【龔成問答信箱】（Q12921-Q12940）

Q12921：

龔成老師，近期我檢討我既投資生涯，令我更加醒覺，但醒覺後，都期望尋找合適方法，故來信請教老師。

先說我的投資經歷過程：

股齡多年，經歷2015極短暫港股大時代的小勝利、2016小股災、2017小牛市、2018快速蒸發

股票組合：約有超過60隻大大小小股票

種類及現況分佈：
佔整體70%
1.殼股=>
購入原因：以小博大，企圖博收購變10倍股
結果：往往10隻未能中一隻，反之長期陰跌，即使有三至四隻可以擊中，變成三至五倍股，但高位貪心沒收成，結果一等再等，反而跌回買入價，倒蝕變場，甚至有單日暴跌九成，血本無歸，天堂回地獄。

2.8字頭股=>
購入原因：以小博大，企圖博變10倍股
結果：因為每隻成本比較小，但同殼股一樣，長期沒成交，陰跌。

3.聽number=>
購入原因：聽股評人/朋友的貼士，跟風炒入，打算有20-30%盈利就走
結果：初入一至兩日係威係勢，次後陰跌，最後宣布入雪櫃

4.跟炒股=>
購入原因：跟據當時熱炒板塊追入，期望搭順風車
結果：跟入即跌，變成坐定股，但得個座字

5.新股=>
購入原因：預算抽中，賺番約20-30%，更甚變10倍股
結果：一手黨代言人，隻隻一手，結果有升唔止賺，有跌就座貨，成手蟹貨

6.新經濟股=>
購入原因：期望變成新一隻騰訊
結果：騰訊就沒，騰騰震就有，沒隻可以回到招股價，甚至一半都沒

7.撈底股=>
購入原因：期望可能低買高買
結果：睇圖表以為撈底，雖然有時真係做到，但升了唔放，一個反彈即跌穿買入價，再成蟹貨

自我分析原因：

1.亂石投林，分得太散，不論股票數目定是價錢，結果成手蟹貨。

2.不懂止賺，贏時妄想由幾毫炒上20-30蚊，即使幾毫升上1蚊2蚊都沒走，結果倒輸，甚至一日輸九成。

3.不肯止蝕，當跌穿20%，唔捨得，到30-40%唔再走，再到50-60%就溝貨，結果仲大損失。

4.跌到谷底，當跌至70-80%先肯割肉，結果已經無用。

5.妄想買中新股是中煙及頤海國際、新經濟股是美團或騰訊、撈底股是舜宇光學科技/中國奧園等。

6.只聽number入貨，沒理會風險，結果成手蟹貨。

現況

銀行股（匯豐）、賭股(永利)、內房股(新城發展）、物管股(奧園健康)

自我分析原因：結果是最簡單的幾隻股票，自我發掘的是最細水長流賺得多，反而70%的股票中，即使有三至五隻細股成為爆升股，但沒止賺最後還是輸番轉頭。

期望重新出發，不再沈迷街坊股神式的投資風格，期望踏踏實實重新出發，認同老師所言，一年出手次數不需太多，最緊要一擊即中，悶悶地贏，好過好刺激咁輸。

故有以下想法請教老師，

1.因為大部份的佔股已於組合中蝕了約65-70%，請問我應該忍痛沽清所有的蟹貨股，將僅有的22萬本取回再等待下一個合適機會

(只是擔心地獄黑仔王會一沽即跌，這個正是止蝕的心魔，與及止蝕那刻的痛，同止賺心魔一樣，怕一沽再升，結果止賺與止蝕都是沒做)

2.還是讓它們繼續，直至等大牛市重臨，或再回升至30000點左，等回升才趁機減本。

而我心目中有新的組合的編排的
1.繼續保留匯豐、永利、新城發展及奧園健康，老師認為此四隻股票值得持有嗎?

