【龔成問答信箱】（Q21781-Q21800）

Q21781：

龔sir, 我係你舊生，有關於現金流嘅問題想請教，我偶爾聽到你評論一些公司現金流強，請問現金流強、普通、弱有什麼指標?謝謝你百忙抽空回答

龔成老師：

投資者會分析企業的現金流量表，在年報可以找到的，當中會分為「經營活動」、「投資活動」、「融資活動」3部分，而我地會集中分析經營活動部分。

如果企業的經營活動現金流保持強勁，反映企業憑做生意，持續保到理想現金流，除了反映業務不差外，企業得到大量現金，無論發展，又或派息，都是有利因素。

你預保持年年正數，就是現金流強或普通，而當中的數字大，就是強勁。當然，我地仍有好多因素分析，例如現金流量表的各項目，盈利的情況等。

------------------------------------------------

Q21782：

龔老師你好丫，我係你嘅忠粉，我有問題想請教你的‍

我現時28歲，剛上車一年，地點係粉嶺聯和墟帝庭軒，買入價係550萬。

想問下黎緊幾年個區樓價升幅大唔大？因為我見附近又有新盤開賣。

我想過幾年轉返出沙田或荃灣的地方住。所以先上車再換樓，咁樣做岩唔岩丫

龔成老師：

坦白講，粉嶺聯和墟始終離市區有距離，就算去翻地鐵粉嶺站，都要坐小巴或行一段時間，長遠的升值潛力不算大。

當然，聯和墟有點似一個小鎮，如果工作地點不是市區，從本身的生活配套上，其實不算差，因此不是劣質。

你擁有一個物業，都算是處於「物業追物業」的狀態，不過選擇物業就不是最好類別，但都不是差。現時你物業，可持有的，到你日後，可轉翻出去沙田或荃灣，無論自住定長遠升值能力都會較好。

------------------------------------------------

Q21783：

龔老師你好。我今年已32歲，一直都沒有理財概念，只係被動地儲錢（即係用剩先儲，但我唔買名牌嘅）。

上年好不幸地被裁員，剛剛搵到工，但人工只剛剛夠食住行+俾屋企人藥錢（年頭驗到有事），差唔多無剩。而我亦只是個文員仔，唔望會加人工，就算搵新工都唔會加到好多。

我嘅人生好似入左個死胡同咁，晚晚臨瞓時都眼濕濕，唔知未來點算。

目前儲蓄只有20萬，深明擺係銀行只有慢慢眨值，想請問有什麼資產增值的方法？

龔成老師︰

現時大環境唔係咁理想，就業市場，以至人工收入受到影響，係正常，唔好諗得太負面。大環境我地係改變唔到，但個人心態係可以改變。

你先要了解自己未來工作發展目標，講緊係長線，10年以上。

再睇翻，現時工作，可唔可以幫你達成目標。如果唔得，那這份工作，純粹只過渡性。你就要工作之餘，努力為你目標工作做準備。

學習相門知識、上相關課程、或者做有關兼職。目標係當市道轉好時，這些經驗可以增加你成功就職理想工作的勝算。

至於財富增值方面，你要一改以往金錢觀念。想做到理想財富增值效果，每月我地係先要儲起一筆錢投資，到真係有錢剩，才作休閒消費，概念是跟你以往係倒轉。

我建議你有時間的話，可以找些增加收入方法，例如兼職、網上小生意等，目的係每月可以開始空出一定資金，作投資增值。

以你32歲，可以選擇一些「平穩增值股」+「潛力股」作投資目標。

到你每月可儲到錢時，你可以每月先用一半儲蓄做月供股票，另一半就先儲起架策略。

由於你投資知識不高，因此可較集中在平穩增長類股，至於潛力股，只宜小小注。此期間，你最好是努力提高投資知識，才慢慢增加翻潛力股比例。

餘下現金就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

至於20萬，我建議你扣起半年開支和屋企人藥錢。有剩的一半，你可以分注買入上述股票，餘下同樣等大跌市機會。

------------------------------------------------

Q21784：

龔sir你好，我今年年初開始接觸到你呢個Facebook page，好有啟發，慢慢開始改正我投資觀念，仲一次過買左你幾本書希望增加投資知識。

有兩個問題想請教你：

1）未認識你呢個網之前只係靠屋企人一d介紹買入一d股票，所以唔識睇“平貴”同優質程度去揀同買，宜家手上股票組合需要慢慢調整，

其中手上持有696呢隻股票，而且係組合入面都佔左幾多（大概20萬入面嘅5萬）。我睇過你嘅書知道呢隻股票有佢嘅獨特性，但我當時2-3年前嘅平均買入為$21-22，

宜家佢股價一路都上唔返去。我因為某d原因暫時唔可以再投入額外新資金去買股票，可以動用黎買嘅現金只有萬五左右。如果我得戶口入面個二十萬黎增值財富，

咁我應該繼續放係度繼續等待定先賣出部份黎增加現金同買其他股票增值？

2）另外，你係書度提過可以留意係生活之中自己喜歡嘅野同埋身邊嘅潮流黎發掘潛力/優質股。最近香港人都係度談論Viutv/mirror/error，

我都係一份子。請問龔sir點睇電盈前景？我睇過佢地係電視業務之前都仲蝕錢，但已經慢慢開始有改善，如果佢地咁嘅走勢，

會唔會有潛力突破到一直以來嘅“穩定”？
先謝謝你！

龔成老師︰

1) 中國民航信息網絡（0696）係資訊服務及網絡管理解決方案商，目標市場為中國航空客運及旅遊行業。

例如電子旅遊分銷系統、機場旅客處理系統等，過往業務穩定，有長線投資價值，不過不是高增長類。

你買入價有少少貴，但又唔係好貴，可以守。若你係年青至中年人士，這股適合，照持有就可以。但由於佢佔你組合較重比例(個股應維持少於組合15%)，我建議你都部份，換至其他優質股，咁會較好。

記住，我地投資股票，就等同你投資緊一間企業，一盤生意。你必需了解佢業務、賺錢能力、行業發展、財務狀況等，才去做決定。

如果你而一刻投資經驗較淺，不懂定平貴。你可以用分注或者月供模式去儲貨，去平衡買貴貨架風險。

現時大市只在合理區，你餘下5萬蚊就先儲起，等大跌市才出手。

2) 生活選股法，係其中一個選股模式。因為這些企業和你生活息息相關，所以你較易了解佢當中營運模式和優勢。

但這只是初級，之後我地就要進一步審視佢本質、行業未來發展、財務狀況等等，才可以決定，是否一間值得投資的企業。

電盈（0008）雖然業務算穩定，但由於負債較多，都有一定風險。

VIU TV最近的確發展不錯，但當你再仔細分析佢年報。你會發現媒體部份，其實佔佢收入比重不高。

因此，就算佢有較理想發展，當整個集團盈利幫助，唔會好大。

這股作為收息股，可以，但增長力不強，若你較年輕，就不宜持有太多。同時負債多有風險，不建議大手投資。現價合理的。

雖然這隻算不上係優質股，但你這個思考模式係正確。只要你再努力學習更具體的投資知識，和累積經驗，相信你長線會有唔錯成績。

------------------------------------------------

Q21785：

龔成老師你好，一家準備移民到英國生活，賣出香港物業後可預計套現800萬。

準備到當地買一層$200~300樓自住，其餘想投資賺取生活費，因為未必會在當地工作，所以需要現金流。

請問：用50%~70%資金買英國樓收租，其餘買收息股好唔好？

如果買收息股，應該係買英國股？還是買港股比較好？

因為對英國股票唔熟悉，只有留意港股，阿sir有無英國收息股推薦？

我見阿sir話個組合要平衡，同一股不能太多，咁一般收息組合應該買幾多隻股票？

(好難搵到太多唔同行業又有6%以上既收息股）例如3988 1398 939 都係銀行業

多謝阿sir解答

龔成老師︰

買入自住物業後，用50%~70%資金買英國樓收租，其餘買收息股架策略，係可以。

但你投資英國樓時，緊記只可以投資一些真正了解的項目，堅守「不認識就不投資」的原則。

確保自已真的已了解當地的物業市場、租務市場、法例、經濟發展。而物業有潛力，租金回報率又理想，咁就可以。

另外，唔好用晒全數資金去投資，要保留一部份現金在手，大約半年開支左右(你可自己按情況調整)，以備不時之需。

至於收息股，其實你買美股、英股、港股都係無問題。你只要睇翻你自己的認識程度、交易成本、稅務成本等，去做決定就可以。

我自己主力研究港股，所以比你建議，都會集中係港股。由於現市大市只係合理區，有不少優質收息股，都無6%咁高。

但我地唔會知，未段一段時間，佢地會唔會回到6%以上。所以，我地只可以策略性地，因應平貴，係現階段先入小注入貨。每有回調，再慢慢加注。

但正如你所講，係配置股票組合時，唔好太集中某行業，以免出現過度集中性風險。相同行業不可佔組合多於30%，而單一企業不要高過15%。

特別要留意係銀行業，佢營運模式較特別，風險會比一般行業為高。必需堅守30%這個準則，如果可控制在20%以內，會更好。

收息股︰港燈（2638）、香港電訊（6823）、恆生（0011）、工行（1398）、置富（0778）、陽光（0435）、深高速（0548）等，大多有5%股息

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

（你可睇下《50穩健收息股》當中仲有好多）。

最後，你要留意英國係收取股息時，係會抽稅。係計算你實際現金流時，你注意這點，以免高估左實際股息回報。詳細計算方法，建議你上官方網頁，或者向當地稅務顧問查詢。

------------------------------------------------

Q21786：

你好，龔成老師，我今年34歲，獨女，屋企供滿左層居屋市值大概480萬，月入4萬，之前因為種種原因幾乎沒有儲蓄。現時有5萬現金，MPF 30萬，

黎緊每月可以儲1.5萬

1. 希望可以55歲退休，想之後每月有最少2萬現金流，請問我應該可以點步署？

2. 屋企人曾經提出以現有單位再買私樓，但居屋原來不能再按，所以唯一方法就係賣出現有單位再另外買私樓，請問長遠計係咪私樓會保值啲？

老師有冇建議我可以點做？點樣安排會好啲？
多謝龔成老師

龔成老師︰

1) 如果你希望55歲退休時，每月有2萬蚊現金流，以股息率6%計，你需要本金400萬。

你可以用「平穏增長股」 + 「潛力股」的組合，去累積這筆資金。現在你每月先用5成儲蓄，即$7500做月供。其餘先儲起，用一邊月供一邊儲蓄的策略。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

2) 居屋雖然投資價值，一般都遜於私樓，但好處係投入資金較少。可以用空出資金，作其他投資之用。

由於你這間是自住屋，是否配合你長線生活需要，會比佢保值能力更重要。除非你現時自住樓，真係好唔理想，配合唔倒你長線生活要求。否則，我唔建議你沽出。

若你想投資物業，你可以先用優質股增值，到一定金額才買物業投資。

------------------------------------------------

Q21787：

早晨龔sir,我除左月供apple外，頌可以月供咩股票可以做到五年連本賺200萬，月供資金有1萬蚊其實有無咁既機會？

現持有9988兩手、823四手、6618兩手、966三手、BIDU 8手，Apple 26股、JD京東20股,Qcom 21股 美股都係依兩星期內先入手

現持有股票還可行？

龔成老師：

你月供apple，可以，佢有質素，無論持術、發展、品牌、銷售網絡都十分強，是可以長線持有的股票。

佢設計了各種各樣的消費電子設備，如智能手機（iPhone）、（iPad）、智慧手錶等。

而iPhone占蘋果總收入的大部分。另外，蘋果亦為客戶提供各種服務，亦是一些延伸的賺錢模式，如蘋果音樂、iCloud、蘋果電視、蘋果支付等。

由於已經發展得好大，因此，最高速增長期已過，之後會進入穩定的增長期。長遠的投資價值仍在，但要留意股價。近年大部分時間在合理區中上部至略貴的水平，如投資要分注，長線。

至於其他股，都可以持有，基本上都是有質素的。

不過，你較多比例集中在科網類別，這會出現集中風險，你要注意翻。

要5年$200萬，$10000月供，仍未足夠的，你要提高金額同時供其他股。另外，每月仍要儲到基本現金，等機會。

選股無問題，但最好平衡翻個組合。同時，在買入時，要慢慢分注，不要一次過買入太過。要同時留現金。

------------------------------------------------

Q21788：

Sir,其實到水桶3楷段買收息股，基本上長期收息，不會常常買出買入，應該選優質的企業的股息越高越好，你常推介的置富和陽光分別5.7%、6.1%

我見3988中國銀行有7.1%更多，反而很少推介是否有問題呢？

龔成老師：

其實最好是建立一個「收息股組合」，因此，幾隻都得，可同時持有。

但我地在分析收息股時，要同時考慮佢業務，因為業務將會影響佢的股價及股息變動，金融業的不確定性以及內銀的風險，比本地的收租企業，前者風險較高。

------------------------------------------------

Q21789：

龔sir。本人48歲，因健康問題已退休，正準備移民往台灣！有幸在半年前朋友介紹而認識你！

購入你的作品，有股票勝經、年報勝經、50穩健收息股、財務自由行及80後百萬富翁！

想請教，我現持有以下股票：

66 有728股 （在IPO時購入一手，持有多年有碎股！）
178 有6000股 （平均價$1.927）
270 有6000股 （平均價$13.773）
435 有1000股 （平均價$3.48）
778 有2000股 （平均價$6.98）

823 有100股 （購入價$69.9）
1398 有1000股 （購入價：$4.94）
1810 有400股 （平均價：$23.35）
2638 有1000股 （平均價：$7.77）
2800 有500股 （購入價$26.62）另開始月供，每月投入$4000

另有3067 有500股（平均價$17.66

我會繼續購入，還有50萬資金！

1.請問龔sir 我是否買得太多問種類股票？

2.需要整合一下嗎？可以如何優化？

3.另我還想購入9988及0285作長線投資！

麻煩你

龔成老師︰

1) 你現時持有種類和數量，算可以。長線計，組合維持10隻左右，會較理想。

2) 從質素上而言，你持股係無問題，可持有。但由於你係退休人士，投資選項時，我地要保守少少。

你應該較集中係「收息股」類別，因為你退休之後係無收入，需要透過「收息股」的現金流，去支援你的生活開支。

因此，你應以「現金流是否充足」作大前題，去考慮你個財富配置。現時你收息股只有陽光(0435)、置富(0778)、工行(1398)和港燈(2638)，唔算太多。

長線計，唔好太集中係幾隻身上，應建立一個平衡的收息組合，包括不同企業和行業，唔好太集中係個別股票。相同行業不可佔組合多於3成，而單一企業不要高過15%。

以下係一些優質收息股，你可以參考下。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

當然，你都可以參考我<50穩健收息股>書中資料。

如果你現有收息股，產出現金流已經係足夠應付你基本生活。你才考慮增持一些「平穏增長股」來增值，好似盈富(2800)、港鐵(0066)、粵海(0270)、領展(0823)、莎莎(0178)等。

否則，「平穏增長股」類持有現貨好了，唔好再加注。

而小米(1810)、安碩恒生科技(3067)這類「潛力股」雖有增長潛力，但波動性太高，唔適合你。現貨可持有，但唔好加注了。

現時大市只在合理區，你可以用多15-20萬，以分注形式入市。餘下的就等大跌市，才用來入貨。

但由於你將會移民台灣，加上你本身身體都有些問題。建議你先預留相關的潛在支出，才開始投資計劃，這樣安排會較為穏當。

3) 阿里(9988)和比亞迪電子(0285)同屬「潛力股」類別，波動性太高，唔建議你投資。

------------------------------------------------

Q21790：

龔成老師你好！本人想請教你有關投資方案 , 本人50歲 , 因市況不景氣, 剛被公司辭退, 待業中 , 家中有兩老需照顧及供養。

本人住公屋, 有積蓄大約25-30萬, 希望老師可以指導如何投資增值, 以維持家庭基本生活.

