［巴塞帝國興亡史］5000幾字，不過應唔算難明。又，原文仲長，唔關我事。循例利申：唔捧巴塞，但亦唔憎巴塞。畢竟我在魯營入場睇美斯。

TLDR： 西瓜共蟹，唔識莫買。呢篇真係極長。但你要搵人鬧嘅，好簡單，Bartomeu就係屌靶。條友完全唔識足球，亦唔識足球嘅生意。自己唔識都算，又唔知人善任。全歐洲都知佢係水魚，玩到佢謝。尼馬嗰2.2億歐羅，最後去咗邊？另外，買親人都畀貴價，簽親都水貨，人工又畀得高，唔死就奇。但話說回頭，邊個選佢上去架呢？聽講巴塞唔係老細足球油王波喎，咩人選佢上去？最後，美斯份糧亦有一定嘅角色，當然佢係落場征戰嗰個，貪錢嗰個好似係佢老豆，冇乜人會怪佢。同場加映 多蒙特同彭美拉斯點樣玩到Bartomeu謝，笑死無命賠。

＝＝＝＝＝＝＝＝＝＝＝＝＝＝
一週年！月頭訂最抵！比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費100，已經1800人訂！ 畀年費仲有85折，20/40年費VIP 送本人著作一本。
＝＝＝＝＝＝＝＝＝＝＝＝＝＝

1. 真係英雄所見樂瞳，我諗到呢個題，然後原文Simon Kuper最後亦都係用羅馬帝國比喻巴塞。記住，你覺得篇文垃圾覺得我唔識波嘅，請你去鬧Simon Kuper，「不過鬧之前睇下人地咩料子先」。內容主要都係取材自篇文，當然有啲我個人想法，我盡量分開。一係你睇原文咯，唔使錢的（https://bit.ly/3fI5AVE），但你又唔想英文或唔鍾意睇字嘅，咁咪只能聽我講，你自己選擇的。

2. 篇文其實嚟自Simon Kuper本新書，幾日後出（https://bit.ly/3iwl9kN）。唔記得佢係咪特別捧巴塞，但之前見佢都寫唔少巴塞或美斯文，訪問好多人，絶對有資格講。佢本書原本係寫巴塞成功史，點知寫寫下已經見到巴塞盛極轉衰，佢篇文寫嗰時都未知美斯走，但已經預言好大機會。

3. 上篇文比較technical（https://bit.ly/37Hxr3T），而且只係講一單球員交換，講巴塞大鑊到要搞埋啲咁嘅怪雞嘢，但冇解到巴塞點搞到咁，不過個故事太過過癮。今篇我保證，易明好多。真係你打football manger都知係乜事

4. 好似講歷史咁，遠因，近因，導火線。巴塞搞到咁大鑊，導火線當然係疫情，同埋西甲嘅salary cap，巴塞要瘦身。但差不多間間球會都受影響，點解唯獨佢地咁大鑊？

5. 巴塞財政問題，你可以睇Twitter @Swissramble，7月尾已經講巴塞好大鑊，唔係事後孔明．但講真佢啲嘢真係純金融，唔易入口。所以你可以睇我呢篇文講。

6. 近因係巴塞財政狀況近幾年都差，年年都只係勉強頂住，但一個疫情打落嚟咪出事。有幾差？普通人都睇得明：巴塞係全世界收入最高嘅足球會，疫情前唯一一間一年收入過10億美金嘅球會（不過，都係少過一間維他奶！）。但欠落嘅債，去到14億美金。冇錯，長命債可以慢慢還，但大鑊在啲債好多都係短債，好快要找數。咁明晒啦？

7. 你想賣人？嘿，成班老嘢，邊有人買？況且，人人知你莫財，點會唔壓你價？就算其他人真係咁好心，亦都有心無力，其他球會都係十分水緊。好可能De Jong，Ansu Fati或Pedri之類都只能平賣。冇錢就係咁架啦（題外話：所以叫你唔好借錢買股票）

