《好波不如好運 藍軍以運氣反勝延續作客搶分王本色 阿仙奴對車路士賽後分析》
.
好波不如好運，相信如果你有睇沉晚哩場倫敦打吡都會有同樣感覺，車路士戲劇性反勝阿仙奴，其實並唔係藍軍有實力而係後者一如以往「自爆」，令最終車路士能以三分全身而退，而過程之中林伯特喺球隊先落後一球之下喺未完半場之前經已作出換人調動，此舉亦令球隊能夠扭轉劣局。
.

兩支倫敦球隊同樣傷兵滿營，林伯特賽前經已確認尼爾斯占士足踝受傷未能趕及復出，而馬高斯阿朗素亦喺對熱刺一戰中受傷，雖然球員非常之希望能夠上陣但最終亦要避戰，意味住林伯特手上既翼衛或閘位球員捉襟見肘，而同時前場既佩利錫亦因傷缺陣。作客黎到酋長球場，林伯特繼續以一個三後衛陣式應戰，個人認為賽前哩個部署其實有據可依，強強大戰加上作客無疑會喺心態上較為保守，再加上對方主帥阿迪達新官上任第二場，對於其執教方格及戰術內容仍然存在未知數，所以以三後衛作戰術鋪排係理解的。
.
後場繼續以蘇馬伙伯魯迪加同湯姆利兩個，而左右翼衛喺未有太多選擇下繼續以艾馬臣同艾斯派古達出戰，中場方面有高華錫停賽後復出，先拍簡迪作正選而佐真奴任後備，至於前場方面就安排番蒙特復任正選，拍住艾巴咸同韋利安作攻堅，再望一望後備席上，有一位新面孔喺入面，就係零零後既Lampety首次進入英超大軍名單之中，亦意味住閘位球員不足到林伯特要喺青年軍之中調任球員到一隊內。
.
由吹雞聲響起直至去到上半場三十五分鐘，車路士可以話一直被阿仙奴玩弄，三後衛陣式唔單止無令藍軍取得任何優勢，更令到隊中控球權要拱手相讓，中場既簡迪同高華錫基本上連波都控唔定，背身一拎到波之後就已經被兩至三個紅衫球員四面八方圍剿，莫講話向前傳，係就連想向前推進一兩步都有困難，既然向唔到前就唯有回後，但同樣阿仙奴前場亦好針對性地安排進攻球員喺客隊回後之下向前壓，迫使湯姆利等人根本唔能夠有太多傳球空間之下只能斬個波上前場，但十居其九都係交番個波阿仙奴。
.
而阿迪達喺安排球隊反擊既時候球員與球員之間走位配合亦收到唔錯效果，只要前場球員一hold到個波，身後就會馬上有隊友前插接應，唔洗兩三腳傳球就經已將球運到車路士既核心地帶，再加上奧斯爾上半場亮眼既表現，以一人之力都經已成功拉走兩三個藍衫球員，車路士根本就好似任人魚肉咁將前、中、後分開左三部份，各自各咁踢緊波咁根本就連接唔起上黎，直到三十五分鐘，林伯特喺風險之下亦要作出第一個換人調動，安排佐真奴入替走漏奧巴美揚頂入既艾巴臣，繼而隨即轉打433陣式，再將場上艾斯派古達調到左閘位置，而湯姆利就安排打右閘。
.
喺哩個臨場安排上，轉陣433既方向上係絕對正確，始終球隊喺未變陣之前一直處於捱打，中場人手嚴重不足之下更本連波都控唔定，有必要安排佐真奴上場控制番球隊既節奏，但喺其餘兩個調動既人手安排上其實係影響左隊中兩條邊路運作，講緊既係湯姆利同艾斯派古達，首先將前者安排以右閘身份係佢今季既第一次，而佢同前面既韋利安以及簡迪明顯喺點契上明顯存在不足，無論係喺前插時機定係走位配合方面，過往車路士既右邊有佢地兩個既推進能力再加上艾斯派古達適時前插，其實哩條右路係幫助球隊向前推既進攻泉源，而將後者調到左閘後，西班牙人喺左邊能夠成功用左腳出波既次數可以話屈指可數，加上前面既蒙特今場波處於「半隱形」狀態，基本上成條左邊路都已經自我癱瘓。其實以不變應萬變，半場未夠換人變陣其實經已係博一博，理應再喺球員位置上郁動得最少從而再減低對球隊既影響，所以個人認為應該保留艾馬臣之下繼而抽起其中一名中堅，效果或會更加理想，至少兩條邊路人腳係最完整，理應喺配合方面既相容性最高。
.
變陣433喺場面上的確形勢上收到成效，而林伯特喺之後兩個換人調動亦可以話以隊中可用既人腳作出臨場最合適既安排，當然，運氣可以話成為哩場波最重要既元素，無人估到近期有唔錯表現既尼奴喺尾段打空氣，繼而亦無人估到車路士以一下全場少有既反擊由艾巴咸射破尼奴大細龍門反勝，令車路士可以全身而退繼續保持作客搶分王本色。傷兵滿營既情況下以三分完結2019年最後一場賽事對結果絕對自足，但同時球隊所面對既問題亦愈黎愈多，即管睇下喺一月轉會窗開啟後藍軍會有咩動作，繼而迎接黎緊困難重重既賽程。
.
《岩睇既比個Like支持我地啊！》
作者 : 藍獅 BluexLion
圖片來源 :Sport Centar
-------------------------------
同場加映《尋回夏薩特遺留的入球數字 轉會窗解禁正是契機？》
https://bit.ly/370yKs8
.
#Chelsea #車路士 #阿仙如 #英超

