【龔成問答信箱】（Q21741-Q21760）

Q21741：

老師，如一個新手剛入股市卻遇上跌市, 剛買的股票即買即跌可以點做?

因為新手, 心理質素不夠強大, 好容易驚唔知發生咩事, 以為股災, 請問你會有甚麼建議？

龔成老師：

第一，你要了解自己所買入企業的業務，只要清楚，就不用擔心。

第二，了解股價下跌原因，是短期因素，還是企業核心有問題。

第三，將焦點集中翻企業，而不是價格。

第四，如果你每次股價上落好大心理壓力，就不宜投資高風險股，可轉到一些股價較穩定及收息類的股。

------------------------------------------------

Q21742：

你好 ,龔Sir, 我日日睇你個 page, 多謝你教嘅理財之道! 知道好多人問你投資問題, 但都希望你可以抽空回答我, 感激不盡!

本人33歲, 有家庭(兩位小朋友), 以下係現有嘅組合, 想龔Sir幫忙睇下有咩野要改善 (太散?太亂? 有冇野唔應該keep要賣走?),

同埋有一筆定期 (10萬港元黎緊到期), 想睇下龔Sir會建議點樣運用 (可唔可以再入少少房託 / 6823作收息用? 入幾手3067? 買資源股如龍源電力, 信義能源??

定領展 / 小米??), 十分謝謝!

收息股 約佔組合51%
陽光房地產基金 5手 @4.12
越秀房产信托基金 4手 @4
置富产业信托 4手 @7.18
富豪產業信託 5手 @1.51
郵儲銀行 2手 @5.96
香港电讯 2手 @10.86
越秀交通基建 1手 @5.32
深圳高速公路股份 1手 @7.55
新創建集團 1手 @8.9


其他 約佔組合19%
長城汽車 3手 @21.85
南方Ａ５０ 5手 @19.99


新經濟股 約佔組合31%
京東集團－Ｓ 1手 @292
美團－Ｗ 1手 @285.8
快手－Ｗ 1手 @257.8
舜宇光學科技 1手 @165

龔成老師︰

你現時組合數量太多，長線維持10隻左右好了，會較易管理。

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

你現時持股，質素上係有，但有2個較大問題存在。

首先，以你現時33歲去計，應先集中做好財富增值部份。策略上，你應投資「平穏增長股」和「潛力股」這類有增長力股票。

但你現時組合，郤一半是「收息股」。佢地係有質素，但增長力好弱，會拖慢你財富增長速度。除非你個承受風險能力好低，否則唔建議持有太多。

第二，任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

你現時房地產類別，有少少集中，要注意。

現有收息股，建議你最好沽出部份，換至有增長力股票，長線會對你較有利。

至於其餘持有股票，包括你計劃投資的龍源電力(0916)、信義能源(3868)都有投資價值。

但信義能源（3868）不能投資太多，因為佢業務都有風險的，要注意股價波動，如分注長線都可以投資。現價合理區頂位，之前略貴。

將來投資，你可以集中「平穏增長股」和「潛力股」。如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，可視乎你當時投資經驗多寡和了解這些股票程度而定。

現時大市只在合理水平﹐唔算好平。你定期的10萬，我地就等機會，當大市出現較大回調，就加大力度掃貨，然後作長線投資。

另外，定期這類定息產品，增長力好低，同樣唔適合你年紀，暫時唔好再用。

------------------------------------------------

Q21743：

龔成老師你好，想問下
泡泡瑪特，79.35蚊入
聽日公布業績，依家係咪一個適合嘅時候去溝貨？

另外京東健康，120蚊入
幾時可以溝下貨？

龔成老師︰

首先，我想你確認自已是否理解"溝貨"與"分注"的分別。溝貨是愈跌愈入，同時不理企業質素，不理自己的設定金額，盲目去入。分注則是「一早定好買入策略，一早定好本金總數，並以有策略的模式進行」。

如果你係"分注"的話，你可因應平貴和質素，去進行。若是"溝貨"，就不是再入貨，因為再平，都只會令你增加風險。

Pop Mart泡泡瑪特（9992）是一家覆蓋潮流玩具全產業鏈的一體化平台，當中包括藝術家發掘、IP運營、消費者觸達及潮流玩具文化的推廣。

根據弗若斯特沙利文報告，分別以2019年的零售價值（市場份額為8.5%）及2017年至2019年的收益增長計，集團是中國最大且增長最快的潮流玩具公司。

合作伙伴中不乏知名品牌，好似迪士尼、HELLO KITTY等等。而產品中，最為人所認識就是"盲盒"，此銷售模式為集團貢獻不少。

雖然中央規管會有負面影響，但長線質素和發展前景依然係度。2019年純利為4.5億，但現時市值郤超過700億。現貨若佔組合比重唔，可持有。但在這個水平加注，風險太高。

由京東（9618）分折出來京東健康（6618）其業務主要提供線上線下的醫藥出售和健康管理服務，業務布局包括醫藥電商、互聯網醫療、智慧醫療解決方案、健康服務等4個大板塊。

京東健康旗下京東大藥房，更是內地線上線下收入規模最大的零售藥房。其互聯網醫院，日接診量超過10萬次。

質素上，京東健康是有的。但要做估值好困難，佢未有盈利之餘，不確定性都大，但市值郤去到3500億以上。

只能說，而價計依然唔平。若你只是小注，可以守。

------------------------------------------------

Q21744：

sir,又想問問你，你說現時恆指23000左右是便宜區，那麼我大概也是在這範圍開始分注入市。我打算動用50萬買下面既股票：

1. 1810 （用50%的資金）
2. 1585 (?%)
3. 136 (?%)
4. 558 (?%)
5. 3738 (?%)
6. 8606 (?%)

因為小米較穩健我有信心所以用50%的資金投入，sir其他你會建議我點樣分配資金？邊隻高比例d，邊隻細比例d？可以比個數據我參考嗎？謝謝成哥！

龔成老師︰

你好年青，只係20出頭，投資選項上可以較進取。

但你要留意，任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

你持股中有主要係潛力股，佢地雖然有增長潛力，但同時波動風險都唔細，故不宜持有太多。以你年紀，最多佔5成好了。若你投資經驗較弱，要再調低至3成以下。

而你所講潛力股，除了小米(1810)係較優質外，其他都係風險較高類型，只宜小注(佔組合5%左右)。

倢冠控股(8606)是一間香港資訊科技服務供應商，佢規模唔大，每年營業額和盈利好細，而且股價都幾波動。

以佢2020年1000萬盈利計，現價欲去到過10億，此刻投資，風險好高，唔係咁建議。

力勁科技（0558）無研究。

如果從過往業務情況分析，這企業投資價值，質素只是中等，唔算好值得投資。不過唔知近期股價上升的原因，除非你確定佢上升背後的因素，是由於一些對企業長期利好的因素，否則，不宜投資。

除了潛力股外，餘下資金你可以集中係平穏增長股，令組合更平衡。

平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、領展(0823)、希慎(0014)、太古地產(1972)

大市現處於合理水平，那50萬資金，你可以先用一半，以"分注"形式慢慢入貨。餘下一半就等大跌市機會出現，才大力度掃貨，並長線投資。

------------------------------------------------

Q21745：

老師！你好！我一直有看老師的問答同定期勵志既post! 真心多謝你！我已經睇完你本80後百萬富翁同買左5年買樓4部曲！但我有些問題想指點迷津⋯⋯

我想問有關置業問題！我係90後但就快29+1、希望5年內甚至更早可以買第一層樓自住！因為都想結婚同組織家庭

我之前睇過兩個樓盤「2-3年樓齡既單幢樓房，係深水埗/慈雲山，均是190尺-245尺既納米單位

我睇完老師本書4部曲講到先買細屋再換dream house,就開始迷茫，因為有朋友教路不好買納米樓、無升值潛力，換不到大單位！但舊樓不是一樣沒升值能力嗎？

又要支付大廈維修費，但我目標第一層樓只能付出450萬樓下既樓價同借9成按揭攤分30年供還款，這樣說在市區好難找到、除非樓齡已經超過30年、但又引申出不會批到9成按揭。

老師，請問我應該點做法？買舊樓大單位？買新樓細單位？我想住市區、不想考慮新界區。。因為家人住所同工作地方均是市區。。

不知道去向，感謝你。耐心等待回覆

龔成老師︰

想借買細屋再換dream house，你細屋必需有一定投資價值，至少跟樓市同步，否則就沒有意義。

納米樓尺寸太細，連一個基本家庭生活所需的300尺寸都無，投資價值相對較弱，唔建議你投資。

至於過30年的樓，唔代表一定無投資價值，但就要小心選擇。而且正如你所講，較大問題係銀行未必會批出9成按揭。

所以，其實你此刻問題重點，會係你置業資金不足，令你變相找不到合適選擇。

我建議你先用優質股，去累積更多置業資金，才去考慮物業部份，咁會較理想。

你可以用「平穏增長股」 + 「潛力股」的組合，去進行增值。你每月先用5成儲蓄，其餘先儲起，用一邊月供一邊儲蓄的策略。

現時大市只是合理區，你現有資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨。

------------------------------------------------

Q21746：

你好！我從來沒有接觸過任何股票，沒有任何投資，我只有五萬多元港幣積蓄，長期放在銀行做定期存款，可惜利率很低！我只是想短期（半年）賺一些。

請問，00968「信義光能」好，還是00135「崑崙能源」好呢？

龔成老師︰

首先，你要明白一個正確的財富增值方法。其實係長線去持有一些優質股，等佢地自然增值，以達至財富增長架效果。

半年只係一個好短架時間，唔係咁理想。一隻優質股，最少要持有3-5年，甚至更長，個財富增值效果才會明顯。

信義光能（0968）本質不差，業務保持有一定的增長力，股本回報率處高水平，加上現金流強勁，是有一定質素，可長線投資的股票。

現價合理區頂，如果想入，要慢慢分注，但仍不是大注投資的時候。這股股價上落都大，要注意金額。現價算合理區頂，如果想入，要慢慢分注。

昆侖能源（0135）雖然質素都算有，但不是最高質類別，佢對油價較為敏感。佢的產品自主力較弱。

石油是商品，當中沒有差異性，佢地要將石油賣出，只能跟國際油價，這令佢地處於被動狀態。沒有價格自主的能力，這令佢地的獨特性有限。

這類商品企業，都可投資，但就要明白不是最高質的企業。由於質素中等，唔建議大注投資。

整體質素而言，信義光能（0968）會較高。但波動性風險，同樣都係較高。若你投資取態係較保守，我唔建議你持有太多。

------------------------------------------------

Q21747：

擔心好快出6G。而我對6G的技術上疑問是6G是否在5G的基建基礎？即是6G要發展，在現在的鐵塔上換6G的設備？還是要推返哂所有5G的硬件？

我相信是前者，就像港鐵一樣，港鐵舊列車就是5G比喻，新列車就是6G，其他硬件（車站、電纜、路軌是不變）

另外，鐵塔會否有一帶一路商機，他們大可以去中國以外地方起鐵塔幫其他發展5G?純粹代入管理層去諗，當然，電訊涉及國家安全，又是政治層面，又另一回事。

現代學習提升思考層次，代入如何我是鐵塔高層如何思考經營鐵塔

從你的千萬富翁本書學習到的，請師傅你不要介意，純粹是向師傅你交流來提升自己層次。向師傅你學習

而且單打獨鬥永遠睇唔到自己盲點，有互動交流是最好的

龔成老師︰

未來6G發展，相信訊息傳輸速度和精準度，會比現時5G有倍，甚至更多的增長。

至於將來6G技術，對相關硬件需求，集團要作什麼樣變動，去配合這種新技術學，現時都無一個切實的定案。

但由於3大電訊商為主要客戶，內地需求得到保障。在內地極高市佔率，有壟斷優勢。加上，本身已多行內累積一定技術和經驗。

將來要發展6G業務，相信集團很大機會成為當中重要的一員。所以，集團長線發展係正面。

至於向外發展，一帶一路係一個機遇，但當中都有不少不確定性，故估值上，只宜作一個參考。

你預佢潛力度無以前咁高，算係平穏增長，至潛力股之間的股票。此股有投資價值，但不宜過份大注。

------------------------------------------------

Q21748：

龔成老師你好！自2018年跟隨你的指引月供股票，歷經數年時間，都有穩定的現金流收入，謝謝你！

現有三條問題，希望老師解答一下，謝謝！

1. 早前第一次買科技股，選了阿里巴巴（9988），$246.8入，現在很波動，捱價中，請問公司前景如何？又可在甚麼價位溝貨？

2. 海螺水泥（914），大約$46@水平入了少許，請問公司前景如何？及

3）現有資金300k，如何逐步建立一個攻守兼組合？（已有兩電、置富產業、港鐵）

謝謝
攻守兼備組合

龔成老師︰

1) 阿里（9988）佢出左最新的季度業績，經營虧損76億元，主要由於國家市場監督管理總局就中國反壟斷法處以罰款182億元。

如果扣左這資罰款因素，經營利潤105億元，同比增長48%。經調整EBITDA同比增長18%，去到近300億。

業績略比市場預期差，因此會令股價短期較波動。

現價合理區中間，長遠價值仍在，不過短期會弱。如果你現有持貨，佔組合比重唔多，現價可再加1注。之後，每回10-15%左右，再加注就可以。

但緊記，個別企業唔好佔組合15%以上，以免出現過度集中風險。

2) 安徽海螺（0914）有質素，有增長力。

佢主要從事生產和銷售熟料和水泥製品，業務地區包括中國東部、南部、西部、中部及海外。而安徽海螺是水泥行業中，全球最大的單一品牌供應商。

水泥屬於基礎原材料行業，對建築行業有很高的依賴性，同時亦會與經濟增長速度有較高的相關性，特別與固定資產投資相關。即是說，當中國基建及房產市場不景，水泥行業會比一般行業處較大的不利狀態。

