【龔成問答信箱】（Q21921-21940）

Q21921：

老師，上完最後一堂，多謝你既分享同教導。

我follow左你個page好耐，但都係今年先開始認真學投資理財，以前以為只要儲錢叻就ok.

自問儲錢唔算差(當然無老師勁), 以前一個月揾一萬左右都儲到7至8000左右，因為細個開始就想收租退休

(大學個時我靠幫人補習都儲到10萬畢業)不過總係儲唔到大錢，次次一儲到一筆仔，就會係無厘頭既情況就會用左

直至認真睇投資書，認真睇致富心理先發現原來我方法算ok, 但心態唔好

老師，尋晚你話俾個終極目標自己，我好認同。收租退休都仲係我終極目標，但係依家學識要set short term goals

話說我買左樓，唔係最理想既，但都係我心水地方之一。新界藍籌屋苑，希望會係我第一間有既樓，之後會再換大啲/買多層收租，希望一步一步向目標前進。

多謝你過去8堂授課。雖然我未明得晒，不過都照報左進階班！希望可以學多啲野！

暫時我都只係做緊月供，見次次你講親既優質股都偏貴。同埋啱啱買完樓要少少時間回氣，差不多差左袋。

不過我會留意多啲股票市場，等自己既投資唔好集中晒係層樓度，雖然依家有mortgage link account, 但我諗揀啱股票既回報會更高，更快可以幫我買第二層樓然後開始收租。

Sor for 太長氣

龔成老師︰

其實你未掌握晒，係正常。但只要你努力溫書，再去實踐。好多你唔明的知識，就會慢慢變得明白。

因課堂教你們的，只是一些知識、技巧和經驗分享。你必需要去實踐，去累積經驗，我教的知識才會有用。

你現時投資想法，大致都正確。由於你財富組合，偏重係物業類。現時你應用新資金，先集中投資優質股。而你未對平貴太有把握前，可維持月供模式去做。

而第二個物業，你唔洗太急，最好隔長少少時間，先再考慮，以減低週期性價格風險。

至於進階班，其實你掌握到初班的7成知識，你就應該應付到。如果你覺得自己未到7成，你就在此期間，比心機溫，為進階班好好準備。

進階班見!

------------------------------------------------

Q21922：

你好啊，想請教下因為計劃緊買樓。

1. 你覺得應該放哂全部股票去比多啲首期好，定係留返部分股票唔放之後比少啲首期較好？

2. 另外，如果諗住可能半年-2年內買樓，係咪唔應該再做月供？

因為我同男朋友現時月供我：$5000 / 男朋友：$8000

龔成老師︰

1) 現時按息不高，我建議你借多D，空出來資金，用來投資增值，效益會較高。

而且，我地投資都會講求一個組合平衡性。如果你買樓，而要盡固股票，令成個財富組合，完全偏晒去一邊，其實係唔理想。

2) 要視乎你月供資金，係唔係需要用來置業。如果不用，你維持月供係無問題。

若要動用，你就要睇有多久，才會動用。若只有半年至1年，最好就不要月供，直接現金持有。

如果長少少，可以去到2年，你都可以維持月供。但選股上，就唔可以太進取，盈富(2800)係可以。

但比亞迪(1211)和小米(1810)這類潛力股，波動性太大，我唔建議。

另外，你可以考慮收息股，佢地增長力不高，但勝在股價波動較細，又有一定股息，都值得你考慮。

收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）或收息基金(3110)都可以。

------------------------------------------------

Q21923：

老師，我係你股票班學生，上年上你堂，真係獲益良多，感謝你一直既分享，同發放正能量，令我覺得自己都有機會做到。

但可惜我剛上完堂，婚姻出現問題，呢半年我經歷情緒問題，好想自己慢慢放下件事，好想向前行

想為自己打算，要靠自己係香港置業，決定自己生活，但睇過好多小單位，一個人供真係好吃力，供得樓黎，又無多餘錢投資，令我覺得無希望一樣。

睇住自己之前建立既股票組合，阿里同中煙都跌好多，而令到心情更差，好似已經努力存資金，但覺得唔會達到財務目標一樣，好灰心。

想多謝你的正能量分享，有時令我覺得仲有希望。另一方面我對唔住你，發生件事後，我無好好溫習，可能課程內容已經俾反晒老師你了。

但我呢排情緒好轉，我亦打算抽時間溫習，希望會pick up 反。感謝

龔成老師︰

每個人一生中，難免都會經歷一些人生起跌。在不順境時，會覺得做什麼事都很困難，有一種無形的無力感。

但你要明白，這個世界，唔會永遠只係給你不如意的事。就好似大雨過後，你是總會看得到晴朗的藍天一樣。

你可以給自己一個時間，去慢慢調整自己心情。有需要時，你可以尋找專業人士意見(如社工、醫生)。之後，你再調整投資和置業計劃都未遲。

中煙國際香港(6055)和阿里巴巴(9988)都有質素，中短期波動總會有，但佢地質素無明顯變差，你照長持有就可以。

月供方面，如果你係用我之前建議，你就照進行，就可以。

記住，你要先照顧好自已，才進一步去計劃其他的事。只要我地要按部就班，一步步去處理眼前問題，總會找到方向。

------------------------------------------------

Q21924：

龔成老師，我最近買了一些股票，比亞迪1211，恆大汽車708，中國平安2318，信義光能968，中芯國際981，工商1398，粵海270，這些股可以長期持有嗎？需要set止蝕嗎？

另想問問中國有贊8083有潛力嗎？想買黎長線投資，值博率高嗎？

另完美醫療最近兩日回了不少，現價8蚊左右可買入嗎？還是等待合理價4～6蚊再買？

VESYNC 2148我12蚊買，依家跌到10蚊想問需要止蝕嗎？佢係小家電龍頭，但由於之前有部份股權有禁售期，黎緊18號解禁，我怕會再大跌，請問需要止蝕嗎？但看佢基本面是強的，唔該哂。

補充一下買價︰

比亞迪1211：$171｛佔比10%｝
恆大汽車708：$36・35｛佔比10%}
中國平安2318 ：$83 ｛佔比20%}
信義光能968 ：$13・93｛佔比10%｝
中芯國際981：$24・75，｛佔比10%｝
工商1398：$5・02｛佔比20%｝
粵海270：$11・5 ｛佔比10%｝
阿里巴巴9988：$217・8 ｛佔比10%｝

龔成老師︰

這些股票都有質素，係一個偏向進取的組合。若你係年青至中年人士，這個組合係可以。

但比亞迪(1211)現價係貴，現貨可持有，但加注最少等到$135以下，才好考慮。

另外，恆大汽車(0708)雖然可能有潛力，但風險高，佢資金投入的確強，大力發展新能源車，但這些仍未有賣產品真正的實力，長遠能帶動多少收入，未知。

由於仍有好多未知數，而股價已經大升左好多（比半年前），因此，這刻要自己衡量風險。

可能佢真的有潛力，但連基本的銷售銷售都未有，我地作為投資者，就好難分析，只可以話佢股價會大上大落。

我唔係話佢無投資價值，只係不確定性較高。投資時，必需控制注碼，不能太大注。

中國有贊（8083）集團主要於中國從事經營電商業務及支付服務業務，業務分類如下：

（１）電子商貿：透過電商品牌「有贊」提供各種有關虛擬批發及零售之線上及線下解決方案及服務，如「有贊微商城」

以有「有贊零售」等ＳａａＳ軟體產品及人才服務、面向開發者的「有贊雲」ＰａａＳ雲服務、面向品牌商的「有贊推廣」與「有贊分銷」、以及面向消費者的「有贊精選」與「有贊微小店」。

（２）第三方支付服務。

（３）一鳴神州：提供第三方支付系統解決方案及銷售綜合智能銷售點裝置。

（４）一般貿易。

近年業務發展快速，生意增長力，不過，現時估值高，業務變化較大，整體有好大的不確定性。加上佢過往在核數師報告出現過「保留意見」，盤數可能有古怪，雖然已是數年前的事，但都會扣分。

佢不是無潛力，但風險較高，這刻投資值博率不高。

完美醫療(1830)現價依然唔平，你最好等佢有明顯回調，才慢慢小注儲貨。

VESYNC（2148）有少少潛力的。佢係美國小家電線上市場的市場參與者。根據報告，在小家電零售商中，佢係美國就通過亞馬遜產生的零售額而言排名第三及通過所有線上渠道產生的零售額而言排名第五。

業務不算差，發展有潛力，但企業規模始終較細，業務未穩定，整體都有風險。若你只係小注，持有無問題，但就要明白當中的風險。

至於解禁，解禁唔代表股東一定沽貨。而且與企業質素無關，你係唔應該考慮。

------------------------------------------------

Q21925：

龔sir, 最近我睇完你一篇關於現金貶值的文章，這樣

你讚不讚成加按物業去做投資，例如股票、基金或年金？

龔成老師︰

現金長線都只會係貶值，我地今天借錢，明天雖然要回歸還同等金額的現金，但當中價值，其實已經係貶值了。

在現時低息環境，加按物業去投資，係可以考慮。

但大前題係你有無個明確的投資目標，可以確保你有效運用這筆資金，去增值自己的財富。優質股、基金或年金都可以考慮。前2者，你可以比較翻個回報，邊個較理想。

而年金，由於本身回報唔算十分高，若按息增加，有機會令你賺取的息差收窄，甚至消失，你要明白這個風險。

之後，我地就要因應你年紀，去睇翻自己現時負債水平，係唔係適合再加重負債。

若你係30歲，總負債相對總資產去到90%，都可以。但若年紀較大，到50歲時，就最多只可以50%。

------------------------------------------------

Q21926：

龔sir. 我現有的股票組合ok嗎？

恒生 16.97%
中國銀行 4.08%
領展 26.87%
中國人壽 11.28%
港鐵公司 15.38%
阿里巴巴 14.93%
小米 10.49%

月供組合ok? 已供1年

盈富基金 53.14% ($4000)
恆地地產 21.99% ($1000)想停供，供左1年都未供到一手...
小米 21.99% ($1500)
香港電訊 2.88%(供左1個月停供左，因為你說要先增值才再現金流)

想放左恆基轉投2800，想利用沽左既錢每月加大供2800月供金額到5000元，龔sir，請問你的睇法，謝謝

龔成老師︰

先講現有持股，質素上係可以。以你41歲年紀計，都適合你。

中國人壽(2628)質素只算中等，不宜持有太多。

另外，任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

但要留意，銀行業營運模式較特別，風險會比一般行業為高。必需堅守30%這個準則，如果可控制在20%以內，會更好。

另外，盈富(2800)係不受此限，因為它是一個包含58間優質企業的基金，這些企業來自不同行業。因此，盈富(2800)就算在組合中佔較大比重，都唔會造成過度集中性風險。