2.並伺機留意中國生物制藥、吉利汽車、舜宇光學科技／比亞廸電子等等，待合適時再購買大份額的，合適嗎?

投資的失利令我有刻心灰意冷，心情極度低落，體驗投資市場的威力，一隻股票可以要幾年先升幾倍，但原來只需要15分鐘已經可以毀滅所有。

故此醒覺不可以再輸身家，期望走回正路，可以遂步追回失敗，面向成功的。長文一篇，期望老師能給予我一點意見嗎?

龔成老師：

我會將你的名、年齡、金額刪去先出街。

我建議你多睇巴菲特相關的書，佢是憑投資「真正賺錢的人」，與坊間「只會吹水的人不同」，所以，我地應該學佢的方法，而我相信，佢見到你的股票組合後，會叫你大部分賣出，同時不要再用過往的投資方法。

我地應該用「質素」去分析持有與否，無質素就要放，而我相信你大部分股票，賣出對你是最好的。

你可能會擔心「賣左後會升，好唔抵」，這明顯是一個心理因素，你唔好比這個因素影響。我相信心理因素在過往，對你有好大的影響，令你做左好多錯的決定，你要學識「理性分析」，平常心面對。

你可以保留匯豐（0005）、永利（1128），至於新城發展（1030）及奧園健康（3662），風險較高，小注持有好了。

另外，我希望你先增加穩健股的比例，例如盈富（2800）、港交所（0388）、金沙（1928）、恆基（0012），然後先增加潛力股如中生製（1177）、比亞迪電子（0285）（同時潛力股只能小注）。

記住，你現時是建立一個優質股的組合，長線持有，不是炒賣，當中一定要穩健行先。

每個人都要有學習的過程，總之你之後用翻正確的投資方法，停止炒賣，同時大量提高自己的投資知識，多睇巴菲特的書，你將來肯定可以賺翻有突！

------------------------------------------------

Q12922：

瑞聲科技點睇呀
誠哥

買咗69萬
買入價37.25

本身賺緊四萬， 之後中美貿易戰 有令到我輸咗七萬
呢隻股票其實合理？
可唔可以繼續守住

龔成老師：

瑞聲科技（2018）雖然質素不算差，但賺錢能力的確比過往有所減弱，增長力不算強，因此你買的算是合理價，而往後股價將平穩增長，但不是高增長模式。

雖然這股你可以守，但最大的問題是擔心你持O貨比例太多。

因為任何一隻股票，就算再優質，也不能佔投資組合的比例太多。所以，如果這股佔比太多，建議你分注賣少少，餘下則長線。

------------------------------------------------

Q12923：

想請教一下老師，經常聽到啲大行説什麼''目標價''，其實這些目標價有冇實質参考價值呢？

龔成老師：

只是一般。

因為大行會著重中短期的情況，所以目標價會著重中短期，同時，大行有時都會做一些古惑野，例如一邊叫人賣貨，自己另一邊買貨。

所以，可以參考，但不能盡信。同時，要綜合分析多間，不能只睇一間。

------------------------------------------------

Q12924：

龔Sir，請問依家港鐵，維他奶，大快活算唔算平？
依家後市點睇？

資金同股票比應該係幾多？
依家數據有下落跡象，有無需要將股票賣出，轉買防守股？

龔成老師：

首先，這幾隻都是有質素的股票，同時股價比高位回落了不少。

港鐵（0066），賺錢能力好強，近期只是一些中短期的事件，無影響佢企業的長期價值。這刻反而適合去做月供。

佢收入主要有運輸、收租、地產，如果你從長遠角度，就能分析到近期的事件，對這幾方面長遠的影響都好少。

最多近期會影響了運輸收入，以及成本增加，但無影響長期情況。現時處合理區，未到平，因為過往一直都有少少貴。

維他奶，這刻仍算有少少貴，因為過往好貴，回落咁多現時仍未到合理區，要落多少少先算合理區。

至於大快活（0052），現價合理，仍由於人工成本增加，加上香港情況，都會影響左佢的中短期股價，但本質無變。

如果你這幾隻持貨，由於本身有質素，因此唔需要賣出，但你預佢中短期股價波動，要長線投資先得。

------------------------------------------------

Q12925：

50歲，先生自顧人士, 有物業已供畢10年。但一直都不懂投資。只買下少少股票，買了10年嘅保險基金也蝕了40%！現只做part time,與先生月入3-4萬但不穩。

