［股票101］技術文：匯豐除凈咗唔派息，點算？

多圖，睇medium 版較好。其實出得medium 版嘅都係咁

0. 其實係好入門嘅問題，但我發現原來好多人都冇答案，甚至畀啲錯嘅答案。我都有啲擔心我下面嘅嘢會錯，但過去十幾年其實我諗過好多次（！），所以應該唔會好錯。但真係錯嘅，請諒。可能有啲人又恥笑，嘩頂CFA喎Head of Research喎大行分析員喎財演喎KOL喎大文豪喎咁嘅嘢都唔識。但肯認自己唔肯定，好過扮晒嘢以為乜都識。希望冇錯。

1. 完全101文，我FB寫過兩篇文講匯控減派息
(https://bit.ly/2R2thvl ) (https://bit.ly/3bEMpr6) 。但由零開始呢度睇都OK。個源起係匯控（5）忽然彈弓手，在英國政府使橫手嘅壓力下，今年（2020）唔會派息。有人話政府只係「建議」，我覺得呢啲友好啱去做公務員。你睇返原文講銀行唔自己識做政府就會用監管權力，即係同個賊拎住把刀叫你除衫咁，你「自願」的。唔止，得意在，連舊年（2019）最後一期息都叫停！宣佈埋！除埋凈！都要停。呢下先夠正。下面會詳細解

2. 英國政府呀，肺炎疫情呀，環球銀行監管呀之類，呢篇文唔講。呢度只係集中講小股東最關心嘅問題，亦係呢兩日我見好多人問嘅問題。

3. 問題一：咁都得？合唔合法？答案好簡單，當然係咁都得。公司隨時可以唔股派息。股票從來冇保證過任何嘢，保證一定派息唔派你可以告佢清佢盤嘅係債券。況且，今次仲要係公司想派（應該係），但英國政府使橫手。咁你問英國政府咁做合唔合法？可唔可以告佢？相信係可以的，法治社會嘛—你隨時可以告，不過我相信勝訴機會唔大。而反正匯控啲大股東，一係就嘅貝萊德，即係一堆ETF，咁貝萊德WFC正路唔會同你告。另一就係大陸佬（係喎），平保。咁平保去告你咪只會覺得大陸佬野蠻。所以簡單嚟講，完全合法，冇得告。長大啦香港人，邊個話你知股息一定要派？（至於其實點解股票派唔派息會影響股價，就睇FB文）

4. 然後去到今篇文想講嘅問題。點解舊年嘅息都可以叫停？宣佈咗架啦喎。首先答點解。答案係，點解唔得？宣佈咗，但錢未到你手嘛。一日未到你手嘅錢就唔係你嘅。所以記住出花紅見到舊錢落咗你戶口先好交信話「仆街，大爺我而家唔撚撈啦，而家係我炒你，哈！」。以前有畸屎（當然唔係我）係花紅出支票，都未過數，只係見到個available balance，就有人走去即時炒老細魷魚。結果花紅都畀人截停埋。唔好做啲咁嘅低能嘢。再保險啲，出咗花紅記住提咗出嚟先，或者轉去第個戶口，轉去條女度更佳。

5. 呢度就要講下股票派息101。其實唔難，用恒生做例子。你見舊年業績當然係今年出，2月18。然後佢宣佈派息一股4蚊，去到3月20號你就會收到。相當簡單係咪？比較煩係中間嗰兩個東西

6. 呢度嘅問題嚟啦，留意全世界都係咁上下玩法，非上市公司其實都差不多。就係有一個「截數日」。某某日子或之前，你係股東，你就entitle呢個派息。某某日子後，你就冇。不難明係咪？

7. 所以就有所謂嘅「除凈日/除息日/除權日」。三樣嘢同一個概念，但公司唔止可以派息，可以係派豬肉，或者派其他公司嘅股票（分拆上市的話），或者派非上市嘅股票，咩都有。原則一樣。就係一個cut off date，埋舟日

8. 你見到恒生個表有兩個日子，一個係「除凈／生效日」（就叫除凈日），一個係「截止過戶日」。呢啲就香港嘅產物，聰明嘅你見到實係隔兩日，因為有T+2過戶日，好多地方係冇的。但問題不大，作為小股東你只係留意個「除凈／生效日」就得。

