【龔成問答信箱】（Q21761-Q21780）

Q21761：

老師你好，我上堂見你有教Benjamin 選股方法，其中一個係計流動資產淨值的3分2

以港鐵#66為例

流動資產=43,495 M
流動負債=41,651 M
流動資產淨值 = 43,495 M - 41,651 M = 1,844 M
流動資產淨值x2/3 = 1,844 M * 2/3 = 1,229 M

25/6/2021 的總市值 = 2,649.53 B
已發行股本(股) = 6,183,275,373
25/6/2021 的收市價 = $42.85

1,229M 除以 6,183,275,373 = $0.19
根據Benjamin 選股方法, 港鐵股價要跌到$0.19 先算便宜

想請問以上計法正確嗎?

龔成老師︰

對，你的計算是正確，但要留意，這只是一個「以資產角度計，貪平的方法」，即是說，我地估值有好多方法，而這個方法，就是假設「就算企業業務再差都好，流動負債點都值錢的」，以爛船都有三斤釘的角度出發。

佢這個方法，只係其中一個估值方法。佢以流動資產淨值，去計算一個有安全邊際的估值。

但由於佢這個方法，只係著重於資產價值上，而港鐵(0066)係一間有潛力企業，未必能有效反映實際情況。

所以，我課堂經常會講，我地最好用多個不同估值方法，去得出一個較立體的估值結果，這個答案，才會較有參考價值。

------------------------------------------------

Q21762：

因為我和家人都有貨(完美健康1830)，但其實不多，大約1-2手，我和家人都不太認識「買賣單位降」和改名會有什麼影響，但我們擔心不知會否影響現時我們持有貨的價錢，

例如現在1手是8蚊，即32000元，但之後改名改股變成8蚊1000股的話，是不是即變成我們持有1手貨由32000變成8000蚊？那麼我們要不要在調整之前賣出，然後降股後買回？

我家人有點擔心

龔成老師︰

其實無分別，只是方便買賣，不用擔心。

我地是否投資一隻股票，重點係佢企業本身架質素。佢改名，其實唔重要，只要佢本身業務和質素係無變，咁就無問題。

完美健康(1830)於7月15日會進行拆細，每一手由以往4000股1手，轉變為1000股1手。從而，令每手買入成本少左。

但作為現有投資者，你係唔會有影響。

以你現時持有一手為例，你有4000股(即1手)，現價假設係$10，你持貨總值就係$10 X 4000股 = $40000

拆細後，你依然都係會持有個4000股，但就會變成4手(因為現時係1000股1手)。我假設現價不變，都係$10。

拆細後持貨總值︰$10 X 4000股 = $40000。

你會見到，其實拆細這個動作，對你手上的持貨價值，係全無影響。因此你唔需要因為拆細，而賣出持貨。

但留意，此股現價略貴。現貨可持有，就暫時不宜再加注。

------------------------------------------------

Q21763：

老師您好！我係您既學生，而家睇緊您本千萬富翁(一路睇放唔低)。

我想創業自己做生意，但一向呢方面既知識唔多，雖然之前返果份工都係做sales...

但覺得自己相比起其他人business sense方面唔太好..想請問有無咩方法改善？老師有無睇過啲好既書本可以推介？

另外，我都明白要認識多啲人加強人際網絡，但係我個人有啲內向型，一諗起呢啲就聯想到要去一啲function自我介紹咁識人，想問下有無咩方法會自然啲？謝謝！

龔成老師：

坦白講，創業最好的學習，就是去創業，你得到的將會比你睇書多好多。

我建議你試下一些低成本的小生意先，例如網上創業等，這是一個很好的進步機會。

你最重要是不斷試不斷試，想，是無用的，試，才可有得著。你可以寫低所有你認為有商機的生意，然後睇下那些較小本，而你又做到，就可以開始。好多時有無市場有無發展，並不是想出來，而是試出來的。

另外，有D生意要真你有較強人際網絡，但有D生意則無要求，所以唔好比這些因素限死左自己。你可以參加一些商會活動，或早餐會之類活動，去結多D人。

至於自然唔自然，其實好主觀的，你去得多就得，所有野都是熟能生巧，做，是最重要的，唔好得得想字。

------------------------------------------------

Q21764：

老師好，有5百萬cash (前幾年買賣樓賺+儲蓄）, 應該買股票好定買樓好？

背景：3字頭，同屋企人住，而家住嘅地方有d遠

人工扣除家用開支，應該儲到1萬左右，有基本嘅醫療、危疾、年金

另外有30幾萬股票：
0002 - 2500股 $73.1
1928 - 2000股 $28.43
9988 - 200股 $225
2018 - 1000股 $41.6
1038 - 500股 $47.3

如果今次再買樓，應該唔會咁輕易賣出，除非好動蕩，最多係用黎自住（近返市區方便d返工同出街）或收租。因為有自住嘅可能，都會揀d高質素少少嘅樓買，咁就會用哂d cash

樓價高，如果只係用黎收租，其實回報唔多，計埋供樓利息可以話冇，不過可以博樓市會升，而家唔買之後可能更貴。但長遠8-10年後，

我唔係太睇好香港前景，覺得會俾大灣區/其他內地城市慢慢取代，所以都驚長遠會跌20-30%

但係另一方面，我又唔敢用幾百萬黎買股票...我就係普通人心態，擁有又驚失去...咁就更加唔上唔落

如果真係唔買樓，而買股票/基金，請問有咩建議？

超長遠目標：返part time、建立1至2個可以一直玩到老嘅興趣，可能要用時間、金錢黎鑽研、再老d或者會移民

唔好意思，寫得好長

仲有一個問題，就係可謂小注？唔同資金下，小注嘅定義會唔會唔同？謝謝

龔成老師︰

香港樓市，中短期會有少少上落（但不會大跌），長遠會向上。

首先要睇經濟基本面，如果經濟持續地差，失業率上升，樓市終會向下，這會對樓市有中期性的影響，不過，就算跌，都不會大跌，最多只是小跌，如果經濟差的情況不是太大，甚至不跌，這是由於背後的需求大。

在長遠計，我仍相信樓市在長遠計，因供求關係，仍是向上多。因為現時香港買樓的需求仍大，而長期供應不足，加上政府往後施政只會更加困難，好多所謂的大計劃都未必能夠實行，又或最後規模細左。

另一方面，需求大，我見唔少適婚年齡的朋友，都正等機會買樓，但未買樓，這些是「潛在需求」，過往每年不斷累積，只要樓市跌少少，就會有需求走出來，這令樓市不能大跌。

另外，樓市另一作用是「投資」，現時的租金無大跌情況，以投資回報率的角度分析，樓價都不會大跌，因此樓市平穩。

長遠計，租金及樓價會平穩，有少少向上，但不是倍升，不會好似過往般倍升，而是平穩向上。

我地再睇翻眼前而一刻，由於你自住唔算有大問題，那這筆資金，我地應較集中從投資角度，去做考慮。

現時租金回報率唔算好高，投資在優質股，值博率相對較高。

你3X歲，建議你用「平穏增長股」 + 「潛力股」的組合。現在你每月先用5成儲蓄，即$5000做月供。其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、領展(0823)、希慎(0014)、太古地產(1972)

或潛力股︰比亞迪(1211)、中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

現時大市只是合理區，你現有500萬資金可以先投入多50-100萬，用"分注"形式，慢慢買貨。餘下資金和每月所儲倒的資金，就等大市出現一定程度的下跌，才大力度掃貨，然後長線投資。

但你要注意一點，我地財富組合除左要有增長力和質素外，平衡性都好重要。你長線都要找機會加入物業類，以免成個組合過於偏重股票類。

因此，若你在此期間，發現一些租金回報率唔錯，又有質素的樓盤，你都可以出手。

至於我成日講架「小注」，如果我係講個別股票「質素或風險度」，只宜小注。代表你只宜用總資金的5%左右，投資在這隻股票上。

若我係講緊「買入價」時，現價只宜小注。就是想指出，此股現價水平唔平，建議你只能用打算投入該股資金，其中一小部份去入少少，到有明顯回調，才加大注碼。

------------------------------------------------

Q21765：

你好，我想問如果我要將啲股票分類

公用: 3， 270
地產/房託: 12，66，823，778
賭業: 27，1928
銀行: 1398，2388，3988
平衡: 2800
新經濟: 388， 788，1177，1211，1810，9988

