【龔成問答信箱】（Q21301-Q21320）

Q21301：

龔SIR 我有問題想問

1. 想問股票班，第4堂現金流折現法如果用係股票, 適合用係邊類型股票? 還是呢種方法唔係太適合用係股票?

因為股現金流折現法用係有年期同穩定無增長既資產先適用…

咁股票全部都係無年期, 加上增長率難預測, 咁係咪現金流折現法唔岩用係股票?

2. 另外想問第5堂教的估值法,,合理區範圍要加Buffer,, 想問點計個百分比, 例如合理區係 $100-$200,, 範圍百分比應該係

(a) (100/200)X 100% = 50%
(b) (100/100)X 100% = 100%

3. 都係關於市盈率估值法,,如果某公司佢係行業龍頭, 需要調高10%,,想問係調高佢PE合理區還是計到最尾個Step 先調高合理估值?

參考第5堂Notes P.34, 388為例,,388因為係壟斷狀態, 要調高

咁應該係幾時調高?
(a) 將PE合理區32.7 – 37.7 倍調高10%
(b) 將合理估值加左Buffer 後的 $212 - $298調高10%
(c) 還是無所謂, 兩個是但一個都得?

4. 我用左388 最新數據去計佢個合理估值,.

年度: 2016/2017/2018/2019/2020
每股盈利($): 4.76/6.03/7.5/7.49/9.11
每股盈利增長率(%): -28.96/26.88/24.38/-0.13/21.63

近5年每股盈利 = $6.978
增長率 = 8.76%
有代表性的EPS= $7.53
合理PE = 34.18x to 42.75x
估算合理價 = $258 to $322
因為估值範圍闊度=25% 所以唔洗加Buffer

(a) 想問以上估值計得岩唔岩?

(b) 因為我想增長率準確D, 我用左過往5年增長率相加再除5

[-28.96 + 26.88 + 24.38 + (-0.13) + 21.63)/5 , 得出8.76%,

我想問堂上你話實計既法(複式增長率) 係咪就係咁樣計? 定係我計錯?

(c) 都係關於增長率問題, 我上網睇番”預測每股盈利”

年度: 2021/2022/2023
預測每股盈利: 11.88/13.73/15.64
EPS增長率(我自己計): 30.4%/15.6%/13.9%

我可唔可以用2021既既預測每股盈利增長率30.4% 當作計算有代表性的EPS既增長率? $6.978 x 1.3= $9

咁樣計法會唔會唔準?

(d) 想問估值範圍闊度應該係(322-258)/322 x 100% =20% 還是 322-258)/258 x100% = 25%

5. 第5堂Notes. P.83, 點解公用股可以用PB Ratio 分析? 公用股Average PB Ratio 13x-16x, 大過4x 正常應該唔可以用PB 分析

有勞龔SIR！

龔成老師︰

1) 其實現金流折現法，係最正統的估值方法，基本上係適合於任何股票。

但由於計算上，有不少主觀數字。只要稍有偏差，最終計算結果的落差，係可以好大。

如果你經驗較淺，你用佢來計算現金流穏定，或者資產有固定年期的企業(好似西隧盈利)，係可以。

但若果你想計一些波動性較大，增長力較高的股票，我建議你先用其他估值方法，會較為穏陣。

2) 假如你初步估值得出，合理區係 $100-$200。

你就用佢2者的差額，即$100。再去比對估值中最高價位，即係$200。

以100/200，得出結果係50%。由於合理價格範圍，高於20%，所以你就不用在初步估值上加入緩衝區。

但假若今次，你初步估值得出，合理區係 $100-$110。

以10/110，得出結果係9%，少於我們要求。因此，你要在初步估值上，加入10%緩衝區。

最終估值，會變成$90 - $121。

其實你要明白這個加緩衝區的原理，是希望股價能更有效反映合理區，你不要公式化去用。

3) 其實港交所，一直都係獨市經驗，你用佢過往PE作參考，已經可以。

因為當中已經反映其獨市優勢，不用作調整。

至於所謂的調高多少%，其實是當比較該企業及行業市盈率時，若然這企業是龍頭，若果以行業市盈率作基礎，就有可能調高，但調高多少%，無絕對的，因為最重要是衡量該企業比行業有多強。

4a + b) 我地算增長率，唔係單單用個平均數，而係用過往多年的增長，去計一個每年平衡增長率。

由2016年至2020年，每股盈利大致上升92%。

年度化增長率︰約為+18%
有代表性的EPS= $8.23
合理PE = 34.18x to 42.75x
合理估值︰$281 - $352
由於合理區範圍只有20%，故再加10%緩衝區，估值變成︰$253 - $387

當然有代表的EPS，我用增長率18%，當我地運用時，要理性地分析，往後是否能增長18%，我地不能公式化運用，要明白每一個數字背後所代表的意義。而從18%推算出來的有代表性的EPS= $8.23，由於能有效反映近年的盈利情況，因此，我相信這數字有一定的代表性。

4c) 你都可以參考大行預測，但最好用多間大行的平均數。之後，你可以用佢結果，再更你計算結果，取一個平均數，去作為有代表性的EPS，都係可以。

4d) 以你上述例子，(322-258)/322 x 100% =20%才是正確計法。

5) 由於公用股，主要企業價值，都可以反映在會計資產上。因此，可以用市賬率，作為計算中電(0002)這類公用股平貴指標。

我相信你見到公用股佢PB去到10倍以上，是找錯左數字，你見到的數字，應該不是PB。

------------------------------------------------

Q21302：

龔老師 請教下，0548已過除淨日，係未再回落D再入好D呢

龔成老師︰

首先，你可能對派息運作，有點誤解。好多散戶都會覺得，「除淨日」後會跌，那時候買入就最抵。

其實，這個想法係不正確。

「除淨日」，其實就是用來確認那些股東收到這權益的日子。等到「除淨日」當天才買，派息就唔會有你份。

「除淨日」那天，股價就會扣除派息部份，例如原來股價$10，派息$1。那麼「除淨日」就會將股價，從$10下調至$9，以反映派息動作。

而「派息日」，就係這班合資格股東，正式收到股息的日子。

由於「除淨日」股價會下跌。而下跌比重同收到息係一樣，所以只係左手交右手動作。作為投資者，你唔會在此期間前後，去做買/沽貨，而出現任何著數。

所以，「除淨日」只係一個用來扣除派息權益的日子，與你是否投資一隻股票，係絕對無關。

深圳高速公路股份（0548）有質素的，這股持有不少有質素的資產，現金流穩定，不過增長力不強。

這股有長線投資價值，收息可以，但就不要對股價有太大期望。現價合理。

------------------------------------------------

Q21303：

你好阿sir，我已睇左三本你既書，分別係選股、股票同年報勝經

本人都對金錢系統同時間值有概念，識捕捉市場恐慌同熱市同有明確目標6年要有100萬

目前進度用左15個月18萬貨，4萬現金，問銀行借左平loan 10萬等恐慌入市機會

但睇完三本書始終吾識做估值衡量股票平貴

一般既市盈率同現金流折現法都明白，但吾識衡量股票平貴同搵潛力股
求指點

龔成老師：

對，保持閱讀與進步，長遠來說，你的知識一定同財富成正比。

至於借貸投資，則是有危有機，雖然利息不高，但你都要明白，這動作有風險的。我一般較建議「有明顯機會才動用「借」這個最後動用的「皇牌」，在一般情況，不太建議為借而借。

如果你現時已經借了資金，就可以等大跌市時，好好把握機會，但唔好心急動用，寧願輸利息，都唔好心急投資。

要計企業的價值，過程比較複雜，好難三言兩語就講到，就算在我的股票班，都要講5小時，裡面會講3種估值方法，有難有易，但同學都用到的。

簡單來說，你要考慮企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。

例如，我地會考慮佢有多少生意，有多少盈利、現金流，有多少資產，從而計算該業務值多少錢，同時會推算將來的盈利情況，去推算這企業長遠的價值。

如果要深入計算，基本上要好仔細的研究企業，要分析好多財務數據用比率，先至有較完整的答案。

------------------------------------------------

Q21304：

老師你好呀！
請問你點睇1358同2899呀？謝謝你

同埋358

龔成老師：

普華和順（1358）主要於中國開發、製造及銷售再生醫用生物材料產品；輸液器產品；以及骨科植入物產品。

本身業務有點波動，同時未見有好大獨特性與規模，整體的投資價值未算好高。

佢派特別股息後，股價除淨大跌，而派特別股息令佢現金減少，整體企業發展力不強。整體的投資價值唔高。

紫金礦業（2899）佢主要從事黃金及其他礦產資源的勘探、採礦、生產、冶煉及銷售。

但你要留意番，雖然這類資源股雖有投資價值，但只算中等。

原因是這樣，資源本身有一定的價值，但盈利始終受國際黃金價格影響，本質上會較為被動，無乜價格自主能力，同時產品無差異性，是典型的商品企業。這類企業都有一定的投資價值，但就不會太高。

江西銅業股份（0358）係中國一家綜合性銅生產企業，主要業務範圍為於江西省東北部經營銅采礦、選礦、熔煉與精煉以生產陰極銅、銅杆線及副產品，包括硫精礦、硫酸及電解金和銀以及稀散金屬，如鉬精礦。

佢亦會為客戶根據來料提供熔煉和精煉的加工服務。

就過往的業務情況來分析，這股不過不失，盈利較為波動，反映無乜產品價格自主的能力，長遠企業價值增長只是一般。

這股不是劣質，但都不是高質，相信股價長遠未必有明顯上升，只是較普通的企業，投資價值只是一般。

------------------------------------------------

Q21305：

老師，目前只有以下的股:
939@4000,
968@2000,
1177@2000,
1810@1000.
1257@2000

想問1257和956邊隻較好，
睇左老師的書，想入

1317或1569两者選一，
1448，1830，1928，696，1458，老師可以比d建議應該咩組合較好

另外，也想問下老師如何評價558，我見佢都升得多，
謝謝你抽空睇我的留言

龔成老師：

現時持有的組合，基本上都是有質素的股，長線持有無問題，但要留意，當中持有的小米（1810）、信義光能（0968）、中生（1177）都是潛力股類別，這些都是可長線投資，但都不能過度集中在潛力股。所以當你日後增加潛力股時，要留意翻比例及上限。

新天綠色能源（0956）本質不差，值博率會高少少，有一定的增長力，但由於都有一定的負債，考慮到風險因素，現價只是合理區，未算平。

你投資都可以，分注無問題，但由於這企業規模比較細，加上有行業風險，因此唔建議太大注。

至於教育股，可考慮楓葉教育（1317）。

至於另外的5間，都是有質素的，如果想收息及平穩增長，可考慮金沙（1928），如果想潛力，可考慮褔壽園（1448）、必瘦站（1830）（當然這兩股回翻少少就較有值博率）。