8. 之但係，呢啲都係近因。巴塞點解搞到負債咁多？同埋點解年年蝕錢（收入高都可以蝕錢）？就係遠因。

9. 巴塞嘅收入，疫情前一路係全球頭兩三位。固然疫情下打擊大，仲有啲贊助商又縮數，但照計唔應該咁快出事。咁收入冇問題，就梗係開支出事啦。於是你普通人都估到，球會可以有乜開支？咪就係買人出事，同埋人工出事。
=========================================================
10. 香港文化興搵禍首，我都明。咁今次畀定個屌靶你，肯定係前任會長Bartomeu，佢就係亡國之君。去到現任Laporta時肯定返魂乏術了。今年3月先接手，可以做乜？

11. 陣間會慢慢鬧Bartomeu，但此人根本完全外行，唔識足球，亦都唔識足球嘅生意，絶對係一條水魚，畀人玩到佢謝。自己唔識都算，但佢又唔知人善任。

12. 但，巴塞唔係老細足球嘛，唔係油王大陸錢，喂，會員制架喎。咁所以，第二屌咪屌啲球迷咯。唔係你同我（除非你係有份投票嘅），我地呢啲電視機球迷反而最聖潔。喂，Bartomeu係你班友選上台架嘛，咁唔係啲選民負責返？原本佢只係過渡角色，但2015年（記住呢個日子）6月巴塞在柏林對祖雲達斯，10年內第5次拎歐聯後，佢就大票數再當選。呢次亦係巴塞暫時最後一次拎歐聯。

13. 當然仲有，美斯。或者應該話美斯份糧，可能係美斯老豆。美斯有幾好波已經唔使討論，佢在賽場上絶對冇欠巴塞半分。巴塞近年戰績可能未如球迷預期，但絶對唔係巴塞財困嘅原因，畢竟巴塞唔係搞到冇歐聯踢嗰種情況。不過，美斯份糧，同埋佢對球會轉會嘅參與，似乎亦同巴塞財困有一定關係。

14. 關於美斯，我仲想講多兩句。Simon Kuper寫過好多美斯嘅文，場上固然唔使討論，足球場外美斯並唔係一個特別鍾意權力嘅人，特別麻煩嘅人，甚至唔係一個特別貪錢嘅人（佢老豆就可能係）。美斯要嘅嘢好簡單：佢要勝利，佢要一隊戰無不勝嘅夢幻隊，就係咁簡單。「其他嘢你地幫我搞掂佢」。球員冇理由要理埋球會財政嘅嘢，關我春事。但美斯份糧，弔詭地就搞到巴塞搵唔到美斯想要嘅球員。況且球員亦都知道美斯呼風喚雨，權力好大，佢撐你，高層唔敢唔加人工。邉個高層夠膽同美斯作對？美斯唔係一個權力慾好大嘅人，但佢知自己有影響力（以上都係作者啲文講，你可以去質疑）

15. 我目測香港巴塞球迷遠多過皇馬。但唔好忘記，在美斯嚟之前，巴塞戰績並唔係一間咁「神」嘅球會。固然巴塞more than a club，你亦可以話係中央馬德里打壓，由佛朗哥之類講起。但客觀事實係巴塞在美斯之前，只係拎過一次歐聯冠軍（當然05-06嗰次都唔多關佢事），美斯同拉馬西亞嘅黃金一代，就改變咗巴塞。但，之後呢？

16. 既然巴塞場上表現唔係導致財困嘅原因，咁所以亦唔使鬧朗奴高文之類，歷任主帥都唔關事。球場上嘅得失冇搞到巴塞陷入困境，至於咩轉會簽人，唔係主師話到事嘅。頂多係體育總監，但實際上係Bartomeu，或者其他高層，或者美斯。朗奴高文之類，會務上冇乜say
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
17. 頭先講過，巴塞2015年拎歐聯後，Bartomeu就大熱再當選。所以就由2015年講起。

18. 正如頭先提到，2015年，巴塞如日中天，10年拎咗5次歐聯。多得拉馬西亞黃金一代，當時巴塞財政情況極好，冇人會相信巴塞有一日會冇錢，當時巴塞要乜人有乜人。但就係呢度開始出事。