請問新經濟嗰部分可以點分，每個分類應佔組合幾多。
謝謝

龔成老師︰

我建議你可以簡單，從「行業」和「風險度」去進行分類。

「行業」你可以主要分成公用(0003,0270)、地產相關(0012, 0066算半隻, 0823, 0778)、博彩股(0027, 1928)、銀行股(1398, 2388, 3988)、科技股(0788, 1810, 9988)、新能車(1211)、醫藥股(1177)

至於港交所(0388)業務性質特別，你可以分開。

我地投資優質股時，任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

但要留意，銀行業營運模式較特別，風險會比一般行業為高。必需堅守30%這個準則，如果可控制在20%以內，會更好。

另外，盈富(2800)係不受此限，因為它是一個包含55間優質企業的基金，這些企業來自不同行業。因此，盈富(2800)就算在組合中佔較大比重，都唔會造成過度集中性風險。

就「風險度」，我地可以分成「潛力股」、「平穩增值股」和「收息股」。

我地投資會運用「先增值，後現金流」作方法，初期應投資較多增值類資產，較後期則應投資較多保守類項目。所以係分配投資項目時，會因應番你的人生階段。

如果你年青，可以「平穩增值股」+「潛力股」。中年人士，可以較集中翻係"平穏增長股"。當你已近退休之年，就應集中在「收息股」，去創造平穏現金流。你可以睇翻自已年紀，去作出配置。

「潛力股」- 0388, 0788, 1177, 1211, 1810, 9988
「平穩增值股」- 0003, 0270, 0012, 0066, 0823, 0027, 1928, 2388, 2800
「收息股」 - 0778, 1398, 3988

但由於「潛力股」有一定波動性，較適宜年青和有投資經驗人士。若你投資取態較保守、經驗較淺或者較接近中年，「潛力股」比重就要相對下調。

這個部份，基本上係因應你人生階段、投資經驗和風險承受力，去作出配置。

例如你係年青人，你就可以「潛力股」、「平穩增值股」各佔50%。若你尚有5-8年就退休，就應「平穩增值股」、「收息股」各50%。到退休，就100%「收息股」。

------------------------------------------------

Q21766：

龔生你好，本人想問你一些意見。我五年前因先生生意問題賣左層樓，已租樓五年，現在想買返樓，請問是否好時機？

我有現金大約三百萬，月入41000，先生沒有穩定收入，兩個仔女一至兩年後大學畢業，本人五十歲。現在租金18500。

我只擔心退休後無屋住，而且已50歲，所以想上返車, thx

龔成老師︰

現時香港樓市，算係合理區頂部，從投資角度，未算好吸引。

但由於你目標係自住，我地考慮重點，唔係現時樓市水平，而係物業符唔符合你需要，講緊係未來10年、20年，係唔係都適合你。

如果係合適，你就堅守住"供得起"這個大原則，就算現時置業都係可以的。

但最好，你可以係置業之餘，留有一定現金，去用優質股進行增值，咁就更理想。

------------------------------------------------

Q21767：

龔老師，您好，我朋友公紹而認識您，我朋友話你分析及推介的股票很準，我初看到閣下的Facebook, 建議買2800，如果大市跌是否會跟住跌，為何會推介2800,因為我股票不太認識。

我有持
1313,9.9元買15000股
914, 45.7買，1000股
1810, 25.15買5000股

最想請教老師我上年$2.9買3988,坐足一年，重貨，跌到約$2.3，利息都補唔番差價，下星期除淨，除淨前會升些嗎？

我想除淨前賺差價，不要息可以嗎？謝謝老師

龔成老師︰

你對派息運作，似乎有點誤解。

在「除淨日」前一天，依然持有股票，就會收到股息。「除淨日」，其實就是用來確認那些股東收到這權益的日子。等到「除淨日」當天才買，派息就唔會有你份。

「除淨日」那天，股價就會扣除派息部份，例如原來股價$10，派息$1。那麼「除淨日」就會將股價，從$10下調至$9，以反映派息動作。

而「派息日」，就係這班合資格股東，正式收到股息的日子。

由於「除淨日」股價會下跌。而下跌比重同收到息係一樣，所以只係左手交右手動作，你唔會在除淨前沽出，而出現任何著數。

盈富（2800）佢係一隻追蹤恆生指數的ETF，所以恆指下跌，佢都會同一比例地下跌。

佢並不是最高回報的投資，但這是一個組合，當中有58隻質素不太差的股票，對本身不懂選股的投資者來說，是一個很好的選擇，加上有平衡組合風險的效果。

就算對無乜選股能力的投資者，提供一個穩健，收息及平穩增長的組合。所以，我經常都會推介佢比讀者，特別係經驗較淺的一群。

你上述4隻股票，都係有質素，若你係年青至中年人士，都適合。

但華潤水泥控股（1313）業務較波動，佢過往的盈利數據上落都大，因此股價的變大亦會較大。

長遠計，房屋、基建發展等因素，都會利好水泥股。但就要留意股價上落會較大，自己要注碼上控制，唔好佔你組合太高比重。

至於中行(3988)佢有質素，算係收息股類，增長力唔高，主要係收下息。若你較年青，就不要持有太多。

而且，我地投資會講求成個組合的平衡性，唔應該太集中單一企業或行業，佔比要維持分別15%和30%以下，才算穏當。

因此，你現時重貨的話，建議你沽出部份，去平衡風險，咁會較好。

------------------------------------------------

Q21768：

龔成老師，您好，我係一位32歲的全職媽媽，留意您的文章有一段時間，但3月才正式入市

270 2000股$24.1
1810 800股 $24.5
1177 2000股 $8
1448 2000股 $7.8

3067 200股$19
2388 1000股$28.5
3800 5000股$2.74
1972 600股$24.3

以上是我手頭上的股票，大部分算高位入市！特別270係咁跌！

1/我們抽中了白居二，可能會在一年內盡量買來一家四口自住，未知是否需要用到此十零萬資金，所以請問我是否需要放曬所有股票？定keep一兩只？目前配置合適嗎？

2/目前住荃灣，應該買唔起附近，以您專業的眼光，如果買樓，邊一區會是個潛力股？因為我今次未必可以買到三房，想以後仔女大左可以換大間！

期待您的解答，感謝

龔成老師︰

首先你要明白一個概念，我地持有一隻股票與否，關鍵位是企業質素、前景，不要被買入價影響。因為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心，照持有就可以。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

你現時股票，大部份都係有質素和適合你。而且除了粵海(0270)，其他都唔算好高位入，大致係合理區頂至略貴，你可以守。

雖然粵海(0270)帳面值虧損較大，但佢係有質素，你照長線持有，主要用來收息，再加上少少平穏增長。

但現回到你買入價，相信會要較長時間。

另外，保利協鑫能源(3800)現時暫時停緊牌，因為佢仍未出到業績，將公佈業績的日期延遲了幾次。

最近現任核數師更請辭，我對這類股票，會較有保留。但由於現時停緊牌，暫時乜都做唔到，只有等。

初步睇佢的財務數據，都幾弱，相信日後就算復牌，股價都會受壓，要有心理準備。

1) 我地成個財富組合，除左講質素外，平衡性都好重要。因此，我建議人在置業同時，必需留有一定優質股，作增值之用。

這樣才會避免到，所有資金完全側重晒係單一資產(物業)類別。

但若你生活上係有置業的迫切性，你盡用這些股票去買樓，都係可以。但緊記，你最低限度，要堅守"供得起"這個大原則，就可以入市。

之後，你再有新資金，才再慢慢累積優質股。

若你打算1年後置業，由於時間唔長。如果你確定係要動用股票部份去業，你現時就要開始，慢慢分批沽出持貨。唔好等到動用資金個一刻，才一次過去沽，以減低價格波動，對你回報造成之影響。

