【龔成問答信箱】（Q21781-Q21800）

Q21781：

龔sir, 我係你舊生，有關於現金流嘅問題想請教，我偶爾聽到你評論一些公司現金流強，請問現金流強、普通、弱有什麼指標?謝謝你百忙抽空回答

龔成老師：

投資者會分析企業的現金流量表，在年報可以找到的，當中會分為「經營活動」、「投資活動」、「融資活動」3部分，而我地會集中分析經營活動部分。

如果企業的經營活動現金流保持強勁，反映企業憑做生意，持續保到理想現金流，除了反映業務不差外，企業得到大量現金，無論發展，又或派息，都是有利因素。

你預保持年年正數，就是現金流強或普通，而當中的數字大，就是強勁。當然，我地仍有好多因素分析，例如現金流量表的各項目，盈利的情況等。

------------------------------------------------

Q21782：

龔老師你好丫，我係你嘅忠粉，我有問題想請教你的‍

我現時28歲，剛上車一年，地點係粉嶺聯和墟帝庭軒，買入價係550萬。

想問下黎緊幾年個區樓價升幅大唔大？因為我見附近又有新盤開賣。

我想過幾年轉返出沙田或荃灣的地方住。所以先上車再換樓，咁樣做岩唔岩丫

龔成老師：

坦白講，粉嶺聯和墟始終離市區有距離，就算去翻地鐵粉嶺站，都要坐小巴或行一段時間，長遠的升值潛力不算大。

當然，聯和墟有點似一個小鎮，如果工作地點不是市區，從本身的生活配套上，其實不算差，因此不是劣質。

你擁有一個物業，都算是處於「物業追物業」的狀態，不過選擇物業就不是最好類別，但都不是差。現時你物業，可持有的，到你日後，可轉翻出去沙田或荃灣，無論自住定長遠升值能力都會較好。

------------------------------------------------

Q21783：

龔老師你好。我今年已32歲，一直都沒有理財概念，只係被動地儲錢（即係用剩先儲，但我唔買名牌嘅）。

上年好不幸地被裁員，剛剛搵到工，但人工只剛剛夠食住行+俾屋企人藥錢（年頭驗到有事），差唔多無剩。而我亦只是個文員仔，唔望會加人工，就算搵新工都唔會加到好多。

我嘅人生好似入左個死胡同咁，晚晚臨瞓時都眼濕濕，唔知未來點算。

目前儲蓄只有20萬，深明擺係銀行只有慢慢眨值，想請問有什麼資產增值的方法？

龔成老師︰

現時大環境唔係咁理想，就業市場，以至人工收入受到影響，係正常，唔好諗得太負面。大環境我地係改變唔到，但個人心態係可以改變。

你先要了解自己未來工作發展目標，講緊係長線，10年以上。

再睇翻，現時工作，可唔可以幫你達成目標。如果唔得，那這份工作，純粹只過渡性。你就要工作之餘，努力為你目標工作做準備。

學習相門知識、上相關課程、或者做有關兼職。目標係當市道轉好時，這些經驗可以增加你成功就職理想工作的勝算。

至於財富增值方面，你要一改以往金錢觀念。想做到理想財富增值效果，每月我地係先要儲起一筆錢投資，到真係有錢剩，才作休閒消費，概念是跟你以往係倒轉。

我建議你有時間的話，可以找些增加收入方法，例如兼職、網上小生意等，目的係每月可以開始空出一定資金，作投資增值。

以你32歲，可以選擇一些「平穩增值股」+「潛力股」作投資目標。

到你每月可儲到錢時，你可以每月先用一半儲蓄做月供股票，另一半就先儲起架策略。

由於你投資知識不高，因此可較集中在平穩增長類股，至於潛力股，只宜小小注。此期間，你最好是努力提高投資知識，才慢慢增加翻潛力股比例。

餘下現金就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

至於20萬，我建議你扣起半年開支和屋企人藥錢。有剩的一半，你可以分注買入上述股票，餘下同樣等大跌市機會。

------------------------------------------------

Q21784：

龔sir你好，我今年年初開始接觸到你呢個Facebook page，好有啟發，慢慢開始改正我投資觀念，仲一次過買左你幾本書希望增加投資知識。

有兩個問題想請教你：

1）未認識你呢個網之前只係靠屋企人一d介紹買入一d股票，所以唔識睇“平貴”同優質程度去揀同買，宜家手上股票組合需要慢慢調整，

其中手上持有696呢隻股票，而且係組合入面都佔左幾多（大概20萬入面嘅5萬）。我睇過你嘅書知道呢隻股票有佢嘅獨特性，但我當時2-3年前嘅平均買入為$21-22，

宜家佢股價一路都上唔返去。我因為某d原因暫時唔可以再投入額外新資金去買股票，可以動用黎買嘅現金只有萬五左右。如果我得戶口入面個二十萬黎增值財富，

咁我應該繼續放係度繼續等待定先賣出部份黎增加現金同買其他股票增值？

2）另外，你係書度提過可以留意係生活之中自己喜歡嘅野同埋身邊嘅潮流黎發掘潛力/優質股。最近香港人都係度談論Viutv/mirror/error，

我都係一份子。請問龔sir點睇電盈前景？我睇過佢地係電視業務之前都仲蝕錢，但已經慢慢開始有改善，如果佢地咁嘅走勢，

會唔會有潛力突破到一直以來嘅“穩定”？
先謝謝你！

龔成老師︰

1) 中國民航信息網絡（0696）係資訊服務及網絡管理解決方案商，目標市場為中國航空客運及旅遊行業。

例如電子旅遊分銷系統、機場旅客處理系統等，過往業務穩定，有長線投資價值，不過不是高增長類。

你買入價有少少貴，但又唔係好貴，可以守。若你係年青至中年人士，這股適合，照持有就可以。但由於佢佔你組合較重比例(個股應維持少於組合15%)，我建議你都部份，換至其他優質股，咁會較好。