19. 巴塞嘅轉會，向來都亂嚟。董事局好多人都有唔同意見，至於教波嗰個往往係唔會知嘅。唔好忘記，仲有體育總監要講嘢，仲有……美斯。

20. 但，始終罪魁都係Bartomeu。好簡單，因為呢條友係真係唔識的！但你地選佢上台嘛。原本佢嘅體育總監係蘇比沙列特（Zubizarreta），巴塞名宿，幫佢簽咗尼馬同蘇亞雷斯，聞風喪膽嘅MSN組合。但2015年Bartomeu就炒咗蘇比沙列特，6年換咗5個體育總監。自己唔識唔緊要，但你搵件識嘅好冇？

21. 事後睇，2017年，就係巴塞惡夢嘅開始，但當時你都唔會估到。發生咩事？尼馬走咗。呢個未必係巴塞或者Bartomeu任何人嘅問題。況且PSG畀咗破紀錄嘅2.2億歐羅轉會費嘛。當時點睇都係PSG先係水魚，對不？巴塞拎住2.2億歐，可以買好多人

22. 但，就係Bartomeu將呢舊錢亂咁用。有好多好好笑嘅故事，但，總之好快，全歐洲就知呢條友好多錢洗，又要好快咁用咗佢，亦知道呢條友乜都唔識。真係千載難逢嘅一條水魚，唔昆你對唔住自己球迷。

23. 當其時嘅巴塞，在轉會市場上呼風喚雨，仲要有錢在手，冇乜球員或經理人會say no，未必單單都成，但所有人都會同你傾。2017年尼馬走後，巴塞原本有機會平價買到麥巴比同夏蘭特，但Bartomeu唔要。不過我覺得呢啲不能怪佢，總有走漏眼，況且其他人都有異議，唔係話個個都話要簽但Bartomeu一票阻止。

24. 咁買唔到最好嘅，冇咁好都OK啦，畢竟2.2億歐真係好多錢（雖然PSG都係分期）。問題係，巴塞結果去買嘅，係多蒙特嘅丹比利Ousmane Dembélé。應該冇乜人反對係水貨啦？仲要係用咗1.5億歐羅。

25. 而成件事係好Q好笑的，好似拍賣會咁，明明另一高層同Bartomeu之前一早講明，我地底線只會畀8000萬歐買丹比利。入蒙地卡羅酒店房（同多蒙特傾）前仲夾好，多過呢個價我地就拍枱起身走。結果入到去，多蒙特嘅德國佬，就話冇時間傾，趕住坐飛機，唔會同你講價，1.5億，要就要唔要就拉倒。但結果？Bartomeu都係話好！咁佢係大佬嘛，另外件高層當然冇聲出。因為Bartomeu要同球迷交代，況且佢根本唔識。事後佢仲話丹比利好波過尼馬。

26. 然後大家都知，之後巴塞亦都用咗1.6歐去買古天奴，利物浦合埋眼都識笑，居然有啲咁嘅水魚。錦上添花當然係後來借埋古天奴畀拜仁，然後拜仁歐聯大炒巴塞古天奴仲要梅開二度。我懷疑路明尼加漢尼斯一定有Whatsapp利物浦啲高層齊齊恥笑Bartomeu。至此，尼馬嘅錢已經嘔突，而丹比利同古天奴，在巴塞嘅表現，大家有目共睹。

======================================================

27. 當然，某程度上巴塞係慣咗做水魚的。背後未必係佢地特別笨（Bartomeu就應該係），亦因為佢地嘅文化係「我要嘅嘢就要得到」，反正選會長個個都係拍心水「我要簽邊個邊個」，有問題留畀下手，球迷係唔會理咩財政狀況，話知你下季畀個警務署長我做，今季我就要捧盃。你搵件「理性撚」去選，同人講「我為巴塞長遠著想，我唔會簽人，因為我地再咁搞呢，5年後會爆煲，大家要接受我地未來幾年都唔會有盃捧」，我保撚證你唔使選。球迷就係咁，呢啲就係「民粹」。