------------------------------------------------

Q21306：

老師您好，請問一下必瘦站1830，您如何分析及看好的原因，希望能夠詳細地瞭解一下您的看法。非常感謝您！

龔成老師：

必瘦站（1830）長遠有發展，本身有一定的質素。

睇翻之前的疫情，佢身處的行業受影響，但佢的現金流及財務數據都唔算差，這點可以想象到，當正常的經營環境，佢的生意一定唔錯。

加上佢的野心愈來愈大，本身有一定的技術，同時不斷將香港的業務模式複製到其他海外地區，我見佢加強了發展其他地方，因此發展不差。

這股有長線投資價值。

這股我自己都有貨，都是長期睇翻，見佢之前的發展一直唔差，加上疫情仍有錢賺，這是加分的地方，你可以推算到，當經濟正常翻，佢的生意一定會唔錯。但近期升了好多，已貴，最好回少少先小注，大跌先正式買入，會較穩陣。

------------------------------------------------

Q21307：

老師我剛開始月供股票，2800 $2000，823/2388各$1500，現在有2個小朋友約10歲，我想將佢地既利是錢用黎買股票希望在佢地成年時已有一筆唔少既錢比佢地繼續投資

如果我用佢地既錢用晒黎買3067長線可以嗎？還是有其他穩陣長線部署？

自己持有
8000 股 1313 $9.34
2000股 358 $16.76
可長線持有嗎？

龔成老師：

你現你月供的盈富（2800）、領展（0823）、中銀（2388），都是有質素的，都可以長期進行。

至於現時持有的股票，華潤水泥控股（1313）本身有質素的，不過業務就較有波動，佢過往的盈利數據上落都大，因此股價的變大亦會較大。

佢之前公布的中期業績，業務有回落情況。長遠計，房屋、基建發展等因素，都會利好水泥股。因此長遠是正面，你長線持有就得。

至於江西銅業股份（0358）係中國一家綜合性銅生產企業，主要業務範圍為於江西省東北部經營銅采礦、選礦、熔煉與精煉以生產陰極銅、銅杆線及副產品，包括硫精礦、硫酸及電解金和銀以及稀散金屬，如鉬精礦。

佢亦會為客戶根據來料提供熔煉和精煉的加工服務。

就過往的業務情況來分析，這股不過不失，盈利較為波動，反映無乜產品價格自主的能力，長遠企業價值增長只是一般。

這股不是劣質，但都不是高質，相信股價長遠未必有明顯上升，只是較普通的企業，投資價值只是一般。因此不建議持有太多貨。

至於你小朋友，集中投資恆生科指（3067）不是不可，但就始終有少少風險，要睇你地的風險承受能力。這是一個潛力股基金，當中都是潛力股，回報高，風險大。從你小朋友長線投資角度，不是不可，但就要明白這動作的風險，如果承受風險能力不高，就只宜部分投資這基金，不能全部。

------------------------------------------------

Q21308：

你好，想問下﹐我用個個估值方法對於某d股會偏差好大。

好似我用來計1177﹐佢收入一時可以增長40%﹐一時又得16%﹐今年仲下跌左﹐變相好難預計以後增長幾多%

龔成老師：

當我地進行企業分析，以及進行估值時，最重要是找一些核心因素。

例如你見佢有時收入增長較多，有時就較少，而我地會著重佢長期的收入增長是多少，而不是一年半年。

同時，你不能只公式化去運用，你要懂得將財務數據「意義化」，你要解釋翻，點解佢該年會增長較多，而另一年增長少，當時的大環境怎樣，而將來的大環境發展又會怎樣，從而推算將來的收入及財務數據情況。

因此，你要利用對企業「核心」，及「長期」的因素作為分析點。

------------------------------------------------

Q21309：

龔成老師，如果3067咩價位入比較適合？

175，2600現價可入？

龔成老師：

安碩恒生科技（3067），有長線投資價值。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂至略貴，因此，這刻不能大注投資。最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

吉利（0175）業績弱將會對股價短期不利，企業價值都有少少影響，不過最重要睇翻長遠價值，吉利（0175）本身的質素不差，擁有一定的銷售網絡及品牌，不錯的市場策略及定位，而又能把握中國汽車市場增長的機遇。

長遠來講，佢的品牌與發展在中國仍理想，2018年，吉利透過旗下海外企業，動用超過$500億人民幣收購戴姆勒股份公司9.69%股份。由于戴姆勒股權結構分散，所以吉利已經成為了戴姆勒集團最大單一股東。這不單有利佢有中國發展，同時長遠，可能加快了海外發展速度。

另外，佢未必發展自己的電動車品牌，但會發展當中的技術，相信在合作及自身價值上，長遠仍是正面的。

現時價位在合理區中上部至頂位，股價波動，有貨可長線。如果現價入貨，小注都得。

中國鋁業（2600）主要從事鋁土礦、煤炭等資源勘探開採；氧化鋁、原鋁和鋁合金產品生產、銷售、技術研發；國際貿易；物流產業，火力及新能源發電業務。

過往的業務與盈利都較波動，反映企業較受外圍價格影響，產品價格自主能力較弱。

質素算中等，現價合理，但又唔算吸引，投資價值只是一般。

------------------------------------------------

Q21310：

啊Sir，多謝你之前回覆，之前請教過你後已減持左一半煤氣轉到9988，同時亦投入左一部分係3067。以下係小弟現時既倉。

想問以下問題:
1. 餘下的煤氣應在那個價位完全減持？

2. 鐵塔長期表現不佳，我應否轉股？如果轉的話那個價位開始減持和轉那一隻股票？

3. 小米和阿里，暫時是我第二、三大持倉，我應在那價位再增持？

4. 福壽園和舜宇光學我非常看好，應在那價位增持？我看福壽園最新業績理想，合理區會由$7上升多少呢？

5. 3067,我在$19.51入市，應該算略貴，我應該如何是好？和在那價位再增加呢？

麻煩晒啊sir

優質股:
1. 煤氣x3,000@$14.5,
2. 銀娛x1,000@$52.25
3. 港鐵x3,204@$38.93
4. 領展x2,137@$62.83
5. 金沙x5,322@$28.78
6. 盈富x2,[email protected]

-潛力股
1. 鐵塔x90,[email protected]
2. 小米x5,400@$25.89
3. 舜宇x500@$129.8
4. 雅生活x3,250@$31.92
5. 中生製藥x12,[email protected]
6. 福壽園x6,000@$7.67, 4.96%
7. 阿里巴巴[email protected]
8. 3067x3,700@$19.51

龔成老師：

1）煤氣（0003）不是無質素的，因此你餘下的貨，持有都無問題。

除非你好想集中資金在潛力股，但其實我又不太建議。

2）中國鐵塔（0788）不是無質素的。始終中國的3大電訊巨頭，都是佢的主要客戶，以及大股東，當5G發展，佢一定會受惠，因此前景仍然正面。

佢現時的收入都增長，盈利都保持向上，但增長比之前略減，加上股本回報率不高，是這股較弱的地方。若分析佢市盈率，會見到現時仍然處較高水平，反映佢雖然股價回落左唔少，但仍然未到平。

這股算是合理價。

這股長遠仍算有發展力，可長線。不過，潛力度比過往略減。

其實只要你持貨不過多，就無問題，如果你較擔心，就賣部分轉其他較有增長力的。

3）如果已經佔有一定的比例，就唔好心急，其實一隻股佔股票組合15%已經是上限，你可以考慮翻這個因素。

同時當你已經持有一定的比例，就更加不要心急加注，小米（1810）最好落翻2成以上，而阿里（9988）就落翻1成以上，先考慮加注。

4）這兩股都是有質素的，但經常都唔平，其實你可以考慮月供。如果你本身有貨，可考慮跌翻1成以上加注。

5）你預恆生科指ETF（3067）合理區頂約在$16/$17，如果低過這價，你又資金足，其實可以慢慢分注買入，以長期儲貨的模式進行。

------------------------------------------------

Q21311：

老師你好！之前因為要買樓俾首期所以將所有股票都賣晒，而家要重新建立股票組合，想再請教一下老師。

三十歲，穩定職業，月入大約十萬，扣除供樓及生活雜費後，每月大概有三萬元剩，打算每月投放兩萬蚊於股票投資，一萬作儲蓄，另外現金有30餘萬打算放入投資市場。

暫時自己選擇了
穩健的包括：

- 美股ETF: VOO

- 創科實業

潛力股包括：
- 小米
- 金沙中國
- 金界控股
- 必瘦站
- 舜宇光學
- 福耀玻璃
- 阿里巴巴

想請問一下老師我的選股是否正確，比例就應該怎樣分配？多謝老師，祝生活美滿！

龔成老師：

基本上，方向正確。

你剛買完樓，可以重新配置個整個財富組合，由於已置業，在之後的配置上，考慮以股票作為增值，是可以的，亦是較平衡的做法。

你所選的都是有質素的股票，都可以考慮，以你30歲的年齡，基本上是適合的，如果你本身有一定的投資實力，潛力股可以去到60%，如果投資實力一般，就大約30%已足夠，你可以睇翻自己的實力及風險承受程度去配置。

$20000作投資（可以利用月供或分注），以及$10000儲蓄，方向正確。

至於現金$30萬，以現時的投資市場平貴，你動用一半資金，以分注模式買股票，可以的。餘下就留現金，去等機會。

至於上述股票，無問題，VOO是ETF，佔比多少少都得，至於其他，就投資適當的比例。

要留意福耀玻璃（3606）、必瘦站（1830）、創科（0669）、舜宇光學（2382）現價唔算平，投資時要控制注碼或回少少先考慮。

------------------------------------------------

Q21312：

阿Sir！好開心我睇完你本書買左1211同1830，都係短時間升左好多

所以1211我無忍得住5手放左2手，不過已經攞返本金。必瘦站就吸收左經驗，無放到，但又後悔無買多啲

我呢種心態係未唔係幾好要改？

另外正題
我股票有

1830,13638股
1211,1500股
0066,1039股
1928,400股
823,213股

全部都係大跌嘅時候買，
所以以家全部都係賺，
但係而家有一個問題，
我唔知可以再買咩

因為好多都唔平，
但係我又唔想月供，
係咪一年只係等一次機會入，
儲多啲錢先？

龔成老師：

比亞迪（1211）同必瘦站（1830）都有質素，同時長遠有發展力的，你餘下的貨，可長線持有。

至於心態，我地永遠無得後悔，投資好需要你理性，因此你平常心就得。

其實，你現時持有的，都是有質素的股票，你持有就得，唔需要太著重當時買入價。

因為最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

至於你唔知可以再買咩，其實，投資不要心急，不要為買而買，要有機會才買，現時大市在合理區，如果部分較貴的股票，就不要心急入貨，但有部分股，其實現價仍可考慮，當然，你要有一定的資金留低，而不是用盡現金，因為以現時的整個大市平貴狀況，你留翻3-5成現金，其實都可以的。