感激萬分 !! 謝謝 !
本人為基層人士

龔成老師︰

我地做財富增值，係需要因應人生階段、投資經驗、客觀環境等因素，去作出一個配置。

由於你暫時無收入，加上有雙親需要照顧，中短期現金的需求不少。所以我地投資前，先要保障好你生活上無問題，做好防守部份，才考慮進攻。

以你現時情況，我建議你先儲起半年基本開支(包括照顧雙親部份)的應急錢，計好數，真的「閒錢」才開始投資計劃。

你可以用「收息股」作投資目標，雖然佢增長力唔高。但派發的股息，可以為你提供穏定現金流，去減輕生活支出的壓力。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）或收息基金(3110)都可以。

如果你能承受到風險，有些更有超過8%、10%的高息股，但股價就略有風險，要自己衡量，佐丹奴國際（0709）、中石化（0386）、互太紡織（1382）等（記住，股價略波動，只能小注）。

但要留意，現時股價只是合理，未到平宜。因始資金不要用盡，大約先用一半，以分注形式慢慢入貨，餘下等大跌市才動用。

到你將來工作變得穏定，有更多空閒資金可作投資。你就可以加入一些較有增長力的「平穏增長股」，去提升翻個增長力。

但現階段，你應以維持家庭基本生活為主要目標。故先集中係能提供現金流的「收息股」身上，「平穏增長股」就暫時不要考慮。

平穏增長股：金沙（1928）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）、長建（1038）

------------------------------------------------

Q21791：

龔Sir，最近我媽媽退休，有一筆$28萬退休金，現想幫她作投資，想請教一下阿Sir

Plan A
$20萬 股票收息股投資
$5萬 作定期或買Ibond
$3萬作後備資金

收息組合
6823 (15%)
1883 (15%)
778 (15%)
6 (15%)
435 (15%)
1038 (10%)
939 (5%)
1373 (5%)
1398 (5%)

Plan B
$25萬，特選客戶優惠
放5年，每年回$6萬，5年後總共得到$30萬
途中如需提出餘下金錢，則不可再累積任何利息，並需收取3%手續費

龔Sir 對兩個計劃有什麼意見？那個較好？

龔成老師︰

整體而言，PLAN A會係較好。

如果想組合更加平衡，可以加入ＧＸ恒生高股息率ETF（3110），同時減少你部分15%幾隻股的比例，去到10%，會較好。

因為你不少選股，都有相同類別的情況，例如相同是電訊，相同是房託，長建（1038）與電能（0006）關連性都高。

PLAN A以收息股作為主力，再加入風險較低的Ibond作平衡。而且，整體回報都明顯較PLAN B為高。

當然，PLAN B都有佢好處，就係回報係更有保證。因為始終收息股都係股票，會有一定不確定存在。

你可以在風險承受能力和回報之間，取個平衡，去決定用邊個計劃。

------------------------------------------------

Q21792：

成哥，我今年一月碩士畢業，過多幾個月就黎25，一d工作經驗都無。因為讀書讀得太多，現在覺得早我兩年出黎做嘢d人好似都好好。

我自己見mt第二輪failed左， 覺得好失敗25歲已經輸俾人地同年齡好多。雖然上左你股票班投資有斬獲，但事業上確是0。

突然覺得自己全部都係0，係社會廢物。好想消失係呢個地球。我應該點算。

龔成老師︰

你現在才事業剛起步，一切由零開始，是正常的。

加上現時市道較差，未必可以短間內找到心儀的工作，但唔好咁快放棄。

同時間，如果未能找到合適工作，都唔代表無野做。你可以做些兼職，有收入之餘，可以獲得工作經驗，如果同你本科有關，咁就更好。

另外，你可以有時間，去借書返來進修其他知識。把握現在空閒，去上些有用課程。

保持個人積極態度，無論對你本身或者見工，都百利而無一害。

另外，我建議你加強一些讀書以外的技巧，例如溝通、領導、處事等。記住，無人生來就是廢物，只是你未找到自己的真正價值而已，加油！

------------------------------------------------

Q21793：

龔sir你好，我睇左你本5年買樓4部曲，想請教你

我27歲，老公30歲。2人月入大約$43000。已問銀行話我同老公收入及職業可買530萬樓下的樓按9成都冇問題。

我同老公睇緊灣仔區樓，我地睇左十幾間樓，有間心水單棟樓，賣445萬，中銀估價430萬，匯豐估400萬。開放式實用207尺，間屋四正，但42年樓。打算用首置按9成收租

樓的詳細：

好處：
間格實用四方，多窗
高層（非頂層）向東，景觀開揚有山有公園望，光猛
落樓30秒即到地鐵站（囍匯旁近合和中心)
旺中帶靜，樓下條街唔嘈（唔係對正大馬路及叮叮路）
裝修企理四正，再油油就ok
冇任何滲水情況
廁所乾濕分隔整齊
平路入大廈唔洗行樓梯級
管理費唔貴，平其他單橦樓$400-$500
外牆及大堂已大維修，來緊換升降機都唔洗業主比錢，大廈有盈餘200萬及政府津貼50萬

唯一唔好處：
42年樓齡，現在可按30年，但將來放好難放。

主要想買樓收租，現在租金下降，但都位置方便都應該放到$11000-12000。感覺間樓幾好，就算老左冇地方住係到住都唔差。

我們目標係400萬/under 400成交，都係我地budget內。灣仔20-40年樓齡較貴，而且有啲太近街市。所以比較心宜這物業，只是擔心樓齡老，但灣仔區的樓都係比較老，我需要擔心之後難放售嗎？

我們仲要睇其他樓，希望發現荀盤。感謝sir解答，謝謝！

現在我們同朋友一齊夾租新界私樓3房單位，兩人租樓支出共6300。如冇意外未來5年都會同朋友一齊住慳錢。

另外因為我未來大約5年後可能會quit現在full time社工的工作，想自己做塔羅諮詢師+part time 社工，所以襯現在工作穩定，想先上車然後遲啲放心追夢。

兩個都第一次買樓，希望將來可換大屋/再買多層。這個上車盤可取嗎？

龔成老師︰

若能做到你預期租金回報$11000-12000，租金回報率，勉強算係可以。

雖然位置係唔錯，但始終係偏舊，相再轉手較難。而且維護成本，可能都唔少。再加上，實用面積太細，連一個基本家庭生活的尺寸(約300尺)，都未到，都係扣分位。

我明白你策略係先細屋，後大屋。但要這策略成功，其中一個重點位，就係個細屋必需有一定增值能力，至少同大市同步。

你現時灣仔這個納米尺寸的單位，能否做到，我較有保留。

如果你未找到合適單位，其實你都可以用優質股，去先做住增值。加上你未來5年住屋問題，都算解決左。

除非你真係找到租金回報率理想、單位又有質素、價格都可以，才出手置業。否則，你唔需要急於一時。

------------------------------------------------

Q21794：

Sir 早晨，我上佐3堂睇埋80後的百萬富翁，開始有d投資既概念，想幫我媽媽買入水桶3既股票，發現佢原來係好多年前開佐個股票戶口，

當中有1102環能國際同埋1150米蘭站，但一直無理到d股票，雖然佢好彩當時都有買到d水桶3既股票，但原來而家呢2隻股票已經供過好次股或者係合股，

佢手上既貨變哂碎股，量唔多既，分別係500股同2000股，但而家賣又賣唔出，可以點做？

同埋我都想問個問題，劣質股係唔係可以跌破0股價或者負數？如果會，甘會點架？股東會唔會被逼補倉架？麻煩哂你

龔成老師︰

首先，持股數量多與少，係唔係碎股唔重要。我地是否持有一隻股票，最重要係睇質素。

環能國際(1102)年年虧損，無投資價值。

加上核數師意見，每年都是「保留意見」，代表盤數有機會有問題，建議盡快沽出。

米蘭站（1150）質素不太好。

佢每年的生意持續下跌，加上年年虧損，投資價值不高，建議沽出。

劣質股係可以跌到個價好細，但唔會跌破$0或者負數，所以唔會有補倉情況。

你所講的補倉，多數是一些槓桿性投資(例如︰用孖展買賣)，才會出現。一般去買正股，係唔會出現咁架情況。

------------------------------------------------

Q21795：

請問9888百度2021Q1業績公佈後最新PE9和預期PE4是怎樣理解？

有時見到靜態市盈率及TTM，又是怎樣。

龔成老師︰

我地一般會成日講的市盈率PE，就係「靜態市盈率」。
[計算︰現時市值，除去最近一年的總純利]

而「市盈率TTM」，係表達現時總市值，相對過去4個季度的純利。[計算︰現時市值，除去最近4個季度總純利]

由於年度數據，只會一年更新一次。故用季度作比對，數據會相對較新，會比較貼近現況。

若「市盈率TTM」比「靜態市盈率」細，你可以理解為，佢近季度盈利能力係有上升。但緊記，我地投資要分析長線和整體，唔好單用這個數字，就下結論。

至於「動態市盈率」，主要係預估本年全年純利。
[計算︰現時市值，除去預測本年度全年總純利。]

由於只係一個預測數字，只宜作參考。

------------------------------------------------

Q21796：

龔老師，你好。本人31歲，月入1萬5。月光族。手上無存款，年供2萬儲蓄，月供1100人壽醫療。卡數負2萬。

無家庭負擔，每月俾3000家用。自己搬出來跟男友同住5年，算普通生活不用負擔。

本身十分在意外表，定期會做facial, 已經維持13年。戶口一有錢就會一筆過買treatment ＆美容針。每月平均有2000在護膚品。

近期開始留意老師專頁，覺得自己真係井地蛙，原來大家都可以咁有錢。希望以後可以開始投資，但無方向，唔知老師有無好介紹。

雖然有睇到有相似個案分享，但大家都有積蓄... 我一無所有，所以好迷茫。原本有2萬5工作，因為疫情辭退之後，只能搵返1萬5，之前試過有輕生想法，覺得自己30歲人好失敗。

想問下開股票戶口？我應該開邊間？本身自己只有匯豐出糧戶口，但朋友分享話citi bank股票戶口比較好？

龔成老師︰

現時礙於大環境欠佳，其實好多事情都未必可以控制得到。但相信長線，疫情會過去，生活與工作都會慢慢重回正軌。現時艱苦，只係一時，唔好氣餒。

而且，有時這些不利的環境，反而可以激發我地的潛能，造就你的成功。

其實，要做財富增值，唔一定係本身好高人工，或者已有一大筆資金，才可以做到好效果。其實只要你每月有一筆閒錢，可以定期做投資增值，已經係可以。

因為你尚算年青，能進行資產增值時間較長，複息效果會較佳。只要你好好把握時間，努力學習正確投資方法，和每月努力儲錢，相信都可以做到不錯效果。

只要你這刻努力，做好理財，定目標，好肯定你過5年後，會比過半同齡人的財富更加多！

投資戶口，你可以係銀行或證券行開都得，只要佢費用合理，又方便你自己，咁就可以。

你現時還很年輕，儲蓄保險這類產品，不建議持有太多。雖然風險較細，但增長力不高，會拖慢你財富增值步伐，你要自己平衡下。

另外，你要想方法，令自己每月能空出一筆資金，作投資增值之用。

你可以考慮做兼職、做網上小生意，去增加收入。同時間，要睇翻日常生活，有無乜野不必要開支，係可以減少。

到你每月都可以空出一筆資金，就可以進行月供股票，去為自己財富增值。

你31歲，建議你用「平穏增長股」 + 「潛力股」的組合。現在你每月先用5成儲蓄做月供。其餘先儲起，用一邊月供一邊儲蓄的策略。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

------------------------------------------------

Q21797：

啊sir ，我是你的忠實讀者。我希望40歲可以做到有被動收入，不至於退休但可以財富增值。

我初學買股票，而因為老師的書。暫時都有小小的回報，大感謝！

但因為手頭上的股票感覺上太多，之前覺得樣樣都會升，就愈買愈多，有d賺有d蝕。

最近想重整一下，希望可以老師指點指點

手頭上月供︰
2800,2823,788

其他嘅就係︰
1997 ($28蚊入)
1928 ($27蚊入)
2845 (平均 $135入)
286 ($41.8入)
522 ($100入)
2388 ($22.5入)
293 (疫情時膽粗粗6.15入)

以上有好大部分都係因為老師嘅分享而有小賺，感謝

另外有一部分就蝕︰
1810 (平均28.5)
0606 (平均 64)

仲有一堆美股︰
APPL, TSLA, NNDM, ARKK, ARKF
美股收息指數
VYM, SPLG

我知道老師集中講港股，可否指點一下迷津，如何重整一下。

感謝

龔成老師︰

你現時股票數量有點多，而且都偏雜亂。長線最好集中翻10隻左右，會較容易管理。

另外，你要明白一個概念，我地持有一隻股票與否，關鍵位是企業質素、前景，不要被買入價影響。因為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心，照持有就可以。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

而且，唔好見個市越升，就越買，咁係好危險。因為市況狂熱時，不少股票個價，都會被炒高，你好易會買貴貨。

如果你對點定平貴，唔係太有信心，未來投資可以集中用月供方法，去減少這方面的風險。

港股中，你持股大部份都有質素，可長線持有。

但愛帝宮(0286)質素較一般，長線換至其他優質，相信會較好。

國泰（0293）同樣質素只是一般。其中一個風險，是油價，睇翻佢過往多年，油價對佢成本影響好大，令佢盈利十分波動，就算佢利用對沖，都唔係好成功，反而試過因對沖而蝕大錢。

另外，航空業對經濟週期較敏感，收入不穩，同時唔算係一個好賺錢的行業，因此這股的質素只是一般。

就算佢重組，得到新資金，只是比佢「捱過這一關」，並不是賺錢能力方面有改善。你想持有都得，但不宜太多。

至於0606，我估你係打錯股票編號，應該是想說眾安（6060）。佢業務都有發展力的，但業務仍有不確定性。

初步睇，企業有發展力的，不過風險同時存在，因此唔建議太大注投資，這股都可長線持有的。

至於美股，同樣大致上都係有質素。但留意Nano Dimension Ltd (NNDM)，初步睇佢業務都有吸引力，但暫時未做到收支平衡，風險會較高。投資與否，要自己衡量。

而月供方面，你現時組合已經可以。安碩Ａ５０（2823）和盈富(2800)係一籃子優質企業，較有風險分散能力，分配上，用這2隻做重心會較好。

現時大市只在合理區，每月資金唔好盡用。最好留有部份，等大跌市出現時，可以用來掃貨。

------------------------------------------------

Q21798：

你好,本人今年40歲, 1家4口, 家庭收入$50,000, 有3層物業 (合共約$2300萬, 己不用供款), 但由於都係細單位, 所以另外租住一間大物業, 暫時收租夠交租同埋夠交小朋友學費。

本人考慮8-10年退休, 想問應如何打算。本人有100萬亞洲債券基金,有約4厘, 另月供約$2萬股票(包括2800, 823, 9988, 388, 2, 1299)

謝謝解答!

