攝時間劇場 - 我朋友發明咗「黃藍分辨眼鏡」第一回 / 「肥龍，我知點樣分邊啲係差人！」小明邊喝凍檸茶邊有型地望著肥龍。 / 「無帶証嘅便衣或者休班警你都分到？」肥龍好奇地與小明對望。 / 「係！」 「點分？」 「總之嗰個人做緊一樣野，但係又好唔專心咁望住我地，佢就係差人！」小明傻強上身，將《無間道》對白背頌如流，肥龍立即舉起中指以示不滿。 / 「差人一定有樣睇啦，同埋得3萬個其實唔難分，最難分嘅係黃藍...全港成700萬人，究竟有幾多個係藍，有幾多個係黃，而又有幾多個係扮出嚟呢...」小明苦苦嘆了一口氣...黃色經濟圈下，他也想支持手足和黃店，有些店表明政見，但他最怕不小心幫襯了別的，被同路人訓示。去年有一段時間，他穿黑色衫常被警察查身分證，有時一不小心穿了白色衫，就被同路人報以歧視的目光，所以他自此便很小心。 / 「你咁鍾意杜汶澤，睇多啲咪識點認囉。同埋食野唔駛擔心啦，勁多黃藍經濟地圖。又有啲KOL帶路，有幾煩啊？」肥龍反問。 / 「咁除咗有黃色經濟圈，都有黃色愛情圈架嘛！」 / 「車，女嘅嘢，係粉紅色就得啦！好似貝依霖咁，粉紅絲！正啊！」肥龍從小到大都是究極黃思，即是大咸濕。 / 「咁唔同政見真係好難一齊架嘛！早啲知道就唔駛浪費時間。」 / 「咁如果林泳淘係藍屍，馬蹄露係黃絲，你同佢地兩個係荒島到生活，你揀邊個啊？」 / 「咁梗係林泳淘啦！我會係咁調教佢！將佢藍都調到黃！」小明十分肯定，一錘定音，沒有討論的空間。 / 「咁咪係囉，講到尾你咪都係睇樣，扮咩分政見呢？」肥龍有點不屑。 / 「你個例子咁極端...」 / 「咁如果容海恩係黃，你係咪肯先？」 / 小明認真思索了數秒，肥龍忍不住破口衝出一句：「嘩，你愛情光譜仲闊過西隧喎！」 / 小明沒好氣地，認真嘆道：「咁下下都要分一個人黃定藍真係好煩啊嘛！」 / 二人沉靜片刻...肥龍慢慢張望茶餐廳其他食客，然後從袋裏拿出一副眼鏡，示意小明戴上。 / 小明有點錯愕，但見肥龍極其認真，便戴上眼鏡。小明並沒有近視，戴後只覺是一副張志明式的平光文青眼鏡，無什特別。然後，肥龍用手機按了幾按，鏡片突然彈出一些數據和分析！ / 坐在收銀枱的女職員被一道黃線包圍著，然後彈出一列她在社交媒體出過的post，轉發過的相片及文章，全都是黃的陣形！同時又彈出她和朋友Whatsapp 的對話！漸漸黃線越變越黃！ / 「痴線！咁又比咗300億國泰！個政府根本係癲架！同埋入海洋公園就無犯限聚令！唔算有共同目的！但去商場唱歌就叫！好！我地就成全佢！入海洋公園抗爭！真懲罰海洋公園！不過，今日6月9，點都要出去！收工我就過嚟！等我」 / 就在女店員極速輸入完這段對話，再加✋🏻👆🏻emoji後，在小明的眼鏡中，她也經變了超級撒亞人，被濃厚的金光圍著！名副其實黃到金！小明再望回肥龍，卻得普通黃線，而且非常微弱... / 「你...?」 「呢個係我新發明嘅黃藍分辨眼鏡，即係智能眼鏡，你當ironman嗰種啦，connect 咗個app，副眼鏡就會face detect 咗你眼前嘅人，可以即刻check到佢係social media打過咩，再經過我自己寫嘅演算法，就可以好易知佢係黃定藍。咁我好少係網上表態，條黃線自然弱啲。」人稱IT狗的肥龍，從少都想做發明家，深信科學可以改變世界，但這個發明...似乎有點... / 「係咪好勁呢！」肥龍沾沾自喜。「你話放上眾籌，有無得做？」 / 「唔係好勁！係好恐怖！好變態啊！你咁樣同共產黨有乜分別？」小明立即除下眼鏡，露出討厭的眼神... / 「咁叻，你唔好上Facebook ，IG同任何social media 啊笨！仲有唔好淘寶唔好打online game，最好唔好上網！咁你就唔怕比人知到曬你啲個人資料啦！啊！仲有，唔好用八達通同信用卡，咁你就無任何痛腳架啦！直頭唔存在添啊！」肥龍以為多年兄弟會賞識自己的發明，怎料被嫌棄，有點動真火。「政府監控你，你又唔出聲。八達通賣你資料，你又唔出聲，你依家覺得我變態？佢地得，但我地市民就唔得？」 / 肥龍罕有地發脾氣...小明不知如何是好... / 如果你是小明，你想不想擁有這副眼鏡？支不支持肥龍把眼鏡量產？ / #攝時間劇場 #我朋友發明咗黃藍分辨眼鏡 #黃藍是政見 #黑白是良知 #好食是良知 #裝修也是良知 #黃藍如何定真假 #如何分多少 #鬥黃 #紅衞兵 #黃衞兵 #無為兵