【龔成問答信箱】（Q21981-22000）

Q21981：

龔sir 你好，上完你既基礎班，我自己整理咗投資組合，希望想聽下你既意見。

本人40歲，資金唔多，得幾萬蚊，（黎緊會keep住儲現金）之前一直都無投資底，我希望係呢10年盡量爭取時間，所以盡量集中水桶1、2既升倍股：

水桶1 -
福壽園 （1448）$1000/ 月供
金界 （3918）$1000 / 月供
希慎興業（0014） $1000/ 月供

水桶2
港鐵 （0066）$1000 / 月供
盈富（2800）$1000 / 月供

另外之前上堂有聽你提過下美股，以下呢兩隻都係追踪指數，亦都係水桶1，係有限既資金上，邊一隻比較忙可取呢？！
（2814）（QQQ)

唔該龔sir

你放心，我唔會訓番身去買水桶1，我記得你講過，要衡量自己可承受風險，所以我都係小注投資，

另外都會用你教既方法去搵潛力股同優質股，唔好盲目去亂買股票，呢個我好勤記

龔成老師︰

你投資的股票，都適合你年紀。但希慎興業（0014），我地會視為水桶2的股票。

Invesco QQQ Trust(QQQ) 是追蹤納斯達克100指數

三星FANG ETF（2814）的投資目標，係追蹤NYSE FANG+指數的表現。是一個美股潛力股基金。

首先，FANG+係代表美國上市多隻領先既科技股票，即係代表Facebook、Amazon、Netflix、Google，而該指數會再加上其他科技股，如Twitter、Tesla、百度等，即是全球處最前列的科技類公司。

這基金是一個潛力基金，長遠正面，但要留意價格會較為波動，加上近年科技類公司上升左唔少，因此現價唔算平，建議以月供的模式投資，買入後長遠持有。

QQQ和三星FANG ETF（2814），2隻都係水桶1的股票，都係有質素，而潛力度和波動性，會係2814較高。

由於「潛力股」係需要一定經驗和有一定波動性，你經驗尚淺，可以先小注，大約佔組合2-3成左右。若你係有一定經驗，你可以投資到約4-5成比重。

現時大市只在合理區，每月資金唔好盡用。最好留有部份，等大跌市出現時，可以用來掃貨。

------------------------------------------------

Q21982：

老師你好。作為收息股，請問覺得 386 ＆ 405 可以嗎？

另1772 現價雖然下跌，但都好似略貴，而且有風險，請問這隻股你覺得可取嗎？

謝謝解答。

龔成老師︰

中石化（0386）和越秀房產（0405）都係有質素的收息股。

中石化（0386）質素算是不差，但又未到好好，始終這只是商品企業，沒有一些太大的優勢。

石油是商品，當中沒有差異性，佢地要將石油賣出，只能跟國際油價，這令佢地處於被動狀態。沒有價格自主的能力，這令佢地的獨特性有限。這類商品企業，都可投資，但就要明白不是最高質的企業。

生意近5年只是上上落落，無乜增長力，這是受油價等因素影響，反映佢處於一個被動的狀態。收息是可以的，但增長力唔算強。現價合理，可以分注入貨。

越秀房產（0405）物業以大陸為主，會較受中國經濟因素影響，以及有人民幣風險。

同時當中的物業，都以商業為主，所以在疫情中波動性也會較大。現價在合理區，可以分注。

贛鋒鋰業（1772）是潛力股，估值較難，分析時的確資料較少。由於上市年份少，我地較難有長期數據分析。

佢為鋰化合物、金屬鋰及鋰電池等鋰資源生產商，業務涵蓋上游鋰資源提取、鋰化合物深加工、金屬鋰生產、鋰電池生產及鋰二次利用及回收。集團提供涵蓋五個主要類別逾40種鋰化合物及金屬鋰產品。

其實佢的產品應用都廣泛，包括電池相關產品、化學品、藥品及新材料等，而客戶主要包括電池材料公司、電池製造商、化學品製造商、製藥公司及電子器件製造商。產品主要於中國、韓國、日本及新加坡等十多個國家出售。

我相信佢長遠有潛力，有長線投資價值，問題只是平貴度的問題。現價略貴，小小注好了，之後等佢回落先正式入貨，始終行業有一定的變化。

其實你選擇上述3隻股票時，除左睇質素外，都要睇翻自己風險承受能力和年紀。

收息股，增長力較弱，就要係創造穏定現金流。較適合近或已退休人士，或者風險承受能力好低的投資者。

而贛鋒鋰業（1772）是潛力股，佢增長潛力高，但風險同樣都大，適合較年青和有經驗的投資者。

你可以因應自己情況，去進行配置。

------------------------------------------------

Q21983：

Hello, 老師，本人也想開始試吓每月投資法，每月可儲三萬左右，你會建議儲邊隻股好呢?

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

因此，你在選擇應該投資那一類股票時，會係因應你人生階段、投資經驗和取態，去做決定。

假設你係年青至中年人士，你可以用「平穏增長股」 + 「潛力股」的組合。如果你係偏年青，比例大約可以去到各一半。

但由於「潛力股」有一定波動性，較適宜年青和有投資經驗人士。若你投資取態較保守、經驗較淺或者較接近中年，「潛力股」比重就要相對下調。

現在你每月先用5成儲蓄，即$15000做月供。其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、領展(0823)、希慎(0014)、太古地產(1972)

或潛力股︰中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

------------------------------------------------

Q21984：

龔sir，你好！已經follow左你一段時間，睇左你不少分析同意見，獲益良多！希望能夠有幸抽中並得到指引！

現在想重整自己的股票組合，有冇咩股票會放左佢會好d ?

