【龔成問答信箱】（Q22061-Q22080）

Q22061：

龔sir, 本人52歲，早年對股票市場沒有深入認識，便跟朋友一起買入股票，97年全部變晒蟹貨，朋友話同佢鬥長命，所以全部都沒有放出，

但有些已100合1，變為單位數股票，想放出也蝕手續費。

最近這兩個月開始睇你Facebook, 覺得應該要整合一下手上的股票，不應採取放任不管態度，要選擇一些適合自己年齡的投資組合。想問以下股票是否應全部放出？

0604(深圳控股）
0622(威華達控股）
0697(首程控股）
0759(CEC國際控股）
0887(英皇鐘錶）

0910(中國三迪）
1168(百仕達）
1339(中國人民保險）
1387(中國地利）

1466(錢唐控股）
8173(萬亞企業）
8178(中國訊息）
8311(圓美光電）

手上還有以下賺的股票，是否應繼續持有？

0354(中軟國際）
0700(騰訊）
1810(小米集團）IPO
2158(醫渡科技）IPO
6618(京東健康）IPO

睇左你facebook後，上月買入以下股票。

2382(舜宇光學）月供$2000
2800(盈富基金）月供$2000
6823(香港電訊）2000股

月入3萬，扣除開支後可儲蓄$5000，.流動資金$1,200,000. 應怎樣運用現有資金，來選擇適合的投資組合。

龔成老師︰

我地投資一隻股票，就如投資一間企業。如果你係無質素架股票，不論而一刻係賺定蝕，你都應該要沽出。

唔好諗住同佢鬥長命，因為無質素架股票，可以越跌越深，去到一個低賤的你估唔到的水平。所以要果斷，無質素就要沽出，將資金收回，用於有價值的股票身上，才是正確做法。

另外，你唔好再單係聽朋友講，或者聽消息就去買貨。

我地買入一隻股票，一定要知道佢質素、行業前景、財務狀況等，才去投資。如果你連間公司點賺錢、行內有乜優勢、點解未來有發展和增長潛力，都答唔倒自已，咁就要停一停，唔好投資住。

以你52歲計，現時月供的股票都無問題。至於，你現有持股方面。中國人民保險(1339)有質素，你可以長線持有。

深圳控股(0604)、首程控股(0697)都可持有，但質素較一般，不宜持有太多。

中國軟件國際(0354)、騰訊(0700)、小米(1810)、醫渡科技(2158)、京東健康(6618)係有質素的潛力股，由於佢地風險較高，以你年紀不宜持有太多，最多只可佔組合2成。

其餘股票，質素較弱，甚至係無投資價值，建議最好沽出，換至其他優質股較好。

未來時來，你可以用以下股票作目標，當中以平穏增長股為主力。但隨著年齡增加，慢慢增加收息股的比例。到退休時，你收息股比例，應提升至100%。

現時大市只係合理水平，現金佔比重大約3-5成。你可以睇翻自已現金和股票比重，決定是否再投入更多資金入市。若然係再入市，緊記係分注慢慢入，唔好一次入晒，以減低買貴貨機會。

------------------------------------------------

Q22062：

老師， 8367 倩碧是麻孫樂控股公司，上月見價位低殘，買一百萬股都是十一萬左右。 之後減磅兩次，仍有六十餘萬，繼續揸擔心一天瀉九成。 可以點處理？

龔成老師︰

倩碧控股(8367)集團於香港以「麻酸樂╱嫲孫樂」、「峇峇娘惹」及「泰巷」三個自營品牌經營。另外，有提供特許經營商經營，供中式麵食、泰國菜式，日本菜式及馬來西亞菜式。

此規模唔算大，營業額唔算多，而且有按年下跌的情況。過去企業多年虧損，2021年表面上係轉虧為盈。但實際上，只係公平值變動(一些會計數字，而非實際收入)會造成。

實際上，佢過去4年都係維持虧損狀況(包括2021年)。睇唔倒有乜明顯因素，支持佢近期大升。

遇到這些情況，我地就要好小心。而且企業本身無明顯投資價值，建議盡快沽出較好。

------------------------------------------------

Q22063：

龔成老師，你好呀！之前問過你有關投資股票嘅問題，因為等佢價格高啲先放，所以現在冇變動過。仍然係以下咁：

#1 2500股 $53.5
#2 1000股 $71.5
#941 1500股 $42.5
#291 10000股 $67
#3690 500股 $278
#909 8000股 $53.5

現在問題是我嘅租約差唔多滿，有現金和以上股票200萬左右。請問我應唔應該賣晒啲股票，用我190萬左右嘅錢去做down-payment 買樓，做6成按揭呢？

因為供樓同我現在租金一樣。我想買嘅係一個272呎嘅元朗開放式單位自己住，供樓連管理費會是$12000內。請問我嘅投資方向啱嗎？

因為份工剛剛做，要到出年才有稅單可以做8到9成按揭，又怕出年更貴，應該怎麼樣更好呢？ 麻煩老師解答，萬分感謝！

龔成老師︰

現時貸款息率唔高，其實盡借長線只會貶值的現金。之後，再將空出來的資金做投資增值，咁會較好。

至於明年樓價會點，無人知。但從長線投資角度考慮，你用低成數按揭，長線可以投資資金會縮細，在現時市況，對你係不利。

現時持有股票，都係有質素，長線持有就可以。

明源雲(0909)和美團(3690)不確定性較高，不宜持有太多。

另外，你非常集中係華潤啤酒（0291），佔組合近一半。記住，個別企業和行業，不要佔組合15%和30%以上，否則會有過度集中性風險。

因此，你要沽出停份，去平衡風險。

------------------------------------------------

Q22064：

龔SIR你好~~我係上年PM問你供股既建議，供左大概九個月，一開始你叫我拎5K月供真係好心痛，後來我減少開支再諗辦法做副業，真係比我做到月供5K!!!

見到有正數增長真係好開心(大概8%)!! 呢一年努力抗疫唔出街，總共儲左10零萬(拎左8萬左右投資)，自己做副業賺左萬零蚊,

雖然好少錢，拎去入左一手IBOND打算賺少少，錢搵錢呢個感覺真係好好。

加上好好運咁逆市升職，加左家用比父母，佢地又開心左～我覺得自己好適合做月供，個心好定，唔洗成日望住個市影響心情！可以用多D時間專注正副職/讀書。

本來手上有5萬左右現金，不過拎左去大學交學費， 再學埋電單車， 比我用晒了…而家無錢入市啦, 只可以月供， 不過D錢投資自己身上我覺得值得既!

未來打算加大個月供計劃！每個月總共可以儲1萬至1萬3～

而家調整緊個計劃，想問下你既意見～

1. 我應該繼續用5K月供,定加到6K?

2. 月供2800 價位約$27, 我可唔可以停左等到價位回落先再供?用筆錢供其他股票?

3. 如果已經有1810, 1211, 9988, 2158, 6618呢幾隻股票係手, 我應唔應該供3067?

9988而家月供緊, 其他暫時無供. 1810, 1211等價位低先再供. (暫時主力供823, 9988, 1177, 2638, 2800)

4. 最近考左電單車牌, 打算買車送外賣/送貨之類.（期望每月賺多$3-5K, 因為我係女仔, 第一比人話危險, 二黎比人笑我無出息, 但我唔理旁人既眼光, 我要賺錢呀!!!!)

a. 假設我手上有四萬現金:
i. 直接全數買車
ii. 兩萬蚊去分注月供股票, 留兩萬係手, 用信月卡分期12個月供車, 利息大約0.15-0.18% . 如果供股票想揀2638, 打算派息可以cover信用卡大部份既利息.

5. 思想上唔夠進取, 唔敢100%拎晒去買潛力股, 所以揀月供2638, 咁樣係咪好蝕底呀?

多謝老師花時間睇我既問題!!

龔成老師︰

現時你理財方向，都正確，要保持住。同時，你努力學習，去提升自己投資知識。

1) 如果每月係可以穏定儲到$12000，你就應將月供加大至$6000

2) 唔建議，首先，我地只會係去到好貴架水平，才會考慮減供款或停供。但現價計，盈富(2800)只在合理水平，不需要調整供款。

另外，你投資經驗不多，我唔建議你咁快自行決定調整供款策略。因為如果你調整時機不對，會大大影響長線平均價格效果，令長線回報受影響。

除非你對定平貴，係好有信心。否則一直不理價格，去長線月供，反而對你係最有利。

3) 港燈(2638)係收息股，增長力不高。你現時29歲，應以增值為主，故此股不適合你作為月供目標。

至於安碩恒生科技(3067)，你去月供係可以。只要你科技股(9988, 1810, 3067)，唔好佔超過組合3成。同時間，潛力股(1810, 1211, 9988, 2158, 6618, 3067, 1177)唔好高於組合4-5成，咁就可以。

小米(1810)現價略貴，但月供還是可以。而比亞迪(1211)現價係貴，月供最好等回到$17X才考慮。

4) 其實工作，都無性別之分。你唔洗太理別人眼光，做正確的事，永遠都是對的。

以利息率計，用分期買車，再去投資收息股，係會較理想。但你要明白，股票始終會有價格波動，有機會賺息蝕價，你要明這個風險。

另外，你都要了解清楚，這個是否真正總年息，會否有其他潛在費用，才去做決定。

5) 我地投資，除左年紀係考慮因素外，投資經驗和風險承受能力，都係一個考慮。所以，無話絕對的對與錯，重點係是否適合你。

以你年紀，港燈(2638)的確會係較保守。但要去到100%潛力股，你個組合風險，又會出現過高情況。

你可以用一半平穏增長股，一半潛力股作組合，這樣組合平衡性會較好。

平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)

或潛力股︰比亞迪(1211)、中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）、三星FANG ETF（2814）。

------------------------------------------------

Q22065：

龔Sir，感謝你在股票班最後一堂的個人分享，聽到我眼濕濕。實在太有共鳴，亦自愧不如。

我嘅成長環境同老師你有啲似，都係成長於公屋家庭，居住環境擠逼，由於長期缺乏私人空間，非常渴望擁有自己居住的房屋單位，

但礙於香港樓價高企，個人經濟能力有限，一直處於半放棄（人生）狀態。

自愧不如的是比老師你行慢好多好多步。老師在十多歲嘅時候已經定下目標，立定決心，付出超乎常人嘅努力，28歲嘅時候賺到第一個100萬，反觀現時27歲嘅自己才剛剛起步。

不智嘅我都曾經怪責父母嘅不努力，甚至抱怨不想被生下來，傷害了彼此。

現在明白父母給予自己最寶貴的禮物是生命，財務知識可以自己學，錢應該自己搵，人生掌握在自己手中，將來由自己親手構建。

當人立志成為優質股、潛力股、倍升股，定必增長迅速，回報驚人。深願能夠運用所學，日後向老師你匯報成果。

龔成老師︰

你現在才27歲，現在努力去做好財富增值，未算遲。這是你最大的本錢，只是你這刻努力，一定能完成到目標！

其實，好多外在的客觀環境，唔到我地去改變。但我地可以改變自己，調整自己的心態。

你唔好覺得不如我，我都只係一個普通人，我做到的事，你都可以做得到，只要你相信自己。

上完課程後，你就當係一個新起點。努力去為自己人生定好計劃，比心機學好理財，相信很多你過往覺得的「不可能」，都會慢慢變成為看得見的「無限可能」。

同學，加油!

------------------------------------------------

Q22066：

老師，上年開始FOLLOW你的PAGE，亦很同意要買優質企業的看法。我亦已閱讀了你的4-5本書籍，亦閱讀了格雷厄姆、彼得林區、巴菲特的一些書籍。

透過購買優質股，我曾經浮收益超過6位數，我非常感謝！

然而，今年分析了968 後，認為該股是優質，故分注入了3手，分別是15、13及12，然而卻不斷下跌，收益不斷減少，令我反思是否應該斬倉...亦令我覺得不應該持續望住股票...希望將來可以好似老師甘可以令利財產增值。謝謝老師

老師，均價13.8入了3手968 信義光能，請問是否應止蝕？

老師，一直都想入完美醫療，但見佢業績持續向好，股價亦不斷上升。想問下老師，此隻股是否仍然5蚊左右才是合理區頂？

龔成老師：

其實，你保持用「價值投資法」就得，但要留意，這是長期性的，你中短期會有好多考驗。

信義光能（0968）是有質素的股，但你犯了幾個錯。

第一，你在貴的價位買入。

第二，你每次買入價相差太近，起碼要有10%以上，如果股價較波動的類別，要差15%。

第三，你應該等回去合理區先分注加注。

第四，你唔應該因為「股價下跌，就認為企業質素轉差」。

這股可以守的，但就要耐心點，如果你持貨不過多，無問題。

完美醫療（1830）長遠有發展，本身有一定的質素。

睇翻之前的疫情，佢身處的行業受影響，但佢的現金流及財務數據都唔算差，這點可以想象到，當正常的經營環境，佢的生意一定唔錯。

加上佢的野心愈來愈大，本身有一定的技術，同時不斷將香港的業務模式複製到其他海外地區，我見佢加強了發展其他地方，因此發展不差。

這股有長線投資價值。

業績前計佢$4是合理區頂，業績後股價升左好多，雖然我之前好大機會會調高佢合理價值，不過，現價都有少少貴。

所以，如果無貨，你可考慮回少少，先小注，然後等跌多d先正式分注投資。

------------------------------------------------

Q22067：

Coinbase我係咪應該放手？

龔成老師︰

Coinbase Global Inc（COIN）雖然有獨特性，但真正的長期價值有多少，根本好難估。

佢係加密經濟技術供應商，佢從平臺上的交易中產生大量交易費用的凈收入，以區域來講，佢大部分收入來自美國，其次是世界其他地區。

要分析佢的價值，就要睇翻虛擬貨幣長遠發展。以本質來說，虛擬貨幣是人為創造出來的，絕對不是「資產」，有沒有真正的價值，如何定義真正的價值，未知，亦令COIN的價值，變成未知數。