2) 較高升值潛力地區，除左鄰近商區地段，好似中環、東九、北大嶼(或有變數)外。你都可以留意一些潛力較高地區，好似堅尼地城、大圍、黃竹坑等。

雖然你長線有細屋換大屋打算，故新購物業(細屋)有升值潛力，對將來換大屋較有利。

但同時間，佢都係你自住樓，你都要從生活角度去考慮。2者要取得一個平衡，才算理想。

------------------------------------------------

Q21769：

龔成老師你好，我和太太均31歲，各月入$5萬，資產如下：

- 物業1，2017年買，自住，月供$15k，26年按揭
- 物業2，2020年買，收租，月供$13k，收租$11k，30年按揭
- 股票$150k，005 和 2628
- 現金$1M

每月扣除開支，儲$30k-35k，想50歲有$50k被動收入，資產應如何配置？感激！

龔成老師︰

若你想做到50歲後每月有5萬蚊現金流，以股息率6%計，你需要本金1000萬。

你現時財富組合，物業和股票都有，係理想。但比例上，明顯偏重左係物業類。因此，我地新資金應優先投放股票類，去令組合更平衡。

現時你持有股票，匯控(0005)主要收息，無乜增長力，唔適合持有太多。而中國人壽(2628)雖係增長股，但近年賺錢能力，明顯係弱左﹐不宜持有太多。

這2隻股票，建議你沽出部份，慢慢換至增長股，長線對你會較有利。

你31歲，應利用「平穏增長股」 + 「潛力股」這類增長股，去創建一個增長組合。現在你每月先用5成儲蓄，即$15000做月供。其餘先儲起，用一邊月供一邊儲蓄的策略。

大市現處於合理水平，那100萬資金，你可以再用多30-50萬，以"分注"形式慢慢入貨。餘下資金和每月儲蓄，就等大跌市機會出現，才大力度掃貨，並長線投資。

假設投資回報有10%（連股息再投資），你每月投資$30000 + 現有資產(15萬股票和100萬現金)，20年後大約會增值至2800萬，相信用以上計劃，很大機會達至你的財務目標。

------------------------------------------------

Q21770：

老師，我現年我33歲，兩公婆每月加埋收入得25000，有一物業供緊剩低50萬左右，但供樓及小朋友同家庭基本開支30000，户口現金剩30萬左右，

我想問下老師意見我仲適唔適合投資股票？

龔成老師︰

以你情況，由於每月係入不敷支，因此重點應先放在這財政問題上，要令你變回收支平衡之餘，也可以有一定資金作投資。

現在你要看看你自已的開支，有沒有一些部份可以調整來增加月供金額。如果無，你就要從開源著手，轉工(如SALES，一些多勞多得的工作)、找PARTTIME、網上生意等。

目標係令你可以應付生活開支同時，每月有資金空出，作投資之用。

當你可以做到這點，你就可以開始月供股票計劃，去為自己增值。

你33歲，可用「平穏增長股」 + 「潛力股」的組合。你每月可用5成儲蓄作月供，其餘先儲起，等大跌市時去掃貨。

月供方面，你可以選擇投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、領展(0823)、希慎(0014)、太古地產(1972)

或潛力股︰中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）。

至於現有30萬資金，我建議先扣起半年生活支出，作應急之用。餘下部份，你可以先用一半，分注買入上述股票。

如果你唔係好認識這些股票，可以集中買盈富(2800)。餘下部份，都係同樣等大跌市機會出現，才出手入貨。

------------------------------------------------

Q21771：

老師，你可否給我一點建議？
我的情況：

現時37歲
每月收入：$20萬
每月開支：$17萬
現有3層樓，都要供，2層出租，一層自住
股票：$25萬（有2388、2800、3067、9888、6618、1208、941）
現金：$30萬

如果我想50歲財務自由，每月有$50000去用，我應該點做？

龔成老師︰

以你的情況，其實不難的，首先，你現時有兩層樓收租，當你50歲的時候，理論上已還了一定的借貸，加上租金在長遠會偏向上，因此，該物業能為你提供一定的正現金流。

若然到日後供款完成後，現金流將會更加明顯。

如果假設你50歲時，物業未供完，我再假設未有正現金流，你就可配合以下方向去參考。

50歲想每月有5萬蚊現金流去支援生活。我地以股息率6%去計，你就需要本金1000萬。

由於你現時已有不少物業，未來新資金應集中翻係股票類，以免財富組合過於偏重單一資產。

以你37歲，應以增值為主，可以選擇一些「平穩增值股」+「潛力股」作投資目標。

你現時持有股票，都係有質素和適合你。但百度(9888)、京東健康（6618）不確定較高，不宜持有太多。

五礦資源（1208）主要從事有色金屬經銷、製造及鋁、銅製品分銷。

過往有多年出現虧損，企業投資的價值不高，加上股價十分波動，炒作多過實際，這股不建議持有，你可以每有反彈，就慢慢沽出。

中國移動(0941)有質素，但只係收息股，增長力麻麻，同樣不要持有太多。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄，另一半就先儲起架策略。

平穏增長股：盈富(2800)、金沙（1928）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）、長建（1038）

潛力股：安碩恒生科技（3067）、阿里巴巴（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845），但就要明白波動性比上述會高左，同時風險大左，你要自己平衡。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

現時大市只是合理區，餘下30萬和每月所儲倒的資金，就等大市出現一定程度的下跌，才大力度掃貨，然後長線投資。

我假設投資回報有10%（連股息再投資），你每月投資$30000 + 30現金 + 25萬持股，50歲時大約會增值至逾1000萬。

再加上你現有物業的租金收入，相信以上增值計劃，很大機會可以助你達成退休目標。

------------------------------------------------

Q21772：

龔sir 你好 ，我本人26歲。以前買過港股，有買過小米$15.x左右，賺左小小16.x就賣左。現在持貨：

-中國鐵塔$1.5
-3兩黃金平均$18600/兩
-小量美股

近年睇多左你既Page，都覺得價值投資既重要。同埋要建立一個投資組合非常重要。

未來計劃主要想投資美股：

長線投資：
-蘋果
-BRK 伯克希爾 B
-Tesla
-微軟
-台積電

中期：
-美航
-Pala Tech

短期：
-富途
-蔚來、bilbil

我想30歲前儲到100萬，我會儲月入大約55%既人工，目前月入24K，資產大約15萬。

希望老師俾小弟建議。

另外非常感謝你回覆網友問題，post其他網友既case，俾我地見到好多層面既人既經驗，非常值得借監，你既回覆亦值得學習。多謝你！加油

龔成老師︰

美股都有質素，你用來作增值組合，都係可以。

我地投資股票，其實等同投資一間企業。希望透過其自然增長，以達至財富增值的目的。

所以，我地投資一定係長線，而唔係短期炒賣，去賺差價。所以，你唔好再用短炒這個策略，而係用長線角度，去選擇股票。

你上述股票，都係有質素。只要你係長線投資，再用平均價格或月供去儲貨，咁就無問題。

但留意，Palantir Technologies Inc (PLTR)和Bilibili Inc (BILI)都有投資價值，不過由於佢地至今都未有盈利，不確定性較高，不宜太大注。

另外，雖然疫情開始穏定，但始終存在不少變數。加上航空業賺錢能力，已經係弱左，American Airlines Group (AAL)這類企業，唔係太建議你投資。

