【龔成問答信箱】（Q22621-Q22640）

Q22621：

老師， 你好！學生有數個疑問，

1. 你上堂曾講數隻房託ETF，
最佳是否 領展0823/陽光0435/
置富0778，那較佳？
還是有其他另一隻呢？
原因？

2. 另外 曾經聽你提到 你會減持水桶1 增持 水桶2，是嗎？為何？ 因年齡？

3. 課堂上 曾聽你多次提過小米1810，你是否認為佢會唔會同 比亞迪1211 一樣數年後 暴升呢？

祝健康！謝謝解答！

龔成老師：

1）領展（0823）、陽光（0435）、置富（0778）算是高質的，你可以考慮這幾隻，都值得投資，可成為投資組合的成員，現價都合理。

如果想增長多D，就領展，因為領展會不斷翻身物業，同時會買賣物業。如果想收息穩健D，就置富（0778），因為佢持有的物業，對象是民生類，受經濟影響相對較少。

其實，你可以睇翻課堂的筆記，買房託如同買樓收租，所以你要研究翻佢持有的物業，就知質素、風險、發展。

2）我當時表述的意思「當我日後年齡慢慢大，就會減持水桶1，增持水桶2」。

這不是今天，而是長遠，原因為財富配置，年輕食進取，年長就保守，所以當年齡慢慢大，就會調整，你可以睇翻第二堂的筆記。

3）小米（1810）有潛力的，我自己都有持貨，長遠正面，但能否象比亞迪（1211）股價升好多，就未知，我只可以話，企業價值前景正面。

佢的產品性價比高，相信在全球好多個國家都會有市場，佢長遠只會進一步增長。

同時，佢建立的平台是佢長遠的增長動力，先賣手機，再利用手機的平台延伸銷售小米家電。長遠正面的。

這股可長線，現價合理區頂，小注分注可以，但唔好入得太急，預佢股價仍波動。$15以下才是便宜區，所以現價不是大手時候。

------------------------------------------------

Q22622：

老師，你在《財務自由行》一書講過財務死胡同，有沒有實質例子供參考?

龔成老師：

如果一個人不斷增加「負債」（即是每月持續消耗現金流的項目），如養車，就算加入工都無用，這就會進入每月無法儲錢的情況。相反，一個年輕人若一開始集中累積資產，慢慢就能做到錢搵錢的狀態（資產產生現金流，現金流買更多資產），最後會進入財務自由的狀態。

------------------------------------------------

Q22623：

龔sir你好 如果係65蚊持有滙豐應該點做
大約30000股……
好迷茫

龔成老師：

匯控（0005）賺錢能力與增長力比過往年代弱左，但又未去到完全無質素。銀行業的賺錢能力比過往減左，因此不能視為增長股，但當經濟好轉，始終都會有錢賺，因此都有投資價值。

相信長遠是收息股，但股價增長就有限。

這股都有投資價值的，但就未必值得佔組合比例太多，同時明白佢是收息股，增長力有限。

如果你本身目標是增值，就應該減部分轉其他。

如果這股佔你組合比例較多，都應該減部分，轉其他。

其實，你最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

------------------------------------------------

Q22624：

老師，有兩個問題想問….

1. 2382 我$145 有貨，想加注應該等咩位置加好？

2. 技術問題，我地如果分三注，理想係每注跌10%加注的，但第三注的10%， 會係第二注加注後總和的10%嗎？

例如我第一注$100， 第二注是$90，第三注會係$81（90*10%）？還是$85.5（95*10%）？

龔成老師︰

1) 舜宇光學科技（2382）現價偏貴，最好等佢回到1,2成，才考慮開始再小注儲貨。如果係月供，現價開始都可以。

2) 最好係用對上一注的價位，去下調10-15%，作為下一注投入的水平參考。

若以下調10%計，即係第一注$100， 第二注是$90，第三注會係$81（90*10%).....。當然，分注有很多方法，有時要到時再調整。

------------------------------------------------

Q22625：

龔sir! 有問題想請教。本人28歲，睇番自己投資組合，發覺潛力股佔左55％，所以想揀多隻平穩增長型去平衡番。我睇中左中國平安2318（組合裡無保險股），但我本身有月供緊平安好醫生1833。

基於佢地都系同一集團，我再買2318合宜嗎？會不會風險大左？但現時佢股價跌左又覺得係好時機買入。

同埋想問買保險股應該點分析行業呢？同銀行股類似嗎？有無特別事要注意？謝謝！

龔成老師︰

對年輕人來說，潛力股55%仍可以，不過當中都不能過份集中同類潛力股。

由於平保(2318)和平安好醫生(1833)係有關聯性，故投資比重不宜過多。

中國平安（2318）有質素的，佢有規模，有品牌，近年的發展都不差，不過，股價有時會有少少波動，這主要受投資市場表現影響。

要分析保險股，其實都幾複雜，簡單會睇佢新業務發展、現有業務狀況。另外，由於佢用浮存金去投資，所以都要睇埋佢投資回報方面。

而且，平保(2318)唔係純保險股，除了壽險和財險這2個主要分部，佢仲有銀行、資產管理、證券等等。

若要認真估值，你係要每個行業咁去睇。除非估值經驗好豐富，否則要完整和準確分析，其實唔容易。

簡單而言，這股有長線投資價值，是平穩增長型。現價算係合理區中下位置，你現時入首注係可以。只要控制好平保比重，不超過組合15%，咁就無問題。

------------------------------------------------

Q22626：

Sir, 上緊進階班中, 但投資實戰上有些迷思.

1. 如收到1000元股息, 股票共投入30000元, 股數1000, 分析個人投資時, 一般會計入股息嗎? (即共$31000 / 1000 = 當平均買入價為 31元)

2. 今年5月時看好3918, 組合上想加入博彩及有寡頭壟斷股, 已設定金額及中途趺5-10%就會加注, 但至上月就買夠, 平均 7.5元, 點知現會再趺;

全世界因疫情暫未有轉好情況, 看來要等疫情好轉後, 這企業才會轉好, 這情況是否耐心等待?

另一角度看, 當時因市場氣氛吸引, 加上計算估值約6.86 – 10.29, 在此範圍內買入, 想知道投資上有沒有做錯?

再另一角度看, 現下跌差不多 30%, 亦不再看好那地方會那麼快復甦, 是否賣出較好, 再買入其他更優質股票? 因這樣一直持有, 可能要數年, 值博率不高.

Thank you Sir.

龔成老師︰

1) 唔會，只會視初期投入的$30000為買入成本。就算你用$1000股息再投資，假設買入了30股。這樣你買入成本，只會變成$30000和1030股，即平均買入價為$29.12。

2) 金界控股（3918）係有質素的，但始終新興市場，因此點都有風險。

佢會因全球的疫情，而影響左生意，但這只是中短期。

長遠計，佢仍然正面，佢之前有項目獲當地政府批准發展5幢建築面積共逾580萬平方呎的物業，包括提供共4700個房間的酒店群、娛樂場所及公寓等。我相信長遠對佢仍正面。

這股股價較為波動，不過都有長線投資的價值，分注投資可以。

你現時平均價，係合理水平，但你預佢中短期一定會好波動，但長線持有係可以。雖然有質素，但始終係市場新興，風險較高，在注碼上緊記不能投資得過多。

你計算合理價都接近，調低多10%會較好。

記住，我地是否持有一隻股票，係用佢質素做分析，而唔係睇佢買入價，你要改變這個"賺差價"的思維。

另外，我地投資唔好估走勢，只會用估值平貴去做決定。此股現價有一定值博率，照持有係可以，除非你持股佔組合較多，否則照守住先。

我地唔會知疫情幾時變好，都唔會知市場幾時會對佢重新估值，令佢真正價值得以反映。可能係明天，可能係幾年後，無人知。

但我地知道的客觀事實，就是其真實價值，未被反映出來。所以長線持有，才是較好做法。

------------------------------------------------

Q22627：

你好，想問吓1799公司前景如何，手上未有貨，幾錢可以入貨？

龔成老師：

新特能源（1799）係太陽能級多晶硅生產商和光伏項目承包商，主要從事中國光伏產業上游和下游環節的業務。

佢除左多晶硅生產外，亦從事電力銷售（透過自有燃煤發電廠供應電力多晶硅生產之用，並銷售多餘電力予當地電網）；工程建設承包（根據ＥＰＣ、ＰＣ或ＢＴ承包模式經營，為光伏及風電項目提供能源解決方案，包括工程設計、諮詢、建設、調試及運維）；逆變器生產（用於光伏項目的一項關鍵部件）及光伏硅片及組件生產。

其實過往的生意與盈利唔算好突出，同埋有D波動，只是近期新能源有炒作，佢都炒起左。實質支持係咪好大，未知。但建議保守少少，暫時這股投資值博率不高。

------------------------------------------------

Q22628：

龔成你好， 這是我現時持有的股票，想問下你的意見。可以點樣優化我的股票組合？

0011
0435
0778
1177
1928
2800
8109
9888
9988

另外我應該再爭持9988嗎？ 因為佢係我既投資比例已佔很多，比起爭持9988，定應選擇投資點700 騰訊？

我是一個投資小白，感謝你讓我明白投資的重要性， 我都好想快點賺到我的第一個一百萬

*8109 係我十年前剛買股票聽人講的教訓，我只放係度提醒自己

龔成老師︰

你現時持有股票(除了8109)，都係有質素，若你係年青至中年人士，係合適的。恆生(0011)、陽光(0435)和置富(0435)增長力較弱，主要係收息，若你偏向年青，不建議持有太多。

另外，我地持股除左講質素外，都會考慮到平衡性。

任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

特別係銀行業，佢營運模式較特別，風險會比一般行業為高。必需堅守30%這個準則，如果可控制在20%以內，會更好。

你現時阿里(9988)佔比已經好重，不要再加注。至於騰訊(0700)現價在合理區中間，係可以入貨水平。

但由於你本身已有不少科技行業股票(9988, 9888)，再增持會令你太集中科技類，而造成風險。

如果你好想入騰訊(0700)，你可以考慮沽少少阿里(9988)，來換碼至騰訊，這樣會較穏當。

------------------------------------------------

Q22629：

想問什麼是平台股?

龔成老師︰

現時你聽到的平台股，相信都是指一些電商平台相關股份，例如阿里巴巴(9988)、騰訊(0700)、美團(3690)、滴滴出行等等。

由於近期中央出手打壓，令不少相關平台股都出現明顯下跌。

但我地作為理性投資者，係這個時候應該理性分析，到底中央係這些新政策裡面，有多大程度影響這些企業，而這些影響，又是否長線?

如果只係中短期影響，我地就唔洗過份在意。相反，如果係有較長線影響，特別係一些核心性問題，我地就要調整估值和注碼，甚至調整成個投資策略。

------------------------------------------------

Q22630：

龔sir，近排入左隻光大綠色，之後同一位前輩討論，該前輩都係信奉價值投資，而且徧保守。結果佢問左一堆關於光大綠色業務同收入嘅問題，

但我嘗試從公司資料，官網同年報都揾5到一d好有説服力嘅答案，令我懷疑自己係咪入錯貨，所以嚟請教龔sir你嘅意見。該前輩對光大綠色的質疑如下:

1. 佢讀書時都接觸過能源相關產業，都知道生物質能依回事，但按佢所認知，生物質能嘅效率很低，可5可以有效發電賣電營利都係問題，年報d數字，

業務描述可能只係個美好嘅故事，嚟氹投資者入局。

2. 佢話公司資料無詳細提及所有客戶資料同相關收入，感覺主要客戶只有地方政府，雖然環保係一個大方向，但由於政策會變，

地方政府未必肯長期燒錢維持d無實際作用嘅項目(特別指生物質綜合利用)。而間公司無咩其他主要客戶，萬一將來政策改變就會對公司營收造成極大影響。

3. 最後，佢提及中國雖然係農業大國，但趨勢相信係由農業轉變成農產品/食品加工業，因為利潤同發展較好。另外沙漠化加上碳中和相關政策會令植樹造林係大趨勢。

最後因農業改革同植樹造林會令生物質原材料不斷減少，因此對其業務長遠帶嚟負面影響。

喺度先謝過龔sir

龔成老師︰

1) 太科學上的知識，我都解答唔到。有時我地分析企業，未必能100%完全理解當中運作，因為我地無可能成位每一行業的專家。

但我地可以從一些數、表現、同行比較等，去大致得出佢架質素。雖然無法100%，但有時都可以找到一個，令人覺得相對穏當的答案。

睇翻佢過去多年，生物質綜合利用項目在營運收益上，都有一定增長。由於唔係1,2年，而係一個較長時間，我地會假設佢這個營運模式，係無問題。

2) 一般企業，都唔會完整列出所有客戶名單，係商業考量和私隠問題。但我地可以知道，2020年最大客戶係政府機構，佔營業額19%，頭5大客戶，則佔營業額43%，唔算過份集中。

