【龔成問答信箱】（Q21401-Q21420）

Q21401：

龔SIR你好!首先要感謝老師教懂我如何選擇一隻好的企業。

自從成為你學生後，我的成績確實有增長，雖然仍未到目標，但確實前進中。多謝老師既教導。

但近期估值課題上有一個疑問，就是「預測市盈率與自行計算市盈率之間的決擇?」

以創科實業為例。根據過往十年數據，利用堂上所學。
合理市盈率應是21.88-23.12,
平均最新5年EPS是2.41。

因為我發現它每年EPS都有增長，自己計算大約是11.5%至29.8%不等(平均數是17.7%)

所以，我打算利用2.41X1.177= 2.84 作為有代表EPS
所以，合理估值應是2.84X21.88- 2.84X23.12再+/-10%，即是55.9-72。

根據自己計算範圍55.9-72 明顯與現時大市有一大距離。此時，再發現中銀既預測市盈率是36。如果用 預測市盈率計算2.84X36=102.24，那麼合理區 再+/-10%，即是92-112.46。則比較接近大市。

因此，我想請教老師2個問題
1.遇到這個情況，應該如何決擇?還是我的計算出左問題?
2.預測市盈率是市場給予的，是否較自己計算的市盈率更重要呢?

知道老師忙碌，問題唔急的，感謝老師的指導。

龔成老師：

你在計算估值時，不能公式化，要「意義化」，你先要了解創科（0669），佢過往的業務情況，品牌、發展，為甚麼過往的營業額有這樣的增長，點解盈利會這樣，是市場不斷擴展，產品的類別增加，定加價，還是其他原因。

你要睇翻5年年報，有具體了解後才有答案。

然後，你要分析這企業之後面對的經營環境，如果市場環境對佢有利，這樣增長就可持續，而你推算EPS時，不能只用平均數，這是一個入門的方法，你要更正確推算，之後的盈利怎樣。

如果你用我第五堂教你參考機構評級的方法，你會見到大行預期盈利接下來幾年平均為0.6美元，即是港幣$4、$5，你就要小心分析，你用2.84 作為有代表EPS，是否保守左，大行點解估到$4，背後咩原因。

你要了解企業之後的情況，從而找出答案。

另外，你在衡量佢市盈率時，如果企業無一些核心的改變，你照用過往的較好，然後再加少少自行的調整。

------------------------------------------------

Q21402：

阿Sir，我自己計咗幾隻股合理價，可唔可以麻煩你幫我睇吓我嘅計法啱唔啱：

新地（16）
行業市盈率 ：6.26-10.5
過往五年平均每股盈利 : 14.8
新地市盈率 : 7-11
合理價: 103.6-162.8 (好似個range 好闊🤔）

雅生活（3319)
行業市盈率 ：27.5-41
過往五年平均每股盈利 : 1.042

雅生活只搵到近三年市盈率，有一些股票如352，1895甚至找不到市盈率資

領展 （823)
行業市盈率 ：5.5-13.18

過往五年平均每股盈利 : 11.63
新地市盈率 : 6-10
合理價: 69.78-116.3 (好似個range 好闊🤔）

龔成老師：

新鴻基地產（0016），要留意，佢這類地產企業，每年的盈利都有物業重估，因此盈利及過往市盈率數據，都要調整翻，所以，計算過程有點複雜的。

你預新地現價合理區中間。

雅生活（3319），當你進行行業比較時，盡量找一些營運模式、規模等接近的，同時，會參考佢自己過往的市盈率。而這股不會比到太高市盈率的，去到30已是太高，20倍會較有代表性，再以這為基礎這行調整。

至於盈利方向，由於佢盈利增長中，因此盈利數字不應只用平均數，要調整。所以，你預現價為合理區中上部。

至於領展（0823），由於每年的盈利都有物業重估，以及先年的市盈率都會因為物業重估因素令盈利變左，所以市盈率的參考價值都減左，因此，你要調整翻先能夠分析得到。你預現價合理區中間至中上。

------------------------------------------------

Q21403：

龔老師 你好 最近見你也對樓市有研究 ，真心想請教 唔想再走冤枉路

現時有一層 216 呎 長沙灣樓
樓齡 1年 （但已過3年 樓花期買）
出租（死約） 10500
按揭連管理費 16000每月
買入時 499 萬 想放570 萬

想要連租約放售 如理想價 570 還完按揭 有170 萬左右

想跟你 學習 股價 覺得已前投資 cash flow 唔靚 供得好辛苦

有家庭 BB 出世 支出更大 同太太 （她都有follow 你Facebook)商量後 現時 層樓 每月都是支出多 不如賣左層樓 所得錢 跟你腳踏實地 投資股票 3-5 再買過一層

不知龔老師可否比意見 ？
謝謝你 祝生活愉快 身體健康

龔成老師：

從宏觀的財富角度分析，你這個動作，就是賣出現有的收租樓，將資金轉成股票，利用股票增值，再在3-5年買買入另一收租樓。

這個動作的考慮點，就是利用股票的增長，高過利用現有物業的增長。

在理論上，這類面積較細的樓，投資價值的確不算強，因為以一個基本家庭來說，去到250呎以上會較合理，因此，長遠增長力不及一般物業。

加上現時股市的平貴度較樓市平，所以在理論上，資金投入股市增長，會好過原有物業。

不過，所有事情都無絕對的，無人能準確預測到樓市，如果樓市在這幾年的升幅比股市多，你的計劃就會出問題，這是風險所在。

另外，香港買賣物業的成本貴，你一賣，日後再買，這是有成本，你都要考慮這因素。

因此，從方向上，這計劃是可以（因為投資不同資產的值博率與回報等概念），但實際上，你會面對上述所講的風險，你自己衡量是否承受。因為始終投資股票，都會有價格波動風險，穩健度比樓市差。

------------------------------------------------

Q21404：

老師想問下，我現在快20歲，有19000元現金，1000股煤氣，500股盈富、500股嘉里同400股小米。

煤氣 大概10元多買入，盈富大概25元入,小米22.8入，嘉里24.48入

龔成老師：

上述的股票，都有質素，無問題可以長線持有。

現金19000，由於不算多，所以持有就得。

小米（1810）我都有貨，雖然股價波動，但正面的，只要你不是持貨過量就得。

盈富（2800）可長線。

嘉里物流（0636）這股不差的，順豐入股後長遠發展更正面。

佢本身由嘉里建設（0683）分拆上市，係亞洲的物流服務供應商，主要從事綜合物流及國際貨運業務，亞洲、澳洲、歐洲及南北美洲的35個國家及地區設有逾400個業務點。

業務以第三方物流服務供應商身份為世界各地的製造商、零售商及其他客戶提供綜合物流服務，包括主要在亞洲提供廣泛的物流服務，如倉儲及增值服務、陸運及配送、退貨管理及各種配套服務。

另外，亦有從事國際貨運：提供的國際貨運服務絕大部份位於亞洲區內以及亞歐大陸之間，涉及空運、海運及跨境陸運服務。

現時的經濟及疫情，對佢都有一定的影響，而市場對佢的估值都會因而減少。

其實現價處合理區頂，以長線投資的角度，有值博率的，可分注。

至於0003，有質素，但你19歲，未必最適合你。

其實煤氣（0003）仍是有質素的股票，但增長力弱左，而佢改為20送1，反映增長力可能減少左，但不算差。

香港業務不強，但中國部分不差，中短期雖然較一般，但見佢的長遠發展力仍在，但就要耐心點。

由於佢一向都穩定派「相同股息」，在這情況下，反映派息的增長會少左。但整體來說，這企業仍是有質素的。

我睇翻佢近年在中國的投資，仍是保持進行的，每年都有幾十億，這些投資不會好快就見到收成，但這企業就仍是發展中的。我對佢長遠發展仍是正面，只是增長力的問題。

------------------------------------------------

Q21405：

老師想問下你 我睇你本股票勝經

用入面既方法計出3838 PEG 和3838的初步分析財務指標5年數據

得出的PEG 由2016-2020 五年間都是0.0x 低過合理價1很多

是因為每股益利增長很大的原因嗎？而這股每股益利增長咁大的原因是因爲澱粉價格而非純盈利嗎？這些指標對於此股有代表性嗎？還是我計錯數了？
請指教

龔成老師：

要留意，PEG只是一個輔助的估值工具，並不能成為企業估值的核心。同時，PEG只適用於高增長類企業，而這股增長力不強，生意增長不高，以及盈利未見有明顯增長，因此，並不適用。

中國澱粉（3838）主要從事製造及銷售玉米澱粉、賴氨酸、澱粉糖、變性澱粉、玉米製副產品及玉米深加工產品。

近年的生意都有增長，不過盈利就唔算強，同時有少少波動，反映佢都受成本等因素影響，產品價格自主力唔強。

整體企業質素，唔算高，但未算劣質。

現價雖然合理，但投資值博率唔高。

------------------------------------------------

Q21406：

你好 , 老師, 想請教你一些投資意見？

1. 如想用$10000投資月供股票計劃, 現階段應如何分配？ 當中想要有潛力股，但1211 已好高價位, 應買嗎？

還是有其他股比較適合？ 應該集中買兩三隻 ，還是分散買好？

2. 目標滾存100萬, 應以5年為期？ 如果想3年為期,每同投資幾多及如何分配比較適合？
thanks

龔成老師︰

1) 我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

因此，你在選擇應該投資那一類股票時，會係因應你人生階段、投資經驗和取態，去做決定。

假設你係年青至中年人士，你可以用「平穏增長股」 + 「潛力股」的組合。如果你係偏年青，比例大約可以去到各一半。

但由於「潛力股」有一定波動性，若你投資取態較保守、經驗較淺或者較接近中年，「潛力股」比重就要相對下調。

現在你每月先用5成儲蓄，即$5000做月供。其餘先儲起，用一邊月供一邊儲蓄的策略。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

至於你所講比亞迪(1211)都係有質素，勉強小小注月供好了。

而我地創建一個財富組合，除了要有質素股票外，平衡性都係好重要。

任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於3成，而單一企業不要高過15%。

但盈富(2800)就不受此限，因為它是一個包含55間優質企業的基金，這些企業來自不同行業。因此，盈富(2800)就算在組合中佔較大比重，都唔會造成過度集中性風險。

