【熱到爆偈】

英國壞車小貼士，响公路邊直擊

近幾日英國出現熱浪，有啲地區熱到三十幾度。對於我地呢啲响香港見慣長期三四十度大場面嘅，當然唔算係啲乜，重覺得好舒服添。就係因為咁，一家人就揸車向南海邊Brighton出發，結果就係架車爆偈死火。現在由我呢個無聊駐英記者，坐住拖車响公路直擊分享，英國公路壞車小貼士。

前文就唔多講，總之係架車水箱喉管老化唔知揸兩個幾鐘，重要晒咗五個鐘。回程行咗一半，出晒煙咁啦。港媽同阿女緊係非常慌張啦，之不過我好話唔好聽都係一名濕滑嘅司機，對付呢類粗心大意嘅公路必然係冷靜啲嘅。乜都唔好諗就停埋一邊趕晒啲人衝落車，企埋一邊離條路有咁遠得咁遠。原因並唔只係驚架車爆（做戲咩，邊有咁易吖），而係英國嘅公路係好多好眼瞓嘅貨車司機。外國公路死得最多嘅唔係兩架行緊嘅車，而係撞落去壞車裡面嘅人。我都唔知點解點解，總之係數據。

千其咪洗旨意咁好似香港咁，叫部的士番屋企先，之後慢慢搞。唔係因為錢同路程嘅問題，而係想嗌都未必有，有都等到儍。所以一般人都會幫襯AA或者RAC之類嘅公路支援服務嘅。價錢有平有貴，視乎鐘意支援到咩地步。我本人就揀急救到就救，救唔到就送人拖車番屋企（一百幾十鎊一年）。除非對自己架車同自己（同屋企人）嘅野外求生技能好有信心，呢啲錢係唔應該慳嘅。

好衰唔衰今日係聲稱英國最熱嘅一日，聽依家坐响我隔離個AA師父講，剩係今日佢地公司响全國就接咗萬幾架過熱死火嘅車。好彩都係等咗四十五分鐘（先有人聽電話！），最後車就急救唔到，我依家坐响部巨型拖車上面寫呢個直擊無聊分享。

#凡事向好嗰邊諗
#唔試過點知點算
#呢個換車理由正