【龔成問答信箱】（Q21561-Q21580）

Q21561：

龔成老師，我想請問：例如我買入一隻股票，佢$400，假設兩年後佢升到$600，如果佢一直跌價只係跌到$580咁上下，那我應該幾時再入貨？

因為當初我入係$400，由於企業質素好，佢一直升，那我再買的時候，由當初$400， 會拉高購入價？謝謝

龔成老師︰

我地制定入市策略架時候，必定係用當時平貴，去作指標。

首先，我地要睇下當時個股價，是否在合理區內。如果已經係偏貴，就唔會再加注。

若在合理水平，你就要睇你資金多寡、持貨是在什麼水平買入，去作決定。

每個股價水平，都有一定入貨比例，越接近合理區頂，動用資金會越小。若越接近平宜區，動用資金入貨比重，就會越高。

以你個例子作解釋，若你資金係好充裕，可以分多注。$400為合理區中下部，$580算合理區頂。係而個情況，你都仲可以在$580加1小注。

但若你資金不多，只能分2,3注。因為注數少，那就應該等跌到接近平宜區，一個明顯平的水平，才出手入第2注。

------------------------------------------------

Q21562：

阿SIR 你好，我正在計緊股價合理區，但吾肯定有冇計錯

2382舜宇光學

5年每股盈利：
2016(1.3), 2017(3.2), 2018(2.6), 2019(4.08), 2020(5.31)
平均: 3.3

10年市盈率:
10.85/ 18.18/ 18.52/ 24.88/ 31.53/ 32.89/36.05/37.06/ 39.38/ 54.23
RANGE: 24.88-36.05

如果假設增長有20%，即3.96

即股價合理區: 98.5-142.76

咁現在股價198.6 咪好貴…..我有冇計錯…..?謝謝

另外，我想小米股價合理區….但得3年市盈率，係咪計吾到呢?

龔成老師︰

由於智能手機近年快速發展，對高質手機鏡需求大增，預期長線都會維持較高需求水平。

因此，我地係計算時候，用較近年數據，才會更有效反映實際情況。

每股盈利，我會用2017-20年的4年平均值，再用+25%增長去計算，大約係$4.75。

至於市盈率區間，係正確。故用市盈率去推算的合理估值，大約為$118 - 171。

但你要記住，這只是其中一個估值的角度。投資者在進行估值時，要同時用多個估值方法去進行估值，才可以得出更立體的結果。預佢現時估值為略貴，回多2,3成合較合理。

至於小米(1810)，由於上市唔太耐，參考數據會較少。我地可以找相類似企業，用佢地市盈率，去作參考。

小米收入以手機為主，舜宇光學(2382)和比亞迪電子(0285)雖然業務上係不同，但同時間係直接受智能手機發展所影響，都有一定參考價格。

你預合理市盈率，大約為22-30倍。再用上市3年的每股盈利平均數計，再做少少調整，會得出估值為$15 - 24。

但始終參考數據較少，加上企業在急速發展，所以以上估值，只係一個較粗略估算。未來，你要再就其發展情況，作進一步調整。

------------------------------------------------

Q21563：

你好啊 龔成老師，本人是新手上路，希望你能指點一下小弟:

1)想問下 9618 京東集團 你有咩睇法啊？有冇長線持有價值？

2)睇你fb Q20570 解答，你建議可以做月供1810小米，想問下月供跟每月小注手數買入有無分別？

3)另外想問下美股Tesla而家還值得長遠投資嗎？

4)睇你fb主要都係分析港股，想問下美股是否適合新手投資者？

希望得到老師的解答，謝謝。

龔成老師︰

1) 京東（9618）業務有質素，發展仍是正面，不過現價就唔算平。

佢係一間電子商業銷售平台，佢定位為「以供應鏈為基礎的技術與服務企業」，現時是中國第二大電商，有一定的品牌。同時，根據《財富》按收入統計的全球500強排行榜，集團是中國最大的零售集團。

佢目前業務已涉及零售、數位科技、物流、技術服務、健康、保險、物流地產、雲計算、AI和海外等領域，其中核心業務為：零售、數位科技、物流、技術服務四大板塊。

京東已建立自己營運覆蓋全中國的物流基礎設施，以支持電商業務，打造了線上購物體驗，係2017年、2018年、2019年，活躍用戶數達到了2.9億、3.0億、3.6億。可見已建立了一個巨大的網絡。

佢經營線上零售，以及電商平台業務，線上零售業務方面，從供應商購買產品，然後直接銷售給客戶，並從24,000多家供應商採購商品。

佢的物流基礎設施佈局覆蓋了中國幾乎所有的區縣，包括遍佈89個城市、累計總建築面積約1,690萬平方米的700多個倉庫，包括京東物流技術開放平台所管理的倉庫面積。

從質素上，這股不差的，現價算是合理區中上部至頂，可小注，這股是可以長線投資的。

2) 我在這條所講的分別是「月供」和「小注」，2個是不同的入貨模式。

「小注」意思是，只可以先用你預設投資在小米(1810)的資金，其中「一小部份」。例如你預備總共會買5手小米，那小注，就代表你可先入1手。

因為，現時價格只係合理區頂部，價格值博率不高。但由於若果無貨，而我地估唔倒佢將來升，定跌。如果一直升，我地就會錯失入貨機會。

所以，係平衡2者利弊後，先買入小注，會係較好做法。

而月供，則是你每月用一個固定「金額」去買入股票。股價高時，買入股數會少D。股價低時，能買到股數就會多D。

透過長線去做，令個買入價拉平均。

「月供」模式會較適合初學者，因為佢地定平貴能力較弱。用月供，可以減少佢地買貴貨的風險。

3) Tesla(TSLA)不差，增長快，近年當業務由虧轉盈時，股價向上好勁。不過穩健度不足，股價上落好大。

例如在資金上，要不斷在市場各途徑集資，以維持營運及研發，未能憑以戰養戰的模式，去穩健地發展新項目，資金鏈斷裂風險存在。

市場方面，有危有機，因為電動車是高增長市場，但行業結構變化大，存有未知數。

另外，股價上落太大，市場超前反映前景因素，只要增長力比預期差少少，都會有明顯回落。

如果你長線睇好，預佢股價上落一定好大，唔好理中短期股價，只要你投入注碼不過多，可長線，等更大收成。

4) 預期未來一段時間，中國和美國都會係全球最重要的經濟體系。因此港股和美股，都係有投資價值。

作為新手，如果你想投資美股，但又對美股唔係好認識，你可以先投資相關的ETF。以下2隻股ETF，都係不錯的選擇。

當中，QQQ波動性會較高，要注要風險。

Vanguard標普500指數ETF〈VOO〉，是追蹤標普500指數的ETF。

Invesco QQQ Trust(QQQ) 是追蹤納斯達克100指數。

------------------------------------------------

Q21564：

175吉利，股價高時買入兩首$31.2。現在雖然有純電動車的發展，但遇上原材料缺乏及成本問題未見有上升趨勢。

請問龔sir，需要繼續長線持有？係咪較難上返買入價的水平？謝謝！

龔成老師︰

短期可能會有不利因素，影響集團盈利能力。但我地分析時候，應以長線作為考慮目標。

吉利(0175)本身的質素不差，擁有一定的銷售網絡及品牌，不錯的市場策略及定位，而又能把握中國汽車市場增長的機遇。

長遠來講，佢的品牌與發展在中國仍理想，2018年，吉利透過旗下海外企業，動用超過$500億人民幣收購戴姆勒股份公司9.69%股份。由于戴姆勒股權結構分散，所以吉利已經成為了戴姆勒集團最大單一股東。