記住，我地投資股票，就等同你投資緊一間企業，一盤生意。你必需了解佢業務、賺錢能力、行業發展、財務狀況等，才去做決定。

如果你而一刻投資經驗較淺，不懂定平貴。你可以用分注或者月供模式去儲貨，去平衡買貴貨架風險。

現時大市只在合理區，你餘下5萬蚊就先儲起，等大跌市才出手。

2) 生活選股法，係其中一個選股模式。因為這些企業和你生活息息相關，所以你較易了解佢當中營運模式和優勢。

但這只是初級，之後我地就要進一步審視佢本質、行業未來發展、財務狀況等等，才可以決定，是否一間值得投資的企業。

電盈（0008）雖然業務算穩定，但由於負債較多，都有一定風險。

VIU TV最近的確發展不錯，但當你再仔細分析佢年報。你會發現媒體部份，其實佔佢收入比重不高。

因此，就算佢有較理想發展，當整個集團盈利幫助，唔會好大。

這股作為收息股，可以，但增長力不強，若你較年輕，就不宜持有太多。同時負債多有風險，不建議大手投資。現價合理的。

雖然這隻算不上係優質股，但你這個思考模式係正確。只要你再努力學習更具體的投資知識，和累積經驗，相信你長線會有唔錯成績。

------------------------------------------------

Q21785：

龔成老師你好，一家準備移民到英國生活，賣出香港物業後可預計套現800萬。

準備到當地買一層$200~300樓自住，其餘想投資賺取生活費，因為未必會在當地工作，所以需要現金流。

請問：用50%~70%資金買英國樓收租，其餘買收息股好唔好？

如果買收息股，應該係買英國股？還是買港股比較好？

因為對英國股票唔熟悉，只有留意港股，阿sir有無英國收息股推薦？

我見阿sir話個組合要平衡，同一股不能太多，咁一般收息組合應該買幾多隻股票？

(好難搵到太多唔同行業又有6%以上既收息股）例如3988 1398 939 都係銀行業

多謝阿sir解答

龔成老師︰

買入自住物業後，用50%~70%資金買英國樓收租，其餘買收息股架策略，係可以。

但你投資英國樓時，緊記只可以投資一些真正了解的項目，堅守「不認識就不投資」的原則。

確保自已真的已了解當地的物業市場、租務市場、法例、經濟發展。而物業有潛力，租金回報率又理想，咁就可以。

另外，唔好用晒全數資金去投資，要保留一部份現金在手，大約半年開支左右(你可自己按情況調整)，以備不時之需。

至於收息股，其實你買美股、英股、港股都係無問題。你只要睇翻你自己的認識程度、交易成本、稅務成本等，去做決定就可以。

我自己主力研究港股，所以比你建議，都會集中係港股。由於現市大市只係合理區，有不少優質收息股，都無6%咁高。

但我地唔會知，未段一段時間，佢地會唔會回到6%以上。所以，我地只可以策略性地，因應平貴，係現階段先入小注入貨。每有回調，再慢慢加注。

但正如你所講，係配置股票組合時，唔好太集中某行業，以免出現過度集中性風險。相同行業不可佔組合多於30%，而單一企業不要高過15%。

特別要留意係銀行業，佢營運模式較特別，風險會比一般行業為高。必需堅守30%這個準則，如果可控制在20%以內，會更好。

收息股︰港燈（2638）、香港電訊（6823）、恆生（0011）、工行（1398）、置富（0778）、陽光（0435）、深高速（0548）等，大多有5%股息

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

（你可睇下《50穩健收息股》當中仲有好多）。

最後，你要留意英國係收取股息時，係會抽稅。係計算你實際現金流時，你注意這點，以免高估左實際股息回報。詳細計算方法，建議你上官方網頁，或者向當地稅務顧問查詢。

------------------------------------------------

Q21786：

你好，龔成老師，我今年34歲，獨女，屋企供滿左層居屋市值大概480萬，月入4萬，之前因為種種原因幾乎沒有儲蓄。現時有5萬現金，MPF 30萬，

黎緊每月可以儲1.5萬

1. 希望可以55歲退休，想之後每月有最少2萬現金流，請問我應該可以點步署？

2. 屋企人曾經提出以現有單位再買私樓，但居屋原來不能再按，所以唯一方法就係賣出現有單位再另外買私樓，請問長遠計係咪私樓會保值啲？

老師有冇建議我可以點做？點樣安排會好啲？
多謝龔成老師

龔成老師︰

1) 如果你希望55歲退休時，每月有2萬蚊現金流，以股息率6%計，你需要本金400萬。

你可以用「平穏增長股」 + 「潛力股」的組合，去累積這筆資金。現在你每月先用5成儲蓄，即$7500做月供。其餘先儲起，用一邊月供一邊儲蓄的策略。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

2) 居屋雖然投資價值，一般都遜於私樓，但好處係投入資金較少。可以用空出資金，作其他投資之用。

由於你這間是自住屋，是否配合你長線生活需要，會比佢保值能力更重要。除非你現時自住樓，真係好唔理想，配合唔倒你長線生活要求。否則，我唔建議你沽出。

若你想投資物業，你可以先用優質股增值，到一定金額才買物業投資。

------------------------------------------------

Q21787：

早晨龔sir,我除左月供apple外，頌可以月供咩股票可以做到五年連本賺200萬，月供資金有1萬蚊其實有無咁既機會？

現持有9988兩手、823四手、6618兩手、966三手、BIDU 8手，Apple 26股、JD京東20股,Qcom 21股 美股都係依兩星期內先入手

現持有股票還可行？

龔成老師：

你月供apple，可以，佢有質素，無論持術、發展、品牌、銷售網絡都十分強，是可以長線持有的股票。

佢設計了各種各樣的消費電子設備，如智能手機（iPhone）、（iPad）、智慧手錶等。

而iPhone占蘋果總收入的大部分。另外，蘋果亦為客戶提供各種服務，亦是一些延伸的賺錢模式，如蘋果音樂、iCloud、蘋果電視、蘋果支付等。

由於已經發展得好大，因此，最高速增長期已過，之後會進入穩定的增長期。長遠的投資價值仍在，但要留意股價。近年大部分時間在合理區中上部至略貴的水平，如投資要分注，長線。

至於其他股，都可以持有，基本上都是有質素的。

不過，你較多比例集中在科網類別，這會出現集中風險，你要注意翻。

要5年$200萬，$10000月供，仍未足夠的，你要提高金額同時供其他股。另外，每月仍要儲到基本現金，等機會。

選股無問題，但最好平衡翻個組合。同時，在買入時，要慢慢分注，不要一次過買入太過。要同時留現金。

------------------------------------------------

Q21788：

Sir,其實到水桶3楷段買收息股，基本上長期收息，不會常常買出買入，應該選優質的企業的股息越高越好，你常推介的置富和陽光分別5.7%、6.1%

我見3988中國銀行有7.1%更多，反而很少推介是否有問題呢？

龔成老師：

其實最好是建立一個「收息股組合」，因此，幾隻都得，可同時持有。

但我地在分析收息股時，要同時考慮佢業務，因為業務將會影響佢的股價及股息變動，金融業的不確定性以及內銀的風險，比本地的收租企業，前者風險較高。

------------------------------------------------

Q21789：

龔sir。本人48歲，因健康問題已退休，正準備移民往台灣！有幸在半年前朋友介紹而認識你！

購入你的作品，有股票勝經、年報勝經、50穩健收息股、財務自由行及80後百萬富翁！

想請教，我現持有以下股票：

66 有728股 （在IPO時購入一手，持有多年有碎股！）
178 有6000股 （平均價$1.927）
270 有6000股 （平均價$13.773）
435 有1000股 （平均價$3.48）
778 有2000股 （平均價$6.98）

823 有100股 （購入價$69.9）
1398 有1000股 （購入價：$4.94）
1810 有400股 （平均價：$23.35）
2638 有1000股 （平均價：$7.77）
2800 有500股 （購入價$26.62）另開始月供，每月投入$4000

另有3067 有500股（平均價$17.66

我會繼續購入，還有50萬資金！

1.請問龔sir 我是否買得太多問種類股票？

2.需要整合一下嗎？可以如何優化？

3.另我還想購入9988及0285作長線投資！

麻煩你

龔成老師︰

1) 你現時持有種類和數量，算可以。長線計，組合維持10隻左右，會較理想。

2) 從質素上而言，你持股係無問題，可持有。但由於你係退休人士，投資選項時，我地要保守少少。

你應該較集中係「收息股」類別，因為你退休之後係無收入，需要透過「收息股」的現金流，去支援你的生活開支。

因此，你應以「現金流是否充足」作大前題，去考慮你個財富配置。現時你收息股只有陽光(0435)、置富(0778)、工行(1398)和港燈(2638)，唔算太多。

長線計，唔好太集中係幾隻身上，應建立一個平衡的收息組合，包括不同企業和行業，唔好太集中係個別股票。相同行業不可佔組合多於3成，而單一企業不要高過15%。

以下係一些優質收息股，你可以參考下。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

當然，你都可以參考我<50穩健收息股>書中資料。

如果你現有收息股，產出現金流已經係足夠應付你基本生活。你才考慮增持一些「平穏增長股」來增值，好似盈富(2800)、港鐵(0066)、粵海(0270)、領展(0823)、莎莎(0178)等。

否則，「平穏增長股」類持有現貨好了，唔好再加注。

而小米(1810)、安碩恒生科技(3067)這類「潛力股」雖有增長潛力，但波動性太高，唔適合你。現貨可持有，但唔好加注了。

現時大市只在合理區，你可以用多15-20萬，以分注形式入市。餘下的就等大跌市，才用來入貨。

但由於你將會移民台灣，加上你本身身體都有些問題。建議你先預留相關的潛在支出，才開始投資計劃，這樣安排會較為穏當。

3) 阿里(9988)和比亞迪電子(0285)同屬「潛力股」類別，波動性太高，唔建議你投資。

------------------------------------------------

Q21790：

龔成老師你好！本人想請教你有關投資方案 , 本人50歲 , 因市況不景氣, 剛被公司辭退, 待業中 , 家中有兩老需照顧及供養。

本人住公屋, 有積蓄大約25-30萬, 希望老師可以指導如何投資增值, 以維持家庭基本生活.

感激萬分 !! 謝謝 !
本人為基層人士

龔成老師︰

我地做財富增值，係需要因應人生階段、投資經驗、客觀環境等因素，去作出一個配置。

由於你暫時無收入，加上有雙親需要照顧，中短期現金的需求不少。所以我地投資前，先要保障好你生活上無問題，做好防守部份，才考慮進攻。

以你現時情況，我建議你先儲起半年基本開支(包括照顧雙親部份)的應急錢，計好數，真的「閒錢」才開始投資計劃。

你可以用「收息股」作投資目標，雖然佢增長力唔高。但派發的股息，可以為你提供穏定現金流，去減輕生活支出的壓力。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）或收息基金(3110)都可以。

如果你能承受到風險，有些更有超過8%、10%的高息股，但股價就略有風險，要自己衡量，佐丹奴國際（0709）、中石化（0386）、互太紡織（1382）等（記住，股價略波動，只能小注）。

但要留意，現時股價只是合理，未到平宜。因始資金不要用盡，大約先用一半，以分注形式慢慢入貨，餘下等大跌市才動用。

到你將來工作變得穏定，有更多空閒資金可作投資。你就可以加入一些較有增長力的「平穏增長股」，去提升翻個增長力。

但現階段，你應以維持家庭基本生活為主要目標。故先集中係能提供現金流的「收息股」身上，「平穏增長股」就暫時不要考慮。

平穏增長股：金沙（1928）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）、長建（1038）

------------------------------------------------

Q21791：

龔Sir，最近我媽媽退休，有一筆$28萬退休金，現想幫她作投資，想請教一下阿Sir

Plan A
$20萬 股票收息股投資
$5萬 作定期或買Ibond
$3萬作後備資金

收息組合
6823 (15%)
1883 (15%)
778 (15%)
6 (15%)
435 (15%)
1038 (10%)
939 (5%)
1373 (5%)
1398 (5%)