另外，水泥企業在生產過程中，燃料成本佔總生產成本中約佔了超過一半。若能源價格出現較大變動，就會對企業成本造成較大影響。因此，當能源價格出現較大上升時，將引致安徽海螺的成本增加，影響其中毛利。

綜合來講，佢擁有相當規模、生產能力，有一定的質素及賺錢能力，而水泥行業長期將因中國城鎮化以及一帶一路的建設，仍然會增長，但不會像過往般快速，而是進入較平穩的時期，在本質上此企業不差，你現貨可持有。

3) 我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你現時35歲，應以增值為主。2電(0002, 2638)、置富(0778)主要係收息，增長力較弱，故不要再加注。至於港鐵(0066)，係可以。

建議你用「平穏增長股」 + 「潛力股」，去創造一個攻守兼備的組合。

若以你年紀計，2種股票比重，可各佔一半。潛力股始終有一定風險，如果你投資知識不高，或者想保守D，可較集中在平穩增長類股。而潛力股，可較小注。

現時大市只係合理水平，現金和股票最好各佔一半。若你持股佔組合不到一半，你可以多用一些資金，以分注模式入市。餘下資金，就等大跌市出現，才加大力度掃貨。

------------------------------------------------

Q21749：

老師中國平安依家值博率高嗎! 最近回到80樓下! 同埋 依家全球通脹升溫, 但係經濟又未 復甦 呢啲係咪叫惡性通脹!

係咪會有一輪大調整! 股票同現金嘅比例應該 佔幾多比較好 謝謝老師!

龔成老師︰

係全球大印銀紙下，而整體經濟未見明顯復甦，的確有機會造成滯脹。

但我地分析一隻股票時，宏觀因素係要考慮，但只係作輔助，主要都係睇翻企業自己本身。

中國平安（2318）有質素的，佢有規模，有品牌，近年的發展都不差，不過，股價有時會有少少波動，這主要受投資市場表現影響。

這股有長線投資價值，是平穩增長型。現價算係合理區中間位置，分注投資就可以。

至於會唔會大調整，我唔知。我地投資唔好去估個走勢，你應用平貴，去為自己制定投資策略。

現時大市只係合理水平，現金可以佔3-5成。

餘下資金，就等大跌市出現，才加大力度掃貨。

------------------------------------------------

Q21750：

你好老師，本人40，已婚，暫時沒有子女，我和老公收入合共大約5萬一個月，有一個已買了不用供的公屋。

現金大約有150 萬，另股票23萬，之前有月供股票，但因為升了就沒有再供款。

尤於唔識投資，想問點可以財富增值，買樓又沒有經驗，買債卷債基會隱陣嗎，謝謝你

龔成老師︰

若你係投資經驗不多，月供股票會係一個唔錯架選擇。因為佢用長線供款，去減少左買貴貨架風險。

所以，你以往月供架做法係正確。月供可以拉平均個買入成本，除非你對定平貴極有信心，否則你應長線一直供，不理平貴。因為咁樣，反而會對你更有利和安全。

以你40歲，可以選擇一些「平穩增值股」+「潛力股」作投資目標。

以現時大市合理區狀況，月供最好用一半每月儲蓄，另一半就先儲起架策略。

由於你投資知識不高，因此可較集中在平穩增長類股，至於潛力股，只宜小小注，最好是你提高投資知識，等你有一定知識，先慢慢增加翻潛力股比例。

現時大市處合理區，150萬資金，可再用多20-40萬，分注咁慢慢盈富及其他平穩增長股。到你有較多經驗，才加大投入金額和增加一些潛力股。

你可以先用股票做增值，到有一定財富，才加入物業類。如果你對買樓無乜概念，你可以睇我本<<5年買樓4步曲>>，都會講述一些買樓相關知識。

而債券，這其實只是「產品」，物業、優質股是「資產」，所以從財富本質上，我地應較集中持有「資產」，才對我地最有利(你可以睇睇《財務自由行》一書，我從財富本質上，講述了當中原理)。同時，現時息口低，但未來有機會重回加息週期，債券未必是最好的投資工具。

至於債券基金，坊間分好多種，你要小心睇，因為有d風險低，無乜問題，有d則有潛在的風險，絕對不是保本的產品，有機會出現了「賺息蝕價」的情況。

第一，有些基券基金，會投資「高收益債券」，即是「垃圾債券」，你一定要睇睇佢所佔的比率。

第二，債券基金往往不是單純地持有債券，而是可以作買賣，以及利用衍生工具作對沖等策略，即是可能有價格上的波動。

第三，不少銀行都會提供借貸，以槓杆去放大回報，以平息借貸去賺取息差。低息環境時間題不大，但進入加息週期，不止借貸成本增加，同時債券價格往往在加息期下跌，雙從打擊下，投資價值成疑。當然，若然加息步伐不快，息差利潤就可觀。

我不是說債券基金有問題，只是說明當中的風險，因為市面上的基券基金好多，你要仔細分析。

------------------------------------------------

Q21751：

你好，想問下基金風險較優質股票 及債券高
穩健為主 投資後者為上？

現在 港股，美股及人民幣又如何投資部署？以下3因素？

1）疫情控制
2）股市表現
3）政治穩定性

龔成老師：

基金有好多種的，因此好難話基金的風險較股票/債券高定低，因為有些基金是投資穩陣股票，有些是高風險股票，有些的投資策略較進取，有的則較保守。

你一定要清楚翻該基金的投資策略，投資目標等因素，先得。

至於股票，同樣有好多種，有穩健，有不穩。

債券都是一樣，有些債券好穩健，但有些則可能連本金都會虧損。

建議你增加知識先投資，不要急。

至於你上述提出的3個因素，主要都是一些中短期因素，而我地買股票就是買企業，因此，著眼點應集中在「企業的長遠發展」，佢的業務情況、前景等。

我地最重要是建立一個長期的「財富組合」，要優質，要平衡，要適合你的年齡與風險承受程度，不是著眼於短期市況及因素。同時不是買賣賺差價，而是成為你財富組合一部分。

------------------------------------------------

Q21752：

老師，想問下保險，2013年，我無啦啦在朋友講解下，用仔名義買了一份AIA保險基金，有人寿每月供hk$2000, 要供30年，期間可以提錢走,但要罰錢，或停止供款，直至30年期屆滿才提錢

現從你身上學了一點投資知識，於是計計回報，才發現每年得1%回報，現大約有hk$15萬。

我在宏利的基金回報都不止1%

我諗緊
1.停止供款, 讓它滾存，直到年期屆滿才提錢
2.停止供款，立即提取全部錢
3.停止供款，把每月的hk$2000用來買股票

老師，有何建議?

另外，講返261 。我去銀行放，銀行只幫我排隊放一星期，之後沽唔出，我繼續沽左幾星期都係沽唔出，怎麼辦?

謝謝你

龔成老師︰

我地保險，只要做好防守部份，買足夠保障，咁就可以。用來投資增值，效果未必如優質股理想。

你現時保險基金，按年只有1%回報，係好低。從長線投資角度考慮，你將佢資金提走和停止供款，將資金轉至其他優質資產，相信長線回報會較理想。

但由於當中會有提早贖回收費，你要問清楚你保險代理，這個罸款係如何計算，才決定基金內資金，如何處理，咁會較好。

ＧＢＡ集團（0261）生意持續下跌，年年虧損，投資價值很低。

由於佢股價只有1仙，用一般架方法較難放。你可以直接打電話去銀行，只佢幫你人手掛一個少於1個仙的價位，出到貨的機會，會較大。

------------------------------------------------

Q21753：

老師，我最近計劃買約900萬的樓，但發覺 撇除家人的一百萬外，我倆還需要取大概一百五十萬左右(包括稅, 裝修, 律師費等)，

所以如果要買樓，就要套現持有的大部分股票和銀行大部分存款。並且每個月還給父母錢和供款後，可能就只剩低二萬左右。

#1 在我的角度來看，我覺得呢個情況會變成了一個每個月收入償還貸款的死胡同，資產可能無法再增值，因為可能再無多餘錢投資股票。

但我男朋友認為收入償還房地產的貸款是增值資產的一種，前提是樓價最遠必升。老師，請問這種說法對嗎？

#2 如果三年後才買樓的話，我哋應繼續投資股票嗎？而且現金和股票持有的比例應該是多少？(我個人現時比例是 現金4 : 股票6)

#3 現時樓價暢旺，樓價長遠只升不跌，如果我們真的取得足夠的首期，而銀行又借足8成，但每月可能還款後只剩約兩萬收入的話，你認為我們應該買入嗎？

謝謝老師。

龔成老師︰

1) 正確，因為我地還款當中，係包括利息和本金部份，本金部份等同買入物業資產。

我地長線財富增值，唔係單單利用優質股，我地都要講求成個組合平衡性。所以，長遠我地都要將物業，包含埋係我地組合之內。

當然，大前題係個物業要優質，才算得上係資產。

2) 你都可以維持用股票增值，以大市水平計，你現金和股票比例，係合適。除非出現大跌市，否則你資金唔好動用。

而且，這些股票當中，應以「收息股」+「平穩增長股」為主，唔好持有太多波動性偏高的股票，以減低最終回報的波動性風險。

3) 你可以睇翻你本身置業有無迫切性，如果有，而你又"供得起"，你都可以入市。因為置業後，你每月都尚有一定資金，可投入股市作增值。所以，問題不大。

若你無置業迫切性，你可以睇翻你個物業架質素，和租金回報率，去決定而一刻是否投資。

記住，就算樓價暢旺，長線港樓會升，但都唔代表你值得係而一刻，去"買貴貨"。我地都要從長線投資角度，去考慮而件事。

------------------------------------------------

Q21754：

龔成老師,想請教你，今年我43歲,堅持有十五隻股票,打算將組合改回十隻股票,你會建議我持有哪十隻令到組合會較平衡？

現在股票組合︰

潛力股
美團 300股
阿里巴巴 200股
平安好醫生100股
中國生物製藥2000股
楓葉教育12000股

平穩增長股︰
新鴻基地產 500股
領展500股
中興通訊 1600股
中國鐵塔 20000股
金沙中國800股
中國民航信息2000股
惠理集團 4000股

收息股︰
中移動1000股
中國電信 10000股
深圳高速公路 4000股

我打算賣出惠理,將資金換入金沙.尚餘約$70萬現金等機會.

如果跌10至15個percent加一注,會用第二次嘅買入價計算,還是用平均買入價計算？

Eg:第一注$30、第二注$38，平均:$34

另外想同你分享，20年前,出來創業,跌得好痛.