所以，如果你組合有盈富(2800)，再只加1,2隻都無問題(只要這1,2隻，不超過以上比重限制)。但若無，你最好係加多幾隻，令組合更平衡。

2) 不同年期，組合都唔會有太大不同。但若年期較長，部份高風險的股票，可能你就要慢慢減個比重，換成較穏定的優質股。

我假設投資回報有10%（連股息再投資），你要每月投資$14000，5年後才會較大機會增值至100萬。

如果年期縮短為3年，就要最少每月$25000。但由於3年唔算長時間，會有機會出現波動，令你最終回報的不確定性增加，你要知這個風險。

------------------------------------------------

Q21407：

老師：您好！我想問6993前景如何？我16.92買，而家跌到落11蚊，應該看長線還是止蝕？

另2883同問，我10.7買。
謝謝

龔成老師︰

藍月亮（6993）有質素的。

佢有「中國P&G」之稱，成立於1992年，擁有衣物清潔護理、個人清潔護理和家居清潔護理三大系列共73個品種的產品。

佢係中國洗衣液有龍頭地位，加上毛利率高，賺錢能力強。睇翻佢之前的資料，以零售額計算，藍月亮在洗衣液市場、濃縮洗衣液市場及洗手液市場的市佔率均為第一，分別為24%、28%、17%。

整體有質素與發展力，但你買入價係上市時較熱炒階段，現時回調只是回到較合理水平，不過現價依然唔平，只算是合理區頂。

若你持貨不多，你長線持係有可以。但較貨較多的話，只宜沽出部份，去平衡風險。

中海油田服務（2883）質素中等，未算強。

佢係中國近海市場最具規模的綜合型油田服務供應商。

佢的服務貫穿海上石油及天然氣勘探，開發及生產的各個階段。業務分為物探勘察服務、鑽井服務、油田技術服務及船舶服務。

雖然佢都有一定的規模，但卻不是最高質素的企業，這是由於佢的產品自主力較弱。

石油是商品，當中沒有差異性，佢地要將石油賣出，只能跟國際油價，這令佢地處於被動狀態。沒有價格自主的能力，這令佢地的獨特性有限。這類商品企業，都可投資，但就要明白不是最高質的企業。

由於質素中等，唔建議大注投資。若持貨不多，可以守。如持貨較多，則應該在反彈時，沽出一部份，去減低風險。

我見你2隻股票都有買貴貨情況，若你對點判斷平貴無乜概念。我建議你再投資時，改用月供，或者分注入貨模式，去平衡這個買貴貨風險。

同時間，努力學習投資，如何選優質股、定平貴等相關知識。對你長線投資發展，會有好正面的幫助。

------------------------------------------------

Q21408：

龔 sir ~ 小女子暫時手上得5萬港幣可買股票, 想高回報 ( 即是高風險啦 ), 是否跟著以下3067、9988、700、388、1810、2382、1177、1448, 便可以 ?

目前目標 ~ 每月儲 一萬港幣, 5年要有 100萬, 用來買私樓的首期。

請指教
暫時有 3067 有1000股 是蟹貨。

亞厘爸爸有700股, 其中200股是蟹貨。
1177 有 2000股, 亦是蟹貨。

是否再加貨 ?
還是買其他 ?
謝謝你

龔成老師︰

我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

唔可以單單集中晒係「潛力股」身上，佢雖然有增長潛力，同時風險都較高。

但風險高，不等如回報一定高，這是一個錯誤想法。如果成功，回報當然可觀。但由於佢波動性大，失敗時，損失也會較慘重。

所以，「潛力股」不宜持有過多，要平衡。若你係偏年青，可以佔5成。但若你較年長或投資經驗較少，要下調少少至3成左右。

你現時組合中股票，都有質素。雖然股票上係虧損，但只是中短期問題，你可以守。

由於你阿里巴巴(9988)佔比好高，個別股票不要佔組合15%以上，所以，你暫時唔好再加注。

將來時間，除了潛力股，你都要加大翻平穏增長股部份，令組合更平衡。

平穏增長股：金沙（1928）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）、長建(1038)

現時大市在合理區，每月先用$5000做月供，餘下$5000和5萬現金，就等大跌市才動用。

以大市過去年平均回報10%計（連股息再投資），你每月投資$10000再加上你現有20萬持股，5年後大約增值至100萬，能達成目標機會頗大。

------------------------------------------------

Q21409：

你好呀 龔老師，我啱啱先開始接觸投資，上年12月頭開左個富途牛牛戶口，然後聽朋友介紹下，我買嘅第一隻股票就係6618京東健康，果輪升得好勁然後就賺左d。

於是我喺高位就直接入多d貨，結果冇耐就一直跌，中間再溝過貨，依家已經蝕緊差唔多40%。

其實呢幾個月都有唔少朋友叫我走，我就係有d唔甘心所以一直擺，不過見到個虧蝕愈來愈多果陣都有啲擔心。

所以想問下老師你意見，我應唔應該del apps繼續擺落去？定係應該依家就止蝕離場？

龔成老師︰

京東健康（6618）係有質素，但問題是你投資知識不足，令到成個策略出左問題。

首先，京東健康雖然有質素，但由於新上市，估值難，不確定性大。本身就不應該持有太多。

另外，我地決定加注與否，要睇幾個因素，記住，並不是以「拉低平均買入價」為目的。

第一，要分析這股的質素，如果無質素，就再跌都唔加。

第二，這股的類別，如潛力或增長或收息類等，是否與你的財富組合匹配，比例是否適合。

第三，你要先計算加注後，這股佔你股票組合的比例會否太多，因為同一行業，同一股票。不能佔股票組合的比例太多。

第四，現價是否有投資價值率，要平，或起碼合理，不能貴。

第五，你要在加注後，仍有現金剩。

你明顯只是想盲目去「拉低平均價」，但完全無考慮成個組合配置和風險。

由於此股波動性風險大，你再入雖然真係會拉低左個平均價。但變相令佢佔你總資產比例又提升左，即係你同時拉高了自已的風險比重。

以你現時情況，若京東健康佔你組合比重較高，建議你沽出部份，先去平衡翻個風險。

此外，你在再投資前，建議你努力學好正確投資理念、資產配置、股票估計等知識，才開始會較好。

------------------------------------------------

Q21410：

老師，我今年應付完DSE會過嚟報讀你嘅課程學下估值，我係從我老竇推介先開始睇你嘅書（跟住就開始留意你平時facebook 同YouTube）

明白到金錢永遠貶值，銀行嘅體系對我哋有咩影響，同埋長線投資嘅威力。我今年年初開咗證券戶口，想你對我嘅投資組合俾啲意見： 我宜家手頭上有

兩手1810（24.35)
嚟緊小米造車可行性大嗎？
一手9666（63.25）

4月開始供1928（每月1000），每月會儲500現金，因為我阿爸都同我講可以學下你咁樣地獄式慳錢雖然我依家比起你嗰陣真係算儲得少

另外有18000現金係咪應該繼續儲等更好嘅機會？（考完試會再做兼職加大儲錢金額，想問吓到時應唔應該再月供其他？例如港交所？因為佢有壟斷優勢）

另外我想再問吓，舊年如果新經濟股炒得好犀利將好多企業嘅發展前景無限放大，估值過高，但係成日都係講話會回歸企業價值

咁老師你會點樣處理，如果面對估值過高係咪會減持，等佢回歸企業價值再買入？

最後，好多謝老師平時無私嘅分享，比起好多坊間嘅「專家」睇得出你嘅回應係好用心，好明白投資唔可以心急你嘅分享亦令到我踩少咗好多氹

例如唔會心急然後將啲錢去玩啲唔熟悉嘅衍生工具同埋做短炒。

龔成老師：

好，最重要是保持學習！

小米（1810）有潛力的，佢的產品性價比高，相信在全球好多個國家都會有市場，佢長遠只會進一步增長。

同時，佢建立的平台是佢長遠的增長動力，先賣手機，再利用手機的平台延伸銷售小米家電。長遠正面的。

這股可長線，現價合理區頂位至略貴，小注分注可以，但唔好入得太急，預佢股價仍波動。回多10%更有投資值博率。

佢將會造車的，但成功與否就未知，但我相信佢正面的，不過股價就可能有點波動。

至於金科智慧（9666）有質素。

佢係中國西南第一的綜合智慧物業服務商，如果按佢綜合實力計，集團自2016年至2020年連續五年被中指研究院評為中國物業服務百強企業十強之一，自2015年至2020年，連續六年西南地區排名第一。

收益主要來源於四條業務線：物業管理服務；非業主增值服務；社區增值服務；及智慧科技服務。

包括各類住宅及非住宅物業，包括但不限於中高端住宅、商業樓宇、產業園、政府公建、高校醫院等其他物業。

生意與盈利都增長理想，暫時睇佢都有投資價值，但負債高會係一個扣分地方。此股投資係可以，只要唔好太大注，咁就無問題。相信長遠有發展的。

至於你月供股票，金沙（1928）可以，而你年輕，可以加入一些潛力企業去供，例如小米都得。港交所（0388）都可以。

至於現金$18000，由於金額唔算好多，因此暫時留現金先，等跌市先考慮動用。

至於企業價值，首先，新經濟股估值難，所以在投資會相對控制注碼，若果到貴的時候，有機會減持的。但如果好高質，就唔會賣晒，因為你唔知賣左後，能否買得翻。

在理論上，股價長遠會回歸合理價，但如果一間企業價值增長得好快，股價就算這刻貴，都未必跌。

加油！你年輕，只要能擁有投資知識，長遠財富會不差的。

------------------------------------------------

Q21411：

老師你好！
現在持有

6618京東健康 500股 $180
9633農夫山泉2000股 $55
305 五菱汽車20000股 $2.57
175吉利汽車1000股 $33
6993藍月亮1000股 $16.9

9666金科服務500股 $73.5
2013微盟集團2000股18.62
1833平安好醫生100股 $133
1772贛鋒鋰業200股 $101

我高追左以上股票、大部分坐緊艇。好彩小米$16.5仍然持有。

1.以上的股票會否升返上去？

2.以上的股票有冇要放棄？

3.組合可否俾意見？
多謝老師

龔成老師：

基本上，你持有的組合不是無質素，但我見到你投資的，大多是之前較熱炒或焦點股，又或是新經濟類股，這會令你的組合風險較高，要注意翻。

五菱汽車（0305）、金科服務（9666）、微盟集團（2013）、平安好醫生（1833）、贛鋒鋰業（1772）雖然都有質素，但股價上落略高，同時行業仍有變化，因此，唔建議持有過多，不過你如果計翻佔組合%不過量，其實無問題。

