金$30萬，以現時的投資市場平貴，你動用一半資金，以分注模式買股票，可以的。餘下就留現金，去等機會。

至於上述股票，無問題，VOO是ETF，佔比多少少都得，至於其他，就投資適當的比例。

要留意福耀玻璃（3606）、必瘦站（1830）、創科（0669）、舜宇光學（2382）現價唔算平，投資時要控制注碼或回少少先考慮。

------------------------------------------------

Q21312：

阿Sir！好開心我睇完你本書買左1211同1830，都係短時間升左好多

所以1211我無忍得住5手放左2手，不過已經攞返本金。必瘦站就吸收左經驗，無放到，但又後悔無買多啲

我呢種心態係未唔係幾好要改？

另外正題
我股票有

1830,13638股
1211,1500股
0066,1039股
1928,400股
823,213股

全部都係大跌嘅時候買，
所以以家全部都係賺，
但係而家有一個問題，
我唔知可以再買咩

因為好多都唔平，
但係我又唔想月供，
係咪一年只係等一次機會入，
儲多啲錢先？

龔成老師：

比亞迪（1211）同必瘦站（1830）都有質素，同時長遠有發展力的，你餘下的貨，可長線持有。

至於心態，我地永遠無得後悔，投資好需要你理性，因此你平常心就得。

其實，你現時持有的，都是有質素的股票，你持有就得，唔需要太著重當時買入價。

因為最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

至於你唔知可以再買咩，其實，投資不要心急，不要為買而買，要有機會才買，現時大市在合理區，如果部分較貴的股票，就不要心急入貨，但有部分股，其實現價仍可考慮，當然，你要有一定的資金留低，而不是用盡現金，因為以現時的整個大市平貴狀況，你留翻3-5成現金，其實都可以的。

如果你現金較多，可以考慮一些合理，平穩增長股，例如：考慮盈富（2800）。

另外再加：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果不想月供，就分注進行。

但要記住，留部分現金，等機會，都是重要的。

------------------------------------------------

Q21313：

Hi, 你好. 有個關於轉工嘅小問題想請教下你

之前有間公司, 經agent幾年前問過我有冇興趣一個post, 跟住我話冇興趣, 幾個月前同一個 agent 搵我去interview 同一間公司 一個post,

佢請咗我同事, 佢係 restructure 要攞package嘅人, 跟住依家有另一個 post open, 同我而家做緊嘅嘢差唔多, 星期五agent叫咗我去interview, 星期六朝早收到offer,

佢減咗我3k人工, 大約有 50% 人工升幅, ~10k, 現在我在這間公司做了11年, 工作環境, 老細, 同事不錯, 只係沒有什麼升職機會, 想請教下你的意見, 萬分感謝

因為我公司將會有restructure, 大約5-7月才知道, 請問我應該推掉 offer, 等restructure之後才找工作( 如果真是被裁員), 其實我現在的工作也挺穩定的, 未必會被裁員,

現時3X 歲. Thanks a lot

現時人工30k

龔成老師︰

你可以多從「長期」視點去分析，就工作來說，無論做那份工作，我地的主要目的都是薪金，以及興趣。

你可以想想，10年後你希望自己的薪金如何，職位是甚麼，當你有左這個大方向，就知道這一刻的情況。

因為2份工作表面上，工作內容係一樣。但當中可以學習，進升等機會，相信會有所不同。

你已在現在公司做了11年，應該會了解，5年後、10年後、甚至20年後，你發展會係點。而這個結果，是不是你想要的?