今年,我再次出來創業，開一個自己運動嘅studio.佢最差嘅情況去做呢件事，我反而係覺得係一個機會。

龔成老師︰

以你43歲計，這個組合比例係合適。

而當中股票，都係有質素，雖然有少少多，但唔需要刻意去沽出持股。你未來資金，較集中翻係當中較有質素的10隻，咁就可以了。

惠理集團（0806）是一家獨立的價值型資產管理集團，業務集中於大中華地區及亞太地區。集團透過惠理品牌管理多隻認可基金。

質素算是不差，但又不能稱為好好。

過往賺錢能力中等，但增長力就不強。你持有係無問題，不過就唔好對股價增長有太大期望。是平穩增長類。

整體質素上，金沙(1928)會較優勝，你可以沽少少，換去金沙，都係可以的。

另外，中興通訊（0763）、美團(3690)、平安好醫生(1833)是潛力股類，而且係不確定性較高的企業。投資係可以，但要控制注碼，不可佔組合太多。

大市現處於合理水平，你可以多用20-30萬，以"分注"形式慢慢入貨。餘下資金就等大跌市機會出現，才大力度掃貨，並長線投資。

至於加注計算方面，每跌10-15%個基數，會係用你對上一注的買入價。

其實做任何事，我地都會經歷失敗，這是在所難免。重點係，你有沒有在這個失敗當中，上了寶貴的一堂課。

創業好少一開始就好成功，成功都係透過無數失敗經驗，去慢慢累積出來。

現時大環境雖然尚是十分不穏定，此刻創業都有一定風險。但同時間，現時很多方面(如租金)，都會比一般情況平，所以都有一定值博率。

最重要係你了解這門生意大方向，明白自己有什麼獨特優勢，將佢盡力發揮出來，咁就可以。

------------------------------------------------

Q21755：

成老師，多謝你一直以來的分享，呢2年鼓勵咗我哋好多好多。因為你分享對樓市的睇法，上年3月我低位買咗元朗溱柏單位自住，今日已經升左50萬，男朋友都升左做老公。

後來我有買你本《五年買樓四步曲》知道元朗南升值潛力有限，不過已經買咗自住，亦都完美解決咗我哋本金小但有自住需要的問題，真係好多謝你！

但前兩日收到個壞消息，政府收咗屋企前面塊地，係2023年起公營房屋，我哋打算努力啲賺錢買第二層，想請教一下老師意見。

目標係升值潛力大嘅天水圍濕地、白石角、馬鞍山等。元朗層樓係我名，買入價410萬，按咗8成7，老公（當時男朋友）做按揭人，當時銀行話我至少月入$30000先甩到老公名走，

我做老師嘅，目前26歲月入$24000，預計4年後先有$30000人工。

老公30歲，多謝你鼓勵年輕時要更上進，佢好努力寫文章分享、上電台直播增加知名度，成功月入4萬變6萬，亦都打算一至兩年短期內開自己店做自己品牌，預計開業成本50萬。

我計過扣除日常開支，月儲4萬唔係問題，呢家有20萬現金同投資咗6萬股票，各三萬

[email protected]
[email protected]

問題一：我唔知應唔應該繼續買股票？

問題二：3067同1798算優質股嗎？可以持有？

問題三：預計4年後買樓要點理財好？買以上三區可以嗎？

麻煩老師指點下我

龔成老師︰

恭喜你，完成左人生中2件大事。

其實，你則買的溱柏係自住樓，升值潛力唔係重點。最重要，係適合你們生活所需，而且做到"供得起"，咁就可以。

而且你物業位置，都算接近港鐵站，質素會睇高少少。

1) 由於你1,2年就要動用這筆資金，去開診所。你動用這些資金增值都可以，但就要相對保守。

目標係一些「平穩增值股」+「收息股」，比例可以50:50。若你相保守些，可以「收息股」佔多D，甚至100%。再保守D，就係加入埋定期儲蓄這個選項。

到你老公要開診所前半年，就開始慢慢沽貨套現，唔好要用先一次過沽，以減低股價波動風險。

2) 安碩恒生科技（3067），有長線投資價值。若你打算將佢套現，去開診所的話。由於佢有一定波動性，暫時唔建議加注，等開完舖先再算。

大唐新能源（1798）主要在中國專注於風電項目的開發、管理及營運。

佢要從事風電等新能源的開發、投資、建設與管理，低碳技術的研發、應用與推廣，新能源相關設備的研製、銷售、檢測與維修等，與新能源業務相關的培訓、諮詢服務，以及房屋出租。

過往的業務發展不差，長遠都有投資價值，不過規模較細，唔建議投資太大注。

3) 到你老公新舖開張，一切穏定，可以再開始每月儲錢時。你就可以月供「平穏增長股」 + 「潛力股」，去做增值，累積置業資金。

你每月先用5成儲蓄月供，其餘先儲起，用一邊月供一邊儲蓄的策略。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨。

3個你所講的置業地點，會以馬鞍山為最好。

白石角，是一個自成一隅的新社區，但這社區的設計，密集程度太高，同時配套不足，物業價值不算高。

天水圍始終同市區有一段距離，投資價值會較弱。

另外，我地做財富增值，除左講增值潛力外，都講組合平穏性。

由於你已經有一間物業，未來再買新物業時，會成個組合偏晒去物業類，會出現過度集中單一資產的風險。

因此，你唔需要急去買第二間屋。再投資第二個物業時，必需確保係買樓同時，都可以保有一定股票係手，作增值之用，才好考慮出手。

------------------------------------------------

Q21756：

你好，請問知唔知道比亞迪在智能汽車例如自動駕駛方面有咩進展？謝謝你

龔成老師︰

比亞迪(1211)係智能車聯網上，一直都在發展，2020年8月，比亞迪DiLink3.0系统上線，進一步為AI、語音識別、車聯網、大數據等技術升級。

2020年，集團同時入股深圳華大北斗科技，相信係為令智能駕駛部份，佈局變得更完善。

以集團規模和經驗，相信長線智能汽車發展，會係正面的。

------------------------------------------------

Q21757：

老師：唔好意思，又打攪你

請問現時持有幾隻科技股最近都跌左好多，我唔知應該跌左咁多再加注，定止蝕轉其他優質股

以下是持股資料：

9988 200股 買入價243.5
9618 100股 買入價329
981 500股 買入價27

謝謝！

龔成老師︰

你唔好將個重點，放錯左係買入價，或者帳面賺蝕上。

我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

你現時持有股票，都係有質素，可照持有。

至於是否加注，就要睇翻你成個組合配置，同股價處於什麼水平。

你上述的都是潛力股，佢地有一定風險。若你係較年青，這類股票佔你組合，可以5成。但若你較年長，或者投資經驗較淺，就要向下調整。

以股價計，現時阿里巴巴(9988)和京東(9618)都合理區中上位置，若你資金足夠，現價可以加1注。

中芯國際（0981）業務有增長力，質素係有，但未到最高質素。

加上之前熱炒過，股價大上大落，投資要注意風險，這股唔建議大注。

------------------------------------------------

Q21758：

依家上緊你既堂，真心覺得你教緊既野同坊間既炒炒賣賣好唔同，我想賺多D錢！麻煩你幫我睇睇有咩可以改善（其實我有個目標...就係好想將來係澳洲買樓！）

我今年29歲，男友33歲，打算2/3年後結婚。

我2018年開始買股票，現有大概10萬月供股票。（其實係咪keep住月供會好d?因為依家係不定期咁買...）

388～34股（＄253.36）
66～310股（＄43.45）
1928～1手（＄34.57）
823～134股（＄66.98）
1177～136股（＄7.33）
2800～724股（＄29.7）
1448～2手（＄7.13）
6823～2手（＄9.96）
2638～2手（＄7.49）

1. 我自覺賺既幅度較細，係咪時候要審視投資上既配置？因為太保守變左增長/潛力唔夠？如果真係潛力唔夠，請問有冇邊D股票係有機會做到3年後有30－40萬？

2. 黎緊就畢業，要還學債。我有諗過襯審視配置既同時，將66賣左還左部分學費先？

3. 我覺得係儲現金方面做得冇咁好，其實咁既年紀，儲現金比例應該大約佔資產幾多成？

4. 如果我想達成係澳洲買樓既目標，應該可以點做？

我會視老師為我理財上既榜樣...希望有一日我地都可以好似你咁做到財務自由。

感謝和辛苦老師你花時間詳細解答我地既問題，祝老師身體健康，大家一齊努力

我仲有1手 8473，＄0.34買入

龔成老師：

1）潛力度的確唔算強，以你地的年齡及投資目標，其實收息股如港燈（2638）、香港電訊（6823）其實未必適合，你可以考慮轉換部分潛力股。

當然，平衡組合都好重要，你太過進取都唔得。

安碩恆生科技ETF（3067）、阿里（9988）、騰訊（0700）、港交所（0388）、舜宇光學（2382）、小米（1810）、ＧＸ中國電車基金（2845）、中生製藥（1177），其實都可考慮。

但就要明白波動性比上述會高左，同時風險大左，你要自己平衡。部分要等回少少先入。

現時你月供的，都是有質素，但可以轉多少少在潛力股類別。

2）如果利息唔高，其實唔需要太急（當然，我唔清楚你當中的條款），至於港鐵（0066）其實有質素及基本增長力，在配置上，可留，如果真的要賣股票還學費，就賣收息股。

3）我地會考慮你年齡及現時的市況平貴度，你可以留3成現金左右。

4）你現時應該著重「增值」層面，目標是利用儲蓄及股票，去追到的目標樓價的數。如果你打算在1、2年內買樓，就未必適合放太多錢去投資，但如果你3年後先會買樓，就要好好利用這段時間去進行增值。

因此，你的方向應該是投資「平穩增長股」+「潛力股」。

至於彌明生活百貨（8473）業務不過不失，發展能力中等，不是高增長的類別。

以佢現時的經營情況，算是合理價，但這股始終規模不大，加上近年的盈利有下跌情況，存有風險，因此不建議太大注。

另外，政治相關因素，都會令這股波動，要明白股價風險，政治因素是好難預測的。

這股唔建議持有太多。

------------------------------------------------

Q21759：

龔老師：本人手持以下股票，可否繼續持有？還是就算損失也要減持？

我之前買了些股票，買入大跌，但一直不捨得減持，到後來忍痛減持，它又回升，當然仍未回家鄉，但起碼損失少点，所以眼見以下股票近來股價不濟，怕又重蹈覆轍，請老師指点一下！

9988 ：1500手均價$249
388 ：800股均價$441
1288 ： 2000股均價$3.2
1339 ：1000股均價$3.48
1398 ：1000股均價$5.11
003 ：2000股均價$12
3690 ：200股均價$266
6618：200股均價$133
1810：200股均價$31.85
1024 ：200股均價$235

另外，後想問：其实買股票心態應是怎樣？我想買股票心態是：增值財富。假設快手當日我$115有一手，去到$370(或者應说去到自己心中的底線那刻）是否應 take profit 先？

還是放在床底讓它滾下去(假設我不急需那資金)？像這快手，當時我沒有放，之後見回落，我就入多一手，結果現在繼續下滑！請龔老師指導下本人心態！

盼望老師回覆！！謝謝！

龔成老師：

最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

你持有的股票，並不是無質素的，基本上都可以持有，但有兩點你要注意，第一，你要做好配置，例如你不少是銀行股，就會有行業集中風險，你要持有優質、平衡的組合。

另外，你有不少股，都是近一年熱炒的股，反映你在選股時，只懂跟市場去買，而這動作是危險的，因為當市場熱炒過後，股價一般都會大幅回落。不過，你上述持有基本上都有質素的，只是你日後要注意翻這點。

第二，你要留意平貴度，如果一隻優質股過貴買入，你都有可能出現損失，如果未有企業價值概念，就多用月供或分注投資模式進行。

至於你問快手（1024）的問題，我地會見到，有時股價上到某個價位，賣出等跌再買入，會有較高回報。而有時又會見到，一直持有會有較好回報，例如港交所（0388）、騰訊（0700）都是升值100倍。

而根據統計，後者的方法，能令投資者有較大的總回報。

當然，有時股價真的貴，都可以考慮賣少少，但點都建議有基本的貨在手，因為長線持有的贏面始終較大。

------------------------------------------------

Q21760：

龔sir您好, 上緊您既堂, 有d問題想請教下您:

我今年31，同我先生月入約40k

-有40萬股票(水桶1-3都有)
-有20萬存款同埋
-有兩份重有10年要供既儲蓄保險(每月大約供$3000)。

1.我地本身同緊屋企人住(層樓有我名), 但都想換樓, 而家住個到始終都舊, 您會建議樓換樓還是過多5-10年等有返d錢先再買多層樓再將而家呢到收租? (而家層樓值450萬, 睇過現時租金大約可以放到11k一個月)

2. 未來一兩年想試下開間餐廳(我先生係廚師)，我同我先生想選址係將軍澳, 因為人口密度較高人流較多, 想請教您有咩睇法。十分感謝!