股票組合如下：

1475(日清食品), $8.74, 5000股
3988(中國銀行), $3.71, 1000股
6618(京東健康), $185 ,100股
9600(新紐科技), $4.24, 800股

2013(微盟), $25.08, 1000股
00992(聯想集團),$9.37, 2000股
1186(中國鐵建), $5.14, 1000股
00769(中國稀土),$0.96, 4000股

感激不盡，謝謝老師！ ！

龔成老師︰

你現時持有股票，大致上都係有質素，有長線投資價值。

除左中國稀土（0769）質素一般般。炒作多過實際，過往賺錢能力不高，業務波動，間中出現虧損，投資價值唔算高。

另外，中國鐵建(1186)質素只係一般，現貨持有係可以，但唔好再加注。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

因此，你在選擇應該投資那一類股票時，會係因應你人生階段、投資經驗和風險承受能力，去做決定。

如果你年青，可以「平穩增值股」(1475, 0992, 1186)+「潛力股」(6618, 9600, 2013)。中年人士，可以較集中翻係"平穏增長股"。

當你已近退休之年，就應集中在「收息股」(3988)，去創造平穏現金流。

你可以睇翻自已年紀，去作出配置。

------------------------------------------------

Q21985：

老師，剛剛睇到80後千萬富翁中段了，但我現時身處一個疑問，現時我擁有一樣價值接近5萬元收藏品

但對這個收藏品的未來，及不知道市場嘅走向感到有點迷惘，咁我應該8折讓出去換現金去投資，定繼續起碼2-3年等佢可能升值？皆因我只見到現時虧損率，但不知道未來嘅增長率。謝謝

龔成老師：

由於「收藏品」不能產生經濟價值，也不會產生出現金流，因此，我地在定義佢質素時較困難，同時不一定是資產類別。

而當中的價格，就取決於大家的認同價值，如果將來對這項目的認同增加，就會對佢價值增加，由於每種收藏品都有各自的市場及認同價值，因此，你一定要有相關的專業知識、分析力。

如果無相關知識，建議賣出。如果有，就要分析這項目長遠的價值。

------------------------------------------------

Q21986：

早晨龔sir，最近睇你pages, 見你介紹3110 高息股作收息。。請問這些有風險嗎？因我幫小朋友長線儲錢用！

另外 3067 我都係跟龔sir意見買左幾千股，但聽龔sir講一隻股不能太多，所以我想分散落 3110！但。。我又唔見 3067 有派息。。

龔成老師：

上述的兩隻，都是交易所買賣基金（ETF），當中都是持有一些質素不差的股票，但性質不同。

安碩恒生科技（3067）風險會較高，投資者進求股價增長，但股息較少。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

這基金上落較大，現價大約在合理區頂，因此，這刻不能大注投資。

最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

如果你投資目標是收息，就不應投資3067，應考慮3110。

GX恒生高股息率（3110），是一個投資收息股的基金，追蹤恆生高股息率指數之表現。

可以視為收息股的組合中其中一員。這基金可投資的，現價合理，可分注。佢是投資香港大型，較穩陣，派息較高的上市公司。

這是不差的收息組合，但增長力不強。

可以上基金網站有介紹的，我建議你睇睇先。

------------------------------------------------

Q21987：

龔老師，上完初階課程後，希望你指點一下我的投資組合

1,000,000現金
400,000人民幣定期存款
200,000保險基金，主要是投資美股科技股每年有7%利息收入
有四手i bond
230,000股票

吉利汽車 00175. @21.000 3,000股
康師傅控股00322@ 12.800 2,000股
中國石油化工[email protected] 2, 000股
置富產業信託 [email protected] 3, 000股
中國鐵塔[email protected] 8, 000股
中國海洋石油00883 @8.050 1 , 000股
友邦保險[email protected] 200股
三生製藥[email protected] 1 , 000股
小米集團一w01810 @29.350 400
平安好醫生 01833@88 200股
港燈一SS 02638 @7.590 4 , 000股

本人40歲，月入30,000，支出大約8000一個月，每月儲蓄大約兩萬蚊

我與家人同住沒有置業需要，有機會也想投資一個物業收租

想五年賺到2,000,000，55歲退休

但由於是投資新手,只懂把資金放進定期及收息產品，高風險投資不知道那樣做，那些股票不是優質股或潛力股可以賣出。

我是可以承受中高風險投資。我知道很多股票現貨價在比較高的水平，我想等回歸合理區才分注買入。多謝賜教

龔成老師：

以你的年齡情況，上述的配置沒有問題，方向基本正確，選股大致都是有質素的股票。

你40歲暫時唔需要再增加收息股，你原有的收息股，就持有先，唔需要特別變動，但之後唔需要再增加就得。例如港燈（2638）、置富（0778）、中石化（0386）。

因為你有15年時間，你可以在頭的7-10年，做好「增值」的部分。到之後的幾年，就開始轉為收息類別，即是運用「先增值，後現金流」作方法。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。

每月$20000的儲蓄，可以用月供，或自行分注的模式投煽總之現時不能用盡現金就得。

平穩增長股：潛力股
7：3
（如果你投資實力較強，可增加潛力股比例）

平穩增長股：考慮盈富（2800）。

另外再加：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

潛力股：安碩恆生科技ETF（3067）

另外再加：阿里（9988）、騰訊（0700）、港交所（0388）、舜宇光學（2382）、小米（1810）、ＧＸ中國電車基金（2845）、比亞迪（1211）、中生製藥（1177）、三星FANG ETF（2814），但就要明白波動性比上述會高左，同時風險大左，你要自己平衡。部分要等回少少先入。

現時大市波動，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q21988：

Sir你好！已經遲職了, 決定去創業～～再做下去已沒意思, 浪費時間。 想剩下的人生時間活得精彩, ～～始終創業才可以真正做到財務自由， 自己話事。將會開間細美容院（大約資金20幾萬）

1）有62萬股票， 40萬現金

2）計劃將剩下1211/1手（$60買入）＆1830/6手（@$3.98）, 全部賣出作為創業資金。

3） 還是賣出其他股票代替1211 1830？想你給予意見作為參考。 謝謝

以下是本人手持股票資料
788 [email protected]
1108 12000@7-
1177 [email protected]
1211 500@60-
1317 [email protected]
1448 [email protected]
1810 [email protected]
1830 [email protected]
2388 [email protected]
3067 [email protected]
6993 [email protected]
謝謝龔Sir回覆

龔成老師：

創業中途會有不同的困難，但只要堅持，就終會有成績，加油！

現時你唔好再買股票，因為創業都要一定的資金，同時要為各種可能做準備，因此要多留現金。

至於賣出那些股票，其實你應該將想法倒轉，你想留下那些股票，那些股票較有質素，以及長遠較有增長力。

上述的不少都是有質素的股，但現時應該賣出一些增長力較一般的。

我會建議留低比亞迪（1211）、中生（1177）、福壽園（1448）、恆生科指基金（3067）、小米（1810）、完美醫療（1830）（如果上述有個別股，佔你組合%較多，都可減持。而餘下就可能考慮賣出。