你現時恆生(0011)、港鐵(0066)和領展(0823)係超標，但由於佢地都質素，因此你不用沽出，只要利用新資金，去慢慢拉翻平衡，咁就可以。

月供方面，無問題。如果你想集中供盈富(2800)係可以，但唔建議沽恆基(0012)現貨，因為此股係有質素，碎股唔應該係你持有一隻股票與否的考量。

現時大市只在合理區，每月資金唔好盡用。最好留有部份，等大跌市出現時，可以用來掃貨。

------------------------------------------------

Q21927：

龔老師想請教一下，早前以26蚊入左2手 0241 阿里健康，今日跌到18蚊，請問如呢幾日以18蚊入番1至2手，呢隻股下半年，有無上升既潛力？

^_^感激不盡！

龔成老師︰

我地投資股票，其實等同投資一間企業。希望透過其自然增長，以達至財富增值的目的。

所以，我地投資一定係長線，而唔係短期炒賣，去賺差價。

阿里健康（0241）這是潛力股，佢營運醫藥電商、互聯網醫療等業務。

「醫藥電商業務」，這業務主要有兩種業務模式，由自營電商和天貓代運營，涉及非處方藥品、醫療器械、計生用品等。

另外，就是「互聯網醫療業務」，阿里健康與國內多家二三級醫院建立合作關係，患者可以通過阿裡健康、支付寶等平台，做到線上掛號、問診、諮詢用藥等等的服務。

阿里健康利用醫療AI系統「DoctorYou」去進行營運，該系統包括臨床醫學科研診斷平臺、醫療輔助檢測引擎、醫師能力培訓系統等，輔助醫生睇病。

業務上，有好大的潛力，不過，本質波動，股價上落大，消息多，市場炒作多，這類股風險都不少。最大問題是無人能正確估值，市場現時只是估估下，推將唔到佢將來的價值。

我唔知道佢下半年會升定跌，但以長線潛力計，這股有投資價值。但由於不確定性較高，這類股只建議小注持有，但你預佢股價上落大。

若你資金非常充裕，就算再加1,2手，都只係佔你組合比重好少，否則不建議加注。

------------------------------------------------

Q21928：

龔sir, 你好！ 有問題想請教你意見，本人43歲，而家住緊一層已供完既未補地價居屋，先生剛剛又買了一層新樓大約明年底可收樓，之後打算住新屋。問題是我層居屋可以點處理好呢？

我唔會補地價放租，亦唔想冒險放租。咁樣應唔應該賣左層樓佢呢？

層樓大約可放到450萬左右，加上我有130萬現金，可否用500萬買一啲收息股來用作生活費。理想係有每月2萬5，我今年開始冇做野，家中無小朋友，先生亦都唔想我再工作。

新樓方面先生可以自己供無問題及支付到大家既生活費。先生亦提出話如果賣左層樓之後10年股票收入會唔會追唔到通脹？

如果真係賣樓轉買股票請問邊啲會合適？（是否銀行股和公用股好）麻煩龔sir比啲意見我呀。唔該晒你。

龔成老師︰

你個情況，比較複雜。我一般會建議，最好將空置物業放租，避免浪費了收取現金流機會。

但你不考慮去補地價放租，我建議可以的話，你們先住居屋。新樓則放租出去，用以租養樓的策略。變相，你先生每月都可以空出一些資金，去用作生活開支。

如果你地都係希望賣樓，去買收息股，都可以。只要你選擇的股票係有質素，長線必然係跑嬴通漲。

但由於收息股作用，主要係提供穏定現金流，去支援你生活開支。因此，你唔好預佢有明顯增長力，只會係收下股息而已。

若你希望每月有2.5萬蚊現金流，以股息率6%計，你需要本金500萬，故你賣樓後，資金係足夠的。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）或收息基金(3110)都可以。

如果你能承受到風險，有些更有超過8%、10%的高息股，但股價就略有風險，要自己衡量，佐丹奴國際（0709）、中石化（0386）、互太紡織（1382）等（記住，股價略波動，只能小注）。

(你可睇下我本《50穩健收息股》當中仲有好多)

現時大市只在合理區，你可以先用一半資金，慢慢咁分注入市。餘下就等大跌市，才出手入平貨。

但你要緊記，唔好太集中係個別企業或行業，成個組合要平衡。相同行業不可佔組合多於30%，而單一企業不要高過15%，否則會有過度集中性風險。

------------------------------------------------

Q21929：

龔成老師，你好。手上有幾隻股我列為灰色股，已持有好幾年，已經跌到一個點，現在想重組下，我應該放哂佢，還是那些可以繼續持有，搏翻身？希望你可以給我意見，萬分感謝

1）1165,順風潔能，均價1.3,持有30000股
2）1848,中國飛機，均價9， 持2000股
3）6136康達環保，均價1.75,持23000股
4）1668華南城，均價1.65,持14000股
5）1800 中交建，均價7持6000股
6）1186中鐵建，均價7.6,持3500股
7）665海通，均價3.7,持30000股

希望你能抽空看一下

龔成老師︰

順風清潔能源(1165)睇唔到有明顯投資價值，你最好係沽出。

康達環保（6136）質素好一般，長線建議你換至其他優質股，會對你較有利。

華南城（1668）、中交建(1800)、中鐵建(1186)、海通國際（0665）質素只算不過不失，這些股唔建議持有太多。

中國飛機租賃（1848）本身質素不算差，但又未到好好，主要原因是負債太高。佢利用高槓杆的模式，進行飛機租賃等業務。

其實佢業務有獨特性，在行內有規模，有長線投資價值。

最大的風險來自佢高負債，佢業務原理是借錢，買飛機，再租出給飛機公司。

航空業不確定性較大，對佢有影響，加上佢利用槓杆，風險點都會有。不過，這只是中短期情況，長遠仍是不差的。

現貨可持有，但總投資注碼不能多。

我相信你投資，存在不少核心性問題，例如選股、定價、理財概念等等。

見你持有股票，不單係質素較弱，而且好多時都係買貴貨。你要明白，買股票就同買企業，你必需要了解企業架優勢，點賺錢、行情有無發展，財務狀況等。

唔好聽消息，或者只係知個號碼，就去投資。另外，你要學識點樣去做估值，點去定平貴。

唔好受大市氣氛，影響你判斷。大市好狂熱，人人買股票，你就要小心。因為個價好易被炒高晒，影響你長線回報。

在你再投資前，我建議你先睇我寫架《80後百萬富翁》、《財務自由行》和《股票勝經》，相信可以幫助到你，去認識正確的理財概念。

之後你再重新計劃，你往後投資之路。

------------------------------------------------

Q21930：

早晨龔成老師 我想問一問關於6666恆大物業 自從我係16.4入左4手之後就一直跌到依家 跌左差唔多一半

我買之前都有做功課見佢持現金比例都好高 賺錢能力又唔錯 見佢管理物業嘅面積都增加緊 但預計嚟到佢9.8配股 佢母公司3333恆大又出債務等壞消息

想請問老師對6666前景睇法點 現價算唔算平 同埋如果母公司出事對佢有幾大影響 唔該晒老師

龔成老師︰

恒大物業（6666）其實都有質素，有長線投資價值。

佢係物業管理服務運營商，佢係中國物業服務百強企業中，以項目所覆蓋城市數目計，佢排名第二，如果以總收入、總毛利及總淨利潤計，排名第三。

類別為中高端住宅物業、寫字樓及商用物業，並已訂約管理其他物業類型如主題樂園、產業園、康養項目、特色小鎮及學校等。

佢絕大部分物業管理服務收入，來自集團控股股東恒大集（3333）所開發物業提供的服務。

至於配售，暫時只係預測，而且2.7億佔已發行股數，係一個好少的比例，影響不大。我地投資與否，應集中翻係企業質素本身。

恆大(3333)和恒大物業（6666）是2間獨立公司，就算恆大(3333)出事，財務上都唔會直接影響到恒大物業（6666）。

但恒大物業（6666）不少收入，是來自母公司提供之物業。若母公司恆大(3333)出現債務問題，影響其物業發展速度，將有機會出現負面影響。

你買入價略貴，近期股價回調不少，但都只算係合理區頂部。若你持貨不多，可以守。但持貨較多，最好沽出部份，去平衡風險。

------------------------------------------------

Q21931：

老師，好鍾意你本新書，教左我一樣好重要的事，失敗係必然，有機會去錯係好事。。。。但我都想問一樣你無咁專的事，就係我到30歲先知自己過度活躍症加d亞斯保加。。。

越來越覺得自己好難打工，因為唔鍾意跟大隊，唔明老闆的暗示，無法一心二用，易得眾人，短期記憶差。。。。。。

但我睇野好通透，危急時好應變到，長期記憶好好，觀察力好強，數理好好，英文好＜＜＜其實都比較係這兩個病常見的特質

你所講那5條路，邊條你覺得我行好？

謝謝阿sir

龔成老師︰

首先，多謝你支持我的新書。

你的健康問題，可以先請教醫生意見。以我理解，係可以透過藥物和一些訓練去治療的。

至於5條路點選擇，其實好睇你個人意向、興趣和專長。你現時健康上的問題，我相信唔會明顯影響到你行任何一條路。

「經紀團隊」、「專家」你可試下。其實「生意」都可以，但你可以試左「經紀團隊」、「專家」先，在這兩個類別，有好多你這些無法明老板想甚麼的人，反而更成功。

其實，行這些路重點唔係你當下能力。而係你是否願意投放時間，將自己磨鍊成一位專家。

當中會經歷無數次失敗，你覺得自己有否能力堅持下去，才是成功與否的重點。

------------------------------------------------

Q21932：

龔sir，有財務上嘅嘢想你幫手分析

本人30歲，已婚，暫時未有子女，但將會計劃生小朋友，與太太收入共50k左右嘅穩定收入。

資產：

1）約100萬現金
2）60萬基金保險儲蓄
3）一隻價值約30萬手錶（非必要不會變賣）
4）一層300呎一房單位，價值500萬左右，位於新界元朗區，於2018年做9成按揭上會，月供15000左右

現時與太太居住於家人嘅住所，每個月會俾番$5000家人作租用

有2個問題：

1）我應該作出投資嗎？因為驚拎錢出嚟投資，將會有小朋友需要用錢時，擔心未能即時調動

2）我應唔應該賣咗現時擁有嘅物業，因為我想買番近少少自己現時住嘅地方，當初置業係一時衝動，現時想平手賣出現時物業，並以9成按揭買另一較大嘅物業。

龔sir，我應唔應該賣出現時嘅物業再買入另一較大，樓齡較舊嘅物業？求解答，好困擾

龔成老師︰

1) 現金長線只會一直貶值，不作投資，變相你的實際財富，其實一直在減少。當然，我地都要因應實際情況，去預留一些現金，作日常交易和應急之用。

所以，你要睇翻你自己人生規劃，去調整投資大計。若你短期內，例如1-2年就打算生小朋友，時間較短，故這部份資金，最好以現金儲起備用。

但餘下的資金，我建議你進行投資增值，咁會較好。

你現時財富組合，已經有物業類。將來投資，我會較建議用優質股進行增值，這樣財富組合平衡會較好。

以你30歲，可以選擇一些「平穩增值股」+「潛力股」作投資目標。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄，另一半就先儲起架策略。