另外，佢早前杭州灣新工廠正式發布純電動新品牌新車「極氪（ＺＥＥＫＲ）００１」，宣布吉利進軍高端電動車。

這些動作不單有利佢有中國發展，同時長遠，可能加快了海外發展速度。因此，這股長遠仍是正面的。

你現時主要問題，係買入價偏貴，令帳面出現虧損。

但吉利係有質素，長遠價值總會上升，從而帶動股價上升。相信長遠佢會上返你買入價，這股票值得你長線持有。

------------------------------------------------

Q21565：

龔成老師，我是一名老師，沒投資經驗，受你指導開始月供股票。因遲些會同仔女去英國讀書，要停月供和賣出股票。

到英國後要找工，靠saving 先生活，找到工後可怎樣繼續投資致富？

龔成老師︰

其實做財富增值的策略，在香港，定英國，都唔會有太大分別。

同樣都是根據你年紀、投資取態、經驗等，去建立一個長期、優質、平衡、又適合你的組合。

當你到達英國，開始有穏定收入，而每月又有閒錢可以動用時，你就可以月供一些優質股，去做財富增值。

在開始投資計劃前，你最好留有半年開支，作應急之用。

如果你在英國都可以投資港股，你可以用以下股票。

平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

潛力股︰安碩恒生科技(3067)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）。

由於你無投資經驗，而潛力股有一定波動性風險，你可以先集中係平穏增長股，甚至盈富(2800)。

此期間你要努力學好投資知識，到你有一定投資經驗﹐可以加大潛力股比重。

另外，你要留意，如果你是在短期內離開香港(少於1年)，你就要開始，慢慢將手頭上的股票，分段沽出。

唔好等到走前一刻，才去一次過沽貨，因為咁樣個價格波動性風險，會太大。

------------------------------------------------

Q21566：

老師你好！最近幾個月先開始睇你嘅書，發現自己已經太遲起步，加上從未投資。

小弟今年已36歲，扣除開支，打算做月供股票，每月$3000，知道我呢個年紀應該做啲平穩增長股，例如2800。

但希望可以先增值，所以諗住投資一啲增值類，以下幾隻係自己心水

2800 盈富基金
0388 港交所
0066 港鐵
1810 小米

請問老師認為只有$3000應該如何分配月供？還是有其他更適合？

感謝老師

龔成老師︰

你現在才36歲，尚算年青。只要你認真學習，學好投資知識，用正確方法去增值，都可以有不錯的效果。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你年紀計，投資應以增值為主，建議你用「平穏增長股」 + 「潛力股」作增值組合。

你每月先用$3000做月供，係可以。但現時大市只在合理區，除了月供那$3000，每月都要一定額外儲蓄，等出現大跌市時，可以出手掃貨。

你上述4隻股票﹐都係適合的選擇。但由於你每月供款不多，加上你未有投資經驗，你最好同時留有現金，不能無資金在手，你可以先集中係盈富(2800)$1500，另外3隻各供$500，不過這個組合會出現一個情況，就是你供$500，每月能買到的股數會較少，你要好長時間先能有一定的數目。

你可以自行決定，是否長遠進行這計劃，又或將計劃改成盈富（2800）$2000，再加上其中一隻股。

------------------------------------------------

Q21567：

老師，我現倉輸緊17萬，請問我有咩股係需要減或者唔揸，定可 繼續長揸？
跌到我心慌

916 21000 股@11.828
1801 500股 @95
6969 1000股 @71.1
9666 800 股 @78.6
9995 1000股@136.25

龔成老師︰

首先，一定要了解股價下跌的原因，基本上，股價中短期上落好正常，但如果上落太大，就要了解翻當中的事情，有無一些影響企業核心的因素。

你現有股票，係有長線投資價值，但佢地都係波動性偏高架類別。

好似信達生物（1801）和榮昌生物（9995）佢業務上，係有潛力架地方。但由於佢一直無有盈利，故不確定較高。

唔係話佢地無質素，但由於佢地架價值都係估估下，所以當市況轉弱，佢地自然就會較波動。

因此，這兩股唔建議持有太多。

金科服務（9666）上市不久，新股好多時都要過一段時間才見真章，現時要準確估值，會較難。

至於餘下兩隻，質素會較好。

這些股票可持有，但不宜佔組合太多，以免風險過高。

------------------------------------------------

Q21568：

不好意思，想請問教陽光能源，廣匯保信，日照廣裕廊，還是思捷環球，這些都持手，看能否走出來。

恒騰這股我從16買了，現在只有9元多，還值得溝貨離場嗎？

龔成老師︰

陽光能源(0757)多年出現虧損，加上負債沉重，建議你沽出。

廣匯寶信（1293）和日照港裕廊 (6117)投資價值好一般，建議你每有反彈，就慢慢沽出，換至其他優質股會較好。

思捷環球（0330）當多年前，環境改變令佢「生意持續下跌」，佢的質素已經改變，佢已經要進行止蝕的動作。

恒騰網絡（0136）有危有機類。

現時企業盈利不多，但市值極高，市場對「前景」有無限幻想，有時炒作會升好多，但跌都可以好勁。

如果長遠業務成功，會爆得好勁，但失敗，會跌得好勁。

因此，若你持資貨較多，建議沽出部份，去平衡風險。餘下的小注，可以守。

我發現你手上的持股，都有長期不止肯蝕的情況，相信你有些投資概念有核心問題，你要小心，最好之後改正翻這個概念，記住，我地不是睇賺蝕，而是睇質素，質素不好就是賣出。

另外，你在加注概念上，同樣有問題。記住，我地決定加注與否，要睇幾個因素。但絕對不會是因為「拉低平均買入價」而去做。

第一，要分析這股的質素，如果無質素，就再跌都唔加。

第二，這股的類別，如潛力或增長或收息類等，是否與你的財富組合匹配，比例是否適合。

第三，你要先計算加注後，這股佔你股票組合的比例會否太多，因為同一行業，同一股票。不能佔股票組合的比例太多。

第四，現價是否有投資價值率，要平，或起碼合理，不能貴。

第五，你要在加注後，仍有現金剩。

記住，重點不是「拉低平均價」，而是組合比例與配置。

------------------------------------------------

Q21569：

hi 龔sir，想問埋3808中國重汽值唔值得投資？見佢2020年營收同純利都好唔錯，分別升左56同89%，純利有成74億，但估值得5百幾億。

值唔值得中長線投資？打算17-18蚊建倉。感謝

雖然依家集中賣重型卡車，唔知將來有冇機會發展新能源技術

龔成老師︰

中國重汽（3808）這股都有質素的，佢主要業務為專營研發及製造重型卡車及有關主要總成及零部件。總部及主要生產基地位於中國山東濟南。

佢連同母公司按銷量是中國最大的重型卡車生產企業。長遠來說，其實是有質素的。

睇翻佢資料，佢重型卡車產品品種包括貨車及貨車底盤（總重超過14噸）、半掛牽引車（准拖掛總質量超過12噸）、自卸車及各類專用車底盤等，是國內驅動形式最全和噸位品種最多的重型卡車生產企業之一。