------------------------------------------------

Q21989：

你好龔老師，我是投資新手，看了一段時間你的教學片，增加了一些投資的知識，未留意你之前買了些股票，包括

0005 @ $60
0410 @ $4 (最近$2.3止蝕賣出後急升）
1310 @$10

今天1310跌到$9.3 ， 我也看到有債務問題，請問現時股價合理嗎？是否值得持有？還是應止蝕沽出？

多謝老師寶貴的意見。

龔成老師：

我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

你最大的問題，就是集中分析短期股價與消費，你犯了一般散戶都會犯的錯。

你記住，買股票就是「買入企業等企業成長」，一般都要3年以上先會見到成果。同時，你不是炒賣，是「財富配置」。

匯豐（0005）、香港寬頻（1310）質素都算有的，但不算高，你可持有，但不建議太多，之後要選更優質的股票。同時，你。建議你睇《股票勝經》。

------------------------------------------------

Q21990：

老師想請教下a股既問題，因為比較接觸多港股，最近買了a股後有點問題

1：5送1的部分，如果係碎股，a股碎股係唔係沽唔到，如果沽唔到應該點做好

2：10股派股息2cny，此股票每手100股，假設我有100股，應該收幾多錢股息？

3：老師，想請教下，週期性行業，係未應該用pe模型，計算果時應該著重pe定係eps，因為我見週期性行業pe高低都好大上落，完全好似冇參考價值咁，應該點計好

龔成老師︰

1) 碎股都可以沽出，但實際處理方法，要問翻你用緊的金融機構。

其實只要係有質素股票，不論係完整一手，還是碎股。佢長線投資價值，都唔會有分別。

2) 若每10股派人民幣2元，你會收到人民幣20元。但實際上，你收到金額會少於20元。因為收到股息前，係先要扣除內地相關稅項，和金融機構代你收息之費用。

3) 去計算一些週期性行業，你可以用市盈率估值法，作為其中一個參考方法。當中，市盈率和每股盈利，都同樣重要。

由於企業盈利，係受一個特定週期所影響。故你在拿參考數據時，係需要拿一個較長年期(7-10年)，已確保數據可以包含整個週期的變化。

但你要留意，在這些年期內，會唔會有一些事情，令成個大環境出現改變。就好似我初班第5堂，用港交所(0388)作例子。佢雖然係週期性企業，但由於近年多左中概股回歸。

在抽取數據時，只會用最近幾年，而唔係用一個週期性長度的時間。

------------------------------------------------

Q21991：

Hello 龔老師，早晨!

現有一層供完樓，作收租之用。如將呢層樓，再造銀行按揭，用作買些电力股收息。請問是否可行？

因本人巳近退休年龄. many thanks

龔成老師︰

現時息口偏低，利用加按貸款，去買入收息股，從而賺取息差，係一個可行做法。

但我地要考慮翻，自己本身負債能力。由於你按揭已經全數清還，所以再透過物業，去借一筆資金投資，係可以。

不過，你現時已經50歲，借貸金額不宜太進取。以你年紀計，總負債佔總資產比倒，唔好高過一半。到60歲，更加下調至30%以下。

另外，我地建立一個收息股組合時，不應太過集中個別企業或行業。因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

特別要留意銀行業，佢營運模式較特別，風險會比一般行業為高。必需堅守30%這個準則，如果可控制在20%以內，會更好。

以下是一些有質素的收息股，你可以參考下。

現時大市只在合理區，新取得的資金，唔好盡用。最好留有部份，等大跌市出現時，可以用來掃貨。

港燈（2638）、香港電訊（6823）、恆生（0011）、工行（1398）、置富（0778）、陽光（0435）、深高速（0548）等，大多有5%股息

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、完美醫療（1830）、互太紡織（1382）等（記住，股價略波動，不能太過大注）。

