【龔成問答信箱】（Q22501-Q22520）

Q22501：

老師！有個問題我想問好耐！

我見你講1211 現價偏貴。咁點解你而家唔先賣出？？？

低位再買返（我絕對明白投資要長線）

但亦冇理由睇住股價由最高位跌返落去？長期持有但高位沽貨！咁又如何獲利？

龔成老師：

因為無人知股價走勢。你這句「冇理由睇住股價又最高位跌返落去」，是「預期股價走勢」的思維，即是「散戶思維」。

這種思維，令一般散戶，無法賺到10倍回報，因為佢地見到某股到了高位，就會「賣出等跌先買」，但結果是「賣出後一直升」。

如果我真的賣出比亞迪（1211），但佢股價唔跌，然後佢的企業價值不斷增加，今天的$2XX是貴，但過一年可以變成合理，我就會買唔翻。

企業的平貴，與股價的走勢，中短期可以無關。

你仍停留在「一般人思維」，你以「現金」作貨幣單位，而我以「資產」作貨幣單位。

一般人認為「持有現金」才是有財富，認為「獲利，賣出股票」才能賺錢，但有錢人思維，就明白「現金永遠貶值，持有優質股才是真財富」，根本不用賣出股票。

一般人擔心「如果高位不賣出股票，不賺錢，有機會股價跌翻」。

有錢人擔心「如果賣出優質股，有機會買唔翻，持有貶值的現金根本無用」。

------------------------------------------------

Q22502：

老師，想請教隻完美醫療

1）公司向主席授出購股權是什麼意思呢？對公司前景是好與壞呢？

2）上海市打擊非法美容服務，正路理解是如果完美醫療係正規，理論上是可以打擊其他同行違規對手，有利完美醫療做到寡頭壟斷和汰弱留強，

從而整治行業而令其受惠及增加市場競爭力及份額，實屬利好！但問題是……作為我們散戶及投資者怎樣可以知道完美醫療有沒有違規呢？？

現在我們都只是能看財經新聞消息和媒體報導，雖然暫時未见到上海市政府有點名批評（完美醫療有違規）的報導好似之前騰訊或阿里違規而遭罰款和要求改善和禁令，

但目前這兩個月從高位$10.9下跌至$6.6，會否已經提前有些預兆和隱藏一些殺機呢？

3）之前聽你講過$6是合理區間的頂部，所以我也本來打算準備$6.5左右開始分注入市的（之後近$6再加注），現階段的策略應該是怎樣呢？需要調整嗎？

觀望一下還是照原定計劃進行呢？盼龔sir指點一下！

4）另外你曾說你之前有入貨完美醫療，私人想問下你之前什麼價位入呢？如果以你自己角度，你會用咩價位再加注呢？

純粹想了解和學習多D你個人意見及做法（如果你介意的話可以唔需要講的）

謝謝龔Sir

龔成老師︰

1) 購股權，其實就係一個權證，給予持有者可以在未來時間，用特定價格買入該股。不少上市企業，都會以購股權作為管理層獎勵。

因為購股權的行洗價，是固定的。若日後企業股價提升，即管理層有機會用比市場更平宜的價錢，去買入該股。

其實這個動作，唔代表公司前景是好，定是壞。作為投資者，你只要留意購股權數量，當全數行洗，會佔已發行股量多少。

因為，當行洗購股權時，公司係會發行新股，變相令現有股東的利益被攤薄。以完美醫療(1830)為例，發行的70.9萬份購股權，只佔發行股份的約0.058%，這程度就影響不大。

2) 我地唔係行內專家或者用家，更加唔係企業一份子，的確很難去知佢現時有無違規風險。所以，我地只能用佢過去紀錄和現時質素，去作為參考，例如以現時香港情況去分析。初步睇，個風險唔算好高。

至於點解跌咁多，係因為之前股價太貴，現時純粹只係回調至一個較合理水平，當然，市場對潛在監管有擔心，都是風險。但現價未算平，只係合理區頂位，只宜小注。

3) 估值上無大變，現價係合理區頂位，如果你無貨可以先小注。但由於此股都有一定不確定性，故長線不宜持有過多。

4) 我在$2左右入，暫時唔會再加注。

------------------------------------------------

Q22503：

龔Sir，你好!我現年59岁，仍在工作，現持有以下股票，是否会适，請賜教:-

#00003 (香港中華煤氣) 2100股 @11.86
#00011 (恒生银行) 200股 @144.25
#00012 (恒基地產) 1000股 @28.75
#00066 (地鐵公司) 3,000股 @41.12
#00303 (伟易達) 500股 @60.58
#00435 (陽光房地產基金) 7000股 @3.75

#00548 (深圳高速公路股份) 2000股 @6.88
#00590 (六福集團) 3000股 @18.50
#00778 (置富產業信託) 5000股 @6.99
#00823 (领展房產基金) 600股 @70.60
#01310 (香港寬頻) 2000股 @11.04
#01448 (福寿園) 3000股 @7.70

#01928 (金沙中国有限公司) 1600股 @33.33
#01972 (太古地產) 1000股 @21.68
#02388 (中銀香港) 2000股 @25.58
#02638 (港燈) 2000股 @7.70
#02800 (盈富基金) 5500股 @27.44
#03067 (安碩恒生科技) 1300股 @17.71
#03110 (GX恒生高股息率) 1200股 @28.50

1) 老師，最终#00788 (中國鐵塔) 及#1177(中国生物製药)賣出了，前者蚀约1700元，后者賺了150多元。在这段日子裡我也按您给我的意見，

加持了部份的股票，有時間請您抽空再给我宝贵意見。

2) 老師，按以上这个组合，我这个年纪应否到价時可减持或全賣出#01448(福寿園) #03067(安碩恒生科技)，会否造成组合不平衡呢？

3) 老師，另外我想问问#01928 (金沙中国有限公司)，这年头怎麼不公佈業绩的，这情況会对企業有影响嗎？还可继續投资？

4) 而#01310(香港寬頻)，我也希望到价時賣出，加持组合內其它的股票。

老師，請抽出您的宝贵時間多多指教提醒。

龔成老師︰

1) 現時這個組合，大致上可以。但緊記，這個組合不是永遠適用。你要按自己人生階段，慢慢將收息股比例加重，至退休時應佔100%。

2) 如果佢地去到好貴水平，你就可以減持(現價只是合理區上部，跟好貴還有很遠距離)。或者到你退休前2-3年左右，慢慢分段沽出，換成收息股，咁就可以。

3) 中期報告，佢往都係8月尾先有，至於2020年全年業績己在2021年3月公布。上年受疫情影響，出現虧損，但相信只係影響集團中短期，長線投資價值依然存在。

4) 香港寬頻（1310）主要在香港提供固定電訊網絡服務及國際電訊服務，以及產品銷售。

業務發展不過不失，中短期較一般，之後會好翻D。

整體來說，長線投資仍可，雖然增長力唔算強，但作為收息股係可以。而且你持貨不算多，唔建議你沽出

------------------------------------------------

Q22504：

龔老師你好，我於去年買入了一些股票，部分買入後幾日就可以倒蝕，當時問過老師意見，希望到一定價位後放出，但一直未有機會。

直至近期差不多全倉紅了，而我亦認為月供股較適合我，但希望老師指點一下如何處理持倉的股票，謝謝

京東健康 6618 $146 ，550股
小米 1810 $28.35 ，600股
東亞銀行 0023 $16.8，600股
云想科技 2131 $12.08，1000股
清科創業 1945 $19，800股
中策集團 235 $0.25，20000股

龔成老師︰

你太在意個買入價和帳面數字，完全錯左焦點。

你唔好再用買入價，作為判斷一隻股票優劣的標準。你應著眼佢本身有無質素，如果有，中短期價格波動，令到出現帳面虧損，係無問題，照可以長線持有。

但如果係無質素，就算而一刻是賺定蝕，你都要將佢沽出。重點分析的地方，係企業質素，而非股價上。

小米(1810)係有質素的潛力股，若你係年青至中年人士，這股適合長線持有。

京東健康(6618)、云想科技(2131)和清科創業(1945)唔係話無投資價值，只係不確定性較高，你現時只有好少貨，其實你可以長線持有都得。

但京東健康(6618)就持貨太多，就算一般優質股，我地都唔好持有過多，大約佔組合15%好了，行業上限則為30%，以免出現過度集中性風險。故你要將6618沽少少，換至其他股票，去平衡個組合。

東亞銀行(0023)和中策集團(0235)質素一般，建議你分段慢慢沽出，換至其他優質股。

其實若果你無太多投資知識和經驗，對企業估值，點去定平貴不太了解。先利用月供模式去做增值，可以減低買貴貨風險，對你而言會較理想。

假設你係年青至中年人士，你可以用「平穏增長股」 + 「潛力股」的組合。如果你係偏年青，比例大約可以去到各一半。

但由於「潛力股」有一定波動性，較適宜年青和有投資經驗人士。若你投資取態較保守、經驗較淺或者較接近中年，「潛力股」比重就要相對下調。

現在你每月先用5成儲蓄做月供。其餘先儲起，用一邊月供一邊儲蓄的策略。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

------------------------------------------------

Q22505：

謝謝老師，明白的。如果有一百萬作投資，分注的話，又估計會下跌，是如何分注？

龔老師，我老公叫我全部公積金（4成都係股票）轉現金。我覺得無必要，因為我的股票部份是港股，而且市一定會反彈的。

但是，我快退休，會於明年1月攞番公積金。請問你可以俾我意見嗎？我很不開心，因為工作多年不開心，難得做了決定，現在為賺錢又不退休，非常難受！

我身體不大好，因為多年壓力，不是一般人可以忍受的。

龔成老師︰

若你明年頭就退休，餘下可投資時間不多，公積金組合，真的不宜持有太多股票。你要開始慢慢將佢地換成較保守組合，例如債券、現金類基金。一切以保本為主，之後取回相關資金，再投資收息資產。

但記住唔洗一次過轉晒，分段咁去做會較好，可以平衡價格波動風險。

另外，我地唔好估個市走勢，無人可以估到佢中短期，幾時跌，幾時升。我地只會用股票平貴，去定我地投資策略。

現時大市在合理水平，你100萬可以先用30-40萬，慢慢分注買入我之前講的收息股。餘下資金，就等有再明顯回調，才慢慢加注。

配置比例上，唔洗諗得太複雜，平均分配在我推介你的收息股就可以。只要唔好偏重個別企業或者行業，比例控制在分別15%和30%以內，咁就可以。

辛苦日子將會過去，好好配置財富組合，去享受將至的退休人生。

------------------------------------------------

Q22506：

感謝龔sir意見！因為巴菲特都非常推薦投資者購買ETF，所以我想多了解一下ETF，龔sir在你的股票班中只有在初班有提及到ETF，

當中你提到NAV值，因為財經網站上提供的NAV值都是有延誤的，所以必須自行計算現時的NAV值。

我以安碩恒生科技（3067）做例子，想麻煩龔sir你睇睇我有冇計錯。

8/18恒生指數收市價 25867.01
8/16恒生指數收市價 26181.46

8/18 安碩恒生科技 現價 12.97

8/16 安碩恒生科技NAV 13.416

計算恒生指數8/16和8/18的差額
25867.01 - 26181.46 = - 314.45
- 314.45 ÷ 26181.46 = - 0.012 （-1.2%）