龔成老師：

1）以累積財富的角度，遲少少先換樓會較好。

首先利用這刻的資金投資股票，先將財富增值，到5年後先換樓，這樣可以有更大的總財富。因為現時股票的增長力，好過香港樓，因此先投資股票會較好。

當然，你自己要考慮自住因素，因此可以在兩個方向取平衡。

2）其實都可以的，有人的地方就有這個需要，而將軍澳是住宅區，你地的方向應較為街坊。另外，要記住做生意技巧，食物是其中一環，但生意會更重要，想想麥當勞你就明。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q20221-Q20240）

Q20221：

成哥，想請教你關於股票的買賣時機和持有股票的時間,及我的遠景

1.我不做短炒，但又覺得長線投資有點遙遠，我想改變策略做中線投資，不知道成哥對中線投資而獲利有什麼看法？

2.我自己中線投資買入時機的策略：（i）據我翻查過往股災的紀錄:
(a)1994~1995年 總跌幅為45.3%
(b)1997~1998年 總跌幅為61.1%
(c)2000～2005年 總跌幅為54.7%
(d)2007~2008年 總跌幅為66.6%
(e)2010~2011年 總跌幅為35.3%
(f)2015~2016年 總跌幅為36.1%
(g)2018~2018年 總跌幅為26.7%
（h)2019~2020年 總跌幅為30.2%

以上數據2018年為小型股災總跌幅為26.7％。我想在股災時分注買入，而不做月供。若我計算恆指從頂位回落25％成為我分注的第一注，其後恆指回落10％我再入第二注，如此疊加。反之，若恆指跌20多％後幾個月不跌反升進入牛市一期，我便一口氣買入，以上的做法如何？

3.我中線投資賣出時機的策略:
(i)投有股票時間:
我持有股票時間短至1年，長至3年，3年內必定清倉，一股不留。

(ii)賣出股票時間:

(a)當從股災見底一刻計算持有股票至1年然後沽出30％的股票。這樣做是想取回本金兼些微利潤。

(b)在1年至2年間內觀察市場氣氛，然後沽清50％股票。這樣做是考慮市場進入牛市二期，快三期的情況而考慮的。

(c)現時只剩20％股票，假設遇上股災就由佢坐艇，如冇既，3年內清倉。以上做法又何?

4.其實股災每2～3年就來1次，按照我上方策略，賣出後再買入唔係更賺嗎？成哥你話賣出後味必有機會買入，其實意思是買入便宜價吧？假設買唔到便宜價，合理區也可以吧。

成哥你也在書中寫出比亞迪的天堂與地獄，由88蚊回落至12蚊，其實冇賣出味賺唔到？

假設88蚊賣出，佢唔落番12蚊，佢落番30幾蚊對當時來說也是合理價吧？在股災前賣出其後再買入不是更好嗎？

當然，冇人知股災幾時來臨，但猜得較接近總是可以吧。賣出後再買入頂多利潤賺少左，但又唔駛承受股災帶來的風險，為何不做呢？我不是挑你機，我當然沒有資格，只是帶出我想法。

成哥繼續努力，永遠支持成哥您！

龔成老師：

1）我之前做過銀行同證券行，見長線客始終賺錢較多，短炒客較難賺錢。

另外，如果你分析全球真正賺錢的投資者、經金經理，佢地都唔短炒，都是長線投資的，巴菲特都反對短炒。

因此，你應該全力長線。如果想中線，真的小部分好了。

2+3）你這樣的推論，會出現了一個盲點，就是表面過去式的推論。

例如你去賭場，見到連續10局，都會大小大小這樣運作，你就將10局套用永遠。你會說服自己，這套模式能運用到過往所有時間（但其實是你由當中的所有時間去抽出數據，當然能應用到），但到第11局，是這些數據以外的，能否應會，無人知。

其實你這類想法，我在20年前已做了唔少研究。技術分析的原理，就是統計學，我數學科是「A」的，我20年前花了大量時間研究，結果，用了幾年，輸足幾年！

你回歸翻「企業價值」面，平貴，是最好的方法。你睇下全球邊個投資者最賺錢？佢點解唔用這些方法？點解？？？

4）我地可以計平貴，有時在貴的時候賣出，等跌的確有賺，但最大的問題是，好多野好難預測。

當時比亞迪（1211）$88是貴，賣出，等跌買入，的確有賺，如果佢企業價值增加，佢股價的確不會支持到$88。

但如果好似近年，佢的業務開始增長，全球都開始用電動車，佢上到$100最初是貴的，但由於企業價值有增長，慢慢又變成合理，如果用你的方法，就會在$100賣出了。

你試想想，如果用你的方法，在過往，港交所（0388）、騰訊（0700）在這麼多年，股價上升100倍時，你的方法能賺到多少？可能連一倍都賺唔到。你怎樣能賺到100倍，就是「唔好賣」。

------------------------------------------------

Q20222：

老師，我唔係好理解到點解美債上升，對納斯達克指數同科技股會有咁大嘅影響？

龔成老師：

關鍵是企業估值，當我地進行估值時，會以無風險利率作為其中一個估值因素，當無風險利率上升時，企業價值會受影響。由於科網股的現金流集中在較後段的年期，所以當估值運用折現率時，對佢地的價值影響，會比傳統企業更大。

當然，要正式計企業的價值，過程比較複雜，好難三言兩語就講到，就算在我的股票班，都要講5小時，裡面會講3種估值方法，有難有易，但同學都用到的。

簡單來說，你要考慮企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。

例如，我地會考慮佢有多少生意，有多少盈利、現金流，有多少資產，從而計算該業務值多少錢，同時會推算將來的盈利情況，去推算這企業長遠的價值。

如果要深入計算，基本上要好仔細的研究企業，要分析好多財務數據用比率，先至有較完整的答案。

------------------------------------------------

Q20223：

想分享因為平時返工冇時間睇市
5 年前蝕左5 萬之後一直冇再玩股票

10 月開始因為在家工作又玩返
最初好易賺錢
買穩陣野都賺到一萬幾千
但最近，日日睇住個市

覺得身心健康都變得好差
花好多時間睇人分析
但賺得唔多
甚至而家一手坐艇股....

我32 歲月入60000
供樓10000
有積蓄約70 萬現金 30 萬股票

但真係唔敢大部分錢都放在股票....
我決定下月開始月供
823 2800 每樣2500 替代日日甘捕市了....

請問老師仲有冇邊隻建議供？

同埋有冇邊啲潛力股？
我睇你2019-20 的50 隻潛力股
好多都倍升 甚至幾倍升了 ....
現價是否太遲？

謝謝老師你

龔成老師：

其實日日睇住個市，未必賺錢的，我過往做過10年銀行與證券行，我見到好多短炒客都是輸，長線投資者就贏。

所以，你現時長期月供，是正確的做法，原理是儲優質股，成為你財富的一部分。這樣壓力較少，財富長期增長乜較多。

其實你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。做月供股票。

你可以考慮盈富（2800）。

另外再加：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

潛力股，則可考慮：安碩恆生科技ETF（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177），但就要明白波動性比上述會高左，同時風險大左，你要自己平衡。部分要等回少少先入。總之買入的比例宜比平穩增長股為少。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q20224：

你好老師，本人26歲，月入15萬，已有現金340萬，是投資新手，剛買左00941 -5000股和9633 -2000股 和00175 -1000股，想在一年內多200萬，

可以如何分配？
謝謝你

龔成老師︰

我地一般目標，係年均回報10-15%，要1年內提升多200萬，用股票就未必適合。但長線計，我都建議你用部份資金去投資優質股，為自已增值。

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

你現時的年齡，是財富增值的黃金時期。策略上，你可以投資"平穏增長股" 和 "潛力股"。中國移動（0941）係收息股，無乜增長力，不宜持有太多。你先用每月5成儲蓄做月供，其餘先儲起，用一邊月供一邊儲蓄的策略。

選股上，你可以投資在平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、粵海（0270）、領展（0823）。

增長力較強的，可選安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園（1448）。但佢地波動性和風險會較高，你要自己平衡。

現時大市只是合理區，你現有340萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

------------------------------------------------

Q20225：

龔sir你好，我是新手學投資，上星期31.450購入1手中芯國際，尋日收市突然跌到去26

本人睇好中國芯片都會有長遠既發展，我係咪應該止蝕離場？

另外有購入小米和京東健康，依兩股都睇好，都係諗住長擺，新手黎講我係咪唔識分配投資，thx

龔成老師︰

首先，我地投資會因應年紀，去選股。若你係較年輕，上述股票都可以。

中芯國際（0981）本質不過不失，雖然仍每年的生意都有增長，但盈利就有波動，反映雖然大環境的市場在增長中，但佢的成本與售價，就未必在佢掌握的範圍，最後造成盈利波動的結果。

雖然這股都有前景，但以佢面對的情況，但好難將佢定義為好優質的股票，只屬中等。再加上中美問題，令不確性增加左。因為有些舉措，未知會否對集團發展，造成長線影響。

雖然近期以由高位$4X，回調到$2X，現時市盈率已經去到8X倍，依然係貴架水平。此股質素和吸引力一般，如果佢佔你組合比重唔高，可以守。

而京東健康（6618），業務主要提供線上線下的醫藥出售和健康管理服務，業務布局包括醫藥電商、互聯網醫療、智慧醫療解決方案、健康服務等4個大板塊。

京東健康旗下京東大藥房，更是內地線上線下收入規模最大的零售藥房。其互聯網醫院，日接診量超過10萬次。

質素上，京東健康是有的。但要做估值好困難，佢未有盈利之餘，不確定性都大，但市值欲去到5000億以上。

只能說，而價計依然唔平。若你只是小注，就無問題。若太大注，最好沽出部份去平衡風險。

小米（1810）長線持有，係可以。

------------------------------------------------

Q20226：

你好阿sir, 我手上有00066，02800，00823，09633，01833，01810，09988， 之前一手手買，各一至兩手貨。現考慮月供方法投資，每月用3k

1）比亞迪潛力空間係咪大過騰信，邊個好D？2）想買一手02382 or 03067, 邊個潛力大D？謝謝解答先。

女，37歲thank you

龔成老師︰

1） 其實2隻都係好有優質和發展潛力，但比亞迪（1211）會較高。

比亞迪（1211）現價偏貴，回到$120才較合理。而騰訊（0700），則要回多1、2成左右，才算合理水平。

2） 舜宇光學科技（2382）如果你睇好手機鏡頭發展，可以投資此股。但現價偏略貴。

而安碩恒生科技（3067）係一籃子科技股組合，較具分散風險能力。現價在合理區頂部至略貴，可小注入貨。月供，慢慢分注入。

月供組合方面，平安好醫生（1833）係潛力股，但就屬於較高風險的類別，我自己會比較怕投資這類。

業務上，佢地的確是高增長，同時業務有發展潛力，但睇翻佢地的財務數據，此股好難估值，你投資都可以，但小注好了。小注月供都可。

------------------------------------------------

Q20227：

龔sir, 你好～小妹一直係你fans，家中已集了多本你出版的書，如50值博倍升股、五年買樓四步曲....當中五年買樓四步曲，睇了一次又一次。

最近遇到一個難題，前年買了沙田第一城放租，現在差不多三年，第一城依三年可以説是易放租，租金可以頂到按揭每月供款

但最近考慮到第一城樓齡真係太高

如果持有多十年廿年，其升值及租務能力未必大，所以考慮轉投資啟德新盤，但那裏租金回報又不大，請問此刻是否應該樓換樓？

另外，想問下龔sir, 我的投資組合是否正確？本人35歲，收入穩定，現持有$70萬現金，$30萬股票：

港鐵 $41.5兩手
騰訊 $519 一手
領展$63.5 兩手
中移動 $47 一手
長江基建 $38.5 一手
長實集團 $47.4 一手
中國平安 $82.9 一手
盈富基金 $24 兩手
阿里巴巴 $205 兩手