整體上，你持有整個組合，基本上都可以守，質素是有的，相信是你未能掌握平貴，在貴的價位買入。你要計下佔組合比例，如果單一股票佔比不過多，就守住先。

你應該在之後，加入一些較為穩健類的股票，平衡翻個組合。

我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

------------------------------------------------

Q21412：

你好龔成老師，我係你的澳門粉絲，一直有Follow你Facebook，期待你黎澳門開班

我38歲，已婚，有一個3歲小朋友，我從事保險行業，收入還不是太穩定，暫不需要供樓。

以家有如下資產：

銀行及儲蓄：
20萬現金放銀行作現金流
40萬收緊3%利息的每月理財產品
50萬派息基金，收緊6.5%利息（本金會有浮動）

月供股票：（今年3月份才開始供）
盈富（2800）：月供2000
金沙（1928）：月供1000
比亞迪（1211）：月供1000
港交所（388）：月供1000
騰訊（00700）：月供1000

股票：
吉利（175）：1000股@28.8
領展（823）：100股@73.5
長江（1038）：500股@41.4
小米（1810）：200股@27.5
泰格醫藥（3347）：300股@165
美團（3690）：300股396
阿里（9988）：200股241.6

想可以做到最大化的財富增值，聽過老師話選擇優質股長線持有的概念，但因為以家手持的好多都係跌，心有擔心。希望龔成老師百忙之中幫我分析一下合理嗎？需要做些什麼調整較適合？會唔會持有太多種類？十分感激

還有一個問題想問
聽人講可以買銀行股來代替銀行定期收息，亦相對其他股票風險較低，你建議嗎？耐心等待老師回答

龔成老師：

最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

其實你現時持有的，基本上都是有質素的，只是你在貴的價位買入，如果你未有捕捉時機，以及企業估值分析的能力，就建議你用月供或慢慢分注的模式投資，會較適合你的。

現時你現金在保守類產品較多，股票就較少，可以慢慢提高股票比例，以你的年齡，財富仍有增長力，加大比例可以的，只要不要太集中在潛力股類別就得。

現時月供的股票，都可以。只要長期進行就得，比亞迪（1211）現價略貴，勉強可以供，但就不要再加大金額。

至於持股方面，都有質素的，泰格醫藥（3347）佢係中國的綜合生物製藥研發服務提供商，主要經營臨床試驗技術服務，例如提供臨床試驗運作服務，包括藥物及醫療器械臨床研究，業務發展都唔差，同時都有一定的規模。

生意與盈利都有理想增長，賺錢能力唔差，不過上市時間唔長，數據的參考價值會減。

質素都有，長遠發展正面的，不過股價潛在波動較大，加上上市時間唔算長，唔建議投資太多。唔建議你加注。

至於美團（3690）有質素，但股價略為波動，業務有變數，你現時持有比例已差不多，不要加注，原有貨就持有。

至於其他持股，基本上無問題的。

你現時的現金$20萬，暫時可持現金，等機會。

反而每月應加大投資股票，例如加大月供，可同時加入平穩增長股及潛力股去月供。平穩增長股如盈富（2800），潛力股如恆生科指ETF（3067）都得。

至於銀行股同銀行收息，是兩回事，銀行股的股息會較高，但就有風險，你要因應自己的風險承受程度，以及投資目標，去決定。

------------------------------------------------

Q21413：

老師 想問物業股哪一個增長力最強 值得投資？873、6666、6098、3319？

龔成老師：

碧桂園服務（6098）及恒大物業（6666）的增長力，算是較強，當然，風險度會高少少。

先講恒大物業，有質素，有長線投資價值。

佢係物業管理服務運營商，佢係中國物業服務百強企業中，以項目所覆蓋城市數目計，佢排名第二，如果以總收入、總毛利及總淨利潤計，排名第三。

類別為中高端住宅物業、寫字樓及商用物業，並已訂約管理其他物業類型如主題樂園、產業園、康養項目、特色小鎮及學校等。

佢絕大部分物業管理服務收入，來自集團控股股東恒大集（3333）所開發物業提供的服務。

不過，現價少少貴，如小注投資持有都可以的。

碧桂園服務（6098）由碧桂園（2007）分拆上市，主要於中國提供物業管理服務等服務。

例如包括保安、清潔、綠化等，物業管理組合涵蓋住宅物業、商業物業、寫字樓、多功能綜合樓、政府及其他公共設施、產業園、高速公路服務站、公園及學校。

佢無論在業務本質、規模、品牌、財務數據、前景，都是理想的，反映這企業有一定的質素。加上有一定的現金流，背景發展等，投資價值絕對有，相信這企業的前景不差，有長線投資的價值。

但要留意，行業有時會有較大的炒作，股價上落大，要注意風險，而整體是有長線投資價值的，這股不少時間都在合理區頂至略貴的水平，投資唔好太大注，要慢慢分注入。

------------------------------------------------

Q21414：

我想請教一下⋯ 我之前錯誤地購買了6123 平均價8.8 有6000
最近股價都在$5 徘徊⋯

我應該點做？
繼續持有還是沽貨止蝕好？

龔成老師：

圓通速遞（6123）本身係一家以香港作為總部的國際貨運代理服務供應商，業務已擴展至多個國家，並在亞洲、荷蘭及北美設立了幾十個辦事處。

佢主要經營以下四項業務：空運及海運貨運代理服務、總銷售代理、配套及合約物流服務。

早前阿里巴巴（9988）入股增持，令股價大上大落，這的確會令企業有更多發展，前景正面，不過，估值方面已難。

因為這刻根本無法計算佢，之能賺多少錢，企業發展情況如果，只可以話好多不確定性，但股價就反映大部分利好因素。

因此，這股雖然有發展，但同樣股價上是有風險，相信之後的股價仍會波動。只可以話，這類股小注持有不是不可，但要明白風險因素。

如果持貨較多，可以考慮減少少，餘下就守，這股不是無質素，但相信你買入時炒作較多。

------------------------------------------------

Q21415：

老師，想問問根據分段買入優質股的方法，咁什麼時間應沽出部份股票獲利呢？以前一直大都只懂買入股份後多年沒有理會以致錯過獲利機會（例如：滙控）

是否要密切留意市況，例如什麼時候會出現牛三而進行沽貨呢？

龔成老師：

首先，我地只買入優質股。

另外，要衡量現時的平貴，自己組合情況、現金，去設定適當的投資策略。

如果升到貴的水平，可考慮賣部分，但如果企業優質，我會建議點都有一定的貨在手，不要盡賣。

另外，當大市處狂熱期，例如牛三全民皆股時期，就同樣可考慮賣出。

你之前的投資經歷，如果忽視了兩點，第一，你無計平貴，可能錯過了貴賣出時機。第二，匯豐（0005）及其他銀行股，都有一個情況，就是賺錢能力，比過往年代弱左，我過往都在銀行工作的，好明白佢地的賺錢能力，已不及從前。

當見到一間企業的質素及增長力下跌時，投資者都有可能作出賣出的動作。

------------------------------------------------

Q21416：

你好成哥，首先感謝你一直熱心解答我地問題，咁多年來除左教識我投資的正確觀念之外，亦都令我培養到一個波瀾不驚既心理質素。

想問下譚仔準備上市，你點睇佢既投資價值？

本人由細食譚仔食到大，對呢間公司有情意結，而且覺得佢連鎖化之後係管理同marketing都有進步，手上亦無類似版塊的股票，想問下值唔值得投資？

龔成老師：

初步分析，譚仔有質素的。

佢有品牌，有規模，以及有穩定的顧客，現金流強，整體不差的。不過，香港飲食業競爭大，同時入行不難，對是對佢扣分的地方，加上香港人好貪新鮮，因此佢都不能一定話品牌永遠穩固。

睇翻佢資料，譚仔及三哥品牌擁有超過二十年歷史，合共經營148間餐廳，包括覆蓋港九新界18區的72間譚仔餐廳及72間三哥餐廳、中國內地深圳的1間譚仔餐廳及新加坡的3間三哥餐廳。

根據2019年的餐廳數目，調查機構歐睿將譚仔列為香港亞洲粉麵專門店的第1位。

假設顧客每光顧譚仔100元的生意，食材成本佔22.9元；有31.1元是員工；約23是租金及折舊，扣除其他開支後，譚仔的純利仍有19.7元，扣除所得稅開支後，亦有17.8元的淨利潤，以香港經營食店來說，是高利潤的（不過，數據都是上市前的數據，所以不排除會執靚盤數上市）。