9. 總之記住，除凈日之前（冇個或字，唔好煩）買嘅，有息收。除凈日或之後（有個或字）買嘅，冇息收。

10. 咁就出現一個少少嘅問題。有冇睇《忒修斯之船》？我冇。但我知個題點嚟。忒修斯之船係出名嘅哲學兩難，你架船一路換零件換嘢，去到一日根本所有嘢都換晒，咁仲係咪最初同一隻船？唔係的話，幾時開始唔係？係嘅話，咁咩係「原本隻船」？換咗一粒釘又係咪「原本隻船」？即係你條女話你變晒，唔係以前嘅你。咁但呢刻嘅你同三分鐘之前屙完屎嘅你，係咪同一個你？

11. 同樣道理，除凈前嘅公司，同除凈後嘅，其實都係兩間公司。「即係女都有時婚前婚後兩個人咁」（OK，仔都會咁）。之前買嘅，係「有幾蚊收嘅恒生」，之後買嘅，係「冇幾蚊收嘅恒生」，咁你話同唔同價？

12. 再講實際啲，假想實驗，我當恒生忽然發神經派50蚊特別息。咁一樣除凈。咁我之前買，同之後買，爭好遠喎大佬。但，我係咪要望實幾時除凈？理論上係投資者嘅責任，但實際上會世界大亂，總有啲盲毛買完都唔知，「下原來冇息收搞撚錯呀賠錢？」。OK其實都唔一定係盲毛，基金經理都可能睇漏啦。

13. 嚟啦喎，重點。所以，為免大家混亂，交易所就整咗「除凈」呢樣嘢。記住，重覆多次，為免混亂，交易所整咗「除凈」呢樣嘢，好artificial的！明呢句，你就明晒。

14. 換句話講，冇除凈呢個過程得得？當然係得的。我有得你班友任trade一樣得 ，但到時好亂喎，用恒生派50蚊特別息嘅例子，我買咗但都唔知自己冇份

15. 所以，交易所就會在除凈日，做一樣嘢，叫做「除凈」。記住，除凈日同除凈係兩樣嘢，正如馬超同司馬昭都係兩樣嘢。

16. 好簡單嘅諗法：私人公司唔可以派息？當然可以。咁會唔會有除凈日？當然都會，邊日邊日你在股東名冊咪得。但使唔使特登搞「除凈」？應該唔使，去樂口福食餐飯咪得。

17. 實務上做法，交易所就會將你隻股票，自動減咗個派息銀碼，第二朝開市就冇咗一截。一般交易所都係咁做。仲有啲奇難雜症，供股呀，一百合一呀，一拆三呀，派實物呀，都有式計 (https://bit.ly/2JyKGHW)。鍾意自己慢慢睇，但我勸你唔好。雖然只係CFA基本嘢，「但個撚個質疑埃汾唔識嘢而佢識」

18. 即係話，假想實驗恒生為例，除凈日之前股價可能係130蚊。我當佢派50蚊特別息。第二朝你會見到個開市價係80蚊，同埋會顯示除咗凈。咁即係之前嗰日15:59分 (咪撚拗四點後呀下)，你買嘅係130蚊嘅恒生附加之後收50蚊嘅權利，第二日，你可以平買恒生，80蚊買到，但冇咗收50蚊嘅權利．All else equal，就等價嘅。所以亦唔存在啲人問，「邊日買之前好」，根本一樣（嚴格嚟講收息仲要畀券商抽佣添）。但當然可能隔晚有咩大消息，或者你可以計「佢大半年先派50蚊我咪蝕息（其實係，而國企有啲真係搞半年）」，或者，今次，不幸地，「佢彈弓手我咪仆街」 （＊）

19. 但，再四再五強調。都話，除凈價只係display，只係參考，artificial。實際上係咩影響都冇，亦根本唔存在「有人扣咗我50蚊」。開市價係乜？只係指引。虛嘅。你鍾意你咪130蚊去買！實際上冇人偷咗你啲錢，而交易所就算出錯，唔記得扣，扣多扣少，理論上市場總有聰明人發現，然後市場力量會改正，但當然咁會對散戶好困擾