恒生指數差額為 -1.2%

再將NAV值 × 恒生指數差額
13.416 × -1.2% = -0.16

13.416 + (-0.16） = 13.256

8/18安碩恒生科技的NAV值是13.256

比較今日收市價12.97，NAV值大於收市價即代表此刻市場低估此ETF價值，是一個買入的訊號。但是我要如何得知此價是應該大手買入還是小注買入呢？

如果我想多了解一下ETF，請問有冇書籍或者網站可以介紹？

謝謝！

龔成老師︰

你唔應該用恆指去計，而要用恆生科指數數去計！

至於當中的計算模式，和得出ETF被市場低估這個結論，係正確。

但係抽取數據作比較時，就有問題。我地係決定用那個數據，同該ETF比較時，要留意有無比較意義。

你現時分析對象係安碩恒生科技(3067)，是30間科技公司的ETF組合。而恆指，則是60間藍籌企業，當中包括科技股以外，多個不同行業。故2者係有根本性的差別，用來比對其誤差，就有失穏當。

你應該用恆指科技指數，去做比對對象。因為3067，就正正係追蹤這個指數。

8/18恒生科技指數收市價 6226.69
8/16恒生科技指數收市價 6420.14

即大約 -3.0%。

而8/18安碩恒生科技股價$12.97，和8/16安碩恒生科技NAV$13.416，差距都是 -3.3%。故ETF3067跟大市，大約只有0.3%的誤差，唔算係好大。

其實一般大型ETF，好少會出現較大誤差的情況。主要係一些冷門和不活躍的ETF，才有機會出現。

如果真係有較大折讓，而個ETF本身都有投資價值。你可以因應當時平貴，去決定注碼。因為我地唔係短炒，這個折讓純粹係多個機會，令你找到別人不為意的平宜貨。

------------------------------------------------

Q22507：

龔sir 你好，已經過左半年，希望老師審視我既投資組合

2800 @ 27.5 2784股
066 @ 44.5 1402股
2388 @ 28.3 1000股
1211 @ 44 205股
1177 @ 7.7 1200股

788 @ 1.28 18000股
178 @ 2.21 6000股
1212 @ 7.6 4000股
1257 @ 3.2 5000股

1972 @ 21.05 1200股
1928@ 27.8 800股
9618 @ 290 50股
3067 @ 13.9 800股

（1） 持股組合有沒有問題？需要改善？

（2） 持股數目會否太多？

（3）月供緊788仲可以繼續？

（4）想往後賣出2388/178，再轉去其他增長股，可以嗎？

（5） 現在科技股有回落，增持3067/9618得唔得

（6）增持1972/1928/1212/1257可以嗎？

謝謝老師指導

龔成老師︰

1) 無問題，你長線持有就可以。

2) 有少少多，最好集中係10隻左右。

3) 可以，但你預佢增長力無以往咁勁，算係潛力股和平穏增長股之間，依然有長線投資價值。

4) 中銀香港(2388)有質素，唔建議咁做。而莎莎(0178)唔係無質素，但比較受經濟週期性影響，不宜持有太多。如果你想換碼，可以等大環境明顯好轉﹐佢有較大回升時，減持少少。

5) 如果你資金較充裕，現時加小注都係可以。但若資金不多，可以等佢地回多少少先，才考慮加注。

6) 這些股票，現價都合理，你最好等佢回到同你上一注，係有10-15%回調幅度，才加注會較好。

另外，中國光大綠色環保（1257）其實本質不差。

睇翻佢的業務情況，長遠發展其實是一個大方向，但佢近年負債有所上升，加上市場擔心佢之後的增長力有所減慢，因此對這股的評價減少左。的確，負債與發展持續性，是這股的風險因素。

長遠來說，這股仍是有投資價值，但不建議太過大注。始終都有風險，同時可能仍會弱一段時期。

------------------------------------------------

Q22508：

龔成老師您好，又想找您問問題。首先，好多謝您回覆所有網友的問題，又會公開俾人睇，您的每個回覆都充滿了正能量，每次我唔開心都會不停睇您的帖子。

我27歲，一事無成，靠努力有4份工，接近番足7日工，每年TOTAL放10全日假都無，雖然D工都係兼職、炒散、正職係低人工的文職，月入都係共$15,000-$17,000左右。

睇左您個page2年左右，由短炒變長渣，由輸好多錢變打和，好多謝您。

現時股票有
12(佔投資組合13%)、
257(佔投資組合7%)、
386(佔投資組合9%)、
728(佔投資組合7%)、
1448(佔投資組合8%)、

1800(佔投資組合6%)、
2388(佔投資組合15%)、
3868(佔投資組合6%)、
3320(佔投資組合6%)、
1(佔投資組合23%)

Total $250,000, 帳面(-5%)

現金$120,000(全數可投資，不用作流動現金)，每月儲$8,300左右，每年股息約$11,000，全數會再作投資

股票好似有D多，但我唔會再買新股，目標係上述10隻股票，平均每隻佔投資組合10%

因為我成日為自己工作好唔開心，所以我目標31歲左右有100萬，之後唔再儲咁多錢，再搵其它開心工作。而果100萬希望之後每年複利息6%增長，

我65歲時就有6,800,000左右，加埋MPF應該有8,200,000，而退休後每年可以用$740,000左右(如果計2021年之後每年3%通帳，我65歲的$740,000即是現時的$240,000)。

如果我現時(27歲)根據每月儲$8,300左右，股票250,000左右，現金120,000左右，再複利息投資上述10隻股票，我31歲時可以有100萬的機會大唔大?

如果我31歲時有100萬，之後不儲蓄但不停複利息增長，我65歲時有6,800,000的機會大唔大?

最後，請問老師有沒有其它財務建議?

萬分感謝，無名的支持者

龔成老師︰

其實你最需要多謝的人，是你自己。因為"改變"唔係一件容易的事，要很大力氣、意志和自律性，才可以做到。

以年均回報6%計，你31歲時100萬，應該在65歲個陣可以升值至720萬。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你27歲這麼年輕的年紀，我會建議先集中係有增長力的優質股(除非你風險承受能力好低)，去累積一筆財富。

而我地以長線平均回報計，每年平均合理增值，大約可以去到10-15%。若以年均10%回報計，你這100萬到65歲，應該已經升值至2000萬以上，故成事機會很大。

我假設投資回報有10%（連股息再投資），你每月投資$8300 + 37萬資產，4年後大約會增值至100萬，配合到你目標。

但較大問題係，你現時持股中，不少是收息股(0728, 3868, 1800,0386)，佢地增長力較弱，主要係收下息，未必可以做到年均10%增長。建議你將部份換碼至以下增長股，同時月供部份，都係以有增長力股票為主。

你可以投資「平穏增長股」和「潛力股」，去創建一個增值平台。你每月5成儲蓄，即是用$4150做月供。其餘先儲起，用一邊月供一邊儲蓄的策略。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

現時大市只是合理區，你現有12萬現金和每月所儲倒的資金，就等大市出現一定程度的下跌，才大力度掃貨，然後長線投資。

到你退休時，將這些股票換成收息資產，去支援你退休生活開支，咁就可以。

------------------------------------------------

Q22509：

阿sir,想問下如果想股換股，因為資金不足

1. 857中石油（賺錢）
2. 788 中國鐵塔 （蝕錢）
3. 9960 康聖環球 （蝕錢）

其實係咪應該將蝕錢的轉倉？如果按質素我覺得可能康聖會係最差？初時諗不如用中石油轉，但如果佢係呢3隻當中最好質素，即佢賺錢能力較強，又冇理由攞佢嚟轉，求賜教，謝謝

阿sir想問呢隻1799可入嗎

龔成老師︰

其實現時係賺錢，定係蝕錢，唔能夠代表佢質素好壞，最終我地都要睇翻佢企業本質而定。

3隻當中，中國鐵塔(0788)最有質素，雖然增長力比以往弱左﹐現算係水桶1至2，但長線投資價值依然存在，建議長線持有。

中石油(0857)都算有質素，但這始終是商品企業，產品沒有差異性，只能賺取合理的利潤，不算是最高質的類別，投資價值中等，這類股不宜持有太多。

石油是商品，當中沒有差異性，佢地要將石油賣出，只能跟國際油價，這令佢處於被動狀態，沒有價格自主的能力，這令佢地的獨特性有限。這類商品企業，都可投資，但就要明白不是最高質的企業。

由價佢會比較受油價影響，自主能力不強，加上油價中短期可以好波動。長遠增長力只屬中等，只宜小注投資。

康聖環球（9960）質素同樣只算是中等。

佢主要於中國向醫院提供6個主要專科領域（包括血液學、遺傳病及罕見病、傳染病、腫瘤、神經學及婦科）的臨床檢測服務，亦提供ＣＯＶＩＤ－１９相關檢測服務及常規檢測服務。

佢亦向合約研究機構、臨床試驗贊助商、製藥公司及研究機構提供臨床檢測服務、諮詢及評估服務，以及標本儲存服務。佢係在武漢、北京、上海、成都、天津及烏魯木齊設有7個實驗室。

其實質素都有的，但不算好高，企業獨特性未算好強，以及這刻佢在虧損中，往後的發展仍有較多不確定性。這類股都一樣不宜投資太多。

如果你0857和9960持貨佔組合較多的話，你係可以沽少少，換至其他優質股。

但緊記我地創建組合時，唔好太集中係單一股票，要平衡。個別企業和行業，不要佔組合15%和30%以上，銀行業更加不要高於組合20%，否則會有過度集中性風險。

在創建組合初期，組合金額較少，出現超標都係可以接受。但長線你要參照這指標，去維持組合的平衡性，才算理想。

新特能源（1799）係太陽能級多晶硅生產商和光伏項目承包商，主要從事中國光伏產業上游和下游環節的業務。

佢除左多晶硅生產外，亦從事電力銷售（透過自有燃煤發電廠供應電力多晶硅生產之用，並銷售多餘電力予當地電網）；工程建設承包（根據ＥＰＣ、ＰＣ或ＢＴ承包模式經營，為光伏及風電項目提供能源解決方案，包括工程設計、諮詢、建設、調試及運維）；逆變器生產（用於光伏項目的一項關鍵部件）及光伏硅片及組件生產。

其實過往的生意與盈利唔算好突出，同埋有D波動，只是近期新能源有炒作，佢都炒起左。實質支持係咪好大，未知。但建議保守少少，暫時這股投資值博率不高。

------------------------------------------------

Q22510：

老師你好，現年已經27歲，收入35k-45k左右，感謝老師一直以來的意見，現已累積超過100萬的資產現持有以下資產：

股票約60萬左右；

銀河持有2216 股，平均價為55.5；
港鐵持有1888 股，平均價為41；
中國鐵塔持有56814 股，平均價為1.22；
中生製藥持有6444 股，平均價7.7；
比亞迪持有258 股，平均價為48.5；
錦欣生殖持有1144股，平均價17.3；
盈富基金持有9148 股，平均價25.4；