長遠的價值，取決於「有多少人用」，如果長遠好多人用，的確可能有高價值。但如果無人用虛擬貨幣，這公司都無價值。

因為分析長遠是否好多人用，是非常困難，因此，當中存有相當的風險，當然，潛力同樣都大。

若你只係好少注，同時又睇好虛擬貨幣長遠發展，你可以守。若佢佔你組合較多，最好沽出部份，去平衡風險。

------------------------------------------------

Q22068：

您好，龔sir.，我想問您對Pre IPO有了解嗎？

我朋友佢話私募基金的回報高過股票，她提及到她將20萬本金放在系一個私募基金的項目裡，三到四個月連埋本金已賺40萬，她問我有冇興趣？

因為我的投資都是放系股票，對於Pre IPO相關資訊真是不太了解，而且回報率禁高，會不會有很大風險呢？

因為我聽她講就好似好低風險，但我始終都不太相信。按常理，高回報就高風險，但她提及的IPO好似有點有悖常理，所以想請教一下您，謝謝！

龔成老師︰

Pre IPO就係指企業在上市前(即IPO前)，進行的集資。

由於正式上市申請，係需要一段時間，有些企業就會用這個方法，去提前得到一些資金，用作上市前支援營運之用。

而Pre IPO基金多數會在上市時，就沽出這些股票獲利。由於上市前，一般估值較低，故潛在升幅會較大。一般這類股票基金，投資時間都唔長，可能講緊只係1,2年時間。

但你有留意我FB，我經常都會話，唔太建議投資IPO。因為可以參考數據好少，好難進行一個合理估值。而且好多時，企業真正表現，要1,2年先會睇得到，故投資風險會較大。

Pre IPO是未正式發表上市的企業，其可參考資訊，就更加少。甚至連佢最終能否上市，都會係一個問號。

我唔係話這類基金，全無投資價值。但你要明白當中潛在風險唔細，是否值得投資，你要自己衡量。

當然，我不是話這類項目不值得投資，只是「有風險，有回報」的類別，你要明白這點。

就算你最終決定投資，你都要控制注碼。永遠我地都要係「先知風險，後想回報」。

------------------------------------------------

Q22069：

老師你好！我跟咗你嘅投資方法三年，而家手上有超過一半係潛力股。我有限住自己每個月至少要供幾多錢，但有時手上嘅股票價格又偏貴唔想再入住，久而久之就越買越多隻股票，而家已經有14隻。

除咗股票數量太多之外，有時咁啱果個月得某一隻股票係合理價我就會買晒佢，好似而家9988已經佔我嘅投資18%。

我知道老師講過單一股票唔好超過15%，但而家佢係喺我手上已有嘅股票中價格最合理嘅。我唔想再增加股票嘅數量，但又無理由買其他貴貨。

龔成老師：

如果你出現愈買愈多的情況，反映你買入前，無經過仔細思考、研究，小心作決定，我在股票班，會派一份6頁紙的「企業評估表」

要求學員，每次買股票之前，都要填好先買，目的是希望令佢地，確保買入的都是有質素的股，以及睇得好準先會買。

阿里（9988）這刻，你只有不要再增持，到之後你有資金，慢慢配置到其他股票，阿里的%自然會減少。這動作不用急，長遠進行就得。

------------------------------------------------

Q22070：

老師你好，我兩三個月前開始見到你FB, 見到你教投資，有看你回答大家嘅問題，睇咗你嘅80後百萬富翁，而家睇緊股票勝經，

我47歲，有幫爸爸和女兒投資，持有以下股票。另外1063唔識點處理，結果而家價值得返$300幾，而家見到6808又跌到$5個幾，應該繼續長遠持有還是換出？

請你指導吓，謝謝老師！

本人持人
1. 9988 阿里爸爸 200股 $245.80
2. 9618 京東 500股 $397.40
3. 3690 美團 400股 $389.80
4. 0909 明源雲 2000股 $54 + 1000股 $45.80
5. 2013 微盟 4000股 $26.05

6. 2318 中國平安 2000股 $97.15 + 500股 $89.10
7. 1211 比亞廸股份 500股 $150.80 + 500股 $147.30
8. 6808 高鑫零售 3000股 $10.20
9. 3738 阜博集團 1000股 $32
10. 1398 工商 19000股 $5.73
11. 1063 新確科技 60000股 $1.38

爸爸80歲
1. 2888 渣打 300股 $105 + 300股 $77.80
2. 0003 中華煤氣 2000股 $14.88 + 100股 送嘅
3. 2318 中國平安 1000股 $95.70 + 500股 $91.30

用女兒利是錢幫佢投資
1. 2800 盈富 500股 $25.88
2. 3067 安碩恒生科技 200股 $17.83

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

由於你地3個人的人生階段不同，所以投資方法和目標，都會有分別。

先講你女兒，佢年輕，可以增長為主。你現時這個組合，已經係可以。

若你想增長力較高，可以多儲安碩恒生科技(3067)。但此股波動性會較大，要睇翻你自已風險承受能力。

至於你父親，由於已經係退休人士，重點唔會再係增值部份，應以收息股為主。透過股息的現金流，去支援佢退休生活上支出。

渣打集團（2888）質素只是一般，建議換碼。而煤氣(0003)和平安(2318)都有質素，可持有。

未來若你加大你父親投資，應集中收息股。以下都係有質素的收息股，你可以從中參考一下。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金(3110)，都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

至於你本人組合，以你47歲計，增長係需要，但要慢慢轉得保守點。

高鑫零售(6808)質素較中等，不宜持有太多。

新確科技(1063)主要於香港從事電話及相關產品之設計及銷售等業務。

這股規模細，加上多年出現虧損，暫時睇唔倒有投資價值，建議你沽出。

中國平安(2318)、工行(1398)有質素，可持有。

較大問題，係潛力股類股票(9988, 9618, 3690, 0909, 2013, 1211, 3738)你持有太多。以你年紀，最多只可以佔4成，而且要慢慢開始下調至2成。

現有持股，可以唔洗沽。但將來，你投資上應較集中平穏增長股部份，令組合風險水平，慢慢回復平衡。

現時大市只在合理區，資金唔好盡用。最好留有部份，等大跌市出現時，可以用來掃貨。

------------------------------------------------

Q22071：

老師最近睇緊千萬富翁， 內容話到如果依家工作發展前景有限 就要轉工轉職位 尋求突破。

關於哩點 我想問下 如果我覺得我依家工作唔會有好大突破

但係我本身工作經驗唔多同時又岩岩得到哩份工冇耐， 咁嘅情況下要繼續留待 或者 搵機會轉工會好d？

龔成老師：

你要以5年、10年，作為思考的單位，現時的工作，對你長遠有無用？

如果無用，就要轉，轉是大方向，但是否這刻轉，或一年後轉，就要睇你自己的情況。

如果你本身工作經驗唔多，就可以先在現時工作，做1年先，等你有工作經驗先轉。又或者，你繼續翻現時工作，同時，尋找自己想發展的工作，如果找到，就辭工。

總之，你要思考你的大方向。然後就要想想，現時選擇那些工，最有機會完成到你的大方向。

------------------------------------------------

Q22072：

你好，我見恆安國際1044 數據都不差，現價入是否值得長線渣？

Pe 純利 股東資金回報都好
唯早前亦回購了數次

龔成老師：

對，恆安國際（1044）的財務數據不差的，不過，企業的發展與增長力就不強，佢主要業務為在中國生產，分銷及銷售個人衛生用品，零食產品及護膚產品。

恆安擁有多個品牌，如「心相印」、「安而康」、「品諾」、「安爾樂」等，而業務大致可分為紙巾產品、衛生巾產品、一次性紙尿褲產品、零食產品。

恆安具有品牌，又處於增長中的市場，前景不俗，故此企業為不錯的優質股。不過，市場競可能令毛利略為受壓，但相信隨著此企業發展更多較高毛利產品，影響不算大。

長遠來說，恆安仍有一定的前景，故有投資價值的。成本上升，令佢略有風險。整體而言，有長線投資價值，現時大約在合理區中間。

------------------------------------------------

Q22073：

龔成老師，請問5M可以買什麼樓來放租？可以考慮那些區域？6年後退休，現在應否做按揭？謝謝！

龔成老師︰

其實無話特定乜野樓會較好，藍籌屋苑會加分，尺寸最好近300呎，符合一個家庭基本需要。

你要睇翻該物業的質素，呎價，預期租金回報率，特別是利用「呎價，預期租金回報率」去比較同區同類單位，以確定該物業的平貴水平。

另外，你再要審視其升值潛力，未來地區上、交通上、生活等等的配套發展，才去下一個結論，咁會較好。

現時息口低，承做按揭，再用多出資金去投資，相信會較好。

但由於你已近退休之年，按揭未必批倒好長年期，故壓力測試上，可能要求會因此而高左。在選擇物業時，你要考慮埋這因素，具體你要問清楚地產經網、銀行，了解清楚先。

------------------------------------------------

Q22074：

老師你好，我黎緊有計劃生完2胎就辭職，因為無人湊BB。你會建議我現階段應該點樣投資？

(先生份糧 + 被動收入可以支撐大部分家庭開支) 我之前買既增長股依家都係負數居多，現階段我應該考慮買返d內銀/ 公用股 收息嗎？

或係我應該買3067/2845 呢類etf嗎？ (手上大約有10萬可投資)

龔成老師︰

我地投資，係應先處理好防守部份(日常生活)，才去進攻(財富增值)。

由於你會做全職媽咪，家庭收入會少了一部份，故首要任務，是要先做到收支平穏。因此，現時支援緊你日常基本開支的收息股，我建議你就唔好變動。

若收支平衡上，依然有一定缺口，你可以將部份平穏增長股，轉移至收息股，去增加家庭現金流。

若已經大致收支平衡到的話，你那些平穏增長股，照持有就可以，讓其繼續為你財富增值。除非佢質素係有問題，否則唔好太在意中短期波動，一直長線持有就可以。

至於3067/2845這類較有增長力的潛力股，到你家庭收支平衡之餘，每月都可以空出一定資金，才作考慮。

至於你手上10萬，我建議你留在身邊，作為應急錢，會較為理想。

------------------------------------------------

Q22075：

你好老師，萬分感謝你的回覆和提供詳細的資訊及分析！

不好意思，這麼遲回覆你，因技術性問題今日先開通富途牛牛戶口。

交代小小我的個人資料，我現43歲，自住物業沒有按揭(已供完)，有物業放租(但租金全數比按揭，按揭還有8年)，現60萬現金，

另20萬要6年後先可取出(兒子出世時買的小狀元儲蓄保險)，現每月可儲HKD13000，現計劃分階段投入20萬作投資股票。

如我選擇五隻平穩增長股作為我開始、首次投資股票，我會以"分注"形式，以下每隻股票先買一手，然後留意價位再每手每手入?

1）盈富(2800)
2）金沙(1928)
3）中銀(2388)
4）港鐵(0066)
5）粵海(0270)

這樣可行嗎？以上這5隻股長揸的話最少多少年較好？這5隻股現在入貨是合理區嗎？

另想問中國鐵塔00788你點睇？

謝謝老師！麻煩晒你！感謝

龔成老師︰

你現時已持有2個物業，成個組合係物業類比重好高。未來時間，應集中投入股市，令組合更平衡。

以你年紀，都有一定增值需要，你現時這個組合係可以。如果你想再進取少少，可以加入少少潛力股。

潛力股︰安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）。

但你要留意翻，部份潛力股已有輕微過熱情況。只有安碩恒生科技(3067)、ＧＸ中國電車基金（2845）、 騰訊（0700）、阿里（9988）、中生製藥（1177）、福壽園(1448)勉強算在合理區頂部，可分注入貨，其餘要等等。

至於你目標的5隻平穏增長股，都在合理區，現價可以先入一注。每再回10-15%，就再加注，直至資金用完。

另外，每月儲起的$13000，都可以做月供股票。每月先用一半儲蓄做月供，另一半就儲起，等大跌市機會。

中國鐵塔（0788）不是無質素的。始終中國的3大電訊巨頭，都是佢的主要客戶，以及大股東，當5G發展，佢一定會受惠，因此前景仍然正面。

佢現時的收入都增長，盈利都保持向上，但增長比之前略減，加上股本回報率不高，是這股較弱的地方。若分析佢市盈率，會見到現時仍然處較高水平，反映佢雖然股價回落左唔少，但仍然未到平。

這股算是合理價。長遠仍算有發展力，可長線。不過，潛力度比過往略減。

這股都適合你年紀，現價可以分注入貨。

------------------------------------------------

Q22076：

你好，老師，有個方法想問你可唔可行，小弟有一層自住樓，已供完，銀行估值600萬，現想加按360萬，分10年還，連本金利息400萬

我計劃：

買1隻穩陣收息股100萬(做膽)，買10隻穩陣不同行業優質股做腳20萬x10隻，淨番60萬一半定下期一半慢慢還款，用曬之後將1隻腳賣走，用來還款，用曬再賣，用曬再賣咁

(當然首選揀隻賺的腳賣啦)10年後，淨反個膽100萬

這方法可行嗎？可以叫做無本生利嗎？

10年叫做無本賺100萬

謝謝老師解答

龔成老師︰

現時息率低，透過借貨去投資，從而賺取息差，係可以。

但有兩大風險，你一定要明白。

第一，借貸創造，表面上無本生利，但實質有風險的，你負債增加，風險會增加。

另外，如果你投資的股票不幸股價下跌，你就會出現「賺息蝕價」，對你不利。

同時間，如果日後加息，又或你收息股的派息減少，都會令你得到的息差回報收窄，你的回報會減少。

所有借貸投資，都不是無本生利，而是背後承受了一定的風險，我不是叫你不能做，而是做進行前，一定要明白當中風險，不要視為穩賺項目。

第二個風險，就是你個配置，有問題。

首先，任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

你膽拖這種模式，個膽一定會超過這個標準，令你出現過度集中性風險。

另外，定期本身回報不高，很大機會回報低於你本身借貨利息。變相，你已有一部份貸款，係無效率地運用，拖低了整個組合回報。

若你想用個定期，去平衡個組合風險。我建議你直接不借定期個部份資金，反而仲有利。

餘下資金，我建議你投資一些「平穩增值股」+「收息股」。

平穩增值股，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、平安(2318)、粵海(0270)、領展(0823)。

同時，可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金(3110)，都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