（你可睇下《50穩健收息股》當中仲有好多）。

------------------------------------------------

Q21992：

吖Sir，2809 GX中國潔能，由之前90幾蚊都升了不少，股價屬於什麼位置？ETF不太清楚平貴

長遠睇好綠色能源板塊，世界各國致力推動碳中和，中國亦已訂立2060碳中和目標，相信未來會有不同政策岀台去支持行業發展的

龔成老師︰

GX中國潔能（2809），其目標為追蹤SOLACTIVE中國清潔能源指數NTR之表現。

當中佔最多為"半導體產品與設備"股份，約組合4成，其次是逾2成的"獨立電力及可再生電力"。

此股平貴不易分析，而且頭10大股份中，除了信義光能（0968）外，其餘都在內地上市。

潛力度是有的，但會比較波動。

你預現價大約係合理區頂，至略貴水平。如投資，宜慢慢分注或者月供儲貨，並長線持有。

------------------------------------------------

Q21993：

多謝老師之前的回覆，我會叫阿仔去上你堂。

$8800真係超值，日後學懂投資長智識一定賺得返。我自己就是一個例子，以前投資真係輸多贏少。

老師，但我更想如何令自己小孩早啲開竅？知識是終身受用。

老師，我有問題唔明。你也建議大家買REITS，回報等同買樓收租，但係如果投資者有能力買樓收租，長遠利益來看，買樓收租更可賺樓價升幅，不是回報更佳。

我明白買樓投資需要龐大資金成本，且流動性較慢，我朋友現在每月供樓壓力頗大，但我深信幾年後他必定有高回報的。

龔成老師︰

無錯，有錢人著眼"回報"，普通人則著眼"付出"。所以，我地學習不應該只著眼於付出多少成本，而是可以從中獲得多少回報。

點樣可以幫小朋友開竅，最主要方法，就係唔好令佢地將"學習"同"返學"掛鈎。

因為，其實有好多有用知識，包括投資，係平常學校都唔會學到。如果小朋友只係學學校教授的知識，他們只會成為一個好員工，但永遠唔會知道，自己可以當主人。

更甚的情況，就係佢畢業後，會認為自己人生的"學習"過程已經完成，永遠只停留在畢業一刻的水平，人生從此就再無前進過。

其實書本，係一個好好學習媒介，你可以鼓勵佢多閱讀不同類型書籍，去開闊自己視野，對佢會將來會好有幫助。

至於REITS和物業，都係優質資產，都應包含財富組合當中。性質上，會有少少不同。

由於物業金額較大，對資金較少，但又想投資物業類的投資者，REITS會係一個好選擇。

但物業雖然流動性較低，成本也較大。但由於佢除了可以收取租金回報外，本身都會有增值潛力，令你資產價值上升。

而REIT，主要係收取當中物業租金回報，資產增值部份唔會明顯。回報部份，主要來自租金產生現金流。

因此，你要睇翻你投資目標，去決定邊個項目才適合你。

------------------------------------------------

Q21994：

龔成sir 你好，我現時32歲

想請教以下問題：

1. 我將手上的股票，按水筒123 分類，想問問分得正唔正確，以及比例上希望俾俾comment

2. 藥明生物2269 的合理價是多少？
謝謝

龔成老師︰

1) 以下是要修正的股票。

水桶1︰港交所(0388)

水桶2︰中金公司(3908)、煤氣(0003)、越秀地產(2934)、長建(1038)

中金公司(3908)經營投資銀行、財富管理等金融業務。佢業務係有，但賺錢能力唔算好強，整體質素算係一般。你投資都可以，但唔好太大注。

ＸＬ二南方恒科（7226）產品之投資目標為追踪恒生科技指數每日表現兩倍（２ｘ）的投資業績。

雖然我長遠認為，恆生科技指數正面，但中短期可以較波動，由於這基金有槓杆，就會令價格更加波動，其實有風險。

我會較建議投資無槓杆的恆生科指ETF（3067），始終較好。

以你現時32歲，應以增值為主，水桶1和2各佔一半都可以。

由於「潛力股」(水桶1)係需要一定經驗和有一定波動性，如果你經驗較淺，可以先小注，大約佔組合3成左右。若你係有一定經驗，你可以投資到約5成比重。

2) 藥明生物（2269），主要提供有關生物製劑藥物發現、開發與生產服務。

佢涵蓋生物製劑發展過程的所有五個階段，即藥物發現、臨床前開發、早期臨床開發、後期臨床開發及商業化生產。

潛力是有的，因為過往的財務數據的確理想，但現時的估值唔平，這刻投資值博率一般。

不過，這類股好難話現價一定貴，因為佢有好高的增長，只可以話現價唔平，但如果之後有高增長，那就未算太貴。只可以話，如果你真的想投資，小注好了，你要明白業務有不確定性，同時股價會好波動。

------------------------------------------------

Q21995：

你好呀龔成老師，多謝你一直以來嘅分享。我同男朋友都有聽你講每月月供優質股，穩定儲咗一筆資金。

我自己有keep住月供恆基，現升幅不少，所以想放少少轉現金，再買入另一啲有升值潛力的股票。

想問問老師意見，我應該等除淨派息後就放一半轉為現金，定係應等恆基價位升到40左右才放呢？有機會嗎？

謝謝老師解答

龔成老師︰

恆基(0012)是有質素，當然，增長力減少左，預期佢中短期都是弱，不過，這股是睇長線及超長線的。

這單計佢手持農地是全港最多的發展商，就明有一定的價值，當然，農地要發展要好長時間，所以這股要好長線。

我地投資優質股，其實就係將只會貶值的現金，轉成有優質資產的過程。只要質素無變，而價格又唔係升到太過高，我地係唔會沽出。

恆基(0012)有一隻有質素的股票，現價唔算特別貴，只係合理區內，唔建議你沽出。可能你會覺得近期升唔少，但我地持有優質股，目標係希望倍升，甚至更多，所以你目標要放遠D。

除非佢已經升到好貴、長線質素明顯變差，或者大市好狂熱，你才好考慮減持。

若你想加入其他優質股，可以用新資金去做，恆基(0012)照長線持有就可以。

------------------------------------------------

Q21996：

龔sir，我買左你好多既書黎睇，宜家已經睇左8成，亦留意到巴菲特都講過婚姻先係人生最大投資，

加上睇埋你幾年前分享的曾同有錢女的拍拖的帖文，我突然有感而發：

我想問下︰

1. 如何用理性地以超長線眼光來擇偶或是

2. 該有何較通用的標準來評估對像的優質度？

因為這是人生最重要的投資之一！

由於學生想獲得較深入的指引，加上比較私人和個人化，如果可以，不知你可以在6月17日股票班課後詳細一點點指引學生好嗎?

利申：男，22歲

感謝

龔成老師︰

我過往有錢女朋友故事，主要係想帶出，只要你有目標和動力，你才會進步。

另外，你身邊要結識一些比你更叻和更高水平的人。如果你身都是同水平的人，你就不會有動力，去再提升自己。

因此，你要創造一個環境，令自己有動力去保持進步。

至於擇偶，每個人都有不同的準則，唔會有一個通用標準。最重要，係佢明白你，同時間願意和你一齊進步，咁就可以。

其實最重要，是同你夾、適合自己，大家有共同的方向。

------------------------------------------------

Q21997：

龔sir您好，想問吓你意見，想將媽媽啲定期存款買股票收息，可否提供幾隻股給我。

如果買1煤氣2匯豐3領展4地鐵現價合理嗎？又想收息同時又可以增長，麻煩比啲意見給我，十分感謝

龔成老師︰

你所講的4隻股票，現價都合理，可以分注。當中匯控(0005)係偏向純收息，增長力唔會明顯。

其餘3隻係平穏增長股，股息係有，但唔算好多，不過會有一定增長力。

投資前，你先要明白，收息股回報雖然高於定期。但就算再穏定的收息股，都會有波動，係可能會出現"賺息蝕價"的情況。唔會好似定期咁，保證你個本金。

若你媽媽距離退休，尚有一段時間，你投資上述股票係可以，去邊收息，邊增值。

但若果你媽媽已經退休，就最好集中翻係收息股，去創造現金流。以下是一些優質收息股，你可以參考下。

現時大市只係合理水平，現金佔比重大約3-5成。故你可先用部份資金，去分注入貨。餘下資金，就等大跌市出現，才加大力度掃貨。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）或收息基金(3110)都可以。