而黃金是貴金屬，有「終極貨幣」之稱，主要作用是對沖黑天鵝事件。

不過，黃金沒有現金流，持有無法創造出經濟價值，持有過多，反而會拖慢成個組合的增值效果，我建議佔財富比例太多，大約3%以內好了。

至於投資部份，你每月可先用5成儲蓄去做月供，其餘先儲起，用一邊月供一邊儲蓄的策略。

餘下的另一半現金，我地就等機會，當大市出現較大回調，就加大力度掃貨，然後作長線投資。

除了可考慮月供上述美股外，我建議你加入Vanguard標普500指數ETF〈VOO〉，是追蹤標普500指數的ETF。佢係一籃子的優質美股，有助提升你組合平衡性。

我假設投資回報有10%（連股息再投資），你每月投資$12000 + 15萬資產，30歲時大約會增值至90萬。

所以，你想提高成事機會，最好再調高少少個月供金額，會較理想。

------------------------------------------------

Q21773：

Hi，有事想請教我收到另一間公司offer

其實我好迷惘 有2個offer 一間全球top 5 會計師樓 一間係中型既list co

Top 5 個間係高壓文化 must ot 會好辛苦 但學既野會多 有朋友話不少人捱五到一個月就走 for junior 位 捱到既senior 就做得耐

另一間中型既list co manager super nice 我覺得 但學既野五太多 佢話五洗ot 兩間既人工offer 一樣

我考慮既點 係要challenge 自己入去個間高壓文化做下 捱到 就會係有料既人。定舒舒服服入去中型list co 做 利申26 years old

講多少少 我自己係能力是ok 我最大問題是情緒問題 一五開心 一驚 表現先大打折扣 有自信信心 表現超好 所以五太岩高壓既環境

但屋企人勸我入個間高壓文化捱下 捱到你咪情高提高

龔成老師：

其實你個考慮點，應該都係放係長線因素，你要知道邊度架經驗、資歷、知識、甚至做事方法，會對你投入這個行業，以至長線發展，會係最有利。

你可以問下一些行內朋友，或者同學意見。再加上你以往在中型/中小型會計師樓經驗，去綜合一個結果比自己。

高壓文化、OT，這些唔係唔可以考慮。但這些相對你成個職業生涯，只係一些中短期因素，我唔建議你睇得太重。

------------------------------------------------

Q21774：

老師, 今次真的可以實名的叫龔老師, 因為我已經報讀老師的課堂.

對上一次請教您, 已是一年多前, 很多手上的爛股都去掉, 現時入的,都是看老師您回覆, 再加上自己預估的, 買了一些股, 老師可否幫忙, 看一看有冇入錯, 謝謝您.

我現年43, 月入50000, 積蓄有80萬, 想再入啲優質股, 保留30萬在手, 所以計劃想投資50萬左右,

現時手持,
1810 x 2000股
788 x 40000股
992 x 2000股,
1478 x 2000股,
2800 x 2000股

本人計劃想買700, 2269 or 1772, 2128, 1347，想請問老師有咩高見? 謝謝您.

另外, 我老豆有些股已經跌左25%, 想請教下, 可唔可以再守? 2188 同860.

感激老師.

龔成老師︰

你現時持有股票，都係有質素，照長線持有就可以，但中國鐵塔（0788）增長力減弱左，你不要加注。

至於你計劃買入的5隻股票，都係有質素，但有幾點要留意。

中國聯塑(2128)現價偏貴，最好等有明顯回調，才入貨。

贛鋒鋰業（1772）、藥明生物（2269）不確定性較高，不宜太大注。

你以上所講的股票，除了盈富(2800)、聯想（0992）算係平穏增長股外，其餘都係潛力股，佢地雖然有增長潛力，同時風險都較高。

以你年紀，不宜持有太多，大約佔3-5成(視乎你投資經驗和風險承受能力而定)，餘下應集中以下平穏增長股，否則會令你組合風險過高。

平穏增長股：盈富(2800)、金沙（1928）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）、長建(1038)

現時大市只在合理區，你可再投資在30-50萬，餘下資金就等大跌市機會。

當然，你可以不用急，唔洗即刻走去再投資。你可以等上完堂，對整個投資概念有較完整理解，才出手都可以。

至於你父親的持股，力世紀（0860）其實好難分析，因為佢一直處於年年虧損的狀態，而我地對這類股好有戒心。

我地只可以對佢的前景作「想象」，無人知真正的價值有幾多，股價一定會大上大落。見佢之前有做個十合一之類動作，這類股票要小心。

整體而言，此股好難分析佢價值，投資風險唔細。

泰坦能源技術(2188)規模好細，而且近幾年都係出現虧損，投資價值不高，建議沽出。股票班見!

------------------------------------------------

Q21775：

成老師，想你提供一些理財意見，現有狀況如下：
年齡： 43
職業： 企業銀行

1）現有資產共HK$16.94 Million

- 現金 ： HK$1.1 Million （remarks: 2%p.a. deposit rate for staff with deposit balance within HK$1 Million）
- Asian Currency Bond Fund : HK$0.1 Million
- 自住物業： HK$13.5 Million
- MPF : HK$1.4 Million

- Equities : HK$0.61 Million
>5 HSBC @ 3156 shares
>3988 @1,000
>1398 @1,000
>3968@650
>16@500
>700@200

>1@50012@1,000
>27@1,000
>9988@100
>1448@7,000
>3067@1,000

- 合資格年金累算權益：HK$0.105 Million （已繳兩年）
- 保單累算權益： HK$0.125 Million

2） 每月收支

- 每月收入: HK$90,000
- 每月合共開支：HK$70,000
（父母家用: HK$15,000）
（供樓：HK$39,000）
（日常開支：HK$14,500）
（MPF 供款: HK$1,500）
->每月平均盈餘 : HK$20,000

請問在50歲時能否做到每月有HK$30,000 被動現金流? 另外，如何能達成？謝謝！

另外，想補充一下, 本人現樓按結欠HK$6.9 Million, 尚餘16年期

龔成老師︰

你現時43歲，財富仍有一定增長能力，可以利用這7年時間，將財富增傳值，到了近50歲，就可轉翻一些現金流類別的資產。

如果你希望7年後每月有3萬蚊現金流，以股息率5%計，你需要本金720萬。

現時大市在合理區，現金和股票最好各佔一半，你現時持有現金水平係偏高。雖然你現金有2%員工利率收取，但這程度的增長力，唔算理想。

建議你用這筆現金和每月儲蓄，去增持一些有增長力股票，去累積這筆財富。

現時持股，大致上可以。但匯控（0005）、中行（3988）、工行（1398）都是收息股，增長力唔高，唔好持有太多。

策略上，你可以投資"平穏增長股" 和 "潛力股"。你先用每月5成儲蓄做月供，其餘先儲起，用一邊月供一邊儲蓄的策略。

選股上，你可以投資在平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、粵海（0270）、領展（0823）。

增長力較強的，可選安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園（1448）、ＧＸ中國電車基金（2845）。但佢地波動性和風險會較高，你要自己平衡。

你現有110萬資金，可以再投入多20-30萬，用"分注"形式，慢慢買貨。餘下資金和每月儲蓄，就等大市出現一定程度的下跌，才大力度掃貨，然後長線投資。

以大市過去年平均回報10%計（連股息再投資），你每月投資$20000再加上你現有資金和持股（約170萬），7年後大約會增值至560萬。如果要達至你的財務目標，月供金額必需增大至$35000。

現在你要看看你自已的開支，有沒有一些部份可以調整來增加月供金額。如果無，你就要從開源著手，轉工（如SALES，一些多勞多得的工作）、找PARTTIME、網上生意等，令你每月可儲資金大幅提升，以助你達成目標。