若你想組合增長力高一些，可以較集中「平穩增值股」。相反你想平穏少少，可以集中係「收息股」。

但成個計劃，你要明白一點。你係投資緊股票，就算最穏陣架收息股，都會有波動，有機會出現賺息蝕價情況，故你計劃係唔會100%穏賺。

而且，現時大市只在合理區，唔算係好平，這個風險就會更高。

現時大市只是合理區，你借款得來資金，可以先投入一半，用"分注"形式，慢慢買貨。餘下一半就等大市出現一定程度的下跌，才大力度掃貨，然後長線投資。

投資增值，其實唔洗諗到好複雜。只要你用我上述計劃，並長線持有這些優質股，其實已經很大機會，得到一個唔錯回報。

------------------------------------------------

Q22077：

你好 老師，又想麻煩你提點下我。

手頭只有各一手而已

-小米
-3067
-6618

我有10萬

1/ 應該繼續集中月供現有嘅小米，3067 ？

2/6618應該keep定放？其實擺起度都無所謂作長線？

3/ 依家手頭嘅好偏埋一邊 或應入手其他類別 （福壽園/金沙/銀娛/中電/地鐵/領展/比亞迪電子/700）

4/ 新能源股 可以建議邊啲我去study多啲？

再次感謝

龔成老師︰

1) 你現時3X歲，雖然投資上可以進取少少，但都不建議全部買晒潛力股。

佢地雖然有增長潛力，同時風險都較高，不宜持有過多。

以你年紀，潛力股可佔約5成，餘下應用以下平穏增長股。若你投資經驗較淺，潛力股比重，要再調至3成以下。到你學到一定投資知識，才慢慢調高。

未來時間，你就要加大翻平穏增長股部份，令組合更平衡。以下平穏增長股，現價都在合理水平，可以分注入貨。

平穏增長股：盈富(2800)、金沙（1928）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）、長建(1038)

月供你可以小注潛力股，較大注係平穏增長股，就可以做到平衡效果。

2) 京東健康（6618）有質素，這股可長線。

其業務主要提供線上線下的醫藥出售和健康管理服務，業務布局包括醫藥電商、互聯網醫療、智慧醫療解決方案、健康服務等4個大板塊。

京東健康旗下京東大藥房，更是內地線上線下收入規模最大的零售藥房。其互聯網醫院，日接診量超過10萬次。

質素上，京東健康是有的。但由於估值難，不確定性大。但由於你只係小注，照持有就可以，但暫時唔好加注了。

3) 係偏向左潛力股，故應加大平穏增長股，去平衡翻個組合。

4) 信義光學(0968)和福萊特玻璃（6865）你可以研究下，但現價都在略貴水平，回多1成左右，值博率會較高。

------------------------------------------------

Q22078：

老師你好，我係投資新手，20歲。我看好未來奢侈品會有更大的市場，所以想投資相關股票，但香港相關股份較少。

我留意到美國有一隻LV ADR股票，LV集團覆蓋性廣，有品牌價值，全球通關後預期業績也會有增長，股價也每年穩步上升中，想問可以以分注買入的方法每月購入嗎？

除奢侈品股，我也看好未來醫美板塊，科技板塊和新能源板塊的發展，想問大方向正確嗎？我應該如何開始部署這些板塊的資產呢？有什麼股份老師比較推介？

謝謝，希望老師能抽空解答

龔成老師︰

LVMH Moet Hennessy Louis Vuitton SE(LVMUY)是一家法國的奢侈品集團，業務涉及六個領域：葡萄酒及烈酒、時裝及皮具、香水及化妝品、鐘錶及珠寶、精品零售及其他業務。

企業有一定品牌，都有投資價值。但畢竟業務以消費類奢侈品為主，較受經濟大環境，盈利會較波動。

這股票都有投資價值，但現價唔平，最多只宜好小注。利用月供儲貨，會較好。

至於你所講的板塊(醫藥業會係重點，醫美都有市場，但無醫藥類咁高潛力)，都係有潛力，同時會係未來大方向之一。

以下都是一些我較睇好的相關行業潛力股，你可以參考下。

潛力股︰安碩恒生科技(3067)、信義光能(0968)、阿里（9988）、騰訊（0700）、舜宇光學（2382）、小米（1810）、中生製藥（1177）、ＧＸ中國電車基金（2845）、三星FANG ETF（2814）。

你現時無投資知識和經驗，對企業估值，點去定平貴未必會太了解。所以你先利用月供模式，去做增值，可以減低買貴貨風險，對你而言會較理想。

你每月大約用一半儲蓄月供，另一半就儲起，等大跌市機會。

另外，潛力股雖然有增長潛力，同時風險都較高，不宜持有過多。

以你20歲年紀，潛力股可佔約5成，餘下應用以下平穏增長股。但由於你投資經驗較淺，潛力股比重，先用3成以下這個指標。到你學到一定投資知識，才慢慢調高。

餘下投資比重，你就配置在平穏增長股上，會令你組合更平衡。

------------------------------------------------

Q22079：

你好啊，龔成老師，我今年27歲，月入兩萬，每個月儲$5000，無月供股票。現時手頭上持有呢三隻股票：

1）中國移動0941 $47.9：1000
2）龍光集團3380 $11.7：2000
3）香港寬頻1310 $9.3：1000

因為我以前係短炒輸過錢，所以我現在就吾想再走回頭路。就想試下建個收息倉，慢慢打造被動收入。

但我見龔成老師通常都叫學員「先增值、後收息」咁我現在呢個想法是否太慢或者吾適合現在的我？求老師賜教

龔成老師︰

短炒係一個不正確投資方法，就算全球投資最賺錢的巴菲特，都唔會做短炒。

其實投資股票，就係等同投資一間企業，只要係有質素，你長線持有比時間佢自行增值，咁已經會有唔錯的回報。

我經常都會叫讀者和股票班同學，用「先增值，後現金流」作方法，去做投資增值。

意思係，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你27歲，就應以增值為主。中國移動(0941)和香港寬頻(1310)係收息股，增長力欠奉，不適合你。但由於持股不多，你可保留，但不要再加注。

龍光集團(3380)適合你，都有增長力，但負債佢比較多，風險會略高。現貨可持有，但暫時不要加注。

你現時這個組合，增長力太低。未來時間，我建議你用「平穏增長股」 + 「潛力股」作組合，去創造一個增值平台。

現在你每月先用5成儲蓄，即$2500做月供。其餘先儲起，用一邊月供一邊儲蓄的策略。

月供方面，你可以選擇投資在平穏增長股或潛力股。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

另外，你現在還很年青，應盡力去做去財富累積部份。我建議你每月最好可以空出一半薪金，去做月供，咁會較理想。

------------------------------------------------

Q22080：

龔成老師您好，本人之前高位買了中國財險（2328), 一路坐艇, 暫時賬面蝕了幾萬蚊。請問你覺得這股票前景如何，應繼續持還是換另一只股票。

本人心水完美醫療(1830)。求指導

龔成老師︰

中國財險（2328）主要於國內為各界客戶提供多種財險產品，包括機動車輛保險、企業財產保險和家庭財產保險。

過往的生意與盈利都不差，不過就無乜增長動力，質素算是中等。這股都可長線，不過就重收息，唔好對股價有太大期望。

若佢只係佔你組合不多，你可以持有。但若較多，你可以沽少少，去平衡翻個風險。

完美醫療（1830）長遠有發展，本身有一定的質素。

睇翻之前的疫情，佢身處的行業受影響，但佢的現金流及財務數據都唔算差，這點可以想象到，當正常的經營環境，佢的生意一定唔錯。

加上佢的野心愈來愈大，本身有一定的技術，同時不斷將香港的業務模式複製到其他海外地區，我見佢加強了發展其他地方，因此發展不差。

這股有長線投資價值。

之前公佈業績理想，但業績後股價升左好多，雖然我在業績後調高左佢企業估值，加上管理層加大了企業發展的力度，前景正面，但現價點都都有少少貴。

所以，如果無貨，可考慮回少少，先小注，然後等跌多d先正式分注投資。如果本身有貨，就長線持有，但這刻就不要心急加注。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21821-Q21840）

Q21821：

hi，龔sir,一直都有留意開你嘅Facebook ,本人30歲，都有買開股票有好幾年，都成日比老婆笑係燈神，買襯啲股票都跌，但放曬就會升⋯

就好似金蝶國際，吉利汽車，碧桂園服務，移卡⋯哩啲，買入時其實都係低位、但經唔起考驗，好早就會放曬⋯想請教一下，應該要點樣調整好心態

仲想問下百富環球同微萌點睇，百富環球5蚊時買入，但跌到4.7時同樣放左～

龔成老師︰

如果你每次投資都是「輸」，即係你存在一些核心性問題。譬如一些錯誤的投資觀念。

記住，正確和正常，是完全不同的事，多人採用，並不代表係正確的方法。

首先﹐股票是企業﹐你要分析企業的本質去投資股票。買股票也不是「賺差價」，而是享受企業成長以及產生的股息。

現你的情況，買入股票唔係無質素。但你錯用短線投資，賺差價的思維去諗這件事。令你可能一見佢跌，你就以為有問題，即沽貨，才做成你過去出現的情況。

往後，你只要以「長線地，投資優質股」，作為你投資策略。

緊記，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

而且將來再投資前，要先做好估值。價格偏貴，就唔入貨。等佢回到合理，甚至平宜區，才分注吸納，或者利用月供去儲貨。

我好有信心，你會結束過往一直虧損的狀況。

百富環球（0327）係一家電子支付終端機解決方案供應商，主要在中國從事開發及銷售相關產品並提供相關服務。

佢產品及服務包括移動終端機、消費者操作設備、非接觸式讀卡設備及提供售後服務等。佢的客戶大致可分為收單機構（如支付交易處理商及金融機構）及商戶服務供應商。

質素都有的，但未算好強，同時業務與股價都有點波動。現價合理區上部，這股係有長線投資價值，但又未算好值得持有太多。如果小注長線可以的。

微盟集團（2013）集團主要在中國從事提供軟件即服務產品及營銷服務。

佢的產品分為「商業雲」解決方案、「營銷雲」解決方案及「銷售雲」解決方案三類。

「商業雲」可助商戶開設線上業務並助彼等提升顧客參與度、轉化率、收益及忠誠度。「營銷雲」通過大數據分析能力及ＡＩ技術為商戶提供智能營銷服務。

這些都是將來發展的大趨勢，從業務潛力上，的確是有的，見佢財務數據的增長都強勁。但在估值上都唔平，所以，如果投資，這刻小注好了。

------------------------------------------------

Q21822：

你好龔Sir! 我係啱啱上完股票初階班嘅學生嚟，有野上向你請教一下。

福壽園(1448)，喺堂上龔Sir你話呢隻係水桶1。 我好簡單咁睇返佢嘅市盈率，我以佢最近7年(計埋2021)嘅市盈率揾返佢嘅中間3年
27.4 27.44 28.06

之後我再搵近平均5年每股盈利係$0.2226(人民幣), 即係$0.27(港幣)。

咁佢嘅合理股價就係
$0.27x27.4 - $0.27x28.06
=$7.4 - $7.6

而現時嘅股價係$7.4。咁我可唔可以推論現時喺合理區嘅低位?

同時我根據篩選三步法分析，第一二步都冇問題，但去到第三步，我想揾佢嘅同行比較時，又唔太揾到真係同福壽園類近嘅企業，咁嘅話我上面嘅推論會唔會唔穩陣? 定係我會睇漏左其他因素?

謝謝你

龔成老師︰

你用佢近7年市盈率，再取中間3年，和用每股盈利5年平均，係可以。

但取出相關數據之後，你要都睇翻，到底這些數據，係唔係足以反映現時企業和行業發展的真實狀況。

你見集團盈利持續都有唔錯增長，故用5年平均每股盈利時，應該再加上5年的年均增長率(約16%)去做指標。(即大約HKD0.37)

另外，由於近年中國政府，對行業有不少新指引，主要方向都係控制價值，避免殯儀業相關產品和服務，出現定價過高情況。相信未來，殯儀業盈利會回到較合理水平。

因此，你計出來的個市盈率，需要打折扣，來反映這些因素，你預大約合理市盈率係15-20倍。

合理價值︰HKD5.5 - 7.4，故現價算係合理區頂部，無貨可先小注。

殯儀業本身好分散，而福壽園係當中龍頭，故真的較難找到相近對手作比較。因此，你係做分析時，應較集中在企業本身和整個行業發展。

最後，係計出合理價值後，你要留意佢是否相距多於20%。

若好似你計出的答案$7.4-7.6，區間太窄，我地就要將合理價值上下限，再額外加多10%緩衝區，令佢更能反映合理區情況。

------------------------------------------------

Q21823：

龔先生你好!我是最近才開始接觸 貴專頁，也報了基礎班，很欣賞你對投資和教學的熱誠，也明白了為什麼你這樣成功！

單親媽媽 兩子就讀小學，每月支出$27000，沒有工作 要照顧兩子

賣樓後現存270萬，希望以投資作被動收入，請問哪種形式或組合較適合我？

謝謝解答

龔成老師︰

這筆錢點樣用，要視乎你實際生活狀況而定，當中考慮重點，係住屋和就業問題。

首先，如果你長線住屋無問題的話，這資金可以用增值。若你有再買自住屋的需要﹐而又要短期內進行，就要先扣起相關支出。

另外，你現時無工作，若只係短期，你可以預留一筆生活費，之後餘下部份，就可以投資「平穏增長股」 + 「潛力股」作增值。

若你預期會較長時間，都無法工作，或者只能有限度咁工作。你就可以考慮，將部份資金，買入「收息股」，去創造現金流(即係股息)，以舒緩日常開支的壓力。

但由於投資係一個長線計劃，我建議唔好急住行動。等你上完堂，有一個完整概念，才去進行會較好。
股票班見!

------------------------------------------------

Q21824：

老師，想問下653，見佢主席換左人，舊既大股東持股量都賣得7788，新人事新作風，股價可否睇好?