近日有朋友介紹Bitcoin, 想請教龔成老師你點睇？謝謝

龔成老師：

你首先應增加理財知識，記住，投資不是炒賣，是分配，你應該投資穩健的股票，長線慢慢增值。唔好追一些近期大熱的類別。

我建議你做月供股票，這可以將你的買入價平均，你集中供盈富（2800）就得。金額則視乎你地的資金情況決定。

至於比特幣，這是高風險的項目，我不認識，所以不投資，如果你投資，你一定要確保自己認識（可能你過往，都有這個情況，投資自己不認識的項目，只聽朋友講就買）。

比特幣，其實無實質價值，最終的價值只有「交易價值」，如果之後好多人用，這就好值錢，如果無人用，就唔值錢，你可以自己分析往後是否多人用。

由於我自認不懂分析往後有多少人用，所以，我選擇不投資。

------------------------------------------------

Q12926：

龔老師，你好。一直都有追睇posts 同已經買哂你既書，多謝你既分享，令我開始左價值投資法

我今年三十歲，月入45000，可投資大概10000～18000每月

現有
2 手匯豐
2手盈富基金
1手港鐵
1手恆基

想弄一個比較全面既平穩增長組合。未來都決定繼續加注以上既股，想再慢慢加多一隻平穩增值同兩隻潛力股,想請教一下

1. 我想加領展，或泓富，因為對REIT 同土地睇好你認為那個更好？

2. 如果潛力股，我想加比亞迪同中生，但中生已經$10以上，過左你之前叫的買入區，現價你認為可以買，定幾時買好？

3. 如果恆指大跌，應該用身家30%大手買入然後長擺嗎？

因為工作原因，我不能月供，所以唯有努力在合理區入貨，謝謝指導

龔成老師：

1）你現時的持股，基本上都有質素，可長線持有。至於加房託，以你的年齡，財富仍有一定的增長力，可以加入領展（0823），最好以分注的模式投資。

2）如果你不能月供，就等中生製藥（1177）落$10樓下先入，又或者，如果你好想入，就現價入一手，然後就等$10以下先再入。

至於比亞迪（1211），現價已可分注入。但佔財富的比例不能太過多。

3）可以，當大市在現時的合理區，我地會「一邊入貨，一邊留現金」，當大市跌到平宜區，就是動用之前儲起現金入貨的時候。

------------------------------------------------

Q12927：

成哥 最近開始想月供 心水股
主388.1928.66.788 次2800.2007.3988.3
因為本身供緊樓8000 所以每月只能3500-4000用來月供
如果有樓再供地產股好嗎。
以上3500-4000點分配最好？

現在暫時
1000=388
1000=1928
1000=66
500=788

我見1000供388好似冇什麼回報太小股數
所以想500.388 500.2800
但又覺得這好像緊散
還是供7隻每隻500好

龔成老師：

上述都是不錯的股票，至於股價大小及與你得到多少股數的關係，其實與你的回報率無關。所以，港交所（0388）都可供的。

如果你年齡唔算大，收息股如中行（3988）可以唔供。

比較平衡的做法：盈富（2800）、港交所、港鐵（0066）、金沙（1928），各供$1000，長期進行就得。

------------------------------------------------

Q12928：

龔成老師：，我前幾年之前入了些674 ($0.4), 目前坐艇中.

這隻股業績這數年一直虧損但我看都一直改善中. 想問我應止損嗎?