整體上，這企業都有質素，但不能定為最高質類，同時，增長力不能說是好強，這股如控制注碼，都可投資的。

------------------------------------------------

Q21417：

阿sir, 昨日我經過黃竹坑地鐵站，影左幾張樓盤上，立刻有兩個女門神企我左右隔離
有個仲追住塞咭片
黃竹坑地鐵上蓋

我覺得呢度最有投資價值
因為正頭喺地鐵隔離
而且除地鐵外其他交通都方便
附近都多野食

景我唔知望唔望到海
阿sir你有錢不如買下

我想買但冇錢
我喺黃竹坑做野睇住佢變
發展潛力好高

而且仲要喺南區
不過先睇埋佢開售呎價先

問左至少30000

龔成老師：

《5年買樓4部曲》都有講，黃竹坑係我其中一個睇好的地區，長遠一定有價值，不過，新樓的確好貴，唔會考慮，其實果度都有少量二受樓的，都可考慮。

我自己都是南區大，都見證當區發展，地鐵站，兩個站能金鐘，加上南區密度較低，工廈變商廈，價值一定有。

但我對新樓興趣不大，因為一般都有溢價。

------------------------------------------------

Q21418：

Ah sir，想再問下我現時持有3.43粒Bitcoin，現市值約160萬，計劃呢2-3個月內賣出一半或全部，套回現金後應該點樣部署投資？

我想5-8年內儲到1000萬移民，會唔會aim太高？

我30歲，現金大概10萬，有15萬喺投資收息保險基金(收每月約$900息)，約有20萬錢喺股票。

做零售生意已4-5年，銷售額穩定但唔算太高，每月七除八扣約賺2-3萬。

另外有份半職收入約15000(但計劃做到9月就會quit)，有個牌可隨時入返行。

但我負債較高，連公司借貸約仍有100萬未還清，每月大概還緊3-4萬。

我理財能力好弱，成日唔識點計好啲錢。

多謝你耐心回答

龔成老師︰

如果你要5-8年內，透過股票將資金翻幾倍，其實係好難。

假設投資回報有10%（連股息再投資），若你每月投資$10000 + 100萬本金，8年後大約會增值至350萬。這個回報程度，會相對合理。

在進行投資增值前，你要先審視負債部份。如果你負債利率係太高，我建議你先還清相關債務，才開始投資。因為高債息，係會好影響你長線回報。

收息保險基金，回報都有7%以上，勉強算係可以。但你要留意，這個回報率是否保證，將來係唔係一直維持到。

另外，Bitcoin本質來說，這是人為創造出來的，絕對不是「資產」，有沒有真正的價值。不過，佢可能有交易價值，但這個價值有多少，無人知。

所以結論就是，佢的波動會十分大，而你現時好集中在這項目，這會有好大風險，因此從整個財富的配置角度，宜減持。

將來贖回Bitcoin後，這些資金可以投資一些增長型股票。同時，你若每月有閒錢，都建議你用來月供優質股。

但潛力股波動性和風險會較高，若你係投資經驗較少，最多只可佔3成。到較大經驗，才升至5成左右。

現時大市在合理區，現金和股票比例，最好各一半。你每月閒置資金，可以先用一半做月供，其餘儲起。

將來有新資，如贖回Bitcoin後資金，都可按這個比例配置，去慢慢分注入貨，並長線持有。

但緊記，你做生意可能需要較多流動資金，作配置時，要先考慮生意部份。因為佢係你主要收入，必需排在其他投資項目之前，去優先處理。

------------------------------------------------

Q21419：

阿sir，近排開始了解債券，唔知阿sir有冇投資債券？

我見銀行可以買內房或其他公司的債券，自己研究左，想買雅居樂的內房債，出資和貸款5:5，利率大約有6-7%，你了解風險高嗎？

有些內房債(佳兆業)可以做到有11%，但有點怕所以唔考慮，怕佢違約。

之前睇左你的片，每月存1萬，5年可滾到100萬，真係好西利。

我計過下，要每年平均有10%回報先做到，請問當時你係投資咩？月供股票嗎？每年有10%回報都幾難

龔成老師︰

債券，這其實只是「產品」，物業、優質股是「資產」，所以從財富本質上，我地應較集中持有「資產」，才對我地最有利(你可以睇睇《財務自由行》一書。

我從財富本質上，講述了當中原理)。同時，現時息口低，但未來有機會重回加息週期，債券未必是最好的投資工具。

而且內房負債偏高，係一直都存在的問題，所以投資這行業的債券，係有一定風險。你要睇翻每間公司，佢現時的財務情況，以及該債券的評級，違約的風險。如果評級A，都可考慮，去到B級，就要小心。

而我自己無買債券，主要透過有優質股，好似比亞迪(1211)、金沙(1928)、中生(1177)等等，在合理，甚至平宜區時儲貨，之後長線持有，才累積到的成果。

當然，我組合未必每年都有10%增長。但我地投資係長線，當你拉長用多年來計，就會得出這個回報。

------------------------------------------------

Q21420：

我見你話「同一行業不能高過3成、同一股票不能高過15% 」，點計？(股票投資總額)計算, 是嗎?

龔成老師：

在股票組合內的比例，同一個行業，不宜多過30%，而同一隻股票，佔比不能高過15%。

方法是以長期的平均股價計算，例如過往一年的平均股價，再乘以你持股的數目，以每一隻股票你擁有的市值計。

不過，你唔需要執著每一個%，大約數就得，不用一過少少%就立刻賣出，因為這只是一個指引的參考大方向。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q20421-Q20440）

Q20421：

老師，我想請教下，一間冇盈利既公司，例如（1833）佢點解可以令到股價高上，而投資者又願意買呢隻股票？

龔成老師：

因為市場集中在佢將來的價值。

在企業估值的方法，不少都會考慮到將來的情況，例如現金流折現法，就是計算將來現金流，變成現在價值的總加。

這並不是考慮最近1年，而是1年、2年、3年，一直考慮。

就算企業這刻的現金流較少，只要將來的現金流較強，都會有一定的價值。

當然，愈是將來的現金流，不確定性愈高，就會令股價波動愈大。

------------------------------------------------

Q20422：

老師，自從睇左你嘅書（但未睇哂），我開始每月儲錢，而家28歲，月入20k，每月儲到8,000-10,000，而家儲左50k. 我有以下2個大方向想請教：

1. Hkd 5, 000供股＋買增值股，暫時打算hkd 2,500係盈富(2800)，hkd 2,500係比亞迪（1211），再每月買1手etf(3067)

2. 月供4000落儲蓄保險，（之後第2年開始年年派20,000），每月買1手3067，之後佢每年派息先再買股票。

真係多謝老師，如果唔係你嘅書，我好肯定我唔會每個月儲到8000-10000

龔成老師：

太好了！你已經踏上了正確的理財之路，保持知識與財富增長！

28歲，如果你可承受風險，可選（1），而（2）會較保守的（當然，如果你本身好怕風險，就（2））。

不過（1）的方案，現時比亞迪（1211）貴，建議你供其他，盈富（2800）+2845+3067都得，這個組合會較穩健。

GX中國電車（2845），這基金的目標是追蹤Solactive中國電動車指數NTR「相關指數」表現緊密相關的投資回報。

持股中最重就係比亞迪A股（002594），中國因為能源問題，長遠一定要發展電動車，這是大方向，故此股有一定投資價值。

由於近期不少車股被炒起，此股現價略貴。無貨可以現時入少少，到有明顯回調才再慢慢加注。

潛力度是有的，但會比較波動，如投資宜慢慢分注，可長線。

------------------------------------------------

Q20423：

老師，弱弱一問我用富途牛牛投資如果想買收息股佢會點派息？

同埋3738（阜博集團）值得投資有潛質嗎？
thanks

龔成老師：

當你買入某股後，就要睇翻該股有無息派，以及除淨日幾時，這是一個介定有無息收的日子，如果這日或之後先買，就無法收該次的股息。

如果確定你有息後，就會在派息日派息，一般都是現金的，會直入你戶口，除非佢有「以股代息」，你就有權同佢講要股（但可能要你主動提出）。

阜博集團（3738）是較高風險類。

業務是線上視頻內容保護服務供應商，客戶包括七大全球電影公司、電視網絡公司及其他內容擁有者。

過往一直虧損，近年開始有錢賺，業務增長加快，不過，本身的獨特性不是好強，規模未算好大，因此，未見佢有好確定的優勢。

潛力度有的，不過就存有較有不確定性，這類股只適合小注投資。

------------------------------------------------

Q20424：

請教下：
27.4入左1818
7.7入左1448
長線投資，可以？

龔成老師：

招金礦業（1818）不過不失，佢主要從事勘探、開採及銷售黃金。

本身的資源有一定的價值，但盈利始終受國際黃金價格影響，因此本質上會較為被動，無乜價格自主能力，同時產品無差異性，是典型的商品企業。這類企業都有一定的投資價值，但就不會太高。

股價很大程度與黃金掛勾，由於人類對資源的渴求在長期不會停止，而資源是有限的，所以，長遠都會有上升的潛力，但中短期就會波動。

近期受惠於金價上升，此股升了不少，市盈率去較高水平，唔平。

此股唔係無質素，但只屬中等，不建議持有太多。

福壽園（1448）有質素有發展力。你可長線。

佢係中國最大的殯儀企業，有一定的規模，而針對的是高端市場，服務有一定的質素，擁品牌及知名度，有相當的賺錢能力，財務穩健負債少，因此企業本質不錯。
由於行業處增長的市場，而新競爭者要入行不易，因此對原有企業有利，故福壽園是優質的企業。

佢憑著本身的優勢，能取得比同業更好的回報，而福壽園管理層表明會持續擴展，策略上會透過併購同業及買墓園去擴充。

由於福壽園的模式成功，因此只要投入資金去發展，複製過往的成功，已經能取得理想的再投資回報率，長期來說此股有一定的增長潛力。

不過，由於此股業務好獨特，因此業務情況在年報上或資料上，未必能完全反映，雖然數據及資料上都顯示此股有質素，但往往要時間證實。

至於企當估值方面，市場對此股的評價亦不低，企業經常處略貴水平，$7是合理區頂，不能太過進取，以分注小注投資是一個策略。

管理層的野心很大，投資後不要升少少就快，要耐心持有，等長期更大的收成。

你有貨可持有，無問題，但就不要太急去加注。

------------------------------------------------

Q20425：

老師你好，我今年42歲，現時財政狀況如下：
本人及先生月入：$60000
年尾花紅：$10-12萬
樓按揭：餘12萬（快供完）
現金：45萬

MPF: 70萬，高風險為主
儲蓄保險：8年前實供9萬，現值12萬，擺多10年會收番20萬（唔知應否提早取出？）

自己人壽儲蓄：$6萬/年，尚要比多2年
自己危疾儲蓄：$1萬/年，比多10年
先生人壽儲蓄：$3萬/年，比多5年
股票：只有1000股匯豐，平均約58入，每月月供股票$4000

本人想財富增值，日後早少少退休，想請問：

1. 月供股價應否轉為2800？
2. 儲蓄保險應否提早取出？今年11月可取回12萬
2. 應該如何投資，可令財富穩定增值？

謝謝你的回覆

龔成老師︰

1） 匯控（0005）主要用來收息，增長能力好一般。建議你轉做盈富（2800），增值能力會較好。至於現有持股，由於唔算多，持有住都可以。

2） 其實"保險"只係理財中防守部份，買足夠保障就可以，增值應留比優質資產（如優質股、物業等）去做。但由於你們保單都就供完，甚至已供完，故唔建議去做變動。

3） 現時你成個資產組合中，股票比例明顯太少。建議你用"平穏增長股" + "潛力股"作組合，去創造一個增值平台。分配上，應用"平穏增長股"作為主力，再加一些"潛力股"。

現在你每月5成儲蓄，去做月供，其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、領展（0823）、希慎（0014）、太古地產（1972）或潛力股︰中生（1177）、福壽園（1448）、安碩恒生科技（3067）、港交所（0388）、阿里（9988）、騰訊（0700）。

