《祇園》 對於喜歡日本嘅香港人，或多或少都聽過甚至去過「京都祇園」。不過祇園究竟係啲乜，相信未必個個清楚。 世上最初嘅祇園又稱「祇園精舍（Jetavana-vihāra）」，中譯全名為「祇樹給孤獨園」，位於印度北部舍衞城南郊，為釋迦牟尼在世時規模最大嘅精舍（寺院）。祇園前身為波斯匿王嘅太子・祇陀（Jeta）所擁有嘅一個園林。原名為須達多（Sumatra）嘅給孤獨（Anāthapiṇḍada）係一個慷慨嘅富商，為求追隨釋迦學佛不惜耗盡身家，因而感動祇陀捐出園林。釋迦在此長居二十數載，並創造出不少佛學經典如《阿彌陀經》及《金剛經》等等。 唔同嘅時空、唔同嘅基因，引伸出唔同嘅文化。唔知道係乜嘢原因，可能係古時資訊唔流通，又或者單純係言語不通，種種人為問題下導致祇園一詞喺日本有不同嘅見解。江戶幕府三代將軍・德川家光曾派遣一名荷蘭語翻譯員・鳥野兼了到祇園視察。當時，一班位於柬埔寨金邊嘅日本人誤以為祇園即吳哥窟，並將錯誤消息傳回日本。鳥野兼了誤信謠言，錯誤抵達吳哥窟，並製成一幅「祇園精舎見取図」。有趣嘅係，謠言唔只得一個，連呢一幅見取圖都被誤傳為旅行家・森本一房嘅作品。傻豬豬嘅日本人被呢啲謠言呃咗差不多二百年，直至明治末期，建築學者・伊東忠太先正式確定呢幅見取圖所繪畫嘅其實係吳哥窟，並非大家所想嘅祇園精舍。 謠言真係多不勝數。《平家物語》第一卷第一句「祇園精舍的鐘磬，敲出人生無常的響聲」詩意十分，但原來真正嘅祇園精舍根本就冇鐘，梵鐘嘅起源其實係中國。唔知道平家物語嘅作者當時其實係咪寫緊潮文呢？另外，唔知道係咪受中國道教嘅影響，還是當時嘅日本人9up得太犀利，完全由日本人原創嘅神・牛頭天王成為日本祇園神社嘅守護神。明明祇園係一個佛教用語，但係又撈埋神道嘅概念，即所謂「神仏習合」。個人認為左抄右抄其實又冇乜嘢大不了，香港人都食慣fusion菜啦，更何況迷信嘅人點都係迷信，正如今時今日好多所謂佛店會講十二星座同占卜等等，我嘅取態係「你有你搞、唔好搞我」。不過去到明治維新初期，新政府為求確立管治權威同實現「王政復古」「祭政合一」，選擇將神道國教化，並推行「神仏判然令」政策，即神還神佛還佛，河水不能犯井水。與此同時，不少神官妒嫉佛教擁有大型土地以及大量僧兵，以神佛判然令之名引發「廃仏毀釈」運動，大量佛教寺院、佛像、經典被破壞，如此干擾宗教自由嘅行為有如中國嘅文化大革命。 經歷完一場浩劫，京都東山祇園神社喺新政策下重新命名為「八坂神社」。不過祇園呢個名已經深入民心，神社前一帶嘅地域至今仍被稱作祇園。作為京都最繁榮嘅區域，祇園擁有不少芸妓及遊女。時至今日，雖然歌舞妓、茶道不再為市民一般娛樂，但仍然以傳統文化方式得以流傳。 鏡頭一轉有如乘搭著時光機，畫面返返嚟我哋嘅家香港。東方小祇園被譽為「香港第一齋」，創辦人歐陽藻裳早喺1905年便於半山堅道開立第一間店鋪。如今只剩下灣仔軒尼詩道店依然屹立。 整合以上資料嘅過程中，我慢慢感受到文化有趣又可怕之處。原來人一生之中都可能係活喺謊言之中，真實嘅只有當下嘅情感，嗰個只係屬於你一個人嘅情感。