[gfmurmur9455] 先交代下背景先，小妹前排向男朋友（下文稱之為A）提出分手，結束咗差唔多一年嘅感情。我地一齊嘅時候係抗爭打仗時，我當時患上抑鬱、離家出走等，生活無依無靠。A當時照顧我同保護我，所以我地好快就一齊咗，原因係我覺得終於搵到個人可以依靠。拍拖前到拍拖中期佢一直無返工，靠朋友俾錢同埋我嘅獎學金，有時候依賴飯卷過生活。另外都已經計畫去澳洲升學 後來嘅日子我同屋企人關係一直好差，所以有段時間我仲同佢同居，當下嘅感受係有人可以俾我任意妄為，俾我自由，做乜嘢都得。但係因為咁佢嘅所有時間都係對著我，甚至社交圈子就係除咗我之外就係零。我就係所有，聽落去浪漫，實際上其實毫無益處。正常社交圈子唔應該只係得一個人，我甚至懷疑因為咁，佢成為咗一個恐怖情人。（下文會講） 佢成日同我講佢想做社工幫人，我鍾意有目標有理想嘅人，所以我當時真係愛都難以自拔。後來佢仲quit咗ive，走去明愛重生開始讀。即使浪費咗一年時間同埋錢，我都唔介意，因為我支持追夢。 但後來佢同我講話唔想做社工。我當刻真係黑人問號，夢想係話放棄就放棄？然後同我講話想開cafe同埋佢鍾意沖咖啡。有次我就問A點解唔搵咖啡師嘅工做下，A話佢以前做過同埋佢只係想開cafe，自己唔需要落手落腳沖。我再次黑人問號，如果依個係你興趣，你點會咁樣講得出。 情侶嗌交好正常，有次A無端端對我發脾氣然後我嬲9佢，佢即刻道歉講對唔住，但係我氣無咁快消，之後佢就上咗黎我屋企門口跪喺度磕頭。無錯，係磕頭，仲磕都有血。我屋企人唔鍾意佢，但係我唯有可以叫佢入我間房費事尷尬，最後要呵一輪先無事。類似事件有好多，有次又嗌交，我提出分手，佢直接半夜三更搭車黎我屋企樓下，話唔原諒佢就唔會返屋企。 我有朋友同佢傾過計，講過話佢唔成熟，我同A講過話唔成熟，但係佢只係覺得每個人對成熟定義不一，佢就自我感覺良好覺得自己好L成熟。我一直都覺得佢唔成熟但係真係講唔出成熟嘅定義，直到分手後先有咗靈感。佢往往唔會有為一個目標落實一個長遠而可行嘅達到方法。例如開cafe，因為我會移民，佢話到時候會跟我佢嗰度之後開cafe，但係實際上嘅達到方法係無考慮過。佢覺得係一件好容易嘅事，甚至喺佢口中嘅機票錢都係佢好容易就可以草到返黎。我話我要出國升學所以longd，佢覺得無困難，因為機票錢好平可以隨時飛黎搵我。同埋我地既經濟狀況都好差，我都有出去揾工做，有次有份工想請我，咁我同佢講話有工返之後，佢竟然打去間野到要人請埋佢，最後人地唔請佢不特只仲要唔請我，嗰份係講緊我揾咗三個月工唯一一份要我既工。嗰下真係呆咗，我啲朋友聽完之後都呆哂，完全唔知講咩好。 佢口中嘅草錢就係好容易，但係回歸現實，佢喺我地拍拖後期先開始搵到工返，但係依然唔能夠應付自己生活所需，甚至連車錢都要朋友出糧俾佢，佢嘅銀行存款長期個位數，甚至有段日子係依賴我贏返黎嘅獎學金兩個人過活。佢應該係高估自己嘅能力。另外為迎接未來一起出國生活嘅日子同埋佢想學日文，我叫佢學下英文，仲同佢分享一啲我學日文嘅心得。結果：英文係無學，日文就完全無同我講，所以佢自學幾個月依然背唔到五十音。永遠都係高估自己能力，覺得只要佢想做就會做到。 其實我分手當刻完全無討厭佢，只不過係覺得自己值得更好，始終喺拍拖嘅事件加深認識，發現佢嘅唔成熟同埋唔係我想要嘅人。我的確感激佢當初嘅陪伴同埋支持，所以有段時間我未想分手係覺得咁樣好似對唔住佢。但我覺得唔可以因自己覺得嘅對唔住而要自己繼續同一個唔係自己想要交託下半生嘅人一齊。 分手後我有stalk佢ig（好奇心驅使），發現其實佢完全無覺得自己唔成熟嘅問題，甚至經常share啲post暗示係我背棄對佢嘅承諾。我的確愛過，覺得佢值得我托付終身俾佢。但時間可以睇到一個人嘅真實面貌，佢只係覺得係我背棄佢，但唔覺得自己有好大問題。我唔係無叫過佢改，只係如果真係改到就唔會有今日。 A只不過係一個好好嘅抗爭者，而並非一個好嘅伴侶。以前拍拖嘅時候佢將我放上連登，言詞令我被一班連登仔誤會甚至侮辱。依家嘅我無佢當時咁卑鄙，我只係講事實出黎。一來一解不滿同怒氣，二來希望各位絲打巴打唔好好似我咁，未睇清對方就一齊，因為簡直就係浪費咗你嘅時間。 好多謝大家睇到依度！ sorry for1999 ———𝐂𝐨𝐮𝐩𝐥𝐞.𝐦𝐮𝐫𝐦𝐮𝐫——— ♡投稿請按 @couple.murmur IG主頁鏈結! #hongkong #couple #lovestory #hkig