20. 所以再六再七講，根本就可以唔使有除凈呢回事。本來無一物。只係為咗唔好亂，但冇咗一樣生存到。正如我一拆十都可以唔改，但你又會好亂咁解。仲未明嘅，由頭睇多次篇文

21. 明之後，「就明晒啦」。既然除凈本係無一物，根本亦不存在「蝕咗」，亦不存在要「加返畀你」。

22. 當然你初步問我，其實公司宣佈咗，除埋凈，咁但而家彈弓手。交易所係咪可以反除凈，加返上去？我估理論上係得的。問題係我比較相信存在即合理，冇呢樣嘢，就可能有啲技術問題。同埋可能會畀人濫用。我啲細價股咪可以係咁玩呢個機制，彈出彈入，好似張耀揚開槍射黎姿咁（唔知做乜諗到呢個畫面），鍾意又宣佈下派，之後又話取消，股價玩上玩落？

23. 所以，答案係，根本除凈只係幻象一場，你冇蝕過，亦唔存在有人要補返畀你。交易所個除凈價根本不能enforce 任何嘢，亦都冇人在嗰啲位迫你買或賣。換個比喻。我渣隻騰訊，聽日有人報價1蚊買，我咪唔理佢咯。你去賣畀佢你自己低能啫。咁同樣地，聽日有人1000蚊賣匯控畀我，我一樣可以唔理佢，幻覺嚟咋，你冇贏輸過

24. 當然類似嘅東西唔止出現過一次。我記得以前都有公司試過咁，不過冇咁多人關心。你諗下如果係派其他股票，或者係未上市嘅，或者我畀你優先認購我拆出嚟隻新股嘅，就仲煩。根本冇數得計，自己估舊嘢值幾錢

25. 仲有相似嘅情況，大家都有聽過有啲公司係分拆上市的，但唔集資，亦唔係阿里巴巴咁第二度上市回歸。總之我就有隻嘢分拆出嚟，例如利亞（831 ）分拆聖安娜出嚟上市，或者小企鵝實業（我台灣間公司，已死）分拆小企鵝民宿咁。咁新股就話有定價啫，第二上市嘅阿里巴巴都有個美股參考價啫，如果就咁掟出嚟唔定價，咁個"開市價"係乜？係冇的，自由龍，任玩。但有何問題？

26. 結論：的確，如果有「反除凈」呢個安排，理論上港交所可以幫你mark 返上去—但係咪有幫助？玄啲講（自己領略下），你根本分唔到第二日嘅股價變動，有幾多係因為除凈，有幾多係因為唔派息，有幾多係因為「反除凈」。如果你覺得有人屈走你嗰幾蚊，咁你係咪應該買多啲？錯價是你的機會嘛。

27. 仲有個好得意嘅問題。恒生個圖我貼多次，加埋匯控個圖。心水清嘅就會見問題：做乜兩間公司同一日出業績（個宣佈日期有啲煩，唔解，但同一日出業績的），又好似差唔多時間除凈（其實匯控仲要早啲）。但，恒生就3月20錢已收！匯控就拖到4月14（圖已冇咗，但原本係咁寫）？？？你早早快手派咗錢，財到我手，咪唔會畀英國政府搞到。

28. 答案係，我都唔肯定。但的確係，如果早早派咗息，英國政府應該不可能在你戶口拎返錢，公司亦不能，「最多供股」。所以錢梗係快到自己手好。但控制唔到。點解恒生咁快匯控咁耐？我都唔肯定，你可以問返兩間公司，或者問熟嘅人。但可能係英國法規唔同，可能係股東太多，亦可能只係公司啲鬼慢手腳，或者係公司遲下派息就賺多幾日息。

29. 你睇大陸公司，建行，3月尾出業績宣佈派息，7月頭先除淨，8月先派畀你都仲得。更加正嘅係，供股佢就快快手！個幾兩個月搞掂。其實人之常情，即係你個保險經紀，叫你簽單時你半夜都搵到佢，巴利（？）咁滿場飛，到你要claim 單時就耶耶托尼咁步伐沉重搵極唔見了。正如未上床前啲男仔就隨傳隨到晚晚傾電話都唔煩，上完床後就好快眼訓好易累。係咁架啦。