28. 又例如，de Jong應該唔算水貨，但巴塞畀7500萬歐。個問題唔係你同我覺得值唔值，最好笑係阿積士都覺得唔值，原本係出面開價3000-4000萬，但有人畀錢要志在必得獨家買斷，唔通唔要咩。

29. 巴塞嘅文化，痴心情長劍，非君不娶。我唔會要一個「de Jong咁類型但平一半」，我就要de Jong本人，幾多錢都要。聽落好型，但你咁拎去做生意，就死得。對家一定當你水魚咁劏。公平地講，似乎呢個唔係Bartomeu年代獨有嘅事。

=======================================================
30. 至於美斯嗰部份，都講過下，佢份人工實在極高。當然我無意批評美斯，波一定係好到不得了，無可取代（否則巴塞就塞走佢啦），咁你可以話「全世界最好波嘅球員要加人工有乜問題？」（同意），況且，亦有話係佢老豆嘅主意，佢自己只係專心踢波，呢啲真相冇乜人會知。但反正文入面都引述巴塞高層講，美斯都唔係一個問題，最大問題係佢加，其他人又會要加，而大家都知美斯出名鍾意幫朋友，Other people’s money，有錢齊齊搵。

31. 當然美斯對外一直都聲稱自己只係專心踢波，但文中又引述巴塞高層講，美斯都成日背後發功。邊個先真，我都唔知。但話說2019年，尼馬同美斯講話想離開PSG，美斯應該係有大力要求巴塞去買。但巴塞真係冇錢，而且覺得唔值（即係，冇錢），PSG開價2億歐喎。結果真係不停做大龍鳳，扮到好似想買，其實只係安撫美斯，「我地盡晒力啦」。但似乎美斯冇咁好呃。最後大家都知，巴塞買咗基沙文，又係1.2億歐，美斯似乎唔多高興。當然美斯係專業嘅，冇因為咁就hea踢，但文入面話佢完全不能原諒Bartomeu。美斯並唔係一個特別鍾意權力嘅人，佢鍾意人地幫佢搞掂晒，「但我話想要邊個嚟你就幫我搞掂佢」，而由始到終佢都係想要尼馬（所以，我估佢真係一定去PSG）。至於基沙文，嚟到巴塞當然亦係唔係嗰回事，更重要係。呢1.2億歐，仲要壯大埋馬體會，反咬返巴塞。「益利物浦多蒙特都算啦，唔好益自己西甲對手嘛」

===================================================================
32. 事情發展到呢度，巴塞已經好似畀白蟻蛀咁，越嚟越吃力。2014-2019年使咗10億歐羅買人（未計賣尼馬嘅收益嘅），多過任何一間球會，但成績明顯唔成正比。

33. 去到2020年頭，蘇亞雷斯受傷，巴塞要搵人，只能夠搵啲平嘢。結果當時體育總監艾比度Abidal搵著北京國安嘅剛果/法國球員Cédric Bakambu。呢單又係一單鬧劇，剛果人收到電話，十分歡喜，卒之唔使在北京睇電視機，就坐飛機去香港，轉機去巴塞。點知嚟到香港開返電話，Abidal先同佢講：唔好意思我地改變主意，你在香港玩得開心啲。我肯定剛果人屌咗佢老母N次。最後剛果人返返北京繼續睇電視機，而家仲在國安（彩蛋：FC過，其實北京有機直航去巴塞，咁點解會去香港？可能剛果人想嚟香港去重慶大廈食咖喱，可能剛果人唔想坐國航，又或者嗰日咁啱冇機。如果係直航件事仲好笑，剛果人去到西班牙人地先同佢講唔好意思）