------------------------------------------------

Q21998：

龔成 你好 想問8160我由0.6入手，現在跌到0.083，是否應損手離場？

龔成老師︰

金滙教育(8160)在香港以「勵致研習中心」品牌，向中小學學生提供補習服務。

佢業務係有投資價值，但集團規模好細，每年營業額才相連4千萬都唔到。

其品牌唔算好強，見佢多年出現虧損，反映其賺錢能力不足。

此股投資價值好一般，長線計，你換碼至其他優質股會較好。你可以等佢出現反彈，就慢慢沽貨換碼。

------------------------------------------------

Q21999：

Halo 成哥，1357 美圖
708 恆大

如果依兩隻股票一年前都係喺低位只不過依三個月前曾經高過（我喺佢哋高位嘅時候入）但係而家又開始跌返落去，我將三份一嘅股票賣出去做法唔知正唔正確？

恆大而家跌到29，我當時67入
美圖而家跌到2，我當時3.7入

買完之後就一直跌跌到而家幾個月後我都唔知好唔好放定係等一年之後有可能佢哋會再升返我買嘅時候嘅高位？

感謝。我知我傻了，在高位入左

龔成老師︰

首先你要明白一個概念，我地持有一隻股票與否，關鍵位是企業質素、前景，不要被買入價影響。因為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心，照持有就可以。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

美圖公司（1357）長遠仍算正面，佢過左最差時期，現時正向好。

佢主要從事提供在線廣告及其他互聯網增值服務；以及開發、製造及銷售智能硬件產品。

見佢財務數據改善，這企業仍有發展力，有長線投資價值。不過業務變化始終大，不建議大注投資。

恒大汽車（0708）雖然可能有潛力，但風險高，佢資金投入的確強，大力發展新能源車，但這些仍未有賣產品真正的實力，長遠能帶動多少收入，未知。

由於仍有好多未知數，而股價已經大升左好多（比半年前），因此，這刻要自己衡量風險。

可能佢真的有潛力，但連基本的銷售銷售都未有，我地作為投資者，就好難分析，只可以話佢股價會大上大落。

我唔係話佢無投資價值，只係不確定性較高。投資時，必需控制注碼，不能太大注。

這2隻股票，若佢佔你組合不多，你可以守。如果佔比重較高，最好沽少少，去平衡翻個風險。

未來再投資前，記得先做好估值。若你投資經驗較淺，可以考慮用月供去儲貨，透過長期平均價格買入法，去減低買貴貨的風險。

------------------------------------------------

Q22000：

龔Sir, 想請教一下有冇分柝過一些公司，從潛力股到不再是潛力股? 會有什麼先兆 從而知道要及早離場

亦想請教一下現有什麼板塊你認為未來10年會大躍進?

龔成老師︰

除左你可以從年報中，管理層將來發展計劃，可以了解到企業狀況外。

你都可以睇一些財務指標，好似股東權益回報率(ROE)會由以往較高水平，一直回落。派息政策，由以往零派息，到現時較高派息比例。都反映企業增長潛力，係下降左。

另外，當你見到大環境對佢不利，有其他新的產品替代原有產品及行業，都是一個不利訊號。

當然，我地唔可以一概而論，要每隻股票認真分析，睇佢數年發展情況，才可以下定論。

但你要記住，企業增長潛力慢左，唔等同於佢無左投資價值，純粹係企業或/和行業開始成熟，股票由「潛力股」慢慢變成為「平穏增長股」。

我地係投資配置時，唔會全部分晒係「潛力股」上，因為風險會太高。必需配以一些「平穏增長股」，令成個組合風險更平衡。

未來10年，相信新能智能車、醫藥相關、物聯網、綠色能源等行業，會有較大優勢。

----------------------------------------------

若你有問題想向本人發問，可在龔成的fb專頁中（龔成）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q13181-Q13200）

Q13181：

老師，我是股票班學生，想問下：

1. 損益表是否只計算已賣出的貨品原材料成本和生產成本嗎？未賣出的貨品的生產成本和其原材料成本不屬於該年的成本嗎？

2. 承上題，未賣出貨品會出現於資產負債表以「存貨亅形式列出？

關於領展和任何房托：
3. 「扣除與基金單位持有人交易前之年內溢利亅和「可分派收入亅有什麼分別？它們都是純利嗎？

4. 如果計REITs的估值，應該用5年的「可分派收入亅或「扣除與基金單位持有人交易前之年內溢利亅計每股代表盈利嗎？

5. 可分派收入 = 扣除與基金單位持有人交易前之年內溢利 — 投資物業公平值變動 — 出售投資物業之收益 ？？

6. 怎樣推斷領展、越秀房託等的合理PE和每股代表盈利以計算合理價？

7. 房托出售投資物業的收益，是否只可用來再投資物業，而不能用作可分派收入？

龔成老師：

1）對，你的理解正確。

2）正是，而入賬的金額，會以「成本」「銷售價」，兩者的較低者為準。

3）扣除與基金單位持有人交易前之年內溢利，你可以理解為房託在會計上的盈利。但我地最重要，是睇「可分派收入」，因為這部分才是反映房託在營運上，賺到了多少錢，同時，佢可以派多少息，都是建基於這個數目的。

4）投資者會習慣用「可分派收入」作為估值的基礎。

5）你可以咁樣理解。其實，年報有提供這數的。

6）由於佢盈利已無實際意思，所以當我地利用市盈率去進行估值時，就要將過往的所有市盈率，自行扣除物業重估去調整。

然後，我地就要自行計算一個有代表性的「可分派收入」，然後再作出計算，過程會比較複雜。

其實，你可以利用股息率去作計算，因為佢要求將「可分派收入」9成作派息，即是兩者有好大的相關性，因此你利用股息率去計算，都可以。

7）佢賣出的物業而得到的利潤及現金，並不能直接派息的。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13182：