30. 真係結論：宣佈埋派息除咗淨都可以唔派？梗係可以，有冇英國政府介入都可以，亦有發生過。咁除咗凈點算？答案係冇乜點算。你根本冇蝕過任何嘢，只係你嘅妄念。我屋企隻勞蘇都識講，「菩提本無樹，明鏡亦非台，本來無一物，何處惹塵埃。」。除淨非必要，亦冇扣你錢，本來冇蝕過，唔知嘈乜撚。

31. 最後 ，唔知有冇人發現。原來咁多年我都寫錯打錯除凈個凈字，係三點水的淨。下次改返。

32. 應該冇乜人未做。但真係未like FB Page嘅，去啦。講感情唔使畀錢咩。

（＊）呢段edit過，之前係錯的，冇改，但因為都唔少人睇完發現唔明，甚至問返些牙嘅人，所以改返。不便之處請諒

【龔成問答信箱】（Q13021-Q13040）

Q13021：

老師，我係你學生，我現在比較集中看354的財務報表。

雖然當中也有很多看不懂的地方，但就我分析，儘管中美貿戰影響華為大概1年，354在2019上半年的業績還是錄得15%增長，似乎華為本身的影響未轉移到對中軟的影響。

假如下半年保持同樣業績，2019全年比2018還是有增長，而且現價似乎非常折讓。

請問我的分析是否正確？抑或我遺漏了其他重要的地方？我對自己的信心不大

龔成老師：

中國軟件國際（0354）的本質不差的，從財務報表可見，佢的確無受華為事件的影響，但我地在年報裡得知，華為的確是佢的大客戶。

因此，我地要再折解當中的關係，當華為受影響時，對佢來說，是沒有影響，還是影響未出現？

所以我地要好仔細分析企業的業務情況與發展，暫時睇，如果華為自身面對的問題，只是中短期，對佢影響仍未到好大，但如果華為自身面對長遠問題，就無可避免地，要將一些成本減少，甚至要改變當中的部分經營模式。

就現時的情況，華為有部分業務，的確有較為長遠的影響，這些影響會產生鏈鎖效應，對中軟都有影響，因此，可以推論對中軟有部分影響。

所以，我地可以分析出，中軟會因而受影響，但我地從財務報表睇，佢本質仍是好強的，這反映這企業就算被影響，也不會因此而質素轉差，只是增長力會受而拉低。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13022：

睇完你既書之後我在想，我幾時可以發掘一隻10倍股

點解巴菲特可以在比亞迪仍未有人識既時間已經注左咁多資金落去

龔成老師：

投資潛力股是高技項的動作，就算在我的股票班，潛力股都要放在第8堂先會教，因為如果無之前的知識基礎，要尋找潛力股根本無可能。

之前我要教學生「系統選股3步曲」、幾種的企業估值方法，捕捉大市冷熱等技巧，企業優質度的評價與分析，要學生懂得填一份6頁的「企業評估表」，有充足的能力去分析企業，先可以到第8堂的潛力股部分。

因為潛力股往往有危有機，業務的不確定性大，如果無分析企業的能力，投資好多時都會出問題，所以，應該由知識開始。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13023：

老師，我上完你堂，想問白銀問題
上年9月買了3公斤
每公斤大約用了$4000
現在升至每公斤大約$5000
還應該繼續買嗎？

現時擁有的3公斤白銀
約佔所有資產的1-2%

龔成老師：

記住，白銀的策略是只入不出，同時，我會建議你同時持有黃金、白銀。

你可以去到佔總財富3%，之後，當你的財富上升時，你就按比例增持，咁就得。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13024：

老師，本人已閱讀了龔成老師出的80後三百萬富翁、50值博，對比每月供股，個人喜歡等㡳價或合理價購入

本人20歲 資金有限 比較喜歡平穩增值股已持有2388、2638、01、1128 共$12萬多
每次購買都會以$3萬左右購買

想了解應該先建立自己的組合股還是先集中增加其中股數？

因為老師你經常提到的2800、12、1928 我還未購入
而且老師可否講說自己的組合股大約應該是多少隻股和平均每隻股要達到多少股（價值） 還是就個人能力和目標以決定？

龔成老師：

以一個$100萬以下的組合來說，持有5-10隻股票（都要優質股），較適合。

所以，你可以增加盈富（2800）、恆基（0012），然後再平均地增加各股票。

你唔需要計「幾多股」，反而要計「佔股票組合的比例」，盈富佔比較多，其他則按優質度分配，但同一行業、同一股，佔的比例不能過多。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13025：

你上望1177幾高?