龔成老師︰

你現時應透過累積優質資產，去幫自已財富增值。到你退休時，再轉換成收息資產，去創造穏定的現金流，以支援自己的退休生活。

物業都係其中一種優質資產類，除左有升值潛力外，都能提供穏定現金(租金)，所以係合適的。

但我地財富組合除左要有增長力和質素外，平衡性都好重要。你現時資產明顯係偏重於物業類，長線你應加入一些優質股，以免過於集中個別資產類別，而產生風險。

因此，你新資金建議優先投入股市，去令成個組合更平衡。

現時你月供組合的股票，都係有質素和適合你。當中阿里巴巴(9988)和港交所(0388)係潛力股，以你年紀，大約佔組合4成好了，否則風險性會過高。

若你投資經驗較一般，或者承受風險能力較弱，再要將比重下調多少少。

現時大市只在合理區，每月資金唔好盡用。最好留有部份，等大跌市出現時，可以用來掃貨。

至於債券基金，坊間分好多種，你要小心睇，因為有d風險低，無乜問題，有d則有潛在的風險，絕對不是保本的產品，有機會出現了「賺息蝕價」的情況。

第一，有些債券基金，會投資「高收益債券」，即是「垃圾債券」，你一定要睇睇佢所佔的比率。

第二，債券基金往往不是單純地持有債券，而是可以作買賣，以及利用衍生工具作對沖等策略，即是可能有價格上的波動。

第三，不少銀行都會提供借貸，以槓杆去放大回報，以平息借貸去賺取息差。低息環境時間題不大，但進入加息週期，不止借貸成本增加，同時債券價格往往在加息期下跌，雙從打擊下，投資價值成疑。當然，若然加息步伐不快，息差利潤就可觀。

我不是說債券基金有問題，只是說明當中的風險，因為市面上的基券基金好多，你要仔細分析。

------------------------------------------------

Q21799：

老師，你覺得綠置居買唔買得過呀？近排鑽石山綠置居有點兒想抽。但投資價值是否比不上居屋？

而且你本書話黃大仙區投資價值不太高

龔成老師︰

綠置居投資價值會稍遜於居屋，但由於佢定價會比居屋低，故都有投資價值。

今次鑽石山綠置居，位置在鑽石山港鐵站附近，交通十分便利，故有一定吸引力。

雖然黃大仙區，本身人口老化，區內人均收入低，較難撐起樓價，故投資價值不高。但若作為自住樓，都有一定價值。因為佢定價較居屋低，能節省一筆資金，可以用作其他投資之用。

因此，只要佢適合你生活需要，而且有供得起，其實買都係可以。

------------------------------------------------

Q21800：

龔sir,我有些關於前途的問題想問，我現年33歲，現職學校合約文員，月薪萬幾，每次續約會多幾百元的升幅，這份工的優點是返工地點近屋企，

而且放工時間準時和放得早，但近日經過思考後我的目標是將來想財務自由，有自住樓，成為全職投資者，那麼我是否應為了得到穩定收入而投考政府文職公務員，

如果想成為全職投資者條路應怎樣走，謝謝老師答覆

龔成老師︰

我地可以透過投資和累積優質資產，去達至財富自由目標。

但大前題係你要有資金，最少每個月都可以有一筆閒錢，可以用作投資增值。

若你已經有個明確目標，係想做到財務自由，而現有工作收入又較難做到，你就時候作出改變，努力去提升自己收入，為財富增值創造基本條件。

到你每月有一定閒錢，就可以開月供優質股，去累積財富。之後，到有一定資金，就可以加入物業類。當資金累積到足夠數量，你就可以換成收息資產，去創造現金流，支援財務自由生活。

而要做到全職投資者，投資對你而言，不單要係興趣，而且更要成為你強項。若你現時對投資無乜了解，你就要先由一個「基本知識投資者」，慢慢開始提升自己。

你要花大量時間，努力去看相關書籍、睇年報聞、睇新、、上課程，去學習如何分析一隻股票。

到你累積到分析50間企業和長期實戰經驗，你就可以變成一個「有實力的投資者」，以算有做全職投資者的基本條件。

但要突破至最高層次的「真正專業投資者」，已經不單是投資知識的問題，因為要突破，就要擁有很強的分析力、很強的眼光、很強的心理質素。這些要更長時去磨鍊，才會做到。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21601-Q21620）

Q21601：

Hi 你好，睇咗你個page好耐，本人一路想做中低風險投資，只係未開始落手做，因為我知道好大部份財經資訊同新聞都唔係真係教人投資令讀者得到回報同被動收入，

而係好似龐氏騙局咁，呢個觀察令我大學揀商科都選擇咗marketing and pr，冇揀banking and finance，到而家我都係做嘢然後儲錢，冇投資過。

我想由頭開始學正確嘅投資方法，唔係投機或者賭博，我唔想做個啲無基礎知識扮識個類人，請問我可以點做？

如果係咁，我minimum應該預幾多本金慢慢累積呢？

多謝你睇我個msg！期待回覆。

龔成老師︰

你要分清甚麼是「龐氏騙局」，原理就是一個無任何經濟價值的項目，只利用新加入的投資者資金，令初期投資者得益，以這模式一支滾存。

但如果一間企業，本身有實體價值，對社會有長期正面影響，就不是騙局，你要分清「價值」的概念。

其實，坊間你會接受到好多投資資訊，但並不是全部有用。你要學識分辨那些"有用的客觀資訊"和"主觀的個人意見"。

前者係一些你值得參考的資訊，後者對你係無任何意義。

投資絕對唔應該係賭博，因此你需要有相關知識和經驗，去助你判斷每個投資機會。所以，你係投資前，一定要增進投資知識。

我自己會看好多有關投資、理財、股票、成功、激勵、心靈、致富等各方面的書。

我一開始，對投資一無所知，當開始睇，就發現自己過住的投資方法都是錯，更發現坊間的所謂「專家」、散戶，投資方法都是錯！

之後，我開始明白點解香港有9成散戶，投資股票都是輸多贏少，因為佢地無知識！

當我愈睇書，就愈明白真正的投資道理，同時自己的投資實力大升。由多年前輸多贏少，到現時贏多輸少。唔少散戶，可能憑短期市況好而獲利，但如果要做長勝將軍，就只有靠知識。

巴菲特的閱讀就更多，他多年來，絕對不是「睇住個市」，而是不斷睇書增加知識，睇年報了解企業。

我最初睇得好廣泛，到後來會睇較多「分析企業」、「價值投資法」、「巴菲特」類的書。

以下是我認為適合初學者睇的書，部分要到圖書館找的：

《我十一歲，就很有錢》
《經濟蕭條中，七年賺$1500萬》
《富爸爸，窮爸爸》
《思考致富聖經》
《秘密》
《財富金鑰匙》
《有錢人想的和你不一樣》
《世界上最偉大的成功寶典》
《洛克菲勒寫給兒子的38封信》
《解讀巴菲特》
《巴菲特傳-永恆的價值》
《勝券在握》
《智慧型股票投資人》
《非常潛力股》
《彼得林區的選股戰略》
《誰搬走了我的乳酪？》
《人性的弱點》

同時間，你都可以睇我架《80後百萬富翁》、《財務自由行》和《股票勝經》，都適合初學者。

至於開始投資，你唔需要預好多本金。其實只要每月有一定閒錢，就可以用月供股票，去做財富增值。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

若你係偏年青，應以增值為主，建議你用「平穏增長股」 + 「潛力股」作組合，去創造一個增值平台。

現在你每月先用5成儲蓄做月供。其餘先儲起，用一邊月供一邊儲蓄的策略。

由於你投資知識不高，因此可較集中ETF。到你有一定知識，對這些股票又有一定了解，才考慮加入其他股票，咁會較好。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

------------------------------------------------

Q21602：

龔sir你好，3年前接觸你的fb及書籍，見你一直推介1211， 思量後跟你買了少少，現在還持有著，真的萬分感激你！

講一講我背景，42歲，月入4萬，單身，與1位退休家人同住居屋（已供完），屋企所有開支我全負責，每月儲1.3萬。手上現金1百萬，但當中30萬要撥備以防不時之需。

因投資知識不足，股票分得太散，成19隻，當中不乏高位買入。曾經看過阿sir說8-9隻股票組合就夠了，所以想向阿sir請教一下我該如何整合出一個平衡及適合我歲數的組合

以下是手上股票數目及買入價-

銀娛，1手，$52.2
金沙，3手，$35
港鐵，1手，$41.2
粵海，2手，$12.28
比亞迪，3手，$40.6

福壽園，2手，$7.5
小米，2手，$22.9
阿里巴巴，2手，$215.8
騰訊，2手，$610
中生，1手，$7.72
平安好醫生，2手， $84.8

京東健康，1手，$112
金界，2手，$7.7
郵儲銀行，1手，$5.82
中行，1手，$2.95
中銀香港，3手，$29.81

中國人壽，1手，十幾年前買忘了價位
長和 及 長地， 各1手多，當年和黃重組換成的，和黃$68買入

今年4月剛開始月供 恆地$2000 及 中生$1000

想請教阿sir-

1）19隻股票內哪些該集中保留？

2）中銀香港，金沙，郵儲，一來高位買入，二來好似增長不大。是不是等到升回買入價後該優先舍棄呢？

3）手上股票市值8x萬，可動用的現金70萬，比例約一半一半。是不是全部現金都留待大市在平宜區時才入貨較好呢？

如果現在想慢慢入10萬貨，該加注哪隻較好？

謝謝你的時間及解答！Thank you very much!

龔成老師︰

1) 你現時有股票，都係有質素和適合你年紀，不需沽出任何一隻，照長線持有就可以。

中國人壽(2628)賺錢能力弱左，質素只算中等，現貨可持有，但不要加注。

但長線計，你要集中翻係10隻以內，否則你好難定期去審視佢地質素。

2) 首先你要明白一個概念，我地持有一隻股票與否，關鍵位是企業質素、前景，不要被買入價影響。因為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心，照持有就可以。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

這3隻股票都有質素，佢地增長力無潛力股咁高。中銀香港(2388)和金沙(1928)有平穏增長力，加一定股息。而郵儲銀行(1658)主要係派息。

雖然佢地增長力唔高，但有助於你平衡成個組合，建議保留。

3) 現時大市只係合理水平，現金佔比重大約3-5成。餘下資金，就等大跌市出現，才加大力度掃貨。

你想再動用10萬，去分注入市，都係可以。

由於你現時組合，潛力股較多，再加上不少潛力股都在略貴水平。我建議你這10萬，集中係一些平穏增長股身上。現價都算合理水平，可分注儲貨。

另外，你月供組合都可以。但我建議加大月供供款，最好用每月一半儲蓄去做($6500)，餘下一半儲起，等大跌市機會。

------------------------------------------------

Q21603：

龔成老師，本人一直有追蹤你的FACEBOOK和YOUTUBE頻道，雖然你我不曾認識，但對於你想提升大眾的財務知識水平的大任，我實在深感佩服。

而當中的一些觀點，我卻出奇地認同，所以我想寫信給你。感謝你寫了80後千萬富翁這書，也希望藉此告之你有知音，認同其致富之道。

其實我和龔成老師的背景有點相似，自小在公共屋村長大，家境非常一般，讀書也不是特別擅長，會考只有十五分，大學也是剛剛好的進去，畢業成績也是非常一般。還有一點相似的是，我們畢業後都從事銀行業。

龔成老師在很早便明白為富者，有很多道理並非一般中小大學課程所傳授，反而更多是躲在日常生活中的潛則規。我贊同推廣財務教育，畢竟金錢是我們所有人一生中用得最多的工具，但現今竟缺乏學科教授。

然而現在的教育制度也僅僅是培養年輕人成為一個出色的僱員或專業人士，而絕非是一個創業家或投資者。

我和龔成老師也有一點很似，就是很早已經讀了很多金融及理財書藉，可能在潛移默化下走上一個銀行家之路。

可是現今的銀行家大多變成跑數的代表，亦只是公司的其中一個齒輪，即是離不開僱員的命運，你所有的付出和努力說穿了也只是為公司的盈利貢獻。

你所分得的其實很少，但付出了最寶貴的時間，這點我非常明白，但我之前 沒有老師當初的勇氣逃脫這命運之輪。反而沉醉在大公司所給予的看似亮麗的職位和不高不低的收入。

當然後來我真的離開了創立了一隊銷售團隊，單純為了持續而穩定的被動收入和可持續的事業發展。

所以我看到龔成老師所提及成為富翁的五大範疇時（全職股票/商業投資者，全職物業投資者，知名專家，企業家，擁有強大銷售團隊）突然發覺自己一路走來方向是對的。

雖然我和所有一般大眾一樣不是天才，也不是特別聰明。但我天生對所有學問的追求和強大行動力，令我創造了很多人認為的不可能。

在我29歲時買下第一層物業。在35歲，在銀行事業正處高峰時離開選擇一條不一樣的路。在於39歲時重返中文大學修讀全職MBA，主修創業家精神。

在40歲時選擇創立銷售團隊不再為大公司拼命，而是為自己而作選擇。回顧到此，再看看你寫的書，便明白有知音，所以非常感激你可以將你的想法匯集成書，以簡潔的方式表達出來，激勵大眾。除了堅定了我的信念外，你的點子也給我和同事們訓練的重要材料之一，我實在感激。

你在書本中提及銷售能力的重要性，年少時的我曾對銷售員有種不屑之感。

我不知道是大眾的刻版印象影響了我，還是成長中有植入錯誤觀念。到我認真反思為富者應具備的能力時，我真的認為銷售技巧和投資知識非常重要，

其實每一個人也需要作銷售，包括是向股東或潛在投資者解說的CEO，以及是提出論點和協議的大律師，本質上也是銷售。所以愈快掌握和深入研究當中技巧對將來致富之路會更為輕鬆。

