#十年磨一劍 #蝴蝶效應 #長文 十年磨一劍，由我2012年初開始打DSE歷史科筆記已經走入第10個年頭，不知不覺，亦都累計製作左超過8000頁，回想起，呢個數字真係唔簡單。相比起其他導師，我更執著於筆記，因為我知道如果我一旦消失，所遺留下來嘅就只有筆記，一套記錄我過去嘅筆記，一套記錄著我十年間同學生一齊奮鬥嘅史記，我希望利用呢套筆記讓歷史記住我嘅名字。所以我每年都好積極去打Notes，除左D實用性唔高嘅內容，基本上應該要打嘅都打完，直至近年只係每年新增past paper範文同tip題內容。當然，呢個方向亦都會係我往後主攻更新嘅範疇，除此以外，我希望我手傷康復後可以完成我係歷史科裡面最重要嘅一本著作，一本具有劃時代意義嘅著作。 成套筆記除左花費左我9年時間同心血外，花費更加高達20幾萬。中文版筆記內容全部都由我親自撰寫，除past paper外，所有題目都係我制定，絕不假手他人。但係英文版就聘請專人翻譯以確保譯本質素，去到近年，一題完整DBQ同Essay嘅翻譯費用就高達$750同$450(仲未計算約10%嘅bonus)。至於考卷集裡面多達60份嘅5**考卷就係以每份高達$500-$600嘅價錢(獎學金另計)向5**門生收購，單純考卷集嘅成本亦都已經超過3萬蚊。 幾千頁嘅筆記伴隨住嘅亦都係龐大嘅製作成本，之前都有同學問我點解唔將套筆記拎去賣？單純賣筆記都可以賺到唔少錢。但係對於我而言，如果呢套筆記單純變得商業性質，咁樣就會扼殺左流通性，令到我唔能夠實現學術革命嘅夢想，而呢個夢想絕對唔可以以金錢去衡量。而且，近2年我一直都思考一樣事情 —— 蝴蝶效應。每個人嘅力量雖然可能係好微小，但係小小嘅力量或者可以帶來巨大的改變。10年前，我只係以好平嘅價錢幫一個重考生補習，令到佢以新修歷史科取得B grade嘅成績入讀到港大哲學系，令到佢嘅命運隨之然發生改變，甚至乎往後影響著香港思想運動嘅發展。我成日係到諗，如果我同佢無相遇，世界會係點？如果佢無選擇新修歷史科，結果又會係點？如果佢拎唔到B，入唔到港大哲學系，故事又會係點？諗左好多好多，但係卻又好似我上堂成日講咁，歷史從來都無如果，過去已成歷史，歷史就係過左去嘅現實。 正正因為我知道任何一股微小力量都不容小覷，隨意輕拍一下翅膀都可能導致未知嘅將來席捲起一場龍捲風，所以我更加希望利用我嘅力量去改變更多人嘅態度、思維、成績、升學等等，從而改變命運，哪怕100個免費用我Notes嘅學生裡面，只要改變到1個便已足矣，就已經令我嘅心血結晶值回票價。係黑暗嘅時代，我更加希望自己可以成為某人心中嘅一點光，只要意志不滅，星星之火終可燎原，歷史上每一件大事都係從小事而起，每一件小事都有舉足輕重嘅意義，即使是一頂綠帽亦絕不容輕視。 #革命顛覆所有 #5000頁筆記放送計劃 #星星之火可以燎原