正如你所講，現職地方無乜升職機會。若果你目標係更上一層樓，咁你就要諗下現時工作環境是否真的適合。

如果不適合，我建議你可以考慮一個新環境，試一試。

當然，此前你都可以問下你轉左新公司的同事，了解一下這公司的情況，去再作衡量。

至於裁員會係一個風險，但唔係而一刻你決定去或留的主要理由。更重要係睇長線發展，邊一間先會更大機會發展到你心目中的目標。

------------------------------------------------

Q21314：

龔成老師您好，小弟對派息基金有疑問想請教下您。

留意到XXX有一種叫每月派息兩次既基金計劃，佢嘅做法係首先喺月頭買入一隻係月中派息的基金，等到佢除淨之後，就將舊錢轉落另一隻月尾會派息嘅基金度，

咁就變相一嚿錢同一個月收兩次息。我明白個本金，會因為要派息而下降， 但我留意到佢基金價格都尚算穩定，10年來只係緩慢下降，過往紀錄派息記錄好穩定。

就算基金價格慢慢下跌，但收到既利息係扣除基金價格下降後仍然有利潤 。計劃提及會有每月10%利息。

Btw我留意到XXX有同樣嘅做法，佢自稱一個月可以最多轉四次，但要喺操作上邊好完美先做到。

XXX動力亞洲高收益債券基金
XXX基金 - 亞洲高收益基金

龔成老師︰

首先，你要先了解，到底收息資產，是否適合你自己。

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

因此，若你係年青至中年人士，而一刻應先集中財富增值，收息產品並不適合你。相反，你已近退休之年，又或者你係好保守架投資者，將資金投資在收息資產，係可以。

債券和派息基金，這其實只是「產品」，物業、優質股是「資產」，所以從財富本質上，我地應較集中持有「資產」，才對我地最有利(你可以睇睇《財務自由行》一書，我從財富本質上，講述了當中原理)。同時，現時息口低，但未來有機會重回加息週期，債券未必是最好的投資工具。

至於債券基金，坊間分好多種，你要小心睇，因為有d風險低，無乜問題，有d則有潛在的風險，絕對不是保本的產品，有機會出現了「賺息蝕價」的情況。

第一，有些基券基金，會投資「高收益債券」，即是「垃圾債券」，你一定要睇睇佢所佔的比率。

第二，債券基金往往不是單純地持有債券，而是可以作買賣，以及利用衍生工具作對沖等策略，即是可能有價格上的波動。

第三，不少銀行都會提供借貸，以槓杆去放大回報，以平息借貸去賺取息差。低息環境時間題不大，但進入加息週期，不止借貸成本增加，同時債券價格往往在加息期下跌，雙從打擊下，投資價值成疑。當然，若然加息步伐不快，息差利潤就可觀。

我不是說債券基金有問題，只是說明當中的風險，因為市面上的基券基金好多，你要仔細分析。

你以所以提及的，都是收息類產品。XXX派息基金計劃，派息係吸引。但你要留意翻是否全數為「保證部份」，還是會有波動。

而「XXX動力亞洲高收益債券基金」和 「XXX基金 - 亞洲高收益基金 」 ，主要都係投資一些「未達投資級別的高收益證券」。

這類所謂「高收益債券」，即是「垃圾債券」，風險唔細。

唔係話唔可以投資，但你要明白當中有一定風險，而非一個穏陣的收息選擇。

------------------------------------------------

Q21315：

龔成老師，你好!我現時剛出來工作，為專業人士，工作穩定，月入三萬，每月可儲2萬，現暫定每月固定存1萬去股票戶口。暫定來年會用16萬去進修，目標是30歲時買到700萬的樓。

上年開始接觸股票，現時股票戶口有 27萬，分別為
港股 15.6萬
美股 6.7萬
現金 4.8萬

另外有銀行有5萬存款、2萬 ibond及10萬定期 (4月到期)

以下為港股詳情
1. 9988 X 300 平均價:257.3333
2. 00001 X 500平均價:57.6
3. 1093 X 2000平均價:8.5
4. 00003 X 1050平均價:13.7524
5. 3319 X 250平均價:30

6. 6618 X 50平均價:146.
7. 3067 X 300平均價:17.2333
8. 1317 X2000平均價:2.3
9. 3033 X200平均價:8.675
10. 3313 X 20000平均價: 0.1515

問題1: 我打算等3313回去比較高位置就賣出，這做法可以? 除了3313外，想問問上述組合有甚麼需要改進的地方? 我需要多增加潛力股，還是增持現有個股(3319/1093)，或增加現金?

問題2: 9988 佔倉好像比較多，但之後有機會波動，我應趁低吸納，還是維持現狀，甚或賣出一手?

問題3: 想問問我的買樓目標會不會太難達成? 我又可以以甚麼方式加快達成目標?