最後，我花了二天時間讀完80後千萬富翁，在此我鼓勵其他人。龔成老師所說的並不是提供股票號碼，而是確實地，有系統地說明致富的潛則規和在正常書本中學不到的論財知識，所以我非常推薦這書。也希望在不久之將來可以和老師好好交流一下。謝謝你。

你的追隨者

龔成老師︰

多謝你的支持！其實我希望將正確投資理念，和一些過往經驗和方法，跟大眾分享。

希望為一班有理想，但未找到方法的人，提供一條可參考的道路。

同時，也為一班對投資理財有誤解，因而到處碰壁的朋友，引領佢地重回正軌。

成個財富增值之路，要透過不斷學習，令自己保持進步，才可以令我們走得更高，更遠。

其實當我寫書、教班時，我除左想賺錢外，同錯會一定想「怎樣貢獻到社會」，這是一個好大的核心，我相信只要這個大方I向正確，所做的事就正確，而錢就會進來。保持努力，加油~

------------------------------------------------

Q21604：

老師，你好呀。最近岩岩睇完你講樓市既書，

有一章講到地區性。我想問最近有好多新樓盤既位置都係新開發。

我想問問老師點睇屯門掃管芴一帶既新樓盤。

呢一區會唔會受惠到屯赤公路，駁去港珠澳大橋。
發展潛力大唔大呀？好唔好係果區上車

龔成老師︰

屯門是大型的住宅區，商業活動少。而且地理位置上，較遠離市區，因此樓價與市區有距離。

但隨屯門港鐵通車，屯門區交通會較以前便利。屯赤公路，可能都會係一個利好因素。

但始終屯門跟市區有一定隔離，而掃管笏雖在屯門﹐但隔離港鐵站較遠，未能明顯受惠。

因此，掃管笏升值潛力係有，但唔會話好高。因為所有利好因素都反映左，預期掃管笏配套，未來都唔會有好大提升。

------------------------------------------------

Q21605：

想請教，我五十歲，看了你的幾本著作！先想學買股票！

（我份工六十歲要退休，我只剩十年時間有收入去投資！）我應該用月供買邊D股票？

（我每月得4000可運用）手中儲蓄有18萬（但唔係太咁動用)？謝！

龔成老師︰

以你50歲的年齡計，其實已開始為退休做準備。你離退休尚有10年，只要好好把握，都可以做到一個合理增值效果。

但財富增長同時，我地不能過於進取。因此，你可以投資「平穩增值股」+「收息股」。

現時的$18萬，暫時只能動用$7-10萬，因為大市唔算平，你要分注投資，同時留下大約一半資金，等大跌市時入平貨，作長線投資。

當然你覺得自己風險承受力唔高，你保留多一點現金，都係可以。但就會令你財富增值效率，會慢左少少。

月供股票方面，你可以先用$1500供盈富（2800）和供2隻收息股(各$750)。餘下$1000就儲起，同樣等大跌市機會。

但就隨著年齡增加，你要慢慢增加收息股比例。到退休時，收息股佔組合100%。因為你到時，需要透過收息股的現金流(即係股息)，去支持你退休後日常開支。

以下是一些適合你的選擇，你可以從中參考下。

收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

------------------------------------------------

Q21606：

你好，想請教你一些意見。我今年47歲單身，同家人同住公屋，自己有銀行儲蓄大約39萬，股票大約11萬，MPF大約55萬。

想自己搬出來住有私人空間，買樓但又唔想全部銀行儲蓄用晒，唔知好唔好租樓 。

又諗過海外買樓會平啲，再放租出去，再在香港租樓。
你有什麼意見？我頗煩惱。

謝謝！

龔成老師︰

如果置業後，會令到你資金儲備盡用，再無閒錢去買優質股，去保持投資增值，係唔理想。

至於租樓，會令你可投資資金減少，減低左財富增值能力。如非必要，我都唔建議咁做。

當然你可以用買海外樓收租，再租香港樓的方法，去平衡個支出。

但你必需對海外樓投資，有全面的認知，才好實行。我地投資的其中一個關鍵，是你有多認識這項目，「不認識就不投資」，如果你真的已了解當地的物業市場、租務市場、法例、經濟發展，那可說是過了第一關。

土地是有限資源，所以長期一定上升，但你都要分析這地方的長期土地供應。另外就是匯價如何，就算物業有穩定租金，以及樓價上升，但若然匯價不穩，都會對你的投資造成打擊，這方面不能忽視，你應該了解當地貨幣過去的變化，以及將來的強弱分析。

若你不懂，就不要去投資了。

以你47歲，要開始慢慢為退休做準備。在財富增值上，你可以集中係優質股身上。投資目標，可以用「平穩增值股」為主。

現時的$39萬，建議動用多$5-10萬，因為大市唔算平，你要分注投資，同時留下約一半資金。長線投資。

如果你每月有閒錢可以儲，你可以做埋月供股票，供「平穩增值股」。比例上都係用一半，餘下儲起，等大跌市機會。

------------------------------------------------

Q21607：

龔sir, 我是一位50歲嘅未婚女士，有男友但未有結婚打算，現獨居在與父親合資的自住物業。

2008年以198萬買入，市值約750萬，按揭尚餘107萬還清，每月用$6,600供樓。

我現時喺政府做合約職員（今年內可能轉制成為公務員），月入5萬，每年約滿後有一筆約滿酬金，佔全年收入15%，收入算穩定。

做呢份工之前一直不懂投資，亦沒有太多儲蓄。入職5年後到現在儲到約55萬現金，另有30萬股票，同埋下年就供完嘅基金投資保險（現值約24萬）。

股票資產分佈如下：
388 (100股）@$362.7
823（571股）@$78.9
1211 (517股）@$168
1810 (1200股）@$27.3

2800（1774股）@$26.8
6618（100股）@$165
9988（107股）@$250.5

每月扣除按揭供款，所有開支和供養父母的費用後，每月大約儲到$15,000現金。

早前follow你嘅post得到啟發，亦都很認同價值投資法，所以用其中$5,000月供2800和823至上述數量，供咗3年左右直到去年因某些原因停咗月供。

現有數個問題希望你指點一下：

1. 根據現時嘅工作狀況，我預算65歲退休，希望用餘下嘅工作年期可以盡快儲到更多錢做退休儲備。如恢復月供股票應該怎樣分佈較適合我？

2. 你對我現時嘅股票組合有什麼評價？由於有啲股票於較高位買入,現時股價回落，是否應繼續持有抑或應趁低吸納更多？

3. 現時嘅資產應怎樣配置才有機會達到每月$30000現金收入嘅退休目標？

4. 明年供完嘅基金投資保險，到時應全數提取作其他投資，抑或繼續存放滾存比較適合？

感謝你嘅耐性及期待你嘅回覆。謝謝。

龔成老師︰

1) 以你的年齡，其實要開始為退休做準備，但同時，財富仍有增長力（但不是進取），因此，你可以投資「平穩增值股」+「收息股」。

現時的$110萬(連同將贖回24萬基金)，可動用多20-30萬，因為大市唔算平，你要分注投資。同時留下一半資金，等大跌市出現，用來買平貨，作長線投資。

月供方面，你可以供「平穩增值股」+「收息股」。每月先用$8000供款，餘下$7000就儲起，同樣用來等大跌市機會。

如果你風險承受力較高，又想進取D，可以較集中係「平穩增值股」。相反，你較保守，可以較集中係「收息股」。

但你要留意，隨著年齡增加，要慢慢增加收息股的比例。到退休時，收息股應佔100%。

平穩增值股，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、平安(2318)。

收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金(3110)，都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

緊記，月供係一個長線計劃，唔好供下停下。咁樣會影響到平均價格風險的效果，會對你造成不利。

2) 你組合的股票，都係有質素。除左京東健康（6618）真係買入價偏貴外，其他都唔係太貴，算係貴左少少。

部份投資，雖然帳面上有虧損，但由於企業係有質素。長線佢地價值，都會慢慢提升，所以你長線持有就可以。

盈富(2800)和領展(0823)，未來再有明顯回調，你可以考慮加注。

但其他持股，因為風險較高，以你年紀不應持有太多。故只建議你持有現貨，不要再加注了。

3) 由於你自住問題已解決，也算持有一物業。故未來增值上，都係集中係優質股，令成個財富組合更平衡。

如果你希望退休後，每月有3萬蚊現金流，以股息率6%計，你需要本金600萬。

我假設投資回報有8%（連股息再投資），你每月投資$15000 + 現有110萬資產，15年後大約會增值至830萬，故這樣安排相信很大機會達至你的財務目標。

4) 你要睇佢扣除費用後，回報係多少。如果佢整體係優於大市，而風險又唔算過高，你可以考慮繼續存放滾存。

否則，你就按以上計劃。將贖回資金，分注咁慢慢投入「平穩增值股」和「收息股」中。

------------------------------------------------

Q21608：

龔sir，感謝感謝，你之前的回覆得好詳細好用心，老公說很有參考價值，我一直都想供盈富。但考量澳門銀行手續費問題所以未實行，聽您說完更安心了。

我真的要盡快決定投入同開始草貨了。

我老公說：

1.上堂時您提出的‘佐丹奴、粵海投資、大快活、六福‘，當時係優質股，依家隔左咁多年還值得投資嗎？想您俾點點意見，因他說這幾隻文中冇提到。

2.佢見組合內沒有內銀股，如滙豐，這些股票適合繼續持有嗎？

3.科技ETF市面上還有幾隻，是否因為呢隻手續費平D所以選呢隻？

4. 另外是關於我自己的，當時藍月亮發行抽新股時，我抽中左一手，那時睇中它是獨市生意及大陸龍頭，所以冇放，在$13蚊多時更入多了一手，現在這情況你認為適唔適合溝貨或繼續持有？

5. 之前我幾心儀想入手必瘦站，5蚊既時候吾敢入貨吾識睇位，最終沒有持有，必瘦站您認為之後喺邊個位我可以入手？

感謝感謝。
————
我近日開始去看股票勝經，但現在我既level睇會卡住唔太明白，老公說睇左再上您既堂效果會更好。如果老公再上多一次堂，有沒有優惠?

我們2個都會一起上，因有他在我應該會更好學習。

龔成老師︰

1)以上4隻依然係有質素，你投資係無問題。佐丹奴(0709)主要係收息，增長力不高，唔係咁適合你年紀。

粵海投資(0270)和大快活(0052)則平穏增長+股息。而增長力，會係六福(0590)較高，這3隻你們都可以投資。

現時都在合理區，可分注。

2) 大型內銀股和匯控(0005)都有投資價值，但由於已經好大隻，未來增長力唔會高，主要係收息。

以你年紀，應以增長為主，這類收息股就唔係咁適合你。

3) 安碩恒生科技(3067)每年收費和追蹤誤差，都係幾隻當中較低，暫時睇會係較好選擇。

但你要留意，由於幾隻恒生科技ETF都係初上市，追蹤誤差只能作參考，實際誤差未必一樣。

4) 藍月亮（6993）有質素的。

佢有「中國P&G」之稱，成立於1992年，擁有衣物清潔護理、個人清潔護理和家居清潔護理三大系列共73個品種的產品。

佢係中國洗衣液有龍頭地位，加上毛利率高，賺錢能力強。睇翻佢之前的資料，以零售額計算，藍月亮在洗衣液市場、濃縮洗衣液市場及洗手液市場的市佔率均為第一，分別為24%、28%、17%。

整體有質素與發展力，若持貨佔你組合不高，長線持有就可以。

近期雖然回左唔少，但都只算係合理區頂，唔建議現時加注。最好回多1,2成，才考慮。

5) 必瘦站（1830）長遠有發展，本身有一定的質素。

睇翻之前的疫情，佢身處的行業受影響，但佢的現金流及財務數據都唔算差，這點可以想象到，當正常的經營環境，佢的生意一定唔錯。

加上佢的野心愈來愈大，本身有一定的技術，同時不斷將香港的業務模式複製到其他海外地區，我見佢加強了發展其他地方，因此發展不差。

這股有長線投資價值。

業績前計佢$4是合理區頂，業績後股價升左好多，雖然我之前好大機會會調高佢合理價值，不過，現價都有少少貴。

所以，如果無貨，又真係好想入。你可考慮回少少，先小注，然後等跌多d先正式分注投資。

6. 上堂前，你先睇左股票勝經，的確係有助吸收課堂知識。但唔明都唔緊要，到時課堂都會再仔細解釋，當中的概念。

如果你基礎不足，可以上多一次基礎班，同時當你地2人一同上，可以有互動作用，增加了學習的進度，打好基礎後，再上進階。

你重讀初班，可以比個優惠價你，你whatsapp 55457212我同事講翻。

------------------------------------------------

Q21609：

阿sir 我25歲，係疫情低下 3月頭我決定祼辭左一份我覺得毫無進升和學到野既工作！

我自知呢份工如同書入面星期一捱 想等星期五，毫無激情，繼續向呢個公司只係浪費時間（我覺得時間好寶貴）我已經考慮半年，

但身邊朋友同事都勸我騎牛搵馬，都唔太認同我辭職，話呢個時勢有咁既工已經算好，但最尾諗左半年決定辭 因為我唔知前面會點 但我知總會接觸新環境新事物

而且想趁冇負擔年齡試多啲 至少收入冇呢份工高 但我辭左好肯定都有兼職收入 經過兩個月一直好積極揾全職 一邊睇書 一邊兼職 奈何疫情下難揾全職

開始質疑自己夠竟係未岩同焦慮呢兩日睇左書阿sir 本書 覺得完全觀念同我想法一樣！令我更加相信自己冇揀錯，得到肯定！

因為我覺得我花更多時間黎睇理財知識 運動 學野是值得的！多謝阿sir !

龔成老師︰

其實，我地做決定，一定係睇長線。

好多人一直安於現狀，唔肯試下離開舒適圈，就永遠只能停留係現時階段。

恭喜你，能突破自己舒適圈。你才25歲，還很年輕，應該把握這個負擔較少的年紀，去作出不同的嘗試。

現時你就要好好計劃將來，到底自已未來10年、20年目標係點樣，想自己變成一個點樣架人。點做，才會一步步接近你想的人生。

你現時把握未有全職工作的時間，去學習、做運動，努力投資在自己身上，這個態度係非常正確。

相信你將來，一定可以找到理想的人生。

------------------------------------------------

Q21610：

龔SIR 你好~本人是投資倍升股課程學生，剛上了第一課，感謝你在課堂上釐清了一些錯誤的投資觀念。本人今年35歲，通常會每儲蓄到一筆錢就會買股票投資, 增值財富。

這個投資組合有沒有問題? 還是需要再執一執?

