【龔成問答信箱】（Q21681-Q21700）

Q21681：

老師，上完你整個課程，雖然我仍有d唔明，但我想信每天一點一滴去溫習你既notes，我會一步一步進步

我最感恩就係，依加個市上上落落，我都可以放心。因為你教識我，只要持有優質股，不用驚短暫股價既波動

1) 其實之前教既市賬率，市盈率，現金流，折現率...要計數既部份，係咪知下就得喇？

最重要係學會第6，7課既企業評估表，對嗎？

2) 你功課590話每股盈利增長係負數，即是代表什麼？

3) 老師，恕我能力偏弱，我唔識你評估表某些指標的意思，即是搵咩資料：

-生意與盈利保障程度高
-管理層理性
-總負債÷股東權益<100%
-負債的增長不過快

4) 老師，除了590外，還做了669，1211，發覺自己做多了一點，開始知d數據去邊度搵，熟習了一點。

但係指標好多都唔識做，唔能夠理性去分析，只主觀地表示 ✅或❎，甚至唔識做

5) 老師，想問下英磅走勢，你有何意見？

6) 老師，你課堂的第7堂內容非常豐富，如果分2堂講會好d

想問功課

7) 行業市盈率，照網站所示的寫下答案，還是搵返相近市值的股票公司作比較

如六福網站show 行業市盈率是35.47。

而其中 1856依波路 的PE 是710。另外，5間市值最大的股票（周大福，六福，周生生，冠城，力世紀），

當中係無盈利的，即無shows PE，係咪只計頭3間的PE? 還是照抄網頁的數字？

龔成老師︰

1) 唔係，其實這幾個是一些較主要的分析方法。除左用企業評估表中，去判定一間企業長線質素外。

我地都需要詐透過這些方法，去幫助我地計算合理值出來。因此，你係要比時間去了解的。但現金流折現法，會係較為複雜。初學者，可以先掌握其他幾個先。

2) 這個負數，係代表每股盈利由2019年去到2020年，出現66.4%的倒退。

3) 生意與盈利保障程度高︰好似一些公用股，市民基本上經濟好與壞，都要持續消費，故保障性會視為高。(六福0590︰算係一般)

管理層理性︰這個你可以睇佢市場策略，和多年年報。例如公司已經負債累累，市道又不好，還盲發展，可視為不理性。

又或者佢數年前，有些大計。但最終無疾而終，甚至朝令夕改，當經常有咁架情況，就算是不理性。(六福0590︰開店速度理性)

總負債÷股東權益<100%︰主要睇長線償債能力，你可以係BOC網站，財務比率個頁，就可以找到。我地一般要求，少於100%為之好(第7堂SLIDE45)。

但你留意翻，近年由於國際財報標準更改左。一些有較多租舖的業務，例如零售，好似六福這這類企業，我地會將個指標，調升為<150$%都接受。(六福0590︰34%)

負債的增長不過快︰你可以用過去多年數據作比較，如果負債增長較快，而負債相關的指標又明顯變差的話，你就要留意。(六福0590︰負債不多)

4) 這些係需要經驗去慢慢磨鍊出來，你預分析頭幾間，都係會有咁架情況。當你唔明，就睇翻NOTE，自己要多溫書，推論，之後真的都唔明就INBOX問我。

開頭係會較困難，但當你累積到一定經驗，你就會知道面對不同企業時，分析應該係點做。

5) 我對英磅無研究，比唔到實質意見你。但建議你除非有實際用途，否則唔好似貨幣，作為增值渠道。

在投資的角度，外匯不是最好的投資項目，因為說到尾，這些都只是一些貨幣，即是「政府借據」，貨幣中期會以週期的模式運作，但長期來說，都是貶值收場，因為貨幣只有「交易價值」，並無真正的財富價值。

而我地進行財富增值時，應該集中將資金投放在真正的資產，如物業、車位、優質股等。

6)要研究下。

7) 行業市盈率，我建議你找同業，最好係產品、質素、規模都相近的公司。你現時分析六福(0590)，你可以用周生生（0116）、謝瑞麟（0417）、周大福（1929）作參考。

依波路(1856)無論業務內容和規模，都不適合用作參考。加上過去幾年都虧損，令市盈率數據較異常，故不要將佢加入考慮之列。

你用水牛網，找到這幾間企業過去10年市盈率的4個中位數。再用這4間企業市盈率的上下限，去取出平均值，就是行業市盈率。

(即係4間企業的4個中位數，"最細"和"最大"的數字分別加起，再除以4，就是行業市盈率之上下限)

行業市盈率約為︰10 - 14倍

------------------------------------------------

Q21682：

你好，請問對退稅年金有咩評價？始終感覺上好似長時間鎖住舊錢 係唔係比較適合上左年紀而又無咩免稅額既人？

龔成老師︰

年金產品，主要係提供穏定現金流﹐較適合退休人士。

因為較年青人士，應先做好財富增值，這類產品就不太適合。

但同時，你都要睇翻佢節稅能力，同你將同一筆錢，去投資所得回報作比較。

因為投資回報始終有不確定性，而節稅金額和收取年金，係保證。若2者回報係接近，退稅年金就可以考慮。

------------------------------------------------

Q21683：

老師 你好，我手上現有1316 $13.7 有兩手, 1137 $16有1手 及圓通6123 $6.2有2手 請問可以繼續坐嗎?

龔成老師︰

持有一隻股票與否，唔好單單係睇中短期架帳面賺蝕，應從佢本質著手。就算而一刻帳面出現虧損，只要佢長線質素無變，照長線持有就可以。

你以上3隻股票，都係有質素，若你係年青至中年人士，係適合你長線持有。

耐世特（1316）本質中等，之前業績有點弱，但又唔算好差。你持貨唔算多，只係2手，照持有就可以。但因為質素始終不強，你預佢增長力之會係一般，不建議加。

香港電視（1137）業務有前景，但你要留意，佢有兩點都存有風險的。

第一，佢都會依靠人的因素，王維基成為了公司最值錢的資產，佢的想法好多，有生意頭腦。

第二，這企業現時搞網購，有增長力的，但同時存有一定的未知數。疫情過後的增長力會否減慢？故此股可投資，但不建議大注。

圓通速遞（6123）本身係一家以香港作為總部的國際貨運代理服務供應商，業務已擴展至多個國家，並在亞洲、荷蘭及北美設立了幾十個辦事處。

佢主要經營以下四項業務：空運及海運貨運代理服務、總銷售代理、配套及合約物流服務。

早前阿里巴巴（9988）入股增持，令股價大上大落，這的確會令企業有更多發展，前景正面，不過，估值方面已難。

因為這刻根本無法計算佢，之能賺多少錢，企業發展情況如果，只可以話好多不確定性，但股價就反映大部分利好因素。

因此，這股雖然有發展，但同樣股價上是有風險，相信之後的股價仍會波動。你現時只投資小注，係無問題，但要明白風險因素。

------------------------------------------------

Q21684：

Hello Sir, 我上年喺股市最旺盛嘅時間下入市, 本金80萬, 今年2月由賺20萬到今日我已經蝕咗本金30萬.

升唔識食糊, 倒跌至一個位係我覺得不能承受要止血我唯有放。而家我倉位得返50萬⋯⋯

9618 $330
1810 $25
992 $10
2269 $108
388 $515
1833 $135

請問以上股票係咪都係好股？我唔等呢筆錢用, 我其實可以長期持有, 但係長線持有係咪都要止蝕?

我知你比亞迪由$80跌落去你都冇放棄過...但係我冇這份信心

Sir, 我應唔應該放一些新經濟股轉買舊經濟股？例如1299, 5..etc

先謝謝你的解答

龔成老師︰

你同好多散戶一樣，都犯左個錯誤，就係覺得「買入價」﹐係一個神聖的指標。

記住，不要用自己的買入價作為何時沽出的指標，也不要以回本後沽貨作為策略，同時，更加不要抱著「賺了多少就沽貨」這心態去投資。

沽出是基於這股已偏貴，又或沒有前景，質素有問題，而絕非由買入價決定。

相反，若你分析該企業的係有前景，就算中短期股價波動，令你有賬面虧損，我地都唔應該沽。

你以上持股，都係有質素。但有個問題是，你太集中係潛力股類(除了聯想0992，其餘都係潛力股)。

佢雖然有增長潛力，同時風險都較高，不宜持有過多。

若你係較年青，潛力股可佔約5成，餘下應用以下平穏增長股。但若你投資經驗較淺，潛力股比重，要再調至3成以下。到你學到一定投資知識，才慢慢調高。

未來時間，你就要加大翻平穏增長股部份，令組合更平衡。

平穏增長股：盈富(2800)、金沙（1928）、恆基（0012）、港鐵（0066）、友邦(1299)、平安（2318）、粵海（0270）、領展（0823）、希慎（0014）、太古地產（1972）、長建(1038)

匯控(0005)只係收息股，無乜增長力，如果你係較年長或者好保守，都可以加入佢。

現貨要否沽出部份，去換碼至平穏增長股，要睇翻你組合大小。如果金額較多，你可以沽出部份換碼。

但若金額較細，可能每隻只有1,2手，咁你照持有就可以，用新資金去令組合慢慢回復平衡，就可以了。

------------------------------------------------

Q21685：

龔成老師你好，本人女性今年32歲, 穩定月入6萬3. 戶口僅保持10萬儲蓄應付不時之需.

