［失身記］性交轉運 — 我的第一次（下）

1. 上集在此（http://bit.ly/2R6wzwZ）

2. 呢度講多少少。我失身，同陳慧嫻有乜關係？答案：對手係讀瑪利曼嘅，陳慧嫻亦都係。名校女生。係喎，打後我都對名校女生有啲癖好，就連我老婆都係。當然我冇好刻意咁揀。嗰時膚淺，主要都係睇樣。後來先知身材同就手都係好重要的。

3. 當事人屋企都係有啲錢的。唔係富豪，但i mean，中上級嘅中產啦。住雲景道喎（唔怕講）。一層兩伙嗰啲喎，好似千鳩幾尺喎。對我呢啲住屯門元朗天水圍（三度都住過）三四百尺嘅小朋友嚟講，好震憾架。

4. 當然佢就有工人（好似唔係賓，不重要，我又唔係搞佢工人）。但更重要嘅係，有後門！i mean間屋有後門，唔係條女有。BTW，我從來都唔搞後門，一次都冇。我好怕任何搞後門嘅AV，亦唔明點解啲鬼佬咁撚鍾意玩後門，有話係因為啲鬼婆鬆 — 但你見interracial 搞亞洲女佢地都一樣係咁。只能講句習慣成自然。

5. 係喎，我點知有後門？因為我去過作客咯。當年其實只會主場同作客，冇中立場。冇錢爆房，亦冇錢一年去幾次日本。作客就梗係難踢。因為我呢位男朋友係唔見得光嘅。我要做嘅，就係去天后打躉。好似有架小巴上雲景道定乜？然後仲要坐後門嘅電梯，在後樓睇等。在後樓梯搞？你就想。唔好睇咁多向西。我就真係等，寂寞到夜深。

6. 而當年，當然係未有whatsapp，冇得打住機等（打住飛機就可以嘅，但為何浪費彈樂？），冇得上Facebook，冇智能電話。幸好已經有部手提，愛立信嘅3系。但除咗打出打入，同埋買本一本便利嚟入do rei mi鈴聲外，冇其他功能（可以掟人嘅）。

7. 在後樓梯我做乜？就係睇書。有時睇文學書，但最記得係睇C。係睇C，唔係睇詩。C語言。結果我得個C，注定數學再好（咩呀？挑我機？阿叔數學差不多次次滿分，由附加數到純數都係，三個嘅卷我一個鐘左右做完）都唔會做到quant，又冇得做data scientist 大數據呃食飯。應該係嗰期考試（考試唔使扑嘢？就係考試先要扑嘢減壓！）。如果有呢個後樓梯我應該C都冇

8. 呀，去到作客，就真係唔同，就好似阿仙奴對巴塞咁（係！當年就有呢個對決！）。後生仔唔知，阿仙奴以前在高貝利，出名係細場，玩到巴塞啲友謝，成日扭波交波出界，斬波大力少少就射咗上民居（係！高貝利隔離係住人的！）。我情況差不多。在太古堂就只能男上女下，下格床如果女仔在上面會頂頭，而我唔會痴撚線到爬上同房上格做 — 唔係我有良心 — 而係會頂天花板！

9. 作客，魯營喎，坐十萬人喎，雲景道喎，就真係唔同。對手甚至成世都冇訓過碌架床（我看見時代的眼淚，但，「咁巴閉咪又係畀我扑」）。佢有張大床，好大的床。床頭玩到床尾都得。樓底又夠高，點頂都頂唔到天花。咁就可以玩女上男下了。你睇，當年雖然未去到扑嘢都冇錢冇位嘅程度，但原來有錢就可以騎乘，冇錢嘅只可以下格床傳教士。我首次感受到個階級矛盾。

10. 呀，仲有歌聽，係喎，梗係要播歌。我另一性癖：其實我做愛係唔會聽音樂嘅。我係一個好講專心嘅人。扑嘢就扑嘢，聽歌就聽歌。正如我溫書亦都唔聽歌。不過作客就要聽歌，否則會嘈到老母。名校女生嘅房有部幾好的音響，仲要係聽古典音樂，Four Seasons（好聽，但未到夏天就射啦，九分鐘呀）。我就在太古堂聽張學友嘅花與琴的流星。真係有啲分野。