Plan B
$25萬，特選客戶優惠
放5年，每年回$6萬，5年後總共得到$30萬
途中如需提出餘下金錢，則不可再累積任何利息，並需收取3%手續費

龔Sir 對兩個計劃有什麼意見？那個較好？

龔成老師︰

整體而言，PLAN A會係較好。

如果想組合更加平衡，可以加入ＧＸ恒生高股息率ETF（3110），同時減少你部分15%幾隻股的比例，去到10%，會較好。

因為你不少選股，都有相同類別的情況，例如相同是電訊，相同是房託，長建（1038）與電能（0006）關連性都高。

PLAN A以收息股作為主力，再加入風險較低的Ibond作平衡。而且，整體回報都明顯較PLAN B為高。

當然，PLAN B都有佢好處，就係回報係更有保證。因為始終收息股都係股票，會有一定不確定存在。

你可以在風險承受能力和回報之間，取個平衡，去決定用邊個計劃。

------------------------------------------------

Q21792：

成哥，我今年一月碩士畢業，過多幾個月就黎25，一d工作經驗都無。因為讀書讀得太多，現在覺得早我兩年出黎做嘢d人好似都好好。

我自己見mt第二輪failed左， 覺得好失敗25歲已經輸俾人地同年齡好多。雖然上左你股票班投資有斬獲，但事業上確是0。

突然覺得自己全部都係0，係社會廢物。好想消失係呢個地球。我應該點算。

龔成老師︰

你現在才事業剛起步，一切由零開始，是正常的。

加上現時市道較差，未必可以短間內找到心儀的工作，但唔好咁快放棄。

同時間，如果未能找到合適工作，都唔代表無野做。你可以做些兼職，有收入之餘，可以獲得工作經驗，如果同你本科有關，咁就更好。

另外，你可以有時間，去借書返來進修其他知識。把握現在空閒，去上些有用課程。

保持個人積極態度，無論對你本身或者見工，都百利而無一害。

另外，我建議你加強一些讀書以外的技巧，例如溝通、領導、處事等。記住，無人生來就是廢物，只是你未找到自己的真正價值而已，加油！

------------------------------------------------

Q21793：

龔sir你好，我睇左你本5年買樓4部曲，想請教你

我27歲，老公30歲。2人月入大約$43000。已問銀行話我同老公收入及職業可買530萬樓下的樓按9成都冇問題。

我同老公睇緊灣仔區樓，我地睇左十幾間樓，有間心水單棟樓，賣445萬，中銀估價430萬，匯豐估400萬。開放式實用207尺，間屋四正，但42年樓。打算用首置按9成收租

樓的詳細：

好處：
間格實用四方，多窗
高層（非頂層）向東，景觀開揚有山有公園望，光猛
落樓30秒即到地鐵站（囍匯旁近合和中心)
旺中帶靜，樓下條街唔嘈（唔係對正大馬路及叮叮路）
裝修企理四正，再油油就ok
冇任何滲水情況
廁所乾濕分隔整齊
平路入大廈唔洗行樓梯級
管理費唔貴，平其他單橦樓$400-$500
外牆及大堂已大維修，來緊換升降機都唔洗業主比錢，大廈有盈餘200萬及政府津貼50萬

唯一唔好處：
42年樓齡，現在可按30年，但將來放好難放。

主要想買樓收租，現在租金下降，但都位置方便都應該放到$11000-12000。感覺間樓幾好，就算老左冇地方住係到住都唔差。

我們目標係400萬/under 400成交，都係我地budget內。灣仔20-40年樓齡較貴，而且有啲太近街市。所以比較心宜這物業，只是擔心樓齡老，但灣仔區的樓都係比較老，我需要擔心之後難放售嗎？

我們仲要睇其他樓，希望發現荀盤。感謝sir解答，謝謝！

現在我們同朋友一齊夾租新界私樓3房單位，兩人租樓支出共6300。如冇意外未來5年都會同朋友一齊住慳錢。

另外因為我未來大約5年後可能會quit現在full time社工的工作，想自己做塔羅諮詢師+part time 社工，所以襯現在工作穩定，想先上車然後遲啲放心追夢。

兩個都第一次買樓，希望將來可換大屋/再買多層。這個上車盤可取嗎？

龔成老師︰

若能做到你預期租金回報$11000-12000，租金回報率，勉強算係可以。

雖然位置係唔錯，但始終係偏舊，相再轉手較難。而且維護成本，可能都唔少。再加上，實用面積太細，連一個基本家庭生活的尺寸(約300尺)，都未到，都係扣分位。

我明白你策略係先細屋，後大屋。但要這策略成功，其中一個重點位，就係個細屋必需有一定增值能力，至少同大市同步。

你現時灣仔這個納米尺寸的單位，能否做到，我較有保留。

如果你未找到合適單位，其實你都可以用優質股，去先做住增值。加上你未來5年住屋問題，都算解決左。

除非你真係找到租金回報率理想、單位又有質素、價格都可以，才出手置業。否則，你唔需要急於一時。

------------------------------------------------

Q21794：

Sir 早晨，我上佐3堂睇埋80後的百萬富翁，開始有d投資既概念，想幫我媽媽買入水桶3既股票，發現佢原來係好多年前開佐個股票戶口，

當中有1102環能國際同埋1150米蘭站，但一直無理到d股票，雖然佢好彩當時都有買到d水桶3既股票，但原來而家呢2隻股票已經供過好次股或者係合股，

佢手上既貨變哂碎股，量唔多既，分別係500股同2000股，但而家賣又賣唔出，可以點做？

同埋我都想問個問題，劣質股係唔係可以跌破0股價或者負數？如果會，甘會點架？股東會唔會被逼補倉架？麻煩哂你

龔成老師︰

首先，持股數量多與少，係唔係碎股唔重要。我地是否持有一隻股票，最重要係睇質素。

環能國際(1102)年年虧損，無投資價值。

加上核數師意見，每年都是「保留意見」，代表盤數有機會有問題，建議盡快沽出。

米蘭站（1150）質素不太好。

佢每年的生意持續下跌，加上年年虧損，投資價值不高，建議沽出。

劣質股係可以跌到個價好細，但唔會跌破$0或者負數，所以唔會有補倉情況。

你所講的補倉，多數是一些槓桿性投資(例如︰用孖展買賣)，才會出現。一般去買正股，係唔會出現咁架情況。

------------------------------------------------

Q21795：

請問9888百度2021Q1業績公佈後最新PE9和預期PE4是怎樣理解？

有時見到靜態市盈率及TTM，又是怎樣。

龔成老師︰

我地一般會成日講的市盈率PE，就係「靜態市盈率」。
[計算︰現時市值，除去最近一年的總純利]

而「市盈率TTM」，係表達現時總市值，相對過去4個季度的純利。[計算︰現時市值，除去最近4個季度總純利]

由於年度數據，只會一年更新一次。故用季度作比對，數據會相對較新，會比較貼近現況。

若「市盈率TTM」比「靜態市盈率」細，你可以理解為，佢近季度盈利能力係有上升。但緊記，我地投資要分析長線和整體，唔好單用這個數字，就下結論。

至於「動態市盈率」，主要係預估本年全年純利。
[計算︰現時市值，除去預測本年度全年總純利。]

由於只係一個預測數字，只宜作參考。

------------------------------------------------

Q21796：

龔老師，你好。本人31歲，月入1萬5。月光族。手上無存款，年供2萬儲蓄，月供1100人壽醫療。卡數負2萬。

無家庭負擔，每月俾3000家用。自己搬出來跟男友同住5年，算普通生活不用負擔。

本身十分在意外表，定期會做facial, 已經維持13年。戶口一有錢就會一筆過買treatment ＆美容針。每月平均有2000在護膚品。

近期開始留意老師專頁，覺得自己真係井地蛙，原來大家都可以咁有錢。希望以後可以開始投資，但無方向，唔知老師有無好介紹。

雖然有睇到有相似個案分享，但大家都有積蓄... 我一無所有，所以好迷茫。原本有2萬5工作，因為疫情辭退之後，只能搵返1萬5，之前試過有輕生想法，覺得自己30歲人好失敗。

想問下開股票戶口？我應該開邊間？本身自己只有匯豐出糧戶口，但朋友分享話citi bank股票戶口比較好？

龔成老師︰

現時礙於大環境欠佳，其實好多事情都未必可以控制得到。但相信長線，疫情會過去，生活與工作都會慢慢重回正軌。現時艱苦，只係一時，唔好氣餒。

而且，有時這些不利的環境，反而可以激發我地的潛能，造就你的成功。

其實，要做財富增值，唔一定係本身好高人工，或者已有一大筆資金，才可以做到好效果。其實只要你每月有一筆閒錢，可以定期做投資增值，已經係可以。

因為你尚算年青，能進行資產增值時間較長，複息效果會較佳。只要你好好把握時間，努力學習正確投資方法，和每月努力儲錢，相信都可以做到不錯效果。

只要你這刻努力，做好理財，定目標，好肯定你過5年後，會比過半同齡人的財富更加多！

投資戶口，你可以係銀行或證券行開都得，只要佢費用合理，又方便你自己，咁就可以。

你現時還很年輕，儲蓄保險這類產品，不建議持有太多。雖然風險較細，但增長力不高，會拖慢你財富增值步伐，你要自己平衡下。

另外，你要想方法，令自己每月能空出一筆資金，作投資增值之用。

你可以考慮做兼職、做網上小生意，去增加收入。同時間，要睇翻日常生活，有無乜野不必要開支，係可以減少。

到你每月都可以空出一筆資金，就可以進行月供股票，去為自己財富增值。

你31歲，建議你用「平穏增長股」 + 「潛力股」的組合。現在你每月先用5成儲蓄做月供。其餘先儲起，用一邊月供一邊儲蓄的策略。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

