虎紋小繪本—
了解不作心肺復甦術的意義—放手是最後的愛

最近常常見到原本Good Past Health的公公婆婆
突然打橫咁由R房俾姑娘醫生Intubated地推入病房
身上打滿各種天地線
上至由口入氣管喉、強心藥、鼻胃喉，下至尿喉。
好多時候做姑娘一見到佢on住30ml Dopamine, Adrenaline，個BP都唔升，你就知佢可能要「搓」！咁的情況當然第一時間通知當值/主診醫生，醫生會同家屬講述病人情況及可以預期到的急速轉差！
到這一個moment，公公婆婆身體的姨媽姑組三叔六嬸都會圍晒在身邊，真正關心病人只有小數直系家屬，多數是在「看戲、食花生」！為什麼咁講？
因為當姑娘醫生忙到踢晒腳想幫病人做多D護理，就會有理「屋企人」阻住晒條路，擋住D Vital signs，每十五分鐘會有唔同屋企人出黎問病情，叉撚住你，sorry，係challenged 你！
到病人差到要「搓」的一刻，醫生由於一早同屋企人打左底，家人知道病人會變差需要急救去維持生命，但醫生認為急救只會為病人帶來搶傷、延長短暫的生命、甚至苟延殘喘。家人可以決定同意醫生決定的「不作心肺復甦術.DNACPR」，讓病人在有最大限度藥物支持、護理底下離世。所有現有維持生命的東西不會因為你同意DNRCPR而取走的！

在依個病人生死關頭，好多屋企人是接受唔到、唔捨得放手、唔想放棄所有千萬分之一的機會，希望希奇蹟的發生。

有一部分人是做不到這種沉重的決定。現場的親戚就會「加鹽加醋」，例如：「年三十，唔吉利呀，要救！要救呀伯過年關呀！」「起碼過左新年先過身喇」「點解唔救呀！可能有希望呢！」「你點解咁惡毒連自己老公都唔救架？」
所以好多直系家屬（next of kin)就會被動搖，害怕承擔這個千夫所指的罪名，所以真係多得班親戚唔小！因為唔係切膚之痛、果個唔係你老豆老母呀爸呀媽，你當然可以輕易決定要「搓」佢！

每次心外壓後，打夠數大A(1:10000 Adrenaline)都救唔起，醫生會宣告病人死亡。往往去到這個時候，最親的親人望著死後的病人，心口凹了一個坑，四肢腫晒，果種心痛是記一世的！

所以如果連醫生給予家人一個選擇，唔好唔相信我地，質疑我地唔想幫病人，因為我地唔想令病人受太多不必要的苦！我最憎最害怕的就是家屬不信任醫護，往往講出「唔救佢地咪唔洗做囉」「你簽左唔救佢會咩都停晒咩都無架！」，太無知的想法會令醫護滿腹熱誠化為廢水！

故事每天都發生於病房中，
突然地生死永隔，
好多人都接受不到這節奏，
可是，
生命正是無常不規而美麗，
善終也是種福氣。

虎紋姑娘
19-2-2017