34. 剛果人鬧劇之後，應該好多人都知巴塞最後簽咗乜水。丹麥人Martin Braithwaite。此人應該都算係水貨啦？呢條友米杜士堡都未踢得掂，居然去咗踢巴塞，好似話在個介紹新球員環節，條友的波晒球技都出晒醜，波都控唔到。「可能太緊張」。文入面都有講，當年連尼加同曉士（Mark Hughes）去巴塞，話有個介紹會，曉士有啲緊張，連尼加同佢，驚春咩，最多咪一百十人嚟！ —點知去到魯營有6萬人睇佢！連尼加幫曉士開脫，話巴塞嘅壓力，唔係人人受得住。

35. 當然，Bartomeu年代嘅轉會，沒有最好笑，只有更好笑。另外有個叫Matheus Fernandes（我聽都冇聽過）嘅球員，亦係同時簽落。係由巴西彭美斯拉買嘅，仲要只係預備組，我以為係隱世球王拿度尼添。固然只係1000萬歐，散紙，但完全唔知係乜事！呢條友甚至冇一個正式介紹會。最後借咗去華拉度列，出咗幾場，返返巴塞出咗十幾分鐘，就踢咗佢返巴西。

36. 當然只係好少錢，但畀你見到巴塞啲轉會係如何亂嚟。連彭美拉斯個體育總監都覺得神奇，「啲人話我發神經呀，叫艾比度嚟買個踢彭美拉斯預備組都冇乜點有得上場嘅小朋友，點知真係有人買喎」。果然水魚唔怕多。大家可以諗下，美斯見到Braithwaite同Fernandes，有乜感想（彩蛋：Fernandes著咗件19號波衫，因為Covid—19，冇人肯著，成件事真係19得很）

37. 然後，就發生咗上篇文講，同祖雲達斯交換球員嘅事件。美路去祖雲達斯，巴塞簽比真歷。巴塞當時已經好唔掂，但急需要一筆「盈利」。上篇文都冇講，因為再搞唔掂，就要Bartomeu自己上身，咁佢當然諗呢啲方法。但啲蘇洲屎就留下之後嘅人解決了。
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
38. 已經打咗5000字，都只係講咗巴塞轉會如何操作。買貴人嘅後果好嚴重，你賣固然蝕錢，但你唔賣一樣每年同你「折舊」，例如比真歷之類，當然cash唔使點比（同祖雲達斯offset咗嘛），但profit -wise每年都仲要拖低條數。

39. 寫得太長，但以上都只係講轉會。唔好忘記，巴塞除咗轉會出手豪，人工亦出得高，美斯份糧亦係一個問題。本來就收入多開支多冇問題，但以wage as a percentage of income，巴塞都係離晒罩嘅（comment會貼圖）

40. 固然Bartomeu任內，都簽咗Pedri返嚟，好好嘅收購，不過真係十件水貨先扑中一件掂嘅。你話拉馬西亞完全斷層，亦唔係，Ansu Fati亦都擔到大旗。但，真係遠水不能夠近火，都講過巴塞嘅問題唔係場上，係財政。你Ansu Fati踢得再好又點？巴塞似乎只能係賣走呢啲好球員，而疫情下，對家都冇乜錢，況且人人知你莫財，當然再壓你價。

41. 爆煲？就唔似會嘅，但，照計賣走啲主力不能避免，點都要幾年調整下。

＝＝＝＝＝＝＝＝＝＝＝＝＝＝
一週年！月頭訂最抵！比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費100，已經1800人訂！ 畀年費仲有85折，20/40年費VIP 送本人著作一本。
＝＝＝＝＝＝＝＝＝＝＝＝＝＝

［點解球會咁鍾意換妻？］好，既然咁多人想睇，就寫巴塞，「而家搞到好大壓力」（真係麻撚煩）。講真我對自己寫文有信心（冇信心好意思叫人科水？），寫巴塞呢啲更加主要係睇外國文再整合消化，「你去鬧咪鬧原作者」。但你知球迷嘅嘢，本質同我呢啲「懶理性」鍵盤球評家係唔同嘅。