好似光大綠色(1257)這類企業，以政府客戶為主導，其實係正常。當然內地政策變動，會為集團造成風險。但綠色能源和危廢處理，依然係大方向。

而且，集團在這方面，都有一定技術和優質，因此長線發展係正面。

但由於行業算係較新，加上政策風險問題，你會見佢市盈率係好低。某程度是反映，市場對佢營運模式，都尚有一定保留。因此，此股可以投資，但宜小注。

3) 你前輩的擔心，不無道理。但由於中國食物需求，依然未能做到100%自給自足，政府長遠都唔希望要依賴外國入口。故農業發展，相信會維持正面。

而且，集團除了生物質業務外，佢都努力發展危廢處理，去散收入來源，平衡風險。

整體而言，集團長線發展算正面，但風險略高，不宜大注投資。

------------------------------------------------

Q22631：

感謝龔sir回覆，但＃2845同＃3067暫時都未有息。。。＃3067已經有3000股了

對於小朋友來講，唔係應該搵啲高息股咩？我成日都唔明點解有人講，炒股唔係賺股息，點解呢？

不過我都會聽龔sir建議主力擺左2800度，學你話齋，小朋友有長時間增值。。。

但我個人黎計，出糧戶口有003 每月供緊$1000，都已經有2千幾股了，想轉供其他，我應該都會聽龔sir教供2845了，但2845太貴。都唔知供幾耐先會有一手

龔sir你講得啱，我個人好心急

龔成老師︰

首先，我地真正投資增值，唔係做炒股這些短線操作。而係長線持有一些優質企業，透過佢地成長，以達至財富增值目的。

至於你要做增值，定係賺股息，就要睇你現時所處的人生階段。若你係退休人，因為已經無收入，所以我地就應以收息為主，用意係透過股息和利息收入，去支援退休生活。

相反，好似你這些較年青人士，其實應以增長為主，努力去累積一筆資金。到退休時，就用這筆資金換成收息資產，去創造現金流。

GX中國電車(2845)和安碩恒生科技(3067)都係潛力股，由於這些公司都在高速發展，所以好少會派息，因為佢地會將賺到的錢，重新投入業務上發展，去爭取更大回報。

所以，你投資這類潛力股，目標唔會放係股息度，而係係佢增長能力度。

由於這類潛力股波動性好大，雖然長線會升，但中短期點都會有一定波動性。如果你年紀大，快要退休，或者可投資年期較短，就不太適合。

相反，小朋友有好長時間去投資，可以足夠等到企業將佢質素，全面反映係股價上，所以投資盈富(2800), 安碩恒生科技(3067), GX中國電車(2845)都係可以。

煤氣(0003)和GX中國電車(2845)都係有質素，後者增長潛力高，但風險都高，你要自己衡量。

雖然GX中國電車(2845)現價唔平，但月供可以拉平均個價，所以唔算大問題。反而我擔心你會自己去定平貴，或者可能見某股票無乜升，供一陣又停，轉來轉去。

因為月供其實係要你"定期定額"去供特定股票，長線去供先做到平均價格效果，講緊係至少3年以上，並持有5年。

雖然股價貴時，我地的確可以減少供款。但問題係，若果你判斷錯誤，好大機會你最終回報，會受到嚴重影響。如果你投資技巧唔高，只要隻股票有質素，我建議你不理價格，一直長線供，反而會對你最有利。

------------------------------------------------

Q22632：

龔成老師， 我最近有一個好苦惱的問題，看唔清，想聽聽你既專業意見。之前未必想係香港買樓，但考慮到來緊五年都係香港，所以都想買樓，住左三年升。

我最近見到個樓盤我好鐘意，亦都覺得好理想： 長沙灣the campton. 想買400呎左右或以上既都要9百至1000萬，首期需約二百萬左右。

但無可奈何，不計我股票資產。我和男朋友二人最多可以比到150萬左右。我打算放晒手頭上的股票，當做首期，我會沽清所有。而我一年大約可以儲到三十萬左右，

我覺得一下子用盡，後再儲錢，唔太難。 因為份工年年都有加人工，一個月約五萬左右，個人和家庭開支約兩萬。 你覺得賣晒所有股票值唔值？

因為我個人就唔係好想，因為當中長期hold 住，我知會有高回報，以下為我所有的股票。

小米 平均成本 $26.1 1200單位
安碩 平均成本 $14.37 500
煤氣 平均成本 $10.68 5738
地鐵 平均成本 $39.8 2500
完美 平均成本 $5.11 17000
太古 平均成本 $22.24 2000
港燈 平均成本 $8.05 7000
HSBC $81.4 400
恒生 $183.3 300
建行 $8.6 2000

如果我唔放股票既，你覺得我有無需要放左某啲佢，集中幾隻，因為依家感覺好散下～ 我知要分散投資～ 但好似分得太多

因為真係好鐘意果個物業，覺得地理位置都好好，好驚自己做左唔理性既野，所以想來問下你意見

十分感謝老師，已報進修班，因為唔想係現場透漏太多個人資料，所次message 你。

龔成老師︰

首先，要盡沽股票，去投入一個物業，會令成個組合偏晒係物業一方，造成風險，最好唔好咁做。

因為我地無人知，未來幾年樓時係唔係一定升得快過股市，如果係相反，你就會因為而個動作，而減弱左財富增值效率。

另外﹐你5年後都會移民，其實我唔太建議投資樓市，除非你個物業係會保留，用來之後放租，就另作別論。(不過個呎價唔平，租金回報率未必好理想，你要研究清楚。)

因為除左我講，唔知樓市定股市升得快之外，係香港每次做物業買賣，成本都好高昂。你一來一回，其實唔見左好多錢。

所以，如果你好鐘意，我建議你租住就算。餘下5年，好好用你的優質股，去進行增值，相信會較好。

若然你真係堅持要買的話，你可以優先沽出一些增長力無咁高的股票，包括港燈(2638)、匯控(0005)、恆生(0011)和建行(0939)。

其次就係佔比較重的完全醫療(1830)和煤氣(0003)，可以沽部份，其餘就長線持有。

如果你放棄置業，你現時投資組合，大致無問題。除了港燈(2638)、匯控(0005)、恆生(0011)和建行(0939)係收息股，增長力不高，以你31歲計，不宜持有太多。

另外，完美醫療(1830)佔比太重，建議沽少少，換至其他有增長力股票較好。

記住任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

------------------------------------------------

Q22633：

Hello 龔老師! 你好! 现手上有90%也是hold 股票，大多也是不差股票，不知賣出，或是作長期收息股吧？因本人年纪近50，是否該賣出30% 留下現金。现仍有工作，未退休。

謝謝给点意見!!

龔成老師︰

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

由於你已近退休之年，你要將開始審視手上股票，將一些較高風險的持股，慢慢轉成收息類股票(而唔係轉成現金)。

因為你退休時，就會靠收息資產(如收息股、年金、A級債券、收息產品等)創出的現金流，去支援你退休生活。

所以，你唔洗沽出持股換現金。純粹係睇翻你組合，有無調整投資選股的必要，咁就可以。

如果你尚有5年左右，才正式退休，你現時組合，可以持有一些平穏增長股和收息股。但若你只有1-2年就退休，收息股應佔大部份。

到退休時，收息股佔比應為100%。

------------------------------------------------

Q22634：

銀行股：工商 1398
地產股：恆基 12 領展 823 置富778
物管股：雅生活 3319
保險股：中國平安2318
公用股：電訊 6823 粵海270
醫療股：中生製藥1177
ETF:盈富 2800 安碩 3067

以上持股共30萬左右，單一股票不超過5萬元，另外還有20萬現金想投資，本人30歲，請問有沒有什麼建議和改進？

自上年follow 你的page後，已經買左你6本著作閱讀，十分欣賞年報勝經，這本書是我個人認為學習得最多的（可能是第一本看）好認同你的投資方法，謝謝你。

龔sir你好，多謝你的教導，每天睇你的專頁已成為習慣

龔成老師︰

先多謝你支持我的書和專頁，如果你對估值有興趣，可以睇埋《股票勝經》和《選股勝經》。

當然，最理想係上我股票班，因為課堂中會較具體教你點去運用不同方法選股和估值，而且絕大部份內容，在書中都無提及。如果你想認真學好投資，建議你抽時間來上堂。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你30歲，應以增值為主，建議你用「平穏增長股」 + 「潛力股」作組合，去創造一個增值平台。

你上述持股，都係有質素，可長線持有。但工行(1398)、置富(0778)、香港電訊(6823)都係收息股，增長力唔高，主要只係收下息。以你年紀，不宜持有太多。

現時大市只在合理水平，資金不宜盡用。建議你餘下20萬，等大跌市出現，才去掃貨。

另外，你可以考慮用每月儲蓄，去進行月供股票，去加快資產累積速度。

策略上，你每月5成儲蓄做月供。其餘先儲起，同樣都係等大跌市機會出現，才出手掃平貨。

你可以考慮一些優質的平穩增長股，再加潛力股。潛力股，可選：安碩恒生科技(3067)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）。如果有投資美股，可投資QQQ。但佢地波動性和風險會較高，你要自己平衡。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

------------------------------------------------

Q22635：

呀Sir您好呀 我係之前報過您投資班既學生。我想同你分享下宜家我既情況。

其實我宜家暫時係做緊啲短期兼職，同時做緊保險，收入不穩定，但好彩係搵到番黎既我都可以至少儲到6-7成，我平時冇乜駛費，又有記帳習慣，

之前大學幾年搵搵下，宜家有$200000現金，同一份$200000的儲蓄保險，黎緊希望繼續係保險呢行做好，如果真係唔得，先轉。

呀Sir，我真係好想好似你咁財務自由，上完您堂之後，都買左唔少股票

9988 @$203 1手
2638 @$7.83 1手
1928 @$27.6 1手
1810 @$28.7 1手
1448 @$7.45 1手

1177 @$6.95 1手
285 @ $40 1手
270 @11.12 1手
月供VOO @385.75 5股

我想請教呀Sir您 呢個組合 您覺得可以嗎？

我諗住港股暫時咁樣擺係到，長揸果啲股票，同時繼續月供VOO，長遠應該可慢慢致富

我今年23歲. 我同我自己講28歲我要有$100萬. 我真係希望可以做到. 呀Sir，根據我宜家呢份保險工作同買股票既情況. 您可唔可以指點迷津，比啲建議我？

唔該您多謝您呀Sir.

龔成老師︰

以你23歲年紀，這個組合係可以。但港燈(2638)係收息股，增長力唔會明顯，主要係收下息，你現貨可持有，但暫時唔建議你加注。

我假設投資回報有10%（連股息再投資），你現時投資組合約值10萬+20萬現金，5年後大約會增值至48萬。

如果想達至你的財務目標，你每月月供金額要有最少$8000，才會較大機會做到100萬目標。

月供方面，除了保持月供VOO外，你都可以考慮加入其他「平穏增長股」 + 「潛力股」作組合，去創造一個增值平台。

僎設你係月供$8000，你每月先用$4000做月供(連埋VOO計)，其餘$4000儲起，用一邊月供一邊儲蓄的策略。

月供方面，你可以選擇投資在平穏增長股︰指數基金、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)。

潛力股︰安碩恒生科技(3067)、中生(1177)、福壽園(1448)、小米(1810)、港交所(0388)、舜宇光學（2382）、阿里（9988）、騰訊（0700）、ＧＸ中國電車基金（2845）、三星FANG ETF（2814）。如果有投資美股，可投資QQQ。

現時大市只是合理區，你現有20萬資金可以再投入多5-10萬，用"分注"形式，慢慢買貨。餘下資和每月所儲倒的資金，就等大市出現一定程度的下跌，才大力度掃貨，然後長線投資。

另外，係財富增值時，"保險"主要係用來防守，買足夠保障就可以。儲蓄成份架保險，唔係唔可以買。如果你個人風險承受能力好低，或者完全無投資能力，這類保險都有持有價值。

但始終係財富增值角度，佢幫助好有限，一般我都就唔建議太多。做財富增值，應集中投資在優質資產(如優質股、物業等)，效果才會理想。

而工作上，你應該才剛剛畢業，其實可以多作不同嘗試，慢慢去找到適合自己的路。保險都係一個值得一試的行業，你可以看看自己是否適合這份工作，加油!

------------------------------------------------

Q22636：

Sir!成手恆大中國，蝕到入肉。同版塊的融創中國8月11號除淨，唸緊換唔換馬！股息派成$2，好似好吸引！但問題現在內房版塊比政策打到咁，又驚中伏！

驚收完股價急插，因為融創都係3幾蚊炒上去。所以想聽下你意見。現在持恆大中國25萬股，均價$8.3

唔該呀sir，現在帳面虧損35%

龔成老師︰

你對派息運作，似乎有點誤解。

如果你要收到股息，必需在「除淨日」前一天，依然持有股票。「除淨日」，其實就是用來確認那些股東收到這權益的日子。等到「除淨日」當天才買，派息就唔會有你份。

「除淨日」那天，股價就會扣除派息部份，例如原來股價$10，派息$1。那麼「除淨日」就會將股價，從$10下調至$9，以反映派息動作。

「派息日」，就係合資格股東，正式收到股息的日子。

由於「除淨日」股價會下跌。而下跌比重同收到息係一樣，所以只係左手交右手動作，你唔會在此期間因買/沽貨，出現任何著數。

至於換不換碼，你要睇翻企業本身質素。

融創中國（1918）業務不差，有規模、品牌、銷售網絡，但同時有一定風險。

這股同中國恒大（3333）一樣，負債偏高。無事就無事，有事就似中國恒大（3333）咁大件事。(當然負債水平，恆大比融創高得更多。)

而且，近期中央有時會出打擊樓市政策，相信會對佢有一定的影響。此股都有投資價值，但只宜小注，可以，但都要明白風險。

至於中國恒大（3333），負債問題唔細。現時風險很高，你最多只可以小注持有。

若現時持股佔你組合好高，我建議沽出部份，換碼至其他類。

------------------------------------------------

Q22637：

龔先生你好，本人50歲，有一個約850萬物業已供完。強積金及基金約400萬 (中/高風險收益基金為主)。股票約120萬(中風險龍頭股為主)，另現金約200萬。

希望約五年後退休。全球放水估計未來通脹將會加劇，如何運用二百萬現金？有咩高見？

其餘嘅配置有冇問題？

另外想請教你對基金同股票有咩睇法？ 有啲朋友講，買基金不如自己買股票，唔使畀保險公司賺，又唔洗綁死咁多年。

龔成老師︰

由於你距離退休尚有5年，都可以進行適度增值，但選項就要相對保守。

其實基金，唔一定無投資價值。你可以衡量基金的投資策略，所投資的資產類別、投資策略、風險程度、市場、費用成本、以及過往的表現(可以睇佢過往5-10年，如果回報係比主要投資市場高，有機會值得繼續投資)。

