(故事純屬虛構，可長可短，有人睇就長，無人睇就短...)
　
　
《為咗層樓，你可以去到幾盡》
　
第一章：This is the big day: 俾首期嘅日子到喇
　
2050年6月26日
　
「姚上游小姐，喺做手術之前，我代表世代醫院以及世代地產發展商，再次同你confirm 今次手術嘅風險同呢次交易嘅回報，為確保你意識清醒，同意今次嘅手術。以下問題，我地將會錄音，請你聽清楚後回答『清楚明白』。」
「ok」
「姚小姐，你必須答清楚明白，唔可以答OK」
「清楚明白」
「姚小姐，你同意喺2050年6月26 日，喺世代地產發展商旗下嘅世代醫院，以現金港幣360 萬，以及25 歲以下女性腎臟一個，作為首期，腎臟價以2050年6月25日器官市場收市價定價，現值港幣200 萬，購買西九龍區海堤道14號安樂庭園4座14樓4 室，市值港幣1400 萬嘅一個200 呎單位。你是否同意呢項交易價格？」
「點解個腎嘅價錢又跌咗4萬？尋日都仲賣緊204 萬？」
「尋日嘅成交數量破咗本年成交紀錄，而家腎臟嘅供應相當充足，18歲嘅腎供應量愈來愈多，25 歲腎臟功能已經唔算最好，你再猶豫，個價只會愈跌愈低。成個交易過程我必須要錄音，我而家再問你一次.....你同意喺2050年6月26 日，喺世代地產發展商旗下嘅世代醫院，以現金港幣200 萬，以及25 歲以下女性腎臟一個，作為首期.....」
姚上游聽到之後，淚流滿面，好激動咁講：「一晚跌4 萬，我個腎只係賣得200 萬，4萬蚊我要儲幾個月架啦..... 」
「姚小姐，你咁激動都於事無補架，我地醫院手術房好full 架，你取消交易，做唔到手術，之前嘅身體檢測費同層樓嘅臨時交易按金會沒收架，到時你會更蝕架.....」
姚上游不但無平靜落來，仲更加激烈咁喊起上來，一名護士上前拍姚上游膊頭，諗住安慰佢。
「唔好拍我呀，唔好拍我呀，我好冷靜，我好冷靜呀... (嗚嗚嗚嗚嗚)...我無事呀，唔好再拍我呀...」
　
(鬧鐘聲不停嚮.....)
「做乜鬼野呀你，起身呀」，姚上游媽媽一邊叫姚上游，一邊拍佢塊面...「今日你家姐比首期呀，你快 D起身呀，唔可以遲到架」
姚上游終於都醒，發覺自己成面都係眼淚，望一望個鐘，原來已經8 點鐘，即時記起今日係家姐比首期買樓嘅日子，9 點鐘要全家去到世代醫院。
　
簡單梳洗之後，姚上游覺得好口乾，但知道今日唔可以飲水，而且已經24 個鐘無食過野，覺得異常頭暈，8點20 分，姚上游一家，佢爸爸同媽媽一齊出門口，登上的士，出發去世代醫院比首期。
　
2050年6月26日早上8時45 分
　
世代醫院門口，有一對男女等緊...
姚上游一家坐的士抵達世代醫院。
　
「有無搞錯呀，約咗8點30 分架」姚上游家姐，姚上揚緊張咁指責姚上游一家。
姚上游媽媽：「你個妹成晚無食飯，餓到好夜先訓得著呀，今日又唔知醒囉」
姚上游嘅姐夫：「早晨呀，呀爸呀媽。我呀爸呀媽同呀妹都到咗啦，上去囉」
　
「姑娘，我係張自力，約咗今日比首期架」
「張自力，約咗9 點，呢邊呀」
　
姚上游一家3口，姚上揚兩公婆，以及張自力嘅一家三口，一齊去到世代醫院嘅2樓售樓處，其中一個諮詢病房。
　
「張自力先生，身份證呀唔該」，張自力隨即遞上身份證...