由於你投資知識不高，因此可較集中在平穩增長類股，至於潛力股，只宜小小注。此期間，你最好是努力提高投資知識，才慢慢增加翻潛力股比例。

大市現處於合理水平，那100萬資金(要先扣除，有需要預留的資金)，你可以先用一半，以"分注"形式慢慢入貨。餘下一半和每月儲蓄，就等大跌市機會出現，才大力度掃貨，並長線投資。

2) 至於換樓，你要先想清楚。因為香港買賣樓宇成本，其實唔細，一買一賣你當中會無左唔少錢。

作為自住樓，除非佢好唔適合你"長線"生活所需。或者投資價值好弱，否則我唔建議作出變動。

若你真係有實際需要，要轉換自住物業。你可以有2個方法，一個當然是沽出現貨，再換另一間。

另一個就係將而有物業放租，自己另租自住物業。這樣做，就可以保留你這個物業資產，同時也可以滿足你生活需要。

但大前題，係你這個物業要有投資價值，最少有能力跟大市同步，否則就無投資意義。

------------------------------------------------

Q21933：

你好，我買了2618（京東物流），現在我心態放寬，等盈富再跌，再入

京東9618 我也賺了少少時放了，把錢集中在剩下中

都是因為龔sir 建議，已留名你澳門班

龔成老師︰

京東物流（2618）都有質素的。

京東物流係中國領先的技術驅動的供應鏈解決方案及物流服務商。通過科技賦能提供全方位的覆蓋各個業務領域的供應鏈解決方案和優質物流服務，從倉儲到配送，從製造端到終端客戶，涵蓋普通和特殊物品。

根據一些調查報告，按總收入計，這企業係中國最大的一體化供應鏈物流服務商。

2018、2019 及 2020 年，京東物流營收分別為人民幣 379 億元、人民幣 498 億元和人民幣 734 億元。

京東物流於 2018、2019 及 2020 年產生的虧損淨額分別為人民幣 28 億元，人民幣 22 億元及人民幣 40 億元，不過，如果扣除一些非現金流的開支，又未算太差。

佢表示，上市集資所得，部分將用於升級和擴展該企業的物流網絡；部分將用於開發與供應鏈解決方案和物流服務相關的先進技術。

企業有優勢的，長遠發展正面，但中短期股價未必有好強的表現，這股都有投資價值，但現階段未必值得大額投資，小注投資係無問題。

至於沽出京東(9618)，若你係因為風險承受能力，而作出的調整，係可以。

但從財富增值角度，緊記優質股係一定要長線持有，才會有理想效果，唔好升少少就沽，目標要放遠少少。

希望疫情盡快受控，可以早點，可以回澳門跟大家見面，澳門班見!

------------------------------------------------

Q21934：

老師，買了你的書看，學到不少價值投資法。本身持有自住物業，打算月供股票計劃約行2年左右，我都比較保守，想上落較少+慢慢增長，以下組合可行嗎？

進行了約半年：

1）AIA $3000/月
2）HKEX $3000/月
3）建行 $3000/月

打算加：

4）新鴻基 或 領展 $3000/月

供完余下每月約$10000 cash flow作buffer，有其他投資推介嗎？

龔成老師︰

你現時打算月供的股票，都係有質素。當中港交所(0388)盈利較受大市波動影響，會係較高風險的一隻。但只要你長線持有，以上5隻都係無問題。

這個組合算係平穏增長型，若你係年青至中年人士，這個組合都係可以。

新地(0016)和領展(0823)都有質素，但增長潛力，領展會高少少。至於餘下$10000，我建議你先儲起，等大跌市機會，才出手掃平貨。

緊記月供係一個長線計劃，月供最少維持3年，並持有這些股票5年以上，才會有較理想效果。

你月供2年勉強都可以，但再優質的企業，都要時間去增長，所以你必需要用長線持有模式，去處理這些月供得來的股票，才會有好回報。

------------------------------------------------

Q21935：

龔sir你好，今次係第二次聯絡你，過去半年期間，我買晒你所有著作睇晒(除左買樓4部曲果本)，亦閱讀左好多巴菲特同凱恩斯講價值投資既書，叫做開始慢慢理解股票係乜野一回事

我背景今年34歲，月入只有約18k，加埋太太都係只有約30k，上年買左層6m新樓，月供約15k，今年年尾亦會多個新生命，本黎以為一世人就要供樓供到60歲退休，

但自從睇左龔sir既經歷同著作，我深深相信只要有無窮既意志力同不斷增加知識，一樣可以改變人生，就係呢團火令我將所有非必要既支出cut晒，

放工/放假亦搵多份part time增加收入去投資(雖然真係好攰)，所以我先多謝龔sir令我改變左人生態度!而我亦係呢幾個月開始建倉，詳情如下:

66@500 $45.75
175@1000 $24.75
270@2000 $13.16
1099@400 $17.7
1177@1000 $7.74

1928@400 $38.4
1972@200 $23.75
3067@200 $18.96
9988@100 $217.6

暫時仲有約$250k(全副身家)係morgate link

有幾個問題想請教龔sir:

1)你對我所持股票組合有無乜建議?如果我目標係以增長為主，有無邊隻應增持/減少?或加入邊隻股票?

2)現有組合算平衡嗎?

3)我理解龔sir所講，優質股如果股價下跌，反而有加注既機會，但有樣野唔明就係如果我買入一隻股後，股票從未跌穿買入價，咁應該如何去𧗾量加注與否呢?

因為對於資金唔多既小股民，如果只持有一兩手，財富增值一定有限，但如果高於買入價加注咪會拉低左回報囉?

4)我打算短期內最多只會動用多50k投入股票市場，因為要再增加收入/同儲蓄後先會再拎出黎投資，餘下200k就留低以備不時之需，

但現在是否未到時候?係咪應該留起呢50k，等大市有明顯回調先動用?

5)1810&1448我自己好想入，如果無貨幾錢入第一注好?還是起碼等到合理價先入貨?論增長力是否1810會比1448高?

再次多謝龔sir你改變左我人生觀!由於我現時做零售業，夾唔到時間上你堂，但我已決定過埋今年就轉工，希望到時可以夾到時間見到龔sir你真人

Thank you sir!

龔成老師︰

1) 你持有的股票都係有質素和增長力，是適合你的，你照持有就以。

2) 大致上都平衡，但留意一點，以你年紀，潛力股大約佔5成就好了。若你投資經驗較少，要再下調多1,2成。盡可能控制在這個範圍，以免組合中風險過高。

而且，你要隨著年紀增加，要慢慢將潛力股比重下調。去到50歲時，大約只宜佔2成。

3) 你要用買入價，作為入市標準。我地去制定入市策略時，應用企業平身估值平值，去做決定。只要在合理區，我地就可以有計畫地，慢慢分注入貨。但升越合理區，開始貴的時候，我地就要等時機。

若你可用注數不多，第一手是在合理區頂，我地另一注，最好等有較明顯回調，才出手。

若你注數較多，第一手是在合理區中間買入。但由於手上持貨不多，就算回升至合理區中上，你都可以再入小注，再增加持貨。

當然實際操作，我們除了可用注數外，都要考慮埋大市情況，此股質素和潛力等，去得出個最終方向。

你可以參考我<<股票勝經>> P.316-317 中的"金字塔式買入法"。我們分配資金模式，大致上就會用這個方法。

4) 這50K，我建議你儲起，因為現時大市只在合理區，不宜將全部可用資金入市。要留有部份，用來等大跌市機會。

5) 小米（1810）和福壽園（1448）都有好有質素的潛力股，增長潛力上，我會比小米高少少分數。

現價計，小米（1810）略貴，要回多1,2成才算合理。而福壽園（1448）算合理區頂至略貴，無貨先入一注都可以。

我的書本，只是給你一些投資知識、技巧和經驗。真正令你改變人生觀的，其實是你自己。

我有時都開星期六班，你可以留意。雖然你暫時夾唔到時間上堂，但唔好因為咁，就停左學習。要多睇財經新聞、年報、相關書籍，去提升自己技巧，長線投資才做得好，加油!

------------------------------------------------

Q21936：

龔成老師,你好: 上年才認識你, 開始爬文.

本人己是中年,現在份工已做了13年(有中年危機), 但一點都唔開心, 只是求生活, 月入3萬, 物業Mortage尚有300萬, 只有40-50萬現金,上年開始供股$4000 AIA & $4000 銀娛.

想請教:

1) 現在開始步會否太遲?

2) 如果想用儲蓄錢(40-50萬) 加碼在每月供股部份, 應該怎每月供幾多, 買邊隻比較安全?

3) 需要點做才有被動收入3萬達到財務自由?