另外，你現時基金風險水平，其實係有點高。因為係你退休時候，我地係會將這些有增長力資產，轉換成收息類資產，用來創造平穏現金流(如股息、利息收入)，去支援退休生活。

所以，建議你將高風險基金，部份換至一些風險較低基金或優質股。其實最簡單，就係買指數基金。

而現有資金，你可以將佢地投資一些「平穩增值股」+「收息股」。若你想進取少少，可以較集中「平穩增值股」。相反，則以收息股作為主力。

平穩增值股，例如長建（1038）、中銀（2388）、港鐵（0066）、恆基（0012）、粵海（0270）、領展(0823)。如果有投資美股，可投資VOO。

同時，可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）、富豪產業（1881）等（記住，股價略波動，不能太過大注）。

大市現處於合理水平，那200萬資金，你可以多用50-80萬，以"分注"形式慢慢入貨。餘下一半就等大跌市機會出現，才大力度掃貨，並長線投資。

到你退休前一年，就慢慢將你增長類資產，換成收息類資產，去為退休創造一個收息組合，咁就可以。

------------------------------------------------

Q22638：

老師你好，我之前誤打誤撞買股票，輸咗好多錢，差不多輸咗有20萬 ，我而家對股票完全冇期望，但係手上仲有以下股票，

可唔可以俾啲意見我睇吓我手上股票應該要長期揸住定係沽出？

66號，共有835股 @46.536 （月供$1500）
788號，共有4000股 @2.084
823號，共有835股 @76.805 （月供$1500）
2800號，共有835股 @27.888 （月供$1500）
9988號200股 @188.72

龔成老師︰

你必先要了解翻，自己輸左20萬的原因。係買錯股、買貴貨、定係誤把短炒當投資? 你要了解清楚自己問題所在，避免將來再發生。

我地做財富增值，最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？即是你想設計一個怎樣的投資組合？長期、優質、平衡、適合你。

你現時持有股票，都係有質素，只係中國鐵塔(0788)買入價偏貴，但由於有質素，你照長線持有就可以。

這個組合，算係一個增長型配置，若你係年青至中年人士，這個組合係可以。

若你投資經驗不多，建議你先維持用月供方法去儲貨，以減低買貴貨的風險。另外，現時大市只係合理區，每月儲蓄唔好盡用，要留有部份，用來等大跌市機會。

------------------------------------------------

Q22639：

龔sir，想問下如何分辦股票的股價是便宜或贵？是否處於合理區？

龔成老師：

要計企業的價值，過程比較複雜，好難三言兩語就講到，就算在我的股票班，都要講5小時，裡面會講3種估值方法，有難有易，但同學都用到的。

簡單來說，你要考慮企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。

例如，我地會考慮佢有多少生意，有多少盈利、現金流，有多少資產，從而計算該業務值多少錢，同時會推算將來的盈利情況，去推算這企業長遠的價值。

如果要深入計算，基本上要好仔細的研究企業，要分析好多財務數據用比率，先至有較完整的答案。

------------------------------------------------

Q22640：

你好成哥，我今年36歲，單身

最近想開始學投資增值，希望60歳可以有3-5萬現金流，想下個月開始買入以下5隻股票，（2007，3988，6823，0823，303）平均每月可投資$12000以上，你覺得可行嗎？

我目前收入$40000，但之前經歷生意失敗，輸咗幾百萬，所以冇乜積蓄，仲有你覺得我應該先儲首期買樓定收息增值好？謝謝

龔成老師︰

每個人都有自住需要，但現時香港樓唔平，大致在合理區頂至略貴。如果你係無買自住屋的迫切性，建議你先用優質股去增值，會較好。

若你希望60歳退休時，每月有3-5萬蚊現金流，以股息率6%計，你需要本金600-1000萬。

故你現時要做，就係透過一些有增長力股票(而非收息股)，去先累積起這筆財富。到足夠時，才慢慢換成收息股，去創造現金流，支援退休生活。

你上述提到的股票，都有質素，領展(0823)係合適。但中行(3988)、香港電訊(6823)、偉易達(0303)係收息股，增長力唔高，唔適合。

碧桂園(2007)，業務都算不差，但負債高，風險略高，雖然都可考慮，但不宜大注。

你現時無投資知識和經驗，對企業估值，點去定平貴未必會太了解。所以你最好先利用月供模式，去做增值，可以減低買貴貨風險，對你而言會較理想。

策略上，你可以投資「平穏增長股」和「潛力股」。你每月5成儲蓄，即是最少用$6000做月供。其餘先儲起，用一邊月供一邊儲蓄的策略。

選股上，你可以投資在平穏增長股，加少少潛力股。

由於你投資知識不高，因此可較集中在平穩增長類股，至於潛力股，只宜小小注(不多於3成)。最好是你先提高投資知識，等到你有一定知識和經驗，才慢慢增加潛力股比例(大約5成)。

餘下的另一半現金，我地就等機會，當大市出現較大回調，就加大力度掃貨，然後作長線投資。

我假設投資回報有10%（連股息再投資），你每月投資$12000，24年後大約會增值至1300萬，故這樣安排相信很大機會達至你的財務目標。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21701-Q21720）

Q21701：

你好，龔老師，我是你的學生，我想通過比較同行PE來預測#1448福壽園的合理P/E範圍。

#922 安賢園，#1448福壽園，#6966中國萬桐園最近5年P/E範圍分別為2-47， 25-31， 9-22。

#6966中國萬桐園成交量少，2020年度平均成交量93萬，有76日更是0成交量，收入捨棄2019年有一個客戶貢獻2400萬的收入的因素（因為2020年已經不再有這個收入），

其收入維持穩定不變，i.e. 無增長，但其5年內P/E範圍可達9-22， 是否代表市場對這股票過於樂觀，高估其價值，

成交量少另我擔心這股票是否可以賣出或者其P/E是否可參考。

對比#922 安賢園，其收入每年都有上升，但P/E每年下降，甚至只有3倍P/E， 遠遠低於#6966中國萬桐園和#1448福壽園，請問是否代表市場對這股票過於悲觀，相較之下為何有這麼低P/E.

以上，個人簡單分析似乎都得不出可靠的P/E 範圍，請老師指教本人分析是否有誤， 對於#1448福壽園的合理P/E範圍，是否只能參考其自己的歷史P/E範圍，行業內P/E 無法參考？感謝賜教。

龔成老師︰

我地係計算行業PE在參考時，數據除了要係集中在同業，更重要係一些質素相近，甚至盈利規模等等，都接近的企業。

中國萬桐園(6966)和安賢園(0922)規模好細，品牌優勢、市佔都明顯不及龍頭企業福壽園(1448)，作比較價值不高。

因此，你可以集中翻用集團歷史市盈率去做參考。2014-21年中間4年市盈率，大約為27.5 - 30倍。

但由於近年中國政府，對行業有不少新指引，主要方向都係控制價值，避免殯儀業相關產品和服務，出現定價過高情況。相信未來，殯儀業盈利會回到較合理水平。

因此，個市盈率都要打折，你預大約15 - 20倍（當然，這數有主觀成份）。

至於每股盈利，我地可以用較近的5年平均數，再加這5年的年均增長率(約16%)去做參考，大約係HKD$0.374。

你預合理價格，大約係HKD5.6 - 7.5。

雖然增長力弱左，但由於佢本身係行業龍頭，有一定質素。而且行業市佔好分散，令佢有很大潛在發展空間，故依然係一隻相當有潛力的股票。

現價在合理區頂，無貨可小注。

------------------------------------------------

Q21702：

多謝你，你好有heart. 股票班最後一堂基礎班，聽你分享聽到眼濕濕，不過我同意，沒有捷徑，只有努力。

一兩年前，我未上你基礎班前開始睇你的本書和Facebook（未睇其他幾本），睇你解答學生或任何人的問題，解答得清楚唔馬虎，開始買月供股，每個月供一萬蚊，再一份full time 一份part time teaching教三日書，一星期做六日，過程是辛苦但有回報。

上年我終於儲夠錢去加拿大讀書，有幸在下個月走之前能完成你的基礎課程。感謝。

我下一個目標是五年後在加拿大買樓，我會帶埋啲note 去認真再溫習。多謝。安好！

龔成老師：

太好了，你都完成了「儲夠錢去加拿大讀書」的目標，之後就要完成加拿大買樓目標。

我相信每個人都有佢想做的事，可惜一般人會面對現實而放棄，但我唔會，我都希望你能堅持。

希望你過左加拿大，都會保持研究股票，應用課程所學，加油！期待你好快同我讀完成買樓目標！

------------------------------------------------

Q21703：

老師您好，早前買入了1833 平安好醫生 $94.25 @500股，怎知買入後一直跌不停，每天都先升後回，連跌十多天，是否需要訂立止蝕位？

每天看著其他股（例如阿里健康京東健康都是升的），很想賣掉，但一賣掉又立即蝕錢，現在我是否應該不理會股價，待他慢慢回升？

我本來看好平安好醫生的前景，但每天看到股價不斷下跌，有點氣餒及害怕自己判斷錯誤

龔成老師：

有時同一行業，由於企業的發展不同，股價表現都會不同，而我地最重要是集中該企業的分析。

平安好醫生（1833）長遠有發展力。只要你持貨不過多，可持有。

佢係中國領先的一站式醫療健康系統平台，透過「移動醫療+AI」，為每個家庭提供一位家庭醫生，為每個人提供一份電子健康檔案、一個健康管理計畫。

平安好醫生係中國互聯網醫療健康市場的先行者，以平均月活躍客戶，以及在線諮詢量計，是中國最大規模的互聯網醫療健康平台。

企業的業務有潛力，本身有優勢，大環境的配合，都成了這企業的機遇，前景正面，不過財務數據未算好理想。

雖然長遠的企業價值向上，但股價在中短期，可以十分波動，因為市場以「前景」作估值，故此變化必然很大。好難得出平貴的準確數，只能估估下，作參考。

因此，低風險者未必適合投資，若投資者考慮這股，亦不能大注投資，買入後就耐心長線持有，等待這企業改變整個行業的情況，現價算合理區頂，但好波動。

------------------------------------------------

Q21704：

阿sir,再問下你，你認為做地產經紀算唔算係創富嘅一樣野？同埋想問如果真係做得起，又算唔算係一個專家嘅項目？

睇左大半本千萬富翁，我應該試下先？

講返少少我背景，我30歲，得毅進證書，本來一心諗住讀完去考政府工，但睇完本千萬富翁就覺得係咪應該試下做銷售？

我現金同股票大約有2m,股票約1.1m，近來亦發現左一個直銷嘅機會（岩岩開始左半個月），雖然初期回報唔高，不過相信做幾年都有一定可觀回報（因為可以靠下線去幫賺佣金，令自己有一個銷售團隊）

其實有嘅儲備夠我捱到起碼幾年嘅時間，只不過我好怕做左地產會冇收入（唔知成交易唔易，同埋搵客可能好耐先有一位肯成交）

雖然我支出唔算大（大約每月8000-10000），不過都係有少少擔心入不敷支

龔成老師：

正如《80後千萬富翁》所講，地產類晨創富的其中一個方法，而當中不少職業，如地產經紀，都是可以突破的職業，你可以考慮下。

至於是否發展成專家，可以的，但要求你的條件更高，不是不可，但起碼要成為一個專業的地產經紀先。

你要有心理準備，的確有可能有一段時收入不高，但如果你的決心大，我會鼓勵一試。當然，你可以先儲多少少錢，等你較安心，之後先入行。

你30歲是黃金年齡，但就睇你決心有多大！

------------------------------------------------

Q21705：

本人31歲，因患有情緒病導致未能長時間工作，只能半職，每月6000蚊，我想請教……

1）31歲先學理財及投資會否太遲？

2）可以有咩理財嘅方法？

3）如果每個月只能拎出1000-1500蚊，可以點樣投資？
感謝龔成老師

龔成老師：

1）有心唔怕遲，你現時仍是好年青的時期，是累積財富的黃金期，絕對可以開始。

2）我不清楚的情緒病的因素，但我怕投資市場上落大，你會有較大的心理壓力，因此，如果投資股票，就要好好想清楚是否適合自己，如果自己較怕風險，就不要強行投資股票。

3）你可以投資一些較低風險的產品，例如銀行的月供計劃，買一些低風險類別（當然回報未必高）。

如果你能承受風險，就考慮每月供$1000盈富（2800）。

同時，你要留到一定的現金。

理財要一步步，不要急，從基本的儲蓄著手。

------------------------------------------------

Q21706：

老師你好，請問1686新意網你有咩看法？

另外再想請教2138醫思健康，有潛力嗎？

龔成老師：

新意網集團（1686）主要提供數據中心、設施管理、網上應用及增值服務，系統之安裝及保養服務。

行業長遠發展正面，佢已經做到全港最大，加上行業的需求不斷增長，對佢長遠都有正面影響。佢過往生意與盈利保持增長，財務數據正面。

這股有投資價值，不過現價就唔算平，大約在合理區頂至略貴。如投資，小注分注都可。如本身有貨，可長線。

香港醫思醫療集團（2138）主要以ＤＲ　ＲＥＢＯＲＮ品牌提供醫學美容服務。企業都有質素的。

（１）醫療服務：包括整形外科手術、微整形療程及由集團醫生操作的能量儀器療程及一般診症服務，以及牙科（ＯＮＥ　ＤＥＮＴＡＬ及ＯＮＥ　ＤＥＮＴＡＬ　ＰＬＵＳ品牌）、中醫及眼科服務。