【賽後分析】
喺國賽際賽前席既最後一場球會賽事，以大比數作客擊敗對手修咸頓，亦受惠於熱刺失分，令車路士喺今場勝仗後與前列拉近距離喺聯賽榜排第五，雖然後防再一次難保不失，不過前線既攻力以及全隊流暢度令一眾車路士球迷都感覺到球隊正平穩向上，林伯特為大家帶黎新希望。
.
今場波林伯特安排球隊以433陣式應戰，一改上場作客法國里爾既三後衛，後場無乜大變動，繼續由蘇馬搭湯姆利作中堅組合，左右兩閘分別亦都係阿朗素以及艾斯派古達，而中場方面相信簡迪已經全面傷癒，搭檔蒙特同佐真奴，而前場就安排早兩場擔任後備復操既奧岱加上艾巴咸及韋利安作攻堅。
.
開賽初段其實主隊修咸頓先搶作進攻，務求喺藍軍未企穩陣腳前先佔一段優勢，不過喺角球方面睇得到，林伯特喺安排上較早幾場唔同，之前主要喺將球員囤積於禁區之中，而每個球員負責番自己附近既區域，但由於後防球員過於年青缺乏經驗，喺欠缺臨場指揮下球員望波多過望人，令對手能夠入攝走到球員身後既盲眼位。
.
而今場防守角球方面除左部份球員囤於小禁區內圍之外，亦有數名車路士球員會以人釘人方式跟緊對手，務求令對方難以施射或頭槌攻門。而喺無球在腳方面，球隊喺壓迫同遮線上既處理亦都相當理想，前場主要依靠艾巴咸同韋利安先作第一點壓迫，而簡迪及佐真奴亦會喺中場位置緊迫對手或作出遮線，好似層層疊咁每兩個兩個咁一層一層施壓，令對手難以用短傳作結，迫使佢地直接長傳交去前場，減少組織攻勢，而喺過程中亦希望對手犯錯，好幾個車路士既入球都係把握得到修咸頓「自爆」而入。
.
除此之外，蒙特以及奧岱之間位置上既互換亦屬另一道奇招，雖然兩者喺防守方面屬於弱項，令球隊左路較易被對手製造攻勢，不過佢地喺組織攻勢上比較立體，其實早幾場都睇到，奧岱喺持球推進既走位好鐘意斜線式走入內線，左邊線既空間就交由蒙特負責，一方面能夠令對方右閘無所適從，另一方面奧岱喺斜線走既時候亦好鐘意交個地波穿過對手交到右路既韋利安，咁做經已成功拉散修咸頓防線。
.
至於防守方面，今場波既經險場面其實都唔少，蘇馬同湯姆利各有致命失誤，完場前兩個仲要爭波自炒，真係「歡喜冤家」咁既樣，如果唔係幸運元素再加上對手把握力弱，相信絕對唔止失一球咁少，不過都要讚一讚佐真奴，喺護空門既進程中睇到佢既走位其實相當靈巧，睇落簡單但其實龍門咁大你都要走岩個位先可以成功閂走個波，反而再睇返鏡頭哩個時候蘇馬仲散步式回防好以觀眾咁睇波，真係嘔血。
.
最後想講多兩樣野，首先係換人時間，睇返林伯特臨場去到八十分鐘至作出首個調動，由高華錫同普利錫入替蒙特以及奧岱，哩個操作上其實係咪可以再提早到七十分鐘頭左右比較好？始終個人比較擔心尤其係蒙特喺體能上既消耗以及傷患，加上高華錫近兩場都係後備上場，平衡番個體力分擔感覺上會較為理想。第二樣就想講下「美國隊長」普利鍚，今場波的確交到個致命直線比巴舒亞伊，兩個其實喺早年多蒙特年代其實都經已夾慣夾熟，不過普利鍚喺背身接應方面就真係要加把勁強化自己既硬度，身形上佢同蒙治差唔多但後者好多時都能成功背身接應再二傳或者自己推進，但普利錫比對手喺身後一boom就甩波，相信哩一點亦係林伯特所講美國仔仲未係好準備好打英超，所以球迷理應相信林伯特比多啲耐性普利錫，而唔係傳言所講林伯特經已放棄普利錫。
.
黎緊兩個星期將會係國際賽期，今次車路士會有更多球員參與賽事包括蒙治、艾巴咸及湯姆利，加上簡迪近期亦較易受傷，希望各個國家隊主帥高抬貴手錫住用，無傷無病咁重返史丹福橋。
.
《岩睇既比個Like支持我地啊！》
作者 : 藍獅 BluexLion
圖片來源 : Football.London
-------------------------------
同場加映《一球世界波成名的背後 全因大衛雷斯離開而造就今日的湯姆利》
https://bit.ly/2mkw4nF
.
#Chelsea #車路士 #修咸頓 #林伯特