老師好，想問一問金沙1928，比亞迪1211，中生製藥1177，港鐵0066 這個隻股票什麼價位才是便宜區，期待回覆，感謝

龔成老師：

你預金沙（1928）在$30以下會平，比亞迪（1211）$40以下平。

至於港鐵（0066），要預佢去到$32以下先叫平，中生製藥（1177），則要去到$5、$6以下先算平（這個平宜區比半年前調高左）。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13183：

呀sir,我有2個問題想請教你。如果我地所有投資都係長期作前題，低價買入想揸，年回報率咪好多時有機會係負數，因為好多時都揀可能個股有短暫負面消息時入，見住年回報係負數會好sad

另外，關於職業問題想問，自問唔算識好多人，但做左保險年半，開始冇乜客，做到有d迷惘，本身想盡快賺多點錢，依家停左係到，你覺得喱個職業前景如何？我係大學生，你覺得我應該轉翻一份穩定既職業嗎？
謝謝你

龔成老師：

我地講回報，是長期性的，所以根本就唔需要理中短期的回報。

如果一隻股票，佢經濟好時$20，經濟差時$10，你在經濟差，慢慢算到經濟好，已有一倍的回報，只要你有計算企業價值，分析大市冷熱的能力，就唔會出現負回報。

保險呢行，本身是賺錢的，但都好睇你自己的人脈網絡，因為的確唔係個個人都適合。我會建議你想方法，去識多D人，令自己的事業「可持續」，否則，如果單靠原有的人脈，將會好快用完。

所以，你能否持續做，取決於你有無方法，尋找新的人脈網絡方法。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13184：

請問老師點睇3690美團點評？

龔成老師：

美團（3690）業務增長的確快，但最大的問題是，仍然處於負現金流的狀態，企業不斷燒銀紙。

潛力大的確是這企業的賣點，但同時，這類股的估值好難，未知幾時有較似樣的現金流，以及往後會有多少，而市場這刻對佢有好大的憧景，如果增長力不及預期，股價會明顯受壓。

只可以話這類股好難分析，雖然前景不差，但只建議小注投資。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13185：

市場好多noise, 數據。
如：大跌市。。。

想請教老師平時如何操作？會否有部分作知炒玩波幅？ 低位入？RSI 作參考？

長遠，磚頭是否會較為穩建？但如果買了磚，又會少了現金流。 我很喜歡你的大富翁書藉，很用心！

龔成老師：

我地買股票，就是買企業，你要想象，你現時是「收購一盤生意」，你要分析那些資料？

大跌市？資金流向？RSI？炒盤生意？
這些當然不會發生，這些無是無意義的分析！

我地只需要分析企業的業務、前景，現時的企業價值，然後比較股價就可以了。

你認為買磚頭較穩健，只是因為你無用「收購企業」的角度去分析。物業與企業，都有各優質的地方，我地只要買優質企業，其實都可以好穩健。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13186：

老師：我42歲，大陸四線城市有一個鋪位，市值50萬人仔，爭15萬供完，每月收租2200人仔。

泰國芭堤雅有一物業出年6月收樓，收樓後要找尾數42萬港幣。

手上股票有市值50萬，現金有20萬，收息基金有10萬，保險理財產品有20萬（附時拎得，但利息得好少2萬零）。

我每月收入3萬，有㗎車供緊到出年3月完，供車8000幾，我想3年後半退休可以嗎，要點部署？

龔成老師：

你持有的物業，都能比到你正現金流，因此，你可以長線持有，成為資產項，並產生現金流的一部分。

由於你下年要在物業裡找尾數，因此你都要開始準備，增加翻現金的部分。

到完成找數後，你可以投資「平穩增長類」的股票，把握這幾年的時間去增值，盈富（2800）、恆基（0012）、銀娛（0027）等。

如果要3年半後退休，要加大儲蓄，同時保持投資這類股，但由於時間不算長，因此能滾存到的資金不算大，到時可以再將財富配置，集中現金流類別資產。能否退休，則取決於你到時的消費。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13187：

龔成老師，你好，我岩岩睇完你本書分析比亞迪，睇完都覺得好合理，想每月加多$2000供佢，但亦有以下疑問，希望老師可以略為指點。

1. 品質問題：我上網睇到佢好似間唔中都會有事故，今年試過架車自己起火，有啲擔心佢既品質會影響佢既長遠發展

2. 競爭對手：想請問下比亞迪同吉利、蔚來其實有咩大分別，我見佢地都係主要做電動汽車，蔚來之前仲好似好受吹捧。

比亞迪比起佢地既優勝之處係咪佢做電池起家，所以對電源果方面既研究同支援有優勢啲?

盼老師能解答我既疑問，謝謝！

龔成老師：

1）對呀，佢的產品仍有不少問題。但我地投資潛力企業，原理就是在企業未成功時投資，然後慢慢等企業成長，當中的企業價值就會大幅增加，所以，潛力股的產品「這刻未成功」，是經常出現的事。

2）我相信比亞迪（1211）最大的優勢是「電池」，因為佢造電池起家，在全球排數一數二位置，長遠來說，這方面是重要的決勝因素。

中國開始完出全面淘汰傳統車的長遠時間表，到時車廠只會生意電動車、混能車等，無技術的車廠，就要找有技術的合作。

同時，比亞迪投資大量資金去研發電動車，數量十分大，目的就是走在全球前列位置，當然，這一定有危有機，因為會有少少集中投資的情況，所以，這股不建議太大注，但長遠我相信是正面的。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13188：

龔sir, 請問2號中電點分析好？跌返好多，投資收息可以買入嗎？長遠注意咩風險？

龔成老師：

中電（0002）是不錯的股票，股價回落令佢進入翻合理區，現價可以投資，分注投資，長線持有可以。

收息不差的，但股息率就不算好高。相信股價有平穩增長能力。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13189：

你好，老師
我剛開始看你的Facebook 專頁，獲益良多。
我現年35歲，已婚，有兩兒3和1歲；是在政府部門工作的專業人員。現在家庭每月收入$15萬。

身為「高薪」一族的我，自己之前只顧考取專業資格，未有認真理財。現在眼見同齡朋友有些已達到財務自由，我感自愧不如，很後悔當初沒有好好部署投資。有感自己才是真正的「高分低能」。