現金10 萬左右；

派息基金Z07 24萬左右（五年內離場要手續費，所以至少放五年，平均每個月7%息）；

危疾（有儲蓄成份，為期25年）、醫療（消耗）以及儲蓄（為期10年，每月$3000）一年合共保費大約6～7 萬；

央積金大約4 萬（政府每年如果有盈餘會加注幾千，到65歲才能拿）；

1.請問以上股票是否有質素可以持續月供？如仍有質素，以上股票比例上需要調整或加入什麼，可以有更大收益？

2.在以上各方面配置中，老師有什麼建議？（風險承受程度中上）

龔成老師︰

1) 現時股票都有質素，但錦欣生殖(1951)不確定性較高，而且現價偏貴，不宜月供。

比亞迪(1211)現價偏貴，最好回少少先重新月供。但如果真的好想儲貨，同時現金足，現價以小注模式去月供，都可以的。

又或者可考慮GX中國電車（2845），這基金的目標是追蹤Solactive中國電動車指數NTR「相關指數」表現緊密相關的投資回報。

持股中最重就係比亞迪A股（002594），以及與中國電動車產業有關的股票，中國因為能源問題，長遠一定要發展電動車，這是大方向，故此股有一定投資價值。

2) 以上持股配置，問題不大。只要你跟我建議，調整一下月供計劃，咁就可以。

但你27歲很年青，應以增宜為主，派息基金增長力不高，其實不太適合你。但由於離場要收手續費，你照持有都可以，但唔好再加大投資。

------------------------------------------------

Q22511：

！我已經預留登記了星期六班，希望到時學到知識可以識運用！

龔sir, 可否多問一樣關於派息基金，因為這陣子很多不懂投資的同事/ 準備移民，諗住留筆錢比在港父母的朋友都向保險公司買呢類每月派息的基金當家用比父母。

請問您覺得這類型投資如何？值得作為資產配置的一部分嗎？謝謝

龔成老師︰

這類派息基金，其實分好多種，性質上可以成為退休人士資產組合的其中一員。

但問題係，你要明確知道，這些基金派息率是否保證。另外，基金本身有無賺息蝕價的風險。

用這種方法去支援留港父母生活，係一個方法，但必需了解清楚背後條款，以免失算。

------------------------------------------------

Q22512：

我努力睇你既野.可否分柝我既分配是否有問題. 我覺得無咩收息.....加唔肯定幾多錢入注。

2000sh [email protected]高價今明年內賣?
200sh -9988
200sh -1833需再入注?
600sh -0823 應幾錢再入@59.15/66.45
1000sh [email protected]應幾錢再入

以上兩隻我之前等現在升哂
3000sh -3067
500sh -6993
150sh -2807
20000sh -0788
[email protected]可再入注？

應該入金沙?0548/0778？ 收息?

龔成老師︰

我地投資股票，其實等同投資一間企業。希望透過其自然增長，以達至財富增值的目的。所以，我地投資一定係長線，而唔係短期炒賣，去賺差價。

你上述股票，都係有質素(2807相信係打錯編號)，若你係年青至中年人士，這組合係可以長線持有。

除非佢地去到好貴，或者質素變差，否則係唔需要沽出。因此，你3088照長線持有就可以。

至於平安好醫生(1833)佢有質素，但不確定性大，唔建議持有太多。

而領展(0823)有質素，你每注相距大約10-15%咁入就可以。但留意任何股票，都要控制個比重。同一行業或企業，不要超過組合15%和30%，以免有過度集中性風險。

港鐵(0066)現價在合理區中上部，你有貨在手，除非你資金好充裕，否則等佢有明顯回調才加注，會更好。

ＧＸ中國電車ETF（2845）現價在合理區頂部，暫時不宜大注，你等佢回多10-15%才考慮。

另外，你有個較大問題，就係你而家太偏重左係潛力股(3088, 9988, 1833, 3067, 0788, 2845)，佢地雖然有增長潛力，同時風險都較高，不宜持有過多。

假設你年青至中年，潛力股可佔約4-5成，餘下應用以下平穏增長股。若你投資經驗較淺，潛力股比重，要再調至2-3成以下。到你學到一定投資知識，才慢慢調高。

未來時間，你就要加大翻平穏增長股部份，令組合更平衡。

------------------------------------------------

Q22513：

龔SIR, 想問你關於你當時還在儲貨比亞迪既時候, 你話曾經比亞迪試過由$88跌到$12, 想問你當時有冇諗過自己既決定係錯?

因為 公司股價跌,跌左再溝, 又跌再溝, 有好多時會越溝越錯,所以先了解下你當時對比亞迪既諗法係點? 因為當時0幾年既時候

如果電動車將來因為技術上或者其他原因普及唔到, 好可能對比亞迪尼間公司成個諗法就錯唒, 所以好想知你當時考慮左咩因素去決定繼續增持?謝謝你龔SIR

龔成老師：

睇長遠價值，不是睇短期股價。

十幾年前，我已大量睇電動車行業資料，分析行業及技術發展，我見到電動車的最大問題，就是電池技術與配套。

如果這兩大因素解決，電動車一定能普及，因為佢比用油平好多，同時更環保。

然後，我分析電池技術與配套，這兩大因素，中國的配套在近10年間，不斷建設，例如充電設施等，在全球行得較多，多年前已相信，中國這方面的配套成熟，是遲早的事。

之後就是分析電池。

比亞迪（1211）本身就是造電池起家，之後再造車，是全球擁有較高電池技術的車企，其實佢的電動車，2007年已出產，當時已見到唔算差（雖然與市場化有距離），但佢過往的電池研發好強，因此可以推論，只要比時間佢，電池技術一定會提高，因此成功只是時間問題。

我地分析，一定要著重大方向，多年前，當其他人仍停留在「比亞迪的車會爆炸」，我就是分析，這個爆炸的原因是甚麼，是否核心因素，還是能解決的問題，我以「長遠的角度分析」，而不是這刻，我見到佢受短期不利消息，令股價大跌，就會增持，我從不擔心佢股價跌，因為我集中睇企業。

投資潛力企業，就是「這刻未成熟時買入，耐心持有，等企業成長」，所以，我地的分析點一定是長期。

------------------------------------------------

Q22514：

龔成老師你好，暫時冇乜錢，買住一隻先

3067係咪應該長期持有？

龔成老師︰

安碩恒生科技(3067)可以，這隻股票有質素。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

這基金上落較大，現價大約在合理區頂，因此，這刻不能大注投資。

最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

你現先買一隻，係可以。但長線計，我地唔好成個組合，只集中係1,2隻股票身上。

最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能高於組合30%，同一股不能高於組合15%。要平衡，建立後長期持有，不是買賣賺差價，而是成為你財富組合一部分。

------------------------------------------------

Q22515：

龔sir, 父母50多歲，冇任何保險，如果基本保險要每人2000蚊一個月左右，係唔係都最好買？

龔成老師︰

其實保險係我地理財中防守部份，主要係將一些健康風險，轉移比保險公司。所以，保障型的保險，我地係需要的。

至於$2000值唔值，你要睇翻本身個保障，係唔係真係切合你家人需要而定。

若係儲蓄類保險，我就不太建議，始終增長力不及優質股。除非你本身好保守，或者完全唔識投資，否則就不太建議。

------------------------------------------------

Q22516：

龔sir，你好！一直有關注你嘅post、YouTube Channel ，每日會花一小時去睇你解答問題同研究點可以令自己在股票市場進步，去學長線投資，

現時手頭上新經濟股比較多，都係年頭高位買入，想請教一下你嘅意見！

本人手持150萬左右現金，尚有250樓按要償還，月入3萬+，目標係3-5年後還清樓按再購入600-800物業，股票資產50萬，另100萬現金流

手持股票如下：

9988@270 400股
700@674 100股
388@499 100股
[email protected] 6000股
[email protected] 100股

[email protected] 7000股
6185@344 200股
[email protected] 5000股
2400@95 600股
[email protected] 3000股

好多股票都係高位買入，組合亦比較亂，想問應該如何再配置？等升返還是放部分等底位再吸納？

最後想同你講聲多謝，一直keep住睇你嘅post 令我自己都不斷去學習，以前上網無所事事咁過，依家會多思考點去進步，令將來的生活變得更輕鬆，

我相信越努力越幸運，多謝你令我思考點去做個有錢人，而唔係單單停留喺「想成為有錢人」嘅階段，呢啲都係睇你post學返嚟，哈哈，再次衷心謝謝你花時間睇我嘅留言

龔成老師︰

我地持有一隻股票與否，只會睇佢長線質素。同時我地唔會因為買貴左，就先沽出，等平D買翻。因為中短期走勢好難估，會受很不多因素影響，有些因素甚至係同企業本質無關。

如果你而家沽左，無人可以保證佢係唔係會再回，佢可能一直升，咁你就要用更高成本，才可以買回這隻優質股。

你現時持股，都係有質素，應長線持有。但有個較大問題，就係比較偏重潛力股。佢地雖然有增長潛力，同時風險都較高，不宜持有過多。

同一行業佔組合的比例，不宜多過30%，如果你上述有些行業過了這比例，就要減持。

另外，見你不少股都在貴的價位買入，你要大幅強化企業估值及投資時機的能力，又或日後多用分注、月供等投資策略。

如果你係年青至中年，潛力股可佔約4-5成，餘下應用以下平穏增長股。若你投資經驗較淺，潛力股比重，要再調至2-3成以下。到你學到一定投資知識，才慢慢調高。

現貨可以不用沽，但未來時間，你就要加大翻平穏增長股部份，令組合更平衡。以下平穏增長股，現價合理，已可分注。

另外，微盟集團（2013）、心動公司(2400)、康希諾生物(6185)和中國飛鶴(6186)不確定性較高，不宜持有太多。

現時大市在合理水平，你可以多用30-40萬，買入一些平穏增長股。餘下資金，我地就等大跌市，才出手掃貨。

至於物業投資方面，現時按息很低，你唔洗急住清還樓按，反而應該用資金去投資，爭取更大回報。

而投資第二個物業時，緊記要確定買樓同時，你留有一定優質股作增值。否則，你成個財富組合，就會偏晒去物業個邊，造成過度集中性風險。

記住，投資路上係要一直保持學習，長線回報才會好。加油!

