A new life. #staycutecomic #staycuteprocreate 話說我講咗咁耐就快返全職，今日終於搞掂晒簽約嗰堆野，都終於知道下星期一開始要喺咩部門返工。而今日知道返邊度第一下真係有啲唔開心，因為我係返手術室⋯⋯fresh grad就入手術室做，同病房setting咁唔一樣，就咁諗都好似有排適應。諗起之前出實習，睇到啲護士要記熟晒十萬九千件睇落好似差唔多樣嘅工具同儀器（即係tvb劇入面要遞啲較剪呀鉗呀俾醫生嗰啲呢），剩係較剪都有好多種同好多款，骨科手術就仲多工具（好多粒唔同size嘅釘呀螺絲呀支架呀人工關節呀乜乜乜），然後你要背熟晒佢地個名，要大約記得每set唔同嘅工具包入面有幾多支A幾多支B幾多支C⋯ 諗起個腦都爆炸。 不過最大嘅原因我唔想做手術室，係因為我覺得同我性格好唔夾。喺手術室做野其實比起病房爽快好多，因為啲野可以好緊急，所以好要求獨立果斷嘅判斷，程序上都冇病房咁繁瑣咁多protocol跟；但我自問唔係一個獨立性高嘅人，反而可能倚賴啲規矩會令我有安全感啲。再加上我係個鍾意同病人交流、建立關係嘅人，我會好想透過溝通同提供護理去帶啲安慰同關懷俾患病嘅佢地；但喺手術室做野，好大部份時間個病人都係麻醉緊唔清醒嘅，最多都只係手術前後有限地溝通幾句。所以入手術室做，同我希望喺護士呢份工做到嘅野，都可以話好大分別/_\ 不過經過大半日嘅沉澱，我都慢慢接受咗呢個安排喇～人生本來就唔會係跟住你嘅意願咁樣編寫，每條路對第一次成為一個人嘅我地來講都係全新嘅，都係從來未行過嘅。既然天父帶咗我行呢條路，咁我就即管試下行下啦，未試過又點知得唔得，到時唔得咪再行第二條路囉～同埋我諗就算我唔可以透過長時間嘅關係建立去帶温暖俾病人，但可以喺佢地做手術前緊張擔憂嘅時候安慰佢地，可以喺佢地做完手術之後虛弱無力嘅時候照顧佢地，可以為到佢地平安完成一個手術而付出，努力做好本份，其實都同我嘅初衷一樣呀！ 本來想整蛋糕，但打碎雞蛋先發現裡面唔係蛋白蛋黃，竟然係孕育咗一朵雞蛋花。喂呀，我從來冇諗過打蛋會打咗（雞）蛋花出來架喔！！！不過既然係咁，咪諗下點樣用呢啲雞蛋花囉。最後出來嘅結果，原來都唔係想像中咁差，其實都可以係幾好添❤️ 雞蛋花象徵「復活」、「新生」，等我用呢個雞蛋花糕去迎接呢個新開始！雞蛋花！GO！