以往旅遊購物月月清, 最近終想通生活目標, 學習緊斷捨離多儲錢增值自己

經朋友介紹認識你, 希望學習投資重新出發

背景:
資產:3年前8成按購入5M新樓
固定支出28k(供樓,家用,租金,保險)
日常支出希望維持7k

長遠目標:
希望可以5年內換樓

現在目標:
想學習穩定增加資本, 等待時機買dream house (10M)

本人BB班, 過往無投資經驗或概念, 完全唔識股票; 希望得到老師指點初部方向, 建立action plan 一步一步增加財富, 謝謝你。

龔成老師︰

首先，你要改變以往不好的理財習慣，你試下每日記低自己每項支出，再睇翻有無邊D係無必要，盡量空出多一點資金，去做投資增值。

你現時有明確目標，就係細屋換大屋。由於你已有一間物業，我地現在要做的，就是透過優質股，去幫你累積一筆資金，達成你換大屋目標。

你可以選擇一些「平穩增值股」+「潛力股」作投資目標。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄，另一半就先儲起架策略。

由於你投資知識不高，因此可較集中在平穩增長類股，至於潛力股，只宜小小注。此期間，你最好是努力提高投資知識，才慢慢增加翻潛力股比例。

餘下現金就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

到5年後，你可以慢慢套現股票，去實行換屋大計。

但緊記，我地財富組合，唔好偏重係個別資產類別，要平衡，樓和股票都要有。因此你換樓時，唔好股票盡沽，要留有一定數量，可以用來持續增值，才算理想。

------------------------------------------------

Q21686：

老師好，我而家最主要係糾結好唔好買樓，如果買嘅話幾時買，買咩價位嘅單位好。

今年30歲，月入9萬，和父母住。每月支出1萬至2萬。

現金儲蓄 210萬左右，強積金27萬

投資方面︰

大部分2800，有82萬左右

最近加多咗啲水桶一，加埋大概50萬左右（不過好似有啲心急咗應該分細注啲注入）

2800 - 平均價 23.2, 29000股
3188 - 平均價 60.1, 1000股
1810 - 平均價 24.9, 5200 股
1177 - 平均價 8.31 , 13000 股

788 - 平均價 1.12 , 80000 股
0027 - 平均價 65.2, 1000股
388 - 平均價 451, 100 股

遲啲諗住加埋美股 台積電。

而家亦都開始做緊月供：銀河，港交所，小米，中生 每隻5000蚊

買樓方面，唔急住自住，可能都係當投資+- 收租

自己一兩年後亦都有機會想搬出嚟租屋住或者住返買咗嘅appartment， 不過我就係度諗，買樓咁麻煩又要交差餉管理費，可能仲要比錢裝修。

到底對我嚟講呢個係唔係一個合適嘅投資呢? 如果係嘅話我咁嘅情況應該買咩類型嘅單位好呢? 定係留返啲錢遲啲買股票好?

龔成老師︰

我地投資，除左要選擇一些適合自己的優質資產外，組合的平衡性，同樣都係好重要。

若你無實際需要，我建議你先同家人同住，節省更多資金用作投資。若你無自住急切性，可先從投資角度去考慮，現時股市值博率相對樓市較高，加上你己有一間appartment，我地應先從股市這裡入手。

以你30歲計，投資應以增長為主。你現時持有股票，和月供計劃，大致上係可以。

但月供上，有少少偏重係潛力股(1810, 0388, 1177)，風險會稍高。未來可以加入一些好似盈富(2800)的平穏增長股，令組合更平衡。

另外，我建議你每月儲蓄最好可以做到，係收入一半，即係$45000。其中$25000作月供(加多一隻$5000平穏增長股)，$20000儲起。

平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、領展(0823)、希慎(0014)、太古地產(1972)

現時大市只在合理區，現金和股票，最好各一半。你現有資金可以用多少少入市(美股、台積電、港股都可以。)。餘下的資金，就等大跌市才動用。

至於物業，現時香港樓市係合理區頂部，投資價值未算好高。但若你此期間，發現一些有質素，又平宜的旬盤，你都可以考慮用現有資金入貨，之後放租。

因為，我地長線財富組合，唔可以偏晒係股票類，都要加入物業類，令組合更平衡健康。

但由於現時物業值博率不高，你可以集中股票先。而買邊類物業，我會建議初階投資者，先從住宅開始。

若資金較少，可以先入手較細單位(但最好都有300呎以上)，但必需要有質素和投資價值。你可以睇我本<5年買樓4步曲>，會對物業投資，有較完整解釋。

------------------------------------------------

Q21687：

龔老師你好，我30歲，剛在美股損失了很多，差不多70%身家！現持有︰

941*47蚊入
6618*160入
939*6蚊入

現打算月供2800 和6818

現金只餘下數萬元！

你覺得可以嗎？還有機會番身嗎

龔成老師︰

係而個時候，你唔好先諗翻身問題。你要先想清楚，美股出現重大損失的原因。

美股雖然近期係較波動，但不至於7成上落，所以你投資技巧和方法，一定係出左核心性的問題。

記住，我地買入一隻股票，就等同買入一間企業，一定要知道佢質素、行業前景、財務狀況等，才去考慮否投資。

當我地確認係值優質股後，我地會用平貴定入貨策略，並長線持有。而唔係做短炒，去賺差價。

更加唔好用衍生工具，或者槓桿，因為好難玩，個風險會好高。

你現時持有股票，都係質素。但中移動(0941)和建行(0939)只係收息股，增長力唔會太高，以你30歲計，有點保守，建議不要再加注。

至於月供方面，你可以投資「平穏增長股」和「潛力股」。你每月5成儲蓄，其餘先儲起，用一邊月供一邊儲蓄的策略。

你所選盈富(2800)係可以，但中國光大銀行（6818）都係收息股，唔係咁適合。

選股上，你可以投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

潛力股可選安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）。但佢地波動性和風險會較高，你要自己平衡。

你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

到你有一定投資經驗﹐潛力股比重可以相應調高，佔組合約3-5成。

餘下的另一半現金，我地就等機會，當大市出現較大回調，就加大力度掃貨，然後作長線投資。

最重要係，你要努力學習正確投資知識。只要你能運用正確投資知識和技巧，長線回報一定會唔錯。

而一刻你可以先做月供，但你再加大投資前，要先了解過往失利原因所在，才好再投入更多資金入市。

------------------------------------------------

Q21688：

龔sir你好，我是一個新手，想試吓買少少投票賺少少外快。我聽別人介紹買＂美團＂但不知從何入手，求指引

龔成老師︰

首先，你要清晰一個好重要的投資概念。我地投資股票，其實等同投資一間企業。希望透過其自然增長，以達至財富增值的目的。

所以，我地投資一定係長線(3-5年，甚至更長)，而唔係短期炒賣，去賺差價。

美團點評（3690）有潛力的，過往一直虧損，到近一年，開始有正現金流，這是一個實質的利好因素，因為之前一直在燒銀紙，現時初步見到成效，不過，估值的方法好虛無，因為現時的市盈率仍過百倍。

如果有利好消息，佢可以上好多，但如果估值修正，股價可太跌。

只可以話，潛力是有的，現價唔算平，之前明顯貴，之後回翻好少少，大約合理區頂，不過，一定不能大注。小小注，是較好的做法。

------------------------------------------------

Q21689：

龔成老師，你好，最近在facebook發現到你的專頁， 發現你回答讀者問題 提供的意見務實而有用， 非常欣賞 。希望你也可為我提供一些意見

本人32歲，未婚，與家人同住，沒有租樓壓力

月入22000, 擁有積蓄70萬。

一路以來都沒有意識到投資嘅重要，只係識儲錢擺銀行。 直至最近意識到錢擺銀行,遠追不到通脹。

直至上月開始學投資，由於好多嘢都唔識 同唔了解，所以暫時都係偏向保守 型投資。

1.)我放咗三十萬在銀行做咗個守約儲蓄保險計劃,年期8年

8年後可拎到38萬x，平均年利率3.6厘

請問老師你認為呢類型產品做得過嗎?定還是 只年期長回報少?

2.) 想放十萬 在股票市場,暫時手持:

中國移動一手
香港電訊一手
盈富基金一手
中國銀行3988一手
二南方納指500股
(啱啱投資就遇著跌市😅)

請問以上嘅組合可以嗎 或有冇更好的建議可供參考?

3.) 另外想投資15萬 到保險公司購買基金或 月供 盈富基金/voo

請問老師你會比較推薦哪一樣?

我希望呢15萬嘅投資係比作一個中長線嘅儲蓄

非常感激， 期待你回覆

龔成老師︰

1) 這類保險產品，係穏陣，但增長力好弱。持有太多，會拖慢左你財富增長力度。

你若真係想保守點，持有係可以，但金額上要作出平衡。

2) 當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時32歲去計，應以增值為主。中國移動(0941)、香港電訊(6823)、中行(3988)主要係收息，增長力唔高，不宜持有太多。現貨可持有，就不要再加注。