TLDR：我1億簽埃汾返嚟，對家又1億簽勞蘇返嚟。大家一個仙都唔使出，但，就大家都有盈利落袋！幾咁好！

＝＝＝＝＝＝＝＝＝＝＝＝＝＝
一週年！月頭訂最抵！比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費100，已經1800人訂！ 畀年費仲有85折，20/40年費VIP 送本人著作一本。
＝＝＝＝＝＝＝＝＝＝＝＝＝＝

1. 講明先，呢篇係上主菜前嘅小頭盤，主菜下篇，我食埋飯先寫。但呢個好小嘅故事，已經畀你睇到兩樣嘢：第一，巴塞早早已經財經唔多穩健（但球迷先唔會理呢啲），固然疫情冇人估到，但你見其他會情況冇咁差。你本身都危危地嘅，打多個浪埋嚟咪出事。第二，金融撚真係十分重要的。

2. 小故事（頭盤嘅頭盤！）第一：有冇聽過啲友恥笑話「GDP唔代表乜」？故事話兩個經濟學家，阿A同阿B講，你食咗舊狗屎，就畀10000蚊你，點知阿B真係食咗。然後阿B覺得蝕底，又同返阿A講，仲有一舊（唔好問我點解咁多屎），你食咗佢，我畀返10000蚊你，點知阿A又肯食。於是大家都冇嘢變過，兩個都食咗屎，但創造咗10000/20000蚊GDP — 呢個故事其實係有問題嘅，但唔係本文重點。

3. 小故事第二：我地將上面嘅故事演化下。兩間公司，小企鵝實業賣一個企鵝公仔畀勞蘇公司，明明街邊只係賣100蚊，但成交100萬。然後勞蘇公司又賣返個勞蘇公仔畀小企鵝實業，都係只係值100蚊，但成交100萬。實際上，兩間公司一個仙都唔使畀，只係換隻公仔。但，就齊齊都book咗99萬profit！畀你諗下，咁樣做得唔得？陣間答你。（預告：Depends）

4. 你有冇諗過，點解球會咁鍾意交換球員？如果打機嘅應該估到，「唔使畀錢」「又可以順手清垃圾」，但現實世界冇咁簡單，交換球員，仲有一個好重要嘅功能！

5. 之前巴塞嘅問題，下篇文解。但好快回帶去到，時間去到2020年夏天，疫情爆後不久，當時巴塞財政已經相當唔掂，急需要「平咗條數」，做到收支平衡。但，邊度變啲盈利出嚟？

6. 我唔知有冇人寫過，唔多覺，但當其時巴塞就有單令人相當費解嘅球員交易：由祖雲達斯簽入比真歷（Miralem Pjanić），然後以美路（Arthur Melo）交換。當時巴塞就用6000萬歐羅買比真歷，祖雲達斯就用7200萬歐羅買美路。

7. 我冇乜點睇波，唔知呢單交易在足球上make 唔make sense，但實際上，呢單交易99%都係為咗財政。填氹！唔只巴塞填，祖雲達斯都有得填，呢啲就win-win．諗出嚟嘅金融撚應記一功。

8. 冇錯，比真路同美路，應該唔係屎（嗰時菲臘比美路就真係屎！），但，角色咪等於勞蘇公仔同企鵝公仔！

9. 呢單買賣之後，巴塞咪有盈利！咪過到骨！係咪好神奇呢！

10. 講返，咁嘅操作得唔得？答案係，睇情況。渣正嚟講呢，你個auditor會質疑，喂，隻勞蘇公仔出面買100蚊咋喎，做乜你用100萬買？就算你嗰刻話「有人用呢個價買咪值」，但之後呢？你一轉手必定蝕到仆街，唔會有人用100萬接你隻勞蘇公仔。我當比真歷之類在巴塞終老，「一日唔賣一日都唔係蝕」，但，你每年做「折舊」都輸死你。你mark到咁貴嘛，你話100萬，咁隻勞蘇用10年（實情比真歷已經30歲），我咪每年同你「折舊」10萬，一樣之後出事

11. 但，公司又好，球會又好，群眾又好。有乜特色呀？短視咯。搞掂今年先算。我走後話撚知佢洪水滔天。下手自己搞掂。球迷一樣，咪撚同我講5年後爆煲，老子今年就要睇捧盃，之後嘅嘢之後先算。