（２）準醫療服務：包括由已接受培訓的治療師操作的能量儀器療程，該等治療師已完成集團醫生主導的內部
強制性培訓。

（３）傳統美容服務：包括面部護理、按摩以及其他無創療程。

（４）護膚及美容產品：主要為集團的自家品牌寶特曼娜及瑞研雅。

業務發展不差，長遠有增長力，不過業務中短期會有少少波動。現價合理區頂至略貴。

------------------------------------------------

Q21707：

老師請問我這九隻股票能夠長期月供?
2、823、3、6、1038、6823、66、11、2800

剛剛供了兩個月，從朋友口中得知老師的Facebook，所以想請教一下，每隻每月供10,000，目標10年一千萬作收利息退休用

希望老師能指點指點，小弟只期望效果係保本及收利息，方法可行嗎？

龔成老師︰

首先你要明白，若你目標係保本及收利息，定期存款會較合適。

因為，就算再優質和保守的股票，都會有價格波動，只是個波動會較少，唔會完全無，唔會去到保本的地步。

若你可以承受少少價格波動風險，你可以用收息股，去作為月供目標。

你現時月供股票，都係有質素。你每月可以儲$90,000，基本上，就算沒有增長，10年後都能累積到1000萬。

你組合當中領展(0823)、盈富(2800)、煤氣(0003)、港鐵(0066)息率唔算高，但有基本增長力，所以波動性會有少少比純收息股為高。

若你不想承受這程度風險，你可以將這4隻平穏增長股，轉為其他收息股。

以下是一些較優質收息股，佢地主要係收息，波動性唔會好高。但因為始終係股票，價格波動點都會有，你可以從中選擇。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

------------------------------------------------

Q21708：

你好老師 我係最近follow你既讀者 想請教下你有關投資既問題。

本人呢十年一直係外國 所以現時只係通過某cfd平台買賣港股同美股。

本人收入同財產如下

28歲 工作收入： 20000港幣/月左右

副業： 3400 港幣/月左右

有一層唔需要供既樓正在出租： 租金收入 扣曬所以開支大約有4500港幣/月左右 （樓可以賣 而家大約值190-200萬hkd）

每月必要開支： 供自住樓連水電上網 大約21000/月左右

老婆現時收入 17000/月左右

但老婆仲有三個月左右就生，所以之後會無咩收入 或者轉做全職家庭主婦

現金流而家有35萬左右

最近幾個月先開始有做小小投資, 所以唔係好多錢入左股票, 而且比較雜

大約如下

美股
Tesla - 3000usd @ 601
Berkshire hathaway 1000usd @ 286
Baidu - 640usd @ 270
Apple - 500 usd @ 134.5
Microsoft - 500 usd @258.7

港股
9988 - 1150usd @ 213.99
700 - 985usd @ 635.5
00388 - 一手 @ 460 （屋企人代買）
0968 - 一手 @ 14.5 （屋企人代買）

目標：

1. 如你所見 如果老婆唔做野既話 基本上會頂得好辛苦 因此想睇下有咩投資組合可以減輕小小之後既經濟壓力

2. 希望投資平穩有儲錢功能既股票 主要係抗通漲又可以跑贏小小就好（我個平台買唔到2800， 唔知咩原因⋯)

3. 有睇開 比亞迪 但係一直都好高唔夠膽買 最近好似回落左d 想請問一下你認為大約幾錢左右入手會比較合理？

4. 有睇過d高息股 例如中電, 領展, 中銀 同 中移動. 當中得中移動個股價有所回落。 呢幾間值唔值得月供長渣？

5. 700, 9988 係想當潛力股咁買 但買完都係一直咁跌 而家呢個價位應該再入手嗎？

6. 間樓係可以賣 因為而家計落回報率唔夠3% 好似好雞肋咁 如果真係賣左有190-200萬現金 你會建議點樣去投資好？

7. 其實美股同港股既玩法會唔會有好大差別？ 我而家投資左一陣就覺得美股上落差比港股大同密, 但除此之外 我唔太清楚有咩分別

可能一次過問得太多問題， 唔好意思。 唔該曬老師。

龔成老師︰

1) 以你28歲，我一般建議先做好增值部份。之後，到累積到有一定財富，才慢慢換成提供現金流的收息資產。

但由於你預計將來一段長時間，家庭開支壓力會唔細，希望透過投資去加大每月現金流，作為幫補。

因此我建議你新資金，集中投資一些「平穏增長股」 。佢地增長力唔係最高，但都會有平穏增長，而且會有一定派息，可以幫補你生活上支出。

但你唔好預好多，大約3-4%股息率左右。但相信這個方法，較可以平衡你增值需要，和家庭支出壓力。

2) 上述平穏增長股，已可以做到你要效果，若你買不到盈富(2800)，你可以買其他幾隻。只要平衡咁買，唔好太集中個別1,2隻，咁就可以了。

3) 比亞迪(1211)若要直接買，你預$120才算合理區頂，才可小注。若你係月供，現價開始係無問題。

但這隻是潛力股，派息好少，而且你預要持有一段較長時間，去讓等它自然增值。以你狀況，未必適宜持有太多。

4) 這幾隻都可以，但中電(0002)和中移動(0941)係純收息股，佢派息普遍會比平穏增長股多，但增長力好弱，係佢缺點。

而領展(0823)和中銀(2388)，就係有上面講的平穏增長股。

這4隻你都可以投資，現價都合理，可以分注。你要自己從「現金流」和「增值」2者間，作出一個平衡。

5) 首先你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔洗理。

這2隻股票，依然係有質素。阿里(9988)算係合理區中上，而騰訊（0700）則是合理區頂，由於你有貨在手，建議有明顯回調，才再加注。

同埋，你預這2隻股票較波動。佢地增長潛力強，但派息係極少，甚至係無。以你現時情況，不建議持有太多。

6) 以香港物業回報來計，接近3%算係可接受的回報率(若你物業在海外，則作別論)。由於出售物業，都有一定成本。

物業本身是一種資產，同優質股一樣，都具有增值能力。而且佢能提供穏定現金流，對減輕你生活開支壓力，都有幫助。

記住，我地財富增值組合，除了講質素外，都講平衡性，唔可以偏晒係股票類。若你物業係有質素，其實持有係無問題。

若你最終覺得，都係沽出物業較好。這筆資金，你都可以用來投資「平穏增長股」。

當然，你唔一定要100%去投資落「平穏增長股」。

若你想增值能力高少少﹐你可以加入一些「潛力股」。相反，你希望創造多一點現金流，去減低生活開支壓力，則可以加一些「收息股」在組合內。

潛力股︰比亞迪(1211)、中生(1177)、福壽園(1448)、安碩恒生科技(3067)、港交所(0388)、阿里（9988）、騰訊（0700）、舜宇光學（2382）、小米（1810）、ＧＸ中國電車基金（2845）

收息股︰港燈（2638）、香港電訊（6823）、工行（1398）、恆生（0011）、置富（0778）、陽光（0435）、深高速（0548)。收息基金(3110)，都可以。

現時大市只是合理區，200萬資金可以先投入一半，用"分注"形式，慢慢買貨。餘下一半就等大市出現一定程度的下跌，才大力度掃貨，然後長線投資。

另外，由於你就快有小朋友出世，預期有一定額外洗費。加上你太太短期內不能工作，你要先預留半年左右開支，作為應急之用，才開始投資計劃，會較為穏當。

7) 其實投資港股定美股，個重點都係睇企業質素。若有質素，我地再從佢平貴，組合平衡性、是否適合自己投資策略等，去定買入計劃﹐咁就可以了。

------------------------------------------------

Q21709：

你好 最近4.53買左隻1571 13000股 系做汽車內飾既本身覺得隻股手頭有大約5年訂單 而且還多左tesla 蔚來 同小鵬汽車既訂單

埋e加好多汽車，電動車既既第一季季報出左出貨量都仲系增加緊，買果陣市盈率得11倍左右。但得四離多利息，

本身預佢疫情過後，會隨住電動車既增長而增長。同資本開資慢慢減少派息都越來越多，未來一兩年內有豐厚既收益，

但e加大跌到3.96我開始懷疑我買貴左好多，請問我仲keep 唔keep得過？

龔成老師︰

當我地進行企業分析時，要睇一些長期因素，中短期情況不要太過著重，要睇核心。同時在估值上，市盈率低過10倍不一定平，每間企業都有佢自己合理的市盈率，如果企業本身獨特性唔夠強，就未必值得高市盈率。

信邦控股 (1571)業務主要係為中國供應載客車輛的汽車內飾電鍍零件。

業務上，佢都算有投資價值。但睇翻佢過去1,2年表現，未見好突出，唔算好受惠於新能車發展。

初步睇佢都有投資價值，但只是中等。現價算合理區頂位，你投資此股，但若持貨太多，建議沽部份，去平衡風險較好。

------------------------------------------------

Q21710：

老師你好，本人42歲, 月入$25000現金約50萬, 持有以下股票︰

0012 - 1000 @27.90
6823 – 1000 @10
0003 – 1000 @11.5
0002 - 500 @70.5
0016 – 500 @99.95

1833 – 200 @80.7
2382 – 300 @193.4
9988 – 200 @244.5
3067 – 600 @17.7

1928 – 1200 @37
1810 – 2000 @23.7
388 - 200 @469.7
6993 - 2000 @11.92

另月供盈富$2500現大約有1850股及領展 $1500, 約360股

請問以上組合可以嗎? 不同股票會否持有太多，如想加貨應該加那一隻。我收入不多有機會做到財務自由嗎? 有何策略?

謝謝解答

龔成老師︰

其實每個人財務自由定義都不同，你睇翻你自己目標。

但相同地方是，大家都要透過財富增值，先去累積一筆資金。到有一定金額，就換成收息資產去創造現金流，去達成這個財務自由目標。

我們運用的方法，就是「先增值，後現金流」，其實你這刻年齡未大，應該著重財富的增值，到了一定的年齡及擁有一定財富後，才將持有的財富，配置到現金流類別，利用現金流去達到財務自由。當你的被動收入，大過基本支出時，就稱為財富自由。

你現時持有股票，都係有質素，都適合你。

但比重上，有少少偏重左係潛力股(1833, 2382, 9988, 3067, 1810, 0388)，令組合風險偏高。

但由於佢地都有質素，而且唔好高左好多。你只要新資金，集中翻係平穏增長股，令潛力股比重慢慢回落至4成，就可以。

現時大市只在合理區，你月供部份無問題、照做就可以。但最好每月除了月供外，都有一定資金可以儲蓄。

而這些儲蓄，就連同50萬一齊等大跌市機會，才出手掃貨，並長線持有。

------------------------------------------------

Q21711：

龔 sir, 近來開始睇你的FB及書，了解更多理財知識，獲益良多，現請教怎樣步處退休安排。本人预期下年退休， 有物業自住及資產如下:

現金: 約300萬

股票:
煤氣 17,000 股
中銀香港 2,000 股
港鐵 1,000 股
海爾智家 1,400 股

請問怎樣安排可達至每月有現金流$12,000 - $15,000?

可否月供收息股加少許潛力股，如 3067?

感激萬分

龔成老師︰

如果你希望退休後，每月有1.5萬蚊現金流，以股息率6%計，你需要本金300萬。

因此，你現時資金，基本上數字已足夠達至退休目標。

由於你退休所需資金己經存在，其實你已可以為你退休組合，開始進行配置。

至於你現時持有的股票，基本上都有質素，而煤氣（0003）、港鐵（0066）、中銀（2388），雖然未算完全的收息股類股，但風險不高，都可留在退休組合。

另外，你可以將這$300萬，分成5部分。

第一部分投資收息股，你可以建立一個收息股組合，你可考慮港燈（2638）、香港電訊（6823）、恆生（0011）、工行（1398）、置富（0778）、陽光（0435）、深高速（0548）等，大多有5%股息

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

（你可睇下《50穩健收息股》當中仲有好多）。

你平衡的投資這些股，除了可以得到穩健的收息收，同時可有效的分散風險。

至於現有持股和你提議的安碩恒生科技(3067)，雖然有質素，但由於佢地作用主要係增值。而作為退休人士的你，增值已經不太重要，重點反而係創造穏定現金流。

所以，你可以開始慢慢將現有持股，換碼至收息股中，去增大你組合產出現金流的能力。

第二，投資債券，你可以選擇A評級的債券，年期較長都可以，但利息卻不高。你可以到銀行問問。

第三，投資年金，你可以睇睇，這是適合你們的產品，零風險，可以有穩定回報。

第四，你亦可投資銀行低風險類的產品，你可自行到銀行了解下，總之是「低風險，持續現金流」的。

第五，持有現金，除了可做定期外，現金亦可以為你的後盾，以備不時之需。同時，若投資市場大跌，你可以在這時買到更多的收息股，股息率會進一步上升。

你可以將$300萬資金，平衡地分配在上述的項目上，對你來說是最好平衡風險，同時有穩定的現金流。

------------------------------------------------

Q21712：

Hello. 睇完你的選股勝經及股票勝經後. 發現自己有幾隻股票 係因為人性因數而買入而非理性分析.

例如美團3690 係240 有一手. 後來經估值後 PE合理區間為 $132 - $240 左右. DCF 方法為 $167 - 213. 對於重新檢視後發現 因為買入在昂貴區,

我地應該點樣應對? 我明白買賣在於企業本身的質素. 但考慮整體組合, 我應該持有定出售，去張資金放入另外有經分析過又合理區下的股票?

