有日一位女士嚟到診所。
佢行埋嚟登記處：「我有啲嘢…」
佢低頭摷手袋，我在等待等待和等待。
佢拎出幾包藥放喺枱面：「呢啲…」
我又等待等待同等待，都仲未等到佢個『啲』字後面有字出。
我：「請問有咩幫到你呀？」
佢：「我想放啲藥俾你…」
WHAT？放定想換藥呀？
其實我唔駛拎起啲藥睇都知啲藥唔係屬於我哋診所，因為包裝完全唔同。
我：「你呢啲藥唔係我哋診所俾你嘅喎，冇得幫你換藥呀，你要去返你睇嘅醫生度搵佢幫你啊。」
佢：「佢同我講呢啲係特效藥，要廿蚊一粒，我十八蚊粒放俾你呀」
平兩蚊多謝晒喎。
我：「唔好意思呀我哋唔駛咁樣買藥呀，藥係由醫生訂返嚟嘅」
佢：「十七蚊粒呀？」
我：「唔係幾錢嘅問題，係我哋真係唔需要買藥」
我低頭做自己嘢，打算由得佢自己企陣冇癮走…
佢繼續企咗喺度。
我：「我哋診所真係唔駛買藥呀，你如果要睇醫生嘅不如俾身分證我，我同你登記呀」
佢：「我讓步十五蚊粒呀？」
唔好讓步啦，直接讓路好冇？門口嗰邊呀～
我：「我已經講得好清楚，我哋唔會買你嘅藥啊，如果冇其他嘢嘅話我都冇嘢幫到你啦，你去搵吓有冇其他人幫到你啦」
佢：「十四蚊？」
頂你個制呀！係咪我左眼見到鬼個肥妹鬼上身呀？
我已經冇氣，都係低頭做返自己嘢…
過咗冇耐，有個叔叔推門入嚟診所，叔叔行埋嚟登記處企咗喺女士後面，佢應該以為要排隊登記。
我望住叔叔講：「係咪睇醫生呀？你有冇覆診卡或者俾身分證我？」
叔叔伸手遞覆診卡埋嚟，女士攔途截劫，女士望住叔叔講：「你係咪要食藥呀？」
女士立即拎起枱面嘅藥：「我有啲醫生俾我嘅特效藥呀，廿蚊粒咋」
我同女士講：「麻煩你唔好咁樣騷擾人啦，你咁樣…」
我都未講完，女士一嘢揸住叔叔碌粗大手臂，心口向手臂方向挨埋去…
叔叔嚇到立即舉高雙手，立即離開診所。
女士跟埋叔叔走，邊走邊講：「你唔舒服要食藥㗎！」
叔叔！你要跑快啲呀！俾隻肥妹鬼上身嘅話，好大鑊㗎！

有日一位先生嚟到診所。
佢行埋嚟登記處同我講：「姑娘，我想同醫生結合呀」
吓？你咁坦白嘅，搞到我紅都面晒啦，我不妨幫你問問醫生願唔願意啦。
正當我想轉身離開入醫生房，佢嗌住我：「你去邊呀？」
我：「我幫你入去問醫生願唔願意同你結合」
佢：「你唔駛拎埋我啲嘢入去問醫生呀？」
交你細佬出嚟。
我：「你有啲咩可以俾我拎俾醫生呀？」
佢喺袋中摷嘢。我好緊張我好期待，拎出嚟見我！
佢拎出三張病假紙…呢個係咩事呀又？
我望望啲病假紙：「呢兩張唔係我哋㗎喎，得呢一張先係我哋嘅」
佢：「係呀，我想醫生結合呀，變一張呀」
…原來你個結合意思係要將啲假寫埋同一張度呀？我仲以為…SORRY。我誤會咗你。
我：「冇得咁樣做㗎，你張張都唔同診所，冇診所會咁樣幫你㗎」
佢：「但係我要結合咗先可以同公司拎四日連假有錢拎返呀」
好簡單啫，兩張膠紙咪搞掂囉。
我：「呢個我哋幫唔到你啦」
佢望住三張病假紙：「你會唔會知另外兩間診所肯唔肯同我結合呀？」
我：「唔肯㗎啦，冇診所會咁做㗎」
佢：「嗰時我嚟睇你又唔講」
我：「嗰時你都冇問」
YEAH！射返個波俾佢。
佢：「咁我而家結合唔成可以點呀？咪冇錢囉？」
我：「今次冇㗎啦，你下次自己留意返啦」
佢：「下次我應該一開始就問醫生肯唔肯同我結合先呀？」
…如果對方係女醫生的話，你可能已經食咗幾拳。
我：「唔係咁樣講呀，應該係問醫生可唔可以寫到四日病假俾你，醫生都要認為你嘅病係需要休息四日先會寫俾你」
佢：「車，我就係知自己唔駛抖四日，驚醫生唔開俾我先分咗幾間睇咋嘛」
咁你自己攞嚟啦。