------------------------------------------------

Q21797：

啊sir ，我是你的忠實讀者。我希望40歲可以做到有被動收入，不至於退休但可以財富增值。

我初學買股票，而因為老師的書。暫時都有小小的回報，大感謝！

但因為手頭上的股票感覺上太多，之前覺得樣樣都會升，就愈買愈多，有d賺有d蝕。

最近想重整一下，希望可以老師指點指點

手頭上月供︰
2800,2823,788

其他嘅就係︰
1997 ($28蚊入)
1928 ($27蚊入)
2845 (平均 $135入)
286 ($41.8入)
522 ($100入)
2388 ($22.5入)
293 (疫情時膽粗粗6.15入)

以上有好大部分都係因為老師嘅分享而有小賺，感謝

另外有一部分就蝕︰
1810 (平均28.5)
0606 (平均 64)

仲有一堆美股︰
APPL, TSLA, NNDM, ARKK, ARKF
美股收息指數
VYM, SPLG

我知道老師集中講港股，可否指點一下迷津，如何重整一下。

感謝

龔成老師︰

你現時股票數量有點多，而且都偏雜亂。長線最好集中翻10隻左右，會較容易管理。

另外，你要明白一個概念，我地持有一隻股票與否，關鍵位是企業質素、前景，不要被買入價影響。因為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心，照持有就可以。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

而且，唔好見個市越升，就越買，咁係好危險。因為市況狂熱時，不少股票個價，都會被炒高，你好易會買貴貨。

如果你對點定平貴，唔係太有信心，未來投資可以集中用月供方法，去減少這方面的風險。

港股中，你持股大部份都有質素，可長線持有。

但愛帝宮(0286)質素較一般，長線換至其他優質，相信會較好。

國泰（0293）同樣質素只是一般。其中一個風險，是油價，睇翻佢過往多年，油價對佢成本影響好大，令佢盈利十分波動，就算佢利用對沖，都唔係好成功，反而試過因對沖而蝕大錢。

另外，航空業對經濟週期較敏感，收入不穩，同時唔算係一個好賺錢的行業，因此這股的質素只是一般。

就算佢重組，得到新資金，只是比佢「捱過這一關」，並不是賺錢能力方面有改善。你想持有都得，但不宜太多。

至於0606，我估你係打錯股票編號，應該是想說眾安（6060）。佢業務都有發展力的，但業務仍有不確定性。

初步睇，企業有發展力的，不過風險同時存在，因此唔建議太大注投資，這股都可長線持有的。

至於美股，同樣大致上都係有質素。但留意Nano Dimension Ltd (NNDM)，初步睇佢業務都有吸引力，但暫時未做到收支平衡，風險會較高。投資與否，要自己衡量。

而月供方面，你現時組合已經可以。安碩Ａ５０（2823）和盈富(2800)係一籃子優質企業，較有風險分散能力，分配上，用這2隻做重心會較好。

現時大市只在合理區，每月資金唔好盡用。最好留有部份，等大跌市出現時，可以用來掃貨。

------------------------------------------------

Q21798：

你好,本人今年40歲, 1家4口, 家庭收入$50,000, 有3層物業 (合共約$2300萬, 己不用供款), 但由於都係細單位, 所以另外租住一間大物業, 暫時收租夠交租同埋夠交小朋友學費。

本人考慮8-10年退休, 想問應如何打算。本人有100萬亞洲債券基金,有約4厘, 另月供約$2萬股票(包括2800, 823, 9988, 388, 2, 1299)

謝謝解答!

龔成老師︰

你現時應透過累積優質資產，去幫自已財富增值。到你退休時，再轉換成收息資產，去創造穏定的現金流，以支援自己的退休生活。

物業都係其中一種優質資產類，除左有升值潛力外，都能提供穏定現金(租金)，所以係合適的。

但我地財富組合除左要有增長力和質素外，平衡性都好重要。你現時資產明顯係偏重於物業類，長線你應加入一些優質股，以免過於集中個別資產類別，而產生風險。

因此，你新資金建議優先投入股市，去令成個組合更平衡。

現時你月供組合的股票，都係有質素和適合你。當中阿里巴巴(9988)和港交所(0388)係潛力股，以你年紀，大約佔組合4成好了，否則風險性會過高。

若你投資經驗較一般，或者承受風險能力較弱，再要將比重下調多少少。

現時大市只在合理區，每月資金唔好盡用。最好留有部份，等大跌市出現時，可以用來掃貨。

至於債券基金，坊間分好多種，你要小心睇，因為有d風險低，無乜問題，有d則有潛在的風險，絕對不是保本的產品，有機會出現了「賺息蝕價」的情況。

第一，有些債券基金，會投資「高收益債券」，即是「垃圾債券」，你一定要睇睇佢所佔的比率。

第二，債券基金往往不是單純地持有債券，而是可以作買賣，以及利用衍生工具作對沖等策略，即是可能有價格上的波動。

第三，不少銀行都會提供借貸，以槓杆去放大回報，以平息借貸去賺取息差。低息環境時間題不大，但進入加息週期，不止借貸成本增加，同時債券價格往往在加息期下跌，雙從打擊下，投資價值成疑。當然，若然加息步伐不快，息差利潤就可觀。

我不是說債券基金有問題，只是說明當中的風險，因為市面上的基券基金好多，你要仔細分析。

------------------------------------------------

Q21799：

老師，你覺得綠置居買唔買得過呀？近排鑽石山綠置居有點兒想抽。但投資價值是否比不上居屋？

而且你本書話黃大仙區投資價值不太高

龔成老師︰

綠置居投資價值會稍遜於居屋，但由於佢定價會比居屋低，故都有投資價值。

今次鑽石山綠置居，位置在鑽石山港鐵站附近，交通十分便利，故有一定吸引力。

雖然黃大仙區，本身人口老化，區內人均收入低，較難撐起樓價，故投資價值不高。但若作為自住樓，都有一定價值。因為佢定價較居屋低，能節省一筆資金，可以用作其他投資之用。

因此，只要佢適合你生活需要，而且有供得起，其實買都係可以。

------------------------------------------------

Q21800：

龔sir,我有些關於前途的問題想問，我現年33歲，現職學校合約文員，月薪萬幾，每次續約會多幾百元的升幅，這份工的優點是返工地點近屋企，

而且放工時間準時和放得早，但近日經過思考後我的目標是將來想財務自由，有自住樓，成為全職投資者，那麼我是否應為了得到穩定收入而投考政府文職公務員，

如果想成為全職投資者條路應怎樣走，謝謝老師答覆

龔成老師︰

我地可以透過投資和累積優質資產，去達至財富自由目標。

但大前題係你要有資金，最少每個月都可以有一筆閒錢，可以用作投資增值。

若你已經有個明確目標，係想做到財務自由，而現有工作收入又較難做到，你就時候作出改變，努力去提升自己收入，為財富增值創造基本條件。

到你每月有一定閒錢，就可以開月供優質股，去累積財富。之後，到有一定資金，就可以加入物業類。當資金累積到足夠數量，你就可以換成收息資產，去創造現金流，支援財務自由生活。

而要做到全職投資者，投資對你而言，不單要係興趣，而且更要成為你強項。若你現時對投資無乜了解，你就要先由一個「基本知識投資者」，慢慢開始提升自己。

你要花大量時間，努力去看相關書籍、睇年報聞、睇新、、上課程，去學習如何分析一隻股票。

到你累積到分析50間企業和長期實戰經驗，你就可以變成一個「有實力的投資者」，以算有做全職投資者的基本條件。

但要突破至最高層次的「真正專業投資者」，已經不單是投資知識的問題，因為要突破，就要擁有很強的分析力、很強的眼光、很強的心理質素。這些要更長時去磨鍊，才會做到。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q16561-Q16580）

Q16561：

老師，我係你學生，現嘗試分析東江集團控股(2283)。

他的基本數據不錯，負債/ROE/來自主要生意的收入等都不錯，數字上表現不差，於是連同年報一併分析。

近年透過收購公司/建廠證明公司亦有意繼續發展，只是今年因疫情暫停越南設廠(但相信是回復後會進行)。

公司自身技術亦有一定水平，亦有不少大品牌客戶，客戶基礎亦多元化，可以分散風險。耐何是只工廠，有被壓價壓力(19年年報亦指出這點，令業績受損)，因此推算PE要保守一點。

手機/智能家具方面，連續3年收入有顯著增長，2019年年報表示[智能家具方面:對方已向本集團確認更多2020年的訂單。]這是一個不俗的信息。

不過商業通訊設備板塊就比較感到奇怪。19年年報:[商業通訊設備板塊收入則較去年同比下降34.2%，主要由於全球領先品牌客戶的市場已經達到一定飽和水平，故本集團預期其增長將放緩]。

但是據18年年報[商業通訊設備板塊較去年同比增長38.3%，主要為本集團商業及通訊設備國際品牌客戶業務取得持續增長，帶動該板塊業績成長。]

一年之間該板塊變得飽和這個原因會令收入大跌34%?這一點是抱有疑問的。

現時風險主要為中美貿易戰，廠房生意比較被動。加上上述原因，PE推算為約8-12，平均每股盈利為0.2791。

合理高低為2.23/3.34，加上低位10% BUFFER為2。

這股ROE十分高，亦因為這個原因翻閱年報。除了商業通訊設備板塊以外，業績是有根有據的。正因為這樣我反而更好奇為何市場好像不多人談論這股，成交額亦一直不高，因為市值細?