另外，請問點睇2148，可否長期持有?
謝謝

龔成老師︰

卓悅控股（0653）自更換主席後，加強了集團在電商方面發展，但長線有無成效，還有待觀察。

若用以往集團表現，只算是一般般。集團在過往的經營環境都唔算好好賺，經常出現虧損，近期面對疫情，情況更弱。

相信佢疫情過後會好翻D，但根據過往表現來分析，長遠的投資價值唔算高。

VESYNC（2148）有少少潛力的。

佢係美國小家電線上市場的市場參與者。根據報告，在小家電零售商中，佢係美國就通過亞馬遜產生的零售額而言排名第三及通過所有線上渠道產生的零售額而言排名第五。

係美國通過亞馬遜產生的零售額而言，其空氣淨化器於其類別中排名第一，空氣炸鍋於其類別中排名第二。

佢業務主要專注於線上營銷及銷售品牌下的自主設計開發的小家電及智能家居設備。主要通過電子商務交易市場，主要為美國最大的電子商務交易市場亞馬遜銷售其下的產品。

佢的產品主要銷往美國、加拿大、英國、德國、法國、西班牙、意大利及日本等數個國家的用戶。

業務不算差，發展有潛力，但企業規模始終較細，業務未穩定，加上現價略貴。整體都有風險。

這類股，小注投資都可以，但就要明白當中的風險。

------------------------------------------------

Q21825：

想向龔成老師發問：本人47歲，月入4萬。 與伴侶共同擁有一自住物業（樓按還有$4百萬）。互相財政獨立，對分日常開支包括供樓。

現在我每月花費$2萬（即日常開支包括供樓）和堅持貯蓄$2萬。

持有1,000股00016 和 3,000股00175, 現金流$50萬。

雖然工作穩定，但相信沒有打不破的飯碗。懇求龔老師的意見，我該如何策劃財務和投資以致可以盡快財務自由。 謝謝。

龔成老師︰

你現時已有自住屋，係財富組合上，物業類佔比重很高。所以，我地新資金應先投入優質股，令成個財富組合變得更平衡。

以你47歲，都有一定增值需要，你可以選擇一些「平穩增值股」+「潛力股」作投資目標。

我地投資前，先要做好防守部份，建議你先扣起12萬(即半年開支)作應急錢，才開始投資計劃，會較穏妥。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄(即$10000)，另一半就先儲起架策略。

由於你投資知識不高，因此可較集中在平穩增長類股，至於潛力股，只宜小小注(<2成)。此期間，你最好是努力提高投資知識，才慢慢增加翻潛力股比例(最多3-4成)。

另外，你現時組合中，新地(0016)佔比重好高，個別企業和行業不要佔組合15%和30%以上，否則會有過度集中性風險。

但你不用沽出，用新資金慢慢調整個比例就可以，但暫時不要再投資地產相關股票，去平衡風險。

現時大市只是合理區，你可以用多5-10萬，用"分注"形式，慢慢買貨。餘下資金和每月所儲倒的資金，就等大市出現一定程度的下跌，才大力度掃貨，然後長線投資。

如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q21826：

龔sir,早晨，請問京東sw有10萬蟹貨平均315蚊 先平價。 京東物流已上市，係咪如果阿媽京東sw算係高位，分拆業務，阿媽就會跌返最少50蚊出黎?

2～3年都返唔到300蚊？

另外，我排左你d書成幾個月（哈哈）

龔成老師︰

你這個計法不正確，其實分析上市，只係集團將部份業務上市去集資，從而得到發展資金之餘，又可以釋放內在價格。

就算京東物流（2618）上市，其價值依然存在係京東(9816)之內，因此唔會因為分拆上市，而出現你所講的情況。

另外，你要明白，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

京東（9618）業務有質素，發展仍是正面，不過現價就唔算平，算合理區上部。

至於幾時會上翻$300，我預計唔到。但此股有投資價值，長遠要回到$300，相信問題不大。

只要佢現時佔你組合，唔係好多，你照長線持有就可以。

至於書本，圖書館的確好多人在排。如果你有需要，建議你去買。因為用來做記號，抄筆記都會較方便。

------------------------------------------------

Q21827：

老師...你好! 本人39歲，有兩個小朋友，與先生月入8萬，現租住公司提供的房屋，持有三個物業，收租足夠供款，其中兩個十幾年前購入，

因為呎數太細(under300呎實用) 現在放賣中， 想用兩間細樓換一間大樓(700呎，千一萬，30年的二手港島樓地鐵上蓋，需借300萬)繼續收租，for 15~20年後退休一家人住，

如果換樓需付印花35萬，值得嗎？定等退休先換樓呢？ 層樓到時已經五十幾年樓齡，對於樓齡太大有問題嗎？

現金100萬，有少量股票，但懂選股，蝕過三十多萬，所以敢買多，麻煩老師比d意見我，感謝老師。

3033 $8.2 8400股
914 $47.1 1000股
3918 $9.28 2000股

龔成老師︰

由於你現有2個細單位，呎數太少，連一個基本家庭需要的大小，都未達到。長線投資價值較弱，建議你找機會將佢換其他較大單位，唔好到退休先去換。

地鐵上蓋樓盤，始終有一定潛力，但由於已有30年樓齡，你要睇翻佢幾時會做樓宇大維修，因為這個是其中一個較潛在成本。

到你入住時，都已經50年樓齡。就算保養得再好架樓，相信都會出現老化，你要預備一定維修預算，係你退休入住時，甚至之前就要動用。

除左以上2點，你還要了解佢現時租金回報率，和長線增長潛力(如附近未來發展、交通配套等)。如果這幾個因素都過到關，那就值得你多花35萬印花稅去投資。

當然，若你退休時真係太殘舊，你都可以用佢去換另一間較新的自住樓，但相信當中會有一定差價。

因此，你現時可以利用優質股去增值，為退休所需資金，和潛在可能換樓的成本，作準備。令自己到退休時候，有較多本錢在手，令可選擇的方法也會較多。

至於財富增值方面，你現時組合太偏重物業類，令成個組合十分不平衡。因此，你新資金要優先放入股市，去調整翻個財富組合比重，咁會較好。

我地開始新投資前，最好先要找出你過往虧損原因，以免再出現不利情況。

你現時持有股票，都係有質素和適合你。我估計都有一定選股能力，大致能判斷企業好壞。但你都蝕過30萬，若不是選股出問題，較大機會係未能定平貴，或者用左短炒模式去投資。

記住，我地投資股票，就等同投資一間企業。就算再好的企業，都要時間成長，故必須長線持有。中間可能有些波動，但只要佢長線質素無變，照持有就可以，唔好太在意中短期波動。

若你對定平貴，無乜信心，又或者經常比大市氣氛影響，見多人買就衝入市。我建議你用月供模式去儲股票，會較安全。

以你39歲，可以選擇一些「平穩增值股」+「潛力股」作投資目標。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄，另一半就先儲起架策略。

潛力股：安碩恒生科技（3067）、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814），但就要明白波動性比上述會高左，同時風險大左，你要自己平衡。

大市現處於合理水平，那100萬資金，你可以先用20-30萬，以"分注"形式慢慢入貨。餘下資金和每月儲蓄，就等大跌市機會出現，才大力度掃貨，並長線投資。

------------------------------------------------

Q21828：

龔成老師，你好，我今年33歲，月入2.5萬，另有物業收租1萬 (已供滿，未來婚後會收回來住)，每月平均支出1.5萬。

現有現金 $60萬，現開始進行月供股票：

#2800 - $5000
#823 - $2000
#1398 - $1500
#270 - $1500
#3067 - 每個月買1-2手

目標: 穩定收息，提早退休 (或為興趣返工)

屋企人已經失業2年(現63)，再過2年可以拎出強積金 約$60萬，現在考慮有什麼方案可以令到佢每月有穩定收入($2500-$3500)：

1, 購買保險公司的每月派息基金;
2, 幫佢買高息股 (5-6%)如 #778, #941, #3988;
3, 未諗到

老師，想請問我屋企人的情況可以有什麼更好的選擇，希望可以給我意見。

龔成老師︰

先講你本人部份，我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你33歲，應以增值為主，建議你用「平穏增長股」 + 「潛力股」的組合。

現在時大市只在合理區，你每月儲蓄不要盡用，建議先用5成儲蓄做月供，其餘先儲起，用一邊月供一邊儲蓄的策略。

你現時月供股票都合適，但有少少保守。建議你可以增大潛力股部份，以你年紀計，可以佔5成。但若你投資經驗較淺，或者相保守d，就要向下調整。

另外，工行(1398)只係收息股，增長力好一般，唔建議你用來月供。

潛力股︰中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）、三星FANG ETF（2814）。

現時大市只是合理區，你現有60萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

到你累積到一定資產，你就可以慢慢換成收息資產，透過其現金流，達至財務自由。

至於你家人部份，由於佢地已好近退休之年，投資目標會同你不一樣。以佢地人生階段，應集中係收息資產類，去創造現金流，來支援退休生活上的支出。

你所講的派息基金(我建議考慮用3110)，和高息股都係可以。

如果你家人希望每月有$3000現金流，以股息率6%計，需要本金60萬。

因此，你可以建立一個「收息股」的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）或收息基金(3110)都可以。

如果你家人能承受到風險，有些更有超過8%、10%的高息股，但股價就略有風險，要自己衡量，佐丹奴國際（0709）、中石化（0386）、互太紡織（1382）等（記住，股價略波動，只能小注）。

(你可睇下我本《50穩健收息股》當中仲有好多)

但要留意，現時股價只是合理，未到平宜，因此買入時宜分注，同時不能用盡現金。要留有部份，等大跌市才入貨。

------------------------------------------------

Q21829：

龔老師你好，本人30歲全職主婦，老公今年41，月賺3萬，一個月大約草到6000左右，有兩個小朋友，冇物業冇供樓。

資產如下：

黃金暫存5粒一兩重
港股有大約12萬，
2手匯豐005「44$，打算收息」
1手小米「24.5」
1手中國人壽「16.08」（打算18$離場）
1手868信義玻璃「高價26.9」

流動現金有5萬，外幣有4萬「留著旅行用」

想問一問868今年可以一直長持嗎？定要止賺離場？今日由31.3跌到30.4，未來兩日派息！所以好困擾！如果止賺離場又應該轉碼邊啲岩我？

因為暫時不考慮加錢到股票帳號，其他現金先留，股市下跌先入市

龔成老師︰

以你30歲計，應以增值為主。匯控(0005)只是收息股，增長力好弱，唔適合你這個年紀。你可以減持部份或全部，轉至其他增長股，對你較有利。

中國人壽(2628)近年增長力弱左，質素只係中等。你可持有，但唔好再加注。若相換碼，都係可以。

至於小米(1810)和信義玻璃(0868)有質素，都適合你長線持有。

你要記住，當一隻股票股價下跌，你一定要了解當中原因，基本上，股價中短期上落好正常，但如果上落太大，就要了解翻當中的事情，有無一些影響企業核心的因素。

信義玻璃（0868）近年的增長力弱左，不過，佢在技術上的行業優勢仍在，相信長遠仍是正面，不過就未必是高增長的類別，潛力度比過往略有減少。

加上佢不斷將較高增長的業務分柝左上市，令現時的信義玻璃增加，只是平穩類。你預佢中短期會比較波動，要長期先見到收成，現貨照持有就可以。

而黃金無現金流，我地持有佢，主要係為左對沖金融市場的突發性事件。因此，唔需要太多，大約佔組合3%就可以，而且以實金持有最好。

現時大市只在合理區，資金不宜盡用。你5萬可以留待大跌市才出手，咁會較好。

但同時間，你可以用每月儲蓄，進行月供股票。每月先用$3000月供，其餘儲起，同樣等大跌市機會。

現時你們資金較少，可以先集中係優質股，來進行增值。但長線計，當你累積到一定財富，就要慢慢加入物業類，成個財富組合才算平衡。

------------------------------------------------

Q21830：

阿sir 關於第七課的年報問題，想問這個新的租貸會計制度好像有點兒扭曲左真正公司實際情況，當我們分析企業的情況又要不計才有真正的意義，那為什麼需要有這個新的會計準則？有什麼好處？謝謝你！

這個會計數字對企業的情況有什麼implications?

龔成老師：

這是一個新的會計準則，全香港都會用，能夠反映企業「租金」的風險，因為過往不當負債，現時已變成負債，就能更有效反映風險。

但對於零售企業，我地過往分析的指標，同現時最新指標，就會有所不同，所以我地在一些量度佢是否合格的財務指標時，最好有合理化的調整。

------------------------------------------------

Q21831：

Hello龔Sir！很高興認識你，我是你股票班學生，剛上完你最後第八堂，無論在心態、理念、技巧、智識都增進不少

在此再次衷心感激你的無私教咗我好多嘢，希望將來你能在財務自由路上更上一層樓和更加Succeed！

還有在你課堂及FB帖文上的教學, 令我清晰了解選股策略和重要性！

龔成老師︰

多謝讚賞！

我只是盡力，將我所學、所研究，投資及成功的方法、技巧、心得、經驗，教大家，這些方法好多成功人士都做過，我只是用翻這方法，並教翻大家。

你要保持進步，多溫書，多用評估表，加油！

------------------------------------------------

Q21832：

你好，想向你請教本人的投資問題。你好！本人仲有6年便退休，月入$3.5萬，每月約有$13000作儲蓄，希望在2年後可以資產增值至100萬，現時持貨如下：

1177 @8 / 4000sh
762 @4.82 / 6000sh
1972 @17.7 / 400sh
1810 @30.58 / 200sh

6060 @41.03 / 200sh
788 @1.37 / 4000sh
9988 @239.27 / 200sh
883 @8.56 / 3000sh

2382 @149 / 400sh
939 @6.79 / 1000sh
282 @0.192 / 30000sh
6993 @10.793 / 3000sh

提問1: 每月堅持儲蓄$13000，可否達至2年后資產$100萬？（連同現有現金約$15萬）

提問2: 上述持股配置是否合適？須刪減部份/增持其他呢？

提問3: 上述那些持股係水涌1、2、3？

多謝你不段為網民解答疑問，祝身體健康。

每年額外花紅約5萬

龔成老師︰

1) 假設你投資一些較有增長力股票，年均投資回報有10%（連股息再投資），你每月投資$13000 + 40萬現有資產(25萬股票和15萬現金)，2年後大約會增值至80萬。

