我個仔係蟄居族（上） . 我擁有一個幸福嘅人生，所有親戚、朋友、鄰居，都係咁樣諗。 . 我有一個正直而愛我嘅老公，佢係一個好高級嘅公務員，就嚟退休，退休金都成千萬。 . 我有一個孝順嘅女，佢已經結咗婚，亦有自己嘅事業，個個星期都會返嚟陪我哋食飯。 . ， 大家都話，等我老公正式退休，我哋拎住一大筆錢，可以去環遊世界，可以點樣享受生活…… . 但我知道，我邊度都去唔到。 . 因為我仲有一個仔，佢叫阿英，今年四十歲，冇拍拖，冇返工，甚至……冇出門口。 . 我都講唔清楚，佢有幾耐冇出過門口，總之鄰居都唔知我有個仔，以為我得一個女。 . ， 阿英讀中學嗰陣，俾同學欺凌。 . 唔知幾時開始，阿英會打我，會拎菜刀嚇我，好似想將佢喺學校承受嘅苦難，都報復喺我身上。 . 我可以點做？我冇可能報警拉我個仔，亦唔夠佢打，只可以喺俾佢打到頂唔順嘅時候，打電話叫老公嚟救我。 . 然後，返緊工嘅老公匆匆趕番嚟，將阿英制服，再鬧佢一餐，然後……等待佢下一次再打我。 . ， 好彩，畢業後，阿英搬咗出去住。 . 佢做過幾份工，但冇一份做得長，佢話人哋睇唔起佢，唔識欣賞佢。 . 唔返工就冇錢賺，阿英唯有問老公攞錢：「冇錢交租啦！」 . 聽到呢句說話，我悚然一驚，如果阿英交唔起租，佢就會搬番嚟住，又會開始打我。 . 我咁樣講：「畀佢啦，佢始終係我哋個仔。」 . ， 從此之後，我哋一個月畀阿英兩萬蚊生活費。 . 跟住我覺得，父愛可以比母愛更偉大。 . 至少，我對呢個「一唔順心就打人」嘅仔，已經充滿恐懼同無奈。 . 而老公一放假，就去阿英屋企，幫佢執屋、帶佢出街食飯，仲想帶佢見心理醫生，不過阿英唔肯。 . 儘量老公有時返到屋企，臉上會有傷痕，但佢下次都會去搵阿英。 . ， 我以為呢種生活會持續一世，我以為只要唔去搵個仔，我就可以享受我嘅幸福家庭。 . 直到有一日，我收到阿英嘅電話：「阿媽，我聽日搬番嚟。」 . 我隻手震晒，成個電話跌咗落地，當年俾阿英用菜刀逼到角落，不斷打冷震嘅恐懼，再次湧上心頭。 . ， 我無助地望向老公，想尋求少少安慰：「阿英……阿英有改過㗎可？」 . 老公冇答我嘅問題，只係話：「阿英始終係我哋個仔，唔通唔俾佢返屋企咩？」 . 我個心好似坐咗跳樓機咁向下沉，我已經知道答案，阿英仍然會繼續打我。 . 但我冇辦法拒絕，阿英知道我哋住邊，老公仲要係公務員，如果阿英去政府搞事，老公顏面盡失之餘，照樣要俾阿英返嚟。 . ， 之後嘅事，完全喺我意料之中。 . 阿英搬番嚟，日日喺房打機，對我哋呼呼喝喝。 . 我喺網上睇到，呢種人叫做「蟄居族」，唔返工、唔同外人交往，逃避社會，從心底抗拒人群。 . 不過「蟄居族」唔一定有暴力傾向，唉，我已經冇奢望阿英變番正常人，只係想佢唔打人。 . 我唯有小心翼翼咁做人，連呼吸都唔敢太大聲，希望阿英唔好注意到我嘅存在。 . ， 但人生有一樣嘢叫做「命運」，命運，唔係你低調就可以避過。 . 阿英嫌我煮嘅飯菜唔夠好味，鬧咗兩句，拳頭就狠狠窩落我個肚度。 . 我個腦一片空白，即刻呼救：「老公！」 . 然後，我嘅老公，嗰個發過誓會一生一世保護我嘅男人，毫不猶豫地衝埋嚟，推開阿英。 . 推唔開。 . ， 阿英反手捉住老公嘅衫領，將老公個頭撞落牆度，再撞落門度。 . 老公就好似一隻爛咗嘅公仔，俾阿英舞嚟舞去，肆意折磨。 . 我忽然意識到，我老公，老啦。 . 儘管佢想保護我嘅心從來冇變過，但體力嘅差距，已經注定佢唔係阿英嘅對手。 . 待續... . #短故 #短篇 #小說 #陳美濤 #廣東話 #粵語 #tomatochan #我個仔係蟄居族