另想問前幾年同樣入了3368 ($1.3), 也是坐艇中, 會有機會回上嗎? 應止損嗎?謝謝

龔成老師：

中國唐商（0674）本質不佳，除左年年虧損外，生意亦有下跌情況，雖然近一年略有改善，但作長期的角度分析，財務數據仍是很弱，建議賣出這股，又或賣出部分，餘下小注等有較大反彈時賣出。

百盛集團（3368）質素不太好，業務波動，有時賺錢有時蝕錢，投資價值不高，長遠要賣出這股，要上翻去不易，你可先賣出一部分，餘下等反彈再賣出。

------------------------------------------------

Q12929：

老師，近排的跌市令到我有少少擔心同猶豫，以前升得高果時，又諗佢幾時跌啲，等我平啲買貨，到而家跌左咁多，我心入面又十五十六諗應唔應該減少月供。

都係睇老師既專頁揀月供股，前幾個月都月供緊以下，咁我後面調整下每隻股既供款比例，keep住供，多謝老師比番信心我

煤氣：4000
盈富：3000
比亞迪：3000
匯豐：1000
長建：1000
銀河：1000
港鐵：2000

龔成老師：

「以前升得高果時，又諗佢幾時跌啲，等我平啲買貨，到而家跌左咁多，我心入面又十五十六諗應唔應該減少月供」

這是95%散戶的想法，但卻是大錯特錯的心理因素，因為你被「心理」因素影響，你比升跌的情況、股市的恐慌，左右了你的投資決定。

正正因為大部分散都被錯誤的心理因素影響，我先強調月供股票是很好的做法，能將買入價平均，只要長期進行月供，重點是「唔好理中短期股價，長期月供」就得。

你上述都是有質素的股票，集中「長期的企業價值」，保持月供就得。

但要留意，現時大市只處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q12930：

老師，我夜收工(8-9點)如果報你股票班上堂會唔會怕miss左好多重點跟唔到？

龔成老師：

由於股票班是7-10，你將會無左一半，我擔心你跟唔到，你不如等星期六班，我久唔久都會搞星期六班（下午），你等這個更好。

------------------------------------------------

Q12931：

龔成你好，想問下，看過了你既選股勝經，內裡有講到潛力股的準則，其中有以下

- 股本回報 > 20%
- 市值 > 10 億
- 每股盈利增長 > 20%

我想問下，是要持續幾年都大於20% 嗎？還是如何
我在AAstock睇345 維他奶，佢的資料如下：

年份：2015/2016/2017/2018/2019
每股盈利增長（%）：0.359/0.509/0.589/0.555/0.656
股本回報：19.39/24.12/25.02/20.13/21.98

從以上Aastock 資料顯示，2015-2017 的每股盈利都持續上升，直至2018年略為倒退，但於2019 年則再上升，如此的話，單計他2019年的成績表，ROE 有21.98，每股盈利增長有18.2%（不足20%），也算是潛力股嗎？

但是佢市盈率卻超高，成54倍，展望將來，你認為佢有足夠盈利增長支撐起股價嗎？

近年維他奶成功打入國內市場，我有返過深圳超市睇，佢啲產品都好多好齊，同香港超市一樣咁多

同問，341 大家樂集團，一隻半公用股每日為30萬人提供膳食，單計2019 年的成績表，每股盈利增長高達29.11%，ROE 則17（不足20），派息每年穩定增長，原本我會視之為收息股，但隨著佢打入大灣區，並與大型商場簽訂合作協議，你認為佢未來數年是一隻潛力股嗎？計過數之後，我打算於 $23.5 買入 。謝謝

龔成老師

上述的是選潛力股的「其中一個指標」，並不是唯一的指標。

在我的股票班中，我會教5種選股的方法，這是由於無一種方法是完美，而不同的方法，如同不同角度尋找優質股。上述的潛力股指標，有些潛力股符合，但就算不符合都不一定立刻否定。