麻煩龔sir提供意見，謝謝！Jennisa Chou

龔成老師︰

在整個新界區，沙田物業質素算較高。雖然佢有一定年期，但這類大型屋苑保值能力較強。而且位置較近市區和東九，該區新供應又唔算多，都係利好因素。

而啟德位於東九，都有一定潛力。但新盤一般定價都會較貴，投資價值會低左。暫時你可以保留沙田物業，啟德就等佢價格有回調，才再作考慮。

你現時持股都有質素，而且都有一定增長力，適合你。除了中移動（0941），佢主要係收息，增長力較一般，唔建議加注。

另外，長和系股票都有質素，但增長力不算強，你原有貨持有就得，但就不用加注。

現時大市在合理區，股票和現金最好各一半。你可以再投資多少少資金，加大股票比例，咁會較好。

------------------------------------------------

Q20228：

龔老師，你好我今年31歲，剛開始投資，之前間唔中都有買下股票，但唔多

現在手上有10手匯豐，而每個月大約可以有8000蚊既儲蓄

想短期目標3年100萬

我見老師你大多數介紹人先月供2800作開始，我是否應將10手匯豐轉來投資其他？

如果轉出來，我可以會選擇分散投資或是集中一兩隻股就好？如果1772/9922

果啲值唔值得長線投資？然後再每月月供5000盈富/領展？謝謝龔老師解答

想補充，現在31歲先都想投資，會唔會太遲？目標係想37歲之前買400萬以下既樓宇

現在其實手上也有20萬現金可作投資，謝謝！

龔成老師︰

31歲開始投資，都唔算太遲，依然有一定時間去做增值。

以你情況，可以利用"平穏增長股" + "潛力股"作增值組合。匯控（0005）係收息股，增長力唔高，只宜持有小注。你應將大部部份，換至以下股票，長線會較有利。

策略上，現在你每月5成儲蓄，去做月供，其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、領展（0823）、希慎（0014）、太古地產（1972）

或潛力股︰中生（1177）、福壽園（1448）、小米（1810）、安碩恒生科技（3067）、港交所（0388）、阿里（9988）、騰訊（0700）。

至於20萬現金和每月一半儲蓄，就等機會，當大市出現一定程度的下跌，就可以動用現金去投資，在平宜價加大力度掃貨。相信這安排，可以較有效助你儲到置業資金。

至於，九毛九（9922）上市年期唔算耐，分析比較難，因為財務數據少，好難做到準確的估值。

佢係內地中式快時尚餐飲品牌管理及運營者，佢係內地所有中式快時尚餐飲餐廳收入中排名第三，於華南地區則排名第一。

可見，在業務上、品牌上、市佔率上都不差。現時運營269間餐廳，以及管理41間加盟餐廳，而「九毛九」及「太二」為佢的兩個主力品牌。

睇翻佢的財務數據，唔差的，不過以佢2019年賺1億計，市值郤去到400億﹐明顯係貴。雖然這股都有長線投資的價值，有貨就持有，無貨，就唔太建議這刻追。

贛鋒鋰業（1772）是潛力股，但估值較難，分析時的確資料較少。由於上市年份少，我地較難有長期數據分析。

佢為鋰化合物、金屬鋰及鋰電池等鋰資源生產商，業務涵蓋上游鋰資源提取、鋰化合物深加工、金屬鋰生產、鋰電池生產及鋰二次利用及回收。集團提供涵蓋五個主要類別逾40種鋰化合物及金屬鋰產品。

其實佢的產品應用都廣泛，包括電池相關產品、化學品、藥品及新材料等，而客戶主要包括電池材料公司、電池製造商、化學品製造商、製藥公司及電子器件製造商。產品主要於中國、韓國、日本及新加坡等十多個國家出售。

我相信佢長遠有潛力，有長線投資價值，問題只是平貴度的問題。現價略貴，小小注好了，之後等佢回落先正或入，始終行業有一定的變化。

------------------------------------------------

Q20229：

龔成老師，我是你今期投資班的學生，以往一直不懂理財

很慚愧地和一班後生仔上完幾堂後，終於鼓起勇氣寫信請教你︰

我今年41歲，儲蓄有230萬，有穩定收入（公務員），月入八萬，扣除開支後

每月可儲蓄4萬元。我是孤兒，不需要供養父母，自己也沒有家庭，但至今仍未置業。
我想請問︰

（1） 如果只是買樓自住，現在是入市好時機嗎？如果屬自住

我是否不用把租金回報率下跌列入重要考慮因素？我可否視物業為優質股票一樣，可能買貴但不會買錯？

（2） 如果我現在買樓，我應否把230萬全數用於首期及買樓相關開支（如裝修等費用）

然後用每月的儲蓄（供樓後大概3萬）作投資股票之用？還是撥出多一點現金來購入股票資產？

（3） 根據你課堂所教的水桶模式買股法，我的歲數應為40/40/20，但根據我的實際情況

我可否調高水桶1或2的比率？
期待你的回覆。

龔成老師︰

1） 租金回報可以係其中一個考慮因素，另外交通便利性，同區配套和未來發展等，都是相關因素。

想知平貴，你可以跟同區相類似樓盤作比較。現時香港樓價唔算平，但作為自住居所，最重要係"供得起"。

香港樓市，中短期會有少少上落（但不會大跌），長遠會向上。

首先要睇經濟基本面，如果經濟持續地差，失業率上升，樓市終會向下，這會對樓市有中期性的影響，不過，就算跌，都不會大跌，最多只是小跌，如果經濟差的情況不是太大，甚至不跌，這是由於背後的需求大。

在長遠計，我仍相信樓市在長遠計，因供求關係，仍是向上多。因為現時香港買樓的需求仍大，而長期供應不足，加上政府往後施政只會更加困難，好多所謂的大計劃都未必能夠實行，又或最後規模細左。

另一方面，需求大，我見唔少適婚年齡的朋友，都正等機會買樓，但未買樓，這些是「潛在需求」，過往每年不斷累積，只要樓市跌少少，就會有需求走出來，這令樓市不能大跌。

另外，樓市另一作用是「投資」，現時的租金無大跌情況，以投資回報率的角度分析，樓價都不會大跌，因此樓市平穩。

長遠計，租金及樓價會平穩，有少少向上，但不是倍升，不會好似過往般倍升，而是平穩向上。

2） 我地投資組合除左要係優質資產外，多樣性都好重要。

如果你現時完全無股票係手，唔建議全部用晒去買樓。要留有部份，分去投資股票作增值，咁會較好。

所以，適當運用按揭，不要用盡現金，才是更好的方法。

3） 其實水桶模式比例係一個參考，你可以因應自已情況，再作出調整。但當然，唔可以調整得過份進取。

同時你要明白，水桶1要求你有一定的投資實力，這方面你要自己衡量翻。

------------------------------------------------

Q20230：

龔sir,呢排見好多人甚至係財經界人仕，話即將冧市，現時恆指30000點算好高嗎？

以及美股的GameStop事件，都會是冧市先兆嗎？

本人持有
788。20000股@1.53
981。1000股@31.9
520。8000股@18.6
9988。400股@241

持股策略需要改變嗎？

龔成老師︰

首先，我地投資唔好去"估走勢"，應用估值平貴，去定買賣策略。

現時大市只在合理區，雖然部份新經濟股，有輕微過熱架情況。但整體大市水平，尚算合理。

呷哺呷哺（0520）都有質素，但近年增長有所放緩，不宜持有太多。

而且，我地投資時唔可以太集中單一企業，相同行業不可佔組合多於3成，而單一企業不要高過15%，否則會有過度集中風險。此股最好沽出部份，換至其他股票，去平衡翻個組合。

中芯國際（0981）本質不過不失，雖然仍每年的生意都有增長，但盈利就有波動，反映雖然大環境的市場在增長中，但佢的成本與售價，就未必在佢掌握的範圍，最後造成盈利波動的結果。

雖然這股都有前景，但以佢面對的情況，但好難將佢定義為好優質的股票，只屬中等。再加上中美問題，令不確性增加左。因為有些舉措，未知會否對集團發展，造成長線影響。

雖然近期以由高位$4X，回調到$2X，現時市盈率已經去到8X倍，依然係貴架水平。此股質素和吸引力一般，如果佢佔你組合比重唔高，可以守。

另外，中國鐵塔（0788）和阿里（9988）有質素，如果你係較年輕，可持有。

------------------------------------------------

Q20231：

龔sir你好，我今年40歲，由工作而來一直無理會份MPF，全部放了在增長基金，最近睇返份MPF發現升了不少，想請教老師，我如何管理我份MPF，再可在退休有更好的回報呢？是否需要升市時轉回部份做穩定基金？還是按年齡調整風險？

補充：我在醫院工作，兩年前轉做長工，醫院為我轉供公積金，不需再供MPF

謝謝老師！

龔成老師：

由於強積金比我地平時的投資，更為長線，所以強積金在配置上，唔需要經常轉來轉去。你只要簡單按翻你的人生階段，去配置進取/平穩/保守，已經是大方向。

現時你年齡40歲，財富仍有增長力，你可以有一半或以上，持有原本基金，餘下就轉到較低風險類別。

------------------------------------------------

Q20232：

龔sir, 想問下點睇2158同8083？

龔成老師：

醫渡科技（2158）有潛力的。可長線。

提供基於大數據和人工智能（AI）技術的醫療解決方案。集團主要向醫療行業的主要參與者（如醫院、製藥、生物技術及醫療設備公司、研究機構、保險公司、醫生和患者以及監管機構及政策制定者）提供服務和合作。

根據大行報告，於2019年，集團收入在中國所有醫療大數據解決方案提供商中排名第一，在中國醫療大數據解決方案市場中的市場份額為5.0%。

睇翻大行對佢2020-23年預測，收入和毛利增長分別為73%和83%，增長力唔錯。

佢平台有一定擴張性，長遠受惠更多醫療保健客戶使用平台。不過公司客戶過度集中，以及依賴公共部門。

但佢依然係在燒銀紙狀態，係一個扣分架地方。整體算係有質素，但要注意風險，投資時唔建議大注。

現價貴，回翻多D先考慮。

中國有贊（8083）集團主要於中國從事經營電商業務及支付服務業務，業務分類如下：

（１）電子商貿：透過電商品牌「有贊」提供各種有關虛擬批發及零售之線上及線下解決方案及服務，如「有
贊微商城」

以有「有贊零售」等ＳａａＳ軟體產品及人才服務、面向開發者的「有贊雲」ＰａａＳ雲服務、面向品牌商的「有贊推廣」與「有贊分銷」、以及面向消費者的「有贊精選」與「有贊微小店」。

（２）第三方支付服務。

（３）一鳴神州：提供第三方支付系統解決方案及銷售綜合智能銷售點裝置。

（４）一般貿易。

近年業務發展快速，生意增長力，不過，現時估值高，業務變化較，整體有好大的不確定性。加上佢過往在核數師報告出現過「保留意見」，盤數可能有古怪，雖然已是數年前的事，但都會扣分。

佢不是無潛力，但風險較高，這刻投資值博率不高。

------------------------------------------------

Q20233：

龔Sir,想請問838和1753現價值得持有投資嗎？

另外龔Sir,黎緊下個月有機會撈底買入股票作投資嗎？

龔成老師：

億和控股（0838）無研究。

初步睇佢的業務與過往財務數據，只是一般般，現價吸引力一般。

兌吧（1753）主要係中國從事用戶運營軟件即服務平台，以及互動式效果廣告等業務，不過這刻仍處虧損狀態，只可以話分析不易，有危有機類。

這都是潛力股，但風險較高，其實佢生意增長不差，只是未進入收成期，如果你睇好，小注投資可以。

另外，無人能估到大市的升跌，我地只能搞翻企業的平貴去決定買賣的力度。

所以，你最好平衡投資，部分要持有優質股，部分留現金等機會。

------------------------------------------------

Q20234：

老師，最近好多朋友都建議股票，基金投資要「泊岸」，因為有些新經濟股已瘋狂破新紀錄。

兼且首富李先生已在英國發展「小香港」，所以佢哋都會起程，認為香港無希望啦。

想了解一下投資去向？自己深信老師的長線投資理念，因早前短炒帶來痛苦體驗，決定長守。但係自己既貪心又擔心，明白未到收成期，不要理會情緒先生主導。
如你所說投資最終目的是想賺大錢，希望藉這次機會能改善自己財政狀況。

若然李先生撤資香港，我這小市民要怎樣計劃未來？長遠要投資股票在那一版塊？本人都有1038，只是仍然未到家鄉。

睇咗你最新分析，我的1211佔比已超過安全比例。但若能承受風險，是否不用理會。

不過真心不知道自己可以承受多少？

原來有錢賺都會這樣子不安，老師你真係好厲害。

我今日去書局買一本你的書給我的姨甥女，希望佢對財富增值多一些概念。

我相信這樣可以令家人和朋友早一些達至財務自由，不用終日埋頭苦幹換來卑微收入。Work hard Play hard.