「張自力先生，喺做手術之前，我代表世代醫院以及世代地產發展商，再次同你confirm 今次手術嘅風險同呢次交易嘅回報，確保你意識清醒，同意今次嘅手術。以下問題，我地將會錄音，請你聽清楚後回答『清楚明白』。」
「 清楚明白」
「 張自力先生， 你是否同意喺2050年6月26日， 以 現金810萬港幣以及 35歲以下男性腎臟一個作為首期， 腎臟價值根據2050年6月25日器官市場收市價為 158萬， 合共繳交 港幣968萬首期，購買西九龍海堤道14號強腎中心4座14樓 4室 400呎 單位， 現售價為2400萬港元。」
「真係好彩呀，尋日器官市場腎臟供應減少，而家個腎賣高啲價錢， 等於供少兩個月樓呀，老公」姚上揚 興高采烈咁 同張自力講。
「 張自力先生， 你是否清楚明白交易嘅價錢」
「清楚明白」
「 根據政府 2047年定立嘅一手樓銷售條例，買家以活體器官作為部分首期，如買家喺器官採摘手術期間，出現任何併發症引致身體殘障或死亡，地產發展商將不會取消賣樓交易。 而根據世代地產發展商嘅賣樓協議，即使買家器官摘取後， 發現器官功能不適合移植，亦會按照原價158萬港幣，購買你所賣嘅腎臟， 呢項賣樓協議，係其他地產發展商現階段無提供， 其他發展商對於唔適合移植嘅腎臟， 通常只會賠償 器官嘅 50%嘅價錢，所以世代發展商， 的確比起其他發展商有良心，對買家有絕對嘅保障，所以大家都可以放心」
「 喺早前簽訂嘅臨時買賣合約當中，張自力先生填寫咗兩位女士嘅名， 作為賣腎臟嘅後備人選，喺層樓價格上升時，可以即時賣腎補差價， 而家睇來無呢個需要，呢兩位女士可以去食野先啦」
　
張自力之後話：「阿妹你同游游去食啲嘢先啦，成24個鐘頭無食過嘢」
姚上游：「唔差在一陣啦，都餓到唔餓，等你簽完約入埋手術室先啦」
張自力個妹張用心亦話「係啦，簽埋先啦」
　
「張自力先生，你同意個樓價，首期同埋風險.....其實之前睇樓都講過好多次架啦，咁你簽手術同意書，確認呢層樓嘅交易啦！」
張自力毫不猶豫，大筆一揮簽字....
在場負責簽同意書嘅姑娘隨即話「恭喜張生成為世代地產業主，你地放心啦，手術好簡單，世代醫院一向 信譽良好， 手術 係搵最有經驗嘅醫生，手術之後 提供最有質素嘅抗排斥藥，一星期就出院睇新樓，你地完咗手術入伙就會覺得呢個決定無錯，最錯只係點解唔早d 決定」
　
「老公，辛苦哂啦，為咗大家嘅將來，我喺度等你」
「得啦，明架啦，唔使擔心，層樓比完首期仲有排供，一定唔會比你一個人捱嘅」
　
張自力隨即被推入手術室 …
張自力一家同姚上游一家就喺醫院售樓處門外等。
　
售樓處門外，有另一個家庭都係今日比首期 …但氣氛就勁唔對路
　
「成大富先生，由於你所選購嘅一望無際三座三樓E室賣家加價，而家樓價升咗5%, 要3600萬，原本臨時賣買協議係以1240萬現金，以及一個40歲以下男性腎臟一個，腎臟定價130萬港元，作為首期，而家要補差價，171萬。但你無填寫後補賣器官名單補差價，如果你要繼續交易，一係就補多171萬現金，一係就 撻訂，但先前畀咗嘅5%按金，就會沒收。呢個突如其來嘅加價，我地都感到非常可惜，但樓價嘅升幅我哋控制唔到，手術室嘅期又日日都full曬，可以畀你哋決定嘅時間只有30分鐘，你地不如一家人傾下啦」
　
「最衰政府辣招 規定夫婦唔可以同時賣器官作為首期，而家點算呀？」成大富老婆緊張到喊起上來。
「 之前畀落嘅5個%按金，成170幾萬，去到而家呢個地步，點可以撻訂， 170萬我哋係用咗幾耐儲返嚟，怪就怪我哋之前計條數計得太盡，自己心頭太高，係都要揀 一望無際嗰個海景單位，我都唔知點算喇」
售樓處嘅姑娘，見到呢個咁慘絕人寰嘅情況，欲言又止咁提出咗一個方案 …「 其實去到呢個地步，唔想撻訂， 都仲有一個方法可以補差價嘅 ...」
　
（待續）