《愛情動物學 006｜八爪魚》 好多人成日都會話初吻好難忘，因為嗰次係第一次同情人有咁親密嘅接觸。嗰個肌膚之親同埋當刻心卜卜跳嘅感覺，我相信都會係腦海裡面至少loop返十幾二十年。 而係我腦海當中loop嘅話面，除咗係初吻之外，應該仲有第一次拖手嘅感覺。 🤝💓// 拿，個人覺得第一次拖手係唔會輸俾初吻㗎下。因為當時隻左手係喺極度僵硬嘅情況之下，拖住咗另一隻柔軟嘅手，而我仲因為緊張得濟，拖住嘅時候同手同腳行咗成條街。個次嘅拖手雖然自覺浪漫，但係就拖得絕對唔合格！所以今次愛情動物學嘅老師，都可以話係拖手界嘅翹楚，佢就係，八 爪 魚！ 當我見到八爪魚咁多隻爪嘅時候，我即刻就諗：究竟佢哋拍拖嘅時候係會拖邊隻手嘅呢？有冇話邊幾隻爪係攞嚟行路，邊幾隻爪係手呢？ 呢一類望落好似外星生物嘅海洋動物，佢嘅戀愛習慣就同佢個外形一樣：神秘～解答咗你先，八爪魚屬於海洋當中嘅軟體動物，又或者叫佢做無脊椎動物，平時生活當中用作手同腳嘅，其實只係得七隻爪，即係話行街睇戲食飯拖住女朋友都係用嗰七隻嘅啫。而如果講到吸引異性啦喎，男士們要比就梗係比邊個隻爪大啦！ 💪🏿// 通常男仔八爪魚遇到心儀對象嘅時候，就會係個女士面前游嚟游去，然後展示佢個七隻強而有力嘅觸鬚，話俾對方聽：佢就係八爪魚界嘅阿諾舒華辛力加！講真，阿諾舒華辛力加點練都係得兩隻老鼠仔，但係八爪魚就可以操夠七隻！ 另一邊廂，女仔八爪魚就當然唔係淨係睇大隻咁簡單啦，佢地仲會留意埋喺每一隻爪上面嘅吸盤，究竟生得靚唔靚，夠唔夠大夠唔夠圓，如果啱心水，先至會放心用一隻爪被對方拖住，然後就開始發展佢地嘅愛情故事。 ❣️// 冇錯，史上最浪漫嘅愛情都係轟烈而短暫嘅！而八爪魚，正正就係代表人物！ 因為平均壽命只係得大約兩至三年嘅八爪魚，一生人就只係得一次拖手嘅機會，一生人就只係得一次短暫嘅戀愛。 咁係因為其實八爪魚嘅第八隻爪，並唔係手嚟，而係佢嘅生殖器官！只要女仔八爪魚一對佢有興趣，男仔就會即刻伸出佢哋嗰隻生殖器官，然後靠近女仔，準備交配。 真係一個唔覺意拖錯手，就有咗BB呀！ 之但係講到佢哋一生人只係可以戀愛一次，就梗係唔想拍錯拖啦。係認真揀到戀愛對象之後，佢哋先會交配。完成交配之後，男八爪魚嘅身體就會即刻出現變化。佢哋會突然之間冇晒食慾，完全唔想食嘢，就算幾肚餓都好都唔會出去搵嘢食。而佢地就會係交配完嘅7-10日後。。。餓死！！ 即係話八爪魚嘅初戀女朋友，亦都會係佢最後一位女朋友。由相識到生小朋友嘅過程十分之短，而交配完之後嗰7至10日，佢哋亦都唔會一齊生活，可能係男仔唔想比女朋友見到最後自己落泊嘅晚年，而選擇自己一個默默咁樣過埋最後嗰幾日。。。 🥺🥺// 呢段愛情之所以轟烈，係因為女八爪魚係陀住BB嘅時候，會不眠不休咁樣照顧，同埋哺育八爪魚蛋。呢一種二十四小時全天候照顧仔女嘅媽媽，係仔女孵化出嚟之後，就會因為冇休息同埋冇食過野而相繼逝去。。。 