謝謝您。

龔成老師：

我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

如果你認為香港股市較集中，可以同時投資美股，最簡單就是買ETF，例如：VOO、QQQ，令你的組合更為平衡。

你要從概念上，明白「平衡配置」。

至於比亞迪（1211），當我地分析是否過了適當比例時，會以長期股價作準，因此不要短期就調整，要長期。如果你能承受風險，持有都可以的。

希望書本，能提高你同姨甥女的財務知識，大家加油！

------------------------------------------------

Q20235：

老師，想問問我想買呢6隻收息股以達到每個月有息收，你覺好唔好?

1310、778、11、2638、303、883

預計每個月收息$2744，以目前股價投資大約$45000。
唔該老師

龔成老師：

可以。

上述都是有質素的股票，業務基本上都穩定，派息理想，收息可以的。這是一個不差的組合，能平衡風險，以及有穩定股息。

雖然增長力不強，但以收息為目標，可以。現價合理，可投資。

你日後如果有更多資金，打算加入更多收息股，可考慮：ＧＸ恒生高股息率（3110），這是一個收息基金，你都可以參考下。

------------------------------------------------

Q20236：

老師你好 ，我見你成日都會話投資係2800到穩陣 我就有個疑問

以我個人見解，無論升幅同息口都唔夠內銀穩陣，如果以供股形式去投資，股息都用黎抵消晒每月手續費

點解會推薦呢隻，就以今年股災表現，由低位去反現價都係3成，而內銀表現相約

息口還要高，2800升幅係食恒指，而內銀比重都高，2者相比下。應如何取捨

龔成老師：

因為盈富（2800）這是一個「平衡組合的工具」，當中有50隻成份股，對股票組合有平衡作用。

內銀是單一行業，如果你只投資內銀，就會出現行業集中風險，萬一中國出現了金融系統風險，內銀會有較大損失。而盈富有不同類別的股票，始終會較平衡。

可能你見過往表現差不多，但我地分析時，唔能夠只考慮「過往出現的情況」，而是要考慮「各種有可能出現的情況」。

我地投資，一定是「先想風險，後想回報」。

------------------------------------------------

Q20237：

你好，請問388和700邊一個好呢？
買入位是幾多好？

龔成老師：

兩隻都有質素，都有增長力，不過，兩隻都略貴。騰訊（0700）增長力會略高。

你預兩隻都是回1、2成會合理翻D，但就唔知見唔見到，所以，如果想入，可月供，或回少少小注，等跌再加。

------------------------------------------------

Q20238：

想問一問龔成老師對以下四隻股票有咩睇法😖

1）9988 佢個股價岩岩升返上去 初初好驚 其實我覺得佢個股價托得一陣 會再跌 但我知佢有實業 差極有譜
但依然心情好矛盾 原本我set左$300樓上放 依家似乎好遙遠 跌低過$200應該放左佢定買入溝淡佢？

我擔心既係唔知政府只係想罰下佢定針對佢 但針對佢都唔出奇？我200尾買入。想聽下龔成老師你對9988既睇法
佢係咪真係大到倒不下？京東同佢都平排啦個地位？

2）3690 佢仲有冇潛力沖多次過$300？

3）9991 最擔心係佢 倉庫失火兼大股東阿里巴巴出事 網站上話佢集多項服務於一身 冇人代替到
我先買 依家諗唔到佢有咩好處 所以用溝淡方法都擔心 係咪應該放左佢？

4）1137 我覺得佢有潛力發展同佢會uptodate改良營銷方法所以買佢 我預佢會去到$16-$20
但佢反覆徘徊係$10-$13 擔心自己睇法係咪錯左？

唔好意思我呢個新手 心情太矛盾太多問題🙏

龔成老師︰

首先，我想你明白"溝貨"與"分注"的分別。

溝貨是指愈跌愈入，同時不理企業質素，不理自己的設定金額，盲目去入。分注則是「一早定好買入策略，一早定好本金總數，並以有策略的模式進行」。

如果你係"分注"的話，你可因應平貴和質素，去進行。若是"溝貨"，就不是再入貨，因為再平，都只會令你增加風險。

你能分辨清楚的話，有助你更準確去做投資決定。

1） 我地投資係睇長線，唔好太在意個買入價，佢只係心理因素。長線企業質素，才是我地考慮是否持有的重點，。

阿里巴巴（9988）近期面對內地監管可能收緊，風險度增加左。早前螞蟻金服因貸款業務問題，被叫停上市。中央就是擔心這些小型信貸增長過快，但監管又未及銀行嚴緊，會危害實體經濟。

但內地唔係想佢唔賺錢，只係想規管佢。由於佢本身己建立一個完善的業務，因此本身是無得輸，只是賺多賺少架問題。

此股質素依然存在，但你預佢增在力會弱左，但依然值得長線持有。

京東（9618）同佢地位接近，有機會出現同樣情況。但投資上，阿里會較為穏健，而京東潛力較大，但風險也較高。

2） 美團點評（3690）都有質素，佢業務巨大，同時增長快，是有危有機的股票。但近期反壟斷政策，相信會對佢有一定影響。但影響有幾大，暫時無人知。

但相信只係會加強規管，而唔會係出現大改革，整體質素預期唔會大變，要上翻去應該都可以，但增長力一定會比以往慢左。

集團過往一直處於燒銀紙階段，至2019年才開始有少量盈利。未來是否維持，暫時都好難講。這類企業不是不可投資，但不能大注。

3） 寶尊電商（9991）主要在天貓、京東、拼多多、微信小程序、小紅書、抖音及快手等平台以三種業務營運模式為品牌合作夥伴提供電商服務。

提供商為品牌提供IT解決方案、網店運營、市場營銷、客戶服務及倉儲配送等電商服務。初步睇佢業務都有吸引地方，但整體賺錢能力唔算話好強，質素算係中等。

以佢2019年純利不足3億，但現時市值郤有200億，明顯係貴。如果你持貨不多，可以守。但此刻加注，我就不建議。

4） 香港電視（1137）業務有前景，但有兩點存有風險的。

第一，佢都會依靠人的因素，王維基成為了公司最值錢的資產，佢的想法好多，有生意頭腦，但我對這類太依靠個人的企業，不建議太過大注。

第二，這企業現時搞網購，有增長力的，但同時存有一定的未知數。疫情過後的增長力會否減慢？

另外就是估值方面，我都好難講這刻的估值，只能話唔算平。此股可投資，但不確定性較高。若你持貨不多，就無問題。

------------------------------------------------

Q20239：

老師現在我有
1810小米10000股$16.5
7000股$23
6618京東健康500股$180
700騰訊100股567.5
883中海油20000股$7.2
9988阿里爸爸200股$285

1.京東健康高追左、會否升番$180？止蝕定溝貨？

2.小米應否放d？

3.現組合可否比d意見？

4.還有什麼股票好似小米咁可以翻倍？
老師真係好多謝你😘😘能夠令到我賺錢、不過真係要好堅持

因為好驚到時小米會比大陸或美國制裁會跌返落去😔而比人話點解嗰陣時賺錢唔放。

龔成老師︰

1） 由京東（9618）分折出來京東健康（6618）其業務主要提供線上線下的醫藥出售和健康管理服務，業務布局包括醫藥電商、互聯網醫療、智慧醫療解決方案、健康服務等4個大板塊。

京東健康旗下京東大藥房，更是內地線上線下收入規模最大的零售藥房。其互聯網醫院，日接診量超過10萬次。

質素上，京東健康是有的。但由於估值難，不確定性大，同時暫時計唔平。所以，此股只宜佔組合小部份。

2） 小米（1810）你可考慮賣出部份，原因唔係佢質素有問題。純粹係佢你組合比重太高，個別企業佔組合最好維持15%以內。起碼去翻25%先。

你現時超過一半，會有過度集中風險。如果佢萬一出問題，你成個組合就會嚴重地受影響。

至於佢會唔會因政治或政策，而影響長線發展，無人會估倒。但此刻所見，佢係有一定質素和發展潛力，值得長線持有。

3） 中海油（0883）質素只係中等，唔建議持有咁多。

而你組合極偏重潛力股，就算你好年青，都應該加入適量平穏增長股（佔組合最少一半），去加強組合平衡性。

平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、領展（0823）、粵海（0270）。

4） 其實不少潛力股，都有機會倍升。但部份現價偏貴，未係投資時候。而且你組合波動性已經好高，投資唔係買晒全部高質增長股就可以，都需要一個平衡健全的組合。

建議你先調節好個"潛力股"和"平穏增長股"個比重，咁會較穏當。

------------------------------------------------

Q20240：

我早幾個月開始睇到你個page.對股票無咩認識.10月開始左月供.供左3個月

比亞迪電子285
平均38.6 月供1500

中國生物制藥1177
平均7.7 月供1500

小米1810
平均25月供1500

買左10000股788中國鐵塔
1.35入

買左8000股1830必瘦站
2.4入

我想問下呢個組合可以嗎？

1810同285係咪都係偏貴？我仲應唔應該繼續月供定暫時停咗月供呢兩隻先會好啲？

我見788宜家不停跌。我應該守住先唔好理定係放左去好呀？

想入多一隻.想問下龔sir點睇藍月亮6993？
可能太多問題.唔該哂龔sir

龔成老師︰

月供可以幫你拉平均個買入價，基本上你一直月供就可以。但時間必需夠長，最少供3年和持有5年，才有較明顯效果。

你組合中全部都係潛力股，就算你好年青，能承受較高風險。現時比重都過高，我假設你係年青人，個比例最好係"平穏增長股"和"潛力股"各半。

未來你要慢慢調節翻個比重，否則組合個波動性會太大。

平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、領展（0823）、希慎（0014）、太古地產（1972）

中國鐵塔（0788）有質素，你唔洗太在意佢中短期波動，一直持有就可以。不過增長力比過往弱左。

藍月亮（6993）有質素，佢有中國P&G之稱。成立於1992年，擁有衣物清潔護理、個人清潔、家居清潔三大系列。

佢係內地洗衣液龍頭，加上毛利率高，賺錢力強。睇佢之前數據，以零售額計，其洗衣液、濃縮洗衣液和洗手液，市佔率都是首位。分別佔市場24%、28%、17%。

整體質素係有，發展都正面。但現價唔平，現時入貨，風險唔細。

----------------------------------------------

若你有問題想向本人發問，可在龔成的fb專頁中（龔成）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q20141-Q20160）

Q20141：

老師，現時全球不斷印銀紙，股市應該長期向上，是否就不會有股災出現？

龔成老師：

1971年開始無再用金本位的貨幣制度，即是由1971年開始，我地已經不斷印銀紙，這段時間，資產價格大增。

但久不久，都會大跌，1973年港股跌9成，1987年股災，1997年金融風暴跌7成，2001年科網爆左跌6成，2008年金融海嘯跌7成。

無人知幾時發生，但歷史不斷發生。

真正的股災，是在你想都想不到的情況出現。
大家想到的股災，就絕對不是股災。

------------------------------------------------

Q20142：

龔sir 您好! 我終於完成了你的網上課程大富翁18課，所以趁機會整理一下自己的財務狀況，再請教您的意見! 多謝您常常耐心解答讀者的問題，而且您每天都向我們灌輸正面及積極的思維，實在令我獲益良多! 謝謝您!

內容可能有點長，首先多謝您耐心閱讀！
以下是我現時的狀況:

3X歲
每月收入：45K
每月支出：15K
每月供緊危疾及醫保：$700
每月可儲淨現金：30k
現金: 90萬
儲蓄保險: 20萬
現時股票大約70萬(詳情如下)：

水桶1(約34.8%):

吉利汽車（0175）， 1000股，平均價24.2，持倉佔比5.0%
中國鐵塔（0788）， 2000股，平均價1.9，持倉佔比0.5%
阿里巴巴（9988）， 1000股，平均價208.7，持倉佔比28.3%
中國生物製藥(1177) ， 1000股，平均價7.5 ，持倉佔比1.0%

水桶2(約51.4%):

盈富基金（2800）， 3000股，平均價25.5，持倉佔比8.7%
南方A50 (2822) ， 400股，平均價20，持倉佔比0.5%
安碩恒生科技 (3067) ， 200股，平均價16.5，持倉佔比0.4%
中國人壽（2628）， 1000股，平均價20.9，持倉佔比2.9%
中電控股（0002）， 500股，平均價88，持倉佔比6.0%
中銀香港（2388）， 500股，平均價32 ，持倉佔比2.2%
太興集團（6811）， 4000股，平均價3 ，持倉佔比1.6%
友邦（1299）， 600股，平均價69.4 ，持倉佔比5.7%
港鐵 （66）， 2000股，平均價38，持倉佔比10.3%
恒基地產 (12) ，2000股，平均價30，持倉佔比8.2%
香港交易所 (388) ，100股，平均價360，持倉佔比4.9%

水桶3(約13.7%):

工行（1398）， 4000股，平均價4.6，持倉佔比2.5%
建行（0939）， 10000股，平均價6 ，持倉佔比8.2%
匯賢（87001）， 7000股，平均價3 ，持倉佔比3.0%

問題１：我知道持有以上18隻股票是過多，請問我應該怎樣取捨，以達至持倉5至10隻股票 ? 我未能多花時間留意每隻股票的狀況，所以希望只持有一些可以不用太理會的股票。

問題2: 如果重組股票組合，應該在甚麼時機賣出部分股票?

