馬國明和黃心穎拍拖兩年多，早前突傳「掟煲」，有指心穎難抵男友太宅，加埋有富二代力追，而馬國明神回話「唔結就分」，搞到外界以為呢段黃馬戀凍過水，但查實佢哋打風都唔甩，佢哋早前拍拖歐遊8日，異口同聲話玩得好開心！早前又被影到馬明有份出席心穎嘅屋企飯局﹐而日前係心穎29歲生日，馬明仲同女友去咗黃長興同友人合資開嘅法國餐廳食生日飯，勁sweet！ 心穎29歲正日生日，男友馬明當然陪佢慶生，心穎喺IG貼咗一張單人相，留言：「This expression summarized my birthday!簡單的、溫暖的、開心的。多謝你哋嘅祝福！」不過黃長興喺佢間餐廳嘅IG貼同心穎BB及馬明嘅合照，相中二人坐埋一齊，唔好以為黃長興做「電燈膽」，查實佢哋係去咗黃長興同友人合資開嘅法國餐廳食生日飯撐枱腳！ 日前馬明憑《降魔的》贏「最受歡迎電視男角色」，雖然馬明冇當眾感謝心穎BB，不過行去領獎前，馬明都同心穎BB握咗手仔，馬國明得獎時話：「真係冇諗過今晚竟然會有兩個獎攞，我話一個演員一生未必會遇到自己好鍾意嘅劇本，我從影咁耐終於遇到叫做兩、三個鍾意嘅劇本。我已經唔知講咩喇，唔係……雖然今日公司話唔准多謝某啲人，不過我見咁多女artist都唔聽限奶令講，多謝Sandy、多謝杜生，我知道《降魔的》呢套劇，馬季呢個角色係畀我做。多謝樂小姐，我知道我唔係好聽話，多謝你咁多年都對我咁好，多謝珍姐，雖然我喺呢度17年就鬧足我17年，但我都多謝你。多謝公司梳頭、化妝、服裝，特別係女同事，係佢叫我講嘅頭先。其實今日係大日子，係我姪女嘅結婚。」呢個moment唔少同事大叫：「幾時到你？」馬明就話：「我唔知呀。多謝、多謝咁多位。」 偶像變男友 第一次獻馬明 不過超級筍盤又點會冇女埋身，仲要係索爆女神心穎BB！心穎12年選港姐奪亞軍，早早揚言馬明是其超級偶像，希望有朝一日可以跟男神合作。其後於劇集《on call 36小時II》和偶像合作，雖然只係客串，但令心穎開心到瞓唔着。而去年《為食神探》中心穎以小背心谷胸上陣，盡騷激凸身材之餘，又賣大包與馬明零距離身貼身，於是男神都被電到暈得一陣陣！ 情人節拍拖豪歎日本菜 2月13日係馬明生日，又係兩人過的第一個情人節，當然要抽時間慶祝！當日馬明接心穎放工到銅鑼灣，雖然未有親密舉動，但熱戀中的情侶話題綿綿不絕，邊行邊傾，漫步到開平道的高級食肆立林的Cubus大廈，直上十一樓的壽司店。該店賣點是全日本師傅、日本運送貴價當造食材，人頭二千蚊起計算，平時知慳識儉的馬明慳自己、豪心穎！ 歎足兩粒幾鐘，兩人遇見本刊記者時齊齊對住鏡頭傻笑，本刊記者問二人是否慶祝情人節？是否拍拖？一齊幾耐？見家長未？等問題，一臉老尷的馬明只一味無限loop「朋友食餐飯啫」，反而在旁的心穎表現淡定，笑住回應：「係呀﹗朋友約食飯﹗」之後兩人去停車場取車，心穎熟悉地逕自走去開車門上車，等馬明送回香閨。同馬明歐遊8日 黃心穎被問到早前歐遊係咪同馬明同行？黃心穎即冧笑話：「同好朋友囉，歐洲好好玩。」咁感情有冇增進先？佢話：「一定有，一定會了解咗對方，不過我都驚自己嚇怕佢。」 入行後兩段情 馬明入行多年，兩段情都是與圈中人發展。06年馬明被爆與曾華倩發展姊弟戀，兩人被影到拍拖勝地鯉景灣撐枱腳，更被發現曾華倩開車載馬明返香閨過夜，但兩人都死口不認戀情；後來馬明與合作《舞動奇跡2》的胡定欣撻着，但有指女方嫌棄馬明為人老土、悶餅，馬明亦透露曾因冇梳頭、唔打扮、不修篇幅而激嬲定欣，拍拖三年後分手。