問題4: 想問問 1523 珩灣科技是否優質股? 因為其ROE在30%升至40多%、EPS、及派息都長期穩定增長，現時PE在15左右，亦不算太高

加上5G時代對其SD-WAN路由器銷售應該起剌激作用，初步分析正面。可是，由於沒有太多大行研究報告，所以不太肯定其預測盈利。

如果是優質股，同時想問問其合理價。

問題5: 想問問6186 中國飛鶴是否優質股? 因為其ROE在這4年都維持在40多%，且5年間淨利率增幅(10.91%  40%) 顯著高於毛利率增幅(54.61%  72.5%)，反映公司有效降低成本及定價。

如果是優質股，同時想問問其合理價。

問題6: 想問問1297中國擎天軟件是否優質股? 初步分析: ROE平均有20%; EPS穩定增長，而2020年度更是有100%增長;

流動、速動比率持續有6以上，反映公司現金流動性甚高; 公司業務(退稅軟件)具低成本，高獲利性，且沒有太多競爭者。

如果是優質股，同時想問問其合理價。

感謝你的回應。

龔成老師︰

1) 雅高控股（3313）主要從事大理石開採、加工、貿易、銷售、商品貿易及貨運、倉儲和物流業務。

公司市值不高，盈利十分波動，質素不佳。企業不斷虧損，無乜投資價值，賣出這股較好。你唔好預佢會升翻好多，因為佢投資價值好低。如果你唔想一次過沽晒，你可以分注咁出都可以。

你才剛踏入社會，算係年青一群。投資上，可以較為進取，以「平穏增長股」 + 「潛力股」作目標，比重大約各佔一半。

ibond和定期這類收息產品，增長力好有限，唔建議用。

至於組合上，你而家太偏重左係潛力股，佢雖然有增長潛力，同時風險都較高，不宜持有過多。

未來時間，你要加大翻平穏增長股部份，令組合更平衡。

平穏增長股：金沙（1928）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）、長建(1038)