二南方納指(7266)係追蹤納指表現，納指升1%，佢會升2%。但相反，當納指回調，你架損失會係雙倍。這類槓桿ETF，我唔建你用，風險太高。

若你想投資納指，可以投資美股Invesco QQQ Trust(QQQ) ，是追蹤納斯達克100指數，會較適合你。

將來時間，你可以投資「平穏增長股」和「潛力股」。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

3) 3者都可以，但由於基金一般都有一定收費，長線拖低你回報。除非你肯定佢長線回報，會明顯優於大市，否則你投資盈富(2800)或VOO，會較為理想。

但留意，現時大市只係合理區，未到好平。資金一定唔可以盡用，而且係要分注咁，慢慢入貨。餘下資金，就等大跌市，才出手入平貨。

------------------------------------------------

Q21690：

Hello龔sir，我睇咗你本“股票勝經”，都成日睇你Facebook page嘅video同解答網友投資問題，穫益良多，多謝你！

我呢排都買咗少少“安碩恒生科技”3067嚟長線投資。想請教吓，你點睇“華夏恒生生科”3069，同3067相唔相似？係唔係長線投資嘅好選擇呢？

龔成老師︰

華夏恒生生科（3069）主要係追蹤恒生香港上市生物科技指數之表現，係一隻不錯的ETF，值得長線投資。

指數包含51隻成份股，當中有「藥品」、「⽣物技術」等公司。較為人熟識的，有藥明生物（2269）、京東健康（6618）、中生（1177）等等。

隨著人口老化和人均收入增加，對優質醫藥的需求只會有增無減。此股都有質素，可作長線投資。但你預佢會較波動，最好用月供模式儲貨，並長線。

但留意，華夏恒生生科（3069）和安碩恒生科技(3067)都係潛力股類，風險會較高。

假設你算係年青，佔5成左右好了。若你投資經驗較一般，比重就要再下調少少。如果你係接近退休之年，這類股票風險太高，就不太適合你了。

------------------------------------------------

Q21691：

龔成老師，我有個問題請教一下，我是澳門的，我打算一年半後結婚，現在和家人一起住，結婚後大機會和老婆家人住，

我比較偏向買鋪位，但可能要結婚後才夠錢，我是否應該在結婚前先用了青年首次置業先買個唐樓，到之後再用唐樓換鋪位？

結婚費用我工作一年半是完全足夠的，買唐樓首期現在是足夠，但鋪位就不足夠。

龔成老師︰

你都可以用這個方法，以資產追資產模式，去先買唐樓，再增值後轉買舖位。

至於澳門的青年首次置業計劃，其實我唔太清楚具體情況，細節位未必好清楚。

但首先，你要睇翻這唐樓是否有質素和投資價值，唔好純粹因為個價你可以承擔，就盲目出手，最緊要睇佢升值潛力和租金回報率，是否合理。

同時間，你要考慮你用左這個首置機會，你將來要自置自住居所時，就不能享受高成數優惠。

另外，投資舖位，對投資物業技巧要求較高。若你這方面經驗唔係太多，你就可能要提升這方面知識，才出手會較好。

若不買唐樓，你都可以考慮用優質股，去為置業資金增值，都係一個可行方法。

至於結婚資金，你就不要用來投資。因為只有1年半時間，用來投資增值，風險會太高，最多只宜作定期存款。

------------------------------------------------

Q21692：

龔成老師您好，今日想主要問問好多人心目中既股王 騰訊 (700HK)。

我有睇過有人問過700而龔成老師覺得依家係係合理區頂部。騰訊現時PE為29到，以historical 10年PE average 35到，我用個PE range 24.5-52.1黎睇，

依家已經俾過往既十年黎講相當較平而股價區會由500-1050所以覺得580已經相對比較便宜，所以想問問龔成老師咩睇法?

同埋龔成老師每次都基本上會叫人留有現金，係大跌市既市時候買入優質既股票。騰訊由高位770跌到依家580差唔多已經跌左25%。

想問下依家係唔係到龔成老師成日講既大跌市，而呢個係買入良機長線持有?

同時都想問下之前都係百度220蚊，姐係由高位跌左差唔多4成個陣買入打算長線持有。

因為百度仲下跌緊到依家差唔多175蚊，上次220蚊買入又合乎龔成老師” 大跌市”的睇法嗎?

謝謝回覆!

龔成老師︰

騰訊（0700）本身已經好大好大隻，要再高速增長並不容易，雖然手遊的長遠發展仍會不錯。

但要帶動這股倍升，相信並不容易。所以，我地唔可以完全參考過往數據，要因應現有情況，作出合理調節。

當你運用過往的市盈率作估值時，要留意翻環境與企業的情況有無改變，當一間企業有較高增長時，市場會比佢一個較高的市盈率，而騰訊5-10年前，仍處於好高增長狀態，到了今天，是中高增長狀態，估值當然會有調整。

此股相信依然有唔錯增長力，但唔會去到以前咁高。而價算係合理區頂，如果你去到平，你預跌多3-4成，才算平宜﹐故現時未稱得上係明顯買入良機。

百度（9888）有質素，有獨特性，長遠發展不差。

佢係全球最大的中文搜索引擎「百度」的營運商，係內地用家搜尋資訊主要對口，用戶規模突破10億，百度App日活潑用戶超過2億，多個指標都處中國第一。

百度在規模和質素上，一定係有。

但我地唔好單純用比較現價和上次高位距離，因為早前科網股被熱炒，不少相關股票，都因而被大幅推高。

我地應用翻企業本身價值，去衡量佢現時價格水平，是否合理。

佢雖然已跌到$18X，但唔算係平，只是合理區頂至略貴水平。但長線有增長力，若無貨，現價小注投資係可以。

------------------------------------------------

Q21693：

龔成老師，一直睇開你嘅理財資訊，本人34歲，持有現金50萬左右，偏向增長組合。因為最近股市比較波動，所以想問吓老師意見。現持有以下股票：

1810 200×23
6618 350×130
700 600×100
883 6000×9.3
1928 1200×32.9

請問咁嘅組合係唔係有啲雜亂無章？想再增持1810同700，亦想加入823、981同2382，但未知合理價位同時好似業務有重疊。多謝老師嘅時間

龔成老師︰

你組合唔算好亂，整體上都有質素，係合你長線持有。

中國海洋石油（0883），質素都算有，但不是最高質類別，佢對油價較為敏感，所以，如果長遠油價向上，佢都會增值的。

雖然佢都有一定的規模及質素，但卻不是最高質素的企業，這是由於佢地的產品自主力較弱。

石油是商品，當中沒有差異性，佢地要將石油賣出，只能跟國際油價，這令佢地處於被動狀態，沒有價格自主的能力，這令佢地的獨特性有限。

這類商品企業，都可投資，但就要明白不是最高質的企業，不宜持有太多。建議你沽少少，換至其他優質股。

中芯國際（0981）、舜宇光學科技（2382）、騰訊（0700）現價算係合理區頂部，小米(1810)則是合理區頂至略貴，領展(0823)算合理區中上部。

這些股票，若你無貨，而價可以首注。但有貨者，建議再等佢有明顯回調，才出手。

小米(1810)、舜宇光學科技（2382）和中芯國際（0981），行業性質上有重疊，加埋不要高於組合3成。

另外，你持股和目標股票，不少都係潛力股，佢雖然有增長潛力，同時風險都較高，不宜持有過多。

以你34歲計，潛力股可佔約5成，餘下應用以下平穏增長股。若你投資經驗較淺，潛力股比重，要再調至3成以下。到你學到一定投資知識，才慢慢調高。

未來時間，你就要加大翻平穏增長股部份，令組合更平衡。

現時大市在合理區，你50萬現金，可以用多10-20萬，以分注形式入市。餘下現金，我地就等大跌市機會，才出手掃平貨。

------------------------------------------------

Q21694：

龔成老師你好，我最近經常睇你fb專頁同書本，裡面學到唔少，宜家想付諸實行！

我宜家22.5歲，工作左兩年半，現時人工26k，每年大概會加1.5k，開支方面: 每月家用10k, 儲蓄保險每月供款2.5k （為期五年，已供了兩年）,

還有每月日常消費大概3k，剩下用作儲蓄/投資，我目標係二十五歲時有一個穩建成長及帶來現金流的投資組合，

而帶來嘅現金流則可用作再投資、儲蓄或支付日常開支, 例如每月交通費。

我本身對股票幾有興趣，炒左股一年半，雖然會自己研究下圖表、聽下財經節目，但係暫時都係輸錢，加上工作關係唔可以經常睇實個市，而且有時心理壓力都大，

因為有時啲股票好波動，可能幾日已經輸一兩成，所以我想改變下我現有嘅投資方法，以下係我嘅方案：

1. 自行睇位分注吸納科技ETF 3067, 剛在16.5入了第一注，每跌10%加注

2. 月供股票，每月供款金額約$10000
從以下每個板塊挑選一至兩隻月供，每隻供款金額約$1000-2000

- 穩定增長+收息為主 （第二個水桶）
消費板塊：1044 上月已開始供, 想加914可以嗎？
內房板塊 ： 813 or 2007 （二選一）
金融板塊：需要包含嗎？如需要，心儀2628 or 659

- 高增長 （第一個水桶）
生物醫藥板塊 ：1833 + (醫藥ETF?)
可再生能源、環保板塊: 未有特別心水（916？6865？ 586？可以嗎？）
物管板塊: 823 or 3319 or 1821 (三選一至二）
科技板塊：981，1810，2382，9988，9618 （五選二至三）

每隻股嘅供款金額應該會一樣（e.g大概每隻$1000）但係有些板塊會供多於一隻（例如科技、消費、醫療，因為我較睇好這些板塊或者裡頭潛力股較多）

所以7個板塊投資嘅金額唔會係平均14%（100÷7），反而有啲佔比會重啲，有啲則輕啲

想問這個投資方案可以嗎？

還有我現持有以下股票，打算將部分分批賣掉，套現出來的現金打算儲下來留在跌市時分注吸納或用在月供

6186 2000股 買入價 24
2318 1000股 買入價 50
6865 1000股 買入價 34.5
285 500股 買入價 43.85
7226 1000股 買入價 9.96