講波術語，你又識幾多？

香港講波術語

講〔踢波〕，即係英文嘅（Foot Ball），國語又叫做〔足球〕，足球評述員，廣東人會好親切噉稱呼佢哋做〔講波佬〕。廣東人鐘意睇〔粵語〕講波，一方面係因為粵語講波佬能夠營造一種輕鬆而舒服嘅傾談講笑氣氛；令一方面，〔碧咸〕、〔朗拿度〕呢啲叫法好聽過「貝克漢姆」、「羅納爾多」好多；但係更加主要嘅原因重係嗰啲低死生鬼嘅港式足球術語。

廣東話用詞分工好明細同精巧，單單係（踢）波用到嘅腳部動作嘅術語，就有超過十個。
〔踢〕係指用腳向個波做出嘅一個動作，呢個動作就叫做踢。
〔射〕係將個波向某個明確嘅目標踢過去，通常都係指射門。
〔噍〕用力射門，係「射」嘅生動講法。
〔鏟〕通常係指救波時用腳阻止個波前進，或者係改變個波嘅前進方向。
〔掘〕喺場邊或者底線大力斬個波入禁區嘅動作，好似用鏟掘地嘅動作。
〔刮〕有意踢個波嘅底部，要令個波飛起。
〔兜〕有「刮」嘅意思，亦係指用腳背將個波踢出。
〔省〕係指個波打中某人或者以某個人為目標踢出，用嘅力度比較大。
〔搓〕用腳踩個波，令到個波前后左右來回轉動嚟避開對方嘅攔截。
〔擳〕輕軾力將個波彈俾自己隊友。
〔斬〕係用力將個波踢出去，通常係指龍門開波大腳開出。
〔拉〕係用腳將個波加旋轉踢出。
〔扯〕一般係指過頭嘅橫傳，進攻時大範圍轉移路線時用到。
〔梪〕個波到咗時，視乎需要，用腳輕輕將個波彈到一定嘅高度，用嚟避過對方嘅攔截或者係傳個波俾其他隊友。

踢波係七分腳三分頭，對於某啲頭叻過腳嘅球隊，例如係德國隊、中國隊（應該係講佢哋係對腳仲屎過個頭），可能五分腳五分頭添，所以頭部動作嘅術語都有唔少。
〔頂〕係指用個頭對個波做嘅動作，通常比較正路嘅頭錘動作都叫做〔頂〕。
〔批〕用一個唔同於個波來向嘅力頂波，令個波改變方向。而且〔批〕通常包含一個轉頭嘅動作，叫做〔獅子搖頭〕。
〔片〕同〔批〕相似，只係用一個更薄嘅力嚟〔批〕。
〔跣〕對飛嚟嘅波，用頭輕輕加力，令個波去到合適嘅位置。簡單嚟講就係用個頭嚟傳波。
〔鑿〕係〔頂〕嘅一種，指用額頭將個波頂向水平綫以下嘅方向。