11. 無論如何，多數我睇睇下書，電話就會震（唔會響機啦戇鳩，想嘈醒屋企人咩）。Jones Lang 就響起歸家的訊號（http://bit.ly/35ClPvu），今晚扑野夜唔夜（http://bit.ly/2FzDiKl），耶耶托尼耶耶耶（http://bit.ly/2t5l7JJ）！然後佢工人就會開門畀我，將我由後門偷運入去。呼！勝利嘅時刻卒之來臨，蘭諾夫費安尼斯爵士再同補給船會合！

12. 然後？有時我就係好似摩梭族咁。即係點？我都唔知做乜我睇埋啲咁嘅嘢，多得李照興同埋周華山。摩梭族係母系社會，仔女都係成班女人養，根本唔分咩生父。生父，就只係「嗰晚嚟打咗個冷震嘅男人」。同配種差不多。我就係有時咁，半夜走人，放低幾毫升，未睇到雲景道嘅雲景，就不留下一片雲彩。

13. 點解？唔係我薄倖，而係，大佬，第二朝點走？！？！人地老母起身嘛。當然我試過，朝早六點幾七點同佢一齊走，我送佢返學，去我永遠都唔會讀到嘅瑪利曼（廢話，女校嚟的）。食我嘅早餐。然後返去太古堂訓覺（唔通去上堂？）。

14. 亦都有試過係出事嘅。唔知我訓過籠定佢訓過籠定佢老豆心血來潮半夜睇歐聯。總之，偷運唔到。咁就仆街咯。我就好似你睇戰爭片（Dunkirk定1917 )啲小兵咁，被困。咁但，都話人地有錢女，老母係唔會好似我老母咁亂撚咁入房（又體會到階級）。佢鎖住我大半日都冇事。肚餓？佢會叫工人拎嘢比我食。「但要屙屎就仆街了」。對手並未去到自己房有個塔。幸好我只係小便，有水樽。呼。

15. 後來？其實冇乜特別。分咗手。原因唔係好記得，但唔似係我有第個或佢有第個。但好記得係佢主動提起，當然呢啲你飛我定我飛你我唔會介懷或在意，可能係我仆街到等佢忍無可忍講。

16. 分手後，佢搞上咗我嘅Hall Mate兼朋友兼中學同學（其實有心嘅會知係邊個），有可能在分手前佢地已經搞上。呢位朋友，就係嗰時成日同我去兆萬花園餐廳鋸扒嘅嗰位。甚至唔止一次，先後兩次定三次，佢都係同我泡成，或唔成，嘅女仔一齊。真係有舖食廚餘嘅癮。

17. 但天地良心，我同朋友冇乜介蒂。Year Three我地甚至一齊租屋。女仔會唔啱聽，但嗰個年代真係兄弟如手足女人如衣服啦。或者根本唔係好愛，年青人嘅情慾啫。後來同呢位朋友行遠咗，但從無咩面阻阻或乜，而家偶然會成班人食飯。

18. 甚至我地大學畢業時（Hall Mate當然同大學），咁大家都係無心讀書，但居然都畢業。我就錫根撈華，佢就third安娜。史兄個朋友就同佢食煙去賀人賀。我呢？去咗銅鑼灣。叫雞？唔係。我地只係去咗食法國餐。其實咪又係香港人扮撚晒嘢。但個餐牌得法文。當年當年冇Google Translate，我地又唔敢問。結果齊齊食魚，法國大餐多舊魚。點解？因為係我唯一睇得明嘅嘢。Poisson係魚。點解我知？因為Poisson係個統計學家，我仲有上堂時（即係year one早期，1997年尾，未失身時），上堂時教授有講Poisson法文係魚咁解。應該係我讀精算唯一學到嘅嘢。