如果你現金較多，可以考慮一些合理，平穩增長股，例如：考慮盈富（2800）。

另外再加：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果不想月供，就分注進行。

但要記住，留部分現金，等機會，都是重要的。

------------------------------------------------

Q21313：

Hi, 你好. 有個關於轉工嘅小問題想請教下你

之前有間公司, 經agent幾年前問過我有冇興趣一個post, 跟住我話冇興趣, 幾個月前同一個 agent 搵我去interview 同一間公司 一個post,

佢請咗我同事, 佢係 restructure 要攞package嘅人, 跟住依家有另一個 post open, 同我而家做緊嘅嘢差唔多, 星期五agent叫咗我去interview, 星期六朝早收到offer,

佢減咗我3k人工, 大約有 50% 人工升幅, ~10k, 現在我在這間公司做了11年, 工作環境, 老細, 同事不錯, 只係沒有什麼升職機會, 想請教下你的意見, 萬分感謝

因為我公司將會有restructure, 大約5-7月才知道, 請問我應該推掉 offer, 等restructure之後才找工作( 如果真是被裁員), 其實我現在的工作也挺穩定的, 未必會被裁員,

現時3X 歲. Thanks a lot

現時人工30k

龔成老師︰

你可以多從「長期」視點去分析，就工作來說，無論做那份工作，我地的主要目的都是薪金，以及興趣。

你可以想想，10年後你希望自己的薪金如何，職位是甚麼，當你有左這個大方向，就知道這一刻的情況。

因為2份工作表面上，工作內容係一樣。但當中可以學習，進升等機會，相信會有所不同。

你已在現在公司做了11年，應該會了解，5年後、10年後、甚至20年後，你發展會係點。而這個結果，是不是你想要的?

正如你所講，現職地方無乜升職機會。若果你目標係更上一層樓，咁你就要諗下現時工作環境是否真的適合。

如果不適合，我建議你可以考慮一個新環境，試一試。

當然，此前你都可以問下你轉左新公司的同事，了解一下這公司的情況，去再作衡量。

至於裁員會係一個風險，但唔係而一刻你決定去或留的主要理由。更重要係睇長線發展，邊一間先會更大機會發展到你心目中的目標。

------------------------------------------------

Q21314：

龔成老師您好，小弟對派息基金有疑問想請教下您。

留意到XXX有一種叫每月派息兩次既基金計劃，佢嘅做法係首先喺月頭買入一隻係月中派息的基金，等到佢除淨之後，就將舊錢轉落另一隻月尾會派息嘅基金度，

咁就變相一嚿錢同一個月收兩次息。我明白個本金，會因為要派息而下降， 但我留意到佢基金價格都尚算穩定，10年來只係緩慢下降，過往紀錄派息記錄好穩定。

就算基金價格慢慢下跌，但收到既利息係扣除基金價格下降後仍然有利潤 。計劃提及會有每月10%利息。

Btw我留意到XXX有同樣嘅做法，佢自稱一個月可以最多轉四次，但要喺操作上邊好完美先做到。

XXX動力亞洲高收益債券基金
XXX基金 - 亞洲高收益基金

龔成老師︰

首先，你要先了解，到底收息資產，是否適合你自己。

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

因此，若你係年青至中年人士，而一刻應先集中財富增值，收息產品並不適合你。相反，你已近退休之年，又或者你係好保守架投資者，將資金投資在收息資產，係可以。

債券和派息基金，這其實只是「產品」，物業、優質股是「資產」，所以從財富本質上，我地應較集中持有「資產」，才對我地最有利(你可以睇睇《財務自由行》一書，我從財富本質上，講述了當中原理)。同時，現時息口低，但未來有機會重回加息週期，債券未必是最好的投資工具。

至於債券基金，坊間分好多種，你要小心睇，因為有d風險低，無乜問題，有d則有潛在的風險，絕對不是保本的產品，有機會出現了「賺息蝕價」的情況。

第一，有些基券基金，會投資「高收益債券」，即是「垃圾債券」，你一定要睇睇佢所佔的比率。

第二，債券基金往往不是單純地持有債券，而是可以作買賣，以及利用衍生工具作對沖等策略，即是可能有價格上的波動。

第三，不少銀行都會提供借貸，以槓杆去放大回報，以平息借貸去賺取息差。低息環境時間題不大，但進入加息週期，不止借貸成本增加，同時債券價格往往在加息期下跌，雙從打擊下，投資價值成疑。當然，若然加息步伐不快，息差利潤就可觀。

我不是說債券基金有問題，只是說明當中的風險，因為市面上的基券基金好多，你要仔細分析。

你以所以提及的，都是收息類產品。XXX派息基金計劃，派息係吸引。但你要留意翻是否全數為「保證部份」，還是會有波動。

而「XXX動力亞洲高收益債券基金」和 「XXX基金 - 亞洲高收益基金 」 ，主要都係投資一些「未達投資級別的高收益證券」。

這類所謂「高收益債券」，即是「垃圾債券」，風險唔細。

唔係話唔可以投資，但你要明白當中有一定風險，而非一個穏陣的收息選擇。

------------------------------------------------

Q21315：

龔成老師，你好!我現時剛出來工作，為專業人士，工作穩定，月入三萬，每月可儲2萬，現暫定每月固定存1萬去股票戶口。暫定來年會用16萬去進修，目標是30歲時買到700萬的樓。

上年開始接觸股票，現時股票戶口有 27萬，分別為
港股 15.6萬
美股 6.7萬
現金 4.8萬

另外有銀行有5萬存款、2萬 ibond及10萬定期 (4月到期)

以下為港股詳情
1. 9988 X 300 平均價:257.3333
2. 00001 X 500平均價:57.6
3. 1093 X 2000平均價:8.5
4. 00003 X 1050平均價:13.7524
5. 3319 X 250平均價:30

6. 6618 X 50平均價:146.
7. 3067 X 300平均價:17.2333
8. 1317 X2000平均價:2.3
9. 3033 X200平均價:8.675
10. 3313 X 20000平均價: 0.1515

問題1: 我打算等3313回去比較高位置就賣出，這做法可以? 除了3313外，想問問上述組合有甚麼需要改進的地方? 我需要多增加潛力股，還是增持現有個股(3319/1093)，或增加現金?

問題2: 9988 佔倉好像比較多，但之後有機會波動，我應趁低吸納，還是維持現狀，甚或賣出一手?

問題3: 想問問我的買樓目標會不會太難達成? 我又可以以甚麼方式加快達成目標?

問題4: 想問問 1523 珩灣科技是否優質股? 因為其ROE在30%升至40多%、EPS、及派息都長期穩定增長，現時PE在15左右，亦不算太高

加上5G時代對其SD-WAN路由器銷售應該起剌激作用，初步分析正面。可是，由於沒有太多大行研究報告，所以不太肯定其預測盈利。

如果是優質股，同時想問問其合理價。

問題5: 想問問6186 中國飛鶴是否優質股? 因為其ROE在這4年都維持在40多%，且5年間淨利率增幅(10.91%  40%) 顯著高於毛利率增幅(54.61%  72.5%)，反映公司有效降低成本及定價。

如果是優質股，同時想問問其合理價。

問題6: 想問問1297中國擎天軟件是否優質股? 初步分析: ROE平均有20%; EPS穩定增長，而2020年度更是有100%增長;

流動、速動比率持續有6以上，反映公司現金流動性甚高; 公司業務(退稅軟件)具低成本，高獲利性，且沒有太多競爭者。

如果是優質股，同時想問問其合理價。

感謝你的回應。

龔成老師︰

1) 雅高控股（3313）主要從事大理石開採、加工、貿易、銷售、商品貿易及貨運、倉儲和物流業務。

公司市值不高，盈利十分波動，質素不佳。企業不斷虧損，無乜投資價值，賣出這股較好。你唔好預佢會升翻好多，因為佢投資價值好低。如果你唔想一次過沽晒，你可以分注咁出都可以。

你才剛踏入社會，算係年青一群。投資上，可以較為進取，以「平穏增長股」 + 「潛力股」作目標，比重大約各佔一半。

ibond和定期這類收息產品，增長力好有限，唔建議用。

至於組合上，你而家太偏重左係潛力股，佢雖然有增長潛力，同時風險都較高，不宜持有過多。

未來時間，你要加大翻平穏增長股部份，令組合更平衡。

平穏增長股：金沙（1928）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）、長建(1038)

2) 阿里巴巴(9988)成個組合近3成，明顯偏高，有過集中性風險。緊記，相同行業不可佔組合多於3成，而單一企業不要高過15%。

就算佢跌，你都唔好再加注住。到你組合平衡翻，你先再作考慮。

3) 大市過去年平均回報10%計（連股息再投資），你每月投資$20000再加上你現有定期、資金和持股等(約值45萬)，5年後大約會增值至250萬。

相信這筆資金，足夠幫助你置業。

4) 珩灣科技（1523）過往的增長不錯，相信長遠有發展，但公司好細間，一年盈利只有不足美金$1500萬，風險較高，現時估值算是合理，都有潛力的。

若你想投資，可以好小注博下。

5) 中國飛鶴（6186）不差的。

佢係中國從事生產及銷售乳製品，以及銷售營養補充劑，以生產嬰幼兒配方奶粉產品為主，當中可分為高端嬰幼兒配方奶粉及普通嬰幼兒配方奶粉兩大類別。

產品有一定的品牌與市場，同時過往的增長力理想，長遠有前景。

比較大的問題是估值，近期經常在合理區中上部至略貴的水平，股價有時投資值博率不足，因此要注意風險。長線投資可以，但就要控制注碼。

6) 中國擎天軟件（1297）本質不差的，市場擔心佢之後的增長動力減慢，因此估值上認為佢會較低，但如果佢能保持這增長，其實現時的股價有吸引力的。

這股的其中風險，就是規模較細，以及行業存有風險。現價其實有投資價值，但就唔建議太過大注。

------------------------------------------------

Q21316：

你好，龔sir ~ 我是在上月開始閱讀「80後百萬富翁」及 「大富翁置富藍圖」。我很後悔現在（30多歲）才閱讀你的書籍，浪費了很多時間。

我現在剛踏入股票巿場，想你幫忙分析一下組合是否合理？

周大富 20% $11入
盈富 25% $29入
海螺創業 33% $36入
太古地產 8% $24入
新鴻基公司 8% $4入
3067 ： 3% $17入

現在有2000是供基金（最少要多供2年，不算之後也會月供），月供$4000 （供2800，1929及 0586）。

另外，手頭有6萬現金，因要讀書。我應該先投資在股票巿場，都要交學費才換回現金，還是先保留？

最後，近來中國都在研究氫能量，請問你對1907 旭陽集團的前景有何看法？我比較擔心佢負債情況，但佢是行業龍頭，加上同地方政府有不同合作，也很吸引。

不好意思，一下子問你這麼多問題，希望你能騰出一點時間回應我的疑問。謝謝

龔成老師︰

你現時持有和月供的股票，都係有質素，適合你這年紀。但緊記個別企業，唔好佔組合15%以上，否則會有過度集中風險。

你周大福(1929)海螺創業（0586）明顯有這個問題，所以你月供可以先用另一隻股票代替。而現貨可持有，唔洗沽出，用新資金去慢慢平衡翻個組合，咁就可以了。

而盈富(2800)雖然超過15%，但由於佢係一籃子股票，而非單一企業，所以比重上係無限制。另外，恆生科指ETF（3067）反而你加翻少少比重都可以，但當然不是一次過加，只是這類ETF，組合佔多少少都無問題。