電話響起～
我：「你好，乜乜診所」
對方係一位女士：「喂？你好，我係乜乜乜（人名）公司嘅，我想問返乜乜乜嘅情況」
我：「唔好意思，任何關於病人情況嘅你自己問返佢本人啦，我唔可以代佢答」
佢：「佢前日交咗張你哋醫生嘅證明書俾我㗎，咁佢就話佢自己有咗嘅，我想了解返點解會有呢張證明書」
人哋真係有咗，嚟過驗孕咪有囉。醫生寫嘅嘢好難理解咩？
我：「你可以睇返你收到嗰張紙，上面應該有寫明嘅」
佢：「咁係咪即係乜乜乜真係有咗呀？定係你哋收咗錢去夾埋佢去做戲？」
我：「我哋醫生係唔會寫任何虛假陳述嘅，如果你有懷疑可以直接報警」
佢：「我想睇返你哋嗰日同佢做檢查嘅嘢，我都好懷疑張證明書嘅內容係假」
係咪即係俾返碌驗孕棒你睇呀？你自己去堆填區摷呀？
我：「唔好意思，任何關於病人嘅嘢，我哋都唔會俾第三者睇。」
佢：「咁即係假㗎啦？你都唔敢拎證據出嚟證明」
我：「阿小姐呀，你懷疑係假嘅話直接報警啦，虛假文書犯法嘅。」
佢：「哈，你連些少證據都唔敢拎出嚟想大我呀？我係全公司最大嘅，我係有權睇㗎」
好大嘅官威呀，不過我診所唔係你公司管嘅，係咪即係可以叫你收返塊皮先呀？你塊皮脫水啦阿姐。
我：「唔好意思小姐，你公司並唔代表我，我診所同你公司應該冇任何關係」

嘟。
佢cut咗我線，做咩呀？塊皮縮到甩咗呀？

逄星期日 四點至五點
叱咤903
扭扭擰擰扭扭擰 - 阿檸

fanpage: https://www.facebook.com/ningningningbbbbb
instagram: ningbbbbb

環節：扭蛋劇場 週日special (視像版)

編劇：阿檸
製作：阿檸
演出：兩房榮 (豪子) 、 四房榮 (阿檸)

故事：
N: 歡迎大家今晚收聽抽居屋直撃呀下，你好呀兩房榮~
H: 你好呀四房榮，我地睇睇今場賽事嘅賽道先啦好冇呀？
N: 好呀~冇得頂呀~今場賽事呢喺樂富舉行啦~係條1000米嘅賽道啦~今次賽道橫誇咗地鐵站啦~巴士站啦~地鐵站啦~巴士站啦~

H: 今場賽事呢因為天雨路滑嘅關係啦~大家喺速度嚟講呢都相當保守架~
N: 亦因為太多參賽者嘅關係，樂富可以企人嘅地方已經全數被佔領啦，示威者可以休息一日嘅。
H: 既然休息就可以喺屋企收聽今場嘅錄音轉播啦~
N: 係架~如果佢地有屋企嘅話~
H: 呀~四房榮~唔好講埋晒啲唔吉利嘅說話啦~
N: 哎~口多口多~

