雪橇狗之戰（下） . 呢1300公里，都要靠我哋嘅狗腳去行。 . 路上當然好凍，亦有啲雪橇狗病倒，最後有三隻雪橇狗病死。 . 阿森將死咗嘅狗，劏咗分畀我哋食。 . 大家都好耐無食過生肉，其他狗已經大快朵頤。 . 我望住同伴嘅屍塊，呆若木雞，我唔想食佢哋。 . 但我見到阿森行番入帳篷，我知道呢啲就係我哋嘅「晚餐」，今晚我哋唔會有其他食物。 . ， 如果我唔食，我今晚就無嘢落肚，聽日唔夠熱量仲要繼續捱， 我可能會病，甚至會死......然後成為其他狗嘅晚餐。 . 喺呢種環境，一個失誤，就會兵敗如山倒。 . 我合埋眼，一啖咬落去，微溫嘅血液滲入我冰冷嘅牙齒，我諗起一句人類嘅詩：一將功成萬骨枯。 . ， 阿森將所有嘢都安排得好好，每日有充足嘅休息時間，人同狗都保持到良好狀態。 . 但挑戰南極點，唔係咁容易。 . 登上三千幾米嘅極地高原後，我哋嘅食物開始唔夠。 . 陸續有雪橇狗病倒、死亡、成為狗糧，我由心痛變成麻木。 . 我意識到，我已經好耐無食過狗餅，我每餐都係食狗肉。 . ， 問題係，點解會每日都恰到好處地，有狗病死？ . 我偷偷觀察阿森嘅行為，我見到阿森走向一隻病倒嘅雪橇狗，拎住刀，割斷佢條頸。 . 血花四濺，然後馬上凝結成冰花。 . 另一個探險隊成員行埋嚟，阿森同佢講：「狗糧已經用晒啦，為咗啲狗有嘢食，只可以......」 . 只可以，殺狗養狗。 . ， 我同自己講，一切只係意外，行程中比想像中艱險，阿森無準備到咁多狗糧，所以無可奈何。 . 但情況愈嚟愈糟糕，終於有一日，阿森召集晒所有狗，逐隻逐隻摸頭。 . 佢嘅撫摸如此溫暖，但講出嚟嘅說話冷冰無比：「小可愛，表現點？」 . 探險隊成員答：「近排行得有啲慢。」 . 阿森殺咗呢隻叫小可愛嘅雪橇狗。 . ， 「忠忠，表現點？」「好積極。」忠忠逃過一劫。 . 終於輪到我，「旺財，表現......」我屏息以待。 . 阿森嘆一口氣：「旺財嘅表現我知道，初時好積極，但近排好似少咗幹勁，食飯都食得唔快，可能唔健康。」 . 唔健康？我只係唔捨得，狠狠咬落同伴嘅屍身度！ . 但我無辦法辯解，我只可以迎接死亡。 . ， 死後，我嘅靈魂飄到半空，望住人類同倖存嘅狗，食咗一餐狗肉大餐。 . 我先知道，原來人類嘅食物都已經唔夠，只可以殺狗嚟食。 . 為咗生存，為咗達到目標，或者總要有犧牲。 . 都係嗰句「一將功成萬骨枯」，只係呢次，枯嘅係我嘅骨。 . ， 之後，阿森成功咗，成為史上第一支到達南極點嘅探險隊，亦安全回程。 . 我嘅靈魂一直跟住阿森，我聽到，帶矮種馬嘅羅羅，比阿森遲到一個月，成為咗永遠嘅第二名。 . 唔止咁，因為安排不當加上暴風雪，羅羅佢哋全部人，都死喺回程嘅途中。 . 呢一切，證明雪橇狗先係極地霸主，遠遠比馬優秀！ . ， 但唔知點解，我都係唔甘心，雖然我好想成功，但我骨子裡都係一隻狗，我渴望主人嘅愛同認同。 . 直到阿森出咗一本書，講佢嘅南極探險。 . 我好激動，我好想睇嗰本書，書上有無一字一句，係講佢懷念旺財，心痛當日不得不殺我？ . ， 我飄去書局，日日夜夜留喺書局，期望大家講起呢本書嘅內容。 . 然後，我終於得到答案。 . 書中，阿森好詳細咁講佢做嘅準備，包括揀雪橇狗，其中一個主因係，狗可以提供新鮮嘅肉食。 . 因為路上物資一直減少，所以雪橇會愈拉愈輕，自然唔需要咁多雪橇狗。 . 阿森早就計好數，要帶幾多隻狗，去到邊個位，就要殺幾隻狗嚟食。 . 佢嘅糧食預算裡面，係包括我。 . ， 後來，有好多人評價嘅阿森嘅行為，有人讚佢勇敢聰明，有人鬧佢食狗； . 亦有人話佢食狗係逼不得已，喺嗰種情況下，只有食狗，先可以完成呢個壯舉。 . 而我仲聽聞，帶住矮種馬嘅羅羅，都遇到糧食問題。 . 手下建議佢殺馬食肉，但羅羅拒絕咗。 . ， 或者，要成功，總需要狠心同犧牲。 . 但被犧牲嗰顆心，一世都唔會修補得番。 . 改編自Roald Amundsen與Robert Scott的南極點挑戰 . －完－ . #短故 #短篇 #小說 #陳美濤 #廣東話 #粵語 #tomatochan #雪橇狗之戰