------------------------------------------------

Q21776：

因為本人媽媽不擅於投資，我剛開始接觸股票，幫佢review股票組合發現大部分都係蝕錢，我應該幫佢止蝕定由得佢等落去呢？

0042 平均價2.14
1398 平均價5.72
0998 平均價5.68
1288 平均價3.94

3988 平均價3.5
1680 平均價2.98
2628 平均價26.22
2009 平均價3.86

2866 平均價 4.35
1766 平均價11.67
0390 平均價 8.52
0005 平均價78.69

有一部分已蝕一半已上、帳面合共虧損30萬左右，我可以點幫佢調整呢？因為佢年紀都十分大，亦唔適合過高風險投資。唔該曬龔sir。

龔成老師︰

我地先要睇翻隻股票有無質素，如果佢帳面虧損，但係有質素，我地都可以守住先。若無質素，就算帳面無蝕，我地都要考慮減持，甚至全部沽出。

東北電氣(0042)、澳門勵駿(1680)投資價值不高，建議有反彈，就慢慢沽出。

中國人壽(2628)、金隅集團（2009）、中遠海發（2866）、中國中車（1766）、中國中鐵(0390)有投資價值和增長力，但增長力唔會好強，質素算係中等。

若佢唔係佔組合太多，持有係可以。若較多，可以慢慢換碼至優質的收息股。

匯控(0005)、工行(1398)、中信銀行（0998）、農行(1288)、工行(3988)、有質素的收息股，主要提供現金流的股票，適合你媽媽。

由於你目標係收息，帳面賺蝕反而唔重要，除非佢本質出現問題，否則你長線持有收息，就可以了。

但你要留意，現時你媽媽組合中，有不少銀行股。個別行業，不要佔組合30%以上，否則會有過度集中性風險。

而且，銀行業營運模式較特別，風險會比一般行業為高。必需堅守30%這個準則，如果可控制在20%以內，會更好。所以，你都要幫她調整一下個比重。

以下是一些有質素的收息股，給你參考一下。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

------------------------------------------------

Q21777：

咁佢哋都有能力成為10倍股？但似乎來講指數好難升到10倍股⋯⋯水桶一指最大潛力，有冇機會係10倍嘅選股？

阿sir，唔知道你有冇留意啲細價股，汛和（1595）會比京基借殼上市，咁1595值唔值得投資？將來等收成？

另外，我想問第一視頻（82）值唔值得長線投資？因為佢改名做瘋狂體育，未來幾年係體育年份，佢係唔係一隻潛力股？謝謝阿Sir


龔成老師︰

水桶1，係指增長潛力較高股票，通常都是處於行業快速增長階段初至中期，故相對其他股票，有較大增長潛力。

但要指數ETF(如3194、3067、3032、3033)增長10倍，係會較難。

由於佢唔係單一企業，要做到10倍增長，即係要絕大部ETF中股票，出現大幅爆升，因此要ETF成為10倍股，機會較微。除非你投資一個長時間，都有可能。

京基欲借殼汛和（1591）上市，暫時未落實，無人知發展成點。若言成事，我地才可以從新業務，可判斷此股有無投資價值，現時所有都係得個估字。

以現時集團質素計，投資價值不高，唔建議持有。

第一視頻（0082）從事互聯網業務，包括在中國經營體育彩票新零售業務、網絡視聽新媒體、其他互聯網相關的投資，以及阿聯酋杜拜的衛星電視台業務。

業務持續虧損，質素一般。除非你好確認佢之後的發展正面，就可小注博下。

記住，我地投資股票，就係投資緊一間企業，要分析係長線的企業投資價值。佢用乜野名，係唔會對佢業務有影響。

另外，唔係好估走勢或者估消息。我地要用實質理據，去做投資決定。

而且，就算再優質股票，都要時間去成長。唔好用賭博心態，諗住博某股票業務突然改變，從而令其股價爆升。

這個做法，只是投機，並不是投資。

------------------------------------------------

Q21778：

老師，原來我有好朋友關注你，同埋有一個上過你堂，佢依家做到財務自由，佢隻1211原來佢40元樓下買左萬幾股，依家都冇走貨，我問佢幾時走，佢話當你見到成街都係電動車就可能會走！

我依家30歲開始學投資，算吾算遲，其實我五年前已經開始接觸股票，一直都係輸，有時可能贏小小就用晒，到最後本金都輸埋！又重新來過

我開始明白你經常講嘅一句，買股等於企業，企業慢慢去發展，企業既成長，等於我儲蓄！

我而家買入嘅股票我都唔會再輕易去走貨，因為佢係錢搵錢

我放假要再去買你一本書，你經常提我知識好重要，係邊本書係簡單容易明白

我第一本書就係睇你介紹嘅50隻優質股同埋10隻潛力股！

我想學知識，邊一本我比較容易明白
等待謝謝你的回覆

龔成老師︰

你可以睇我寫架"80後百萬富翁"、"財務自由行"和"股票勝經"，較適合初學者。

其實30歲，依然係一個財富增值的黃金時期，只要你認真學好正確的投資方法，一樣可以做到不錯的回報。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你30歲，建議你用「平穏增長股」 + 「潛力股」的組合。

由於你係初學者，對企業估值，點去定平貴未必太了解。我建議你先利用月供模式，去建立一個股票組合，以減低買貴貨風險。

現在你每月先用5成儲蓄估月供，其餘先儲起，用一邊月供一邊儲蓄的策略。

而你朋友買的比亞迪(1211)，係好優質的潛力股，現時未算行業爆發時間，長線持有，待佢慢慢發展上去，回報會更理想。

但由於現價已經偏貴，要月供最好等佢回到$150才開始，會較穏當。

------------------------------------------------

Q21779：

老師，我應唔應該買樓？出面話公務員會減薪, 咁你覺得樓市之後係咪應該會下跌?

咁我係唔係應該要等多一陣先買?

龔成老師︰

若公務員會落實減薪，某程度上，都會影響到私人市場的薪酬變動。

但樓市之後會唔會下跌，係要好多因素，唔係單單睇薪酬變動咁簡單。而且，我地投資唔好太著眼1,2年架事，要諗長線少少。

香港樓長線都係供不應求，因此樓價長線都係睇升。

始終市場需求大，我見唔少適婚年齡的朋友，都正等機會買樓，但未買樓，這些是「潛在需求」，過往每年不斷累積，只要樓市跌少少，就會有需求走出來，這令樓市不能大跌。

但中短期係有機會出現波動，造就入市時機。但你唔好預佢大跌，若係自住樓，只要係合你需要，而且長線"供得起"，你就已經可以出手了。

至於你之前講的房屋政策，只係好初步，無人知會唔會成事。就算成事，又要等到幾時先可以立法執行。

因此，你在做決定時，要在現實情況和這些存在不確定的未來政策中，自己取個平衡。

------------------------------------------------

Q21780：

龔Sir，你好。想請教一下，手上有匯豐控股（00005），平均買入價$57.8；電能實業（00006），平均買入價$66.7。

早幾年買，錯過左高位賣出時機，而家帳面蝕錢，不過睇返多年收過股息算打平。而家係咪應該賣出，定等機會股價升返？（好似好難）

龔成老師：

首先，要睇翻你的年齡與投資目標，你上述持有的，並不是無質素的股票，這些都是收息股，不過，增長力就不強。

如果真的賣出，可以等過1、2年，經濟好轉，等佢地股價上翻D先賣。

如果你年輕，其實未必太適合持有，應該在適當的位置，轉其他。

如果你年長，又或風險承受能力較低，又或投資目標著重現金流，其實就可以持有的，因為這兩股都是不差的收息股，只是你買入價少少高，但如果以長期收息的角度來說，其實無問題的。

另外要留意，你不能持有同一隻股票太多，你應該建立一個組合，同一隻股票去到15%好了。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

📣📣【創業大冒險】📣📣
中小企業朋友們快來看！防疫在家工作也不怕！超強大免費遠距辦公工具推薦給你！

異地辦公、居家隔離，如何不影響工作正常進行？無須擔心會因為防疫而中斷溝通，來來來~3大好康報你知！

好康1🎁　遠距上班工具包
針對 #線上會議、#雲端資料庫、#出勤打卡、#工作管理 四大類別，統整好用工具，協助企業快速選擇遠距工作解決方案！
✨U Meeting： https://u.cyberlink.com/products/umeeting
✨微軟 Teams： https://www.microsoft.com/zh-tw/microsoft-teams/group-chat-software
✨Google Meet： https://meet.google.com/
✨Ragic： https://www.ragic.com/intl/zh-TW/home
✨Google 雲端硬碟： https://www.google.com.tw/intl/zh-TW/drive/
✨Dropbox： https://www.dropbox.com/zh_TW/
✨FLYGO： https://home.flygo.work/
✨外勤筋斗雲： https://www.servicejdc.com/
✨WorkDo： https://portal.workdo.co/zh-hant/
✨JANDI： https://www.jandi.com/landing/zh-tw

好康2🎁　免費線上課程
好用工具導入教學，豐富課程協助企業安心學會使用遠距辦公系統！
✨中小企業網路大學校：https://www.smelearning.org.tw

好康3🎁　專人諮詢服務
提供專人免費線上諮詢服務，協助中小微型企業啟動數位轉型！
電話：0809-092-091（電話客服時間09：00-18：00）
信箱：service@qbicloud.com

📣📣【Startup Adventure】📣📣
No need to worry about working from home(WFH) during the COVID-19 pandemic. No need to be panic, we have a total solution to keep your business up and running.