問題3: 以我的年齡、淺薄的投資知識及短缺的時間，我應該怎樣分配股票(水桶1-3)的比例?

問題4: 我平常買賣股票都是設定價位，並不會即市操作。請問以這樣類似月供，但每月手動的方式，是否適合? 但有時會買不到或賣不出? 抑或我應不理價格，定期定量買入? 還是等低位才大手買入?

問題5: 我和先生有一自住樓，但小朋友即將出生，長遠再購入一大單位的話，居住環境會較舒適，當然支出會相應大增。

但很矛盾的是現時並沒有時間及精力去處理買樓事宜，卻又擔心年齡愈大按揭愈難，將來樓價也會愈來愈難負擔，所以仍有點猶豫不決。您對此有甚麼意見? 這可能要用盡我現有的資金。

多謝龔sir的耐心解答，期待你的答覆～祝願身體健康! 平平安安! 事業更上一層樓!

龔成老師：

1）你的分配大致可以。你整個組合，有防守性產品，同時有股票這類進攻產品，基本上無問題。

中國鐵塔（0788）增長力略減左，暫時水桶1-2。3067是水桶1。中電（0002）是水桶2-3。

以一個$100萬以上的組合，大約可持有10-15隻，因此，你又唔算好散，只是適當的整合就得。

中國人壽（2628）、太興集團（6811）不宜加注，原有貨持有就得。

2）如果你3X歲，水桶3未必需要持有，這幾隻水桶3股都可以賣出。除非你本身較保守，就可以考慮持有。

3）水桶1可25%，水桶2可75%。到你有至多的知識，可以將水桶1加至40%左右。當然，都要考慮你的風險承受程度。

至於水桶3，0-20%。

4）如果你未有掌握大市買賣時機，以及未有企業估值的概念，你用自行分注的模式，可以的，總之將一注資金分開多注，慢慢買入就得，將買入價平均。

同時，當見到大跌市時，就可以加注。這是最平衡的做法。

5）不要太強行去換樓，自己的負擔能力是最大的考慮因素，如果這方面未得，就儲更多資金先，利用儲蓄及投資滾大，到有一定的數量後，你已經感到無太大壓力，到時先換樓。

------------------------------------------------

Q20143：

想問如果有10萬元本金，怎樣可每個月有1千至2千收入？

龔成老師：

$10萬要平均一個月收$1500，即是一年$18000，回報率18%，這是一個很高的回求回報率！

你預背後要承受一定的風險，才可爭取到這個回報。

我建議你用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

如果你這刻好想用$10萬收息，不是不可，但預一般的工具，一年收息約$5000。

------------------------------------------------

Q20144：

阿sir 你好，想問問如果一啲未有盈利既公司，應該點計佢既合理價？用咩估值法比較好？同埋又點分析呢？例如宜家美國果啲科技公司，好多都無盈利，但又升到天花板咁高

另外，S&P500 個合理價可唔可以用你教既PE去計？

龔成老師：

每類公司都有不同的估值方法，有些公司可以同時用多種方法。

如果無盈利，可以用預測的盈利作計算，考慮一個佢已經建立好完整的生意，到時的盈利多少。然後就用行業的市盈率做推算。

至於S&P500，你可以睇翻佢過往的市盈率水平，然後大致將佢分區，以過往去推算平貴度。

------------------------------------------------

Q20145：

你好！想請問1971買唔買得過？

我用物管同業平均PE計到佢值8.18，唔知咁計啱唔啱？((59,061,000×1.1977×1.6)÷415,000,000)×30= 8.18

條式係 （(19年度股東應佔溢利 乘 人民幣兌港元 乘 盈喜公佈每股盈利增長百分比) 除 已發行總股本）乘 同業平均下限PE
係pe嘅公式

龔成老師：

你的計算方法，方向不是錯，但會出現了一些誤差。

最大的問題是最後X30，這是同業平均下限PE，但你要好清楚當中的「可比較性」。

中國物管行業，你會見有些企業市盈率好高，當中有8一個重要因素，就是有強大的母公司支持，市場預期母公司不斷發展物業，但的生意就能持續增長，因此值一個高市盈率。

但如果這因素不足，就不能用一個太高的市盈率去作計算基礎。

弘陽服務（1971）質素是有的，但未算好強。

佢主要係中國從事提供物業管理服務，包括安保、清潔、綠化及園藝、設施管理、維修及保養服務。

睇翻佢資料，佢總合同建築面積達2700萬平方米，其中在管總建築面積達1600萬平方米，在管項目主要分布於南京市及江蘇省，佢的在管物業主要為弘陽地產（1996）所開發的項目。

由於1996本身規模唔算好大，因此，都唔能夠弘陽服務的增長力好強。

所以，你在計算是估高了這公司。

------------------------------------------------

Q20146：

老師呀，咁想問有冇啲乜嘢高增長類嘅優質股推介

龔成老師：

坦白講，現時大部分潛力股都升左，這刻買入反而有風險。

安碩恒生科技（3067）是勉強可考慮的，這ETF可長線。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂，因此，這刻不能大注投資。最好的策略，就是月供，或自行分注小注慢慢收貨，原理如同不斷儲貨，這樣就能平均買入價，減少風險。然後就長線持有。

------------------------------------------------

Q20147：

成哥 好想請問下如果買樓 紅磡 深水埗 元朗 屯門 東沖 邊度好

龔成老師：

如果以投資價值來計，紅磡會較好。當進行長期樓市分析時，地點佔了好大因素，因此市區、交通較方便的地方，質素始終較高。

加上區份長遠可供應的數不算多，因此紅磡會較好。

------------------------------------------------

Q20148：

龔sir 我想問下如果儲到一筆首期 應該買樓或是投資股票較合適呢？
樓是自主住的

龔成老師：

如果你有實際的自住需要，而現時你首期足，供樓方面無問題，其實已經可以開始睇樓，選對就買。

但如果你資金好勉強，就唔建議太急，不如投資股票，將資金滾存更多，遲D先買。最好是你買樓後，仍有一定的資金剩。

比起分析樓市升跌，你本身的供樓能力更加重要。

香港樓市，中短期有可能向下（但不會大跌），長遠會向上。

首先要睇經濟基本面，如果經濟持續地差，失業率上升，樓市終會向下，這會對樓市有中期性的影響，不過，就算跌，都不會大跌，最多只是小跌，如果經濟差的情況不是太大，甚至不跌，這是由於背後的需求大。

在長遠計，我仍相信樓市在長遠計，因供求關係，仍是向上多。因為現時香港買樓的需求仍大，而長期供應不足，加上政府往後施政只會更加困難，好多所謂的大計劃都未必能夠實行，又或最後規模細左。

另一方面，需求大，我見唔少適婚年齡的朋友，都正等機會買樓，但未買樓，這些是「潛在需求」，過往每年不斷累積，只要樓市跌少少，就會有需求走出來，這令樓市不能大跌。

另外，樓市另一作用是「投資」，現時的租金無大跌情況，以投資回報率的角度分析，樓價都不會大跌，因此樓市平穩。

長遠計，租金及樓價會平穩，有少少向上，但不是倍升，不會好似過往般倍升，而是平穩向上。

------------------------------------------------

Q20149：

龔sir 你好，現時有10 手9988, 均價275, 請問是否可溝貨？

快手298 買入，是否可以再加持？
thanks a lot

龔成老師：

阿里（9988）將面對內地監管可能收緊，因此風險度增加左，不過，我相信佢的整體優質度仍在，內地不是不想佢賺錢，只是想規管佢。佢已建立好完善的業務，因此本身是無得輸，只是賺多賺少問題，現時監管多左，點都會影響賺錢能力。

又以佢的螞蟻貸款業務來講，這部分是一些網上的小型貸款業務，增長快，但監管並不如銀行般緊，因此，中央會有更多的監管針對這部分，影響了賺錢能力。

整體上，阿里，長遠仍是有發展，賺錢能力雖然有少少減，但長遠會同政府同意一些監管方法，以及找到合理的賺錢模式，你預阿里現價約在合理區頂部，這股可長線。不過，中短期會波動。

如果有貨，可持有，但就唔需要太急加注，最近由貴去翻合理區頂部，但由於你已有貨，因此，唔建議加注太急。

至於快手（1024）係全球數一數二大的直播平台，絕對是一隻優質股，有獨特性，有客戶群，有潛力，長遠的發展力正面。這股有長線投資價值。

快手與業務夥伴合作提供了一系列產品和服務，於滿足平台上自然產生的多種需求。快手提供的產品和服務包括娛樂、線上營銷服務、電商、網絡遊戲、在線知識共享等。

快手科技已建立了穩定的用戶，在全球已佔據了重要的位置，企業有一定的優勢，以及獨特地位。加上用戶仍在快速增長，以及增長趨勢仍持續，預期有一定的發展。

雖然這刻盈利不多，甚至因加強發展業務而出現虧損，但這類股的分析特點是將來，等之後的收成期。

由於已擁有一定的優勢，以及仍增長中，企業要將用戶化成現金並不困難，只是時間問題，以及多少問題，預期2022年盈利模式已穩定，同時有一定的盈利。

簡單來說，企業有質素，有發展。

現價雖然無之前咁貴，但仍略貴，但短期股仍會十分波動，如果想入貨加注，這刻唔建議。

------------------------------------------------

Q20150：

老師，好多謝你每日抽咁多時間解答咁多人既問題，唔只係投資上的問題，更多更重要係人生上的疑難。
有個職業交叉點好想問問老師的意見～

今年27歲，一直都做同一間公司。兩年前開始在公司做得唔開心，但好處係可以準時收工，同事關係亦很好。

正因為可準時收工，因此有時間在1年前發展副業做花藝。花藝方面每月大約有$10000或以上的收入，同時亦有意計劃今年生育。

原本計劃在現有公司做到生完小朋友（預算大約明年年頭），可以享受產假之餘，同時可以過到壓力測驗買樓。

但每天都抱住好想辭職和唔太開心既心態工作好辛苦，就你意思，你會建議一直忍住到原本計劃的時間才辭職/ 現在放心一搏全職做花藝呢？

補充少少 未辭職的另一原因是一直struggle 花藝會否是長遠的職業好選擇，因為之前老師有提及過手工藝未必是長遠發展的好選擇，會比較困身，難做成提及被動收入的行業。

多謝你既意思呀老師！

龔成老師：

如果你準備買樓，就最好等完成買樓過程先，當然這段工作時間你要調整心態，唔好太過負面，否則你好辛苦。

完成在買樓動作，過左按揭後，就可以辭職。

如果你現時單利用副業模式，花藝方面都有$1萬收入，我相信是有發展的，所以你之後可以全力去試，雖然手工藝未必能做到好大，但我相信是你的興趣，你可以試左先，之後再睇下點樣搞大佢。

------------------------------------------------

Q20151：

龔Sir你好，本人31歲，開始買股票大約已經過一年有多了，但我仍然會說我仲係新手。

月薪約$18,000，水電煤租家用每月支出$7,000，學費每月$2,000

以下是我持有的股票

阿里巴巴（9988） 200股@188.87
中海油（883） 2000股@6.95

以下是我持有的月供股票
每個月月供$7,000
（2）（5）（2800）各$2,000
（6823）$1,000

中電（2） 330股@77.44
匯豐（5） 798股@40.42
盈富（2800） 880股@26.49
香港電訊（6823） 1461股@11.24

我有幾條問題想請教下龔Sir

1. 我另外有很少的蟹貨，是（928）和（3313）各一手，請問我應該點處理他們 ?

2. 我目標係想5年內有一百萬港元或以上，請問咁樣會否太貪心 ?

3. 因為我認為我缺乏現金買股票，所以有諗過賣曬（9988）可以多D現金買其他股票。
如果我現在賣曬（9988）咁樣做會唔會係錯誤的決定 ?

