富二代殺人狂（上） . 我屋企好有錢，就係果種「贏在起跑線」嘅富二代。 . 人地介紹我，都係「佢咪XXX個仔」，然後大家恍然大悟，露出或羨或妒嘅眼神。 . 我一直以黎都想除甩呢個標籤，令大家認識我Johnny呢個人，但由細到大，我有任何成就，都會同我個有錢阿爸扯上關係。 . 讀書叻？「梗係啦，佢屋企用咁多錢培養佢。」 . 事業有成？「梗係啦，佢有後台，阿爸打個電話，咩工都有佢份。」 . 就算追女仔拍拖，人地都會覺得，個女仔係鍾意我屋企副身家。 . ， 直到有一日，我睇到一條片，講一個日本富二代，喺外國留學果陣槍殺咗個女同學，切開黎食。 . 好快佢俾警察捉咗，佢好爽快咁認罪，但佢阿爸幫佢請咗最好嘅律師，輾轉之下，個富二代居然重獲自由。 . 然後呢？佢用食人嘅經歷，寫咗幾本暢銷書，仲有人請佢寫食評，因為佢食過人，有得拍電影，名成利就。 . ， 喺網民留言唾罵話「殺人放火金腰帶」果陣，我諗到另一樣野， . 講真，名利唔係好吸引，我唾手可得，但呢個富二代做嘅野實在太突出，突出到......擺脫咗富二代嘅標籤。 . 所有人提起佢，都係講佢個名，或者改綽號叫佢「食人魔」，無人再講佢係「XXX個仔」。 . 呢種「獨立」，係我夢寐以求嘅事。 . ， 好似一個困喺牢籠嘅人，終於睇到一條出路，佢會不顧一切咁向果條出路爬，直到粉身碎骨， . 所以，經過一番思想掙扎後，我決定模仿。 . 我做咗一個詳細嘅計劃，了解各國法律、點樣買槍、邊個係最好嘅律師。 . 殺人唔難，難嘅係脫罪，只要逍遙法外，我就可以成為食人界KOL。 . 我同果個日本富二代一樣，有最堅實嘅後盾：屋企有錢。 . ， 然後，我報咗個外國學位，揀咗個又靚又聰明嘅女同學Selina做獵物。 . 我儘量模仿果個日本食人魔嘅做法，先叫Selina讀德國詩篇，等佢讀到好專心，我再喺佢後面拎把槍出黎。 . Selina背對住我，突然問：「你覺唔覺得，呢個場景有啲熟悉？」 . 「下，點熟悉？」我一路講，一路研究點樣扳動扣板。 . Selina好慢咁講：「曾經有個日本人，喺個女學生讀德國詩篇果陣，喺背後殺咗佢......」 . 我呆咗，Selina轉身，正好望到我手上果把槍。 . 無驚慌，無尖叫，Selina勾一勾嘴角，笑得嫵媚。 . ， 然後，我嚇到連槍都跌咗落地。 . 我知道呢一仗我已經一敗塗地，就同Selina坦白我嘅計劃。 . 唔知點解，我覺得佢唔會告發我，不過都無咩罪證，我又未得手，把槍都係從合法途徑買番黎。 . 「Johnny，你有無殺人嘅經驗？」Selina嘅語氣，就好似人事部問有無相關工作經驗咁。 . 「我無......但凡事都有第一次，果個日本富二代都係第一次殺人。」 . 「你同佢唔一樣，佢係被心底嘅慾望驅使，享受過程，就做得好自然。」Selina搖搖頭：「而你，想要嘅只係結果，係世人嘅認同。」 . 我未諗到點反駁，Selina喺手機上開咗幾張圖畀我睇，全部都係開劏破腹、死狀恐怖嘅屍體。 . 我望咗一眼，就將晚飯嘔晒出黎。 . 「你咁樣就想做食人魔？」 . 待續... . #短故 #短篇 #小說 #陳美濤 #廣東話 #粵語 #富二代殺人狂 #tomatochan #殺人 #恐怖