重型卡車產品廣泛服務於基礎設施、建築、集裝箱運輸、物流、礦山、鋼鐵及化工等行業的客戶群。

過往的生意與盈利理想，有長線投資價值。

將來會否全面投入新源市場，都係未知之數。

而現時質素而言，此股有投資價值。17-18蚊算係合理區中至上部，可分注，並長線持有。

------------------------------------------------

Q21570：

早晨龔sir！我之前已經有留意你既堂，不過因為小朋友剛出生不久，呢兩年夜晚都要早早回家，所以一直無報讀，我都有曾經諗過，問問你會否用zoom或teams搞網課，不過因為可能會被人偷錄，我都不好意思問出口

至於打算加注的資金，我最近拜閱緊你的50潛力及50值博兩書，當中50值博真的好厲害！

龔sir你於18年尾出書，到現在21年首季，約2年半的時間，超過一半公司已經超額完成倍增成果；另有部份即使面對疫情逆境，都沒有遭受毀滅性打擊，公司非常優質，證明龔sir你分享既理論同埋眼光都非常正確！

龔成老師：

對呀，因為股票班，由於內容太重要，只有實體班，唔會開網上課程。

因為之前實體股票班試過比人偷拍，之後放左上網賣，最後要搞到報海關先處理到，好煩。所以，網上類的教學，都好擔心有偷拍問題，風險太高，因為好多課堂內容，都唔想太公開，只想自己學生知，所以暫時都唔會搞。

至於《50股》一書，我寫的方向，是從企業長期發展去寫的，中短期股價可能波動，但長遠這些都是有質素的企業，因此都有長期投資的價值。

------------------------------------------------

Q21571：

龔sir你好，四年前受你啟發，開始月供股票、工作跳出舒適區，人工由當時14k變為現時$30k，生活質素大大改變了。

最近一年，我更踏入一生令一階段，並有想在這一年置業的打算。

本人33歲月入$30k，月儲$20000。

太太29歲，月入$23k，每年跳point，月儲$14k。

現在只有我月供股票：12 $2000，66$2000，1177$2000

我們有130萬現金，股票80萬（其中是月供1211@$50.687 1883股，謝謝老師）

1. 我們打算買6.5m的樓，應該要借9成定8成好? 借9成還可以有現金投資，借8成不用還太多利息

2.買樓後，月供應該要停供還是繼續月供?

3.股票組合中有12、66、823、1177、1211、1810、1448、9988、2628，新經濟股跟舊經濟股佔5050，未來應該要轉換股票組合嗎?

謝謝老師回覆!

龔成老師︰

1) 現時利率較低，盡借9成，令自己可以空出較多資金，來進行投資增值，咁會較好。

但都要留意，成數愈高，按揭保費會愈高，你要自己計算一下，而我相信8成半或9成都可考慮的。

2) 月供是一個長線策略，盡量維持月供。

而且，係你買入一間物業後，個財富組合會較左係物業個邊。因此，你必需去加大翻股票比重，維持月供，係較理想的做法。

當然，買樓前就不用太進取投資股票，等完成買樓過程後，先慢慢加強股票部分都得。

3) 以你33歲計，係可以。但新經濟股會較波動，你要明白這個風險。

另外，你持股中有不少地產股(0012、0823、0066算半隻)。緊記個別行業，佔組合比重不能高於30%，否則會有過度集中性風險。

你現時每月月供$6000，以你們每月儲蓄水平計，係偏少﹐最好可以做到一半儲蓄，用於月供股票。

持股中，中國人壽(2628)近年增長力弱左，質素只係中等，不宜持有太多。

其餘股票都有質素，你長線持有就可以。

由於你未來一年會置業，時間太短，你要先扣起這部份支出，不可用作投資。

現時大市只在合理區，扣除置業開支後的現金，可以先儲起，等大市有明顯回調才出手。

------------------------------------------------

Q21572：

老師，開始遇到樽頸，已有物業及股票，不知點行下一步。

只有車位及細價工廈選擇，唔知老師新作千萬富翁有冇教?

龔成老師︰

首先，我地要從成個資產配置去考慮。你現時組合中，己持有物業及股票，但當中比例是否平衡?

如果係明顯偏重係物業，而一刻，你要做的事，就是加大股票比重，令個組合平衡翻。

若果組合平衡性無問題，你就可以考慮其他資產，好似車位及工廈。但留意這類物業，比較適合較專業和有經驗的投資者。

近年車位和工廈的回報率不高，投資價值只屬中等。 但如果你找到租金回報率較高，有潛力的項目，都可考慮。

我本新書《80後千萬富翁》﹐都有講述一些有關車位和工商廈等的投資技巧和注意點，你可以參考下。

------------------------------------------------

Q21573：

你好呀，睇左你facebook都有一段時間, 有跟你教入左1211,靠佢令到整個組合不至蝕，因之前有原本高價入落的 0002/0011/0303/939，現有持貨市值720k+。

補充小小個人資料，48歲，現每月淨大約35000，其中5000會多供個人MPF, 有11000會去月供股票。

而加想加大月供去到20000, 打算供以下股票，而1177/1810/9988 是打算新增加的，希望個組合唔止著重收息。

呢個組合會否太散，有需要減數目或換其它股？同埋現市況，會否太大比重放左落月供？ 唔該哂！！！

0002 2500
0011 1500
2638 2000
2800 6000

6823 2500
1177 2000
1810 1500
9988 2000

龔成老師︰

你現時中電(0002)、恆生(0011)、偉易達(0303)和建行(0939)雖然帳面有虧損，但這些股票都係有質素。

而且佢地都係收息股，持有目的主要係收息。以你48歲，你組合中係需要有一定收息股，故你可以不理股價波動，照持有就可以。

而比亞迪(1211)質素，但以你的年齡，其實要開始慢慢為退休做準備。

比亞迪(1211)、中生(1177)、小米(1810)、阿里(9988)這類潛力股，增長潛力係高，但波動性都大，現時最多佔組合約2成好了。

你現時月供組合，基本上都可以，唔會係太散。

但大市只在合理區，如果$20000就係你每月可投資資金總數，你就要按比例減少少個月供供款。令到可以每月留有一定現金，用來等大跌市時掃貨。

最後，你要緊記隨著年紀漸長，潛力股比例要慢慢下降，將佢平均地轉入其餘「平穩增值股」(2800)和「收息股」(0002, 0011, 2638, 6823)中，去平衡風險。