每月可以儲多$2000現金

龔成老師︰

1) 現時起步雖然唔算係早，但只要你用正確方法和心態去投資增值，都可以做到一定效果出來。

2) 以中年人士而言，都有增值需要，但策略上要保守少少。你可以選擇一些「平穩增值股」，作為投資目標。

以現時大市合理區狀況，你手上50萬，我唔建議盡用。你大約可以20-25萬，分開3年，每個月加大$5500-7000去做月供。

平穏增長股：盈富(2800)、金沙（1928）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）、長建（1038）

你可以從中選擇多2隻，更好方法，就是全數加入盈富(2800)，佢係包括55間質素不錯上市公司股票的組合，有助你平衡組合中的風險。到你有一定能力，才買其他我建議的股票。

餘下現金和每月多儲的$2000，就是等大跌市時才出手。如果你能在這段時間學好選股等技巧，到大跌市時就能把握機會，財富增值會更明顯。

3) 如果你希望每月有3萬蚊現金流，以股息率6%計，你需要本金600萬。

你要透過以上方法，去累積這筆資金。到有足夠數量時，就將佢換成收息資產，去創造現金流，支付你退休生活的開支。

我假設投資回報有10%（連股息再投資），你每月投資$10000 + 50萬本金，15年後大約會增值至590萬，故這樣安排相信很大機會達至你的財務自由目標。

------------------------------------------------

Q21937：

龔sir, 現為大學year3, 預計畢業後有20-25萬資產。暫為14萬資產，5萬由屋企人保管投資，2.5萬貴金屬， 4.7萬股票，其餘為現金。

今年內預計會再有5萬現金收入作為增長，暫時收入以補習教學為主，7-8、12為收入高峰。現為21歲，如果想5年內有100萬資產，應如何部署增加收入？

小妹在投資市場上曾入手港股1.06 元入手432及美股以64usd 入手Nio，而432已離開，仍手持nio, 但虧損波幅較大。

我可以承受中等風險的投資，但仍未搵到合適自己的投資組合

龔成老師︰

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

你現時大學year3，相信是十分年青的年紀，是財富增值的黃金時期。除了盡力儲蓄、投資、學投資知識外。也要把握這個黃金時間，做好財富增值部份。

策略上，你應以增值為主。

貴金屬(如金銀、黃金)，主要係用來對沖突發性事件。佢本身唔會創造現金流，不宜持有太多。佔組合3%左右，其實就足夠，最好以實貨持有。

蔚來（nio）有質素的。佢係中國高端電動汽車市場運營，生產電動汽車，同時間佢發展緊自動駕駛，以及人工智慧等下一代技術的創新項目。

例如型號EP9、ES8、ES6、EC6，通過佢自己的銷售網路銷售汽車。長遠發展正面，前景就無問題，現貨可持有。

但你預佢之後的股價上落仍大，投資一定不能太大注。可長線的，注意風險。

盈大地產(0432)過去多年都出現虧損，加上負債不輕，睇唔倒佢有投資價值，不要再投資。

由於你現時無投資知識和經驗，對企業估值，點去定平貴未必會太了解。所以你先利用月供模式，去做增值，可以減低買貴貨風險，對你而言會較理想。

你可以投資「平穏增長股」和「潛力股」。你每月5成儲蓄做月供。其餘先儲起，用一邊月供一邊儲蓄的策略。

你現時無太多投資經驗，潛力股這類風險較高的股票，你就不要持有過多，最多維持2-3成好了。你相再保守點，甚至先集中係平穏增長股類。

到你有一定投資經驗﹐潛力股比重可以相應調高，佔組合約3-5成，視乎你當時投資經驗多寡和了解這些股票程度而定。

現時大市只是合理區，你現有25萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

我假設投資回報有10%（連股息再投資），你每月投資$8000 + 25萬本金，5年後大約會增值至100萬。你可以就著這個預算，去計劃你的理財方案。

當然，這個金額只係一個參考。你還很年青，負擔相對較少，應該盡力儲蓄去做增值，儲蓄比例最少要達至收入一半，才算理想。

------------------------------------------------

Q21938：

龔成老師你好，我今年32歲，月入$45,000，每月可儲$20,000至$30,000。

1. 目前持有股票：盈富基金2800 5000股@24.5、希慎興業0014 500股@29.5、粵海投資0270 2000股@12.08，以上是希望可以長揸收息。

2. 另外還持有：偉易達303 1300股@89.30、易大宗1733 12000股@0.78、中國銀行3988 20000股@3.29、碧桂園2007 10000股@14.57、明源雲909 1000股@60，

雖然部份都有息收，但股價一直上不回家鄉價，要不要考慮止蝕。

3. 現有$300,000現金，考慮再買入以下股票：金沙中國有限公司1928，國藥控股1099，阿里巴巴9988，銀河娛樂0027，京東集團9618，中國平安2318，

請問以上推介那一隻呢？建議買入價是多少？

麻煩晒

龔成老師︰

1) 你個財富增值概念，唔係太正確。

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時32歲去計，應先做好增值部份，而唔係去諗點收息。你現時持有股票，其實都有一定增長力，係平穏增長股類，都適合你，你長線持有就可以。

2) 你唔好用買入價，作為判斷一隻股票優劣的標準。你應著眼佢本身有無質素，如果有，中短期價格波動，令到出現帳面虧損，係無問題，照可以長線持有。

但如果係無質素，就算而一刻是賺定蝕，你都要將佢沽出。重點分析的地方，係企業質素，而非股價上。

你上述持股有質素，但偉易達(0303)、中國銀行(3988)只係收息股，增長力好一般。碧桂園(2007)負債水平好高，風險唔細。

而明源雲(0909)不確定性較高，這4隻股票，你都不宜持有太多。

至於易大宗（1733），此股投資價值不高。最大的問題，就是核數師意見，過往多年都出現「保留意見」，反映核數師認為佢盤數「有古怪」，有些問題，這類股，沽出較好。

3) 這6隻股票，都係有質素的增長股，都適合你。阿里巴巴(9988)和京東集團(9618)偏向潛力股類型，風險會較高﹐故要控制注碼。

現時這些股票，都在合理區，現價可以入1注。但由於未算平，故資金不要盡用，最好多等每回調10-15%，才再考慮加注。

------------------------------------------------

Q21939：

成哥你好，想問下你隻1024快手，我330入，依家大概回到去204，見佢業績都麻麻，請問可唔可以長線持有，定升返d轉其他。

另外本身個組合想入返d實業類，蒙牛乳業同農夫山泉，想問下咩價位入比較合理。

謝謝你抽空幫忙。

龔成老師︰

快手（1024）係全球數一數二大的直播平台，絕對是一隻優質股，有獨特性，有客戶群，有潛力，長遠的發展力正面。這股有長線投資價值。

快手與業務夥伴合作提供了一系列產品和服務，於滿足平台上自然產生的多種需求。快手提供的產品和服務包括娛樂、線上營銷服務、電商、網絡遊戲、在線知識共享等。

快手科技已建立了穩定的用戶，在全球已佔據了重要的位置，企業有一定的優勢，以及獨特地位。加上用戶仍在快速增長，以及增長趨勢仍持續，預期有一定的發展。

雖然這刻盈利不多，甚至因加強發展業務而出現虧損，但這類股的分析特點是將來，等之後的收成期。

由於已擁有一定的優勢，以及仍增長中，企業要將用戶化成現金並不困難，只是時間問題，以及多少問題，預期2022年盈利模式已穩定，同時有一定的盈利。

簡單來說，企業有質素，有發展，你現貨可持有，但你預佢短期股仍會十分波動。

蒙牛乳業（2319）有質素。

佢於中國從事乳製品生產及經售業務，乃中國領先的乳製品生產商之一，以蒙牛為主要品牌提供多元化的產品，包括液體奶（乳飲料及酸奶）、冰淇淋及其他乳製品（如奶粉等）。

無論品牌、銷售網絡、發展，都不差，長遠正面。這股有長線投資價值，不過現價就唔算平，回翻10%先慢慢分注入，會較好。

農夫山泉（9633）有質素的。由於有一定的品牌價值，因此企業質素與發展正面，財務數據不差，生意與盈利都有理想增長。

不過上市不久，股價較波動，同時上市前數據可能執靚過，因此要注意風險度。現價合理區頂至略貴。

若想入貨，現價小注投資好了，這股適合長線的。

------------------------------------------------

Q21940：

您好龔成, 訂閱您Fb已多年, 以下有一問, 十分煩惱,未知閣下能否抽空賜教：

情況：媽有一個自住三房私人舊樓單位，樓齡32年, 估計如賣出約560萬。 因該樓舊需要夾錢換𨋢, 大約每戶比20萬, 暫時不知何時要付。

她已60+歲退休弄孫， 她除家用外無收入。我們３個子女現為搬出，但家姐租樓多年，有意和姊夫跟一細女回去同住，他們儲蓄20萬左右未夠錢買樓。

她有幾個選擇， 哪個是最好的財務安排?

１. 賣出，媽出首期比家姐買較新的樓， 家姐供樓 ，然後：

１Ａ： 4人（媽，姊，姊夫, 一細女即孫 ）同住, 可能繼續住元朗/轉去東涌/青衣。媽每月比少少租家姐當幫手供。或

１Ｂ： 自己另外買細單位自住，其餘投資／買股票做每月收入 （唧種可推薦給她這些退休人士而是比較高收入，低風險?）

3. 繼續自住, 家姐搬回, 每月給媽家用

或有其他選擇, 但現時未想到。

十分感謝！

龔成老師︰

其實係財務層面，這3個選項都係可以。反而我覺得，選擇邊個方法的重點，應該是你媽媽自己的想法。

因為香港一買一賣的成本較高，因此，未有明確目標前，（3）是較好。

當然，另外兩個方案其實都可考慮，最重要是你地成家人的意願，因為現時影響多人。進行（1）的方案時，要大家傾好各自的權益，清清楚楚是最重要，大家要「先小人，後君子」。

如果你媽媽，係想和你姐一家同住。若現有自住樓係配合到佢地長線生活所需，咁就可以。

除非有好大生活上問題，否則不建議換樓，因為香港買賣樓宇成本唔細，一來一回，會唔見好多錢。

若你媽媽不想同住，佢可以沽出現時物業，換一間較細自住屋。再將餘下資金，投資一些收息股，去為自己創造現金流，支援自己退休生活上的開支。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

現時大市只係合理水平，資金不宜盡用，你可以先將部份，以分注形式買入上述股票。餘下資金，就等大跌市出現，才加大力度掃貨。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q20981-Q21000）

Q20981：

老師，我想問下隻金沙
根據2020年報數據
短期借貸: 0.21億美元
長期借貸: 70.44億美元
現金及現金等價: 8.61億美元

計出:
淨負債: 62.04 億美元
但現金 8.61億美元足以應付短期借貸，在這情況下是否不用太擔心企業財務出現問題?