但由於2年係一個好短時間，好易出現波動，令最終回報不確定性好高。而且，你都接近退休之年，我唔建議作太高風險投資。

以你年紀，只宜進行較保守的增值。

2) 你現時持有不少潛力股(1177, 1810, 6060, 0788, 9988, 2382, 6993)，佢地增長潛力高，但風險都好大。

由於你接近退休，應該要開始減持這類股票，換至較平穏的「平穩增值股」和「收息股」。

還要隨著年齡增加，慢慢將收息股的比例提升。到退休時，你收息股比例，應佔100%。

平穩增值股，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、平安(2318)。

收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金(3110)，都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

壹傳媒(0282)近期股價較波動，長線投資價值不算高，建議你換至其他股票較好。

中石油(0883)只係商品類股票，佢價值自主能力好低，投資價值只係中等，唔建議持有太多。

其餘持股，都係有質素。

3) 水桶1︰1177, 1810, 6060, 0788, 9988, 2382, 6993
水桶2︰0762, 1972, 0883
水桶3︰0939

你現在要做，就是將「潛力股」，慢慢換至「平穩增值股」和「收息股」。至於現有資金，就等大跌市才動用。

另外，每月$13000的儲蓄用一半去月供「平穩增值股」和「收息股」，另一半儲起，同樣等大跌市機會。

若你想增長力大少少，可以較集中「平穩增值股」。但緊記要慢慢將比重，轉去「收息股」部份。

雖然這樣做，不能達至你2年100萬的目標。但由於你快將退休，唔建議你太冒險。因為若你此時投資失利，你無足夠時間去再追回這筆資金，風險很高。

所以，我建議你考慮我上述策略，相信會對你較好。

------------------------------------------------

Q21833：

龔成老師，想請教你的理財意見。本人今年44歲,已婚,無細路, 兩公婆冢入大約$55K,自置物業完供, 一向由家人代為儲蓄, 近年開始自學一下,想為兩公婆退休作準確

本身自己都有些年金儲蓄(已完供,等多10年收$),手頭亦有些股票(樣樣有D), 但股票蝕多過賺(因個性心急,次次一買就跌,有點心灰)

現有現金:30萬左右
現有股票
買入價

已持有2年
0002 - 500股 70.7
0005 - 400股 72.5
0012 - 1000股 40.5
0939 - 1000股 6.5

近期亂入 (多數1-2手)
00992 - 2000股 9.89
1208 - 4000股 4.64
02158 -200股 47.95
01398 - 2000股 4.99
00762 -2000股 4.37
00384 - 400股 28.9

剛入
02618 -100股 45.9
01177 - 2000股 8.65

唉!感覺自己在股票方面是盲頭烏蠅, 想重新建立一個老師講的長期「財富組合」，所以希望老師俾D意見

1. 想問問需要沽出現時股票?

2. 月供股票是否適合我? 大約月供多少(本身預$2-3K)? 那些股會比較適合我?

謝謝你的指導。

龔成老師︰

如果你過往經常出現虧損，反映你有一此核心投資問題，建議你增加知識。同時，你最好用月供優質股的模式進行，相信會較為適合你的。

1) 五礦資源（1208）主要從事有色金屬經銷、製造及鋁、銅製品分銷。

過往有多年出現虧損，企業投資的價值不高，加上股價十分波動，炒作多過實際。這股不建議長線。

2) 我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你44歲，應以增值為主，建議你用「平穏增長股」 + 「潛力股」作組合，並以「平穏增長股」為主力。

你現時持有股票(除了1208)，都適合你。唔好太在意中短期波動，你要清楚這些股票質素所在。就算出現下跌，只要佢長線質素係無變，你照持有就可以。

月供方面，你可以每月先用5成儲蓄，其餘先儲起，用一邊月供一邊儲蓄的策略。

以你家庭每月入息55K計，月供只有3K係太少。由於你已有物業類資產，建議你每月閒錢，都用來月供增值，咁會較好。

月供方面，你可以選擇投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)

或潛力股︰比亞迪(1211)、中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）、三星FANG ETF（2814）。

由於你投資知識不高，因此可較集中在平穩增長類股，至於潛力股，只宜小小注(不多於2成)。最好是你先提高投資知識，等到你有一定知識和經驗，才慢慢增加潛力股比例(大約4成)。

現時大市只是合理區，你現有30萬資金可以多用5-10萬，用"分注"形式，慢慢買貨。餘下資金和每月所儲倒的資金，就等大市出現一定程度的下跌，才大力度掃貨，然後長線投資。

------------------------------------------------

Q21834：

龔老師你好，本人今年52歲，想請教我現除了持有現金30萬。 每月可儲八千元。 計劃8年後退休。

還有以下股票數量

#763( 中興通訊)
7000股 21.5買入
4000股 20.3買入

#175(吉利汽車)
2000股 22.55買入

1. 請問我應否繼續持有或 止蝕？

2. 請問問怎樣可以將現有的現金價值8年內增加兩倍?

3. 請問你我的股票組合應該怎樣安排？

求指點

龔成老師︰

1) 我地是否持有一隻企業，主要係睇佢長線質素，唔好太著眼係「買入價」，佢純粹係一個心理因素。

除非你發現佢長線質素轉壞左，否則係唔需要賣出。

吉利(0175)有質素和潛力，此股可持有。

中興通訊（0763）從基本面分析，這股不差的，我亦相信5G的發展，會對佢長遠有正面影響，因此長遠不會太差。

佢本身係中國高科技通信設備主導供應商之一，通過提供客戶化的產品及解決方案，目前主要服務於中國及其他發展迅速的新興市場。

佢主要同中國電信、中國網通、中國聯通和中國移動等中國主導的電信運營商建立了長期穩定的合作關係。這部分是較穩定的。同時，佢亦向全球多個國家銷售產品，但之前同美國果邊，因政治問題而有影響。

不過，政治等因素令佢股價大上大落，從生意分析，長期仍會有發展的，只是有潛在的政治風險，這點不能忽視，而這個風險好難分析及預測。此股可長線，但不宜佔組合比重太高。

記住，我地唔好成個組合，只集中係1,2隻股票身上。

最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

因此﹐我建議你每有反彈，就慢慢分段沽出部份中興通訊（0763），換碼至其他優質股，咁會較理想。

2) 你要8年做到2倍增長，需要每年平均升幅達15%，才可以做到。

要達至這個升幅，你必須要投資一些增長力較高，但同時風險較大的股票，才有機會做到。

由於你只有8年就退休，不宜承受這樣高的風險。因為投資這類股票成功時，回報當然可觀。但不理想的時候，你損失都會較嚴重，你要明白這個風險。

我會建議你，最好集中係「平穏增長股」。這類股票升值能力雖然不算好高，但勝在有平穏增值效果，波動性無咁大，較適合你這個年紀的人士。

到你接近退休的年齡，應該開始投資一些收息類工具，例如收息股，以平衡組合，同時減少風險，到退休時，就宜將較大比例，持有收息類資產，減少平穩增長股比例。

3) 你52歲，可以用「平穏增長股」作組合。現在你每月先用5成儲蓄，即$4000做月供。其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、領展(0823)、希慎(0014)、太古地產(1972)

至於持有30萬和每月儲蓄，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

------------------------------------------------

Q21835：

龔成老師你好，現時我28歲已每月月供股票$5000大約有2年，但係理財方面仲係好生疏，所以想請教你的意見。目標想係之後的2-3年內儲到70萬左右，並為將來可以有財富滾存同時達到財富自由。

現金:10萬左右,月入20K

手持:
100股(00823)領展
800股(00005)滙豐

現時月供組合：
$1500（02800）盈富
$1500（00066）港鐵
$2000（00388）港交所

1.月供股票有無邊隻股需要賣出?

2.如果要達到目標是是否需要更變投資組合方向?如果需要增加， 哪些股可以?

3.想請問(00945),(00001),(01810),(00012)現價是否合理,是否可以分注買入, 還是適合月供?

4.基金投資是否適合我?

謝謝！

龔成老師︰

1) 當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

以你28歲計，應先做好增直部份。你現時月供股票和資金分配，係合適的。

但現時大市只在合理區，最好每月的資金不要用盡。要留有部份，等大跌市出現時，可用來掃貨。

另外，我建議你將$2000，加到盈富（2800），因為盈富本身是一個50隻股票的組合，就算資金多一點都無問題，可以令你的組合更為平衡。

2) 以大市過去年平均回報10%計（連股息再投資），你每月投資$5000再加上你現有10萬資金和持股，5年後(已計算已供的2年)大約會增值至52萬。

如果要達至你的財務目標，你可以增加投資年期，例如去到7年，就會滾存到$75萬，較接近你的目標。

或者，你可以選擇現時將月供金額，加大至$9000，都是一個方法。

又或者，你可以提高你的回報率，例如投資較多潛力股，當然，這會令你風險度提高，以及要求你有更多的投資知識，你都要明白這點。

3) 這4隻都適合月供，現價月供係無問題。

但若要直接入貨，小米(1810)現價偏貴，要回多1,2成，才開始算合理區頂。其餘3隻，現價合理，可以分注入貨。

4) 要視乎基金投資目標、質素等去考慮。以你年紀，盈富基金(2800)、安碩恒生科技（3067）這類有質素和增長力的ETF基金，就會適合你。

------------------------------------------------

Q21836：

龔老師，我大約兩年前開始拜讀你的文章，資產在這兩年大跌巿間，幸有聽從你的建議，不但沒有少了，還喜見增長，多謝你。現想請教你，我可以如何改善我的資產配置，早日達到第一個一百萬，

從而步向財務自由呢？

我現時36歲，文職公務員，月入4萬5左右，持有現金＄26000。另持有保險現金價值約有＄63500, 當中有50萬人壽，100萬意外和116萬危疾保障。

MPF現有約27萬7千，過多一年半就過probation, 屆時僱主供款會增至15％。

現時每月債務還款約＄12000, 2022年12月還完；交租及雜費＄15000；孝敬爹娘＄9500。

現時持股如下：
4手 3072 買入平均價＄162.4
2手 3187 買入平均價＄21.4
16單位(碎股 ) 0066 買入平均價$41.279
2手 0303 買入平均價$47.35
2手 0388 買入平均價$445.1
1手 1373 買入價$2.5

我對新上巿的2814有興趣，應否用來取代3072？還是可以同步進行？

謝謝賜教

龔成老師︰

首先，若你現時債務，貸款利息係較高。最好係開始投資前，先作清還，因為佢會拖低你長線回報。

以你36歲年紀，應先做好財富增值部份。

ETF三星亞太高息房地產信託(3187)和偉易達(0303)主要係收息，增長力唔高，唔建議持有太多。

其餘股票都有質素，你照持有就可以。

三星FANG ETF（2814）的投資目標，係追蹤NYSE FANG+指數的表現。是一個美股潛力股基金。

而日興環球聯網(3072)投資目標是尋求提供在扣除費用及開支前與iEdge-Factset Global Internet Index (“指數”)的表現緊密相關的投資回報。

當中包括不少環球有潛力企業，例如阿里巴巴、FACEBOOK、AMAZON、百度等。

相對之下，3072會較全球性，而2814會集中在美股。2隻都有增值潛力和投資價值。你可以睇翻佢10-15大持股，去決定邊隻較適合你。

3072和2814同步進行都可以，但當中有不少股票，都係重覆。因此，這2隻ETF佔組合比重唔可以太高，連同其他科技類股票，你要控制在3成佔比以下。

另外，我建議你用每月閒錢，去做月供，來進行一個長線的財富增值。

策略上，你可以投資「平穏增長股」和「潛力股」。你每月5成儲蓄做月供。其餘先儲起，用一邊月供一邊儲蓄的策略。

選股上，你可以投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

潛力股可選安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）。但佢地波動性和風險會較高，你要自己平衡。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

餘下資金，我地就等機會，當大市出現較大回調，就加大力度掃貨，然後作長線投資。

------------------------------------------------

Q21837：

老師，請問 7226 同 3076性質是否一樣，7226是否一樣可以長期持有。

如果我早年半前睇到你page就好，年半前那時係低位入過金沙，舜宇，但都只係賺差價，甚至騰訊係186同439有貨，都沽咗，真係好後悔。

現在開始要慢慢調整手頭股票，將無質素換有質素去長期持有。早前33.7入了一手金沙，諗住分注入，

(我理想價係希望30左右先入，但今年好似比較難去到30，所以33.7都先入一手)長期持有，不過這之後已升，又要再等下。

龔成老師︰

你才40歲，只要現在學好正確投資方法，依然有充份時間，去做好增值。

你現時入金沙(1928)策略正確，好多時優質股，都唔會咁易回到較平水平，所以我地要分注，去平衡入唔倒貨架風險。

現要時$33.7入左首注，你預每回調10%左右加注，咁就可以。

ＸＬ二南方恒科（7226）產品之投資目標為追踪恒生科技指數每日表現兩倍（２ｘ）的投資業績。

雖然我長遠認為，恆生科技指數正面，但中短期可以較波動，由於這基金有槓杆，就會令價格更加波動，其實有風險。

雖然都係追蹤恒生科技指數，但我會較建議投資無槓杆的恆生科指ETF（3067），始終較好。

------------------------------------------------

Q21838：

阿sir 雖然距離1,000,000仲差好遠，但想同你講多謝你, 自從2018年尾同男朋友分手, 人生好似無咩目標！

但2019年初認識到你, 不停睇你fb, 我就由零知識開始不停儲錢同長線技資，供股etc. 2018年年尾由10幾萬努力儲錢投資到而家70幾萬（我知道雖然唔多錢, 比起好多80後既人)

呢兩年幾不停睇你既書同你介紹既書藉增值知識，然後2019年就報名上你堂, 更加明白價值投資法同長線投資嘅重要性....