至於手上6萬現金，如果你1,2年內就要用來讀書，我就唔建議你投資了。因為時間太短，回報不確定性會好高。

中國旭陽（1907）無特別分析，只見之前有些報導。

佢之前公布，澄清最近涉及其於河北省定州市及內蒙古的氫能項目的若干媒體新聞報道，指定州項目試產，並擬於呼和浩特市建加氫站。

該集團指，有關於定州經濟開發區河北旭陽新能源產業園內建設運營氫氣儲運和建加氫站，有關生產基地去年7月開始試產，探索區內在氫能存儲、運輸和燃料相關電池布局機會，開拓京津冀市場等。

至於去年，該集團合營企業與呼和浩特清水河縣政府簽訂另一項氫氣項目框架協議，合作於清水河縣開展氫氣開發項目。

與定州項目相似，該集團將負責於清水河縣進行氫能生產、運輸和建設加氫站，把該市發展為華北地區氫能輸出基地。

只可以話有風險有回報的類別，如真的想投資，一定要控制好注碼。

------------------------------------------------

Q21317：

老師你好，本人24歲，扣除家用每月儲蓄約$15,000(自己較少開支和娛樂)，現金約有$100,000。

目標是28歲前置業，但預計現時置業需$400-$500萬或以上，不知這目標是否在能力和資金範圍內，所以想請教你的投資方向和意見。

股票如下：
0003 11.5，10,000股
2382 175，100股

另外，想問繼續買0003，還是賣出？定轉移集中買其他潛力股如舜如丶中生或小米。謝謝。

龔成老師：

你有4年時間準備，都可以利用投資，去適當利用股票去進行財富增值，到你準備買樓前的一年，就要將股票分段賣出，準備所需的資金。

你可以投資「平穩增長股」，加上小量「潛力股」為組合，助你幾年內財富增值。

煤氣（0003）增長力不強，你不宜持有太多，建議減部分，但留部分是無問題的。

另外，舜宇（2382）、中生（1177）、小米（1810）都是適合你的，都是有潛力的股。不過，你不能只集中在潛力股。

你現時的現金，可以動用$5萬，分注投資。

至於每月儲到的$15000，初期可月$10000去做月供或分注，到後期，就要慢慢減金額。

------------------------------------------------

Q21318：

hello 啊Sir
想問問

#2318 中國平安
#2518 汽車之家
#388 港交所

呢3隻長期持有可以嗎？
合理價大概係幾多？
謝

龔成老師：

中國平安（2318）有質素的，佢有規模，有品牌，近年的發展都不差，不過，股價有時會有少少波動，這主要受投資市場表現影響。

這股有長線投資價值，是平穩增長型，分注投資都可以。

港交所（0388）絕對是優質股，獨市生意，加上香港的金融中心角色，這企業有長線投資價值。

多年來的生意與盈利都有理想增長，派息不差。

但要留意，由於這股的盈利會受股市成交影響，因此股價都會有影響。

這股雖然有質素，但近年成為市場焦點股，令佢經常處貴的水平。現價略貴，你預回1成較好。

這兩股都好有質素，你月供都得。

至於汽車之家（2518），都有質素的。

佢中國的汽車消費者在線服務平台。根據資料，以移動端日活躍用戶計，在汽車服務平台中排名第一。

透過旗下網站為汽車消費者提供全面、獨立及交互式的內容和工具並為汽車價值鏈的汽車製造商和經銷商提供全套服務。

根據資料，集團是最大的在線汽車廣告及線索服務供應商，就媒體服務及線索收入而言，於中國在線汽車垂直媒體廣告及線索市場中佔據的市場份額約3成。

佢收入源自媒體服務、線索服務及在線營銷及其他。

佢係2008年成立，最開始是一家內容型垂直媒體公司，專注於媒體服務。於 2016年，推出「4+1」戰略轉型方案，打造了一個囊括「車內容」、「車交易」、 「車金融」及「車生活」的平台，從內容型垂直公司轉型和升級為數據和技術驅動的汽車平台。

自2018年起，專注於用人工智能（AI）、大數據及雲技術（統稱ABC）開發全套智能產品和解決方案，透過提供跨價值鏈的端到端數據驅動產品和解決方案，構建一個連接汽車行業所有參與者的集成生態系統。

展望未來，計劃繼續利用「軟件即服務」（SaaS）能力連同核心AI、大數據及雲技術同時進行橫向和縱向擴張。

發展力是有的，但價位都唔算平，如果控制注碼，這股都可長線的。

------------------------------------------------

Q21319：

你好，想請教你，25歲，月入$25000，一直都是月光族
每個月要還卡數$7500（大約仲有1.5年）

但依家想改變，唔想再喺呢個循環，因為經常都會自責、內疚，依家想儲錢結婚、買樓，自覺好似得番好少時間，已經25歲

已報了你的投資班，希望學習投資知識，因為一直都無接觸理財、投資知識。

屋企人有買你的書，應該睇邊本先？

依家我打算先儲蓄、供月供股票，但係我應該供邊隻，同埋應該供幾多錢？仲有d咩可以做？
謝謝你！

之前只在中銀開左個股票戶口，我應該喺中銀做月供股票，定係有其他建議？謝謝你！

龔成老師：

過去的情況無得改變，自責無意義，你只要做好這刻就得，你現時25歲，只要行翻正確的方向，已經比好多同齡的人做得好。

現時，不要再增加卡數，如果卡數利息較高而又可以提高還款，就盡早處理。

之後，就要留有一定的現金，作為備用及等投資機會。

到餘下有資金，可以長期都不動用的，就可以做長線投資。

你25歲，財富有增長力，可投資「平穩增長股」+「潛力股」，在你知識未算高時，潛力股不用太多。

暫時，你可考慮一些ETF，如盈富（2800）以及恆生科指ETF（3067），至於個股，我會建議你上完堂後，先正式加入。

另外，現時大市波動，唔好用盡現金投資。

投資不用急於一時，這是一個長期的策略，所以好多野都可以等你上堂先進行配置。

------------------------------------------------

Q21320：

本人在銀行工作，part-time 要徵詢公司的同意，是不可能的事，但轉工是一個可行方案。不過，本人在這間公司任職，倘餘幾個月，快將7年了！

如果工作屆滿10年， MPF （僱主voluntary 部份）可以拿到100% 。現在要離開公司的話，損失40%, 大概都有幾十萬，唔捨得！

距離屆滿10年，尚有3年多，現在打算好好裝備自己。

老師，我明白在股票投資組合裏要取得平衡，投資增長力較強的股票的同時，亦要投資平穩增長股。

請問如果用7年的時間分別投資平穩增長股及增長力較強的股票，平均7年回報的差距有多大？

龔成老師：

其實我以前都做過銀行10年，我未過試用期，已經出現做兼職了，當然，銀行不會同意，佢地亦不會知。

這當然有風險，但有時做人，又唔好有太多限制思維。

但如果你不想做兼職，當然無問題，只要好好利用這幾年的時間，裝備好自己就得，因為我都睇得出，你的目標是起碼想做多3年，那你就好好利用這3年時間。

如果用7年時間，投資平穩增長股，我假設回報為8%，假設每月投資$10000，預期7年後滾存到$108萬。

如果用7年時間，投資平穩增長股，我假設回報為15%，假設每月投資$10000，預期7年後滾存到$130萬。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q19441-Q19460）

Q19441：

老師，我時常記着「當別人恐懼時我貪婪，當別人貪婪時要恐懼」，我明白這個道理。市場高位時，旁人不停賺錢時更加要克制；反之，耐心待跌市時別人恐懼時就是開始入貨的好機會。

我深深明白亦非常同意應該要長線持有優質股。但是如果明知道熱潮後有回落，那是不是需要在高位先放出然後待回落再買？？

這一點有時真的想不通⋯⋯⋯⋯⋯

謝謝解答！

龔成老師：

我地原則上，是長線持有股票，同時集中持有優質股，這點是不變的。

當然，有時當佢處於貴的時候，我地都有可能賣出，但我不建議全部賣，只建議賣出部分，因為當你賣出優質股後有機會買唔翻的！

所以，我建議點都要有優質股在手，就算貴，都只賣部分，盡量不要賣全部。

你這一句：「我深深明白亦非常同意應該要長線持有優質股。但是如果明知道熱潮後有回落，那是不是需要在高位先放出然後待回落再買」。

最大最大的問題，就是「明知」。

真的是明知嗎？

好多人會估大市將會升或跌，但最後都估錯，記住，唔好有「明知會跌」這總想法，好危險。

就算這刻真的貴，股市可以再貴，如果企業價值不斷上升，之前的貴過2年就可能合理。

港交所由幾蚊上市，不斷創新高，好多人在當中都認為「明知佢會跌，要盡快賣出」，佢地錯過了賺100倍的機會。

有D香港人，在過往樓市不斷上升時，因為「明知」樓市會跌，所以賣出自住樓，到最後永遠買唔翻。

------------------------------------------------

Q19442：

你好龔sir,我為左自己定下了個人目標為三年後有50萬資產

現有10萬元資產包括：
領展 300股
盈富 1500股
中國生物製藥 2000股
眾安 400股
$10000 現金

每月可儲$5000-$7000

1. 我點做先可以三年後完成目標，係米無咩可能做到？

2. 而家有既股票係米太散？ 洗唔洗集中一點？

3. 我想問新手應該睇股票勝經先定80後百萬富翁先？

多謝龔Sir

龔成老師︰

1） 以恆指平均年回報10%計，月儲$7000 + 本金10萬，大約可增值至40萬。

但由於3年唔算長時間，會有機會出現波動，令你最終回報的不確定性增加，你要知這個風險。

2） 唔算散，你每月儲$7000可先用一半做月供。餘下一半和1萬現金，就等大跌市。

你可考慮用$2000供盈富（2800），再加一隻潛力股$1500，好似安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園（1448）都可以。