------------------------------------------------

Q22517：

老師，可唔可以講解下1825同2944。如果跌到0會點架？

龔sir, 我最終賣咗0136， 另外一隻1825，止蝕離埸，蝕左20万

好彩還有隻1211 保住，15x-17x 入手，入咗6 手，仲有D小注0285，1830，2388， 3319，3918 ， 坐艇。我以後都聴晒你講。

龔成老師︰

美臻集團（1825和2944）過往業務一般，之前因為有炒作，現在只係回調翻去較合理水平。不過以業務發展來分析，這股的投資價值，只是一般般。

正常股票唔好跌到零，點到有些剩餘價格。但由於這股質素好一般，你沽出都係可以。長線換至其他優質股，回報會更好。

至於餘下持股，都係有質素，你可以長線持有。

但組合現時較偏重左係潛力股(1211, 0285, 1830, 3918)，而且非常集中比亞迪系股票，佢地雖然有增長潛力，同時風險都較高，不宜持有過多。

若你偏年青，潛力股可佔約5成，餘下應用以下平穏增長股。若你投資經驗較淺或較近中年，潛力股比重，要再調至3成以下。

未來時間，你就要加大翻平穏增長股部份，令組合更平衡。

------------------------------------------------

Q22518：

你好龔Sir ，你對ESG 投資有咩睇法？邊隻股票好值得投資

龔成老師︰

ESG，就代表環境、社會及管治。是近年多左人討論的一個項目。

這部份係一些非會計上的因素，而這些因素，係有機會影響企業長線經營和發展。

投資者過往選擇投資項目，主要係分析企業長線盈利表現。但近年已開始愈來愈重視ESG，企業能否在賺錢之餘，對社會和環境作出一定貢獻。

而且，全球法律改變，人們對環境關注度增加，都令企業對ESG的實踐造成推動力。但現時亞洲ESG未算好普及，主要都係一些歐洲企業，佢地對ESG關注度會較高。

其實我地係分析企業時，除了財務數據，我地都會分析企業和相關行業本質，如果ESG因素係對企業有長線影響，我地都應該將佢加入估值考量之列。

而我分析無特別用ESG表現，去做分類。但ESG比較多人關注會係綠色能源，你可以向這方向找投資機會。

------------------------------------------------

Q22519：

你好， sir 1.其實700 我453入貨有無錯？

1.其實700 我453入貨有無錯？
2.下一级支持位在哪？
3.rsi 好似無乜用
4.牛熊分析恒指没乜用
5.恒指25000是否有支持？
6. 700,6618那個較好可以吸？

Thx you

可否比d意见

我又放左

龔成老師︰

1) 騰訊（0700）你買入價合理，但你預佢中短期會較弱，長線持有就可以。

2) 我唔會睇支持位，只會睇企業質素，去決定長線持有，還是要沽出。

3) RSI係一些技術分析，只係短炒架人用。我唔建議你用短炒方法去投資，因為中短期會受好多因素影響，只有長線持有，才可以有效反映企業價值出來。

你見全球最賺錢的投資人巴菲特，去都係只會長線持有優質股，唔會做短炒或者用技術分析。

4) 牛熊分析，可以作參考，但實際用途唔大。因為其走向不一定順序的，因為有好多外在因素影響，我不會用「預期」的方法，去估股市、股價點發展，

我只會用「測量狀態」這方法，分析現時處甚麼位置，從而作出策略，但就不會預測。

5) 25000點算係合理區較底位置，有一定值博率。但都要睇翻個別企業平貴，因為大市在合理水平，唔代表企業都一定係合理價，有權可以係好貴。

6) 騰訊（0700）算係合理區中部，而且整體質素都較高，值博率會較高。而京東健康（6618），不確定性較大，無貨現價可小注，但長線不宜佔組合太大比重。

------------------------------------------------

Q22520：

抱歉老師，我發現自己打錯字…是0688 （中國海外）15.3入2000股

不過謝謝老師的詳細解答 我是因為看過老師在fb的發文或閲讀過老師的書籍才有些少能力判斷某些公司的前景。縱然現在大市回落一些，但仍然二千元盈利。

我家人説很多人在這段時間都是虧損 所以還得感謝老師

其實建行是我還在在學期間聽信祖母的意見買入的 現在 家人也建議我待它升回6.X元時便會沽出所以股分。我也有這樣的打算

因為在學期間沒有很多的收入，不太敢輸錢。所以只是把積蓄放在一些收息股上

龔成老師︰

中國海外發展（0688）不是無質素，在發展商來講，不算最強，長遠有平穩增長的能力，前景都可以。

睇翻佢的財務數據，基本上都是正面的，但生意增長力不是好強，見佢過往的生意都只是平穩，而整體都有投資價值的。

可以視這股為平穩型的企業，中短期可能因樓市一般而股價一般，但長遠，仍是可以的，你可以持有。

至於投資初期，買一些波動性較細的收息股，其實都係可以。但由於建行(0939)你持貨都唔少，為免佢過度拖低你組合增長力，你都係沽少少，換至其他我之前建議的優質股，咁會較好。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q16761-Q16780）

Q16761：

另外我有啲想知老師你由一百萬滾到一千萬嘅過程係點嘅呢？你會唔會出書分享呢？

龔成老師：

會出書呀，目標今年年底，會出《80後千萬富翁》，當中有理論，以及有我的分享。

當我累積$100萬，儲蓄、慳錢，這些成份佔了不少，但去到$1000萬，這些的作用已減。而投資，賺錢方法，錢搵錢的技巧，就會較多。

正如我在《80後百萬富翁》所講的「加」與「乘」的概念。

$100萬，「加」與「乘」都重要，但到$1000萬，「乘」就佔了大部分。

------------------------------------------------

Q16762：

龔成老師；你好！ 我係你嘅超級fans！我有個問題想請教一下老師 ，我之前買咗 6000股匯豐0005

買咗一千股中國平安2318，買咗一萬股紅星美凱龍(想沽出)，本人今年50歲，每月工作可以儲2萬5仟，還有30萬現金

想十年後退休， 想盡量實現財務自由， 應該再買邊隻股票來投資呢？個 股票組合應該點樣整合呢？

希望老師百忙之中可以畀寶貴意見！
多謝老師！

龔成老師：

匯豐（0005）是收息股，雖然在退休組合中，可以成為其中一員，但就唔能夠太集中，你應該建立一個平衡的組合。

你可以等匯豐股價上升翻較多後，賣出部分，分配至其他收息股，會較好。

至於平安（2318），持有無問題。

紅星美凱龍（1528）宜賣出。

以你的年齡，其實會開始為退休做準備，但同時，財富仍有增長力（但不是進取），因此，你可以投資「平穩增值股」+「收息股」。

現時的每月儲到的現金，可動用可半買股票，同時留下一半資金。長線投資優質股。

同時，你可以做月供股票，供「平穩增值股」+「收息股」，但就隨著年齡增加，慢慢增加收息股的比例。

平穩增值股，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、港交所（0388）。

同時，可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、匯豐（0005）、置富（0778）、陽光（0435）都可以。

另外，建議你多增加投資知識，在選股、企業估值、投資時機上落功夫，對你長遠財富有好大影響。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q16763：

龔sir你好，小妹31歲，平時只識係銀行買啲儲蓄保險，醫療保險咁...因為最近香港太亂，開始會諗儲錢問題

依排留意緊股票...但又唔識應該揀邊類股票
唔知你有冇咩建議呢？

龔成老師：

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你買儲蓄保險，都可以，但只能是組合的其中一部分，餘下資金，應投資較有增長力的項目。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股只能小注。

你可以考慮盈富（2800）。

另外再加1、2隻：銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）、希慎（0014）、太古地產（1972）等，你可以了解下這些股票，然後從中選股。

如果你不懂股，就集中供盈富。

現時大市波動，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q16764：

你好！我大約開始左月供股票一年，其中一隻是滙豐，其他都是比較穩陣的股票。

匯豐最後插水，我諗緊我應該繼續供匯豐（當撈底，溝淡）還是轉另一隻股票！

請指教，謝謝

龔成老師：

匯豐（0005）的賺錢能力，比過往略有減弱，整體的投資價值略減。你持有不是不可，但就唔應該佔你長遠的財富組合太多。

因此，你應該將資金投資盈富（2800）及配置其他優質股，而匯豐可以是其中一部分，但不應佔比太多。

------------------------------------------------

Q16765：

老師，我關於資產配置方面問題想問，現時有：
家庭淨收入（扣除了支出）每月有6萬
140萬現金於mortgage link 戶口

一間市值530萬的自住物業（仍有320萬按揭要供）
股票45萬，組合如下：

2800 @ $23.7，3000股
2388@ 28.1，3000股
1928@$25.6，1500股
1211@ 38.3，1000股
1038@ 48， 2500股
823@ 68.7，900股
14@ 24.65，3000股

由於家庭需要關係（包括近工作地點、需要大一點的空間、小朋友升學等），希望於3年內搬到3房（市值約1000萬，可做8成按揭），暫有以下方案：

1. 下年買樓花，估計樓花期為2年，但要同時供兩層，支出較大，而且要賣所有股票

2. 買二手，換樓（應先買後賣還是先賣後買？還是有其他方法？）

3. 買二手，將現時自住樓放租，有可能遇到不好的租客，租金約$14000，亦要賣所有股票及同時供兩層

4. 雙租，不過樓價可能會繼續向上，導致目標愈來愈遠，有遇壞租客的可能，不過不用賣股票及較彈性

以現時市況來看，哪一個方案較好？還是有其他建議？或如何更快達到目標？

龔成老師：

方案（2）、（3）較好。要睇你是否長遠睇好香港的樓價，以及你可以承受的風險度如何。

（2）是比較穩陣的方法，先賣出現在的物業，再買入新物業，你這樣不用比15%重稅，如果你以「先買後賣」的模式，就要先比15%稅，之後到你賣出後政府比翻你，但你這段時間就要鎖死多一筆大資金。

（3）都是一個方法，如果你第一層樓能做到「以租養供」，就可以唔需再理會佢，而你只要集中供新一樓物業就得，當中，同時持有兩物業，風險度會高左，所以你要自行睇翻你的情況與方向。

------------------------------------------------

Q16766：

老師你好,我正在拜讀老師的'選股勝經'加緊增加投資知識,但作為新手入門學習投資,一直有個疑問,希望能請教老師,就是,學習投資,選擇優質股

買入並長期持有,如果是非常優質的股票,甚至可永久持有,那如想透過股票獲利,甚至達到財務自由的話,只持有優質股而不賣出

這樣是不是不會因股票而獲得現金以應付開支?還是依靠股票的派息來獲得現金?因為並不是每隻股票都會派息?如何知道那隻股票會派息?

我了解要選擇優質股投資,但投資後,在不賣出優質股的情況下,如何成為獲利的工具,產生足以應付生活的現金流這方面,就不明白了,所以想請教老師.

另外,關於月供股票,應月供到什麼程度才停止?比如說月供滿多少手?或者月供滿多少年,應該以什麼準則去判斷呢?謝謝老師!