189 2000股 買入價 7.5
6601 1500股 買入價 9.2
6049 200股 買入價 69
6110 1000股 買入價 12.6

2333 500股 買入價 23
3319 250股 買入價 35.2
9888 50股 買入價210

想請教下你，謝謝

龔成老師︰

你過去的投資方法和理念，都唔係咁正確。

我地投資股票，其實等同投資一間企業。希望透過其自然增長，以達至財富增值的目的。

所以，我地投資一定係長線，而唔係短期炒賣，去賺差價。因此，我地唔會係用睇圖表，這類技術分析方法，更加唔需要成日睇住個市。

另外，當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時22.5歲去計，是財富增值的黃金時期。

你重點唔係要現金流去再投資，而係直接集中係一些較有增長力股票，去累積一筆財富。

"保險"只係理財中防守部份，買足夠保障就可以，增值可以留比優質資產(如優質股、物業等)去做。買太多，只會拖慢你財富增長力。

現時，你自行睇位分注吸納安碩恒生科技(3067) ，這方法可以。

月供策略上，你可以投資「平穏增長股」和「潛力股」。現時大市只在合理水平，除了月供外，每月都要留有一定資金，等大跌市才掃貨。

選股上，你上述板塊都可以。但內房負債較較高，不宜持有太多。而且一些不確定性較高的股票，都唔建議用來月供。

以下是一些較有質素的月供組合，你可以從中參考。

你可以投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

潛力股可選安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）。但佢地波動性和風險會較高，你要自己平衡。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

至於持股方面，如果有質素，我建議你長線持有。若你想留一些資金，捕捉大跌市機會，可以新資金來做。

怛留意，ＸＬ二南方恒科（7226）產品之投資目標為追踪恒生科技指數每日表現兩倍（２ｘ）的投資業績。

雖然我長遠認為，恆生科技指數正面，但中短期可以較波動，由於這基金有槓杆，就會令價格更加波動，其實有風險。

我會較建議投資無槓杆的恆生科指ETF（3067），始終較好。

東岳集團（0189）、滔搏（6110）質素中等，唔建議持有太多。

朝雲集團(6601)不確定較高，不宜持有太多。若現時只佔你組合一小部份，可以持有。

------------------------------------------------

Q21695：

老師，我這次的置業目標，計畫的使用的方法會較為特別，我想和你分享一下。

我即將39歲，月入＄29000, 已婚，有1小孩（即將6歲）。

我有1個物業（屯門兆康苑，已補地價），管理費＄700, 做按揭時是自住的，現時已出租（月租＄10500），按揭利率為H+1.23%, 2019年轉按了，轉按時銀行估價540萬，我借了6成，供款期為30年。此物業我在2010年買入，當時樓價115萬，做7成H按揭，一直收租至2015年結婚後自住。

我太太即將36歲，月入＄36000, 2019年購入屯門新樓御半山自住，樓價666萬，做6成按揭，按揭利率為H+1.23%, 30年供款，管理費＄1900.

現在我打算購置第3個物業作投資（名義上是我外父自住用途）。

我外父和外母現聯名持有1個私樓物業（深井碧堤半島）作自住（已完成供款），並持有1個該屋苑的私家車位（已完成供款）。

他們本身是舊制已退休的公務員，有長俸，外父（即將61歲）的長俸較多，有＄30000, 我跟他們談過我的想法，但要他們將現聯名持有的物業改為獨名持有（外母持有），然後當我看中物業時，我外父便可用首置名義（投資）入市

若他能通過壓測的話便可做到9成按揭（樓價800萬或以下），30年供款，供樓戶口要用他名下的，直至按揭總額還款至低於6成方可改為我名義的戶口供樓，當然，所有相關費用，包括供樓會由我承擔。又假設我外父的長俸過不到壓測，也可加我做擔保人，但便只能做8成揭揭。

這樣，我便能合法地做到我想做的。這個物業會由我打理一切，雖然名義上不是我的，但我太太是獨女，就算當我外父、外母百年歸老後，物業仍會被視為遺產留給我太太。

這第3個的物業（嘉輝花園）我會出租，實行以租養樓。

龔sir, 對於我的計畫，不知你會有何評價。

而我和我太太預計會60歲退休

龔成老師：

方向不是不可，但有幾點要講翻。

第一，你地（我以整個大家庭作單位），將會持有4個物業（連同你外父外母聯名那物業的計），在整個財富配置中，其實出現了集中風險。因為我地投資，其中「平衡」都是好重要的，加上香港物業增長力最高的年代過往，我預期往後10年、20年，將會是平穩增長年代。

因此，如果從財富配置的角度，投資其他項目的回報，以及對整體財富的平衡度，將會是最好的。

第二，當涉及的人物愈多，就愈容易出現問題，始終大家都會有不同意見，每個人都是獨立個體，因此，如果日後有甚麼問題出現，會對你地的關係有所影響。

第三，壓力測試，我都唔能夠講得好清楚，佢是否能過關，你最好問清楚先好進行。

第四，買樓有一個好關鍵因素，就是「供得起」原則，如果樓市及租金下跌，你地的防守力如何，如果有一段時期租不出，你地的資金是否頂得住？

至於大方向，其實可以，但你地要明白上述的風險，大家都有共識後，先可以進行。

至於嘉輝花園，可以的，有質素。

------------------------------------------------

Q21696：

老師。其實968呢隻股似唔似資源股，價格比市場影響。因為記得上堂老師不太建議投資呢啲股。

龔成老師：

有少少影響，因此在價格自主能力方面，未能去到好強。不過，我地要睇翻佢本身有無技術，如果擁有技術的話，其實佢能否以較低成本生產到產品。

同時，能生產到較高質的產品，這就會產生了產品價格的差異性，反映企業有質素。就能跳出課堂所課，無法加價的問題。

因此，你在分析時，要小心分析佢的技術，是否行得較前，以及往後的技術發展如何，這是決定企業有無質素的關鍵位。

------------------------------------------------

Q21697：

老師，多謝你回覆。其實我由細接觸好多活動都揾唔到自己真正興趣，直到大學期間睇左富爸爸本書改寫左我人生同觀念，就瘋狂睇其他理財投資書，開始決定長遠目標和寫成功日記，我可以樂此不疲連續睇書，就諗呢個係未我興趣但又害怕(當時中係由窮人思維變緊富人思維中)。

直到網上遇到你，你完完全全教我地點樣實行，開始接觸股票，睇你著作，呢個時侯我已經好肯定咁揾到自己興趣(想成為專業投資家)同人生價值，生活習慣，思維幾年內睇到自己變化好大，亦同身邊人分享理財重要性同推薦你網站。

見到佢地有改變 自己好滿足同開心。我想激動分享既係你地好偉大！啟蒙左我，來來回回咁多年我終於揾到自己目標，好開心！

我亦知自己揾唔到全職一時既低落，調整心態，唔會花時間諗(曬時間)，自己能力范圍亦會幫助其他人，相信你同其他作家都希望會見到呢個乘的效應！好啦！

知道阿SIR貴人時忙，我知我多野講，但太激動所以想同你分享，感謝你同其他作家，感恩遇到你地！

龔成老師：

其實你自己都好明白方向，只是一些短期問題。

你知唔知，決定一個人是否成功，不是睇佢順境，是睇佢逆境，如果一個人要對逆境，都能夠保持正確方向行，做出一些對自己長遠利好的決定，這類人成功，只是遲早的問題。

加油啦！

------------------------------------------------

Q21698：

呀sir 我現家重整左股票組合

9988@242 2手
285@47 3手
1810@26 5手
1211@178 1手

我草緊錢準備跌市加倉，但如果到時資金有限，我加倉次序應該點排好，比亞迪其實好想加先，因為得一手，唔該晒呀sir幫我解答

龔成老師：

你所持有的，都是有質素的股票，可以長線投資，無問題，最緊要唔好太著重短期股價上落。

另外，你出現了集中風險情況，同一系的公司，不能太多。

同埋，你整個組合都是潛力股，你應該加入平穩增長股，去平衡整個組合。

所以，你加倉時，應該加入其他。如果想加入上述的股，要跌更明顯下跌才出手。

------------------------------------------------

Q21699：

你好龔SIR，小弟剛睇完《股票勝經》，而家睇緊《50優質潛力股》，暫時只買了幾隻你比較常推薦的潛力股(2800, 0823, 0012, 1928, 3319, 3918)每隻目前都係入唔1-2手

部份都有輕微升幅，部份好似因為之前美國提及是否加息而出現跌市，所以有下跌，想請教一下點解只係討論美國加息與否，都會對股市咁大影響，小弟只了解過對樓宇按揭利息有影響，如果美國真係加息，是否會做成大跌市？

另外想問一隻股票，虎都(2399)早前見阿里巴巴同虎都旗下公司合作，這隻股票是否有潛力？但見最近股價一直大跌，這股值得投資嗎？

希望龔SIR可以提供意見，謝謝

龔成老師：

你上述持有的股票，都有質素的。

可能你會見到股價之前升，之後跌翻，但其實唔需要太過理會。

至於投資市場，一向是以一個「預期」的模式運作，即是說，不是發生了才反映，而是預期之後點發生。

美國加息，理論上會對樓價有影響，會下跌，因為供樓的成本增加左，但要睇到時加多少，如果加幅不大，根本無乜特別影響。

加上香港樓的供應不足，需求大，因此樓價下跌根本有限。

至於虎都（2399），擔心佢炒作多過實際，唔好比一D表面因素影響，要睇企業的實際發展。暫時唔太建議投資，風險高。

------------------------------------------------

Q21700：

龔sir, 你好，想請教一下我有2百萬想放入股市買入一些收息股來做被動收入，請問有什麼股票現在可買入/介紹？

而我會分開十期，每月買入二十萬元股票，這個方法好嗎，還是分開五期，每期四十萬較好？

我現年46歲，打銀行工，有供緊樓。想將這些被動收入補償供樓利息的支出和增值。

下列是而家月供股票

$2000 - 66 （平均價 42.77）
$4000 - 2800 （平均價 26.12）
$2000 - 1928 （平均價 32.59）

我仲想問吓，呢$2,000,000嘅投資應該買入幾多隻股票呢，五隻會唔會太多？我大概希望有 5% - 7% 嘅收入。謝謝

龔成老師：

你46歲，可投資平穩增長股，加收息股，你不用100%投資收息股，因為你這年齡仍有財富增長力。

我會建議你分10期，每次20萬，分12-18個月進行，慢慢分注投資，能將買入價平均，你可以投資5-10隻股票。

你可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

如果你能承受到風險，有些更有超過8%、10%的高息股，但股價就略有風險，要自己衡量，佐丹奴國際（0709）、中石化（0386）、互太紡織（1382）等（記住，股價略波動，只能小注）。