12. 實際上，你隻勞蘇公仔當然唔可以估值100萬 —「除非係限量版」。真喎，藝術嘅嘢你識條撚？限量版，藝術嘢嚟呀，你啲分析員人地畫家個名都未識讀，憑乜質疑？呢個係嚟自意大利嘅無敵新名牌子，叫做ITALIANO加HE NO磨HIT池，你識乜？

13. 我可以話你知，實際上都係可以咁玩。你公司買個工廈單位（翠華？唔怕開名），總不能隔離單位賣緊3000蚊尺 你就mark 30萬一尺，你個海景無敵，咁我個海景唔使出嚟行啦？測量師唔會咁同你癲，你話mark 6000仲得，但唔好太過份（亦所以，有樣嘢叫做「特色單位」！）

14. 但，去到藝術品，就真係任你講了。你會計佬分析員點去質疑？咪唯有信「第三方估值」（實務上，就係大股東嘅炮兵團兄弟，或者情婦之類）

15. 咁球員，一樣！球員點估值？特別去到呢啲頂級嘅Level，你點質疑比路唔值7200萬？況且，好多球會都唔係上市公司（雖然祖雲達斯係），更加亂嚟，球迷亦唔會理。

16. 實際上，都有啲公司幫球員做估價嘅，例如Transfermarkt。咁我係球會咪話拎呢啲「獨立第三方」嘅估價。咁當然，就好多油水好多貓膩了。有利益就有古惑。

17. 留意，你用Transfermarkt嘅估值睇，當年比真歷同美路，都唔會值佢地買賣嘅價。但講真冇乜嘢，就算正常買賣都可以係咁。個重點係交換，大家都唔使出錢。

18. 呢類操作就係飲鴆止渴，你「貴價」買返嚟，之後咪又係要折舊write off，況且比真歷份糧你又要出，而個球員好似都冇乜點出過。但，搞掂一季先啦。

19. 故事講完，再講一次，巴塞點解會行到咁水深火熱，下篇文先講。但以上故事已經畀你見到，巴塞在舊年夏天，已經相當頭痕，先要搞啲咁嘅嘢。

20. 要講嘅係，本人唔係會計佬又唔係律師，但相信以上操作，99%都係合法合理，並唔係咩「洗黑錢」之類，頂多係法律邊緣，最古惑係「球員估值」呢下啫。亦絶對唔係巴塞首創，只係畀你見到，巴塞當時個情況都已經去到幾水深火熱。同埋，金融嘢真係十分重要，否則你永遠無法理解呢啲交易點解會出現。

21. 正文完晒。以下講嘅，只係個人感想，同巴塞興亡都冇乜大關係，唔鍾意唔使睇。勿鬧。

＝＝＝＝＝＝＝＝＝＝＝＝＝＝＝＝＝＝

22. 正如上面所講，你睇金融嘢真係幾咁緊要。丘世文（都死咗好多年）本身都係會計師，當時（都廿幾三十年前）佢在書中寫，中學應該必修會計。雖然我中四五有讀會計，大學都有選修過下（主要因為多女），但當其時我都覺得佢只係賣花讚花香，「同A Club啲讀者要求廿四小時播動畫差不多」

23. 但而家睇返，我十分同意佢嘅講法。等於而家話學生必修Coding咁，我覺得真係應該必修會計（定已經太遲？）。因為你諗下，我地真係生長在一個高度金融化嘅社會。唔係個個要做金融做會計從商，但你冇基本嘅知識，真係唔知個世界點運作。正如點解你要識英文。

24. 但，同好多人想像唔同，我並唔係咩覺得「乜撚都要講錢」。我係極之唔想見到足球（或好多嘢）咁商業化嘅。你諗真啲其實好合理，我成長嘅年代，足球仲係「未咁商業化」，保護主義，巴塞踢歐冠都只能出3個外援（好似係羅馬利奧，史岱哲哥夫，同埋朗奴高文）。