現時大市只是合理區，你現有45萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

------------------------------------------------

Q20426：

龔sir，你係成功過程中
點樣調整到蝕左錢個心態

有時蝕左錢就好想即刻追返
心急就亂，亂就好易出事

龔成老師：

我持有比亞迪（1211）12年，多年前由十幾二十蚊，見佢上到$88，其後見佢有$88跌近9成，去翻$12！

比亞迪當時已是我最大持股，由賺變蝕！

我的財富當然大幅貶值，我同自己講，過往的無辦法，最重要是將來，理性分析現時應該持有/加注/賣出，在投資世界，理性是最重要。

我上了一課，經歷財富的大起大跌，心理質素大幅提高。

記住，最重要不是睇「賺蝕」，不是睇「買入價」，而是睇質素。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

------------------------------------------------

Q20427：

男神，我同你報喜
我由2019年12月識你之後
就開始進行月供股票
到目前為止

盈富增值＋16.22%
港鐵增值＋12.18%
中銀增值＋3.47%
金沙增值＋55.16%一手手買
中間有小小炒賣
必瘦站增值＋104.41%
不過中生制藥就－14.85%
都係多謝你先 之前我只會將錢儲定期 一年有1-2萬蚊已經十分開心

而家唔止增值1-2萬蚊
真係好開心

您真係致富明燈
任勞任怨帶領大家財富自由 你真係超級無敵靚仔兼大善人
真心多謝你 ！

龔成老師︰

能夠幫到你，咁就好！

緊記月供係一個長線計劃，月供最少維持3年，並持有這些股票5年以上，才會有較理想效果。

當中會有升有跌，但係正常的。只要持股係有質素，中間股價波動係唔洗理，長線持有就得。

另外，唔好短炒，可能一次半次有賺到錢。但我之前做銀行、證券行咁多年，見證大量客短炒全部最終都係蝕錢，只有長線才能有錢賺。

長遠來說，我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

------------------------------------------------

Q20428：

老師，有個情況想問你意見：

當年我媽退休時（我還未接觸股票），被他人說服用退休金買2628，仲要以高位（大約@33）買入共46手。買入後大跌，她也沒有止蝕（因她也不太懂股票）keep住到而家。

想問一下如何處理？（想幫佢好好咁manage一下佢既退休金）

現在賣出轉其他收息股？等回到某一水平才賣？還是keep住唔賣，就咁收息？謝謝

龔成老師︰

其實已退休人士，應集中係"收息股"身上。用佢產出架穏定現金流（即係股息），去支援退休生活開銷。

中國人壽（2628）近年賺錢能力弱左，質素只算中等（不是無質素）。但佢唔係收息股，唔適合你母親，就算持貨都不應太多。

你可以慢慢沽出（唔係一次過，要分段做），再建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）都可以。

如果你能承受到風險，有些更有超過8%、10%的高息股，但股價就略有風險，要自己衡量，佐丹奴國際（0709）、中石化（0386）、互太紡織（1382）等（記住，股價略波動，只能小注）。

現時股價只是合理，未到平宜，因此換碼時宜分注。同時，可保留一部份作現金，等大跌市才動用。

最後，你要留意係創建這個收息組合時，唔好太集中係單一股票上。相同行業不可佔組合多於3成，而單一企業不要高過15%，否則會有過度集中風險。

------------------------------------------------

Q20429：

龔sir，想問平有教我們供股票既意思是否定期一手一手禁買入跟晤同既股價追上?

因為我之前入咗隻莎莎國際1.2 入的～ 這股都用供股形式去分段投資合理價嗎？

因為我之前以為供股個意思係張啲股票同一口價落三成本金跟住借七成 畀你股24個月禁供

這樣是否誤會咗你嘅意思

龔成老師：

我所講的是「月供股票」，要先同銀行登記，簡單來說，就是你每月將現金，買入某一隻或多隻股票，慢慢咁樣儲貨。坊間不少銀行都有提供月供股票服務，你先開證券戶口，然後登記做月供股票。

形式就是每月投入相同的金額，買入同一隻或多隻股票，並持續進行。

例如，每月以相同金額$10,000 買入盈富基金（2800），假設第一個月股價為$25，就能買入400股；第二個月升至$35，就能買入286 股；第三個月跌回$30，就能買入333股。

總結這三個月，投入了的資金為$30,000，累積股票為1019股，平均買入價為$29.4。

由於月供股票每月投入的金額相同，因此當股價上升時，買入的股數自然減少，而當股價下跌時，就自然會買入較多股數，如同自行調節一樣。

如果你不想用上述月供，用「自行分注」都得，例如每1、2個月買入一手。

莎莎（0178）都有質素的，相信最差時期已過，你都可以久唔久入一注，但最近升左上去，又唔值得買入得太密，同時未必值得持有得太過多。你原有貨不持有，但就加注未必要加得太急。

------------------------------------------------

Q20430：

請問6837可以入貨嗎？之前d潛力股都未返到買入價。謝謝你

龔成老師：

海通證券（6837）業務有：證券及期貨經紀、資產管理、自營交易、投資銀行、直接投資、管理本部及其他分部、融資租賃、海外經營分部。

業務主要地是中國，近年的生意不算差，但增長力唔算強，同時盈利略有波動，始終行業都會受投資市場上落因素影響。

現價合理，但你預佢都會有波動風險，長線投資價值都有但不是高增長類。

------------------------------------------------

Q20431：

Hello,想問0175 同3993 前景如何

龔成老師︰

吉利（0175）本身的質素不差，擁有一定的銷售網絡及品牌，不錯的市場策略及定位，而又能把握中國汽車市場增長的機遇。

長遠來講，佢的品牌與發展在中國仍理想，2018年，吉利透過旗下海外企業，動用超過$500億人民幣收購戴姆勒股份公司9.69%股份。由于戴姆勒股權結構分散，所以吉利已經成為了戴姆勒集團最大單一股東。這不單有利佢有中國發展，同時長遠，可能加快了海外發展速度。

現時價位在合理區頂，甚至有少少貴，股價波動，有貨可長線。最好回少少，或這刻小注等跌再加。

洛陽鉬業（3993）並不是完無質素，但不能說是穩健，佢的營業額同盈利都十分波動，這點令分析佢較困難。因為好難確定到往後經營環境對佢的影響，同埋，佢亦因成本令佢盈利較波動，這同樣是較難預測的。

我地好需要，用過往的數據去分析，同時判斷往後的經營環境，如果過往數據變化太大，會較較分析。

另外，這股的股價較為波動，這股不是不能投資，但不建議大注。

------------------------------------------------

Q20432：

龔成老師你好！ 睇你專頁都有一段長時間，晌上年開始我入市以下股票：

0003-2100股 平均價$13.14
388-8股 平均價$382.65 （之前月供，上到$500後停供）
823-631股 平均價$65.94
1177-3000股 平均價 $9.4
2628-2000股 平均價 $16.42
3328-5000股 平均價 $4.75
8328-4000股 平均價$5.22

每月我大概可儲$14000，當中有$7000月供領展。
2628同3328 ，我打算升番d就平手或賺少少離場。 到時大概有5萬，再加我手上餘錢，合共8萬左右。

我有諗過以下想法，想問下老師的意見？

1/ 8328最近升左好多，請問值得高追1-2手嗎？
2/我睇中1789及3718，請問老師對此兩隻股票意見？
3/ 0003 現價好平，值得現在加注嗎？

謝謝老師

龔成老師︰

1） 信義儲電（8328）都有質素，但盈利上好波動，不宜持有太多，唔建議加注。

2） 愛康醫療（1789），以長遠業務分析，正面的。佢以「愛康」品牌從事設計、開發、生產及銷售骨科植入物，並專注於髖關節及膝關節置換植入物。

睇翻佢的資料，佢的產品包括用於初次手術的骨關節植入物，以及為置換、修復或升級前次手術的植入物或部件的翻修手術而專門設計的骨關節植入物。都是有前景的業務。

這股業務不差，有增長潛力，盈利增長，這反映企業有實際的價值提升。不過，這股經常處於少少貴的水平。現時市盈率達40倍以上，投資時要考慮價格風險。

北控城市資源（3718）有質素的。佢主要在中國從事環境衛生服務；危險廢物處理業務；以及廢棄電器及電子產品處理業務。

環境衛生服務方面，佢的服務涵蓋綜合道路清潔、垃圾分類、垃圾收運、垃圾轉運站管理、公廁管理、糞便收運、綠道養護、河道保潔服務。

同時自2019年起開始，佢有係北京的若干商住區域提供物業管理服務。

過往財務數據不差，有一定的增長力，有長線投資價值。現價大約合理區頂位，不建議這刻太大注。

3） 煤氣（0003）現價係合理區中間，加小注可以。但緊記，個別企業唔好佔組合15%以上，否則會有過度集中風險。

另外，投資記住係用長線持有模式，讓優質股自然咁增值，而唔係做短炒。

現有持股中，中國人壽（2628）質素較中等，不宜持有太多。你可以將部份換至其他優質股，咁會較好。

而交行（3328）主要係收息，若你係年青至中年，由於佢無乜增長力，都唔適合你。

------------------------------------------------

Q20433：

龔成老師您好，本人是來自澳門的一位80後的家庭主婦。最近開始閱讀你的作品，希望從中可以學習到投資的知識，期望你不久的將來可以過來澳門開班。

目前有小小問題想請教一下你，本人大約在6年前自以爲懂投資的情況下，購買了以下股票，購買了之後就一直跌到現在

本人想放售然後入小米，但還是想聽聽龔成老師意見，應該繼續持有，還是怎樣，感謝你的解答

751--10,000股 （成本價$6.6）

1060--60,000股（成本價 $2.78）

1816--20,000股（成本價 $4.5）

龔成老師︰

創維集團（0751）從事電機、智能系統技術業務、智能電器業務等，中國及海外都有市場。

近年增長力唔算強，生意未見有擴展力，盈利有點波動，整體的品牌價值及銷售網絡，未算好強。長遠發展力只是一般。你預佢增長力唔算強，長遠算是不過不失。

如果佢只係佔你組合小部份，持有都可以。

阿里影業（1060），炒作較多，風險高。這企業到現時仍未有盈利，市場只憑佢前景去評估，其實這會有相當的風險，這類股最多只能小注。

中廣核電力（1816）主要從事發電及電力銷售，以及核電項目及非核清潔能源項目的建設、運營及管理。

佢主要於中國從事核能發電業務，包括運營及管理核電站、銷售電力、管理及監督核電站的工程建設，以及向工程公司提供相關技術及維修服務。

這企業發展平穩，但增長力不強，收息可以，但就唔好對股價有太大期望。

現時小米（1810）都有點貴，想換碼入貨，等佢回1成先會較好。

其實我之前都有開過澳門班的，不過現時疫情，所以暫時停左，之後會再開翻的。

你或者可以預早留位，只要whatsapp 852-55457212我同事講，打「留位澳門班」就得。我地有具體資料就會 whatsapp你。

因為現時已有好多澳門人留左位。

------------------------------------------------

Q20434：

希望龔sir可以審視一下我既理財妝況

背景： 26歲，未計雙糧花紅月入20k ，月儲12k,其中7k月供股票，現金儲4-5k

現時現金大約11萬，投資組合現值約32萬

現時月供 2800 - $2000
066. - $2000
788. - $1500
1177. -$1500
手持股票：
2800。2400@$27.3
066。 1100 @$44.2
788. 9750 @ $1.35
1177. 408 @ $7.3
178. 6000@ $2.21
1211. 204 @. $44
1212. 3000@ $8.24
1257. 3000@ $3.45
1928. 800@ $27.83
1972. 1200@ $21
2388. 1020@ $28.2