------------------------------------------------

Q21574：

你好，龔成先生！我係一個普通男仔，24歲，大學商科畢業，與家人同住已供滿嘅居屋。

面對香港不斷通脹嘅社會，好多人食飯買樓都成問題。我唔想有一日冇選擇而要住劏房、食冇營養嘅食物、冇好嘅醫療保障、請唔到工人照顧父母。

所以我想學投資，利用資產保障自己同家人嘅未來生活質素。

以目前情況，投資股票係現階段我能夠做到嘅嘢。然後下階段就諗自住物業(2019年抽中居屋前5個號碼，不過應該唔輪到我揀樓)，我會 Keep 住抽居屋。

希望可以請教到龔生喺投資方面嘅睇法！多謝！

工作背景：
合約工作，月薪$17,000，應該續約至2022年
(打算完約後投考ACO)

銀行儲蓄：
$100,000
(每月可儲蓄$10,000)

持有股票：
3067安碩恒生科技 / 100股 / 16.70
1810小米集團 / 200股 / 24.80
0270粵海投資 / 2000股 / 12.24
2628中國人壽 / 1000股 / 16.02

5月份開始月供
0388 香港交易所 / 1000元
0700 騰訊控股 / 1000元

心儀股票
0823 領展房產
1177 中國生物製藥
1448 福壽園
3110 GX恒生高股息率
0066 港鐵公司
1928 金沙中國

龔成老師︰

正確，當不滿現時生活，就要作出行動，去改變。

你現時想法和策略，都係正確。係我地資金不多時，應先用優質股去增值。

到有一定資金，我地就加入其他優質資產，好似物業。令到成個財富組合，更完整和平衡。

你現時係24歲，是財富增值的黃金時期。除了盡力儲蓄、投資、學投資知識外。也要把握這個黃金時間，做好財富增值部份。

在你持股名單中，中國人壽(2628)近年增長力弱左，質素只算中等，現貨可持有，但不要加注。

而心儀股票中，GX恒生高股息率基金(3110)主要係收息，增長力好弱，不適合你。

月供策略上，你可以投資「平穏增長股」和「潛力股」。你每月5成儲蓄，即是用$5000做月供。其餘先儲起，用一邊月供一邊儲蓄的策略。

除了你所選的2隻月供股票外，可以加入以下這些股票。

選股上，你可以投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

增長力較強的，可選安碩恒生科技(3067)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）。但佢地波動性和風險會較高，你要自己平衡。

由於潛力股有一定風險，你現時無太多投資經驗，除了月供0388和0700各$1000外，其餘$3000應先集中係平穏增長股，甚至盈富(2800)。到你學到一定投資知識和經驗後﹐才慢慢加大潛力股比重。

現時大市只是合理區，你現有10萬資金可以先投入3,4萬，用"分注"形式，慢慢買入平穏增長股。餘下資和每月所儲倒的資金，就等大市出現一定程度的下跌，才大力度掃貨，然後長線投資。

學習方面，你要去多讀投資相關書本、年報，新聞和報相關課程。

書本上，你可以睇我寫架"80後百萬富翁"、"財務自由行"和"股票勝經"，都適合你這類初學者。

------------------------------------------------

Q21575：

龔老師，我朋友有買保險公司的每月派息基金，10萬元在一年裡增至11萬，另利息共$7,200。但要限年期5年，若中途要取出，就會有些罰款。

她鼓勵我要唔要也考慮買，幫忙我的財富能增值。

請問若購買這樣的基金，與自行購買ETF / 優質的收息股比較，我比較適合哪一項？

這類基金當中有無一些魔鬼細節
是不太建議的地方？

龔成老師：

你要問清楚，在那些情況會增加到$11萬，然他派$7200，是一定？還是在某些投資環境先有？要問清楚。

另外，$7200是怎樣派？這是指每年？還是甚麼？佢會以怎樣形式派比你？是投入在基金，選是派現金到你手？要問到好清楚。

另外，問清楚5年內賣出，會有甚麼後果。

如果各方面都無問題，這類基金都可以成為財富配置的其中一部分，不過，增長力未必強，你要同時投資其他項目。

------------------------------------------------

Q21576：

龔sir，你好呀～～我係你而家基礎班既學生，首先好多謝你，因為你令我對股票有新認識，由初初讀你本「80後百萬富翁」、到like你FB、到而家直頭報埋你既股票班，我自覺獲益良多。

雖然仲未好掌握選股學問，但從我聽你上堂同睇你既post，都考慮緊自己應該要買咩股票，黎緊我諗住少少地月供買呢幾隻股票，不竟而家隻隻都好似唔係平入價，希望你可以指點下我。

（2382）舜宇光學：月供$1000
（0027）銀娛：月供$1000
（0669）創科：月供$1000
（1448）福壽園：月供$1500
（3918）金界：月供$1500

另外，如果供埋呢隻美股有冇得諗呢？我記得阿sir上堂你話呢隻係水桶1（QQQ 納斯達克）謝謝～

Sir，餘下幾堂我會俾心記聽書

龔成老師︰

以上提及股票，都係有質素，當中金界(3918)、舜宇(2382)、福壽園(1448)波動性會較大。

現時你經驗不多，如果你對這些股票，未算好認識，最好先較集中點係水桶2。到你有較多經驗，才加大水桶1，就會較安全。

至於美股，都有投資價值。如果你對美股股票，唔係太識。你可以用QQQ或VOO ETF，前者係水桶1(追蹤納斯達克100指數)，後者係水桶2(追蹤標普500指數)。

其實月供係一個長線策略，我建議你唔好急於一時，可以等上完堂，對投資有較全面的理解，才去慢慢做配置，咁會更好。

------------------------------------------------

Q21577：

你好， 老師。 我見你之前話太古地產比大古A好。 但太古a既價格不斷上升。

好快可以上番疫情前的水平，而且太古地產的成交量亦比太古a低很多

第日疫情好的話，太古a入邊既國泰都應該會慢慢好番。

龔成老師︰

我地投資一隻股票與否，唔好用成交量作參，要睇翻佢本身質素。

太古地產（1972）有質素的。佢太古地產是香港及中國的綜合地產發展商、業主及營運商。簡單來說分做三個部分：物業投資、物業買賣、酒店投資。

持有優質的物業組合，加上定位於中高檔次，當中的租金回報亦理想，加上物業組合有相當價值，長遠計的租金會保持上升，當然中短期一定有上落。

另外，由於太古地產有發展大型綜合項目的技術與經驗，這是獨有優勢，無論是發展中國又或是外國的項目，都能為太古地產帶來理想的回報，亦會令往後的總租金收入長遠能向上。

因此，太古地產有相當的質素，是不錯的優質股，長遠投資有一定回報。

不過，疫情因素對這企業都有一定的影響，但只是中短期不利，長遠會好轉。

另外，在家工作及網上購物，都會對這企業造成影響，但長遠而言，市民對實體購物，以及實體寫字樓，都有一定的需求，因此長遠仍不差，但增長力可能略有影響，令增長力不會太高。