龔成老師：

在大方向上，我地會長線持有優質股，但當中都會按自己的人生階段，而作出適當的配置。

我地進行人生財富累積時，會用「先增值，後現金流」，即是年輕時會投資增長力較強的類別，當這刻企業增長後，如果我進入了中年階段，其實可以進行調整，當進入年長階段，希望有現金流，就會配置到收息股，以希望得到現金流。

在人生的上半場，會著重增值，因此會建立一個較好增長的組合，因此不用急於賣出套現，而是分析怎樣能令財富有最大的增長。到了人生下半場，就會配置為現金流類別。

當然，這個過程不是一下子，而是長期慢慢轉變的。

至於你問月供股票，原則都是一樣，你要分析該股佔你組合多少比例，才是合理。

------------------------------------------------

Q16767：

請教144咩料 做乜15年開始 EPS每年穩定增加 但股價唔見咗三分二? NAV 又大折讓

龔成老師：

雖然這企業在行業裡是不差，但由於3大原因，令股價持續向下。

第一，佢的賺錢能力弱左，整體已不及過往的年代，這令到企業的盈利減少，估值自然下跌。

第二，行業的風險度提高左，以及整個行業都面對較一般的情況。

第三，貿易風險不斷增加，中美間的貿易問題，對佢都有一定程度的影響。因為這幾個因素，市場都對佢估值調低左，認為風險較高，長遠賺錢能力不強，令股價出現這現象。只可以話，這股作為收息股，可以，但就唔好對股價有太大期望。

------------------------------------------------

Q16768：

老師 最近手頭上有資金來用作收息股

728（10手）
2388（8手）
2777（5手）
883（5手）
這幾隻可以嗎？

或者老師有冇其他推薦
月供已有2800（每月2000） 2388（每月2000）1928（每月1000）

龔成老師：

中國電信（0728）作為收息股，可以。

中銀香港（2388）投資作收息股，可以。

富力地產（2777）股息率好高，但行業風險較大，加上有一定的負債，你要明白佢風險會較高，股價較波動，如投資，收息好了。

中國海洋石油（0883），油價上落大，從本質上，不太適合收息。不過現時股價率高，如果明白風險，小注進行，不是不可投資。

你現時月供的，可以保持。

你可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、匯豐（0005）、置富（0778）、陽光（0435）都可以。

現時大市處波動，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q16769：

龔sir，其實真心好慶幸可以係18歲呢個年紀就認識到你，我自己其實都係小康之家，未睇你之前或者同好多年青人一樣，覺得買樓係mission impossible ，一百萬已經係難以達成...

但睇左龔sir 你Ｄ書後，覺得一千萬都吾係遙不可及，只要每個月儲1900，年利率有10%(其實應該好多人都做到，不過佢地係吾夠堅持？)。

不過當我同Ｄfriends 講既時候，佢地反問我，65歲有一千萬有咩用？其實我都費事答佢...真心，好好彩係呢個年代已經接觸到你，其實睇得明你講既道理

我至少已經行少左好多冤枉路，慳咗好多時間！我都明白先投資，後享受既道理。

另外，好感激龔sir 每日花咁多時間答問題，呢個真係幫到好多人！其實我都有兩個問題。

1:我吾係太明個複利息回報率。假如我係2018年低位買入某股票，當係823，＄69入，佢19年上到去＄92，但基於我係長揸，我冇放，Ｅ家跌落到＄66，咁我係呢段時間個回報係咪only 得股息？

2:想問龔sir，係咪專注係港股都ok ？ 美股如何？

感謝龔sir 解答。最後，我set 左個目標比自己，就係2年內一定要上你既堂，真人向你請教！不過龔sir你上堂仲會吾會戴面具？

龔成老師：

年輕是你最大的資產，你這年齡已有目標，是十分好，你之後只要保持進行就得，你已經行得比同年人快！加油！

1）對，這段時間你只會得到股息，因為股價無增長。

不過我地一定要睇長線（5年以上），長遠企業的價值會向上，而你會見到中短期股價會好波動，但長線投資，一般都會有不差的回報。

當然，有時當中的股價，都可能處貴的水平，因此我地不是不能賣出，但這要有一定的技巧，你要學懂分析企業估值。

2）只要是優質企業，我地就可以投資，因此，港股美股你都可以投資，只要優質就得。但要留意，我地投資前要經過好仔細咁分析企業，你要確保你買入該股前，已經是好了解。

由於我了解港股多過美股，因此你見我集中講港股，但你都可以投資美股的。

我上堂唔戴面具，以真面目同學生交流，2年內見！

------------------------------------------------

Q16770：

我想要每月有二萬被動收入,我依加月供緊#5二千#11一千#12一千#1211一千#2800二千每月總共7千.

但我發現我自己唔應該一次過供2隻#5#11,我想供夠一手#5就停.(其他會KEEP住供)你覺得呢?

今年25,我想十年後就有二萬被動收入
依個月供一月果陣開始左

龔成老師：

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股只能小注。

因此，匯豐（0005）、恆生（0011），以你的年齡來說，未必最適合。小注就可以。因為這些都是收息股。

至於盈富（2800）、恆基（0012）、比亞迪（1211），可以。

------------------------------------------------

Q16771：

龔老師：我將移民英國，你覺得值得去嗎？

我係因為呢次運動想帶2個小朋友到外國讀書，亦因為呢次疫情想留低香港，加上我唔捨得香港份人工，真不知道如何好

龔成老師：

呢個係一個好個人化的問題，你最好試下去當地生活，了解更多，最後先決定是否移民，因為對你影響到大。

經濟的長遠發展，英國未必是長遠好強的地方，不過，我相信你不止睇這一點。

我相信唔少香港人同你一樣，面對好兩難的決定。你要睇翻果度從事甚麼職業，如果比較大風險，就要盡力在香港，累積到足夠財富先想下一步。

------------------------------------------------

Q16772：

你好，我係澳門文員，今年32歲，不懂得投資，只有買儲蓄保險，看到你的FB，想在35歲前賺1百萬

本想試下月供金沙，工銀或其他股，但疫情影響，不敢投資，請問現在疫情影響下有什麼投資建議？麻煩你分享，謝謝！

龔成老師：

你最重是分析企業的長遠價值，現時的疫情是中短期情況，當然對金沙（1928）不利，但長遠而言，其實影響有限。

相反，如果市道正常，金沙就不會是現時的股價。你以月供模式進行，已經是一個很好的價格平均模式，已經能有效減少風險。

金沙，可以開始月供。

至於工行（1398），是收息股，對你的年齡來說未必是最適合。建議你月供盈富（2800）會更加好。

如果想3年內有$100萬，相信要更努力儲蓄投資。建議你多增加投資知識，在選股、企業估值、投資時機上落功夫，對你長遠財富有好大影響。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q16773：

您好，成哥～
您點睇VTECH HOLDINGS 偉易達(0303)呀？

我＄56買入左，見佢派息高就買左少少，
但佢岩岩公佈派息無以往咁理想，而宜家股價又跌左，
所以想問下您意見，我應該止蝕定繼續渣呢？佢有前景嗎？

我買股票的目的都係想幫輕下供樓，
所以一直留意D派息幾高ge股

我有留意開中國移動(0914)，雅居樂(3383)，中國銀行(3988)

您覺得以上戈幾隻好唔好呀？宜家係咪入市好時機呀？
平穏收息股您有無推薦呀？

幫朋友問埋，百威亞太(1876)又有無前景呢?有無買入的價值呀?
唔該您，成哥～

龔成老師：

偉易達（0303）雖然近年的股價較一般，但本質都算不錯的，但就唔叫好強。

我先用佢過往正常年份去分析，過往派息比率高達9成，成立於70年代，業務是電子產品，這麼高的派息，反映管理層明白這公司已過了最高增長的年代，之後只會是平穩增長。

公司已不需要每年投資發展，反而管理層、大股東，偏向想收息，因此這是重派息多過重發展的公司。

雖然佢係某些業務做得不錯，但發展心不強，同時大環境並不是高速增長，故相信佢之後都會平穩。近年這公司的生意，都是平穩增長，如果比較幾年前的盈利，都是差不多。

因此，作為收息股是可以的。由於佢之前公布的業績，生意同盈利都出現了下跌，因此股價受壓。我相信佢唔會太差，但唔好預佢有增長，你持有是可以，但不能太過大注。

但要留意翻，如果你打算1年內買樓，其實應該較多資金持有現金，持有股票不應太多，因為股票始終有風險，對你買樓一刻有風險。

中移動（0941），不差的，可以持有。

雅居樂（3383），風險略高，小注好了。

中行（3988）是收息股，現價合理，但增長有限。

百威亞太（1876）是有質素的股票，現價在合理區中上部，分注投資可以。

------------------------------------------------

Q16774：

龔成老師你好，一直有睇你facebook同書，十分喜歡，所以有啲問題想請教老師。

本人打算月供2、12、16、388、2800，每隻月供$1000，打算長算投資。請問會唔會太散，減低效益？
感謝！

龔成老師：

你上述月供的，都是有質素的股票，不過每隻$1000就有點少，這會令你要供好長時間先有一定的貨，建議你集中供其中3隻，盈富（2800）是其中之一，每隻$2000。

不過，如果你想每隻$1000，不是不可，但你要預供較長的時間。

------------------------------------------------

Q16775：

Hello老師，想問關於月供股票，我月入11000左右，想開始投資（考慮緊月供股票）不過我見大部分銀行有收買賣手續費或額外收費，我有計過一年要比幾多手續費

但係唔知應該拎幾多錢出黎月供先可以賺到（收息返黎嘅錢）同埋手續費。

是否要參考股票年利率再計算返入左幾多股？唔好意思，我唔係好清楚計法同埋有點混亂。

Thank you

龔成老師：

你可以用1%作為界線，如果你支付的手續費，超過了投入資金的1%，就開始成本上有點高，未必值得投資。

如果這樣，你可以自己儲現金先，等較多現金才自行慢慢分注投資，就會較好。

------------------------------------------------

Q16776：

老師，你好，我本身買股買得好散，
現有：

一手1548，11.1入
三手1177，9.82入
一手3888，19.9入
三手2186，3.77入

現年29歲，持有三十萬現金，月入14500，可儲$9000
1. 想喺5年內儲到100萬，單靠現有收入是否可行？
2. 想月供2800，但應否全數月供$9000？
謝謝你

龔成老師：

雖然你持有的股票，基本上都是有質素，但你要留意翻，你太集中在醫藥相關類，你這樣會有行業集中風險。

雖然你29歲，可以較進取，但都應該建立一個平衡的組合。

1）如果每月能儲$9000，5年已經是$54萬的本金，加上你現時的現金與股票，要5年$100萬根本無問題，只要投資平穩類股票已可，根本不用承受太高風險。

2）你可以將其中的$5000投資盈富（2800），餘下可以投資2隻股，一隻平穩增長股，一隻潛力股，已經是不差的組合。至於$30萬現金，就見到每次大跌市時出手，買入優質股長線投資。

另外，以你的年齡，財富仍有一定的增值力，建議你多增加投資知識，在選股、企業估值、投資時機上落功夫，對你長遠財富有好大影響。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q16777：