現時月供的，可以保持，長期進行就得。

要留意，你不能用盡所有現金，要同時留有部分資金，等機會投資。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q18121-Q18140）

Q18121：

阿Sir，我係你學生，好奇一問，點解你唔出樣呀，又唔係唔靚仔（八卦咋）

龔成老師：

第一，因為我唔中意比無聊人知我真樣，你上過我堂，當我是老師，當我是朋友，比你見真樣，無問題，但網上好多人，唔會尊重你，甚至只會攻擊你，這些人，我唔覺得佢有資格見我真樣。

第二，我好多朋友都唔知我就係龔成，而我都唔想太多人知。

因為當佢知道你認投資股票時，就會成日煩你，問你貼士，而股票總有賺蝕，所以好煩。

------------------------------------------------

Q18122：

成老師，我也很想報讀師您的課程，但可惜小弟在新界西上班，每天早出晚歸，要堂到港島上課，實在有點難度。

不過，誠如老師所說: 「路是人行出來的」，我會嘗試安排工作，看看有沒有可能抽空來上課，在老師的指引下在投資路上成長。

龔成老師：

加油！

你最重要是保持進步，可以睇住書先，之後再安排時間，睇下得唔得。

我過往的股票班，試過有澳門人、國內人，每堂特登過香港上堂，即日來回，我希望你唔好比小問題阻到你。

------------------------------------------------

Q18123：

老師 請問268值得投資嗎？

龔成老師：

金蝶國際（0268）主要業務為在中國境內開發、製造及出售軟件產品及提供軟件相關技術服務。業務增長快，同時市場預期佢有一定的發展力，對佢期望唔從細。

睇翻財務數據，其實是不錯的股票，生意同盈利都有明顯的增長，而且行業仍處增長階段。

不過，這股的股價太高，現價處貴水平，對這刻投資有所保留。如果真的投資，小注好了。

------------------------------------------------

Q18124：

你好龔成, 我今年29歲, 一直有一份穩定工作, 但人工唔係好高..得2萬5到...已經結左婚, 所以家庭有一定既開支, 我又唔熟股票市場

其實好怕貫完輸好多錢, 儲蓄亦唔多, 明白唔可以只係節流, 我都想開源, 請問我適合買少少安全既股票嗎?

龔成老師：

你要做三樣野，第一，增加知識，你要學理財及投資的知識，記住，投資並不是坊間的炒炒賣賣，你要從書本或課堂上認真學習。

買股票是買入一間優質企業，長線投資。

這是一個財富配置的動作，你將現金，轉為有價值的優質股資產。

第二，了解銀行及證券行，去開一個證券戶口，並準備做月供股票。

其實兩者都可以，銀行就較方便，但手續費就較貴，證券行收費就較平。你可以先了解下不同的收費。

第三，將每月的部分資金，去做月供股票，供盈富（2800）。對初階投資者來說，月供股票是一個很好的累積財富方法，因為可避免你一次過在高位買入的風險。

原理如同儲錢，不過就不是儲現金，而是儲股票。計劃要長期進行。

另外，盈富是一個組合，適合絕大部分人投資，風險不高，長期儲貨可助你財富平穩增值，記住要長線持有。

你可以考慮其他指數基金，例如南方Ａ５０（2822）、VOO。由於不是持有一隻股票，而是持有一個「組合」對你來說風險會較低。

當你在做上述三件事的同時，開始學下股票，了解下那些股票適合你自己。上述只同你簡單供盈富，當你過半年，有知識及少少經驗後，就可以利用你手上的資金，其中一部分，去投資股票。

------------------------------------------------

Q18125：

龔成老師，您好！睇咗你個page一段時間，終於下決心向您請教。

40歲，因為有長期病患，搵工困難，所以而家嘅人工比啱啱畢業嘅大學生仲低，只有11K。

每個月一半俾家用，自己用$2000左右。買咗兩份儲蓄保險，其中一份已經供完。而家有大約10萬現金。

因為擔心身體狀況未必可以長時間做全職工作，所以想盡量儲多啲錢，亦唔敢買股票。但最近發覺繼續咁樣落去行唔通，所以想請教吓點樣嘅投資比較穩陣，期待你嘅回覆，謝謝！

龔成老師：

我地理財，最重要是進行「配置」，要敢守兼備。

你的情況，可以防守方面要較多，要做好防守部分先，但如果餘下有資金，就要進攻，只要唔好太過進取就得。

建議你投資一些穩健的指數基金，每月月供$2000-$3000，長遠都能儲到錢及有基本的財富增值。你可考慮盈富（2800）、VOO。

但要記住，你點都要有一定的現金防守，作備用。

------------------------------------------------

Q18126：

你好，龔成大師！最近比你嘅video吸引 開始回看你嘅舊PO 有用如一巴打醒我。

我對於自己財務狀況，處於一個沼澤嘅狀態。迷惘，不知如何爭扎重上軌道

背景狀況：
31歲，月入30k，負責卡數40k及餘下學債60k （本為200k）

每月支出：
7k 保險25年基金投資plan (至少夠12年先可以全取，分別開始於2008 及2017年）
6k 租金
10k 找卡數
3k 學債
1.2k 醫療保險

不流動資產：250k
流動資產：40k

以前一直不善理財，以享樂旅行行先，所以一直儲唔到Cash。比起同年紀，自己財富數目係一個令自己feel shame嘅題目

自己直自己事，所以逼自己儲少少錢到某保險25年投資基金，短期角度來看，都幾後悔，因為lock起曬達十幾年咁耐，無cashflow。又承受不了股市up & down嘅壓力，無輸錢嘅勇氣。

希望得到你寶貴意見，無打算於香港置業或置業，倒是想離開香港到非主流商業城市過簡單嘅生活。

1. 可以如何practically重新部署再出發，定，難以挽回 結束自己嘅路比較直接了當？

2. 我知道你嘅理念係中長線投資股票為主，但無cash 又負債嘅我 ，求教可以點樣快啲滾到多少少cash，唔需要大錢，起碼可以令自己有多少少空間去儲錢

知道你要花大量時間解答各式各樣嘅問題，但先多謝你，一個渠道讓我提起勇氣，面對自己嘅問題，同向別人承認自己係財務方面係遠不及旁人嘅事實。

龔成老師：

理財方面，你唔好再增加卡數，這些消費性負債只會令你累積唔到財富。

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你現時的$4萬，由於不算多，因此應該持有現金，作備用。

無論你之後想在香港或其他地方生活，我都建議你先定一個目標，5年-7年累積$100萬，我希望你從生活上做好消費控制，唔好再用信用卡。同時比自己一D儲蓄的目標。

你無本金，就無可能滾大到財富，你一定要努力儲左本金先。

同時，你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。做月供股票，每月$5000。

你可以考慮盈富（2800）$2000。

另外再加1、2隻（每隻$1500）：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。

如果你不懂股，就集中供盈富$5000。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q18127：

你好，我都是近期才接觸老師你的fb，好多人都話睇你書學到唔少，我都要睇睇，認識多D！

如果資金唔多，又希望有回報，可以選擇咩股票投資？
同埋之前成日聽你介紹資金不多的人可考慮月供盈富基金，其實又係點樣同可以喺邊度供？

多謝老師既回覆
希望遲D可以上你既堂

小米染藍成功，未入手既仲追唔追得過？
咩價位入市？

龔成老師：

簡單來說，月供股票就是你每月將現金，買入某一隻或多隻股票，慢慢咁樣儲貨。坊間不少銀行都有提供月供股票服務，你先開證券戶口，然後登記做月供股票。

形式就是每月投入相同的金額，買入同一隻或多隻股票，並持續進行。

例如，每月以相同金額$10,000 買入盈富基金（2800），假設第一個月股價為$25，就能買入400股；第二個月升至$35，就能買入286 股；第三個月跌回$30，就能買入333股。

總結這三個月，投入了的資金為$30,000，累積股票為1019股，平均買入價為$29.4。

由於月供股票每月投入的金額相同，因此當股價上升時，買入的股數自然減少，而當股價下跌時，就自然會買入較多股數，如同自行調節一樣。

要注意的是，由於每月持續投入資金，因此一定要選優質股，長線投資，同時要以儲股票的概念進行，最少持續供3 年以上，之後持有5年以上。

你去銀行或證券行先要開一個證券戶口，然後就登記話要做「月供股票」就得。

至於小米（1810），有質素的，你預$17以下較合理現價如想入，小小好了，或等回翻D先。

------------------------------------------------

Q18128：

你好呀。我想問下呢，我宜家35歲。自己係做生意的。每月既收入其實都好唔穩定，但平均會有10-15萬一個月番黎。

我巳結婚，冇計劃要小朋友。想係10年內可以財務自由，約有3萬蚊既被動收入。

現有一層已供滿既工廈物業。約350萬。
另外岩岩上年買左層樓花，21年2月會收樓，諗住做9成按揭。月供約$20000。

有與家人借貸。每月還$23000。10年後還清。另外月供儲蓄保險$10000，2023 年供完，約可取回100萬。

股票方面如下：
現時月供：約供左1年。
盈富$10000
中電$10000
電能實業$20000
港鐵$10000

另持有：

2500股HSBC（平均$52.8）
6000 股中國銀行（平均$2.93）
100000股正通汽車（平均1.17）
5000股大快活（平均$20.3）
10000股深圳高速公路（平均$10.8）