19. 女主角。後來好似去咗美國讀書。之後嫁埋人，聽聞嫁得好好。呢個時侯就要講慕遜加柏。慕遜加柏係隊唔多出名嘅德國球會，曾經勁旅但講緊我出世之前。點解我會迷戀呢隊波？因為佢出好多之後好有成就嘅球員，遠有納妙，邦荷夫，希歷基斯，福士。近有馬圖斯，艾芬堡。再近啲有萊斯。即係feeder club，為他人作嫁衣裳

20. 又關乜事？因為，真的。我好多ex都嫁得好好。任你用咩標準，總之就係好，遠好過平均。老公又錫佢，又富貴（仲想點）。我懷疑我有段時期不停咁在網上講呢樣嘢，見到女仔都會講，從而勾佢地上床。等佢地有一個「同埃汾上完床就會嫁得好」嘅幻想

21. 而個成功率好似幾高喎。真正嘅性交改運。亦係呢兩篇文個題嘅由來。

22. 關於周小姐嘅事，應該講完了。拿，有姓，有埋年份，知埋學校名，知埋住邊，其實有心一搵就搵到當事人。但重要咩？我反正唔係佢第一個男人，佢拎走我嘅初夜，亦冇乜咩咁特別，就只係咁啱嗰個人。我唔會話我唔愛佢，更加唔會話冇感情（冇感情寫咁大篇嘢？）。但話我好愛佢亦係大話。

22. 吾友 置地記者少寫自己嘢，話賣藝不賣身。我就話why not both，又賣藝又賣身，莫負青春好年華。失身都唔寫嘅，唔通死咗先寫？我鼓勵大家寫下第一次，真的，每個人都有一個故事。你啲其他故事我未必想聽，但失身故事，我應該總會想聽。

23. 返去寫吧。咩話？你仲係處男／處女？I am sorry to hear that。幫你唔到。男嘅我唔啱，但自己去澳門或富士山（識嘅自然明）吧。女嘅？叔叔從來冇處女情意結，當年都冇，況且我唔係好想成為你筆下嘅對手。雖然亦有唔少對手畀過差評。

24. 事實上，我話我第一次冇好似史兄咁幾下搞掂，唔係我勁或佢虧，主要都係彩數。天時地利人和，人生控制到嘅，比你想像中少。但正係咁人生先吸引，性愛先咁吸引。我試過好爽嘅性，試過好差嘅，I’ve look at sex from both sides now，from up and down（http://bit.ly/2tJCmAw），男上又好女上又好，未試過點知呢。我一樣試過幾下就射咗，甚至好似試過一放入去就射咗，對方真係「你有冇搞撚錯」然後指住我嚟笑，不幸地仲要係個靚女，但又如何？意外嘅嘢。

25. 我亦都試過有個原本唔熟嘅女仔朋友，樣子普通身材好似幾得，真係主動送上門，明顯係貪我靚仔或有才華，或者自己寂寞。但結果？我起唔到頭。佢好似之後都冇睬過我，佢應該覺得我侮辱咗佢。但只能講句，你估我想架咩。意外嘅嘢。

26. 所以，去經歷吧。然後寫低佢。但唔使拍片了。

仙台尋找魯迅 （五千字長文，多圖，慎入）

多圖，睇medium 版啦

1. 篇文原本係想叫做「仙台尋找周樹人」，呼應返「緬甸尋找奧威爾」(http://bit.ly/35VPVue)（本書我就在緬甸買的，水已魚），而且七個字嘅題比較有音樂美。但，首先，我懷疑根本冇人知道「緬甸尋找奧威爾」呢本書（倒係我引過書中關於「惡龍」嘅傳說，好多人轉貼，沈大師都有轉上轉）(http://bit.ly/2LbLCTK) 。另外，我亦擔心，根本冇人知道周樹人就係魯迅。

2. 真人真事，我話去睇魯迅，有人以為係佬訊
(http://bit.ly/2P6IidD )。應該都係我啲廣東話太差。幸好我有急才，話佢知，係呀，咪佬訊張profile pic嗰條友