00388 $478.6 @200-
0003 $14 @3707-
0005 $33.617 @ 1200-
02202 $27.3 @200-
03988 $2.4 @3000-
09988 234.8 @100

另外，知道澳門政府在珠海哪邊建立一個新街坊項目，在橫琴哪邊建立一個屬於澳門的新區。（橫琴「澳門新街坊」項目）

位置鄰近澳門關口, 在此發展中的新區對面亦有新樓盤開賣, 你認為值不值得投資?樓價大約為33平方, 值港幣110 萬左右, 租大約每月可收4000-5000元。

龔成老師：

你上述持有的，基本上都有質素，不算差，但可以優化組合。

你年齡35歲，其實可以著重增值多少少，所以，你持有的煤氣（0003）、匯豐（0005）、中行（3988）只是收息類別，不應佔你組合比例太多。

至於港交所（0388）及阿里（9988）無問題。而萬科企業（2202）負債較高，不宜持有太多。

你在之後的財富配置，可以投資平穩增長股+潛力股。

至於澳門新街坊，我無仔細研究在，但我自己對橫琴是正面的，這地方是中央其中一個重點發展地區，加上澳門地方細，一定要想方法延伸經濟圈。

同時，中央會對澳門的信任度會大過香港，所以會加強澳門周邊地區發展。

當然，你最好實地考察下先，上述只是簡單意見。

------------------------------------------------

Q21611：

老師，我亦很仰慕股神巴菲特，所以我亦有投資brk.b，持有1個半月已有7.5%回報，再加上佢財報穩健，令我更有信心持有。

不過，畢竟他年時已高，有佢隨時退休令股價下跌的隱憂，亦不清楚接任的人會不會處理伯克希爾如股神一樣穩妥。

你又對此有什麼看法？

龔成老師︰

其實巴郡已經係一間大型企業，雖然股神巴菲特真的退下來，很難找一個有咁高能力的人取代。

但由於企業已係好成熟，就算係其他人掌舵，相信大方向唔會差好遠。

此股依然係具有投資價值，值得你長線持有，

不過，回報率點都會比過往略減，但仍然是不差的。

------------------------------------------------

Q21612：

想問老師，一年只買1/2隻股票，是否次次都是賺錢。

如果我這樣做，我心理上會害怕。如果睇錯，整年的儲蓄，會就此蝕了。

暫時都想分散投資，如果不夠資本，可能3067/2833/QQQ/VOO/ARKK便算

請問我的想法是否可行？

此外，你為何會有信心，果1/2隻會是眾多公司中，成長最快的一兩間？

龔成老師︰

唔係，就算股神巴菲特投資，都唔會隻隻都係賺錢，佢都試過不少失敗投資。

但由於佢成個組合做得好，整體成績都有唔錯表現，這就是我成日強調，組合要優質和平衡的原因。

其實只要你有一定經驗，細心分析，加上係合理價或以下，才買入優質股，長線虧損的機會，唔會好高。

至於點解有信心，個1,2隻係眾多公司中，成長最快的一兩間。除左累積不少分析經驗外，我都分析左好多企業，從中作比較，才會知道個別企業，優質度如何。

你5隻股票都有質素，3067/VOO/ARKK係潛力型股票，波動性較大。如果你係偏年長、投資經驗較少、或者風險承受力唔高，就不要持有太多。

現時大市在合理區，記得資金唔好用盡，要留部份等大跌市，才出手。

------------------------------------------------

Q21613：

老師，有評論話如果完美醫療（1830）無左過期套票，必瘦站會蝕錢，可信嗎？

龔成老師︰

完美醫療（1830），這個所謂過期套票，其實是指一些客人已付費，但顧客於合約服務期內並無使用服務確認的收益。

預繳收入其實在不少行業都存在，是一種對企業甚為有利的營運模式，利用折扣價向客戶出售預繳套票，藉此推廣纖體美容服務，多年來令集團收入提升不少。

而這些過期套票，大致維持佔每年入帳之套票2-3成。至於出現原因，可以係客人計錯數買多左，或者好多其他因素，無人知。

但這部份一直多年恆常地存在，佔收入比重每年都大致相同。基本上，佢已經算係恆常收入一部份。

這部份收益，無話好定唔好。但我地計算企業盈利時，考慮這部份收益，才算正常。因為佢真係成個生意模式中，其中一個收入部份。

其實，你試從顧客的角度去想想，當你買產品時，你不會假設自己不會用，而最終總會有一部分客無用，有部分客只用到部分。

正如你食一個飯，都會食剩，如果將食剩的%要退錢，要按比例從收入扣除，相信好多食店都會虧損。

這些「用不到」「食剩」，其實是產品收入的一部分，所以，做生意不可能強行將「過期套票」數目折去的。

------------------------------------------------

Q21614：

龔sir你好，今年33歲。早兩年賣左樓，賣咗樓之後大概有5,000,000現金，現在跟屋企人租緊樓，全家五人，爸爸媽媽啱啱退休，我同老公同細佬做嘢

大家都係搵萬幾蚊，每個月租金$29500，屋企人覺得都係買返樓好啲，自己都有買下股票，手上持有3690，3993，6969，6618，291，都係短炒為主

因為都想幫補租金，每年要供三份合共大約120,000保險，3年前供的，包括一份基金（$50000每年），基金已經供咗3年可以隨時停供

一份儲蓄（$50000每年）另外一份危疾（$26000每年），想你俾啲意見我，啲錢點樣可以運用同埋投資得好啲,可以40歲達致財務自由

龔成老師：

你地首先要決定，是否買翻買，如果買樓，就要預留部分資金，然後餘下投資增值。

如果唔買樓，就可全部用作增值。

如果現時完全無物業，我會傾向買基本的自住樓，但就作高成數按，餘下資金投資增值。

如果想40歲財務自由，你可以投資
平穩增長股：潛力股
7：3
（如果你投資實力較強，可增加潛力股比例）

好好利用7年時間，去進行財富增值，利用股票投資。現時現金，計好多少會買樓，餘下的「可長線投資金」，現時已可分注買入（當然要有一定的現金留低）。

另外，唔好再短炒。至於現時持有的其他理財產品，都可以繼續進行。

------------------------------------------------

Q21615：

老師你好....自己依家嘅方向好迷惘，自己有工作，但債項實在太多，呢個時候我真係唔知點做好.....

我好想去重新好好開始，已經31歲嘅我仲係一事無成，我依家應該要點做好....

龔成老師︰

我明白你此刻，可能有太多不如意事情，同時間圍繞在你身邊，令你好氣餒和無奈。

但其實所有問題，都總會有解決方法。在好多問題圍繞自己時，我地要努力去保持一個正面心態。有系統地，將問題逐一拆解。

首先，我相信你最大問題，係債務方面。你先集中去清理這部份，優先處理利息較高債項。或者可以將較高息債務，先轉到較低貸款利息的地方。

我地先減少你長線還債負擔，再慢慢被這些負債消滅。

至於，人生目標，每個人都不同。唔一定要做到家財萬貫，才算係事業有成。

你要清楚知道，5年、10年、甚至20年後，希望自己變成點。之後，再想下，點樣先可以一步步咁達成。

記住，這個世界無問題係解決唔到。只要你定好計劃，按部就班咁實行，問題總會解決。而你人生目標，都總會達到。

------------------------------------------------

Q21616：

Hi 龔sir! 我年紀2X, 每月都儲到幾千蚊加上本身有少少閒錢，所以想由月供股票開始投資。

我有3個問題希望龔sir可以指點一下。

第一：就係月供股票嘅回報。我傾向長期投資，但係唔知道長期係幾長。簡單啲講月供股應該供幾耐(5年10年?)，或者供到有幾多手先夠? 雖然成本平均咗，但回報係咪同時會平均(拉低)咗?

如果股價合適係咪直接(或儲夠錢)買一手長渣好啲?

第二：我諗緊月個股票包括0027 0293 0823 3690

前三隻我覺得喺疫情之下已經係低谷，未來幾年都會升。3690就潛力而言，現時股價係咪屬於合理/便宜區域，或者bottom line (市場消化完美團負面消息)?

第三：揀月供股嚟講成交量應唔應該係重要考量? 抑或其他因素比容易賣碎股更重要?

謝謝

龔成老師︰

1) 如果你定平貴能力不足，一手手買，會有買貴貨風險。月供可以平衡價格波動風險，所以較適合你這類初學者。

月供係一個長線計劃，月供最少維持3年，並持有這些股票5年以上，才會有較理想效果。當然，更理想係一直做，一直維持累積優質股(優質資產)的習慣，對你會最有利。

用月供方法，成本會拉平均左，但同時間，平均回報都會有機會被拖低左。

所以，若你用估值方法，直接1手手係合理區，甚至平宜水平才入貨，的確回報一般會比用月供儲貨為高。

但問題係，用估值方法去入貨，對投資知識要求較高。初學者我唔建議咁做，反而會增大你買貴貨的風險。

記住，我地投資唔係想賺到盡。而係在合理風險下，賺取最大回報。

2) 國泰（0293）的質素只是一般。其中一個風險，是油價，睇翻佢過往多年，油價對佢成本影響好大，令佢盈利十分波動，就算佢利用對沖，都唔係好成功，反而試過因對沖而蝕大錢。

另外，航空業對經濟週期較敏感，收入不穩，同時唔算係一個好賺錢的行業，因此這股的質素只是一般，此股不宜作為月供目標。

其餘3隻，用來月供都可以，美團點評（3690）有潛力的，但不確定性都高，只可小注月供。

3) 成交量，參考價值好低。有無碎股，其實都唔重要。

你要記住，我地係長線持有一些優質股，而唔係短炒。我地著眼點，應該係企業質素、行業發展、財務狀況等。

我建議你，可以睇我寫架"80後百萬富翁"、"財務自由行"和"股票勝經"，都適合初學者，可以令你更深入了解成個財富增值的理念。

------------------------------------------------

Q21617：

龔成老師你好！本人（31歲）與丈夫（34歲）共月入7萬，育有1子，現金大約有50萬，持有股票價值約12萬，依家持有友邦、盈富、小米、安碩恆生科技，買左一層公屋自住。

仲有3年供完，市值大約300萬。依家每月大概有3萬蚊流動資金可以用黎投資。

想問下老師，如果想係10年內做到每月被動收入有3萬，可唔可行？應該點先可以做到？

龔成老師︰

由於你已有自住物業，因此在你之後的財富配置上，不用太急增持物業部分，可以利用股票去進行增值，而現時自住公屋，基本上狀態不用有特別變動。過3年供樓完成後，你可以再加大力度投資股票，令財富進一步增值。

要做到每月有3萬蚊現金流這個目標，以股息率6%計，你需要本金600萬。

以你31歲，可以選擇一些「平穩增值股」+「潛力股」作投資目標。現有持股，都係有質素，適合用來增值，可長線持有。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄，即先用$15000月供，另一半就先儲起架策略。

如果你投資經驗唔算高，可以先集中係平穏增長股，潛力股只小注(少於3成)。若你有一定投資經驗﹐可以加大潛力股比重，最多佔組合3-5成，視乎你投資經驗多寡和了解這些股票程度而定。

現時大市只是合理區，你現有50萬資金可以先投入多10-20萬，用"分注"形式，慢慢買貨。餘下資金和每月所儲倒的資金，就等大市出現一定程度的下跌，才大力度掃貨，然後長線投資。

我假設投資回報有10%（連股息再投資），你每月投資$30000 + 現有資產62萬(現+股票)，10年後大約會增值至720萬，故這樣安排相信很大機會達至你的財務目標。

------------------------------------------------

Q21618：

老師你好，小弟現年31歲手上有20萬資金想入市投資股票。

最近有留意0002, 0003, 0012, 2800, 6823想從中開始投資，不過有部分股黎緊都會除淨，理解到一般情況下股價係除淨日後會回調，

如果我目標係長線持有以上股票的話，請問我係唔係應該等除淨日後先開始入市？多謝老師指教。

龔成老師︰

你對除淨派息的運作，似乎有少少誤解。

如果你要收到股息，必需在「除淨日」前一天，依然持有股票。「除淨日」，其實就是用來確認那些股東收到這權益的日子。等到「除淨日」當天才買，派息就唔會有你份。

「除淨日」那天，股價就會扣除派息部份，例如原來股價$10，派息$1。那麼「除淨日」就會將股價，從$10下調至$9，以反映派息動作。

所以，假設不受其他市場因素影響，單係除淨這個因素，除淨日股價下跌，係正常。

而「派息日」，就係這班合資格股東，正式收到股息的日子。

由於「除淨日」股價會下跌。而下跌比重同收到息係一樣，所以只係左手交右手動作。因此，你唔會在此期間前後做買/沽貨，而出現任何著數。

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時31歲去計，應先集中做好增值部份。你所講的股票都有質素﹐但中電(0002)、香港電訊(6823)增長力較弱，主要係收下息，不建議你持有太多。

策略上，你可以較集中投資在「平穏增長股」和「潛力股」上。如果你覺得自己經驗尚淺，想先保守少少，用中電(0002)、香港電訊(6823)都係可以。

現時大市只在合理水平，你20萬可以先用一半，以分注形式，慢慢入貨。餘下的另一半現金，我地就等機會，當大市出現較大回調，就加大力度掃貨，然後作長線投資。

由於「潛力股」係需要一定經驗，你投資經驗較淺，建議你先小注，大約佔組合3成左右。此期間，你要努力提高投資知識，到有一定水平時，你可以慢慢將佢調升至5成比重。

------------------------------------------------

Q21619：

你好，我由2020年中開始到今年5月在不同的日子持有的股票比例：

00941 10,000股
02628 10,000股
00003 10,000股
03988 5000股
700 100股

另有現金200,000

以上比例會唔會太不平均，比例太重放在0941？

呢幾隻都係股息很不錯的股票我才選上的，但其實這個想法是否錯誤？求解答！謝謝！

龔成老師︰

你現時持有的股票，大體上都有質素，可以長線持有。

但中國人壽(2628)增長力，近年明顯係弱左，你可以考慮沽少少，換去其他優質股。

另外，任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

你現時中國移動(0941)，佔成個組合一半，明顯係嚴重偏高。你必需慢慢減持部份，換至其他優質股，去平衡風險。

至於以上股票是否適合你，要睇你年紀、經驗和風險承受能力。

好以騰訊(0700)這類潛力股，增長潛力大，但同時間波動性都較高。比較適合年青、有經驗的投資者。否則，不宜持有太多。

至於中國移動(0941)、中行(3988)這類收息股，增長力好弱，但勝在有穏定的派息，風險較細。適合較年長、或者投資取態好保守架人士。

而中國人壽(2628)和煤氣(0003)算係2者只間，有一定增長力之餘，都有一定派息，風險度相對係中等。

你現時組合，算係一個偏向保守的平穏增長 + 收息組合。

若係較接近退休之年的人士，或者投資好保守，想以收息為主。941和3988係合適，但其餘幾隻，就未必太適合。

以下是一些優質收息股，給你參考。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

------------------------------------------------

Q21620：

小妹我已經35歲，工作13年，穩定，但無特破，對炒樓有興趣，想做地產經紀，但家庭有負擔，兩難，但我這年齡又是出去衝的最後機會，點算？

我想做有錢人，但呢刻又好多限制！
同埋我唔夠勇氣呀！

龔成老師︰

要成為有錢人，就不能安於現狀，要有勇氣去突破，你已經存在了第一個條件，因為你已懂得對不理想的現象不滿。

地產代理是成為有錢人的5大方法之一，建立銷售團隊之路。

但從事這條路，不確定性一定比你現時工作高。而且開頭時，收入有機會比你現有工作少。如你選擇好這條路，就要有一定決心，一直走行去。

否則，好大機會會令你成個事業發展，變得進退失據，你要明白這一點。

較好的方法，就是你一邊做現時的工作，一邊尋找一些可以「不辭工但又能創富」的模式（因為我從你的文字，已見到你勇氣不足，如果這刻不足，只能暫時留在原工作先）。

例如你利用投資，好好滾大資金。

然後，到了資金有一定的水平時，你在負擔上較安心，而你又有足夠的勇氣，到時才跳出去。

同時，你可以在這段時間，結識一下地產代理，多了解佢地的工作。（甚至做兼職，當然，你要了解現時正職是否容許，或當中風險，所以你自己衡量，如果真的做兼職，當見到自己這方面真的有發展時，先全力去做。加油啦！

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21581-Q21600）

Q21581：

你好，龔sir ,有啲迷惘，想請教下；由於疫情持續、生意收入大減一半、現在每個月收入勉強只能養活一家四口、已經沒有額外金錢作投資...