想問下我依個組合點樣呀？可以點改善好，現金約50萬
哎。打少左持倉。

我重有20000股香港電訊（平均$11.62）
唔該晒你

龔成老師：

你現時持有2物業類別，因此在財富配置上，應該著重翻股票。

由於你35歲，年齡唔算大，加上離財務自由的目標有10年時間，因此，其實你投資上唔需要太過保守。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股只能小注。

因此，匯豐（0005）、香港電訊（6823）、電能（0006）、中行（3988）、中電（0002），以你的年齡來說，並不適合。持有不是不可，但不應成為財富組合的核心。你可以持有，但之後唔好再加注。

你可以考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。

現時大市處合理區，可以一邊投資一邊留現金，$50萬唔好用盡，動用部分好了，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q18129：

你好龔sir，Follow左你一排 見好多人跟你學野 我今年19歲 草左十幾萬但放左系度

想學投資錢滾錢 但吾太識揀同吾識點運作 有咩有用既資訊可以比到我？thanks

龔成老師：

你要做三樣野，第一，增加知識，你要學理財及投資的知識，記住，投資並不是坊間的炒炒賣賣，你要從書本或課堂上認真學習。

我會建議你睇《股票勝經》，如果無知識就去投資，就好難賺到錢。

第二，了解銀行及證券行，去開一個證券戶口，並準備做月供股票。

其實兩者都可以，銀行就較方便，但手續費就較貴，證券行收費就較平。你可以先了解下不同的收費。

第三，將每月的部分資金，去做月供股票，供盈富（2800）。對初階投資者來說，月供股票是一個很好的累積財富方法，因為可避免你一次過在高位買入的風險。

原理如同儲錢，不過就不是儲現金，而是儲股票。計劃要長期進行。

另外，盈富是一個組合，適合絕大部分人投資，風險不高，長期儲貨可助你財富平穩增值，記住要長線持有。

當你在做上述三件事的同時，開始學下股票，了解下那些股票適合你自己。上述只同你簡單供盈富，當你過半年，有知識及少少經驗後，就可以利用你手上的資金，其中一部分，去投資股票。

------------------------------------------------

Q18130：

龔成老師，你認為港股跟美股的投資比例應該是多少呢？ 我港股也打算買銀河及AIA，你認為ok嗎？ 我今年24歳，希望投資一些比較進取的項目。

以及我是電影工作者，收入不穩定，有時候一大筆（夠一年或更多的開支）有時候準備另一個項目時未必有收入。我也有投資自己的項目，可是回報或多或少，比較高風險。

關於股票班，我有可能隨時要離港工作一段時間，未必提前很久知道，所以很難就時間。如果我上不到某些堂，有可能讓我在之後再補上嗎？

感謝你的分享！

龔成老師：

前先，我地最重要是投資「有質素」「自己真正認識」的企業，所以，如果你唔認識美股，就未必適合投資，只投資相關的ETF就算。

我地一般會對港股有較多的認識，但同時，可以按你自己想的平衡風險角度去平衡地區組合。因此你投資2-5成美股都可以，視乎上述因素而定。

銀娛（0027）、友邦保險（1299）都有質素，適合你投資的。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你收入不穩，可以先留一定的現金作備用，餘下先投資，這就可以。

至於股票班，我有補堂機制的，你預早同我同事講，那1、2堂上唔到，下次開班時就會補翻比你。

------------------------------------------------

Q18131：

老師您好︰近期在留意石藥集團(1093)及中國生物制藥(1177)，若疫苗成功研發，或許中國境內對於保健藥品的需求會增加

兩間企業可能受惠，請問就現價而言，1093 市盈約28，1177 市盈約58，請問那一隻的前景您更看好﹖現價算是合理區的那一部分，感謝！

本人對於金界控股3918 @8.41 市盈約9及太古地產01972 @19.52 市盈約8.5 都有興趣 請問現時算是合貨時機嗎﹖

另外大約有4萬現金，10萬股票，請問這個比率按現時股市情況算是合理嗎﹖

但其中持有中國銀行3988 @3.15 8000股、中國鐵塔788 @2.15 18000 股，佔股票組合約45%，是當時還未有投資概念時買入的，本人現時22歲，請問是否需要作出調整﹖

非常感謝！

龔成老師：

中生製藥（1177）、石藥（1093）都有質素，前者的質素與增長力會較強，不過現價就少少貴。兩隻都有長線投資價值。

金界（3918）有質素，不過中短期會較一般，始終較受旅遊業影響，但長遠正面，現價可投資。

至於太古地產（1972），有質素，現價合理，可投資。

你現時的股票與現金比例適合，暫時應持有這個現金數，等跌市先動用。

至於中行（3988）未必太適合你，因為增長力低，而你年輕。而中國鐵塔（0788）可以持有。

------------------------------------------------

Q18132：

老師， 另外想問問我現揸以下股票應長揸嗎？ 定揀d放左佢 另外我其實是剛剛學緊買股票，如果睇書應睇邊本先 ？

[email protected]
[email protected]
[email protected]
[email protected]
[email protected]

感謝你

龔成老師：

金界（3918）有質素，可長線。

交通銀行（3328）質素都算有，但不算好強，同時增長力不算高。唔建議持有太多。

贛鋒鋰業（1772）有潛力，但業務都有風險，唔建議持有太多。

中國建材（3323）都算有質素，但不算好強，同時增長力不算高。唔建議持有太多。

興業物聯（9916）質素中等，但你預股價會較為波動。

你可首先睇：

《80後百萬富翁》
《股票勝經》
《財務自由行》

之後再睇其他。

------------------------------------------------

Q18133：

龔sir你好，我不嬲有跟你買開福壽園，多謝你嘅介紹，我之前係$6入貨，而家長線投資，暫時只會加注，唔會出貨。

見到佢有一隻對手安賢園922。財務比例當然冇福壽園咁靚，但都叫做年年有錢賺有現金流，但係驚見佢五年股價跌咗九成，又要供股。

唔知老師有冇研究呢隻股票，點解會落得如斯田地。

龔成老師：

福壽園（1448）是優質股，可長線。

雖然安賢園（0922）都是同業，而我地分析股票時，一定要個別分析的。

這股試過合股供股，而現金流時好時壞，加上規模好細，未必有競爭優勢。

我無仔細分析這企業，但初步分析只是一般，唯一值得留意就是行業。

------------------------------------------------

Q18134：

您好 龔sir ，自從上次問左你投資意見之後，一直都有很好的效果。

依家有新既人生規劃，所以想再黎問下你意見哈哈，多謝你不厭其煩甘答我地問題～

依家有18萬現金，股票有20萬左右，之前聽你意見一直有供股同投資潛力股，依家有少少成績。

目前股票組合：

066 @ 1700 股 －供股中 ＄1500每月，平均價＄44買入，中間有低價買入高價賣出

2800 ＠ 1500 股－分注買，平均買入價＄27左右
1299 ＠600 股－分注買，平均買入價＄74左右
285 ＠ 1000股 本身有4手已持貨很久，平均買入價＄15，最近倍升放左一半，仍持有2手

因為小朋友年底出生，下年想休息一年照顧小朋友同埋完成個學位，再返回工作。

有沒有可能以目前的資金，可以令下年有少少的被動收入以幫補下，會唔會太大想頭？

現時工作月入3萬，扣除所有支出每月可儲15000，今年會工作至12月，加上產假等，下年2月會正式沒有工作收入。

另外比亞迪電子，想問下是否可以放，換其他潛力股，因為本身已賺，但這股波動大好像合適長揸。

同埋我現時手上股票價格算不算貴？現在好似跌左好多

感激不盡

龔成老師：

現時你的持股，都是有質素的，可以長線持有，股價升一倍放一半都是可以運用的策略。至於餘下一半的比亞迪電子（0285），建議你持有，因為你組合無潛力股，因此點都要在配置上，持有少少潛力股，你唔理佢就得，目標是持有3年。

至於另外的3股，合理價，你持有就得，唔好太著重中短期股價，無意思的。

現時你的現金與股票比例，無問題。

由於你半年後會無收入，因此你應該多留現金，當見到大跌市時先運用資金。如果之前有月供股票，金額唔算多，就可保持。

------------------------------------------------

Q18135：

老師，想問下我睇完80後的百萬富翁之後，應該睇財務自由行還是股票勝經好

還有之前$152入了 9999 我應該走嗎？想把資金都轉去盈富基金

龔成老師：

如果你想學股票，可以先睇《股票勝經》之後就睇《財務自由行》。

至於網易（9999）有質素的。

先講講佢基本業務，佢創立於1997年，為用戶提供優質的內容和服務。以中文門戶網站起家，並推出了至今仍在發展的媒體及電子郵件服務。

2001年，戰略擴展到在線遊戲業務領域，根據App Annie的數據，按2019年iOS 及Google Play綜合用戶支出計算，集團現已成為全球第二大移動遊戲公司。

2006年， 推出有道業務，後已成為在紐交所上市的智能學習平台；2013年，推出音樂 流媒體平台網易雲音樂；2016年，開設電商平台嚴選，迅速成長為一家主流的自有品牌商品平台。

佢而家提供超過140款手遊和端遊，涵蓋遊戲類型廣泛。集團並內部孵化並發展出一系列創新且成功的業務，包括智能學習及其他業務，如音樂流媒體平台、自有品牌電商、互聯網媒體、電子郵件服務等。