龔成！你好我是一个家庭主妇，想问你一下2328财險可以买吗？

我想买D收息股，我是新手
有时间复我Thx

龔成老師：

中國財險（2328）本質不算差，但近年的賺錢能力減弱，同時增長力不強，投資價值都有，但未到好高的程度。

這股可以投資作收息，但行業有時會出現一些特殊風險，因此唔建議太注。

如果你想投資收息股，可以建立一個「組合」，唔好只集中一隻。財險是其中之一，不是唯一。

例如港燈（2638）、深高速（0548）、香港電訊（6823）、工行（1398）、匯豐（0005）、置富（0778）、陽光（0435）都可以。

你可以多自行了解，先進行投資，唔好心急。

------------------------------------------------

Q16778：

龔成老師你好，我今年30歲，睇過你嘅80後百萬富翁，非常好睇。多謝你令我獲益良多。

我想6年後儲到首期上車，以下係我既投資組合，請你俾啲意見我應該如何調整

我月入$16000，扣除每月生活開支，大約有$5000供股票，$4000(2800) $1000(388)

另外想買入1448福壽園，但現時價位會唔會比較高左少少？

同埋我自己做左少少研究
2552華領醫藥算唔算有潛質既股票？
先多謝你既回覆

龔成老師：

你可以保持月供盈富（2800）、港交所（0388），保持進行就得，金額無問題。

至於褔壽園（1448），你可以先小小注投資，因為現價唔平，但要佢大跌又唔易，小小注投資左，之後跌先正式買入。

你保持一邊投資，一邊留部分現金，我相信要6年內買樓，無問題。

華領醫藥（2552）為中國的生物製藥公司，從事開發用於治療２型糖尿病的口服新藥Ｄｏｒｚａｇｌｉａｔｉｎ（又稱ＨＭＳ５５５２）。

佢透過與瑞士跨國醫療公司羅氏（Ｆ﹒　Ｈｏｆｆｍａｎｎ－Ｌａ　Ｒｏｃｈｅ　ＡＧ）訂立有關若干專利及專有技術許可安排，以在世界範圍內糖尿病治療許可領域開發、製造、委託、使用、銷售、要約出售、出口及進口Ｄｏｒｚａｇｌｉａｔｉｎ。

不是話佢無潛力，但仍處於煤銀紙狀態，風險高，要自己衡量是否投資。我只可以話，如投資，不宜大注。

另外，以你的年齡，財富仍有一定的增值力，建議你多增加投資知識，在選股、企業估值、投資時機上落功夫，對你長遠財富有好大影響。

現時大市波動，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q16779：

老師，已透過不同渠道認識老師，同時也經常留意老師出ge po文。

也買了老師的書及睇左老師介紹的書，自己個人的思維都開始轉變左，要多謝老師的無私知識。

我自己34歲，流動現金約10萬，固定儲蓄15萬，有一個唐樓物業單位，手持3手288及1手762。想請教老師，未來應如何部署我希望係40歲可以換到樓及老師幾時會在澳門開班。謝謝。

漏了.我月入24k
謝謝老師

龔成老師：

你的物業可保持持有，然後集中在股票方面的累積與增值，到了股票滾存到一定的數目，就可以到時換樓。

所以，你這刻應集中力量，儲錢、投資股票。

萬洲國際（0288）、中國聯通（0762）質素有的，你可以持有。但你要同時，投資其他優質股，我相信你有6年時間，無問題的。

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先。

盈富（2800）、銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）、希慎（0014）、太古地產（1972）等，你可以了解下這些股票，然後從中選股。

你現時持有一定的現金，已經可以分注買入股票，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

可能9月開澳門班，未定。

------------------------------------------------

Q16780：

老師 想問你點睇1890中國科培 同埋高鑫零售 6808 現價是否過高定屬合理區域 唔該你

想投資一隻增長會好啲嘅股票中短期持有

龔成老師：

中國科培（1890）主要透過結構性合約於中國廣東省肇慶從事提供高等教育服務。佢於廣東省肇慶經營廣東理工學院（前稱：肇慶科技職業技術學院）及肇慶市科技中等職業學校（前稱肇慶科技學校）。

睇翻佢的業務發展，不差的，長遠仍是正面，但就未心是高增長類別。現價在合理區中上部，以投資值博率計，未算好吸引，如投資，這刻小注好了。

高鑫零售（6808），有質素的，但現價有少少貴，投資值博率未夠。

其實兩股都可以長線投資，但這刻在時機上未必最好。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q16741-Q16760）

Q16741：

龔sir 我有野想向你學習。
龔sir 你點睇成功學？

我最近上緊股票班，而且一直睇開理財書，間吾中見到一兩句佳句都想分享一下。有時見到龔sir你po既野都忍吾住分享一下，因為實在太認同。

但最近我有朋友向我反映成功學睇得多會壞腦，價值觀會出現問題，而且好肯定咁講，成功既人一定無睇成功學既野，因為有錢到吾洗做既人一定吾洗睇成功學。

但其實我好多時分享既只不過係一d簡淺既理財知識，佢地話理財書籍都包含成功學，會壞腦。

會吾會係大家年紀20出頭，擁有我要理財既想法太似一個好物質既人？但我一向好慳家，賺埋賺埋好多都係儲蓄同買股票，點解會覺得我好有問題？

我自己係幾吾認同成功既人一定冇睇過成功學，而且我從來都冇諗過發達係成功既唯一標準，我認為達到自己既目標都係成功既一種。

龔sir你身為一位幾成功既人士，你點睇成功學？

龔成老師：

係100年前，大家對成功都是自學，無統一的方法，其後有個作者，用左20年時間，去訪間去500最強的成功人士及有錢人，發現佢地都有一些共通點，於是寫成一本書，叫《思考致富聖經》，而家仲有得賣，你可以睇，而這作者拿破崙．希爾亦成為了成功學的始創人。

有些人，可以自學或憑著本身的特質，去得到成功，但而家，我地已經有野可以跟，點解唔學？點解唔跟？

你想學踩單車，最好的方法是跟一位懂得踩單車的人學，跟專業，最強的人學，這是最好的。

你問身邊人無用的，你問學功人士先有用。

這正如一般人只懂問無錢的人如何致富一樣。這就是我18歲開始，唔會向老師、父母、朋友請教點致富，而是去圖書館睇有錢人的書。

------------------------------------------------

Q16742：

龔sir 你好，我係18歲year 1 學生，一直讀文科，但眼見近日股市大跌

同時受停課影響，多左時間接觸新野，想研究下股市同個人理財，但如果由0開始應該睇龔sir 你邊本書先？仲有

本人現有資金20000，打算投資落股票市場，而父母建議我入滙豐，盈富，港燈，中電，建行呢幾間公司，但20000其實吾多，想問龔sir 有何指教？謝謝

龔成老師：

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股只能小注。

因此，上述的股票，對你來說並不是最適合，唯一適合的，就是盈富（2800），你可以投資。

你可以睇《80後百萬富翁》《股票勝經》。

------------------------------------------------

Q16743：

老師, 我兩夫婦各有一個物業:

大單位 (自住，市值930萬，未供完按揭約350萬)
細單位 (上年買600萬，已出租)

我剛剛以高價賣了自住單位，原因有兩個:

1) 想係疫情與反修例社會運動的不明朗氣氛下，能以高賣低買以補最小的金額更換較大面積的單位或換較優質及新的單位。

(原舊單位差不多30年樓齡，沒有會所，所以管理費很平) ，打算用1-2年租屋住去捕捉呢過機會，而因小朋友返學的地理問題，會選擇名城三期 (較近地鐵站)或大圍地鐵上蓋(兩年後先可以入伙)

i) 買到名城可以自住

ii) 買大圍站上蓋三房可以自住(兩年後才收樓)，但樓價補貼金額可能較名城多150-200萬，會幾吃力, 但潛在升值能力會較高，因買樓花通常會較平宜

iii) 若買大圍站上蓋兩房就當投資或收樓後出租，以後都租樓住。

2) 另一個原因亦可以話係另一抉擇，因社會運動關係，引發出一些社會矛盾影響我對我的小朋友將在香港來的學習及生活的擔憂。

如一家人到澳洲生活及升學，就似乎應該要留現金並在合理區或平宜區將部分買入股票以增值現金流。

老師請比D意見我，因為經常都十五十六, 唔知行邊一步對我我地最好

龔成老師：

我先講方向，香港樓中短期會弱，經濟疫情等因素，香港經濟慢慢會見到更弱的一層，之後會對樓市有影響，令樓市中短期受壓，不過，這只是中短期，同時預佢跌得唔會多，之後當經濟「好翻少少」，樓價就會再向上，因為需求仍是很大。

但如果想在當中以先賣出，之後以較平的價再買翻，難度就較高，你要明白當中的情況。

因此，你的方法不是話不可，但你要面對風險，就是當樓市跌少少，你未買翻，正等佢跌更多時，樓市已向上，你要明白這是要承受的風險。

至於鐵路站上的物業，有質素的，有一定的投資價值。

至於移居等問題，相信你這刻要做的，是努力儲蓄及投資，盡力在這時候提高累積財富的能力，因為你這刻仍未有明確的決定，變數仍存在，因些，這時努力儲蓄是最好的。

------------------------------------------------

Q16744：

成哥，我又有野想請教你喇，感謝你一路以來的指教！
我最近搵到一個優惠，係可以有借最多9萬，免息、免手續費（6個月內要還晒），我想借黎等平價時候買入太古地產2手、比亞迪1手、希慎1手，其他留返唔用，慢慢分6個月還，但男朋友覺得我有啲衝動，你覺得我應唔應該借好？

我而家月入$15390（已扣mpf), 可以草$4000，有$106,000係股票度，暫時無現金係手
我感覺個負債比率好似好高

龔成老師：

免息的借貸，在投資上的確是優勢，例如創造息差，你零息借得資金，投資收息股，就可以賺息差。但最大問題，就是「價格」，如果價格下跌，你賺到息差都無意義。

不過，你6個月內要還錢，其實原理就如同「將你將來6個月儲得的資金，在這刻動用」，但你要分析，這刻市況是否很平。

因此，這動作唔建議在正常時期進行，始終借貸都是有風險。如果市況出現大跌，出現便宜價，好多投資機會時，才動用這方法，暫時就唔需要。

------------------------------------------------

Q16745：

你好 龔成老師

非常之多謝你上次為我解答
最近看到你的財務自由行
令我嘅財富金錢概念完全改變了
不過當中有一啲內容我都係有些唔明白
現在我和未婚夫的金錢、資產分配也有一些不同 我們有共同儲蓄目標

希望可以在30歲之前置業或者租屋住都希望可以財務自由行
衷心希望你可以幫一幫我們
以下是我們的背景資料：

先生25歲
公務員 穩定月入$ 29000
我26歲
瑜伽導師 不穩定月入$11000-$40000
（疫情關係月入只有大概$11,000）
暫時租屋住每月$5600
今年年尾結婚
未來一兩年會生小朋友