已經失去了十年，我還是覺得要把握時間。希望你能给我啟蒙。

我有400萬現金，手上冇樓。家庭開資暫時5萬已足夠，但兒女長大後可能會增加。想子女將來到英國或加拿大升中學，而自己也能處於半退休狀態，不用為龐大的學費資出煩惱。

對於從未投資的我，怎樣的攻略比較好？我見你主張月供股票，但我又想已我的能力又可以直接買入股票。有其他的投資項目適合我嗎？

子女在外國留學，應否先儲定英鎊或買英國樓？這部分怎樣做？

龔成老師：

首先你要明白，我地理財，是建立一個平衡的財富組合，當中有不同的資產，長線持有，若只持有現金，只會不斷貶值。記住，我地是分配，不是炒賣，所以，你一定要學懂分配。

最簡單的做法，是投資「股票」、「物業」。

股票方面，你這年齡仍是財富增值期，但由於你未有股票知識，這刻建議你集中投資平穩增值股，如盈富（2800）、金沙（1928）、長建（1038）、中銀（2388）、港鐵（0066）、恆基（0012）、港交所（0388）。

至於物業，你最好在香港買翻自住樓，香港樓市相信會有中短期調整，你可以把握機會，而長遠來說，香港樓仍是供求失衡，因此樓價會向上。

至於英國樓，在資金許可的情況下，先考慮，因為這不是必然性的，你可以視作投資，視作財富分配的一部分。

你先了解下上述的分配，以及自己的投資目標，同時多增加投資知識，然後就可以進行計劃。初期唔好用盡現金，慢慢進行分配。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13190：

Hello mr Success,
我今年28歲, 扣除必要開支後每個月大概有2.5 萬, 目標係3-5 年後財富有理想增長 (20%), 想看看而家組合可以點樣改善:

1. 美股基金 – 每月供3000
2. 醫藥行業基金 (成分主要係國際藥廠) – 每月2500
3. REIT 基金 (成分主要係領展同新加坡REIT) – 每月2500
4. 國際股票基金 (成分一半係美股) – 每月 1500
5. 長建 (1038), 長實(1113), 港鐵(0066) – 每月各2000

感覺上好似無咩增長型股票, 請賜教!

龔成老師：

你上述持有的（1）、（4）都是平穩增值類，不過可以助你的財富有環球分散的作用，因此有持有的作用。

至於（3）、（5），都是平穩增長類，如果你想減持，將資金轉到增長力較強的類別，就將（3）、（5）的比例減少少。

至於（2），則是增長型的，可持有。

上述基本上都是不差的組合，如果你真的想增加組合增長力，就減少少（3）（5），同時投資更多在其他潛力股類別。

你本身已有醫藥這類的潛力基金，之後可投資科技類別的基金或股票。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13191：

你好，我一直對於買股票其實都吾係好了解，之前草左少少錢就跟我老豆亂咁買，最後啲錢都蝕晒...

最近我就諗住入番啲穩陣少少嘅股票，就入左1299友邦，另外都入左1212利福國際...

想問下你對於1212利福國際有咩睇法啊，入左諗住收下息，但最近都keep住跌。

龔成老師：

你一定要明白，買股票就是買企業，你要想象自己「正收購一間企業」，咁樣你要分析D乜？當然是企業的業務、前景、價值。同時，這是長線投資的，亦不用太在意中短期的股價。

友邦保險（1299）有一定的質素，你長線投資無問題。

至於利福國際（1212），本質是正面的，佢有崇光的業務，不過，中短期一定會因香港的社會運動，令佢業務弱，同時股價都會弱。但只要長遠回到正常，佢都會股價回升。

另外，佢同時持有了優質的物業，啟德地都是這公司的，我相信長遠有增長力。當然，所有野的前題，都是香港回到正常狀態。

佢之前以$74億投得啟德商業地，利福國際計劃於該地興建兩幢大廈，當中包括建立新的崇光百貨店，連同其他商業、娛樂及飲食設施，以拓展崇光百貨的零售業務，以及持有作收租用途。新項目預期將於2022年落成。

利福國際將繼續用地產加百貨的模式發展，購入有相當價值的黃金地段，將百貨店進駐其中經營，提高百貨店的品牌及生意，物業其餘部分用作收租，長遠享受物業價值的提供、百貨店在黃金地段的業務提升、租金收入的長遠升值。

簡單來說，就是地產加百貨，購入黃金地段，注入百貨業，而百貨業務產生品牌及人流效應，從而對持有周邊地收租的利福，產生亙相提升價值的效果，絕對是長遠增值的業務模式。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13192：

你好，我之前想月供，諗諗下覺得碎股問題加上手續費的成本，我想變成一手一手咁買

我原本打算一個月儲一萬
但想買銀娛、盈富、比亞迪

假設我第一個月先入一手盈富
隔一個月吾買
下一月儲夠兩萬再入比亞迪
再隔5個月儲夠5萬再入銀娛，一路循環

這個方法是否可行？
謝謝你既回覆

龔成老師：

我平時建議月供的目的，就是有效地將買入價平均，如果你可以將上述的股票，以自行分注的模式投資，就可以有類似的效果。其實，目的都是想減少一次過在某一價位買入的風險。

所以，你上述的模式，大致可以，你最好調整至「比例」上，各股票都能做到平衡的效果。

同時，現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13193：

龔成老師您好，我在港鐵(66)54蚊時持有了十手。我本是打算長放作資產增值用途，你覺得我現時可再作分注買入溝貨嗎？

我沒有持有其他股票。
謝謝

龔成老師：

港鐵（0066）是有質素的股票，你買入價在合理區頂部何不過這股有得守，唔需要擔心的，你可以長線持有。

現價可以分注投資，不過，你一定要睇翻你持有這股的比例，就算一隻股優質，我地都不能太過集中，否則會出現集中風險。

你要計算總財富的比例，現金與股票的比例。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13194：

龔成老師，你好，我現時32歲，早前買股票都是輸多贏少，自從留意你page,開始明白投資要看長遠，所以上年開始月供2800同66
現在手上持有股票

772 1200股 104.7入
931 35000股 3.6入
1337 14000股 5.07入
700 500股 414.76入
788 40000股 2.145入
1211 500股 54入