龔成老師：

其實我一向都不預測目標價，但只可以話佢$10以上開始有少少貴，這是我過往一直都有講的。

所以，如果$10以上買，只能小注、月供。我相信佢長遠有增長力的，佢仍處於一個不錯的增長力，但就要留意股價都幾波動。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13026：

龔成老師，我一個月會月供6000
想問一下 如果本新有月供開4000盈富同2000港鐵
如果仲想選多一隻供2000元。

12恆基 16新鴻基定1038長江基建 三隻中邊一隻比較值得中長線投資定係會有更好選擇？

龔成老師：

你原本供的，都是優質股，基本上可以保持月供，只要長期進行就得。

如果想加多一隻，你可以考慮恆基（0012），我相信這是質素較好，同時又較有增長潛力的股票，加上現價合理，你長期月供不差的。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13027：

龔sir, 你好。

我近期研究緊收息股，我發現有一隻 3322 永嘉集團 都幾好息，但你嘅50隻收息股又無建議。

雖然上年份annual report 數據好過早幾年，但我見佢年報個負債仍然都唔少，究竟作為收息股買唔買得過？

龔成老師：

永嘉集團（3322）質素一般，所以唔值得推介。

收息股要有持續的股息，就一定要有穩定的業務，以及穩定的現金流，但這股現金流只是一般，同時盈利波動，無法符合「穩健收息股」的條件。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13028：

如果新手，睇你邊本書會易起手？

因為本人27歲，之前經常炒買但多損手爛腳，想開始穩定投資。

本人有五手匯豐平均價67蚊，手上有70萬資金，不如如何投資？

龔成老師：

《股票勝經》、《80後百萬富翁》。

每個人都要經過學習，先懂得投資，最重要是知道自己的不足，努力去學、進步。

匯豐（0005）雖然仍有質素，但已經比過往年代弱左，同埋佢增長力已不及過往年代，所以，只是一隻收息股，不要對股價有太大期望。

另外，以你的年齡，收息股。並不是主打的目標。

同時，我地唔應該太集中在單一股票，要建立一個平衡的組合。

你可以善用這$70萬，建立一個平穩組合，平穩增值股，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、港交所（0388）。

另外，以你的年齡，財富仍有一定的增值力，建議你多增加投資知識，在選股、企業估值、投資時機上落功夫，對你長遠財富有好大影響。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13029：

老師，我下年2月會用一筆錢，要賣掉手頭上的支票。
想問我應該幾時沽貨好呢？

之前為了鎖定資金，賣了700, 現價較我沽貨時升了十幾蚊，好掟心呀！

我應該如果佈署接下來要沽的股票呢？
謝謝

龔成老師：

你賣出後股價上升，而你有「唔開心」的感覺，這是不理性的投資表現。散戶經常認為自己能在最高位賣出，但這其實是不能做到，因此，這是正常的事，你不用不開心。

如果你做不到理性的心理狀態，就無法成為成功的投資者。

至於你現時賣出那一隻股，就是質素較差的股，記住，唔好比買入價影響你的決定。

另外，你可以賣出佔你組合比例較多的股，這可以減少你組合的集中風險。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13030：

龔成老師 我最近買左你本50隻優質潛力股， 按照老師你既分析， 我係應該投放較多資金落潛力股到。

然後財富增值， 想問做法係咪先而家買入潛力股，然後等市場過熱， 股票價格> 內在價值 既時候放出去。

如果月供盈富既話係咪一邊收取股息 一邊再利用股息投資？

我仲有一個問題想問既就係雖然月供股票係利用平均成本法拉低成本，但如果月供既時候係處於牛市，會唔會變左係愈供愈貴？

龔成老師：

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

所以，如果你是年輕人，潛力股可佔一半，不過，如果你投資知識不算強，例如連選股、企業估值都未能掌握，潛力股的比例就只可以2、3成。

月供股票是長期進行，最好是5年以上，當中會有牛熊市，雖然牛市有機會令你的買入價上升，但只要供的時期夠長，買入價就能有效平均，將買入風險減少。

當然，如果在牛市第三期，即是狂熱期，你可以減少供的金額，甚至停供，這是可以的，但你一定要有分析大市冷熱程度的技巧。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13031：