3） 其實初學者，我建議2本都要睇。

另外想提你，眾安（6060）這類股，好難玩的，因為多年都在燒銀紙，就算近年才初見盈利。但都仍未能確定長線情況，這類股要估值好難。

因此，股價一定好波動，所以組合中不宜有太多。

------------------------------------------------

Q19443：

HI 龔成
我有一個比較複雜既證券戶口問題。

我本身持有以下股票
1177 2手
788 6手
2018 10手
883 6手
1398 13手
5 6手
3 5手
405 5手

全部都捱價中，一直想溝貨，但係現用的倉有存倉費及最低佣金費。雖然這些費用不算多，但長遠就以存倉費一年己被收300，我覺得不合理，假設長期持有，同時每年又被扣300，這些也是成本。同時，溝貨的話又被收最低佣金費。

我見有別間收費是不設最低收款額及存倉費，我打算在新的戶口溝貨，一心以現金儲有資產這信念。

以下我遇到的情況，應該怎樣好？
1）全部股票轉倉。蝕轉倉的手續費。
2）舊倉KEEP住，新倉溝貨。慢慢減持舊倉。

龔成老師︰

1） 其實存倉費佔整體成本好少，我唔會特別理。而我自己每年買賣次數係好少，優質股我買完就長放係度，所以佣金費高低影響唔大。

如果是我，就無必會做轉倉這個動作。

2） 你分開2個戶口，反而令整體成本多左。如果你真係想轉，最好一次過處理，選定以後用邊個。

另外，我想清楚"溝貨"與"分注"的分別。溝貨指是愈跌愈入，同時不理企業質素，不理自己的設定金額，盲目去入。

分注則是「一早定好買入策略，一早定好本金總數，並以有策略的模式進行」。

如果你係"分注"的話，你可因應平貴和質素，去進行。但若果係"溝貨"，就不是再入貨，因為再平，都只會令你增加風險。

------------------------------------------------

Q19444：

想與你分享一個好消息，剛完成月結，剛好衝破一百萬關口，而且比30歲的目標還提早了半年達成，多謝你所教的方法，亦都有幸成為你第N+1個達成這個目標的學生。

為了第二個一百萬，思考了下列的問題，希望可以指引一下我

1.第二個一百萬的目標設定為三年至三年半是否合理?第一個一百萬要5年，用乘的方法的話，第二個所要的時間假定為第一個的60-70%。

人工17K+3-4K pt(將來半年會上堂，預計減半)每月可儲10K。

2.資產分配方面，現金有30萬，股票70萬，其中包括一些之前買落的蟹貨(現值都有約4萬)，理智上明知清左佢地應該好些，總是不肯下定決心，甚至[陪]到我上到100萬...。

雖然黎緊會清左佢地，可是不夠理智這一點將會是接下來要改善的地方。要如何才能好像你這樣呢?

3.購置物業方面，因人工不高，按揭不會有太多的成數，也暫沒有購買的必要，所以暫不考慮。

不過，只要人工不高，便等於要動用大部分現金作首期才能置業，但樓價會同時上升，這便變了死胡同或者要起碼到150-200萬才能考慮?
多謝你。

龔成老師：

恭喜你！我記得當年我月結計到自己身家超過$100萬，都好開心的！第一個$100萬是最開心！

因為第一個是最難，之後反而錢滾錢的力量較大，會更加順利。

1）合理，但當然無絕對的答案，你只要保持進行之前所做的事。同時，由於你現時資金大左，每1%的回報差都會大左，因此，你應該投入更多時間去研究股票，提高回報率。

2）你要理性，這是成功投資者好重要的因素。

我會以更長遠的角度分析，例如5年、10年，現有資產怎樣幫我建立更多財富，如果該股的增長力不強，即是無作用，那就應該盡快賣出，轉其他。

唔好比過往的所謂買入價，影響左你，最重要分析佢將來會增值多少。

3）可以到近$200萬先考慮，因為股票的增長力較高，你利用股票增長去追物業，比起太急投資物業，會較好。

------------------------------------------------

Q19445：

早晨龔sir, 我就黎睇完你既股票勝經, 有個問題想請教你。

你話當股市越熾熱，個個都買股票貪婪既時候就係我地要遠離股市既時候。你覺得而家美股係咪呢個情況？我睇左好多間公司都係2020年3月後直線上升咁，身邊好多朋友都開始炒美股。

我暫時仲係增加投資知識既階段，未敢入場住，但見隻隻都升到飛天. 你覺得我應該點做

龔成老師：

2020年3月，當時是恐慌期，正正是《股票勝經》所講的買入時機，你可以睇翻書中的要點，因此，當時不少股都處平的狀態。所以，你會見到股價不斷向上，這是不少市場都有這情況。

你最重要是分析平貴，優質。現時的市況，有少少貴，部分股過熱，因此你應該投資一些無咁熱的股。

同時，如果你完全無貨，一直等，又不建議，所以，最簡單是投資一些指數基金，如果你睇好美股，可投資VOO，追蹤標普500指數，你分注入就得。

點解我成日叫人分注入或月供，就是平均買入價風險，同時可以避免一直等待。

------------------------------------------------

Q19446：

龔成老師，你好!~依幾個月開始follow你facebook，之後買左80後百萬富翁黎睇，發現自己起步得太遲~

我30幾歲，已婚有一子，家庭月收入約80k，有一自住物業，月供18k，仲有約400萬先供完~

另外係XX買左每月派息基金，每月約派息3-4000，打算用依4000蚊黎月供股票，依個做法可行嗎？

1. 如果供2000盈富，1000領展，1000雅生活，依個組合ok ma？

2. 我地儲多二年錢，應該可以買第二層樓細價樓收租，用D租黎供樓，會大風險嗎？

3. 我自己每月儲到10k，應儲起黎作第二樓層首期，定點樣運用好呢？

4. 我地本身已買保險，現金儲備應該有幾多先叫穩健呢？

謝謝老師，希望可以得到你解答

龔成老師：

雖然方法不是不可，但未必是最好的做法，但如果你認為這總買派息基金，然後月供股票的方法，較適合你的風險度，都可以進行的。

其實，當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

1）可以，都是有質素的，可長線。

2）其實唔需要太急買第二層，這動作會令你財富太集中在物業類，因此可等你有較多財富才進行這動作。希望做各類資產都有，而不是只集中在物業。

3）可以投資股票，令財富有更好的增長。

4）最少3-6個月的基本開支。同時要留部分資金等投資機會。

------------------------------------------------

Q19447：

老師，想問下 中電 算係收息股定平穩增長股 同埋 我月供計劃 有冇好太問題

4000元2800
1500元0823
1500元0002
求老師指點

龔成老師：

中電（0002）是收息股，加少少增長力。

你上述月供的，都是有質素的，可以長線保持進行，是平穩增長模式，當然增長力就不算好強。

另外，建音你同時留有某部分現金，等機會投資。這樣並行的策略較好。

------------------------------------------------

Q19448：

龔成老師我今年33歲，自从睇左你FB先知道，長線的重要性同埋我依家睇緊年報勝經。我手上有3隻股

中國鐵塔（788）5手@1.45
中興通訊（763）1手@18.9
中國移動（941）1手@47.7

手上有現金3萬，想買其他股，同埋月供$2000的話，應該買晒盈富基金嗎？我目標在1年儲多20萬，謝謝

龔成老師：

先講你上述股票，太過集中在同一類別，你會出現集中風險。上述股不是無質素，你可以持有，但之後最好增加其他類別的股票。

手上的資金$3萬，暫時唔好心急動用，等大市回翻D先用。

另外，當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你投資盈富（2800），可以，但應該同時投資其他潛力股。你33歲，仍是增長的時期。

------------------------------------------------

Q19449：

龔成老師，我看完你的「80後百萬富翁」和「股票勝經」，其他作品也準備看，想問1928受新冠肺炎影響

賭收咁差都30幾蚊，現價算貴嗎？想下個月開始做月供，還是再等佢跌下？

龔成老師：

金沙（1928）現價合理。當我地投資及計算企業價值時，會著重長期的因素。

因此，金沙中短期雖然不利，但疫情總會過去，因此你現時開始月供，無問題。當然，你不能用盡資金，要同時留有現金。

------------------------------------------------

Q19450：

老師你好 今年26歲由3年前開始睇你既書 搵到覺得識合自己既方向 備戰半年到就開始入市

當中經歷中美貿易戰同COVID-19 賬面一度出現虧損 但是有緊守到價值投資既準則 現在賬面總值已經升值一倍有多 突破人生第一個一百萬

目標係一直享受複利既好處直到財務自由 題外話係比起巴菲特 我更中意彼得林區既書

龔成老師：

太好了！我記得我當年有第一個$100萬都好開心！

你保持進步就得，之後的錢會以更高速成長。

我地投資，唔好太著重短期回報，一定要睇長。

其實巴菲特的書都是其他作者寫的。佢兩個都是高手，都值得學習，可以配合運用的。

------------------------------------------------

Q19451：

老師，想同你分享好消息，按照進度，我同女朋友將會在兩個月內（市況好的話一個月）達成100萬淨資產的目標！

如你所講，知識同回報成正比，你嘅12本大作我都有睇晒，獲益良多！

我運用書上嘅投資心法，嚴選幾隻優質潛力股作長線投資。另外我和媽媽建立的退休組合亦因為比亞迪爆升而賺了不少，一年半已累積了23萬股票資產。

我已經當你係半個師父
雖然我仲未抽到時間上你堂

龔成老師：

太好了！

我相信你地都付出了一定的努力，無論是儲錢，還是增加知識，這是你地應得的。男女朋友能有共同目標，往往效果會更好，你地可以再定出不同的共同目標。

總之，保持知識增長，財富都會不斷增加！

------------------------------------------------

Q19452：

老師~我依家睇緊你既一本年報勝經,學緊如何睇主席報告分析股票,但佢有時一d文字藝術都要分析下。

我有個關於溝貨既問題想問下,我有個朋友之前有買3662奧園健康,好似9月嗰陣物管股炒到好勁,佢已經開始入從7蚊開始

之後應該每跌一成佢都會入,依家應該買左10萬元以上3662,之前我有提過佢唔好再買物管股,之後會再跌短時間都唔會升上去。你是否不建議不停地溝貨?

佢諗住如果一升就可以賺得最多,這樣的想法。我自己之前都買左2168,蟹左。我估應該要等一段長時間先會升番,龔sir你建唔建議放左一部分?

之前講到我買左831,佢賣左ok店之後想發展網上平台,依家香港疫情問題會不會對佢有d有利既因素?