整體上，佢業務有一定的優勢，以及仍有增長力。

不過，現時唔算平，同時市況波動，因此唔建議太進取，如果你只是持有小注，持有是可以的。當然，這股的波動性會比盈富（2800）大。

------------------------------------------------

Q18136：

老師，想問382中滙集團質素優質嗎？現價pe 19倍，我估算為合理區中上部，請問正確嗎？中滙好像比楓葉教育更有潛力，想買入長線持有。謝謝老師

龔成老師：

中滙集團（0382）佢係中國提供民辦高等教育，現時於廣州運營兩家學校（華商學院及華商職業學院）。

睇翻佢的資料，佢主要提供本科課程及專科學歷課程，包括會計、金融、經學濟及商務英語。

亦係澳洲墨爾本營運一間學校（澳洲國際商學院），提供職業教育培訓課程及非學歷教育課程（如短期遊學課程、海外留學生英語語言強化課程、職業培訓課程及文化探索課程）。

財務數據方面不差的，業務發展正面，不過由於上市年期唔算耐，因此分析時的參考價值會減。整體都有質素的，相信長遠前景正面，你預現價合理區中上部，小注投資都可。

------------------------------------------------

Q18137：

阿 sir, 本身我同屋企人現在住已購買的公屋，但因有些家庭糾紛問題，家人打算賣掉現在的公屋（估計值260萬至300萬), 之後搬去另一處

我有兩個想法，想問你意見

1) 賣公屋後去買樓 （買約400萬的樓）

2) 賣屋後去租屋，多出的錢去另一處投資

想問哪個方向比較有效去累積財富，因主要供樓是我本人，父母亦已半退休，所以想為將來打算下

謝謝解答

龔成老師：

買翻一層私樓較好，因為長遠你地都要住，如果長期租樓，你地會面對「租金與樓價」長期向上的可能，因此，你地會較為不利。

當然，你地要計好數，堅持「供得起」的原則，就可以買。

------------------------------------------------

Q18138：

老師月供股跟買碎股的好壞插在哪裡呢？

因我的證據行是用富途，可是我用了以後才知道他們無法用月供股，這樣我就只能買碎股了

龔成老師：

其實分別唔太大的。

月供的好處，就是「固定金額」，因此可以自動調整買入數量。

例如，每月以相同金額$10,000 買入盈富基金（2800），假設第一個月股價為$25，就能買入400股；第二個月升至$35，就能買入286 股；第三個月跌回$30，就能買入333股。

總結這三個月，投入了的資金為$30,000，累積股票為1019股，平均買入價為$29.4。

這樣，會比你以每月買入固定數量，月供有較好的價格平均效果。

------------------------------------------------

Q18139：

龔老師，真的很多謝你常常回覆問題，我這些小問題對你來說實在很簡單，但於我卻是幫了一個大忙。實在非常感謝你。

1 。因我媽放了十幾萬在我名的戶口內，之前只做定期，但現在息太低，所以想買收息股，0435，0778，2638，現價ok嗎？

2。 恆生00011，現在之投資價值如何？因做開月股，但聽人說現在看淡銀行股，而我又想現在香港之經濟環境銀行之風險是否比之前大？需否減少月供？

3。阿里巴巴9988，合理價位是多少？它與港交所388，那個較有投資價值？

再一次多謝你的解答，謝謝

龔成老師：

1）可以。你可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）都可以。

2）恆生（0011）的賺錢能力比過往略減，不過仍是有投資價值的，現價合理。但就以收息為主，增長力唔算強。

3）兩隻都有質素，可長線。你預兩隻都略貴，阿里巴巴（9988）的增長力會略好，如果跌1成會較合理。

------------------------------------------------

Q18140：

想問問「分拆上市」既野：太古話今年業績受國泰影響，咁國泰自己上市，但太古股價又受國泰影響，咁咪double count左？分拆左上市唔係應該分開2條數咁睇？
I mean分開2間獨立公司&會計上互不相關

另外, 我想問點解我見你成日推介太古地產，而唔係太古公司？

太古公司是否可以做到Risk Diversification? 你prefer太古地產係咪因為唔睇好太古其他業務(ie國泰/飲品/航海)? 同埋想問太古A/太古地產幾多錢進入平宜區？Thank you!

龔成老師：

因為太古（0019）是國泰（0293）的大股東，持有佢相當數目的股票，當國泰的股價上落，以及生意與企業價值向下，太古自然會受影響。

太古（0019）質素一般，雖然有多個業務，有風險分散能力，因國泰始終會令佢受不利影響。

而太古地產（1972）則有質素，因為地產始終是較有價值的資產，加上佢無持有國泰，因此對佢無影響。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q17161-Q17180）

Q17161：

老師，我48歲，上堂老師都講過同一系列不能超過30%，唔知點解我對12恒地有偏愛，點算好？如果企業不變差月供3至5年後，再供其他股票可以嗎？

今個月已加2000 元月供2800， 其他不变，等機會再買入2018. 1810. 1928.1212.66. 請問老師這5衹股價哪衹優先買入？Thanks !

您好!老師，我投資組合里沒有水桶1潜力股，想添加少量1810,1177可以嗎？

水桶2平穩增長股較多，水桶3收息股衹有少量5，144，我想增加多1隻778，我個年紀這個組合適合嗎？老師有其他建議？多謝!

龔成老師：

的確，恆基（0012）是不差的，只要你唔過度集中就得，長遠，我都睇好佢，佢持有的農地，價值將會慢慢釋放，這不是短時間，但長遠會發生。所以，你應該更長線持有。

恆基是綜合企業，業務多元化，有風險分散的作用，但恆基系的股，都不能過多。

至於這5股，你可以考慮金沙（1928）、小米（1810）。

小米及中生製（1177）可加，後者要慢慢分注，因為現價唔平。

你48歲，水桶3可以加，但仍不用太多，水桶2是核心。你加入置富（0778）是可以的。

------------------------------------------------

Q17162：

老師，國泰預期要2023年才回復正常客運，係咪反映大籃籌公司都會預期呢3年大市都差？改派息政策/減息會否成大勢？

好耐無買書，今次想買襲sir既書學野《5年買樓》. 不過已經唔係90後/00後。

龔成老師：

相信航空業的回勇期，會比其他行業慢，所以，大籃籌公司都會預期弱1、2年，但之後會開始穩定。如果這些企業的盈利明顯下跌，或出現虧損，當然會影響派息，但我地唔好太著重中短期不利情況，要睇長線。

《5年買樓4部曲》唔單止比90後/00後，其實所有有意置業的人都適合，只不過，90後/00後是最需要睇這書的。

------------------------------------------------

Q17163：

我30歲，現時因為本好細
係咪唔適合放收息股

睇到d同學仔要月息有1萬
都起碼要200萬以上

如果而家得30萬 放係收息股應該好難儲到第一個100萬

龔成老師：

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

所以，你30歲，這刻唔需要考慮收息方面，集中力量去令財富有增長。

其實你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先。

------------------------------------------------

Q17164：

感謝老師忙碌抽空回答，想多問一個問題，因為我自己猶豫中， 如果我每個月月供$10000去盈富基金，堅持五年，真的可以達成有一百萬嗎？

我意思是本金加回報，我想問如果我月供盈富基金， 賺取既回報係咪咁多年既利息同股價？

咁如果多年後利息是有回報，但我咁多年買入價有很多都蝕錢，不是一樣沒有回報嗎？只是賺了利息，但股價蝕錢怎麼辦？

龔成老師：

月供盈富（2800）是一個穩健的做法，但要5年滾存到$100萬，要睇到時市況。如果你每月供$10000盈富，連股息計，預期5年有$80萬-$100萬。

你的回報，就是多年得到的股息，以及股價的升幅。如果到時股價下跌，你的確會出現虧損，不過，長遠而言，盈富是平穩加有基本增長，如果你當時見到虧損，只要唔好賣出，等大市好翻就得。

如果你想提高回報，就要將部分資金，投資其他股票，同時要有把握時機的做法，因為月供是一個穩健的做法，但缺點是無法足到低位，因為佢將買入價平均左。

所以，你可以部分資金供盈富，同時部分留現金，以一手手選股模式投資，但這部分，要求你有較多的投資技巧，你可以因應自己的能力決定是否進行。

------------------------------------------------

Q17165：

老師你好，想同伴侶開始儲錢，希望5年後上車。
我地每人儲$6000,

$12000 全拿來供股，還是一半做定期比較穩陣？
如月供股票5年後套現，有邊隻介紹？感激！

龔成老師：

你可以利用這5年去合理滾存財富，投資一些較穩健的股票，雖然增長力不算最強，但風險就唔算高。

你可以做月供股票，每月$3000。

你可以考慮盈富（2800）$2000。

另外再加1隻（每隻$1000）：銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）、希慎（0014）、太古地產（1972）等，你可以了解下這些股票，然後從中選股。

至於每月餘下的$3000，就儲現金先，如果大市有明顯的下跌，你就可以動用這些現金入市。

不過，到了準備買樓前的1、2年，你就要開始留較多現金，慢慢減少投入股市的比例，到時再定相關的策略。

------------------------------------------------

Q17166：

老師,想你講下3690美團及3933聯邦製藥 ,有D想入呢2隻,謝謝~

龔成老師：

美團點評（3690）我唔敢睇少佢的業務，因為真的業務巨大，同時增長快，不過，佢仍是有危有機的股票。

業務較新興，發展力有，但估值難，市場對佢的睇法不一，這一定會令股價十分波動。

只可以話現價唔平，但貴唔貴，的確好難講。如果投資，不是不可，但就只能在現價小注。

聯邦制藥（3933）不差的，但盈利就有少少波動，股價有時上落都大，因此要留意翻。

佢從生物發酵開始集醫藥中間體、原料藥、藥物制劑、藥包材生產等，發展力是有的，但未必是高增長型，現價合理，分注投資都可。

------------------------------------------------

Q17167：

老師你好,因為感到自己財務狀況十分混亂,望老師比啲意見

本人23歲,月入$17700,欠財務公司$80000,分24個月,每月還款$4900,另每月家用$6000。

自己希望可以盡快還清債務,亦希望能夠5年內置業,因此想再次進行月供股票,每月$2000比亞迪。

請問老師可唔可以比少少意見我？
thanks

龔成老師：

對，你應該這刻保持還錢。見標是兩年後，你可以真正開始累積財富。

這刻，都盡力去儲錢、投資。

如果可以的話，每月要儲到現金$4000，其中$2500月供股票，盈富（2800）$1500、比亞迪（1211）$1000，這是較穩健的做法。

------------------------------------------------

Q17168：

老師 恆大健康買唔買得過

龔成老師：

恒大健康（0708）是有潛力，有風險的類別。

佢主要於中國從事提供健康管理服務、經營國際醫院、養老及康復產業、醫學美容及抗衰老業務，亦從事研發、生產及銷售新能源汽車科技業務。

都是較為新興的業務，因此潛力度是有的，不過，同時業務有不確定性，企業仍在燒銀紙中，估值難，這一定會令股價波動，所以投資要好小心。

這刻，小小注好了。

------------------------------------------------

Q17169：

1066 威高點睇?
便宜區幾錢?