（1）. 股票組合係咪偏向平穩而唔夠進取？

（2）增持1212會唔會好過增持178？

（3）長遠來說，放走178/2388而換其他增長力較高既股票，得益會唔會更大？

（4）如果公司私有化，對股票持有人會有損失？

（5）. 新經濟股佔比係咪太少？現價太貴而不敢入市

（6） 我將家用交俾家母時，原來她一直都會將一少部分儲起，再若干年後（大約15-20年）送贈給我，
但問題係現金已經不斷貶值，如果我說服家母儲起既現金慢慢入手黃金會唔會更加好？

再次祝福龔sir工作順利！！

龔成老師︰

1） 以你年紀，平穏增長股和潛力股比例，大約各佔一半。所以，你月供配置，係可以。但持股比例，就偏保守。

2） 利福國際（1212）和莎莎（0178）其實都差唔多，大家都受經濟週期和疫情影響。但利福國際（1212）負債較多，風險高少少。

3） 莎莎（0178）都有質素，但近年係弱左，不過不是無質素，只要不過多貨就得。而中銀香港（2388）係有質素，可長線持有。

4） 要睇翻佢私有化個收購價，如果比你買入價低，會有財務上損失。同時，由於你不在持股，你將失去佢升值的得益。

5） 以你年紀計，係偏少，潛力股和平穏增長股各佔一半左右，會較理想。

現時部份新經濟股，有輕微過熱架情況。要若直接入，最好等回翻先好入市，或者用月供去儲貨都可以。

6） 黃金是貴金屬，有「終極貨幣」之稱，是人類自古以來的貨幣，因此，有持有價值，而現時我地的現金，一定長期貶值，所以黃金長期會向上。

不過，黃金沒有現金流，持有無法創造出經濟價值，其主要作用是對沖黑天鵝事件。

所以，你可以投資黃金，但不用佔財富比例太多（<3%），而且持有的應該為實金。其餘最好投放在優質股，增值效果會較理想。

------------------------------------------------

Q20435：

龔sir～ 我係一個大學生最近先開始玩股票～ 依家手持01810 06993 03800

暫時感覺都唔錯 都問下有機會突破嗎？ 同埋都買左 01076 00438 想問下呢兩隻股既睇法～

因為都偏冷門小小，麻煩你

龔成老師︰

我唔知佢中短期會唔會有突破，但只要股票係優質，長線持有佢就會自然增長。

小米（1810）係優質潛力股，可長線持有。

藍月亮（6993）有質素，畢竟係新股，有一定不確定性，唔好持有太多。

保利協鑫能源（3800）質素只是一般。佢主要為光伏行業製造多晶硅及硅片；銷售電力；開發、投資、管理及營運光伏項目。

市場炒緊佢前景，但當中存有不確定性，股價大上大落，佢的確可能會大升，但同樣可以大跌，無得估，這炒作不少，現時值博率不算高，小小注好了。

博華太平洋（1076）主要從事博彩及度假村業務，包括發展北馬里亞納群島聯邦塞班島綜合度假村。

集團生意一直下跌，連年持續虧損。而且，2018和19年核數師意見出現有小問題。

整體而言，此股無投資價值，賣出較好。

彩虹新能源（0438）主要從事太陽能光伏產業業務；生產和銷售發光材料和鋰電池正極材料；太陽能電池元件及其他配件交易。

此股盈利波動，賺錢能力唔高。加上佢負債係一個唔理想架水平，長線我建議你換碼至其他優質股較好。

你在選股能力和經驗上，都未算太理想。我建議你先學好選股和定平貴知識，再慢慢去投資。就算想現在投資，也先集中係一些大路股票，會較穏陣。

你可以睇我寫架"80後百萬富翁"、"財務自由行"和"股票勝經"，會幫助到你。

------------------------------------------------

Q20436：

啊Sir想請問一下我今年37歲。以下組合可以如何優化？太多銀行股同時蝕緊錢。
應止蝕轉其他潛力股嗎？

1. 煤氣x1,000@$16.94
2. 匯豐x400@$76.05
3. 港交所x200@$279.4
4. 騰訊x200@$463.4
5. 領置x200@$59.5
6. 中生製藥x4,000@$8.58
7. 比亞迪x500@$69.8
8. 小米x800@$25.3
9, 舜宇x200@$126.1
10. 中銀香港x500@$26.55
11. 雅生活x250@$37.5
12. 中國銀行x10,000@$4.72
13. 阿里巴巴x100@$176

龔成老師︰

你上述持有的，基本上都是有質素的，問題不算大。而你37歲，可以在當中作一些調整。

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

你現時的年齡，應以增值為主。匯豐（0005）、中行（3988）只係收息，無乜增長力，唔適合持有太多。

其餘股票都適合，但你潛力股佔比重佔好高。佢地有增長潛力，但同時波動性都好高，所以最多只可以佔你組合4成左右。未來新資金，可以優先投資平穏增長股，令組合更平衡。

平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、粵海（0270）、領展（0823）。

另外，潛力股可考慮安碩恒生科技（3067），有長線投資價值。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂至略貴，因此，這刻不能大注投資。最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

------------------------------------------------

Q20437：

老師，我媽取25萬給我幫佢投資，我既諗法係用最低成本幫佢買入高息股以賺取股息，我睇了以下兩隻：

00808（50手）及03988 （50手），你覺得可以嗎？
謝謝

龔成老師：

上述兩隻都是有質素的股票，收息無問題，現價合理，可投資。

其實，持有2股有少少集中，你可以建立一個收息股的組合，目標是5%、6%的股息率的收息股，可以考慮加入以下股票（在當中選股）：

例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

------------------------------------------------

Q20438：

老師，想問下你意見，（大概18歲時曾經問過風水師，佢話美容行業唔岩我）

賭場我已經做左十幾年，一直無起色，職場上明爭暗鬥令我很累，加上自身性格問題，做得唔開心就轉工

但以家開始年紀大，唔想捱夜，如果35歲先試學做美容，咩都從新頭開始，係咪太遲。

加上美容店都請勞工（有經驗），而我就無經驗，條路好似好難行。

龔成老師：

我從來不信命運，我只會信我自己。

如果你真心想試，就大膽去做，你這年齡仍是可改變的時期，你試完，如果唔得，都可以轉去賭場。

好多野我都唔試，永遠唔知結果的！

你美容從頭開始雖然有點遲，但如果方向正確，過5年後、10年後，仍可以有一翻作為，加油！

------------------------------------------------

Q20439：

老師，當我見我個倉每日跌2%，個心又不安了，究竟要點樣先可以培養到好嘅心態？

龔成老師：

我持有隻比亞迪（1211）已經有12年，試過由$88跌到$12，跌左9成！之後先慢慢上翻。

你要集中分析「企業長遠的價值」，唔好太理會中短期股價，同時，唔好集中一隻股，要建立「組合」。

記住，「企業」是重點，短期股價不是，要平常心，同埋唔短期股價波動，最好練唔好日日睇股價。

------------------------------------------------

Q20440：

老師，我想問中國生物製藥現價算合理嗎？

另外，騰訊的主要收入來自網絡遊戲，風險會否因此比阿里巴巴高？騰訊現時價格是否太高？

希望㰍sir能抽空解答。謝謝！

龔成老師：

中生製藥（1177）是潛力股，人口老化令佢長遠有唔錯的增長，無論是政府投入的行業資源，又或是人民生活質素令可控制資金上升，都令人們更在醫療方面投入更多。

佢已建立一套完整的商業系統，有多個已賺錢的藥品類別，同時毛利高，可以不斷將錢投資在新藥裡，這模式運作很好。

但這類藥物企業，難免有一點風險，因此要久不久檢視，中短問題不用理會，但如果有一些核心性的問題，就要再全面分析。

就這刻來說，這股可以一直持有，因為商業模式理想，高回報，不斷再投資令股東利益快速增長。加上睇翻佢的業績，保持增長，這令企業價值有實際的上升，令股價得以支持。

現價合理區中上部，有貨可持有，分注或月供可以，這股可以長線持有的。

騰訊（0700）與阿里（9988）都有質素的，都可以長線投資，月供適合。騰訊雖然網絡遊戲佔了一定的比重收入，但佢最有價值的，就是「平台」，這亦是現世代好有發展的資產。

我地分析企業時，要思考那些是核心的企業價值。

佢業務模式係提供平台，如通訊平台、交易平台、入門網站、遊戲平台等，而收入來源則是其廷伸的服務，如增值服務、網絡廣告、電子商務交易等。

過往的業績十分理想，又身處高增長的行業，加上擁有重要的資產，即龐大的客戶群，將來發展各業務都有相當的優勢，這都是騰訊值錢的地方。

現價略貴，如投資要明白當中的風險，這刻在注碼上不過份大注，就可以投資這股。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q20021-Q20040）

Q20021：

龔sir，我有啲概念野唔太明，股票係買賣，賣都要有人接貨，如果有人賺錢，係咪應該意有人蝕？

龔成老師：

「有人賺錢，係咪應該意有人蝕」，這只會發生在零和遊戲的項目。

舉例說，如果四人打牌，有人賺一定有人蝕，這是零和。

如果股價今年$10，20年後股價不變都是$10，這就是零和，當中股價可以大上大落，有人賺有人蝕。

但如果股價今年$10，20年後$500，就是賺的人較多。當企業的實質性的長期增長，就不是一個零和，而是財富增值。隨著貨幣系統的運作，以及經濟成長，有些優質企業會得到較大的利益，增長力較強。

------------------------------------------------

Q20022：

老師，如果你是政府，你會如何收縮貧富差距的問題?