這些低成交的股票會不會有更多要注意的地方呢?
謝謝

龔成老師：

東江集團控股（2283）見到你整體分析得不錯，這股規模不大，優勢不算強，過往財務數據不差，但盈利的增長力不強，同時近年有下跌情況。

首先，佢係中國的一站式注塑解決方案供應商，主要從事注塑模具的設計及製作及注塑組件的機械設計及製造業務
，以及提供二次加工服務。

於客戶的產品設計過程中，提供有關模具及注塑組件的的售前設計、可行性及優化建議。

注塑模具可分為高效模具及標準模具：高效模具用於大量生產相同的尺寸較小及生產週期相對較短的注塑組件，包括ＵＳＢ快閃記憶體及智慧手機配件等消費電子產品及一次性注射器等醫療用品的注塑元件。

而標準模具用於製造相對複雜、尺寸較大及生產週期較長的注塑組件，包括門板、手套箱及格柵等汽車部件、會議電話終端機等。

近年，佢毛利率有下跌情況，而模具製的營業額同樣出現下跌，這部分佔佢業務4分1，反映大環境轉弱，而佢出現被壓價的情況。

至於商業通訊設備板塊，變化大，反映對市場較為敏感，因為這企業規模不大，當有些主要客戶的生意出現波動時，對佢的影響就會變得好大，這亦是這股的風險之一，因此，在估值時都要較為保守。

你的估值應該再調低少少，以反映當中的風險因素。你預現價在合理區中下部。

這股市值不高，同時獨特性不強，潛力度不強，所以市場對這股的買賣都唔算活躍，造成成交少的情況。這類股都可投資，但就不宜太大注。

------------------------------------------------

Q16562：

sir 我follow您都有5年 最近先儲了十萬 ，請指教下 可以用借錢增大資本 去儲股票嗎？

我其實明白需要現金流 但不知仔細怎計算
已經29歲了 收不不高 得16000蚊
用來準備結婚買樓

希望可建立長遠被動收入 財務自由
謝救回小弟過去幾年光陰 實在感激

龔成老師：

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股只能小注。

但要留意，由於你準備結婚，要預留資金，而投資要較長時間才有效果，因此，你應該較多持有現金，只能用部分去投資。

至於借貸投資，當我地進行時，第一要睇「息差」，例如借的息為「2%」，之後將資金投資收息股，約收「5%」的股息，息差為「+3%」。這的確過了第一關。

第二關，就是虧損的可能，股價是會升跌的，若然買入後股價下跌，你就會出現「賺息蝕價」的情況，那計劃就會得不償失。

當我地進行上述模式時，要好大程度確保價格上不會損失，將「賺息蝕價」的可能性減少。

但現時恆指未算好平，你如何確保不會「賺息蝕價」？

即是說，這些借貸投資不是不能用，而是要過幾關才能用，要較有把握才會用。

我會建議你，想方法增加收入，加大儲蓄，相信是這刻較好的做法。

------------------------------------------------

Q16563：

老師 你好！
本人有意投資1299友邦或者0011恒生。

前者有鑑於世界人口老化問題日益嚴重，醫療費用不輕，人們愈來愈願意購買保險去分擔風險。而友邦近年增長不錯，現時更積極在中國這個保險滲透輕率未算很高的國家擴展版圖。

至於恒生，我會視佢為一隻收息股，派息穩定，加少少增長。始終佢主要業務在香港，而香港乃一個很成熟的市場，相信往後日子業務平穩，增長有限。

友邦同恒生兩隻都是金融類股份，難免受經濟、金融市場影響。但於長遠發展、股息增長而言，投資友邦是否較好？如果想投資兩隻，比例如何分配？友邦大約幾錢開始進入平宜區？

謝謝老師！
祝安康

龔成老師：

兩隻都有質素的。

友邦（1299）擁有一定的品牌及規模，長遠發展不差，人口老化會帶動當中的生意有增長。

這股現時在合理區，你可以投資，但股價略波動，分注買入會較好。你預跌多15%開始平。

至於恆生（0011），是收息股，增長力略有，但不算高，本身有質素，可長線投資。現價合理。

兩隻都可投資，只要你合共持有的比例不過多就得，你應該建立一個平衡的組合，這兩股是其中兩股，不是唯一的兩股。

------------------------------------------------

Q16564：

你好呀，我27歲 ，投資新手，之前得做左儲蓄保險40萬，銀行戶口有120萬其中100萬放定期 ，每年要供保費6萬保費

你會建議我做d 咩股票，還是 留住現金流之後買樓

麻煩可否比d 意見我 ，因為宜家銀行低息，有無d 咩股票短放適合新手的

同咪想請教下你，係買樓收租會好d, 還是買股票會快d 到財務自由

龔成老師：

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

至於持有現金多少，好睇你幾時買樓，如果你打算1、2年內買，就要多留現金，如果在3、4年後先打算買，就應該善用現金，好好投資。

你27歲，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股只能小注。

以這刻的投資值博率計，股票市場的投資回報會較好，但如果你見到樓市下跌，而你本身又未有物業，其實都可以考慮物業。

------------------------------------------------

Q16565：

龔成老師你好
想請教一下03662，值不值長線投資？

龔成老師：

奧園健康（3662）由中國奧園（3883）分拆上市，主要在中國從事物業管理服務及商業運營服務。

例如提供住宅及非住宅物業管理服務（安保、清潔、園藝、維修與維護服務）等，業務穩定，現金流不差，但上市年期不算耐，以及現價處略貴水平，都是當中的風險。

這股前景是正面的，但平貴問題影響了當刻的投資值博率，這刻如投資，不建議太大注。

------------------------------------------------

Q16566：

你好，我開始追看你的 posts 因為覺得很實用。 我是初學者，可否請教你基本和股票的分別？

另外，我想找一些較穩陣的投資，請問哪樣會較適合我開始？謝謝

龔成老師：

你要做三樣野，第一，增加知識，你要學理財及投資的知識，記住，投資並不是坊間的炒炒賣賣，你要從書本或課堂上認真學習。《股票勝經》是入門書，很適合你。

第二，了解銀行及證券行，去開一個證券戶口，並準備做月供股票。

其實兩者都可以，銀行就較方便，但手續費就較貴，證券行收費就較平。你可以先了解下不同的收費。

第三，將每月的部分資金，去做月供股票，供盈富（2800）。對初階投資者來說，月供股票是一個很好的累積財富方法，因為可避免你一次過在高位買入的風險。

原理如同儲錢，不過就不是儲現金，而是儲股票。計劃要長期進行。

另外，盈富是一個組合，適合絕大部分人投資，風險不高，長期儲貨可助你財富平穩增值，記住要長線持有。

當你在做上述三件事的同時，開始學下股票，了解下那些股票適合你自己。上述只同你簡單供盈富，當你過半年，有知識及少少經驗後，就可以利用你手上的資金，其中一部分，去投資股票。

------------------------------------------------

Q16567：

龔sir......你好....如果我月供組合有6隻股，分別派4,5,6,7,8,9厘息

我想計全個組合既派息共幾多厘，係咪將佢6隻股息加埋除6就等如每年收到幾多厘息?THX Sir

龔成老師：

如果你每隻的月供的金額一樣，而佢地全部的股息率，都保持這個水平，而佢地下年派息股息與上年一樣，就會是。

------------------------------------------------

Q16568：

龔Sir, 我有少少問題想問

如果睇好恒指（盈富基金）表現長期平穩向上，點解唔採用分注買入/便宜時投資係7205呢類正向嘅槓桿ETF上？

我明白因為每日結算嘅原因，長期就算恒指升10%，7205都唔會真係有足20%升幅，但我利用過往歷史數據睇過，就算無兩倍，佢亦會比恒指升幅更大，如果我睇好恒指長期向上，我係咪可以買7205？

龔成老師：

ＦＬ二　三星恒指（7205）產品之投資目標為追踪恒生指數每日表現兩倍（２ｘ）的投資業績。

佢有槓杆，所以升幅會比盈富（2800）大，同時跌幅都會比恆指大。

恆指長期的確向上，所以理論上，投資7205會有較高回報，但要注意的是，佢的風險都會加大左，而我地投資，應該首先「考慮風險」。

另外就是潛在的成本，如果恆指有理想的上升，你的方法正確，但如果升幅只是一般，計及成本後，其實未必比盈富多好多，但你背後就面對了風險，這點都要明白。

因此，在一般的時期未不會考慮。

但如果你分析到當刻恆指好平，同時你明白上述的風險，都可以考慮投資的。

------------------------------------------------

Q16569：

老師我睇緊你的80後百萬富翁 本人有一個好愚昧的問題， 成日睇到你話現金流係什麼意思， 多謝老師解答

龔成老師：

首先，「現金」與「現金流」是不同的，現金就是指一筆現金。

現金流就是指一種狀態，例如你每月收租$10000，這就是一種持續的現金流入，這就是現金流。又例如你有一般生意，已經穩定，每月收入減支出有$30000，持續每月都有，我地會稱這個為「正現金流」的生意。