老師，你上堂話，低市盈率可能代表倒退，我不明白，為什麼不是高，而是低？

龔成老師：

市盈率的公式：「股價」÷「每股盈利」

你見我地上堂講的股票，不少都在10倍-15倍。

如果有一隻股票的市盈率好低，例如4倍。例如股價$40，每股盈利$10。

這是一個好吸引的價格，但市場為可會出現這個「大特價」？其中一個原因，就是一年的盈利可能會倒退。市場就是明白這點，先會得到4倍這個大特價。

當下年的盈利，下跌至$2，下年的市盈率，就是20倍了，你上年以為好平的價，到下年其實不平的，這就是低市盈率，可能出現的情況。

當然，不代表低市盈率就有一定有這情況，但這只是講，可能有這問題，因此不能一見低市盈率就買入，而要小心分析之後的情況。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13032：

Hellooo 我係你fans

想請問我今年fresh grad 月草兩萬五 想三年內有三百萬 應該點投資呢

龔成老師：

每月儲$25000，3年能儲到的本金就是$90萬，要打上$300萬，要有幾倍的回報先得，這一定是較高風險的，你要自己衡量。

你集中投資潛力股，例如投資3-5隻隻最好是投資市場未發現的潛力股，由於這方法要有較高的技巧，你一定要在選股、企業估值、企業質素評估方法，有一定的水平先得。

同時，你要不斷花時間分析股票，希望比市場早一步找到潛力股，並買入，這就有機會成功。當然，集中潛力股一定會令你風險提高，你要自己衡量。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13033：

Hello你好，留意左你個page年幾 一直都好buy你既諗法
我想問如果我想買金 應該點買呢。去金行買定係買金既期貨？

唔好意思問題可能比較膚淺
我都係岩岩先接觸投資

龔成老師：

黃金、白銀，都是貴金屬，這些都可以作為財富分配的其中一部分，因為供應有限，當中有一定的價值。

但由於沒有現金流，所以，不用投資太多，你可以部分買實金，即是到金舖買，但只要佔總財富1%-3%已得。

如果你睇好中長期的金價走勢，其實可以買少少金etf，與上面的並行進行就得。例如ＳＰＤＲ金ＥＴＦ（2840）。

我會較建議買實金的。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13034：

本人於3.24 買入約20萬股347鞍鋼，請問老師如何看此股

龔成老師：

鞍鋼股份（0347）本質屬中等，但有較受大環境影響。

佢始終這只是商品企業，沒有一些太大的優勢。近年盈利上落較大，難以達到穩定生意與盈利的投資擬標。所以整體的投資價值只是中等。雖然這刻的股息率不差，但下年有機會因盈利回落而略減，要注意翻。

持有這股不是不可，但就不建議持有得太多。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13035：

龔成老師您好，本人係一名家庭主婦，股票新手，現在想用廿萬投資股票，希望6年後能翻倍，請問有可能嗎？
全部用月供股票方法，續少續少供嗎？

還是一，兩年內供晒，滾存落去呢？
可以教教我嗎？

龔成老師：

如果要6年升一倍，每年平均的複息回報約12%，其實都可以做到，但就要多少少技巧。

如果全部月供平穩增值股，平均會得到8%-10%的回報，所以，你最好留翻少少現金，等大跌市時買入，這就會增加你整個組合的回報率。

首先，你可以將$20萬的6、7成的資金，用1、2年時間，每月月供盈富（2800）、銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）等（你要在當中選股）。

另外，你建議你多增加投資知識，在選股、企業估值、投資時機上落功夫，之後就是利用這些知識，去將餘下現金的運用。

這些餘下的現金，就是等大跌市時出手，如果你能在這段時間學好選股等技巧，懂得捕捉買入時機，到大跌市時就能把握機會，財富增值會更明顯。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13036：