維他奶（0345）是優質的股票，增長力不差，但由於現價不平，股價未必能爆升。

至於大家樂集團（0341），這股有質素，有增長力，雖然中國部分有機會帶動增長，但不能有必然的期望，就算大快活（0052）多年前打上大陸，也只是蝕錢，到近年先開始有少少錢賺。

你可以分注投資這股的。

------------------------------------------------

Q12932：

龔成你好，我23歲，我手頭上有8萬現金，16萬優質股（銀娛長實匯控瑞聲中移吉利小米），由於買入價的問題導致帳面蝕錢，這批股票如果計算買入價的話，應該值20萬。

所以你可以當我有28萬吧，剛剛8月中裸辭，但找不到工作，暫時失業。

如果我想每個月有12000被動收入，應該如何投資才好？我計過了，如果我每月有被動12000 收入，之後再加上我搵到工正職，那麼我就夠錢用了。

我是非常慳錢的人，平時午餐多數食麵包杯面，但偶爾也會出國旅行（東南亞）以及買一些高階電子產品，但全在我控制範圍的

龔成老師：

如果你暫時無工作，最好就是把握這段時間增加投資知識，亦可以試下做小生意，我地從整個人生的角度分析，利用時間做一些長遠有利的事。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

所以，不建議這刻集中在現金流的部分，更何況，如果要在低風險的情況下，每月要有$12000現金流，假設收息回報率為6%，要求資金就是$240萬。

------------------------------------------------

Q12933：

龔成老師：好多謝你的 50 值博倍升股一書，分析了不少潛力股投資策略。

我也運用了你著作思維模式：盈利前景能力丶業務獨特性丶估值評估潛力股特點。

我睇了你大部份內容,小住低位4.2 買入10000 股最低位3.4 不也止蝕。請問愛康醫療前景如何，中期純利急增81％以上，業績似乎已經超出管理層當初承諾。現價止賺嗎？

而且技術上已經破位，估計應該很多基金經理入市，當時成交金額高達1 億以上，$6相信是支持位。

如果下半業績保持高增長，上望空間相信還有可能喎，不知道我的想法是否太貪心。

龔成老師：

愛康醫療（1789）正面的，這股業務不差，有增長潛力，中期盈利增長，這反映企業有實際的價值提升，股價有實際的支持。

其實你以分析企業的方向分析是正確的，但就不用分析甚麼技術位、成交，這些都是錯誤的分析方向。

你唔好著重分析股價走勢等無意義的指標，集中分析企業質素，估值，以平貴去衡量持有與否。

這股現價已有少少貴，未必估值得再入，但如果你持貨不算多，就長線持有，到再上升至更貴水平，就賣出一半，餘下長線投資。

------------------------------------------------

Q12934：

龔成老師你好! 我在早期7元入了幾手中國通訊服務(552)