手頭上有三份保險，大人那兩份供了10年及小朋友的只供了兩年....

我諗緊應唔應該cut 左份保單....用來供股又好、其他投資也好....

現在保險變成好似每個月的消耗品、好大負擔⋯⋯兩公婆以前沒有考慮周長便買左，一供便供了10 年....

小朋友成長，開去只會越來越多，生意不滯下、開始愈來愈擔心

希望老師能夠比小小意見或方向，屋企得我一個人搵錢。開始感到有壓力

龔成老師︰

其實"保險"主要係用來防守，透過當中保障，去將你的人生風險分左比保險公司。因此，保險你係要買的，但只要買足夠保障就可以。

儲蓄成份架保險，唔係唔可以買。如果你個人風險承受能力好低，或者完全無投資能力，這類保險都有持有價值。但用來做財富增值，效率就不算太理想。

你要先了解翻，你保險係保障，還是儲蓄類。如果係保障，我建議保留。因為你取消左，唔一定可以用以往條件買翻。

如果係儲蓄類，又就供完，我建議你供埋佢較好。

若你覺得保險供款，對你造成好大壓力。你可以了解翻你持有保單，有無短期停供的方法。如果有，你可以考慮短期停供，去減輕你生活壓力，詳細你可以向保險公司了解。

另外，你要記住我地投資，永遠都係先做好防守，才會去進攻。

記住，成個財富增值，係一個全面和長線計劃，當中包括考慮你家庭開支、生意、和其他投資項目等。

現時你收入受疫情影響，資金應優先處理好日常生活部份，再預留半年開支，作應急錢。

你唔好急住去投資，要先處理好家庭。之後，就係你生意部份。最後再有餘力，才用優質股去增值。總之，你唔好操之過急。

你要明白，一盤生意做得好，回報係會比投資優質股大。所以，我會建議將生意，放在較前位置去考慮。

現時疫情造成的經濟問題，相信只會係中短期，長線會重回正軌。只要你保持正面心態，事情就會自然變好，加油。

------------------------------------------------

Q21582：

老師早晨！我是投資新手，2月頭開始接觸股票。入手了1137（$15），0175（$25）和3690

（$396）。不幸地入手不久後就開始跌。由於第一次接觸股票即失利，心情十分徬徨！

究竟應該止蝕離場還是堅守？而它們的前景又如何？求老師你為我指點指點。

龔成老師︰

投資前，做好估值去避免買貴貨，係重要。

但當你已入貨（不論買平左，定貴左），其實你都唔應該太睇重"買入價"。因為當你買入一隻股票之後，你是否繼續持有，關鍵位應該係企業質素、前景。買入價，已變成一個心理因素。

這3隻股票都有質素，有長線投資價值。吉利（0175）無問題，但美團（3690）架業務係較新，不確定性都高，持有無問題，但不建議太多，同時要明白股價上落較大。

而香港電視（1137）則有兩點都存有風險的。

第一，佢都會依靠人的因素，王維基成為了公司最值錢的資產，佢的想法好多，有生意頭腦，但我對這類太依靠個人的企業，不建議太過大注。

另外，這企業現時搞網購，有增長力的，但同時存有一定的未知數。。

佢多年來不斷在燒銀紙，雖然佢的業務的確增長中，並初見盈利，但長線能否維持，還需觀察。

所以，這2隻股票不宜太大注。如果佢地只佔你組合很少比重，長線持有係無問題。

------------------------------------------------

Q21583：

龔成老師，你好，我今年33歲，搵$22000一個月，我之前有短炒港股，但計返玩左咁耐，無乜點贏，宜家買左你本股票勝經，想學多啲投資知識

我有買美股作長遠投資，每月會買3-4股，因為美股可一股一股買，成本低，可輕易設組合，等同月供股票咁。

以下組合唯獨百度高位入左，現在跌左近30%，未知要唔要調一調倉，同埋我個組合新舊經濟都有，唔知啱唔啱，麻煩老師比少少意見，感謝感謝。

股票如下；

百度265 入
嗶哩嗶哩 110 入
愛奇藝 16.7 入
ARKK 123.99入
AMC 9.69 入

台積電 118.55 入
美國運通147 入
卡夫亨氏 38.9入
可口可樂 51.9 入

龔成老師︰

我想你先清晰2個概念，首先，我地投資股票，係希望買入一些優質企業，透過佢自然增長，達至財富增值目的。

重點係長線持有隻優質股﹐唔係去做短炒，因為中短期走勢無人知。但長線持有，企業質素一定會反映在股價當中。

第二，唔好覺得買入一隻股票入場費低，就係抵。我地是否買一隻股票，要從質素作考量，而唔係買入成本。

若你買的是優質股，可能1手要5萬蚊，入場費係貴，但因為有質素，所以可以再升。相反，如果係劣質股，就算入場費只要$100，都可以再跌。

所以，我地重點應放係「質素」上。

我唔係話你1股股買美股，當係做月供儲貨的方法有問題。只係想提提你，唔好用買入成本多少，去判斷投資價值，而是要以「質素」來作判斷。

你組合中股票，大致上都係有質素，可以長線持有，不過科技相關股的持股比例開始有少少多，你要注意會否出現集中風險。

另外，有以下3隻，想你留意翻。

愛奇藝(IQ)有質素，但現時尚在未有盈利階段，不確定性較大，不宜持有太多。

AMC Entertainment Holdings(AMC.NYSE)業務主要是經營劇院，市場包括美國、多個歐洲國家、沙特阿拉伯等。

質素都算有，但唔係好高。近年受疫情影響，2020年出現大幅度虧損，出現破產風險。

此股有一定風險存在，投資與否，你要自己衡量。同時，你預佢中短期都會較波動，長線才會慢慢轉好。整體而言，此股只宜小注投資。

百度（9888）有質素，有獨特性，長遠發展不差。

佢係全球最大的中文搜索引擎「百度」的營運商，係內地用家搜尋資訊主要對口，用戶規模突破10億，百度App日活潑用戶超過2億，多個指標都處中國第一。

業務上，佢擁有好強大互聯網基礎的領先AI公司。自2010年起一直投資AI以提升搜索及變現能力，並使用核心AI技術引擎「百度大腦」開發新AI業務。

我睇翻一些報告：

1. 佢擁有中國最多的AI專利數量以及AI專利申請數量。

2. 按累計拉取請求計，百度的深度學習框架飛槳居中國深度學習框架榜首，全球排名第二，僅次於Facebook Pytorch。

3. 按開發者數目計，百度開放式AI平台擁有超過數百萬名開發者，係中國最大的開放式AI平台。

4.按開發者數目計，係百度雲基礎設施上運行的Baidu OSChina是中國最大的開源活動開發平台，全球排名第三。

百度核心業務（唔包括愛奇藝）由AI驅動，為其貢獻超過70%的總收入，主要提供基於搜索、信息流及其他在線營銷服務，以及來自AI新領域的產品及服務。

並廣泛使用AI技術開發創新營銷服務（例如動態廣告），為各搜索用戶推薦最適合的營銷客戶產品。

現時佢坐擁不少資訊和客戶群，就可以利用佢地去發展很多不同業務，可以話係一個好大的優勢。佢收入不差，長遠有發展，但由於本身有相當規模，因此，未必是高速增長型。

百度在規模和質素上，一定係有。但近期科網股波動，風險高左。

雖然你係高位入左貨，但此股長線有增長力，只要唔係佔你組合太高比重，持有係無問題。若佔比重偏高，就最好沽少少，去平衡下個風險。

------------------------------------------------

Q21584：

Hello ar sir！剛剛完成了你的8堂基礎班，坦白講，放工後再上3至4個鍾堂真係幾攰，不過8堂我都非常專心，至少比我以往讀書專心，哈哈。

首先課程係自己揀，我亦知道內容甚至影響一生。

黎緊呢個月要再重溫整合你的筆記，謝謝你既分享。雖然我唔敢講課程能夠令我馬上致富，但以下幾點對我最大影響：

1. 你個句“要將數字意義化”，我覺得係精粹，意義化即係分析，分析不單能夠解讀過去，甚至預判將來。不只股票投資，工作生活等事情上同樣有幫助。

2. 分散投資，考慮風險再考慮回報。

3. 耐性同堅持。等機會入巿，等企業成長，有耐性同堅持既人比較大機會成功。

4. 我喜歡你的正面思想及不斷吸收別人的長處為已用。我跟你一樣公屋出身，我的親友都係基層巿民，我細個就發現我d親友一d都唔蠢，

至少係賭錢同出古滑上佢地係高手，但佢哋不敢訂立大目標，沒有偉大的理想，結果貧窮限制他們的發展。

我覺得除了理財的書籍，我覺得你亦十分適合寫勵志書或舉辦人生規劃課程。城市生活令人壓抑，不少人多多少少都有d情緒病，精神健康欠佳或缺乏人生方向。

相信你能幫到這些人。

希望以上既回饋，可以比到你參考，繼續在課程內容或者你既教學範疇上更進一步。

龔成老師︰

無錯，就算係日常生活，好多事情我地都唔好只睇表面。要認真了解眼前資訊，在背後所代表的意義。

其實好多人都有目標，知道未來想自己變成一個怎樣的人。但實行上，未必用對正確方法。

特別係投資範疇，好多人希望透過投資股票致富，但認知上，都停留係大部份散戶，那種「一般人」的思維。

因此，希望透過課程，灌輸一些經驗、正確投資理念和知識。希望可以幫助佢地，從「一般人」思維，跳進「有錢人」思維，從而增高成功致富機會。

我好多謝你寶貴的意見，但因時間關係，相信未來一段時間內，我都會先以投資理財作主導。希望先從我專業範疇，去幫助有需要的人。

但你的建議好有意思，我會認真考慮，謝謝你。

加油，記得多溫書，保持進步！

------------------------------------------------

Q21585：

你好 龔老師，之前有睇開你的理財真人SHOW，直至今年2月先開始投資股票。我經富途牛牛買股票，想學習老師講嘅長線投資 ，應該放邊幾隻或增持邊幾隻。

我的資產分佈及投資未來方向可以點改善。謝謝老師

25歲

港股:
6690.HK: 1000股 $32.86 (想沽)
6993.HK: 2000股 $11.08 (想沽)
2382.HK: 100股 $160.40
3067.HK: 600股 $17.58

美股:
AAPL.US: 10股 $134.30
DIS.US: 5股 $188
JNJ.US: 5股 $162
TME.US: 40股 $19.575 (想沽)
ARKX.US: 30股 $20.875 (想沽)

另打算增加個別港美股
1177.HK
1810.HK
BRK.B.US

龔成老師︰

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時25歲去計，是財富增值的黃金時期。除了盡力儲蓄、投資、學投資知識外。也要把握這個黃金時間，做好財富增值部份。

策略上，你應以增值為主，可以用一些「平穏增長股」和「潛力股」作目標。

你現時持有股票，都係有質素，建議你長線持有。至於3隻新增目標，都可以考慮。

但留意，ARK Space Exploration & Innovation ETF(ARKX)不確定較大，不宜持有太多。

另外，藍月亮集團（6993）、海爾智家（6690）其實都有質素的，你都可以長線持有，只要貨不過多就得。在你衡量是否持有一隻股票時，不要著重短期的股價表現，要睇翻長期的企業價值。

由於你無太多投資經驗，未必對平貴估值方法，有太深了解。建議你先用月供，去儲優質股，這樣有助你降低買貴貨風險。

你每月先用5成儲蓄做月供，其餘先儲起，用一邊月供一邊儲蓄的策略。

選股上，你可以投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

增長力較強的，可選安碩恒生科技(3067)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）。但佢地波動性和風險會較高，你要自己平衡。

你現時投資經驗不多，可以先集中係平穏增長股，甚至盈富(2800)。到你有一定投資經驗﹐才慢慢加大潛力股比重，最多佔組合3-5成，視乎你當時投資經驗和了解這些股票程度而定。

餘下的另一半現金，我地就等機會，當大市出現較大回調，就加大力度掃貨，然後作長線投資。

------------------------------------------------

Q21586：

老師你好,本人現年33歲 有兩子 想用他們的利是錢投資 (約30000)應該買那隻長線股好？

另外正在開始月供股票 (2000盈富) 尚有1000元可用 但銀行無3067月供。

龔成老師︰

小朋友儲錢方面，你可以儲盈富(2800)，佢係包括55間質素不錯上市公司股票的組合，有一定增長力。

若你想增長力較高，可以儲安碩恒生科技(3067)。但此股波動性會較大，要睇翻你自已風險承受能力。

基本上，以你小朋友年紀計，持有以上股票都係可以，但你明白當中風險。

現價計3067無得月供，你可以每2個月自行買1手，都可以做到月供效果。

但緊記，現時大市只在合理區，每月儲蓄不要盡用。要儲起部份，等大跌市時才出手。

------------------------------------------------

Q21587：

早晨，龔sir 請問2158應現在放嗎?

係64蚊買完話跌到32，今日升返上45應該止蝕嗎

龔成老師︰

唔好太睇重"買入價"，因為當你購入一隻股票後，你是否繼續持有，關鍵位是企業質素、前景。買入價，只係一個心理因素。

醫渡科技（2158）有潛力的。可長線。

提供基於大數據和人工智能（AI）技術的醫療解決方案。集團主要向醫療行業的主要參與者（如醫院、製藥、生物技術及醫療設備公司、研究機構、保險公司、醫生和患者以及監管機構及政策制定者）提供服務和合作。

根據大行報告，於2019年，集團收入在中國所有醫療大數據解決方案提供商中排名第一，在中國醫療大數據解決方案市場中的市場份額為5.0%。

睇翻大行對佢2020-23年預測，收入和毛利增長分別為73%和83%，增長力唔錯。

佢平台有一定擴張性，長遠受惠更多醫療保健客戶使用平台。不過公司客戶過度集中，以及依賴公共部門。

但佢依然係在燒銀紙狀態，係一個扣分架地方。整體算係有質素，但要注意風險，投資時唔建議大注。

若你現時持貨不多，無問題，作長線投資就可以。但如果佔比重較高，最好沽少少，去平衡翻個風險。

------------------------------------------------

Q21588：

龔sir，你好!Follow咗你個page好耐，學咗好多野同埋亦深受你的鼓勵，今次係第一次pm你。

我想問吓你對VR產業未來嘅睇法係點? 我認為佢嘅發展不會差於電動車，雖然現在大多只用於娛樂，但係未來在教育，醫療層面的使用相信也不少。

但是距離技術成熟還有一段路。請問阿SIR如果我看好這個產業，會推薦投資哪一間公司?