龔成老師，最近大市有啲難捉摸 所以由短炒轉攻中長線股票，我早前入左必瘦站（1830）@2.85，覺得呢隻股票值唔值得長渣？

另外仲有隻日清，4蚊買左2手，一直都想加， 依加加會唔會唔係好時機？ 唔該曬！

龔成老師：

其實市況根本好難捉，所以一向都不建議短炒。集中長線持有優質股，是最好的方法。

必瘦站（1830）有質素的，佢生意穩定，同時有平穩增長的情況，電佢盈利都不錯，保持增長。

比較特別的是，佢的派息比率高達100%，每年都是。這反映兩點。

第一，佢有自我成長的能力，不用投資太多的資金，都能令企業成長，這是佢優質的地方。第二，管理層重派息多過企業增值，因為管理層未無太大的發展意慾。

我相信這是不錯的收息股，現時10%的股息，亦很吸引。但市場是公平的，佢股價不太高，先會有10%的股息，而市場點解比佢的股價唔會太高？

這是由於佢的業務，點都會有不確定性，就算過往派息不錯，也未知之後的業務、盈利、派息，你要明白這點。在注碼上，不要太過訓身。你可以持有，長線無問題。

至於日清（1475），有質素的，只是近期升到略貴水平，你有貨可以持有，但最好回少少先加。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13037：

老師你好，我是投資新手，剛好30歲，覺得不得不學習投資，希望將來生活有保障。

我擁有一手匯豐，由於最近社會問題，已將少量港幣轉做美金，另外早年都買落儲蓄保險每月2000，已供完一半年期，餘下大約5萬流動現金可以做投資。

我現在考慮6823 ，435哩類收息股，友邦都係考慮之列，但現在是不是入市時機? 請給我一點意見，謝謝

龔成老師：

匯豐（0005）雖然仍有質素，但增長力過往年代有所減弱，只是收息股，不要對股價有太大期望。而你30歲，其實是財富增長的黃金時期，所以，你應增加投資知識，並投資增長力較強的股票類別。

至於轉美元，其實無必要，港幣有匯聯，無野好擔心。

香港電訊（6823）、陽光（0435）都是不錯的股票，但增長力都不強，你最好小注投資，反而應將餘下資金，投資較有增長力的股，例如最基本的盈富（2800）。而
友邦保險（1299）亦是不錯之選。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13038：

龔成老師，之前看了你兩本關於投資概念的書（50倍升股及300萬富翁），很認同你對財富的觀念，股票是資產，不是數字。

我有內銀及本地銀行股作收息，另有以下持股，但似乎近來企業質素有變，我有些看法，能否指教一下：

178 莎莎：本地因素嚴重影響零售，雖有hktvmall網店，但幫助暫時有限，股價很殘，賺錢能力受旅客下降受影響，我計劃繼續持有，等待零售市道復甦。

6869長飛：受惠5g發展，龍頭級光纖公司，但內地業務競爭激烈，產能過盛，賺錢能力大大下降，中短期未見有見底跡象，計劃賣出。

2018瑞聲：手機設備股，之前熱炒，股價過高，現回到40元左右，屬合理價，但毛利率受壓，增長轉弱，但技術及新業務（Android 部份）可憧景，會繼續持有。

龔成老師：

莎莎（0178），有品牌及銷售網絡，財務數據穩健，對佢長遠不擔心。但中短期一定會弱，但反而是有危有機的時期，只要長線投資就得，不過不建議太大注。

長飛（6869），中短期會有受大的競爭，但行業發展中，加上佢有技術，並不是無優勢的，你可以留小注持有，無問題的，不用全賣。

瑞聲（2018），有質素，但增長力的確比過往年代弱左，持有都可以的，等行業復蘇。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13039：

2018, 522有冇意見提供？

龔成老師：

瑞聲（2018），有質素，但增長力的確比過往年代弱左，持有都可以的，等行業復蘇。

上年手機股熱炒，加上當時有唔少新股上市，這就是過熱的訊號，所以當時是貴。

這刻市場估值回至正常，而這股亦合理，現價可投資，但相信佢中短期都會較弱，要長期先會有收成。

至於ASM PACIFIC（0522），佢多年前已係全球首個為半導體封裝及電子產品生產提供步驟技術和解決方案的設備製造商，包括從半導體封裝材料到後段等。

這企業有一定的增長力，財務數據正面，行業前景正面，因此有投資價值。但從過往的數據可見，業務都有略為波動的情況，始終這類科技行業的變化較大，存有不確定性，分注投資都可以的。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13040：