財政狀況：
結婚開支約$28萬（暫時大概有$8萬尚未支付）

月供股票：$4000
金沙、盈富
比亞迪（由2020/5月開始）

股票：$39萬（帳面計）
有恒生、領展、盈富基金、比亞迪、瑞聲、太古

現金：已預留8萬結婚支付
余下共$6萬

我有保險投資儲蓄
月供$3900
至少要到50歲以上才可以將筆錢攞返出嚟用

先生有政府儲戶口
月供$2000
現時共有$34000
尼筆錢可以隨時攞返出嚟亦都唔需要收取任何費用，我哋有諗過攞返呢一筆錢出嚟作其他投資

我們二人由畢業至今都是靠自己
我們的家庭都是比較貧困
希望可以擺脫
做到真正的財務自由行

睇過你喺YouTube 分享自己由細到大嘅搵錢經歷
覺得你真係非常之利害
同樣都係沒有家底靠自己 的確令我好佩服
搵錢嘅同時你都要注重健康

明白到人生係要選擇 選擇用多啲時間去搵錢自然會忽略某一些事
祝你無論事業感情人生都非常完美美好

多謝你

龔成老師：

由於結婚是將要發生的事，你應該先預留足夠的資金，要預留比計算多少少的資金，以備不時之需，餘下就可以投資。

至於股票方面，現時持有的都是有質素的股票，可以長線。

月供方面，都是有質素的，基本上無問題，但應該在遲少少，資金較為鬆動時，增加供盈富（2800）的金額。

你地現時25歲，打算30歲置業，這目標好合理，你地最好合共，每月儲到$10000以上，然後穩健投資，到30歲會累積到$100-$150萬，相信要完成置業目標不難。

生小朋友後會令你地的支出，你地都要盡力做到理財，希望保持每月$10000。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。因此，你地這刻可以投資一些平穩增長類+潛力股的股票。

另外，以你的年齡，財富仍有一定的增值力，建議你多增加投資知識，在選股、企業估值、投資時機上落功夫，對你長遠財富有好大影響。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q16746：

老師您好，我工作兩年，現金積蓄大概10萬，最近見到波音公司股價跌得很低，您覺得可以是開始投資的方向嗎？雖然不曾買海外股票，不知如何運作。

想先聽聽您的意見。謝謝呀

龔成老師:

波音公司（NYSE: BA）是美國知名開發、生產和銷售飛機和相關產品公司。近期疫期，令航空相關類股份大跌。

我自己無特別研究美股，比唔倒太多意見你。但這股的風險較高，投資價值只是中等。

找平宜股去投資，再作長線持有，是一個正確方向。但你必先要確認，此股是否只因疫情拖累，令佢中短期變平宜。還是出現左一些變化（可能係企業層面、或者行業上），令佢長線質素變差，所以令股價下跌。

如果你唔係好知點投資美股，其實你可以簡單買入領航標普五百（3140），佢是追蹤標普500指數之表現，可以在港交所買賣，相信是最好及方便的工具。

------------------------------------------------

Q16747：

老師，我已報讀10月份的進階班,

最近 ,亦開始練習早前學到的知識 分析一下175（吉利） , 希望老師可以指教一下.

我已看過 最近三年的年報 .

2017 . 2018 的eps高增長原因大概是 經營50%權益領克合營公司 , 及早前的低油耗購置稅優惠刺激下 帶動了銷售量 .

但我有樣野唔太明白係 2017吉利提早贖回優先票據 ,同埋我發覺佢每年都會 出售一些子公司 我想問 咁樣既舉動係有咩意義?

2019 eps明顯回落 ,而負債亦高左 , 研發電動車的成本亦增加 . 銷售量亦下跌 . 但見到出口既銷售量亦算不錯. 中美貿易戰都對佢有一定既影響 . 但我相知是中短期,佢最近同LG合營研發電池 我相信吉利175都有一定的成長

分析:
平均eps : 1
PE:11-15倍 （已對比同行）
現金流: 唔係好識計 好似好難計咁, 佢今年盈餘 8億. 我計到是57 - 61億左右 .
合理價: $11-15
緩衝:$10-16 （但未考慮疫情對中國冒影響）

唔知咁既正唔正確?
希望老師能指點

另外 想問 659 同 1038 既質素會否改變？ 當有依啲外在因素影響企業盈利下，調整既百分比應該要點做？

謝謝你抽空

龔成老師:

吉利汽車（0175）有質素的，你估值上都接近，我會保守多少少，在你估值上減少多15%。現金流部份，要從經營、投資和融資現金流一個整體咁睇，這部份大致正常。

你見倒佢有時會出售一些附屬公司，其實係一些內部重組動作，主要係想令不同範疇營運更有效率，是正常的。亦都有可能是想增加現金，以提公司作發展之用。

此股現價合理，中短期中國車市唔會強，但長遠來說，這企業有質素，有品牌，基本上是不差的，可分注投資。

新創建集團（0659）有質素的，佢係是新世界發展（0017）的基建及服務旗艦，業務遍及中國內地、香港、澳門。

整體的質素，算是不差，但又未到最高級別。近期的肺炎對佢有一定的影響，相信中短期仍弱，不過長期來說。仍是有投資價值。

現價合理，分注投資可以，但這股不建議太大注。同時要耐心等好轉。

長建（1038）是香港具規模及多元化的上市基建公司，並在國際基建業穩據重要地位。

雖然近期佢跟隨大市回落不少，但這股質素依然存在。但睇翻現時歐洲情況，相信會令佢中短期表現較弱。

要預2年左右先至會開始回勇，此股仍值得長線持有。

10月進階班見！

------------------------------------------------

Q16748：

另有些問題想請老師指教一下，本人是家庭主婦，我倆夫婦年紀都接近40，有兩個小朋友，分別10歲和4歲，先生月入約4.5萬，每月大約可儲$1.5萬，有一個單位（已供完），一個車位（已供完），1/3舖位的業權（已供完），三項加埋約值$1900萬。

問題如下：

1. 我自己有兩份人壽儲蓄保險已經供完了很久，用了十年時間才回了本，現在踏入第十四個年頭才開始有每年大約4.x-5%的回報，想問現在應該繼續持有，還是退保將錢投放落股票市場買收息股好？心水收息股有3988，2388同6823。

還是老師有更穩陣的收息股提議？這筆款項是繼退休金和强積金後，另一份用作支持老年生活的資金，所以想以保本和收息為主。

（因為本人當年買的是大新保險，現已變成泰禾保險，最近泰禾集團又傳出有財困問題，令代銷商暫停其保險銷售。所以擔心將來保險公司倒閉會血本無歸，才萌生退保念頭。）

2. 之前用了大約35萬買入股票，並打算長線持有，老師可否幫忙看一下，以下股票比例是否太分散，還是應該只集中某幾隻股比較好？

11 （300股）買入價$136.6
939 （5000股）$6.66
1928 （1200股）$31.5
12 （2000股）$31.65
1299 （600股）$69.2
823 （700股）$69.5
1211 （1000股）$44
3988 （10000股）$3.9

3. 現有大約$35萬現金可以再投放股票市場，以上股票哪幾隻可以再增持？12，823，2388適合再增持嗎？

4. 想開始月供股票，$10000分配成以下組合可以嗎？

$4000 2800
$2000 66
$2000 2388
$2000 1211

5. 以下股票，如果給老師選擇，二選一，老師會點揀？或有更好的選擇？
11 or 2388
27 or 1928
12 or 1038
1299 or 2318
700 or 9988

6. 老師我應該加按物業或車位套現去買收息股嗎？

7. 請問怎樣可以看到公司的估值？什麼是溢價？每股淨值即是每股的實際價值嗎？ 一隻股平或貴是看每股淨值嗎？是如何計算出來？在哪裏可以看到恆指市盈率?

不好意思！太多問題想請教老師，還望見諒！

老師，不好意思！問漏了一條問題，就是兩小兒子有兩份人壽儲蓄保險，每年約有4.x-5%回報，請問我應該繼續持有還是退保，將資金轉去買收息股或月供股票？待他們長大時用。
萬分感謝

龔成老師:

1） 我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

故以你年紀，應該保持增長力會較好，工行（3988）和香港電訊（6823）這類收息唔適合你。

人壽儲蓄保險已供完，每年又有額外4%至5%回報的話，你可以持有，唔洗退保。而且香港對保險業監管係唔錯，一般都唔易倒閉，政府要求保險公司有一定償付能力充足率，其實香港買保單算係安全。

2） 有少少散，但最大問題係太集中係金融業，而且絕大部份都在銀行股，如工行（3988）、恆生（0011）、建行（939）。咁會有過度集中風險，當行業一出事，你整個組合就會有重大打擊。暫時免強可以，但唔好再加注銀行股住（第4點之月供計劃除外）。

3） 以你年紀恆基（0012）、領長（0823）、金沙（1928）和中銀香港（2388）都可以，但由於你已很多銀行股，故中銀香港暫時唔好直接加注。

4） 這組合可以，中銀香港可照供。

5） 其實佢地質素都好相近，但以增長潛力計，我會選中銀香港（2388）、銀娛（0027）、恆基（0012）、平安（2318）和騰訊（0700）

6） 用這方法去賺息差係可以，但現時股市未到最平宜，有機會"賺息蝕價"。而且往後加息，都會令你息差優勢減少，你要知道這個風險。

7） 公司估值要講在課堂上都要數小時，簡單而言係睇企業質素、行業前景、財務狀況等，去評估出佢大約價值。

"溢價"是指支付的實際金額，超出股票本身價值或面值部份。而"每股淨值"是指每股佔淨資產價值，佢係一個公司價值參考指標，但只係評估價格的其中一部份。

"恆指市盈率"在一般投資相關網站可以找到。

至於你小朋友的人壽保險，你要知道這4%至5%是否保證。另外，我地月供以盈富基金（2800）計，連股息平均年回報約10%，故相信月供一些平穏增長股（如盈富），長線會比保險回報好。

------------------------------------------------

Q16749：

龔成你好，有留意你的意見，現在有點問題想請教你：

我27歲，月入$25000，之前投資10萬股票821，當時見股市跌，就入多10萬，總數20萬，價位0.325。但股價飄忽，現在股票跌至0.270。請問我應該轉去投資其他股票還是繼續持股？