龔成老師︰

我地投資一隻股票前，必需先做好分析和估值，之後出手，才算正確方法。

但由於你已買入，我地就應審視翻，這隻股票有無質素，去決定是否持有。因為已買入，所以重點已經係睇質素，買貴左，定平左，而一刻唔會係我地持有與否的理由。

若分析後，發現此股係有質素。我地就要了解，佢是否適合我地成個財富配置。

以美團(3690)為例，佢係潛力股類，但不確定性較高。若你係退休人士，就不適合持有，有質素都要沽。

若你係年青人，這股適合。但佢佔你組合比重好高，我地就要沽少少，去平衡個風險。

美團本身係有潛力的，過往一直虧損，到近一年，開始有正現金流，這是一個實質的利好因素，因為之前一直在燒銀紙，現時初步見到成效，不過，估值的方法好虛無，因為現時的市盈率仍過百倍。

如果有利好消息，佢可以上好多，但如果估值修正，股價可太跌。

只可以話，潛力是有的，現價唔算平，之前明顯貴，之後回翻好少少，大約合理區頂至略貴。

你持有此股係可以，但此股暫時不宜太大注。

------------------------------------------------

Q21713：

老師，我男朋友之前入左4手中國碳中和(1372)，在5.5買入，你覺得這股票有前景嗎，長線持有可以嗎？謝謝你

另外，我都睇好新能源股，老師對於大唐新能源01798有咩看法？可以分注吸納長線持有嗎？

龔成老師︰

中國碳中和(1372)主要在香港從事土木工程項目、樓宇建造和保養；以及開發、生產及銷售汽車發動機。

企業規模唔算好大，股價、營業額和盈利都十分波動。過去有多年出現虧損，加上過去幾年，核數師都比出「無保留意見 (修定報告)」

雖然唔一定有問題，但我地對這類股票，就要保守少少。

整體而言，此股投資價值不高，你勉強可以好小注持有。但長線計，換至其他優質股較好。

大唐新能源（1798）主要在中國專注於風電項目的開發、管理及營運。

佢要從事風電等新能源的開發、投資、建設與管理，低碳技術的研發、應用與推廣，新能源相關設備的研製、銷售、檢測與維修等，與新能源業務相關的培訓、諮詢服務，以及房屋出租。

過往的業務發展不差，長遠都有投資價值，不過規模較細。現價合理區中上部，可分注，但唔建議投資太大注。

------------------------------------------------

Q21714：

Sir：這些年來不斷看老師的書和 Facebook post，使我的理財和投資知識增長不少。

今次想請老師你看看我的投資組合，給予我一些意見。

我現年27歲，全職+freelance月入為$3萬至$3.5萬，扣除開支每月可儲約$2萬元。

目標在5年後Full Pay買入市值$300萬以下的村屋單位自住，並於40歲前財務自由過半退休生活。

現時手持$20萬現金和總值約$40萬股票，組合如下：

2 中電 117 @$74.89
5 匯豐 835 @$43.83
66 港鐵 257 @$42.10
1810 小米 1000@$26.54
2800 盈富 363 @$27.19
9988 阿里 1036@$250.36
ARKK 27@USD$140.46
TSM 34@USD$125.93
PYPL 10@USD$253.40

中電、匯豐、港鐵和盈富月供$2000，阿里就$3000。

因為尚算年輕，所以股票組合側重於增長股。最近科技股回調不少，雖然有時會因而感到憂慮，但憂慮過後明白波動只是一時，應該把目光放遠。

比較擔心的是ARKK，高位買入太多了，現正盤算是否應全數賣出轉做現金，然後等待時機買入VOO，還是在低位時再加貨？

老師認為我的組合還有其他地方需要作出調整嗎？

另外，我正考慮購買儲蓄保險/年金，希望40歲後有固定收入/一筆錢用作日常開支，你認為儲蓄保險還是年金會比較適合我？

老師對我的40歲前財務自由計劃還有其他意見嗎？
Thanks!

龔成老師︰

不論是置業，還是你財務自由目標，都尚有一定時間，係而一刻我地應先做去增值部份，累積一筆財富，為這2個目標作準備。

你現時持股和月供選股，都係有質素。但中電(0002)和匯控(0005)主要係收息，增長力唔高，不宜持有太多。

而儲蓄保險和年金，這類產品，都不太適合用於財富增值。

以你現時27歲去計，可以投資「平穏增長股」和「潛力股」。你每月5成儲蓄，即是用$10000做月供。其餘先儲起，用一邊月供一邊儲蓄的策略。

選股上，除了盈富(2800)和港鐵（0066）這類平穏增長股，你都可以投資同是平穏增長股的VVO、金沙（1928）、恆基（0012）、平安(2318)、中銀（2388）、煤氣(0003)、長建(1038)、粵海(0270)、領展(0823)。

潛力股可選安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）。但佢地波動性和風險會較高，你要自己平衡。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

餘下的另一半儲蓄和$20萬現金，我地就等機會，當大市出現較大回調，就加大力度掃貨，然後作長線投資。

至於ARKK，係有質素。但你預佢股價較波動，係潛力股類，要控制整體注碼。但現貨唔洗沽，長線持有就可以。

我假設投資回報有10%（連股息再投資），你每月投資$20000 + 現有資產60萬(現金和持股)，5年後大約會增值至240萬。

但我唔建議你用FULL PAY去買屋，因為現時係低息環境。若你有一定投資知識，應用借貨模式買入物業，以便留下較多資金去做增值。

假設你動用一半資金去置業，之後再用同一方法去增值至40歲，大約可累積到500萬。

再將佢換成6%收息資產，每月大約可以創造2.5萬現金流。

你可以用我以上預算作為參考，因應自己情況和目標，再作調整，去提高達成你目標的可能性。

------------------------------------------------

Q21715：

老師你好，本人持股2318，貨量唔多，長線看好，但睇返新聞先知有華夏事件，我在87蚊買的，適宜在81蚊多買一注嗎？

另外亦有939，有20000股，在2018年買入，一直跌，買入價7.8左右，宜繼續買入，定收住息先？

手上有中國人壽20000股，16.3買入，長線看好這公司嗎？

龔成老師︰

華夏幸福(600340)公司出現流動性緊張，平安(2318)為其第二大股東，在此公司投資額約為540億。

以平安資產規模計，算唔上一個大投資，而且集團最終損失，都不是以這個投資額作準。

因此，這個問題唔算係好嚴重。反而要留意，將來會不會陸續出現同類問題。如有，就反映平安係投資決策上，可能有不足之處，那就有需要扣分。

暫時睇平安質素依然存在，你可長線持有。但再加注，最好相隔10-15%，所以建議等人回多少少先。

建行(0939)有質素，但主要係收下息。若你目標係收息的話，不用理股價波動，照持有就可以。

中國人壽（2628）並不是無質素，不過增長力唔強。同埋企業的賺錢能力不及過往年代。

相信這股唔會再大跌，但要佢大升都不易，長線持有價值都算有，但暫時唔好對股價有太大期望。

若你持貨不多，係可以。相反你持貨佔組合較多，建議沽出部份，換至其他優質股﹐去平衡風險。

------------------------------------------------

Q21716：

老師，我又來請教你了，因為我多了月供的預算，以及媽媽聽我說願意把自己只懂得放在銀行的其中10萬儲蓄嘗試給我幫她投資，

為了保險起見，還是想問問你的意見~另外我也看了你的財務自由行，80後百萬富翁，五年買樓四部曲，50優質潛力股等書！

現在排緊預約你的股票勝經呢在100多名後哈哈。

我今年剛滿27歲，打算幾年後結婚置業，現在月供緊：

2800盈富1000
0027銀娛1000
3067 安碩恆生科技1000

另外有兩手3067和一手小米

1. 過多一段時間，我供完自己讀書後，每個月會再多出7000可投資，總共每月可投資金額1萬。因為老師你說要預留些資金，所以打算每月儲蓄4000，投資6000

（還是可以再多些？因為我今年才開始投資股票，起步較晚）。

請問以下6000的投資方案哪個較好？是方案一分散投資，或方案一集中etf投資，因為手續費的問題，或者老師你可以建議我怎樣調整我的投資方案嗎？

我還年輕，可承受風險較高，那麼舊經濟股和新經濟股可一半一半嗎？甚至新經濟股比例可再更高？因為想五年內可買細價樓投資。

方案一:
2800盈富2000
0027銀娛1000
3067 安碩恆生科技1000
1810小米1000/或港交所好？
1177中生1000

方案二：
2800 盈富2000
0027 銀娛 1000
3067 安碩恆生科技 3000


2. 另外，我媽媽（佢年齡唔算大，相信仍可財富增值），佢願意拿儲蓄其中10萬給我嘗試投資，不過她說虧了我就要賠給她成本，贏了就算我的哈哈。

她比較保守，我打算買收息股，現在幫她買了一手0548深高速@8.020，剩餘84000左右，打算會繼續買收息股如港燈、香港電訊、工行、置富等老師你說過的收息股。

那麼，我媽媽是否應該將其中一半投資平穩增長股如盈富、領展、港鐵等呢？還是收息股比較穩當，因為我不能虧了她本金哈哈。若賺了我還是會分她一半的。

謝謝老師你的無私分享，問題比較長，希望不要介意，繼續向你學習！

龔成老師︰

1) 你現時月供$6000，儲蓄$4000，根據大市平貴水平而言，已經係可以，唔建議再調高每月供款。

你現在還很年青，操之過急，反而會對你不利。只要用對方法，長線持有這些優質股，自然會有不錯回報。

其實方案1和2都適合你，選擇重點會係月供成本和你對這些股票的認識。

若你係特別睇好小米(1810)、港交所(0388)和中生(1177)，你可用方案1。

小米(1810)、港交所(0388)都係好優質，你可以視乎個人喜好和認知程度，去做決定。

如果你想月供成本少D，或者你唔係咁熟這些潛力股，又或者想分散D個風險，方案2會較合適。

2) 至於你母親，雖然以佢年紀計，的確好似你所講，係有一定增值需要。

但由於佢個人比較保守，風險承受能力不高。我建議你照她意願，集中係收息股，會比較適合。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金(3110)，都可以。

但緊記，係你創建收息組合時，唔好太集中係個別企業和行業，以免有過度集中性風險。

------------------------------------------------

Q21717：

老師想請教下你，3883及2233、799邊隻較有質素？現價邊隻較抵買？

龔成老師︰

其實3隻股票，性質好唔同。我建議你除了價格值博率外，都要因應自己風險承受能力，去選股。

中國奧園（3883）主要於中國從事物業發展及物業投資業務，近年增長快速，這是受中國樓市保持向好的情況帶動，加上佢利用大量負債運作，當好景時，佢就會好好賺。

但佢的負債有點多，有危有機，好景時好好賺，但逆景時，就幾大件事。

所以，這類股不是無前景，現價合理，但此股風險較高，唔建議大注。

西部水泥（2233）主要在中國陝西省從事水泥生產，以「堯柏」及「堯柏水泥」商標銷售，主要用於建設高速公路、橋樑、鐵路及道路等基建項目以及住宅樓宇。

業務不過不失，雖然都有d質素，但不算好強，產品價格自主能力不高，賺錢能力不算強。

比較吸引的是現價唔貴，但長遠對佢增長就唔好有太大期望，可以視為收息股。這類股唔建議太大注投資。

IGG（0799）業務上都有質素的，但卻是有風險的類別。

雖然佢財務數據不差，但業務本質的不確定性大，軟件及遊戲都是變他較大的行業，這種不確定性可以令企業好勁或好弱，因此你要明白這點。

佢股價上落大是正常的，如果你投資要明白這點，就算長遠企業價值向上，都要明白股價波動。這股不是無質素，現價算合理。但由於有風險，因此唔建議大注。

------------------------------------------------

Q21718：

龔sir，可否分析一下現在經濟狀況，是否偏向滯帳。

現在由於（1）疫情，資源生產受影響，（2）另加上多國量寬政治，引致資源價格大升，不只是大升，是創歷史新高。

但另一方面，經濟重啟亦受各地疫情影響，經濟停滯不前。通脹升溫，而經濟沒跟上，引致滯脹危機風險，現在是否很高。

以往，很少出現滯脹，但印象中，有一次，是所有資產價格會下跌包括股票，物業，債券。。。那時是現金為王。

可否聽聽龔sir你的看法。

龔成老師︰

各國係疫情期間，加大印銀紙速度，令市場預期通漲會進一步升溫。引至滯脹機會，係存在。

但我地係制定投資策略時，應集中在企業層面去作考慮。而唔係估會否出現滯脹，或者出現後，成個大市會點走向。

我地做架事，其實應該係偏向被動，而唔係去預估將來。只要市場出現變化，令價格調者至有利位置，我地就可以有策略地出手。

當然，宏觀經濟唔係完全唔理，但只會佔較少比重。較要留意，這類宏觀因素變化，會唔會影響到企業長線發展，咁就可以。

------------------------------------------------

Q21719：

龔sir你好，睇完思維篇之後，有幾題問題想請教老師

（1） 書中提及過辭職，我想問當時你同上司講辭職原因係咩？

（2） 書中提及進攻型思維，前提係都要有基本防守，我股票組合大約$30萬，當中大部分都係水桶2，想問咁算唔算防守？

（3）本身月供緊1177，2800，788，066，下個月將788變成供1211(如果唔貴的話)，算唔算增加進攻？可行嗎？

（4） 如果我強項及興趣在於股票/理財/投資/數學，應否全面集中提升這些技能既實力，還是都要發展其他技能？

（5）小弟幾鐘意數學，但數學能力其實可唔可以幫助理財/投資？

謝謝龔sir指導

龔成老師︰

1) 同佢講我想尋找其他發展，首先想休息下，之後再轉其他工作。（但其實，當時我已經寫緊書，已經建立了出面的副業，但無同上師講）。

2) 你現時26歲，係財富增值的黃金時期。而且你年輕，風險承受能力，理應較高。

水桶2，係要有，但大約佔組合一半好了。因為水桶2有增長力，但唔算最高，主要係幫你穏中求勝。

其餘部份，應投入水桶1股票，去做進攻。但我唔係要你盲力地加大比重，因為始終水桶1要求投資知識較多，風險也較大。

如果你經驗較淺，可以先小注，大約佔組合3成左右。此期間，你要努力學習，去提升自己投資知識水平。到你有一定知識和經驗，你可以投資到約5成比重。

3) 要睇你供款比例，水桶1(1177, 1211, 0788)和水桶2(2800, 0066)，應大約各佔一半，當然你視乎投資能力，去再作調整。

4) 我建議你先集中係自己強項，但唔代表其他唔理。就好似我自己，投資商業/股票較強，所以會先集中這部份。

但同時間，我都會學習其他地方，令擴闊自己知識之餘，都看看其他地方，有無發展機會。

5) 坦白講，係有D幫助，但唔會好大。除非係會計方面，個幫助就會較直接。

------------------------------------------------

Q21720：

龔成老師，近期股市調整令股票資產-30% 心理上有壓力，本人持有 9988，3690，1810，175，6690，2400

請問以上是否有質素的股票？是否應該長期持有？現在應唔應該溝貨？感謝

龔成老師︰

你持有股票都係有質素，可以長線持有。你要明白，就算優質股都會有波動，唔好太受個買入價影響判斷，要從企業質素去諗，到底隻股票值唔值得長線持有。

但我發現，你持有的股票，都是近半年較熱門的類別，反映你在選股時，只跟著市場較多人投資、近期較多人談論的類別去選股，而這類股（近期熱門類），一般都已經炒起左，因此一般都貴。

