又一個頒獎禮，係咪可以話比大家知樂壇未死？ Viu聰明嘅地方，就係比全民投票，食正香港人投訴以往無得揀，無自由嘅想法同感覺，令全民掌握話事權，推自己喜歡嘅歌手得獎。 重點就嚟啦，商台嘅我最喜愛都係全民投票，而港台頒獎禮都有全民投票。但姜濤拎我最喜愛男歌手，全城勁讚，周柏豪拎港台男金，全城指罵。 「全城」有幾全城？有幾多香港人有投票？佢地又代唔代表到大部份香港人嘅口味同選擇？ 所以Viu真正聰明嘅係搵到自己嘅觀眾，serve到自己嘅觀眾，觀眾才是老闆，老闆開心，就自然長做長有啦。 同一把尺，TVB其實無問題，佢好知自己觀眾係咩人，所以就做返相對嘅口味，你唔like唔鍾意，因為係你唔愛回家啫。 而叱咤嘅好，係有專業堆介，亦有我最喜愛，叫做盡力平衡專業同普及程度，因為多人聽嘅歌，未必係好歌，正如賣座電影，未必係好電影，或者再講白啲，未必係高藝術或技術成份。 至於港台嘅難處，就係無特定受眾群，因為真係太多元，多元到無可能serve曬滿足曬所有人嘅口味，令部分人覺得無格調。 咁新城呢？ 見住Viu音樂頒獎禮嘅得獎名單，Rubberband 輸比Mirror，由多謝Herman變多謝花姐，星夢班底變造星班底...真係突然諗起新城勁爆頒獎禮。雖然好多人話係分豬肉，但起碼有啲獎分得好細緻，例如組合同樂隊曾經分開頒獎，又有跳唱歌手、Rap歌手、仲有啲咩台風獎等等，呢啲就真係肯定小眾，專重唔同界別嘅單位，將不同聲音帶比大家。如果再大搞，一定會有edm獎、MV獎、造型獎、Poster設計獎(莫文蔚有力挑戰呢個獎！)、戴住口罩演繹獎、永無走音獎 etc...當然最尾幾個獎係亂噏搞笑兼抽水，但分得咁細都真係有其可取之處。 最後講到尾，音樂係藝術，同時亦係商品。 獨特性 vs 普及性， 主導市場 vs 市場主導， 都係值得創作人同觀眾深思嘅問題。 不過，將個波拋比觀眾好似好不負責任，因為好多觀眾想法只係好簡單，餵到堆嚟就食，無諗背後咁多野。 所以，頒獎禮真係好反應到民意同品味。而樂壇已死嘅其中一個原因，會唔會係太「是但求其」？，亦無同外國相比呢？ 所以如果叫我揀一首2021年暫時最值得推介嘅歌，我真係會揀《樂壇已死》，可惜佢無獎。可能係因為大家覺得樂壇未死，又可能係大家根本無聽過呢首歌... Ps. 有朋友話《樂壇已死》表演好正，仲問點解商台同港台無請佢地表演。我就話：因為呢首歌係頒獎禮之後...小克有感而發填詞再出post搵人合作先有呢個project...所以係兩台頒獎禮之後先出現嘅作品...然後佢恍然大悟。同時呢位朋友亦話Viu 頒獎禮好好睇，好睇過港台同商台，但我唔識比反應，因為細問之下其實呢位朋友係無睇商台同港台年頭製作嘅頒獎禮...我唔係唔比你讚，但個理由要合理囉... #zip噏 #頒獎禮

1）【人去樓空】入座率慘不忍睹 空凳處處 新城頒獎禮被喻為全港最無睇頭頒獎禮，年年入座率都破新低，入場券經常在拍賣網平賣。2013年頒獎禮為例，晚上7時開騷時，入座率只得四成，高峯期也不足七成，連粉絲燈牌都欠奉，猶如死場，唔講以為去左殯儀館。 2）【小學雞】登報紙串爆叱吒 勁爆頒獎典禮2001於無線錄得平均收視有二十六點，而商台「2001年度叱樂壇頒獎禮」則只得平均二十三點，新城電台為表揚收視理想，特於報章刊登廣告，寫上「誰是真英雄，我做得更好！」擺明勁串2001年商台頒獎禮的宣傳口號「人人英雄、一一起舞」。當時新城電台行政總裁甘國亮說：「我都贊成用呢句口號，主要因為去年收視已經贏一次，今年再贏，其實係話畀贊助商聽，佢地慧眼識英雄。」小學雞都唔玩呢啲啦！ 3）【方丈朱明銳】諷天后王菲輸唔起 若詞界方丈係黃偉文，咁朱明銳一定係電台界方丈。勁爆頒獎禮2002，「全球勁爆歌手」十強名單王菲十強不入。當時任新城娛樂台總監的朱明銳，直言王菲因為輸不起，所以沒有報名競逐，說：「阿菲輸唔起，冇報到名，就算入到候選名單都明知唔得，實唔夠人爭。」