你既正量真係幫到好多人，岩岩睇完你既千萬富翁既書, 而家思考緊點樣可以用空閒時間去做副業, 我其實覺得keto desserts呢個market係有得做,

本身都鐘意baking, 而家仲思考緊點可以行出第一步, 始終要拎個食物牌先可以賣出去, 但拎一個正規既食物牌要投資好多錢, 而家就係stuck住係呢一步。

唔知阿sir你會唔會有d意見可以比到我？

PS 希望不久將來成為千萬富翁

我希望盡快可以cap screen到我第一個一百萬給你，多謝你。

同埋我2019年頭開始每個月供0003($2000) & 2800 ($3000)，因為當時無咩投資知識，因為你話供股最少要3-5年先可以平衡風險,

想請教你 我係唔係應該繼續供到去5年就停？ 到時就轉供潛力股？

定一話而家可以停供呢兩隻股轉供潛力股？

我今年34歲了

龔成老師︰

能夠有這樣成績，都是你自己努力學習和實踐的成果。記住，投資路上要一直保持學習，才會成功。

至於100萬，我相信你按部就班，可以好快會達成。

至於月供方面，我希望大家最少供3年，並持有5年以上。但當然，不論係月供年期，定持有時間，都係越耐會越好。

而幾時加入潛力股，這個係睇你人生階段作決定。

我地投資會運用「先增值，後現金流」作方法，初期應投資較多增值類資產，較後期則應投資較多保守類項目。所以係分配投資項目時，會因應番你的人生階段。

較年青人士，可以用「平穩增值股」+「潛力股」。中年人士，可以較集中翻係"平穏增長股"。當你已近退休之年，就應集中在「收息股」，去創造平穏現金流。

以你34歲年紀，應用「平穩增值股」+「潛力股」作組合。

潛力股︰可選安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）

如果你現時覺得，自已投資經驗都未算多，潛力股這類風險較高的股票，你就不要持有過多，最多維持2-3成好了，甚至先維持現狀。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

另外，你要合法從事這門生意，這個成本始終都要投資。但若你覺得太貴，你可以睇下有無志同道合架朋友，一齊去開，去分擔成本。

但你要明白，當多一個生意合伙人，就會多一個變數，甚至係多一個麻煩，你要了解這個風險。

又或者，你最初可以到相關公司工作，最好是一些中小企，你要盡力了解該生意的營運，同老版傾計，這都是一個方向。

------------------------------------------------

Q21839：

呀sir,最近先有時間去買你嘅書睇,但係好似已經太遲,因為係3月左右係高位買左3690,9618,9988,已經蝕緊好多,呀sir想請教下依加應該止蝕定係轉買另一隻股呢？謝謝

龔成老師︰

首先你要明白一個概念，我地持有一隻股票與否，關鍵位是企業質素、前景，不要被買入價影響。因為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心，照持有就可以。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

這3隻股票，都係有質素。就算你買貴左，長線企業會增值，慢慢會重回你買入價，故可以守。

但當中美團(3690)有潛力的，過往一直虧損，到近一年，開始有正現金流，這是一個實質的利好因素，因為之前一直在燒銀紙，現時初步見到成效，不過，估值的方法好虛無，因為現時的市盈率仍過百倍。

如果有利好消息，佢可以上好多，但如果估值修正，股價可大跌。

因此，這類不確定性高的股票，只能小注。若佢佔你佔合較大比重，建議你沽少少，去平衡下個風險。

------------------------------------------------

Q21840：

您好 ! 龔成老師,

1. 本人2020年7月14日$8.12買入01114 華晨中國 ,但於2021年3月已停牌, 以你專業意見, 此股有無機會復牌呢?

2. 2021年 2月8日 $0.485購入#00451協鑫新能源, 可繼續持嗎?

3.2020年11、12份 分別$4.74, $4.59 (股數3萬)入00831 利亞零售 之後於12月份分別$0.69, $0.63 (股數7萬)

12月31 日已收了股息$114,900 你覺得應該繼續持有，還是放再賣其他股呢?

龔成老師︰

1) 華晨中國(1114)自2021年3月31日起停牌，集團由於未能完成2020年年報，故要待公司釐清當中資料後，相信會有機會復牌。

但由於暫時無佢太多資料，根據以往數據分析，集團只算係不過不失，投資價值一般。

現時你暫時無野可以做，你預復牌後，如果2020年數據較差，股價會有較大波動。

2) 協鑫新能源（0451）主要從事光伏電站之開發、建設、經營及管理。

生意增長力不強，可過盈利十分波動，股價上落大，高風險類，市場往往炒作多過實際。

要睇你承受風險的能力，股價有時會大升，但又可以跌得好快。整體的投資價值，未算高。長線計，換至其他優質股，會比較好。

3) 利亞零售（0831）賣左「ＯＫ便利店」業務資產後，就只剩餘集團的品牌（聖安娜、Ｍｏｎ　ｃｈｅｒ和Ｚｏｆｆ）。

預期發展只是一般，同埋之後好睇佢資金的運用情況，投資價值只是中等。

若你持貨佔組合比重不高，你持有都可以。但若佔比重較大，最好估出部份，換至其他優質股。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21741-Q21760）

Q21741：

老師，如一個新手剛入股市卻遇上跌市, 剛買的股票即買即跌可以點做?

因為新手, 心理質素不夠強大, 好容易驚唔知發生咩事, 以為股災, 請問你會有甚麼建議？

龔成老師：

第一，你要了解自己所買入企業的業務，只要清楚，就不用擔心。

第二，了解股價下跌原因，是短期因素，還是企業核心有問題。

第三，將焦點集中翻企業，而不是價格。

第四，如果你每次股價上落好大心理壓力，就不宜投資高風險股，可轉到一些股價較穩定及收息類的股。

------------------------------------------------

Q21742：

你好 ,龔Sir, 我日日睇你個 page, 多謝你教嘅理財之道! 知道好多人問你投資問題, 但都希望你可以抽空回答我, 感激不盡!

本人33歲, 有家庭(兩位小朋友), 以下係現有嘅組合, 想龔Sir幫忙睇下有咩野要改善 (太散?太亂? 有冇野唔應該keep要賣走?),

同埋有一筆定期 (10萬港元黎緊到期), 想睇下龔Sir會建議點樣運用 (可唔可以再入少少房託 / 6823作收息用? 入幾手3067? 買資源股如龍源電力, 信義能源??

定領展 / 小米??), 十分謝謝!

收息股 約佔組合51%
陽光房地產基金 5手 @4.12
越秀房产信托基金 4手 @4
置富产业信托 4手 @7.18
富豪產業信託 5手 @1.51
郵儲銀行 2手 @5.96
香港电讯 2手 @10.86
越秀交通基建 1手 @5.32
深圳高速公路股份 1手 @7.55
新創建集團 1手 @8.9


其他 約佔組合19%
長城汽車 3手 @21.85
南方Ａ５０ 5手 @19.99


新經濟股 約佔組合31%
京東集團－Ｓ 1手 @292
美團－Ｗ 1手 @285.8
快手－Ｗ 1手 @257.8
舜宇光學科技 1手 @165

龔成老師︰

你現時組合數量太多，長線維持10隻左右好了，會較易管理。

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

你現時持股，質素上係有，但有2個較大問題存在。

首先，以你現時33歲去計，應先集中做好財富增值部份。策略上，你應投資「平穏增長股」和「潛力股」這類有增長力股票。

但你現時組合，郤一半是「收息股」。佢地係有質素，但增長力好弱，會拖慢你財富增長速度。除非你個承受風險能力好低，否則唔建議持有太多。

第二，任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

你現時房地產類別，有少少集中，要注意。

現有收息股，建議你最好沽出部份，換至有增長力股票，長線會對你較有利。

至於其餘持有股票，包括你計劃投資的龍源電力(0916)、信義能源(3868)都有投資價值。

但信義能源（3868）不能投資太多，因為佢業務都有風險的，要注意股價波動，如分注長線都可以投資。現價合理區頂位，之前略貴。

將來投資，你可以集中「平穏增長股」和「潛力股」。如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，可視乎你當時投資經驗多寡和了解這些股票程度而定。

現時大市只在合理水平﹐唔算好平。你定期的10萬，我地就等機會，當大市出現較大回調，就加大力度掃貨，然後作長線投資。

另外，定期這類定息產品，增長力好低，同樣唔適合你年紀，暫時唔好再用。

------------------------------------------------

Q21743：

龔成老師你好，想問下
泡泡瑪特，79.35蚊入
聽日公布業績，依家係咪一個適合嘅時候去溝貨？

另外京東健康，120蚊入
幾時可以溝下貨？

龔成老師︰

首先，我想你確認自已是否理解"溝貨"與"分注"的分別。溝貨是愈跌愈入，同時不理企業質素，不理自己的設定金額，盲目去入。分注則是「一早定好買入策略，一早定好本金總數，並以有策略的模式進行」。

如果你係"分注"的話，你可因應平貴和質素，去進行。若是"溝貨"，就不是再入貨，因為再平，都只會令你增加風險。

Pop Mart泡泡瑪特（9992）是一家覆蓋潮流玩具全產業鏈的一體化平台，當中包括藝術家發掘、IP運營、消費者觸達及潮流玩具文化的推廣。

根據弗若斯特沙利文報告，分別以2019年的零售價值（市場份額為8.5%）及2017年至2019年的收益增長計，集團是中國最大且增長最快的潮流玩具公司。

合作伙伴中不乏知名品牌，好似迪士尼、HELLO KITTY等等。而產品中，最為人所認識就是"盲盒"，此銷售模式為集團貢獻不少。

雖然中央規管會有負面影響，但長線質素和發展前景依然係度。2019年純利為4.5億，但現時市值郤超過700億。現貨若佔組合比重唔，可持有。但在這個水平加注，風險太高。

由京東（9618）分折出來京東健康（6618）其業務主要提供線上線下的醫藥出售和健康管理服務，業務布局包括醫藥電商、互聯網醫療、智慧醫療解決方案、健康服務等4個大板塊。

京東健康旗下京東大藥房，更是內地線上線下收入規模最大的零售藥房。其互聯網醫院，日接診量超過10萬次。

質素上，京東健康是有的。但要做估值好困難，佢未有盈利之餘，不確定性都大，但市值郤去到3500億以上。

只能說，而價計依然唔平。若你只是小注，可以守。

------------------------------------------------

Q21744：

sir,又想問問你，你說現時恆指23000左右是便宜區，那麼我大概也是在這範圍開始分注入市。我打算動用50萬買下面既股票：

1. 1810 （用50%的資金）
2. 1585 (?%)
3. 136 (?%)
4. 558 (?%)
5. 3738 (?%)
6. 8606 (?%)

因為小米較穩健我有信心所以用50%的資金投入，sir其他你會建議我點樣分配資金？邊隻高比例d，邊隻細比例d？可以比個數據我參考嗎？謝謝成哥！

龔成老師︰

你好年青，只係20出頭，投資選項上可以較進取。

但你要留意，任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

你持股中有主要係潛力股，佢地雖然有增長潛力，但同時波動風險都唔細，故不宜持有太多。以你年紀，最多佔5成好了。若你投資經驗較弱，要再調低至3成以下。

而你所講潛力股，除了小米(1810)係較優質外，其他都係風險較高類型，只宜小注(佔組合5%左右)。

倢冠控股(8606)是一間香港資訊科技服務供應商，佢規模唔大，每年營業額和盈利好細，而且股價都幾波動。

以佢2020年1000萬盈利計，現價欲去到過10億，此刻投資，風險好高，唔係咁建議。

力勁科技（0558）無研究。

如果從過往業務情況分析，這企業投資價值，質素只是中等，唔算好值得投資。不過唔知近期股價上升的原因，除非你確定佢上升背後的因素，是由於一些對企業長期利好的因素，否則，不宜投資。

除了潛力股外，餘下資金你可以集中係平穏增長股，令組合更平衡。

平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、領展(0823)、希慎(0014)、太古地產(1972)

大市現處於合理水平，那50萬資金，你可以先用一半，以"分注"形式慢慢入貨。餘下一半就等大跌市機會出現，才大力度掃貨，並長線投資。

------------------------------------------------

Q21745：

老師！你好！我一直有看老師的問答同定期勵志既post! 真心多謝你！我已經睇完你本80後百萬富翁同買左5年買樓4部曲！但我有些問題想指點迷津⋯⋯

我想問有關置業問題！我係90後但就快29+1、希望5年內甚至更早可以買第一層樓自住！因為都想結婚同組織家庭

我之前睇過兩個樓盤「2-3年樓齡既單幢樓房，係深水埗/慈雲山，均是190尺-245尺既納米單位

我睇完老師本書4部曲講到先買細屋再換dream house,就開始迷茫，因為有朋友教路不好買納米樓、無升值潛力，換不到大單位！但舊樓不是一樣沒升值能力嗎？

又要支付大廈維修費，但我目標第一層樓只能付出450萬樓下既樓價同借9成按揭攤分30年供還款，這樣說在市區好難找到、除非樓齡已經超過30年、但又引申出不會批到9成按揭。