謝謝!

龔成老師︰

其實現時虛擬實境(VR)產業，除了娛樂，已應用在不少行業上，例如建設、設計、教育等方面。

這種技術可塑性好高，相信不久將來，會有更多不同行業和場景，會應用到VR技術，前景是正面的。

暫時我未有特別研究，唔清楚邊間企業，會較直接受惠。

但你可以從不同行業，特別係已應用VR技術的行業中找尋。有邊D企業或行業，會因為VR技術，令佢本身價值或者成個營運效益有較大提升。

你可以進一步研究，了解佢是否有投資價值。

------------------------------------------------

Q21589：

龔大哥，求教 493 同9997點玩好 兩隻都炒落咁款 我想玩反彈岩唔岩？

龔成老師︰

我地投資股票，係希望買入一些優質企業，透過佢自然增長，達至財富增值目的。

重點係長線持有優質股﹐唔係去做短炒。我地唔會去估走勢，因為中短期走勢好難估。佢可以受好多因素影響，好似資金流向、市場氣氛等等。

但長線持有，企業質素一定會反映在股價當中。

國美零售（0493），從過往分析，質素只是一般。

企業連續出現虧損，品牌價值遠不及從前，優勢不強，雖然正加強網上網售網絡。

唯一的賣點是創始人黃光裕回歸，可能帶公司變強，但發展仍有未知數，如果以這刻的業務、發展、現價，整體的投資價值唔算高。

當然黃生可能帶領公司變到好唔同，但這點真的無得計。

此股不宜持有太多，若你持股較多，應先沽出部份。餘下的持股，可以守。

康基醫療（9997）睇翻佢的資料，佢係中國最大的國內微創外科手術器械及配件(MISIA)平台。

根據資料，按銷售收入計，2019年中國MISIA市場規模達到人民幣185億元，集團在國內廠商中排名第 一，在所有廠商（包括國際和國內廠商）中排名第四，所佔市場份額為2.7%。

根據資料，2019年銷量計，集團在中MISIA市場的多個細分領域，包括一次性套 管穿刺器、高分子結紮夾、第三類一次性電凝鉗以及重複性套管穿刺器和鉗中亦排名 第一。

佢不是無質素，現時回調，主要係因為上市定價唔平，現時只係回調至較合理水平，但都仲有少少貴。

若你持貨不多，可以守。但持貨較多的話，建議你沽出部份，去平衡個風險。

------------------------------------------------

Q21590：

龔sir，你好。今年30，月入35000，得我一人收入，有两個小朋。

太太就間唔中就買下，手上都有隻2186綠葉制藥6000幾股。

佢之前放咗幾隻唔知咩股蝕咗4萬幾

而我自己就冇乜投資經驗，但都會睇你facebook同下財經新聞以及同聽身邊啲人取下經

因為以前又冇乜點理財同儲錢習慣，宜家我哋就開始想學習你嘅長遠投資組合當儲蓄。 希望學習到同得到一個好嘅理財習慣。

常見龔sir你都推介2800盈富基金，3067安碩恆生，1177中國生物做月供

而我都有幾隻想請教阿sir你提議下可否做月供?

1308海豐國際
2269 藥明生物
1810小米
5滙豐控股

2800盈富基金
3067安碩恆生
1177中國生物

請阿sir指教月供邊隻好，月供咩組合好?

同月供每隻供嘅資金分布係幾多，每月應該可抽$8000月供。

最後一問太太隻2186可以放出。

龔成老師︰

我地做財富增值，最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

由於你無投資經驗，用月供會以避免左買貴貨的風險。只要你月供組合，係選對一些優質，而又適合你的股票，其實成個增值效果，已經會係唔錯。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你30歲，應以增值為主。你所講的月供股票，都有質素。但匯控(0005)只係收息股，增長力唔高，唔建議你用。

而你組合當中，不少係潛力股類別(2269, 1810, 3067, 1177)。佢地增長力高，但同樣波動性都好大，你投資經驗不多，不宜太大注。

月供配置上，你可以先用$4000供盈富(2800)，用佢作主力。再月供$1000海豐國際(1308)和其中3隻潛力股。

現時大市只在合理區，除了月供$8000外，你都要額外預留一些資金，等出現大跌市時，可以動用來買平貨。

至於綠葉製藥（2186），都有質素。佢主要銷售腫瘤科、心血管系統以及消化與代謝三個領域的新藥品，基本上都係有市場的，其實長遠又不是太差，只是市場有時對佢的增長力會有不同。

但近年佢質素的確有少少轉弱，但相信最差時間已過，這股本身的風險較高，唔建議投資得太多。

若你持股佔組合比例唔多，你可以長線持有。如果佔比重較大，就最好沽少少，去平衡個組合風險。

------------------------------------------------

Q21591：

你好！我們一家四口，現金有$100萬，沒有自住物業。

現在有2難，應否拿100萬作首期買樓？

但用了便沒有餘錢投資。

如果月供股票，那隻較好？

龔成老師︰

每個人都有自住需要，長遠最好都有一個自住居所，以免承受租金波動的影響。

但由於你現時資金不多，如果買樓後，完全不能維持投資增值，就唔係咁理想。

我建議你先用優質股，去累積一筆資金。之後，再去考慮買自住居所，咁會較好。(詳細方法，你可以睇我本"5年買樓4步曲")

月供方面，你可以選擇一些「平穩增值股」+「潛力股」作投資目標。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄，另一半就先儲起架策略。

由於「潛力股」係需要一定經驗，如果你經驗較淺或較年長，只宜小注，大約3成左右。若你係較年青，而且已有一定經驗，你可以投資到約5成比重。

餘下現金，我地就是等大跌市時，才出手掃平貨。

------------------------------------------------

Q21592：

我每月可以儲$8500，比例上咁安排適合嗎

3067，$5000
2800，$2000
現金，$1500
每月月供

因為我本身係中銀月供，但中銀冇3067可月供

頭先上網search過有間XX證券行有3067可月供，免存倉費，佣金收0.0675%，比其他證券行平

Sir，唔好意思比較多問題，頭先上網睇過證券行同銀行比較月供股票，如果係證券行月供股票，會有風險，有機會倒閉。

但銀行又月供唔到3067，只可一手手買，但銀行買，手續費貴。可否比d建議如果想供3067應該點做。

龔成老師︰

其實香港對金融機構監管係唔錯，證券行出問題機會，唔算好大，可以用佢作投資渠道。

如果你都係覺得銀行穏陣D，安碩恒生科技（3067）你每月直接一手手買就可以，都做到月供效果。

至於你資金分配上，有少少進取。以你近30歲年紀，安碩恒生科技（3067）這類潛力股，最多佔5成左右好了。

若你自問投資經驗較一般，最好再調低多少少(至3-4成)，到你有經驗才重新調高。

因為潛力股增長力係有，但風險同樣高，故不建議初階投資者持有過多。

而預留現金比例，都可以調高翻少少。因為大市未算開始平，只係合理水平，不宜投入過大資金比重。

------------------------------------------------

Q21593：

我用咗幾萬元買咗1653 Mos House，當初係喺1.13買入，但現時價位已跌到0.41！

1. 請問呢隻股穩陣的嗎？

2.你覺得是否老仟股？

3.我現時已蝕了幾萬元，請問我現正是否應該放嗎？還是放住喺度先？

龔成老師：

MOS HOUSE（1653）於香港銷售及供應外國製瓷磚，即石英、陶質及馬賽克瓷磚。此外，亦銷售衛浴潔具（浴缸、臉盆及其他配件）。產品均由意大利及西班牙進口。

企業無乜獨特性，加上近年出現虧損，而佢過往一直都唔太賺錢，整體的投資價值不高。

你的買入價明顯只炒作的價，佢根本唔會值該價，現時的股價算是合理價，你等佢有反彈宜減持部分，之後再等機會賣晒。這股長線持有的價值不高。

------------------------------------------------

Q21594：

龔成老師，上年我買左掃管笏Oma by the sea 一個471尺兩房的單位，584萬，老師覺得嗰區發展如何?

會唔會有機會升到$17000，一尺?

我諗住長線投資的，謝謝老師的分析和建議！

龔成老師︰

屯門是大型的住宅區，商業活動少。始終離市區較遠，因此樓價與市區有距離。

但隨屯門港鐵通車，屯門區交通變得便利。

但始終屯門跟市區有一定隔離，而掃管笏雖在屯門﹐但隔離港鐵站較遠，未能明顯受惠。

因此，掃管笏升值潛力有少少，但唔會話好高。因為所有的利好因素其實已經反映左，而掃管笏各方的配套都唔會再有明顯改善。

------------------------------------------------

Q21595：

Sir,還有一個買賣問題想請教下，如果一隻股票賺了錢，賣取一部分獲利，一部分持有，這是容易做到的。但相反買入一隻股票賠了錢，應該要怎樣做

龔成老師︰

你要明白一個概念，我地持有一隻股票與否，關鍵位是企業質素、前景，不要被買入價影響。因為我地買股票就是買企業，重點永遠都係企業質素。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心，照持有就可以。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

------------------------------------------------

Q21596：

龔sir 你好。有個疑問想問,本人現時已月供股票$4000 領展同盈富

如果每個月還有$6000剩。咁月供日本樓收租好還是加碼月供股票好呢？thx

龔成老師︰

日本樓，我無特別研究，你可以從佢租金回報率和對日本樓認知度，去決定是否投資。

而日本樓認知度，會是你投資的其中一個關鍵，到底你有多認識這項目?「不認識就不投資」，如果你真的已了解當地的物業市場、租務市場、法例、經濟發展，那可說是過了第一關。

土地是有限資源，所以長期一定上升，但你都要分析這地方的長期土地供應。另外就是匯價如何，就算物業有穩定租金，以及樓價上升，但若然匯價不穩，都會對你的投資造成打擊，這方面不能忽視。

你應該了解當地貨幣過去的變化，以及將來的強弱分析。

如果你對日本樓唔係咁了解，或者回報唔算高的話，你$6000用來月供股票會較好。

現時大市在合理區，每月儲蓄唔好盡用。這$6000中的$4000，建議先儲起，用來等大跌市機會。

而餘下$2000，你可以因應你年紀，去決定加入邊隻股票去月供。

若你係年青人，可加入一隻潛力股。如果你中年至退休人士，或者你投資取態較保守，你可以加一隻平穏增長股。

------------------------------------------------

Q21597：

龔成老師，有一些問題很急切的想請教您：

我好朋友的父親，在十幾年前某些原因，所以將部分資金轉移到他的妹妹（中銀），即我朋友姑姐的戶口。

但存摺和提款卡和密碼，以及買賣股票的密碼都在她父親手上，所以十幾年來都能賣買，但她爸爸幾個月前突然離世，搞父親的遺產需要一段時間。

現在已知的是父親有一個股票戶口（中銀），另外幾個儲蓄戶口，和大陸有一個定期戶口。

現在能動用的資金可能就是她姑姐戶口的股票，不過，這十多年來，世伯已買入不少股票，而她初步問過銀行，整個股票戶口不能直接轉名。

世伯離世後，她姑姐有說過可以繼續用她戶口買賣，但伯母對錢很擔心，很想轉回戶口的股票，又不知能否全部轉名，或者是先賣出一些比較不優質的，

然後再轉名，而她們對這些又不太熟悉，又不知該問誰，所以，很想請教一下您的意見。

以下是她"爸爸"這十多年來買的股票，以及買入價：

0123 越秀 40000股 買入價：20000股1.67、20000股0.99
0386 中國石油化工股份 2600股 買入價；2000股7..19
0536 貿易通 30000股 買入價：1.96
0579 京能清潔能源 4000股。買入價：3.42
0732 信利國際 6000股 買入價：3.69
1171 兗州煤業 6000股 買入價：2000股11.86、4000股13.62
1415 高偉電子 10000股 買入價：2.1
1418盛諾集團 20000股 買入價：1.23
1508 中國再保險 3000股 買入價：2000股2.51、1000股2.49
1569民生教育 10000股 買入價：1.8
1618中國中治 3000股 買入價：2.3
2038 富智康集團 6000股 買入價：1.42
2369酷派集團 16000股 買入價：8000股3.79，另外8000唔知買入價
2638 港燈-SS 1000股 買入價：5.23

由於她爸爸之前一直都是賣出一些賺錢的股票來維持生計，而她看過以上的股票大部分都未到買入價，帳面已蝕十幾萬，

想問問老師以上那些股票可賣出吐現、止賺、止蝕。以及那些是優質股票，那些值得保留，以及轉名等等。

還是她可以以現價賣出，然後再用另一戶口以現價買入，這樣會不會蝕很多？她們現在很惆悵，真的很需要老師的意見，懇請老師幫忙。

另外，以下是她"媽媽"股票戶口的股票，也是世伯幫她買的，想問問老師那些可以賣出止蝕，以及保留一些優質的股票：

0005 匯豐控股 713股 買入價：買了多年，我找不到買入價
0718 莎莎國際 6000股 買入價：1.73
0347 鞍鋼股份 5200股 買入價：8.93
0476 中國動力控股 10000股 買入價：找不到買入價
0536 貿易通6000股 買入價：2.030
0732 信利國際 4000股 買入價：3.69
1398工商銀行 6000股 買入價：6.15
1415高偉電子 10000股 買入價：4000股3.74、6000股2.99
1638 中國中治 4000股 買入價：2.3
1638佳兆業集團 2111股 買入價：3.45
1898中媒能源 6000股 買入價：3.25
2362 金川國際 6000股 買入價：1.23
2800盈富基金 2500股 買入價：28.1
2845 GX中國電車 50股 買入價：123.8
3067 安碩恆生科技 200股 買入價： 19.26
3338中國龍工 5000股 買入價：4.49

她這幾個月實在很徬徨無助，所以，盼望老師能幫忙。

謝謝老師。

龔成老師︰

全部轉名到你朋友媽媽戶口，係可以。一般用這個方法，費用會較平。但你要問翻中銀，因為每間銀行和證券行收費，都不一樣。

若你打算用同時間一買一賣，去變相轉戶，都係一個方法。但變相要支付雙倍經紀佣金，而且可能買入和賣出價未必一致，會有價格波動的風險。

另外，你要緊記一個投資重點。我地持有一隻股票與否，關鍵位是企業質素、前景，不要被買入價影響。因為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心，照持有就可以。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