如果你日後都以這方法投資，往後仍是好易買貴貨的情況出現。

但好彩的是，上述持股，不少都有質素的。

另外，我想你留意，以下幾個問題。

首先，你組合中除了海爾智家(6690)，全部都係潛力股。佢地雖然有增長潛力，同時風險都較高，不宜持有過多。

特別係心動公司(2400)、美團(3690)這類不確定性高的公司，投資時不可以佔組合太高比重。

就算你現時好年青，風險承受力較高，潛力股都最多都只可以佔約5成，餘下應投資平穏增長股。若你投資經驗較淺，潛力股比重，要再調至3成以下。到你學到一定投資知識，才慢慢調高。

未來時間，你就要加大翻平穏增長股部份，令組合更平衡。

對於你想再加注，我就唔建議。

因為本身你組合已經風險偏高，就算再平，暫時都唔建議加注在這些潛力股。到你組合開始大，個比例回復正常，你才考慮是否加注。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21681-Q21700）

Q21681：

老師，上完你整個課程，雖然我仍有d唔明，但我想信每天一點一滴去溫習你既notes，我會一步一步進步

我最感恩就係，依加個市上上落落，我都可以放心。因為你教識我，只要持有優質股，不用驚短暫股價既波動

1) 其實之前教既市賬率，市盈率，現金流，折現率...要計數既部份，係咪知下就得喇？

最重要係學會第6，7課既企業評估表，對嗎？

2) 你功課590話每股盈利增長係負數，即是代表什麼？

3) 老師，恕我能力偏弱，我唔識你評估表某些指標的意思，即是搵咩資料：

-生意與盈利保障程度高
-管理層理性
-總負債÷股東權益<100%
-負債的增長不過快

4) 老師，除了590外，還做了669，1211，發覺自己做多了一點，開始知d數據去邊度搵，熟習了一點。

但係指標好多都唔識做，唔能夠理性去分析，只主觀地表示 ✅或❎，甚至唔識做

5) 老師，想問下英磅走勢，你有何意見？

6) 老師，你課堂的第7堂內容非常豐富，如果分2堂講會好d

想問功課

7) 行業市盈率，照網站所示的寫下答案，還是搵返相近市值的股票公司作比較

如六福網站show 行業市盈率是35.47。

而其中 1856依波路 的PE 是710。另外，5間市值最大的股票（周大福，六福，周生生，冠城，力世紀），

當中係無盈利的，即無shows PE，係咪只計頭3間的PE? 還是照抄網頁的數字？

龔成老師︰

1) 唔係，其實這幾個是一些較主要的分析方法。除左用企業評估表中，去判定一間企業長線質素外。

我地都需要詐透過這些方法，去幫助我地計算合理值出來。因此，你係要比時間去了解的。但現金流折現法，會係較為複雜。初學者，可以先掌握其他幾個先。

2) 這個負數，係代表每股盈利由2019年去到2020年，出現66.4%的倒退。

3) 生意與盈利保障程度高︰好似一些公用股，市民基本上經濟好與壞，都要持續消費，故保障性會視為高。(六福0590︰算係一般)

管理層理性︰這個你可以睇佢市場策略，和多年年報。例如公司已經負債累累，市道又不好，還盲發展，可視為不理性。

又或者佢數年前，有些大計。但最終無疾而終，甚至朝令夕改，當經常有咁架情況，就算是不理性。(六福0590︰開店速度理性)

總負債÷股東權益<100%︰主要睇長線償債能力，你可以係BOC網站，財務比率個頁，就可以找到。我地一般要求，少於100%為之好(第7堂SLIDE45)。

但你留意翻，近年由於國際財報標準更改左。一些有較多租舖的業務，例如零售，好似六福這這類企業，我地會將個指標，調升為<150$%都接受。(六福0590︰34%)

負債的增長不過快︰你可以用過去多年數據作比較，如果負債增長較快，而負債相關的指標又明顯變差的話，你就要留意。(六福0590︰負債不多)

4) 這些係需要經驗去慢慢磨鍊出來，你預分析頭幾間，都係會有咁架情況。當你唔明，就睇翻NOTE，自己要多溫書，推論，之後真的都唔明就INBOX問我。

開頭係會較困難，但當你累積到一定經驗，你就會知道面對不同企業時，分析應該係點做。

5) 我對英磅無研究，比唔到實質意見你。但建議你除非有實際用途，否則唔好似貨幣，作為增值渠道。

在投資的角度，外匯不是最好的投資項目，因為說到尾，這些都只是一些貨幣，即是「政府借據」，貨幣中期會以週期的模式運作，但長期來說，都是貶值收場，因為貨幣只有「交易價值」，並無真正的財富價值。

而我地進行財富增值時，應該集中將資金投放在真正的資產，如物業、車位、優質股等。

6)要研究下。

7) 行業市盈率，我建議你找同業，最好係產品、質素、規模都相近的公司。你現時分析六福(0590)，你可以用周生生（0116）、謝瑞麟（0417）、周大福（1929）作參考。

依波路(1856)無論業務內容和規模，都不適合用作參考。加上過去幾年都虧損，令市盈率數據較異常，故不要將佢加入考慮之列。

你用水牛網，找到這幾間企業過去10年市盈率的4個中位數。再用這4間企業市盈率的上下限，去取出平均值，就是行業市盈率。

(即係4間企業的4個中位數，"最細"和"最大"的數字分別加起，再除以4，就是行業市盈率之上下限)

行業市盈率約為︰10 - 14倍

------------------------------------------------

Q21682：

你好，請問對退稅年金有咩評價？始終感覺上好似長時間鎖住舊錢 係唔係比較適合上左年紀而又無咩免稅額既人？

龔成老師︰

年金產品，主要係提供穏定現金流﹐較適合退休人士。

因為較年青人士，應先做好財富增值，這類產品就不太適合。

但同時，你都要睇翻佢節稅能力，同你將同一筆錢，去投資所得回報作比較。

因為投資回報始終有不確定性，而節稅金額和收取年金，係保證。若2者回報係接近，退稅年金就可以考慮。

------------------------------------------------

Q21683：

老師 你好，我手上現有1316 $13.7 有兩手, 1137 $16有1手 及圓通6123 $6.2有2手 請問可以繼續坐嗎?

龔成老師︰

持有一隻股票與否，唔好單單係睇中短期架帳面賺蝕，應從佢本質著手。就算而一刻帳面出現虧損，只要佢長線質素無變，照長線持有就可以。

你以上3隻股票，都係有質素，若你係年青至中年人士，係適合你長線持有。

耐世特（1316）本質中等，之前業績有點弱，但又唔算好差。你持貨唔算多，只係2手，照持有就可以。但因為質素始終不強，你預佢增長力之會係一般，不建議加。

香港電視（1137）業務有前景，但你要留意，佢有兩點都存有風險的。

第一，佢都會依靠人的因素，王維基成為了公司最值錢的資產，佢的想法好多，有生意頭腦。

第二，這企業現時搞網購，有增長力的，但同時存有一定的未知數。疫情過後的增長力會否減慢？故此股可投資，但不建議大注。

圓通速遞（6123）本身係一家以香港作為總部的國際貨運代理服務供應商，業務已擴展至多個國家，並在亞洲、荷蘭及北美設立了幾十個辦事處。

佢主要經營以下四項業務：空運及海運貨運代理服務、總銷售代理、配套及合約物流服務。

早前阿里巴巴（9988）入股增持，令股價大上大落，這的確會令企業有更多發展，前景正面，不過，估值方面已難。

因為這刻根本無法計算佢，之能賺多少錢，企業發展情況如果，只可以話好多不確定性，但股價就反映大部分利好因素。

因此，這股雖然有發展，但同樣股價上是有風險，相信之後的股價仍會波動。你現時只投資小注，係無問題，但要明白風險因素。

------------------------------------------------

Q21684：

Hello Sir, 我上年喺股市最旺盛嘅時間下入市, 本金80萬, 今年2月由賺20萬到今日我已經蝕咗本金30萬.

升唔識食糊, 倒跌至一個位係我覺得不能承受要止血我唯有放。而家我倉位得返50萬⋯⋯

9618 $330
1810 $25
992 $10
2269 $108
388 $515
1833 $135

請問以上股票係咪都係好股？我唔等呢筆錢用, 我其實可以長期持有, 但係長線持有係咪都要止蝕?

我知你比亞迪由$80跌落去你都冇放棄過...但係我冇這份信心

Sir, 我應唔應該放一些新經濟股轉買舊經濟股？例如1299, 5..etc

先謝謝你的解答

龔成老師︰

你同好多散戶一樣，都犯左個錯誤，就係覺得「買入價」﹐係一個神聖的指標。

記住，不要用自己的買入價作為何時沽出的指標，也不要以回本後沽貨作為策略，同時，更加不要抱著「賺了多少就沽貨」這心態去投資。

沽出是基於這股已偏貴，又或沒有前景，質素有問題，而絕非由買入價決定。

相反，若你分析該企業的係有前景，就算中短期股價波動，令你有賬面虧損，我地都唔應該沽。

你以上持股，都係有質素。但有個問題是，你太集中係潛力股類(除了聯想0992，其餘都係潛力股)。

佢雖然有增長潛力，同時風險都較高，不宜持有過多。

若你係較年青，潛力股可佔約5成，餘下應用以下平穏增長股。但若你投資經驗較淺，潛力股比重，要再調至3成以下。到你學到一定投資知識，才慢慢調高。

未來時間，你就要加大翻平穏增長股部份，令組合更平衡。

平穏增長股：盈富(2800)、金沙（1928）、恆基（0012）、港鐵（0066）、友邦(1299)、平安（2318）、粵海（0270）、領展（0823）、希慎（0014）、太古地產（1972）、長建(1038)

匯控(0005)只係收息股，無乜增長力，如果你係較年長或者好保守，都可以加入佢。

現貨要否沽出部份，去換碼至平穏增長股，要睇翻你組合大小。如果金額較多，你可以沽出部份換碼。

但若金額較細，可能每隻只有1,2手，咁你照持有就可以，用新資金去令組合慢慢回復平衡，就可以了。

------------------------------------------------

Q21685：

龔成老師你好，本人女性今年32歲, 穩定月入6萬3. 戶口僅保持10萬儲蓄應付不時之需.

以往旅遊購物月月清, 最近終想通生活目標, 學習緊斷捨離多儲錢增值自己

經朋友介紹認識你, 希望學習投資重新出發

背景:
資產:3年前8成按購入5M新樓
固定支出28k(供樓,家用,租金,保險)
日常支出希望維持7k

長遠目標:
希望可以5年內換樓

現在目標:
想學習穩定增加資本, 等待時機買dream house (10M)

本人BB班, 過往無投資經驗或概念, 完全唔識股票; 希望得到老師指點初部方向, 建立action plan 一步一步增加財富, 謝謝你。

龔成老師︰

首先，你要改變以往不好的理財習慣，你試下每日記低自己每項支出，再睇翻有無邊D係無必要，盡量空出多一點資金，去做投資增值。

你現時有明確目標，就係細屋換大屋。由於你已有一間物業，我地現在要做的，就是透過優質股，去幫你累積一筆資金，達成你換大屋目標。

你可以選擇一些「平穩增值股」+「潛力股」作投資目標。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄，另一半就先儲起架策略。

由於你投資知識不高，因此可較集中在平穩增長類股，至於潛力股，只宜小小注。此期間，你最好是努力提高投資知識，才慢慢增加翻潛力股比例。

餘下現金就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

到5年後，你可以慢慢套現股票，去實行換屋大計。

但緊記，我地財富組合，唔好偏重係個別資產類別，要平衡，樓和股票都要有。因此你換樓時，唔好股票盡沽，要留有一定數量，可以用來持續增值，才算理想。

------------------------------------------------

Q21686：

老師好，我而家最主要係糾結好唔好買樓，如果買嘅話幾時買，買咩價位嘅單位好。

今年30歲，月入9萬，和父母住。每月支出1萬至2萬。

現金儲蓄 210萬左右，強積金27萬

投資方面︰

大部分2800，有82萬左右

最近加多咗啲水桶一，加埋大概50萬左右（不過好似有啲心急咗應該分細注啲注入）

2800 - 平均價 23.2, 29000股
3188 - 平均價 60.1, 1000股
1810 - 平均價 24.9, 5200 股
1177 - 平均價 8.31 , 13000 股

788 - 平均價 1.12 , 80000 股
0027 - 平均價 65.2, 1000股
388 - 平均價 451, 100 股

遲啲諗住加埋美股 台積電。

而家亦都開始做緊月供：銀河，港交所，小米，中生 每隻5000蚊

買樓方面，唔急住自住，可能都係當投資+- 收租

自己一兩年後亦都有機會想搬出嚟租屋住或者住返買咗嘅appartment， 不過我就係度諗，買樓咁麻煩又要交差餉管理費，可能仲要比錢裝修。

到底對我嚟講呢個係唔係一個合適嘅投資呢? 如果係嘅話我咁嘅情況應該買咩類型嘅單位好呢? 定係留返啲錢遲啲買股票好?