香港講波術語（250）

001〔醫院波〕
傳唔到腳嘅波，隨時俾人踢傷，惑者傳球嘅尺寸差，容易令到隊友受傷。

002〔收山腳〕
顧名思義，即係一腳收你皮。

003〔炒芥蘭〕
兩隻腳一齊炒埋一齊，即係撞埋一齊。

004〔開汽水〕
觀眾（噓）聲四起，全場氣氛就好似開汽水咁。

005〔磨薑〕
喺石地場射波嗰時，隻腳指俾地下刮親。

006〔恰西〕
即係Offside，叫做（越位）或者Offside Trap（越位陷阱）。

007〔地莊〕／〔地樁〕
指一支球隊因有太多傷兵，喺冇選擇之下，只好連續幾場比賽都用同一班球員上陣。

008〔高章〕
技巧高超，令人意想不到嘅，感者多數來形容後防球員，喺對方緊迫之下，後衛又唔大腳解圍，反而賣弄自己嘅腳法、傳波，結果俾對方偷咗腳下嘅波，代表球員有查奧爾、法蘭迪保亞。

009〔魚生粥〕
僅僅熟，險勝（例：1-0，2-1）。

010〔底線傳底〕
和仔嘅絕招，左/右底線斬中，中間冇人頂到個波飛到右/左底線，或底線出波時唔夠力，隊友接應唔到個波，個波已經墜番落底線。

011〔球迷奇遇記〕
當觀眾人以為大局以定嘅時候，又出現估唔到嘅賽果。

012〔賣老抽〕抽筋。

013〔濕手巾〕起勢咁扭波。

014〔叉燒〕
即係Chance，原本係排球術語。

015〔上五吋、下五吋〕
自己搵把尺度下自己嘅小腿就知。

016〔鵝眉月〕
喺籠門禁區對出嘅半月形位置。

017〔噍佢〕射門。

018〔周圍哨〕
形容啲球員唔停咁走動。

019〔擳波〕
用腳面（Cheuk）高個波。

020〔腳腳七注〕
意思應該係用盡力咁狂抽。

021〔七個一皮〕
形容場波係7：1，大比數。

022〔掛網〕
係形容入波，掛網而入。

023〔痾蛋〕
守門員接波甩手，仲由佢褲浪底將個波漏咗入網。

024〔牛油手〕
龍門接波跣手，經常接唔到波。

025〔暖水壺〕
戰術嘅一種，暖水壺係咁滾，即係唔停咁用高空波放喺對方禁區度，想要（滾）到入波。

026〔踩波車〕
球員唔小心踩著個波之後失平衡。

027〔手榴彈〕
掟界外球嗰時，大力將個波掟入禁區。

028〔掘波〕
指球員喺邊或底線度，大力斬個波去禁區嘅腳部動作，好似用鏟掘地嘅動作一樣。

029〔彈琵琶〕
指龍門想抱住個波，不過抱唔實片咗去兩邊。

030〔三閘線〕
將球場平分為三分，約略所得出嘅界線。

031〔插花〕
形容啲球員控球用腳左穿右插，避開對方爛截想扭過對方。

032〔執死雞〕
形容入波補中，多數係自己方第一次試射未能入波，喺有其人未有反應嘅時候及時施射入波。

033〔推左走右〕
傳波嘅球員將個波踢向攔截球員嘅側邊，自己就走另一邊，用來避開攔截再推波前進。

034〔通坑渠〕
形容帶波嗰時，個波穿過對方球員兩腳中間。

035〔入埋大細龍〕
形容入波時穿過守門員兩腳之間（細龍）同入龍門（大龍）。

036〔搓波〕
用腳底踩喺波頂做向前，落後或斜向動作來呃對方嘅技巧。

037〔猜波〕
形容隊友之間唔停咁傳波。

038〔Ｋ角位〕
由龍門中央到大禁區角所形成嘅直線，因為同底線成一個Ｋ字得名。

039〔拉篩〕用腳將個波加旋轉。

040〔躂Ｑ〕
形容交波，斬波，射波時隻腳踢唔應個波，個波受力唔夠或變咗方向。

041〔插水〕
扮野，多數指球員扮跌低搏罰球，好似插水咁。

042〔擦鞋仔波〕
不求組織，縮骨唔攻，有波大腳解圍。

043〔炒飛機〕通常指射門高出目標好多。

044〔紅牌阿姑〕球員食紅牌。

045〔波係圓既〕
呢句講明球賽未到最後都難定勝負，伍晃榮名句。