Hi 我想問384 有股東減持佔總數3%股，洗唔洗降低企業質素。想問友邦便宜價係幾多。

354 2017提及有2026年收入千億目標，2018年就沒有提及，反映主席亂定目標嗎，去年只有105億收入。另外附註中收入有超過一半來自客戶甲，是華為嗎? 是公司故意唔想披露客戶名?

龔成老師︰

中國燃氣（00384）遭股東南韓SK集團旗下SK E&S出售股份，佔總發行股本約3%，套現47億。

我地見到股東減持，可能是不利訊號，但都不一定，因為可能只是大股東需要資金，又或認為當刻較貴，並不代表企業無質素。此股質素上唔見有太大變動，依然有質素，可以長線持有。

友邦保險（1299）有一定的質素，有品牌、有規模，生意雖然做到較大，但仍有增長力，不過就不是高增長，只是平穩增長。

由於保險公司有投資相關收益，所以這亦會令股價略為波動。這股有長線投資價值，很少處於平宜水平，現價就處合理區較上部。如果你有興趣，建議你分注或月供較好。

中國軟件國際(0354)，作為第一個到達人民幣100億位置的軟件服務企業，希望利用「8年時間做到內地首間人民幣1000億」的軟件服務企業。不幸受到早前華為事件影響，雖然影響屬中短期。

但因由未來在中美貿易戰上，尚有很多變數，難免令這個1000億大計受到影響，所以管理層保守點唔再提也無可口非。長期來說，這企業受到的影響未算好大，投資價值還在。

而你所講的客戶甲，就是集團主力戰略合作伙伴「華為」。有些企業基於商業秘密，會唔披露客戶名，避免被對手掌握太多相關資料。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

多謝各位提問，若然你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網的，當然，會將發問者的身份，以及有關個人的部分刪去。

另外，由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

講金又講心

母親節送甚麼俾阿媽，相信是不少子女頭癢的事。今年買了一手中電（002）予母親，原因不外乎每年穩定派息、每年收到四張股息支票，但背後卻想他們知道買到好股票、穩定收息的好處，較傳統的銀行定存、或者高息外幣更具吸引力。

很多父母都有炒股、而經常在電視節目中向財演吐苦水的，亦是年長的長輩，不過炒來炒去，都是垃圾的三四線股。很多時候，長輩買股票，為求有穩定回報，但殊不知買中妖股，股價大跌之餘，股息年年欠奉，過了一段時間要大折讓供股抽水，買中幾次，就對股市心死，到了大時代重臨，又被熾熱氣氛吸引入場再買、然後再中伏。

香港不乏好股票，但更慘是有更多的衰股票，長者認定了買磚頭好過買股，就是緣於成世人，總遇上幾個股渣，守也守唔到。

早一兩個月寫過買藍籌自製年金，有網友嫌月供會有碎股，想知道50隻藍籌的入場費及股息，統計了數據（見大表）。買港股煩的地方，是每隻港股一手股數都有分別，藍籌由一手最少的騰訊（100股）至最多的吉利（5000股），最貴藍籌一手入場費是新地（016），以上周四收市價計，最低消費一手1000股超過11萬，隨後是長江基建（1038）及九倉（004），入場費皆超過6萬元。

至於股王騰訊（700），每手100股約2.5萬元，兩電則大約3至4萬，煤氣（003）約1.6萬元。最低入場費是內銀，中行（3988）四千元有找，工行（1398）亦大約5,000元。

去年每手派息最多藍籌是電能（006），有近4,000元，這是由於有派特別息的因素，新地及長建則分別有3,850元及2,260元，中電則有1,400元，股息皆超過3厘。

幾年前，曾經參加過中電專為股東而設的睇廠活動，「團友」更興奮話，早年曾遇過大老闆米高嘉道理帶隊睇電廠，更難得是帶同子女同行睇電廠運作情況，這是買股收息之外的意外之獲。

股榮