龔成老師︰

我地投資，除左要選擇一些適合自己的優質資產外，組合的平衡性，同樣都係好重要。

若你無實際需要，我建議你先同家人同住，節省更多資金用作投資。若你無自住急切性，可先從投資角度去考慮，現時股市值博率相對樓市較高，加上你己有一間appartment，我地應先從股市這裡入手。

以你30歲計，投資應以增長為主。你現時持有股票，和月供計劃，大致上係可以。

但月供上，有少少偏重係潛力股(1810, 0388, 1177)，風險會稍高。未來可以加入一些好似盈富(2800)的平穏增長股，令組合更平衡。

另外，我建議你每月儲蓄最好可以做到，係收入一半，即係$45000。其中$25000作月供(加多一隻$5000平穏增長股)，$20000儲起。

平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、領展(0823)、希慎(0014)、太古地產(1972)

現時大市只在合理區，現金和股票，最好各一半。你現有資金可以用多少少入市(美股、台積電、港股都可以。)。餘下的資金，就等大跌市才動用。

至於物業，現時香港樓市係合理區頂部，投資價值未算好高。但若你此期間，發現一些有質素，又平宜的旬盤，你都可以考慮用現有資金入貨，之後放租。

因為，我地長線財富組合，唔可以偏晒係股票類，都要加入物業類，令組合更平衡健康。

但由於現時物業值博率不高，你可以集中股票先。而買邊類物業，我會建議初階投資者，先從住宅開始。

若資金較少，可以先入手較細單位(但最好都有300呎以上)，但必需要有質素和投資價值。你可以睇我本<5年買樓4步曲>，會對物業投資，有較完整解釋。

------------------------------------------------

Q21687：

龔老師你好，我30歲，剛在美股損失了很多，差不多70%身家！現持有︰

941*47蚊入
6618*160入
939*6蚊入

現打算月供2800 和6818

現金只餘下數萬元！

你覺得可以嗎？還有機會番身嗎

龔成老師︰

係而個時候，你唔好先諗翻身問題。你要先想清楚，美股出現重大損失的原因。

美股雖然近期係較波動，但不至於7成上落，所以你投資技巧和方法，一定係出左核心性的問題。

記住，我地買入一隻股票，就等同買入一間企業，一定要知道佢質素、行業前景、財務狀況等，才去考慮否投資。

當我地確認係值優質股後，我地會用平貴定入貨策略，並長線持有。而唔係做短炒，去賺差價。

更加唔好用衍生工具，或者槓桿，因為好難玩，個風險會好高。

你現時持有股票，都係質素。但中移動(0941)和建行(0939)只係收息股，增長力唔會太高，以你30歲計，有點保守，建議不要再加注。

至於月供方面，你可以投資「平穏增長股」和「潛力股」。你每月5成儲蓄，其餘先儲起，用一邊月供一邊儲蓄的策略。

你所選盈富(2800)係可以，但中國光大銀行（6818）都係收息股，唔係咁適合。

選股上，你可以投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

潛力股可選安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）。但佢地波動性和風險會較高，你要自己平衡。

你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

到你有一定投資經驗﹐潛力股比重可以相應調高，佔組合約3-5成。

餘下的另一半現金，我地就等機會，當大市出現較大回調，就加大力度掃貨，然後作長線投資。

最重要係，你要努力學習正確投資知識。只要你能運用正確投資知識和技巧，長線回報一定會唔錯。

而一刻你可以先做月供，但你再加大投資前，要先了解過往失利原因所在，才好再投入更多資金入市。

------------------------------------------------

Q21688：

龔sir你好，我是一個新手，想試吓買少少投票賺少少外快。我聽別人介紹買＂美團＂但不知從何入手，求指引

龔成老師︰

首先，你要清晰一個好重要的投資概念。我地投資股票，其實等同投資一間企業。希望透過其自然增長，以達至財富增值的目的。

所以，我地投資一定係長線(3-5年，甚至更長)，而唔係短期炒賣，去賺差價。

美團點評（3690）有潛力的，過往一直虧損，到近一年，開始有正現金流，這是一個實質的利好因素，因為之前一直在燒銀紙，現時初步見到成效，不過，估值的方法好虛無，因為現時的市盈率仍過百倍。

如果有利好消息，佢可以上好多，但如果估值修正，股價可太跌。

只可以話，潛力是有的，現價唔算平，之前明顯貴，之後回翻好少少，大約合理區頂，不過，一定不能大注。小小注，是較好的做法。

------------------------------------------------

Q21689：

龔成老師，你好，最近在facebook發現到你的專頁， 發現你回答讀者問題 提供的意見務實而有用， 非常欣賞 。希望你也可為我提供一些意見

本人32歲，未婚，與家人同住，沒有租樓壓力

月入22000, 擁有積蓄70萬。

一路以來都沒有意識到投資嘅重要，只係識儲錢擺銀行。 直至最近意識到錢擺銀行,遠追不到通脹。

直至上月開始學投資，由於好多嘢都唔識 同唔了解，所以暫時都係偏向保守 型投資。

1.)我放咗三十萬在銀行做咗個守約儲蓄保險計劃,年期8年

8年後可拎到38萬x，平均年利率3.6厘

請問老師你認為呢類型產品做得過嗎?定還是 只年期長回報少?

2.) 想放十萬 在股票市場,暫時手持:

中國移動一手
香港電訊一手
盈富基金一手
中國銀行3988一手
二南方納指500股
(啱啱投資就遇著跌市😅)

請問以上嘅組合可以嗎 或有冇更好的建議可供參考?

3.) 另外想投資15萬 到保險公司購買基金或 月供 盈富基金/voo

請問老師你會比較推薦哪一樣?

我希望呢15萬嘅投資係比作一個中長線嘅儲蓄

非常感激， 期待你回覆

龔成老師︰

1) 這類保險產品，係穏陣，但增長力好弱。持有太多，會拖慢左你財富增長力度。

你若真係想保守點，持有係可以，但金額上要作出平衡。

2) 當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時32歲去計，應以增值為主。中國移動(0941)、香港電訊(6823)、中行(3988)主要係收息，增長力唔高，不宜持有太多。現貨可持有，就不要再加注。

二南方納指(7266)係追蹤納指表現，納指升1%，佢會升2%。但相反，當納指回調，你架損失會係雙倍。這類槓桿ETF，我唔建你用，風險太高。

若你想投資納指，可以投資美股Invesco QQQ Trust(QQQ) ，是追蹤納斯達克100指數，會較適合你。

將來時間，你可以投資「平穏增長股」和「潛力股」。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

3) 3者都可以，但由於基金一般都有一定收費，長線拖低你回報。除非你肯定佢長線回報，會明顯優於大市，否則你投資盈富(2800)或VOO，會較為理想。

但留意，現時大市只係合理區，未到好平。資金一定唔可以盡用，而且係要分注咁，慢慢入貨。餘下資金，就等大跌市，才出手入平貨。

------------------------------------------------

Q21690：

Hello龔sir，我睇咗你本“股票勝經”，都成日睇你Facebook page嘅video同解答網友投資問題，穫益良多，多謝你！

我呢排都買咗少少“安碩恒生科技”3067嚟長線投資。想請教吓，你點睇“華夏恒生生科”3069，同3067相唔相似？係唔係長線投資嘅好選擇呢？

龔成老師︰

華夏恒生生科（3069）主要係追蹤恒生香港上市生物科技指數之表現，係一隻不錯的ETF，值得長線投資。

指數包含51隻成份股，當中有「藥品」、「⽣物技術」等公司。較為人熟識的，有藥明生物（2269）、京東健康（6618）、中生（1177）等等。

隨著人口老化和人均收入增加，對優質醫藥的需求只會有增無減。此股都有質素，可作長線投資。但你預佢會較波動，最好用月供模式儲貨，並長線。

但留意，華夏恒生生科（3069）和安碩恒生科技(3067)都係潛力股類，風險會較高。

假設你算係年青，佔5成左右好了。若你投資經驗較一般，比重就要再下調少少。如果你係接近退休之年，這類股票風險太高，就不太適合你了。

------------------------------------------------

Q21691：

龔成老師，我有個問題請教一下，我是澳門的，我打算一年半後結婚，現在和家人一起住，結婚後大機會和老婆家人住，

我比較偏向買鋪位，但可能要結婚後才夠錢，我是否應該在結婚前先用了青年首次置業先買個唐樓，到之後再用唐樓換鋪位？

結婚費用我工作一年半是完全足夠的，買唐樓首期現在是足夠，但鋪位就不足夠。

龔成老師︰

你都可以用這個方法，以資產追資產模式，去先買唐樓，再增值後轉買舖位。

至於澳門的青年首次置業計劃，其實我唔太清楚具體情況，細節位未必好清楚。

但首先，你要睇翻這唐樓是否有質素和投資價值，唔好純粹因為個價你可以承擔，就盲目出手，最緊要睇佢升值潛力和租金回報率，是否合理。

同時間，你要考慮你用左這個首置機會，你將來要自置自住居所時，就不能享受高成數優惠。

另外，投資舖位，對投資物業技巧要求較高。若你這方面經驗唔係太多，你就可能要提升這方面知識，才出手會較好。

若不買唐樓，你都可以考慮用優質股，去為置業資金增值，都係一個可行方法。

至於結婚資金，你就不要用來投資。因為只有1年半時間，用來投資增值，風險會太高，最多只宜作定期存款。

------------------------------------------------

Q21692：

龔成老師您好，今日想主要問問好多人心目中既股王 騰訊 (700HK)。

我有睇過有人問過700而龔成老師覺得依家係係合理區頂部。騰訊現時PE為29到，以historical 10年PE average 35到，我用個PE range 24.5-52.1黎睇，

依家已經俾過往既十年黎講相當較平而股價區會由500-1050所以覺得580已經相對比較便宜，所以想問問龔成老師咩睇法?

同埋龔成老師每次都基本上會叫人留有現金，係大跌市既市時候買入優質既股票。騰訊由高位770跌到依家580差唔多已經跌左25%。

想問下依家係唔係到龔成老師成日講既大跌市，而呢個係買入良機長線持有?

同時都想問下之前都係百度220蚊，姐係由高位跌左差唔多4成個陣買入打算長線持有。

因為百度仲下跌緊到依家差唔多175蚊，上次220蚊買入又合乎龔成老師” 大跌市”的睇法嗎?

謝謝回覆!

龔成老師︰

騰訊（0700）本身已經好大好大隻，要再高速增長並不容易，雖然手遊的長遠發展仍會不錯。

但要帶動這股倍升，相信並不容易。所以，我地唔可以完全參考過往數據，要因應現有情況，作出合理調節。

當你運用過往的市盈率作估值時，要留意翻環境與企業的情況有無改變，當一間企業有較高增長時，市場會比佢一個較高的市盈率，而騰訊5-10年前，仍處於好高增長狀態，到了今天，是中高增長狀態，估值當然會有調整。

此股相信依然有唔錯增長力，但唔會去到以前咁高。而價算係合理區頂，如果你去到平，你預跌多3-4成，才算平宜﹐故現時未稱得上係明顯買入良機。

百度（9888）有質素，有獨特性，長遠發展不差。

佢係全球最大的中文搜索引擎「百度」的營運商，係內地用家搜尋資訊主要對口，用戶規模突破10億，百度App日活潑用戶超過2億，多個指標都處中國第一。

百度在規模和質素上，一定係有。

但我地唔好單純用比較現價和上次高位距離，因為早前科網股被熱炒，不少相關股票，都因而被大幅推高。

我地應用翻企業本身價值，去衡量佢現時價格水平，是否合理。

佢雖然已跌到$18X，但唔算係平，只是合理區頂至略貴水平。但長線有增長力，若無貨，現價小注投資係可以。

------------------------------------------------

Q21693：

龔成老師，一直睇開你嘅理財資訊，本人34歲，持有現金50萬左右，偏向增長組合。因為最近股市比較波動，所以想問吓老師意見。現持有以下股票：

1810 200×23
6618 350×130
700 600×100
883 6000×9.3
1928 1200×32.9

請問咁嘅組合係唔係有啲雜亂無章？想再增持1810同700，亦想加入823、981同2382，但未知合理價位同時好似業務有重疊。多謝老師嘅時間

龔成老師︰

你組合唔算好亂，整體上都有質素，係合你長線持有。

中國海洋石油（0883），質素都算有，但不是最高質類別，佢對油價較為敏感，所以，如果長遠油價向上，佢都會增值的。

雖然佢都有一定的規模及質素，但卻不是最高質素的企業，這是由於佢地的產品自主力較弱。

石油是商品，當中沒有差異性，佢地要將石油賣出，只能跟國際油價，這令佢地處於被動狀態，沒有價格自主的能力，這令佢地的獨特性有限。

這類商品企業，都可投資，但就要明白不是最高質的企業，不宜持有太多。建議你沽少少，換至其他優質股。

中芯國際（0981）、舜宇光學科技（2382）、騰訊（0700）現價算係合理區頂部，小米(1810)則是合理區頂至略貴，領展(0823)算合理區中上部。

這些股票，若你無貨，而價可以首注。但有貨者，建議再等佢有明顯回調，才出手。

小米(1810)、舜宇光學科技（2382）和中芯國際（0981），行業性質上有重疊，加埋不要高於組合3成。

另外，你持股和目標股票，不少都係潛力股，佢雖然有增長潛力，同時風險都較高，不宜持有過多。

以你34歲計，潛力股可佔約5成，餘下應用以下平穏增長股。若你投資經驗較淺，潛力股比重，要再調至3成以下。到你學到一定投資知識，才慢慢調高。

未來時間，你就要加大翻平穏增長股部份，令組合更平衡。

現時大市在合理區，你50萬現金，可以用多10-20萬，以分注形式入市。餘下現金，我地就等大跌市機會，才出手掃平貨。

------------------------------------------------

Q21694：

龔成老師你好，我最近經常睇你fb專頁同書本，裡面學到唔少，宜家想付諸實行！

我宜家22.5歲，工作左兩年半，現時人工26k，每年大概會加1.5k，開支方面: 每月家用10k, 儲蓄保險每月供款2.5k （為期五年，已供了兩年）,

還有每月日常消費大概3k，剩下用作儲蓄/投資，我目標係二十五歲時有一個穩建成長及帶來現金流的投資組合，

而帶來嘅現金流則可用作再投資、儲蓄或支付日常開支, 例如每月交通費。

我本身對股票幾有興趣，炒左股一年半，雖然會自己研究下圖表、聽下財經節目，但係暫時都係輸錢，加上工作關係唔可以經常睇實個市，而且有時心理壓力都大，

因為有時啲股票好波動，可能幾日已經輸一兩成，所以我想改變下我現有嘅投資方法，以下係我嘅方案：

1. 自行睇位分注吸納科技ETF 3067, 剛在16.5入了第一注，每跌10%加注

2. 月供股票，每月供款金額約$10000
從以下每個板塊挑選一至兩隻月供，每隻供款金額約$1000-2000

- 穩定增長+收息為主 （第二個水桶）
消費板塊：1044 上月已開始供, 想加914可以嗎？
內房板塊 ： 813 or 2007 （二選一）
金融板塊：需要包含嗎？如需要，心儀2628 or 659