龔成老師：

其實溝貨最大的問題是「超出預期的買入金額」，我平時叫人同「分注買入」，原理是先定出一筆資金，這是入貨的上限，然後就分注入，這是整個策略。

而溝貨則是無預算無策略，將買入的資金不斷增加，這當然會提高風險。

同埋，「諗住如果一升就可以賺得最多」，這是有問題的想法。

我經常講，我地要「先想風險，後想回報」，我地要建立一個平衡的組合，同時在資金方法要控制適當，之後先穩中求勝。

佳兆業美好（2168）由佳兆業集團（1638）分拆上市，整體都有質素的，有長線投資的價值。不過規模不大，母公司不算強，因此估值不會太高。

睇翻佢的財務數據，正面，生意與盈利有不差的增長，現金流強，有長線投資。

現價合理，不過行業股價上落較大，要注意風險，同時這股規模唔算大，因此唔值得太大注。

你唔應該以中短期股價去衡量佢的價值，應該以質素，以及這股在你組合的角色，去衡量應該持有多少。

利亞零售（0831）出售香港「ＯＫ便利店」業務，作價２７﹒９億元現金，交易完成後，擬向股東派發特
別現金股息每股３﹒８５元。利亞零售預期出售收益約２９億元。

利亞零售表示，便利店業務主要以密集運營模式服務香港市場，並且由於其覆蓋之產品種類繁多，因此涉及相對龐大的物流營運設置以及供應鏈基礎設施。

另一方面，剩餘集團的品牌（聖安娜、Ｍｏｎ　ｃｈｅｒ和Ｚｏｆｆ），其實都適合利用互聯網及線上平台，對中等收入客戶群更具吸引力，並且更少依賴物流設置以及供應鏈基礎設施。

但始終賣左資產後，發展只是一般，同埋之後好睇佢資金的運用情況，現價合理區中上部，投資價值只是中等。

要留意，唔好只貪佢特別息，派息後股價會除淨，自然下跌翻，而特別息只有一次，之後唔會有的。

------------------------------------------------

Q19453：

你好，我試問你請教，因我們聾人們用手語溝通或用筆談，我們是新手，所以很開心看到fb多人問你，我找你請教。

不幸被拉我們入群組認識股票，喊叫我們試下，第一次買1376可賺3百幾元，第二次買1953可賺2百幾元，在今年8月25日第三次買1894買入5.43第四天很快下跌

現在0.19，我們傷心了，未沽出，我們心想等升上可拿回。請問有沒有機會等一年？兩年？令1894升上嗎？
買了三股共8萬幾元，也有買了一股27300元

龔成老師：

我建議你們增加投資知識，《股票勝經》適合你們的，同時不要再相信這些投資群組，要有自己的獨立分析能力。

往後投資，要買一些大型的優質企業，長線持有，如不懂，就投資盈富（2800）。

恒益控股（1894）每年的營業額很少，盈利不多，加上中期業績盈利大跌，因此投資價值不高。

這股要升到$1以上，不容易。因為企業本身的增長力不強，無獨特優勢。

------------------------------------------------

Q19454：

你好，想請教：

1）希望你可以簡單講下係用乜嘢方法令自己由百萬富翁變成千萬富翁呢？當中過程用左幾多年時間？

2）請問你現時的現金流，在股息、收租物業/鋪位/車位等，比重係點？因為想知道點取得平衡

3. 2021年，老師覺得邊幾隻有機會成為倍升股呢？

龔成老師：

1）大約用了6-8年時間。主要是投資，股票增值，同時其他收入增加左，我開發了打工以外的收入，過往只靠打工，之後不斷開發其他收入，例如出書、做生意、教班等，當其他收入增加，就亂去銀行工，全力發展其他事業。

2）你預我大部分是股票，之後到物業，餘下是現金。

3）由於2020年新經濟股已有少少熱，所以2021年反而唔好太過進取，加上疫情減去令新經濟股的動力減左，因此應該建立平衡組合。同時留意翻D舊經濟類。

------------------------------------------------

Q19455：

成哥，睇完你本身書，你點睇樓齡？有一些大型屋苑，樓齡快超過40年，你認為我們應該選擇這些樓齡大，但是是大型屋苑還是比較新的半新樓？

龔成老師：

最好的樓齡在30年以下，除了考慮本身維修因素外，你都要考慮若果日後賣出，下一手的買家會怎樣買，如果下一個買家認為質素唔好，自然會影響你物業的價值。

當然，本身的維修質素有好大影響，大型屋苑如果各方做得好，其實市場價值仍會好高。所以，觀察維修保養，有無做大維修，都是要考慮的因素。

------------------------------------------------

Q19456：

老師你好。 我今年32歲
請問我的強積金投資組合，有一半在保證基金，好嗎？

龔成老師：

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你32歲，可以進取少少。你保證基金的比例50%，太高。你可以減少至20%以下，甚至0%。

將資金轉去均衡基金、亞太股票、中國股票。你年輕，可承受風險，可以進取少少，加上複息原理，你年輕增長力高，長遠有著數。

------------------------------------------------

Q19457：

老師，領展，我用 2012-2019年 市賬率 去估值，睇到 1.23-1.316 係 合理價

但 衣家 領展 68.9 （股價）除 77.609 （每股賬面淨值）= 0.89 （市賬率）

但於合理市賬率，甘係咪 代表 係平位？

龔威老師：

如果你記得我上堂講過，領展（0823）比起其他房託較為進取，佢唔單計持有物業，同時會買賣。如果你睇翻第4堂筆記，地產發展商的市賬率，都出現一個持續下跌的情況，不過我地擔心佢谷大左賬面值，而領展都有少少這種情況。

當我地見到有可能出現這情況，市賬率運用時就要小心，可能用的年份只能較近期，或作出一些調整。

而我見你用1.23-1.316，其實有少少高估，最好調低翻15%。

至於你計算方面，用佢股價，除以每股賬面淨值，正確。之後再比較翻合理範圍。所以你方向正確。

------------------------------------------------

Q19458：

龔sir，不好意思，我數學邏輯不太好，在閱讀中遇到問題，盼賜教

第6版 財務自由行/第249頁
不明解以下2點：

1）每月的供款就會為$19700
不應是（$270萬 x 1.03利率）/ 14年 / 12月 = $16553？

2）樓價由$300萬跌至$150萬，但資本上卻是由$30萬增值至$150萬？感謝

龔成老師：

1）因為「供款」是包左每月要還的本金，以及要比的利息，即是你每月供樓，其實都是包左這兩個數。你可以上一些銀行的網站有按揭計算機，能計到這數的。

2）因為每月都會還本金，而書的例子是14年就能還清本金，即是完全擁有物業，因此，最後就是完全擁有該樓，而該樓價值$150萬，所以擁有$150萬財富。

------------------------------------------------

Q19459：

成哥，我想問1d關於買樓既問題。

我宜加26歲，儲到31萬，人工＄24000，目標下年每月儲大概＄15000，如果想2023年置業，仲有3年時間畀自己。

假設人工每年加4％，到2023年應該有＄26.x K。如果想買400萬的樓，我預計股票固報（15%/year)連儲到既錢2023年年頭會有80幾萬。加上家人可以借50萬畀我，共130萬。

上網做過壓力測試，如果到時2023年人工有＄26.x K，其實我係咪首期要儲到150萬先穩陣買樓？（130萬首期，再借7成按揭(人工要求$26.5k)，20萬作後備之用）。

其實我想借足8成，除左擔保人外仲有冇其他方法，因為父母都係做兼職，銀行應該唔接納。

希望成哥可以指點下，等我目標更加清晰。

唔知條數計得岩唔岩？

龔成老師：

大約計算正確，不過到時買入前要再計清楚。

其實最好都是用擔保人，但具體銀行接受擔保人收入的定義，你可以再問清楚，只要有收入證明或有交稅，都會接受的。

另一方法就是提高你的收入，你現時26歲，好年輕，思維可以闊少少，唔好只打算永遠做一份工，可能改變有突破。同埋思維上，唔好比一層樓永遠困死你的青春。

------------------------------------------------

Q19460：

老師想請教
BTC是否最好唔好touch？

龔成老師：

虛擬貨幣，是人為創造出來的，絕對不是「資產」，有沒有真正的價值，如何定義真正的價值，我有相當的疑問。

這些人為創造的貨幣，因為關注度由很少變得大，價格會大升，但這背後是否有真正的支持，我不知道。只能說，投資這些貨幣，投機味好重，可能大賺，亦可能蝕到一文不值，因為，當中有沒有價格，我不知道。

但這不代表佢無價值，佢可能好勁，只是我自己不知佢好勁定好差。

佢長遠的價值，取決於「有多少人用」，即是說，雖然無真實價值，但可以有「交易價值」，如果長遠好多人用，的確可能有高價值。

因此，這些虛擬貨幣，由於我無法作出專業分析，所以，我不會投資。

但如果你分析到佢長遠的交易大，大家都持續關注，就有價值，就值得你投資。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q13041-Q13060）

Q13041：

老師，你最初寫書，點揀到你宜家既呢個定位的？理財？百萬富翁？導師？

龔成老師：

我分析了自己的強項弱項，我有知識，因為我睇了好大量的書，但我知道出面有知識的人都好多。另外，我自己需然完成了一些財務目標，但比我有錢的人好多，所以我唔可以「同人鬥多錢」。

所以我要以自己的「公屋大，月入萬多元，能合理滾出財富」，作為我的定位。

因為我真是認為只是一個普通人，但我可以合理地滾出現時千萬財富，而我認為這是大家都做到的，因此，我希望以這作為切入點，令大家，特別是「月入不多的年輕人」，都能為自己定目標，一步步完成以為不可能的事。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13042：

阿Sir，我係你學生，想問EBIT同operating income好似。
-有什麼分別
-用邊個會好啲？

龔成老師：

有些企業operating income，會同EBIT一樣的，但我地可以簡單在損益表找到，利息及稅前的溢利，這是明確講左，這個數字並不包利息與稅的。

至於operating income，則是將最初的收入，減去一切成本及營運上的支出，這個數雖然有時同EBIT一樣，但有些如果仍有其他特殊支出未減，就會出現不一樣的情況。所以無話分析邊個好D，只是不同的角度。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13043：

龔成老師 我有問題想請教你 手頭上未有足夠資金可一手買入某些優質股 但我每月可儲$3000 我想開始儲錢計劃 應該展開月供股票計劃嗎？

但我是投資新手 對股票不是很認識 如果要月供股票的話 以這個budget 來計算應該供那個股票較好？謝謝你解答

龔成老師︰

投資股票就是投資企業，對初學者來說，買入業務穩定的企業，是最好的第一步，因為這些企業一般都股價較穩定，加上不少都有派息，作為入門較好的。

盈富（2800）、港燈（2638）、香港電訊（6823）、工行（1398）、置富（0778）、陽光（0435）都是你入門之選，你可以先了解這些股票。盈富是集合50隻股票的組合，而另外幾隻，則是收息股。

月供股票這計劃絕對適合你，由於你無投資經驗，建議你簡單地全數月供盈富基金（2800），到你有一定投資知識和經驗，你可以加入其他優質股票。

同時，你亦要加強吸收知識，你可以睇《股票勝經》，裡會有教你點樣有系統地選股。

而我的股票班【投資倍升股課程】適合初學者的，整個課程的設計都是針對初中階投資者的，每一課後都會有指引比你，到你讀完整個課程後，你已能自己選股、投資、評估平貴，在投資上已掌握了一定的知識。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13044：