4. 現在暫時有現金5萬，想買D倍升股又唔知擇邊D股，請問有冇好介紹? 令我更快有更多錢 ?

5. 另外想請問我的月供股票需要換組合嗎 ? 定係繼續咁樣ge組合供 ?

麻煩你！

龔成老師︰

1） 雅高控股（3313）和蓮和醫療（0928）無投資價值，建議沽出。

另外，中海油（0883）質素只算中等，不宜持有太多。所以，此股唔好再加注了。

2） 我地一般係希望組合可以做到一個合理增長，講緊係每年10-15%左右，如果你要5年內做到100萬，就要將月供加大至約$12000，會較為適當。

3） 價質架股票，長線會自行增值，所以只要有質素，我地就應該長線持有。阿里巴巴（9988）係優質潛力股，你長線持有會最理想。

4） 現時大市只在合理區，你5萬蚊先儲起，等大跌市才用。

5） 要，因為你組合相對你年紀，係太保守。匯控（0005）、香港電訊（6823）和中電（0002）增長力唔高，主要係收下息。

你月供組合，應該以增長股為主，以下都係合適選擇。

平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、領展（0823）

潛力股︰安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園（1448）。

現時大市只在合理區，每月儲蓄唔好盡用。最好留有部份，等大跌市出現時，可以用來掃貨。

------------------------------------------------

Q20152：

hello 龔SIR, 想麻煩你幫我做個案分析
本人40歲, 現在無持有任何股票,無物業, 租住私樓,未婚

銀行現金: 50萬
保險月供: $5000 （供到55歲）
每月儲蓄: $3000-5000

1. 現金50萬中應該用多少出來投資? 哪隻股票較好?

2. 每月應該用多少去月供股票? 哪隻股票較好?

3. 在疫情下很多行業都做唔住, 但股票卻不斷升, 是正常現象嗎? 大市仍有上升空間嗎?謝謝

龔成老師︰

1） 現時大市合理區，而新經濟股就有少少貴，50萬可先動用一半，以分注形式，慢慢咁入貨。餘下就等大跌市機會，才出手。

以下股票都適合你，當中"平穏增長股"應佔較大比重。

平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、粵海（0270）、領展（0823）。

增長力較強的，可選安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園（1448）。但佢地波動性和風險會較高，你要自己平衡。

另外，"保險"其實只係理財中防守性部份，買足夠保障就可以，增值應留比優質資產（如優質股、物業等）去做。你可以睇下，有無需要調整。

2） 你每月應先用5成儲蓄，去做月供，其餘先儲起，用一邊月供一邊儲蓄的策略。餘下一半，同樣等大跌市時機。

3） 短期股票走勢，可以完全跟基本面無關係。但長線，只要一隻股票有質素，佢真正價值自然會在股價中反映出來。

現時大市在合理水平，中短線會升定跌，我估唔到。但現水平，唔算係貴，長遠仍有一定上升空間。

------------------------------------------------

Q20153：

你好龔成老師，我41歲單親帶住個仔仔，想請教你我的財務組合ok ma?因為著前途苦惱中，想令財富增加令生活穩定

以下是手持股票平均價如下:

3988-31000股$3.7
0011-1000股$196
2800-500股$29.4
6823-33000股$10.5
0003-16000股$11.4
0778-4000股$7.2
1686-4000股$7.25
6088-3000股$3.7
1772-200股$137

我差不多全是收息股，3988，0011是18年尾買（蟹貨），其他都係近期買，但股價都向下走，
於是就入左6088和1772，你可以分析一下我的組合有問題嘛？

6088和1772值得長線持有嘛？
先謝謝你花時間了解及分析，候覆

龔成老師︰

你組合比較偏重係收息股，以你年紀，應該先做好財富增值。當累積了相當財富後，才漸漸轉成收息型股票，為自已創造穏定現金流。

你現時應將部份收息股（3988, 0011, 6823, 0778），換碼至一些"平穏增長股" 和 "潛力股"，並以"平穏增長股"為主。

平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、領展（0823）、粵海（0270）

潛力股︰小米（1810）、中生（1177）、福壽園（1448）、安碩恒生科技（3067）、港交所（0388）、阿里（9988）、騰訊（0700）。

你現有持股中，贛鋒鋰業（1772）上市時間唔算長，這類企業數據較少，好難分析。

只見佢的盈利略有波動，業務上有點潛力，但不宜持有太多。

FIT HON TENG（6088）質素中等，雖然都有投資價值，但企業不是最高質之列。

不過，這股始終不是無質素，暫時可以守住，但在有較大反彈時，可以賣出部分，餘下再守。

------------------------------------------------

Q20154：

龔成， 睇左你Facebook 都年幾， 我想問手持嘉華國際， 平均價3.7 ， 應該點部署

龔成老師︰

嘉華國際（0173）算是香港的中型地產商，都有投資的價值。

如果睇翻佢的財務數據，雖然收入有點波動，但地產企業常有這情況，特別是中型一類，有時會令股價較為波動。

整體來說，都有質素的，但又未去到好強。你預佢只能平穩增長，潛力唔算好大，長線持有係可以，但不宜持有太大比重。

------------------------------------------------

Q20155：

龔老師你好，先講我下嘅生活背景，我47歲，從事陪月工作6年，薪金大概每月$25000左右

之前跟人炒倫敦金結果信錯人蝕$10萬，我一年前留意你的FB和買了你四本著作，獲益良多

開始明白資產配置好緊要，如何買入優質股永久持有便是資產，你提供的比亞迪我賺了6位數

十分滿足和開心，感謝你無私分享，你真係我們投資路上的明燈，非常欣賞平時好多正能量知識為我們加油打氣

每月家用+交通費+雜費支出$12000，去年買一個每月供$3300左右的年金，10年供完

我和女兒2018年各供20年的危疾+意外+住院醫療保險各$70萬保額的供款，每月供$4000左右

每月供領展$1500；盈富$2000；港鐵$1500，比亞迪就$120便停供，在$262買出一手，現時還有少部份打算長線持有

華夏恒生1手，（請問安碩和華夏邊隻好些？幾錢先平？打算分注入）
中生製藥2手
現金$20萬，住公屋
每月可儲$3000-5000

請問我的資產配置健康平衡嗎嗎？
如果我實現人生的第一個100萬，如何可以做到？

我是一個讀書唔多，對數字唔敏感和沒有記性的人，我其實好想報讀你提供課程，但我擔心自己讀唔到

我非常明白老師是非常繁忙，你時間許可先覆我

龔成老師︰

好多謝你架支持!

安碩恒生科技（3067）相對華夏恒生科技（3088）費用成本會較低，長線計會較好。但你要留意，由於幾隻恒生科技ETF都係初上市，追蹤誤差只能作參考。實際誤差未必一樣，你要知道這個風險。

你現時資產配置上，都可以。由於大市只在合理區，每月儲蓄唔好盡用。要留有部份，等大跌市機。

以你人生階段計，投資上要保守少少。中生（1177）、比亞迪（1211）、安碩恒生科技（3067）這類潛力股，不宜佔組合太大比重。未來重心，係應該放係"平穏增長股"上。

平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、領展（0823）、粵海（0270）

20萬現金，扣除大約半年開支的應急錢後，現時可以先將小部份入市。餘下的同樣等大市有明顯回調，才出手。

至於課程方面，其實適合初學者的，因為整個課程的設計都是針對初中階投資者的，課堂頭3堂都是初階的內容，只要你課後好好溫習，能跟到之後的內容。

每一課後都會有指引比你，要你在一星期內找那些資料，溫那些內容，只要你跟著去完成，到你讀完整個課程後，你已能自己選股、投資時機、配置、評估平貴，在投資上已掌握了一定的知識。

另外，你上課之前，多睇理財、股票類的書，留意一下財經新聞，到時就較易跟到。

------------------------------------------------

Q20156：

Hello 龔Sir

1. 我宜家開始月供港鐵500同港交所500，請問咁嘅組合有冇問題？

2. 同埋我有一手陽光房地產3.9入，係咪應該放住先？

3. 我想買嘅股票都未去到合理價，但又好驚錯過咗個價就買唔返，應該點做？

4. 我最近留意到9992同埋2633，老師點睇？
麻煩晒你呀！

龔成老師︰

1） 如果你係年青至中年人士，這組合係可以。

2） 陽光房地產（0435）主要係收息，若你較年輕，這類股票不宜持有太多。只是一手的話，可持有。

3） 如果唔係貴得太緊要，你可以先入一小注，去平衡入唔倒貨架風險，或者用月供去儲貨都可以。

4） Pop Mart泡泡瑪特（9992）是一家覆蓋潮流玩具全產業鏈的一體化平台，當中包括藝術家發掘、IP運營、消費者觸達及潮流玩具文化的推廣。

根據弗若斯特沙利文報告，分別以2019年的零售價值（市場份額為8.5%）及2017年至2019年的收益增長計，集團是中國最大且增長最快的潮流玩具公司。

合作伙伴中不乏知名品牌，好似迪士尼、HELLO KITTY等等。而產品中，最為人所認識就是"盲盒"，此銷售模式為集團貢獻不少。

雖然中央規管會有負面影響，但長線質素和發展前景依然係度。2019年純利為4.5億，但現時市值超過1000億。在這個水平投資，風險絕對唔細。就算想投資都要控制好注碼。

雅各臣科研製藥（2633）在香港從事非專利藥及中成藥的開發、生產、市場推廣及銷售。

見佢生意都穏定，但增長和賺錢能力只算係中等，都有投資價值。現價計，算是合理區，可分注入貨。

------------------------------------------------

Q20157：

請問老師152及590 及1928的合理區中下部係幾錢呀？值得投資嗎？

想收息加平穩增值

龔成老師︰

這3隻股票，都有長線投資價值。以現價計算，都已在合理區中下部範圍。

但3者所屬行業不同，深圳國際（0152）主要從事收費公路的開發、營運及管理；物流中心及綜合物流港的建設、營運及管理等業務，發展會較穏定。

金沙（1928）係澳門博彩業，六福（0590）係零售業，你預佢地中短期都會較弱，但長線持有係無問題。

------------------------------------------------

Q20158：

龔sir你好，你的讀者
想問以下股可入手的合理區
0001
9988
1972
1928
0027
1810
0388

龔成老師︰

港交所（0388）和小米價1810）現價略貴，要回較多才算合理區。現時月供較好。

其餘幾隻，都在合理水平，可以分注咁慢慢入貨。

但留意阿里巴巴（9988）只在合理區頂部，未算話平，入貨時要控制注碼。

上述都是有質素的股票，只是平貴度的問題。

------------------------------------------------

Q20159：

早晨你好 ,最近想搵一啲可以中長線投資既股票， 2013 同285 現價可考慮嗎？ 或者有咩係適合加入
大約會投放資金係10萬左右。

另外手上持有 1789, 應否繼續持有🙏🏿
謝謝你

龔成老師︰

微盟集團（2013）集團主要在中國從事提供軟件即服務產品及營銷服務。

佢的產品分為「商業雲」解決方案、「營銷雲」解決方案及「銷售雲」解決方案三類。

「商業雲」可助商戶開設線上業務並助彼等提升顧客參與度、轉化率、收益及忠誠度。「營銷雲」通過大數據分析能力及ＡＩ技術為商戶提供智能營銷服務。

長遠業務上係有一定潛力，但盈利和股價上佢都幾波動。此股可投資，但只宜小注。

比亞迪電子（0285）質素不差的，有潛力。睇佢過往發展都正面，有技術，而前景都唔錯。

考慮到近期的增長，$30左右算係佢合理區頂部，現價己經略貴。

愛康醫療（1789）算是不差，從財務數據睇，佢的賺錢能力不錯，生意有理想增長，盈利增長快速，股本回報率高。

但上市年期不算太長，這點令過往的數據，未知能否反映佢的真實情況。

此股現價係貴，如果你持貨唔多，現貨可持有。現回到較合理水平，要回較多先算。

------------------------------------------------

Q20160：

早晨，想請教一下你意見

之前跟人買入3313，0.8入，已經蝕到入肉，應該有得佢放喺度，定係走晒佢算數？
仲有冇機會上返去？

龔成老師︰

雅高控股（3313）主要從事大理石開採、加工、貿易、銷售、商品貿易及貨運、倉儲和物流業務。

公司市值不高，盈利十分波動，質素不佳。企業不斷虧損，無乜投資價值，賣出這股較好。

其實如果你有上過我股票班，一定會發現此股無投資價值。其實投資股票就會買企業，你要好好研究佢質素和前景，確定是有質素才作投資。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。