但查實王菲於2002年根本沒有推出唱片，連王菲經理人陳家英都串爆銳哥：「一個電台高層會講埋啲咁冇智慧的說話，阿菲今年冇出唱片，又何來有資格角逐？輸唔起又從何而來？」完美收銳哥皮。 4）【On9當有趣】肉酸DJ年年擺歌手緋聞上枱 新城出名多肉酸DJ，唔識搞氣氛之餘，無幽默感又要搞爛gag，唔想笑囉。技窮到得一招，就係擺歌手緋聞上枱。早於2005年，新城將鄭中基、方力申及 Twins的緋聞擺上枱，方力申當場黑面， Twins事後表示不喜歡新城的安排，蔡卓妍說：「我唔鍾意咁嘅方式。」而鄭中基更缺席新城慶功。其他歌手更唔洗講，個個都比人玩過，頒獎禮開開心心，係要搞到人黑面先安樂嘅。歌手唔開心，睇嘅又覺得肉酸，何必呢？ 5）【方丈朱明銳】鬧爆港台 死都要霸頭位第一個舉行頒獎禮 年年四個台搞頒獎禮，新城就死都要做第一個搞，無得搶頭啖湯，銳哥咪嬲嬲豬囉。2010年勁爆頒獎禮，新城台長朱明銳斥港台改頒獎禮日子，是不光明磊落兼蠱惑，更斷言不會參與港台傳媒大獎投票，他說：「大家要協商，我身為納稅市民好想港台對樂壇做有益嘅事。」 6）【因財失義】曾得罪全港多間唱片公司 2006年，勁爆頒獎禮分獎不公，陳奕迅敗給古巨基，而陳慧琳只奪3獎，傳環球正東勁不滿，拉大隊缺席慶功以示不滿。 2007年，黃柏高旗下的金牌唱片公司，公開發聲明杯葛勁爆頒獎禮2007。事件緣由：新城每年都會舉辦多個音樂會，形式類似商台拉闊音樂會，這類音樂會都是向各大唱片公司借出有份量歌星來擔大旗，而電台做這種商業性音樂會時，會得到很多廣告贊助費，帶來可觀收入，不過2007年金牌決定轉型，獨自主辦音樂會，獨食廣告費，所以拒絕為新城做商業性音樂會，招來新城不滿，以致在勁爆頒獎禮獎項分配上遭刻意冷待，古巨基更被飛出大獎行列，故金牌決定還以顏色，拒絕讓旗下歌手出席新城頒獎禮。 7）【環境災難】損害地球環保生態 10年來生產逾一千四百個膠獎 新城出名「太公分豬肉」，每年猶如東涌羽絨特賣場開倉勁減，獎項仲多過現場觀眾。瓊姐作出統計，由2004年起計今年共10年，總共派出1402個獎，平均每年派140個獎，相信總計量產N噸亞加力膠，對環境造成史無前例的破壞。 8）【方丈朱明銳】唔抵得祖兒去叱吒 銳哥強酸 2014年，容祖兒因檔期問題未能出席勁爆頒獎禮，朱明銳即時嬲嬲豬，如數家珍般表示新城多年來如何錫容祖兒，但其實祖兒只是因檔期問題未能出席。祖兒於2010年及2011年均因為要開巡唱而缺席十大中文金曲頒獎禮，當時港台也沒有半句怨言。祖兒亦純粹因為檔期能遷就到去叱吒、無線及港台頒獎禮，並非銳哥所說的陰謀論。祖兒經理人Mani 盡顯睿智，大方回應：「銳哥好大器量，唔會嬲」即見高手低手之分。 9）【肉酸DJ】年年講錯歌手名講錯歌名亂頒獎 普遍樂迷都認為新城DJ質素奇低，連做頒獎禮司儀都唔做足功課，經常講錯歌手名及得獎歌名，例如2007年，某DJ講錯方力申的歌曲「在你遙遠的附近」為「在你遙遠的褲」。新城前DJ李麗蕊更三句唔埋兩句就狗叫「Woo~ Woo~~ Woo!!」，令人困擾。亂頒獎情況更屢見不鮮，2005年頒「新城勁爆原創歌曲」給祖兒的「明日恩典」，但其實「明日恩典」為改編聖詩「A May Sing Grace」的改編歌。 10）【騎呢獎項】創新獎項名稱 寫個服字比你！ 新城獎項夠多，所以諗獎項名都別出心裁。例子包括2005年 「I-Tech勁爆新人王」，「十五周年中國搖擺歌手大獎」、2006年「新城勁爆創意表現成就大獎」、「新城勁爆最具創意市場策略大獎」、2007年「新城全國樂迷投選勁爆彩鈴及網絡歌曲」（為新城歷年最長獎項名，共17字）、「新城勁爆金心大獎」、2009年「新城全球勁爆最受歡迎至尊歌手大獎」、2010年「新城勁爆安哥25銀禧大賞」、2011年「新城勁爆最傑出至尊男女歌手及組合獎項」、2012年「新城數碼音樂台亞洲超銷量組合大獎」……唔數喇，比我抖下啦！