現價合理中至上部，對追求收息及平穩增值的投資者，這股適合，但就不是高增長類別。

太古股份公司Ａ（0019）佢是綜合企業，佢都正面，但整體質素上算係中等。

但佢業務已經好大，長線增長力會不及1972高。現價算是合理區中上部，你可以分注投資。

而國泰（0293）質素只是一般，航空業對經濟週期較敏感，收入不穩，同時唔算係一個好賺錢的行業，因此這股的質素只是一般（國泰會影響太古A的）。

過左疫情，佢會好翻D，但始終賺錢能力都係弱左，唔好對佢有太大期望。

------------------------------------------------

Q21578：

龔老師：弱弱一問，2823安碩A50 ，3煤氣 及 2828 恆生中國企業，係屬於平穩增值股嗎？

因想改下水桶123的持股比例，唔好意思，打攪哂

龔成老師︰

其實煤氣（0003）有質素，但增長力弱左，而佢改為20送1，反映增長力可能減少左，但不算差。

香港業務不強，但中國部分不差，中短期雖然較一般，但見佢的長遠發展力仍在，但就要耐心點。

由於佢一向都穩定派「相同股息」，在這情況下，反映派息的增長會少左。但整體來說，這企業仍是有質素的。

我睇翻佢近年在中國的投資，仍是保持進行的，每年都有幾十億，這些投資不會好快就見到收成，但這企業就仍是發展中的。我對佢長遠發展仍是正面，只是增長力的問題。

安碩Ａ５０（2823）資目標為追蹤富時中國Ａ５０指數之表現，即是當國內股票升，佢都會上升，是一個中國股票的組合。

相信長遠仍有增長力，不過國內股股價一向較波動，令到這基金都會較為波動，如投資，最好用分注或月供的模式進行。可長線。

恒生中國企業ETF（2828）有投資價值。

這基金的投資目標，是追蹤恒生中國企業指數之表現，即是中國的企業，當中不少都有一定的質素。只要中國經濟長遠增長，而這些企業合理增長，就能帶動價格保持上升。

由於這些國企的股價較為波動，你最好以長期的模式去進行月供，每次供的金額不用太大，以較長時期去平均價格，自然能減少風險。

以上3隻股票，煤氣（0003）係平穏增值股，而安碩Ａ５０（2823）和恒生中國企業ETF（2828）係平穏增長股，至潛力股之間。

增長潛力較煤氣高，同時風險都略高。但相比煤氣，這2隻ETF係一籃子股票，故分散風險能力會較好。

------------------------------------------------

Q21579：

明白, 謝謝老師. 其實我一直考慮一個問題就是, 價值投資是好好, 我在想如果它可以制造現金流會更加好, 因為價值投資需要時間累積.

我亦明白你既投資理念. 先儲蓄後增值. 當增值到一個大數後就可以利用收息策息來賺取穩定收益.

我從2018年開始就想擺脫打工仔既生涯, 我睇左你本千萬富翁, 思維篇的內容可以話就係我而家做緊既野, 不斷去嘗試. 搵機會。不斷明確自己欲望和目標. 我亦相信最後我一定做到.

我而家背景是已婚人仕, 有一女, 準備再添一男. 收入是穩定, 兩公婆加埋有大約10萬收入。

我而家每日都同自己講, 我出年會實現搵到每個月被動收入6萬蚊. 講左一排後發現自己真係會係咁唸點樣先可以達成尼個目標。

我出年係公司做夠15年, 可以攞到七成退休金, 再加埋其他資產, 大約有3-400萬現金, 所以我就係度唸, 我點樣可以運用尼筆資金黎制造現金流, 令到我可以達成尼個每月6萬元穩定被動收入既目標.

感謝老師回覆

龔成老師︰

將資金變成製造現流工具，方法好簡單，就係有策略地，分注買有優質收息資產(如收息股、年金、定息產品、債券等)。

透過佢地派息，從而獲得現金流收入。

如但要做到每月有6萬蚊現金流，以股息率6%計，你需要本金1200萬本金。

以你現時情況，你退休金+其資資產總金額，跟目標1200萬尚有一定落差。建議先用優質股，再進行一定程度的增值，才實行財務自由計劃，咁會較好。

除了你每月可以做月供股票外，這筆退休金，都可以投入以下股票，進行財富增值。

以你36歲計，投資目標可以用「平穏增長股」 + 「潛力股」，你每月先用5成儲蓄，其餘先儲起，用一邊月供一邊儲蓄的策略。

但潛力股有一定風險，如果你覺得自己都有一定投資經驗，最多比重可以去到5成。否則，大約佔3成好了。到你有經驗時，才慢慢提升潛力股比例。

退休金，到時可以因應市況，分注入貨。餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

------------------------------------------------

Q21580：

阿Sir我想問你，我啱啱賣咗自己層樓，想轉三房。因為而家兩個小朋友，要多點空間。

我想問你認唔認識麗城嗰邊？如果喺嗰邊買樓20幾年樓細屋苑得兩三座或者單幢樓，你覺得投資價值係咪相對麻麻。

但因為荃灣西三房新屋苑閑閑哋都過千萬，真係頂唔順。

龔成老師︰

荃灣本身算是不錯的地點，這是市區與新界西的重要連結位，交通方便，區內配套齊，算唔錯。

作為自住樓，除了睇投資價值，都要考慮埋本身財務狀況和生活需要。

你所講地方，我相信係蔚景花園、韻濤居。這些屋苑較細，甚至只有單幢。樓齡剛過20年，唔算係好舊。

而且交通算係可以，步行10-15分鐘，可以到荃灣西站。初步睇，都算方便。

如果佢尺寸、位置等，配合到你生活，同時做到"供得起"，我覺得可以考慮。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q19861-Q19880）