We have listed the top 10 useful and free digital tools for remote-work startups and small businesses. Here is the video to ensure your work and projects right on track without a hitch during WFH.❤️

Let's watch the VIDEO👇👇👇

【龔成問答信箱】（Q18961-Q18980）

Q18961：

sir，我唔係問野呀，只想寫少少野~

越睇你既書，就越喜歡你每本書既結構。我呢排隨住股票班所教既步伐，一邊睇《勝經》系列，開班前睇過一次《股票勝經》打底，但當中既基礎未完全掌握，而家上完幾堂，我再重温呢本書，感覺穩固好多。

然後我睇《選股勝經》，琴日睇到第12章「系統式投資」，就好想寫幾隻字俾你，呢個小小既篇章，令我諗通好多野~

呢部份，你仔細教既每一步，令我對整個投資操作有更立體既畫面，而家清楚應該點樣有系統地step by step去做，之前我既概念好似砌圖欠缺幾塊咁。例如選股後/逐隻分析前，原來要排好分析次序 (否則我可能無系統地隨意揀選黎分析)。

又明白了唔需要刻意追求某一隻股，明白觀察名單點運用。又見到你2016年買金沙，原來呢隻係2014年已經分析好，更深層次明白所講既「耐性」等待買入時機，可以係點既程度。

所以我話，好喜歡你每本書既結構，由淺入深，由基礎到實際操作，有step by step講解，又有自己既實戰分享，以及你當時每行一步既想法同分析 (投資係，走上財務自由都係，有可行既方法，有step by step)。

我好期待睇《年報聖經》，但想跟翻課程步伐，慢慢學，慢慢掌握。只係偷步睇左「自序」「結語」已經非常期待了~

其實買股票，分析企業都有當中既樂趣，呢刻學習都係 (當然最大樂趣係希望佢幫我啲錢不斷增值啦，哈哈)。

龔成老師：

你講得好正確，我的書同課程，都經過設計安排的，你跟次序去學，其實會有好大進步。

《股票勝經》係基礎，配合課程初段部分去學習更好，而課程後段，則可配合《年報勝經》去學習。

完成後，就係利用課堂的「企業評估表」，不斷分析企業及進行估值，令自己實力提升，以及實戰運用。

加油！我見你好用心學習，相信長遠會有好大進步，之後要保持溫書、睇書、分析企業。

------------------------------------------------

Q18962：

龔sir你好，小弟31歲。之前不幸被投資群組騙去5萬元, 最近想認真學習投資理財, 也檢視一下自己的財富組合。

小弟月入$32000，今年5月買了樓收租, 打算兩年後結婚自住。每個月開支如下：

$3500日常開支, $1500 MPF, $5000 家用, $10000 儲蓄投資, $10000 供樓, $2000 其他雜費.

銀行戶口約有$35,000現金、股票戶口約有$342,040 (按市值計)、期貨戶口約有$130,000

持有股票：
11 恒生銀行 (佔所有股票14.31%)
66 港鐵公司 (佔所有股票11.29%)
883 中國海洋石油 (佔所有股票4.26%)
939 建設銀行 (佔所有股票6.64%)
1310 香港寬頻 (佔所有股票2.07%)
1398 工商銀行 (佔所有股票2.58%)
2328 中國財險 (佔所有股票4.74%)

2638 港燈－ＳＳ (佔所有股票2.31%)
2800 盈富基金 (佔所有股票7.60%)
2823 安碩Ａ５０ (佔所有股票10.49%)
3988 中國銀行 (佔所有股票1.51%)
6823 香港電訊－ＳＳ (佔所有股票3.05%)
7200 恒生指數每日槓桿 (佔所有股票2.19%)
9988 阿里巴巴－ＳＷ (佔所有股票26.96%)

請問龔sir覺得以上分配如何？若想改善，應該怎麼辦？

另外想請教老師，以下的股票值得持有嗎？
0700 騰訊控股
AAPL 蘋果
GOOGL Alphabet
MSFT 微軟

期待龔sir悉心的回覆，謝謝！

龔成老師：

你年輕，$5萬不是大數目，好好學投資，長遠賺的數一定遠超這個數！

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

所以，有些持股不太適合你：建行（0939）、財險（2328）、工行（1398）、香港寬頻（1310）、港燈（2638）、香港電訊（6823）、中行（3988）。

恆生（0011）、中海油（0883）則唔建議持有太多。

另外，7200這類杆槓工具，都不建議投資，好難玩的。

另外，阿里（9988）有質素，但你持有太多，單一股票去到15%已足夠。

至於騰訊控股（0700）、蘋果、Alphabet、微軟，都有投資價值的，不過就唔平，要慢慢分注投資。

------------------------------------------------

Q18963：

你好吖！老師！我而家嘅組合⋯分別係：

00027—52.050入
01928—28.100入
03988—2.670入
00700—514.00入
01810—15.000入
01128—12.800入
09988—262.00入

咁樣長線Ok嗎？

仲有，期待你過嚟澳門開班

龔成老師：

上述都是有質素的股票，可以長線持有。

不過，同一行業唔應該超過組合比例的30%，所以，你在賭業股方面，出現了集中風險，你應該調整翻。

你可以考慮加入盈富（2800），以及其他類別的股票，去平衡整個組合的風險。

其實我之前都有開過澳門班的，不過現時疫情，所以暫時停左，之後會再開翻的。

你或者可以預早留位，只要whatsapp 852-55457212我同事講，打「留位澳門班班」就得。我地有具體資料就會 whatsapp你。

因為現時已有好多澳門人留左位。

------------------------------------------------

Q18964：

龔Sir你好，我44歲，近期開始睇你多本嘅著作，獲益良多，近日想開始做月供股票，每月$10000，月供股票方向如下：

（2800）盈富：$4000
（0066）地鐵：$2000
（0823）領展：$2000
（6823）香港電訊：$1000
（2638）港燈：$1000
請問方向正確嗎？

另本身有⋯
1手盈富（$25入）
1手地鐵（$38.8入）
11手匯豐（平均價$68.45）

謝謝

龔成老師：

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

以你的年齡，其實財富仍有增長力，但不是進取模式。

因此，收息股不用太多。匯豐（0005）、香港電訊（6823）、港燈（2638）都是收息股，匯豐宜上翻D減部，而香港電訊與港燈，你保持各供$1000可以，但之後不用增加金額。

你之後的方向，應該集中在「平穩增長類」。

盈富（2800）、港鐵（0066）、領展（0823）適合的。如果日後有資金，就加大盈富。

如果能承受風險，就加入少少潛力股。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q18965：

龔sir 對 1183 ，想轉為電能股有咩睇法同發展？
Thanks

龔成老師：

兩隻性質有點不同，澳能建設（1183）風險較高，但增長力較強，電能（0006）則是收息股，要睇你的投資目標。

澳能建設以過往的業務來睇，只是中等，業務發展不算強，整體不差但又未算好好。

佢最近宣布，同德國創新科技企業Ｕｂｉｔｒｉｃｉｔｙ達成戰略合作，於大灣區拓展大灣區開發、製造及分銷電動汽車充電業務。

睇翻澳能果邊，主席表示，目標係兩年內在港澳大灣區安裝500至1000個充電裝置。

企業發展力都有，但近期股價其實有點超前反映。這刻投資值博率未算高，如睇好，小注持有可以。

------------------------------------------------

Q18966：

老師您好
1我13.3 買了2333 長城汽車， 見佢每日都12-13 徘徊， 長線睇定set位離場？
2 6.1 買了939 ， 由8 月開始佢一直向下， 前景如何？