但現在已有不少大行調低目標價，想問這股我應該放，還是保留守一段時間? （感謝老師賜教）

龔成老師：

中國通信服務（0552）這企業的增長能力，的確有下跌的情況，而市場之前預期佢有較強的增長力，所以過往估值較高，而這刻見到增長力弱左，所以估值調低。

這股的質素仍在，只要你的持貨不是過多，基本上有得守的。暫時持有住先。

------------------------------------------------

Q12935：

龔Sir 1177我$7.1入，在早前我放左賺左，另外我組合又好多蟹貨，咩乜價位可再入1177？

龔成老師：

其實，你持有的蟹貨，與你是否再入這股無關的，你整個投資概念有問題。

我地不應該以「賺蝕」去衡量那隻股票賣出，應該以「企業質素」去決定，而我地應該建立一個優質、平衡的組合。

中生製藥（1177）是優質股，你唔應該賣，另外，如果你手上的蟹貨，如果是劣質股，應該賣。而兩者，沒有必然的買賣關係，你要清晰翻投資概念。

現時中生製藥已略貴，不建議強行追貨，要跌翻1、2成先入。你持有現金，或買入盈富（2800）都可以。

------------------------------------------------

Q12936：

Hello sir ，我而家供緊 2800 12 66 1211

我諗緊供唔供多隻 收息11 或者進取 1177 or 1448

龔成老師：

你原本的組合不差，基本上都是有質素的股票，同時可以進行長期的月供。

如果你想加新的股去月供，其實好睇你本身的投資目標，你本身已有供潛力股，但如果你想組合潛力增加，同時你願意承受風險的話，就加中生製藥（1177），如果你想組合穩健D，就加恆生（0011）。

------------------------------------------------

Q12937：

老師，你一直看好濠賭業，爲什麽在推介時你多數推介金沙而不是銀娛？不是後者爆發力更勝一籌嗎？

龔成老師：

其實兩隻都是有質素的股票，都適合投資。

金沙（1928）會比較穩陣，同時股息較好，因此適合較多投資者，銀娛（0027）都是十分優質的，其實增長力比金沙強，但以穩定性的角度，就不及金沙，因此，好睇你投資的目標。

------------------------------------------------

Q12938：

龔Sir: 我現在持有8,400股恆地(#12)，平均價係HK$37.43，佔我手持portfolio嘅47%，但只佔手上現金嘅26%。

但因為最近好多消息話大市可能落到 24,000，甚至22,000。所以想問是否需要減持? 因為有少少擔心

龔成老師：

你持有單一股票的情況，的確較集中，恆基（0012）雖然是好優質的股票，但你都持有過多。

不過，由於這股是綜合企業，業務上都有分散風險的作用，你可以慢慢賣出部分的貨，平衡翻組合的風險，單一股票你預佔組合20%已是夠。

至於現金，以現時的大市水平，持有3、4成較好。

不過，你唔好太著重所謂的消息，例如你上述講的「最近好多消息話大市可能落到 24,000」，這是無人知的。

因為，根本無人能預測股市走勢，我地只能從平貴角度去設定投資的策略。

------------------------------------------------

Q12939：

龔sir 想問問你 2669 / 6098 / 3319 內房物管系列 睇法

龔成老師：

物管企業其實不錯的，現金流穩定，加上有背後企業的支持，不少生意都能保持增長，長遠發展不差。但就要留意現價會否貴，因為這類股間中都會有炒作，要小心。

雅生活服務（3319）算是投資值博率較高的，有質素，又不算貴，但這刻都不能叫平，如投資，最好分注投入。

------------------------------------------------

Q12940：

老師，我之前想買股票既時候 次次買完都好冇安全感，好驚！

睇完你寫既書開始有少少踏實感。雖然我冇去做月供股，但係我每個月都儲一筆錢，儲到咁上下就去買一手手既股票，希望咁樣都可以做到財富增長。

而家手頭上有一手11，一手2388，一手1972。

遲下儲到錢想買2800，1211同1177，但係我見到1177 keep住升都冇跌過，現價買會唔會太貴呀？

希望遲下儲到錢可以去上你既堂，我對公司估值有少少興趣，多謝遇到老師你！

龔成老師：

你之前無安全感，因為你無企業概念。如果你明白，你現時買入的是一間企業，你從企業質素、前景角度分析，以及進行企業估值，以企業的業務價值及資產價值去進行估值，你買入時就會實在得多。

從上述持有的，都可以長線。

至於盈富（2800），你可以保持分注投資，比亞迪（1211），有長線投資的價值，只要注碼不過多就無問題。

中生製藥（1177）的確有少少貴了。

上述可以有效加強你的知識，對你長遠財富影響好大，希望遲D見到你！

----------------------------------------------

多謝各位提問，若然你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網的，當然，會將發問者的身份，以及有關個人的部分刪去。

另外，由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。