另外，在會計上都會見到這項目，例如「現金流量表」，就是列出企業在「一段」時間內的現金出入情況，你有機會睇下企業的年報就會見到。

------------------------------------------------

Q16570：

老師我想多問一個問題
如果我買盈富要放多久才拿出來

龔成老師：

在理論上，如果盈富（2800）質素向好，價值保持向上，理論上可以一直持有。

當然，實際上都有考慮一些因素而賣出，因前題是長線投資（例如5年或更長）。

第一，當股市已過熱的時後，大市整體都是貴，會賣出，等大市正常才再動用資金。

第二，你找到其他更好的投資工具，就可以進行資產轉移。

第三，你人生階段改變，盈富是平穩增長型，如果你到了近退休，就會要求收息資產轉多，到時就可以進行賣出，買入收息資產。

------------------------------------------------

Q16571：

老師～近日有人加我好友～不停話帶我賺錢、叫我買1472 、又叫沽曬D盈利股、佢話自己係滙豐經紀、係咪吾應該跟佢？因為我都認為長線投資比較適合自己

龔成老師：

100%是騙局！

你問佢職員編號，試下找唔找到這個所謂的「滙豐經紀」。

------------------------------------------------

Q16572：

老師，疫症前入咗15手1810小米，平均價$13，應唔應該止蝕？

龔成老師：

不用。

小米（1810）本身的質素不差，有品牌及發展，之前我出的《50優質潛力股》2020年版，都有加入這股。

這股有長線投資價值，你的買入價合理，可長線，但都不能持貨過多。

------------------------------------------------

Q16573：

你好呀，我依家係大學生，有3萬儲蓄，想學下投資買股票但無從入手，聽人講盈富基金適合新手因為夠穩定

但係我唔係好清楚整個投資既過程同判斷入手時機，請問你有咩高見？謝謝

龔成老師：

你要做三樣野，第一，增加知識，你要學理財及投資的知識，記住，投資並不是坊間的炒炒賣賣，你要從書本或課堂上認真學習。你可以睇《股票勝經》。

第二，了解銀行及證券行，去開一個證券戶口，並準備做月供股票。

其實兩者都可以，銀行就較方便，但手續費就較貴，證券行收費就較平。你可以先了解下不同的收費。

第三，將每月的部分資金，去做月供股票，供盈富（2800）。對初階投資者來說，月供股票是一個很好的累積財富方法，因為可避免你一次過在高位買入的風險。

原理如同儲錢，不過就不是儲現金，而是儲股票。計劃要長期進行。

如果你不想做月供，就以正常模式一手手入，盈富一手是500股，即是約$12000，你可以了解下，試下入一手無。

另外，盈富是一個組合，當中有50隻股，適合絕大部分人投資，風險不高，長期儲貨可助你財富平穩增值，記住要長線持有。

------------------------------------------------

Q16574：

老師，你好！今年33歲 身處國外 兩公婆一共有大約500,000港幣儲蓄

有兩間物業係國外仲供緊亦唔值錢，一間自住令一間收租 兩間仲有大約27 年供款

每月扣除所有洗費可以儲大約$13,000港幣

我哋想善用每個月儲低嘅錢想問吓你有冇啲適合我哋嘅投資工具同埋可以點分配投資先至係適合我哋

未買過股票想開一個戶口，買香港股票投資想問吓你有冇邊間股票行公司建議 . 亦想問吓有邊幾隻股票適合我哋去投資

謝謝！

龔成老師：

你本身已有物業，因此，在財富分配中，應該分配到其他類別的資產，股票是適合的。

你去銀行或證券行都得，例如匯豐、中銀、南洋商業銀行等。

股票方面，你可以考慮盈富（2800）。另外再加幾2隻：銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）、希慎（0014）、太古地產（1972）等，你可以了解下這些股票，然後從中選股。

另外，建議你多增加投資知識，在選股、企業估值、投資時機上落功夫，對你長遠財富有好大影響。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q16575：

想請教460

龔成老師：

四環醫藥（1460）質素一般。佢過往停過牌，核數師試過出現「保留意見」。投資價值唔會高。

------------------------------------------------

Q16576：

你好，本人26歲，投資新手，有4萬現金，看了你的股票勝經後本來想用一半資金慢慢供盈富基金，因為現金一直放在銀行只會眨值，但近來受疫情和社會運動影響，很怕金融風暴會再次來臨。

我知道經濟周期會不停循環，下次金融風暴來臨只是時間問題，所以比較擔心一投資就遇上股災。

你覺得我可以如何開始投資? 會有倒蝕的風險嗎?
感謝你！

龔成老師：

你已經可以開始投資，只要不用盡現金就無問題。

經濟有週期，股災都會久不久出現，但無人知佢幾時來，如果你永遠等，有可能要等好耐，你會錯失左機會，因此，你只要平衡去投資就得。

即是一邊買入優質股長線投資，一邊預留部分的現金。唔好用「預期大市跌」的角度去分析，只要利用平貴，去進行財富配置就得。

------------------------------------------------

Q16577：

阿SIR 我係你學生，想問問
在計算有代表性每股盈利時
我地應唔應該自行減去非控股權益而帶來既股東應佔溢利?

咁樣先可以反應番母公司自己賺錢既能力。
這樣想法對嗎?

龔成老師：

放心，報表在表述時，佢用「股東應佔溢利」除以發行股數，去得出「每股盈利」。

所以，你平時在年報及財經網站見到的盈利，已經減去了非控股權益帶來的盈利數字。

------------------------------------------------

Q16578：

老師你好，就如你上述講我持有太多銀行板塊，現在已停月供滙豐，現持有

滙豐6700股
工商40000股
置富20000股
盈富基金13000股

因為你提醒要平衡板塊，想入香港電訊，但現價去到12.X，想請教你加大置富或入香港電訊好？

仲有4年前入左中廣核10000股，當時4元上入的，現在得返1.7元，想聽你意見留或放
謝謝老師

龔成老師：

對，你平衡組合是較好的做法。

你加入置富（0778）及香港電訊（6823）都可以，置富這刻的平貴度計算，有較大的投資值博率。

而香港電訊，只是收息股，同時不及置富平。

中廣核（1816）本身並不是無質素，但幾年前大時代熱炒這股，要上翻去不易。你預這股之後能平穩增長，但不會大升，如果持貨不算多，持有可以。

------------------------------------------------

Q16579：

龔成老師：我想講你個名成日令我諗起「宮成良田」打波好叻果個

我有野想請教：

HKTV 我$6.85購入8手，現價$4.6 徘徊，我唔知道究竟分階段再購入，還是放手離場，揀其他更有潛力的股票。望指點

龔成老師：

哈哈，其實個名最主要的意思是「成功」倒轉。

香港電視（1137）業務有前景，但有兩點都存有風險的。

第一，佢都會依靠人的因素，王維基成為了公司最值錢的資產，佢的想法好多，有生意頭腦，但我對這類太依靠個人的企業，不建議太過大注。

另外，這企業現時搞網購，有增長力的，但同時存有一定的未知數。

佢多年來不斷在燒銀紙，不斷等收成，雖然佢的業務的確增長中，但無人知幾時會有真正的盈利，同埋無人知真正的結果會點。所以，這股只合小注投資。

因此，要睇翻你的持股比例，現時佔組合的比例多少，如果大多，就不要再加。

------------------------------------------------

Q16580：

成哥您好，最近才認識您，覺得您好犀利，很想請教您

我今年二十歲，每月有4000蚊可作投資。

想問下利用月供股票如何可以增值財富？(因為家人比較反對我月供股票，佢地話我一手手咁買反而可以在低位吸納多一點，請問可以教我如何説服他們嗎？)

另外，我心儀3, 823 及2800，打算1:1:2去供他們，請問這樣的組合現在購入要持貨多久？什麼時候才合適賣貨？

最後，想問下為什麼成哥建議我們在月供股票的組合中2800佔較多比例？
感激不盡

龔成老師：

一手手買與月供，各有好處的，一手手買，的確可以捕捉到低位時買入，而月供，可以將買入價平均。

很多散戶都認為，自己有本事捉到低位，所以唔想月供，但以我過往做了10年銀行與證券行的經驗，見了無數客戶投資成績，可以話你知，散戶大多數高估自己，以為自己低位入，但事後發現不是。反而簡單做月供的客，回報更理想。

的確，如果你有實力，一手手會較好，但你要計翻，過往3年投資成績，否果以一手手模式買入，是否跑贏大市？如果是「否」，就乖乖做月供。

至於你上述的3股，都是有質素的，月供比例適合，可以進行。你最好供5年以上，月供要較長時才可發揮到作用。盈富（2800）佔一半適合的。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q14481-Q14500）

Q14481：

成Sir,你好, 我係你學生
有一只股票: 1212 利褔國際, 想請教成Sir!!