謝謝你解答

龔成老師：

1）我地投資，不應太著重中短期股價，最重要是長期的企業價值，發展。長城汽車（2333）不是無質素的，你可以持有。

2）建行（0939）本身質素不差，有一定的規模，在全球都有網絡，本身不會無質素的。

不過，這股增長力不算強，只是一隻收息股，現價投資可以，因為在合理價，但唔好對股價有太大期望。

前景不過不失，中短期會因中國經濟有影響，銀行業的賺錢能力不及從前，加上壞賬因素，都會令佢中短期弱。

而長遠，會慢慢穩定的，不過，增長力不強。

------------------------------------------------

Q18967：

老師 我係你舊生，溫書第3堂，有關ETF部分，時發現不太會計NAV。請問係點計佢有冇偏離現實價值

龔成老師：

首先，右邊的數字是NAV，這是這基金的真正價值。

例如$25。

如果現時基金價，開$26，反映開貴左。

不過，由於佢的日期延後左1、2天，所以，我地要考慮這因素。

例如該基金追恆指，11月4日的NAV，顯示：$25

今年恆指比尋日升了2%，所以，我地應該自己計最新的NAV：$25X（1+2%）=$25.5。

如果現時該基金的市場價為$25.8，反映市場開貴左。

------------------------------------------------

Q18968：

龔成老師你好，最近我買了你的三本書打算好好增值一下投資方面的知識，第一本睇嘅書係財務自由行，我看到「先增值後現金流」。

令我後悔上年買了XX的15年儲蓄基金，這個基金我每年要儲10萬，第二年開始每年定額派$32,000，如果每年都取出32,000的話，本金要去到20年後先回本。

係我吸收你書本知識之前我認為買呢個基金很化算，但而家回頭看，發覺根本抵不上通漲，亦不算是一個資產，甚至令資產貶值，如果我現在cut單

便會失去當初的10萬元，但係就往後1可以好好利用這10萬蚊去投資其他地方，老師可給我一點指示嗎

不過除此之外我每月用自己僅餘嘅$2500可用資金月供緊盈富基金

因為我輪班工作 所以比較難就時間上堂 唯有盡量吸取書本上嘅知識

龔成老師：

這些基金，在我地理財中不是無價值的。

我地理財，會以攻守兼備作原則，基本的防守都是可以的，而這些儲蓄基金，是理財中較為防守的部分。

不過，防守部分不用太多，我地做好基本的防守後，餘下資金就要全力進攻，特別在年輕時期，著重「增值」。

所以，這基金你要睇翻每月投入的比例多少，佔你可以儲得的部分。如果佔比太多，你可以要調整翻。

最好當然減金額，但如果無得減金額，取消都是可以考慮的做法，我地最重要睇翻長期的財富回報，長遠來說，投資股票的回報較好，但有一個前題，就是你要有一定的投資實力。

這基金不是無好處，始終風險低，如果本身投資實力不強，投資這類基金都是不差的選擇。

------------------------------------------------

Q18969：

老師，我以前既心態係短線炒股，累積落嚟其實都係半輸半贏，後來想改變，再加上睇左你既專頁一段時間，
依家持有2隻股票一隻係電能一隻係領展，都係想長線揸。雖然知道疫情/經濟各因素，呢2隻中短期都係會弱啲，
但係睇住電能由$55買入到依家跌穿40再睇到新聞話英國有可能中止外國既投資，都會諗係咪應該減持。

其實我既心態已經由投機改變為投資，但係財富都無增長過反而仲減少左

係咪因為我既資金太集中響2隻股票而唔係幾隻優質股，希望老師可以俾少少意見我🙏🏻謝謝

龔成老師︰

任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於3成，而單一企業不要高過15%。

所以，你組合只有2隻股票，一定係唔理想。假設你資金不到100萬，組合也最少要5-6隻不同行業的股票，組合才算平衡。

至於電能（0006），我地而一刻唔知英國會唔會改變投資政策。但暫時電能都係有質素，係值得長線持有。只是佢增長力好一般，算係收息股類別。

如果你未到退休年紀，或者係好保守的話。你可以沽出部份，換馬至其他有增長力的股票上。

------------------------------------------------

Q18970：

如果有現金八萬元左右，可以怎樣投資？

但公司最近亦要員工放no paid leave , 一直至年尾，每月收入相對減少

之前有買過股票（恒生、地鐵）但由於之前丈夫買倫敦金，一道要賣樓，全股票賣清；從前不懂投資，全軍覆沒，可以說人生一個「窮」字，由於要生活、養女；只有腳踏實在過活

網上見到老師有很多講解、和見議
所以想聽老師提點

龔成老師：

我地理財，要平衡，要攻守兼備，當中要考慮風險，財富的配置。

你現時有面對收入的不確定性，應該留多點現金，唔好進取投資，投資最好是「閒錢」才進行。

你要做兩樣野，第一，增加知識，你要學理財及投資的知識，記住，投資並不是坊間的炒炒賣賣，你要從書本或課堂上認真學習。《股票勝經》適合初階者的。

第二，當你日後收入穩定後，將每月的部分資金，去做月供股票，供盈富（2800）。對初階投資者來說，月供股票是一個很好的累積財富方法，因為可避免你一次過在高位買入的風險。

原理如同儲錢，不過就不是儲現金，而是儲股票。計劃要長期進行。

另外，盈富是一個組合，適合絕大部分人投資，風險不高，長期儲貨可助你財富平穩增值，記住要長線持有。

累積財富要一步步，無得急，由建立知識開始。

------------------------------------------------

Q18971：

老師我想請教一下，以下這幾隻股票還能留嗎？87001、505、511、8083、1371、1088樣樣都持有，都跌到無眼睇

龔成老師：

首先你要明白一個概念，我地持有一隻股票與否，關鍵位是企業質素、前景，不要被買入價影響。買為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心。

如果企業無質素，但你現時蝕錢中，繼續持有只會令你財富繼續貶值，因此要賣出。

興業合金（0505），質素一般。

電視廣播（0511），質素有轉差情況。

中國有贊（8083）高風險股，唔建議投資，就算持有都唔能夠大注。

匯賢產業信託（87001）有質素，可持有。

中國神華（1088）都有少少質素，可守。

------------------------------------------------

Q18972：

老師你好 我今年29歲 月入4萬 而家大約120萬現金 無股票物業 現在與家人同住

最近樓市有小小回落 但租金市場不太理想 在考慮買樓自主還是放租 有以下問題想請教

（a)請問如果今年
（1)買私樓自住 (大約 3-5年後賣出再搬與男友同住）（2）買公屋/私樓放租 那個回報較好？

（b) 如果以100萬投資物業 剩下現金投資股票 請問有沒有股票建議？

未來人工不會上升 行業沒有花紅
謝謝老師

龔成老師：

A）如果你長遠有自住的需要，就可以在1、2年內買樓，我相信樓市中短期會跌，始終香港經濟轉弱，但這只是中短期。長期來說，香港樓市仍是向上的，因為香港樓的長期供應仍是不足。

因此，中短期可說是一個機會，你可以每個業主都大力還價，希望中了一個心急業主，你就可以買到平貨。

至於公屋好還是私樓好，在投資的角度，私樓始終會較好。

B）你最好買左物業先，餘下資金先買股票，始終買物業較多變數，例如按揭等，你留較多現金，完成買樓後先慢慢投資股票，會較好。

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。

你可以考慮盈富（2800）。

另外再加：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：安碩恆生科技ETF（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177），但就要明白波動性比上述會高左，同時風險大左，你要自己平衡。部分要等回少少先入。

------------------------------------------------

Q18973：

點樣評估一個公司業職同潛力，要從邊幾樣評估同考慮？

龔成老師：

要睇企業，好多野睇的，簡單來說，你要考慮企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。了解佢有無優勢、獨特性。