046〔雙鎗將〕
球員左右腳都可踢左右拉弓，無踢死一邊。

047〔單蹄馬〕
指嗰啲只係識用左腳或右腳嘅球員。

048〔生蟲腳〕
用唔熟鍊嘅腳踢波。

049〔鐵衛〕
非常堅嘅防守球員。

050〔財星〕
應容實力同表演都好差嘅球員，容易令己方失球，而使到下注對方波盤嘅人可以贏錢。

051〔窿對窿〕０比０。

052〔食糊〕入波。

053〔食詐糊〕入波唔算。

054〔風流波〕
因為目的已經達到，任意踢，爭勝心唔不大。

055〔腳指尾拉篩〕
詳情請睇卡路士喺法國盃收死巴夫斯嗰個波。

056〔送大禮〕
自己球隊失誤，造就咗對方入波。

057〔太公波〕替國家隊效力。

058〔黃大仙〕有求（球）必應。

059〔宴客〕決勝射12碼唔入。

060〔炒波底〕
通常指射門嗰時食唔應個波，踢左波底，結果會係〔炒飛機〕。

061〔單刀〕/〔半單刀〕
球員單人帶波射入，呢句話出喺三國演義第六十六回（關雲長單刀赴會．伏皇后為國捐軀）。

062〔世界波〕超靚入球，世界級嘅入波。

063〔擔位〕
頂高波時佔據咗對方球員嘅有利位置。

064〔上身〕
係指啲球員演出超水準（多數指啲龍門），好似如有神助（神仙上身）咁。

065〔先拔頭籌〕第一個入波。

066〔梅開二度〕
喺同一場波入面，一個球員連入兩個波。

067〔連中三元〕
通常係同一場波入面，一個球員連入三個波，或者一隊波連贏三場。

068〔四喜臨門〕你話呢！

069〔帽子戲法〕
Hat Trick，喺同一個球員喺同一場入3球或以上，為之（大演帽子戲法）。

070〔撐龍舟〕用個頭將個波頂去後面。

071〔老竇帶仔出街〕
即係（大細[勢]已去），雖然場波仲未打完，但係落後一方已經無翻身之力。

072〔打倒掛〕/〔倒掛金勾〕
一種射門技巧，背向目標凌空翻身射門。

073〔銅牆鐵壁〕形容後防穩健。

074〔七旋斬〕
急勁傳中球，碧咸好多時會用嘅。

075〔莫晒〕
冇晒氣，跑唔陏，何老靜經常講嘅。

076〔黃魚〕
形容犯規球員嘅動作，（好謀）又係何老靜經常講嘅。

077〔高Ｑ大棍〕長傳急攻戰術。

078〔白頭麼囉〕
當球員頭部受傷，用沙布包紮之後，好似印巴人士一樣，亞德能，亞叔都經常講。

079〔笠死〕笠入
笠（lob）嘅聲譯，解做個波成拋物線飛過球員頭頂。

080〔省中〕/〔省到〕
指俾去勢凌厲嘅波擊中，而食波餅專指省中面部。

081〔黃金右腳〕形容球員嘅右腳技巧好得。

082〔破網〕入波嘅速度好勁，差啲連網都穿埋。

083〔黑哨〕執法受質疑嘅球証。

084〔打假波〕
形容場波嘅結果受人控制，唔係公平嘅比賽。

085〔公公腳〕撩陰腿。

086〔球場黑洞〕
指球員勁差嘅表現，馮係隊友傳波畀佢都有去冇回，失晒啲控球權，同真正黑洞一樣。

087〔五鬼拍門〕用盡晒啲外援名額落場應戰。

088〔長命賽〕
足球聯賽，因為一季嘅聯賽所有隊伍都會主客互賽，所以會好多場賽事。

089〔掛靴〕
掛起球靴，唔再踢波，指啲球員嘅職業生涯完結。

090〔斬波〕大腳傳波。

091〔造波〕策劃同製造進攻機會。

092〔跑９〕多數指大腳傅波畀跑得快嘅球員。

093〔衝力射球〕
源自漫畫足球小將，主角戴志偉成名射門絕招，球速同力度好高嘅射門。

094〔香蕉球〕
射門有（篩）而灣向龍門，通常喺射罰球嗰時出現最多。

095〔猛虎射球〕
源自漫畫足球小將，主角小志強成名射門絕招。

096〔燙波〕通常指用腳內側踢波。

097〔篤波〕用腳尖輕踢。

098〔掃把腳〕用腳內側踢（燙）。

