多謝大家關心我們在隔離營的生活，趁我還有三天在營解答一下大家問題

Q：唔係要隔離十四天咩？點解有人可以早走？
A：因為隔離令係以我地最後一次有機會接觸確診者，或者喺懷疑受感染環境逗留（即係返工講波）嗰日之後起計十四日。

Q：今日又有人走先過你？
A：馮堅成 同 蔡芳裕 今晚返得屋企，徐sir徐嘉樂 同 李嘉耀 Dale Li 就聽晚走！何振然 Elson Ho 噚晚已經返咗屋企。

Q：咁你幾時可以走？
A：我同另外三位同事貝可泓、Emil Cheung 張存華 - 華弟 同埋 邢安邦 Ying On Bong 係最後一批喺12/31返工嘅，所以1/1起計，隔離期到1/14晚23:59完成。即係後晚走！

Q：咁即係唔駛隔離十四日？
A：我地1/3入營，所以喺竹篙灣只需要住十二日，今天係第十日。

Q：點解要夜麻麻出營？
A：因為隔離令係23:59完結，梗係想盡快返屋企，不過聽聞有部分人會選擇瞓到第朝早食埋早餐先走。呢度會有兩班車安排俾營友去東涌港鐵站，一班夜晚2359走，一班第朝1000走。但營友都可以自行安排接送，位置就喺迪迪尼私家車停車場再後啲。

Q：Sports 2 World 體通天下 幾時有返粵語評述？
A：我會喺1/17同 梁國成 KwokShing 負責0830嘅黃蜂vs速龍，徐嘉樂就會同蔡芳裕負責1100嘅鷹隊vs拓荒者。1/20早上1000會有阿貝同華弟負責塘鵝vs爵士。

Q：出營後最想做嘅第一件事？
A：喺無宵夜食嘅情況下，最想返屋企浸一個熱水浴，不過離開竹篙灣前一定要拎「離營書」。

Q：隔離營伙食真係好差？
A：其實好健康，份量唔會太多，亦唔會太油膩。而且有時會出現「份子料理」，俾你喺隔離期間有意外驚喜。

Q：一日三餐最唔好食係咩野？
A：係「凍」！所以最怕瞓過籠，錯過咗取餐時間，俾外面大風吹凍晒先拎入房。

Q：呢幾日係咪好凍？頂唔頂得順？
A：窗門都閂實哂，唔會太凍，加上暖氣機，有需要時開着佢，不過我唔中意間房開暖氣會變得好乾燥。

特別一提，呢幾日外面真係又凍又大風，見到今日嚟收檢測樽嘅防疫人員，食住西北風嚟檢查資料，仲有每日派飯派水嘅人員，真係要同佢地講聲「辛苦哂！」

Q：點解你成日影日出？
A：因為我年紀大，早起身（哈哈）。唔通我會話，因為Kobe令到我習慣凌晨四點起身咩？😉 不過我都開始會多留意日落。

Q：要唔要帶多幾件衫俾你啊？
A：講真，入嚟成個禮拜，淨係洗過一次衫，因為做完運動出晒汗唔洗唔得，所以儲埋一次過手洗，一早帶定多幾套運動內衣，好方便。反而平常著衫，同堅成件baby blue一樣，日日都著住唔使換，完全唔臭，好多衫都未著！

Q：有咩野最想帶入營但無帶？
A：多幾個香薰蠟燭，同埋以前加拿大用過，插電嘅充氣床褥。

Q：有咩野帶咗入營但未用過？
A：NINTENDO SWITCH！日日掛住睇波同睇Netflix，完全無時間打機。

Q：隔離營裡面點樣打發時間？
A：你睇我IG FB同埋Story咪知囉。好似開LIVE同埋宜家玩答問題，都可以打發唔少時間。仲可以做下HIIT、睇波、射下籃球仔、睇Netflix…

仲有咩問題？歡迎提問。
過埋今晚，仲有兩日俾你地問！
(有無人話俾我知點解竹篙灣英文叫PENNY's Bay?)

#竹篙灣的日與夜
#竹篙灣QandA
#QuarantineLife
#StayNegative
#阿勤講波
#竹篙灣檢疫中心
#檢疫中心 #隔離營
#隔離營的生活