老師，請問我應該點做法？買舊樓大單位？買新樓細單位？我想住市區、不想考慮新界區。。因為家人住所同工作地方均是市區。。

不知道去向，感謝你。耐心等待回覆

龔成老師︰

想借買細屋再換dream house，你細屋必需有一定投資價值，至少跟樓市同步，否則就沒有意義。

納米樓尺寸太細，連一個基本家庭生活所需的300尺寸都無，投資價值相對較弱，唔建議你投資。

至於過30年的樓，唔代表一定無投資價值，但就要小心選擇。而且正如你所講，較大問題係銀行未必會批出9成按揭。

所以，其實你此刻問題重點，會係你置業資金不足，令你變相找不到合適選擇。

我建議你先用優質股，去累積更多置業資金，才去考慮物業部份，咁會較理想。

你可以用「平穏增長股」 + 「潛力股」的組合，去進行增值。你每月先用5成儲蓄，其餘先儲起，用一邊月供一邊儲蓄的策略。

現時大市只是合理區，你現有資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨。

------------------------------------------------

Q21746：

你好！我從來沒有接觸過任何股票，沒有任何投資，我只有五萬多元港幣積蓄，長期放在銀行做定期存款，可惜利率很低！我只是想短期（半年）賺一些。

請問，00968「信義光能」好，還是00135「崑崙能源」好呢？

龔成老師︰

首先，你要明白一個正確的財富增值方法。其實係長線去持有一些優質股，等佢地自然增值，以達至財富增長架效果。

半年只係一個好短架時間，唔係咁理想。一隻優質股，最少要持有3-5年，甚至更長，個財富增值效果才會明顯。

信義光能（0968）本質不差，業務保持有一定的增長力，股本回報率處高水平，加上現金流強勁，是有一定質素，可長線投資的股票。

現價合理區頂，如果想入，要慢慢分注，但仍不是大注投資的時候。這股股價上落都大，要注意金額。現價算合理區頂，如果想入，要慢慢分注。

昆侖能源（0135）雖然質素都算有，但不是最高質類別，佢對油價較為敏感。佢的產品自主力較弱。

石油是商品，當中沒有差異性，佢地要將石油賣出，只能跟國際油價，這令佢地處於被動狀態。沒有價格自主的能力，這令佢地的獨特性有限。

這類商品企業，都可投資，但就要明白不是最高質的企業。由於質素中等，唔建議大注投資。

整體質素而言，信義光能（0968）會較高。但波動性風險，同樣都係較高。若你投資取態係較保守，我唔建議你持有太多。

------------------------------------------------

Q21747：

擔心好快出6G。而我對6G的技術上疑問是6G是否在5G的基建基礎？即是6G要發展，在現在的鐵塔上換6G的設備？還是要推返哂所有5G的硬件？

我相信是前者，就像港鐵一樣，港鐵舊列車就是5G比喻，新列車就是6G，其他硬件（車站、電纜、路軌是不變）

另外，鐵塔會否有一帶一路商機，他們大可以去中國以外地方起鐵塔幫其他發展5G?純粹代入管理層去諗，當然，電訊涉及國家安全，又是政治層面，又另一回事。

現代學習提升思考層次，代入如何我是鐵塔高層如何思考經營鐵塔

從你的千萬富翁本書學習到的，請師傅你不要介意，純粹是向師傅你交流來提升自己層次。向師傅你學習

而且單打獨鬥永遠睇唔到自己盲點，有互動交流是最好的

龔成老師︰

未來6G發展，相信訊息傳輸速度和精準度，會比現時5G有倍，甚至更多的增長。

至於將來6G技術，對相關硬件需求，集團要作什麼樣變動，去配合這種新技術學，現時都無一個切實的定案。

但由於3大電訊商為主要客戶，內地需求得到保障。在內地極高市佔率，有壟斷優勢。加上，本身已多行內累積一定技術和經驗。

將來要發展6G業務，相信集團很大機會成為當中重要的一員。所以，集團長線發展係正面。

至於向外發展，一帶一路係一個機遇，但當中都有不少不確定性，故估值上，只宜作一個參考。

你預佢潛力度無以前咁高，算係平穏增長，至潛力股之間的股票。此股有投資價值，但不宜過份大注。

------------------------------------------------

Q21748：

龔成老師你好！自2018年跟隨你的指引月供股票，歷經數年時間，都有穩定的現金流收入，謝謝你！

現有三條問題，希望老師解答一下，謝謝！

1. 早前第一次買科技股，選了阿里巴巴（9988），$246.8入，現在很波動，捱價中，請問公司前景如何？又可在甚麼價位溝貨？

2. 海螺水泥（914），大約$46@水平入了少許，請問公司前景如何？及

3）現有資金300k，如何逐步建立一個攻守兼組合？（已有兩電、置富產業、港鐵）

謝謝
攻守兼備組合

龔成老師︰

1) 阿里（9988）佢出左最新的季度業績，經營虧損76億元，主要由於國家市場監督管理總局就中國反壟斷法處以罰款182億元。

如果扣左這資罰款因素，經營利潤105億元，同比增長48%。經調整EBITDA同比增長18%，去到近300億。

業績略比市場預期差，因此會令股價短期較波動。

現價合理區中間，長遠價值仍在，不過短期會弱。如果你現有持貨，佔組合比重唔多，現價可再加1注。之後，每回10-15%左右，再加注就可以。

但緊記，個別企業唔好佔組合15%以上，以免出現過度集中風險。

2) 安徽海螺（0914）有質素，有增長力。

佢主要從事生產和銷售熟料和水泥製品，業務地區包括中國東部、南部、西部、中部及海外。而安徽海螺是水泥行業中，全球最大的單一品牌供應商。

水泥屬於基礎原材料行業，對建築行業有很高的依賴性，同時亦會與經濟增長速度有較高的相關性，特別與固定資產投資相關。即是說，當中國基建及房產市場不景，水泥行業會比一般行業處較大的不利狀態。

另外，水泥企業在生產過程中，燃料成本佔總生產成本中約佔了超過一半。若能源價格出現較大變動，就會對企業成本造成較大影響。因此，當能源價格出現較大上升時，將引致安徽海螺的成本增加，影響其中毛利。

綜合來講，佢擁有相當規模、生產能力，有一定的質素及賺錢能力，而水泥行業長期將因中國城鎮化以及一帶一路的建設，仍然會增長，但不會像過往般快速，而是進入較平穩的時期，在本質上此企業不差，你現貨可持有。

3) 我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你現時35歲，應以增值為主。2電(0002, 2638)、置富(0778)主要係收息，增長力較弱，故不要再加注。至於港鐵(0066)，係可以。

建議你用「平穏增長股」 + 「潛力股」，去創造一個攻守兼備的組合。

若以你年紀計，2種股票比重，可各佔一半。潛力股始終有一定風險，如果你投資知識不高，或者想保守D，可較集中在平穩增長類股。而潛力股，可較小注。

現時大市只係合理水平，現金和股票最好各佔一半。若你持股佔組合不到一半，你可以多用一些資金，以分注模式入市。餘下資金，就等大跌市出現，才加大力度掃貨。

------------------------------------------------

Q21749：

老師中國平安依家值博率高嗎! 最近回到80樓下! 同埋 依家全球通脹升溫, 但係經濟又未 復甦 呢啲係咪叫惡性通脹!

係咪會有一輪大調整! 股票同現金嘅比例應該 佔幾多比較好 謝謝老師!

龔成老師︰

係全球大印銀紙下，而整體經濟未見明顯復甦，的確有機會造成滯脹。

但我地分析一隻股票時，宏觀因素係要考慮，但只係作輔助，主要都係睇翻企業自己本身。

中國平安（2318）有質素的，佢有規模，有品牌，近年的發展都不差，不過，股價有時會有少少波動，這主要受投資市場表現影響。

這股有長線投資價值，是平穩增長型。現價算係合理區中間位置，分注投資就可以。

至於會唔會大調整，我唔知。我地投資唔好去估個走勢，你應用平貴，去為自己制定投資策略。

現時大市只係合理水平，現金可以佔3-5成。

餘下資金，就等大跌市出現，才加大力度掃貨。

------------------------------------------------

Q21750：

你好老師，本人40，已婚，暫時沒有子女，我和老公收入合共大約5萬一個月，有一個已買了不用供的公屋。

現金大約有150 萬，另股票23萬，之前有月供股票，但因為升了就沒有再供款。

尤於唔識投資，想問點可以財富增值，買樓又沒有經驗，買債卷債基會隱陣嗎，謝謝你

龔成老師︰

若你係投資經驗不多，月供股票會係一個唔錯架選擇。因為佢用長線供款，去減少左買貴貨架風險。

所以，你以往月供架做法係正確。月供可以拉平均個買入成本，除非你對定平貴極有信心，否則你應長線一直供，不理平貴。因為咁樣，反而會對你更有利和安全。

以你40歲，可以選擇一些「平穩增值股」+「潛力股」作投資目標。

以現時大市合理區狀況，月供最好用一半每月儲蓄，另一半就先儲起架策略。

由於你投資知識不高，因此可較集中在平穩增長類股，至於潛力股，只宜小小注，最好是你提高投資知識，等你有一定知識，先慢慢增加翻潛力股比例。

現時大市處合理區，150萬資金，可再用多20-40萬，分注咁慢慢盈富及其他平穩增長股。到你有較多經驗，才加大投入金額和增加一些潛力股。

你可以先用股票做增值，到有一定財富，才加入物業類。如果你對買樓無乜概念，你可以睇我本<<5年買樓4步曲>>，都會講述一些買樓相關知識。

而債券，這其實只是「產品」，物業、優質股是「資產」，所以從財富本質上，我地應較集中持有「資產」，才對我地最有利(你可以睇睇《財務自由行》一書，我從財富本質上，講述了當中原理)。同時，現時息口低，但未來有機會重回加息週期，債券未必是最好的投資工具。

至於債券基金，坊間分好多種，你要小心睇，因為有d風險低，無乜問題，有d則有潛在的風險，絕對不是保本的產品，有機會出現了「賺息蝕價」的情況。

第一，有些基券基金，會投資「高收益債券」，即是「垃圾債券」，你一定要睇睇佢所佔的比率。

第二，債券基金往往不是單純地持有債券，而是可以作買賣，以及利用衍生工具作對沖等策略，即是可能有價格上的波動。

第三，不少銀行都會提供借貸，以槓杆去放大回報，以平息借貸去賺取息差。低息環境時間題不大，但進入加息週期，不止借貸成本增加，同時債券價格往往在加息期下跌，雙從打擊下，投資價值成疑。當然，若然加息步伐不快，息差利潤就可觀。

我不是說債券基金有問題，只是說明當中的風險，因為市面上的基券基金好多，你要仔細分析。

------------------------------------------------

Q21751：

你好，想問下基金風險較優質股票 及債券高
穩健為主 投資後者為上？

現在 港股，美股及人民幣又如何投資部署？以下3因素？

1）疫情控制
2）股市表現
3）政治穩定性

龔成老師：

基金有好多種的，因此好難話基金的風險較股票/債券高定低，因為有些基金是投資穩陣股票，有些是高風險股票，有些的投資策略較進取，有的則較保守。

你一定要清楚翻該基金的投資策略，投資目標等因素，先得。

至於股票，同樣有好多種，有穩健，有不穩。

債券都是一樣，有些債券好穩健，但有些則可能連本金都會虧損。

建議你增加知識先投資，不要急。

至於你上述提出的3個因素，主要都是一些中短期因素，而我地買股票就是買企業，因此，著眼點應集中在「企業的長遠發展」，佢的業務情況、前景等。

我地最重要是建立一個長期的「財富組合」，要優質，要平衡，要適合你的年齡與風險承受程度，不是著眼於短期市況及因素。同時不是買賣賺差價，而是成為你財富組合一部分。

------------------------------------------------

Q21752：

老師，想問下保險，2013年，我無啦啦在朋友講解下，用仔名義買了一份AIA保險基金，有人寿每月供hk$2000, 要供30年，期間可以提錢走,但要罰錢，或停止供款，直至30年期屆滿才提錢

現從你身上學了一點投資知識，於是計計回報，才發現每年得1%回報，現大約有hk$15萬。

我在宏利的基金回報都不止1%

我諗緊
1.停止供款, 讓它滾存，直到年期屆滿才提錢
2.停止供款，立即提取全部錢
3.停止供款，把每月的hk$2000用來買股票

老師，有何建議?

另外，講返261 。我去銀行放，銀行只幫我排隊放一星期，之後沽唔出，我繼續沽左幾星期都係沽唔出，怎麼辦?

謝謝你

龔成老師︰

我地保險，只要做好防守部份，買足夠保障，咁就可以。用來投資增值，效果未必如優質股理想。

你現時保險基金，按年只有1%回報，係好低。從長線投資角度考慮，你將佢資金提走和停止供款，將資金轉至其他優質資產，相信長線回報會較理想。

但由於當中會有提早贖回收費，你要問清楚你保險代理，這個罸款係如何計算，才決定基金內資金，如何處理，咁會較好。

ＧＢＡ集團（0261）生意持續下跌，年年虧損，投資價值很低。

由於佢股價只有1仙，用一般架方法較難放。你可以直接打電話去銀行，只佢幫你人手掛一個少於1個仙的價位，出到貨的機會，會較大。

------------------------------------------------

Q21753：

老師，我最近計劃買約900萬的樓，但發覺 撇除家人的一百萬外，我倆還需要取大概一百五十萬左右(包括稅, 裝修, 律師費等)，

所以如果要買樓，就要套現持有的大部分股票和銀行大部分存款。並且每個月還給父母錢和供款後，可能就只剩低二萬左右。

#1 在我的角度來看，我覺得呢個情況會變成了一個每個月收入償還貸款的死胡同，資產可能無法再增值，因為可能再無多餘錢投資股票。

但我男朋友認為收入償還房地產的貸款是增值資產的一種，前提是樓價最遠必升。老師，請問這種說法對嗎？

#2 如果三年後才買樓的話，我哋應繼續投資股票嗎？而且現金和股票持有的比例應該是多少？(我個人現時比例是 現金4 : 股票6)

#3 現時樓價暢旺，樓價長遠只升不跌，如果我們真的取得足夠的首期，而銀行又借足8成，但每月可能還款後只剩約兩萬收入的話，你認為我們應該買入嗎？

謝謝老師。

龔成老師︰

1) 正確，因為我地還款當中，係包括利息和本金部份，本金部份等同買入物業資產。

我地長線財富增值，唔係單單利用優質股，我地都要講求成個組合平衡性。所以，長遠我地都要將物業，包含埋係我地組合之內。

當然，大前題係個物業要優質，才算得上係資產。

2) 你都可以維持用股票增值，以大市水平計，你現金和股票比例，係合適。除非出現大跌市，否則你資金唔好動用。

而且，這些股票當中，應以「收息股」+「平穩增長股」為主，唔好持有太多波動性偏高的股票，以減低最終回報的波動性風險。

3) 你可以睇翻你本身置業有無迫切性，如果有，而你又"供得起"，你都可以入市。因為置業後，你每月都尚有一定資金，可投入股市作增值。所以，問題不大。

若你無置業迫切性，你可以睇翻你個物業架質素，和租金回報率，去決定而一刻是否投資。

記住，就算樓價暢旺，長線港樓會升，但都唔代表你值得係而一刻，去"買貴貨"。我地都要從長線投資角度，去考慮而件事。

------------------------------------------------

Q21754：

龔成老師,想請教你，今年我43歲,堅持有十五隻股票,打算將組合改回十隻股票,你會建議我持有哪十隻令到組合會較平衡？

現在股票組合︰

潛力股
美團 300股
阿里巴巴 200股
平安好醫生100股
中國生物製藥2000股
楓葉教育12000股

平穩增長股︰
新鴻基地產 500股
領展500股
中興通訊 1600股
中國鐵塔 20000股
金沙中國800股
中國民航信息2000股
惠理集團 4000股

收息股︰
中移動1000股
中國電信 10000股
深圳高速公路 4000股

我打算賣出惠理,將資金換入金沙.尚餘約$70萬現金等機會.