099〔似傳非傳，似射非射〕
球員踢出嘅波，令人唔清楚究竟係傳定係射。

100〔血肉長城〕人牆。

101〔901戰術〕
侯利亞擅長戰術，仲將佢發揚光大，自己方9個球員喺後場防守，只得一個球員做反擊用。

102〔射波射咗去天后廟〕
形容射門無準，射得遠又方向唔啱。

103〔一二〕One Two撞牆。

104〔對面海〕
同102〔射波射咗去天后廟〕一樣。

105〔慢流尾袋〕
門將（欲救無門）嘅情況下（通常因為唔在場或者失位），個波慢慢流入龍門。

106〔護空門〕
其他球員及時喺守門員未返位救波嘅時候將射門救出。

107〔起雙飛〕雙腳鏟波嘅危險動作。

108〔挑波〕你話呢

109〔望門輕嘆〕
通常指因為防守誤會導致，守門員喺無可奈何嘅情況下，唔能夠作出正常嘅撲救動作，睇住個波流入龍門。

110〔半車身〕半窩利。

111〔窩利〕
即係Volley（凌空）嘅音譯。

112〔插水式頭錘〕
指球員用頭攻門時，飛身扒前頂波。

113〔擺老烏〕
擺烏龍，即Own Goal，喺交波或救波時誤入自己方嘅龍門。

114〔龍門雙龍出海〕
形容龍門用雙拳將對方嘅射波打出。

115〔破蛋〕落後一方嘅第一個入球。

116〔入球荒〕
Goal Drought，前鋒球員長期無入波嘅時期。

117〔火星撞地球〕球員猛力相撞。

118〔水銀瀉地〕
形容攻勢凌勵，發揮超常水準，攪到對方難以招駕。

119〔玻璃腳〕
形容謀啲球員隻腳好易受傷。

120〔打仔格〕
指攔截毫不留情嘅工兵型球員。

121〔三文治〕
兩個後衛一齊夾住對方球員。

122〔踢空氣〕
接應交波或射門，隻腳踢唔應，踢到空氣。

123〔波到人到〕
形容傳波動作合拍純熟，心有靈犀。

124〔人快波慢〕
球員已到位，但係個波比人較遲到位。

125〔拉布〕
領先球隊拖延時間，守波。

126〔搶點〕球員頂波。

127〔對腳痴膠水〕
球員唔喺狀態或者好赲導致舉步為艱。

128〔豆腐籠〕
好似豆腐一樣，不堪一擊嘅籠門。

129〔血肉長城〕
喺禁區密集防守，用身體阻擋對方中距離射門。

130〔腳頭〕球員射門嘅力度。

131〔坐冷板〕
球員經常喺後備席唔獲正選上陣。

132〔上帝之手〕
球員用手入球而球証見唔到判為入波影響賽果，源自馬勒當拿86世界杯四強對住英格蘭嗰球。

133〔食波餅〕
指俾去勢凌厲嘅波擊中，專指省中面部。

134〔頭捶跣入〕/〔頭捶批入〕

135〔坐扑史〕？？？

136〔彈弓旗〕旁證舉完旗又放番低。

137〔高而不遠〕
將個波踢得好高，但唔係踢得好遠距離。

138〔閂倒〕射門俾防守球員擋出。

139〔矮腳虎〕
形容嗰啲矮細而又球技超好嘅球員。

140〔柱蠆式〕
多數型容身材高大，頂波好掂嘅前鋒。

141〔交叉走位〕
進攻技術之一，指球員由球員前面或後面交叉走過，引開守衛。

142〔收死龍門〕
指攻方球員射出一球刁鑽嘅射球，籠門想救都救唔到。

144〔割草式〕
多數形容射波，指射出嘅波同地面距離好少，好似割草咁。

145〔曲墜〕
指踢出嘅波帶有下旋，拋物線比一般情況為短。

146〔美高梅〕巨片撻Ｑ。

147〔惹火尤物〕
形容啲球員脾氣暴躁，容易（法火）同對方球員發生衝突。

148〔柱邊〕籠門柱嘅外邊。

149〔要左定要右〕
Describe a scenario where the attacker can get a goal easily, usually when faced one-to-one with the goalkeeper。