3. 本文就真係講在仙台尋找魯迅足迹。好似話唔少人，根本連魯迅在仙台留學都唔知，甚至佢在日本留學都有人唔知。又或者唔知，原來日本（人）仲保留咗咁多魯迅嘅東西。

4. 可能係我偏見。但我在網上搵關於在仙台尋找魯迅足迹，出嚟嘅，唔係台灣文，就係大陸文。包括項明生(http://bit.ly/2RcJW0f) 。你話，嘩，項明生都大陸仔？幾時開始玩血統純正論？差矣。你睇佢書就知，佢好多遊歷，都同佢在大陸讀書成長嘅經驗有關，包括佢寫魯迅。因為佢有提過，《藤野先生》一文（出自《朝花夕拾》，陣間再講呢篇文）(http://bit.ly/2RdBNbU) ，係大陸語文課本必讀。我年代香港中學都必讀魯迅，但冇呢篇文，收嘅幾篇文，都冇直接講魯迅去過日本。雖則講佢點解「棄醫從文」時其實個轉捩點就在日本

5. 而陪我在仙台上路嘅，正係香港人天書，閃閃書。嘻，唔係你以為係乜？我覺得呢本書好代表香港精神喎。定你覺得拎本正文社就文青啲？唔知。但肯定嘅係，我唔會拎本Lonely Planet去日本，實在太裝B 。雖則，我其實去緬甸去老撾都係拎本Lonely Planet。諗諗下應該去台灣韓國日本都拎，扮下ABC呃蝦條都好

6. 而當然 ，在仙台閃閃書入面，關於魯迅嘅東西，係零。一個字都冇提過。not a single fucking word．啱丫，你睇人封面寫乜先？食玩買終極天書嘛。魯迅食得的？你睇閃閃書想搵魯迅 ，不如買龍虎豹搵（而其實啲鹹故文學水平幾高，肯定高過閃閃書，實不相瞞都對我寫作有啲影響）。

7. Anyway，我去仙台，主要都係食同玩（朋友可證，我同囡囡，都係唔買嘢的）。食，咪食牛舌。咁玩，咪玩魯迅。本人住在仙台站附近，去片。

8. 香港一般人，對魯迅應該唔太陌生，特別係我年代嗰啲，會考仲有指定課文之類，中六七做讀書報告亦都必睇。許欽文本《吶喊分析》，等於米高佐敦嘅Bryon Russell ，或者柏金嘅達比薩斯。就係多得考試局要做《吶喊》先有人買佢本嘢。而本人當然不屑買呢啲書，我成份嘢都係自己寫，好似寫咗成萬字。你睇我其實自細已經係咁：離群，扮撚晒嘢，同埋口水多過茶。

9. 無論如何，《孔乙己》《狂人日記》《阿Q正傳》呢啲，稱得上深入民心。《一件小事》《風箏》我年代初中亦有讀。仲有呢十年人氣急升嘅「血鰻頭」，亦係出自魯迅（你以為係長毛發明的？）．而根本冇乜人留意，其實篇文（《藥》），係話「你班友戇撚鳩」，民智未開，革乜撚嘢命。

10. 仲有，「 你永遠無法叫醒裝睡的人」都可以半歸功於佢。而家但凡你講外國點點點，會有人話「臭蟲」，出處亦係魯迅。當然仲有吾友 利世民 (http://bit.ly/35Xtkxk) 最鍾意嘅一句：可憐之人必有可恨之處。同樣係多得魯迅發揚光大。

11. 張學友同林嘉欣（wow，初出道扮學生妹嘅林嘉欣）套《男人四十》(http://bit.ly/37SDbGN) ，我睇咗幾次。一開場就有張學友教中文，教完孟子，就預告下堂教魯迅。同學大呼out，張學友強調魯迅好in，「係第一代去東京留學兼掃貨嘅型仔」「佢住喺神田，坐山手線由Shibuya坐十個站就到啦」。我地Fact check一下，的確係十個站，岸西啲劇本係認真嘅。