即係話，每一隻八爪魚佢哋嘅爸爸媽媽，都用自己嘅生命去令下一代可以繼續生活落去。呢一份咁震撼嘅情感，除咗係淒美浪漫之外，作為仔女嘅，仲感受多一份父母嘅大愛！ 而喺戀愛世界入面，我哋比八爪魚幸福得多，因為我地同女仔拖手嘅機會應該多好多（希望係！）。不過，會唔會就係有咁多機會我哋就變咗唔識珍惜呢？ 如果將每一次同情人嘅拖手，又或者係同情人嘅相處，都諗成係最後一次嘅話，你係咪會對另一半更加好呢？ 🐙🐙 #天欣喜歡你 #愛情動物學

《愛情動物學 005｜黑猩猩》 動物嘅愛情俾我嘅感覺一向都係：簡單粗暴。當佢哋一男一女走埋一齊，無論用咩方法都好啦，目的就只有一個：生仔！ 就係咁簡單。 而人類就梗係唔一樣啦，因為可以同你一齊做好多嘢都得，就係唔想生仔。就算係想生仔，喺生之前，都會經歷一大輪拍拖呀，互相試探吓對方係咪Mr Right / Mrs Right，又二人世界浪漫返幾年，先再坐低計下夠唔夠錢生小朋友。 🤰🏻// 「咁唔通，就冇一種動物係識得享受一下拍拖㗎咩？下下一嚟諗都唔諗就生仔咁衝動！？」 冇理由係咪？ 今次愛情動物學嘅老師就係，極少數同我哋人類一樣，識得嘆下戀愛感覺嘅：黑 猩 猩！ 🧠// 被譽為最接近人類嘅動物，黑猩猩嘅智力其實都有70，喺動物界當中，都可以算係愛因斯坦級別。因為係生活嘅過程當中，佢哋識得利用工具去完善自己嘅生活，唔係所有嘢都係單靠一雙手握成拳頭就捱下去。 野生嘅黑猩猩，佢哋最主要嘅聚居地就係喺非洲中部，即係剛果共和國。表面上十分之粗豪嘅黑猩猩，估唔到喺愛情當中，都可以算係動物界之中嘅 情 聖！ 🌹// 平時嘅動物求偶，無論方法幾咁特別都好，目的都只係為咗繁衍後代。而黑猩猩，佢哋有時候結識伴侶嘅原因，係因為佢哋想拍拖呀！ 當兩隻兩情相悅嘅黑猩猩見面嘅時候，佢哋唔會急於交配，亦都唔會即刻諗係咪要同呢一個伴侶生小朋友，反而佢哋會享受拍拖嘅過程。所以佢哋會接吻啦會擁抱啦，會愛錫佢哋嘅另一半。 目的，只求呢一分鐘嘅浪漫。 👩🏻‍❤️‍👨🏻// 咁同人類一樣嘅係，佢哋拍拖都係會鬧交！而處理鬧交嘅方法上面，佢哋都係有橋㗎，有花心思度過㗎。 當黑猩猩情侶鬧到面紅耳熱嘅時候，男仔黑猩猩並唔會懶有型即刻轉身走，亦都唔會冷戰。反而，佢哋會選擇用自己個pat pat，去輕輕撞對方嘅pat pat，希望用呢個方法可以氹番對方，同對方和好。如果對方下左啖氣，佢哋就會將開雙手擁抱對方，表示原諒對方。然之後再次手拖手，喺非洲嘅森林同原野，一齊拍拖闖蕩。 👫🏻// 既然黑猩猩嘅拍拖模式同我哋人類咁相似，今次就唔洗學習佢嘅求偶方式喇，反而要學嘅係，佢哋係鬧交嘅時候氹番另一半嘅方法。 雖然patpat撞patpat唔一定work，但係如果你願意跟住做嘅話，咁最起碼，你都冇掉低另一半唔理佢呀～ 我估，你唔會渣過隻黑猩猩掛？ 🦍🦍 #愛情動物學 #天欣喜歡你