2) 阿里巴巴(9988)成個組合近3成，明顯偏高，有過集中性風險。緊記，相同行業不可佔組合多於3成，而單一企業不要高過15%。

就算佢跌，你都唔好再加注住。到你組合平衡翻，你先再作考慮。

3) 大市過去年平均回報10%計（連股息再投資），你每月投資$20000再加上你現有定期、資金和持股等(約值45萬)，5年後大約會增值至250萬。

相信這筆資金，足夠幫助你置業。

4) 珩灣科技（1523）過往的增長不錯，相信長遠有發展，但公司好細間，一年盈利只有不足美金$1500萬，風險較高，現時估值算是合理，都有潛力的。

若你想投資，可以好小注博下。

5) 中國飛鶴（6186）不差的。

佢係中國從事生產及銷售乳製品，以及銷售營養補充劑，以生產嬰幼兒配方奶粉產品為主，當中可分為高端嬰幼兒配方奶粉及普通嬰幼兒配方奶粉兩大類別。

產品有一定的品牌與市場，同時過往的增長力理想，長遠有前景。

比較大的問題是估值，近期經常在合理區中上部至略貴的水平，股價有時投資值博率不足，因此要注意風險。長線投資可以，但就要控制注碼。

6) 中國擎天軟件（1297）本質不差的，市場擔心佢之後的增長動力減慢，因此估值上認為佢會較低，但如果佢能保持這增長，其實現時的股價有吸引力的。

這股的其中風險，就是規模較細，以及行業存有風險。現價其實有投資價值，但就唔建議太過大注。

------------------------------------------------

Q21316：

你好，龔sir ~ 我是在上月開始閱讀「80後百萬富翁」及 「大富翁置富藍圖」。我很後悔現在（30多歲）才閱讀你的書籍，浪費了很多時間。

我現在剛踏入股票巿場，想你幫忙分析一下組合是否合理？

周大富 20% $11入
盈富 25% $29入
海螺創業 33% $36入
太古地產 8% $24入
新鴻基公司 8% $4入
3067 ： 3% $17入

現在有2000是供基金（最少要多供2年，不算之後也會月供），月供$4000 （供2800，1929及 0586）。

另外，手頭有6萬現金，因要讀書。我應該先投資在股票巿場，都要交學費才換回現金，還是先保留？

最後，近來中國都在研究氫能量，請問你對1907 旭陽集團的前景有何看法？我比較擔心佢負債情況，但佢是行業龍頭，加上同地方政府有不同合作，也很吸引。

不好意思，一下子問你這麼多問題，希望你能騰出一點時間回應我的疑問。謝謝

龔成老師︰

你現時持有和月供的股票，都係有質素，適合你這年紀。但緊記個別企業，唔好佔組合15%以上，否則會有過度集中風險。

你周大福(1929)海螺創業（0586）明顯有這個問題，所以你月供可以先用另一隻股票代替。而現貨可持有，唔洗沽出，用新資金去慢慢平衡翻個組合，咁就可以了。

而盈富(2800)雖然超過15%，但由於佢係一籃子股票，而非單一企業，所以比重上係無限制。另外，恆生科指ETF（3067）反而你加翻少少比重都可以，但當然不是一次過加，只是這類ETF，組合佔多少少都無問題。

至於手上6萬現金，如果你1,2年內就要用來讀書，我就唔建議你投資了。因為時間太短，回報不確定性會好高。

中國旭陽（1907）無特別分析，只見之前有些報導。

佢之前公布，澄清最近涉及其於河北省定州市及內蒙古的氫能項目的若干媒體新聞報道，指定州項目試產，並擬於呼和浩特市建加氫站。

該集團指，有關於定州經濟開發區河北旭陽新能源產業園內建設運營氫氣儲運和建加氫站，有關生產基地去年7月開始試產，探索區內在氫能存儲、運輸和燃料相關電池布局機會，開拓京津冀市場等。