龔成老師：

財務情況的確比過往弱左，但又未去到好有問題。

第一，佢現金流強，現時澳門已開始有翻D客，所以佢這方面無問題，根本好快就有資金翻。

第二，佢擁有的資產好有價值，所以就算有問題，要借錢或其他方法去得到資金，無問題，佢仍有好大條件去得到資金。

第三，佢所欠的大多是長期負債，短期負債唔多，只要日後澳門好翻，還錢或再借貸方面都無問題。

------------------------------------------------

Q20982：

龔Sir，我手上有好多以前買落嘅股票，蝕左好多好多，我諗緊好唔好賣左佢重新嚟過

請指教

390、592、3333、1339、1766、2006、2380、3623、144、1638、175、981、1810。不少都是高位買，3333在$25入，981$31入。

龔成老師：

最重要不是睇「賺蝕」，不是睇「買入價」，而是睇質素。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

相信你在選股，及買入時機，把握力都較弱。

吉利（0175）、小米（1810）可持有，中鐵（0390）、中芯（0981）、中國電力（2380）、招商局（0144）、恆大（3333）小注持有都得。

你可以重組一下你的組合。

我建議你之後，最好用「月供」模式，這個方法較適合你的。

你可以考慮盈富（2800），小注3067。

安碩恒生科技（3067）可長線。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂至略貴，因此，這刻不能大注投資。最好的策略，就是月供，或自行分注小注慢慢收貨（例如每月買一次、或2個月買可次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

------------------------------------------------

Q20983：

老師，我之前放咗700雖賺好少，但希望更低位入來長揸。但我資金只能二選一，買700就買唔到388，你意見？

2）941睇有無機會50附近入（但佢被美國限制所以有些擔心），還是舍此而投放388？

3）另我想請教我有一細寫字樓收租（現市價都跌咗成百萬，雖理解疫情有因但感覺自己都係投資錯），但當時買銀行係估到價，我日後買賣是否不應再以銀行估到價就作為安全線以此為到價位？

4）可以分享下要睇市況而步署？我好多時短線係高買低放，股無選錯但錯過賺錢的時機而回報差。好似700我幾次都早放（但都無後悔因技不如市），要點樣先可以唔低放？

5）我有6618想長線近期跌有些擔心，應止蚀？

另到底是否真要升一倍放一半？我700當年咁所以後悔（因160幾入300放400又放，最後剩極少至今）；9988上年入升極都無放有200入亦有170幾入）如今差不多打返原形，咁又錯過賺錢。

所以我按自己兩個案例來分析真的有些迷惘應點為止賺？

目標我都係想長線投資因好認同你講的，但又感市場升跌根本無定律（雖然三月跌多係入市機會）388當年我都163入過賺完走，如果持有至今都係幾倍。

所以是否應該說所有股票不能一概而論，真的要視變化而變化？我估700係想俾自己有個止賺位，但真去到一千想長揸的應該都唔會放，所以好認同你講估係無意義，但定不定及執不執止賺位？感謝🙏

龔成老師

1）賣出等跌再入，不一定成功的，如果是優質股，就應該長線。

至於現時2選1，要睇你本身的組合，如果你現時組合已有一定的科網手機相關股，就選港交所（0388）（但都要等回翻少少先買入）。

2）最重要睇長線的。始果見到近$50，都可以買入，合理價。

3）銀行估值是可以參考的，但只代表這物業當刻的估計市場價值。而我地作為投資者，要有分析長遠質素及價值的能力。

4）你不用理會短線。我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

5）京東健康（6618）由京東（9618）分折出來京東健康，將會來港上市。這股可長線。

其業務主要提供線上線下的醫藥出售和健康管理服務，業務布局包括醫藥電商、互聯網醫療、智慧醫療解決方案、健康服務等4個大板塊。

京東健康旗下京東大藥房，更是內地線上線下收入規模最大的零售藥房。其互聯網醫院，日接診量超過10萬次。

質素上，京東健康是有的。但由於估值難，不確定性大，暫時合理區頂至略貴，所以如投資，小注都可以。當然回翻1成更有值博率。

這股如本身有貨，可長線。

------------------------------------------------

Q20984：

阿sir 我想問下，你點睇大陸買樓投資？

我見珠海依加發展好好 又見樓價唔算太貴 想買黎等升值

龔成老師：

最重要睇當區的長遠發展，交通、配置，該地區長遠的經濟活動及發展，在國家裡的定位發展如何。

珠海基本上無問題的，長遠正面，你最重要睇翻當區的交通等，當然，都要睇翻租金回報率會唔會太低。合理價，都可考慮。

------------------------------------------------

Q20985：

老師你好，我有問題想請教下你。我今年想買樓，首置。我現金約有HKD300萬，首期約150萬，未計印花稅等雜費。

如果我買接近700萬既私樓會唔會好危險？我家庭收入約有5萬幾。平時無投資的。我又擔心失業會供唔起。如果我買630～650萬左右既居屋感覺上會唔會好d?

雖然供款上都係每個月差兩千幾。有無咩advice比到我？thanks

龔成老師：

如果按揭$550萬，假設你供30年，2%，即是每月約供$20000。

如果你家庭收入有$5萬，其實都可以進行，當然，你都要明白按揭就是負債，點都有風險的。

如果你擔心，在完成買樓後，持有$50萬-$80萬的現金，萬一失業等不利情況發生，你都可以有一定的備用現金支持住。我相信你留一定的現金，會較為安心的。

從長遠投資的角度，私樓會較好，但如果純自住，其實居屋都唔差。

------------------------------------------------

Q20986：

阿sir, 想再問如果我月供，是否只供2800都足夠? 還是可以加多一隻?

Sir, 再有多條問, 咁小米合價錢是22至24，如果到呢個價錢區，是否應該再入貨

龔成老師：

盈富（2800）這是一個「平衡組合的工具」，當中有52隻成份股，對股票組合有平衡作用。

所以，你可以用盈富作為核心，長期月供，但同時，可以加入其他股票（當然要有選股的能力）。

至於小米（1810）有潛力的，佢的產品性價比高，相信在全球好多個國家都會有市場，佢長遠只會進一步增長。

同時，佢建立的平台是佢長遠的增長動力，先賣手機，再利用手機的平台延伸銷售小米家電。長遠正面的。

這股可長線，現價合理區頂大約在$24，小注分注可以，但唔好入得太急，預佢股價仍波動。回多15%更有投資值博率。

------------------------------------------------

Q20987：

老師，我想放了5號仔換馬入中海油(883）、中芯(981)、3067或再追加小米(1810)；現有中生(1177)、福壽園(1448)及比阿迪。謝謝。

龔成老師：

我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

你先睇翻自己的年齡與風險，設計一個組合比例，然後睇翻現時的組合應該怎樣改善。同時，要考慮佢地現時的平貴。

你打算轉入的，都有質素，但你不能全集中在這些潛力股，同時這些股大多處貴水平。因此就算現價買入，也只能小注。

------------------------------------------------

Q20988：

老師，mpf應該點投資好？
而家凈係放哂預設投資

龔成老師：

由於強積金是超長期的投資，我地只要好簡單咁人生階段、風險承受能力去配置就得。例如年紀較輕就進取，中年就平衡分配，年長就保守，咁就得。

例如，假設你年輕，就可以進取的，可以將較多資金，投資在較為進取的類別，少少在平衡組合，咁已經得。同埋，強積金唔需要經常轉來轉去的。

我由初踏出社會開始，都是100%恆指的。

------------------------------------------------

Q20989：

老師，長線是指時間多久?
3800你建議止蝕嗎?有冇機會上升至$2.9?

龔成老師：

長線一般指5年以上，最少都要3年。我地買股票，就是買入企業，原理就是等企業成長，這當然要時間。

保利協鑫能源（3800）業務不穩，質素中等。不過不是無增長，是有危有機類。

佢主要為光伏行業製造多晶硅及硅片；銷售電力；開發、投資、管理及營運光伏項目。

市場炒緊佢前景，但當中存有不確定性，股價大上大落，佢的確可能會大升，但同樣可以大跌，無得估，這炒作不少，現時值博率未算好高。

如果你持有較多，宜減。

------------------------------------------------

Q20990：

老師你好，我係澳門人，想買樓，睇左你的《5年買樓4部曲》，並已睇了十幾個樓盤，然後發覺有些問題想問：

1. 書中提到不要執著買些靚樓，新樓，年輕樓。又貴管理費，總價又貴！！

以澳門樓做例子，澳門借貸最盡只能做到樓齡55年，即是若你現在買入樓齡35年的樓，只能供20年。

而以這幾個月的睇樓經驗，樓齡較大的樓呎價确實是較低，但買入後感覺將來已冇機會換樓（若買35年樓，10年後45年，好難搵人接手買，因買方只有10年時間供），加上樓齡大其實不能拖很長的還款額，變相每月供款都多，每月能存的錢少了。

若買新樓，的確又細又貴，但供款期可拖長，但是首期就高！ 但感覺將來易賣出（若買10多年樓，10年後只係20幾年樓齡，較易轉手，因買方有較長時間供）！

想請教老師如何在大細樓齡間做平衡？

2.我目標想要買3房，因將來有小朋友唔夠住。到底要買後生樓，保值些，呎數細d頭10年小朋友仲細住住先，10年後再換樓！

定一次過就買呎數大d, 但樓齡大，冇咩機會換樓，可能只能一直住這間？

因為書中都提到唔好用晒d錢買1間，留d繼續做投資
舉例：

a) 後生樓 10年 708呎 2房，750萬
首期清晒所有存款，管理費千幾

b) 30年樓 1280呎 大3房， 738萬
首期清晒所有存款

c) 37年樓 850呎 2房 ，550萬
比完首期後 還有1筆錢繼續投資，但之後唔夠住換唔到樓唔知點算好！

d) 26年 820呎 2房 ，620萬
比完首期仲剩小小錢 ，但10年後都比較大樓齡
呀sir如果上述狀況應該那個決擇較好呢！？

龔成老師：

1）如果有這個情況，你可以買入5-20年樓齡的樓，我相信是最平衡的。新樓由於一開始有溢價，所以一般都唔平，但去到5年，就已能有效反映真實價值。

你可以在這個樓齡內尋找。

2）（A）（D）都可以考慮。

（A）的物業，好處是樓齡較新，缺點是用盡了你的存款，以及面積在上述選擇中較少。

至於（D）資金及面積應該都適合你。至於樓齡方面，勉強都可以，雖然日後都有機會貶值，但算是上述中，仍可考慮的齡樓，因此，都是可考慮之選。

如果你想進行（A），其實可以儲多1，2年錢，之後先買（A）類的物業，這樣就更加穩健。

------------------------------------------------

Q20991：

請問一下京東健康同啊里健康比較，邊一隻質素比教好？同埋平安好醫生

龔成老師：

幾隻都是有質素，長遠有投資價值的，投資值博率其實好接近。

阿里健康（0241）與京東健康（6618）業務模式較接近。阿里健康是潛力股，佢營運醫藥電商、互聯網醫療等業務。

「醫藥電商業務」，這業務主要有兩種業務模式，由自營電商和天貓代運營，涉及非處方藥品、醫療器械、計生用品等。

另外，就是「互聯網醫療業務」，阿里健康與國內多家二三級醫院建立合作關係，患者可以通過阿裡健康、支付寶等平台，做到線上掛號、問診、諮詢用藥等等的服務。

這類股只建議小注持有，但你預佢股價上落大。

京東健康（6618）業務主要提供線上線下的醫藥出售和健康管理服務，業務布局包括醫藥電商、互聯網醫療、智慧醫療解決方案、健康服務等4個大板塊。

質素上，京東健康是有的。但由於估值難，不確定性大，暫時合理區頂至略貴，所以如投資，小注都可以。當然回翻1成更有值博率。

這股如本身有貨，可長線。

至於平安好醫生（1833）長遠有發展力。

佢係中國領先的一站式醫療健康系統平台，透過「移動醫療+AI」，為每個家庭提供一位家庭醫生，為每個人提供一份電子健康檔案、一個健康管理計畫。

平安好醫生係中國互聯網醫療健康市場的先行者，以平均月活躍客戶，以及在線諮詢量計，是中國最大規模的互聯網醫療健康平台。

企業的業務有潛力，本身有優勢，大環境的配合，都成了這企業的機遇，前景正面，不過財務數據未算好理想。

雖然長遠的企業價值向上，但股價在中短期，可以十分波動，因為市場以「前景」作估值，故此變化必然很大。好難得出平貴的準確數，只能估估下，作參考。

因此，低風險者未必適合投資，若投資者考慮這股，亦不能大注投資，買入後就耐心長線持有，等待這企業改變整個行業的情況，現價算合理區頂，但好波動，月供就得，如直接買入只能小小注。

------------------------------------------------

Q20992：

龔成老師, 你好, 我想問下一個問題. 我想問下關於基本面分析, 我睇左你個POST話基本面分析同長線持有才是王道, 其實我一直有個疑問. 就是基本面分析是怎樣管理風險?