H: 咁多人參加唔知係咪因為大家都覺得今次抽籤比較大機會呢？
N: 未必啦~不過而家唔抽就起碼十年冇機會啦~

H: 同大家留意下各路走勢先啦~
N: 好呀~麻煩晒兩房榮~
H: 我今場呢係比較睇好過四十歲嘅中年參賽者架~
N: 我都係咁話呀~所謂路遙知馬力吖嘛~條人生路行咗一半都未上到樓~都仲頂硬上呀~都睇得出佢地嘅堅持架~
H: 係呀~你睇哩隻「捱咗大半世」，血色就麻麻架啦~不過夠硬淨！
N: 不過都唔好睇小八十後嘅參賽者呀？
H: 係？四房榮你有咩心水先~
N: 我留意咗哩隻好耐啦~「冇樓唔結婚」，「冇樓唔結婚」呢喺頭先巴士站第一個彎位呢，已經同女朋友鬧咗三次交架啦~睇嚟佢今日交唔到表呢~分手都有之呀~

N: 咁講吖兩房榮，其實今日嚟參加得嘅人呢~其實都係豁出去架啦~
H: 哇……真係唔該晒你帶出啲咁有意思嘅資訊比大家知喎~

H: 喂兩房榮，你睇！你捧開嘅「冇樓唔結婚」似乎有啲意外喎……
N: 哇唔係啩~「冇樓唔結婚」代表咗一大班八十後嘅希望架喎~
H: 摷緊公文袋啦……係咪唔記得帶文件呀……
N: 唔係吖~齊呀……唉YA！用咗藍色筆填表呀！冇啦冇啦~

H: 轉個鏡頭睇番「捱咗大半世」啦~
N: 睇過~
H: 胸有成竹咁出番嚟呀~交到表啦！
N: 係喎~
H: 喂你唔凳人開心嘅~
N: 交到表喳嘛~又唔係抽到~冇著數啫~我係佢我就拿拿臨拎張表出去炒啦~

影片來源：TVB.COM

520
曲詞編唱、導演、監製、剪片：烙印
特別鳴謝天公造美、攝影師哥哥

每次我揸起支筆　就好似飲左廿四味
諗唔起　諗唔起　點樣摷返啲靈感出嚟
明明我溫緊中史世史　毛澤東　馬克思
講起呢啲政治　真係好鬼幼稚
個腦出現一堆數字　究竟係邊個賦予呢啲數字一種意義
唔好再同我講歷史　我只係想知
你個短訊裡面打嘅1314　係咪暗藏含意

你嘅「鍾意　鍾意」　打亂我啲思緒
我聽日就要考試喇　算啦　豪畀佢
你話「Baby Baby」　邊個畀你扮Justin Bieber架
但我暗自陶醉
愛情唔係數學　學校唔教考試唔考
講真呀　就算我識得馬克思愛因斯坦
但Professor King Doctor 張　我又應該點揀
你啲達文西摩斯密碼　有時都幾煩

Chorus

你話暗戀咗我好耐　但我哋識得個幾月
愛情呃嚟呃去我明　都唔洗去到咁絕
更何況　我唔係沈佳儀　你又唔係張志明
其實唔係個個都需要CHOK住咁證實愛情
就好似返工都會　遲到　愛情要等　運到
我點名果陣你　報到　有意外都未嘗　唔好
最緊要你對我如珠如寶
我唔介意你為咗我　掘個大啲嘅　地牢

人人都話金錢係數字堆砌出嚟
其實愛情都係　只要你肯花多啲心機
520 1314　你不放下我不放下你
一句到尾　要識得點樣放底自己
講返今次考試　我覺得考試嘅意義
係教我哋點樣做人　而唔係駕馭歷史
今次係我第一次嘅嘗試　畀啲鼓勵支持
畀啲掌聲有請　唔係麥玲玲　係駱胤鳴 

Chorus

呢首歌真係死都唔斷氣呀　不停repeat
你鍾意就keep　唔鍾意就delete
不過愛情唔一樣　幸福唔可以憑空想像
而係創造包容付出　先係宇宙最強

女人對數字嘅敏感度　強到你想像唔到
如果你是旦噏　亂咁嘈　一定死得早
假如你對我真係有意思不如再send個短訊嚟呀
我可能或者maybe會覆你　520 1314

Chorus