龔成老師：

如果我是政府，會推行理財教育，以及教學生做生意。近幾十年的財富，不斷偏向了資產增值及生意成長，懂得投資物業、股票、懂做生意，愈來愈有錢，打工仔愈來愈無錢，這是最大的核心問題。

------------------------------------------------

Q20023：

你好 想問以下問題

1.想問下由於仲係學生暫未有收入，每月只有大約1000～2000的資金，咁少錢可以有咩投資方法選擇？

2.由於資金少，投資新手冇經驗
呢排剛接觸買美股，但仍未知點選擇投資組合，一啲股貴只能夠買一兩股，平嘅股又上上落落

上網有見話買實一兩隻優質股，同埋月供其實係點？

因為買實一隻優質股、佢個價位越嚟越高時之後都繼續照買照供？定係賣左再重新再買？

3.咁少錢建唔建議分散投資去唔同好平嘅股等佢幾年升？

4.現時有咩複息回報產品回報%好啲嘅推介/多人會選擇用？係咪買香港銀行啲儲蓄計劃定係咩基金？
thankyou

龔成老師

1）如果你想穩陣，就月供盈富（2800），如果你能承受風險，就久不久，例如每隔2、3個月，買入一手安碩恒生科技（3067），可長線的。

3067這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂至略貴，因此，這刻不能大注投資。最好的策略，就是月供，或自行分注小注慢慢收貨（例如每月買一次、或2個月買可次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

2）所謂的買實1、2隻股，即是每月，不理價照入，長期進行，如果企業成功，你的回報會最大。不過，如果你未有選股能力，就唔建議，因為萬一選錯股，你集中1、2隻，損失會好大。

所以，我會建議投資ETF較好，如果美股，可考慮VOO。

3）最重要是投資「優質股」，建立一個組合。

你小注投資一些潛力股可以，但這類股要求你都有一定的分析力。

另外，唔好因為資金小，刻意買一些無質素但入場費低的股票。

4）我建議你投資ETF，2800、3067、VOO、QQQ，長遠好過你買儲蓄計劃，從學習及提升投資實力角度都是。

------------------------------------------------

Q20024：

龔sir 想問下你點解覺得華潤醫療潛力未到十倍股。

因為我見到佢依家既六大專科發展（腦病學科，康復學科，腫瘤學科，消化學科，骨創學科，心臟學科）
好有潛力。將旗下醫院打造成各個專科醫院。

如果成功的話，起碼是千億級別（海吉亞，錦欣生殖只是專做一個專科醫院已值幾百億）

而且佢又有華潤健康既資產注入，依個都值得期待。

政策是長期利好，我見之前中國政策傾斜既行業，都發展得好好，例如電商，乳業等。

所以華潤醫療既專科發展成功機會都大。
仲未講佢如果發展互聯網醫療，應有一定優勢。

龔成老師：

我相信這股有增長力的，至於能否成為10倍股，就要睇佢之後的業務發展，大環境能否配合。

華潤醫療（1515）其實本質唔錯，不過業務波動與中短期因素，令股價波動。

佢是華潤集團在醫療版塊的主平台。主要在中國從事綜合醫療服務、提供醫院管理、諮詢服務、醫院集團衍生業務。

旗下擁有過百家醫療機構，提供臨床診療、健康管理、公共衛生、醫養結合等全方位、多層次的醫療健康服務。擁三級醫院、二級醫院、一級醫院、社區機構，總床位數超過1萬張。

本身有一定的企業優勢，長遠企業發展仍是正面，此刻價格大約在合理區中上部。

------------------------------------------------

Q20025：

龔sir，我今年32歲，月入$25000-$30000，手上現金20萬，我從未試過投資，我想下一年生寶寶，所以現在想賺多啲錢，我應該投資哪一股票？

月供哪些？
直接買入哪些？
謝謝你的分享

龔成老師：

如果你無投資經驗，月供會較好，雖然回報不及把握時機，但起碼能減少你的風險。

你現時可以利用每月月供股票，將手上的資金，慢慢轉為股票，例如每月供$5000-$8000。當你的現金開始到達較低水平，如$5萬-$10萬（要視乎你的家庭情況），你就可能要減月供金額。

其實你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。做月供股票，每月$5000。

你可以考慮盈富（2800）$2000。

另外再加1、2隻（每隻$1500）：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：安碩恆生科技ETF（3067），如果無得月供就自己隔2、3個月入一次。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q20026：

Hi 老師 手持十萬中國電信 728 平均2.15入
之前比制裁既時候覺得抵入 中間有溝貨 見佢都有5厘息 打算長揸

請問哩隻股質素如何 哩個價可以長揸嗎？

龔成老師：

中國電信（0728）有質素的，5G雖然對佢有正面影響，不過，中國政府希望相關費用不會太貴，令資訊流通更好便利，所以，對佢的賺錢能力方面，未必能帶來突破性的增長。

可視佢為收息股，唔好對股價有太大期望，增長力不算強，這股有長線投資價值。

你可以將這股，成為你投資組合其中一部分，但不能過多。

------------------------------------------------

Q20027：

Hello 龔Sir!第一次send message 給你，想來多謝你及問小小問題，希望你在百忙中能抽空一點時間給我們一些建議。

一年前開始深入看你的著作及Facebook專頁，剛好身邊積累了一點閒錢又遇上疫情跌巿，參考你的建議後分注入巿，這一年都賺了一點利潤，很多謝你無私的分享。
因此成績並非全靠自已的分析，很多是聽從你的建議及策略，為了令自已更明白什麼是股票投資，我已報讀你3月的課堂，期待從中學到更完整及深入的股票知識及方法，為未來增加投資能力，同時減少投機取巧。

你書中指上完你的課程正常能在股巿中賺回學費，但我估計很多學生未上你的堂，只留意你的專頁及書藉，不盲目投機，應該已經賺夠了學費，哈哈!

我的朋友(35歲)有一個問題是關於自願性可扣稅強積金。他的收入已達17%的稅階(假設跟往年一樣有稅務寬減2萬後仍要交約2萬稅)，如果將收入放入強積金，相等於節省了17%的稅款。

但因為強積金必須要到65歲才能取出，相等於該筆錢只能一直放在強積金戶口滾存，相反如果不放入強積金，即時會被收17%稅。

因為他的股巿經驗不多，未知能否賺多於強積金的回報，他過往8年強積金的年化收益率約為8%。請教呀SIR 給點建議。

最後，很喜歡你不定時上載一些正面的句子，鼓勵大家一齊進步。祝大家身體建康。股票班見。

龔成老師：

我相信知識與財富成正比，你擁有的知識愈多，長遠財富都會愈多。

至於自願供款扣稅強積金，有好有壞，好處是稅項的優惠，但要留意，佢都會有個上限。

如果你朋友原本都是儲蓄投資，比起自己做，參加自願可扣稅，這的確是好處。

當然，都有壞處，首先是管理費，盈富（2800）的管理費只是0.1%，但坊間的強積金，就算是追蹤指數的基金，管理費都唔低，要計下數睇下有無著數。

另外，你要到65歲先可以取到，靈活性會大減，因為佢人生裡不同的階段，都可能會需要資金，而不一定等65先，所以，這方面要留意。但如果佢本身都想這筆錢65歲作退休先用，咁都可以考慮。

加油！股票班見！

------------------------------------------------

Q20028：

Hi 想請教一下 我幾年前開始月供股票 中途有斷續地供唔同組合

66、175、823、939、1038、1113、2318、2800、3988

所以有啲散收收 如果我想集中供其中3-4隻 有咩建議呢？

龔成老師：

你現時所月供的，都有基本質素，不過有些同類就唔需要供太多，例如銀行、長和系。

如果你想組合有基本增長，可以停供一些收息股，只供：盈富（2800）、港鐵（0066）、吉利（0175）、平安（2318）。

------------------------------------------------

Q20029：

成哥 有樣野想唔明 我驚阻你時間 如你有空先回應我 中海油 近期港股通北水好強買入

成交又大 買盤長期多過賣盤 點解股價唔暴漲 雖則漲了不小。 謝謝！

龔成老師：

這些是一些中短期的分析，其實你唔好太在意，最重要是睇翻「企業本質」。

所謂的成交，要有「買入」「賣出」，所以當有資金買入，如果同時股價已貴，就自然會有一定數量的賣出。即是買入的人多，賣出都多，而你所見到的買入多過賣出，只是一些短期現象，會變得好快的，因此唔好盡信。

------------------------------------------------

Q20030：

龔老師，你點睇一個做咩都唔成功既人
做每一樣野..係咪意志力唔夠

龔成老師：

我手機中有一句用了多年的金句：「成功不是比能力，而是比毅力」！

我睇左好多成功人士、有錢人的傳記，佢地的共通點，就是「不會輕言放棄」。好多時，佢地同失敗者在能力上分別不大，但佢地會好堅持，每件事都堅持。

如果你記得我早前FB的貼文，當日好凍，但8度，但我都會堅持去跑步。

其實跑步只是一個好微少的動作，但我會堅持每星期跑1、2次步，當我定了當天要跑，就要落雨、打風、好凍，我都照跑，這動作持續了20年。

成功不是一下子做一件大事，而是堅持做小事。試下定左目標後，「無論如何」都要做到，當習慣了這情況，做事就會好成功！

------------------------------------------------

Q20031：

老師你好，近期經朋友介紹接觸到你，投資知識係0. 本人38歲，專業人士，私人執業，月入不穩。平均每月有6-8萬。

本人最大問題係收入有時以幾個月作結算，例如半年會有18萬收入，是每月3萬的總和。但每月至少會有3萬現金流。

儲蓄約20萬。

期望2022年12月31日前增加儲蓄到100萬，想了解一下，若收入不穩定，一時很多錢，有時無現金流情況應該如何投資？想問下月供小米和迪比亞是好選擇嘛？

請老師指教

龔成老師：

只要用平均的概念進行就得，無問題的。

首先，由於你收入不穩，因此現金唔建議用盡，最好點都有$10萬現金剩，暫時只用$10萬去投資好了。

你可以用分注，或月供股票的模式進行，不過，比亞迪（1211）現價貴，唔太建議。小米（1810）都唔平，部分資金月供好了，不要大手買。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。

你可以考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：安碩恆生科技ETF（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177），但就要明白波動性比上述會高左，同時風險大左，你要自己平衡。部分要等回少少先入。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q20032：