我打算下年結婚，手頭上想預多點資金，怕會蝕晒，請問我應不應該全部賣出然後轉去投資其他穩定股票？

如果應該，20萬想分散投資幾隻相對穩定的股票有推介？

感激指教，實在後悔胡亂投資，令自己處於兩難局面，遲下有時間會報名你的股票班學多點投資知識，一定要打穩信心和基礎，謝謝。

龔成老師︰

滙盈控股（0821）主要從事提供經紀及融資服務；企業融資及其他顧問服務；保險經紀服務；資產管理服務及自營買賣。

此股市值和生意額都唔高，再加上過去幾年，年年虧損。如果有上我堂的同學，一定會知道此股無任何投資價值。你最好全數沽出，轉至其他優質股上。

另外，你下年就結婚，如果那20萬都係預左會用在結婚上，咁就不宜作任何投資，宜較多持有現金。

若言這20萬不在結婚預算中，你可以先用盈富基金（2800）作為你投資目標，佢係包括50間質素不錯上市公司股票的組合，有助你平衡風險。

現時大市在合理區底部，你可以動用沽出滙盈控股的資金之一半，用分注形式去慢慢入貨。

至於其餘資金，我建議你上完我堂，或者到你有一定能力，才買其他股票。

------------------------------------------------

Q16750：

你好，我留意左你專業一段時間，同有睇你既書，老師可以幫我分析下，我現在的情況？

我29歲，收入22200，每月供樓支出13000 保險1100
樓是和家人一起供的

我還有機會達成財務自由？

還有我是澳門的讀者

澳門的房價 租金回報 唔可以抵過還款系未不易投資。
我現在大約有15萬現金

龔成老師：

現時的資金不算多，你要著重之後財富的累積，先有機會做到財務自由，而這刻你物業對你的作用並不算大，保持現時的狀態就得。而你最好每月能儲到$8000以上，即是一年可以儲到$10萬。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先。做月供股票，每月$5000
。

你可以考慮盈富（2800）$2000。

另外再加1、2隻（每隻$1500）：銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）、希慎（0014）、太古地產（1972）等，你可以了解下這些股票，然後從中選股。

如果你不懂股，就集中供盈富$5000。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q16751：

老師你好，我知我問的太遲 我比人騙左買老千股 已經輸左錢 心情好差！點算？

另外，想問下1212利福國際，而家有幾手在手。

龔成老師：

你最重要睇翻企業質素，本身有無業務，之前有無錢賺，上年盈利多少，如果盈利好少，但你用一個好高的價買，就是貴。如果是年年虧損的企業，就更加不宜投資。

至於利福國際（1212）這股有質素的，只是中短期疫情令佢較弱，佢可以守到，但你預中短期股價都會較一般，長遠仍是不差，只要你持貨不是過量就無問題。

------------------------------------------------

Q16752：

你好老師，正睇緊你既財務自由行，第六個章節 「...買入時時機...」正正就係依加；但我係投資新手

如果手頭上預20萬係股票市場上，你會認為依加最值得入手既係邊幾隻？

心急想問下你係因為..怕我睇哂你既書後，依段咁值得入手既時期就過了。感謝你，希望得到你既回覆。

龔成老師：

你預現時大市的估值，在合理區的底部，你買入股票可以，但就要同時留有現金。

由於你是新手，暫時只建議你動用$8萬入市，你可以分注投資有質素的股票，長線持有，如果不懂選股，就投資盈富（2800）。

另外，現時你都可以考慮太古地產（1972）、金沙（1928）都有值博率的。

另外，建議你多增加投資知識，在選股、企業估值、投資時機上落功夫，對你長遠財富有好大影響。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q16753：

阿sir 80萬富翁你講溝貨係錯誤觀念，而分段吸納就係唔會超出預算。

咁我想問月供都好似等同溝貨，兩者有咩分別？

龔成老師：

你其實已講出了重點：「預算」。

月供股票是一個長期策略，例如你打算每月供金沙（1928）$2000，這投了你每月可儲蓄資金的10%，你就要分析，在長遠的財富組合上，這股票應該佔你多少？

你應該預早「設定」好該股的比例，又或投入資金的上限，這就是策略。

而溝貨，第一，散戶不理企業質素，第二，這是比原本打算投入的資金更多，並沒有「策略」。

這就是兩者的分別。

------------------------------------------------

Q16754：

請14同12邊隻比較好，兩隻咩價位是便宜

老師另外我現在已有股票是1211，14，1972、823，3918，1113，1212各小小注

請問這個組合會不會唔好？

龔成老師：

兩隻都有質素，現價都有投資值博率，恆基（0012）會比較平衡。你預跌多5%-10%開始平。

至於你持有的組合，無問題，長期持有就得，你可以加入盈富（2800）以平衡組合風險。但要留意股市上落較大，要同時留有現金。

------------------------------------------------

Q16755：

龔Sir 你好
背景：27歲 月入17000 月存9000

其實到底是不斷買入比較平 跌得多的舊經濟股好（如12，27，1211，14，2388），還是買入超貴但未來三年確定性高的消費、物管、新經濟、電商果類比較好？

（如安踏、李宁、飛鶴、雅生活、碧桂園服務、中海物業、ATM三個電商巨頭）

因為我發現即使我平價買入這些舊經濟股，未來市場資金不怎流入果d股份，只會越買越跌。即使五年後價值修復， 回報也不會太高，主要變作收息用，但當中的機會成本就大。

反觀強勢板塊之所以強是因為對未來行業增加的確定性，未來滯脹對其影響輕微，即使進一步惡化到通縮，也不像舊經濟公司咁容易倒閉。

1. 如果以價值投資的方式，很有可能全倉都是舊經濟股（平，有折讓，有一定質素），而不會買到新經濟類（貴，有溢價，對未來期望大），按這一邏輯，是不可能買到像騰訊或舜禹光學果類超級大牛股，因為他一直成長過來都必定是高溢價，老師怎解決這問題？

2. 我月供的都是有質素的舊經濟股，到現在還是虧損，近期買入很多新經濟類股，最終追平虧損，我是續繼買入更多新經濟貴股，還是貧平買入舊經濟股好？

3.因為失本金小，舊經濟股的派息也就total千幾到幾千，倒不如買高成長股好？

龔成老師：

1）其實最重要睇長遠的企業質素、前景。

如果是舊經濟股，只要是有質素的，長遠都不會差，但本身的增長力不算強，所以得到的回報是平穩，不會太高。

至於新經濟股，表面上回報好好，但最後的情況，仍要睇佢的業務真實面，這刻市場以「預期」模式去睇這些新經濟股，如果過幾年，佢地的業務不如預期般高增長，股價會大跌，這反而會出現虧損。

所以，說到尾都是分析企業長遠的業務發展，基本因素，市場會自然地因為佢到時的情況而進行估值調整。

2）你應該建立一個平衡的組合。同時，如果你持有的是有質素的股票，就唔需要太擔心中短期股價。

3）當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

------------------------------------------------

Q16756：

你好 我想問下 你既股票賣出時機係咩 因為我想知道 長期持有係升幾多先會賣出 唔該你

龔成老師：

賣出不是建基於「賺多少」。

當股價遠超過企業的價值時，可以考慮賣出，但如果是優質股，則只會賣出部分。

另外，當大市過熱時，同樣可以賣出。

原則上，優質股可以一直持有，但當見到價格比價值明顯高時，就有可能進行賣出這動作。

------------------------------------------------

Q16757：

龔老師你好，小姓賀，今年35歲，一家三口，無生活及工作壓力。本人從未有投資股票經驗，近日心血來潮，在唔影響現實生活情況下，決定用上限15萬作為投資股票市場，當交學費及累積經驗。

一口氣買入以下股票：

0145 日清 1手@6.21
0939 建行1手@6.19
0005 匯豐1手@39.00
2313 申洲國際 1手@92.50

買完後餘下10萬本金可投資，想5萬作長線，5萬作短線，分別有什麼建議嗎？

謝謝回復，不勝感激。

龔成老師：

首先，唔建議短炒，因為這根本無法賺錢。

至於上述股票，本質不算差，但你一次過用資金在同一時段內買入，就會有價格風險。另外留意翻，唔好太集中在同一行業，你要建立一個平衡的組合。

餘下的資金，你可以投資盈富（2800），我相信會比較適合你，但就唔好太心急入，要慢慢用資金，將買入價平均，減少買入價風險。

另外，以你的年齡，財富仍有一定的增值力，建議你多增加投資知識，在選股、企業估值、投資時機上落功夫，對你長遠財富有好大影響。

現時大市波動，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q16758：

Halo 龔SIR 大半年前已經留意開你分享一啲投資心得，多謝你無私既分享同鼓勵。小弟對投資仍探索緊，有問題想請教你

1.大約1年前至今，小弟抱住銀行股實無死既心態分別買左2888 @4手
3988 @16手

問題 點睇2888，會吾會回到六七水位？另外3988都你推薦一隻優質股之一啦，你建吾建議我以月供股增持？

2.另外小弟可以用$6000作月供，所以都有參考你既建議今個月都開始月供3000盈富,1000比亞迪，餘下$2000有咩建議？

P.S.小弟26歲 月入$13-14k 手頭上有40k流動資金 目標30歲左右有100萬

Thank your:)

龔成老師：

1）銀行股的賺錢能力不及過往年代，因此並不是值得大手投資的類別，最多只能在組合中作一小部分的配置。另外，你太集中在同一行業，因此會出現行業集中風險。

所以，未繠值得再增持。

2）你可以月供盈富（2800）$3000、恆基（0012）$2000、比亞迪（1211）$1000。

現時你的現金，暫時應持有，唔好心急動用，等大市再大跌時才出手。

以你的年齡，財富仍有一定的增值力，建議你多增加投資知識，在選股、企業估值、投資時機上落功夫，對你長遠財富有好大影響。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q16759：

老師您好，想請問您對302 中手遊的看法？

該股最近股價持續探底，但其實產業前景看好，加上第一季中國疫情應該有利手遊股，可否給點意見？

我在2.49買入10手合計2萬股，今天股價盤中一度跌破新低價2.38，有點緊張呢，謝謝

龔成老師：

中手游（0302）主要於中國從事手遊發行及遊戲開發業務。佢提供多種類型的手遊，包括ＣＣＧ（可收集卡牌遊戲）、ＲＰＧ（角色扮演遊戲）、ＭＭＯＲＰＧ（大型
多人網絡角色扮演遊戲）、ＳＬＧ（模擬遊戲）等。

過往生意不差，有持續的生意與盈利增長，財務數據初步正面。

不過，上市年期不算長，這會令財務數據代表性較低，同時，行業業務波動，不確定性大，都令這股造成風險。這股如果你投資不過多，持有無問題，始終不是無質素。

------------------------------------------------

Q16760：

成哥您好
我今年26 每月供2萬落盈富（2800）到我30既時侯拎反出黎 4年後大概會有幾多增長？

因為我身邊都好多朋友有買2800
見股價都唔會大上大落 應該都幾穩陣

定係得我儲到大概100萬再大手入貨？
但現在24.650 算唔算高位？
其實所為既派息係如何計算？

假如我大手入貨 2800 買左100萬 大概81手 40500股
睇反最近派息係 0.7800

如何計算我收到幾多股息？
謝謝成哥

龔成老師：

盈富（2800）是一個組合，因此對大部分來說，都是一個不差的選擇。比起大手一次過買，你月供會較好，因為可以將買入價平均，減少風險。

所以，你保持現時的月供就得，但比較好的做法，是一邊月供，同時留到一些現金。

如果每月投資$20000，你預4年後會滾存到$120萬-$140萬。

佢每半年都會派一次息，以「每單位計」，所以，到時要睇你持有多少個單位，乘以每單位所分派的股息就得。如果你上述的假設，就會收息40500股X0.78=$31000。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。