就咁嘅 經歷咗好震撼嘅兩日 首先 尋日 3pm到6pm短短3個鐘 好開心 因為滿客人同埋做埋居民外賣 一個人喺店裡面 我完全感受到 開呢間店 真正意義係咩 就係比我自己好好學習管理自己嘅人生 做返個有返少少條理嘅人 廚房最後好似打完仗 因為我準備做得唔好 整整下唔見呢樣唔見嗰樣 最後我覺得我人生好累 好累於人生8成時間不停咁搵嘢 但係其實我做好少少準備條理啲 過程都可以好順利 所以經過星期六我決定夜晚同第二日早起身重新執過個廚房 計畫趕唔上變化 呢晚有朋友黎探我 人生第一次見住一個女仔 好似以前打長途電話咁每10秒一蚊咁 佢每10秒嘔一次 嘔到 有人問我長洲有無醫院 有無急症 見過大場面嘅姨姨我都嚇親了 我都用我餘下意志去拎張床行出黎比佢訓訓 完成任務然後姨姨都起唔返身了 第二日 啊姨我雖然唔嘔 但係眼前嘅畫面fing足整整一日 而呢位妹妹真係妹妹 下午已經恢復體力 不過話唔好再提個酒字 同埋佢嘔到今朝8點嘅時候 好擔心同佢朋友講佢覺得自己會以後都咁樣嘔落去唔會好返 而佢都足足嘔咗8個小時 一個working hour 都一組拍攝嘅時間 好努力 好誇張 而呢個教訓 都震撼到我提醒自己千祈唔好有呢一日 好 恐 怖 然後今日 我用我最後意志力 fing住洗咗起碼一個小時碗碟 都仲有呢一排杯等緊我去洗 所以第三個震撼 係開舖以來 我覺得洗手盤好似一個黑洞 入咗去就出唔返黎 永遠有洗唔完嘅碗碟 今日我呢個垃圾最後係廚房無執店無開 對唔住所有入咗黎然後只可以同一個嚴重hangover個頭凌亂不堪嘅醉婦喺門口打卡 超級多謝你地體諒 最後 鄰居叔叔們吃過我整嘅雞雜 從此每次見到我都會問幾時有雞雜 我每次都話下次 因為有時候未必有貨 又未必自己可以做到而唔浪費啲食材 原本我好肯定語氣應承咗今日一定整比佢 佢今日 真係好堅持喺我閘嘅門嚹伸個頭入黎 「有無雞雜？」 因為應該已經有兩個禮拜 今日我答佢無嘅時候 我見到叔叔好失望嘅表情 我個心好似比刀捅咗一下 我好似做咗一個欺騙男人心嘅壞女人 所以無論如何 我聽日一定一定會班到啲雞雜返黎 而關於酒精 真係酒精害人 我2021年目標係只可以1個月比自己1次機會hangover 完 無喇 一個月一次 一個月一次 no more shot shot shot shot shot no @oneday.since.autumn 🌻

[gfmurmur9471] 仲記得小學嗰陣大家好中意喺到講話中意呢個中意嗰個，一年轉三四個「意中人」，諗返起都幾搞笑。我從來都唔知真正中意一個人嘅感覺係點，直到中三。 中三嗰陣，「佢」教咗我半年會計。係呀，係你哋可能會覺得好低能嘅嘢，「佢」係老師，但請你留言叫我醒吓之前睇埋先。一開始，我對佢係完全冇感覺，第一堂我仲同隔嚟個同學喺本筆記到畫佢個樣喺到傾計，比佢叫我哋兩個收聲。半年嚟我上親堂就瞓覺，次次都係佢敲我枱我先醒，我仲覺得佢好煩。所以我一直會計成績都只係啱啱好合格，從來冇諗過揀科揀會計。 唔知點解，嗰半年完咗考完試，我突然覺得呢個教咗十幾年書三十幾歲嘅大叔靚仔。