Q19861：

老師，我還有一個希望，就是有一些投資可以產生每月2-3萬的固定現金流。

目的是在突然失業或因意外情況而無法全職工作的時候也能有一些基本收入。請問如何投資才能實現這個目標呢？

龔成老師：

要一步步，不要急。

第一，努力儲蓄，沒有本金就無得錢。

第二，做好投資。當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

第三，就是配置，當你有一定的財富後，就配置成收息股，或其他現金流類別的資產項。

如果你擁有$500萬，投資收息類資產，年收6%利息股息，每月就能收息，每月就是$25000。

------------------------------------------------

Q19862：

龔sir 早晨
一路有睇開你既page同書
感謝你既用心教學
但就住最近全球印銀紙呢樣野有啲問題想問下

好多人都講緊要避險 因為銀紙已經越來越唔值錢
除咗可以買股票 同 磚頭

我想問下買黃金同虛擬貨幣係咪都可以做到對沖？

如果係既話咁 黃金到底其實係買真正既金幣實物比較好定係買黃金既etf都可以 兩者其實分別大唔大？依家其實又係咪買既好時機？

另外，虛擬貨幣我都想知老師你係點睇呢樣野
感謝你嘅回覆

龔成老師：

其實全球不斷印銀紙，銀紙不斷貶值，已經進行左幾十年，所以你會見到幾十年來，物業、優質股、黃金的價格不斷向上，就是因為銀紙不斷貶值。

你要明白一個概念，我地不是炒賣，而是持有翻「真財富」，建立一個財富組合，長期持有。重配置，重質素。

你買部分黃金，可以，ETF都得，但只是整個財富組合的其中一部分，小部分。

至於虛擬貨幣，是人為創造出來的，絕對不是「真財富」，有沒有真正的價值，如何定義真正的價值，我有相當的疑問。

這些人為創造的貨幣，因為關注度由很少變得大，價格會大升，但這背後是否有真正的支持，我不知道。只能說，投資這些貨幣，投機味好重，可能大賺，亦可能蝕到一文不值，因為，當中有沒有價格，我不知道。

但這不代表佢無價值，佢可能好勁，只是我自己不知佢好勁定好差。

佢長遠的價值，取決於「有多少人用」，即是說，雖然無真實價值，但可以有「交易價值」，如果長遠好多人用，的確可能有高價值。

因此，這些虛擬貨幣，由於我無法作出專業分析，所以，我不會投資。

但如果你分析到佢長遠的交易大，大家都持續關注，就有價值，就值得你投資。

------------------------------------------------

Q19863：

老師，80後百萬富翁已經睇咗，真係學到野！
如果收息嚟講，3988比1398市盈率更低，係咪抵買d？

龔成老師：

市盈率只是我地分析的其中一個要點，你仍要分析好多指標，例如企業質素等。

上述兩股都是有質素的，不過增長力不強，只是收息股，你可以考慮工行（1398）。

但如果你想收息多D，可考慮中行（不過這股質素就比工行略略差）。

------------------------------------------------

Q19864：

老師 我想問下我只有現金3萬 同有幾隻輸緊錢股票 我又想一年內有十萬 有冇可能

龔成老師：

財不入急門，唔好太進取。

你要由基本的儲蓄開始，要有本金先可滾存更多財富。

你要調整你的組合，只持有優質股，建立一個平衡組合，長期持有。手上現金不用太急動用，反而應該想方法加強儲蓄。

最多只建議買入一手盈富（2800），然後持有。

------------------------------------------------

Q19865：

868 與 968 是不是868較好？
Btw 感謝老師推介 早前22蚊時入了兩手175試試 會長揸

龔成老師：

兩隻都有質素的，都可以長線。

信義玻璃（0868）是母公司，業務較穩健及平衡。至於信義光能（0968）比起信義玻璃，就會較進取，潛力較高，風險都較高。

所以要睇你的投資目標。現時信義玻璃算是無咁貴。

吉利（0175）有質素的，你長線就得。

------------------------------------------------

Q19866：

龔sir你好，想問下1358

龔成老師：

普華和順（1358）主要於中國開發、製造及銷售再生醫用生物材料產品；輸液器產品；以及骨科植入物產品。

本身業務有點波動，同時未見有好大獨特性與規模，整體的投資價值未算好高。

佢派特別股息後，股價會除淨而大跌，而派特別股息令佢現金減少，整體企業發展力不強。整體的投資價值唔高。

------------------------------------------------

Q19867：

龔sir你好，大半年前聽你講開始月供，而家已經賺左不少，多謝你！

想請問一下：

1. 1211由40幾開始供，供左幾個月去到100,我就停左無買啦！而家一手都唔夠，但賬面都有賺，我應該繼續持有嗎？我轉供285又合適嗎？

2. 我同我丈夫月入共7-8萬，36歲，沒有小朋友，考慮買樓，如果價錢一樣是600多萬，到底應該買呎數大d既私樓（500呎），還是地鐵上蓋，細一百呎（300多呎）的私樓？謝謝！

龔成老師：

1）原本的比亞迪（1211）就一直持有。

如果你想為組合加入潛力股去月供，可考慮安碩恒生科技（3067）。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂，因此，這刻不能大注投資。最好的策略，就是月供，或自行分注小注慢慢收貨，原理如同不斷儲貨，這樣就能平均買入價，減少風險。然後就長線持有。

2）如果500呎樓的地點好差，就未必值得，但如果地點都不算太差，而整體的質素無問題，就可以考慮。我地會以地點及整體質素作考慮點，然後再考慮平與貴。

------------------------------------------------

Q19868：

我968，22蚊位入，你覺得高無？我都信距可以長線，短期波動好大，要唔要諗止損位？

龔成老師：

信義光能（0968）本身有質素，是《50股》書其一股，你只是買入價問題，這股本身無問題。

佢業務保持有一定的增長力，股本回報率處高水平，加上現金流強勁，是有一定質素，可長線投資的股票。

現價略貴，這股股價上落都大，要注意金額。如果你持貨不過多，無問題。但如果持貨太多，宜減少少。

------------------------------------------------

Q19869：

你好，龔成
我和老婆月入7萬。
我地今年30歲。

我們很後悔很遲才接觸投資。
現在我們正計劃未來10年的投資計劃，包括置業。

最近睇咗你一本書，內容要我們爭取向上流，不要向下流。

但上月我和老婆抽中了居屋（第2支籤），很大機會可以揀樓，心水是鑽石山。估計很有升值潛力

想請教下成哥，你覺得我們應該買居屋？還是買細價私樓，然後慢慢換大樓？

龔成老師：

在自住的層面來講，居屋會較好，但投資價值，始終就是私樓較好。

如果你本身有自住需要，就買居屋，因為對你地住的環境會較好，例如相同的每月支出金額，可以有較好的住方面的質素，因此「自住」因素是較好的。

自住居屋的好處，是幫你地節省每月現金流，令你地每月可以有更多現金流作投資，就能累積更多財富。這都有向上流的作用。

------------------------------------------------

Q19870：

成sir，您好。小弟近期讀過＜股票勝經＞和＜年報勝經＞，覺得很有啟發。

等疫情過後，會報讀你的課程。

另外請教一下，你對美國行政命令中，提及禁投資的中國公司前景有何看法？
例如941，3311，1800。謝謝。

龔成老師：

對中國企業，點都會有影響的，但這情況中短期較多，因為美國政府換屆，同時中國政府與中國企業都會找出路，中短期影響較大，但慢慢會正常翻D。

而有一些因素，對企業長遠影響不大的，例如美國人不能買某些中國公司的股票，這對短期股價會受壓，但長遠來說，股價會回歸企業價值，因此會慢慢正面翻。

上述3間公司，都身都有質素的，現價合理。不過，增長力本身不算強。

------------------------------------------------

Q19871：

龔成老師, 你好。我現在42歲. 我儲備有大概32萬美金, 而家銀行冇利息. 想請問您能建議如何投資這筆美金? 您會建議轉返做港幣, 將啲錢用嚟買股票? 想請教你如何處理好.