12. 但魯迅在東京讀嘅，類似係foundation course 或者預備班。原本佢應該係去東京帝國大學讀採礦冶金，但佢選擇讀醫，去仙台。原因未有定論，有講話因為佢老豆被庸醫（中醫啦）所害，佢自己棚牙又一路都唔好，加上佢覺得西醫係日本維新好重要嘅部份。至於點解去仙台？佢自己有提過睇唔過眼東京啲留學生玩吃玩樂，正係在《藤野先生》入面講，所以佢選擇去冇中國留學生嘅地方（我懷疑亦因為東京大學讀醫好難入）

13. 魯迅當年讀嘅係仙台醫學專門學校，後來（都成百年前）併入東北大學。由仙台站行過去15分鐘左右，仙台雖然已經係東北最大城市，但只係100萬人，同香港冇得比，加上天氣好，行15分鐘極之舒服（其實我全日都冇坐過車，基本上半個鐘頭以內嘅我都會行）。

14. 11月尾嘅東北大學，係已經冇乜人嘅。放晒假？又好似唔係。要上堂？或者係。但我只係想講，你同香港嘅大學比下，香港嘅大學就算放假，都係嘈得多。

15. 好快，就搵到魯迅在東北大學嘅像，亦寫明係仙台醫學專門學校遺跡

16. 東北大學史料館，係有專門一個展示室畀魯迅

17. 但自己留意返開館時間 ，另外留意，其實史料館裝修到下年3月。我仲以為冇得睇，其實係臨時搬咗去第度。不難搵，反正個校園本部唔大。

18. 入面就由魯迅離開東京去仙台讀醫開始講 ，講佢因為想遠離留學生而去仙台，當然亦都係引返魯迅《藤野先生》一文。留意成本《朝花夕拾》都係回憶錄（睇書名就知），魯迅寫時已經近50歲，然後未到60就死咗。想講係，魯迅廿幾三十年後回憶前事，或者有選擇性遺忘，有文學加工，或者根本記錯，絶不出奇。畢竟嗰個年代佢未會打卡放上Facebook

19. 當年報紙都有報，魯迅唔只係仙台第一個中國留學生，甚至就係第一個留學生，相信亦因為咁，仙台醫專對佢非常好。報紙亦都有提佢識日文。當然近年唔少憤青考究返，魯迅譯文好似不少錯。亦可以話日本人只係厚道，或者官方話佢識日文佢地咪照講。但相當肯定嘅係，佢嘅日文點都有一定程度。

20. 其實諗下都知，佢冇人冇物，可以在仙台生存，上堂，讀醫，寫筆記，藤野先生會批改。佢有乜可能日文會差？咪撚玩。當然而家你拎出嚟驗屍咁驗挑錯誤就好易的。等於你睇慢鏡覺得「屌，畀著我就右腳控定扭過一個再左腳拉遠柱啦，咁射，仲話球王。」

21. 藤野先生，藤野嚴九郎嘅CV。十分守規矩，寫晒每份工幾錢人工。最後都係40 yen個月，有興趣可以對返當年物價。但魯迅月租都好似要8 yen，考慮到魯迅仲要只係一條友，亦唔會住得好，可見藤野先生唔算好高人工？

22. 《藤野先生》一文嘅初稿。當然只係複製品

23. 魯迅讀醫嘅時間表。有冇留意日日都上「獨逸語」？獨逸就係德意志。讀醫必修德文，因為啲字都係用德文。聞說去到而家都仲係好多醫學字用德文。所以魯迅當然都識啲德文，事實佢未去日本已經識啲。反而英文佢好坦白話自己係唔識的。

