你相信小米的聲明嗎？

驚！這款下載超過1000萬次的App，竟然從「正常」變成「惡意軟體」了？😱 #QRCode #Android #惡意App

詳情：www.nmplus.hk/768037
【#科技控】有安裝過嘅記得要即剷！
#新Monday #android #qr #barcode #apk #google #playstore #NM_odin

多出戶外工作，又成日用手提電腦上網做嘢嘅朋友，相信對於 Pocket Wi-Fi 都唔會陌生。隨住香港推出 5G 服務，華為就推出咗呢款 E6878 5G Mobile WiFi Pro。今日就同大家做個開箱！

打開箱，就見到呢部 5G Mobile Wi-Fi Pro 嘅真身，Size 比想像中大，配件方面，除咗說明書，亦都包括咗一個支援快充嘅充電插頭，同埋一條傳統大頭去 USB-C 嘅充電線。

講返部機嘅大細喇，拍埋同牌子上幾代嘅 Pocket Wi-Fi 比較，呢部支援 5G 嘅 Wi-Fi 蛋的確大咗好多，只係細過旁邊部 iPhone Pro Max 11 少少。不過再睇睇數據，新機內置咗 8000mAh 嘅電量，比以前只有千幾到三千左右嘅電量明顯加大咗好多，咁唯有喺大細上面作出啲犧牲。

呢部機嘅 SIM 卡位係喺機身嘅側邊，使用 Nano-SIM，不過就唔使用針拮，只要揭開個蓋，將 SIM 卡推入去就得喇。要換卡亦都係推一推，張卡就會彈出來。華為上一代嘅 Pocket Wi-Fi 都仲係用緊 Mini SIM 大卡 同埋 Micro SIM 中卡，今次支援 Nano-SIM 相對就方便好多，唔洗再用卡套或者怕張卡「卡」住喺卡槽入面。

盒上面有張貼紙，係部機嘅預設 Wi-Fi 資料，搵手機駁好咗之後，可以用瀏覽器打指定嘅 IP 地址，或者下載 華為智能家居 呢個手機應用程式操作。不過未睇呢個介面之前，不如先試吓呢個 5G 嘅 Wi-Fi 連線先。

正如網頁所講，以 Wi-Fi 接駁呢部 5G Mobile WiFi Pro，最高嘅速度只係支援 867mbps，要去盡呢隻 Wi-Fi 蛋嘅最高理論下載速度 1.65Gbps，就一定要透過 Type-C 線連線先得！不過香港嘅 5G 網速喺大部份情況之下都去唔到咁快，大家都唔使咁介意。

介紹吓個介面，基本上一般路由器嘅功能都可以喺 App 入面搵到，Wi-Fi 設定亦都好簡單。可能因為我手上呢部係行貨嘅關係，當我放本地嘅 SIM 卡落去之後，都可以自動設定啱用嘅 APN，唔使再手動設定先至上到網咁麻煩，對於唔熟手嘅朋友嚟講，就更加方便喇。

部機本身亦都配置咗一個單色嘅 Mon，雖然唔係 Touch Screen，但係都可以透過機身側邊嘅兩個掣操作常用嘅功能，最特別嘅就係可以顯示一個連接嘅 QR code，無論你用緊 iPhone，定係 Android 手機，只要嘟一嘟，就可以馬上連線，唔使手動輸入密碼咁麻煩！

8000mAh 嘅電量，亦都可以充當行動電源嘅功能！唔好以為只係支援有線嘅反向快充，呢部華為 E6878 5G Mobile Wi-Fi Pro，連反向無線快充都一樣得㗎 ！之後就唔駛特登帶多嚿電出街啦！

唯一要留意嘅係，根據官方網頁嘅資料，呢隻 Wi-Fi 蛋嘅 5G 頻段，喺香港只係支援 N77 同埋 N78，電訊商有可能喺未來將現有嘅 4G 低頻段改為 5G 使用，呢機就配合唔到喇！