除咗美金,我大概有港幣60萬, 同埋有63萬股票.月入$68K.

66 @3.07 - 700
939 @5.30 - 3000
823 @60.45 - 600
1928 @26.95- 800
700 @531 - 300
9988 @267 - 200

9618 @343 - 100
3690 @ 280 - 200
2800 @25.4 - 2000
1833 @99.05 - 100
1810 @17 - 400

2382 @ 147 - 100
6618 @70.85 - 50
772 @55 - 200
405 @3.62 - 2000
9987 @412 - 50

希望你可以比我一點意見. 萬分感激! 謝謝.

龔成老師：

如果你想買翻港股，可以轉港幣買港股。如果你想分散風險，令組合更加環球，可以投資美股ETF，例如追蹤美股標普500的VOO，追蹤納指的QQQ，但由於美股現價都唔平，如投資，一定要慢慢分注入，不要急。同時要留部分現金。

至於你現時的持股，其本上都是有質素的，都是可以長線持有的，不過隻數有點多，唔建議再不斷加隻數。

反而你之後的增持可D簡單，你現時42歲，財宗富仍可平穩增長，投資盈富（2800）適合你，另外，可以加少少安碩恒生科技（3067），都可長線。但比例就應該比盈富少。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂，因此，這刻不能大注投資。最好的策略，就是月供，或自行分注小注慢慢收貨，原理如同不斷儲貨，這樣就能平均買入價，減少風險。然後就長線持有。

------------------------------------------------

Q19872：

龔成老師， 我好耐之前買了二隻銀行股， 建行 5.8 （16000股）同埋農行3.5 （25000股），我知道吾應該全集中於銀行股，我想賣掉一隻， 再用來買其他股

但農行還有很多才回到之前我買的價錢，請問我應該再等等嗎？

龔成老師：

最重要不是睇「賺蝕」，不是睇「買入價」，而是睇質素。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

上述股質素不差的，第一，你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？

兩隻中，農行（1288）質素較弱，你可以先賣部分，然後等經濟再好翻D，股價上多翻少少，再賣餘數，轉其他。

------------------------------------------------

Q19873：

Hi ,現在人民幣到期想問應該繼續做定期或兌換港幣好？謝謝你回覆

龔成老師：

如果你轉做港幣無特別用途，做人民幣定期都可以。

但就唔能夠過度集中在人民幣。

相信人民幣大跌的機會不高，但長遠持有始終回報不高，因此，只能作為財富組合分配的其中一部分。

------------------------------------------------

Q19874：

龔sir，其實好想知你係點樣知某D股票回翻10%入會好啲，我知要去上你既堂會好啲，但我係澳門人，過來香港不是太方便，請問可以透露少少嗎？

龔成老師：

其實這涉及企業價值的問題。

我地買股票就是買企業，每間企業都有佢的優質度、增長力、現時的平貴。我地投資，首先一定要投資優質股，但優質股都有平貴，我地就會考慮佢的優質度與潛力，以及現時平貴，去衡量「投資值博率」。

例如佢只值$200，而現價$300，投資值博率就不足。當有足夠的投資值博率，我地就會進行投資，同時以這點去考慮注碼。

但要留意，我地不是分析走勢，只是「值博率」，例如當我表示，跌多10%較適合投資，就是反映下跌10%的值博率較合理，但不代表我預測佢會跌10%。

其實我之前都有開過澳門班的，不過現時疫情，所以暫時停左，之後會再開翻的。

你或者可以預早留位，只要whatsapp 852-55457212我同事講，打「留位澳門班」就得。我地有具體資料就會 whatsapp你。

因為現時已有好多澳門人留左位。

------------------------------------------------

Q19875：

成哥 請問你點睇波音呢間公司同埋佢嘅股票？小弟對航空業有一定嘅知識，知道波音同airbus基本上壟斷整個民航機市場，再加上軍用飛機同埋美國國防設備，我覺得呢間公司有一定質素。

近期737max事件加上航空業嚴重受創，令波音股價下跌唔少，依家係唔係入市嘅時機呢？

多謝成哥指教

龔成老師：

我無特別研究，但我相信佢是有質素的，因為佢在技術上一定不差。就算航空業面對不景期，也只是中短期，而在長遠，這一定有需求，同時有技術一定有價值。

不過我不清楚現時的平貴，你可以以分注買入的模式投資，長線持有，只要總金額不過多就得。

------------------------------------------------

Q19876：

老師，現階段有邊隻長線股處合理價呢？

因無投資知識，以前買了很多垃圾股票，賣掉又輸很多，不賣又沒價值，有些甚至無成交。請問可否給點意見? 以後我只想買些穩健及長線的肌票呢～

龔成老師：

你可以考慮盈富（2800）。再加上銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：安碩恆生科技ETF（3067），但就要明白波動性比上述會高左，同時風險大左，你要自己平衡。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q19877：

老師，拜讀完你本5年買樓書想問下你意見:

我本身住公屋，想用綠表呢個’優勢’上左居屋先再諗私人樓(dream house)，咁符唔符合你書中所教嘅: 我當上居屋係第三步 然後將來以居屋換私樓？

書中你有提過大圍樓長遠都有價值，都有話如果自住，其實居屋都唔差。

我本身住開沙田，所以都心水大圍居屋，但要符合以上所講新d嘅樓只有兩棟2017年入伙離大圍火車站10-15分鐘路程嘅兩個屋苑，但分別都係單棟樓。

但你本書都有教揀呢種單位同成交量比較少嘅樓又要注意例如將來維修費得好少人分嗰d，而且交通方面又唔係最近大圍站。

我留意到最近呢兩個屋苑只有5單內嘅交易，好似冇乜參考數據。上述種種因素都令我好15 16。

老師，你有冇咩建議比我？究竟計唔計劃買呢個居屋好呢？同埋我嘅置業觀念是否正確？

另外好感謝你寫左呢本書，我本身真係一張白紙咩都唔識，亦覺得買樓好複雜好難，但你嘅寫法令我好易明白左好多重要概念，亦令我有信心可以買到dream house!