現金流量表中, 2017年到2018, 現金及等同現金, 同期未之現金, 大幅減少
公司是否出現危急?
感謝!!

龔成老師：

由於這部分比較複雜，因此要睇翻佢年報裡的「現金流量表」當中的「投資活動現金流量」先得。

之前我上堂講過，這報表是比較複雜的，因為較多會計上的定義，唔仔細，好難明。

你可以睇翻利福國際（1212）2018年年報，P95，你會見到影響佢最大的出入數，是「存放定期存款」「提取定期存款」。出入數有過百億，而加減後的淨額數有幾十億，正正是這個數，對佢現金影響好大。

同時，你再睇翻佢的2017年及2018年資產負債表，P91，在「流動資產」部分，你會見到2018年比2017年，多了一筆「定期存款」，為數$47億。

其實，只是現金在會計上的定義，一般都不包非短期的定期存款，因此無在現金流量表視作現金。所以這企業並無現金方面的問題。

------------------------------------------------

Q14482：

龔sir你好，早前聽你講 開始左月供盈富($4000)及港鐵($3000)已有1年，另有莎莎，恒生，中國銀行，阿里爸爸，1211，媒氣，各1~2手，以上分配可以嗎?如果想加多一隻月供約$2000 可以邊隻，置富可以嗎?

另外，家姐在澳洲有投資房屋做airbnb ，總價約75萬港，每年約有8萬幾港幣收入，計番有幾多回報率?如有錢，我應該在澳洲投資物業or留港投資or買股好呢? 感謝龔sir解答

龔成老師：

上述的股票，都是有質素的，可以進行長期月供，分配無問題。

如果想加，可加置富（0778）。

至於澳洲果邊，最簡單計算回報的方法，就是將全年收入，減去所有的支出，然後除以樓價，如果你上述所講的$8是「淨收入」，除以$75萬，回報率就有約10%，這是一個不錯的回報率。

不過，你要仔細計好各費用，以及潛在的風險，先可考慮投資。

------------------------------------------------

Q14483：

龔sir，小弟持有大量現金打算投資美股港股，但現在美股是歷史高位，也是史上最長的超級大牛市，萬一爆破肯定全世界金融風暴的，現有還不停升。

而全世界的債卷都低息，黃金也貴，到底在大牛市時應該如何部署呢？應該小注入市，還是按兵不動？

龔成老師：

高不一定是貴。

我地最重要，是按每間企業的情況，分析其質素，平貴。

當我地以企業長期角度分析，就不用太怕中短期風暴，只要集中企業價值就得，總之，你的概念是買入一盤生意，這生意長遠的情況如何。

現時大市處合理區中上部，只要找優質股，動用部分現金投資仍是可以的，只要留一定現金等機會就得。

記住，我地不是預測風暴，而是進行財富的配置，建立一個組合。

------------------------------------------------

Q14484：

老師你好,工作了數年,26歲..月入13K, 家用比3K,支出每月約4K,餘下的儲起,儲蓄約10萬.

對投資都不太認識, 會買牛熊,有時有薄利.不是賺太多
目標希望3年能儲多儲8萬..

近來留意盈富,煤氣,電能, 以我的狀況, 應以月供方式 / 買入一手作投資嗎?謝謝你的建議.

龔成老師：

不建議再投資牛熊證，我只可以話，以我過往做銀行及證券行，見證大量散戶的投資成績，佢地玩衍生工具，絕大部分在長期計，都是輸的。

我會建議你月供股票，盈富（2800）$3000，煤氣（0003）、電能（0006）各$1000，長期進行。

另外，以你的年齡，財富仍有一定的增值力，建議你多增加投資知識，在選股、企業估值、投資時機上落功夫，對你長遠財富有好大影響。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q14485：

老師你好，本人29歲，沒有任何投資經驗，有30萬作投資，主要想投資在收息及潛力股，一路都睇緊0005，0019，2800，1221，700，請問現在適合入市嗎？還是等年後比較好？

各股的理想入市價大約多少，同埋分布如何？

龔成老師：

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。

匯豐（0005）只是收息股，增長力不強，未必最適合你。

太古股份公司Ａ（0019）質素不差，增長力中等，你都可以考慮，但太古地產（1972）質素會更高。

信和酒店（1221）增長力不強，未必最適合你。

盈富（2800）適合你。佔組合較多都無問題。

騰訊（0700）都適合你，但不能太過大注。

另外，你可以考慮恆基（0012）、銀娛（0027）都是適合你的。

其實上述股，現價都在合理區，你都可以分注投資，但不能用盡現金。

------------------------------------------------

Q14486：

龔成老師, 我想多謝你一聲
三十出頭, 以前冇投資意識, 直至半年前開左戶口, 冇乜做功課之下買股票, 好好彩都算平手經過貿易戰第一波

之後朋友介紹吓開始留意你facebook同睇你啲書, 先慢慢組織起自己嘅投資租合

講吓而家計劃, 月入約34k, 月供股票10k, 另5k現金
4k 2800盈富
3k 3988中銀
3k 0012恆基
想問吓以上分配有冇問題? 會唔會太保守? 定係襯價低轉供0066?

另外留20萬投資用, 留12萬現金應急錢

有個問題想請教, 當潛力股已到達價格高水平, 例如
2331李寧, 已經倍升, 但同時亦似到價格高嘅水平, 咁樣係咪唔應該持有, 放左佢另入其他潛力股好?

最後講多一句, 我打算年中加人工或轉工後, 加大儲蓄同投資到50%, 希望3, 4年內儲到一百萬

睇你啲書多左, 好多謝你鼓勵正面積極思想, 我月入冇7萬唔緊要, 努力學習財產分配都可以做到財務自由, 大家加油!

龔成老師：

先講你的月供股票，這3股都是有質素的股票，可以長線投資。

不過，中行（3988）只是收息股，增長力不強，以你的年齡來說，並不是最好的配置。

其實，當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

所以，你可以考慮將中行轉港鐵（0066）。

李寧（2331）處略貴的水平，的確可以考慮轉另一隻。但要留意，我地不是分析高低，而是平貴，如果企業價值大幅上升，這樣，就算股價倍升，都未必貴。

另外，以你的年齡，財富仍有一定的增值力，建議你多增加投資知識，在選股、企業估值、投資時機上落功夫，對你長遠財富有好大影響。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。加油！

------------------------------------------------

Q14487：

老師，最近買了你的2百萬和3百萬來看，獲益不少，想問你的新書年報勝經大概講d咩？

龔成老師：

主要是企業年報的分析，如果你投資股票，買入前就一定要了解企業，睇年報是一定要做的動作。

如你想學投資股票，建議你睇左《股票勝經》《選股勝經》先，之後先睇《年報勝經》。

------------------------------------------------

Q14488：

老師，想請教3140值唔值得投資？我見好多銀行都沒得月供這股票，如果想月供要點樣操作？

龔成老師：

可能有些證券行會提供月供。

如果無得月供，你可以自行分注，因為佢入場費不高，一手只是100股，其實二千多蚊已入到一手，你自行每個月入一手，都已經是一個分注的模式，又或每隔2個月入2手，都是一個方法。

------------------------------------------------

Q14489：

龔sir，請問下你覺得XX的派息基金算得上資產嗎？

因為佢派息有9%，依家仲可以玩埋複利滾存，我睇緊股票勝經，記得啊sir有講保險類的投資也算資產。

但我又覺得呢啲派息基金唔多穩陣，唔知自己買左啲咩，特意請教龔sir，感謝

龔成老師：

是否能夠定義為資產項，要睇翻佢能否長期增長，以及現金流都有增長能力。

首先，你最好了解翻佢的投資策略，派息政策，9%是不差的，但最緊要了解，這9%怎樣來？是利用高風險的投資策略？合理投資回報得來？還是動用了部分的本金派出？因為我見過有些基金的派息，只是用了原有本金派出，假象令自己成為一隻高息基金，但投資者卻「賺息蝕本」，因此要多了解。

只外，你要了解佢的投資策略，投資在那些項目，如果這些項目都—有質素，就可能是資產項。同時要預期長遠的回報如何。

------------------------------------------------

Q14490：

龔Sir , 你好~
想請問一下，你會點睇物流運輸相關股份？6123 圓通。多謝

龔成老師：

圓通速遞國際（6123）係一家以香港作為總部的國際貨運代理服務供應商，並在亞洲、荷蘭及北美設立了數十個辦事處。

空運及海運貨運代理服務，係佢的核心業務，主要涉及在收到客戶的訂艙指示後作貨運安排、自航空公司及海運公司取得貨運艙位、製備相關文件、拼箱以及在交付至目的地後安排貨物清關及貨物裝卸。

