《唔好再請啲sales 返來為香港教育追數啦》
　
(事先聲明，香港教育制度係一個非常沉悶嘅議題。但我作為一個大學畢業生，我覺得自己都有呢份社會責任，討論香港教育制度同香港大學嘅沉淪)
　
讀過大學嘅朋友，有無take 過一啲course，明明係間大學最出名嘅professor，世界知名學者教，但佢教得差到一個地步，係等於同學參加咗自學人生自助計劃一樣？
通常出現呢個情況，同學都會喺學期尾將仇恨盡情發洩喺張evaluation form度，諗住煮重個professor 米，諸死個professor，令佢俾大學炒魷魚。然後你會發現無論呢班充滿仇恨嘅同學幾團結一致，個professor 都會喺個間大學盡享永生，永遠都喺間學校度繼續教？
　
其實點解會出現知名professor 教得勁差呢個情況？
係因為香港嘅大學無劃分research professor同埋teaching professor。大家都明，你讀書好叻，唔等於你識教到其他人讀書好叻，正如你識踩單車，唔等如你識得教人踩單車。(所以林作就算讀oxford 都說服唔到人佢識教)。
　
無劃分research professor同埋teaching professor，搞到本身專長做research 嘅professor 要夾硬教書。咁你會問，點解唔請啲teaching professors？咁咪可以提升教學質素？
一間大學有幾叻，除咗睇佢教出來嘅學生成就，仲關乎呢間大學嘅professor做咗幾多research， research 會協助一間大學追世界排名。講得衰啲，research professor就好似一間公司嘅sales，係幫間大學跑數，追排名。假設一間大學有100蚊，50 蚊可以請一個teaching professor, 50蚊請另 一個research professor，香港嘅大學都會請兩個research professors。佢理得啲學生有無得到好嘅教學呀，最緊要跑到數。咁亦解釋到，點解啲 professor 教得差過學生自學，大學都唔會炒左個professor。
　
求學不是求分數，但高等學府都做唔到.....佢哋都跑緊數，罪魁禍首當然係個大學政策傾向追求大學排名.....
大學排名係最可以measure 到嘅指標，最可以show off 嘅statistics，所以你明白，咩叫做野最緊要俾人睇到你有做野，你做野但無人睇到，點算成功？無野show off 俾人睇，點R funding？
　
最近聽到一個肢解案，香港大學要將數學系同物理系肢解.....
原因都好明顯，佢哋條數唔好睇，你得個幾丁人畢業，一個學期又要投資resources 喺咁少人嘅學系身上。咪好似瀨尿牛丸咁，將啲學系溝埋一齊囉......
　
今日大家聽到一個駭人聽聞嘅消息，大家傳緊陳美齡受到到林鄭月娥嘅邀請出任教育局局長.....我即時就諗起，又搵個跑數嘅top sales 搞教育.....
好多人指出陳美齡嘅政治立場親中，又嫁畀一個日籍老公，質疑佢嘅政治同外交立場矛盾。退一萬步，唔講佢嘅政治立場，只講佢對教學以及教育發展嘅認識。佢根本無做過任何教育決策發展嘅工作，「無做過唔等於做唔到嘅」....香港有咁多人唔用，要請個外傭？
　
「佢啲 仔都唔喺香港接受教育，佢識咩呀佢....」
「所有三司高官仔女都唔喺香港讀書架啦...」
　
的確，佢唔一定要感同身受先有資格做好香港教育。我對佢政治立場唔comment，對佢工作經驗唔comment，我只係對佢人格作出質疑.....
　
一個家長要幾怪獸？先會出本書，同人分享佢用50 個方法，令到佢3個仔讀史丹福大學？我唔識佢，我都feel 到佢見到朋友咩都唔講，甚至唔講hello，都要提一提佢有3個仔讀史丹福。
　
香港嘅教育制度，就係俾人批評成日追求主流同精英主義，教育出路單向，一味追求入名校，逼到班細路上絕路。然後仲要搵個終極怪獸家長做教育局局長，我真係聽到都心寒。
　
陳美齡作為一個怪獸家長，真係勝利者，但你想像下，佢3個仔走上史丹福大學呢條路，個3個仔身邊係有幾多追唔上主流精英教學嘅同學仔陪跑.....然後你聽到陳美齡嘅回應，真係心寒到成個夏天都唔使開冷氣，佢話「我喺任何崗位都願意。希望帶一陣新風進入香港教育。」，你真係頂佢唔順，你想跑數，proud of 自己過往戰績良好，想再證明自己，問題係我哋唔想呀嘛，唔好咁一廂情願啦。同埋佢咁答，係證明左應該真係有人同佢傾過呢個計劃。
　
請佢返來，係唔係想追高入讀外國知名大學數字條數？好嘅教育制度根本唔係用數字來prove，「數得出」嘅教學成就，有幾叻？我最怕係，追左另一條數，自殺靚仔個條數....