《或者存在的不存在職業 – 職場公敵》

一間公司，同事們唔一定係水乳交融，更多係水火不容。
就好似呢四條友咁。喺公司合稱「四人幫」。

松姐，47歲行政部老屎忽，專長冇乜，對年輕同事恨之入骨。

明仔，28歲職場新一代，為求升職加薪，不惜暗箭傷人。

八婆陳，40歲雜務部主管，為人邋遢，最愛周圍八。

周爺，34歲營業部大佬，愛恨分明，但對同事有恨冇愛...

「四人幫」主宰公司四大範疇，但由於心病太重，
小至換水，大至拎文具，都可以喺公司wtsapp group開火。每日打字駁火已經佔咗3份1工時。

而我，喺呢個時候空降成為COO(營運總監)。
「空降」本身已經極有潛質成為「乞人憎」嘅眼中釘，正路我應該行「懷柔政策」，但Sorry，我選擇高壓，仲要畀佢哋更污糟邋遢。

第一日，我已經嚟料。

松姐喺5:30pm打算離開公司，我一個閃身擋喺佢面前，問：「office Hour 6點收工，你呢家去邊？」
松姐有啲慌：「呃...我...我屋企人有啲唔舒服，想早少少返去睇下。」
我鐵面無私：「咁咪跟手續拎半日大假囉。」

松姐想挽回面子：「跟手續？我屋企人死咗點算呀！」
我令佢更冇面：「你屋企人死咗關我Q事呀？坐埋位！一定即炒！」

呢一句，令我第一日就被冠以「冷血」嘅形容詞，
當然，我嘅行動陸續有來！

一星期後，公司大會前，我同周爺講：「聽日Present份PowerPoint，你幫我做，但你唔使出聲，我講晒就OK」。

周爺反應好大：「但公司啲Project我最熟喎！」
我指住自己COO嘅Title：「邊個知呀？」

第二日，大會上，我將功勞全部歸於自己，最後一句「份PowerPoint我自己做咗一晚，希望大家有用啦」更將周爺激到臉色發紫，差啲噴血憤死。

同日，我捉到明仔嘅錯處，特登發大嗓門：「明仔！！！同我死入嚟！！」
明仔心知不妙，沉住氣行入我間房，打算關門。
我立即阻止佢：「唔使關門！」佢聽到之後面無血色。

我再盡啲：「同我拉開埋啲窗簾！畀全公司見到你個死樣。係呀，你自己拉。」
最後喺半間公司都望到、聽到嘅情況下，我鬧晒佢祖宗18代。

而8婆陳？
我取消咗佢成Dept嘅年終花紅，佢問我點解，我簡單答佢一句：「因為你成個部門都係垃圾囉。」

唔使兩星期，我人見人憎，而公司Wtsapp Group都冇咗昔日互片嘅情況，變成咗「圍毆」狀態。「圍毆」我一個。

冷言冷語、單單打打、Email老闆篤我背脊仲要CC畀我。
工作方便都緒多留難，特登唔做、做錯、夾口供屈我，趁我去廁所個個搶先起步霸滿晒都有。

人類仇恨嘅力量，果然厲害。而仲有一樣嘢變咗，
就係松姐、明仔、8婆陳同周爺嘅關係漸漸友好，唔止冇互鬧，有時仲一齊Lunch。
聖誕抽獎會互相嗌對方個名，真係想像唔到一個月前仲係刀劍相向。

佢哋愈來愈Friend，力量都愈來愈大，我嘅工作接近完全推進唔到。
所以我辭職。

消息一出，人性簡直推上崩潰邊緣，唔少擦鞋仔即時掉晒鞋油，西臉西到宇宙盡頭，「四人幫」有風駛盡利，對我冷嘲熱諷，但本人不在意，徐徐走入老闆房作道別。

＝＝＝＝＝＝＝＝＝＝＝＝＝＝＝＝＝

老闆房內，傳來我同老闆嘅笑聲......同一疊銀紙。

老闆：「你係有計嘅！一個月就搞到自己神憎鬼厭！呢啲酬勞你應得。」
我：「天生樣衰啫，點呀，『四人幫』和好之後，公司啲嘢係咪順晒？」
老闆：「係呀，以前佢哋各自作對，一份文件都搞幾日。至從你做咗公敵之後，佢哋淨係搞你，但你啲工作根本係虛嘅，唔影響公司。反而其他嘢佢哋通力合作，公司呢個月成績好咗好多。」

我滿意點頭，示意離開。

我嘅職業，被人稱為「職場公敵」。
當一間公司太多小圈子，分化得太嚴重，我就會被聘用，
專做衰人，短時間內搞最大嘅屎棍。

因為要人類和好，只有一個方法，就係製造一個共同敵人。
『可以阻止「憎恨」嘅只有「憎恨」，要阻止兩個人彼此憎恨，唯有令佢哋仇恨同一個人。』

當佢咃產生友情，團結一致要掃走我，
亦係我功成身退嘅時候。而我嘅離開，會令成間公司士氣高漲。

我離開，明明已係過返啲「日常」日子，但對班員工嚟講都會變「天堂」。
因為我在任時創造咗「地獄」，
人類總係見識過「地獄」，先知咩係「天堂」。

你睇下，當老闆決定出返花紅畀八婆陳，佢個狗樣幾開心。
但佢明明係應得，就係因為「地獄」過，「日常」都變「天堂」。

最後，老闆問我：「但你呢個公敵一消失！佢哋會唔會故態復萌？」

我笑一笑：「短期唔會，長期就睇佢哋做化，不過有咩需要，可以打畀我，再預約一個『職場公敵』。」

------------------------------
概念源頭：藤子f不二雄嘅《異色短篇集》，講述一班太空人嘅回航經過，中間亦有一角色專做壞事以團結其他成員。

------------------------------
其他不存在的職業系列Album：https://goo.gl/xh4bbt

其中推薦：
《死亡剪片師》https://goo.gl/le9re9
《試毒員》https://goo.gl/f3ruQ9
《都市傳說文案人》https://goo.gl/aqYG8x
《安樂死執行者》https://goo.gl/4s14q3
《Facebook生死冊(上)》: https://goo.gl/TpJFWi
《Facebook生死冊(下)》:https://goo.gl/1mggQc
===========================
PS. 因為小弟舊作《18歲的野比大雄》，有啲朋友話想睇，呢個係Google Doc Full Version (同出書內容一樣)，有興趣可睇下
Link在此: https://goo.gl/oFbMWS

FOR懶鬼，PDF download: https://www.sendspace.com/file/dy9whj

Ig:cheungson88
*會慢慢Up嘢上去