【關於我的近況二三事】 如果有睇我 晞。觀影記事 大概都會知道呢排忙到癲咗，又包場又考試又工作，讀者朋友唔講，我都冇留意已經一個月冇update。一來冇旅行去、二來熱到我山都唔想行、三來我發現近呢一年好多時候都係寫感性同悲觀嘢，但呢排我生活好充實都有唔同目標，突然叫我寫positive嘢好似冇咩好寫，可能都係一件好事😂 或者都要轉個頭抽個水，即使我忙到一日訓得三個鐘，我都係可以有時間覆機、朋友叫到食飯我都可以抽到時間，真正有心，再忙都好，時間都係可以擠到出嚟。 唔想放棄呢邊，都簡單交代一下近況。 1/ 我終於完成咗西班牙文A1課程，完成咗一個人生bucket list咁，好興奮。臨老入花叢，人生第一次為自己想學嘅嘢去報個course，仲可以一年都100% attendance兼交足100%功課。第一次明白，原來人生不為cert不為錢不為事業，真係為自己興趣去讀樣嘢，感覺原來咁正。 決心要讀西班牙文，係由我踏入智利機場發現我講I come from Hong Kong同purpose係Travel，而對方即使係移民局，都唔知你講乜，佢係咁問你donde eres你又唔會知佢問乜，到你即日已發現唔識西班牙文車飛都買唔到、嗌咗嘅嘢食都唔會知係乜嚟，而Google translate都唔會幫到你、join local tour全車有一半人唔識英文，但除咗你冇人唔識西班牙文時，你知道呢個世界有好多地方，你苦讀多年英文曉飛也好，都係嘥氣。 最後，你返香港果班機，你發現自己可以同空姐溝通識嗌arroz con carne，簡單一句已經好滿足。 唔同你去日本唔識日文、去俄羅斯唔識俄文、去泰國唔識泰文，冇人覺得你奇怪，但喺拉丁美洲，人哋會覺得你係怪人，點會有人唔識架？ 更開心係識到一班同學，可以講鳩嘢講是非，都可以認真到去自修室開個study group。上年經歷太多唔開心嘢，一星期定期有班人同你傾到計，而大家都歷盡由面授到zoom再到面授，喺人生最絕望最無聊日子，可以喺zoom上堂係我一星期最期待時刻，到最後由40人讀到得返少於15人期期見面。 重點遇到一個好老師，上堂唔止教你practical嘢，仲有人生百態同拉丁文化，只可惜佢唔再教落去。 2/ 我突然有返一份正職。同樣地，舊年經歷得太多無常不安，你或者再唔會相信有咩係永恆，又會有咩人係真正好人。每一次有新工，講真我都唔會完全放開懷抱去信人，因為一般唔駛一個月就開始發現有人想插你一刀。新工我諗係近呢幾年感覺最良好嘅一份，環境好、工作好、人都好，希望短期內我唔會再經歷咩無常。 3/ 完成咗13週年嘅包場，想講嘅之前都講曬，無論你係有故事的旅人讀者又好、晞。觀影記事讀者也好、travelerwithmovie讀者都好，13年嚟感謝你哋嘅支持。呢一個event好辛苦好累都好緊張，但我係滿足嘅。雖然同樣經歷到人性陰暗面，但都遇到好多好人好事，多謝幫助我完成嘅每一個你。 4/ 近排遇上有啲嘢，可能你會覺得好邪，都驚係另一個恐怖嘅輪迴，甚至我會怕一年前嘅陰霾再度重現。或者近期遇到嘅事都令我心境開朗，有啲嘢就算真係好邪，邪到你會覺得有冇可能咁啱，但唔好自己嚇自己，保持希望，一切總會更好，應該唔會真係邪到咁，可能會係另一個希望轉機呢。你命硬架，相信自己，大概已經冇嘢會嚇得到你。我咁樣同自己講。緣份無限輪迴、人情無限輪迴、經歷無限輪迴，但輪迴到一個地步，我相信總有希望，呢個loop唔會跟你一世嘅。朋友話，唔好俾你以往恐懼放棄一個又一個機會，我諗，我要學識呢樣嘢。 5/ 人生從未試過有一次可以同自己講「我開始穩定到」，正職加埋freelance同網店收入大增，人生頭一次唔駛擔驚受怕，唔知聽日有咩要洗錢，原來感覺係幾好，就好似你奮鬥咗咁多年終於有回報、終於有人賞識你；唔係大富大貴，最少呢一刻唔駛憂鹽憂米仲有閒錢剩。積穀防饑好緊要，昔日嘅不安令你所學會嘅係，無論你賺到幾多錢，今日唔會知聽日事，你嘅穩定唔會到永遠，呢個價值觀點都會跟我一世。可以洗錢洗得鬆動少少都唔錯，最少，今日你唔駛為慳三毫子分段行幾個巴士站。 都有少少文章、唔同計劃想寫，travel都陸陸續續會update返架喇。多謝支持。 . 👉電影網店現貨品低至$5起，請即到bio link搶購！ . 【Patreon加強版】尊享優惠、更多深度獨家電影文章：https://www.patreon.com/travelerwithmovie . 📣文字工作者也得要吃飯，你的支持是我的原動力。請給點心意，給小弟寫更多好文章，歡迎透過payme課金以作支持🥳：https://bit.ly/3a9wOzy 或使用Payme link：https://payme.hsbc/jackyhei 或透過Paypal捐款：paypal.me/jackyhei . 【MeWe請Follow】mewe.com/p/travelerwithmovie . #有故事的旅人 #人生哲學 #人生語錄 #人生故事 #文字分享 #香港文字 #香港生活日常 #hkdaily #hklife #hkbloggers #lifeisbeautiful #travelerwithmovie