- 高增長 （第一個水桶）
生物醫藥板塊 ：1833 + (醫藥ETF?)
可再生能源、環保板塊: 未有特別心水（916？6865？ 586？可以嗎？）
物管板塊: 823 or 3319 or 1821 (三選一至二）
科技板塊：981，1810，2382，9988，9618 （五選二至三）

每隻股嘅供款金額應該會一樣（e.g大概每隻$1000）但係有些板塊會供多於一隻（例如科技、消費、醫療，因為我較睇好這些板塊或者裡頭潛力股較多）

所以7個板塊投資嘅金額唔會係平均14%（100÷7），反而有啲佔比會重啲，有啲則輕啲

想問這個投資方案可以嗎？

還有我現持有以下股票，打算將部分分批賣掉，套現出來的現金打算儲下來留在跌市時分注吸納或用在月供

6186 2000股 買入價 24
2318 1000股 買入價 50
6865 1000股 買入價 34.5
285 500股 買入價 43.85
7226 1000股 買入價 9.96

189 2000股 買入價 7.5
6601 1500股 買入價 9.2
6049 200股 買入價 69
6110 1000股 買入價 12.6

2333 500股 買入價 23
3319 250股 買入價 35.2
9888 50股 買入價210

想請教下你，謝謝

龔成老師︰

你過去的投資方法和理念，都唔係咁正確。

我地投資股票，其實等同投資一間企業。希望透過其自然增長，以達至財富增值的目的。

所以，我地投資一定係長線，而唔係短期炒賣，去賺差價。因此，我地唔會係用睇圖表，這類技術分析方法，更加唔需要成日睇住個市。

另外，當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時22.5歲去計，是財富增值的黃金時期。

你重點唔係要現金流去再投資，而係直接集中係一些較有增長力股票，去累積一筆財富。

"保險"只係理財中防守部份，買足夠保障就可以，增值可以留比優質資產(如優質股、物業等)去做。買太多，只會拖慢你財富增長力。

現時，你自行睇位分注吸納安碩恒生科技(3067) ，這方法可以。

月供策略上，你可以投資「平穏增長股」和「潛力股」。現時大市只在合理水平，除了月供外，每月都要留有一定資金，等大跌市才掃貨。

選股上，你上述板塊都可以。但內房負債較較高，不宜持有太多。而且一些不確定性較高的股票，都唔建議用來月供。

以下是一些較有質素的月供組合，你可以從中參考。

你可以投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

潛力股可選安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）。但佢地波動性和風險會較高，你要自己平衡。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

至於持股方面，如果有質素，我建議你長線持有。若你想留一些資金，捕捉大跌市機會，可以新資金來做。

怛留意，ＸＬ二南方恒科（7226）產品之投資目標為追踪恒生科技指數每日表現兩倍（２ｘ）的投資業績。

雖然我長遠認為，恆生科技指數正面，但中短期可以較波動，由於這基金有槓杆，就會令價格更加波動，其實有風險。

我會較建議投資無槓杆的恆生科指ETF（3067），始終較好。

東岳集團（0189）、滔搏（6110）質素中等，唔建議持有太多。

朝雲集團(6601)不確定較高，不宜持有太多。若現時只佔你組合一小部份，可以持有。

------------------------------------------------

Q21695：

老師，我這次的置業目標，計畫的使用的方法會較為特別，我想和你分享一下。

我即將39歲，月入＄29000, 已婚，有1小孩（即將6歲）。

我有1個物業（屯門兆康苑，已補地價），管理費＄700, 做按揭時是自住的，現時已出租（月租＄10500），按揭利率為H+1.23%, 2019年轉按了，轉按時銀行估價540萬，我借了6成，供款期為30年。此物業我在2010年買入，當時樓價115萬，做7成H按揭，一直收租至2015年結婚後自住。

我太太即將36歲，月入＄36000, 2019年購入屯門新樓御半山自住，樓價666萬，做6成按揭，按揭利率為H+1.23%, 30年供款，管理費＄1900.

現在我打算購置第3個物業作投資（名義上是我外父自住用途）。

我外父和外母現聯名持有1個私樓物業（深井碧堤半島）作自住（已完成供款），並持有1個該屋苑的私家車位（已完成供款）。

他們本身是舊制已退休的公務員，有長俸，外父（即將61歲）的長俸較多，有＄30000, 我跟他們談過我的想法，但要他們將現聯名持有的物業改為獨名持有（外母持有），然後當我看中物業時，我外父便可用首置名義（投資）入市

若他能通過壓測的話便可做到9成按揭（樓價800萬或以下），30年供款，供樓戶口要用他名下的，直至按揭總額還款至低於6成方可改為我名義的戶口供樓，當然，所有相關費用，包括供樓會由我承擔。又假設我外父的長俸過不到壓測，也可加我做擔保人，但便只能做8成揭揭。

這樣，我便能合法地做到我想做的。這個物業會由我打理一切，雖然名義上不是我的，但我太太是獨女，就算當我外父、外母百年歸老後，物業仍會被視為遺產留給我太太。

這第3個的物業（嘉輝花園）我會出租，實行以租養樓。

龔sir, 對於我的計畫，不知你會有何評價。

而我和我太太預計會60歲退休

龔成老師：

方向不是不可，但有幾點要講翻。

第一，你地（我以整個大家庭作單位），將會持有4個物業（連同你外父外母聯名那物業的計），在整個財富配置中，其實出現了集中風險。因為我地投資，其中「平衡」都是好重要的，加上香港物業增長力最高的年代過往，我預期往後10年、20年，將會是平穩增長年代。

因此，如果從財富配置的角度，投資其他項目的回報，以及對整體財富的平衡度，將會是最好的。

第二，當涉及的人物愈多，就愈容易出現問題，始終大家都會有不同意見，每個人都是獨立個體，因此，如果日後有甚麼問題出現，會對你地的關係有所影響。

第三，壓力測試，我都唔能夠講得好清楚，佢是否能過關，你最好問清楚先好進行。

第四，買樓有一個好關鍵因素，就是「供得起」原則，如果樓市及租金下跌，你地的防守力如何，如果有一段時期租不出，你地的資金是否頂得住？

至於大方向，其實可以，但你地要明白上述的風險，大家都有共識後，先可以進行。

至於嘉輝花園，可以的，有質素。

------------------------------------------------

Q21696：

老師。其實968呢隻股似唔似資源股，價格比市場影響。因為記得上堂老師不太建議投資呢啲股。

龔成老師：

有少少影響，因此在價格自主能力方面，未能去到好強。不過，我地要睇翻佢本身有無技術，如果擁有技術的話，其實佢能否以較低成本生產到產品。

同時，能生產到較高質的產品，這就會產生了產品價格的差異性，反映企業有質素。就能跳出課堂所課，無法加價的問題。

因此，你在分析時，要小心分析佢的技術，是否行得較前，以及往後的技術發展如何，這是決定企業有無質素的關鍵位。

------------------------------------------------

Q21697：

老師，多謝你回覆。其實我由細接觸好多活動都揾唔到自己真正興趣，直到大學期間睇左富爸爸本書改寫左我人生同觀念，就瘋狂睇其他理財投資書，開始決定長遠目標和寫成功日記，我可以樂此不疲連續睇書，就諗呢個係未我興趣但又害怕(當時中係由窮人思維變緊富人思維中)。

直到網上遇到你，你完完全全教我地點樣實行，開始接觸股票，睇你著作，呢個時侯我已經好肯定咁揾到自己興趣(想成為專業投資家)同人生價值，生活習慣，思維幾年內睇到自己變化好大，亦同身邊人分享理財重要性同推薦你網站。

見到佢地有改變 自己好滿足同開心。我想激動分享既係你地好偉大！啟蒙左我，來來回回咁多年我終於揾到自己目標，好開心！

我亦知自己揾唔到全職一時既低落，調整心態，唔會花時間諗(曬時間)，自己能力范圍亦會幫助其他人，相信你同其他作家都希望會見到呢個乘的效應！好啦！

知道阿SIR貴人時忙，我知我多野講，但太激動所以想同你分享，感謝你同其他作家，感恩遇到你地！

龔成老師：

其實你自己都好明白方向，只是一些短期問題。

你知唔知，決定一個人是否成功，不是睇佢順境，是睇佢逆境，如果一個人要對逆境，都能夠保持正確方向行，做出一些對自己長遠利好的決定，這類人成功，只是遲早的問題。

加油啦！

------------------------------------------------

Q21698：

呀sir 我現家重整左股票組合

9988@242 2手
285@47 3手
1810@26 5手
1211@178 1手

我草緊錢準備跌市加倉，但如果到時資金有限，我加倉次序應該點排好，比亞迪其實好想加先，因為得一手，唔該晒呀sir幫我解答

龔成老師：

你所持有的，都是有質素的股票，可以長線投資，無問題，最緊要唔好太著重短期股價上落。

另外，你出現了集中風險情況，同一系的公司，不能太多。

同埋，你整個組合都是潛力股，你應該加入平穩增長股，去平衡整個組合。

所以，你加倉時，應該加入其他。如果想加入上述的股，要跌更明顯下跌才出手。

------------------------------------------------

Q21699：

你好龔SIR，小弟剛睇完《股票勝經》，而家睇緊《50優質潛力股》，暫時只買了幾隻你比較常推薦的潛力股(2800, 0823, 0012, 1928, 3319, 3918)每隻目前都係入唔1-2手

部份都有輕微升幅，部份好似因為之前美國提及是否加息而出現跌市，所以有下跌，想請教一下點解只係討論美國加息與否，都會對股市咁大影響，小弟只了解過對樓宇按揭利息有影響，如果美國真係加息，是否會做成大跌市？

另外想問一隻股票，虎都(2399)早前見阿里巴巴同虎都旗下公司合作，這隻股票是否有潛力？但見最近股價一直大跌，這股值得投資嗎？

希望龔SIR可以提供意見，謝謝

龔成老師：

你上述持有的股票，都有質素的。

可能你會見到股價之前升，之後跌翻，但其實唔需要太過理會。

至於投資市場，一向是以一個「預期」的模式運作，即是說，不是發生了才反映，而是預期之後點發生。

美國加息，理論上會對樓價有影響，會下跌，因為供樓的成本增加左，但要睇到時加多少，如果加幅不大，根本無乜特別影響。

加上香港樓的供應不足，需求大，因此樓價下跌根本有限。

至於虎都（2399），擔心佢炒作多過實際，唔好比一D表面因素影響，要睇企業的實際發展。暫時唔太建議投資，風險高。

------------------------------------------------

Q21700：

龔sir, 你好，想請教一下我有2百萬想放入股市買入一些收息股來做被動收入，請問有什麼股票現在可買入/介紹？

而我會分開十期，每月買入二十萬元股票，這個方法好嗎，還是分開五期，每期四十萬較好？

我現年46歲，打銀行工，有供緊樓。想將這些被動收入補償供樓利息的支出和增值。

下列是而家月供股票

$2000 - 66 （平均價 42.77）
$4000 - 2800 （平均價 26.12）
$2000 - 1928 （平均價 32.59）

我仲想問吓，呢$2,000,000嘅投資應該買入幾多隻股票呢，五隻會唔會太多？我大概希望有 5% - 7% 嘅收入。謝謝

龔成老師：

你46歲，可投資平穩增長股，加收息股，你不用100%投資收息股，因為你這年齡仍有財富增長力。

我會建議你分10期，每次20萬，分12-18個月進行，慢慢分注投資，能將買入價平均，你可以投資5-10隻股票。

你可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

如果你能承受到風險，有些更有超過8%、10%的高息股，但股價就略有風險，要自己衡量，佐丹奴國際（0709）、中石化（0386）、互太紡織（1382）等（記住，股價略波動，只能小注）。

現時月供的，可以保持，長期進行就得。

要留意，你不能用盡所有現金，要同時留有部分資金，等機會投資。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。