25. 只係因為「個世界已經變咗係咁」，我先照講。深層中我係個pragmatic 嘅人，個世界係咁運作我就話你知係咁運作，「應唔應該係咁」呢啲係另一個問題。

26. 事實上，亦因為咁，我係寧願睇國家隊。我捧德國嘅感情，多過任何一間球會，拜仁輸波我都唔會好大感覺。同我鍾意德國as a nation都唔係最大關係，最大關係係國家隊冇得買人！反而好玩的。（當然話完全冇商業化影響亦係自欺欺人，英格蘭國家隊都最後受惠於英超嘅成功）

27. 最最最後，自high講下，真係要睇唔同嘅嘢。呢個故事最初係Financial Times 講（其他媒體都有）。但，我係睇Bloomberg嘅Matt Levine（我個Patreon都受佢啟發），先再留意到。

28. 真係最後，而你亦見到，Financial Times同Bloomberg都要錢，都唔平。正如我個Patreon都要錢。但應該係咁的，「高度金融化嘅社會」嘛。寫得好，點解唔收錢？掉轉頭，唔收錢嘅，背後係乜？你可以諗下。

＝＝＝＝＝＝＝＝＝＝＝＝＝＝
一週年！月頭訂最抵！比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費100，已經1800人訂！ 畀年費仲有85折，20/40年費VIP 送本人著作一本。
＝＝＝＝＝＝＝＝＝＝＝＝＝＝

自我修復功能可以期待在BMW iX系列了，😃
他們在上海車展秀過👉🏼 https://fb.watch/76wJ3c3bX7/

RubberBand x Yellow! 乾杯音樂會 2017 主題曲 : 一生青春 Lyrics Video

男人最緊要忙，唔忙會被人覺得無用。但當你退休之時，方發現青春的魄力全奉獻給工作，還有很多事還未做，當你後悔之時已經太遲。

遺憾兩字不要帶到生命?。所以大家都要懷著一生青春、永遠青春的動力。趕走後悔及遺憾！

曲、詞、編 : RubberBand & Yellow!
監 : Jeremy Cheng & RubberBand & Yellow!

浮城的燈影 累壞的日程
落入這杯中倒影
看不通看不穿看不清

當天 不怕醜 立志當歌星 玩新秀
當初 不識死
浪照衝 就趁風球洶湧

今天筋骨都疏鬆 得
偶爾會酸痛

好想 不返工
到遠方 帶個背包旅行
想寫一齣 青春片
願有天踏進歐洲影展

想起家中的妻小 總
秒殺各種白日夢

噢 一生青春 誰可 一生青春
尚喋喋不休 光陰可會回頭
若不甘去退化折舊
重新跟這命運 搏鬥

時間靜止
好想翻番去初戀無知
想同Mary Sandy Betty 講聲 唔好意思
做?個陣
好後悔但求平穩
屈指一算眨眼二十八年
仲係一條懵人
吓～ 一睜開眼
我地仲剩低幾多時間
要繼續抱住遺憾
定選擇破繭重生

Oh 一生青春 （乾杯好説愁)
誰可 一生青春 （誰又有熱情發售)
尚喋喋不休 光陰可會回頭（一生青春）
若不甘去退化折舊
就出走

Oh 一生青春 （乾杯好説愁)
誰可 一生青春 （誰又有熱情發售)
尚喋喋不休 光陰可會回頭（一生青春）
若不甘去退化折舊
重新跟這命運 搏鬥

RubberBand x Yellow! 乾杯音樂會 2017
日期: 2017年6月9日 （星期五）
地點: 九龍國際展貿中心 Star Hall
票價: $580 (全企位) / $380 (Balcony 座位)
www.hkticketing.com | 電話訂票熱線 : 3128-8288
主辧單位 : HKonlineTV
協辦單位 : Sunny Idea, R Flat, ELF ASIA
製作單位 : 商台製作
#HKonlineTV #SunnyIdea #ELFASIA #RFlat
#RubberBand #yellowhk #野佬 #乾杯音樂會 #一生青春