甚麼情況下需要止蝕?因為如果中途基本面有可能會轉差, 如果到時才止蝕, 可能虧損會很大. 還有一個問題是, 如果長線持有, 那如何基本面分析製造現金流?

因為如果每次買股都是要5-10年後先有回報, 咁尼段時間D資金咪鎖死晒?

龔成老師：

如果我地見到企業的核心質素轉差，就要止蝕，有時的確會遲左，但當企業業務或大環境有明顯轉弱時，投資者是可以睇到的，雖然可能已下跌了部分，但仍要作出止蝕。

如果用一些技術位去進行止蝕，當騰訊（0700）、港交所（0388）這些股上升100倍，而中間有上上落落時，一定會因觸及一些技術位而止蝕了，根本賺唔到100倍的回報。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

至於你「資金咪鎖死」的問題，對，是鎖死的，但反而對長遠財富增長最有利！

因為一般散戶，不斷賺左先，例如我多年前做銀行見到大量客戶買入隻港交所，佢地$15買，$20已有9成客賣出，就是佢地唔想鎖死資金，想賺左先，以為賣出，等跌可再買翻。到最後，錯過了10倍回報，這就是一般散戶！

希望你能放棄一般散戶的思維。

------------------------------------------------

Q20993：

阿sir, 如果我現時手上有50萬股票, 另外揸住60萬現金應該點運用好? 應否等大市回落等機會先入貨?

龔成老師：

首先，你要睇翻自己所持的，是否有質素的股票，如果無質素就要賣出。另外，要睇比例是否適合自己。

而$60萬，你可動用其中的$20萬-$30萬，現時舊經濟股合理，已經可以分注投資，新經濟股就在合理區頂，你最多小注好了，最好是等跌先入。你可按自己的年齡，風險承受程度分配投資。

------------------------------------------------

Q20994：

老師，我短炒輸左好多錢，我覺得自己好失敗！

龔成老師：

我20年前，是短炒者（應該有3-5年時間），投資幾年，輸足幾年，之後長線投資，就開始不斷賺錢。

每個人都有學習的過程，最重要是保持進步。希望你明白真正的投資之道，之後學翻正確的方法。

投資是一場馬拉松，加油！

------------------------------------------------

Q20995：

龔sir 有d問題想請教你 想問其實買股票1至2隻優質股長揸係咪已經好足夠 反而幾隻只會令資金分散？唔該你

龔成老師：

除非你是高階投資者，有很強的實力，否則，這是高風險行為。

因為你集中1、2隻股，如果該股出問題，對你組合會有好大影響，因此，建立一個平衡組合，能有效減少非系統性風險。

------------------------------------------------

Q20996：

老師，最近留意緊隻3319雅生活，想進行月供或分注買入，響財經apps見佢現在市盈率係26倍，預測市盈率係18倍，咁樣係代表住d咩？

龔成老師：

雅生活服務（3319）不錯的，佢無論在業務本質、規模、品牌、財務數據、前景，都是理想的，反映這企業有一定的質素。

加上這企業的背景因素，以及行業的發展，相信這企業的前景不差，有長線投資的價值。

整體是有長線投資價值的。現價合理，不過股價都會有時出現波動，投資宜分注進行。

至於市盈率，即是用上年度盈利，以現價除一除，就是26倍。

由於預測佢下年度的盈利增長，所以用以現價除一除，就是18倍。

------------------------------------------------

Q20997：

老師，我想上你堂，但又住得遠，點算？睇書先？

龔成老師：

睇書當然可以，但你要記住，唔好因為小問題而影響你增加知識，我幾年前未開澳門班時，每次都有澳門人，每一堂乘船來香港上堂的。

------------------------------------------------

Q20998：

龔sir,你好，我有兩件事想請教你。

美國十年期國債孳息率同港股有乜關係？為何美債孳息率升港股會大跌？

另外，想問下關於分注策略。應該係睇價格決定何時下一注，不理會每注間的時間長短？還是定每隔一特定時期便下一注，完全不理價格變化？

希望你能抽空解答。
謝謝。

龔成老師：

首先，利息就是企業資金的成本，所以會影響企業營運，從而對企業不利。加上利息會影響企業的估值，因此對股市都會有下跌情況。

另外在企業估值上，例如現金流折現法，當息率上升折現率會調高，這就最終令計算出來的企業價值減少。由於新經濟股現金流一般是較後期出現及較大，所以當折現率上升時，對這類股的影響會較大。

至於策略方面，兩隻都可以，如果你有企業估值的能力，利用價格去進行平均買入，會較好。但如果未有這能力，利用時間，每隔一段時間買入一次，會較好。

------------------------------------------------

Q20999：

龔Sir我現年45歲，已婚，有一個小朋友，現自住一層樓，仲有450萬按揭，要還25年。

我每月收入5萬，供樓2萬，保險儲蓄3千(供10年，已供1年)，2份基金月供1200各一，另日常支出約2萬左右

現有資產：大約100萬現金，40000股(1288)，3000股(1398)，4000股(0005)，全部長期持有，另外之前用左25萬買入咗隻收息基金(約6里息)，MPF 現有大約120萬，今個月開始月供股票1萬元(2800)，會係現有現金到扣數。

如果我希望可以：
1. 現有份工55歲要退休，估計到時層樓仲有200未供完，點樣可以令財富增加到退休時可以贖回層樓呢？

2. 係點樣可以係退休時財務自由，每月有穩定2萬至2萬5嘅收入呢？

3. 我知道買樓投資係一種致富途徑，我應唔應該用現有資金入市買多一層樓收租呢？

請指點指點，謝謝!

龔成老師：

1）以你這個年齡，財富有一定的增長力，每月投資$10000，10年，回報率10%，10年後都有$192萬，因此，你唔需要這刻投資大部分的工具。

我見你現時的投資，都是收息及銀行股，第一，收息股在你年齡，可投資，但不用全部集中。第二，你集中銀行股會有行業單一集中風險。

2）你現時開始月供盈富（2800）可以，如果有其他心水股，都可以加入（如果無，$10000盈富無問題），心水股宜選平穩增長類，如港鐵（0066）、領展（0823）等。

當我地進行人生財富累積，會運用「先增值，後現金流」作方法，初期投資較多增值類資產，而較年長的，則應投資較多保守類項目。

因此，你這10年可投資「平穩增長股」，令你財富增值，10年後，就集中轉為現金流類別。

以你的情況，我相信到時可以有$20000每月現金流。

3）你現時已有物業，因此，這動作唔需要太急。因為，第一，你會好集中在物業，第二，這是一個投資決定，而香港物業這刻的投資價值，只是中等，未算吸引，反而投資其他工具回報率更好。

因此，除非樓市下跌，否則這刻未必是好時機。

------------------------------------------------

Q21000：

你好，我想請教：

（1）我想知道[盈富基金]合理區至頂位範圍？每次買幾多股才可以達到回報？

（2）我於17.33及18.60買入[3067安碩恒生科技股]各300股，若股價不低於17元，是否不再買入？

（3）1448[福壽園]股價很難跌至7元以下，若在7.2—7.4買入是否可以？

龔成老師：

1）你預$30是合理區的中上部，以這刻的市況，去到$33大約是合理區頂，不過，這個數會變的。

至於買多少股，我地不會這樣分析的，因為回報率不是睇多少股的。另外，每個人的財務情況不同，你只要按自己的去決定投資多少%就得。

2）你預$17是合理區頂，如果你現金分配到3067的%已適當，就不要在$17以上加注。但如果你持有%不多，加上現金足夠，就算比$17高少少，都可以慢慢分注投資。

3）可以，你可以小注買入後，等跌先正式買入。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q19341-Q19360）