老師 睇你本書介紹左1448 .想問問 呢隻股咩價錢合理..想入手

龔成老師︰

福壽園（1448）福壽園主要在中國從事殯儀及相關業務，主要可分為3 個範疇：殯儀服務、墓地出售、墓園維護服務。以收益及地理覆蓋範圍計算，福壽園是中國最大的殯葬服務商。

福壽園是首批進入中國殯葬服務業的私營企業，以企業化經營殯儀業務，主要針對較為高端的市場，並有一定品牌。

這企業是行業的龍頭，有相當的質素，同時有一定的潛力，優質度高，因此有投資價值。見佢近年不斷收購同行，以及收地，企業仍然有一定的增長。

但由於其質素高，所以很難會見到佢價格去到平宜位置。此股$6以下算進入合理區，已有長線投資價值。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13045：

龔成老師您好，我現時24歲，月入約3萬，每月養車用1萬，有年供醫療人壽危疾保險但沒有儲蓄成份，自己沒有儲蓄習慣。

希望可以開始做一些平穩投資或儲蓄基金令自己可以有儲蓄習慣，本人亦沒有投資經驗，謝謝老師指點

龔成老師︰

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，如收息型股票。

以你年齡，應以增值為主，你可以投資在平穏增長股︰盈富（2800）、銀娛（0027）、恆基（0012）、中銀（2388）、港鐵（0066）、長建（1038）、煤氣（0003）或潛力股︰比亞迪（1211），中生（1177）或福壽園（1448）。

但由於你無投資經驗，建議你簡單地投資盈富基金（2800），去銀行開個投資戶口，利用月供模式去供佢就可以了。跟據過往恆指幾年的數據，連股息的複息回報有近10%。到你有一定投資知識和經驗，你可以加入以上股票到你組合。

另外，你亦要加強吸收知識，多閱讀理財類別的工具書，以及多接觸財經新聞，而進修相關課程亦是重要的知識來源。我不時會舉辦一些課程，你可以留意FB。這【投資倍升股課程】適合初學者的。

因為整個課程的設計都是針對初中階投資者的，每一課後都會有指引比你，到你讀完整個課程後，你已能自己選股、投資、評估平貴，在投資上已掌握了一定的知識。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13046：

龔老師，我已經報咗名，覺得不能再遲去學習你既知識，已經遲了好多年...真的好期待上你的堂！

另想請教多一樣，剛看完你的問答信箱，你話月儲40,000，預10%回報率，20年後是2700萬，程式是點樣計出來？

如果以我地既資產及現金合共約85萬左右，想2023年有300萬，應該要月儲幾多先可以達到目標呢？

感謝你花時間解答我地既問題，答唔答都多謝你🙏🏻確實係你令我地有目標同希望為自己建立財富

祝你身體健康，繼續可以完成你的大計！

龔成老師︰

月儲40,000，預10%回報率，20年後是2700萬，當中10%是假設你將收到股息重新投資的回報率。計法好簡計，你可以用EXCEL SET FORMULA︰

你計算每年供款在N年後回報，可用以下EXCEL公式 =POWER（A,B）*C
A = 年度回報，如+10%回報則輸入1.1
B = 投資總年期
C = 本金

假設你想計首年供款，在20年後有多少︰EXCEL公式 =POWER（1.1,20）*480000

如果你想2023年有300萬，即要在4年內增值215萬，用番你10%年增長計，應該要月供$37,000股票才可以達到。

學習從來都是有心唔怕遲，期待課堂上見到你。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13047：

龔老師，你好，本人30歲，打算開始月供股票，但本身對股票市場不太了解，請問如以每月3000蚊，2500買盈富基金，500買媒氣這個組合可行嗎？建議供3年/5年/一直供?

另外，我不太明白月供股票後既派息都不算多，但我們要投入很多既資金，如買夠100萬盈富一年才有萬6元左右既息，這是合理嗎？

最後，想請月供股票後，有什麼需要留意? 有沒有說放幾耐或是應該一直持有?

我每月可儲11000，我應該繼續每月將現金儲起?或是安排多少錢月供股票?

龔成老師︰

由於你月供資金唔算多，我比較建議你全數3,000蚊都供盈富（2800），它包括50間質素不錯上市公司股票的組合，當中也也包括煤氣（0003）在內。

至於月供我建議你最少保持5年，最好長遠供落去。你要明白其實月供股票就是你每月將現金，買入某一隻或多隻股票，慢慢咁樣儲貨。

月供股票每月投入的金額相同，因此當股價上升時，買入的股數自然減少，而當股價下跌時，就自然會買入較多股數，如同自行調節一樣，去減低價格波動的風險。

我地投資股票，其實就等同投資企業。優質企業價值係要時間去比佢慢慢咁增長，中期會出現波動，但長遠會上升。所以，以5年為最低供款期，會對你整體回報較理想。

另外，其實盈富基金（2800）是平穏增長型股票，股息唔會太多。盈富主要有兩個回報（分別是股價升幅，加上股息回報），股息大約只有3%，而考慮埋股價升幅，長期平均計都有5%-10%，算是一個合理的回報。

現時大市在合理區，如果你每月可儲$11,000蚊，我建議你$6,000月供股票，其餘儲起靜待股市大跌時入貨。

供款中，$3,000在盈富，另外再選2隻$1,500的平穏增長股︰盈富（2800）、金沙（1928）、恆基（0012）、中銀（2388）、港鐵（0066）、長建（1038）、領展（823）或潛力股︰比亞迪（1211），中生（1177）或福壽園（1448）。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13048：

龔老師你好，經男朋友介紹下，睇左你Facebook嘅資訊同問答題環節，糾正左我唔少投資嘅壞習慣。

之前會短炒股票，諗住賺少少就會即刻走，但係overall真係有蝕錢，所以依家諗住做返個月供股票計劃。

而加有幾個問題想請教下，講返少少背景先：

我同我男朋友啱啱一齊夾錢買咗樓，打算出租一年，第二年收返來自住。下個月開始就要每人月供各10K樓宇貸款，但我哋嘅工作同月收入唔穩定，一般月入25k-30k。

我地有個聯名戶口，存款約100k、而我個人戶口就大約有300k-400k。現手持匯豐1600股，打算長渣收息。

1）我想做返個月供股票計劃，想唔影響生活質素既情況下，應該每月攞幾多錢出嚟供會比較好？

2）爬文見到龔老師有講到，盈富基金、比亞迪、港鐵、金沙等等⋯⋯ 假設我月供6000，我平均分配 2000/盈富基金，2000/比亞迪，1000/中電控股或滙豐，1000/中國平安或，呢個組合比例可行嗎？或者有冇其他建議？

3） 係而加仲有流動資金情況下，要唔要短線投資比亞迪？而家呢個價位適唔適合入市？

麻煩龔老師你既解答～

龔成老師︰

1）其實月供無話供多少錢才是好，你可以視乎番你現時生活開支，將餘下的大部份進行月供。在月供同時，也把部份錢儲下，等待大跌市時出現的入市機會。但你要留意番，你第二年開始會無租金收入去抵銷樓字供款，不要忘記計算這筆數。

2）當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目。所以月供應配置什麼性質股票，要視乎你年紀。

例如你是25-35歲較年青，我會建議你投資在平穏增長股︰盈富（2800）、金沙（1928）、恆基（0012）、中銀（2388）、港鐵（0066）、長建（1038）、領展（823）或潛力股︰比亞迪（1211），中生（1177）或福壽園（1448），因為這些股票都以增值為主。

你所講的月供股票是優質的，都可以供。但要留意番盈富和平安是平穏增值類、中電控股和滙豐是收息類（適合較年長人仕）、比亞迪是潛力股類。你要視乎番自已年齡，去選擇合適的投資組合。

3）投資任何股票，我都唔建議短炒。短炒根本是無法賺錢，我之前做銀行、證券行多年，見證大量客短炒全部都蝕錢，只有長線才能有錢賺。

因為投資股票其實就是投資企業，而企業成長需要時間。就算是優質股，中短期都會有股價上落，要長期先可以確保股價向上。

至於比亞迪（1211）股價由高位回落不少，現在回落至合理水平，同時反映市場預期中國車市的不利情況。相信這股中短期股價仍會不利，但長遠持有無問題。

現價在合理區，已經可以購入，$40以下會初步進入平宜區，$35以下會更安全。但要留意，這股有風險，因此不能太大注。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13049：

Hello. 想請教一下，我月薪35000，家用俾10000，月供應幾多，先至可以儲到2,000,000首期買樓？

萬分感謝（本身有用8000數作用供5，388，2388，1299，2800，66，但我覺得呢供咁多太貪心）

龔成老師︰

根據過往50年恆生指數，升幅連股息計算大約有14%多。雖然香港及中國的高速增長期已過，但預期恆指的回報率（連股息再投資）都有10%。

若以7年期去計算，你想儲一筆200萬的首期須要增加每月供款近一倍，即$15,000才可以做到。

至於你所供的股票數量，唔算大問題，只係有少少多，但都可以。而選股方面，大致無問題。除了匯豐（0005），因為這企業的賺錢能力比過往年代已減，這刻只是一隻收息股，對需要增值的你就唔太合適。

你可以選擇金沙（1928）、恆基（0012）、長建（1038）或煤氣（0003）去代替。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13050：

啊sir 想問下咩係細價股，聽人講最好唔好掂

龔成老師︰

細價股是市值較細，街貨股數較少的股票，由於股票數量少，所以比較容易造成價格波動和被莊家操控，風險比較一般股票高。

不過細價股，唔係一定等同唔掂。細價股也有好壞之分，如果該公司的業務本質穩定，市值不算太細，而且穩健發展業務，這類股票就仍有投資價值。

但如果市值低於10億元，生意既不穩健，賺錢能力又弱，過往更從沒派息，股價波動大，不但是市場上的炒賣股，連帶公司內部也加入炒賣，所以這類股絕對不宜沾手。

只要你明白股票的本質是企業，你就知道股票的真正價值，亦不用懼怕股票。最重要是懂得挑選優質企業的股票，長期持有，因企業擁有一定的價值，這與本質欠佳的股票不同，絕不會像哪些有問題的股票隨時暴跌八、九成。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13051：

老師，請問你點睇中國的泡沫經濟？另外，中國之前曾有地方政府承認GDP數據做假，中國經濟增長實際可能低很多，請問你投資中國企業的股票時怎樣處理這些風險？謝謝

另外，想請教一下關於比亞迪近兩個月新能源汽車銷量同比下滑的情況，據聞比亞迪新能源汽車本年尚未因補貼退坡漲價，但外間卻常把比亞迪近來銷量下滑歸因於補貼退坡，請問何解？謝謝

