其實我知條formula點行，我只需要係啲好hit嘅嘢出左之後一兩日出首粵語版，個訂閱數應該上得好快。 好似「打上花火」咁，我可以是但搵個花名塞落去做gimmick，再溝埋曬我之前寫果三首「你的名字」啲內容，最後放一堆好似好有深意其實無深意但又扮到我份人好有深意嘅詞彙落去，令你班傻西瓜聽到似懂非懂，就會讚我文學造詣好高，問我係咪讀中文。係我良心過意唔去先諗住慢慢填。 我鍾意聽同睇熱門嘢，我唔介意跟大潮流，但我介意自己交啲垃圾出嚟之後仲比人讚，介意果份知道自己可以做得更好但無做到嘅心虛，介意自己為咗一個gimmick而屈就，就好似我而家仲時不時問緊自己「蛋乜嘢餅」，當然功力未夠都係其中一個問題。 身邊有人好不屑睇「你的名字」同聽入面嘅歌，因為啲嘢好主流，唔知有無不屑睇我寫果幾份歌詞。但其實我幾鍾意果幾份詞，因為佢地係大潮流下過到我條水準線。而我嘅方針係用啲我自己鍾意嘅熱門嘢去寫啲我自己鍾意嘅內容，用一首「上到位」嘅歌包裝一份「唔係用嚟上位」嘅詞，所以我特別鍾意填外語歌。 可能因為呢個方針，我次次見到人亂跟上面條formula都會好似傅穎聽到人講粗口咁打曬冷震，都唔要求有承接有語境意識，但起碼啱音吖大哥？當自己再世莫札特咁改曬堆音，咁洗咩填詞呀，作曲咪得囉。又要借首原曲嘅名氣帶起你自己，又要唔尊重首原曲，下面回覆仲有一班人讚緊話寫得好過林夕，而次次見到咁嘅情況我都會懷疑自己聽幾百次首歌，放慢零點五倍速，坐足十幾個鐘望住個mon為求填啱曬啲音節同承接到底有咩意義。 其實無意義㗎，係比份詞人請人唱果陣底氣足啲囉，係聽翻成品果陣自己個心好過啲囉，係見到有人「又」同自己「撞」歌果陣，無論佢有幾多點擊幾多人share同like果陣，都可以打從心底裡睇唔起佢囉，因為有啲嘢呃到人，呃唔到自己。而我從來唔鍾意呃自己呃咁多，呃少少就夠。