嗰陣時開始我已經好有自知之明，好似大家咁，我成日同自己講：「超，大把女仔都話自己中意過老師㗎啦，過兩年咪又係唔記得咗人」何況我知自己係睇中佢個樣先(佢係睇起嚟好後生幾靚仔)對佢就好似追星嘅感覺咁，佢喺學校都有啲女fans，所以冇特別留意。但係慢慢發現我開始成日諗住佢，一見到佢就會怕醜一秒面紅(我平時係粗魯到死喺學校都算幾活躍嗰啲人嚟)，就連學校Christmas party揾佢影相都要揾同學拉我去。嗰時我一直唔肯認，亦都唔信自己係「中意咗」佢，覺得冇可能，覺得我對佢似追星多啲，下年就會唔記得咗佢。去到中三尾揀科，我想讀嘅EngLit同music我學校都冇得讀，苦惱緊嘅時候我突然諗起佢(佢係嗰時全校唯一一個會計老師)，我就求求其其揀咗科會計。 唔知個天係有心玩我定點，去到中四偏偏就殺咗個本身教其他科嘅老師出嚟教我地嗰屆會計。失望嘅我開始變本加厲，用盡一切辦法去見佢；係離遠望嗰隻見，畢竟我唔慣同人自來熟。我會記哂佢所有當值時間地點，有咩時候會嚟我地嗰層，幾點返到學校幾點收工，平時成日遲到嘅我會因為佢早半個鐘返學，只係為咗見佢一面。啲同學都笑我好變態，咁樣跟蹤人地，我自己都覺得係，但係我真係無時無刻都好想見佢先咁樣。 慢慢我開始識咗佢教嗰班師兄姐，佢哋同我講佢教書都唔係好得去邊，相比起好嘅老師，佢係自私嗰type(呢個係我自己理解)，我都成日見到佢同班高層一齊，我同大家一樣都覺得佢好世界仔，啲師姐話佢做班主任從來都冇開心過，甚至個mean爆數學miss都好過佢多多聲。但係我對佢嘅感覺都冇變過。 去到學期中至尾，佢宣布要結婚。老實講我一早就預咗呢日會嚟，我都真心祝福佢，只要佢開心我點都冇所謂。加上2019年嘅呢段時間大家都知發生咩事，我開始全身投入比自己更加重要嘅事，講真我關心呢個社會多過關心自己。呢段時間我一直衝，都諗住咁樣就會冇時間去諗佢。 點知去到後尾，我開始確定個天係有心玩我。佢結婚對象係我一個好中意嘅老師，佢婚禮就係我生日正日。我突然發現自己其實接受唔到，我知道嗰刻喊咗好耐，我從來都唔係眼淺嘅人，但的確自從嗰次開始我就好容易喊。 喊乜嘢？有咩好喊？你都預咗㗎啦？你有咩資格喊？人地連你係邊個都只係記得個名，唔好咁白痴得唔得？我同自己咁講。去到最後，我都係喺我生日嗰日同同學去咗佢婚禮(女miss有教過我)，就當係對佢最後嘅祝福。 由嗰日起，我就開始唔想慶祝自己生日。結果我16歲嘅生日朋友屋企人嘅慶祝我都推哂，問我做咩我就用社會事件搞到冇嘢值得慶祝做理由。我開始覺得自己好賤，雖然我乜都冇做嘢都冇同佢講多句，但我中意咗一個有老婆嘅人，對佢有唔應該有嘅幻想。 直到而家，我同你已經唔喺同一個地方啦。你有你嘅生活我有我嘅忙碌；你為你嘅家庭拼搏我繼續為我嘅未來埋頭苦幹。呢個世界冇話冇咗邊個唔得。啱啱喺寫呢篇嘢之前見到佢個女啱啱出咗世，佢笑得好開心，即使我個心好似比刀插咁痛，我都真心好為佢開心。 預咗嘅事逐一實現，我想唔想見到都阻止唔到。希望我只係常見嘅少女心，希望一段時間後我會放得低你，希望三五十年後我對你呢段感情會成為往事。感謝你教識咗我愛一個人嘅感覺，但願未來日子一切安好，衷心祝福。 給已成過客的你 ———𝐂𝐨𝐮𝐩𝐥𝐞.𝐦𝐮𝐫𝐦𝐮𝐫——— ♡投稿請按 @couple.murmur IG主頁鏈結! #hongkong #couple #lovestory #hkig