至於去年，該集團合營企業與呼和浩特清水河縣政府簽訂另一項氫氣項目框架協議，合作於清水河縣開展氫氣開發項目。

與定州項目相似，該集團將負責於清水河縣進行氫能生產、運輸和建設加氫站，把該市發展為華北地區氫能輸出基地。

只可以話有風險有回報的類別，如真的想投資，一定要控制好注碼。

------------------------------------------------

Q21317：

老師你好，本人24歲，扣除家用每月儲蓄約$15,000(自己較少開支和娛樂)，現金約有$100,000。

目標是28歲前置業，但預計現時置業需$400-$500萬或以上，不知這目標是否在能力和資金範圍內，所以想請教你的投資方向和意見。

股票如下：
0003 11.5，10,000股
2382 175，100股

另外，想問繼續買0003，還是賣出？定轉移集中買其他潛力股如舜如丶中生或小米。謝謝。

龔成老師：

你有4年時間準備，都可以利用投資，去適當利用股票去進行財富增值，到你準備買樓前的一年，就要將股票分段賣出，準備所需的資金。

你可以投資「平穩增長股」，加上小量「潛力股」為組合，助你幾年內財富增值。

煤氣（0003）增長力不強，你不宜持有太多，建議減部分，但留部分是無問題的。

另外，舜宇（2382）、中生（1177）、小米（1810）都是適合你的，都是有潛力的股。不過，你不能只集中在潛力股。

你現時的現金，可以動用$5萬，分注投資。

至於每月儲到的$15000，初期可月$10000去做月供或分注，到後期，就要慢慢減金額。

------------------------------------------------

Q21318：

hello 啊Sir
想問問

#2318 中國平安
#2518 汽車之家
#388 港交所

呢3隻長期持有可以嗎？
合理價大概係幾多？
謝

龔成老師：

中國平安（2318）有質素的，佢有規模，有品牌，近年的發展都不差，不過，股價有時會有少少波動，這主要受投資市場表現影響。

這股有長線投資價值，是平穩增長型，分注投資都可以。

港交所（0388）絕對是優質股，獨市生意，加上香港的金融中心角色，這企業有長線投資價值。

多年來的生意與盈利都有理想增長，派息不差。

但要留意，由於這股的盈利會受股市成交影響，因此股價都會有影響。

這股雖然有質素，但近年成為市場焦點股，令佢經常處貴的水平。現價略貴，你預回1成較好。

這兩股都好有質素，你月供都得。

至於汽車之家（2518），都有質素的。

佢中國的汽車消費者在線服務平台。根據資料，以移動端日活躍用戶計，在汽車服務平台中排名第一。

透過旗下網站為汽車消費者提供全面、獨立及交互式的內容和工具並為汽車價值鏈的汽車製造商和經銷商提供全套服務。

根據資料，集團是最大的在線汽車廣告及線索服務供應商，就媒體服務及線索收入而言，於中國在線汽車垂直媒體廣告及線索市場中佔據的市場份額約3成。

佢收入源自媒體服務、線索服務及在線營銷及其他。

佢係2008年成立，最開始是一家內容型垂直媒體公司，專注於媒體服務。於 2016年，推出「4+1」戰略轉型方案，打造了一個囊括「車內容」、「車交易」、 「車金融」及「車生活」的平台，從內容型垂直公司轉型和升級為數據和技術驅動的汽車平台。

自2018年起，專注於用人工智能（AI）、大數據及雲技術（統稱ABC）開發全套智能產品和解決方案，透過提供跨價值鏈的端到端數據驅動產品和解決方案，構建一個連接汽車行業所有參與者的集成生態系統。

展望未來，計劃繼續利用「軟件即服務」（SaaS）能力連同核心AI、大數據及雲技術同時進行橫向和縱向擴張。

發展力是有的，但價位都唔算平，如果控制注碼，這股都可長線的。

------------------------------------------------

Q21319：

你好，想請教你，25歲，月入$25000，一直都是月光族
每個月要還卡數$7500（大約仲有1.5年）

但依家想改變，唔想再喺呢個循環，因為經常都會自責、內疚，依家想儲錢結婚、買樓，自覺好似得番好少時間，已經25歲

已報了你的投資班，希望學習投資知識，因為一直都無接觸理財、投資知識。

屋企人有買你的書，應該睇邊本先？

依家我打算先儲蓄、供月供股票，但係我應該供邊隻，同埋應該供幾多錢？仲有d咩可以做？
謝謝你！

之前只在中銀開左個股票戶口，我應該喺中銀做月供股票，定係有其他建議？謝謝你！

龔成老師：

過去的情況無得改變，自責無意義，你只要做好這刻就得，你現時25歲，只要行翻正確的方向，已經比好多同齡的人做得好。

現時，不要再增加卡數，如果卡數利息較高而又可以提高還款，就盡早處理。

之後，就要留有一定的現金，作為備用及等投資機會。

到餘下有資金，可以長期都不動用的，就可以做長線投資。

你25歲，財富有增長力，可投資「平穩增長股」+「潛力股」，在你知識未算高時，潛力股不用太多。

暫時，你可考慮一些ETF，如盈富（2800）以及恆生科指ETF（3067），至於個股，我會建議你上完堂後，先正式加入。

另外，現時大市波動，唔好用盡現金投資。

投資不用急於一時，這是一個長期的策略，所以好多野都可以等你上堂先進行配置。

------------------------------------------------

Q21320：

本人在銀行工作，part-time 要徵詢公司的同意，是不可能的事，但轉工是一個可行方案。不過，本人在這間公司任職，倘餘幾個月，快將7年了！

如果工作屆滿10年， MPF （僱主voluntary 部份）可以拿到100% 。現在要離開公司的話，損失40%, 大概都有幾十萬，唔捨得！

距離屆滿10年，尚有3年多，現在打算好好裝備自己。

老師，我明白在股票投資組合裏要取得平衡，投資增長力較強的股票的同時，亦要投資平穩增長股。

請問如果用7年的時間分別投資平穩增長股及增長力較強的股票，平均7年回報的差距有多大？

龔成老師：

其實我以前都做過銀行10年，我未過試用期，已經出現做兼職了，當然，銀行不會同意，佢地亦不會知。

這當然有風險，但有時做人，又唔好有太多限制思維。

但如果你不想做兼職，當然無問題，只要好好利用這幾年的時間，裝備好自己就得，因為我都睇得出，你的目標是起碼想做多3年，那你就好好利用這3年時間。

如果用7年時間，投資平穩增長股，我假設回報為8%，假設每月投資$10000，預期7年後滾存到$108萬。

如果用7年時間，投資平穩增長股，我假設回報為15%，假設每月投資$10000，預期7年後滾存到$130萬。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。