24. 成績表，特登放大畀你睇。因為有人以為魯迅成績太差，所以先作個故事出嚟話棄醫從文。後面會講，故事或者有啲創作，但魯迅成績，就肯定唔係好差。正如佢在《藤野先生》入面寫：「同學一百餘人之中，我在中間，不過是沒有落第」。睇返成績表，並無大話，幾十年後佢都冇呃自己。142人魯迅考68，正如佢講，唔係太雞又唔太好。考慮到佢係唯一一個留學生，又唔係細個學日文，又多課外活動，其實相當勁。不過正係佢最尊敬嘅藤野先生嗰科解剖學佢就肥咗。可能因為咁先幾廿年後慚愧寫返文講佢。

25. 不過亦留意，魯迅在畀友人書信中，亦提過在仙台讀醫，悶，死記，又多堂上，阻住佢啲「課外話動」（「校中功課，只求記憶，不須思索，修習未久，腦力頓錮。四年而後，恐如木偶人矣。」第二是課時太多，無暇搞譯述活動：「而今而後，只能修死學問，不能旁及矣，恨事！恨事！」）。可以見到佢並非讀得好開心，亦有點吃力。

26. 另外留意，全部成績示眾，邊有而家咁玻璃心。仲有，魯迅中游，已經係丙。唔係A* 人人first hon量化寬鬆

27. 走堂全部有紀錄。魯迅都有走過，唔知去咗邊。當時就冇人講「大學中學化」「學生唔上堂教嗰啲要檢討下」（不過我估而家醫學院都唔會有人走堂嘅可？）

28. 魯迅嘅transcript，仲有JUPAS personal statement，好求其架咋

29. 呢個就勁咯，唔止係麥高芬(http://bit.ly/33B8T7T) ，直頭係中國文學史嘅轉捩點。傳說中嘅，魯迅睇嘅仙台醫專幻燈片，亦即係村上春樹嘅明治神宮野球場養樂多燕子隊(http://bit.ly/34Jowvo) ，亦都係埃汾嘅......50萬琴行空姐（有機會再解呢個故事）

30. 但Fact check 一下，當年真係有放幻燈片，亦的確有講日俄戰爭，但冇魯迅講嘅行刑中國人。有可能係文學創作，或佢根本記錯咗。

31. 然後大家都知，根據魯迅所講，佢認為救人身體冇用，冇腦的話身體再強都係把托，佢認為成個民族頭腦都病咗，所以棄醫從文。讀咗一年半。臨走藤野先生仲畀咗張相佢，呢啲都在《藤野先生》有提。

32. 但恕我無禮，魯迅點解棄醫從文，仲係一個謎。佢成績唔係太差，但亦唔係好，拎獎學金基本上無望，呢個可能係原因。另外亦講過，佢讀醫讀得唔開心。仲有更奇怪嘅係，魯迅1906年3月退學，同年畀佢老母用「病危」做理由電報召返中國。同年7月佢就順老母意結埋婚。當中似乎係有啲嘢。更特別嘅係，佢結婚冇耐，又再去返日本，去到1909年先返中國教書。魯迅退學後當然冇返仙台，係在東京。到底做乜過乜？冇乜人知。只知章太炎流亡東京，魯迅有佢去屋企聽講。但冇可能係佢生活全部，況且章太炎都去到1908年先去日本，咁之前魯迅在東京做乜？冇人知。可能睇其他史料有，但我暫時唔見。聞說佢仲可以花天酒地，又有日本妹做女傭，仲資助埋細佬周作人在日本讀書。

33. Anyway，呢個「階段教室」（樓梯是也）係意外驚喜。係魯迅當年上課嘅地方。你網上睇嘅資料，包括睇項明生講，都話你知要預約，往往要成個星期甚至搞一個月。

34. 結果我嘅預約，就只係去嗰度寫個名。又，原本想寫University of Warwick，但唔識寫片假名，所以都係寫香港大學算。又，手眼協調差，啲字係咁上下。