150〔突然死亡〕
加時賽嘅即時入球決勝；另外亦可以解做同波後射十二碼，經過指定次數後（通常五輪後），只用一輪定勝負嘅方法。

151〔黃金入球〕加時賽嘅即時入球決勝。

152〔摸和〕原本係麻雀術語，意思係指不分勝負。

153〔逼和〕落後｛弱方｝球隊以和局完成賽事。

154〔無帶射門鞋〕射極都唔入，多數用來形容前鋒。

155〔俾波過唔俾人過〕阻人前進。

156〔光蛋〕無入波（食蛋）。

157〔如入無人之境〕
形容對方球員毫無防範，可以任意進攻。

158〔以寡敵眾〕一方嘅球員人數比另一方嘅少。

159〔孤立無援〕形容（籠門）同（後衛）。

160〔疊瓦式〕
進攻模式之一，多數用喺邊線，後上球員於帶波球員身邊快速走上，做突破或拉開對手防線。

161〔反人牆〕
成排人牆入面，企個自己方既球員喺度，用來干擾之效。

162〔拉鋸〕
雙方球員都唔能夠佔到對方嘅甜頭。

163〔中腰波〕
通常指傳波嘅高度大概喺腰部嘅位置，有時亦會指射門嘅高度。

164〔網仔〕指籠門網嘅左右兩側。

165〔三角短傳〕
3個球員用3角形走位模式互相傳波時，高效率嘅傳波方法。

166〔伏兵門前〕指進攻方球員喺龍門前等機會接應。

167〔爭食〕
通常係形容自己隊球員喺同一位置爭波踢或射。

168〔較炮〕
負責做織攻勢，用致命傳送為隊友製造入波機會，多數形容進攻中場。

169〔雙翼齊飛〕左右中場輪流出擊。

170〔雙翼齊跛〕左右中場出唔到擊。

171〔標波〕航住嘅相反。

172〔後抽〕指用腳爭，將個波向後踢。

173〔曬靴〕
全力用腳鏟對方時，好似Show（曬）對Boot（靴）畀人睇咁。

174〔虎尾腳〕隻腳向後申。

175〔唔岩步韻〕
帶波或接波時，雙腳跑速同個波唔協調。

176〔食塵〕
球員追對方前鋒帶波，自己落後喺對方後面，好似食塵咁樣。

177〔十上十落〕荷蘭嘅全能足球打法。

178〔拗柴〕專指腳腕腳爭（足踝）扭傷。

179〔炒埋一碟〕形容啲球員撞埋一齊。

180〔浪射〕
亂咁射門，應傳唔傳走去射波。

181〔怪腳〕
你估佢唔到，源自阿仙奴球員簡奴嘅踢法。

182〔揪高氣爽〕踢到個波無雷公咁遠。

183〔舞龍咁舞〕
形容腳法乖巧，好似舞龍一樣S形，扭過好多球員，將敵方球員玩弄喺股掌之中。

184〔級波級過佢〕帶波過人。

185〔濕滯波〕踢到不知所謂。

186〔射到九樓高〕射波好差，射到好高。

187〔左右閘〕
左右兩則後衛嘅別名，負責掃蕩。

188〔空籠〕
指守門員失位導致籠門出現真空冇人嘅情況。

189〔數胡〕
Score goals. Usually describes the best goal-scorer in a team.

190〔入楔〕
形容攻方球員入滲敵方陣地嘅動作。

191〔四鬼拍門〕
指出動四個前鋒，搏混亂入波嘅戰術，為雲高爾喺世界杯外圍賽對愛爾蘭嗰時，無計可施之下所創出嘅笑爆嘴之招數，侯利亞亦喺足總杯嗰時對水晶宮將佢發揚光大。

192〔星期美點〕
係指球隊每次嘅出賽陣容時都好唔同，好似啲餐廳個個禮拜推出唔同嘅點心，應該係源自古烈治、維埃里，同埋雲尼亞里係車路士領隊期間嘅陣容特色。

193〔的波〕
Football skill. Kick the ball so that it won't touch the ground.