《愛情動物學 004｜長頸鹿》 🚥🚥// 計我話，係曖昧嘅時候，要增加你成功追到佢嘅機率，靠嘅就一定係身體接觸。例如係過馬路嘅時候有意冇意咁樣等到紅綠燈閃下閃下個陣先拖住佢跑過去，又或者睇戲個陣唔覺意咁樣拉高咗個扶手，等你地可以膊頭掂膊頭，越坐越埋，愈黎愈close。但無論我地人類係拖手又好，翹手又好，翹腳都好啦，親密嘅程度都一定唔及以下呢一種翹法呀。呢種咁纏綿嘅動物就係：長頸鹿。 👩‍❤️‍👨// 喺陸上嘅動物來講，生得最高嘅都應該係長頸鹿喇掛。呢一種最主要生活係非洲大陸，撒哈拉沙漠以南地區嘅動物，一年365日都係繁殖期。即係話，佢地嘅愛情同我哋一樣，真係話嚟就嚟，擋都擋唔住。 而講到男仔長頸鹿追女仔，佢地就梗係會第一時間拎出佢哋最長嗰樣嘢出嚟啦。。。。 係囉，咪就係講緊佢條頸囉～ ❣️// 當男仔長頸鹿遇到心儀對象嘅時候，佢哋就會一步一步行緊對方作出試探。而試探嘅方式對於我哋人類來講，都可以算係單刀直入。因為佢地係會用自己條頸，去嘗試繞住對方條頸，希望利用多啲身體接觸，嚟營造親密嘅感覺。個畫面就係長頸鹿嗰兩條頸翹埋一齊。而呢一種長頸之戀嘅曖昧，其實亦都係男仔長頸鹿對對方嘅示愛。如果女仔長頸鹿接受對方嘅話，係翹完條頸之後，就會伸條你出嚟lam下對方身體，話俾對方聽：我lam你呀，我鍾意你～ 👅// 聽到呢度，呢啲親密啲嘅身體接觸，長頸鹿做到嘅嘢，我地人類都做到呀，lam咋嘛～ 但係當長頸鹿同對方一齊咗之後，男仔對女仔做嘅行為，我地就未必做到喇。。。 👫🏻// 當佢地一齊咗之後，有時唔知係咪女仔長頸鹿心花怒放，翹翹下頸就係情急之下，賴尿呀。。。 係呀，係緊張到瀨尿呀！！不過，男朋友見到呢個情況就竟然一啲都唔介意，仲會同佢講： 「拉尿咋嘛，唔緊要啊，有邊個冇瀨咗尿呀，來呀，等我幫你處理佢。」 係呢個時候，女朋友就頭耷耷咁樣行開，而男朋友，就開始幫佢做清潔嘅工作喇。但係佢哋又冇地拖，於是乎，男朋友就會lam對方嘅尿。。。 🧹🧽🧻// 你覺得好核突係咪？你覺得咁樣好唔文明係咪？不過，愛情咪就係令到對方可以放低世俗嘅枷鎖，唔理旁人嘅目光，只要能夠令到對方開心嘅事，無論係赴湯蹈火，都會為對方完成呀嘛～！ 所以，對長頸鹿來講，要飲對方嘅尿可以話係義不容辭。不過咁講，呢個舉動其實都係有實際作用嘅。因為男性嘅長頸鹿係過程當中，會試得出呢個氣味，嚟到判斷對方究竟係咪處於受孕期。如果時候唔啱嘅話，男朋友就會等多陣啦。如果時候嚟到，佢地就會開始親密一下，繁衍下一代。 學嘢⋯// 你放心，我哋今集就唔係話要學長頸鹿咁樣做，我哋睇嘢唔應該咁表面。我哋係要學習佢呢種精神呀嘛。又或者我哋應該更加細心咁樣觀察伴侶，究竟佢嗰日嘅心情係點？究竟佢今日攰唔攰呢？我地都可以從一啲微小嘅事情留意到。就唔洗洗下去到長頸鹿咁嘅。但係佢呢種默默觀察對方嘅態度，咪就係我地要跟長頸鹿學嘢囉～ 🦒 #愛情動物學 #天欣喜歡你