如果跌10至15個percent加一注,會用第二次嘅買入價計算,還是用平均買入價計算？

Eg:第一注$30、第二注$38，平均:$34

另外想同你分享，20年前,出來創業,跌得好痛.

今年,我再次出來創業，開一個自己運動嘅studio.佢最差嘅情況去做呢件事，我反而係覺得係一個機會。

龔成老師︰

以你43歲計，這個組合比例係合適。

而當中股票，都係有質素，雖然有少少多，但唔需要刻意去沽出持股。你未來資金，較集中翻係當中較有質素的10隻，咁就可以了。

惠理集團（0806）是一家獨立的價值型資產管理集團，業務集中於大中華地區及亞太地區。集團透過惠理品牌管理多隻認可基金。

質素算是不差，但又不能稱為好好。

過往賺錢能力中等，但增長力就不強。你持有係無問題，不過就唔好對股價增長有太大期望。是平穩增長類。

整體質素上，金沙(1928)會較優勝，你可以沽少少，換去金沙，都係可以的。

另外，中興通訊（0763）、美團(3690)、平安好醫生(1833)是潛力股類，而且係不確定性較高的企業。投資係可以，但要控制注碼，不可佔組合太多。

大市現處於合理水平，你可以多用20-30萬，以"分注"形式慢慢入貨。餘下資金就等大跌市機會出現，才大力度掃貨，並長線投資。

至於加注計算方面，每跌10-15%個基數，會係用你對上一注的買入價。

其實做任何事，我地都會經歷失敗，這是在所難免。重點係，你有沒有在這個失敗當中，上了寶貴的一堂課。

創業好少一開始就好成功，成功都係透過無數失敗經驗，去慢慢累積出來。

現時大環境雖然尚是十分不穏定，此刻創業都有一定風險。但同時間，現時很多方面(如租金)，都會比一般情況平，所以都有一定值博率。

最重要係你了解這門生意大方向，明白自己有什麼獨特優勢，將佢盡力發揮出來，咁就可以。

------------------------------------------------

Q21755：

成老師，多謝你一直以來的分享，呢2年鼓勵咗我哋好多好多。因為你分享對樓市的睇法，上年3月我低位買咗元朗溱柏單位自住，今日已經升左50萬，男朋友都升左做老公。

後來我有買你本《五年買樓四步曲》知道元朗南升值潛力有限，不過已經買咗自住，亦都完美解決咗我哋本金小但有自住需要的問題，真係好多謝你！

但前兩日收到個壞消息，政府收咗屋企前面塊地，係2023年起公營房屋，我哋打算努力啲賺錢買第二層，想請教一下老師意見。

目標係升值潛力大嘅天水圍濕地、白石角、馬鞍山等。元朗層樓係我名，買入價410萬，按咗8成7，老公（當時男朋友）做按揭人，當時銀行話我至少月入$30000先甩到老公名走，

我做老師嘅，目前26歲月入$24000，預計4年後先有$30000人工。

老公30歲，多謝你鼓勵年輕時要更上進，佢好努力寫文章分享、上電台直播增加知名度，成功月入4萬變6萬，亦都打算一至兩年短期內開自己店做自己品牌，預計開業成本50萬。

我計過扣除日常開支，月儲4萬唔係問題，呢家有20萬現金同投資咗6萬股票，各三萬

[email protected]
[email protected]

問題一：我唔知應唔應該繼續買股票？

問題二：3067同1798算優質股嗎？可以持有？

問題三：預計4年後買樓要點理財好？買以上三區可以嗎？

麻煩老師指點下我

龔成老師︰

恭喜你，完成左人生中2件大事。

其實，你則買的溱柏係自住樓，升值潛力唔係重點。最重要，係適合你們生活所需，而且做到"供得起"，咁就可以。

而且你物業位置，都算接近港鐵站，質素會睇高少少。

1) 由於你1,2年就要動用這筆資金，去開診所。你動用這些資金增值都可以，但就要相對保守。

目標係一些「平穩增值股」+「收息股」，比例可以50:50。若你相保守些，可以「收息股」佔多D，甚至100%。再保守D，就係加入埋定期儲蓄這個選項。

到你老公要開診所前半年，就開始慢慢沽貨套現，唔好要用先一次過沽，以減低股價波動風險。

2) 安碩恒生科技（3067），有長線投資價值。若你打算將佢套現，去開診所的話。由於佢有一定波動性，暫時唔建議加注，等開完舖先再算。

大唐新能源（1798）主要在中國專注於風電項目的開發、管理及營運。

佢要從事風電等新能源的開發、投資、建設與管理，低碳技術的研發、應用與推廣，新能源相關設備的研製、銷售、檢測與維修等，與新能源業務相關的培訓、諮詢服務，以及房屋出租。

過往的業務發展不差，長遠都有投資價值，不過規模較細，唔建議投資太大注。

3) 到你老公新舖開張，一切穏定，可以再開始每月儲錢時。你就可以月供「平穏增長股」 + 「潛力股」，去做增值，累積置業資金。

你每月先用5成儲蓄月供，其餘先儲起，用一邊月供一邊儲蓄的策略。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨。

3個你所講的置業地點，會以馬鞍山為最好。

白石角，是一個自成一隅的新社區，但這社區的設計，密集程度太高，同時配套不足，物業價值不算高。

天水圍始終同市區有一段距離，投資價值會較弱。

另外，我地做財富增值，除左講增值潛力外，都講組合平穏性。

由於你已經有一間物業，未來再買新物業時，會成個組合偏晒去物業類，會出現過度集中單一資產的風險。

因此，你唔需要急去買第二間屋。再投資第二個物業時，必需確保係買樓同時，都可以保有一定股票係手，作增值之用，才好考慮出手。

------------------------------------------------

Q21756：

你好，請問知唔知道比亞迪在智能汽車例如自動駕駛方面有咩進展？謝謝你

龔成老師︰

比亞迪(1211)係智能車聯網上，一直都在發展，2020年8月，比亞迪DiLink3.0系统上線，進一步為AI、語音識別、車聯網、大數據等技術升級。

2020年，集團同時入股深圳華大北斗科技，相信係為令智能駕駛部份，佈局變得更完善。

以集團規模和經驗，相信長線智能汽車發展，會係正面的。

------------------------------------------------

Q21757：

老師：唔好意思，又打攪你

請問現時持有幾隻科技股最近都跌左好多，我唔知應該跌左咁多再加注，定止蝕轉其他優質股

以下是持股資料：

9988 200股 買入價243.5
9618 100股 買入價329
981 500股 買入價27

謝謝！

龔成老師︰

你唔好將個重點，放錯左係買入價，或者帳面賺蝕上。

我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

你現時持有股票，都係有質素，可照持有。

至於是否加注，就要睇翻你成個組合配置，同股價處於什麼水平。

你上述的都是潛力股，佢地有一定風險。若你係較年青，這類股票佔你組合，可以5成。但若你較年長，或者投資經驗較淺，就要向下調整。

以股價計，現時阿里巴巴(9988)和京東(9618)都合理區中上位置，若你資金足夠，現價可以加1注。

中芯國際（0981）業務有增長力，質素係有，但未到最高質素。

加上之前熱炒過，股價大上大落，投資要注意風險，這股唔建議大注。

------------------------------------------------

Q21758：

依家上緊你既堂，真心覺得你教緊既野同坊間既炒炒賣賣好唔同，我想賺多D錢！麻煩你幫我睇睇有咩可以改善（其實我有個目標...就係好想將來係澳洲買樓！）

我今年29歲，男友33歲，打算2/3年後結婚。

我2018年開始買股票，現有大概10萬月供股票。（其實係咪keep住月供會好d?因為依家係不定期咁買...）

388～34股（＄253.36）
66～310股（＄43.45）
1928～1手（＄34.57）
823～134股（＄66.98）
1177～136股（＄7.33）
2800～724股（＄29.7）
1448～2手（＄7.13）
6823～2手（＄9.96）
2638～2手（＄7.49）

1. 我自覺賺既幅度較細，係咪時候要審視投資上既配置？因為太保守變左增長/潛力唔夠？如果真係潛力唔夠，請問有冇邊D股票係有機會做到3年後有30－40萬？

2. 黎緊就畢業，要還學債。我有諗過襯審視配置既同時，將66賣左還左部分學費先？

3. 我覺得係儲現金方面做得冇咁好，其實咁既年紀，儲現金比例應該大約佔資產幾多成？

4. 如果我想達成係澳洲買樓既目標，應該可以點做？

我會視老師為我理財上既榜樣...希望有一日我地都可以好似你咁做到財務自由。

感謝和辛苦老師你花時間詳細解答我地既問題，祝老師身體健康，大家一齊努力

我仲有1手 8473，＄0.34買入

龔成老師：

1）潛力度的確唔算強，以你地的年齡及投資目標，其實收息股如港燈（2638）、香港電訊（6823）其實未必適合，你可以考慮轉換部分潛力股。

當然，平衡組合都好重要，你太過進取都唔得。

安碩恆生科技ETF（3067）、阿里（9988）、騰訊（0700）、港交所（0388）、舜宇光學（2382）、小米（1810）、ＧＸ中國電車基金（2845）、中生製藥（1177），其實都可考慮。

但就要明白波動性比上述會高左，同時風險大左，你要自己平衡。部分要等回少少先入。

現時你月供的，都是有質素，但可以轉多少少在潛力股類別。

2）如果利息唔高，其實唔需要太急（當然，我唔清楚你當中的條款），至於港鐵（0066）其實有質素及基本增長力，在配置上，可留，如果真的要賣股票還學費，就賣收息股。

3）我地會考慮你年齡及現時的市況平貴度，你可以留3成現金左右。

4）你現時應該著重「增值」層面，目標是利用儲蓄及股票，去追到的目標樓價的數。如果你打算在1、2年內買樓，就未必適合放太多錢去投資，但如果你3年後先會買樓，就要好好利用這段時間去進行增值。

因此，你的方向應該是投資「平穩增長股」+「潛力股」。

至於彌明生活百貨（8473）業務不過不失，發展能力中等，不是高增長的類別。

以佢現時的經營情況，算是合理價，但這股始終規模不大，加上近年的盈利有下跌情況，存有風險，因此不建議太大注。

另外，政治相關因素，都會令這股波動，要明白股價風險，政治因素是好難預測的。

這股唔建議持有太多。

------------------------------------------------

Q21759：

龔老師：本人手持以下股票，可否繼續持有？還是就算損失也要減持？

我之前買了些股票，買入大跌，但一直不捨得減持，到後來忍痛減持，它又回升，當然仍未回家鄉，但起碼損失少点，所以眼見以下股票近來股價不濟，怕又重蹈覆轍，請老師指点一下！

9988 ：1500手均價$249
388 ：800股均價$441
1288 ： 2000股均價$3.2
1339 ：1000股均價$3.48
1398 ：1000股均價$5.11
003 ：2000股均價$12
3690 ：200股均價$266
6618：200股均價$133
1810：200股均價$31.85
1024 ：200股均價$235

另外，後想問：其实買股票心態應是怎樣？我想買股票心態是：增值財富。假設快手當日我$115有一手，去到$370(或者應说去到自己心中的底線那刻）是否應 take profit 先？

還是放在床底讓它滾下去(假設我不急需那資金)？像這快手，當時我沒有放，之後見回落，我就入多一手，結果現在繼續下滑！請龔老師指導下本人心態！

盼望老師回覆！！謝謝！

龔成老師：

最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

你持有的股票，並不是無質素的，基本上都可以持有，但有兩點你要注意，第一，你要做好配置，例如你不少是銀行股，就會有行業集中風險，你要持有優質、平衡的組合。

另外，你有不少股，都是近一年熱炒的股，反映你在選股時，只懂跟市場去買，而這動作是危險的，因為當市場熱炒過後，股價一般都會大幅回落。不過，你上述持有基本上都有質素的，只是你日後要注意翻這點。

第二，你要留意平貴度，如果一隻優質股過貴買入，你都有可能出現損失，如果未有企業價值概念，就多用月供或分注投資模式進行。

至於你問快手（1024）的問題，我地會見到，有時股價上到某個價位，賣出等跌再買入，會有較高回報。而有時又會見到，一直持有會有較好回報，例如港交所（0388）、騰訊（0700）都是升值100倍。

而根據統計，後者的方法，能令投資者有較大的總回報。

當然，有時股價真的貴，都可以考慮賣少少，但點都建議有基本的貨在手，因為長線持有的贏面始終較大。

------------------------------------------------

Q21760：

龔sir您好, 上緊您既堂, 有d問題想請教下您:

我今年31，同我先生月入約40k

-有40萬股票(水桶1-3都有)
-有20萬存款同埋
-有兩份重有10年要供既儲蓄保險(每月大約供$3000)。

1.我地本身同緊屋企人住(層樓有我名), 但都想換樓, 而家住個到始終都舊, 您會建議樓換樓還是過多5-10年等有返d錢先再買多層樓再將而家呢到收租? (而家層樓值450萬, 睇過現時租金大約可以放到11k一個月)

2. 未來一兩年想試下開間餐廳(我先生係廚師)，我同我先生想選址係將軍澳, 因為人口密度較高人流較多, 想請教您有咩睇法。十分感謝!

龔成老師：

1）以累積財富的角度，遲少少先換樓會較好。

首先利用這刻的資金投資股票，先將財富增值，到5年後先換樓，這樣可以有更大的總財富。因為現時股票的增長力，好過香港樓，因此先投資股票會較好。

當然，你自己要考慮自住因素，因此可以在兩個方向取平衡。

2）其實都可以的，有人的地方就有這個需要，而將軍澳是住宅區，你地的方向應較為街坊。另外，要記住做生意技巧，食物是其中一環，但生意會更重要，想想麥當勞你就明。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。