《Z世代達人》
麥卓華

#E6878-370 #香港5G #E6878

之前同大家介紹過剛發佈嘅三星 Galaxy Note9 手機，雖然仲未在市面推出，但今日我就拎到部實機玩下，即刻同大家分享！

其實Galaxy Note9 同 Note8 拎上手嘅手感差唔多，如果同 iPhone X 比較，Note9 就明顯大部好多。部機嘅操作好暢順，用內置嘅瀏覽器上網，好快就可以打開到相關嘅網頁，之後試吓播片，效果暢順，作為旗艦級手機絕對稱職。試埋個影相Apps，對焦快，曝光亦唔差，絕對合格。

之後試吓今次重新設計嘅 S-Pen喇。我在筆記模式用呢支新S-Pen寫過，效果比上一代流暢，而由呢代嘅S-Pen起，預設喺手機寫出嚟嘅顏色將會對應返支筆嘅顏色，雖然好似冇乜實際嘅用途，不過都算係一個花巧嘅更新啦！另外今次呢支S-Pen內置藍牙，可以當自拍遙控用添！

另外，我亦都試咗近年三星旗艦手機另一賣點 - Dex桌面模式。今次我係透過 Dex Pad 連接手機及顯示器，配合一個普通嘅藍牙鍵盤。可以睇到桌面模式有啲似Windows嘅桌面，試吓用瀏覽器開我哋嘅網頁，的確會出現桌面版，我亦都試過開手機內置嘅 Office應用程式，見到嘅都係熟悉嘅桌面版本畫面。不過要享受到呢個桌面模式，相關嘅流動應用程式就要事先支援桌面模式，如果唔係就會出現走位嘅情況。

同場我都有試下將會推出嘅Galaxy Watch 46mm 版本。系統方面都係使用三星之家嘅Tizen，外型同功能都同上一代差唔多，試吓拼埋我手上面隻Gshock睇下，視覺上都有嗰種粗豪咁，不過可能係錶帶配色嘅問題，點睇都冇上一代咁靚，不過相信消費者希望嘅係功能上面嘅突破，又即管睇下Galaxy Watch推出後仲會唔會有突破性嘅軟件更新！

《Z世代達人》
麥卓華

最新嘅科技資料、潮流玩意，都有《Z世代達人》麥卓華到處搜羅送到你面前！

Google呢個名，相信大家都唔會陌生，唔理你係用緊iOS平台定Android平台既智能手機，其實背後唔多唔少都係用Google幫手做後盾。不過，你又知唔知道，生活上好多野，原來Google都幫到手呢？

即Check 匯率
有時上網買野，又或者去左旅行，想睇下當地貨幣兌港紙即係幾錢既時侯，原來可以乜野App都唔駛裝，開個瀏覽器就ok！譬如輸入 10000 yen to hkd，好快就見到即時匯率嘅中間價出咗嚟。原來連 safari 都得，因為Safari都係設定用Google做預設搜尋器，譬如我打 500 sgd to hkd，就會見到即時新加坡元兌港元既匯率喇。

有乜航班可以飛
Google一樣可以幫你計劃下一個旅程架！有時你突然之間想去一個地方，又唔知道有啲乜嘢航班可以搭，打開瀏覽器再輸入出發地同目的地就得㗎啦！譬如我打 HKG to SIN，即係香港去新加坡，你就會見到Google會搵晒所有航班出來。有時當你計劃行程嘅時候，目的地同出發地都係你唔熟悉嘅地方，好似一啲歐洲內陸或者美加嘅短程航班，呢個功能就大派用長啦。

天氣
Google一樣可以幫你做天氣先生個喎！如果你依家想知道澳洲何巴特嘅天氣，只要打 weather hobart，就會即刻走出嚟㗎啦。試多個呀！大阪天氣又點？打weather osaka，搞掂！

唔講唔知，快遞件一打即Check
頭先講嗰幾個功能，可能有啲朋友都已經知道啦。不過你又知唔知原來Google可以幫你追蹤快遞文件同包裹呢？有時釘咗野，收到個Tracking No.，通常都要上返各大速遞公司嘅網頁再慢慢按入去先至可以輸入個Tracking No. 有時你連邊間速遞公司都唔知，得個號碼咁點算呢？原來只要你輸入呢個號碼， Google就幫你搵埋係邊間公司同埋搵埋條link俾你，一按就睇晒份件既下落喇！

《Z世代達人》
主持：麥卓華