龔成老師：

威高股份（1066）主要從事研發、生產及銷售一次性醫療器械產品，以及於中國經營融資租賃及保理業務。

業務發展不差，有增長力，但現價就唔算平，算是一個略貴的價位，要跌10%先合理。

------------------------------------------------

Q17170：

老師 你覺得我下年出國讀有關finance嘅master好唔好？
可能要40萬 屋企人想我讀 因為就業前途會好d 但屋企唔係話有錢 如果就係出去讀

可能要賣股票 覺得俾咗負擔俾屋企 同埋自己其實唔希望打一世工

想自己投資加可能網上做d生意去做到財務自由 唔知投資40萬落master值唔值得 如果有master打工慢慢晉升我知係穩定嘅

龔成老師：

最緊要是長遠的發展，你先要了解翻，當你出國讀有關finance嘅master，對你的長遠收入提升多少，你要較明確有這方面的答案，如果你唔知，就唔好讀。

你要明確知道，這個決定，要對你有明確的發展幫助，先會去行這一步。

如果網上做生意，不確定性較大，其實你可以這刻開始試，如果試半年都無起色，可能暫時仍未能有突破，暫時打工可能較好。

相反，如果半年有一些起色，你已經確定唔需要再讀上去。

------------------------------------------------

Q17171：

老師想請教一下。我明白複利的威利有幾強。但我理解唔到我買入股票長線投資後，複利如何運作？

我係不停買入一隻優質股，之後每年派息，我再買入返同一股，不斷滾？咁我有d只買入一手果d點？等佢高價位我沽出？謝謝

龔成老師：

我地投資股票的回報，主要是透過股價增長，以及股息的派發。

就算你唔賣出，但只要股價一直上升，這已經是複息的原理，例如騰訊（0700）、港交所（0388），都是幾蚊上市，之後上升100倍，你唔需要買入賣出，只要買入並持有，財富已經有理想增長。

另外，如果一隻股票派股息，你都可以再投資落這股票裡，同樣是一個複息滾存的模式。

------------------------------------------------

Q17172：

老師，我現在用$16000月供股票，$18500供樓，另儲現金$20000.

一年儲得現金$240000,但扣除年金同交税，實質一年儲得現金只有$140000,仲末扣旅行費用。我覺得有啲失落，因儲埋都唔見一大半

龔成老師：

其實你的情況已不差，理財是一個長期過程，保持進行就得。

你有部分投資投資在股票及年金，所以餘下現金未必多，但唔需要太比這刻的數字影響心態，規律去做就得。

其實你大致分配都平衡。如果想財富有更大的增長，就要從新的收入來源著手。

------------------------------------------------

Q17173：

阿sir, 今次想問你一些本質上問題。你點睇利豐（494）曾經係一隻藍籌股風光過然後股價係過去10年係咁跌跌到得返一蚊最後仲私有化埋？

當年10幾廿年前佢應該符合一隻叫做優質股嘅條件，個人覺得佢嘅衰敗原因係因為班管理層墨守成規唔識得革新轉型比阿里巴巴打沉

龔成老師：

兩大因素：「大環境」、「管理層思維」。

這股的確強過，當年是優質股，但當大環境改變，行業變成夕陽，質素向下，如果之前買左，就一定要在當時止蝕。

大環境對佢不利，佢唔需要比阿里打沉，因為佢終會轉差，這是結果。

其實在多年前的年報，見佢生意連跌幾年，已知佢面對一個好不利的環境，因為佢以「中間人」自稱，但當網絡發展，這角度淡化，夕陽行業，已經知企業面對好大問題。

不過，見管理層改變的心態唔強，雖然佢地都有試過變，但只是一些少變，無做全面的改革，當大環境更不利時，已經更難翻身。

------------------------------------------------

Q17174：

龔sir，家人想買樓(~400呎)，由小弟供樓做樓奴
小弟月薪21k 想每月供款約11k, 家用4K, 剩餘再刪減洗費

想請問實時時勢
供股還是供樓財富會增值得更快？

同埋呢個時候樓價下跌空間大唔大？
感激

龔成老師：

香港樓，中短期有可能回落，因為香港經濟將會向下，這會對樓市有影響，不過，下跌只是有限數，因為潛在的需求實在太大。

而在長遠計，香港樓會向上。

是否買樓，要睇你地的實際需要，如有需要，都可以考慮。不過，你要供好大部分收入，你要好好為自己想清楚，與家人好好傾下。

以這刻的股市投資角度，買股票會比買樓升得較快，不過，買樓可以利用借貸，令回報有所放大，所以不是不值得。

最緊要睇翻你地的實際需要，以及你地的供款能力。

------------------------------------------------

Q17175：

老師，請問你對於投資印度，越南基金有沒有什麼看法？有朋友介紹說有很大潛力

龔成老師：

這些都是較新興的市場，潛力度是有的，但唔建議太大手投資，因為有時新興市場可以好波動。

越南的發展會較好，因為佢的角色似中國，當中國成本增加，以及如果外國想將部分廠轉去其他地方，就會去越南。至於印度，發展雖然有，但未必如想象中強，加上好多基建配套只是一般。

------------------------------------------------

Q17176：

老師你好，再一次關於理才方面向你請教
我兩公婆現在月收入25000左右，但疫情過後收入會去到35000~40000左右

每月必要開支包括貸款開支約12000，其中4500明年還清，其餘到2024年。

每月可用資金約15000左右。

手上股票約10萬，分別1928金沙中國，880澳博，及2322晶苑國際，現金20萬左右，希望盡快賺到首期。

請問，我既財富部署應該係點？謝謝

龔成老師：

如果可以的話，最好是加大儲蓄，提高你手持的本金。

至於現時持有的股票，可以優化，金沙（1928）澳博（0880）是同行，其實唔應該太集中同一行業投資，要建立一個平衡的組合，所以之後可以增加其他行業股票。

晶苑國際（2232）質素一般，收息的確可以，但增長力不強，如果你想累積首期，應該投資有增長力的股票。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先。

你可以考慮盈富（2800）、恆基（0012）、中銀（2388）、港鐵（0066）、粵海（0270）、領展（0823）、港交所（0388）、希慎（0014）、太古地產（1972）等，你可以了解下這些股票，然後從中選股。

現時大市處合理區，可以一邊投資一邊留現金，暫時可以動用$10萬現金，餘下$10萬現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q17177：

成哥，我依家有月供1000蚊1177，繼續進行就OK

我真係覺得你好叻，我跟你買股票，十隻有9.5隻都係win，0.5係我心急早放。感激

龔成老師：

中生製藥（1177）保持進行就得，不過月供金額唔好太大注。

哈哈，其實我都會犯錯的，所以最重要是建立一個平衡的組合，這已紜能贏多輸少。

另外，我相信你掌握到長線投資，所以有唔差的回報，其實這亦是投資的原則，買入優質股長線持有，所以令到你有唔錯的回報。

保持學習啦，我都用超過20年去學投資，無人一開始識，但可以在學習與經驗中不斷進步。

------------------------------------------------

Q17178：

大師，現在我已經四十七歲 而家開始
會唔會太遲呀？

龔成老師：

當然唔會遲，你這年齡，離退休仍有十幾二十年，在投資上是一個理想的時機。

不過，你在投資上就不能進取，建議你投資「平穩增長股」，選擇有質素，風險不高，平穩型的股票，這類股雖然不是爆升型，但風險唔算高，因此適合你投資。

你可以考慮盈富（2800）、銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）、希慎（0014）、太古地產（1972）等，你可以了解下這些股票，然後從中選股。

另外，建議你多增加投資知識，在選股、企業估值、投資時機上落功夫，對你長遠財富有好大影響。

你可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q17179：

老師，778，435多数持有什麼類型物業？

龔成老師：

置富（0778）持有的，都是一些大型屋苑的商場，例如沙田置富第一城、天水圍置富嘉湖、馬鞍山廣場等，都是民生類別，對經濟週期的影響，相對較少。

至於陽光（0435），寫字樓及商場各佔一半比例。

兩隻都是有質素的房託，收息無問題，不過增長力就唔算好強。

------------------------------------------------

Q17180：

阿sir, 請指教。香港有好多人租屋，租金已佔人工一半，因為身體/家庭原故，也沒工餘時間增加收入，如何是好呢？

龔成老師：

香港的確是困難的，面對這類情況，只有盡力用餘下時間增值自己。

因為當前的儲錢能力已有限，所以，應該集中「提升自己」，令自己更加值錢，提升將來的收入，這是較好的做法。

例如利用空閒時間去睇書、學習，就算每天只用半小時搭車的時間，去提升自己，慢慢都會進步。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。