194〔五五波〕
指對賽嘅兩隊球員嘅實力相若。

195〔鋼龍〕
豆腐龍嘅相反，指守門員受到敵方球員嘅強攻下，依然保持唔失波或者指守門員有超水準嘅演出。

196〔敗家〕/〔敗家仔〕
球隊喺大好形勢下，進攻球員浪費好多入波機會，最後導致球隊失去應有嘅賽果。

197〔唔生性〕/〔唔生銹〕。

198〔抽水〕喺球証嘅盲點位暗算敵方球員。

199〔後面有鬼〕
鬼，係足球術語之一，形容敵方球員；相對（人），指自己隊友，成句意思係（後面有敵方球員）。

200〔當老肯〕
即係On-fire（着火）咁解，何老靜以前成日講。

201〔二仔底〕亞叔金句，指（死跟）。

202〔開大片〕/〔埋堆〕指打交。

203〔打球證〕/〔刪球證〕。

204〔花王〕
指插花好利害嘅球員，或者專指何守信評述時嘅表現，何守信因為唔太熟悉足球，每次喺評述球賽時候，只識集中提及草地情況，好似花王咁留意植物咁得名。

205〔人前波後〕人快波慢。

206〔妙到毫巔〕吾知。

207〔飲茶〕
亞叔同亞瑜喺下晝有直播時喺球迷世界講嘅暗號。

208〔臨天光〕
球隊喺臨完場前一刻或補時階段入波，以致成場波嘅賽果突然改變。

209〔紅褲子出身〕
領隊或教練執教之前曾經做過球員。

210〔史高斯式攔截〕
攔截時間出錯，踢中人而踢唔中波，史高斯常犯嘅。

211〔送波終／鐘〕睇住個波碌走又追唔倒。

212〔搬去後面埋咗佢喇〕
旺角場啲亞叔睇唔過眼有球員詐死講嘅。

213〔穩守突擊〕
軟硬串郭家明話港隊穩守咗十幾年都仲未打得成一次突擊。

214〔較剪腳〕你話呢

215〔收咧〕你話呢

216〔死角〕你話呢

217〔白飯魚〕白布鞋。

218〔單刀橫傳〕應該唔需要解釋啦。

219〔達比薩斯式解圍〕
源自前紐卡素後衛＋希臘國腳達比薩斯既（唔湯唔水）嘅解圍方式。

220〔拉弓〕
指球員準備起腳勁射一刻，隻腳好似一把準備射箭嘅弓咁向後拗。

221〔鋼門〕
形容嗰啲好少失球嘅穩健門將。

222〔豆腐防線〕
無需多講，皇馬果條咪係囉。

222〔計時炸彈〕
形容嗰啲時不時會連累球隊輸波嘅球員。

223〔旺角對落〕
油麻地，形容嗰啲球賽，球隊，球員嘅質素好差。

224〔蛾眉月〕
由十碼點劃出一個半徑十碼嘅圓形，射十二碼時，除咗龍門同射波球員，所有人都要離球十碼。

225〔搋波〕
係指隊友之間唔停咁來回傳波。

226〔救駕〕
其他球員及時喺守門員未返位救波嘅時候將射門救出。

227〔擁躉〕
即係Fanatics，香港人多數講成fan屎，係好迷好擁護啲偶像、球隊嘅人，即好狂熱嘅支持者。

228〔橫刀奪愛〕側擊偷襲對方。

229〔監粗利亞〕監硬嚟。

230〔食咗山渣麥芽〕
係形容長距離遠射要用好多力，咁都想入波，真開胃。

231〔李鄉長嘅女〕李〔你〕愛。

232〔發揮小宇宙〕
形容啲球員有超水準表現，源自聖鬥士星矢嘅對白。

233〔天后廟賀聖誕〕
係形容啲射門高出個籠門框好多。

234〔軟射〕無力度射門。

235〔超級軟射〕唔使多講都明。

236〔加時〕
係種決勝嘅方法，通常嘅情況係喺法定嘅比賽時間結束之後，比賽雙方所得嘅分數都係一樣，呢個時候就需要加時，延長比賽時間去決定勝利一方。

237〔十二碼〕
又叫做（點球），喺足球比賽入面，守方球員喺自己禁區內犯規而判罰嘅一種定位球。

238〔被處以極刑〕
由於十二碼一般入球率喺90%以上，俾人罰嗰隊差唔多係毫無反抗能力，因此俾人叫做足球嘅極刑，有時講波佬索性用極刑或「被處以極刑」嚟代替（十二碼）呢個稱呼。

239〔互射十二碼〕
喺一般淘汰賽入面，如果喺法定時間完場、加時入面都分唔出勝負，就會用互射十二碼嘅方式決勝負，雙方各派出五人梅花間竹咁輪住嚟射。頭五輪就用入波多啲嗰隊贏，如果打完頭五輪都分唔到勝負，就會進入突然死亡階段，到時任何一方射入而另一方射失，場波就會完。

240〔大四喜〕
原本係打麻雀術語，食大四喜即係話一個球員喺一場賽事射入四球，犀利過連中三元。

241〔打荷包〕
意思係當控球在腳嘅球員唔小心或者唔留神，而俾對方球員喺腳下偷甩個波變成對手反攻嘅機會。

242〔自由球〕
Free Kick，又叫（罰球）、（任意球），喺出現犯規之後重新開波嘅方法，分兩種：（直接自由球）踢波球員可以將個波直接射入犯規隊伍龍門；同（埋間接自由球）踢波隊員唔可以直接射門，個波入網之前一定要俾第二啲隊員踢到或者掂到。

245〔頂頭鎚〕
指球員用個頭頂個波，改變個波方向，有利入球或頂走去。頂頭鎚同食波餅唔同，波係被動，頭係特登頂埋去。如果兩個人一齊死力去頂會好危險。

246〔到喉唔到肺〕
踢波時，想交個波畀人，點知踢出去軟弱無力，個波離隊友仲有一段距離。

247〔神仙水〕有冇人知呢？

248〔兩黃一紅〕
收兩張黃牌＝收紅牌，又做阿姑嘞。

249〔射飛機〕
射門射到冇雷公咁遠。

250〔頂！〕
有冇攪錯，咁都唔入。

譯：蕭南仁．2015年6月21日
圖：New Monday

術語連篇。廣東話資料館