今日單獨去探劉頴匡，佢精神好好，但就真係好熱好熱，熱到寫信都會浸濕信紙。講起喺獄中嘅佢俾外面自由嘅人狙擊，佢都話至少引起討論，討論就可以帶來反思，都唔係壞事。 我都有精選一啲留言讀俾佢聽（例如呢個post入面嘅cap圖），佢都聽到哈哈大笑，笑下笑下，咁又過咗15分鐘。不過，佢特別關心 陳運通 Mozam 尋日比國安上門搜查，佢話擔心到全晚都瞓唔到覺，好驚好驚，是以按佢要求，我嚟緊都會安排阿通插隊探佢。 今日我帶咗佢要求嘅《人間失格》入俾佢，正正係阿通及助理幫手搵，我之後再去書局同佢買日文教材，準備再入俾佢。 好多人話，留喺香港做乜，仲有乜嘢可以做？只能夠話，恭喜你，你好幸運可以完全唔需要承受苦難，可以咁輕鬆地講出呢句。 對於呢啲人黎講，「手足」只係一個concept，係遙不可及嘅somebody，甚至只係新聞、被捕數字。但對於我哋來講，手足係我地嘅朋友、至親、愛人。即使有「能力」走，又點可能喺呢個時候丟低為香港受緊苦難嘅人？點有可能做得出？ 其實好多人仍然願意留喺香港，就算乜都唔做，至少支援、鼓勵一下身陷囹圄嘅人，為抗爭而犧牲未來、犧牲自由嘅人。除咗香港，呢個世界上冇可能有一個地方係香港，如果「邊度有香港人，邊度就係香港」，咁「邊度有中國人，邊度就係中國」，移民去中國做乜😀 要走要留，真係悉隨尊便。但請明白，對於大部份平民百姓來講，移民（唔係有案在身要走難嘅手足）去做其他國家嘅人，就真係無辦法再點樣參與香港嘅公民社會，等同放棄。移民係你哋個人嘅選擇，可能係為咗下一代或者家人嘅生活，但唔好自欺欺人，如果真正融入左人哋嘅國家，去到第二代、第三代，就唔會再係香港人，除非你去到人哋度做蝗蟲侵略人哋文化資源。 為咗手足，除非我喺度要面臨即時生命威脅，如果唔係我唔會走，尤其是艱難嘅時刻更加唔會走。講呢啲說話/見解，可能會督破部分人嘅期望（覺得在囚手足一定要樂觀正面、多做運動、見字飲水），令你地睇到好唔舒服，亦都會有負面嘅批評聲音。但事實上，坐監就係咁唔舒服，就係會諗咁多嘢，就係會期盼出面嘅人支援佢哋。你哋再唔舒服，都係喺冷氣房對住自己部手機唔舒服，都係舒服過真正受緊嘅人。 所以由今日起，我唔會夾硬粉飾，劉頴匡嘅patreon將會post 一啲比較真實，相對負面、抑鬱、抱怨嘅信件內容。如果連唔開心嘅資格都冇，如果喺獄中表達真我係會得罪人、令人討厭佢鬧佢係鬼，然後又唔課金唔剩，唔緊要㗎，我養佢。 www.patreon.com/ventuslauwh