雖然我屋企人話買樓根本冇可能，但受到你影響我絕對對自己都充滿信心，覺得會達成！謝謝老師！

龔成老師：

居屋有自住的作用，需要投資價值唔算高，但都可以考慮。

因為購買居屋後，其實比你買私樓，能較節省現金流，這樣，你就可以有更多多餘的資金去進行其他方面的投資，例如股票。

利用股票去進行財富增值，因此，這都是買居屋的優勢。

沙田大圍區，整個區份都不差，你可以在這區尋找目標物業。至於單棟樓，不是不能買，只是你買入時要較小心分析，本身的維修，實際價格，要多了解，如果該單棟樓比其他樓較平，其實都值得考慮的。

其實你可以進行這個計劃，大方向無問題的。

最後，唔好比人影響，只要你做正確的事就得，當然你要有一定的知識，以及各方的準備，之後保持去行就得。相信自己，你可以成功的！

------------------------------------------------

Q19878：

老師！原來澳門圖書館也有老師的書供借閱（我是澳門人），本想先借來了解一下書的內容我是否能讀懂後再去宏達購買以便定時能複習

結果發現大多都至少有6個人或以上在排隊等待中，我這星期五會乖乖去宏達買書閱讀來增值自己！

看到老師你的fb前，我在同事的勸導下開始了投資，身邊的同事大多都是短炒，我觀察他們的投資方式後就覺得短炒太勞心要時時刻刻注意股市

即使看中了優質股也因為高買低賣而蝕錢，那時我就覺得應該中長綫發現，可惜因為沒有認真學習投資所以沒能力發掘優質股以及了解該如何分配投資組合

希望現在開始學習能令我更好的增值自己的資產（因為家人都不鼓勵我投資，覺得定期最好最穩陣）

龔成老師：

其實連我自己都唔知，原本澳門圖書館有得借我的書，哈哈。

我地最重要是建立一個長期的「財富組合」，要優質，要平衡，要適合你的年齡與風險承受程度，各類優質股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。當你用這方法進行，就會發現投資其實好穩健。

------------------------------------------------

Q19879：

你好！ 有個無知疑問關於比亞迪。
有人話佢嘅股價會升到去300, 500, 甚至更高.....

但真係會有股價去到咁高？

睇返而家比亞迪嘅股價去到250以上，都成10幾萬一手，真係會有股票係要用到10幾萬買一手？

龔成老師：

現時比亞迪（1211）已經貴，佢已經透支了幾年後的業務發展與盈利，因此在中短期，就算有升幅都只是炒作，未必是企業實質價值的提升。

所以現時投資值博率不算高，但如果本身有貨，由於佢有前景，所以可長線。

不過，你要明白，就算$10萬一手，都可以不貴的，你不要用「入場費」去限制自己。正如美股巴郡股票，一股是過百萬的！是「一股」。

所以，如果企業有發展，業務與長遠價值不斷向上，就能夠支持到股價，這點你都要明白。

------------------------------------------------

Q19880：

龔sir 688我本身高位持貨大半年
現時我覺得估值偏低 值得哩個價位溝貨嗎？
預期出財報會炒番上去

我既諗法啱嗎？

內房同銀行股現時應該應該建倉嗎 睇好疫情後應該會好轉

龔成老師：

中國海外發展（0688）不是無質素，在發展商來講，不算最強，長遠有平穩增長的能力，前景都可以。

睇翻佢的財務數據，基本上都是正面的，但生意增長力不是好強，見佢過往的生意都只是平穩，而整體都有投資價值的。

可以視這股為平穩型的企業，現價合理。當然中短期可能因樓市一般而股價一般，但長遠，仍是可以的。

現價合理區中下部，你如果資金多，可加少少。不過，是否出在業績後會上翻，無人知的，因為中短期總有好多不確定性，你要以長期作為分析點。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

2020 年，新冠肺炎 (COVID-19) 疫情爆發，成為全球市場最大的「黑天鵝」，金融市場人人自危，投資人「什麼都賣」的恐慌出脫，相信還是很多人被嘎「空手」，仍不敢進場買股。記得從"心"開始出發，才是能在股市中讓你化險為夷的武器！
到了2020年的尾聲，這一年來台股上漲將近23 %，所以媒體統計了2020年股民平均賺進65萬元。這個數值就跟台灣男女平均有一顆蛋蛋還沒有意義～看看就好，最重要的還是自己是否有一點一點地往前進！
.
至於2021年該怎麼做，老牛有幾點建議：
⭐【懂得投資】
今年台股火熱，從成交量就可以看出來！投資老手都知道，過去台股成交量小於千億，是相當常見的；不過今年低利QE政策、加上股市逆轉返漲，吸引不少散戶大舉開戶。今年新增開戶人數高達50萬人以上，這些螞蟻雄兵也反映在成交量的提升上。
身為投資新手沒關係，記得要逐步學會如何懂得投資，多頭時人人當股神，可惜隔年震盪被擊沉。懂得正確的投資方式才能在這條路上走得安穩，走得自在。
⭐【抱緊投資】
在股市創高之後，進入橫盤整理期，很多人在抱緊處理的路上半途而廢，每每熬不過那段股價最無聊的期間。以為自己的持股不漲就是爛股票，然後輕易地賣掉，去追高那些熱門股，最終可能賠錢的機率變得很高。
把財務報表當成在股海中航行的明燈，俱備閱讀財報的能力，從各項財務指標拆解公司營運能力、獲利能力、現金流量甚至是還債能力。透過認識公司的真正價值而不被外部評價影響，才能安心抱緊持股！進一步還能股價落難時，趁機會多買好幾張～
⭐【一再投資】
複利是世界第8大奇蹟！做好投資策略規劃，讓利潤像雪球般越滾越大，與此同時堅持長期投資的耐心，去等待投資組合逐漸成長，最終盈餘及股利會回饋到我們身上！
今年依舊是怨嘆還沒買夠就漲上去，還好「抱緊處理」不只是讓我避開股災的心驚膽跳，也讓我在屢創新高下常到不小甜頭。再細細品嘗這句「一再投資，別讓你的利潤空閒著！」更能體會其奧妙之處。
.
我自己從年頭忙到年尾，即使是天天早起擠時間，但還是深感時間真的不夠用。除了出了第二本書《股海老牛最新抱緊股名單》之外， Youtube頻道不到一年，已經累積超過70萬人次觀看，這是一開始沒想過的事情，還是感謝大家在今年的支持～
最開心的還是，能盡自己一點微薄之力，幫助到更多的人走上正確的投資理財之道。如果有任何投資上的問題，我一樣會不吝給予幫助，歡迎提出來跟我一起討論。
最重要的是...祝大家新年快樂～2021年一起繼續抱緊享富！🍀
https://www.pressplay.cc/link/1F43911923?oid=ED53559270

Netflix可以買了嗎？技術分析+基本面分析 | 美股 | 股票入門 | 股票教學 | Catherine Wood

FB: http://www.facebook.com/springinvest
IG: http://instagram.com/spring_invest
Line群組：http://line.me/ti/g/TJ-zQFDbJ1


#netflix #美股 #股票

Zoom可以買了嗎？技術分析+基本面分析 | 美股 | 股票入門 | 股票教學 | Catherine Wood

FB: http://www.facebook.com/springinvest
IG: http://instagram.com/spring_invest


#zoom #美股 #股票

FB: http://www.facebook.com/springinvest
IG: http://instagram.com/spring_invest


#美股 #技術分析 #股票教學

川普確診又好轉?! 美股該怎麼操作？| 美股看這兩個關鍵支撐點 | 股票教學 | 股票入門