如果要深入計算，基本上要好仔細的研究企業，要分析好多財務數據用比率，長遠的發展前景、市場情況、技術等等。

------------------------------------------------

Q18974：

你好，龔成。我係你在FB的長期讀者。

我今年38歲，有固定的工作，有家庭，但仍每月入不敷支，因外有借貸要還，一來儲不了錢，又沒有本錢去投資，請問我該如何是好？謝謝！

龔成老師：

理財要一步步，無得急。

你現時的情況，目標不是投資，而是收入、儲蓄、知識。

負債還清後，就最好唔好再有負債。

你這刻，要想方法增加收入，兼職，各種可行的小生意，在長遠，你要提高你的身價，令你有正職收入的長期提升。

同時，要控制支出，要減少不必要的消費，令到自己有得儲蓄。

之後有本金，先可以投資。

------------------------------------------------

Q18975：

龔成大師你好，我一向住在英國，主要買英國公司。偶然間看到你的FacebookPage細看你對公司嘅詳細分析深感易敬佩。

你雖然是分析在香港上市嘅公司為主，但學到不少你對公司的看法想法。

可惜我唔喺成日返香港如果唔計一定會報你嘅課堂來學習。我見你嘅ebook 在googlebook 有得買，請問你會建議我買邊本你嘅作品開始好呢？？

龔成老師：

我所講的方法是「價值投資法」，因此，只要你學到知識，對於成熟市場，美國、香港、英國，都是適用的。

以下是我的12本書：

《80後百萬富翁》（第8版）
《80後2百萬富翁》（第4版）
《80後3百萬富翁》（第2版）
《財務自由行》（第6版）
《大富翁致富藍圖》（第4版）
《50優質潛力股》（第3版）
《50穩健收息股》（第3版）
《50值博倍升股》（第1版）
《股票勝經》（第3版）
《選股勝經》（第2版）
《年報勝經》（第2版）
《5年買樓4部曲》（第1版）

不過，不是每本都有電子書。

你可首先睇：

《股票勝經》
《大富翁致富藍圖》

之後再睇其他。

------------------------------------------------

Q18976：

龔成老師，想問下9996沛嘉醫療-B ,近日見他股價下滑但未見詳細原因,如果這股下試招股價，你覺得可以持有嗎？

龔成老師：

沛嘉醫療（9996）不是無發展，但佢仍處燒銀紙的狀態，虧損不斷出現，根來無人知幾時先有較似樣的盈利。

這就會出現一個嚴重問題，企業值幾多錢先合理？

答案是無人知。

市場根本無法正確估到佢地企業價值，那就只能單憑概念、前景，去估這股的股價值幾多。這就會令這企業的股價十分波動，因為大家都只是估估下。

所以，這股不是無潛力，但股價多少才是平貴，是最大的問題。只可以話，唔建議持有太過多。小注好了。

------------------------------------------------

Q18977：

成哥，最近見1211升得好勁，其實唔太明白點解去100蚊花咁多年，但升200蚊是幾個月的事。

龔成老師：

股市上經常有這情況，我地好難預測幾時出這樣衝上去，但只要長線持有，就會等到。

最主要係電動車開始在技術上，突破左樽頸位，市場真正接受佢的產品，加上配套成熟，都令消費者更願意比錢買，而不是單靠政府支持。

另外，市場對行業有好大期望，因此股價上得好快，不過，這種期望放在股價，有可能出現過熱，因此現價已經唔算平，可能已透支左幾年後的業務增長。

------------------------------------------------

Q18978：

Sir，因為睇了你的書，對理財方面的認識多了。近日有同家人提及過少少，可能媽媽都見我係認真，所以佢今日問我，佢話佢有一手港交所，之前買落，而家賺了8000蚊賣唔賣好。我當然同佢講唔好賣啦，優質股要長期甚至永久持有!

然後我靈機一觸，媽媽其實已經一早財務自由，有一間非住宅物業收租，有穩定現金流。不過基於現金會被“主人”偷走，我覺得佢有幾十萬現金實在係有點可惜。(而佢亦都識講話覺得錢好似愈來愈少咁)

媽媽一向都對投資無興趣，我亦都唔想佢50幾歲人用我的心態投資，不過我就想幫佢分段買入一啲收息股，等間中有啲零用錢，好過就咁放銀行，畢竟佢已經有穩定的被動收入，銀行入面的現金其實都無實際生活上的用途。

如果想幫媽媽買股票收息，我諗我都會用月供方法，比較簡單，可能一個月一萬咁樣。之前龔sir講過中電同港燈都係收息股，而我相信煤氣都係。

想請教一下，中電同港燈兩間都係做電，都係必須品，又係市場上的sole supplier，兩者的質素其實有沒有差異呢？

另外煤氣係好多我公司的師奶同事都喜歡的股票，50幾歲的師奶係咪都因為佢係收息股而適合呢？

最後想問問sir，你極力推薦的盈富，我自己有月供，打算同盈富一齊成長。不過媽媽去到50幾歲呢個人生階段，係咪其實未必咁啱佢？

還是應該幫媽媽月供一隻電/煤，再加一隻房託(如置富)會比較好呢？

龔成老師：

我地最重要是建立「財富的配置」，你要設計翻一個適合佢年齡、風險程度的組合。

佢現時有物業，餘下的財富配置應該著重股票，如果佢對股票認識不大，投資收息股是可以的，而原有的港交所可持有。

佢可以建立一個收息股的組合，目標是5%、6%的股息率的收息股，例如港燈（2638）、煤氣（0003）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

港燈與中電（0002）都優質的，只是港燈派息較高，中電就增長力較好。

至於盈富（2800），如果佢可以承受少少風險，加入去組合是可以的，長期月供模式。

------------------------------------------------

Q18979：

老師你好,i wanna know 點可以PREVENT隻股升到好高先追買的壞習慣

龔成老師：

你可以用幾個方法

第一，用月供或分注等模式，當你鎖定想買入某股時，就要同時設計好入市的模式，只要唔好一次過入，而是用「設定好」的模式去入，就能有效減少風險。

第二，小心計算企業價值，只要利用計算，就能避開貴的價位買入，所以這是投資者好需要學習的。

第三，買入時多D留現金，唔好用盡。

------------------------------------------------

Q18980：

老師 現時我21歲每月兼職有4000左右

請問買股票可以點樣增加實際現金流？簡收息股？

如果只月供$500盈富會唔會唔夠？ 我想每個月有番啲收入

如果月供埋公用股會唔會好啲？可以收息？

另外港鐵 比亞迪 小米 適唔適合我依家呢個時候買？呢啲咩價位入會好啲？唔該曬

龔成老師：

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。做月供股票，每月$2000。

你可以考慮盈富（2800）$1000。

另外再加1隻（每隻$1000）：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：安碩恆生科技ETF（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177），但就要明白波動性比上述會高左，同時風險大左，你要自己平衡。部分要等回少少先入。這些股月供都得，但就唔建議這刻大手買。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

Microsoft Teams版本那麼多種，到底要怎麼分以及能否符合申請的資格？讓燕秋老師為您說明白～

教育版
分成A1、A3及A5
A3及A5是付費版，A1為免費版。
大學由學校統一向微軟申請（組織形態），帳號會有二種方式：1.透過AD介接全校帳號，即可登入。2.學校手動匯入帳號。此部分請洽各校計中。
倘若前項二種方法都沒有（學校沒申請）那就使用網頁自行註冊，老師個人或學生個人只要使用edu信箱即可免費申請，目前國中小學的教育雲就是A1版本，也已完成帳號建置。
https://www.microsoft.com/zh-tw/microsoft-365/academic/compare-office-365-education-plans?activetab=tab%3aprimaryr1

個人版=免費版（2019年推出的版本）任何人都能申請使用
https://products.office.com/zh-tw/microsoft-teams/free

所以免費版就是現在的教育雲版本，並不是付費版本（二者功能預設上有些微差別但都非付費版的功能）版本功能列表可參考以上二個網址連結。

企業版
分成商務基本及商務進階版
由企業付費申請

這三個版本都能互加入為團隊（企業須設定），可設成來賓或成員

Microsoft Teams-免費牌、教育版及個人版，傻傻分不清？
https://youtu.be/JC05X8wlzTI

#燕秋老師教學頻道
#數位學習顧問
#燕秋老師教學團隊