龔sir,你好，我今年三十幾歲，有家庭，兩公婆月入大概6萬左右，有兩個唔夠3歲既小朋友，一直都無乜有效既儲錢方法，加上宜家家庭開支加大，想為未來打算一下。

自己20歲出黎返工已經每月拎千幾蚊左右買左份投資雙連既保險，儲左10幾年，宜家睇返都有30幾萬。

呢幾個月有個諗法，就係拎呢30幾萬出黎股票市場投資，希望財富增值。

如果計劃實行，我打算將呢筆錢分散投資放係以下股票（1810小米，941中移動，3067安碩恆生，1177中生製藥，2158醫渡，869信義光能），想問有冇意見俾到我？謝謝

龔成老師：

如果將投資雙連既保險，轉去股市，有危有機，其實好睇你風險承受能力。

長遠來說，股市回報會較高，但風險度都較高，加上現時股市已唔平，投資要更加小心。

你上述選的，除了中移動（0941）外，其他都是潛力類股，但最大的問題是現價大多唔平，甚至部分貴，你將會將對股價波動的風險。

我會建議你一半是平穩型，如盈富（2800）、港鐵（0066）等這類，一半是潛力類，你會較平衡，同時，潛力類入貨時，要慢慢分注入，不要一次過大手入。

------------------------------------------------

Q20033：

你好成哥，我係你的讀者，想請教你關於置業揀樓的問題

我本人單身，約30歲，最近我中左白居二得到置業機會，想買來自住+當係投資

第1個問題係考慮我財政能力，首期40-50萬應該無問題，再多既都只有大約1年洗費預算，現時工作穩定，月入3萬儲2萬，如果供400-500萬樓，供款大約2萬，每月就會無錢剩之餘另外仲有約$1000-$2000/月 家居洗費

正路每年我可以加人工，將來如有機會結婚亦可同另一半分擔生活費，所以暫時可以頂住先

我咁諗會唔會好有問題? 其實係咪唔應該買?

第2個問題，如果買的話，白居二可以買二手市場未補地價居屋，如果樓齡20年內可以借足9成錢 + 還款期25年，否則需要在政府擔保期內還到4成錢

好處係政府做擔保，可以唔洗做壓力測試。睇過現時比較多既居屋屋苑大多都係20年左右，有平有貴，範圍大約$9xxx - $11xxx/尺

我有個擔心，如果我現時買左20年樓齡居屋，將來賣出既難度可能會大大提高。因為買完10年內已無政府擔保，將來白居二買家需要直接比4成首期(以500萬樓計，大約200萬)先能夠買到

或者我需要另補地價先可以係二手市場賣樓，如果我係買家，有200萬其實已經過左資產上限申請唔到白居二，或者跟本唔需要用白居二名額買樓。我亦無咁多錢用來補地價。

所以樓齡細(約1-10年)，但係比較貴($12xxx/尺)既樓比較值得買?

我先用可承受樓價->買值得投資既居屋作為考慮條件正確嗎? 或者有咩其他我諗唔到既因素可以建議一下?

感謝你抽空解答!

龔成老師：

1）你最好預多少少首期，除了可能更穩陣買到樓外，當你完成買樓後，不要令到現金變為零，要留有一定的防守力。

另外，要計清楚供樓情況，每月供款方面是否無問題，因為現時你的情況有點盡，供款佔入息過多。

我地買地，最重要是「供得起」原則，如果這方面未能好安全地過關，那不如儲多少少資金先，或買一些金額更細的樓。

2）居屋最大的作用，基本上自住，投資價值不算好強，所以你可以先從自住的角度考慮。

當然，我認為你現時的供款情況買樓是較進取的。

你應該考慮左供款、樓價這些問題先。

------------------------------------------------

Q20034：

龔Sir, 你好，我係你股票班學生，因為近黎個市場非常波動，我亦暫未睇到有咩股票係平可以買。所以想做番月供計劃

因此想問下而家阿里巴巴（9988）受到中國政府嚴密既監控，股價不斷受壓，未知幾時會完，而我長遠都睇好阿里巴巴既發展，而家係咪一個合適既時機去做月供股票（太約每個月$5000）

慢慢儲貨，等佢未來爆上去呢？ 另外想問下去到幾多錢就暫停一下月供計劃呢？謝謝你

龔成老師：

近期的新經濟股股價回落，加上阿里（9988）將面對內地監管可能收緊，都令佢股價上落大左。新經濟股股價回落只估值問題，由之前的貴，去翻合理水平，反而要從一些核心因素分析。

例如內地監管可能收緊，相信對佢中短期有影響，不過，我相信佢的整體優質度仍在，內地不是不想佢賺錢，只是想規管佢。佢已建立好完善的業務，因此本身是無得輸，只是賺多賺少問題，現時監管多左，點都會影響賺錢能力。

又以佢的螞蟻貸款業務來講，這部分是一些網上的小型貸款業務，增長快，但監管並不如銀行般緊，因此，中央會有更多的監管針對這部分，影響了賺錢能力。

整體上，阿里，長遠仍是有發展，賺錢能力雖然有少少減，但長遠會同政府同意一些監管方法，以及找到合理的賺錢模式，你預阿里現價約在合理區頂部，這股可長線。不過，中短期會波動。

你現時開始月供，適合。$5000無問題。

由於月供是一個長期計劃，除非佢升得太多，如$280、$300，否則，你可以一直進行的。

------------------------------------------------

Q20035：

龔成老師你好，想問下買盈富2800的策略是應該升到高位放部份，再等跌市底位入翻賺差價，還是不理現價一直長揸？

之前睇過老師建議長揸好似3-5年以上才有回報，但有少少疑問因2800跟恒指，咁若果5年後的恒指和現在一樣，咁若不計派息，可能賺不到股價？

另外我是每月看現價盡量捕低位一手手入，但呢2個月都價位偏高無入到，想知應如何應對

另外想問問3067有無咩建議價位入，呢排一味升，難以揾到位入手，謝謝老師!

龔成老師：

盈富（2800）最大的作用是幫我地平衡組合，以及爭取基本的回報。所以，盈富最大目的不是賺價。

建議你點都有一定的貨在手，如果再升到貴，你賣部分是可以的。現價唔算平，月供好了。

如果你想組合有增長力，可以投資安碩恒生科技（3067）可長線。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂至略貴，因此，這刻不能大注投資。最好的策略，就是月供，或自行分注小注慢慢收貨（例如每月買一次、或2個月買可次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

現時大市，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q20036：

老師您好
想問下保險業前景

而家考慮緊AIA(1299)同中國平安(2318）
邊隻更值得長線持有。感謝！

龔成老師：

兩隻都是有質素的，都可以長線持有。

中國平安（2318）會略略好，這股有質素的，佢有規模，有品牌，近年的發展都不差，不過，股價有時會有少少波動，這主要受投資市場表現影響。

這股有長線投資價值，是平穩增長型，分注投資都可以。

------------------------------------------------

Q20037：

老師 0981同美股強生現價值得入嗎

同6690

龔成老師：

中芯國際（0981）業務有增長力，但未必能稱為好優質的股。

睇翻佢過往的業務情況，雖然仍每年的生意都有增長，但盈利就有波動，反映雖然大環境的市場在增長中，但佢的成本與售價，就未必在佢掌握的範圍，最後造成盈利波動的結果。

雖然這股都有前景，但以佢面對的情況，但好難將佢定義為最優質的股票。

加上此股近年升了不少，就算有所回落都唔算平，加上之前熱炒過，股價大上大落，投資要注意風險。這股唔建議大注，回翻D較合理。

美股強生無特別研究，基本上是有質素，有增長力的，不過唔知現價平貴。

至於海爾智家（6690）主要從事生產及銷售家用電器，並以３個自主發展的品牌（包括海爾、卡薩帝、Ｌｅａｄｅｒ）及４個收購的品牌（包括ＧＥ　Ａｐｐｌｉａｎｃｅｓ、Ｃａｎｄｙ、Ｆｉｓｈｅｒ＆Ｐａｙｋｅｌ及ＡＱＵＡ）營運業務。

佢家電產品涵蓋冰箱、冷櫃、廚房電器（包括油煙機、灶具、消費櫃及烤箱）、家用空調、商用空調、淨化器、新風系統、洗衣機等。

業務不差的，有質素，長遠有發展，現價合理區頂位。

------------------------------------------------

Q20038：

你好，想問1931同978 呢2隻股係咪唔ok.978放左好多年了，唉

啱啱去書局見到你本50值博倍升股。。。2018年著。咁係咪應該d股升曬了。。使唔使轉買50潛力優質股係咪update d

龔成老師：

華檢醫療（1931）業務波動，加上企業獨特性不強，整體的投資價值只是一般。

現時股價算是合理，但又未見有增長力。

招商局置地（0978）集團主要從事開發、銷售、租賃、投資及管理房地產，其實過往業務不過不失，不過增長力就唔強。

現價處合理區，不過這股收息較增長為佳，因此唔好對股價有太大期望。這股都有長線投資價值。

至於《50優質潛力股》，最新版是（2020年-2021年度）。

------------------------------------------------

Q20039：

老師 如供3067潛力係咪應該大過388
因388現價已經很高？

再請教3067現價已貼近52週最高 應該等回落至咩價位開始入貨呢？因銀行沒有月供此股

另收息股如想把939換成另一隻 請問有那些建議？

非常感謝你

龔成老師：

恆生科技ETF（3067）與港交所（0388）現價都略貴。

由於3067是一個組合，風險度會比港交所較低。如果銀行無得供，你自行分注去儲貨就得，例如每2個月入幾手手。

如果收息股想轉，可轉香港電訊（6823）或置富（0778）。

------------------------------------------------

Q20040：

成哥，想係度多謝你！我係大學上過一個personal finance嘅course，因此對財務自由、投資等已經有基本概念同認識。

不過由於只係短短一個sem個課程，而當中亦包括稅制等其他課題，令我對投資嘅認識非常有限，亦令我唔敢行出第一步，因為驚會蝕錢收場。

但自從上年認識咗你，睇完你百萬富翁系列之後，令我財務知識倍增，亦令我有信心同興趣開始投資同埋研究相關資訊。

依家小弟唔可以話自己好叻，但起碼因為成哥令我對呢一方面有正確、專業嘅知識，相信令我日後達成財務自由相當有幫助。多謝成哥！你日後嘅著作同埋課程，小弟一定會大力支持！

龔成老師：

太好了！

記住要保持知識增長，我深信，我地長遠的財富，一定同我地的財務知識，成正比！

加油！

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。