Q19341：

老師，我見0006電能嘅流動資產減少約2成，反而流動負債增加左9成，流動資產淨值呈現負數，往年均為正數，呢個係唔係一個嘅危險訊號呢？

另外，係報讀老師你嘅倍升股進階課程之前，有咩書可以睇去作準備？我已經上左基礎班。

龔成老師：

風險度略略有增加，但又不用太過擔心。

睇翻佢最新的中期業績，如果你睇佢資產負債表同埋附註15，就會見到具體情況。

佢流動資產淨值呈現負數，如要是流動負債增加左，睇翻原因，是一筆$33億的負債，由之前的長期負債變成了流動負債，即是差不多開始到期。

但以佢本身的資產與現金流情況，以一間業務很穩定的企業來說，要延長或再進行借貸，無問題的，始終整體的負債水平不高，因此問題不大。

你上進階班前，可以睇《選股勝經》《年報勝經》。

------------------------------------------------

Q19342：

你好啊 成哥，好耐冇問你問題 最近諗緊兩條問題 想請教下你

1. 作為一個投資新手 因為手上冇乜股票 係咪應該喺合理區中部或者合理區下部就應該入手 而唔係一直等到佢到便宜區？

因為冇人可以預測未來 都冇人知道心水股票是否會喺股災來臨時跌到便宜區

2. 當有股災既時候購入既策略應該係點？係咪都係應該分注入？

因為當跌到便宜區就大手買入 如果再跌到更加多手上資金可能就唔夠 但如果唔大手買又驚錯失良機

龔成老師：

1）其實最重要是平衡，如果你本身完全無貨，在配置中已變成了「不平衡」（集中在現金），因此，都要適當地買入優質股，只要合理價就可以。

當然，不會用盡你的現金，只會部分入貨，餘下現金會等平先買入。

2）要睇股災的情況。

在正常的市況（合理區），會一邊買入，一邊留現金，而所留的現金，就是等大跌市（便宜區），即股災時買入。

但動動用的程度是一次過買入，還是分注入，要睇情況，但都是動用儲備。

------------------------------------------------

Q19343：

老師你好呀 想問問港元債券 港股 美股 歐洲股 日本股 嘅發展分析為何？

龔成老師：

我地進行理財，可以建立一個平衡的組合，因此，只要有質素，都可以考慮。

港元債券是防守性產品，若你好低風險，好想收息，就可考慮，但以增長角度，未必適合。

至於歐洲股、日本股，本身經濟不太好，加上疫情，回勇時間要更耐，所以長遠的發展只是一般。

至於港股與美股，長遠的發展理想，中國與美國在長遠，將會是全球兩個最大的經濟體，因此相關企業往往有一定的投資價值，同時投資這兩個市場可以的。

------------------------------------------------

Q19344：

你好老師
想問！一隻股票目標價係點定斷？

龔成老師：

所謂的目標價，通常是一些大行分析，計算出這股的企業價值，然後認為這股現時股價與這價值有距離，之後就會去翻目標價。

要計企業的價值，過程比較複雜，好難三言兩語就講到，就算在我的股票班，都要講5小時，裡面會講3種估值方法，有難有易，但同學都用到的。

簡單來說，你要考慮企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。

如果要深入計算，基本上要好仔細的研究企業，要分析好多財務數據用比率，先至有較完整的答案。

------------------------------------------------

Q19345：

老師你好，想問下如果每月扣除供樓開支後的餘錢，應該用作股票投資還是盡快還清貸款？謝謝

龔成老師：

現時處於低息環境，還錢並不一定有著數，其實最重要是計算「按揭利息」及「回報」之間的差別。

例如你有$100萬，如果投資收息股能取得6%股息，你就得到$60000一年，如果你想這$100萬作還錢，就可以慳利息，如果按揭利息3%，你就慳到$30000。

比較之下，你唔還錢，將錢作投資，得到$60000去支付$30000按息，會更著數。

當然，投資收息股有價格上的波動，而減少負債能令你減少風險，因此，各種選擇相會有利弊，但你先要明白，並不一定「盡快還錢」就是最好。

在低息環境，你拖長還錢反而有利，而高息環境，就應該盡快還錢。

如果你有基本投資知識，就應該將資金投資。但如果無信心，就還錢。

------------------------------------------------

Q19346：

你好，1088相比起1310同2638係唔係風險大啲？

龔成老師：

雖然3隻都是收息類股，但中國神華（1088）的風險度，的確會比另外兩隻較大。

最主要是業務因素，一間企業要有穩定業務，先可以有穩定的盈利，先有條件去進行持續派息。中國神華（1088）質素中等，過往較有質素，近年有減弱情況。

佢始終有一定規模，但政策不是好支持行業，的確會對佢有影響，但已經在股價反映左。

所賣出的是商品，當中沒有差異性，令佢地處於被動狀態，只能睇市場價，沒有價格自主的能力，如果商品價格大升，佢會好賺，但如果大跌，佢就可能會蝕錢，而這方面好難控制的。

所以整體來講，這股不算差，但又不算非常好，唔好對股價有太大的期望。如果是收息的，都可以，但就唔建議太大注。

------------------------------------------------

Q19347：

想指敎一下，現在入車位投資值得嗎？ (平過市價一成) 本身有一層自住加一層收租, 有股票基金債券佔一半！ 謝謝

龔成老師：

現時的車位租金回報率唔高，以投資的價值計，其實唔算吸引。但如果你找到平過市價一成的，就可考慮。

可以視車位為你的財富配置一部分。

------------------------------------------------

Q19348：

龔Sir，我follow了你的fb 專頁已有一段時間，亦是你書籍的讀者，從你的文字可感受到你對教授投資知識嘅熱誠同價值觀，使我獲益良多。

我想報讀老師的課程，但礙於居住地點及作為兩個年幼子女的父親，還是希望放工後盡量將寶貴的時間留給他們。請問老師有否考慮製作網上課程呢？

即使以相同課程費用，我也願意報讀。因現時科技發達，我相信成年學生即使在網上平台與老師溝通互動，也可做到課堂實體上課效果。還望老師日後可作考慮。

龔成老師：

明白，我遲d，會開一個有關於資產配置的網上課程。

至於股票班，由於內容太重要，暫時唔會。

因為之前實體股票班試過比人偷拍，之後放左上網賣，最後要搞到報海關先處理到，好煩。所以，網上類的教學，都好擔心有偷拍問題，風險太高，因為好多課堂內容，都唔想太公開，只想自己學生知，所以暫時都唔會搞。

------------------------------------------------

Q19349：

成兄 想請教一下網上醫療 阿里健康財報 半年約純利4億，但現時市值3000億以上，係咪已經被高估，還是一個新領域嘅開始，將來會有爆發式增長？

龔成老師：

當我地進行估值時，佢上年度的盈利只是其中一個推算點，特點是潛力股時，所考慮的因素會著重「將來」。由於市場預期佢每年盈利會高速增長，因此市場比佢好高估值。佢有潛力，但現價略貴。

阿里健康（0241）這是潛力股，佢營運醫藥電商、互聯網醫療等業務。

「醫藥電商業務」，這業務主要有兩種業務模式，由自營電商和天貓代運營，涉及非處方藥品、醫療器械、計生用品等。

另外，就是「互聯網醫療業務」，阿里健康與國內多家二三級醫院建立合作關係，患者可以通過阿裡健康、支付寶等平台，做到線上掛號、問診、諮詢用藥等等的服務。

阿里健康利用醫療AI系統「DoctorYou」去進行營運，該系統包括臨床醫學科研診斷平臺、醫療輔助檢測引擎、醫師能力培訓系統等，輔助醫生睇病。

業務上，有好大的潛力，不過，本質波動，股價上落大，消息多，市場炒作多，這類股風險都不少。最大問題是無人能正確估值，市場現時只是估估下，推將唔到佢將來的價值。

這類股只建議小注持有，但你預佢股價上落大。

------------------------------------------------

Q19350：

龔老師你好!
想問1177及1071！

龔成老師︰

在未來人口老化、政府對行業資源的投入、人民生活和收入質素提升等因素下，都令人們對醫療需求增加。

中生製藥（1177）本身己有一套完善的營運系統，集團己擁有多個賺錢的藥品類別。在高毛利支持下，可以不斷將錢再投資在新藥裡。這種經營模式下，相信長線發展可維持正面。

現價算係回到合理區中上部，可以開始分注投資。

華電國際電力股份（1071）主要從事發電及供熱業務。

本身賺錢能力唔算話太高，盈利過去幾年都幾波動，而且負債唔輕。

整體質素，只屬一般。

------------------------------------------------

Q19351：

你好 我留意左你個page好耐 獲益良多 知你好忙 我長話短說

我媽媽已經67，有10萬元想買股票。我miss左個銀髮ibond, 請問除了盈富外仲有咩可買呢？謝謝你

龔成老師︰

以你媽媽年紀，投資上應該以保守項目和現金流為主。

佢可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）都可以。

上述股票都在合理區，你可以先用5萬分注入貨。餘下一半，就等大跌市出現，才進行入市。

------------------------------------------------

Q19352：

成哥,你好!本人近兩個月已讀了你6本著作,獲益良多,正安排時間打算參加你的課堂。

最近讀了你的書才開始檢視自己和家人的財政狀況,發現頗為混亂,整個人都處於迷惘中,還望成哥指點迷津:

1. 本人14年前在澳門和家人以$170萬合資購買了一個複式唐樓單位,

每層實用面積約900呎,共1800呎,一直放租,已供滿,現時租金$12000。由於樓齡已超過30年

唐樓升值能力有限,打算以約$600萬之價出售,雖呎價平但因LUMP SUM太大故一直無人問津,

請問我們應減價出售還是應該繼續放租呢?

2. 現和家人同住屯門居屋,3年半前老公單名以$417萬買入屯市實呎317兩房單位放租,

尚欠300萬,租金回報約4厘,由於樓齡也超過30年,且面積太小,請問應否放售後再換大一點及樓齡細一點的單位嗎?

3. 我暫時無業,老公月入約$55000,中年無子女,有約港幣$130萬在高息戶口,

人民幣$150萬,分批放入定期,年利率約2厘左右,因人民幣定存利率愈來愈低,最近人民幣也升值不少,
所以打算分段兌回港幣,請問這做法是否正確?所持現金,我應再投資樓市還是買股票收息好呢?

4. 以前太無知,人雲亦雲買股票,所以股本已損失約30%,現在價值約$28萬,實是慘痛教訓!以下為本人持倉:

股票 股數 買入價
0778置富 8000 8.812
0823領展 500 67.85
0005匯豐控股 800 38.7
0939建行 6000 8.46
3988中國銀行25000 3.014
3311中國建築 6000 12.52
3337安東油田 10000 3.95
8198樂透互娛 2000 12.8

由於一直用澳門銀行戶口買股票,費用貴,且現在已常居香港,是否應沽出手上股票,轉在香港劵商繼續投資?
另外,3337及8198已損失近9成,應該沽出還是繼續放著算了?

5. 閱讀你的書籍後,深知資產的重要,近期已在香港開了劵商的投資戶口,

希望能幫老公建立較優質的投資組合,由於我投資知識仍有限,故只是從盈富開始,打算大約1個月入1-2手,
若PE較低時會多入1手,現在已儲了4手,請問這做法是否可行?另外,我也可始留意置富、領展、金沙、港燈等收息股,

但仍未能掌握買入價位,因之前的慘痛經驗,現在投資都比較保守,但若以我現時情況,盈富+收息股這個組合又是否恰當呢?

知道問題太多,但還望成哥賜教!

