【影視】Tom Hardy因9年前講過「Chinaman」被指辱華 中國網民呼籲抵制《Venom 2》 Marvel電影《Venom: Let There Be Carnage（毒魔：血戰大屠殺）》將於今年9月全球上映，最近官方亦公開首條預告片，能夠見到Venom今次將會大戰Spider-Man經典反派「血蜘蛛（Carnage）」，確實令唔少影迷非常期待。正當電影宣傳得如火如荼之際，男主角Tom Hardy就被中國網友翻舊帳，挖出9年前曾喺公開場合講過「Chinaman」一詞，被指涉嫌「辱華」，呼籲各位罷睇新戲。 據了解，Tom Hardy喺2012年出席《Lawless（無法無天）》電影宣傳嗰陣，有記者表示Tom Hardy嘅演出令佢諗起年輕時期嘅Marlon Brando（馬龍·白蘭度）。Tom Hardy就回答自己冇睇過《The Godfather（教父）》、《A Streetcar Named Desire（慾望街車）》等經典名作，不過就有睇過佢另一部作品《The Teahouse of the August Moon》，並表示：「Marlon Brando好似喺電影入面飾演一個Chinaman？」就係當年呢句話，令Tom Hardy陷入「辱華」風波。 其實「Chinaman」一詞喺初期並無貶義，只一個對中國人嘅稱呼，同Englishman（英國佬）、Frenchman（法國佬）以及Irishman（愛爾蘭佬）差唔多。但到咗現代，由於「Chinaman」曾經係第一批到美國淘金嘅華人代名詞，加上歷史上多次排華運動都用上「Chinaman」稱呼中國人，所以大多數字典都認為呢個字帶有種族歧視色彩，不過最重要都係中國網民認為呢個字有「辱華」嘅意思。Tom Hardy「辱華」言論喺網絡上發酵多日後，微博就開始有人呼籲罷睇《Venom 2》，並且揚言Tom Hardy一日唔道歉都唔會睇。 早排就講過Marvel嘅《尚氣》、《Eternals（永恆族）》因為「辱華」而有機會無緣中國市場，依家又傳出抵制《Venom 2》，唔知之後仲有幾多套Marvel電影會被中國封殺呢？ #Marvel #SMU #TomHardy #Venom2