請問772、931、1337還有投資價值嗎？
另外想月供多一隻應該選擇823還是1211？

龔成老師：

月供盈富（2800）、港鐵（0066），可長期進行。

至於你有上的持股，部分的質素一般，你要多從「買入企業」的角度分析。

閱文（0772），業務有增長力，但就屬於較高風險的類別，這類股不是不可投資，但最多只能小注，同時要明白風險。

業務上，佢地的確是高增長，同時業務有發展潛力，但睇翻財務數據，閱文算是有盈利，但市場估值仍貴。市場大部分的估值，都是基於佢的前景，只是不斷估將來的盈利，這一定會令股價好波動。

中國天然氣（0931）經常出現虧損，又玩財技。這股無乜投資價值。

雷蛇（1337）雖然在業務上，可能有潛力，但本質好波動，佢到而家仍處於虧損狀態，但公司市值已有$100億，所有的市值，都只是基於「將來預期」去產生，這個預期可以變得好快，因為大家都只是「估」。

同時，電競行業的真正營運模式，賺錢能力如何，充滿了未知數，一個遊戲可以好受歡迎，亦可以好快無人玩。這類股，小注好了。

只外，如果你加多一隻月供，可以加領展（0823），比亞迪（1211）則在你資金較多時，自行小注投資就得。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13195：

龔成老師, 你好, 現時388 跌到225, 但評論說沽售;而 我本身有4 手是很高位入, 現價買入拉平, 可以嗎? 賜教. 先謝.

龔成老師：

所謂的評論，都只是針對中短期的市況，只要我地長線投資，以買企業的角度分析，就不用理會。

港交所（0388）優質度不變，股價上落好正常，這股獨市生意，長遠一定有錢賺，問題是買入價平貴的問題。股價由高位回落了不少，現時處於合理區中上部。

雖然現價可分注投資，但如果你本身已有一定的貨，就唔需要再加，我地會以「佔財富的比例」去衡量是否加注。

絕對唔好因為「想拉低平均買入價」而去加注，這是錯誤的投資觀念。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13196：

你好，龔Sir，之前見你講澳門樓房市場嘅事，我本身係澳門居民，已有物業，但因政府嘅政策，買第二個單位嘅稅就貴咗！

我想問咁如果買珠海同中山嘅樓盤！有沒有投資價值，我想半投資半自住的

龔成老師：

澳門樓市都有類似香港的政策，買第二間就好煩，所以，你轉投資其他地方是可以的。但記住，唔好為投資而投資，要「有機會」才投資。

珠海是不錯的發展區，長遠正面，你可以在這裡找盤，但就要小心，因為有些盤會較貴，租金回報率極低，你要小心分析發展情況。就算你買入作自住，都要以投資者的角度分析。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13197：

老師
金沙、銀娛、金界控股
以上三隻都是濠賭業股

我現時25歲，可用平穩增值+潛力股， 但三隻中應如何選擇？

另外金沙現價 是否值得入手？
三隻的投資策略又是否相同呢？
謝謝老師

龔成老師：

首先，同一個行業不能佔你投資組合太多，你要在組合中，建立一個平衡的分配。

金沙（1928）會比較穩健，收息較強，但如果講增長力，銀娛（0027）會較好，至於優質度，再隻都不差。以你的年齡，銀娛會略適合。

至於金界（3918），這都是有質素的股票，不過就比上面兩隻，風險會再高，因為始終投資較新興的市場，投資注碼不要過大。

3隻都在合理區，分注投資就得，總之合共不能佔你總股票組合的比例太過多。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13198：

老師，莎莎點睇？
可能仲有好長時間都好少大陸客黎香港

龔成老師：

莎莎（0178）面對的問題，中短期影響較大，例如香港零售業，香港社會運動，人民幣下跌等，這都會對消費有影響。

長遠而言，這些因素影響不算太，不過，網購及旅客的消費力減弱，有些是長遠性對佢有影響，因此，這股在估值上，有少少調整。

現時在合理價，小注投資可以，但就不能太大手投資。你要預期佢中短期一定會弱，要耐性先有收成。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13199：

想問1177，其市值已逾千億，與2382相若，作為藥企是否仍有倍升空間？謝謝

龔成老師：

只要企業的價值向上，長遠就可以帶動股價向上，不過，中生製藥（1177）近年都處略貴或合理區中上部水平，這的確對長期投資回報率有影響。

不過，只要佢生意與盈利保持增長，企業價值就會向上，我相信仍有增長的空間，但股價要再倍升，則要多少少時間。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13200：

老師，聽聞近年有金融界投資者以炒賣殼股致富，想問你點睇這方面的投資？成功率高嗎？謝謝你

龔成老師：

其實投資殼股，可說是一種另類的價值投資法，因為這些企業的股價好低，但一旦選中成為殼，有人收購或入股，股價就會大幅提高。

但分析這些殼並不易，就算在我的股票班，也只是略略介紹這方法，始終不是穩健的投資模式，同時風險高，因為成功率並不算高的，同時近年證監會在監管方面多左，因此這類活動有所減少。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

多謝各位提問，若然你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網的，當然，會將發問者的身份，以及有關個人的部分刪去。

另外，由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

<攻守兼備的投資工具>

Reits投資風險跟報酬介於股票及債券之間，且租金收益穩定，是個很適合長期持有的標的。

去年我開始增加股利收入比重，就已規劃投資Reits，可惜國內產品競爭力都不夠，當時曾有網友問我有關這方面的問題，我的回答是「傾向買香港跟新加坡規模最大的作配置(領匯基金及CapitaMall Trust)(股息免稅)，這樣管理方便，風險我也可接受...」

後來我也確實在去年8、9月間買進領滙，並且在今年1月間加碼，只是原本只想要5%左右的殖利率，沒料不到一年內卻有超過30%以上的資本利得，這種長期趨勢向上，平時穩定領股息，漲時還可賺價差的投資工具，就是很適合喜歡樂活投資的朋友。

可惜當時我多寫了一句「但新加坡可能會等到台星通後再說...」，結果金管會喊半天到現在也還沒消息><，沒想到為了省點手續費，卻錯失最好的買點，也給了我很大的教訓，投資一定要抓大放小，機會出現時才能把握。

對有興趣的朋友來說，現在可能不是好買點，但如果未來因為升息預期等因素回檔時，就是值得好好留意的時候。