唔係因為佢帳面賺，就覺得佢長線一定好。唔好因為而一刻帳面蝕，就覺得此股無投資價值。記住我地係睇質素，唔係睇價位去做決定。

先講你朋友"爸爸"戶口︰

京能清潔能源（0579）、信利國際（00732）、兗州煤業股份(1171)、高偉電子（1415）、中國中冶（1618）、富智康集團（2038）質素較一般或者波動性偏高，都不宜持有太多，建議最少要減持部份。

盛諾集團(1418)投資價值不高，換至其他優質股，長線會較理想。

酷派集團（2369）在幾年前我已經有點怕佢，第一，玩財技，第二，2016年核數師意見為「不表示意見」，2017年為「保留意見」，反映核數師對盤數有問題，第三，非常多散戶炒這股，而散戶永遠是輸的一方，因此我對這股一直有保留，就算數年前有讀者問我都是。

佢之前仲要停過牌，其中一個原因，是由於賬目問題，我見佢2018年度的核數師部分，出現「修定報告」，反映盤數有可能有小小古怪，投資價值不算高，建議沽出較好。

你朋友"媽媽"戶口︰

鞍鋼股份(0347)、信利國際（00732）、高偉電子（1415）、中國中冶（1618）、佳兆業集團(1638)、中煤能源（1898）、金川國際（2362）、中國龍工(3339)質素較一般或者波動性偏高，都不宜持有太多，建議最少要減持部份。

中國動力控股(0476)佢營業額好細，而且一直處嚴重虧損狀態，暫時唔見有明顯投資價值。

其餘無提及的股票，都有質素，她長線持有就可以。當中絕大部份，都係提供現金流的收息股。

由於持有目的係收息，所以佢不需要太在意帳面賺蝕，只要長線持有收息，就可以了。

------------------------------------------------

Q21598：

其實我都唔明，你隻1211，自己都計到股價貴，點解你之前唔放大部份？

龔成老師：

因為無人能預期股價升跌，如果我賣出，而佢股價一直唔跌，當企業價值不斷向上，我就會買唔翻，佢會由貴去翻合理。

我擔心買唔翻的風險，多過股價跌的風險，我著重資產，不著重短期股價。記住，現金不是真財富，資產才是。

------------------------------------------------

Q21599：

龔sir,請問我地應該點樣解讀股東增持，同減持嘅動作？
同睇好/吾睇好企業有冇關？

龔成老師：

如果股東增持或減持的%好少，就不用理會，佢可能自己都要取現金，或現金多想投資。

但如果%較大，就反映佢都睇好/睇淡公司，或反映現價處平/貴。

這些動作，參考下好了。我地一定以「企業」作為分析的核心。

------------------------------------------------

Q21600：

成哥，第一次膽粗粗傳訊息俾你，我只有26歲，今年我快29歲了。咁就3年，時間真不留人。

當年26歲，戶口只有10萬現金，一份供梗既儲蓄保，0股票。今日，我快29歲了，戶口中有38萬現金，18萬左右港股，5萬8左右美股，總資產為60多萬港元。

儲蓄保險亦供完，當然並不是一個咩大數，或者一件咩值得驕傲既事，只係隨住時月，我除左老左之外，戶口都叫隨年漸長，都係一件值得安慰既事。

多謝你當年啟發左我，3年來我都係用月供股票既方式買入股票，不論港股或美股，由買入果一刻開始就無放過。

結果，感恩既係我付出既時間好少，甚至我一個月先打開個股票戶口睇一次，但每次睇都會見到有賺。

反而身邊短線投資既朋友，會跟住個市場買入GME丫，晚晚睇住個市，但都仲蝕梗本金。就好似我一年前既訊息所言﹕「身邊聲音煩擾，但我步伐仍舊」。

講講下，好似打日記咁，多謝你繼續睇到呢度。

我想問下下一步我應該點樣做，或者除左股票以外，我仲可以投資D咩去令我既資產平穩增值？

收入﹕4萬多
支出﹕15000
港股(月供金額)﹕盈富($4000)、煤氣($1500)、港交所($1500)、領展($1500)
美股(每月手動買一手，約$9000多)﹕VOO、QQQ、ARKK、SQ、MCD

成哥，我相信好人有好報，多謝你詳細解答陌生人既問題。衷心祝你身體健康，生活幸福美滿。

龔成老師︰

我教的理財知識，只係為你提供一個指引和方向。最終能變成點樣，其實很大程度，係睇你本身所付出的努力，我純粹係助你一把。

我經常講，投資一定係做長線，但其實好多人會唔明白，唔相信。因為佢地依然停留係賺差價的思維。

你身體力行，去證明左長線投資價值，才是最有效的財富增值方法。

希望你保持學習，令自己一直進步之餘，都用你的故事，去感染依然短炒中的朋友，幫佢地重回正軌。

你現時投資組合，係可以。但緊記現時只係合理區，每月資金唔好盡用，要儲起部份。連同現有資金，一齊等大跌市機會出現，才入市掃平貨。

而我地成個財富配置，係講求增長力就餘，都要有平衡性。除了優質股外，都要加入一些其他不同資產，如物業類。

但由於你現時資金不多，可先用優質股增值住先。到有較多資金，可以考慮買較小型物業作跳板，最後買大屋。

我本<5年買樓4步曲>，會有較詳細解釋，你可以買黎睇下。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

解構福臨門｜食富豪飯堂唔使怯！午市$1,200兩個人食點心名菜 飽到要打包
https://bit.ly/3nrpuGS

富豪飯堂福臨門，這個名字真的令人怯一怯。本刊安排了記者及攝影師，放蛇試食一餐午餐，結果用餐氣氛輕鬆，服務態度不俗。至於價錢方面，兩個人結賬要1,200元，價錢是有點貴，不過食得飽又有食物打包，算是不錯。

福臨門
地址：灣仔莊士敦道35-45號利文樓地下3號鋪
電話：2866 0663
營業時間：星期一至日: 11:30am-3pm, 6pm-11pm

解構福臨門｜富豪飯堂逐層深入睇 名人最愛102號包房 超隔音兼配備專用?
https://bit.ly/3vtG0ZB

位於灣仔的福臨門，坐落莊士敦道，樓高三層，甚具霸氣。這間達官貴人御用飯堂，氣氛懾人，一眾平民即使捨得消費也未敢光顧。我們今次逐層解構，其中一樓有間VIP房，除了隔音超強，還配備專用電梯，是一眾名人最愛用的房間。

解構福臨門｜粵菜少林寺 炒條菜心要揀最嫩位 學廚做滿八年先有得炒鑊
https://bit.ly/3nuCPy0

福臨門人稱富豪飯堂，但其實他們更愛粵菜少林寺這個稱呼，全因這裏廚房出品製作認真，一條菜心也只挑選精華最嫩位置。而每道菜餚，更必須是具備八年經驗的炒鑊師傅製作出來。

解構福臨門｜八小時淋六百次滾油造就暢銷炸子雞 大廚公開福臨門名菜竅妙
https://bit.ly/3nAGP0g

福臨門以頂級食府聞名，其中最暢銷的菜式，原來居然是炸子雞。究竟這道廣東傳統菜式為何可以打敗眾多其他名菜？福臨門行政總廚公開箇中竅妙，原來原因無他，堅持傳統和付出心思，才是致勝關鍵。

解構福臨門｜口密唔准大細超 記得客個名 福臨門夥計要具備五大條件
https://bit.ly/3dVJIFw

有「富豪飯堂」之稱的福臨門，出入都是達官貴人。裏面的員工來自五湖四海，不過也要遵守公司一些不明文守則。在福臨門工作31年，現時任職營業部經理的新哥，具備不八卦、對客人一視同仁等五大條件，難怪有不少行家向他挖角。

解構福臨門｜何東彭定康點名食　第三代接班人真心話：富豪飯堂係一個包袱
https://bit.ly/3dYmChJ

福臨門歷史悠久，從創業開始就有不少名人光顧。由當年的富豪何東到末任港督彭定康也是座上客，故這裏被人冠名為富豪飯堂。但今日的接班人開腔，指這個稱號對他來說其實是一個包袱。


解構福臨門｜遭米芝蓮除星 七哥又另起爐灶 第三代接班人：最好方法係分道揚鑣
https://bit.ly/3aMrzIf

福臨門近年風波不斷，先是有兄弟拆夥分家事件；後有大廚跳槽到其他酒店，馬上遭米芝蓮除星。到底種種迹象是否暗示福臨門已經大不如前？




===================================

? 8折全年睇《蘋果》即慳$121！
現有日費訂戶亦可轉訂? http://bit.ly/2YwE3Ma ?
訂閱《飲食男女》YouTube： http://bit.ly/2Md5V2k
Facebook： http://bit.ly/2MJejcp
Instagram： http://bit.ly/2EA3qpR

推薦影片:
【太子餃子店】新移民唔怕蝕底自薦包餃子 粗重功夫一腳踢 老闆刮目相看邀開店：呢個女人唔係女人(飲食男女 Apple Daily) (https://youtu.be/7CUTg7LXQ4M)
【街市尋寶】慈雲山街市 二百幾萬機器鮮製$24午餐肉 肉彈味濃無添加日賣500份 (飲食男女 Apple Daily) (https://youtu.be/rTrYPzECHI0)
【灣仔燒味老字號】17歲做大廚 自立門戶35年 油雞酒味濃 老闆：好做嘅食物唔會好食(飲食男女 Apple Daily) (https://youtu.be/svAF8pKszw0)
【假如沒有天價租】「福食」三老　唔靠綜援靠自己 (果籽 Apple Daily) (https://youtu.be/aUE2oQIDoV0)
【籽想旅行】直擊東南亞首個人妖騷後台　變性舞台一姐的日與夜 (果籽 Apple Daily) (https://youtu.be/CBBq_D0-Lsg)
【娛樂人物】情願市民留家唔好出街聚餐 鄧一君兩麵舖執笠蝕200萬 (蘋果日報 AppleDaily) (https://youtu.be/e3agbTOdfoY)
【這夜給惡人基一封信】大佬茅躉華日夜思念 回憶從8歲開始：兄弟有今生沒來世 (壹週刊 Next) (https://youtu.be/t06qjQbRIpY)

#福臨門 #富豪飯堂 #大劉 #粵菜 #彭定康 #米芝蓮中菜
#飲食男女 #StayHome #WithMe #跟我一樣 #宅在家

飲食男女 打卡大街小巷搵食地圖
https://hk.adai.ly/e/gPF0DIjsB9

《蘋果》每日為你增值 立即訂閱
https://hk.adai.ly/e/kbo0wDsxB9

汲水門大雞魚，要揀住嚟釣 | 『香港釣魚 : 艇釣』青龍頭 {粵語旁白+中英文字幕}
Selection of Chicken Grunt to take away | [Hong Kong HK Fishing : BoatGame] Tsing Ma Bridge {Voice Over + CC}

Business Cooperation and Media 商業合作、採訪通知：tkcmarco@gmail.com
******************************************************************
Media Interview(s) OR Reproduce with authorization 媒體採訪或授權轉載
Media 媒體報導
: Oriental Daily 東方日報 :
【手絲釣魚】岸釣系列#1 數碼港係熱門釣魚點？釣足30條泥鯭！
https://tv.on.cc/index.html?vid=OUGC20200707_900009_01&createtime=1594094281&subsection=468
More...Please refer to the channel description 更多... 請參閱頻道簡介
******************************************************************

==================================================================
YouTube Channel 頻道 : https://www.youtube.com/channel/UCO_5XP-qd-udNxBlzzSzgvw?sub_confirmation=1
Donate and Support my Channel 資助我的頻道：https://www.paypal.me/handlinefishing
==================================================================
Facebook 手絲釣魚交流群: https://www.facebook.com/groups/616740025403230/
Instagram 官方賬戶: https://www.instagram.com/handlinefishing_hk/
==================================================================
You can purchase my gear through the link below 你可以經以下連結購買產品
硬件
(NEW) Insta360 Go 2 - https://www.insta360.com/sal/go_2?insrc=INRW1ZI
Insta360 ONE X2 - https://www.insta360.com/sal/one_x2?insrc=INRW1ZI
Insta360 ONE R - https://www.insta360.com/sal/one_r?insrc=INRW1ZI
Artlist.io Referral link Artlist 介紹碼連結 : https://artlist.io/Handline-861488
==================================================================
Background Music 背景音樂名稱 : If I Were King by Low Light
Source 來源 : Artlist.io
Referral link 介紹碼連結 : https://artlist.io/Handline-861488
Background Music 背景音樂名稱 : Dead-end maze (https://johnnyhk.bandcamp.com/track/dead-end-maze)
Source 來源 : Troglojam
==================================================================

#汲水門大雞魚 #釣魚 #手絲釣魚 #香港釣魚

Sharp呢個牌子相信都冇人唔識，佢地當年係日本品牌製造LCD面板的原祖代表，依家去到2021年勒，佢地既廠都比台灣鴻海收購左，不過好彩佢地既AQUOS 系列都依然有一份堅持，就係用返MIJ日本製造的LCD面板作為素材，而且依家官方定價６０吋都只係一萬蚊樓下的 Sharp 4K TV Aquos，實在係非常吸引。今次小瑟就同大家開箱實測一下呢部咁抵玩的 60"有咩優點同大家入手要留意既係咩啦!!!

-0:00 今次評測嘅係60 吋 Sharp 4T-C60BK1X
-1:16 機身外型細節
-3:17 產品重點規格
-4:50 試片：Netflix 《Emily in Paris》《怪盜羅蘋》《驚天營救》《Mission Impossible Fallout》
-7:18 小瑟小貼士： 如何設定Netflix有更佳效果？
-9:02 試片：4k UHD 影碟 《天能》《水行俠》
-10:15 小瑟小貼士：如何設定畫面提升電影感？
-12:03 小瑟小貼士：聲音設定識得玩，唔同音效有得揀
-13:15 試片：ViuTV, 香港開電視

?圖文片 : https://post76.hk/news/2021/03/sharp-4t-c60bk1x-review/
⚡️討論帖 : https://post76.hk/thread-327084-1-1.html

----------------- ⚡️⚡️⚡️ 精選文章 ⚡️⚡️⚡️ ----------------
?Web: https://post76.hk/
?網店: https://store.post76.hk/
?Mewe : https://bit.ly/38yYT4X
?YouTube: http://bit.ly/3qyrixZ
?FB: http://bit.ly/3bOMZ8Y
?IG: https://bit.ly/3nTarV5

?‍♂️◆最新精華帖◆??
http://bit.ly/2WZa1iC

??‍♂️◆最新影音報告◆?
http://bit.ly/2FtLbBj

??‍♂️◆最新熱門帖◆ ✈️
http://bit.ly/2IDflEh

#Post76玩樂網 #Sharp #Aquos #hometheater #4KTV #HDR #電視評測