龔成老師︰

中國經濟雖然正發展，但當中伴隨不少問題，包括之前房地產價格升幅過快、地方債過高、資金外流、部份行業產能過剩等等因素，對中短期經濟和部份企業盈利會造成影響。

但要記往我地買入一隻股票，就形同買入一間企業。除了考慮市場環境外，還有其生意、盈利、前景等基本因素。

如果那些經濟問題唔會影響到企業長遠盈利能力，咁中短期波動我地可以唔理會，買入後長期持有就可以。

至於中國數據做假，都不算是新鮮事。這的確會影響到我地進行評估時候的準確性，我地面對而個情況，我地只好盡可能找更多其他客觀數據和資料去支持自已的想法，令成個分析變得更立體，從而減少被這些數據誤導的機會。

6月26日起，新能源汽車地方政府補貼取消，國家補貼標準將降低50%以上。但6月25日之後，比亞迪全係的新能源汽車終端的指導價格保持不變。

補貼退坡令車價變相上升，正常客人會買少左，所以比亞迪在不加價下銷售出現倒退，其實主要並非其本質出現問題。

你睇番現時中國車市明顯出現放緩、外來和行業間競爭加劇等不利的因素，中短期都會對整個行業造成不利影響。比亞迪雖是行業龍頭，但也不能幸免。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13052：

成哥，好。你的《年報勝經》我睇緊，差不多接緊尾聲，都好到好多基本野，謝謝。

成哥，書中尾部講現金流，現金流量表，3大活動。。
你强調現金流越多越好。

我想問，睇現金流量表，係米可以知道該公司現金流有幾多。

現金流，係未（經營活動減投資活動），就可以得出該公司有幾多現金流。

唔該成哥

因為書中講3大活動部分，各圖中講維他奶經營活動現金流量，投資現金流量，每項現金流量都有大數，所以有不明我先問問，成哥，唔該你

龔成老師︰

在財務報表中有3項現金流︰

經營現金流︰經營活動現金流量凈額是由在經營活動中產生的現金流入減去與經營活動有關的現金支出構成的，如銷售收入，營運開支等。

投資現金流︰指企業長期資產的購建等活動，如購建和處置固定資產。

融資現金流︰是指導致企業資本及借款規模和構成發生變化的活動，包括吸收權益性資本、資本溢價、發行債券、借入資金、派股息、償還債務等。

我地其實最主要要留意番佢「經營現金流」個部份，佢係代表集團當年在經營收入扣去支出後，實際現金流入。這部份的現金流如果充裕，不單可以確保唔會有信貨風險，也可以睇到企業有沒有足夠資金支持其未來發展、派息等開支。

你可以睇番2018年維他奶（345）的現金流表，你會發現經營現金流收入，比投資和融資現金流開支總額還要多，就可以大約了解到維他奶在經營中賺到現金，足夠支援進行投資、還款和派息等活動，相信其營業現金流充裕。當然我地分析一間企業唔會只睇現金流這指標，還需要配合其他指標和資料。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13053：

老師，其實比亞迪既優勢是否它的發展方向 及 市佔率？

因為比亞迪好似有行持續環保發展既方向，賣電動車，太陽能板，經營鐵路，都是國策既大方向（解決原油產量少，減少污染，交通擠塞既問題），前景不錯的增長力。

另外BYD市佔率好似24%，國內好似無一間電動車企及自主品牌市佔率有幾%，所以優勢係在於它的市佔率，以及普及化後既商業模式，客要買返佢既電池，電池業務收入因而大量增加，而且能產生一定程度既穩定盈利。

在光伏類 及 鐵路業務，BYD似乎有意在環保及道路等有國策支持既方向發展，相信這些業務性質能增加企業穩定既盈利能力。

巴菲特接觸過王傳福，覺得佢係 愛迪生 同 ac電發明之父tesla 既混合體，相信會成為一間了不起既公司。

我覺比亞迪業務是一間可持續性既企業，是一間可持有一輩子既企業。

主要大國應該在2040-50年將燃油車轉換為電動車，加上其他業務性質是可持續性，所以我覺得是一間適合長線投資滾複利既公司。

龔成老師：

比亞迪（1211）的技術，以及現時的市佔率，都是當中的優勢，佢已經行在市場的前列位置，只要市場爆上去，佢就會有很大的利益。

現時最重要是等市場進一步的突破位，以及隨著時間，佢的技術一定會再進步。

不過，之前出左業績，雖然有增長，但較近期的數據及預期業務較弱，相信中短期仍會弱。

中國車市放緩、外來競爭、行業競爭加劇，都成為不利的因素，相信中短期仍會對佢不利，這會影響整個行業。

加上佢負債的確有增加的情況，這一定會扣分。但長遠來說，我仍是很睇好的。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13054：

外國真係經濟大衰退，其實會對香港有咩影響??

龔成老師：

香港是一個外向型的經濟，即是我地唔能夠只靠自己去生存，好多行業，都會因為全球的經濟好與壞，而有影響。

金融、旅遊等，只要全球及中國的經濟唔好，香港都會有連鎖影響，當香港這部分受影響，就會產生另一個連鎖影響，最終全港經濟都會不利。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13055：

另外我應該要點去分析一個企業既係有質素同係質素 ，要從企業既年報同新聞開始學習分析？

龔成老師：

企業的優勢，會做就當中的賺錢能力，你要從企業的優勢去分析，另外，大環境亦會影響企業的長期發展，這些都是要分析的因素。年報當然是其中一個學習的地方，新聞你可留意，但重要度不及年報。

如果你上過我的股票班，你會見到課堂會派一份「企業評估表」，當中有6頁，教你一步步去點定義，一間企業的優質度，同簡單的方法教你評分。

同時，會教你企業的估值，如何定義平貴，入市的策略如何。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13056：

老師你好，看了你的專頁差不多一年獲益良多，明白資產的重要。我看了你的介紹及其他講有關財務自由的書，大致上明白如何可達到，例如增加被動收入及資產項目，而被動收入多過開支可算是財務自由。

但是我想問由於物價通常會受通脹影響而上漲，而個人的消費開支可能會加多(包括供養年長家人)，如何衡量自己是否已經達到財務自由? 我覺得很難假設日後的慣常消費金額

我今年41歲，月入約$15萬，資產主要集中在股票(1, 6, 11, 27, 66, 388, 700, 823, 992, 1113, 1114, 1211, 1299, 2238, 2318, 2778, 6823, 6098)(約$1000萬)丶基金(約$200萬)，主要是長期持有，股息約$25萬一年。

想兩年後或最遲45歲之前不用工作，財務管理上我應如何知道我有足夠的財務自由去決定是否繼續工作？
或在組合上可如常改善?

感謝老師撥冗閲畢和解答

龔成老師：

財務自由最基本的公式，「被動收入」大過「基本支出」，如果你現時資產，每月所得到的平均月現金流，已過基本支出，這就可以當進入了—「基本財務自由」狀態。

如果你持有的是「真資產」，例如物業、股票這類，當中的價值，以及所產生的現金流，都可以憑財富系統而上升。那你就不用擔心。

但如果你持有的是「產品」，你往後得到的，只是每年相同的現金流，所以，即是利息無增長力，這就會產生你上述所提出的問題。

所以，我地在進行財富配置時，會偏向集中「資產項」。

你現時持有的，都是有質素的股票，但就開始有點散，你只要投資盈富（2800）已有分散風險的作用，然後可重整一下組合。

同時，你如果想2年後退休，其實可以在這兩年，慢慢進行財富配置，增加翻收息股的比例，令你每月現金流增加。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13057：

請問如果我按股息計823, 覺得其合理價上限是在85, 但又未等到它跌低過85,

那我應否在等候期間, 即月SHORT PUT 85來拿些權金?

龔成老師：

我對這類期權投資，有保留。

表面上，只要佢不跌去$85，而這機會發生的可能性，看似不大。但如果有股市突發情況出現，你其實面對很大的風險，因為SHORT一向是處較高風險的一邊，而你最後得到的，只是有限的回報。

即是你進行「高風險，低回報」的策略。

當然，我明白發生的可能性，應該是少過一半，但希望你明白我上述所講的風險，因此我不太建議。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13058：

老師你好，還沒認識你之前，我一直以為買賣股票就是要一日之內又買又賣，蝕得多才會等明天再看看情況，根本同賭錢無分別，所以只可以用作收息。多謝你令我對股票改觀。

我想入2800，27，請問怎樣才算是便宜區？

另外我想問下，你當年人工最高是16000，也不算高，請問你是怎麽敢去投資？我現在有10萬儲蓄，人工15000，但見到銀娛差不多要6萬一手，真的不敢投資下去。月供1000手續費要50，又覺得比例上佔很多...

龔成老師：

盈富（2800）你預$24以下，是平宜區，銀娛（0027）$40以下是平宜區。

我會用絕大部分的人工去投資，因為我是「儲真財富」，原理同一般人努力「儲現金」一樣，但現金只會貶值，我投資真財富則不斷升值。

當然，我都經過大量學習投資，先算學有所成，我18歲投資股票，最初都會輸錢，幾年後才明白分析企業價值、平貴的重要，懂得投資策略，這才可以去盡投資。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13059：

你好龔成
有投資問題想請教一下

月入2萬，手頭現金10萬，月供1年大概有10萬，而家供緊盈富2500，媒氣2500。

1. 而家呢個月供組合會5會太保守？

2. 想額外單買一隻有增長潛力的股，但自己又怕D波幅太大的 。另外幾錢入先系岩時機？老師有冇推介？

龔成老師：

1）都唔算保守，算是平穩增長型。

這兩股都有質素，基本上都可以長期進行月供的，長線仍有增長的能力。

2）你可以用上述2股為基礎，保持月供，同時加一隻增長力較強的股，如果你能承受風險，就加潛力股，例如比亞迪（1211），不過注碼不能太大。

如果承受風險能力一般，就加上穩健而有一定增長力的股，例如銀娛（0027）。如果你未有企業估值的技巧，你可以用月供的模式進行，就可以減少一次過在高位買入的風險，有效將買入價平均。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13060：

請問龔成老師，除了中生製藥外, 你認為有什麼保健醫療類的潛力優質股？

另外之前聽你說會出優質股更新版的書，會在什麼時候呢？很期待!

龔成老師：

中生製藥（1177）、石藥集團（1093），都是我較看好的醫藥股，不過要留意，中短期股價波動會較大，要長線投資，同時不要太過訓身。

其實，《50值博倍升股》，有分析到多隻醫藥股，會講得更詳細，你最好睇睇。

至於《50優質潛力股》，預計11、12月，會出增新版，到時會加入新的股票，你可留意。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

多謝各位提問，若然你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網的，當然，會將發問者的身份，以及有關個人的部分刪去。

另外，由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。