業務比較波動，見佢盈利近年有明顯下跌，令股價都有一定的影響。加上企業規模唔算大，未能產生好大的優勢。

整體質素分析，只是中等，現價合理，都反映了近年生意不利的情況，這類股不宜投資太大注。

------------------------------------------------

Q14491：

老師見你之前推介過大快活，而呢排大快回股價回落左唔齴，係咪因為係近排社會事件導致佢生意差咗影響純利，定係本質差左？

你點睇？另外現價是否合理可以投資定再等佢回落多啲？謝謝

龔成老師：

大快活（0052）生意有轉弱情況，不過我相信是中短期。

第一，香港的社會運動，對佢生意有影響，盈利受壓，但如果我地從長遠分析，當中的影響會慢慢減少。

第二，近年員工的成本增加左，而無法將所有成本轉嫁比消費者，這令到企業的賺錢能力減少，但我相信，市場會慢慢平衡，令佢賺錢更合理的利潤。不過，這不是短期的事。

整體來說，佢仍有質素，但增長力就不強。現價是合理價，可分注，長線投資。

------------------------------------------------

Q14492：

老師，中國光大國際 (0257) 和 中國光大綠色環保 (1257) 的市盈率已經分別回落到 8倍 和 6倍

想問問是否到達便宜區 和 那一隻更巨增長力和潛力 謝謝你

龔成老師：

佢地都是長遠發展正面的企業，不過，由於近年投資多左，負債增長多左，而投資的回報未見到，市場對佢估值略有調低。

但如果我地用長期角度分析，佢地的質素無變，發展力仍在，現價都在合理區中下部，有投資價值。特別是中國光大綠色環保（1257），這企業的潛力不少，當然，本身的風險都會高少少，如投資，要控制注碼。

------------------------------------------------

Q14493：

龔sir,你好，我係澳門股票班嘅舊生。近兩日留意有部份消息話：東南亞國家有意整頓網上賭博，會唔會令金界控股（3918）嘅潛力更大？

另外，因為澳門月供股票手續費太貴，供股太少。如果我將計劃改為令4個月轉一隻股票：例如來年1-4月先集中供港鐵；然後5-8月集中供港交所；9-12月集中供另一隻潛力股，會唔會比較划算？

還有一個問題，來年老師你比較睇好邊一個板塊？或者邊一間企業係你會留意多啲？

龔成老師：

由於金界（3918）好多生意都是來自旅客（特別是中國），我相信網上的賭博就算減少左，對唔能夠話對佢有好大的正面影響，因為始終旅客並不是全部都為左賭，而親身賭同網上賭會有不同。

我相信對佢只可以話有少少正面，唔能夠推論到成為好大的利好因素。

不過，這股有質素的，壟斷的市場，不斷增長的遊客，中國遊客的潛力，這股長遠發展正面，但現價就在合理區中上部。

你的月供股票方法，可以，但就要較長時間，先有平均的效果。

如果想要更平均價格效果，最好是1月供A，2月供B，3月供C，4月供A，5月供B，如此類推，不過就比較煩，但風險度會比你的方法為低。

科技、醫藥類，因為科技的應用只會更廣，加上人口老化問題，長遠一定有發展。

------------------------------------------------

Q14494：

領展拆散至100股一手，長遠股價有好處？

龔成老師：

領展（0823）多年來，股價上升左好多，令散戶入場費大左，因此，佢進行拆細每手股數的動作，目的是方便散戶買入。

不過，這動作並不會影響企業價值，因此不會對長遠股價有甚麼影響。

------------------------------------------------

Q14495：

老師, 你好呀！如果我手上有人民幣, 現放在定期, 年頭就到期, 留意緊87001 匯賢產業信託

因它是用人民幣投資, 如我把手上的人民幣轉入這隻股票, 是否正確？這隻股優質嗎？

龔成老師：

你的確可以將手上的人民幣，轉為這房託，這房託有質素的，可以作長期收息，但要留意兩點，第一，你要計翻你的總財富，唔好大過集中在單一股票。

第二，匯賢產業信託（87001）雖然是不錯的房託，但這房託比其他房託有點特別。

匯賢現時主要資產：包括於2011年收購的北京東方廣場之零售、寫字樓及服務式公寓業務；以及兩家酒店（北京東方君悅大酒店及瀋陽麗都索菲特酒店）。

加外有新增投資，於2015年才收購的重慶大都會東方廣場。

但要留意，根據北京市人民政府於2006年6月26日發出的國有土地使用證（京市東港澳臺國用（2006出）第10128號），該發展項目總土地面積為7萬7千平方米的土地使用權已授予北京東方廣場公司作綜合用途，到期日為2049年4月21日。

從整體及本質上，這房託是不錯的，適合長線投資。雖然有上述所講的潛在風險，但高股息率，可說能抵償當中風險，同時反映部分物業有「到期」因素。

簡單來說，就是佢的股價，會慢慢長期向下，因為有些資產會到期。不過，如果佢餘下的資產在這段時間增值，咁股價就不會向下。

你其實可以咁樣理解，你收到的股息，有少少是包括了本金的部分，所以就算日後賣出價低了少少，也不會因此而虧損。

整體來說，這股現價有投資價值，分注投資就得。

------------------------------------------------

Q14496：

老師，請問如果我想要完成圖中目標

（月供$6300，8%回報，25年）

是否每月保持月供以上金額的優質股，25年後即可達到滾存至6百萬？

還有什麼需要做？
例如收到的股息再投資？

龔成老師：

對，只要你保持每月做月供股票，$6300，持續25年，假設每年的複息回報有8%，大約就能滾存到$550萬至$600萬。

首先，你一定要保持供$6300或以上，要堅持。

第二，要取得8%的複息回報，這是一個（連股息的回報），即是說，當你收到股息後，你要做一個再投資的動作。

就算最初收到的股息數目不多，你都要先儲起，然後等機會投資。

下一步，就是選股，選長期能增長8%或以上的股票，建議你選一些平穩增長股，成功機會較高，例如盈富（2800）再加上其他股。

------------------------------------------------

Q14497：

你好，我未試過月供股, 想開始月供股票

想請教是否每月固定購入就是月供股票, 同埋係供幾耐. 本人每月可供約1-2萬, 想請教老師有那些股票值得供.謝謝

龔成老師：

簡單來說，月供股票就是你每月將現金，買入某一隻或多隻股票，慢慢咁樣儲貨。坊間不少銀行都有提供月供股票服務，你先開證券戶口，然後登記做月供股票。

形式就是每月投入相同的金額，買入同一隻或多隻股票，並持續進行。

例如，每月以相同金額$10,000 買入盈富基金（2800），假設第一個月股價為$25，就能買入400股；第二個月升至$35，就能買入286 股；第三個月跌回$30，就能買入333股。

總結這三個月，投入了的資金為$30,000，累積股票為1019股，平均買入價為$29.4。

由於月供股票每月投入的金額相同，因此當股價上升時，買入的股數自然減少，而當股價下跌時，就自然會買入較多股數，如同自行調節一樣。

要注意的是，由於每月持續投入資金，因此一定要選優質股，長線投資，同時要以儲股票的概念進行，最少持續供3 年以上，之後持有5年以上。

我會建議你這刻月供$10000，之後如果資金較多，可再加。

你可以考慮盈富（2800）$6000。

另外再加2隻（每隻$2000）：銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）等，你可以了解下這些股票，然後從中選股。

如果你不懂股，就集中供盈富$10000。

------------------------------------------------

Q14498：

請問老師認為那個地區的升值潛力會更高呢？

本人看好洪水橋一帶的發展，因為現在所有的基建及配套都未完善，應否在它潛力未釋放前先買這區的物業，等待多年後才慢慢收成。

龔成老師：

我相信2020年香港的樓市會下跌，但不會多，由於長遠香港樓市會向上，因此，2020年香港經濟差，是一個買樓的時機。

當然，無人知會跌多少，同時我地買樓，不用太著重「是否見底」「之後的樓價升跌」，最重要是，能夠「供得起」。

洪水橋一帶的發展，正面的，發展會更為成熟，不過，我一向都太多供應的地方，都唔會給予太高分，始終供應多會令投資者選擇多。整體來說，投資價值算是不差，但只擔心在長遠太多供應。

------------------------------------------------

Q14499：

老師點睇2606藍光嘉寶服務和1501康德莱醫械？值唔值得長線投資？

龔成老師︰

藍光嘉寶服務（2606），主要在中國提供物業管理服務及相關增值服務。

康德萊醫械（1501），主要在中國從事介植入醫療器械的研發、製造及銷售，當中專注於心內介入醫療器械。

2隻股票都上市不足1年，而且市值都唔算十分高。如果你有留意開我FB，我一向都新股半新股都無興趣，因為真實面要慢慢先見到，加上佢股價十分波動，估值困難。

所以現階段好難話佢地有無長線投資價值，如果你睇好此2間企業，建議你保守點只可小注，同時你要明白當中的風險。

------------------------------------------------

Q14500：

龔成老師, 請問我年半後會移民離港, 你應為應現在賣樓先定年半後先賣呢?

移民後唔需要呢筆錢做生活費, 咁keep住層樓出租可行嗎？謝謝

龔成老師：

你可以將香港樓，視為一個長期收租的資產項，因此，你就算唔賣樓，長期持有作收租，都可以。

當然，這要視乎你有無資金需要，同時是否睇淡香港。

如果你移民，都身都睇淡香港前景，咁不如現時已賣。

首先，要睇你本身的資金需求，同時，要睇你是否想長期持有香港樓，作為環球分配資產的其中一部分。始終香港樓，由於地少人多，點都有價值。

----------------------------------------------

多謝各位提問，若然你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網的，當然，會將發問者的身份，以及有關個人的部分刪去。

另外，由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。