龔成老師︰

1） 你現時租金算唔錯。但由於樓齡開始大，如果佢無特別大升值潛力，你可以慢慢找機會放，但唔需要急。

至於要否減價，你可以參考同區類似單位，看會否定價過高。

2） 如果有實際生活需要（如居住面積不足），換屋都可以。只要整體負債唔會因此變得過高，同埋堅守"供得起"原則就可以。

若無迫切性，可以先用優質股一邊增值，一邊等換樓機會都可以。

3） 除非你有明確需要，否則轉回港幣去做投資較好，不論高息戶口、定期也好，這些產品都不是理想的財富增值功具。

由於你手上已有2間物業，再投資物業會太集中（當然你成功沽出唐樓，則另作論。），所以你而家應該去投資股票，令成個財富組合更平衡。

4） 你要時持股，大部份都有質素。但過份集中在銀行股，佢佔你組合近一半。個別行業唔好高於組合30%，否則會有過度集中風險。

樂透互娛（8198）和安東油田（3337）質素好一般，建議沽出。

由於優質股係長線持有為主，唔會經常做交易，所以你放在澳門銀行先都可以。

5） 你現時儲盈富（2800）架方法係可以，但由於你無乜投資經驗，"其他股票"若都想自行定平貴去入市，會有點危險。

建議你用月供，或者"定時定額"咁去直接入貨。例如每個月1號，不論當時股價多少，都入1手。咁樣就可以平衡倒價格波動架風險。

但這個動作和月供，都必需長期進行，最少供3年和持有5年，才會有理想效果。

組合上，你可以用盈富（2800）主導，再配以一些"平穏增長股"和"收息股"。如果你較近退休之年，"收息股"比重上可以多一點。以下都是合適股票，給你參觀。

平穩增值股︰盈富（2800）、金沙（1928）、長建（1038）、中銀（2388）、港鐵（0066）、恆基（0012）、港交所（0388）。

收息股︰港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。

------------------------------------------------

Q19353：

龔先生你好請教一下：

1） 何為細價股和大價股？ 用股價區分對嗎？ 如港燈（02638）, 股價7.71和陽光房產（0435）
都屬細價股嗎？ 細價和大價股有什麼優點和缺點呢？

2）本人是新手, 層低風險一族, 以上提到的兩樣股票以下股價值得入手嗎？ 息率應有5%對嗎？

港燈02638： 7.71
陽光房產0435： 3.81
謝謝！
補充, 我不是月供股票, 是每手買入

龔成老師︰

1） 細價股無一個明確定義，一般都係講一些股價或市值好低的股票。

細價股也有好壞之分，如果該公司的業務本質穩定，市值不算太細，而且穩健發展業務，這類股票就仍有投資價值。但如果市值低於10億元，生意既不穩健，賺錢能力又弱，過往更從沒派息，股價波動大。

不但是市場上的炒賣股，連帶公司內部也加入炒賣，所以這類股絕對不宜沾手。

你明白投資股票，我地係睇企業本質，去評定佢有否價值。所以，大定細價股，其實唔算主要考慮因素。

2） 港燈（2638）和陽光房地產（0435）都係有質素架收息股，這2隻坊間都唔會視為細價股。

佢地都有投資價值，前者等佢息率到5%才分注入市，咁會較理想。

而陽光房地產已在合理區，可以開始分注入市。

------------------------------------------------

Q19354：

你好丫sir，我有關於債券嘅問題想問你。

雖然你本書話買咗最好係持有至到期日，不過我有另一種方法唔知可唔可行。

股票我會一手一手買，如果冇比較平嘅股票我就會儲現金，但不過覺得現金儲得太多，但係又未有股票合適買

所以想買債券令啲錢唔好就咁放喺度毫無增長，然後如果中途站嘅話就會攞出嚟，冇賺嘅話就直到到期日，
咁樣可唔可行？

龔成老師︰

你做法雖然可以令資金保持一定增值，但長遠計有機會得不償失。

我地假設中途出現買平貨機會，而債券又跌低過你買入價。若你因為怕債券蝕價而唔放，咁就會失去儲平貨時機。相反，若你選擇照放債券去入平貨，債券會出現虧損。

由於長線計，優質股的增長力，一定優於債券這類投資產品，所以2個情況都會令你長線回報被拉低。當然你會話，咁債券升就雙嬴。無錯，但我地唔會去咁估，投資要用一個理性和平衡架策略。

我建議你用現金去等機會，雖然中間會有段時間係白白放左係度，但用長線財富增值效果計算，都會對你較有利。

------------------------------------------------

Q19355：

老師你好， 我想請教聽聞一間企業分拆子公司上市會令母公司股價上升的，但我買了京東集團（9618）後，分拆了京東健康出來上市後，京東集團沒有因此有令其股價上升

反而下跌，這令我費解想不明白，請老師有空回答吧，謝謝。

龔成老師︰

這個唔係一定，其實我地投資，著眼點應該放係企業本身架質素和長線行業發展上。這些跟企業質素無關的事情，我地唔應該考慮。

京東（9618）業務有質素，發展仍是正面，不過現價就唔算平。

佢係一間電子商業銷售平台，佢定位為「以供應鏈為基礎的技術與服務企業」，現時是中國第二大電商，有一定的品牌。

過往的財務數據，收入每年都是20%左右增長，2019年收入為5700億人民幣，已經有實質的盈利，用佢2019年盈利為120億作初步推算，現價唔平。

從質素上，這股不差的，但估值上就不算平。如果佢佔你組合唔多，現貨長線持有就可以。

如果市場認為佢分柝出來後，反而無左一些優質資產，就會令股價跌。但如果認為佢得到資金後有更好的發展，就會升。

------------------------------------------------

Q19356：

今年32歲。穩定月入六萬

我由今年2,3月開始積極入貨（可惜初初未認識龔sir, 有少少亂買）。

現有既貨：

762 , $4.76 ~ 22000 股
9988, $263.8~ 300股
005 , $43.15 ~ 1200股
1177, $7.4 ~ 7000股
285, $22.72~ 1000股
1810, $22.5 ~ 600股
788 , $1.32 ~ 26000股
1833, $100.5 ~ 200股
1038, $37.5 ~ 500股
2382, $ 152.1~ 39股

有10 萬現金。打算如果762, 1177, 788 同1833 再keep 住跌的話，會用埋黎加注。

當日心諗恆指昇我都會跟住有相應既回報。但到左今時今日，帳面仲係蝕（未計939, 我真係蝕住走左蝕$8000）。

其實有d 心灰，想聽下龔sir 意見

龔成老師︰

恆指升，唔代表所有股票都會一齊升。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你年紀計，應以增長為主。匯控（0005）只是收息股，增長力唔高，唔適合你。

組合中，除了中國聯通（0762）和長建（1038）係較平穏外，其他都波動性較高的潛力股。佢地雖然有質素，但波動性略高，不宜持有過高比重。

未來時間，你應該加大"平穏增長股"的比重，咁你個組合先會較平衡。

平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、領展（0823）、希慎（0014）、太古地產（1972）

另外，平安好醫生（1833）有質素，但業務不確定性較高，暫時唔建議心急加注。

雖然現時帳面係虧損，但只要調整翻好個組合，長線相信都會有理想回報。

------------------------------------------------

Q19357：

龔sir, 你好，最近終於跟先生買了第一層物業，看了樓都差不多成年，見疫情下樓價依然看似穩定而本身租樓有需求便入市。

可惜未能如你教導般找到低市價一成的荀盤，只是低2-3%便入了...現在向銀行申請按揭中，想請教：

方案1：申請85%按揭，剩餘約30萬元資金作股市投資，如盈富、領展等（不擅投資，求建議），
希望2年後轉按時回報能高於按揭息率

方案2：申請80%按揭，裝修後剩餘無幾，每月供樓後有1-2萬收入餘額作儲蓄，再作股市投資

龔sir未知哪個方案較好呢？謝謝!

龔成老師︰

現時按揭息率依然係有個較低水平，我建議你用方案1，盡量留多一點資金在手。

現時大市只是合理區，30萬資金可以先投入一半，用"分注"形式，慢慢買入以下平穏增長股。餘下一半就等大跌市出現，才大力掃貨。

用盈富（2800）計，長線都會有8-10%回報（連股息再投資），足以跑嬴按息。但留意2年而個時間唔長，回報會相對波動。但只要你係長線持有，咁就無問題。

平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、領展（0823）、希慎（0014）、太古地產（1972）。

不過，你唔好太心急入市買股，等完成整個按揭過程先，因為你要買過6成要買按保，不確定性較高，所以要預留多d資金。等完成過程先。

------------------------------------------------

Q19358：

龔老師，去年看了你多本書後，叫細佬入1211比阿迪同阿里巴巴，佢存款不多但也賺了十萬蚊。

我代他感激你！你的分析及眼光均非常精準。

佢四十歲人才開始發奮工作，在順豐速運工作，現終於積存了十八萬，謝謝你。

另我逼佢每月5000蚊月供煤氣、盈富儲錢，請問現有資金有什麽其他選擇？我只叫他抽了一手萬國數據。另外你最近出了的新書是什麼名稱？感謝!!

龔成老師：

能夠幫倒你細佬就好了，除了月供外，佢可以先動用9萬去"分注"買入以下平穏增長股。餘下9萬，就等大跌市才出手，入平貨。

平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、領展（0823）、粵海（0270）。

盈富（2800）可以長期月供，煤氣（0003）都可供，但金額應較盈富少。

萬國數據（9698）主要通過可變利益實體在中國內地及香港從事運營數據中心，以提供託管服務、管理、諮詢等服務。

初步睇佢都有投資價值，但係此股則上市，可參考數據唔多。而且集團過往一直在燒銀紙狀態，未有盈利。而是市值郤去到過千億，當中主要都係"估"佢將來發展。

當將來發展不似預期，就會出現較大回調，你要明這個風險。此股可持有，只是不宜太大注。

我最近的新書《5年買樓4部曲》。

------------------------------------------------

Q19359：

成哥
想問有無聽過銀行同保險公司合作

借一球 去買一隻有保值回報的基金
借一球 息H+0.8%+0.25%

大概1.2-1.5%
但基金保證回報 3.2%
所以offset利息後

有19尼回報
有風險嗎？

本要出10萬（90萬借銀行）
total 100萬買基金

龔成老師：

兩個風險，第一，H如果上升，你的資金成本會增加，令你回報減少，甚至出現虧損。

第二，該基金的回報是否保證，你一定要問得好清楚，基本背後有那些風險。又或如果你中途賣出有那些問題。

------------------------------------------------

Q19360：

龔sir,有事請教，之前投左1M係股市，現在眼見樓市下調，本來打算樓換樓,但彈藥未夠，想轉投買細價樓收租，計過如果買3、4百萬的樓加其他雜費，用首置約花80萬左右，計過收租回報約3%.

正在考慮到底keep住留優質股或買樓？

矛盾因素：老公現供樓貸款2百萬，我倆收入穩定，兩人月入五萬多，月供萬七，買左樓儲錢能力或現金流大減

未來一年會生小朋友，支出大增，但疫情過後樓價又升怕更難買到樓.我應該點揀？點部署長期計劃？

我最近對澳門樓市吾太樂觀，樓價升幅太大，有泡沫的危機感，普遍澳門人兩萬元的收支，唐樓約3M起、十幾年樓5百幾約5、6M，8百呎以上8M以上，而租金6千至萬鬆

用嚟投資回報率吾高，賣樓扣除成本價格上升有1M先叫有賺，新樓推出好快有出租盤，投資客多，現時買入估計要捱一年，疫情過後外僱回流，租客先會多，我要去博嗎？謝謝

龔成老師：

我相信澳門樓，有自住的價值，始終澳門都是一個地少人多的地方。但以現時的回報水平，以投資的角度，只是一般。

如果你資金不是好多，就唔好心急買樓，反正你現時都有物業自住，買樓有一個好重要的原則，就是「供得起」。

比起樓價升跌，你是否供得起會更重要。如果計過數，支出太大，就等多幾年先。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。