［嬲豬些牙系列之黑頭終結粉刺拔膜組］

網上啲舖頭對由我的心機出品《黑頭終結粉刺拔膜組》嘅評價，基本上十篇有十一篇都講到佢好似由神創造咁！適逢老子較早前去咗台北玩樂，當然要入手返一盒一試究竟啦！

雖然佢cheap cheap地圍返港紙大約五草嘢，但配套都比想像中認真！除咗有個樣大到big爆包裝嘅Ella，入面有3支嘢進行黑頭三步曲。第一支係深層毛孔軟化水，吱落有黑頭地方按摩兩分鐘；第二支係活性炭粉刺拔除黑面膜，留意返，唔可以搽得太薄！太薄冇料到之餘仲會扯痛皮膚！第三支係淨化調理毛孔緊緻露，即係搞大完你毛孔又跟手令佢收緊返！

頭先我提過啦，Step 2真係不能薄敷，事關我第一次就係因為咁而中伏！搣走個鼻膜果陣真心有啲痛！經一事就梗係蔡一智，第二次我搽返厚些少，佢話就話15-20分鐘就乾，但老子等咗半粒鐘都仲係半乾濕狀態...... 最後足足要九個字先乾晒！個心一路安慰自己唔緊要啦，可能好work呢！到搣出嚟...... 我唔講！你自己睇！黑頭依舊離不開鼻頭，拔出嘅只有少量粉刺同大量面毛！嗯嗯，可能我平時勤力底，唔夠污糟啫，搽返緊緻露算9數啦！我都比咗一晚時間佢架，可惜到第二朝毛孔都仲係冇收細返，鼻頭仲勁多油...... 我都好樂觀，開返盒Miracle-S緊致返毛孔就算，不過就肯肯定唔會再用第三次囉！所以，若然你好似老子咁平時做足深層清潔，對收毛孔同補濕又好有要求的話，你當慳返呢幾十蚊買杯靚靚雪糕呃like好過啦！

公道講句，如果你平時懶如毒L，對毛孔大細好睇得開，深層清潔一個月都未必做一次的話，以一舊水都唔洗嘅價位，呢盒《黑頭終結粉刺拔膜組》你一定會覺得好好用，塊鼻膜啲黑頭應該密晒lone添！不過，以鼻膜嚟講，等大半粒鐘嚟講，收唔返毛孔嚟講，我用返普通deep clean mask唔好？！