. #蟹膳 #Kanizen 今年食咗人生食過最貴嘅一餐，$1720+10% per head，但真係令人回味無窮，食勻最高級嘅蟹類品種，包括鱈場蟹、松葉蟹同埋毛蟹。 首先餐廳裝潢具格調，一日內就見到巨大魚缸，可以欣賞非常大隻嘅活蟹，請人嚟食飯非常體面，餐枱上仲有一個小魚缸裝著一隻蟹仔，好得意。 我哋選擇咗「花見」餐牌，共11品料理，睇吓我哋食咗咩好野啦： 🌸前菜 - 係有蟹肉嘅柚子沙律，fresh fresh地好開胃 🌸松葉蟹腳刺身 第一次食蟹刺身，口感特別，唔係一咬就好容易散開嗰啲，如果唔係選用新鮮蟹都唔會可以食到刺身。 🌸蒸松葉蟹及蟹膏 呢碟菜由蒸籠煮上，由我哋食緊刺身嘅時候開始蒸，即使唔識食蟹腳嘅人，都可以試到濃濃蟹膏嘅蟹殼，相對比刺身，呢道菜可以直接試到蟹肉嘅鮮味，啖啖滿足。 🌸燒鱈場蟹蟹腳 大家睇到張相應該都真係嚇咗一跳，大大條蟹腳，即燒即食，真係點煮都好味。 🌸松葉蟹蟹鉗及鱈場蟹蟹腳天婦羅 呢道菜係我最愛嘅頭三道菜，天婦羅整得非常之出色，而用上嘅松葉蟹部位非常厚肉，平身未試過食蟹可以係啖啖肉，真係有感動到流淚嘅衝動，同埋用天婦羅嘅煮法，可以保持到蟹肉嘅鮮味，又可以試都脆卜卜嘅外皮，兩種口感都非常之正。 🌸凍毛蟹 其實食到呢度，已經食咗好多蟹肉，而呢道菜再次用咗唔同嘅煮法繼續刺激食客嘅味蕾，以凍食嘅方式呈上毛蟹嘅精華。 🌸鱈場蟹及松葉蟹蟹肉火鍋 🌸雜菜盤火鍋 呢個係類似壽喜燒嘅食法，有一大盤蔬菜，加上蟹肉，令食客可以食返少少蔬菜類嘅嘢，一樣咁鮮味，鍾意火鍋煮法嘅食客一定好滿足～服務員會先讓食客品嚐湯底，再去調整鹹淡程度，我哋就加多咗少少蛋，令湯底更有蛋香。 🌸蟹肉餃子 食到呢度其實已經非常飽，但因為未試過蟹肉餃子，點都要試吓，結果當然真係唔會令人失望。 🌸雜燴粥 最後就好似打邊爐嘅ending咁，會將所有鮮味共治一爐，用足去將所有食材嘅精華濃縮一起，呢度菜都係我嘅top three。同埋食到最後，粥都係一個易入口嘅途徑吧。 🌸甜品 完美嘅一餐又點少得甜品呢，甜品係雪糕，有芝麻同柚子雪芭，個人較愛前者，口感非常濃郁，但其實兩款都好好食。 總括而言呢餐真係令人非常難忘，本身唔識剝蟹嘅我，一路都淨係識食蟹蓋，好少食到蟹肉，但呢餐令我知道原來蟹可以有好多肉食，係可以肥美到同肉差唔多嘅程度，同埋透過咁多種唔同嘅食法，對蟹呢種食材都有更深入嘅認識，真的是一場盛宴。