35. 平時係鎖埋的，但我去嗰日根本冇人，任你點坐都得。

36. 魯迅和藤野先生。有人話似黃之鋒

37. 離開東北大學，仲有其他魯迅足跡。估下呢間係乜（雖然同魯迅無關）？

38. 其實就係學生嘅餐廳。十分抵食，不過我費事咁缺德去同人爭食，雖則人唔多，亦唔見話一定要學生先食得。

39. 又，當年在愛沙尼亞（仲要唔係Tallinn!) ，我都去學生飯堂食飯，罪過罪過。咩啫，咁完全唔見有其他地方有嘢食嘛，Tartu就係個大學城

40. 繼續，離開東北大學，景色依然靚。行多一陣（睇返我最上嘅地圖，中間冇注解嘅紅點），就會見到一個咁嘅東西

41. 就係魯迅在仙台讀書時，佢住嘅地方。不過而家乜都冇剩，得返呢碌柱。但有冇依稀記到左下角寫乜？係「郭沫若題」。其實之前呢度都只係得呢碌柱，後面有間屋，但係私人住宅，冇開放，而家間屋都冇埋

42. 不過，勁咯，原來起個魯迅紀念廣場。但2021年先完工，又有藉口再去仙台食牛舌。

43. 繼續行多半個鐘（！），就會去到仙台青葉山公園。呢個東西同魯迅無關，但順手講下，係五色沼。有乜特別？係日本花樣滑冰嘅發源地。最初就係德國人在呢度開始教日本人（冬天會結冰啦大佬），之後差不多所有日本嘅花樣滑冰選水，都係師承自仙台嘅呢班初代教練。

44. 而羽生結弦就正係仙台人。

45. 去到公園入面嘅仙台市博物館，一樣有魯迅像

46. 同埋魯迅碑

47. 留意上面寫嘅係日文。又係郭沫若
________________________________________
48. 講仙台遊歷講到呢度，之後係個人感想，唔鍾意可以跳走。

49. 最後講下（有冇人睇到呢度？），4年前，2015年 ，我先第一次去日本。2017年我去咗東京明治神宮野球場。上面講過了，明治神宮野球場係,村上春樹（至少佢係咁講）忽然決定要「寫啲嘢」嘅地方，資深村上春樹迷實知。我去嘅原因，十分明顯啦。然後去到2019年，我去埋仙台，在東北大學，去到魯迅（至少佢自己係咁講），決定棄醫從文嘅地方。兩大我心中嘅文學之神，影響我最大嘅作家，就係呢兩個。

50. 兩個都N咁多人寫過，但我都係要講，魯迅，係一個十分「型」嘅作家。就係村上春樹在《聽風的歌》(http://bit.ly/2DzFOPR) 虛構嘅 戴立克．哈德費爾（好多人以為真有此人，包括我）一樣，係以文章做為戰鬥武器的少數非凡作家之一。

51. 其他人可能都寫得好，但係唔型。錢鍾書都型，但其實老婆楊絳寫文比較「人性」。陶傑都型，但倪匡寫故事蔡瀾寫雜文更好。Oscar Wilde George Orwell都型。冰心就唔型，巴金亦都唔型。聞一多郁達夫型，徐志摩仲型，郭沫若如果死早啲就型，咁長命，搞到去中華人民共和國，就唔型。梁實秋胡適就唔型。白先勇都型，梁啟超唔型。太宰治同三島由紀夫就當然型過村上春樹，但講真村上春樹寫文最好。以上種種，自己慢慢細味下。

52. 簡單嚟講，短命咪型，死於非命就更好，live fast and die young。Heinrich Heine話頭，Sleep is good, death is better; but of course, the best thing would to have never been born at all．但佢除咗呢句嘢外就完全唔夠尼采或叔本華咁型。正如我無法想像「如果家駒未死」會點，請別誤會，我懷住最高嘅敬意講呢句嘢，真歌迷應該會明。

53. 當然總有例外，魯迅唔算太早死，村上春樹成日跑長跑有排都唔死，白先勇八十幾歲都未死，錢鍾書九十歲先死，楊絳百幾歲先死添。

54. 東京（神戶都有）尋找完村上春樹，仙台尋找完魯迅後，似乎下一個，就到白先勇。當然可能返Warwick尋找陶傑簡單啲 （但佢筆下近乎冇提過）。